ಸಾಂತಿಪಣಾಚೆ ವಾಟೆರ್ ಆಸ್ಚೊ ಆಮ್ಚೊ ಪಾದ್ರ್ಯಾಬ್ ಹ್ಯಾಚ್ ನಾಂವಾನ್ ಲೊಕಾಮನಾಂತ್ ಆಪ್ಲೆಂ ನಾಂವ್ ವೊಂಪುನ್ ಗೆಲ್ಲೊ ಕಾಪುಚಿನ್ ಯಾಜಕ್ ಬಾ| ಆಲ್ಫ್ರೆಡ್ ರೋಚ್ ಹಾಂಕಾ, ಅಗೋಸ್ತ್ 15 ವೆರ್ ತಾಂಚಿ ಸಮಾದಿ ಆಸ್ಚ್ಯಾ ಬ್ರಹ್ಮಾವರ್ ಭಾಗೆವಂತ್ ಕುಟ್ಮಾಚ್ಯೆ ಫಿರ್ಗಜೆಂತ್ ಉಡುಪಿ ದಿಯೆಸೆಜಿಚೊ ಧರ್ಮಾಧ್ಯಕ್ಷ್ ಅ| ಮಾ| ದೊ| ಜೆರಾಲ್ಡ್ ಐಸಾಕ್ ಲೋಬೊ, ಸಕಾಳಿಂಚ್ಯಾ 8.00 ವ್ಹರಾಂಚೆರ್ ಸಂಭ್ರಮಿಕ್ ಮಿಸಾಚ್ಯಾ ಪವಿತ್ರ್ ಬಲಿದಾನಾ ವೆಳಾರ್ ದೆವಾಚೊ ಸೆವಕ್ ಮ್ಹಣ್ ಪಾಚಾರ್ತಲೆ ಮ್ಹಣ್ ಬ್ರಹ್ಮಾವರ್ ಭಾಗೆವಂತ್ ಕುಟ್ಮಾಚ್ಯೆ ಫಿರ್ಗಜೆಚೊ ವಿಗಾರ್ ಮಾ| ಬಾ| ವಿಕ್ಟರ್ ಫೆರ್ನಾಂಡಿಸ್ ಹಾಣಿ ಕಳಯ್ಲಾಂ.

ಆಮ್ಚೊ ಪಾದ್ರ್ಯಾಬ್, ದಯಾಳಾಯೆಚೊ ಗೊವ್ಳಿ ಮ್ಹಣ್ ನಾಂವಾಡ್ಲಲೊ ಕಾಪುಚಿನ್ ಫ್ರಾದ್ ಬಾ| ಆಲ್ಫ್ರೆಡ್ ರೋಚ್ ಹಾಂಕಾ ಭಾಗೆವಂತ್ ಆನಿ ಸಾಂತ್ ಮ್ಹಣ್ ಪಾಚಾರ್ಚೆ ಉದೆಶಿಂ ಪ್ರಕ್ರಿಯಾ ಸುರ್ವಾತ್ ಕರುಂಕ್ ಕಾಪುಚಿನಾಂಚೊ ಜನರಲ್ ಪೊಸ್ಟುಲೇಟರ್ ಬಾಪ್ ಕಾರ್ಲೊ ಕಾಲ್ಲೊನಿ ಹಾಣೆಂ, ಕರ್ನಾಟಕ ಪವಿತ್ರ್ ತ್ರಿಂದಾದ್ ಕಾಪುಚಿನ್ ಪ್ರಾಂತಾಚೊ ವ್ಹಡಿಲ್ ಭೋ. ಮಾ. ಜೋನ್ ಅಲ್ವಿನ್ ಡಯಾಸಾ ಮುಕಾಂತ್ರ್ ಉಡುಪಿ ದಿಯೆಸೆಜಿಚ್ಯಾ ಧರ್ಮಾಧ್ಯಕ್ಷಾಲಾಗಿಂ ವಿನವ್ಣಿ ಕೆಲ್ಲಿ ಆಸುನ್ ಸಾಂತಿಪಣಾಚ್ಯೆ ಪ್ರಕ್ರಿಯೆಚೊ ಪಯ್ಲೊ ಹಂತ್ ಜಾವ್ನ್ ಅಗೊಸ್ತ್ 15 ವೆರ್, ಭಾಗೆವಂತ್ ಯಾಜಕ್ ಫ್ರಾದ್ ಆಲ್ಫ್ರೆಡ್ ರೋಚ್ ಹಾಂಕಾ ‘ದೆವಾಚೊ ಸೆವಕ್’ ಮ್ಹಣ್ ಪರ್ಗಟ್ಣಿ ಚಲ್ತಾ. ಹ್ಯಾ ಭಕ್ತಿಕ್ ಕಾರ್ಯಾಕ್ ಬಾ| ರೋಚಾಚ್ಯಾ ಅಭಿಮಾನಿಂಕ್ ಮೊಗಾಚೆಂ ಆಪವ್ಣೆಂ ಆಸಾ ಮ್ಹಣ್ ಫಿರ್ಗಜ್ ವಿಗಾರ್ ಮಾ| ಬಾ| ವಿಕ್ಟರ್ ಫೆರ್ನಾಂಡಿಸ್, ಉಪಾಧ್ಯಕ್ಷ್ ಮೈಕಲ್ ಪುರ್ಟಾಡೊ, ಕಾರ್ಯದರ್ಶಿ ಆಂಟನಿ ಬಾರ್ನೆಸ್, ಆಯೋಗಾಂಚೊಂ ಸಂಯೋಜಕ್ ರೋಬರ್ಟ್ ಲುವಿಸ್, ಫಿರ್ಗಜ್ ಗೊವ್ಳಿಕ್ ಮಂಡಳಿ ಆನಿ ಭಾಗೆವಂತ್ ಕುಟ್ಮಾಚಿ ಫಿರ್ಗಜ್, ಬ್ರಹ್ಮಾವರ್ ಹಾಂಗಾಚ್ಯಾ ದೇವ್‌ಪ್ರಜೆನ್ ಉಪ್ಕಾರ್ ಮಾಗ್ಲಾ.

ಬಾರ್ಕೂರ್ ಫಿರ್ಗಜೆಚ್ಯಾ ಮೂಡಾಡು ಗಾಂವಾಂತ್ ಜಲ್ಮೊನ್, ಆಮ್ಚ್ಯಾಚ್ ರಾಜ್ಯಾಂತ್ಯ್ಲಾ ಬ್ರಹ್ಮಾವರ್, ಬಿಣಗಾ, ಕಾಸರಕೋಡ್, ಫರಂಗಿಪೇಟ್ ಸುವಾತೆಂನಿ ದೆವಾಚೆಂ ಉತರ್ ಪರ್ಗಟ್ ಕರುನ್, ದುಬ್ಳ್ಯಾ – ಧಾಕ್ಟ್ಯಾಂಚ್ಯಾ ಗರ್ಜಾಂಕ್ ಪಾವೊನ್, 31 ಡಿಸೆಂಬರ್ 1996 ವೆರ್ ದೆವಾಚ್ಯಾ ರಾಜಾಂತ್ ಭರ್ತಿ ಜಾಲ್ಲ್ಯಾ ಆಮ್ಚೆ ಮಧೆಂ ಜಿಯೆಲ್ಲ್ಯಾ ಯಾಜಕಾಕ್ ಅಲ್ತಾರಿಚೊ ಮಾನ್ ಫಾವೊ ಜಾಂವ್ಚಿ ಗಜಾಲ್ ವರ್ತ್ಯಾ ಅಭಿಮಾನಾಚಿ ಅನಿ ಗವ್ರವಾಚಿ ದೆಕುನ್, ಬ್ರಹ್ಮಾವರ್ ಭಾಗೆವಂತ್ ಕುಟ್ಮಾಚ್ಯಾ ಫಿರ್ಗಜೆಂತ್ ಆಸ್ಚ್ಯಾ ತಾಂಚ್ಯಾ ಸಮಾದಿಥಳಾಕ್ ಭೆಟ್ ದೀವ್ನ್, ತಾಂಚೆ ಮಾರಿಫಾತ್ ಸರ್ವೆಸ್ಪರಾಲಾಗಿ ಉಪ್ಕಾರ್ ಮಾಗೊನ್, ಬರೆಂಪಣ್ ಜೊಡ್ಲೆಲ್ಯಾಂನಿ ಸಾಕ್ಸ್ ದೀವ್ನ್ ತಾಂಚ್ಯಾ ಸಾಂತಿಪಣಾಚ್ಯಾ ಪ್ರಕ್ರಿಯೆಂತ್ ಉರ್ಭೆನ್ ವಾಂಟೆಲಿ ಜಾಯ್ಜಯ್ ಮ್ಹಣ್ ಕರ್ನಾಟಕ ಪವಿತ್ರ್ ತ್ರಿಂದಾದ್ ಕಾಪುಚಿನ್ ಪ್ರಾಂತ್ಯಾಚಾ ವ್ಹಡಿಲಾಂನಿ ವಿನವ್ಣಿ ಕೆಲ್ಯಾ.

ಆಮ್ಚೊ ಪಾದ್ರ್ಯಾಬ್ ಬಾ| ಆಲ್ಫ್ರ‍ೆಡ್ ರೋಚಾವಿಶಿಂ

ಚಡಿತ್ ವಿವರ್, ಇ ಬೂಕ್ ವಾಚುಂಕ್ ಕ್ಲಿಕ್ ಕರಾ ►

Amcho Padryaab – Alfred Roche