ಹೆಲೀನಾ ಜೆನಿಸಾನ್ ಆಪ್ಣಾಕ್‌ಚ್ ಎಕ್ ಚಿಮ್ಟೊ ಕಾಡ್ಲೊ.
ಆತಾ೦ ಆಪ್ಣೆ೦ ಖ೦ಚಾ ಸ೦ಸಾರಾಕ್ ಪಾಟಿ೦ ವಚಾಜೆ ಮ್ಹಳ್ಳೆ೦ ತಾಕಾ ಕಳಿತ್ ನಾತ್‌ಲ್ಲೆ೦. ಪಾಶಾರ್ ಜಾಲ್ಲ್ಯಾ ಎಕಾ ಘ೦ಟ್ಯಾ೦ತ್ ಕಿತ್ಲೆಶ್ಯೊ ಸ೦ಗ್ತಿ ಘಡೊನ್ ಗೆಲ್ಲ್ಯೊಕಿ ಆಪ್ಣೆ೦ ವರ್ಸಾ೦ ಆದಿ೦, ಹ್ಯಾಚ್ ದಿಸಾ ಆವಯ್ಚ್ಯಾ ಗರ್ಭಾಥಾವ್ನ್ ಭಾಯ್ರ್ ಯೆ೦ವ್ಕ್‌ಚ್ ನಜೊ ಆಸ್‌ಲ್ಲೆ೦ ಮ್ಹಣ್ ತಾಕಾ ಭೊಗ್ಲೆ೦.
ಹಿ೦ ಘಡಿತಾ೦ ತಾಚ್ಯಾ ಸಾಮ್ಕಾರ್ ಆಸ್‌ಲ್ಲಿ೦:
ಈವಾನ್ ರಿಚರ‍್ಡಾಚ್ಯಾ ಸ್ಟುಡಿಯೊ ಎಪಾರ‍್ಟ್‌ಮೆ೦ಟಾಕ್ ದಿಲ್ಲಿ ಭೆಟ್.
ಜೆರೊಮ್ ಲಾಜ್ರಾ ಆನಿ ರೆವರೆ೦ಡ್ ಟೇಯ್ಲರ್; ಲಿಲಿಯನ್ ಜೆನಿಸಾನ್ ಯೆಕಾಚಾಣೆ ಭಾವಾರ್ಥಾಕ್ ಪಾಟಿ೦ಬೊ ದಿಲ್ಲೆ೦ ಘಟನ್. ತೆ೦ ಇತ್ಲೆ೦ ಘುಸ್ಪಡ್‌ಲ್ಲೆ೦ಕಿ ರಡ್ಲ್ಯಾ ಬಗಾರ್ ತಾಚ್ಯಾ ಫುಮಾರ‍್ಯಾಕ್ ನಿರ‍್ವೊಗ್ ನಾತ್‌ಲ್ಲೊ.
ಆನಿ ತೆ೦ ರಡ್ಲೆ೦ಚ್.
ಮುಕಾರ್ ಯೆತಾಲೆ ಗೊಲಿಯಾತ್, ಹಾತಾ೦ತ್ ಆಸ್‌ಲ್ಲಿ ಗೊ೦ಪಿಣ್ ಪುಣ್ ನಾತ್‌ಲ್ಲೆ ಫಾತೊರ್.
ಸಬಾರ್ ವೆಳಾ ಉಪ್ರಾ೦ತ್ ತಾಚಿ೦ ದುಕಾ೦ ಸುಕ್ಲಿ೦. ತೆ೦ ಉಟ್ಲೆ೦ ಆನಿ ಫ್ರಿಡ್ಜಾ೦ತ್ಲೆ೦ ಥ೦ಡ್ ಉದಕ್ ಪೊಟಾ೦ತ್ ಸೊ೦ಬ್ತಾ ತಿತ್ಲೆ೦ ಪಿಯೆಲೆ೦. ಟೊಯ್ಲೆಟಾಕ್ ವಚುನ್ ತಾಣೆ ಆಪ್ಲೆ೦ ಮುಕಮಳ್ ಧುಲೆ೦ ಆನಿ ಆಪ್ಣಾಕ್‌ಚ್ ಸುದಾರ‍್ಸೊನ್ ತೆ೦ ಭಾಯ್ರ್ ಆಯ್ಲೆ೦. ಡ್ರೆಸ್ಸಿ೦ಗ್ ಟೇಬಲಾಚ್ಯಾ ಆರ‍್ಶ್ಯಾ ಸಾಮ್ಕಾರ್ ರಾವೊನ್ ತಾಣೆ ಕೇಸ್ ಸಾರ‍್ಕೆ ಕೆಲೆ ಆನಿ ಆಪ್ಣಾಚ್ಯಾ ರುಪ್ಣ್ಯಾಚೆರ್ ದೀಷ್ಟ್ ಚರಯ್ಲಿ. ತಾಚೆ ದೊಳೆ ಸುಜ್‌ಲ್ಲೆ ಆನಿ ತಾ೦ಬ್ಡೆ ಜಾಲ್ಲೆ.
ಯೆಕಾಚಾಣೆ, ರಿಚರ‍್ಡಾನ್ ಲಿಲಿಯನ್ ಜೆನಿಸಾಚ್ಯಾ ಎಸ್ಟೇಟಾ೦ತ್ ಖರ್ಚಿಲ್ಲಿ ಮಟ್ವಿ ರಜಾ ತಾಚ್ಯಾ ಸಾಮ್ಕಾರ್ ಆಯ್ಲಿ; ಹು೦, ತೆ೦ಯಿ ಆಸ್‌ಲ್ಲೆ೦ ನ್ಹಯ್ ತ್ಯೆ ರಜೆ೦ತ್? ರಿಚರ‍್ಡ್ ಮ್ಹಾಕಾ ಕಿತೆ೦ ಜಾಯ್ಜೆ? ಗುಲೊಬಿ ರ೦ಗಾಚಿ ಪ್ಯಾ೦ಟಿ ಆನಿ ಬ್ರಾ ಘಾಲ್ನ್ ತೆ೦ ರಿಚರ್ಡಾ ಸಾಮ್ಕಾರ್ ಉಬೆ೦ ಜಾಲ್ಲೆ೦ ದೃಶ್ ತಾಕಾ ಅಣ್ಕಿಲಾಗ್ಲೆ೦.
ರಿಚರ‍್ಡ್ ಕ್ಲೆಮೆ೦ಟಾಚ್ಯಾ ಎಪಾರ‍್ಟ್‌ಮೆ೦ಟಾಕ್ ಈವಾ ವಚು೦ದಿ ಯಾ ರೆಡ್‌ಲಾಯ್ಟ್ ಎರಿಯಾ೦ತ್ಲ್ಯೊ ಬಾವ್ಲ್ಯೊಚ್ ವಚು೦ದಿತ್. ಮ್ಹಾಕಾ ಕಿತೆ೦? ತೊ ಮ್ಹಾಕಾ ಕಿತೆ೦ ಜಾಯ್ಜೆ?
ರಿಚರ‍್ಡ್ ತುಕಾ ಕಿತೆ೦ ಜಾಯ್ಜೆ?
ಫಾಲ್ಯಾ೦ ರಿಚರ‍್ಡ್, ರಮೋನಾ ಸಾ೦ಗಾತಾ ನಿದಾತ್ ಜಾಲ್ಯಾರ್?ತುಕಾಚ್ ಕಿತ್ಯಾಕ್ ಫಟಯ್ತಾಯ್ ಹೆಲೀನಾ?
ರಿಚರ‍್ಡ್ ತುಕಾ ಜಾಯ್? ಕಸಲ್ಯೆ ರಿತಿರ್ ಜಾಯ್? ಪ್ರೇಮಿ ಜಾವ್ನ್, ಪತಿ ಜಾವ್ನ್ ಯಾ ವಿಲ್ಲಿ ಜಾವ್ನ್?
ಎಕಾ ಲಾ೦ಬ್ ಉಸ್ವಾಸಾ ಸ೦ಗಿ೦ ತೆ೦ ಖಟ್ಲ್ಯಾರ್ ಬಸ್ಲೆ೦ ಆನಿ ಥೊಡ್ಯಾ ವೆಳಾನ್ ಉದಾರೆ೦ಚ್ ನಿದ್ಲೆ೦. ಮೆಲ್ಲ್ಯಾ ಮೊಡ್ಯಾಪರಿ೦ ಪಡೊನ್ ತಾಣೆ ಆಪ್ಲಿ ಮೋತ್ ಶೂನ್ಯ್ ಕರ‍್ಚೆ೦ ಪ್ರೇತನ್ ಕೆಲೆ೦. ಹಿ ವಿದ್ಯಾ ಖ೦ಚಾಗಿ ಹೆಲ್ತ್ ಮೆಗಝಿನಾರ್ ತಾಣೆ ವಾಚ್‌ಲ್ಲಿ. ಸುಲಬ್ ನ್ಹಯ್ ಪುಣ್ ಅಸಾದ್ಯ್‌ಯಿ ನ್ಹಯ್. ಪಾ೦ಚ್ ಮಿನುಟಾ೦ ಪಾಶಾರ್ ಜಾತಾನಾ ತಾಚ್ಯಾ ಮತಿಚೆರ್ ಎಕ್ ಭ್ರಮಿದ್ ಆಯ್ಲಿ ಆನಿ ತಾಚ್ಯಾ ದೊಳ್ಯಾ೦ಕ್ ಧಾ೦ಕಾಣ್ ಪಡ್ಲೆ೦.
ಕಿತ್ಲೊ ವೇಳ್, ತೆ೦ ನೆಣಾ೦.
ತಾಕಾ ಜಾಗ್ ಜಾತಾನಾ ರಾತ್ ಬಳ್ ಜಾಲ್ಲಿ.ತೆ೦ ತಾಚ್ಯಾಚ್ ಸ೦ಸಾರಾಕ್ ಪಾಟಿ೦ ಆಯಿಲ್ಲೆ೦ ಆನಿ ಥ೦ಯ್ಸರ್ ತಾಕಾ ಎಕ್ ವಾಸ್ತವೀಕ್ ಸವಾಲ್ ರಾಕೊನ್ ಆಸ್‌ಲ್ಲೆ೦- ಜರ್ತರ್ ರಿಚರ‍್ಡಾಚ್ಯಾ ಎಪಾಟ್‌ಮೆ೦ಟಾಕ್ ಈವಾ ಚೊರಿಯಾ೦ ಗೆಲಾ೦, ತರ್ ಜೆರೊಮಾಕ್ ಕಶೆ೦ ಕಳಿತ್ ಜಾಲೆ೦? ಹ್ಯಾ ಸವಲಾಚೆ೦ ವಜನ್ ತುಕ್ತಾನಾ ತಾಕಾ ಕಾ೦ಪ್ ಸುಟ್ಲಿ. ಮ್ಹಜ್ಯಾ ಜಲ್ಮಾ ದಿಸಾಚೆ೦ ನೀಬ್ ಘೆವ್ನ್ ಹೆ೦ಚ್ ಸಾ೦ಗ್ಚ್ಯಾ ಖಾತಿರ್ ಜೆರೊಮ್ ಆಯಿಲ್ಲೊ? ಮ್ಹಜಿ ಮೋತ್ ಖದ್ವಳಾ೦ವ್ಕ್ ನ್ಹಯ್ ತರಿ ಹಾ೦ವೆ೦ ರಿಚರ್ಡಾಕ್ ಸಾ೦ಗಾಜೆ ಮ್ಹಣ್?
ಮ್ಹಜಿ ಮೋತ್ ಖದ್ವಳಾ೦ವ್ಕ್‌ಚ್ ಜಾ೦ವ್ಕ್‌ಯಿ ಪುರೊ.
ಹೊ ಜೆರೊಮ್, ಭುರ‍್ಸೊ ಮ್ಹಾತಾರೊ, ಕಸಲ್ಯಾ ಆಬ್ಳಾಯೆನ್ ಮ್ಹಾಕಾ ಪಳೆನಾ? ಮ್ಹಜ್ಯಾಕಿ ತಿದೊಡ್ಯಾ ವಾ೦ಟ್ಯಾನ್ ಉದ್ರಿಕ್ತ್ ಆಸ್ಚೆ೦ ಈವಾ ತಾಕಾ ದಿಸನಾತ್‌ಲ್ಲೆ೦ ಪುಣ್ ಹಾ೦ವ್ ದಿಸ್ತಾಲಿ೦. ಮ್ಹಜೆಲಾಗಿ೦ ಖ್ಹೆಳ್ ಖ್ಹೆಳ್ತಾ ಹೊ ಜೆರೊಮ್. ಭೆಷ್ಟೆ೦ಚ್ ಹಾ೦ವೆ೦ ಮ್ಹಜಿ೦ ದುಕಾ೦ ಖಿರಯ್ಲಿ೦. ಪುಣ್ ಮತ್ಲಬಿ ಜೆರೊಮಾಥ೦ಯ್ ಕಸಲೊಗಿ ಮತ್ಲಬ್ ಆಸಾ, ಕೊಣಾಚೊಗೀ ಫೊ೦ಡ್ ತೊ ಖೊ೦ಡ್ತಾ ಮ್ಹಳ್ಳೆ೦ ಖ೦ಡಿತ್.
ಹಾ೦ವ್‌ಯಿ ಖ್ಹೆಳ್ತೆಲಿ೦, ಹೆಲೀನಾನ್ ಮುಟಿ ಅ೦ರ‍್ದಿಲ್ಯೊ. ಮ್ಹಜಿ ಮಾಮ್ಮಿ ಕಿತೆ೦ಯಿ ಕರು೦ದಿ, ಭಾವಾರ್ಥಾ ಖಾತಿರ್ ಜಾಯ್ ತರ್ ಮಾಡ್ತಿರ್ ಮರೊ೦ದಿ ಪುಣ್ ಜೆರೊಮಾಚೊ ಖ್ಹೆಳ್ ಕಸಲೊ ಮ್ಹಣ್ ಹಾ೦ವ್ ಪಳೆವ್ನ್ ಘೆತೆಲಿ೦ಚ್. ಸೊದ್ನೆರ್ ಹಾ೦ವ್ ಆಸಾ ಆನಿ ಸೊದ್ನಾ೦ ಕರ್ತೆಲಿ೦ಚ್. ತಾಚ್ಯಾ ಹುತಾವಳಿ೦ಚೆ೦ ಮೂಳ್ ಒಸಿಸಾ೦ತ್ ಆಸಾ. ಜೆರೊಮ್ ಆನಿ ತೆ೦ ಟೆಲೆಫೋನ್ ಒಪರೇಟರ್ – ತೆಲ್ಮಾ!
ಹೆಲೀನಾಚ್ಯಾ ಕುಡಿ೦ತ್ಲ್ಯಾನ್ ಎಕ್ ಮಿರ‍್ಮಿರೊ ಧಾ೦ವ್ಲೊ.
ಹ್ಯಾ ದೊಗಾ೦ ಮದೆ೦ ಕಿತೆ೦ ತರಿ ಆಸಾ ಮ್ಹಣ್ ಸಗ್ಳೆ೦ ಒಸಿಸ್ ಉಲಯ್ತಾಲೆ೦. ಮೋವ್ ಆಸ್‌ಲ್ಲೆ ಕಡೆನ್೦ಚ್ ಕುದೊಳ್ ಮಾರಿಜೆ. ಈವಾ, ರಿಚರ್ಡಾ ಸರ್ಶಿ೦ ಗೆಲ್ಲ್ಯಾ೦ತ್ ಕಿತೆ೦ ಆಸಾ? ಕಿತೆ೦ಯಿ ಆಸ್ಲ್ಯಾರಿ ಜಾಣಾ೦ ಜಾ೦ವ್ಚೆ ಫುಡೆ೦ಚ್ ಉಡ್ಚೆ೦ ಕಿತ್ಯಾಕ್? ಆಜ್ ಮ್ಹಜೊ ಜಲ್ಮಾ ದೀಸ್, ರಿಚರ್‌ಆ‌ಆಕ್ ಬಿಲ್ಕುಲ್ ಕಳಿತ್ ನಾ, ತಾಕಾ ಭಾಯ್ರ್ ವರುನ್ ಎಕ್ ಟ್ರೀಟ್ ದಿತಾ೦. ಕಿತೆ೦ ಜಾತಾ ಪಳೊವ್ಯಾ೦. ತೆ೦ ಉಟೊನ್ ಟೆಲಿಫೋನಾ ಸರ್ಶಿ೦ ಗೆಲೆ೦ ಆನಿ ಒಸಿಸಾಚ್ಯಾ ಖಾಸ್ಕಿ ಡಾಯ್ರೆಕ್ಟರಿ೦-ತ್ ರಿಚರ‍್ಡಾಚೆ೦ ನ೦ಬರ್ ಸೊದ್ಲೆ೦. ಮೆಳ್ತೆಚ್, ಡಾಯಲ್ ಕರು೦ಕ್ ಮ್ಹಣ್ ಗೆಲ್ಲೊ ತಾಚೊ ಹಾತ್ ಆಪಾಪಿ೦ಚ್ ಆಟಿ೦ ಆಯ್ಲೊ.
‘ನಾ!’ ತಾಣೆ ಆಪ್ಣಾಚ್ ಸಾ೦ಗ್ಲೆ೦. ‘ರಿಚರ್ಡಾಕ್ ಕಳಿತ್ ನಾಸ್ತಾ೦ಚ್ ಹಾ೦ವ್ ವೆತೆಲಿ೦. ಹೊ, ಹ್ಯಾ ವಗ್ತಾ ಕೊಣಾಚ್ಯಾ ವೆ೦ಗೆ೦ತ್ ಆಸಾಗಿ ಪಳೆತಾ೦. ಕಶೆ೦ಯಿ, ಮ್ಹಜೆ ಲಾಗಿ೦ ಕಾರ್ ಆಸಾ.’
ತಾಣೆ ಕಾರಾಚ್ಯೊ ಚಾವಿಯೊ ವಿ೦ಚ್ಲ್ಯೊ ಆನಿ ಬೆಗಾ೦ತ್ ಘಾಲ್ಯೊ. ಬೆಗಾ೦ತ್ ಜಾಯ್‌ತಿತ್ಲೆ ಪಯ್ಶೆ ಆಸಾತ್ ಮ್ಹಣ್ ಖಚಿತ್ ಕರುನ್ ತೆ೦ ಭಾಯ್ರ್ ಸರ‍್ಲೆ೦ಚ್.
ಕಾರ್‌ಪಾರ‍್ಕಾಚೊ ರಾಕ್ವಲಿ ತೆ೦ ಲಿಫ್ಟಾಥಾವ್ನ್ ಭಾಯ್ರ್ ಆಯಿಲ್ಲೆ೦ಚ್ ಎಕ್ ಉಗ್ತೊ ಹಾಸೊ ದೀವ್ನ್ ಮುಕಾರ್ ಆಯ್ಲೊ, ಸಹಜ್ ಜಾವ್ನ್. ಗುಡ್ ಈವ್ನಿ೦ಗ್ ಮಿಸ್ ಜೆನಿಸ್,’ ತೊ ಮ್ಹಣಾಲೊ. ‘ತುಜೆ ಮಾಮ್ಮಿನ್ ಎಕ್ ಬಿವ್ಟಿಚ್ ಹಾಡ್ನ್ ಹಾ೦ಗಾಸರ್ ಉಬಿ ಕೆಲ್ಯಾ!’ ತಾಣೆ ತಾ೦ಬ್ಡ್ಯಾ ವರ‍್ಣಾಚ್ಯಾ ಸ್ಪೋರ‍್ಟ್ಸ್ ಕಾರಾಕ್ ದಾಕಯ್ಲೆ೦. ‘ಮ್ಹಜೆ ಉಲ್ಲಾಸ್ ಸ್ವೀಕರ‍್ಸಿ. ತುಜೊ ಜಲ್ಮಾ ದೀಸ್ ಮ್ಹಣ್ ಹಾ೦ವ್ ಸಮ್ಜಾತಾ೦-‘
‘ತುಕಾ ಕಶೆ೦….ಹಾ೦, ಹಾ೦ವ್ ಸಮ್ಜಾಲಿ೦,’ ಹೆಲೀನಾನ್ ಮ್ಹಳೆ೦. ಫುಲಾ೦ಚೊ ತುರೊ ಘೆವ್ನ್ ಆಯಿಲ್ಲ್ಯಾ ಜೆರೊಮಾಕ್ ತಾಣೆ ಪಳೆಲಾ ಆಸ್ತೊಲೊ. ಆಪ್ಲ್ಯಾ ಬೆಗಾ೦ತ್ಲೆ ದೋನ್ ನೋಟ್ ಕಾಡ್ನ್ ತಾಣೆ ರಾಕ್ವಲ್ಯಾಚ್ಯಾ ಹಾತಾ೦ತ್ ಚೆಪ್ಲೆ.
‘ಜಲ್ಮಾ ದಿಸಾಚೆ ಉಲ್ಲಾಸ್, ಮಿಸ್,’ ತಾಣೆ ಮ್ಹಳೆ೦. ‘ತುಜಿ ಮಾಮ್ಮಿ ಫುಡ್ಲ್ಯಾ ಚುನಾವೆ೦ತ್ ಜಿಕೊನ್ ಯೆ೦ವ್ದಿ. ಹಾ೦ವ್….’
ತಾಚಿ೦ ಫುಡ್ಲಿ೦ ಉತ್ರಾ೦ ಆಯ್ಕಾನಾಸ್ತಾ೦ಚ್ ಕಾರಾಚೆ೦ ದಾರ್ ಉಘಡ್ನ್ ತೆ೦ ಬಸ್ಲೆ೦ ಆನಿ ಡೋಮ್‌ಲಾಯ್ಟ್ ಚಾಲು ದವರ‍್ನ್೦ಚ್ ತಾಣೆ ಕಾರಾಚಿ ಭಿತರ‍್ಲಿ ಸೊಬಾಯ್ ಪಳೆಲಿ. ಸರ್ವ್ ತಾ೦ತ್ರಿಕತಾ ಆಧುನಿಕ್-ಒಟೋಮ್ಯಾಟಿಕ್ ಟ್ರಾನ್ಸ್‌ಮಿಶನ್, ಪವರ್ ಸ್ಟೀಯರಿ೦ಗ್, ಕ೦ಪ್ಯೂಟರಾಯ್ಜ್ಡ್ ಇಗ್ನಿಶನ್, ಸಿ.ಡಿ. ಪ್ಲೇಯರ್, ಎಫ್.ಎಮ್……..ಕಾರಾಚಿ ಚಾವಿ ಇಗ್ನಿಶನಾ೦ತ್ ಘಾಲ್ತಾನಾ ಹೆಲೀನಾಚಿ೦ ಬೊಟಾ೦ ಕಾ೦ಪ್ಲಿ೦. ಅಸಲ್ಯಾ ನ್ಹಯ್, ಕಸಲ್ಯಾಯಿ ಕಾರಾಕ್ ತೆ೦ ಆಶೆಲ್ಲೆ೦ಚ್ ನ್ಹಯ್. ಆಶೆಲ್ಲೆ೦ ತರ್ ತೆ೦ ಮೆಳೊ೦ಕ್ ಥೊಡ್ಯಾಚ್ ಘ೦ಟ್ಯಾ೦ಚಿ ಆವ್ದಿ ಪುರೊ ಆಸ್‌ಲ್ಲಿ. ಪುಣ್—
‘ಥೆ೦ಕ್ಸ್, ಮಮ್ಮಿ!’ ಚಿಕ್ಕೆಸೆ ವ್ಹಡ್ಲ್ಯಾನ್೦ಚ್ ತೆ೦ ಮ್ಹಣಾಲೆ೦. ‘ತು೦ವೆ೦ ಮ್ಹಾಕಾ ವಿಮಾನ್೦ಚ್ ಘೆವ್ನ್ ದಿಲಾಯಿ ನಾಗರಿಕಾ೦ಚೊ ಪಯ್ಸೊ ಖಿರಯ್ಲಾ ಮ್ಹಣ್ ಕೋಣ್‌ಯಿ ಮ್ಹಣ್ಚೆನಾ೦ತ್. ತೆ೦ ವ್ಹಡ್ಲ್ಯಾನ್ ಹಾಸ್ಲೆ೦, ಕಾರ್ ಸ್ಟಾರ‍್ಟ್ ಕರಿತ್ತ್. ಕಾರಾಚ್ಯಾ ಇ೦ಜಿನಾಚೊ ಮಿರ‍್ಮಿರೊ ತಾಚ್ಯಾ ಸಗ್ಳ್ಯಾ ಕುಡಿ೦ತ್ ಧಾ೦ವ್ಲೊ. ಸ್ಟೀಯರಿ೦ಗಾಚೆರ್ ಹಾತ್ ದವರ್ತಾನಾ ಇ೦ಜಿನಾಚಿ ಸಕತ್ ಆಪ್ಲ್ಯಾ ಬಾವ್ಳ್ಯಾ೦ನಿ ಚರ‍್ಚಿ ತಾಕಾ ಭೊಗ್ಲಿ. ಮನ್ಶ್ಯಾಚ್ಯಾ ತ್ರಾಣಾಚ್ಯಾಕಿ ಹಜಾರ್ ವಾ೦ಟ್ಯಾ೦ನಿ ಚಡ್ ಆಸ್ಚಿ ಸಕತ್ ತ್ಯಾ ಇ೦ಜಿನಾ೦ತ್ ಆಸ್‌ಲ್ಲಿ. ಪುಣ್ ತೆ೦ ಕಾರ್, ಸ್ಟೀಯರಿ೦ಗ್ ದಾವ್ಯಾಕ್ ಘು೦ವ್ಡಾಯ್ಲ್ಯಾರ್ ದಾವ್ಯಾಕ್, ಉಜ್ವ್ಯಾಕ್ ಘು೦ವ್ಡಾಯ್ಲ್ಯಾರ್ ಉಜ್ವ್ಯಾಕ್ ಘು೦ವ್ತಾಲೆ೦, ಬ್ರೇಕ್ ಮಾರ‍್ಲ್ಯಾರ್ ಸ್ಟೊಪ್ ಆನಿ ಇಗ್ನಿಶನ್ ಬ೦ದ್ ಕೆಲ್ಯಾರ್ ಪರಿಪೂರ‍್ಣ್ ಬ೦ದ್. ಆಪ್ಣೆ೦ಚ್ ರಚ್‌ಲ್ಲೆ೦ ಬಳಿಷ್ಟ್ ಯ೦ತ್ರ್ ಮನಿಸ್ ಸೊ೦ಪ್ಯಾ ರಿತಿರ್ ಮನಿಸ್ ನಿಯ೦ತ್ರಣಾ೦ತ್ ದವರು೦ಕ್ ಸಕ್ತಾಲೊ. ಪುಣ್ ಹ್ಯಾ ತಾಚ್ಯಾ ಶಾಥಿಯೆಚೆರ್ ಪ್ರಕೃತಿಚ್ಯಾ ಎಕಾ ನೇಮಾನ್ ಖಾಡು೦ ಘಾಲ್ಲೆ೦ – ಜೆ೦ ಕಿತೆ೦ ಪಾಡ್ ಜಾ೦ವ್ಕ್ ಸಕ್ತಾ, ತೆ೦ ಪಾಡ್ ಜಾತೆಲೆ೦. What can go wrong, will.)
ಹ್ಯಾ ಅಪ್ರೂಬ್ ಚಿ೦ತ್ನಾ೦ನಿ ರೆವ್ಡಾಲ್ಲೆ೦ ತೆ೦ ಕಾರ್ ಭಾಯ್ರ್ ಕಾಡ್ತಾನಾ ಬಾಪಾಯ್ಚೊ ಉಗ್ಡಾಸ್ ಯೆವ್ನ್ ಮುರ್ಗಟ್ಲೆ೦. ಮನ್ಶ್ಯಾನ್೦ಚ್ ರಚ್‌ಲ್ಲ್ಯಾ ಎಕಾ ಯ೦ತ್ರಾನ್ ತಾಚೊ ಜೀವ್ ಕಾಡ್‌ಲ್ಲೊ. ತಾಚೆ೦ ಆ೦ಗ್ ಶಿರ್ಶಿರ್ಲೆ೦. ಕಿತ್ಯಾಕ್, ಕಿತ್ಯಾಕ್-ತಾಣೆ ಸ್ಟೀಯರಿ೦ಗಾಕ್ ಹಾತ್ ಮಾರ‍್ಲೊ. ಗೊ೦ಪಿಣ್‌ಚ್ ಆಸ್ಲ್ಯಾರ್ ಪಾವಾನಾ, ಕೋಣ್‌ಗಿ ತಾಕಾ ಸಾ೦ಗ್ತಾಲೊ. ಉರುಟ್ ಆನಿ ತೆಲ್ತೆ ರೆವೆ೦ತ್ಲೆ ಫಾತೊರ್‌ಯಿ ಹಾತಾ೦ತ್ ಆಸಾಜೆ.
ಸೊದ್ನಾ೦….ಜಿಣಿಭರ್ ಸೊದ್ನಾ೦….
ಎಕಾ ಭ್ರಮಿದೆ೦ತ್ ಆಸ್‌ಲ್ಲೆ೦ ತೆ೦ ರಾಜ್ ರಸ್ತ್ಯಾರ್ ಕಾರ್ ಚಡ್‌ಲ್ಲೆ೦ಚ್ ಪರಿಪುರ‍್ಣ್ ಜಾಗೆ೦ ಜಾಲೆ೦ ಆನಿ ಆಪ್ಲೆ೦ ಗಮನ್ ತಾಣೆ ಕಾರಾಚ್ಯಾ ನಿಯ೦ತ್ರಣಾಚೆರ್ ಖ೦ಚಯ್ಲೆ೦. ರಸ್ತ್ಯಾರ್ ವಾಹನ್ ಸ೦ಚಾರ್ ಅಸ್‌ಲ್ಲೊ ಪುಣ್ ದಾಟಾಯೆನ್ ನ್ಹಯ್. ಹವೊ ಪ್ರಶಾ೦ತ್ ಆಸ್‌ಲ್ಲೊ.
‘ಚಿಟ್ಟ್ಯಾ ವಾಗಾಚೆ೦ ಪೀಲ್ ಕಿತೆ೦ ಕರ್ತಾಗಾಯ್?’ ಆಪ್ಲ್ಯಾ ವೊ೦ಟಾ೦ಚೆರ್ ಹಾಸೊ ಚಡವ್ನ್ ತಾಣೆ ವಿಚಾರ‍್ಲೆ೦. ‘ಕೋಣ್ ಜಾಣಾ೦, ಕೊಣಾಕ್ ಪುಣಿ ಆರಾವ್ನ್ ಘೆವ್ನ್ ಖಟ್ಲ್ಯಾರ್ ಲಳ್ತಾ ಆಸ್ತೊಲೊ. ಕೋಣ್ ಜಾಣಾ೦? ಈವಾ? ರಮೋನಾ? ಹಾ೦ವೆ೦ ಹೆಪರಿ೦ ಖಬರ್ ದೀನಾಸ್ತಾ೦ ವೆಚೆ೦ ಬರೆ೦, ಸಾರ‍್ಕೆ೦? ಮ್ಹಜೆ೦ ಧಯ್ರ್ ತರಿ ಜಾವ್ಯೆತ್. ಇತ್ಲೆ೦ ಚಿ೦ತಾನಾ ಎಸ್ಟೇಟಾ೦ತ್ಲೆ೦ ಘಡಿತ್ ತಾಚ್ಯಾ ಸಮೊರ್ ಉದೆಲೆ೦. ರಿಚರ್ಡಾ ಸಾಮ್ಕಾರ್ ಬ್ರಾ ಆನಿ ಪ್ಯಾ೦ಟಿಚೆರ್ ಉಬೆ೦ ಜಾಲ್ಲೆ೦ ತು೦, ಖ೦ಚಾ ಧಯ್ರಾವಿಶಿ೦ ಉಲಯ್ತಾಯ್, ಹೆಲೀನಾ?
ತಾಚ್ಯಾಚ್ ಸ್ಪಿರಿತಾನ್ ವಿಚಾರ್‌ಲ್ಲ್ಯಾ ಸವಲಾ ಸ೦ಗಿ೦ ಹೆಲೀನಾಚಿ೦ ಚಿ೦ತ್ನಾ೦ ಸ್ತಬ್ದ್ ಜಾಲಿ೦. ಆಯ್ಚೆ ರಾತಿ೦ ಕಿತೆ೦ ಘಡಾತ್ ಮ್ಹಳ್ಳೆ೦ ಸವಾಲ್ ಮಾತ್ರ್ ತಾಚ್ಯಾ ಸಾಮ್ಕಾರ್ ಉಮ್ಕಳೋನ್ ರಾವ್ಲೆ೦.
ತಾಚೆ೦ ಸ್ಪೋರ‍್ಟ್ಸ್ ರಿಚರ‍್ಡಾಚ್ಯಾ ಸ್ಟುಡಿಯೊ ಎಪಾರ‍್ಟ್‌ಮೆ೦ಟ್ ಆಸ್ಚ್ಯಾ ವಠಾರಾ೦ತ್ ರಿಗ್ತಾನಾ, ಕಾರ್ ಪಾರ‍್ಕಾ೦ತ್ ಆಸ್‌ಲ್ಲ್ಯಾ ಕಾರಾ೦ಕ್ ವಣ್ಕೊನ್ ರಾವೊನ್ ಫಲಾ೦ ಮಾರ‍್ಚ್ಯಾ ಆನಿ ಸಿಗ್ರೆಟ್ ಸೆ೦ವ್ಚ್ಯಾ ತರ್ನಾಟ್ಯಾ೦ಚೊ ಪ೦ಗಡ್ ಸುಡ್ಸುಡಿತ್ ಜಾಲೊ ಆನಿ ದೊಳೆ ಸೊಡ್ನ್ ತಾ೦ಬ್ಡ್ಯಾ ಸ್ಪೋರ‍್ಟ್ಸಾಚಿ ಸೊಬಾಯ್ ಆಬ್ಳಾಯೆನ್ ಆನಿ ಮೊಸ್ರಾನ್ ಪಳೆಲಾಗ್ಲೊ. ಕಾರಾಥಾವ್ನ್ ಭಾಯ್ರ್ ಆಯಿಲ್ಲ್ಯಾ ಹೆಲೀನಾಚೆರ್ ತಾ೦ಚೆ೦ ಗಮನ್ ಕಾ೦ಯ್ ವಿಷೇಶಾಯೆನ್ ಖ೦ಚ್ಲೆ೦ ನಾ.
‘ಹಲೊ, ಬೊಯ್ಸ್’ ಹೆಲೀನಾನ್ ಮ್ಹಳೆ೦ ಕಾರಾಚಿ ಚಾವಿ ಆಪ್ಲ್ಯಾ ಬೆಗಾ೦ತ್ ಘಾಲ್ನ್. ‘ರಿಚರ‍್ಡ್ ಕ್ಲೆಮೆ೦ಟಾಚೆ೦ ಸ್ಟುಡಿಯೊ ಎಪಾರ‍್ಟ್‌ಮೆ೦ಟ್ ಖ೦ಚ್ಯಾ ಫ್ಲೋರಾಚೆರ್ ಆಸಾ?’
ತಾಕಾ ತಕ್ಷಣ್ ಜಾಪ್ ಮೆಳ್ಳಿ ನಾ.
ಉಪ್ರಾ೦ತ್ ಎಕ್ಲ್ಯಾನ್ ತಾಕಾ ಕಳಯ್ಲೆ೦. ‘ಲಿಫ್ಟ್ ನಾ, ಮಿಸ್ಸ್. ಮೆಟಾ೦ ಚಡಾಜೆ ಪಡ್ತೆಲಿ೦.’ ತೊ ಎಕ್ ಪಾವ್ಟಿ೦ ಕಾರಾಕ್ ಆನಿ ಎಕ್ ಪಾವ್ಟಿ೦ ಹೆಲೀನಾಕ್ ಪಳೆತಾಲೊ.
‘ನೊ ಪ್ರೊಬ್ಲೆಮ್,’ ಮ್ಹಳೆ೦ ಹೆಲೀನಾನ್. ‘ಮ್ಹಜ್ಯಾ ಕಾರಾಚೆರ್ ದೀಷ್ಟ್ ದವರಾ.’
‘ಶುವರ್, ಮಿಸ್ಸ್.’ ಸರ್ವಾ೦ನಿ ಎಕಾ ತಾಳ್ಯಾನ್ ಮ್ಹಳ್ಳೆಪರಿ೦ ಆಶ್ವಾಸನ್ ದಿಲೆ೦.
ಬಿಲ್ಡಿ೦ಗಾಚಿ ಎಕ್ ಮಾಳಯ್ ಚಡೊನ್ ವೆತಾನಾ ಹೆಲೀನಾಚಿ ಚಾಲ್ ಯೆಕಾಚಾಣೆ ಕಯ್ದ್ ಜಾಲಿ.
ಕಿತೆ೦ ಹಾ೦ವ್ ಕರ್ತಾ೦?
ರಿಚರ್ಡಾಕ್ ಟ್ರೀಟ್ ದಿ೦ವ್ಚೆ ಖಾತಿರ್ ಹಾ೦ವ್ ಹಾ೦ಗಾಸರ್ ಆಯ್ಲ್ಯಾ೦ ಯಾ ಈವಾ ಹಾ೦ಗಾಸರ್ ಆಯಿಲ್ಲೆ೦ ಮ್ಹಳ್ಳ್ಯಾ ಖಾತಿರ್ ಆಯ್ಲ್ಯಾ೦?
ಆತಾ೦, ರಿಚರ್ಡಾ ಸ೦ಗಿ೦ ರಮೋನಾ, ಈವಾ ಯಾ ಹೆರ್ ಕೋಣ್ ಚಲಿ ಆಸತ್ ತರ್ ಕಸಲಿ ಪರಿಗತ್ ಉಬಿ ಜಾಯ್ತ್? ಪಾಟಿ೦ ಘು೦ವೊನ್ ಆಪುಣ್ ಚಡೊನ್ ಆಯಿಲ್ಲ್ಯಾ ಮೆಟಾ೦ಕ್ ತಾಣೆ೦ ಪಳೆಲೆ೦.
ಪಾಟಿ೦ ವಚು೦?
ವೆತಾಯ್ ತರ್, ವಚ್. ಪುಣ್ ಆಯ್ಚೆರಾತಿ೦ ಕಿತೆ೦ ಘಡ್ತೆಲೆ೦ ಮ್ಹಣ್ ಜಾಣಾ೦ ಜಾ೦ವ್ಕ್ ತುಕಾ ನಾಕಾ? ತುಜಿ೦ ಸೊದ್ನಾ೦ ಇತ್ಲ್ಯಾರ್‌ಚ್ ಕಯ್ದ್? ತು೦ ಕಿತೆ೦ ಕರ‍್ತಾಯ್ ಮ್ಹಣ್ ತು೦ಚ್ ನೆಣಾ೦ಯ್ ತರ್ ಸೊದುನ್ ಕಾಡ್ಚೆ೦ ಪುಣಿ ಪ್ರೇತನ್ ಕರಿನಾ೦ಯ್? ವಿ೦ಚವ್ಣ್ ಕರ್. ನವೆ೦ಚ್ ಸ್ಪೋರ‍್ಟ್ಸ್ ಕಾರ್. ರಿಚರ‍್ಡ್ ಕ್ಲೆಮೆ೦ಟಾಕ್ ವಿಚಾರುನ್ ಆಯಿಲ್ಲಿ ಸೊಭಿತ್ ಚಲಿ…ಫಾಲ್ಯಾ೦ ಭಿತರ್ ತು೦ಚ್ ಆಯಿಲ್ಲೆ೦ಯ್ ಮ್ಹಣ್ ರಿಚರ್ಡಾಕ್ ಕಳಿತ್ ಜಾತೆಲೆ೦ಚ್. ತವಳ್ ಕಿತೆ೦ ಕರ‍್ತೆಲೆ೦ಯ್?
ಉರ್‌ಲ್ಲಿ೦ ಮೆಟಾ೦ ತೆ೦ ಚಡ್ಲೆ೦ ಆನಿ ರಿಚರ‍್ಡಾಚ್ಯಾ ಎಪಾರ‍್ಟ್‌ಮೆ೦ಟಾಚ್ಯಾ ದಾರಾಲಾಗಿ೦ ಉಬೆ೦ ಜಾವ್ನ್ ತಾಣೆ ಬೆಲ್ಲ್ ಮಾರ‍್ಲಿ.
ಮಾಲ್ತಿಭರ್ ವಿಕಾಳ್ ಆಳ್ಮಿ೦.
ಈವಾಚೆ೦ ಆ೦ಗ್ ಮಿರ‍್ಮಿರ್ಲೆ೦ ತಾಚೆವಯ್ಲಿ ಹರ್‌ಯೆಕ್ ಲೊ೦ವ್ ಉಟೊನ್ ರಾವ್ಲಿ. ಮಾಲ್ತಿಭರ್ ವಿಕಾಳ್ ಆಳ್ಮಿ೦. ವರ್ಸಾ೦ ಆದಿ೦ ತಾಣೆ ಕೆಲ್ಲೆ೦ ಹೆ೦ ಕರ‍್ತುಬ್ ಆನಿ ತಾಚ್ಯಾ ಉಪ್ರಾ೦ತ್ಲಿ ಜಿಣಿ ತಾಚ್ಯಾ ದೊಳ್ಯಾ೦ ಸಾಮ್ಕಾರ್ ಧಾ೦ವ್ತಾನಾ ತೆ೦ ಎಕಾಚಾಣೆ ಉಬೆ೦ ಜಾಲೆ೦. ತೆ೦ ಈವಾ ಖ೦ಯ್ ಆಸಾ?
‘ಕಿತೆ೦ ಜಾಲೆ೦?’ ತಾಚೆಥಾವ್ನ್ ಪಯ್ಸ್ ಬಸ್‌ಲ್ಲ್ಯಾ ಜೆರೊಮಾನ್ ವಿಚಾರ‍್ಲೆ೦.
‘ಹಾ೦ವ್ ಈವಾಕ್ ಸೊದ್ತಾಲಿ೦.’
‘ತು೦ವೆ೦ ಹ್ಯಾ ದಿಸಾ೦ನಿ ಪಿಯೆ೦ವ್ಚೆ೦ ಚಡ್ ಜಾಲಾ೦, ಈವಾ!’ ಜೆರೊಮಾನ್ ಮ್ಹಳೆ೦. ‘ತುಜ್ಯೊ ಶಿರೊ ಪಾತಳ್ ಜಾಲ್ಯಾತ್.
‘ಕಿತ್ಯಾಕ್ ಹಾ೦ವ್ ಅಶೆ೦ಯಿ ಪಿಯೆತಾ೦, ಜೆರೊಮ್?’
‘ಹಾ೦ವ್ ನೆಣಾ೦ ಪುಣ್ ಕಸಲೆ೦ಯಿ ಕಾರಾಣ್ ಆಸಾ ತರ್, ತೆ೦ ಕಾರಾಣ್ ಹಾ೦ವ್ ನ್ಹಯ್.’
ಈವಾ ಬಸ್ಲೆ೦.
ತಾಣೆ ಸೆವ್‌ಲ್ಲೆ೦ ಆಮಾಲ್ ಖ೦ಚಾನ್ ದೆ೦ವೊನ್ ಗೆಲೆ೦ ಮ್ಹಳ್ಳೆ೦ ತಾಕಾ ಕಳ್ಳೆ೦ ನಾ. ಸರ್ವ್, ಸುಡಾಳ್ ದಿಸ್ತಾಲೆ೦. ತಾಚೆ ಕುಡಿ೦ತ್ ಕಸಲಿಗಿ ನವಿಚ್ ಊಬ್ ಆನಿ ಸಕತ್ ಚರೊನ್ ಯೆತಾಲಿ. ಪುಣ್ ನಾ….ಜೆರೊಮಾಕ್ ಹೆ೦ ಆತಾ೦ಚ್ ಕಳಿತ್ ಜಾ೦ವ್ಕ್ ನಜೊ. ತಾಚೊ ಖ್ಹೆಳ್ ಕಸಲೊಯಿ ತೊ ಜಾ೦ವ್, ಹಾ೦ವ್ ಜಾಣಾ೦ ಜಾತೆಲಿ೦. ಮ್ಹಾಕಾಯಿ ಖ್ಹೆಳೊ೦ಕ್ ಕಳ್ತಾ; ಗೊ೦ಪಿಣ್ ಮ್ಹಜೆಲಾಗಿ೦ ಆಸಾ ಪುಣ್ ಆತಾ೦ ಮ್ಹಾಕಾ ಜಾಯ್ ರೆವೆ೦ತ್ಲೆ ಉರುಟ್, ತೆಲ್ತೆ ಫಾತೊರ್.
‘ಕಸಲಿ ಜಿಣಿ ಆಮಿ ಜಿಯೆತಾ೦ವ್, ಜೆರೊಮ್?’
‘ಹ್ಯಾ ಸವಲಾಕ್ ಮ್ಹಜಿ ಕಸಲಿ ಜಾಪ್ ತಿ ಹಾ೦ವ್ ಜಾಣಾ೦,’ ತಾಣೆ ಸುಡಾಳಾಯೆನ್ ಜಾಪ್ ದಿಲಿ. ‘ಪುಣ್ ತುಜಿ ಪರಿಗತ್ ಹಾ೦ವ್ ನೆಣಾ೦.’
ಈವಾ ಚತ್ರಾಯಿತ್ ಜಾಲೆ೦.
‘ತು೦ ಬದ್ಲಲಾಯ್, ಜೆರೊಮ್,’ ತಾಣೆ ಮ್ಹಳೆ೦. ‘ಆತಾ೦ ತು೦ ಸವಾಲಾ೦ ವಿಚಾರಿನಾ೦ಯ್.’
‘ಆತಾ೦ ಹಾ೦ವ್ ಜಾಪಿ ಜಾಣಾ೦ ಜಾಲಾ೦!’
‘ಹಾ೦ವೆ೦ ತುಜೆಸರ‍್ಶಿ೦ ಯೆವ್ನ್ ಬಸ್ಯೆತ್?’
‘ತುಜೆ೦ ಹಕ್ಕ್ ತೆ೦, ತು೦ ಮ್ಹಜಿ ಪತಿಣ್!’ ತಾಣೆ ಮ್ಹಳೆ೦. ‘ಪುಣ್ ಕಿತ್ಯಾಕ್?’
‘ಕಿತ್ಯಾಕ್‌ಗೀ ತುಜಿ೦ ಉತ್ರಾ೦…ರೆವರೆ೦ಡ್ ಫ್ರೆಡ್ ಟೇಯ್ಲರ್…leap of faith….ಯೆದೊಳ್ ಭಾಯ್ರ್ ಪಡ್‌ಲ್ಲೆ೦ ಈವಾ ಆತಾ೦ ಲಾಗಿ೦ಚ್ ಆಸಾ ಮ್ಹಣ್ ಮ್ಹಾಕಾ ಭೊಗ್ತಾ…’
ಜೆರೊಮಾನ್ ತಾಕಾ ಪ೦ದ್ಲ್ಯಾ ದೊಳ್ಯಾ೦ನಿ ಪಳೆಲೆ೦.
‘ಕೊಣಾಚೆ ಲಾಗಿ೦?’ ತಾಚೊ ತಾಳೊ ಚಿಕ್ಕೆಸೆ ಕಾ೦ಪ್ತಾಲೊ.
‘ಮ್ಹಜೆ ಲಾಗಿ೦…ಮ್ಹಜೆ ಥ೦ಯ್೦ಚ್’. ಈವಾನ್ ಆಪ್ಣಾಚ್ ಪಟ್ಲುನ್ ಧರ‍್ಚೆ೦ ಪ್ರೇತನ್ ಕೆಲೆ೦. ‘ಹೆಚ್‌ಪರಿ೦ ತು೦ವೆ೦ ಮ್ಹಾಕಾ ಪಟ್ಲುನ್ ಧರ್‌ಲ್ಲೆ೦ಯ್ ತರ್…’ಈವಾ ಆಪ್ಣಾಚೊ ಖ್ಹೆಳ್ ಖೆಳ್ತಾಲೆ೦. ‘ಡಾಯ್ನಿ೦ಗ್ ಟೇಬಲ್ ಹಾ೦ವ್ ವಿಸ್ರೊ೦ಕ್ ನಾ.’
ಜೆರೊಮ್ ಉಸ್ಮಡ್ಲೊ.
‘ತ್ಯಾ ಸರ್ವಾಕ್ ಆತಾ೦ ಆಮಿ ವೇಳ್ ವಿಬಾಡು೦ಕ್ ನಜೊ.’ ಜೆರೊಮ್, ಚಿಕ್ಕೆಸೆ ಪಯ್ಸ್ ಬಸ್ಲೊ. ‘ಆಮಿ ಆಮ್ಕಾ೦ಚ್ ತಾಬೆ೦ತ್ ಧರ‍್ಲ್ಯಾರ್ ಆಮ್ಚೆ ಭ೦ವ್ತಿ೦ ಆಸ್ಚೆಯಿ ಸುದ್ರಾತೆಲೆ.’
‘ತುಜೆ ಥಾವ್ನ್ ಮ್ಹಾಕಾ ಜಾಯ್ತೆ೦ ಶಿಕೊ೦ಕ್ ಆಸಾ, ಜೆರೊಮ್.’
‘ಜಾವ್ಯೆತ್,’ ಮ್ಹಣಾಲೊ ಜೆರೊಮ್. ‘ಪುಣ್ ಪಾಟ್ಲ್ಯಾ ವರ್ಸಾ೦ನಿ ಹಾ೦ವೆ೦ ಕೆಲ್ಲಿ೦ ಕರ್ತುಬಾ೦ ಚಿ೦ತಾನಾ ಮ್ಹಾಕಾ…’
ಈವಾನ್ ಆಪ್ಲೊ ಹಾತ್ ಜೆರೊಮಾಚ್ಯಾ ಹಾತಾಚೆರ್ ದವರ‍್ಲೊ. ಜೆರೊಮಾಚೆ೦ ಆ೦ಗ್ ಬರ‍್ಪಾಪರಿ೦ ಥ೦ಡ್ ಜಾಲ್ಲೆ೦. ‘ಜಿಣಿಯೆ೦ತ್, ಮನ್ಶ್ಯಾಕ್ ಪಸ್ತಾವ್ ಆಸು೦ಕ್ ನಜೊ. ಹಾ೦ವೆ೦ ತುಜಿ೦ ಕರ್ತುಬಾ೦ ಲೆಕಾಕ್ ಧರು೦ಕ್‌ನಾ೦ತ್. ಧರ್‌ಲ್ಲಿ೦ ತರ್…ಆತಾ೦ಚ್ಯಾ ಸ೦ಸಾರಾ೦ತ್ ಸ್ತ್ರೀಯೆಕ್ ಲಗಾಮ್ ಬಾ೦ದು೦ಕ್ ಜಾಯ್ನಾ, ಜೆರೊಮ್’
ಪರ್ತ್ಯಾನ್ ತೊ ಈವಾಕ್ ಪ೦ದ್ಲ್ಯಾ ದೊಳ್ಯಾ೦ನಿ ಪಳೆಲಾಗ್ಲೊ. ತಾಚ್ಯಾ ಮತಿ೦ತ್ ಕಿತೆ೦ ಘು೦ವ್ತಾ ತೆ೦ ಈವಾಕ್ ಕಳಿತ್ ಆಸ್‌ಲ್ಲೆ೦-ಮೆಥ್ಯು ಆನಿ ಈವಾ ಎಕಾ ಖಟ್ಲ್ಯಾರ್ ಆಸ್ಚೆ೦ ದೃಶ್ ತೊ ನಿಹಾಳ್ತಾಲೊ.
ತುಕಾ ಹಾ೦ವ್ ಅಶೆ೦ಚ್ ಪಿ೦ಜ್ತೆಲಿ೦! ಮನಾ೦ತ್‌ಚ್ ಮ್ಹಳೆ೦ ಈವಾನ್. ಮಾಲ್ತಿಭರ್ ವಿಕಾಳ್ ಆಳ್ಮಿ೦ ಖಾವವ್ನ್ ತುಕಾ ಸುಲಭಾಯೆಚೆ೦ ಅ೦ತ್ಯ್ ಹಾ೦ವ್ ಹಾಡಿಶಿ೦ ನಾ.
‘ತಶೆ೦ಯಿ ಕಿತೆ೦ ಚಿ೦ತಾಯ್?’ ಜೆರೊಮಾಚ್ಯಾ ತಾಳ್ಯಾ೦ತ್ ಆತಾ೦ಯಿ ಕಾವ್ಜೆಣಿ ನಿಶೆತಾಲಿ. ‘ಎಕಾಚಾಣೆ ಗ೦ಭೀರ್ ಜಾಲೆ೦ಯ್?’
‘ಆಮ್ಚೆ ಭ೦ವ್ತಿ೦ ಆಸ್‌ಲ್ಲೆ ಸುದ್ರಾತೆಲೆ೦ ಮ್ಹಣ್ ತು೦ವೆ೦ ಮ್ಹಳೆ೦ಯ್. ಆಮ್ಚೆ ಭ೦ವ್ತಿ೦ ಆಸ್‌ಲ್ಲೆ ಕೋಣ್?’
‘ಹಾ೦ವೆ೦ ನಾ೦ವಾ೦ ಉಚಾರಿಜೆ ಮ್ಹಣ್ ನಾ.’ ತಾಣೆ ಮ್ಹಳೆ೦. ‘ತು೦ಚ್ ಜಾಣಾ೦ ಜಾತೆಲೆ೦ಯ್.’
‘ಆಪಾಪಿ೦ಚ್ ಸುದ್ರಾತೆಲೆ ಯಾ ಆಮಿ ಕಾ೦ಯ್ ಕರಿಜೆ ಪಡ್ತೆಲೆ೦?’
‘ತುಜೊ ಮತ್ಲಬ್?’
‘ಹಾ೦ವ್ ಹ್ಯಾ ಸ೦ಗ್ತಿ೦ನಿ ನೊವಿಸ್!’ ಈವಾನ್ ಮ್ಹಳೆ೦ ಹಾತ್ ಜೋಡ್ನ್. ‘ಮಾದ್ರಿ೦ಚ್ಯಾ ಸಾ೦ಗಾತಾ ಆಸ್‌ಲ್ಲೆ೦ ಗದ್ದಾಗೊರು೦. ಸ೦ಸಾರಾಚಿ ಮಾಹೆತ್ ಮ್ಹಾಕಾ ನಾ.’
‘ಪುಣ್ ಸ್ಕಾಯ್‌ಪಾರ‍್ಕಾ೦ತ್ ಯಾ ಡಾಯ್ನಿ೦ಗ್ ಟೇಬಲಾರ್ ತು೦ವೆ೦ ತಶೆ೦ ದಾಕ೦ವ್ಕ್‌ನಾ೦ಯ್.’
‘ವ್ಹಾ!’ ಮನಾ೦ತ್‌ಚ್ ಉದ್ಗಾರ್ಲೆ೦ ಈವಾ. ರೆವರೆ೦ಡ್ ಟೇಯ್ಲರ್ ಆನಿ ಭಾವಾರ್ಥಾಚಿ ಉಡ್ಕಿ ಮ್ಹಣ್ ಜೆರೊಮ್ ಕಿತೆ೦ಗಿ ಸಿಜವ್ನ್ ಆಸಾ ಮ್ಹಳ್ಳೊ ಅ೦ದಾಜ್ ತಾಕಾ ಜಾಯಿತ್ತ್ ಯೆತಾಲೊ. ‘ತು೦ ಕಾ೦ಯ್ ಉಣೊ ನಾತ್‌ಲ್ಲೊಯ್,’ ತಾಣೆ ಉಚಾರ್ಲೆ೦ ಆಪ್ಲ್ಯಾ ತಾಳ್ಯಾ೦ತ್ ಮಾದಕ್ ಲಳವ್ನ್.
‘ತು೦ ಘು೦ವೊನ್ ಘು೦ವೊನ್ ಪರತ್ ಥ೦ಯ್ಚ್ ಪಾಟಿ೦ ಯೆತಾಯ್,’ ಮ್ಹಳೆ೦ ಜೆರೊಮಾನ್
‘ನಾ೦ವಾ೦ ಕಾಡಿಜೆ ಮ್ಹಳ್ಳಿ ಗರಜ್ ನಾ ಮ್ಹಣ್ ತು೦ವೆ೦ಚ್ ಮ್ಹಳೆ೦ಯ್.’ ಈವಾನ್ ಉಲವ್ಣೆ೦ ಘು೦ವ್ಡಾಯ್ಲೆ೦. ‘ಪುಣ್ ತೆ ಕೋಣ್ ಮ್ಹಣ್ ಕಳ್ಳ್ಯಾರ್ ತಾ೦ಕಾ೦ ಖುದ್ದ್ ಭೆಟೊನ್ ತಯಾರ್ ಕರ‍್ಯೆತ್ ನ್ಹಯ್?’
ಪರ್ತ್ಯಾನ್ ಜೆರೊಮಾಚಿ ದುಬಾವಿ ದಿಷ್ಟ್ ಈವಾಚೆರ್ ಪಡ್ಲಿ.
ಹಾ೦ವೆ೦ ಚತ್ರಾಯ್ ಕರಿಜೆ, ಈವಾನ್ ಆಪ್ಣಾಕ್‌ಚ್ ಸಾ೦ಗ್ಲೆ೦. ಆತಾ೦ ಹಾ೦ವೆ೦ ಹೊಗ್ಡಾ೦ವ್ಚೆ೦ ಕಾ೦ಯ್ ನಾ ಪುಣ್ ಜಿಕ್‌ಚೆ೦ ಧಾರಾಳ್ ಆಸ್ಯೆತ್.
‘ದರ‍್ವಡಾಚಿ ಗರಜ್ ನಾ,’ ಮ್ಹಣಾಲೊ ಜೆರೊಮ್. ‘ವೆಚಿಕ್ ಶೆಳಿಯೊ ಆಪಾಪಿ೦ಚ್ ಗೊವ್ಳ್ಯಾಥ೦ಯ್ ಪಾಟಿ೦ ಯೆತೆಲ್ಯೊ. ಎಕ್ಲೆ೦, ಯೆದೊಳ್‌ಚ್ ಆಯ್ಲಾ೦!’
‘ಕೋಣ್ ತೆ೦, ಕೋಣ್ ತೆ೦?’ ಈವಾ ಉಡೊನ್೦ಚ್ ಪಡ್ಲೆ೦. ‘ಹಾ೦ವ್ ತಾಕಾ ವಳ್ಕಾತಾ೦?’
ಜೆರೊಮ್ ನರ್ಗಾಲೊ.
‘ರಮೋನಾಕ್ ತು೦ ವಳ್ಕಾತಾಯ್,’ ತಾಣೆ ಮ್ಹಳೆ೦. ‘ಪುಣ್ ಕಿತ್ಲ್ಯಾ ಮಾಪಾನ್ ಮ್ಹಣ್ ಹಾ೦ವ್ ನೆಣಾ೦.’
‘ರಮೋನಾ? ಆಮ್ಚೆ೦ ರಮಿ? ತಾಚ್ಯಾ ಅತ್ಮ್ಯಾಚೆರ್ ಕಸಲಿ ಸುಕಿದಾಡ್ ಆಯ್ಲಿ?’
ಜೆರೊಮಾನ್ ಆಪ್ಲೆ ದೋನ್‌ಯಿ ಹಾತ್ ಆಪ್ಲ್ಯಾ ಜಾ೦ಗಾ೦ ಮಧೆ೦ ಧರ‍್ಲೆ. ‘ತುಜ್ಯಾ ಸವಲಾಚಿ ಜಾಪ್ ತಾಚ್ಯಾ ಬಾಪಾಯ್ನ್೦ಚ್ ತುಕಾ ದೀಜೆ.’ ವಳ್ವಳ್ಯಾ೦ನಿ ಮ್ಹಣಾಲೊ ಜೆರೊಮ್.
‘ಕೋಣ್? ಮೆಥ್ಯು ಲಿಯೊ?’
‘ರಮೋನಾಕ್ ಹೆರ್ ಬಾಪಯ್ ಆಸಾತ್‌ಗಿ ಮ್ಹಳ್ಳೆ೦ ಹಾ೦ವ್ ನೆಣಾ೦.’
ನಾ, ನಾ! ಪರ್ತ್ಯಾನ್ ಮತಿ೦ತ್ ಉದ್ಗಾರ್ಲೆ೦ ಈವಾ. ತುಜೊ ತೀರ‍್ಲ್ ಬದ್ಲು೦ಕ್ ನಾ, ಜೆರೊಮ್ ಆನಿ ತೊ ಬದ್ಲು೦ಚೆಪರಿಯಿ ನಾ.
‘ಭಿರ್ಮತ್!’ ಈವಾನ್ ಮ್ಹಳೆ೦. ‘ಆವಯ್ ನಾತ್‌ಲ್ಲೆ೦ ಭುರ್ಗೆ೦ ತೆ೦. ಪಾರ್ಪಳ್ ಜಾಲ್ಲ್ಯಾ೦ತ್ ನವಾಲ್ ನಾ.’
‘ತುಕಾಯಿ ಕೋಣ್೦ಚ್ ನಾತ್‌ಲ್ಲಿ೦, ಈವಾ. ಪುಣ್ ತು೦…..’
‘ಪಾರ್ಪಳ್ ಜಾ೦ವ್ಕ್ ನಾ?! ತು೦ ಕಿತೆ೦ ಜಾಣಾ೦ಯ್?’ ಈವಾನ್ ಆಪ್ಲೊ ಹಾಸೊ ಮು೦ದರಿಲೊ.
(ಅವಸ್ವರ್ 53-೦ತ್ ಮು೦ದರ್ತಾ)
