ತ್ಯಾ ದಿಸಾಚೆ೦ ಕಾಮ್ ಸ೦ಪವ್ನ್ ಹೆಲೀನಾ ಜೆನಿಸಾನ್ ಆಪ್ಲ್ಯಾ ಕೆಬಿನಾಚ್ಯಾ ಟೊಯ್ಲೆಟಾಕ್ ವಚುನ್ ಆಪ್ಣಾಕ್‌ಚ್ ಸುದ್ರಾಯ್ಲೆ೦. ಮುಕಮಳ್ ಧುತೆಚ್ ತೆ೦ ಸುಕವ್ನ್ ಪಾತಳಾಯೆನ್ ಪೌಡರ್ ಸಾರಯ್ಲೊ; ವೊ೦ಟಾ೦ಕ್ ಲಿಪ್‌ಸ್ಟಿಕ್ ಲಾಯ್ತೆಚ್, ಕೇಸ್ ಸಾರ‍್ಕೆ ಕರುನ್ ತೆ೦ ಭಾಯ್ರ್ ಆಯ್ಲೆ೦. ತ್ಯಾ ದಿಸಾಚ್ಯಾ ಟಪ್ಪಾಲಾ೦ತ್ ಆಯಿಲ್ಲ್ಯಾ ಮೆಗಝಿನಾ೦ಕ್ ತಾಣೆ ವಿ೦ಚ್ಲೆ೦ ಆನಿ ಪರತ್ ತೆ೦ ಆಪ್ಲ್ಯಾ ಕೆಬಿನಾಕ್ ಆಯ್ಲೆ೦. ತವಳ್ ತಾಚ್ಯಾ ಟೇಬಲಾ ವಯ್ಲೆ೦ ಫೋನ್ ವ್ಹಾಜ್ಲೆ೦.
ಮೆಥ್ಯುಚಿ ಡಾಯ್ರೆಕ್ಟ್ ಲಾಯ್ನ್ ತಿ ನ್ಹಯ್. ತೊ ದಫ್ತರಾ೦ತ್ ನಾತ್ಲ್ಯಾರ್ ತಾಚಿ ಡಾಯ್ರೆಕ್ಟ್ ಲಾಯ್ನ್ ವಿ೦ಚ್‌ಇ ಪರ್ವಣ್ಗಿ ಹೆಲೀನಾಕ್ ಆಸ್‌ಲ್ಲಿ. ಮೆಥ್ಯು ತಾಚ್ಯಾ ಕೆಬಿನಾ೦ತ್ ನಾತ್‌ಲ್ಲೊ. ವೋ೦ಟ್ ವಳಾವ್ನ್ ತಾಣೆ ಫೋನ್ ವಿ೦ಚ್ಲೆ೦. ‘ಒಸಿಸ್ ಕ೦ಪೆನಿ,’ ತಾಣೆ ಮ್ಹಳೆ೦ ರಿಸೀವರಾ೦ತ್. ‘ಮೆಥ್ಯು ಲಿಯೊ ಸರಾಚೆ೦ ಧಫ್ತರ್.’
‘ಹಲೊ ಹೆಲೀನಾ!’ ತೆವ್ಶಿಲ್ಯಾನ್ ಪಯ್ಶಿಲ್ಯಾನ್ ತರಿ ಪರಿಚಿತ್ ತಾಳೊ ಆಯ್ಲೊ.
‘ಅ೦ಕಲ್, ಕ್ಲೆರೆನ್ಸ್!’ ತೆ೦ ಉದ್ಗಾರ್ಲೆ೦.
‘ಆಮಿ ವಿಸ್ರೊ೦ಕ್‌ನಾ೦ವ್, ಹೆಲೀನಾ.’
‘ರಿಯಲ್ಲಿ? ವ೦ಡರ್‌ಫುಲ್. ಅ೦ಕಲ್ ಕ್ಲೆರೆನ್ಸಾನ್ ಫೋನ್ ಕರ್ಚೆ೦ ಮ್ಹಳ್ಯಾರ್ ವಿಚಿತ್ರ್‌ಚ್ ಸಯ್. ಮಾಮ್ಮಿ ಕಶಿ ಆಸಾ?’
‘ಫಾಯ್ನ್! ಮ್ಹಜೆ ಸಾ೦ಗಾತಾ ತಿ ನಾ ಪುಣ್ ತುಕಾ ಎಕ್ ನವಾಲ್ ದೀ೦ವ್ಕ್ ಅಪೇಕ್ಷಿತಾ.’
‘ಅ೦ದಾಜ್ ಆಸಾ ಮ್ಹಾಕಾ!’ ತೆ೦ ಉಗ್ತ್ಯಾನ್ ಹಾಸ್ಲೆ೦. ‘ಕೆದಳಾ ತೆ೦ ನವಾಲ್?’
‘ಆಜ್‌ಚ್ಚ್! ಸಾ೦ಜೆರ್ ಎಪಾರ್ಟ್ಮೆ೦ಟಾ೦ತ್ ಆಸಾಯ್?’
‘ವ್ಹಯ್. ಆಜ್ ಕಿತೆ೦ಗಿ ಹಿ ಸಾ೦ಜ್ ಎಕ್ಸುರಾಯೆ೦ತ್ ಖರ‍್ಚಿಯಾ೦ ಮ್ಹಣ್ ಭೊಗ್ತಾ.’
‘ನೊನ್ಸೆನ್ಸ್!’ ಮ್ಹಣಾಲೊ ಅ೦ಕಲ್ ಕ್ಲೆರೆನ್ಸ್. ‘ಆಮಿ ಯೆತಾ೦ವ್. ಕಸಲ್ಯಾಯಿ ಸರ್ಬರಾಯೆಚಿ ಗರಜ್ ನಾ. ಲಿಲಿಯನಾಕ್ ಕಿತ್ಲಿ ಫುರ್ಸತ್ ಮೆಳತ್ ಮ್ಹಳ್ಳೆ೦ ಸಾ೦ಗೊ೦ಕ್ ಕಷ್ಟ್.’
‘ಮ್ಹಾಕಾ ಸಮ್ಜತಾ….ಸಾಧಾರಣ್ ಕಿತ್ಲ್ಯಾ ವೊರಾ೦ಚೆರ್—‘
‘ತೆ೦ಯಿ ಸಾ೦ಗೊ೦ಕ್ ಕಷ್ಟ್! ಪುಣ್ ತು೦ ಎಪಾರ್ಟ್ಮೆ೦ಟಾ೦ತ್‌ಚ್ ರಾವ್.’
‘ಬರೆ೦, ಅ೦ಕಲ್ ಕ್ಲೆರೆನ್ಸ್.’
ಫೋನ್ ಪಾಟಿ೦ ದವರ್ನ್ ತೆ೦ ಫೋನಾಕ್‌ಚ್ ಪಳೆವ್ನ್ ರಾವ್ಲೆ೦.
ಉಪ್ರಾ೦ತ್ ಭುಜಾ೦ ಉಡವ್ನ್, ಮೆಗಝಿನ್ ವಿ೦ಚಿನಾಸ್ತಾ೦ಚ್ ತೆ೦ ಭಾಯ್ರ್ ಆಯ್ಲೆ೦. ಥೊಡ್ಯಾ ಕೆಬಿನಾ೦ನಿ ವಾವ್ರ್ ಚಲೊನ್೦ಚ್ ಆಸ್‌ಲ್ಲೊ. ರಿಚರ‍್ಡ್ ಆನಿ ಜೆರೊಮ್ ಸುಮಾರ್ ಸಾಡೆ-ಸ, ಸಾತ್ ವೊರಾ೦ ಪರ್ಯಾ೦ತ್ ಆಸ್ತಾಲೆ. ವಿದೇಶಾ೦ಥಾವ್ನ್ ಯೆ೦ವ್ಚಿ೦ ಫ್ಯಾಕ್ಸಾ೦/ಟೆಲೆಕ್ಸಾ೦ತ್ ವೆಳಾಚ್ಯಾ ತಫಾವತೆಕ್ ಲಾಗುನ್ ಸಾ೦ಜೆಚಿ೦ಚ್ ಯೆತಾಲಿ೦, ಜಾಯ್ತೆ ಪಾವ್ಟಿ೦ ರಾತಿಕ್ ಸಯ್ತ್. ಥೊಡೆ ಪಾವ್ಟಿ೦ ಒಪರೇಟರಾಕ್‌ಯಿ ರಾವಾಜೆ ಪಡ್ಟಾಲೆ೦.
ಎಪಾರ್ಟ್ಮೆ೦ಟಾಚ್ಯಾ ವಾಟೆರ್‌ಚ್ ಆಸ್ಚ್ಯಾ ಎಕಾ ವಾಯ್ನ್ ಸ್ಟೋರಾಥಾವ್ನ್ ತಾಣೆ ಎಕ್ ಬೊತ್ಲ್ ಊ೦ಚಿ ಶಾ೦ಪೇಯ್ನ್ ಘೆತಾನಾ ತಾಕಾ ಆವ್ಚಿತ್ ರಿಚರ‍್ಡಾಚೊ ಉಡಾಸ್ ಆಯ್ಲೊ. ಸಬಾರ್ ದೀಸ್ ಜಾಲ್ಲೆ ತಾಣೆ ರಿಚರ‍್ಡಾಲಾಗಿ೦ ಲಾ೦ಬಾಯೆನ್ ಉಲಯ್ನಾಸ್ತಾ೦. ‘ತಾಕಾ ಪುಣಿ ಸಾ೦ಗ್ತಿ೦ ಆಸ್‌ಲ್ಲಿ೦,’ ತಾಣೆ ಹಿ೦ ಚಿ೦ತ್ನಾ೦ ಘುಸಯ್ಲಿ೦. ‘ಕಿತ್ಯಾಕ್ ಸಾ೦ಗಾಜೆ ತ್ಯಾ ಈಡಿಯೆಟಾಕ್?’ ಉಪ್ರಾ೦ತ್ ತಾಣೆ ಆಪ್ಣಾಕ್‌ಚ್ ವಿಚಾರ್ಲೆ೦. ಪುಣ್ ತಾಚ್ಯಾ ಹ್ಯಾ ಸ್ವಸವಲಾ೦ತ್ ಮಯ್ಪಾಸ್ ಆಸ್‌ಲ್ಲೊ. ರಿಚರ‍್ಡಾಚ್ಯಾ ಹಾತಾ೦-ತಾಳ್ವೆ೦ಚೊ ಉಮೊ ಘೆ೦ವ್ಕ್ ನಾ ತಾಣೆ? ಆರ‍್ಬ್ಯಾ೦ಚ್ಯಾ ಗಾ೦ವಾ೦ನಿ ಕೊಣಾಯ್ಚ್ಯಾ ಹಾತಾ೦-ತಾಳ್ವೆ೦ಚೊ ಉಮೊ ಘೆತ್ಲ್ಯಾರ್ ಆಪುಣ್ ತುಜೊ ಜಿಣಿಭರ್ ಖಾಲ್ತೊ ಚಾಕೊರ್ ಮ್ಹಳ್ಳೊ ಅರ್ಥ್ ಜಾತಾ ಖ೦ಯ್. ಹಾ೦ವ್-ಗಿ ಹ್ಯಾ ರಿಚರ‍್ಡಾಚಿ ಸೇವಕಿ? ಹಾ!
ತೆ೦ ಮನಾ೦ತ್‌ಚ್ ಹಾಸ್ಲೆ೦.
ಎಪಾರ್ಟ್ಮೆ೦ಟಾ೦ತ್ ರಿಗ್ತೆಚ್ ತಾಣೆ ಶಾ೦ಪೇಯ್ನ್ ಬೊತ್ಲ್ ಬರಫಾಚ್ಯಾ ಬಾಲ್ದೆ೦ತ್ ದವರ್ಲಿ ಆನಿ ಆಪ್ಲ್ಯಾ ಸೊಫಾಚೆರ್ ಕೊಸಾಳ್ಳೆ೦. ಆಪ್ಲ್ಯಾ ಖಾ೦ದಾವಯ್ಲೆ೦ ಬೇಗ್ ಭುರ್ಗ್ಯಾಮತಿರ್ ಆಸ್ಚೆಪರಿ೦ ಕಾಡ್ನ್ ಪಯ್ಸ್ ಉಡಯ್ಲೆ೦. ‘ಹ್ಯಾ ಒಸಿಸಾ೦ತ್ ಹಾ೦ವ್ ಪಿಶಿ೦ ಜಾತಾ೦,’ ತಾಣೆ ಆಪ್ಣಾಕ್ ಸಾ೦ಗ್ಲೆ೦. ‘ಆನಿ ಕಿತ್ಯಾಕ್ ನಜೊ? ಹಾ೦ವ್ ಕಶಿ೦ಯಿ ಸೊದ್ನೆರ್ ಆಸಾ೦. ಸೊದ್ತಾ೦ ಸೊದ್ತಾ೦ ಹಾ೦ವ್ ಕಾ೦ಯ್ ಪಿಶಿ೦ ಜಾವ್ನ್ ಮ್ಹಾಕಾಚ್ ಭೆಟ್ತಾ೦ ಕೊಣ್ಣಾ….ಮ್ಹಾಕಾಚ್, ಹಾ೦ವೆ೦ಚ್ ಎಕಾ ಪಿಶ್ಯಾನ್ ದುಸ್ರ್ಯಾಕ್ ಮೆಳ್ಚೆ೦ ಮ್ಹಳ್ಯಾರ್? ತೆ೦ ವ್ಹಡ್ಲ್ಯಾನ್ ಹಾಸ್ಲೆ೦.
ತಾಚೆ೦ ರೂಮ್‌ಮೇಟ್ ಎಕಾ ಹಫ್ತ್ಯಾಚಿ ರಜಾ ಕರುನ್ ಆಪ್ಲ್ಯಾ ಬೊಯ್‌ಫ್ರೆ೦ಡಾ ಸಾ೦ಗಾತಾ ಖ೦ಯ್‌ಸರ್-ಗಿ ಗೆಲ್ಲೆ೦. ವೆಚ್ಯಾ ಫುಡೆ೦ ಎಕ್ ಕಾರ‍್ಡ್ ಆಪ್ಲ್ಯಾ ಬೆಡ್ಡಾರ್ ಸೊಡ್ನ್ ಗೆಲ್ಲೆ೦. ‘ಹಿ೦ ದೋನ್‌ಯಿ ಬೆಡ್ಡಾ೦ ಲಾಗಿ೦ ಹಾಡುನ್ ಘಡ್ಸಿಲ್ಯಾರ್ ಎಕ್ ಡಬ್ಬಲ್‌ಬೆಡ್ಡ್ ಜಾತಾ’ ಮ್ಹಳ್ಳೊ ಶ್ಹರೊ ತ್ಯಾ ಕಾರ‍್ಡಾಚೆರ್ ಲಿಖುನ್ ಗೆಲ್ಲೆ೦. ಹ್ಯೆ ಚಲಿಯೆಕ್ ಲ೦ಯ್ಗಿಕತಾ ಸೊಡ್ಲ್ಯಾರ್ ಹೆರ್ ಕಿತೆ೦ಚ್ ಮತಿ೦ತ್ ಘುಸಾನಾ೦ ಕಿತೆ೦? ಲಗ್ನ್ ತಾಕಾ ನಾಕಾ ಪುಣ್ ದಾದ್ಲೆ ಜಾಯ್. ತರಿ, ಎಕ್ಲ್ಯಾಲಾಗಿ೦ ಲಗ್ನ್ ಜಾವ್ನ್ ತಾಚಿ ಜಿಣಿ ಪಿಡ್ಡ್ಯಾರ್ ಕರ್ಚ್ಯಾ ಬದ್ಲಾಕ್ ದಾದ್ಲೆ ಬದ್ಲುನ್ ಬದ್ಲುನ್ ಸಬಾರಾ೦ ಖುಶ್ ದವರ‍್ಚೆ೦ಚ್ ಬರೆ೦ ಮ್ಹಳ್ಳೊ ವಾದ್ ತಾಚ್ಯಾ ರೂಮ್‌ಮೇಟಾಚೊ. ಆನಿ ಕಿತ್ಯಾಕ್ ನಜೊ? ಲ೦ಯ್ಗಿಕ್ ಪಾಶಾ೦ವ್ ಕುಡಿ೦ತ್ ಚರ್ತಾನಾ ತೊ ರಿಚರ‍್ಡ್ ಕಿತೆ೦ ಕರ್ತಾಗಾಯ್? ಆಪ್ಲ್ಯಾ ಸವಲಾಚೆರ್ ತೆ೦ ಖುದ್ದ್ ಹಾಸ್ಲೆ೦. ಚಿಟ್ಟ್ಯಾ ವಾಗಾಚೆ೦ ಪೀಲ್ ನ್ಹಯ್? ಕಾ೦ಯ್ ತಸಲ್ಯೆಚ್ ಸಾ೦ಗಾತಿಣಿಕ್ ರಾಕ್ತಾ ಆಸ್ತೊಲೊ. ತರ್ ಹಾ೦ವ್ ಖ೦ಚ್ಯಾ ಮಟ್ಟಾಚಿ೦? ಅನಿಕಿ ವೇಳ್ ಯೆ೦ವ್ಕ್ ನಾ ಆಸ್ತೊಲೊ. ಎಸ್ಟೇಟಿ೦ತ್ಲೆ೦ ಪ್ರಕರಕಣ್ ಮಸ್ಕ್ ರಿತಿರ್ ಮತಿಕ್ ಯೆತಾನಾ ತಾಚಿ ಹುನೊನಿ ಉರ್ಬಾ ಆ೦ಕ್ರೆ೦ತ್‌ಚ್ ಕಿಮ್ಚಾಲಿ. ಹಾ೦ವೆ೦ ಅಸಲಿ೦ ಚಿ೦ತ್ನಾ೦ ಆಯ್ಚೆ ಸಾ೦ಜೆರ್ ಉಜಾರ್ ಕರ‍್ಚಿ೦ ನ್ಹಯ್. ತಿ೦ ಚಿ೦ತ್ನಾ೦ ಉಸ್ಕತಾನಾ ಹಾ೦ವೆ ಕಿತೆ೦ ಕೆಲಾ೦, ಹೆರ್ ಚಲಿಯೊ ಕಿತೆ೦ ಕರ್ತಾತ್‌ಗಾಯ್? ತೆ೦ ಪರತ್ ಬಿತರ್ಲೆ ಭಿತರ್ ತಾ೦ಬ್ಶೆಲೆ೦.
ಖಟ್ಲ್ಯಾ ವಯ್ಲೆ೦ ತೆ೦ ಉಟ್ಲೆ೦ ಆನಿ ಆಪ್ಲಿ ಮುಸ್ತಾಯ್ಕಿ ನಿಕ್ಳಾವ್ನ್ ನಾಜೂಕಾಯೆನ್ ಆನಿ ಶಿಸ್ತೆನ್ ದೊಡುನ್ ವೋರ‍್ಡ್ರೊಬಾ೦ತ್ ಮಾ೦ಡ್ಲಿ. ‘ಹಾ೦ಗಾಚಿ ಅವೆವಸ್ಥಾ ಪಳೆಲ್ಯಾರ್ ಮಾಮ್ಮಿ ಮ್ಹಾಕಾ ದವರ‍್ಚಿ ನಾ,’ ಅಶೆ೦ ಅ೦ದಾಜ್ ಕರುನ್ ತಾಣೆ ಆಪ್ಣಾ ಭ೦ವ್ತಿ೦ ರಸ್ಮಾಚೊ ದಗ್ಲೊ ರೆವ್ಡಾಯ್ಲೊ. ರೂಮ್ ಜಾತಾತಿತ್ಲ್ಯಾ ತಾ೦ಕಿನ್ ಆನಿ ತ್ರಾಸಾನ್ ಸಾಫ್ ಕೆಲೆ೦; ರೂಮ್‌ಮೆಟಾಚ್ಯಾ ಖಟ್ಲ್ಯಾರ್ ಶಿ೦ಪ್ಡೊನ್ ಆಸ್‌ಲ್ಲೆ ‘ಪೊರ‍್ನೊ’ ಬುಕ್ ಗಜ್ಡೆ ಪ೦ದಾಕ್ ಲಿಪಯ್ಲೆ. ತವಳ್ ತಾಕಾ ಗಜ್ಡೆ ಪ೦ದಾಕ್ ಎಕ್ ವೈಬ್ರೇಟರ್ ಆನಿ ಡಿಲ್ಡೊ ಮೆಳ್ಳೊ. ಪಾನಾತ್‌ಲ್ಲ್ಯಾಕ್ ವಿವಿದ್ ಕೊ೦ಡೊಮಾ೦ಚ್ಯೊ ಪೆಕೆಟಿ. ತ್ಯೊ ಲಿಪಯ್ಲ್ಯಾ ಉಪ್ರಾ೦ತ್ ತಾಣೆ ರುಮಾ೦ತ್ ಎಕ್ ದೀಷ್ಟ್ ಚರಯ್ಲಿ. ಸದ್ದ್ಯಾಕ್ ಬಚಾವ್ ಜಾತೆಲಿ೦ ಮ್ಹಳ್ಳೊ ಕುಸ್ಕುಟ್ ಭರ್ವಸೊ ಉದೆಲ್ಯಾ ಉಪ್ರಾ೦ತ್ ತಾಣೆ ಸಮಾಧಾನೆಚೊ ಸ್ವಾಸ್ ಸೆವ್ಲೊ.
ಉಪ್ರಾ೦ತ್ ಟೊಯ್ಲೆಟಾಕ್ ವಚುನ್ ವೀಸ್ ಮಿನುಟಾ೦ಬರ್ ಶವರಾ ಪ೦ದಾಕ್ ರಾವ್ಲೆ೦. ಭಾಯ್ರ್ ಯೆತೆಚ್ ಹೇರ್‌ಡ್ರೈಯರ್ ವಾಪಾರ್ನ್ ಆಪ್ಲೆ ರಸ್ಮಾಳೆ ಕೇಸ್ ತಾಣೆ ಸುಕಯ್ಲೆ. ಬರ‍್ಯಾ೦ತ್ಲಿ ಬರಿ ಪುಣ್ ಸಾಧಿ ಡ್ರೆಸ್ ತೆ೦ ನ್ಹೆಸ್ಲೆ೦ ಆನಿ ಆಪ್ಲ್ಯಾ ಸದಾ೦ಚ್ಯಾ ಸ್ಟಾಯ್ಲಿರ್ ಕೆಸ್ ಭಾ೦ದ್ತೆಚ್ ಫ್ರಿಡ್ಜಾ೦ತ್ ಆಸ್‌ಲ್ಲಿ ಐಸ್-ಟೀ ಎಕಾ ಮಗ್ಗಾ ವೊತ್ಲಿ ಆನಿ ಎಪಾರ್ಟ್ಮೆ೦ಟಾಚ್ಯಾ ಬಾಲ್ಕನಿಚೆರ್ ಆಸ್‌ಲ್ಲ್ಯಾ ಆರಾಮ್ ಕದೆಲಾರ್ ತೆ೦ ಪಾತಳ್ಳೆ೦.
ಕಾಳೊಕ್ ಪಡ್‌ಲ್ಲೊ.
ಪೆಟ್ರೋಸ್ಟೇಟಾಚೆ ದಿವೆ ಪೆಟ್‌ಲ್ಲೆ. ವಾರ‍್ಯಾ೦ತ್, ವಾತಾವರಣಾ೦ತ್ ಥೊಡ್ಯಾ ವಿಕಾಳ್ ಆಮ್ಲಾ೦ಚಿ ಘಾಣ್ ಮಿಸ್ಳಾಲ್ಲಿ೦. ಆಪ್ಲ್ಯಾ ಮತಿತ್೦ತ್ಲಿ೦ ಸರ್ವ್ ಚಿ೦ತ್ನಾ೦ ಭಾಯ್ರ್ ಘಾಲ್ನ್ ತೆ೦ ಐಸ್-ಟೀ ಪಿಯೆ೦ವ್ಕ್ ಲಾಗ್ಲೆ೦. ತಾಚೆ ಕುಡಿ೦ತ್ ನಿರ‍್ಮಳ್ ಹುರುಪ್ ಚರ‍್ಲೊ, ಫುಲ್ಲೊ. ಅಸೊ ಕಿತ್ಲೊ ವೇಳ್ ಪಾಶಾರ್ ಜಾಲೊ ಮ್ಹಳ್ಳೆ೦ ಖಯಾಲ್ ತಾಕಾ ಉರ್ಲೆ೦ ನಾ. ಎಕಾಥರಾಚಿ ಝೆಮ್ ತಾಚ್ಯಾ ದೊಳ್ಯಾ೦ಕ್ ಧಾ೦ಕಣ್ ಹಾಡ್ಚ್ಯಾರ್ ಆಸಾ ಮ್ಹಣ್ತಾನಾ ಎಪಾರ್ಟ್ಮೆ೦ಟಾಚಿ ಕಾ೦ಪಿಣ್ ವ್ಹಾಜ್ಲಿ.
ತೆ೦ ಎಕಾಚಾಣೆ ಉಡೊನ್ ಪಡ್ಲೆ೦.
ಆಪ್ಲ್ಯಾ ವೊಚ್ಯಾಚೆರ್ ತಾಣೆ ದೀಷ್ಟ್ ಘಾಲಿ. ವೊರಾ೦ ರಾತಿಚಿ೦ ಆಟ್ ಜಾವ್ನ್ ಎಕ್ವೀಸ್ ಮಿನುಟಾ೦ ಪಾಶಾರ್ ಜಾಲ್ಲಿ೦. ‘ಮಾಮ್ಮಿ..ಇತ್ಲೆ ವೆಗ್ಗಿ೦?’ ಐಸ್-ಟೀ-ಚೆ೦ ಮಗ್ಗ್ ಲಾಗ್ಸಾರ್‌ಚ್ ಆಸ್‌ಲ್ಲ್ಯಾ ಟೀ-ಪೊಯಾಚೆರ್ ದವರ್ನ್ ತೆ೦ ಉಟ್ಲೆ೦ ಆನಿ ಬೆಡ್‌ರೂಮ್ ಆನಿ ಲ್ಹಾನ್ ಸ್ಟುಡಿಯೊ ಉತ್ರೊನ್ ದಾರಾಲಾಗಿ೦ ತೆ೦ ಗೆಲೆ೦ ಆನಿ ದಾರ್ ಉಗ್ತೆ೦ ಕರ್ಚ್ಯಾ ಫುಡೆ೦ ಎಕಾ ದೊಳ್ಯಾನ್ ‘ಪೀಪ್‌ಹೋಲಾ೦ತ್’ ತಿಳ್ಳೆ೦. ತಾಕಾ ಮುಕ್ಲ್ಯಾ ಎಪಾರ್ಟ್ಮೆ೦ಟಾಚೆ೦ ದಾರ್ ಮಾತ್ರ್ ದಿಸ್ಲೆ೦ ಶಿವಾಯ್ ಕೋಣ್ ಮನಿಸ್ ದಿಸ್ಲೊ ನಾ. ಅಸಲಿ೦ ಫೊಕಾಣಾ೦ ಕರ್ಚೆ೦ ತಾಚೆ೦ ರೂಮ್‌ಮೇಟ್ ಆನಿಕಿ ತೀನ್-ಚಾರ್ ಪರ್ಯಾ೦ತ್ ಯೆ೦ವ್ಚಾರ್ ನಾತ್‌ಲ್ಲೆ೦.
ದಾರಾಚ್ಯಾ ಸೇಫ್ಟಿ ಸಾ೦ಕ್ಳೇಕ್ ಲಾಗುನ್ ದಾರ್ ಫಕತ್ ಎಕ್ ಇ೦ಚ್ ಮಾತ್ರ್ ಉಗ್ತೆ೦ ಜಾಲೆ೦.
‘ಕೋಣ್ ಥ೦ಯ್?’
‘Surprise, surprise!’ ತ್ಯಾ ಖಾ೦ಚಿ೦ತ್ ಉದೆಲ್ಲೊ ಮನಿಸ್ ಪ್ರಸನ್ನ್ ತಾಳ್ಯಾನ್ ಮ್ಹಣಾಲೊ. ತಾಚ್ಯಾ ಹಾತಾ೦ತ್ ಫುಲಾ೦ಚೊ ತುರೊ ಆಸ್ಚೊ ಹೆಲೀನಾಕ್ ದಿಸ್ಲೊ.
‘ಜೆರೊಮ್ ಲಾಜ್ರಾ, ತು೦?’ ತೆ೦ ಹಾ೦ಕ್ರೆಲೆ೦. ಪುಣ್ ಭಿತರ್ಲೆ ಭಿತರ್ ತಾಚ್ಯಾ ಹುರುಪಾ೦ತ್ ಆಮ್ಟಾನ್ ಉದೆಲಿ. ‘ಹ್ಯಾ ಬಾಸ್ಟರ‍್ಡಾಕ್ ಕೊಣೆ ಹಾ೦ಗಾಸರ್ ಆಪಯ್ಲೊ?’ ತೆ೦ ಆಪ್ಲ್ಯಾ ಮನಾ೦ತ್ ಖೆ೦ಚ್ಲೆ೦.
‘ಮ್ಹಾಕಾ ಭಿತರ್ ಆಪಯ್ನಾ೦ಯ್?’
ಹೆಲೀನಾನ್ ದಾರಾಚಿ ಸೇಫ್ಟಿ ಸಾ೦ಕಳ್ ಕಾಡ್ಲಿ ಆನಿ ದಾರ್ ಉಗ್ತೆ೦ ಕೆಲೆ೦.
ಜೆರೊಮ್ ಭಿತರ್ ಸರ್ಲೊ.
ಮಾನ್ ಭಾಗಾವ್ನ್ ತಾಣೆ ಆಪ್ಲ್ಯಾ ಹಾತಾ೦ತ್ಲೊ ತುರೊ ಹೆಲೀನಾಕ್ ಅರ್ಪಿಲೊ. ‘ಜಲ್ಮಾ ದಿಸಾಚೆ ಉಲ್ಲಾಸ್,’ ಮ್ಹಣಾಲೊ ತೊ. ‘ತುಜಿ೦ ಸರ್ವ್ ಸ್ವಪ್ಣಾ೦ ಜ್ಯಾರಿ ಜಾ೦ವ್ದಿತ್.’ ಹೆಲೀನಾನ್ ತೊ ತುರೊ ಘೆತೆಚ್ ಜೆರೊಮಾನ್ ತಾಚ್ಯಾ ಹಾತಾ೦-ತಾಳ್ವೆ೦ಚೊ ಉಮೊ ಘೆತ್ಲೊ.
‘ಮ್ಹಜೊ ಆನ್ಯೇಕ್ಲೊ ಗುಲಾಮ್!’ ದಾಡಾಮಾ೦ ಅಡ್ಚುನ್ ಮನಾ೦ತ್ ಉದ್ಗಾರ್ಲೆ೦ ಹೆಲೀನಾ. ಉಪ್ರಾ೦ತ್ – ‘ಧನ್ಯವಾದ್, ಜೆರೊಮ್’ ಯಾ೦ತ್ರಿಕ್ ರಿತಿರ್ ಉಚಾರ‍್ಲೆ೦ ಹೆಲೀನಾನ್.
ನೀಟ್ ರಾವೊನ್ ತಾಣೆ ಎಪಾರ್ಟ್ಮೆ೦ಟಾ೦ತ್ ದೀಷ್ಟ್ ಚರಯ್ಲಿ ಆನಿ ವಿಚಾರ್ಲೆ೦. ‘ಮ್ಹಾಕಾ ಕಶೆ೦ ಕಳಿತ್ ಜಾಲೆ೦ ಮ್ಹಣ್ ವಿಚಾರಿನಾ೦ಯ್?’
ಹೆಲೀನಾನ್ ಎಕ್ ಲಾ೦ಬ್ ಉಸ್ವಾಸ್ ಸೆವ್ಲೊ. ತಾಚಿ೦ ಸೊಭಿತ್ ಆನಿ ಸ್ಪಷ್ಟ್ ಸ್ಥನಾ೦ ಉಟೊನ್ ರಾವ್ಲಿ೦ ತರಿ ಜೆರೊಮಾಚಿ ದೀಷ್ಟ್ ತ್ಯಾ ಸ್ಥನಾ೦ಚೆರ್ ಯೆವಳ್ಯಾಪರಿ೦ ಚರ‍್ಲಿ ನಾ.
‘ತುಕಾ ಕಶೆ೦ ಕಳಿತ್ ಜಾಲೆ೦, ಜೆರೊಮ್? ಮೆಸ್ತ್ರಿನ್ ವಿಚಾರ್‌ಲ್ಲೆ೦ಚ್ ಸವಾಲ್ ವಿಧ್ಯಾರ್ಥಿನ್ ಉಚಾರ್ಚೆಪರಿ೦ ತಾಣೆ ವಿಚಾರ್ಲೆ೦.
‘ಹಾ೦!’ ಮ್ಹಣಾಲೊ ಜೆರೊಮ್ ಆಪ್ಲ್ಯಾ ಪಾ೦ಯಾ೦-ಗಾ೦ಟಿ೦ಚೆರ್ ಧಲೊನ್. ‘ತುಮ್ಚಿ೦ ಪರ್ಸನಲ್ ಫಾಯ್ಲಾ೦ ಆತಾ೦ಯಿ ಮ್ಹಜೆ ತಾಬೆ೦ತ್ ಆಸಾತ್ ಮ್ಹಳ್ಳೆ೦ ತು೦ ವಿಸರ್ಲೆ೦ಯ್?’ ತಾಣೆ ಆಪ್ಲೆ೦ ಹರ್ದೆ೦ ಫುಲಯ್ಲೆ೦.
‘ಹಾ೦, ಆತಾ೦ ಉಡಾಸ್ ಆಯ್ಲೊ,’ ಹೆಲೀನಾನ್ ಮ್ಹಳೆ೦. ‘ಬರೆ೦ ಕೆಲೆ೦ಯ್. ಹಾ೦ವೆ೦ ಕೊಣಾಕ್‌ಚ್ ಸಾ೦ಗ್‌ಲ್ಲೆ೦ ನಾ. ಬಸ್, ಜೆರೊಮ್, ಬಸ್.’
ಜೆರೊಮ್ ಬಸ್ಲೊ. ‘ತುಜೆಲಾಗಿ೦ ಉಲಯ್ನಾಸ್ತಾ ಸಬಾರ್ ತೇ೦ಪ್ ಜಾಲೊ. ಹೊಚ್ಚ್ ಅವ್ಕಾಸ್ ಬರೊ ಮ್ಹಣ್ ಹಾ೦ವೆ೦ ಲೆಕ್ಲೆ೦.’
‘ಬರೆ೦ ಕೆಲೆ೦ಯ್,’ ಹೆಲೀನಾನ್ ಮ್ಹಳೆ೦ ಸುಕ್ಯಾ ತಾಳ್ಯಾನ್. ಫುಡೆ೦ ಕಿತೆ೦ ಉಲ೦ವ್ಚೆ೦ ಮ್ಹಣ್ ತಾಕಾ ಸುಸ್ತಾಲೆ೦ ನಾ. ತೆ೦ ಜೆರೊಮಾಕ್‌ಚ್ ಪಳೆವ್ನ್ ಬಸ್ಲೆ೦ ಆನಿ ತೊ ಮಾ೦ಕ್ಡಾಪರಿ೦ ಹೆಣೆತೆಣೆ ಪಳೆತಾಲೊ.
ಸ್ಕಾಯ್‌ಪಾರ‍್ಕ್ ಪಾರ‍್ಟಿ ಉಪ್ರಾ೦ತ್ ಜೆರೊಮಾಚೊ ಬದ್ಲಾಲ್ಲೊ ಜಿನೊಸ್ ಸಬಾರಾ೦ಚ್ಯಾ ಗುಮಾನ್ ಗೆಲ್ಲೊ ಪುಣ್ ವೆವೆಗ್ಳ್ಯಾ ರಿತಿ೦ನಿ. ಮೆಥ್ಯು ಲಿಯೊನ್, ಈವಾಕ್ ಸ್ಕ್ರೂ ಘಾಲ್ಲ್ಯಾನ್ ಜೆರೊಮ್ ಸಗ್ಳೊಚ್ ಪಿಗ್ಳೊನ್ ಗೆಲಾ ಮ್ಹಣ್ ಒಸಿಸಾ೦ತ್ಲೆ ಸರ್ವ್ ಉಲಯ್ತಾಲೆ. ಹೆ೦ ಆನಿ ಅಸಲೆ೦ ಉಲವ್ಣೆ೦ ಹೆಲೀನಾನ್‌ಯಿ ಆಯ್ಕಾಲ್ಲೆ೦. ಒಸಿಸಾ೦ತ್ಲೊ ಆ೦ಜ್, ಡಾರ್ಲಿ೦ಗ್ ಹೆಲೀನಾ ರಿಚರ‍್ಡಾ ಸಾ೦ಗಾತಾ ಎಸ್ಟೇಟಾ೦ತ್ ಮಝಾ ಮಾರ್ತಾನಾ ಒಸಿಸಾಚ್ಯಾ ರಿ೦ಗ್ ಮಾಸ್ಟರಾನ್ ಜೆರೊಮಾಚ್ಯಾ ಸೆಕ್ಸಿ ಪುಸ್ಸಿಕ್ ಸ್ಕ್ರೂ ಘಾಲ್ಚೆ೦ ಖ೦ಚೆ ವ್ಹಡ್ಲೆ೦ ನವಾಲ್ ಯಾ ಪಾತಕ್? ಹೆ೦ ಉಲವ್ಣೆ೦ ಒಸಿಸಾ೦ತ್ ಥೊಡೆ ದೀಸ್ ಪರ್ಯಾ೦ತ್ ಚಾಲು ಉರ್ಲೆ೦.
ಪುಣ್ ಜೆರೊಮಾಚೊ ಜಿನೊಸ್ ಮಾತ್ರ್ ಸರ್ವಾ೦ಚ್ಯಾ ಗಮನಾ೦ತ್ ಜಿವೊಚ್ಚ್ ಉರ್ಲೊ. ಪಾವಾನಾತ್‌ಲ್ಲ್ಯಾಕ್ ಜೆರೊಮಾನ್ ಒಸಿಸಾ೦ತ್ಲ್ಯಾ ಟೆಲೆಫೋನ್ ಒಪರೇಟರಾಲಾಗಿ೦ ಖೆ೦ಚುನ್ ಉಲ೦ವ್ಚೆ೦ ಆನಿ ಒಪರೇಟರಾನ್ ಜೆರೊಮಾಲಾಗಿ೦ ನಕ್ರ್ಯಾ೦ನಿ ಉಲ೦ವ್ಚೆ೦ ಸರ್ವಾ೦ಚ್ಯಾ ಗಮನಾಕ್ ಗೆಲ್ಲೆ೦. ಹ್ಯಾ ತಾಚ್ಯಾ ನವ್ಯಾ ನಡ್ತ್ಯಾ೦ತ್ ಜೆರೊಮ್ ಹೆರಾ೦ಚಿ ಭಿರ್ಮತ್ ಆನಿ ಕಳ್ವಳೆ ಆಪ್ಣಾ೦ವ್ಕ್ ಸಕ್ಲೊ, ಶಿವಾಯ್ ಹೆಲೀನಾಚ್ಯಾ!
ಥೊಡ್ಯಾಚ್ ದಿಸಾ೦ ಆದಿ೦ ರೆವರೆ೦ಡ್ ಫ್ರೆಡ್ ಟೇಯ್ಲರಾಚ್ಯಾ ಮಾಗ್ಣ್ಯಾ ಜಮಾತಿ೦ಚ್ಯಾ ಯೆವ್ಕಾರ್ ಸಮಿತಿಚೊ ಚೇರ್‌ಮೆನ್ ತೊ ಜಾತಾನಾ ಸರ್ವಾ೦ಕ್ ಕಿತೆ೦ ಮ್ಹಣ್ಚೆ೦ ಮ್ಹಳ್ಳೆ೦ ಕಳಿತ್ ಜಾಲೆ೦ ನಾ. ಸಬಾರಾ೦ನಿ ತಾಕಾ ಉಲ್ಲಾಸಿಲೆ೦ ಆನಿ ಕ್ರಿಸ್ತಾಚಿ ಸುವಾರ್ತಾ ಪ್ರಗಟು೦ಚ್ಯಾ ಹ್ಯಾ ದೈವಿಕ್ ವಾವ್ರಾ೦ತ್ ಹಾತ್ ಘಾಲ್ಲೊ ಬರೊಚ್ ಜಾಲೊ ಮ್ಹಣಾಲಿ೦. ಜೆರೊಮಾಚಿ ಕಾ೦ಯ್ ಥೊಡಿ ಚರಿತ್ರಾ ಕಳಿತ್ ಆಸ್‌ಲ್ಲಿ೦ (ಹೈಡ್ರೋಸಿಲ್ ಸೊಡುನ್ ಜಾಯ್ಜೆ) ಕುಸ್ಕುಸೋನ್ ಮ್ಹಣಾಲಿ೦. ‘ಕಸೊಯಿ ಸೆಮಿನರಿಕ್ ವಚುನ್ ಪಾಟಿ೦ ಆಯಿಲ್ಲೊ ಮನಿಸ್; ಅರ್ಧೊ ಪಾದ್ರಿ, ಅರ್ಧೊ ಪಿಸೊ!’
ಪುಣ್ ಹೆಲೀನಾಕ್ ಜೆರೊಮಾನ್ ಪಾ೦ಗುರ್ಲೆಲ್ಯಾ ನವ್ಯಾಚ್ ಕಾ೦ಬ್ಳಿ ಪ೦ದಾಕ್ ಕಿತೆ೦ ತರಿ ಸಿಜೊನ್ ಆಸಾ ಮ್ಹಳ್ಳೊ ದುಬಾವ್ ಜಾಲ್ಲೊ. ರಿಚರ‍್ಡಾಲಾಗಿ೦ ಉಲಯ್‌ಜೆ ಮ್ಹಣ್ ತಾಣೆ ಚಿ೦ತ್‌ಲ್ಲೆ೦ ಪುಣ್ ಅವ್ಕಾಸ್ ಮೆಳ್ಳೊ ನಾ. ಸ್ಕಾಯ್‌ಪಾರ‍್ಕ್ ಪಾರ‍್ಟಿ ಉಪ್ರಾ೦ತ್ ಸರ್ವಾ೦ಚಿ೦ ಚಕ್ರಾ೦ ವೆವೆಗ್ಳ್ಯಾ ಚಿ೦ತ್ಪಾ೦ನಿ ಘುಸ್ಪಡ್ಲೆಲಿ೦ ಜಾಯ್ಜೆ.
ಹೆಲೀನಾಚ್ಯಾ ಮತಿಕ್ ಗೆಲ್ಲಿ ಪಯ್ಲಿ ಸ೦ಗತ್ – ಜೆರೊಮಾಚ್ಯಾ ಕಾಲೆತಿ೦ತ್ಲಿ೦ ಲ೦ಯ್ಗಿಕ್ ಖೊವ್ಳಾ೦ ನಿಕ್ಳೊನ್ ಗೆಲ್ಲಿ೦ ಯಾ ತಶೆ೦ ದಿಸ್ತಾಲೆ೦. ನ್ಹಯ್, ತೊ ಸ್ತ್ರೀಯಾ೦ಕ್, ಚಲಿಯಾ೦ಕ್ ತು೦ ಮ್ಹಜಿ ಆವಯ್, ತು೦ ಮ್ಹಜಿ ಭಯ್ಣ್ ಮ್ಹಣ್ ಉಲೊ ಮಾರಿನಾತ್‌ಲ್ಲೊ (ಖ೦ಯ್ಸರ್‌ಗಿ ತಾಣೆ ಹೆಲೀನಾಕ್ ತು೦ ಮ್ಹಜೆ ಧುವೆಪರಿ೦ ಮ್ಹಣ್ ಮ್ಹಳ್ಳೆ೦) ತರಿ, ತಾಚ್ಯಾ ದೊಳ್ಯಾ೦ನಿ ನಿಶೆ೦ವ್ಚಿ ತಿ ಅಪೂರ‍್ಣ್ ಜಾಲ್ಲಿ ಲ೦ಯ್ಗಿಕ್ ಆಬ್ಳಾಯ್ ಉಬೊನ್ ಗೆಲ್ಲೆಪರಿ೦ ದಿಸ್ತಾಲಿ. ಈವಾ ವಿಶಾ೦ತ್ ಉಲ೦ವ್ಚೆ೦ ತಾಣೆ ಉಣೆ೦ ಕೆಲ್ಲೆ೦ ಆನಿ ಸ್ವಭಿರ್ಮತೆಚೆ೦ ರುದಾನ್ ಸಯ್ತ್‌ಯಿ ಉಣೆ ಕೆಲ್ಲೆ೦. ಹ್ಯಾ ಸರ್ವಾ೦ ಬದ್ಲಾಕ್ ಎಕ್ ವಿಚಿತ್ರ್ ಉಜೊ ತಾಚ್ಯಾ ದೊಳ್ಯಾ೦ನಿ ದಿಸ್ತಾಲೊ. ಖ೦ಯ್‌ಗಿ ಸುಪ್ತ್ ಆನಿ ಗುಪ್ತ್ ಉದ್ದೇಶ್ ಜ್ಯಾರಿ ಕರು೦ಕ್ ಆಸಾ ಮ್ಹಣ್ಚೆಪರಿ೦ ತಾಚೆ೦ ವೆಕ್ತಿತ್ವ್ ಫುಮಾರ್ತಾಲೆ೦.
ಇತ್ಲೊ ಚತುರ್ ರಿಚರ‍್ಡ್ ಆನಿ ತಾಚ್ಯಾಕಿ ದೊಡ್ಯಾನ್ ‘ಸಪಣ್ ಪಾರ‍್ಕಿ’ ಮೆಥ್ಯು ಹಾ೦ಚ್ಯಾ ಗಮನಾಕ್ ಹ್ಯೊ ಸ೦ಗ್ತಿ ಗೆಲ್ಯಾತ್ ಯಾ ನಾ ಮ್ಹಳ್ಳೆ೦ ಹೆಲೀನಾಕ್ ಸಮ್ಜನಾತ್‌ಲ್ಲೆ೦. ಭೋವ್‌ಶಾ ಒಸಿಸಾಚ್ಯಾ ಬಿಸ್‌ನೆಸ್ ವಾತಾವರಣಾ೦ತ್ ಹ್ಯಾ ಸರ್ವಾಕ್ ಜಾಗೊ ನಾತ್‌ಲ್ಲೊ.
ತ್ಯಾ ಟೆಲೆಫೋನ್ ಒಪರೇಟರಾ ಸಾ೦ಗಾತಾ ಜೆರೊಮಾಚೆ೦ ಕಿತೆ೦ ತರಿ ಚಲೊನ್ ಆಸಾ ಮ್ಹಣ್ ಸುಕ್ಷಿಮಾಯೆನ್ ಪಳೆತೆಲ್ಯಾ೦ಕ್ ಸುಸ್ತಾತಾಲೆ೦. ಪುಣ್ ಹೊ ಜೆರೊಮ್ is a dirty old man ಮ್ಹಳ್ಳೆ೦ ಛಾಪ್ ತಾಚೆರ್ ಯೆದೊಳ್‌ಚ್ ಪಡ್‌ಲ್ಲ್ಯಾನ್ ಹೆರಾ೦ಕ್ ಹೆ೦ ಕಾ೦ಯ್ ನವೆಸಾ೦ವ್ ಜಾವ್ನ್ ದಿಸ್ಲೆ೦ ನಾ.
ತೊ ಹೆಲೀನಾಚ್ಯಾ ಎಪಾರ್ಟ್ಮೆ೦ಟಾಕ್ ಆಪವ್ಣೆ೦ ನಾಸ್ತಾ೦ ಆಯಿಲ್ಲ್ಯಾಕ್ ತಾಣೆ ಬರೆ೦ಚ್ ಕಾರಾಣ್ ದಿಲ್ಲೆ೦ ತರಿ ಹೆಲೀನಾಚ್ಯಾ ಮತಿ೦ತ್ ಕಸಲೊಗಿ ದುಬಾವ್ ನಾಚ್ತಾಲೊ. ಮಾಮ್ಮಿ ಹಾ೦ಗಾಸರ್ ಖ೦ಡಿತ್ ಜಾವ್ನ್ ಯೆತೆಲಿ ಮ್ಹಳ್ಳೊ ಮು೦ಗಡ್ ಇಸಾರೊ/ಅ೦ದಾಜ್ ಜೆರೊಮಾಕ್ ಕಾ೦ಯ್ ಆಸ್‌ಲ್ಲೊಗಾಯ್?
ಕಿತ್ಲ್ಯಾಯಿ ವರ್ಸಾ೦ಕ್ ಆಪ್ಲೊ ಉಡಾಸ್ ಪಾಟಿ೦ ಧಾ೦ವ್ಡಾಯ್ಲ್ಯಾರಿ ಲಿಲಿಯನ್ ಜೆನಿಸಾನ್ ಹೆಲೀನಾಚೊ ಜಲ್ಮಾ ದೀಸ್ ಆಚರಿಲ್ಲೊ ದಿಸುನ್ ಯೆನಾತ್‌ಲ್ಲೊ. ಜಲ್ಮಾ ದೀಸ್ ಎಕ್ ದೀಸ್, ಹೆರ್ ದಿಸಾ೦ಪರಿ೦ ಎಕ್ ದೀಸ್ – ಹೆ೦ ಶಿಕಪ್ ಲಿಲಿಯನಾನ್ ಸವಿಸ್ತಾರ್ ಉತ್ರಾ೦ನಿ ತಾಕಾ ಶಿಕ೦ವ್ಕ್ ನಾತ್‌ಲ್ಲೆ೦ ಪುಣ್ ಸಮ್ಜಾಯಿಲ್ಲೆ೦. ಸ೦ಸಾರಾ೦ತ್ ತುಜೆ ಖಾತಿರ್ ಆಚರಣ್ ಕರ್ಚೆ೦ ಕಾ೦ಯ್ಚ್ ನಾ ಆನಿ ತು೦ವೆ೦ಚ್ ತುಜೆಚ್ಚ್ ಖಾತಿರ್ ಆಚರಣ್ ಕರ್ಚೆ೦ಯಿ ಕಸಲೆ೦ಚ್ ನಾ. ಜೆ೦ ಕಿತೆ೦ ತೊ ಜೊಡ್ತಾಯ್, ಶಿಕ್ತಾಯ್ ಆನಿ ಫುಲಯ್ತಾಯ್ ತೆ೦ಚ್ ತುಜೆ೦ ಆಚರಣ್, ಸದಾ೦ಯಿ ಯೆ೦ವ್ಚೊ ತುಜೊಚ್ಚ್ ಜಲ್ಮಾ ದೀಸ್.
ಪುಣ್ ಆಜ್ ಕಿತೆ೦, ಎಕ್ surprise ದೀ೦ವ್ಕ್ ಮಾಮ್ಮಿನ್ ಯೆತಾ೦ ಮ್ಹಳಾ೦, ತಶೆ೦ಚ್ ಅ೦ಕಲ್ ಕ್ಲೆರೆನ್ಸಾನ್.
ಪುಣ್ ಹೊ ಜೆರೊಮ್ ಕಸೊ ಘುಸ್ಲೊ ಆನಿ ಘುಸ್ಲೊ ತರ್ ಕಿತ್ಯಾಕ್ ಘುಸ್ಲೊ?
ಸಬಾರ್ ವರ್ಸಾ೦ ಆದಿ೦ ತಾಚೊ (ಹೆಲೀನಾಚೊ) ಬಾಪಯ್ ವಿಮಾನ್ ಅವ್ಘಡಾ೦ತ್ ಸರ್‌ಲ್ಲ್ಯಾ ವೆಳಾರ್ ಅ೦ಕಲ್ ಕ್ಲೆರೆನ್ಸಾ ಪಳೆವ್ನ್ ಹೆಲೀನಾನ್ ಮ್ಹಳ್ಳೆ೦. ‘ತು೦ ಕಿತ್ಯಾಕ್ ಕೆದಳಾರಿ ಹಾ೦ಗಾಸರ್ ಆಸ್ತಾಯ್?’ ತವಳ್ ಲಿಲಿಯನಾನ್ ತಾಕಾ ಜಾಪ್ ದಿಲ್ಲಿ. ‘ಅ೦ಕಲ್ ಕ್ಲೆರೆನ್ಸ್ ತುಜ್ಯಾ ಡೆಡಿಚೊ ಮೊಗಾಚೊ ಮಿತ್ರ್. ತು೦ವೆ೦ ತಾಕಾ ಗವ್ರವ್ ದೀಜೆ.’
ಪುಣ್ ಗವ್ರವ್ ವಿ೦ಗಡ್, ಹೆಲೀನಾನ್ ಅ೦ಕಲ್ ಕ್ಲೆರೆನ್ಸಾಕ್ ಮಹತ್ವ್ ಆನಿ ಗಮನ್ ದಿ೦ವ್ಚೆ೦ಚ್ ಸೊಡ್‌ಲ್ಲೆ೦. ಕಿತ್ಯಾಕ್ ಮ್ಹಳ್ಳೆ೦ ತಾಕಾಚ್ ಕಳಿತ್ ನಾತ್‌ಲ್ಲೆ೦. ಹಫ್ತ್ಯಾ ಮದೆ೦ ಅ೦ಕಲ್ ಕ್ಲೆರೆನ್ಸ್ ತಾಕಾ ಕಿತೆ೦ಗಿ ಪಿಯೆ೦ವ್ಕ್ ದಿತಾಲೊ; ರುಚೀಕ್ ಕಸಲೆ೦ಗಿ ತೆ೦ ದ್ರವ್, ಪಿಯೆಲ್ಯಾ ಉಪ್ರಾ೦ತ್ ತಾಕಾ ಕಠೀಣ್ ಝೆಮ್ ಯೆತಾಲಿ ಆನಿ ನೀದ್ ಪಡ್ಟಾಲಿ. ಸುಶೆಗಾಚಿ ನೀದ್, ನಾ೦ತ್ ಸ್ವಪ್ಣಾ೦ ನಾ ಯಾ ಭಿರಾ೦ತ್. ಪುಣ್ ಸಕಾಳಿ೦ಚೆ೦ ತೆ೦ ಉಟ್ಟಾನಾ ಮಾತ್ರ್ ತಾಕಾ ಹಳ್ಟಾಚಿ ತಕ್ಲೇಫಡಾಫಡ್ ಆಸ್ತಾಲಿ. ಪುಣ್ ತೆ೦ ಶಾಳೆಕ್ ಭರ್ತಿ ಜಾಲ್ಯಾ ಉಪ್ರಾ೦ತ್ ಅ೦ಕಲ್ ಕ್ಲೆರೆನ್ಸಾನ್ ತಾಕಾ ಹೆ೦ ದ್ರವ್ ದಿ೦ವ್ಚೆ೦ ಬ೦ದ್ ಕೆಲೆ೦ ಕಿತ್ಯಾಕ್ ತ್ಯಾ ಉಪ್ರಾ೦ತ್ ಲಿಲಿಯನ್ ಆನಿ ಅ೦ಕಲ್ ಕ್ಲೆರೆನ್ಸ್ ಸಾ೦ಜೆಚ್ಯಾವಗ್ತಾ ಬ೦ಗ್ಲ್ಯಾ೦ತ್ ಆಸಾ೦ಚ್ ನಾತ್‌ಲ್ಲಿ೦.
‘ತುಜಿ೦ ಚಿ೦ತ್ನಾ೦ ಉಚಾರೋನ್ ಸಾ೦ಗ್ಶಿ ತರ್ ಸಗ್ಳೊ ಸ೦ಸಾರ್‌ಚ್ ತುಜ್ಯಾ ಪಾ೦ಯಾಥಳಾ ದವ್ರು೦ಕ್ ಹಾ೦ವ್ ತಯಾರ್!’ ಜೆರೊಮಾಚಿ೦ ಉತ್ರಾ೦ ಆಯ್ಕೊನ್, ಘುಸ್ಪಡೋನ್ ತೆ೦ ಜಾಗೆ೦ ಜಾಲೆ೦.
‘ಕಿತೆ೦ ಮ್ಹಳೆ೦ಯ್ ಜೆರೊಮ್?’
‘ಸ೦ಗತ್ ಸೊಡ್!’ ಜೆರೊಮಾನ್ ಜಾಪ್ ದಿಲಿ. ‘ಆಜ್ ತುಜೊ ಬರ್ಥ್‌ಡೇ; ಕಿತ್ಲೊಯ್ ಲಿಪಯ್ಲ್ಯಾರಿ ಮ್ಹಾಕಾ ಕಳಿತ್ ಜಾಲೊ ಹೊ ದೀಸ್. ತು೦ವೆ೦ ಸ೦ತೊಸ್‌ಭರಿತ್ ಆಸಾಜೆ-‘
‘ಹಾ೦ವೆ೦ ಕೆದಳಾರಿ ದುಕೇಸ್ತ್ ಆಸ್ಚೆ೦ ತು೦ವೆ೦ ಪಳೆಲಾ೦ಯ್, ಜೆರೊಮ್?’
‘ನಕ್ಕೀ ಸಾ೦ಗೊ೦ಕ್ ಜಾಯ್ನಾ ಪುಣ್ ಆಯ್ಚೆ ಸಾ೦ಜೆರ್ ಕಸಲ್ಯಾಗಿ ಮಿಶ್ರಿತ್ ಚಿ೦ತ್ನಾ೦ನಿ….’
‘ತಶೆ೦ ಕಾ೦ಯ್ ನಾ,’ ಜಾಪ್ ದಿಲಿ ಹೆಲೀನಾನ್. ಹು೦, ಹೊ ಫಡ್ಪಶಿ ಆತಾ೦ ಉಲ೦೦ವ್ಕ್‌ಯಿ ಶಿಕ್‌ಲ್ಲೊ?
‘ಬೋವ್‌ಶಾ ಎಕಾ ವಿಸೇಶ್ ಸಯ್ರಾಚೆ೦ ಯೆಣೆ೦ ಜಾ೦ವ್ಚಾರ್ ಆಸಾ?’
‘ಉಡಾಸ್ ದವರ್ನ್ ಆಯಿಲ್ಲ್ಯಾ ಎಕಾ ಮಾಲ್ಘಡ್ಯಾ ಸಯ್ರಾಚ್ಯಾಕಿ ಹೆರ್ ಸಯ್ರೊ ವಿಸೇಶ್ ಜಾ೦ವ್ಕ್ ಸಕ್ತಾ?’ ಹೆಲೀನಾನ್ ಆಪ್ಲಿ೦ ಉತ್ರಾ೦ ಘು೦ವ್ಡಾವ್ನ್ ಜೆರೊಮಾಕ್ ತಾಚ್ಯಾಚ್ ನಿಳಿ೦ತ್ ಬುಡಯ್ಲೊ.
‘ಬರಾಬರ್, ಬರಾಬರ್,’ ಒಪ್ಲೊ ಜೆರೊಮ್ ಐಸ್‌ಬಾಲ್ದೆ೦ತ್ಲ್ಯಾ ಶಾ೦ಪೇನಾಕ್ ಪಳೆವ್ನ್.
‘ವಿಸರ‍್ಲಿ೦ ಹಾ೦ವ್!’ ಹೆಲೀನಾನ್ ಮ್ಹಳೆ೦. ‘ಖ೦ಯ್ ಆಸಾ ಮ್ಹಜಿ ಸಬ್ಯತಾ? ಕಿತೆ೦ ಪಿಯೆತಾಯ್, ಜೆರೊಮ್? ಕೊಫಿ, ಟೀ, ಸೊಫ್ಟ್ ಡ್ರಿ೦ಕ್? ಎಪಾರ್ಟ್ಮೆ೦ಟಾ೦ತ್ ಹಾ೦ವ್ ಸೊರೊ ದವರಿನಾ….that is if you do not consider champagne as alcohol!’
ಮಾತೆ೦ ಉಕ್ಲೊನ್ ಜೆರೊಮ್ ತಾಕಾಚ್ ಪಳೆಲಾಗ್ಲೊ. ‘ಜೆರೊಮಾಕ್ ಆನಿ ಸೊರ‍್ಯಾಕ್ ತುಮಿ ಹೆಪರಿ೦ ಗಾ೦ಟಾಯ್ಲಾ ನ್ಹಯ್?’ ತಾಚೊ ತಾಳೊ ದುಕಿನ್ ಕುಸ್ಕಾಲ್ಲೊ. ‘ಕೊಣಾಕ್ ಕಿತ್ಯಾಕ್ ದುರ್ಸೊ೦ಚೆ೦? ಹಾ೦ವೆ೦ ತಸಲಿ೦ ಕರ್ತುಬಾ೦ ಕೆಲ್ಯಾ೦ತ್ ನ್ಹಯ್?’
‘ತುಕಾ ದುಕ೦ವ್ಚೊ ಉದ್ದೇಶ್ ಮ್ಹಜೊ ನ್ಹಯ್ ಆಸ್ಲೊ’
‘ವ್ಹಯ್ ತರಿ ತು೦ ಸಲ್ವತೆ೦ಯ್, ಹೆಲೀನಾ!’ ಮ್ಹಳೆ೦ ಜೆರೊಮಾನ್. ‘ಮ್ಹಾಕಾ ದುಕ೦ವ್ಚೆ ಅವ್ಕಾಸ್ ಕೊಣಾಕೀ ದೀನಾ.’
ಹೆ೦ ಆಯ್ಕೊನ್ ಹೆಲೀನಾನ್ ಆಪ್ಲೆ೦ ಹಾತ್ ಮುರ‍್ಡಿಲೆ. ‘ಫಟಿ೦ಗ್ ಮ್ಹಾತಾರೊ ಕಾ೦ಯ್ ಸುದಾರ‍್ಚೆ ವಾಟೆರ್ ಆಸಾ ಕೊಣ್ಣಾ.’ ತಾಣೆ ಅ೦ದಾಜ್ ಕೆಲೊ. ‘ತ್ಯಾ ಈವಾ ಖಾತಿರ್ ಪುಣಿ ತಶೆ೦ಚ್ ಜಾ೦ವ್.’
ಅಶೆ೦ ಚಿ೦ತುನ್ ತಾಣೆ ಉಗ್ತ್ಯಾನ್ ಮು೦ದರಿಲೆ೦. ‘ಶಾ೦ಪೇನ್ ಯೆದೊಳ್‌ಚ್ ಥ೦ಡ್ ಜಾಲ್ಯಾ ಆಸ್ತೆಲಿ…..’
‘ನಾ ಹೆಲೀನಾ, ನಾ.!’ ಜೆರೊಮಾನ್ ಮ್ಹಳೆ೦. ‘ತಿ ಶಾ೦ಪೇನ್ ಮ್ಹಜೆ ಖಾತಿರ್ ಹಾಡ್‌ಲ್ಲಿ ನ್ಹಯ್ ಮ್ಹಣ್ ಹಾ೦ವ್ ಜಾಣಾ೦. ತುಕಾ ತ್ರಾಸ್ ಜಾಯ್ನಾ೦ತ್ ತರ್, ಎಕ್ ಕಪ್ ಹುನೊನಿ ಕೊಫಿ…’
ಹೆಲೀನಾ, ಎಪಾರ್ಟ್ಮೆ೦ಟಾ೦ತ್ಲ್ಯಾ ಕಿಚನಾಕ್ ಉಬೊನ್೦ಚ್ ಗೆಲೆ೦. ಬ೦ದ್ಪಾಸಾ೦ತ್ಲೆ೦ ಸುಟೊ೦ಕ್ ಹೊಚ್ ಉಪಾಯ್. ಪುಣ್ ಹೊ ಫಟಿ೦ಗ್ ಮ್ಹಾತಾರೊ ಪಾಟ್ಲ್ಯಾನ್ ಯೆವ್ನ್ ಮ್ಹಾಕಾ ಗೊಪ್ ಘಾಲಿಸೊ ನಾ-ಮೂ? ಎಪಾರ್ಟ್ಮೆ೦ಟಾ೦ತ್ ಹೆರ್ ಕೋಣ್೦ಚ್ ನಾ೦ತ್…’
ಪುಣ್ ತಶೆ೦ ಕಾ೦ಯ್ ಘಡ್ಲೆ೦ ನಾ. ಕೊಫಿ ಘೆವ್ನ್ ಹೆಲೀನಾ ಭಾಯ್ರ್ ಯೆತಾನಾ ಜೆರೊಮ್ ಕಸಲೊಗಿ ಮೆಗಝಿನ್ ಪಳೆತಾಲೊ.
‘ಜೆರೊಮ್, ತುಜಿ ಕೊಫಿ!’ ಹೆಲೀನಾನ್ ಆಪ್ಲ್ಯಾ ಹಾತಾ೦ತ್ಲೆ೦ ಕಪ್ಪ್ ತಾಕಾ ವೊಡಾಯ್ಲೆ೦. ತೆ೦ ಕಪ್ ಘೆ೦ವ್ಚೊ ಹಾತ್ ಬಿಲ್ಕುಲ್ ಕಾ೦ಪಾನಾತ್‌ಲ್ಲೊ. ಬರ್ಪೂರ್ ಆಮಾಲಿ ಜಾವ್ನಾಸ್‌ಲ್ಲ್ಯಾ ತಾಚೆ ಹಾತ್ ಕಾ೦ಪ್ಚೆ ಸಬಾರ್ ಪಾವ್ಟಿ೦ ಪಳೆಯಿಲ್ಲೆ ಹೆಲೀನಾನ್. ಸಬಾರ್ ಪಾವ್ಟಿ೦ ಹ್ಯೆ ಕಾ೦ಪ್ಣೆನ್ ತಾಚಿ ದಸ್ಕತ್ ಸಯ್ತ್ ಅಸ್ತ್‌ವ್ಯೆಸ್ತ್ ಜಾತಾಲಿ.
‘ಹಾಣೆ ಆಮಾಲ್ ಸೊಡ್ಲಾ೦ ತರ್ ರೆವರೆ೦ಡ್ ಫ್ರೆಡ್ ಟೇಯ್ಲರಾಚ್ಯಾ ಪ್ತಭಾವಾನ್ ನ್ಹಯ್‌ಮೂ?
ಜೆರೊಮಾನ್ ಮೌನ್‌ಪಣಿ ಆಪ್ಲಿ ಕೊಫಿ ಸೆವ್ಲಿ.
‘ಜಿಣಿಯೆ ವಿಶಾ೦ತ್ ತು೦ ಕಿತೆ೦ ಚಿ೦ತಾಯ್ ಹೆಲೀನಾ?’ ತಾಚೆ೦ ಹೆ೦ ಆವ್ಚಿತ್ ಸವಾಲ್ ಆಯ್ಕೊನ್ ಹೆಲೀನಾ ಘುಸ್ಪಡ್ಲೆ೦. ತೆ೦ಯೀ, ಅಸಲೆ೦ ಸವಾಲ್ ಜೆರೊಮಾ ತಸಲ್ಯಾಥಾವ್ನ್ ಯೆ೦ವ್ಚೆ೦? ಖ೦ಡಿತ್, ತೆ೦ ಆಪ್ಣಾಯಿತ್ಲ್ಯಾಕ್ ಚಿ೦ತಿಲಾಗ್ಲೆ೦. This old man has lost his marbles or balls!’
‘ಹಾ೦ವ್ ಸಮ್ಜಾಲಿ೦ ನಾ!’
‘ಆಜ್ ತುಜೊ ಜಲ್ಮಾ ದೀಸ್,.’ ಆಪ್ಲೆ ವೋ೦ಟ್ ಪುಸಿತ್ತ್ ತಾಣೆ ಮ್ಹಳೆ೦. ‘ಜಿಣಿಯೆಚ್ಯಾ ಖ೦ಚಾ ಹ೦ತಾರ್ ತು೦ ಉಬೆ೦ ಆಸಾಯ್ ಮ್ಹಳ್ಳ್ಯಾ ಸವಲಾಚೆರ್ ಚಿ೦ತಪ್ ಆಟಯ್ಲಾ೦ಯ್?’
‘ಚಿ೦ತ್ಚೆ೦ ಕಸಲೆ೦?’ ಹೆಲೀನಾನ್ ವಿಚಾರ್ಲೆ೦. ‘Live life to the fullest–ಪರಿಪೂರ‍್ಣ್ ಜಿಣಿ ಜಿಯೆ೦ವ್ಚಿ, ತಿತ್ಲಿಚ್. ಕಿತ್ಯಾಕ್ ಹೆ೦ ಗ೦ಭೀರ್ ಸವಾಲ್?’
ಹೆ೦ ಸವಾಲ್ ವಿಚಾರ್ನ್ ಸಾ೦ಪಡ್ಲೆ೦ ಹೆಲೀನಾ.
(ಅವಸ್ವರ್ – 49- ೦ತ್ ಮು೦ದರ್ತಾ)
