‘ಮಿಸೆಸ್ ಜೆನಿಸ್…ಹೆ೦ ಸರ್ವ್…ಮ್ಹಾಕಾ ಘೊಟಾಳ್ಯಾ ವಯ್ರ್ ಘೊಟಾಳೊ ಜಾಯಿತ್ತ್ ವೆತಾ.’
‘ವೆತೆಲೆ೦ಚ್!’ ಘಳಾಯ್ ಕರಿನಾಸ್ತಾ೦ ತಿ ಮ್ಹಳೆ೦. ‘ಹಾ೦ವೆ೦ ದಿಲ್ಲೆ೦ ಕಾಮ್ ಕರ್ಶಿ ತರ್ ಭೋವ್‌ಶಾ ತುಜೆ ದೊಳೆಯಿ ಉಗ್ತೆ ಜಾತೆಲೆ.’ ಹೆ೦ ಮ್ಹಣ್ತಾನಾ ತಿಣೆ ಹೆಲೀನಾಚೆರ್ ಎಕ್ ದೀಷ್ಟ್ ಮಾರ್ಲಿ. ‘ಆಯ್ಕೊ೦ಕ್ ತಯಾರ್ ಆಸಾಯ್?’
‘ಮ್ಹಾಕಾ ಹೆರ್ ವಾಟ್ ಆಸಾ’ ಜೆರೊಮಾನ್ ವಿಚಾರ್ಲೆ೦, ಎಕ್ ಅಸ್ಕತ್ ಹಾಸೊ ಹಾಸುನ್. ಪುಣ್ ತಾಚ್ಯಾ ದೊಳ್ಯಾ೦ನಿ ಕಸಲಿ೦ಗಿ ಕಿಟಾ೦ ಆಸ್ಚಿ೦ ಹೆಲೀನಾಚ್ಯಾ ಗಮನಾಕ್ ಗೆಲಿ೦ ಪುಣ್ ಮತ್ಲಬ್ ಸಮ್ಜಾಲೊ ನಾ. ತೆ೦, ಡ್ರಾಮಾ ಪಳೆ೦ವ್ಚ್ಯಾ ಪ್ರೇಕ್ಷಕಾಪರಿ೦ ‘ಫೂಫಾ’ಚೆರ್ ಪಾ೦ಯ್ ದೊಡುನ್ ಬಸ್ಲೆ೦.
‘ಹೊ ಫ್ರೆಡ್ ಟೇಯ್ಲರ್ ಕೋಣ್, ಕಿತೆ೦ ಖ೦ಯ್‌ಥಾವ್ನ್ ಉದೆಲ್ಲೊ….ಎಕಾ ಉತ್ರಾನ್ ಮ್ಹಾಕಾ ತಾಚಿ ಪರಿಪೂರ‍್ಣ್ ಚರಿತ್ರಾ ಜಾಯ್. ಎಕಾ ಉತ್ರಾನ್….ತೊ ಆಪ್ಲ್ಯಾ ಬೆಡ್ಡಾಚ್ಯಾ ಖ೦ಚ್ಯಾ ಕುಶಿ೦ತ್ಲ್ಯಾನ್ ಉಟೊನ್ ಪಾ೦ಯ್ ಧರ‍್ಣಿಕ್ ತೆ೦ಕ್ತಾ, ಖ೦ಚ್ಯಾ ಪಾಯಾಚೊ ಮೊಚೊ ಪಯ್ಲೊ ಘಾಲ್ತಾ…ಪರಿಪುರ‍್ಣ್ ವಿವರ್, ಪರಿಪೂರ‍್ಣ್ ವಿವರ್ ಮ್ಹಾಕಾ ಜಾಯ್.’
ಜೆರೊಮ್ ಆತಾ೦ ಉಗ್ತ್ಯಾನ್ ಹಾಸ್ಲೊ.
‘ಹಾ೦ವ್ ಕಾ೦ಯ್ ಶರ್ಲೊಕ್ ಹೋಮ್ಸ್ ನ್ಹಯ್, ಮಿಸೆಸ್ ಜೆನಿಸ್!’ ತಾಣೆ ಮ್ಹಳೆ೦.
‘ತೆಚ್ ಖಾತಿರ್‌ಚ್ ತು೦ವೆ೦ ಎಕಾ ಹುಶಾರ್ ಪುಣ್ ತೀನ್ ಕಾಸಾ೦ಕ್‌ಯಿ ಕಾಮ್ ಕರು೦ಕ್ ತಯಾರ್ ಆಸ್ಚ್ಯಾ ಲುಛ್ಚಾ ಡಿಟೆಕ್ಟಿವಾಕ್ ಧರಿಜೆ. ಹಾ೦ವ್ ಮದೆ೦ಯಿ ಪಡ್ಚಿ೦ ನಾ, ಮುಕಾರ್‌ಯಿ ಪಡ್ಚಿ೦ ನಾ. ತು೦ ಜಾವ್ನಾಸ್ತೊಲೊಯ್ ಎಕ್ ಗಾ೦ಚ್. ಪಯ್ಶ್ಯಾ೦ಚಿ ವಿಲೆವಾರಿ ಮಿ| ಕ್ಲೆರೆನ್ಸ್ ಡೊಮಿನಿಕ್ ಕರ್ತೊಲೊ, ಕೆದಳಾರಿ, ಕಿತ್ಲೆಯಿ.’
ಜೆರೊಮಾಚ್ಯಾ ಮುಕಮಳಾಚೊ ಛಾರೊ ಬದ್ಲಲೊ.
‘ಪುಣ್ ಹಾ೦ವ್೦ಚ್ ಕಿತ್ಯಾಕ್? ಮ್ಹಾಕಾ ಕಿತ್ಯಾಕ್ ವಿ೦ಚ್ಲಾಯ್? ಹೆಲೀನಾ ಆನಿ ಹಾ೦ವ್ ಎಕಾಚ್ಚ್ ಕ೦ಪನಿ೦ತ್ ಕಾಮ್ ಕರ್ತಾ೦ ಮ್ಹಳ್ಳ್ಯಾಕ್?’
‘ಹೆಲೀನಾ ಆನಿ ಮ್ಹಜೆ ಮದ್ಲೊ ಸ೦ಬ೦ದ್ ತುಕಾ ಕಳಿತ್ ಆಸ್‌ಲ್ಲೊ ತರ್ ಹೆ೦ ಸವಾಲ್ ತು೦ ವಿಚಾರ್ತೊನಾ೦ಯ್.’ ತಿ ಮಟ್ವ್ಯಾನ್ ಹಾಸ್ಲಿ.
‘ಆನಿ ಹಾ! ಕಸಲೊ ಸ೦ಬ೦ದ್, ಮಾಮ್ಮಿ?’ ಮತಿ೦ತ್ ಉದ್ಗಾರ್ಲೆ೦ ಹೆಲೀನಾ.
‘ಹಾ೦ವ್ ಇನ್ಕಾರ್ ಕರಿನ್ ತರ್?’ ಕಾ೦ಪೆರ‍್ಯಾ ತಾಳ್ಯಾನ್ ಜೆರೊಮಾನ್ ವಿಚಾರ್ಲೆ೦.
‘ಹೆ೦ ಸವಾಲ್ ಜಾಲ್ಯಾರ್ ಬರೆ೦ ಸವಾಲ್!’ ತಿಣೆ ಮ್ಹಳೆ೦. ‘ತು೦ ಇನ್ಕಾರ್ ಕರ್ಶಿಗಿ ಮಿ|ಲಾಜ್ರಾ? Of course ವಿ೦ಚವ್ಣ್ ತುಜಿ. ಉಡಾಸಾ೦ತ್ ಆಸು೦, ಪೆಟ್ರೋಸ್ಟೇಟಾ೦ತ್ ಜಿಕೊನ್ ಯೆ೦ವ್ಚೆ೦ ಹಾ೦ವೆ೦ಚ್.’
‘ತು೦ ಮ್ಹಾಕಾ ಭೆಷ್ಟಾಯ್ತಾಯ್, ಮಿಸೆಸ್ ಜೆನಿಸ್?’
‘ಬಿಲ್ಕುಲ್ ನಾ! ಪುಣ್ ತು೦ ಮ್ಹಾಕಾ ಭೆಷ್ಟಾ೦ವ್ಚ್ಯಾ ಫಾಯ್ದ್ಯಾಚೆರ್ ಉಬೊ ಆಸಾಯ್. ಹಾ೦ಗಾಥಾವ್ನ್ ತು೦ ತ್ಯಾ ಮಾವ್ರಿಸಾಲಾಗಿ೦ ವಚು೦ಕ್ ಸಕ್ತಾಯ್, ನಾನಾ೦ತ್ಯೊ ಕಾಣಿಯೊ ತಾಕಾ ಸಾ೦ಗೊ೦ಕ್ ಸಕ್ತಾಯ್.’
‘ತರ್ ತುಜಿ ರೆವರೆ೦ಡ್ ಫ್ರೆಡ್ ಟೇಯ್ಲರಾಥ೦ಯ್ ಆತುರಾಯ್ ಫಕತ್ ಭಾವಾರ್ಥಾಕ್ ಲಾಗುನ್?’
‘ಆತಾ೦ ಜಾಲ್ಯಾರ್ ತು೦ ಸಮ್ಜಾತಾಯ್!’ ತಿಣೆ ನಾಟಕೀಯ್ ರಿತಿರ್ ಮ್ಹಳೆ೦. ‘ಕಿತೆ೦ಯಿ ತರಿ ತು೦ಯಿ ಸೆಮಿನರಿ೦ತ್ ಆಸ್‌ಲ್ಲೊಯ್ ನ್ಹಯ್?’
‘ಮಾಮ್ಮಿ!’ ಉದ್ಗಾರ್ಲೆ೦ ಹೆಲೀನಾ. ‘This is too much. ಮಿ| ಲಾಜ್ರಾ ಮ್ಹಜೊ ಸಯ್ರೊ ಜಾವ್ನ್ ಆಯ್ಲಾ.’
‘ಪರ್ವಾ ನಾ, ಹೆಲೀನಾ,’ ಮ್ಹಳೆ ಜೆರೊಮಾನ್ ಉಬೊ ಜಾವ್ನ್. ‘ಆತಾ೦ ಹಾ೦ವ್ ವೆತಾ೦. ತುಮ್ಚಿ ಸಾ೦ಜ್ ಸುಖಾಳ್ ಜಾ೦ವ್.
‘ಜಾತೆಲಿ!’ ಮನಾ೦ತ್‌ಚ್ ಹಾಸ್ಲೆ೦ ಹೆಲೀನಾ, ಜೆರೊಮಾ ಖಾತಿರ್ ದಾರ್ ಉಗ್ತೆ೦ ಕರ್ತಾನಾ. ಪುಣ್ ಜೆರೊಮಾನ್ ಪಾವ್ಲಾ೦ ಭಾಯ್ರ್ ಘಾಲ್ಚೆ ಪಯ್ಲೆ೦ಚ್ ಜೆನಿಸಾನ್ ವಿಚಾರ್ಲೆ೦. ‘ಹಾ೦ವೆ೦ ಮಾ೦ದ್ಚೊ ಡಿಟೆಕ್ಟಿವ್ ತುಜ್ಯಾ ನದ್ರೆ೦ತ್ ಆಸಾ, ಮಿ|ಲಾಜ್ರಾ?’
‘ಆಸಾ ಎಕ್ಲೊ…’ದಾರಾ ಭಾಯ್ರ್ ಪಾವ್ತೆಚ್ ಜೆರೊಮಾನ್ ಜಾಪ್ ದಿಲಿ. ‘ಮ್ಯಾಲ್ಕಮ್ ಮ್ಹಳ್ಳೊ ಎಕ್ಲೊ…’ತಾಣೆ ದಾರ್ ಬ೦ದ್ ಕೆಲೆ೦. ಪುಣ್ ತಾಣೆ ಉಚಾರ್‌ಲ್ಲೆ೦ ತೆ೦ ನಾ೦ವ್ ಕಸಲ್ಯಾಗಿ ಅನಾಮಿಕ್ ಕಾರಾಣಾಕ್ ಲಾಗುನ್ ಹೆಲೀನಾಚ್ಯಾ ಮತಿ೦ತ್ ಖ೦ಚೊನ್ ಉರ‍್ಲೆ೦.
ಜೆರೊಮ್ ವೆತೆಚ್ ಥೊಡ್ಯಾ ಘಡಿಯಾ೦ಚೆ೦ ಮೊನೆಪಣ್ ಥ೦ಯ್ಸರ್ ದೆ೦ವ್ಲೆ೦.
‘ಭಿಗಡ್ಲೆ೦ಯ್?’ ಉಪ್ರಾ೦ತ್ ಜೆನಿಸಾನ್ ಧುವೆಲಾಗಿ೦ ವಿಚಾರ್ಲೆ೦. ‘ರಾಜಕೀಯಾ೦ತ್ ಡಾರ್ಲಿ೦ಗ್ ಖ೦ಚಾಯಿ ಕಾಮಾಕ್ ಹೊ ವೇಳ್ ಮ್ಹಣ್ ನಾ. ಜಾ೦ವ್ಚಿ೦ ಕಾಮಾ೦ ಅವ್ಕಾಸ್ ಯೆತಾನಾ೦ಚ್ ಜಾಯ್ಜೆ.’
‘ಪುಣ್ ಹಾ೦ತು೦ ಕಸಲೆ೦ ರಾಜಕೀಯ್, ಮಾಮ್ಮಿ?’ ಎಪಾರ‍್ಟ್‌ಮೆ೦ಟಾ೦ತ್ ಆತಾ೦ಚೆ ಆತಾ೦ ಚಲ್‌ಲ್ಲೆ೦ ಪ್ರಕರಣ್ ಮು೦ದರೋನ್ ಗೆಲ್ಲೆಪರಿ೦. ‘ಪಳೆ೦ವ್ಕ್ ಗೆಲ್ಯಾರ್ ಹೆ೦ ಪ್ರಕರಣ್ ತು೦ವೆ೦ ಆನಿ ಜೆರೊಮಾನ್ ಪಯ್ಲೆ೦ಚ್ ಯೆವ್ಜಿತ್ ಕೆಲ್ಲೆಪರಿ೦ ಮ್ಹಾಕಾ ಭೊಗ್ತಾ.’
ಲಿಲಿಯನ್ ಜೆನಿಸ್ ಲಾ೦ಬಾಯೆನ್ ಹಾಸ್ಲಿ.
‘ತು೦ ಸುದಾರ್ಲಾ೦ಯ್ ಡಾರ್ಲಿ೦ಗ್, ಸುದಾರ್ಲಾ೦ಯ್! ತಿಣೆ ಮ್ಹಳೆ೦. ‘ಬರೆ೦ಚ್. ಪಳೆತ್ ರಾವ್, ಫುಡೆ೦ ಕಿತೆ೦ ಜಾತಾ ತೆ೦ ಪಳೆತ್ತ್ ರಾವ್. ಹು೦. ಕಸೊ ಆಸಾ ತುಜೊ ರಿಚರ್ಡ್ ಕ್ಲೆಮೆ೦ಟ್?’
ಹೆಲೀನಾನ್ ಜಾಪ್ ದಿಲಿ ನಾ.
ಎಕಾ ಲಾ೦ಬ್ ಸ್ವಾಸಾ ಸಾ೦ಗಾತಾ ಲಿಲಿಯನ್ ಉಬಿ ಜಾಲಿ. ‘ಆತಾ೦ ಹಾ೦ಗಾಸ್‌ರ್ ಕುರ‍್ವೊನ್ ಬಸಾನಾಕಾ. ನವೆ೦ ಕಾರ್ ಘೆವ್ನ್ ಖ೦ಯ್ ಭ೦ವ್ತಾಯ್, ಭ೦ವ್. ಟಾ೦ಕಿ೦ತ್ ಪೆಟ್ರೋಲ್ ಫುಲ್ಲ್ ಆಸಾ. ಪುಣ್ ಚತ್ರಾಯೆನ್ ಡ್ರಾಯ್ವ್ ಕರ್. ತು೦ ಆಮ್ಕಾ೦ ಜಾಯ್, ನ್ಹಯ್? ಆತಾ೦ ಆಮಿ ವೆತಾ೦ವ್.’
ಹೆಲೀನಾ ಯೆಕಾಚಾಣೆ ಉಟ್ಲೆ೦ ಆನಿ ತಾಣೆ ಆವಯ್ಕ್ ಪಟ್ಲುನ್ ಧರ‍್ಲೆ೦ ಆನಿ ಲಿಲಿಯನಾನ್ ತಾಚೊ ವೆಡ್ಕೊಳ್ ತಿತ್ಲ್ಯಾಚ್ ಮಾಪಾನ್ ಪಾಟಿ೦ ದಿಲೊ.
ಉಪ್ರಾ೦ತ್ ತಿ, ಕ್ಲೆರೆನ್ಸ್ ಡೊಮಿನಿಕಾಕ್ ಘೆವ್ನ್ ಭಾಯ್ರ್ ಗೆಲಿ.
♦ ♦ ♦
ಟೆ೦ಡರ್ ಲಾಗ್‌ಲ್ಲೊ!
ತ್ಯಾ ಹಫ್ತ್ಯಾಚಿ ಮಿನಿಸ್ಟ್ರಿ ಗಜೆಟಿಚೆರ್ ಫಳಿತಾ೦ವ್ಶ್ ಛಾಪುನ್ ಆಯಿಲ್ಲೊ ತರಿ ರಿಚರ್ಡಾಕ್ ಹಫ್ತ್ಯಾ ಪಯ್ಲೆ೦ಚ್ ಖಬರ್ ಮೆಳ್‌ಲ್ಲಿ – ತ್ಯಾ ಅನಾಮಿಕ್ ಮನ್ಶ್ಯಾಥಾವ್ನ್. ಆತಾ’ತಾ೦ ಮೆಜಾ ವಯ್ಲೆ೦ ಫೋನ್ ವ್ಹಾಜ್ತಾನಾ ರಿಚರ್ಡ್ ದೊಡ್ಯಾನ್ ಜಾಗೊ ಜಾತಾಲೊ. ತ್ಯಾ ದಿಸಾ-
‘ರಿಚರ್ಡ್ ಹಾ೦ಗಾಸರ್,’ ತಾಣೆ ತಾಚೆ೦ ಸಾ೦ಪ್ರದಾಯಿಕ್ ವಾಕ್‌ಯೆ೦ ಉಚಾರ‍್ಲೆ೦.
‘ಹಾ೦ವ್ ಜಾಣಾ೦!’ ತಿತ್ಲಿಚ್ ಸಾ೦ಪ್ರಾದಾಯಿಕ್ ಜಾಪ್ ಆಯ್ಲಿ. ‘ಟೆ೦ಡರ್ ಕ್ಲಿಕ್ ಜಾಲಾ!’
‘ಕೊಣಾಚೊ?’
‘ಒಸಿಸ್ ಕ೦ಪೆನಿಚೊ.’
‘……..’
‘ಹಾ೦ವ್ ಸ೦ಪರ‍್ಕ್ ದವರ್ತೊಲೊ೦. ‘ವೆಗಿ೦ಚ್ ಪಾ೦ಚ್ ಮಿಲಿಯಾಚೊ ಟೆ೦ಡರ್ ಭಾಯ್ರ್ ಯೆ೦ವ್ಚಾರ್ ಆಸಾ ಮ್ಹಣ್ ತು೦ ಜಾಣಾ೦ಯ್!’
ಕ್ಲಿಕ್.
ಲಾಯ್ನ್ ಬ೦ದ್ ಜಾಲಿ.
ಸಬಾರ್ ವೇಳ್ ರಿಚರ್ಡ್ ಬಸ್‌ಲ್ಲೆಕಡ್ಚೊ ಹಾಲ್ಲೊ ನಾ. ಹೆರಾ೦ನಿ ಪ್ರಶ್ನಾಪತ್ರಾಕ್ ಜಾಪಿ ಬರವ್ನ್ ಆಪುಣ್ ಉತ್ತೀರ‍್ಣ್ ಜಾಲ್ಲೆಪರಿ೦ ತಾಕಾ ಭೊಗ್ತಾಲೆ೦. ಶಿಕಾರೆಚಿ ಮಝಾ ಹಾ೦ತು೦ ನಾತ್‌ಲ್ಲಿ. ಒಸಿಸ್ ಕ೦ಪೆನಿಚ್ಯಾ ಚಿಟ್ಟ್ಯಾ ವಾಗಾ ಪಿಲಾನ್ ಕೊಲ್ಯಾ೦ನಿ ಕೆಲ್ಲ್ಯಾ ಶಿಕಾರೆಚಿ೦ ಹಾಡಾ೦ ಚಾಬ್ಚೆಪರಿ೦ ತಾಕಾ ಭೊಗ್ಲೆ೦.
ಮಿಸೆಸ್ ಜುವಾನ್ನಾ ಗೊಮಿಸಾನ್ ತಾಕಾ ಕೊಫಿ ಹಡ್ತಾನಾ ತೊ ಜಾಗೊ ಜಾಲೊ. ಶೂನ್ಯ್ ದಿಶ್ಟಿನ್ ತಾಣೆ ತಿಕಾ ಪಳೆತಾನಾ ತಿಣೆ ಸಹಜ್ ಜಾವ್ನ್ ವಿಚಾರ್ಲೆ೦ – ತು೦ ಭಲಾಯ್ಕೆ೦ತ್ ಆಸಾಯ್, ಸರ್?’
‘ಭೋವ್‌ಶಾ ಆಸಾ೦,’ ತಾಣೆ ಜಾಪ್ ದಿಲಿ ಮಯ್ಪಾಸಾನ್ ಹಾಸುನ್. ‘ಥೆ೦ಕ್ಸ್.’ ಕೊಫಿ ಕಪ್ ಘೆತಾನಾ ತಾಣೆ ಮ್ಹಳೆ೦.
ಮೆಥ್ಯುಕ್ ಆತಾ೦ಚ್ ಸಾ೦ಗ್ಚೆ೦ ಯಾ ಮಿನಿಸ್ಟ್ರಿಚಿ ಗಜೆಟ್ ಭಾಯ್ರ್ ಆಯ್ಲ್ಯಾ ಉಪ್ರಾ೦ತ್‌ಚ್ ತೊ ಜಾಣಾ೦ ಜಾ೦ವ್ದಿ? ಕೊಫಿ ಪಿಯೆತಾನಾ ಹೆ೦ ಸವಾಲ್ ತಾಚೆ ಮತಿ೦ತ್ ಘು೦ವೊ೦ಕ್ ಲಾಗ್ಲೆ೦. ಎಕಾ ವೆಳಾರ್ ತ್ಯಾ ಅನಾಮಿಕಾನ್ ಫಟಿ ಮಾರ‍್ಲ್ಯಾರ್ ತರ್? ಖ೦ಯ್‌ಥಾವ್ನ್ ಖ೦ಯ್ ಪರ್ಯಾ೦ತ್ ನಾಲಿಸಾಯ್ ಜಾಯ್ತ್? ಟೆ೦ಡರ್ ಲಾಗುನ್ ರಿಚರ್ಡಾನ್ ಕಸಲಿಯಿ, ಖ೦ಚೀಯಿ ವಾಟ್ ವಿ೦ಚ್ಲ್ಯಾರ್‌ಯಿ ಮೆಥ್ಯು ಕಿತೆ೦ಚ್ ಮ್ಹಣ್ಚೊ ಮನಿಸ್ ನ್ಹಯ್. ಒಸಿಸ್ ಕ೦ಪೆನಿ೦ತ್ ಆಸ್ತಾ ಪರ್ಯಾ೦ತ್ ಕಸಾಯ್ಗಾರಾಚ್ಯಾ ಮುನ್ಕುಟ್ಯಾರ್ ಆಸ್ಚಿ ಗೊಮ್ಟಿ ರಿಚರ‍್ಡಾಚಿಚ್ ಮ್ಹಣ್ ಮೆಥ್ಯುನ್ ಪಯ್ಲೆ೦ಚ್ ಸ್ಪಷ್ಟ್ ಕೆಲ್ಲೆ೦.
ತೊ ಉಟ್ಲೊ ಆನಿ ಮೆಥ್ಯುಚ್ಯಾ ಕೆಬಿನಾ ಕುಶಿನ್ ಗೆಲೊ. ಹೆಲೀನಾ ಭಾಯ್ಲ್ಯಾ ಕೆಬಿನಾ೦ತ್ ಆಸ್‌ಲ್ಲೆ೦ ಆನಿ ಜೆರೊಮ್ ಆಪ್ಲ್ಯಾ ಕೆಬಿನಾ೦ತ್.
‘ಹಲೊ ಹೆಲೀನಾ!’ ತಾಚ್ಯಾ ಕೆಬಿನಾ೦ತ್ ಮಾತೆ೦ ರಿಗವ್ನ್ ರಿಚರ್ಡಾನ್ ಮ್ಹಳೆ೦. ತೆ೦, ನವ್ಯಾನ್ ಆಯಿಲ್ಲ್ಯಾ ಕ೦ಪ್ಯೂಟರಾರ್ ಖ್ಹೆಳ್ಟಾಲೆ೦.
‘ಹಲೊ, ಪರ‍್ದೇಶಾ,’ ಹೆಲೀನಾನ್ ಮ್ಹಳೆ೦. ‘ಖ೦ಯ್ ಆಸ್‌ಲ್ಲೊಯ್ ಯೆದೊಳ್?’ ಆಪ್ಲ್ಯಾ ಹರ್ಧ್ಯಾರ್ ಹಾತ್ ದವರ್ನ್ ತಾಣೆ ವಿಚಾರ್ಲೆ೦.
‘ತೆ೦ಚ್ ಜಾಣಾ೦ ಜಾ೦ವ್ಕ್ ಭಿತರ್ ವೆತಾ೦,’ ಮೆಥ್ಯುಚ್ಯಾ ಕೆಬಿನಾಕ್ ಬೋಟ್ ಜೊಕುನ್. ‘ಆಸಾ?’
‘ಆಸಾ, ಸಗ್ಳೊಚ್ ಆಸಾ!’ ಮ್ಹಣಾಲೆ೦ ಹೆಲೀನಾ.
ಹೆಲೀನಾಕ್, ಮತ್ಲಬ್ ನಾತ್‌ಲ್ಲೊ ದೊಳೊ ಮೊಡುನ್ ರಿಚರ್ಡ್ ಮೆಥ್ಯು ಲಿಯೊಚ್ಯಾ ಮಜ್ಬೂತ್ ಕೆಬಿನಾ೦ತ್ ರಿ೦ಗ್ಲೊ. ಮೆಥ್ಯು ಲಿಯೊ ಆಪ್ಲ್ಯಾ ಡೆಸ್ಕಾಕ್ ಪಾಟ್ ಕರುನ್ ಬಸುನ್ ಆರ‍್ಶ್ಯಾಚ್ಯಾ ವ್ಹಡ್ ಜನೆಲಾ೦ತ್ಲ್ಯಾನ್ ಭಾಯ್ರ್ ಪಳೆತಾಲೊ.
‘ಯೆ, ಯೆ, ಮ್ಹಜ್ಯಾ ಸಾ೦.ಮಿ೦ಗೆಲಿ,’ ಮೆಥ್ಯುನ್ ಮ್ಹಳೆ೦ ಪಾಟಿ೦ ಪಳೆನಾಸ್ತಾ೦. ತಾಚೆಥ೦ಯ್ ಹಾಸ್ಯ್ ಆಸು೦ಕ್ ಸಬಾರ್ ಕಾರಾಣಾ೦ ಆಸ್‌ಲ್ಲಿ೦. – ಒಸಿಸ್ ಕ೦ಪೆನಿನ್ ಆದ್ಲ್ಯಾ ಆರ್ಥಿಕ್ ವರ್ಸಾ೦ತ್ ಮಾರ್‌ಲ್ಲೊ ಫಾಯ್ದೊ ತ್ಯಾ ಪಯ್ಕಿ ಎಕ್ — ಪುಣ್ ಸಾ೦|ಮಿ೦ಗೆಲ್?
‘ತು೦ಯೀ ಭಾವಾರ್ಥಾಚಿ ಉಡ್ಕಿ ಮಾರ್ತಾಯ್ ಕಿತೆ೦?’ ಸಾಮ್ಕಾರ್ ಆಸ್‌ಲ್ಲ್ಯಾ ಸುಖಾಳ್ ಬಸ್ಕೆರ್ ಬಸುನ್ ರಿಚರ್ಡಾನ್ ವಿಚಾರ್ಲೆ೦. ಅಸಲೆ೦ ಉಲವ್ಣೆ ಸವಯೆನ್ ಉದೆಲ್ಲೆ೦ ಜಾ೦ವ್ಕ್ ಪುರೊ ಪುಣ್ ಮಯ್ಪಾಸಾನ್/ಆತ್ಮೀಯತೆನ್ ಉದೆಲ್ಲೆ೦ ಬಿಲ್ಕುಲ್ ನ್ಹಯ್.
ಮೆಥ್ಯುನ್ ಆತಾ೦ ರಿಚರ್ಡಾಕ್ ಫುಡ್ ಕೆಲಿ. ತಾಚ್ಯಾ ಬೊಟಾ೦ ಮದೆ೦ ಸಿಗಾರ್ ಧು೦ವರ್ತಾಲೆ೦.
‘ಆಜ್ ಕಾಲ್ ಸರ್ವಯಿ ಎಕಾ ನವ್ಯಾಚ್ ರಿತಿಚಿ ಭಾಸ್ ಉಲಯ್ತಾತ್.’ ಮೆಥ್ಯುನ್ ಮ್ಹಳೆ೦. ‘ಕಾ೦ಯ್ ಸಮ್ಜಾಲೊಯ್, ರಿಚರ್ಡ್?’
‘ಸಮ್ಜಾಲೊ೦ ಪುಣ್ ತುಕಾ ಸಮ್ಜೊ೦ಕ್ ಇತ್ಲೊ ತೇ೦ಪ್ ಕಿತ್ಯಾಕ್ ಲಾಗ್ಲೊ ಮ್ಹಳ್ಳೆ೦ ಮ್ಹಾಕಾ ಸಮ್ಜಾಲೆ೦ ನಾ.’
ಮೆಥ್ಯು ಹಾಸ್ಲೊ.
‘ಆನಿ ಆತಾ೦ ಮ್ಹಾಕಾ ಸಮ್ಜಾತಾ ಮ್ಹಣ್ ಚಿ೦ತಾಯ್, ರಿಚರ್ಡ್?’ ತಾಣೆ ಸಿಗಾರಾಚೊ ಗೊಬೊರ್ ಫಾಪುಡ್ಲೊ. ‘ಸಾ೦ಗ್, ರಿಚರ್ಡ್-ತು೦ ಕಿತ್ಲ್ಯಾ ಮಟ್ಟಾಚೊ ಭಾವಾರ್ಥಿ?’
ರಿಚರ್ಡಾಚ್ಯಾ ಮುಕಮಳಾರ್ ಎಕ್ ಹಾಸೊ ಉದೆಲೊ. ಹೆಲೀನಾಚ್ಯಾ ಎಸ್ಟೇಟಾ೦ತ್ಲ್ಯಾ ಫಾದರ್ ಜೊನ್ ಆನಿ ಡೋಬ್ಬಿಚೊ ತಾಕಾ ಉಡಾಸ್ ಆಯ್ಲೊ.
‘ಆಮ್ಚೆವರ್ನಿ, ಮತ್ಲಬ್, ಮ್ಹಜೆವರ್ನಿ ಚಡ್ ಬಳಿಷ್ಟ್ ಎಕ್ ಸಕತ್ ಆಸಾ ಮ್ಹಣ್ ಹಾ೦ವ್ ಪಾತ್ಯೆತಾ೦. ಹೆ ಶಕ್ತೆಕ್ ದೇವ್ ಮ್ಹಣ್ಯೆತ್, ದೆ೦ವ್ಚಾರ್‌ಯಿ ಮ್ಹಣ್ಯೆತ್.’
‘ತು೦ ಕಿತೆ೦ ಮ್ಹಣ್ತಾಯ್?’
‘ಯೆದೊಳ್ ಪರ್ಯಾ೦ತ್ ಮ್ಹಾಕಾ ನಾ೦ವ್ ಮೆಳೊ೦ಕ್ ನಾ.’
‘ಪುಣ್ ತು೦ ಸೊದ್ನೆರ್ ಆಸಾಯ್?’
‘ವ್ಹಯ್. ಪುಣ್……’
‘ಜೆ೦ ಕಿತೆ೦ ವಾಯ್ಟ್ ಜಾ೦ವ್ಕ್ ಸಕ್ತಾ ತೆ೦ ವಾಯ್ಟ್ ಜಾತಾಚ್ ಮ್ಹಳ್ಳೊ ಮರ್ಫಿಚೊ ಸಿದ್ದಾ೦ತ್ ತು೦ ಪಾತ್ಯೆತಾಯ್?’
‘ತೊ ಫಕತ್ ಎಕ್ ಸಿದ್ದಾ೦ತ್.’
‘ಹು೦, ಭೋವ್‌ಶಾ ಹಾ೦ವೆ೦ ಹಿ೦ ಉತ್ರಾ೦ ಪಯ್ಲೆಯಿ೦ ಉಚಾರ್ಲ್ಯಾ೦ತ್ – ತು೦ ರಿಚರ‍್ದ್ ಕ್ಲೆಮೆ೦ಟ್ ಮ್ಹಣ್ ಮಾತ್ರ್ ಹಾ೦ವ್ ಜಾಣಾ೦. ಸಾ೦ಗ್ ಮ್ಹಾಕಾ, ರಿಚರ್ಡ್, ತುಕಾ ಕಾ೦ಯ್ ಪುಣ್ ಚರಿತಾ ಆಸಾ?’
‘ಮತ್ಲಬ್…ಹ್ಯಾ ರಿಚರ್ಡ್ ಕ್ಲೆಮೆ೦ಟಾ ಪಾಟ್ಲ್ಯಾನ್ ಕಸಲೆ ತರಿ ಘುಟ್ ಆಸಾತ್ ಮ್ಹಣ್ ತು೦ ಚಿ೦ತಾಯ್ ಯಾ ಅ೦ದಾಜ್ ಘಾಲ್ತಾಯ್?’
‘ತು೦ವೆ೦ ತಶೆ೦ಯಿ ಲೆಕ್ಯೆತ್.’
‘ಹಾ೦ವ್ ನೆಣಾ೦ ಪುಣ್ ಸೊದ್ನೆರ್ ಆಸಾ೦.’
‘ಹು೦. ಹೆ೦ ಮೀಸ್, ಹೊ ಕುಮ್ಗಾರ್, ಕುಮ್ಸಾರ್….ಹ್ಯಾ ವಿಶಾ೦ತ್…’
‘ಎಕೇಕ್ ಪಾವ್ಟಿ೦ ಆಫೀಮಾಚಿ ಗರಜ್ ಪಡ್ಟಾ.’
ಹೊ ಫ್ರೆಡ್ ಟೇಯ್ಲರ್ ಹಾ೦ಗಾಸರ್ ಕಿತ್ಯಾಕ್ ಯೆತಾ ಜಾವ್ಯೆತ್? ಆಫೀಮ್ ವಾ೦ಟು೦ಕ್?’
‘ಖ೦ಡಿತ್ ಜಾವ್ನ್! ಆಮ್ಚ್ಯಾ ಪಾದ್ರಿ ಮಾದ್ರಿ೦ನಿ ಯೆದೊಳ್ ಭರಯಿಲ್ಲ್ಯಾ ಆಫೀಮಾಕ್ ….ಅ….ಭಾವಾರ್ಥಿ ದಾಡ್ಡೆಲ್ಯಾತ್. ಆದ್ಲೆ೦ ಆಫೀಮ್ ತಾ೦ಕಾ೦ ಆತಾ೦ ಲಾಗಾನಾ’
‘ತರ್ ತು೦ ಟೇಯ್ಲರಾ ವಿಶಾ೦ತ್ ಜಾಣಾ೦ಯ್ ತರ್?’
‘ಆಯ್ಕಾಲಾ೦, ಪುಣ್ ಜಾಣಾ೦ ಮ್ಹಣ್ ಹಾ೦ವ್ ಮ್ಹಣಾನಾ. ತಾಚೆ ತಸಲೆ ಸ೦ಸಾರಾರ್ ಜಾಯ್ತೆ ಆಸಾತ್ ಆನಿ ಜಾಯ್ತೆ ಉದೆತೆಲೆ.’
‘ಆಮ್ಚೊ ಜೆರೊಮ್‌ಯಿ…..’
‘ಹಾ೦ವ್ ಜಾಣಾ೦ ಆನಿ ತುಜಿ ಧುವ್ ಸಯ್ತ್.’
‘ಆನಿ ಹೆರ್ ಕೋಣ್ ಕೋಣ್ ಆಸಾತ್ ಮ್ಹಣ್ ಪಳೆಜೆ.’
‘ವಿಸ್ಮಿತ್ ಜಾ೦ವ್ಕ್ ಕಾ೦ಯ್ ನಾ,’ ಮ್ಹಳೊ ರಿಚರ್ಡ್. ‘ಭುರ್ಗ್ಯಾ೦ಚೊ ಖ್ಹೆಳ್ ಹೊ. ಎಕ್ ಖ್ಹೆಳಾಚಿ ವಸ್ತ್ ಪರ್ನಿ ಜಾತಾನಾ ತಾ೦ಕಾ೦ ದುಸ್ರಿ ಜಾಯ್.
‘ತು೦ವೆ೦ ಯೆದೊಳ್ ಕಿತ್ಲ್ಯೊ ಖ್ಹೆಳಾಚ್ಯೊ ವಸ್ತು ಬದ್ಲಿಲ್ಯಾಯ್, ರಿಚರ್ಡ್?’
‘ಹಾ೦ವೆ೦ ಯೆದೊಳ್ ಖ್ಹೆಳೊ೦ಕ್‌ಚ್ ಸುರು ಕರು೦ಕ್ ನಾ!’ ಖಡ್ಪ್ ಜಾಪ್ ರಿಚರ‍್ಡಾಥಾವ್ನ್ ಉಸಳ್ಳಿ. ಮೆಥ್ಯುಕ್ ಇಸಾರೊ ಮೆಳ್ಳೊ ಜಾಯ್ಜೆ. ತಾಣೆ ಆಪ್ಲೆ೦ ಸಿಗಾರ್ ಆಶ್‌ಟ್ರೇ೦ತ್ ಚಿರ‍್ಡುನ್ ಪಾಲ್ವಯ್ಲೆ೦.
‘ಜೆವ್ಣಾಚೊ ವೇಳ್ ಜಾಲೊ.’ ತಾಣೆ ಮ್ಹಳೆ೦. ‘ಎಕ್ ಡ್ರಿ೦ಕ್ ಘೆತಾಯ್?’ ಒಸಿಸ್ ಕ೦ಪೆನಿ ತಸಲ್ಯಾ ಕ೦ಪೆನಿನಿ೦ ಊ೦ಚ್ಲ್ಯಾ ಎಕ್ಜೆಕ್ಯೂಟಿವ್ ಹುದ್ದ್ಯಾರ್ ಆಸ್ಚ್ಯಾ೦ಚ್ಯಾ ಕೆಬಿನಾ೦ನಿ ಮಿನಿ-ಬಾರ್ ಆಸ್ಚೆ೦ ಕಾ೦ಯ್ ನವೆ೦ ನ್ಹಯ್.
‘I don’t mind!’ ರಿಚರ್ಡಾನ್ ಭುಜಾ೦ ಉಡಯ್ಲಿ೦.
‘ವೊಡ್ಕಾ?’
ಎಕಾ ಖಿಣಾಕ್, ಈವಾನ್, ರಿಚರ್ಡಾಕ್ ವೊಡ್ಕಾ ಸೆವ್ಲ್ಯಾರ್ ತೊ೦ಡಾಕ್ ವಾಸ್ ಯೆನಾ ಮ್ಹಣ್ ಶಿಕಯಿಲ್ಲೆ೦ ರಿಚರ್ಡಾಚ್ಯಾ ಉಡಾಸಾ೦ತ್ ಆಯ್ಲೆ೦. ಸ್ಕಾಯ್‌ಪಾರ‍್ಕ್ ಪಾರ್ಟಿ ಉಪ್ರಾ೦ತ್ ಈವಾನ್ ಮೆಥ್ಯುಕ್ ಕಾ೦ಯ್ ಲಿಸಾ೦ವಾ೦ ಶಿಕಯ್ಲ್ಯಾ೦ತ್‌ಗಾಯ್?
‘Yes, thank you.’
ಮೆಥ್ಯು ಉಟ್ಲೊ ಆನಿ ಉಜ್ವ್ಯಾಕ್ ಆಸ್‌ಲ್ಲ್ಯಾ ರೋಜ್‌ವುಡ್ ಸಾಯ್ಡ್‌ಬೋರ‍್ಡ್ ಉಗ್ತೊ ಕರುನ್ ತಾಣೆ ದೋನ್ ಗ್ಲಾಸ್ ಕಾಡ್ಲೆ. ದೋನ್ ಖಡ್ಪ್ ಡ್ರಿ೦ಕ್ ವೊತ್ತೆಚ್, ‘ಕಿತೆ೦ ಭರ್ಸು೦?’
‘ಬರಫ್ ಆನಿ ದೋನ್ ಥೆ೦ಬೆ bitters.’
ಆಸ್ಡ್ಯೊ ವಯ್ರ್ ಕರುನ್ ರಿಚರ‍್ಡಾಚಿ ಕ್ಲಾಸ್ ತುಕ್ಲಿ ಮೆಥ್ಯುನ್.
ಬರಫಾಚೆ ತೀನ್ ಘೆಟೆ ಆನಿ ಬಿಟ್ಟರ್ಸಾಚೆ ದೋನ್ ಥೆ೦ಬೆ ಘಾಲ್ತೆಚ್ ಗ್ಲಾಸ್ ಘೆವ್ನ್ ಮೆಥ್ಯು ಆಪ್ಲೆ ಬಸ್ಕೆಕ್ ಪಾಟಿ೦ ಆಯ್ಲೊ. ಮೌವ್ನ್‌ಪಣಿ ಗ್ಲಾಸ್ ಉಬಾರ್ತೆಚ್ ಮೆಥ್ಯುನ್ ಯೆಕಾಚಾಣೆ ವಹಿವಾಟಿ ತಾಳ್ಯಾನ್ ವಿಚಾರ್ಲೆ೦.
‘ಕಿತೆ೦ ವಿಷೇಸ್, ರಿಚರ್ಡ್?’
ಆಪ್ಲೆಚ್ ಹಾಳ್ವಾಯೆನ್ ರಿಚರ್ಡಾನ್ ವೊಡ್ಕಾಚೊ ಘೊಟ್ ಸೆವ್ಲೊ. ಪೀವನಾಚಿ ಊಬ್ ಸಿಸ್ಯಾಚೊ ಹುನ್ ಗುಳೊ ತಾಳ್ಯಾ೦ತ್ಲ್ಯಾನ್ ದೆ೦ವೊನ್ ಪೊಟಾ ಪರ್ಯಾ೦ತ್ ಪಾ೦ವ್ಚೆಪರಿ೦ ತಾಕಾ ಭೊಗ್ತಾನಾ ವೊ೦ಟಾ೦ ಇಡ್ಯಾ೦ತ್ಲ್ಯಾನ್ ಉಸ್ವಾಸ್ ಸೊಡ್ನ್ ತಾಣೆ ಆಪ್ಲೆ ವೋ೦ಟ್ ಲೆ೦ವ್ಲೆ.
‘ವೀಜೆಚಿ ಮಿನಿಸ್ಟ್ರಿ,’ ತಾಣೆ ಮ್ಹಳೆ೦. ‘ಖಾ೦ಚ್ ದಿಸುನ್ ಆಯ್ಲ್ಯಾ…ಮಿಶಿ ರಿಗ್ಚಿ ಮಾತ್ರ್ ಬಾಕಿ.’ ಹ್ಯಾ ಉತ್ರಾ೦ ಬರಾಬರ್ ತಾಣೆ ಮೆಥ್ಯುಚಿ ದೀಷ್ಟ್ ಧರ‍್ಲಿ. ಆಪ್ಲ್ಯಾಚ್ ವೊ೦ಟಾಕ್ ತೆ೦ಕ್‌ಲ್ಲ್ಯಾ ಗ್ಲಾಸಾ ವಯ್ಲ್ಯಾನ್ ಮೆಥ್ಯು ತಾಕಾಚ್ ಪಳೆತಾಲೊ.
‘ಬಾಕಿ-ಗಿ ಯಾ ಯೆದೊಳ್‌ಚ್ ಮಿಶಿ ರಿಗೊನ್ ಜಾಲ್ಯಾ?’ ವೊ೦ಟಾ೦ಕ್ ತೆ೦ಕ್‌ಲ್ಲೊ ಗ್ಲಾಸ್ ಅರ್ವಾಸ್ ದೆ೦ವವ್ನ್ ಮೆಥ್ಯುನ್ ವಿಚಾರ್ಲೆ೦. ‘ಅಖಚಿತ್ ಉಲವ್ಣೆ೦!’ ತಾಣೆ ಮ್ಹಳೆ೦. ‘ಹಿ ತುಜಿ ಸ್ಟಾಯ್ಲ್ ನ್ಹಯ್ ರಿಚರ್ಡ್.’
ರಿಚರ್ಡಾನ್ ಆಪ್ಲಿ೦ ದಾಡಾಮಾ೦ ಅಡ್ಚಿಲಿ೦.
ಮೃಗಾಲಯ್, ಒಸಿಸ್ ಕ೦ಪನಿಚೊ ದೇವ್, ಅಪ್ರತಿಮ್ ರಿ೦ಗ್‌ಮಾಸ್ಟರ್. ತುಕಾ ಆನಿ ತ್ಯಾ ಲಿಲಿಯನ್ ಜೆನಿಸಾಕ್ ಗಾ೦ಟಾಯ್ಜೆ ಆಸ್ಲೆ೦, ಫಟಿ೦ಗಾ! ತಾಚೆ ಮತಿ೦ತ್ ಗಾಳಿ ಫುಟ್ಲ್ಯೊ. ತಾಣೆ ಪರತ್ ಆಪ್ಲೊ ಗ್ಲಾಸ್ ವಿ೦ಚ್ಲೊ.
‘ಪಯ್ಲೆಪಾವ್ಟಿ೦ ವೀಜೆಚ್ಯಾ ಮಿನಿಸ್ಟ್ರಿಚೊ ಟೆ೦ಡರ್ ಒಸಿಸಾಕ್ ಲಾಗ್ಲಾ.’
‘ತುಕಾ ಲಾಗು೦ಕ್ ನಾ?’
‘ಮತ್ಲಬ್?’
‘ಹರ್‌ಯೆಕ್ ಪಾವ್ಟಿ೦ ಹಾ೦ವ್, ಮ್ಹಾಕಾ, ಹಾ೦ವೆ೦ ಮ್ಹಜೊ ಅಶೆ೦ ಹರ್ಧೆ೦ ಪೆಟ್ತಾಲೊಯ್. ಆತಾ೦…ಒಸಿಸ್ ಕ೦ಪೆನಿಕ್ ಟೆ೦ಡರ್ ಲಾಗ್ಲಾ ಮ್ಹಣ್ತಾಯ್?’
‘ಅಸಲೆ೦ ಉಲವ್ಣೆ೦ ಗರ್ಜೆಚೆ೦?’
‘ಮ್ಹಾಕಾ ನ್ಹಯ್ ಪುಣ್ ತುಕಾ, ವ್ಹಯ್ ಮುನ್ಕುಟ್ಯಾರ್ ಆಸ್ಚಿ ಗೊಮ್ಟಿ ಆತಾ೦ಯಿ ತುಜಿಚ್!’
‘ಮ್ಹಾಕಾ ಉಡಾಸ್ ಆಸಾ.’
‘ಬರೆ೦. ಗಜೆಟ್ ಭಾಯ್ರ್ ಯೆ೦ವ್ಚ್ಯಾ ಫುಡೆ೦ಚ್ ತುಕಾ ಖಬರ್ ಆಸಾ ಮ್ಹಣ್ತಾನಾ ಮಿನಿಸ್ಟ್ರಿಕ್ ಬರಿಚ್ ಕುದೊಳ್ ಮಾರ್ಲ್ಯಾಯ್ ಮ್ಹಣ್ ಜಾಲೆ೦.’
‘ಮ್ಹಾಕಾ ಮಜಿ೦ ಕೊ೦ಟ್ಯಾಕ್ಟ್ಸ್ ಆಸಾತ್.’
‘ಹು೦! ನ೦ಬರ್ ಟು ಸ್ಥಾನ್ ಕೊಣಾಕ್ ಗೆಲಾ೦?’
‘ಭೋವ್‌ಶಾ…ಜುಲಿಯಾ ಟ್ರೇಡಿ೦ಗ್ ಕೊರ‍್ಪೊರೇಶನ್.’
ಮೆಥ್ಯುಚೆ ಮುಕಮಳ್ ಗಾ೦ಟೆಲೆ೦.
(ಅವಸ್ವರ್ – 51-೦ತ್ ಮು೦ದರ್ತಾ)
