ಬೆಂಗ್ಳುರ್ ಆರ್ಚ್ ದಿಯೆಸೆಜಿಚೊ ಬೈಬಲ್ ಆಯೋಗ್ ಹ್ಯಾಚ್ ಜುಲಾಯ್ಚಾ 26 ಥಾವ್ನ್ 30 ತಾರಿಕ್ ಪರ್ಯಾಂತ್ ಕೊಂಕ್ಣಿ ಬೈಬಲ್ ಮ್ಯಾರಥಾನ್ ಮ್ಹಳ್ಳೊ ಸಂಪೂರ್ಣ್ ಬೈಬಲ್ ಪರ್ಗಟ್ಣಿ ಅಭಿಯಾನ್ ಹಾತಿಂ ಧರ್ತಾ. ಅಪ್ಲ್ಯಾ ಸಂಘಾಂಚಾ ಹುದ್ದೆದಾರಾಂಸವೆಂ ಫೆಡರೇಶನ್ ಅಫ್ ಕೊಂಕಣಿ ಕ್ಯಾಥಲಿಕ್ ಅಸೋಸಿಯೇಶನ್ಸ್ (FKCA), ಬೆಂಗ್ಳುರ್ ಹೆಂ ಕಾರ್ಯೆಂ ಸಂಯೋಜನ್ ಕರ್ತಾ. ಸಗ್ಳೊ ಬೈಬಲ್ ಕೊಂಕ್ಣೆಂತ್ ಅಂತರ್ಜಾಳಿಚೆರ್ ನಿರಂತರ್ ಪರ್ಗಟ್ಣಿ ಕರ್ಚೆಂ ಅಖ್ಖ್ಯಾ ಸಂಸಾರಾರ್ ಹೆಂ ಪಯಿಲ್ಲೆಂ ಪ್ರಯತನ್.
ಬೈಬಲಾಂತ್ಲಿಂ 73 ಪುಸ್ತಕಾಂ ಪರ್ಗಟ್ಚಾಕ್ 48 ಪರ್ಗಟ್ಣಾರಾಂ ವಿಂಚುನ್ ಆಯ್ಲ್ಯಾಂತ್. ಹರ್ಯೆಕಾ ಅರ್ಧ್ಯಾ ವರಾಕ್ ವಾಚ್ಪಿ ಬದಲ್ತಾತ್ ತರೀ ಪರ್ಗಟ್ಣಿ ಪಾಂಚ್ ದಿಸಾಂಕ್, ದೀಸ್ ಆನಿ ರಾತ್ ಕಳ್ಮಿತ್ ನಾಸ್ತಾಂ, ಜಾವ್ನ್ ಆಸ್ತೆಲಿ. ಅಂತರ್ಜಾಳಿಚೆರ್ ಹಿ ಪರ್ಗಟ್ಣಿ ಚಲ್ಚಿ ದೆಕುನ್ ತಾಂತ್ರಿಕ್ ರಿತಿನ್ ಕುಮಕ್ ಕರುಂಕ್ 12 ನಿರ್ವಹಣ್ಗಾರ್ (Admin) ವಾವುರ್ತೆಲೆ. ಪರ್ಗಟ್ಣಾರ್ ತಸೆಂ ನಿರ್ವಹಣ್ಗಾರ್ ಲಾಯಿಕ್ ಆಸೊನ್ ಬೆಂಗ್ಳುರಾಂತ್ ವಸ್ತಿ ಕರ್ಚೆ ತಸಲೆ.
ಹೆಂ ದೆವಾಚಾ ಉತ್ರಾಚಿ ಪರ್ಗಟ್ಣಿ ದೆಕುನ್ ಏಕ್ ಭಕ್ತಿಕ್ ಕಾರ್ಯೆಂ. ದೆವಾಚೆಂ ಉತರ್ ಸಂಸಾರ್ಬರ್ ಸಗ್ಳ್ಯಾ ಕೊಂಕ್ಣಿ ಲೊಕಾಕ್ ಆಯ್ಕೊಂಕ್ ಮೆಳ್ಚಾಕ್, ನಿಯಾಳ್ಚಾಕ್ ಆನಿಂ ಜಿಣ್ಯೆಕ್ ಲಾಗು ಕರ್ಚಾಕ್ ಏಕ್ ಲ್ಹಾನ್ ಕುಮಕ್. ದೆವಾಚಾ ಉತ್ರಾಚಿ ರೂಚ್ ದಿಂವ್ಚಾ ರಿತಿನ್ ಹೆಂ ಪ್ರಯತ್ನ್ ಚಲ್ತೆಲೆಂ. ಜುಲಾಯ್ಚಾ 26 ತಾರ್ಕೆರ್ ಸಕಾಳಿಂ 8.30 ವರಾರ್ ಉಗ್ತಾವ್ಣೆ ಕಾರ್ಯಾಸವೆಂ ಪ್ರಾರಂಭ್ ಜಾತೆಲೆಂ. ಬೆಂಗ್ಳುರ್ ಅರ್ಚ್ ದಿಯೆಸೆಜಿಚೊ ಆರ್ಚ್ಬಿಸ್ಪ್ ಅಧಿಕ್ ಮಾನಾಧಿಕ್ ಪೀಟರ್ ಮಚಾದೊ ಉಗ್ತಾವ್ಣಿ ಕರ್ನ್ ಸಂದೇಶ್ ದಿತೆಲೆ. ಉಪ್ರಾಂತ್ ಸುರ್ವಿಲಿ ಪರ್ಗಟ್ಣಿ ಥೊಡೊ ವೇಳ್ ಆರ್ಚ್ಬಿಸ್ಪ್ಚ್ ಕರ್ತಲೆ.
ಹಿ ಪರ್ಗಟ್ಣಿ ಬೆಂಗ್ಳುರ್ ಆರ್ಚ್ ದಿಯೆಸೆಜಿಚಾ ಯುಟ್ಯೂಬ್ (YouTube) ಚ್ಯಾನಲಾಚೆರ್ ಪಾಂಚ್ ದೀಸ್ ನಿರಂತರ್ ಜಾತಲಿ. ಸಂಪೂರ್ಣ್ ಪರ್ಗಟ್ಣಿ ಆಯ್ಕೊಂಕ್ ಸರ್ವ್ ಬಾವಾರ್ಥ್ಯಾಂಕ್ ಅಮಿ ಉಲೊ ದಿತಾಂವ್. ಸಗ್ಳೊ ವೇಳ್ ಸಾಧ್ಯ್ ನಾಂ ತರ್ ತುಮ್ಚಾ ಸಂದ್ರಾಪಾ ಪರ್ಮಾಣೆ ದೆವಾಚೆಂ ಉತರ್ ಆಯ್ಕೊಂಕ್ ಪಾವ್ಟ್ ಕರ್ಚಿ. ಹ್ಯಾ ಚಾರಿತ್ರಿಕ್ ಘಡಿತಾಂತ್ ವಾಂಟೆಲಿ ಜಾಯಾ ಆನಿಂ ಅತ್ಮಿಕ್ ಫಾಯ್ದೊ ಜೊಡಾ.
ಮಾನೆಸ್ತ್ ನೈಜಿಲ್ ಫೆರ್ನಾಂಡಿಸ್ (ATC Publishers) ಹಾಂಚಾ ಮುಕೆಲ್ಪಣಾರ್, ಮಾ| ಬಾ| ಫಾವುಸ್ತಿನ್ ಎಲ್. ಲೋಬೊ (ನಿರ್ದೇಶಕ್ – ಕರ್ನಾಟಕ ಪ್ರಾಂತೀಯ್ ಗೊವ್ಳಿಕ್ ಕೇಂದ್ರ್) ಹಾಂಚಾ ಮಾರ್ಗದರ್ಶನಾಖಾಲ್ ಕೊಂಕ್ಣಿ ಬೆಬಲ್ ಮ್ಯಾರಥಾನ್ ಕಮಿಟಿ ವಾವ್ರ್ ಕರ್ನ್ ಆಸಾ. ಕಮಿಟಿಚೆ ಹೆರ್ ಸಾಂದೆ ಹ್ಯೆ ಪರಿಂ ಅಸಾತ್ – ಶ್ರೀಮಾನ್ ಸಿಲ್ವಿಯನ್ ನೊರೊನ್ಹಾ (ಅಧ್ಯಕ್ಷ್ FKCA), ಬಾ| ಜೋರ್ಜ್ ವಿನ್ಸೆಂಟ್ ಲೋಬೋ (ಕಾರ್ಯದರ್ಶಿ – ಲಾ. ಕ್ರಿ. ಸ. ಪ್ರಾಂತೀಯ್ ಆಯೋಗ್) ಶ್ರೀಮತಿ ನೋರಾ ಮಿನೇಜಸ್, ಶ್ರೀಮತಿ ಸಿಂತಿಯಾ ಲೋಬೊ, ಶ್ರೀಮತಿ ಐಡಾ ಸಿಕ್ವೇರಾ, ಶ್ರೀಮತಿ ಲವೀನಾ ಫೆರ್ನಾಂಡಿಸ್, ಶ್ರೀಮಾನ್ ಗೊಡ್ವಿನ್ ಕಾಸ್ತೆಲಿನೊ ಆನಿ ಶ್ರೀಮಾನ್ ಪೀಟರ್ ಡಿಸೋಜ.
