ಕರ್ಫ್ಯೂ, ಲಾಕ್‌ಡಾವ್ನ್ … ಕಿತ್ಲೊ ತೇಂಪ್ ?

ಕರ್ನಾಟಕಾಂತ್ ಸವ್ಕಾಸ್ ತರೀ ಇಸ್ಕೊಲಾಂ –  ಕಾಲೆಜಿ ಸುರು ಜಾತಾತ್ ತಶೆಂ ದಿಸ್ತಾ. ಹ್ಯಾ ವರ್ವಿಂ ವಿದ್ಯಾರ್ಥಿಂಕ್ ಖುಶಿ ಆನಿ ಖಂತ್ ದೊನೀ ಸುರು ಜಾಲ್ಯಾ. ಫಕತ್ ಆನ್‌ಲೈನಿರ್ ಶಿಕಪ್ ಜೊಡುನ್ ಆಸ್‌ಲ್ಲ್ಯಾ ತಾಂಕಾಂ ಖಂಡಿತ್ ಕಾಂಟಾಳೊ ಆಯ್ಲಾ ಮ್ಹಣ್ಯೆತ್. ದುಸ್ರೆಂ ಆನ್‌ಲೈನ್ ಶಿಕ್ಪಾಕ್  ಸ್ಮಾರ್ಟ್ ಪೊನಾಂ ಆನಿ ಲ್ಯಾಪ್‌ಟಾಪ್ ಘೆಂವ್ಕ್ ದುಡ್ವಾದಾರಾಂಕ್ ಮಾತ್ ಸಾಧ್ಯ್ ಆಸಾ. ಮಧ್ಯಮ್ ವರ್ಗಿಯ್ ಲೋಕ್ ಆಪ್ಲ್ಯಾ ಭುರ್ಗ್ಯಾಂ ಖಾತಿರ್ ಕಿತೇಂಯ್ ಕರುಂಕ್ ತಯಾರ್ ಆಸಾ ಜಾಲ್ಲ್ಯಾನ್, ತಿತ್ಲೆ ಸಮಸ್ಯೆ ಜಾಯ್ನಾಂತ್. ಕಷ್ಟ್ ನಿಮ್ನ್ ಮಧ್ಯಮ್ ವರ್ಗ್ ಆನಿ ದುಬ್ಳ್ಯಾ ವರ್ಗಾಚ್ಯಾ ಲೊಕಾಚೆ. ತಾಣಿ ತಾಂಚ್ಯಾ ಭುರ್ಗ್ಯಾಂಕ್ ಸ್ಮಾರ್ಟ್ ಫೊನಾಂ ಆನಿ ಲ್ಯಾಪ್‌ಟೊಪಾಂ ಹಾಡ್ನ್ ದಿಂವ್ಚಿಂ ತರೀ ಖಂಯ್ ಥಾವ್ನ್ ?

ಆಜ್ ಕಾಲ್,  ಸ್ಮಾರ್ಟ್ ಫೊನಾಂಯ್ ಕಾಂಯ್ ಉಣ್ಯಾ ಮೊಲಾಚಿಂ ಘೆವ್ನ್ ಫಾಯ್ದೊನಾ. ಚಡಾವತ್ ಉಣ್ಯಾಮೊಲಾಚಿಂ ಸ್ಮಾರ್ಟ್ ಫೊನಾಂ,  ವಾಪಾರಾ ಆನಿ ಉಡಯಾ ಮ್ಹಳ್ಳ್ಯಾ ಖಾಸ್ತಾಚಿಂ. ದುರುಸ್ತ್ ಜಾಂವ್ಕ್ ಬಿಲ್ಕುಲ್ ಆಯ್ಕಾನಾಂತ್. ಹ್ಯಾ ಕಾರಣಾಕ್ ಲಾಗೊನ್  ಆಜ್ ಇಸ್ಕೊಲಾಕ್ ವಚಾಜಯ್ ಜಾಲ್ಲಿಂ ಭುರ‍್ಗಿಂ ಹಳ್ಳ್ಯಾಂನಿ ಕೃಷೆಚಾ ಕಾಮಾಂತ್ ಘೊಳೊಂಕ್ ಪಾವ್ಲ್ಯಾಂತ್. ಜಾಯ್ತ್ಯಾ ಲ್ಹಾನ್ ಪ್ರಾಯೆಚ್ಯಾ ಭುರ‍್ಗ್ಯಾಂಕ್ ಕಾಜಾರ್ ಕರುನ್ ಧಾತಾರಾಂ ಆಪ್ಲ್ಯಾ ಖಾಂದಾ ವಯ್ಲೆಂ ವೊಜೆಂ ದೆಂವಯ್ತ್ತಾತ್. ಥೊಡ್ಯಾ ಭುರ್ಗ್ಯಾಂನಿ ಫಕತ್ ಫೊನಾಕ್ ಲಾಗುನ್ ಜಿವ್ಘಾತ್ ಕರ್ನ್ ಘೆತ್ಲ್ಯಾತ್.

ದುಸ್ರಿ ಗಜಾಲ್, ಆನ್‌ಲೈನ್ ಶಿಕ್ಪಾಚ್ಯಾ ತುಲನಾಂತ್, ಉಗ್ತ್ಯಾ ಕ್ಲಾಸಿಂನಿ ಮೆಸ್ತ್ರಿಂನಿ ಶಿಕಂವ್ಚೆಂ ಲಿಸಾಂವ್ ಶಿಕೊಂಕ್ ಅಂವಡ್ತಾ ಮಾತ್ ನಯ್,  ಭುರ‍್ಗಿಂ ಆಪುರ‍್ಬಾಯೆನ್ ಶಿಕ್ತಾತ್. ಇಸ್ಕೊಲಾಂತ್ ಫಕತ್ ಶಿಕಪ್ ಮಾತ್ ನಯ್, ಖೆಳ್, ಸಾಂಸ್ಕೃತಿಕ್ ಚಟುವಟಿಕೊ, ವೆಕ್ತಿತ್ವ್ ವಿಕಸನಾಕ್ ಜಾಯ್ತೆ ಅವ್ಕಾಸ್ ಲಾಭ್ತಾತ್. ಪೂಣ್ ಘರಾ ಭಿತರ್ ಬಸೊನ್ ಕಂಪ್ಯೂಟರಾ ಮುಕಾರ್ ಬಸೊನ್ ಕಿತ್ಲಿಂ ಲಿಸಾಂವಾಂ ಆಯ್ಕೊನ್, ಬರವ್ನ್ ಘೆತ್ಲ್ಯಾರೀ, ಜಿವಾಕ್ ಆನಿ ಮನಾಕ್ ಕಸ್ಲ್ಯೊಯಿ ಚಟುವಟಿಕೊ ನಾಸ್ತಾನಾ, ಭುರ‍್ಗಿಂ ಆಳ್ಮಿಂ ಜಾತಾತ್ ಮಾತ್ ನಯ್,  ತಾಂಚಿ ಮತ್ ಜಾಯ್ ತ್ಯಾ ಮಾಪಾನ್ ವಿಕಸಿತ್ ಜಾಯ್ನಾ. ಮಾನಸಿಕ್ ಸಮಸ್ಯೆ ಚಡ್ತಾತ್. ಹ್ಯಾ ವಿಶಿಂ ಸಂಬಂಧ್ ಜಾಲ್ಲ್ಯಾ ಅಧಿಕಾರಿ ಆನಿ ಸರ್ಕಾರಾನ್ ಗುಮಾನ್ ದಿಂವ್ಚಿ ಗರ್ಜ್ ಆಸಾ. ಫಾವೊತಿ ಚತ್ರಾಯ್ ಘೆವ್ನ್ ಎಎಕಾ ಕ್ಲಾಸಿಂತ್ 30 ವಿದ್ಯಾರ್ಥಿಂ ಬದ್ಲಾಕ್ 15 ವಿದ್ಯಾರ್ಥಿಂ ಲೆಕಾನ್ ಬಸವ್ನ್ ಕೋವಿಡ್ ನಿಯಾಮಾಂ ಪಾಳ್ಳ್ಯಾರ್ ಖಂಡಿತ್ ಜಾವ್ನ್ ಕಸಲ್ಯಾಚ್ ಅಪಾಯಾವಿಣೆಂ ಭುರ‍್ಗ್ಯಾಂಚೆಂ ಶಿಕಪ್ ಬರ‍್ಯಾನ್ ಚಲವ್ಯೆತ್. ವಾ ದೋನ್ ಪಂಗಡ್ ಕರ್ನ್ ದೋನ್ ದಿಸಾಂಕ್ ಏಕ್ ಪಾವ್ಟಿಂ ತರೀ ಭುರ್ಗ್ಯಾಂಕ್ ಇಸ್ಕೊಲಾಕ್ ಆಪವ್ಯೆತ್. ಘರಾ ಭಿತರ್  ಬಸೊನ್ ಶಿಕ್ಚ್ಯಾ ಭುರ‍್ಗ್ಯಾಂಕ್ ಭಲಾಯ್ಕೆ ಸಂಬಂಧಿ ಸಮಸ್ಯೆ ಉಬ್ಜಾಲ್ಲೆ ದಾಕ್ಲೆ ಚಡೊನ್ ಆಸಾತ್. ಕೊರೊನಾ ಸಾಂಕ್ರಮಿಕಾ ಥಾವ್ನ್ ವಿದ್ಯಾರ್ಥಿಂಕ್ ಬಚಾವ್ ಕರ್ಚೆ ಖಾತಿರ್ ಇಸ್ಕೊಲಾಂ ಸುರು ಕರಿನಾಸ್ತಾನಾ ರಾಂವ್ಚೆಂ ಅರ್ಥಾಹೀನ್ ಜಾವ್ನಾಸಾ, ಕೊರೋನಾ ಭುರ್ಗ್ಯಾಂಕ್ ಬಾದಕ್ ಕರಿನಾ ಮ್ಹಣ್ ತಜ್ಞ್ ವಯ್ಜ್ ಪರತ್ ಪರತ್ ಸಾಂಗೊನ್ ಆಸಾತ್.

ಭುರ‍್ಗ್ಯಾಂಚಾ ಆಂಗಾಂತ್ ಪ್ರತಿರೋಧಕ್ ಸಕತ್ ಬರ್ಫೂರ್ ಆಸ್ತಾ ಜಾಲ್ಲ್ಯಾನ್ ತಾಂಕಾಂ ವೊಸೊ ಲಾಗಾನಾ. ಹಜಾರಾಂತ್ ಕಾಂಯ್ ಏಕ್ ದೋನ್ ಪ್ರಕರಣಾಂ ಮೆಳ್ತಿತ್ ಮ್ಹಣ್ ತಜ್ಞಾಂನಿ ದಾಂಬೂನ್ ಸಾಂಗ್ಲಾಂ ಆಸ್ತಾಂ, ಕೊಲೆಜ್ ಶಿಕಪ್ ಆರಂಭ್ ಕೆಲ್ಯಾ ಉಪ್ರಾಂತ್ ಚಡ್ ಗಳಾಯ್ ಕರಿನಾಸ್ತಾನಾ ಪ್ರಾಥಮಿಕ್, ಮಾಧ್ಯಮಿಕ್ ಇಸ್ಕೊಲಾಂಯ್ ಸುರು  ಕರುನ್ ವಾಟ್ ಚುಕೊನ್ ವೆಚ್ಯಾ ಭುರ‍್ಗ್ಯಾಂಗ್ ಮೌಲಿಕ್ ಶಿಕ್ಪಾ ಥಂಯ್ ಪಾಟಿಂ ಹಾಡ್ಚಿ ಗರ್ಜ್ ಆಸಾ.

ಕೊರೊನಾ ವೊಸ್ಯಾಚಿ ವೆಗಿಂಚ್ಯಾಕ್ ಆಳ್ವೊಂಚಿಂ ಖುಣಾಂ ದಿಸಾನಾಂತ್. ಜಶೆಂ ಸಂಸಾರಾ ಹೆರ್ ಸಾಂಕೃಮಿಕ್ ಪಿಡಾ ಸುರು ಜಾಲ್ಲ್ಯೊ, ಸುರು ಜಾತಾನಾ ಲೊಕಾಂಚೊ ಜೀವ್ ಘೆತ್ಲೊ ಆನಿ ಉಪ್ರಾಂತ್ ಹಾಂಗಾಚ್ ಆಸಾತ್ ಸಂಪೂರ್ಣ್ ನಾಸ್ ಜಾಂವ್ಕ್ ನಾಂತ್ ತಶೆಂ ಕೊರೊನಾಯಿ ಅನಿಕೀ ಥೊಡೊ ತೇಂಪ್ ಲೊಕಾಂಕ್ ಭೆಷ್ಟಾವ್ನ್ ಆಸ್ತೆಲಿ. ತಿತ್ಲ್ಯಾರ್ ಕೋಣ್ ನಾ ಕೋಣ್ ವಿಗ್ಯಾನಿ ಹ್ಯಾಯ್ ಪಿಡೆಕ್ ಶಾಶ್ವತ್ ವಕಾತ್ ಸೊಧುನ್ ಕಾಡ್ತಲೊ ಆನಿ ಮನ್ಶ್ಯಾಕುಳಾಕ್ ರಾಕ್ತಾಲೊ.

ಜರ್ತರ್ ಆಮಿ ಘಟ್ ಠರಾಯ್ಲ್ಯಾರ್ ಹಿ ಪಿಡಾ ಪಯ್ಸ್ ದವರ್ಯೆತ್. ಖಾಸ್ಗಿ ತಶೆಂ ಸಮಾಜಿಕ್ ನಿತಳಾಯ್, ಸಮಾಜಿಕ್ ಅಂತರ್, ಮಾಸ್ಕ್, ಭಾಯ್ರ್ ಥಾವ್ನ್ ಘರಾ ಆಯ್ಲ್ಯಾ ಉಪ್ರಾಂತ್ ಹಾತ್ ಪಾಯ್ ದುಂವ್ಚೆ ಯಾ ನ್ಹಾಣ್ ಘೆವ್ನ್ ನಿತಳ್ ಜಾಂವ್ಚೆಂ, ಘರಾಂತ್ ಆಸ್‌ಲ್ಲ್ಯಾಂನಿ ಚತ್ರಾಯ್ ಸಾಂಬಾಳ್ಚಿ … ಇತ್ಯಾದಿ ಗರ್ಜೆಚೆಂ. ಶೆಳ್, ಖೊಂಕ್ಲಿ, ನಾಕ್ ವ್ಹಾಂವ್ಚೆಂ ಚಡಾವತ್ ಪಾವ್ಸಾಂತ್ ಚಡ್. ಸುರು ಜಾಲ್ಲೆಂಚ್  ಕೊವಿಡ್ ಮ್ಹಣ್ ಭಿಯೆನಾಸ್ತಾನಾ ಘರ್ಚ್ಯಾ ಸಾಂಬಾರಾಂತ್ಲ್ಯೊ ವಸ್ತು ವಾಪ್ರುನ್ ಕಸಾಯ್ ಕರ್ನ್ ಪಿಯೆಜಾಯ್. ಶೆಳ್ ತಾಪ್ ಸುರು ಜಾಲ್ಯಾರ್ ಸಳ್ಸಳ್ಯಾ ಉದ್ಕಾಚಿ ವಾಫ್ ಘೆತ್ಲ್ಯಾರ್ ಬೋವ್ ಬರೆಂ.

ಆತಾಂ ಕೊವಿಡ್ 19ಚೊ ತಿಸ್ರೊ ಅವ್ತಾರ್, ಡೆಲ್ಟಾ+ ದಾರಾರ್ ಉಬೊ ಆಸಾ ಮ್ಹಣ್ತಾತ್. ದುಸ್ರೊ ಆವ್ತಾರ್‌ಚ್ ಅಜೂನ್ ಪುರ್ತೊ ಸಂಪೊಂಕ್ ನಾ. ಮಾದ್ಯಮಾಂನಿ ತಿಸ್ರ್ಯಾ ಅವ್ತಾರಾವಿಶಿಂ ಭೆಶ್ಟಾಂವ್ಕ್ ಸುರು ಕೆಲಾಂ.  ಕೊವಿಡ್ ನಿಯಂತ್ರಣಾಂತ್ ಕೇರಳ್ ರಾಜ್ಯ್ ನಂಬರ್ ವನ್ ಮ್ಹಣ್ ಥೊಡ್ಯಾ ತೆಂಪಾ ಆದಿಂ ಪುಕಾರ್ಲೆಲೆಂ.  ಆತಾಂ ತ್ಯಾಚ್ ಕೇರಳಾಂತ್ ಪರ್ತ್ಯಾನ್ ಸಂಕೊ ಚಡೊನ್ ಯೆತಾ. ಪಾಟ್ಲ್ಯಾ ದಿಸಾಂನಿ ಈದ್ ಪರ್ಬೆ ವೆಳಾರ್ ತೀನ್ ದಿಸಾಂ ಖಾತಿರ್ ನಿಯಂತ್ರಣಾಂತ್ ಸದಿಳಾಯ್ ದೀಜಾಯ್ ಮ್ಹಣ್ ಸಮುದಾಯಾನ್ ಸರ್ಕಾರಾಕ್ ವಿಚಾರ್‌ಲ್ಲೆಂ ಆನಿ ಸರ್ಕಾರಾನ್ ತಾಂಚ್ಯಾ ವಿನವ್ಣೆಕ್ ಮಾನ್ಯತಾ ದೀವ್ನ್ ತೀನ್ ದಿಸಾಂಚಿ ಸದಿಳಾಯ್ ದಿಲ್ಲಿ ಆನಿ ಗಡ್ದಿ ಜಾಲ್ಲಿ. ಆತಾಂ ಕೇಂದ್ರ್ ಸರ್ಕಾರಾನ್ ಕೊವಿಡ್ ವಿಶ್ಲೇಸಜ್ಞ್ ದಾಕ್ತೆರಾಂಚೊ ಆನಿ ವಾವ್ರಾಡ್ಯಾಂಚೊ ಏಕ್ ಪಂಗಡ್ ಕೇರಳ ಧಾಡ್ಲಾ.

ದಶೆಂಬ್ರಾ ಭಿತರ್ ಆಖ್ಖ್ಯಾ ಭಾರತಾಂತ್ಲ್ಯಾ ಪರ್ಜೆಕ್ ವ್ಯಾಕ್ಸಿನಾಂ ದಿತೆಲ್ಯಾಂವ್ ವ್ಹಣ್ ಸರ್ಕಾರಾನ್ ಸಾಂಗ್‌ಲ್ಲೆಂ. ಪುಣ್ ಆತಾಂ ಪಾಟ್ಲ್ಯಾ ಆಟ್ ಮಯ್ನ್ಯಾಂನಿ 52% ಲೊಕಾಂಕ್ ಮಾತ್ರ್ ವ್ಯಾಕ್ಸಿನ್ ಲಾಬ್ಲಾಂ. ಆನಿಕೀ 48% ಲೊಕಾಂಕ್ ವ್ಯಾಕ್ಸಿನ್ ಜಾಯ್.  ಪುಣ್ ವ್ಯಾಕ್ಸಿನಾಂಚೆಂ ಉತ್ಪನ್ನ್ ಉಣೆ ಜಾಲಾಂ. ಹಜಾರಾಂನಿ ಲೋಕ್ ಸದಾಂ ವ್ಯಾಕ್ಸಿನಾಕ್ ಲೈನಿರ್ ರಾವೊನ್ ಪಾಟಿಂ ವ್ಹೆತಾ! ಏಕ್ ದೋನ್ ಕಂಪೆನ್ಯಾಂನಿ ಮಾತ್ರ್ ವ್ಯಾಕ್ಸೀನ್ ಉತ್ಪನ್ನ್ ಜಾತಾ ಖಂಯ್. ಕಿತ್ಯಾಕ್ ಹೆರ್ ವಕ್ತಾಂ ಕಂಪೆನ್ಯಾಂಕ್ ಪರ್ವಣ್ಗಿ ದೀವ್ನ್ ವ್ಯಾಕ್ಸಿನಾಂಚೆಂ ಉತ್ಪನ್ನ್ ವಾಡಂವ್ಕ್ ನಜೊ? ಸರ್ಕಾರಾ ಲಾಗಿಂ ದುಡು ನಾ? ಯಾ ಆಸ್‌ಲ್ಲ್ಯಾಂತ್ ಆನಿ ಮೆಳ್‌ಲ್ಲೆ ಪ್ರಮಾಣೆ ಸುದಾರ್ಸುಂಚೆಂ ಮ್ಹಣ್ ಸರ್ಕಾರ್ ಚಿಂತಾ? ಸರ್ಕಾರಾ ಥಾವ್ನ್ ಹೆಂ ನಿರ್ಲಕ್ಷ್‌ಪಣ್ ಬೆಜಾರಾಯೆಚೆಂ. ಆಪ್ಲ್ಯಾ ಪರ್ಜೆಚೆರ್ ಸರ್ಕಾರಾಚೊ ನಿರ್ಲಕ್ಷ್ಯ್ ಕಿತ್ಲೊ ಮ್ಹಳ್ಯಾರ್ ಹರ್ ನಾಗರಿಕಾಕ್ ಮುಫ್ತ್ ವ್ಯಾಕ್ಸೀನ್ ಮೆಳ್ಚೆಪರಿಂ ಪಳಯಾ ಮ್ಹಣ್ ಸುಪ್ರ‍ಿಮ್ ಕೋಡ್ತಿನ್ ಸರ್ಕಾರಾಕ್ ಸಾಂಗಾಜಾಯ್ ಪಡ್ಲೆಂ. ದೇಶಾಚಾ ಪರ್ಜೆಚೆಂ ಬರೆಪಣ್ ಪಳಯ್ಜೆ ಜಾಲ್ಲೊ ಸರ್ಕಾರ್ ಆಜ್ ಫಕತ್ ರಾಜಕೀ ಘಡಾಮೊಡಿಂನಿಂಚ್ ಚಡ್ ಮಗ್ನ್ ಜಾವ್ನ್ ಗೆಲಾ ಶಿವಾಯ್, ದುಸ್ರೆಂ ಕಿತೆಂಚ್ ಕರುಂಕ್ ವಚಾನಾ. ಹ್ಯಾ ಪರಿಂ ಜವಾಬ್ದಾರಿ ವಿಸ್ರೊಂಚ್ಯಾ ಸರ್ಕಾರಾಕ್ ಕಿತೆಂ ಮ್ಹಣೊಂಕ್ ಫಾವೊ?

►  ನವೀನ್ ಕುಲ್ಶೆಕರ್