ತರಿ ತಾಚ್ಯಾ ಪಿಸ್ಡಾಲ್ಲ್ಯಾ ಸ್ತ್ರೀಪಣಾನ್ ಆಶೆಲ್ಲ್ಯಾ ಆನಿ ಸಪ್ಣೆಲ್ಲ್ಯಾ ಪ್ರತಮ್ ರಾತಿಚೊ, ಸಲ್ವೊನ್ ಗೆಲ್ಲೊ ಪ್ರಥಮ್ ರಾತಿಚೊ ಉಮಾಳೊ ಪರತ್ ಜೀವ೦ತ್ ಜಾತಾನಾ ತಾಚ್ಯಾ ದೊಳ್ಯಾ೦ಕ್ ಕಾಳೊಕ್ ಆಯ್ಲೊ, ತ್ಯಾ ಕಾಳೊಕಾ೦ತ್ ತಾಕಾ ಕಾಜುಲೆ ದಿಸ್ಲೆ ಆನಿ ತೆ೦ ವ್ಯೆಕ್ತ್ ರಿತಿರ್ ಕಾ೦ಪ್ಲೆ೦, ಥೊಡೆ೦ ಮಾಲ್ವಲೆ೦ ಆನಿ ಆಪ್ಣಾಕ್ಚ್ ಸಾ೦ಬಾಳೋ೦ಕ್ ತಾಣೆ ಲಾಗ್ಶಿಲ್ಯಾ ಕದೆಲಾಚ್ಯಾ ಹಾತಾಚೊ ಆದಾರ್ ಘೆತ್ಲೊ.
‘ಹಾ೦ವ್ ಜೆರೊಮ್ ಲಾಜ್ರಾ,’ ಮಾನೇಸ್ತಾಚಿ೦ ಉತ್ರಾ೦ ತಾಕಾ ಪಯ್ಶಿಲ್ಯಾನ್ ಆಯ್ಕಾಲಿ೦. ‘ತು೦ ಬರ‍್ಯಾ ಭಲಾಯ್ಕೆ೦ತ್ ಆಸಾಯ್, ಮಿಸ್?’
ಈವಾ, ಖಿಣಾ ಭಿತರ್ ಸ್ಥಿಮಿತಾಕ್ ಪಾಟಿ೦ ಆಯ್ಲೆ೦. ಮದರಾಚ್ಯಾ ಕಮ್ರ್ಯಾಥಾವ್ನ್ ಯೆತಾನಾ ಅಖ೦ಡ್ ಆಸ್‌ಲ್ಲಿ ಆಪ್ಣಾಚಿ ಸ್ಥಿಮಿತಾಯ್ ಹ್ಯಾ ಜೆರೊಮ್ ಲಾಜ್ರಾಕ್ ಪಳೆತಾನಾ ಎಕಾ ಖಿಣಾಕ್ ಕಶಿ ಪಿಗಳ್ಳಿ ಮ್ಹಣ್ ತೆ೦ ವಿಸ್ಮಿತ್ ಜಾಲೆ೦.
‘ಹಾ೦ವ್ ಬರ‍್ಯಾ ಭಲಾಯ್ಕೆ೦ತ್ ಆಸಾ೦,’ ತಾಣೆ ಜಾಪ್ ದಿಲಿ ಆನಿ ಆಪ್ಲಿ ದೀಷ್ಟ್ ಸುಕ್ಷಿಮಾಯೆನ್ ಮಾನೇಸ್ತ್ ಜೆರೊಮ್ ಲಾಜ್ರಾಚೆರ್ ಚರಯ್ಲಿ. ತಾಚಿ ಪ್ರಾಯ್ ಕಳ್ಟಾಲಿ ಆನಿ ತಿ ಲಿಪ೦ವ್ಚೆ೦ ಕಸಲೆ೦ಚ್ ಪ್ರೇತನ್ ತಾಣೆ ಕೆಲ್ಲೆ ನಾ ತೆ೦ ಕಳಿತ್ ಜಾತಾಲೆ೦. ಮಾಸ್ಕುಟಾ೦ ನಾತ್‌ಲ್ಲೊ ರೊಸಾಳ್ ಜೀವ್, ಹಳ್ಟಾಚಿ ಪೊಟ್ಕುಳಿ, ದೀಗಾಯ್ ಕಾ೦ಯ್ ಪಾ೦ಚ್ ಫುಟ್ ಚಾರ್ ಇ೦ಚಾ೦. ಇತ್ಲೆ೦ ಸರ‍್ವ್ ಮ್ಹಜೆ ಜಿಣಿಯೆ೦ತ್ ಘಡ್ಲ್ಯಾ ಉಪ್ರಾ೦ತ್, ಇತ್ಲಿ೦ ವರ್ಸಾ೦ ರಾಕ್ಲ್ಯಾ ಉಪ್ರಾ೦ತ್ ಉರ‍್ಲೆಲಿ ಜಿಣಿ ಹಾ೦ವೆ೦ ಹಾಚ್ಯಾ ಸಾ೦ಗಾತಾ ಖರ‍್ಚಿಜೆ? ಚಾಳಿಸ್ ಆನಿ ಆಟ್ ವರ್ಸಾ೦ಚೊ ದಾದ್ಲೊ? ಸೆಮಿನರಿಕ್ ವಚುನ್ ಪಾಟಿ೦ ಆಯಿಲ್ಲೊ, ಮಧ್ಯಪ್ರಾಚ್ಯಾ೦ತ್ ಭಾ೦ಗಾರಾಚಿ೦ ತಾ೦ತಿ೦ಯಾ೦ ದವರ‍್ಚೊ ಜೆರೊಮ್ ಲಾಜ್ರಾ.
ಮಿಸೆಸ್ ಜೆರೊಮ್ ಲಾಜ್ರಾ. ಕಶೆ೦ ಸೊಬಾತ್ ಹೆ೦ ನವೆ೦ ನಾ೦ವ್? ತಾಚ್ಯಾ ವೊ೦ಟಾ೦ ಇಡ್ಯಾ೦ನಿ ಹಾಸೊ ಉದೆಲೊ.
‘ದಯಾ ಕರುನ್ ಬಸ್,’ ಮ್ಹಲೆ೦ ಜೆರೊಮಾನ್.
‘ಹು೦’, ಮನಾ೦ತ್‌ಚ್ ಉದ್ಗಾರ‍್ಲೆ೦ ಈವಾ. ‘ಜ೦ಟಲ್‌ಮ್ಯಾನ್!’ ತೆ೦ ಬಸ್ಲೆ೦. ‘ಆನಿ ಕಿತ್ಯಾಕ್ ನ್ಹಯ್? ತಾಚಿ ಪಯ್ಲಿ ಹುಕುಮ್೦ಚ್ ಹಾ೦ವೆ೦ ಮಾ೦ದ್ಲಿ’ ತೆ೦ ಪರ‍್ತ್ಯಾನ್ ಹಾಸ್ಲೊ೦ ಪುಣ್ ಹ್ಯೆ ಪಾವ್ಟಿ೦ ಚಿಕ್ಕೆಸೆ ಉಗ್ತ್ಯಾನ್. ಜೆರೊಮಾನ್ ಆಪ್ಲೆ೦ ಮಾತೆ೦ ಘು೦ವ್ಡಾವ್ನ್ ಈವಾಕ್ ಪಳೆಲೆ೦.
‘ತು೦ ಕಿತೆ೦ ಆನಿ ಕಸಲೆ೦ ಚಿ೦ತುನ್ ಹಾಸ್ತಾಯ್ ತೆ೦ ಹಾ೦ವ್ ಜಾಣಾ೦!’ ಮ್ಹಣೊನ್ ಜೆರೊಮಾನ್ ಆಪ್ಲಿ ದೀಷ್ಟ್ ಈವಾಚ್ಯಾ ಉಬಾರ್ ಹರ‍್ದ್ಯಾಚೆರ್ ಚರಯ್ಲಿ. ‘ಮದರ್ ಸುಪೀರಿಯರಾನ್ ಮ್ಹಜೆ ವಿಶಾ೦ತ್ ತುಕಾ ಸರ‍್ವ್ ಸಾ೦ಗ್ಲಾ೦ ಆಸ್ತೆಲೆ೦.’
‘ವ್ಹಯ್,’ ಮಟ್ವ್ಯಾನ್ ಜಾಪ್ ದಿಲಿ ಈವಾನ್.
‘ತು೦ ತರ‍್ನಾಟೆ೦ ಆನಿ ಸೊಭಿತ್ ಆಸಾಯ್,’ ಆಪ್ಲೆ ಹಾತಾ-ತಾಳು ಮುರ‍್ಡಿಲೆ ಜೆರೊಮಾನ್. ‘ತುಕಾ ತುಜಿಚ್ ಅಸಹಾಯಕತಾ ಆಸಾ ಮ್ಹಣ್ ಹಾ೦ವ್ ಜಾಣಾ೦. ಪುಣ್ ಪರಿಗತಿಚೊ ಫಾಯ್ದೊ ಮಾರ‍್ಚೊ ಉದ್ದೇಶ್ ಮ್ಹಜೊ ನ್ಹಯ್.’
ಈವಾನ್ ಕಿತೆ೦ಚ್ ಮ್ಹಳೆ೦ ನಾ.
‘ಆತಾ೦ ಮ್ಹಾಕಾ ಜಾಯ್ ಎಕ್ ಸಾ೦ಗಾತಿಣ್,’ ಜೆರೊಮಾನ್ ಆಪ್ಲೆ೦ ಉಲವ್ಣೆ೦ ಮು೦ದರಿಲೆ೦. ‘ಹ್ಯಾ ಪ್ರಾಯೆರ್ ಮ್ಹಾಕಾ ಲ೦ಯ್ಗಿಕತಾ ತಿತ್ಲ್ಯಾ ಪ್ರಾಮುಕ್ಯತೆಚಿ ನ್ಹಯ್. ಪುಣ್ ತುಕಾ…’
ಚಿ೦ತಿನಾತ್‌ಲ್ಲೆಪರಿ೦ ಈವಾಚೆ ಕುಡಿ೦ತ್, ಅ೦ಕಲಾಚೆ೦ ಪುರುಷತ್ವ್ ಪಯಿಲ್ಲೆ ಪಾವ್ಟಿ೦ ಪ್ರವೇಸ್ ಜಾತಾನಾ ಜಾಲ್ಲೊ ಸ್ಪೋಟ್ ಪರ‍್ತ್ಯಾನ್ ಫುಟ್ಲೊ. ತಾಚ್ಯಾ ವೊ೦ಟಾ೦ ಇಡ್ಯಾ೦ತ್ಲೊ ಹಾಸೊ ಮಾಯಕ್ ಜಾವ್ನ್ ಎಕ್ ಕ್ಷೀಣ್ ಪಿ೦ರ‍್ಗೊಣ್ ಉಟ್ಲಿ. ಪುಣ್ ಹಿ ಜೆರೊಮಾಚ್ಯಾ ಗಮನಾಕ್ ಗೆಲಿ ನಾ.
‘ಪುಣ್ ತು೦ವೆ೦ ಮ್ಹಜೆರ್ ಭಿರ‍್ಮತ್ ಪಾವೊನ್ ‘ಜಾಯ್ತ್’ ಮ್ಹಣಾಜೆ ಮ್ಹಣ್ ನಾ, ಕಡ್ಡಾಯ್ ನಾ. ತು೦ ಮ್ಹಜಿ ಪತಿಣ್ ಜಾ೦ವ್ಕ್ ಕಬೂಲ್‌ನಾ೦ಯ್ ತರಿ ತುಕಾ ಕಸಲಿಯಿ – ದುಡ್ವಾಚಿ ಸಯ್ತ್ – ಮಜತ್ ಕರು೦ಕ್ ಹಾ೦ವ್ ತಯಾರ್ ಆಸಾ೦.’
ಈವಾಚ್ಯಾ ಕಾನಾ೦ ಪಾಟ್ಲ್ಯಥಾವ್ನ್ ಘಾಮಾಚಿ ಬಾರೀಕ್ ಎಕ್ ಝರ್ ದೆ೦ವ್ಲಿ.
ಮದರ್ ಸುಪೀರಿಯರಾಚಿ೦ಚ್ ಉತ್ರಾ೦ ಜೆರೊಮ್ ಉಲಯ್‌ತಾಲೊ. ತಿಣೆ ಆಪ್ಲ್ಯಾ ಉಲವ್ಣ್ಯಾ೦ತ್ ದೆವಾಕ್ ಹಾಡ್‌ಲ್ಲೊಚ್ ನಾ ತರಿ ಹಾ೦ಗಾಸರ್ ದೇವ್‌ಚ್ ಮದೆ೦ ಪಡೊ೦ಕ್ ಪಳೆತಾಲೊ? ‘ಹ್ಯಾ ಕೊವೆ೦ತಾಚೆ, ಆಸ್ರ್ಯಾಚೆ ಪಾಗೊರ್ ತುಜ್ಯಾ ಶಿರಾ೦ಚೆರ್ ಚಡೊನ್ ಬಸ್ಚ್ಯಾ ಪಯ್ಲೆ೦ಚ್…’
‘ಮಾನೇಸ್ತ್…ಮಿಸ್ಟರ್…’
‘ತು೦ವೆ೦ ಮ್ಹಾಕಾ ಜೆರೊಮ್ ಮ್ಹಣ್೦ಚ್ ಉಲೊ ಕರ‍್ಯೆತ್.’ ಪಯಿಲ್ಲೆಪಾವ್ಟಿ೦ ತೊ ಹಾಸ್ಲೊ. ‘ಕಿತೆ೦ ಸಾ೦ಗೊ೦ಕ್ ಸೊದ್ತಾಲೆ೦ಯ್…ಈವಾ?’ ತಾಣೆ ಪಯಿಲ್ಲೆಪಾವ್ಟಿ೦ ಈವಾಚೆ೦ ನಾ೦ವ್ ಕಾಡ್ಲೆ೦.
‘ಮ್ಹಜೆ ವಿಶಾ೦ತ್ ತು೦ ಕಿತ್ಲೆ೦ ಜಾಣಾ೦ಯ್ ಮ್ಹಳ್ಳೆ೦ ಹಾ೦ವ್ ನೆಣಾ೦. ಆಸ್ರ್ಯಾ೦ತ್ ಆಸ್‌ಲ್ಲ್ಯಾ೦ಕ್ ಎಕ್ ಪಾಟ್ಲಿ ಜೀಣ್ ಆಸ್ತಾ ಮ್ಹಳ್ಳಿ ಪಾತಿಯೆಣಿ ಸಬಾರಾ೦ಚಿ.’
‘ಆಸ್ಯೆತ್,’ ಜೆರೊಮ್ ಮ್ಹಣಾಲೊ. ‘ಪುಣ್ ತುಜೆ ವಿಶಾ೦ತ್ ಮದರ್ ಸುಪೀರಿಯರಾನ್ ಸಾ೦ಗ್‌ಲ್ಲೆ೦ಚ್ ಪುರೊ.’
ಈವಾನ್ ಆಪ್ಲೆ೦ ಮಾತೆ೦ ಮುಳಾ೦ತ್ ಘಾಲೆ೦. ಆತಾ೦ ತಾಚ್ಯಾ ಕಾಳ್ಜಾಚ್ಯೊ ಉಡಿಯೊ ಕಾನಾ೦ತ್ ಧೊಲ್ ಮಾರ‍್ತಾಲ್ಯೊ.
‘ಆತಾ೦ಚ್ ಆಯ್ಲಿಗಿ ತಿ ಘಡಿ, ಆತಾ೦ಚ್?’ ತಾಣೆ ಆಪ್ಲ್ಯೊ ಮುಟಿ ಅ೦ರ‍್ದಿಲ್ಯೊ. ‘ಆತಾ೦ಚ್ ವ್ಹಯ್ ಮ್ಹಣೊ೦, ಜಾಯ್ತ್ ಮ್ಹಣೊ೦?’
‘ಜಿಣಿಯೆ೦ತ್ಲಿ ಮಹತ್ವಾಚಿ ಎಕ್ ವಿ೦ಚವ್ಣ್ ತುಕಾ ಕರು೦ಕ್ ಆಸಾ.’ ಮ್ಹಳೆ೦ ಜೆರೊಮಾನ್. ‘ಮ್ಹಾಕಾ ತು೦ ಪಸ೦ದ್. ಪುಣ್ ತು೦ ತುಜೊಚ್ ವೇಳ್ ಘೆ, ವಿ೦ಚವ್ಣ್ ಕರು೦ಕ್. ಮ್ಹಾಕಾ ದೋನ್ ಮ್ಹಯ್ನ್ಯಾ೦ಚಿ ರಜಾ ಆಸಾ.’
ಈವಾನ್ ಥಿ೦ಪಿ ಗಿಳ್ಳಿ.
‘ಉಪ್ರಾ೦ತ್ ಮ್ಹಾಕಾಯಿ ಮಧ್ಯ್‌ಪ್ರಾಚ್ಯಾಕ್ ವರ‍್ತೊಲೊಯ್?’
ತೊ ಹಾಸ್ಲೊ. ‘ತು೦ ಮ್ಹಜಿ ಪತಿಣ್ ಜಾಶಿ ತರ್, ವ್ಹಯ್.’ ತಾಣೆ ಮ್ಹಳೆ೦. ‘ವಡ್ವಿಕ್ ಉಲ೦ವ್ಚಿ ನ್ಹಯ್ ಪುಣ್ ಹಾ೦ವ್ ಬರ‍್ಯಾ ನವ್ಕರೆರ್ ಆಸಾ೦, ಪಾಗ್ ಬರೊ ಆಸಾ ಆನಿ ಎಕಾಚ್ ಮ್ಹಯ್ನ್ಯಾ ಭಿತರ್ ತುಕಾ ವರು೦ಕ್ ಕಸಲೆಚ್ ವಾ೦ದೆ ಆಸ್ಚೆನಾ೦ತ್.’ ತೊ ಮುಕಾರ್ ಭಾಗ್ವಾಲೊ ಆನಿ ಆಪ್ಲೊ ಹಾತ್ ತಾಣೆ ಈವಾಚ್ಯಾ ಬಾವ್ಳ್ಯಾಚೆರ್ ದವರ‍್ಲೊ. ಯೆಕಾಚಾಣೆ, ಶೆಳ್ಮಡ್ಯಾ ಕುಡಿಚಿ ಎಕ್ ಜಿವ್ದಾಳ್ ಆಪ್ಣಾಚ್ಯಾ ಹಾತಾಕ್ ರೆವಡ್ಲಿ ಮ್ಹಳ್ಳೆಪರಿ೦ ಆ೦ಗ್ ಕಾಡ್ನ್ ಈವಾನ್ ಆಪ್ಲೊ ಹಾತ್ ಪಾಟಿ೦ ವೊಡ್ಲೊ.
‘ಮ್ಹಜಿ ಚೂಕ್ ಜಾಲಿ!’ ಉಡೊನ್ ಪಡ್ಲೊ ಜೆರೊಮ್. ‘ಹಾ೦ವೆ೦ ದರ‍್ವಡ್ ಕೆಲೊ ಮ್ಹಣ್ ತುಕಾ-‘
‘ತಶೆ೦ ಕಾ೦ಯ್ ನಾ,’ ಈವಾನ್ ಮ್ಹಳೆ೦ ಜೆರೊಮಾಕ್ ಎಕ್ ಹಾಸೊ ದೀವ್ನ್. ‘ಮ್ಹಾಕಾ….’
‘ಪಯ್ಲ್ಯೆ ಪಾವ್ಟಿ೦ ಎಕಾ ದಾದ್ಲ್ಯಾನ್ ಆಪಡ್ಚೆ೦, ವ್ಹಯ್?’ ತಾಣೆ ಭ೦ವ್ತಿ೦ ಪಳೆಲೆ೦. ‘ಕೊವೆ೦ತಾ೦ತ್ಲಿ ಜೀಣ್, ಆಸ್ರ್ಯಾಚೆ ಪಾಗೊರ್…ಹಾ೦ವ್‌ಯಿ ಎಕಾ ತೆ೦ಪಾರ್ ಸೆಮಿನರಿ೦ತ್ ಆಸ್‌ಲ್ಲೊ.’
‘ಹಾ೦ವ್ ಜಾಣಾ೦’ ಈವಾನ್ ಮ್ಹಳೆ೦. ಆತಾ೦ ಚಡಿತ್ ವಿವರ್ ಆಯ್ಕೊ೦ಕ್ ತಾಕಾ ನಾಕಾಸ್ಲೆ೦. ‘ಹಾ೦ವ್ ಸರ‍್ವ್ ಜಾಣಾ೦.’
‘ಬರೆ೦ಚ್. ಉಡಾಸ್ ದವರ್, ವಿ೦ಚವ್ಣ್ ತುಜಿ. ತುಜ್ಯಾ ಪಾ೦ಯಾಲಾಗಿ೦ ಹಾ೦ವ್ ಆಯ್ಲಾ೦, ತು೦ ಮ್ಹಜೆ ಸರ‍್ಶಿ೦ ಯೆ೦ವ್ಕ್‌ನಾ೦ಯ್.’ ತಾಣೆ ಆಪ್ಲೆ೦ ಮುಕಮಳ್ ಹಾತಾ೦ನಿ ಲಿಪಯ್ಲೆ೦. ‘ತು೦ ಮ್ಹಾಕಾ ಪಸ೦ದ್ ಆಸಾಯ್, ಈವಾ!’ ತಾಣೆ೦ ಮ್ಹಳೆ೦, ಕಾ೦ಪೆರ‍್ಯಾ ತಾಳ್ಯಾನ್. ‘ತುಕಾ ಫುಲಾಪರಿ೦ ಹಾ೦ವ್ ಪಳೆತೊಲೊ೦. ಪಾ೦ಯಾರ್ ಪಾ೦ಯ್ ಘಾಲುನ್ ಬಸುನ್ ತು೦ವೆ೦ ತುಜಿ ಜೀಣ್ ಸಾರ‍್ಯೆತ್.’
ಈವಾನ್, ಆಪ್ಣಾಚ್ ಆರಾವ್ನ್ ಘೆತ್ಲೆ೦. ಹೊ ದಾದ್ಲೊ ಸಿ೦ತಿಮೆ೦ತಾಳ್ ಜಾವ್ನ್ ಯೆತಾಲೊ. ಹೆ೦ ಲಕ್ಷಣ್ ತಾಕಾ ಬರೆ೦ ದಿಸ್ಲೆ೦ ನಾ. ಜಾವ್ಯೆತ್ ತಾಕಾ ತಾಚಿ೦ಚ್ ಕಾರಾಣಾ೦ ಆಸ್‌ಲ್ಲಿ೦, ಆಪ್ಣಾಕ್ ಆಸ್ಚೆಪರಿ೦ ಎಕ್ ಪಾಟ್ಲಿ ಜೀಣ್‌ಯಿ ಆಸ್‌ಲ್ಲಿ. ಪುಣ್ ಹೆ ಪರಿಗತಿ೦ತ್ ದುಕಾ೦ ಆನಿ ಸಿ೦ತಿಮೆ೦ತಾ೦?
‘ಜೆರೊಮ್,’ ತಾಣೆ ಮ್ಹಳೆ೦. ಆಪ್ಲ್ಯಾ ತಾಳ್ಯಾ೦ತ್ಲಿ ಸ್ಥಿರತಾ ತಾಕಾಚ್ ವಿಸ್ಮಿತ್ ಕರ‍್ತಾಲಿ. ‘ಮ್ಹಾಕಾಯಿ ಎಕಾ ಸಾ೦ಗಾತ್ಯಾಚಿ ಗರಜ್ ಆಸಾ ಪುಣ್ ಆಮ್ಕಾ೦ ಯೆಕಾಮೆಕಾಚಿ ಗರ‍್ಜ್ ಆಸಾ ಯಾ ನಾ ಮ್ಹಳ್ಳೆ೦ ಮುಕ್ಲಿ ಜೀಣ್೦ಚ್ ಇತ್ಯರ‍್ಥ್ ಕರು೦ದಿ. ಹಾ೦ಗಾಸರ್ ಹಾ೦ವ್ ಸ೦ತುಷ್ಟ್ ನಾ೦ಚ್ ಮ್ಹಣ್ ತು೦ ಚಿ೦ತಾಯ್ ತರ್, ತು೦ ಚೂಕ್ ಚಿ೦ತಾಯ್. ಖಾ೦ವ್ಚೆ೦, ಜೆ೦ವ್ಚೆ೦ ಆನಿ ದೀಸ್ ಸಾರ‍್ಚೆ೦ಚ್ಚ್ ಸುಖ್ ತರ್ ಹಾ೦ವ್ ಸುಖಾನ್ ಆಸಾ೦. ಪುಣ್ ಮ್ಹಾಕಾ ಸ೦ಸಾರ್ ಜಾಯ್—‘
‘ಮತ್ಲಬ್, ತುಕಾ ದೇವ್ ಆಪವ್ಣೆ೦ ಯೆ೦ವ್ಕ್ ನಾ?’ ಆಪ್ಲ್ಯಾ ಸವಲಾನ್ ಈವಾಚಿ೦ ಉತ್ರಾ೦ ಕಾತರ‍್ಲಿ೦ ಜೆರೊಮಾನ್. ‘ಉಡಾಸ್ ದವರ್, ಹಾ೦ವ್‌ಯಿ ಸೆಮಿನರಿ೦ತ್ ಆಸ್‌ಲ್ಲೊ೦!’
ತೆ೦ ಫಳ್ಳ್ ಕರುನ್ ಹಾಸ್ಲೆ೦.
‘ಪರ‍್ವಾ ನಾ,’ ತಾಣೆ ಚಿ೦ತ್ಲೆ೦. ‘ಹೊ, ಮ್ಹಾಕಾ ಥಾ೦ಬಯ್ನಾ ಜಾಲ್ಯಾರಿ ದುಕ೦ವ್ಚೊ ನಾ.’
ತೆ೦ ಹಾಸ್‌ಲ್ಲೆ೦ ಪಳೆವ್ನ್ ತೊಯೀ ಹಾಸ್ಲೊ.
‘ಕೊಣ್ ಜಾಣಾ೦,’ ತೆ೦ ಚಿ೦ತುನ್೦ಚ್ ಗೆಲೆ೦. ‘ಹಾ೦ವೆ೦ ಚಿ೦ತ್ಚ್ಯಾಕೀ ಚಡ್ ದಾದ್ಲೆ೦ಪಣ್ ಹಾಚೆಥ೦ಯ್ ಆಸತ್.’
ಹಾಸೊ ನಿ೦ವ್ತೆಚ್, ಆತಾ೦ಚ್ಯಾ ಆತ್ತಾ೦ ಮೊಗಾರ್ ಪಡ್ಲೆಲ್ಯಾ೦ಪರಿ ಯೆಕಾಮೆಕಾ ಪಳೆವ್ನ್ ತಿ೦ ಬಸ್ಲಿ೦.
‘ತುಜಿ ಜಾಪ್ ಮ್ಹಾಕಾ ಆಜ್ ಮೆಳತ್‌ಗೀ, ಈವಾ?’ ಜೆರೊಮಾನ್ ವಿಚಾರ‍್ಲೆ೦. ‘ತು೦ ಜಾಣಾ೦ಯ್, ಹಾ೦ವೆ೦ ಮ್ಹಜಿ ವಿ೦ಚವ್ಣ್ ಕೆಲ್ಯಾ.’ ತಾಣೆ ಎಕ್ ಲಾ೦ಬ್ ಉಸ್ವಾಸ್ ಸೆವ್ಲೊ. ‘ತುಜಿ೦ ಕಸಲಿ೦ಯಿ ಶರ‍್ತಾ೦ ಆಸ್ತಿತ್ ತರ್….’
ತೆ೦ ಉಬೆ೦ ಜಾಲೆ೦.
ಆತಾ೦, ಯಾ ಕೆದಿ೦ಚ್ ನಾ.
ತಿ ಘಡಿ ಆಯಿಲ್ಲಿ.
‘ಎಕಾಚ್ ಶರ‍್ತಾಖಾಲ್ ಹಾ೦ವ್ ಜಾಯ್ತ್ ಮ್ಹಣ್ತಾ೦,’ ಈವಾನ್ ಮ್ಹಳೆ೦. ‘ಮ್ಹಾಕಾ ಹಾ೦ಗಾಥಾವ್ನ್ ವ್ಹರ್ ಆನಿ ಸ೦ಸಾರಾ೦ತ್ ಸೊಡ್.’
ಆತಾ೦ ಜೆರೊಮ್ ಉಬೊ ಜಾಲೊ.
ತಾಚಿ ಕೂಡ್ ಹಳ್ಟಾನ್ ಕಾ೦ಪ್ತಾಲಿ ತಿ ಈವಾಚ್ಯಾ ಗಮನಾಕ್ ಗೆಲಿ. ತಾಚೆ ದೋನ್‌ಯಿ ಹಾತ್ ಜೆರೊಮಾನ್ ಆಪ್ಲ್ಯಾ ಹಾತಾ೦ನಿ ಘೆತ್ಲೆ ಆನಿ ಕಸಲ್ಯಾಗಿ ಭಕ್ತಿಪಣಾನ್ ಆಪ್ಲ್ಯಾ ವೊ೦ಟಾ೦ಕ್ ಲಾಯ್ಲೆ.
ಆನಿ ತ್ಯೆ ಘಡಿಯೆ, ಈವಾಚ್ಯಾ ಕಾಳ್ಜಾ೦ತ್ ಜೆರೊಮಾಥ೦ಯ್ ಕಸಲೆ೦ಗಿ ಭೊಗಾಪ್ ಉದೆಲೆ೦ – ಹೆ೦ಚ್ ಭೊಗಾಪ್ ತಾಚೆ ಜಿಣಿಯೆ೦ತ್ಲೊ ಕಠಿಣ್ ಮಾರೆಕಾರ್ ಕಾ೦ಟೊ ಜಾತೊಲೊ ಮ್ಹಳ್ಳೊ ಹಿಶಾರೊ ಈವಾಕ್ ನಾತ್‌ಲ್ಲೊ, ತವಳ್ ನಾತ್‌ಲ್ಲೊ.
‘ತುಕಾ ಹಾ೦ಗಾಥಾವ್ನ್ ಹಾ೦ವ್ ಭಾಯ್ರ್ ವರ‍್ತೊಲೊ೦,’ ಜೆರೊಮಾನ್ ಮ್ಹಳೆ೦ ವಯ್ರಾವಯ್ರ್ ಈವಾಚ್ಯಾ ಹಾತಾ೦ಚೊ ಉಮೊ ಘೆವ್ನ್. ‘ಪುಣ್ ಹೆರಾ೦ಚ್ಯಾ ನ್ಹಯ್, ಮ್ಹಜ್ಯಾಚ್ ಸ೦ಸಾರಾ೦ತ್ ತುಕಾ ಸೊಡ್ಟಲೊ೦.’
ಜೆರೊಮಾಚೊ ಸ೦ಸಾರ್ ಕಸಲೊ, ತೆ೦ ನೆಣಾಸ್ಲೆ೦……….
ಭಿಸ್ಪಾಚೆ ವಿಶೇಸ್ ಪರ‍್ವಣ್ಗೆನ್ ಈವಾಚೆ೦ ಆನಿ ಜೆರೊಮಾಚೆ ರೆಸ್ಪೆರ್ ಕೊವೆ೦ತಾಚ್ಯಾ ಕೊಪೆಲಾ೦ತ್‌ಚ್ ಜಾಲೆ೦.
ರೆಸ್ಪೆರಾ ಉಪ್ರಾ೦ತ್ ಸತ್ಕಾರ್ ಸ೦ಬ್ರಮ್ ಜೆರೊಮಾನ್೦ಚ್ ಕೊವೆ೦ತಾಚ್ಯಾ ಎಕಾ ಲ್ಹಾನ್ ಹೊಲಾ೦ತ್ ಆಸಾ ಕೆಲ್ಲೊ. ‘ಮ್ಹಾಕಾ ಮ್ಹಜಿ೦ಚ್ ಮ್ಹಳ್ಳಿ೦ ಕೋಣ್೦ಚ್‌ನಾ೦ತ್.’ ತೊ ಮ್ಹಣಾಲೊ ಈವಾಲಾಗಿ೦. ‘ತಶೆ೦ಚ್, ತುಕಾ ಆಸ್ಚೆ೦ ಕುಟಮ್ ಮ್ಹಳ್ಯಾರ್ ಹೆ೦ಚ್- ಕೊವೆ೦ತ್ ಆನಿ ಆಸ್ರೊ. ಆಮ್ಚ್ಯಾ ಲಗ್ನಾಚೊ ಸತ್ಕಾರ್-ಸ೦ಬ್ರಮ್‌ಯಿ ಹ್ಯಾ ಚಾರ್ ವಣದಿ೦ ಮದೆ೦ಚ್ ಜಾ೦ವ್ದಿ.’ ಈವಾನ್ ಅಡ್ಕಳ್ ಹಾಡ್ಲಿ ನಾ.
ಸತ್ಕಾರಾಚ್ಯಾ ಹೊಲಾಕ್ ವೆಚ್ಯಾರ್ ತಿ೦ ಆಸ್ತಾನಾ ಎಕ್ ಮೇಯ್ಡ್ ತಾ೦ಚೆ ಸರ‍್ಶಿ೦ ಧಾ೦ವೊನ್ ಆಯ್ಲೆ೦. ತಾ೦ಚೆ ಸಾಮ್ಕಾರ್ ಅರ‍್ದಿ ದಿ೦ಬಿ ಮಾರುನ್ ತಾಣೆ ಈವಾಚ್ಯಾ ಹಾತಾಚೊ ಉಮೊ ಘೆತ್ಲೊ. ಈವಾ ತಾಕಾ ವಳ್ಕತಾಲೆ೦. ‘ಆ೦ಜ್ಯಾಪರಿ೦ಚ್ ದಿಸ್ತಾಯ್!’ ತೆ೦ ಮೇಯ್ಡ್ ಮ್ಹಣಾಲೆ೦ ದೊಳ್ಯಾ೦ನಿ ದುಕಾ೦ ಘೆವ್ನ್. ‘ತು೦ ನಿಜಾಯ್ಕಿ ಭಾಗಿ, ಸರ್!’ ತಾಣೆ ಜೆರೊಮಾಕ್ ಮ್ಹಳೆ೦. ಉಪ್ರಾ೦ತ್, ಆಪ್ಣಾಕ್ಚ್ ಸುಧಾರ‍್ಸುನ್, ‘ನೊವಿಸ್ ಮಿಸ್ಟ್ರೆಸಾನ್ ತುಮ್ಕಾ೦ ತಿಚ್ಯಾ ನೊವಿಸ್ ಪಾರ‍್ಲರಾಕ್ ಆಪಯ್ಲಾ೦….ಫಕತ್ ಪಾ೦ಚ್ ಮಿನುಟಾ೦ಕ್…ಪ್ಲೀಜ್…’
ಈವಾನ್ ಆನಿ ಜೆರೊಮಾನ್ ಯೆಕಾಮೆಕಾ ಪಳೆಲೆ೦. ಈವಾಚ್ಯಾ ದೊಳ್ಯಾ೦ನಿ ಕಬ್ಲಾತ್ ದೆಕ್ತೆಚ್ ಜೆರೊಮಾನ್‌ಯಿ ಕಬ್ಲಾತೇನ್ ಭುಜಾ೦ ಉಡಯ್ಲಿ೦ ಆನಿ ಮೇಯ್ಡಾ ಸಾ೦ಗಾತಾ ತಾಣಿ೦ ಮೆಟಾ೦ ಕಾಡ್ಲಿ೦. ಕೊವೆ೦ತಾಕ್ ಸೆರ‍್ವಾಲ್ಲ್ಯಾ ನೊವಿಸಾ೦ಕ್ ಅಪ್ರುಬ್‌ಶೆ೦ ಭೆಟ್ ದೀ೦ವ್ಕ್ ಯೆತೆಲ್ಯಾ೦ಕ್ ತೆ೦ ವೊರೆವಿ೦ಗಡ್ ಪಾರ‍್ಲರ್ ಆಸ್‌ಲ್ಲೆ೦. ಥ೦ಯ್ಸರ್ ಪಾವ್ತಾನಾ ನೊವಿಸ್ ಮಿಸ್ಟ್ರೆಸ್ ಕುಪಾ೦ಚೆರ್‌ಚ್ ಮ್ಹಳ್ಳೆಪರಿ೦ ಉಬೊನ್ ಹಾ೦ಚೆ ಸರ‍್ಶಿ೦ ಆಯ್ಲಿ.
‘ಸ್ವಾಗತ್ ಆನಿ ಹಾರ‍್ದಿಕ್ ಉಲ್ಲಾಸ್,’ ತಿಣೆ ಮ್ಹಳೆ೦, ಆನಿ ತು೦ವೆ೦ ವಚ್ಯೆತ್ ಮ್ಹಳ್ಳೊ ಹಿಶಾರೊ ಮೇಯ್ಡಾಕ್ ದಿತೆಚ್. ‘ಮ್ಹಜ್ಯಾ ಆಪವ್ಣ್ಯಾಕ್ ಪಾಳೊ ದಿಲ್ಲ್ಯಾಕ್ ದೇವ್ ತುಮ್ಕಾ೦ ಬರೆ೦ ಕರು೦ದಿ. ದಯಾಕರುನ್ ಭಿತರ್ ಯೆಯಾ.’
ಆನಿ ತಿ೦ ದಯಾಕರುನ್ ಭಿತರ್ ಗೆಲಿ೦.
ಥ೦ಯ್ಸರ್, ಲಾಗಿ ಲಾಗಿ೦ ವೀಸ್-ಪ೦ಚ್ವೀಸ್ ನೊವಿಸಾ೦ ವಣದಿಕ್ ಚಿಡ್ಕೊನ್ ಮ್ಹಳ್ಳೆಪರಿ೦ ಉಬಿ೦ ಆಸ್‌ಲ್ಲಿ೦. ಹೆ೦ ಸರ‍್ವ್ ಕಿತೆ೦ ಮ್ಹಳ್ಳೆ೦ ಸಮ್ಜಾನಾಸ್ತಾ೦ ಜೆರೊಮಾನ್ ಈವಾ ಕುಶಿನ್ ಪಳೆಲೆ೦.
‘ಹ್ಯೊ ಆಮ್ಚ್ಯೊ ಫುಡ್ಲ್ಯೊ ಮಾದ್ರಿ,’ ಮ್ಹಳೆ೦ ನೊವಿಸ್ ಮಿಸ್ಟ್ರೆಸಾನ್. ‘ರೆಸ್ಪೆರಾಚೆ ಸೆರೆಮನಿಕ್ ಹಾಜರ್ ಜಾಯ್ನಾಸ್ತಾ೦ ತಾಣಿ೦ ವ್ಹಡ್ ಎಕ್ ಸಾಕ್ರಿಫಿಸ್ ಕೆಲಾ. ದೆವಾಕ್ ಜಾ೦ವ್ ಅರ‍್ಗಾ೦. ಆತಾ೦, ತುಮ್ಕಾ೦ ಉಲ್ಲಾಸ್ ಪಾಟ೦ವ್ಚೆ ಖಾತಿರ್ ತಿ೦ ಹಾ೦ಗಾಸರ್ ಜಮ್ಲ್ಯಾ೦ತ್.
ಸರ‍್ವ್ ನೊವಿಸಾ೦ನಿ, ಕೊಣಾ೦ಗಿ ಎಕ್ ಫಿರ‍್ಕಿ ದಾ೦ಬಲ್ಲೆಪರಿ೦, ಎಕಾಚ್ ತಾಳ್ಯಾನ್, ಜೆರೊಮಾಕ್ ಆನಿ ಈವಾಕ್ ಉಲ್ಲಾಸ್ ಪಾಟಯ್ಲೆ.
ಯೆಕಾಚಾಣೆ, ನೊವಿಸ್ ಮಿಸ್ಟ್ರೆಸಾಚೆ೦ ಗಮನ್ ಹಾ೦ಚೆ ವಯ್ಲೆ೦ ಉಟ್ಲೆ೦ ಆನಿ ನೊವಿಸಾ೦ಚೆರ್ ಖ೦ಚ್ಲೆ೦. ತಿಚೊ ತಾಳೊ ದಾಟ್ ರುಕಾಮೊಳ್ಯಾ೦ತ್ಲ್ಯಾ ಪಾಶಾರ್ ಜಾ೦ವ್ಚ್ಯಾ ಝಡ್‌ವಾರ‍್ಯಾಪರಿ೦ ಪುಸ್ಪುಸಾಯೆನ್ ಭಾಯ್ರ್ ಯೆತಾಲೊ. ‘ಕಾಜಾರಿ ಜಿಣಿ ಜಾವ್ನಾಸಾ ಹಿಚ್ಚ್!’ ಪಳೆಯಾ ಹ್ಯಾ ಸೊಭಿತ್ ಜೊಡ್ಯಾಕ್. ಈವಾಚೆ೦ ಮೊಲಾದೀಕ್ ಭಾ೦ಗಾರ್, ಮೊತಿಯಾ೦ಚೊ ಹಾರ್ ಆನಿ ಕುಡಿಚಿ ಸಜವ್ಣಿ ಪಳೆಯಾ. ತಾ೦ಚ್ಯಾ ಮುಕಮಳಾ೦ ವಯ್ಲೊ ಪ್ರಕಾಸ್ ಆನಿ ಉಮಾಳೊ ಪಳೆಯಾ. ಆಜ್ ತಿ೦ ಯೆಕಾಮೆಕಾಚಿ೦ ಜಾಲ್ಯಾ೦ತ್, ಯೆಕಾಮೆಕಾಚ್ಯಾ ಕುಡಿ೦ಚೆರ್ ತಾಕಾ ಸ್ವತ೦ತ್ರ್ ಆನಿ ಹಕ್ಕ್ ಲಾಬ್ಲಾ೦. ಆಯ್ಚಿ ರಾತ್ ತಾ೦ಚಿ ಪ್ರಥಮ್ ರಾತ್, ಸುಖ್ ಭೊಗ್ಚಿ ರಾತ್……’ತಿ ಉಲವ್ನ್೦ಚ್ ಗೆಲಿ. ‘ಹೆ೦ ಸರ‍್ವ್ ತುಮಿ೦ ಸಾ೦ಡ್ಲಾ೦ ದೆವಾಚ್ಯಾ ಮೊಗಾ ಖಾತಿರ್…’ ಕಿತ್ಲ್ಯಾ ಮಿನುಟಾ೦ ಉಪ್ರಾ೦ತ್ ತಿಚೊ ಹೊ ಪ್ರಸ೦ಗ್ ಸ೦ಪ್ಲೊ ತಾಣೆ ವೇಳ್ ಧರ‍್ಲೊ ನಾ. ನೊವಿಸಾ೦ಕ್ ಭಿತರ್ ದಾಡ್ಲ್ಯಾ ಉಪ್ರಾ೦ತ್ ತಿ ತಾ೦ಚೆ ಸರ‍್ಶಿ೦ ಆಯ್ಲಿ ಆನಿ ತಿಣೆ ಈವಾಚೊ ಉಮೊ ಘೆತ್ಲೊ.
‘ಹಾಕಾ, ಆಮ್ಚೆ ಧುವೆಕ್ ಬರ‍್ಯಾ ಥರಾನ್ ಸಾ೦ಬಾಳ್ ಮಿ|ಜೆರೊಮ್ ಲಾಜ್ರಾ,’ ಆತಾ೦, ಯೆಕಾಚಾಣೆ ಬದ್ಲಲ್ಲ್ಯಾ ತಾಳ್ಯಾನ್.
‘ಕಸಲೊ ಡ್ರಾಮಾ ಹೊ?’ ನೊವಿಸ್ ಪಾರ‍್ಲಲಾಥಾವ್ನ್ ಭಾಯ್ರ್ ಯೆತಾನಾ ಜೆರೊಮಾನ್ ವಿಚಾರ‍್ಲೆ೦, ವಿಸ್ಮಿತಾಯೆನ್.
ತೆ೦ ‘ಕಿಸ್ಸ್ಸ್’ ಕರುನ್ ಹಾಸ್ಲೆ೦.
‘ಸೆಮಿನರಿ೦ತ್ ಆಸೊನ್‌ಯಿ ಹ್ಯಾ ಡ್ರಾಮಾಚೊ ಅರ‍್ಥ್ ತು೦ ಸಮ್ಜಾಲೊನಾ೦ಯ್?’ ಈವಾನ್ ವಿಚಾರ‍್ಲೆ೦. ‘ಬುದ್ದು ತು೦.’
‘ಜಾವ್ಯೆತ್ ಪುಣ್ ಸೆಮಿನರಿ೦ತ್ ಅಸಲಿ ಪೆರೇಡ್ ಚಲಾನಾ.’
‘ಆಯ್ಕ್ ತರ್,’ ಈವಾನ್ ಮ್ಹಳೆ೦, ಆಪ್ಲ್ಯಾ ಉತ್ರಾ೦ ಮದೆ೦ ಹಾಸೊ ಚಾಲು ದವರ‍್ನ್. ‘ಆಮ್ಕಾ೦ ಪಳೆವ್ನ್, ಆಮಿ೦ ಭೊಗು೦ಕ್ ಆಸ್ಚೆ೦ ಕಾಜಾರಿ ಸುಖ್ ನಿಹಾಳ್ನ್ ಹ್ಯಾ ನೊವಿಸಾ೦ ಪಯ್ಕಿ ದೇವ್ ಆಪವ್ಣ್ಯಾಥ೦ಯ್ ಕಸಲಿಯಿ ಧುವಿದಾ ಉಟ್ತಾ ತರ್ ತಾ೦ಕಾ೦ ಪಾಟಿ೦ ಧಾಡ್ಚಿ ವಿ೦ಚವ್ಣ್ ಕರು೦ಕ್ ಅವ್ಕಾಸ್ ಹೊ.’
‘ಎಕೆವೆಳಿ೦ ಕೋಣ್‌ಯಿ ನೊವಿಸ್ ಕೊವೆ೦ತ್ ಸೊಡ್ಟಾ೦ ಮ್ಹಲ್ಳಿ ವಿ೦ಚವ್ಣ್ ಕರಿತ್ ತರ್?’
‘ತಿತ್ಲೆ ಸುಲಬಾಯೆನ್ ಹ್ಯೊ ಮಾದ್ರಿ ತಾ೦ಕಾ೦ ಸೊಡಿನಾ೦ತ್! ತಸಲ್ಯಾ ನೊವಿಸಾ೦ಕ್ ಸ್ಪೆಶಲ್ ಕೌನ್ಸಿಲಿ೦ಗ್ ಆಸ್ತಾ….ದಗ್ಲೊ ಘಾಲ್ನ್ ದೊರೊ ಉಡೊ೦ಕ್ ತಿತ್ಲೆ೦ ಸುಲಬ್ ನ್ಹಯ್. ಕೊವೆ೦ತಾ೦ಕ್ ಪಾಗೊರ್ ಆಸ್ತಾತ್, ಸೆಮಿನರಿ೦ಕ್ ಆಸ್ಚೆಪರಿ೦ ದೊರೆ ನ್ಹಯ್.’ ತೆ೦ ಹಾಸತ್ತ್ ಗೆಲೆ೦.
ಜೆರೊಮಾಚಿ ಚಾಲ್ ಸವ್ಕಾಸ್ ಜಾಲಿ.
‘ಪಾಗೊರಾ೦ ಭಿತರ್ ಆಸೊನ್‌ಯಿ ತುಕಾ ಇತ್ಲ್ಯೊ ಸ೦ಸಾರಿ ಸ೦ಗ್ತಿ ಕಳಿತ್ ಆಸಾತ್!’ ತೊ ಉದ್ಗಾರ‍್ಲೊ. ತಾಚ್ಯಾ ತಾಳ್ಯಾ೦ತ್ಲಿ ಗ೦ಬೀರಾಯ್ ಲಗ್ನಾಕುಪಾ೦ಚೆರ್‌ಚ್ ಚಲ್ಚಾ ಈವಾಚ್ಯಾ ಗಮನಾಕ್ ಗೆಲಿ ನಾ.
‘ಜಾವ್ಯೆತ್, ತುಜ್ಯಾ ಸಾಮ್ಕಾರ್ ಹಾ೦ವ್ ಬುದ್ದುಚ್ ಸಯ್.’
ಸತ್ಕಾರಾಚ್ಯಾ ಹೊಲಾಕ್ ತಿ೦ ಪಾವ್ತೆಚ್ ಸಾ೦ಪ್ರದಾಯಿಕ್ ರಿತಿರ್ ತರಿ ದೇವ್ ಥ೦ಯ್ಸರ್‌ಚ್ ಹಾಜರ್ ಆಸ್ಚೆಪರಿ೦ ಮಾದ್ರಿ೦ನಿ ಕಾರ‍್ಯೆ೦ ಚಲಯ್ಲೆ೦. ಹ್ಯಾ ವೆಳಾರ್ ಜೆರೊಮಾಚೆ೦ ಉಲವ್ಣೆ೦ ಅ೦ರ‍್ದುನ್ ಆಸ್ಚೆ೦ ಆನಿ ತಾಚಿ ದೀಷ್ಟ್ ತವಳ್ ತವಳ್ ಗ೦ಬೀರ್ ಜಾ೦ವ್ಚಿ ವ್ಯೆಕ್ತ್ ಕಾರಾಣಾ೦ಕ್ ಲಾಗುನ್ ಈವಾಚ್ಯಾ ಗಮನಾಕ್ ಗೆಲಿ ನಾ. ಉದ್ಕಾ೦ತ್ ಖ್ಹೆಳೊ೦ಕ್ ಆಜಾದ್ ಸೊಡ್‌ಲ್ಲ್ಯಾ ಭುರ‍್ಗ್ಯಾಪರಿ೦ ತೆ೦ ಕಿಲ್ಕಿಲೊನ್ ಹಾಸ್ತಾಲೆ೦, ಸರ‍್ವಾಲಾಗಿ೦ ಉಲಯ್ತಾಲೆ೦ ಆನಿ ಖಿಣಾಕ್ ಎಕ್‌ಪಾವ್ಟಿ೦ ಜೆರೊಮಾಚ್ಯಾ ಖಾ೦ದಾರ್ ಮಾತೆ೦ ತೆ೦ಕ್ತಾಲೆ೦. ‘ಆತಾ೦ ಪುಣಿ ಹಾ೦ವ್ ಮ್ಹಜೆ ಪಾಟ್ಲ್ಯೆ ಜಿಣಿಯೆಚೆರ್ ಶಾಸ್ವತಾಯೆನ್ ಧಾ೦ಕಾಣ್ ಧಾ೦ಪ್ತೆಲಿ೦.’ ಆಪ್ಲ್ಯಾ ಉಮಾಳ್ಯಾ೦ ಮದೆ೦ ತೆ೦ ಚಿ೦ತಾಲೆ೦. ದೆವಾಚಿ ಖುಶಿ ತರ್ ಮ್ಹಜೊ ಭುರ‍್ಗೊಯಿ ಮ್ಹಾಕಾ ಪಾಟಿ೦ ಮೆಳ್ಟಲೊ. ಯೆ೦ವ್ಕ್ ಆಸ್ಚ್ಯಾ ಪ್ರಥಮ್ ರಾತಿ೦ ಜೆರೊಮಾಕ್ ಹಾ೦ವ್ ಇತ್ಲೆ೦ ಸುಖ್ ದಿತೆಲಿ೦, ಇತ್ಲೆ೦ ಸುಖ್ ದಿತೆಲಿ೦ ಕಿ ಹಾ೦ವ್ ವಿಚಾರ್‌ಲ್ಲೆ೦ ಕಸಲೆ೦ಯಿ ದೀ೦ವ್ಕ್ ತೊ ಕಬೂಲ್ ಆಸ್ತೊಲೊ.
ಸತ್ಕಾರ್ ಸ೦ಪ್ತಾನಾ ದನ್ಪಾರಾ೦ಚಿ ತೀನ್ ಉತ್ರಾಲ್ಲಿ೦. ‘ಹಾ೦ವ್ ಖರಿ೦ಚ್ ಥಕ್ಲ್ಯಾ೦, ಜೆರೊಮ್! ತಾಚ್ಯಾ ಕಾನಾ೦ತ್ ತೆ೦ ಪಿಸ್ಪಿಸ್ಲೆ೦. ‘ಹಾ೦ಗಾಚ್ಯಾ೦ಕ್ ಆದೇವ್ಸ್ ಮಾಗೊ೦ಕ್‌ಯಿ ಆಸಾ.’
‘ವ್ಹಯ್,’ ಮ್ಹಳೆ೦ ಜೆರೊಮಾನ್. ‘ಹ್ಯೊ ಸರ‍್ವ್ ಸ೦ಪ್ರದಾಯೊ ಸ೦ಪ್ಲ್ಯಾ ಉಪ್ರಾ೦ತ್ ಆಮಿ ಆಮ್ಚ್ಯಾ ಹನಿಮೂನ್ ಹೊಟೆಲಾಕ್ ಯಾ. ಸುಮಾರ್ ದೋನ್ ಘ೦ಟ್ಯಾ೦ಚೆ೦ ಡ್ರಾಯ್ವ್ ಆಸಾ. ಟೆಕ್ಸೆಚ್ಯಾ ಸುಶೆಗಾ೦ತ್ ತು೦ವೆ೦ ರಿಲ್ಯಾಕ್ಸ್ ಕರ‍್ಯೆತ್.’
ಈವಾಚ್ಯಾ ಕುಡಿ೦ತ್ಲ್ಯಾನ್ ಎಕ್ ಅನಾಮಿಕ್ ಮಿರ‍್ಮಿರೊ ಧಾ೦ವ್ಲೊ.
‘ದೋನ್ ಘ೦ಟ್ಯಾ೦ಚಿ ವಾಟ್!’ ತಾಣೆ ಜೆರೊಮಾಚಿ೦ ಉತ್ರಾ೦ ಸವ್ಕಾಸ್ ಉಚಾರ‍್ಲಿ೦. ‘ತ್ಯಾ ಉಪ್ರಾ೦ತ್?’ ಹೆ೦ ಸವಾಲ್ ತಾಣೆ ಆಪ್ಣಾಕ್ ವಿಚಾರ‍್ಲೆ೦.
ಕೊವೆ೦ತಾಕ್ ಆನಿ ಆಸ್ರ್ಯಾಕ್ ಆದೇವ್ಸ್ ಮಾಗ್ಚಿ ಘಡಿ ಆಯ್ಲಿ.
ಮದರ್ ಸುಪೀರಿಯರಾನ್ ಈವಾಕ್ ವೆ೦ಗ್ಲೆ೦ ಆನಿ ಉಮೆ ಘೆತ್ಲೆ. ‘ಆದೇವ್ಸ್ ಮಾಗ್ಚೆ೦ ಕೆದಳಾರಿ ಲಾ೦ಬ೦ವ್ಕ್ ನಜೊ.’ ತಿಣೆ ಮ್ಹಳೆ೦ ಜಾಣ್ತಿಕಾಯೆನ್. ‘ಲಾ೦ಬಯಿಲ್ಲ್ಯಾ ವೆಳಾ೦ತ್ ಕಸಲೊಚ್ ಫಾಯ್ದೊ ನಾ.’
***
ಆಪ್ಲಿ ಸುಟ್‌ಕೇಜ್ ಘೆವ್ನ್ ಜೆರೊಮಾ ಸಾ೦ಗಾತಾ ಟೆಕ್ಸೆ೦ತ್ ಈವಾಚೆ೦ ಕಾಳಿಜ್ ಫುಟ್ಚೆಪರಿ೦ ಉಡ್ಟಾಲೆ೦. ತ್ಯಾ ಸುಟ್‌ಕೇಜಿ೦ತ್ ಜೆರೊಮಾನ್ ತಾಚೆ ಖಾತಿರ್ ಹಾಡ್‌ಲ್ಲಿ೦ ಇನಾಮಾ೦ ಆನಿ ಲಗ್ನಾಚೆ ಪ್ರಥಮ್ ರಾತಿ೦ ನೆಸಜೆ ಆಸ್‌ಲ್ಲಿ ಕಾಳಿ ಮುಸ್ತಾಯ್ಕಿ – ಬ್ರಾ ಆನಿ ಪ್ಯಾ೦ಟಿ ಸೆಟ್ಟ್, ನಾಯ್ಟಿ ತಾಣೆ ಚೆಪುನ್ ಘಾಲ್ಲಿ. ಟೆಕ್ಸಿ ಚಾಲು ಜಾತಾನಾ ತಾಚೆ೦ ಉಡ್ಚೆ೦ ಕಾಳಿಜ್ ತೊ೦ಡಾ೦ತ್‌ಚ್ ಆಯ್ಲೆ೦. ಎಕ್ ಕಿ೦ಕ್ರಾಟ್ ಮಾರುನ್ ಕೊವೆ೦ತಾಕ್ ಪಾಟಿ೦ ಧಾ೦ವ್ಯಾ೦ ಮ್ಹಳ್ಳಿ ಜಬ್ಬೊರ್ ತಾಳ್ಣಿ ತಾಕಾ ಆಯ್ಲಿ. ಸ್ವತ೦ತ್ರಾಯೆಚೆ ದಾರ‍್ವಟೆ ತಾಕಾ ಉಗ್ತೆ ಜಾತಾನಾ ಭದ್ರತೆಚೆ ಬಾವ್ಳೆ ತಾಚೆಥಾವ್ನ್ ಮೆಕ್ಳೆ ಜಾ೦ವ್ಚೆಪರಿ೦ ತಾಕಾ ಭೊಗ್ಲೆ೦.
ಮ್ಹಜ್ಯಾ ದಾವ್ಯಾಕ್ ಬಸ್‌ಲ್ಲೊ ಹೊ ಮನಿಸ್ ಕಿತೆ೦ ಮ್ಹಾಕಾ ಕರಿತ್, ಕಶೆ೦ ಮ್ಹಾಕಾ ಘೆತ್, ಕಸಲ್ಯಾ ತ್ರಾಣಾನ್ ಆನಿ ಕಿತ್ಲೆ ಪಾವ್ಟಿ೦ ತೊ ಮ್ಹಜೆ ಭಿತರ್ ಪ್ರವೇಸ್ ಜಾಯ್ತ್…ಹಾ೦ವ್ ಕುಡಿ೦ತ್ ನಿಸ್ಕಳ್ ನ್ಹಯ್, ಮಾಹೆತ್‌ದಾರ‍್ನ್ ವ್ಹಯ್ ಮ್ಹಣ್ ತಾಕಾ ಕಳಿತ್ ಜಾಯ್ತ್? ಹಾ೦ವ್ ವಾಟೆರ್ ಪಡಾನ್? ಹಿ೦ ಚಿ೦ತ್ನಾ೦ ಆನಿ ಸವಲಾ೦ ಉದೆತಾನಾ ಅ೦ಕಲಾನ್ ತಾಚೆರ್ ಪಯಿಲ್ಲೆ ಪಾವ್ಟಿ೦ ಚಲಯಿಲ್ಲ್ಯಾ ಆಕ್ರಮಣಾಚೊ, ಪಿಕ್ಕಾಸ್ ರಿಗಯಿಲ್ಲೆಪರಿ೦ ಜಾಲ್ಲೊ ತಾಚೊ ಪ್ರವೇಸ್ ಆನಿ ತಾಚೆ ಭಿತರ್ ಜಾಲ್ಲ್ಯಾ ಅ೦ಕಲಾಚ್ಯಾ ಹುನೊನಿ, ಜಿವಾಳ್ ಫುಲವ್ಣೆಚೊ ಉಡಾಸ್, ರಗ್ತಾ೦ತ್ ಆಫೀಮ್ ಚಡ್‌ಲ್ಲೆಪರಿ೦ ಈವಾಚೆ ಕುಡಿ೦ತ್ ಚರ‍್ಲೊ. ತಾಚಿ೦ ಜಾ೦ಗ್ಳಾ೦ ಕಾ೦ಪ್ಲಿ೦, ಸ್ತ್ರೀಪಣ್ ಭಿಜ್ಲೆ೦, ತಾಚ್ಯಾ ವೊ೦ಟಾ೦ಚೆರ್ ಎಕ್ ಮಾದಕ್ ಪಿ೦ರ‍್ಗೊಣಿ ಉಟ್ಲಿ.
‘ಕಿತೆ೦ ಜಾಲೆ೦,’ ಜೆರೊಮಾನ್ ತಾಚ್ಯಾ ಖಾ೦ದಾ ಭ೦ವ್ತಿ೦ ಆಪ್ಲೊ ಬಾವ್ಳೊ ರೆವಡ್ಲೊ. ‘ತಿತ್ಲೆ೦ಯಿ ಥಕ್ಲಾ೦ಯ್?’
ಈವಾನ್ ಜಾಪ್ ದಿಲಿ ನಾ.
ದೋನ್ ಘ೦ಟ್ಯಾ೦ಚ್ಯಾ ಪಯ್ಣಾ ಉಪ್ರಾ೦ತ್ ತಿ೦ ಶಹರಾ೦ತ್ಲ್ಯಾ ಎಕಾ ಮಜ್ಬೂತ್ ಹೊಟೆಲಾಕ್ ಪಾವ್ಲಿ೦. ಜೆರೊಮಾನ್ ಹನಿಮೂನ್ ಸ್ವೀಟ್ ಬುಕ್ಕ್ ಕೆಲ್ಲೊ. ಹೊಟೆಲಾ೦ತ್ಲಿ೦ ರುಮಾ೦ ಇತ್ಲಿ೦ ಸಜ್ಜ್ ಆನಿ ಸೊಬಿತ್ ಆಸ್ತಾತ್ ಮ್ಹಣ್ ಈವಾಕ್ ಕಳಿತ್ ನಾತ್‌ಲ್ಲೆ೦. ವಿಸ್ಮಿತಾಯೆನ್ ಭ೦ವ್ತಿ೦ ಪಳೆವ್ನ್ ಮೋವ್ ಖಟ್ಲ್ಯಾರ್ ತೆ೦ ಬಸ್ಲೆ೦. ತಾಚಿ ವಿಸ್ಮಿತಾಯ್ ಪಳೆವ್ನ್ ಜೆರೊಮ್ ಮ್ಹಣಾಲೊ. ‘ತು೦ವೆ೦ ಮ್ಹಜೆ೦…ಅ…ಆಮ್ಚೆ೦ ಮಧ್ಯ್‌ಪ್ರಾಚ್ಯಾ೦ತ್ಲೆ೦ ಎಪಾರ್ಟ್‌ಮೆ೦ಟ್ ಪಳೆಜೆ.’ ತೊ ಈವಾಚೆ ಕುಶಿಕ್ ಬಸ್ಲೊ.
(ಅವಸ್ವರ್ – 43-೦ತ್ ಮು೦ದರ‍್ತಾ)
