“ಆಮಿ ಆಯ್ಕೊಂಚೆಂ ದೆವಾಚೆಂ ಉತರ್ ಜಾವ್ನಾಸಾ ಆಮ್ಚ್ಯಾ ಜಿವಿತಾಚೆಂ ಹಾತೆರ್. ದೆವಾಚ್ಯಾ ಉತ್ರಾಂಚೊಂ ಫರ್ಮಳ್ ಆನಿ ರೂಚ್ ಭುರ್ಗ್ಯಾಂ ಬಾಳಾಂಕ್ ಆಮಾಯ್ಚ್ಯಾ ವೊಂಟಿಯೆಂತ್ ಆಸ್ತಾನಾಂಚ್ ಪಾವಂವ್ಚೆಂ ಕಾಮ್ ಜಾಯ್ಜೆ” ಮ್ಹಣಾಲೊ ಅ| ಮಾ| ದೊ| ಪೀಟರ್ ಮಚಾದೊ, ಬೆಂಗ್ಳುರ್ ಆರ್ಚ್ ದಿಯೆಸೆಜಿಚೊ ಧರ್ಮಾಧ್ಯಕ್ಷ್. ತೋ ಬೆಂಗ್ಳುರ್ ಆರ್ಚ್ ದಿಯೆಸೆಜಿಚ್ಯಾ ಬೈಬಲ್ ಆಯೋಗಾನ್, ಫೆಡರೇಶನ್ ಒಫ್ ಕ್ಯಾಥೊಲಿಕ್ ಎಸೋಶಿಯೇಶನ್ಸ್ ( FKCA ) ಹಾಂಚ್ಯಾ ಜೋಡ್ ಆಸ್ರ್ಯಾಖಾಲ್ ಮಾಂಡುನ್ ಹಾಡ್ಲೆಲ್ಯಾ ಸಂಪೂರ್ಣ್ ಸುವಾರ್ತಾ ಪರ್ಗಟ್ಣಿ ಕೊಂಕಣಿ ಬೈಬಲ್ ಮ್ಯಾರಥಾನ್ ಕಾರ್ಯಾಚೆರ್ ಆಶೀರ್ವಚನ್ ಕರುನ್, ಕಾರ್ಯಾಕ್ ಚಾಲನ್ ದೀವ್ನ್ ಉಲಯ್ತಾಲೊ.
ಮುಂದರುನ್ ಅ| ಮಾ| ದೊ| ಪೀಟರ್ ಮಚಾದೊ ಹಾಣಿ ಮ್ಹಳೆಂ ” ಆಜ್ ಸಂತಾನ್ ಮಾಯೆಚೆಂ ಆನಿ ಸಾಂ. ಜೊಕಿಚೆಂ ಫೆಸ್ತ್. ಆಮ್ಕಾಂ ವರ್ತ್ಯಾ ದಬಾಜ್ಯಾಚೊ ದೀಸ್. ಆಯ್ಚೊ ದೀಸ್ ಆಮ್ಚ್ಯಾ ಆಮಾಯ್ಚೊ ಆನಿ ಬಾಪಯ್ಚೊ, ಮ್ಹಳ್ಯಾರ್ ಮಾಲ್ಘಡ್ಯಾಂಚೊಂ. ಆಮ್ಚ್ಯಾ ಪಾಪ್ ಸಾಯ್ಭಾನ್ ಕಾಲ್ಚೊ ದೀಸ್ ಆಜೊ – ಆಜಿಯಾಂಚೊ ದೀಸ್ ಮ್ಹಣ್ ಎದೊಳ್ಚ್ ಪಾಚಾರ್ಲಾ. ಆಯ್ಚ್ಯಾ ಹ್ಯಾ ದಿಸಾ ತುಮ್ಕಾಂ ಸರ್ವಾಂಕ್ ಫೆಸ್ತಾಚೆ ಶುಭಾಶಯ್ ಪಾಟಯ್ತಾನಾ, ಮಾಲ್ಘಡ್ಯಾಂ ಖಾತಿರ್, ಆಮ್ಚ್ಯಾ ಆಮಾಯ್ ಬಾಪಯ್ ಖಾತಿರ್ ಪ್ರತ್ಯೇಕ್ ಥರಾನ್ ಮಾಗೊಂಕ್ ಉಲೊ ದಿತಾಂ. ಪಾಪಾ ಫ್ರಾನ್ಸಿಸಾನ್ ಮ್ಹಳ್ಳೆಂ ಆಸಾ ‘ಭುರ್ಗ್ಯಾಚಿ ಪಯ್ಲಿ ದೊತೊರ್ನ್ ಜಾವ್ನಾಸಾ ಆವಯ್ಚ್ಯಾ ವೊಂಟಿಯೆರ್ ಆಯ್ಕಾಲ್ಲೆಂ ದೆವಾಚೆಂ ಉತರ್’ ದೆಕುನ್ ವ್ಹಡಿಲಾಂಲಾಗಿಂ ಹಾಂವ್ ಮಾಗ್ತಾಂ ಭುರ್ಗ್ಯಾ ಬಾಳಾಂಕ್ ತುಮ್ಚ್ಯಾ ಉಸ್ಕ್ಯಾರ್ ಆಸ್ತಾನಾಂಚ್ ದೆವಾಚ್ಯಾ ಉತ್ರಾಚಿ ರೂಚ್ ಚಾಕೊಂಕ್ ದಿಯಾ. ದೆವಾಚೆಂ ಉತರ್ ಆಮ್ಚ್ಯಾ ಜಿವಿತಾಕ್ ಘಟಾಯ್ ದಿಂವ್ಚೆ ಬರಾಬರ್, ಆಮ್ಚ್ಯಾ ಜಿವಿತಾಚಿ ಬುನ್ಯಾದ್ ಘಾಲ್ತಾ. ಆಮ್ಚ್ಯಾ ಮೆಟಾಂಕ್ ವಾಟ್ ದಾಕಯ್ತಾ. ಥೊಡೆಪಾವ್ಟಿಂ ದೆವಾಚೆಂ ಉತರ್ ಸಮ್ಜೊಂಕ್ ಕಶ್ಟ್ ಮಾರ್ತಾತ್. ಫೂಣ್ ಆಮಿ ತೆಂ ಆಯ್ಕೊಂಕ್ ಆಳ್ಸಾಯ್ ಕರುಂಕ್ ನಜೊ. ಬಗಾರ್ ಆಮಿ ಸಾಮ್ವೆಲಿಪರಿಂ ಮ್ಹಣೊಂಕ್ ಜಾಯ್ ‘ಉಲಯ್ ಸೊಮ್ಯಾ ಆಯ್ಕಾತಾ ತುಜೊ ಸೆವಕ್.”
ದಾಕ್ಲ್ಯಾಭರಿತ್ ಪಯ್ಲೆಂ ಬೈಬಲ್ ಮ್ಯಾರಥಾನ್ ಮಾಂಡುನ್ ಹಾಡ್ಲೆಲ್ಯಾ ಬೈಬಲ್ ಆಯೋಗಾಚ್ಯಾ ಮುಕೆಲ್ಯಾಂಕ್, ದೆವಾಚೆಂ ಉತರ್ ಪರ್ಗಟ್ ಕರ್ಚ್ಯಾ 48 ಪರ್ಗಟ್ಣಾರಾಂಚೆರ್, ತಾಂತ್ರಿಕ್ ಶಿಬಂದೆಚೆರ್ ಆನಿ ಎಡ್ಮಿನಾಂಚೆರ್ ವಿಶೇಸ್ ಬೆಸಾಂವಾಂ ಮಾಗೊನ್ ಅ| ಮಾ| ದೊ| ಮಚಾದೊ ಮ್ಹಣಾಲೊ ” ದೆವಾಚೆಂ ಉತರ್ ಉಚಾರ್ಚೆಂ, ದೆವಾಚೆಂ ಉತರ್ ಆಯ್ಕೊಂಚೆಂ ಆಮಿ ಸರ್ವ್ ಭಾಗಿ ಜಾವ್ನಾಸಾಂವ್. ತಶೆಂಚ್ ದೆವಾಚ್ಯಾ ಉತ್ರಾಂ ಫರ್ಮಾಣೆ ಜಿಯೆಂವ್ಚೆ ವ್ಹರ್ತೆ ಭಾಗಿ ಜಾವ್ನಾಸಾತ್. ಆನಿ ಹೆಂ ಭಾಗ್ ಸಗ್ಳ್ಯಾ ಸಂಸಾರಾಚೆಂ ಜಾಂವ್”
ಆಶೀರ್ವಚನಾ ಉಪ್ರಾಂತ್ ಧರ್ಮಾಧ್ಯಕ್ಷ್ ಮಚಾದೊ ಹಾಣಿ ಉತ್ಪತ್ತಿ ಗ್ರಂಥಾಂತ್ಲೊ ಏಕ್ ಅಧ್ಯಾಯ್ ವಾಚುನ್ ಕೊಂಕ್ಣಿ ಬೈಬಲ್ ಮ್ಯಾರಥಾನಾಕ್ ಅಧಿಕೃತ್ ಥರಾನ್ ಚಾಲನ್ ದಿಲೆಂ.
ಸಕಾಳಿಂಚ್ಯಾ ಸಾಡೆ ಆಟ್ ವೊರಾಂಕ್ ಸುರು ಜಾಲ್ಲ್ಯಾ ಕಾರ್ಯಾವಳಿಕ್ ಬೈಬಲ್ ಆಯೋಗಾಚಿ ಕಾರ್ಯದರ್ಶಿ ಮಾ| ಭ| ವರ್ಜೀನಿಯಾ ರಾಜಕುಮಾರಿ ಹಿಣೆ ಪ್ರಸ್ತಾವನ್ ದಿಲೆಂ. ಆಪ್ಲ್ಯಾ ಪ್ರಸ್ತಾವನಾಂತ್ ಹೆಂ ಏಕ್ ಭಕ್ತಿಕ್ ಕಾರ್ಯೆಂ ಜಾವ್ನಾಸೊನ್ ದೆವಾಚ್ಯಾ ಉತ್ರಾಂಚೆಂ ಬಳ್ ಆಮ್ಚೆಲಾಗಿಂ ಸದಾಂಚ್ ಆಸ್ಲ್ಯಾರ್ ಸಯ್ತಾನಾಕ್ ಪಯ್ಸ್ ಧಾಂವ್ಡಾವ್ಯೆತ್ ಮ್ಹಣ್ ತಿ ಮ್ಹಣಾಲಿ.
ಪ್ರಾಸ್ತಾವಿಕ್ ಜಾವ್ನ್ ಉಲವ್ನ್ ಬೆಂಗ್ಳುರ್ ಆರ್ಚ್ ದಿಯೆಸೆಜಿಚೊ ಲೋಕ್ ಸಂಪರ್ಕ್ ಅಧಿಕಾರಿ ಮಾ| ಬಾ| ಫಾವುಸ್ತಿನ್ ಲೋಬೊ ಹಾಣಿ ಮ್ಹಳೆಂ ” ದೆವಾಚೆಂ ಉತರ್ ಜಾವ್ನಾಸಾ ದೋನ್ ಧಾರಿಂಚ್ಯಾ ತಲ್ವಾರಿಪರಿಂ. ದೆವಾಚ್ಯಾ ಉತ್ರಾಚೆರ್ ಆಪ್ಲೆಂ ಜಿವಿತ್ ಬಾಂದುನ್ ಹಾಡ್ತಾ ತೋ ಮನಿಸ್ ಖಡ್ಪಿ ಸುವಾತೆರ್ ಬುನ್ಯಾದ್ ಘಾಲ್ನ್ ಘರ್ ಬಾಂದ್ತಾ ತಸಲ್ಯಾ ಬುದ್ವಂತಾಪರಿಂ. ದೆಕುನ್ ದೆವಾಚೆಂ ಉತರ್ ವಾಚ್ಚೆಂ, ಆಯ್ಕೊಂಚೆಂ, ನಿಯಾಳ್ಚೆಂ ಆನಿ ಆಮ್ಚ್ಯಾ ಜಿಣ್ಯೆಂತ್ ಪಾಳ್ಚೆಂ ಜಾವ್ನಾಸಾ ಆಮ್ಕಾಂ ವರ್ತ್ಯಾ ಫಾಯ್ದ್ಯಾಚೆಂ. ಪಯ್ಲೆ ಪಾವ್ಟಿಂ ಬೆಂಗ್ಳುರ್ ಆರ್ಚ್ ದಿಯೆಸೆಜಿಚ್ಯಾ ಬೈಬಲ್ ಆಯೋಗಾನ್ ಮಾಂಡುನ್ ಹಾಡ್ಲ್ಲೆಂ ಬೈಬಲ್ ಮ್ಯಾರಥಾನಾನ್ ಆಮ್ಕಾಂ ಅಸಲೊ ಏಕ್ ಫಾಯ್ದೊ ಜೊಡುನ್ ಘೆಂವ್ಕ್ ಅವ್ಕಾಸ್ ಕರುನ್ ದಿಲಾ. ಹೆಂ ಏಕ್ ಭಕ್ತಿಕ್ ಕಾರ್ಯೆಂ ಜಾಲ್ಲ್ಯಾನ್ ದೇವ್ ತಾಚ್ಯಾ ಉತ್ರಾಂ ಮುಕಾಂತ್ರ್ ಆಮ್ಚೆಲಾಗಿಂ ಖುದ್ ಹ್ಯಾ 48 ಪರ್ಗಟ್ಣಾರಾಂ ಮುಕಾಂತ್ರ್ ಉಲಯ್ತಾ ಮ್ಹಳ್ಳೆಂ ಮತಿಂತ್ ಘೆವ್ನ್ ಹ್ಯಾ ಕಾರ್ಯಾಂತ್ ಆಮಿ ವಾಂಟೆಲಿ ಜಾವ್ಯಾಂ “
ಹ್ಯಾ ಸಂದರ್ಭಿಂ ಮಾ| ಬಾ| ಫಾವುಸ್ತಿನ್ ಲೋಬೊ ಹಾಣಿ 26 ಜುಲಾಯ್ ಪಾಸುನ್ 31 ಜುಲಾಯ್ ಪರ್ಯಾಂತ್ ಚಲ್ಚ್ಯಾ ಕೊಂಕ್ಣಿ ಬೈಬಲ್ ಮ್ಯಾರಥಾನಾಚಿ ಮಟ್ವ್ಯಾನ್ ಒಳಕ್ ಕರುನ್ ದಿಲಿ ಆನಿ ಮಾರ್ಗದರ್ಶನ್ ದಿಲ್ಲ್ಯಾ ಧರ್ಮಾಧ್ಯಕ್ಷಾಚೊ, ಬೈಬಲ್ ಆಯೋಗಾಚ್ಯಾ ಸಾಂದ್ಯಾಂಚೊಂ ತಶೆಂಚ್ ವ್ಹರ್ತಿ ಉಮೆದ್ ಘೆವ್ನ್ ಭಕ್ತಿಕ್ ಕಾರ್ಯೆಂ ಮಾಂಡುನ್ ಹಾಡುಂಕ್ ಸಾಂಗಾತಾ ಆಯಿಲ್ಲ್ಯಾ ಫೆಡರೇಶನಾಚೊ ಆನಿ ಪಾಟಿಂಬೊ ದಿಂವ್ಚ್ಯಾ ಮಾದ್ಯಮಾಂಚೋಯ್ ಉಪ್ಕಾರ್ ಭಾವುಡ್ಲೊ.
ಹ್ಯಾ ಸಂದರ್ಭಿಂ ಫೆಡರೇಶನಾಚೊ ಅಧ್ಯಕ್ಷ್ ಸಿಲ್ವಿಯನ್ ನೊರೊನ್ಹಾ, ಬೈಬಲ್ ಆಯೋಗಾಚೊ ಸಹ ಕಾರ್ಯದರ್ಶಿ ನೈಜಿಲ್ ಫೆರ್ನಾಂದ್ , ಫೆಡರೇಶನಾಚೊ ಲೋಕ್ ಸಂಪರ್ಕ್ ಅಧಿಕಾರಿ ಗೊಡ್ವಿನ್ ಕಾಸ್ತೆಲಿನೊ, ವಾಮಂಜೂರ್ ಹಾಜರ್ ಆಸ್ಲೆ.
ಹೆಂ ಭಕ್ತಿಕ್ ಕಾರ್ಯೆಂ ಬೆಂಗ್ಳುರ್ ಆರ್ಚ್ ದಿಯೆಸೆಜಿಚ್ಯಾ ಯು ಟ್ಯೂಬ್ ಚ್ಯಾನೆಲಾರ್ ಆತಾಂ ಲೈವ್ ಚಲ್ತೇ ಆಸುನ್, ಹಾಂಗಾಸರ್ ಸಕಯ್ಲ್ ತೆಂ ಪಳವ್ಯೆತ್.
