‘
ವ್ಹಯ್! ಆತಾಂ ತಿ ಪ್ರವೇಸ್ ಜಾಲ್ಯಾ! ಬರೆಂಚ್. ದೋನ್ ಎದ್ರಿ ರಾಜಕಾರಿ ಪಾಡ್ತಿ ಯೆಕ್ಲ್ಯಾಚೆರ್ ಗಮನ್ ದವ್ರುನ್ ಆಸಾತ್ – ಫ್ರೆಡ್ ಟೇಯ್ಲರಾಚೆರ್ ಪುಣ್ ವೆವೆಗ್ಳ್ಯಾ ಕಾರಾಣಾಂಕ್ ಲಾಗುನ್. ತುಂ ಲಿಲಿಯನಾಚೆಂ ಕಾಮ್ ಕರ್, ಮ್ಹಜ್ಯಾ ಮುಕಾಂತ್ರ್ ಆನಿ ಹಾಂವ್ ಮಾವ್ರಿಸಾಕ್ ವಾರೆಂ ಘಾಲ್ತಾಂ. ರಂಗ್‌ಸ್ಥಳ್ ತಯಾರ್ ಜಾತಾನಾ ಝಜ್ ಜಾತೆಲೆಂ ಬಲ್ತ್ಯಾಂಚ್ ಮಧೆಂ. ಪಳೆವ್ನ್ ರಾವ್. ಮ್ಹಜೆ ದುಸ್ಮಾನ್ ಆಪಾಪಿಂಚ್ ನಾಸ್ ಜಾತೆಲೆ. ಉಡಾಸ್ ದವರ್ ಮೆಲ್ಕಮ್, ಟೇಯ್ಲರಾ ತಸಲೆ ಫಟ್ಕಿರೆ ಪ್ರವಾದಿ ಮನ್ಶಾಂಚ್ಯಾ ಮೆಂದ್ವಾಂಚೆರ್ ಚಡೊನ್ ಸವಾರಿ ಕರ‍್ತಾನಾ ಕಿತೆಂ ಸರ‍್ವ್ ವಯ್ರ್ ಪಡ್ತಾ ಮ್ಹಣ್ ತುಂ ನೆಣಾಂಯ್.’
‘ತುಂ ತಿತ್ಲ್ಯಾ ಖಚಿತಾಯೆನ್ ಉಲಯ್ತಾನಾ ಮ್ಹಾಕಾ ಗರ‍್ಜೆಕ್ ಪಡ್ಚ್ಯೊ ಥೊಡ್ಯೊ ಸಂಗ್ತಿ ಲಿಪಯ್ತಾಯ್ ಮ್ಹಣ್ ಭೊಗ್ತಾ.’ ಚತ್ರಾಯೆನ್ ಮ್ಹಣಾಲೊಮೆಲ್ಕಮ್. ‘ತುಂವೆಂ ಹಾಂಗಾಸರ್ ಯೆಂವ್ಚೆಂ, ತೆಲ್ಮಾ, ಹಾಂವ್…ಹೆರಾಂಕ್ ಕಳಿತ್ ಜಾಲ್ಯಾರ್ ಫಾಲ್ಯಾಂ, ತುಂವೆಂ ಕಾನೂನಾಚ್ಯಾ ದಾವ್ಲ್ಯಾಂಕ್ ಶಿರ‍್ಕೊಂಚೆಂ ಖಂಡಿತ್.’
‘ತುಕಾ ಭೆಂ ದಿಸ್ತಾ, ಮೆಲ್ಕಮ್?’ ದೊಳೆ ಅಶೀರ್ ಕರುನ್ ಜೆರೊಮಾನ್ ವಿಚಾರ‍್ಲೆಂ. ‘ಹ್ಯಾ ಸಗ್ಳ್ಯಾ ಖ್ಹೆಳಾಂತ್ ತುಂ ಕಿತ್ಲೊ ಮೆತೆರ್ ಆಸಾಯ್ ಆನಿ ಹಾಕಾ ದಾಕ್ಲೆ ಜಾವ್ನ್ ಕಿತ್ಲ್ಯೊ ರುಜ್ವಾತಿ ಮ್ಹಜೆಲಾಗಿಂ ಆಸಾತ್ ಮ್ಹಣ್ ತುಂ ಜಾಣಾಂಯ್.’
‘ಹಾಂವ್ ಜಾಣಾಂ.’
‘ಬರೆಂ ತರ್, ಆತಾಂ ಸಿಗ್ರೆಟ್ ಚಿಂವಲ್ಲಿ ಪುರೊ, ಸೊರೊ ಘೊಟ್‌ಲ್ಲೊ ಪುರೊ.’ ಜೆರೊಮಾನ್ ಆಪ್ಲ್ಯಾ ಕೋಟಾಚ್ಯಾ ಬಲ್ಸಾಂತ್ಲಿ ನೊಟಾಂಚಿ ಎಕ್ ಅಟ್ಟಿ ಕಾಡುನ್ ಜೆರೊಮಾಕ್ ದಿಲಿ. ‘ಆತಾಂ ಕಾಮ್ ಸುರು ಕರ್!’
ಮೆಲ್ಕಮ್ ಉಟ್ಲೊ ಆನಿ ತೆಲ್ಮಾಚೆರ್ ಎಕ್ ನಜರ್ ಮಾರುನ್ ಭಾಯ್ರ್ ಗೆಲೊ. ತಾಣೆ ದಾರಾಚಿ ಖಿಳ್ ವೊಡ್ತೆಚ್ ಜೆರೊಮಾನ್ ಎಕ್ ಕೊರ್ಡ್‌ಲೆಸ್ ಫೋನ್ ವಿಂಚ್ಲೆಂ ಆನಿ ಎಕ್ ನಂಬರ್ ಲಾಗಯ್ಲೆಂ. ತೆಂ ಲಾಗ್ತೆಚ್-
‘ಮ್ಹಾಕಾ ಶ್ರೀಮತಿ ಲಿಲಿಯನ್ ಜೆನಿಸಾಲಾಗಿಂ ಉಲಂವ್ಕ್ ಜಾಯ್.’ ತಾಣೆ ಮ್ಹಳೆಂ. ತೆವ್ಶಿಲಿಂ ಉತ್ರಾಂ ತೆಲ್ಮಾಕ್ ಆಯ್ಕಾಲಿಂ ನಾಂತ್. ‘ತಿ ಮೀಟಿಂಗಾರ್ ಆಸಾ ಮ್ಹಣ್ ಹಾಂವ್ ಜಾಣಾಂ ಪುಣ್ ಮ್ಹಜೆಂ ನಾಂವ್ ಸಾಂಗ್ಲ್ಯಾರ್…ಕೋಣ್? ಮಿ|ಕ್ಲೆರೆನ್ಸ್ ಡೊಮಿನಿಕ್? ಹಾಂವ್ ಜೆರೊಮ್ ಲಾಜ್ರಾ ಉಲಯ್ತಾಂ. ಶ್ರೀಮತಿ ಲಿಲಿಯನ್ ಜೆನಿಸಾಕ್ ಎಕ್ ಸಂದೇಶ್ ದಿ – ತಿಚೆಂ ಕಾಮ್ ಜಾತೆಲೆಂ, ದುಡ್ವಾಚಿ ವಿಲೆವಾರಿ ತುರ‍್ತಾನ್ ಜಾಂವ್!’
ಚಡಿತ್ ಉಲಯ್‌ನಾಸ್ತಾಂ ತಾಣೆ ಸಂಪರ‍್ಕ್ ತುಟಯ್ಲೊ.
ಆಪ್ಲೆಂ ತೊಂಡ್ ಬಿಳಾಪರಿಂ ಉಗ್ತೆಂ ಕರುನ್ ತೆಲ್ಮಾ ತಾಕಾ ಪಳೆತಾಲೆಂ.
‘ಕಿತೆಂ ಪಳೆತಾಯ್?’ ತೊ ಖೆಂಚ್ಲೊ. ‘ತ್ಯಾ ರೊಸಾಳ್ ತೊಂಡಾಂತ್ ಕಾಂಯ್ ಚೆಪುಂ?’
ತೆಲ್ಮಾನ್ ತಾಚ್ಯಾ ಸವಾಯ್ ಭಾಸ್ಕಳ್‌ಪಣಾಚೆಂ ಗಮನ್ ಕೆಲೆಂ ನಾ. ‘ಇತ್ಲೆವೆಗಿಂ ತಿಚೆಂ ಖಾಸ್ಕಿ ನಂಬರ್ ಜಾಣಾಂ ಜಾಲೊಯ್ ಆನಿ ನಾಂವಾಂ ಕಾಡುನ್ಂಚ್ ಉಲಂವ್ಕ್ ಪಾವ್ಲೊಯ್?’
‘ಹಾಂವ್ ಜೆರೊಮ್ ಲಾಜ್ರಾ, ತೆಲ್ಮಾ!’ ತಾಣೆ ಮ್ಹಳೆಂ ಆಪ್ಲೊ ಗ್ಲಾಸ್ ಖಾಲಿ ಕರುನ್. ‘ಹೆಂ ತುಂ ಕೆದಳಾಯಿ ಉಡಾಸ್ ದವರ್.’
‘ಉಡಾಸಾಂತ್ ದವರ‍್ತೆಲಿಂ,’ ತಾಣೆ ಮ್ಹಳೆಂ ಖಟ್ಲ್ಯಾಚೆ ದೆಗೆಕ್ ಯೆವ್ನ್. ‘ಆತಾಂ ಹಾಂಗಾಸರ್ ಯೆ, ಭೋವ್ ಥಕ್ಲಾಯ್ ತುಂ.’
‘ಮ್ಹಾಕಾ ಗರ‍್ಜ್ ನಾ,’ ತಾಣೆ ಮ್ಹಳೆಂ ಆಪ್ಲೆಂ ಮಾತೆಂ ಭುಜಾಂ ಮಧೆಂ ಗಳವ್ನ್.
‘ತುಜ್ಯೊ ಗರ‍್ಜೊ ಹಾಂವ್ ಜಾಣಾಂ ಜೆರೊಮ್,’ ತಾಣೆ ಮ್ಹಳೆಂ ಆಪ್ಲ್ಯಾ ಬ್ಲವ್ಜಾಚೆ ಬುತಾಂವ್ ಉಸವ್ನ್. ‘ಹಾಂವ್ ದುಬಾರಿ ಮೊಲಾಚಿಂ ವೆಭಿಚಾರಿಣ್-ಕೊಲ್ ಗರ‍್ಲ್-ಜಾಂವ್ಕ್ ಪುರೊ. ಪುಣ್ ತುಜ್ಯಾ ತಸಲ್ಯಾಂಚೆಂ ಮನಶಾಸ್ತ್ರ್ ಹಾಂವ್ ಜಾಣಾಂ.’
‘ಹುಂ! ತುಂ ಆನಿ ಮನಶಾಸ್ತ್ರ್?’ ತಾಣೆ ತಿರಸ್ಕಾರಾಚೊ ಉದ್ಗಾರ್ ಸೊಡ್ಲೊ. ‘ತುಜೆಂ ಮನಶಾಸ್ತ್ರ್ ಫಕತ್ ತುಜ್ಯಾ ಜಾಂಗಾಂ ಮಧೆಂ ಆನಿ ದಾದ್ಲ್ಯಾಂಚ್ಯಾ ಪೆಂಟಾ ಭಿತರ್ ಆಸಾ.’
‘ತುಜೆಂ ಆನಿ ಸರ‍್ವಾಂಚೆಂಯಿ ಥಂಯ್ಚ್ ಆಸಾ, ಜೆರೊಮ್,’ ತೆಲ್ಮಾನ್ ಖಚಿತಾಯೆನ್ ಮ್ಹಳೆಂ ಆಪ್ಲೊ ಬ್ಲವ್ಜ್ ಕಾಡುನ್ ಖಟ್ಲ್ಯಾರ್ ಉಡವ್ನ್. ತಾಕಾ ಬ್ರಾ ಘಾಲ್ಚಿ ಸವಯ್ ನಾತ್‌ಲ್ಲಿಚ್. ಜೆರೊಮಾಚಿ ದೀಷ್ಟ್ ಆತಾಂ ಫರಾಗತ್ ತೆಲ್ಮಾಚ್ಯಾ ಸ್ಥನಾಂಚೆರ್ ಚರ‍್ಲಿ. ಮಾತಿಯೆ ರಂಗಾಚ್ಯೊ ತಾಂಚ್ಯೊ ತುದಿಯೊ ತವಳ್‌ಚ್ ಉದ್ರಿಕ್ತ್ ಜಾಲ್ಲ್ಯೊ. ಜೆರೊಮಾನ್ ಆಬ್ಳಾಯೆಚಿ ಥಿಂಪಿ ಗಿಳ್ಳಿ.
‘ಈವಾಥಂಯ್ ಹಾಚ್ಯಾಕಿ ಚಡ್ ಬದಿಕ್ ಆಸತ್,’ ತೆಲ್ಮಾನ್ ಮ್ಹಳೆಂ, ಆಪ್ಲ್ಯಾ ಸ್ಥನಾಂಚೆರ್ ಹಾತ್ ಚರವ್ನ್. ‘ಪುಣ್ ತುಂ ಎಕ್ ಪಿಸೊ!’
‘ಮ್ಹಾಕಾ ಚಾಳಯ್ನಾಕಾ, ತೆಲ್ಮಾ’ ತೊ ಮ್ಹಣಾಲೊ. ‘ಮ್ಹಜಿ ಜಿಣಿ ಕೊಣಾಕ್ ಪುಣಿ ಉಗ್ತಿ ಕರಿಜೆ ಆಸ್‌ಲ್ಲಿ. ತುಂ ಕಿತೆಂ ಜಾಣಾಂಯ್ ತೆಂ ಹೆರ್ ಕೋಣ್ಂಚ್ ನೆಣಾಂತ್ ಮ್ಹಣ್ತಾನಾ ಮ್ಹಜೆರ್ ಸರ‍್ವಾಧಿಕಾರ್ ಚಲಂವ್ಚೆಂ ಹಕ್ಕ್ ತುಕಾ ನಾ.’
‘ಹ್ಯಾ ಖೆಳಾಂತ್ ಕೊಣಾಯ್ಕಿ ಕಸಲಿಂಚ್ ಹಕ್ಕಾಂ ನಾಂತ್ ಜೆರೊಮ್!’ ತೆಲ್ಮಾನ್ ಮ್ಹಳೆಂ ಆಪ್ಲ್ಯಾ ವೊಂಟಾಂಚೆರ್ ಜೀಬ್ ಚರವ್ನ್. ‘ಚಡ್ ಮ್ಹಳ್ಯಾರ್ ಹೊ ಖೆಳ್ ಸಾತ್ ಮಿನುಟಾಂಕ್ ಲಾಂಬ್ತಾ.’ ತಾಣೆ ಆಪ್ಲ್ಯಾ ಸ್ಕರ‍್ಟಾಚ್ಯಾ ಜಿಪಾಕ್ ಹಾತ್ ವೆಲೊ.
‘ಪಯ್ಶೆ ಜಾಯ್ ತರ್ ಸಾಂಗ್!’ ಜೆರೊಮಾನ್ ಮ್ಹಳೆಂ, ಪಂದ್ಲ್ಯಾ ದೊಳ್ಯಾಂನಿ ತಾಕಾ ಪಳೆವ್ನ್.
‘ಪಯ್ಶೆ ಮ್ಹಾಕಾ ಜಾಯ್,’ ತೆಲ್ಮಾನ್ ಜಾಪ್ ದಿಲಿ ಜಿಪ್ ವೊಡುನ್. ‘ಮ್ಹಜೆಂ ಮೇಕಪ್ ಕಿಟ್ ಖಾಲಿ ಜಾಲಾಂ, ಲಿಪ್‌ಸ್ಟಿಕ್ ಆನಿ ಸುವಾದ್ ಕಾಬಾರ್ ಜಾಲಾ ಆನಿ ಮ್ಹಜ್ಯಾ ಪ್ಯಾಂಟಿಂಕ್ ಬುರಾಕ್ ಪಡ್ಲ್ಯಾತ್. ಪುಣ್ ಹಾಂವ್ ಭಿಕ್ ಘೆನಾ, ಜೆರೊಮ್!’
ತೆಂ ಉಟ್ಲೆಂ ಆನಿ ಖಟ್ಲೆಂ ಸಾಂಡುನ್ ಉಬೆಂ ಜಾಲೆಂ. ಆಪ್ಲೊ ಸ್ಕರ‍್ಟ್ ತಾಣೆ ಧರ‍್ಣಿರ್ ಗಳಯ್ಲೊ. ಪ್ಯಾಂಟಿ ಭಿತರ್ ಲಿಪೊನ್ ಆಸ್‌ಲ್ಲ್ಯಾ ಸ್ತ್ರೀಪಣಾಚಿ ಉಬಾರಾಯ್ ಜೆರೊಮಾಕ್ ತೊಪ್ಲಿ. ತೊ ದಣ್ಸಾಲೊ. ಸ್ಕರ‍್ಟ್ ಖೊಟಾವ್ನ್ ಪಯ್ಸ್ ಕರುನ್ ತೆಂ ಪರ‍್ತ್ಯಾನ್ ಖಟ್ಲ್ಯಾರ್ ಬಸ್ಲೆಂ.
‘ತುಂವೆಂ ಮ್ಹಾಕಾ ಪಿಸೊ ಮ್ಹಳೆಂಯ್!’ ತೊ ದುರ‍್ಸಾಲೊ ಎಕಾ ಲ್ಹಾನ್ ಭುರ‍್ಗ್ಯಾಪರಿಂ. ‘ಮ್ಹಾಕಾ ಕೊಣೆಂಯಿ ನಾಂವಾಂ ಆಪಂವ್ಚಿಂ ಬರಿಂ ಲಾಗಾನಾಂತ್.’
‘ಜಿಣಿಭರ್ ತುಂ ತರ‍್ನ್ಯಾ, ಖತ್ಕತ್ಯಾ ಮಾಸಾಕ್ ಲಾಲೆಲೊಯ್!’ ತೆಲ್ಮಾನ್ ಮ್ಹಳೆಂ ಆಪ್ಲೆ ಕುಡಿಚೆರ್ ಹಾತ್ ಚರವ್ನ್. ‘ಪುಣ್ ಈವಾ ತುಕಾ ಮೆಳ್ತಾನಾ ಕಿತೆಂ ಕೆಲೆಂಯ್? ತಾಚಿ ಉದ್ರಿಕ್ತಾಯ್ ತುಜ್ಯಾನ್ ಗಿಳುಂಕ್ ಜಾಲಿ ನಾ, ಸೊಭಾಯ್ ಸೊಸುಂಕ್ ಜಾಲಿ ನಾ. ಹ್ಯಾ ಕ್ಷೇತ್ರಾಂತ್ ನೊವಿಸಾಂ ಜಾವ್ನಾಸ್ಚ್ಯಾ ಹೆಲೀನಾ ತಸಲ್ಯಾಂಚೆರ್ ತುಜಿ ಆಬ್ಳಾಯ್ ಪಡ್ಲಿ. ಕಿತ್ಯಾಕ್ ತುಜ್ಯಾ ಈವಾಕ್ ಸ್ಕ್ರೂ ಘಾಲುಂಕ್ ಮೆಥ್ಯುಚ್ ನ್ಹಯ್, ಸಗ್ಳೆಂ ದಾದ್ಲ್ಯಾಂ ಕುಳ್‌ಚ್ ರಾಕೊನ್ ಆಸಾ ಮ್ಹಣ್ ತುಂ ಪಾತ್ಯೆಲೊಯ್. ಆನಿ ತ್ಯೆ ರಾತಿಂ, ಈವಾ ಮೆಥ್ಯು ಸಾಂಗಾತಾ ವೆತೆಚ್ ತುಜಿ ಹಿ ಆಶಾ ಜ್ಯಾರಿ ಜಾಲಿ. ತ್ಯೆ ರಾತಿ ಮೆಥ್ಯು ಆನಿ ಈವಾ ಮಧೆಂ ಕಿತೆಂ ಚಲ್ಲೆಂ ಮ್ಹಣ್ ತುಂವೆಂ ಆಜೂನ್ ವಿಚಾರ್‌ಲ್ಲೆಂಯ್ ನಾ….’
‘ಖಂಡಿತ್, ತಿಂ ಯೆಕಾಮೆಕಾಚೆ ಹಾತ್ ಧರುನ್ ಬಸುಂಕ್ ನಾಂತ್.’
‘ನ್ಹಯ್ ಯಾ ವ್ಹಯ್, ಪುಣ್ ತುಂ ನೆಣಾಂಯ್!’ ತೆಲ್ಮಾನ್ ಮ್ಹಳೆಂ, ಆಪ್ಲ್ಯಾ ಉತ್ರಾಂಚಿ ಧಾರ್ ತಶಿಚ್ಚ್ ಧರುನ್. ‘ವರ್ಸಾಂ ಥಾವ್ನ್ ಸ್ವತಾಕ್ ದಣ್ಸುನ್, ಎಕಾ ದಿಸಾ ಮೆಥ್ಯು ಆನಿ ಈವಾ ಸಾಂಗಾತಾ ನಿದ್ತೆಲಿಂ ಮ್ಹಣ್ ಚಿಂತುನ್ ಆಸ್‌ಲ್ಲ್ಯಾ ತುಜೆಂ ಸಪಣ್ ಜ್ಯಾರಿ ಜಾಲೆಂ. ತುಜ್ಯೊ ಶಿರೊ ಸದಿಳ್ ಜಾಲ್ಯೊ ಆನಿ ಪುರುಷತ್ವ್ ಜಾಗೆಂ ಜಾಲೆಂ. ಆನಿ ತುಂ ಕಿತೆಂ ಕರುಂಕ್ ಸಕ್ತಾಯ್ ಮ್ಹಳ್ಳೆಂ ತುಂವೆಂ ಈವಾಕ್ ದಾಕಯ್ಲೆಂಯ್.’
ಜೆರೊಮಾನ್ ಎಕ್ ಲಾಂಬ್ ಸ್ವಾಸ್ ಸೊಡ್ಲೊ.
ತಾಚೆ ಮತಿಂತ್ ಆಪಾಯ್ ಸುಚಾಂವ್ಚೆ ತಾಂಬ್ಡೆ ದಿವೆ ಝಳೊಂಕ್ ಲಾಗ್ಲೆ.
‘ತುಂ ಇತ್ಲೆ ಸುಲಭಾಯೆನ್ ಅಶೆಂ ಸರ‍್ವ್ ಉಲಯ್ತಾಯ್, ತೆಲ್ಮಾ?’ ಜೆರೊಮಾಚೊ ತಾಳೊ ಕಾಂಪ್ತಾಲೊ.
‘ವ್ಹಯ್ ಜೆರೊಮ್!’ ತೆಲ್ಮಾನ್ ಜಾಪ್ ದಿಲಿ. ‘ಹೆ ಕುಡಿಂತ್ ಎಕ್ ಮೆಂದು ಆಸಾ ಮ್ಹಳ್ಳೆಂ ಜಾಣಾಂ ಜಾ. ಕಶಿಂ ಹಾಂವ್ ಹೆ ಪರಿಗತಿಕ್ ಪಾವ್ಲಿಂ…..’
‘ತುಜ್ಯಾ ಜಿಣಿಯೆಚಿ ಕಾಣಿ ಆಯ್ಕೊಂಕ್ ಮ್ಹಾಕಾ ನಾಕಾ.’ ಜೆರೊಮಾನ್ ತಾಚಿಂ ಉತ್ರಾಂ ಕಾತರ‍್ಲಿಂ.
‘ಆನಿ ತಿ ಕಾಣಿ ತುಕಾ ಹಾಂವ್ ಸಾಂಗಾಂಯ್‌ನಾ.’ ತೆಲ್ಮಾನ್ ಮ್ಹಳೆಂ ಖಚಿತಾಯೆನ್. ‘ಉಪ್ರಾಂತ್ ಕಿತೆಂ ತುಂವೆಂ ಕೆಲೆಂಯ್?’
‘ತುಜೆಂ ಉಲವ್ನ್ ಜಾಂವ್ಕ್ ನಾ?’
‘ನಾ!’ ತೆಂ ಮ್ಹಣಾಲೆಂ, ಪರ‍್ತ್ಯಾನ್ ಖಟ್ಲ್ಯಾ ವಯ್ಲೆಂ ಉಟೊನ್ ಜೆರೊಮಾ ಸಾಮ್ಕಾರ್ ಉಬೆಂ ಜಾವ್ನ್. ಭಾಗ್ವೊನ್ ಜೆರೊಮಾಚ್ಯಾ ಖಾಂದಾರ್ ತಾಣೆ ಆಪ್ಲೆ ಹಾತ್ ದವರ‍್ಲೆ. ತಾಚಿಂ ಸ್ಥನಾಂ ಜೆರೊಮಾಚ್ಯಾ ವೊಂಟಾಂಥಾವ್ನ್ ಥೊಡಿಂಚ್ ಇ೦ಚಾಂ ಪಯ್ಸ್ ಆಸ್‌ಲ್ಲಿಂ. ‘ಈವಾಕ್ ರೂಚ್ ಲಾಗಯ್ಲಿಯ್ ಆನಿ ತೆಂ ಆಪ್ಣಾಚ್ಯಾ ಪಾಂಯಾಖ್ಮ್‌ಚ್ ಪಡ್ತೆಲೆಂ ಮ್ಹಳ್ಳೆಂ ಪಿಶೆಂಪಣ್ ತುಂವೆಂ ಪಾಗುರ‍್ಲೆಂಯ್. ಪರಿಣಾಮ್ ಜಾವ್ನ್ ಈವಾ, ರಿಚರ‍್ಡಾ ಸರ‍್ಶಿಂ ಗೆಲೆಂ.’
‘ರಾವಯ್, ತೆಲ್ಮಾ, ರಾವಯ್!’ ಜೆರೊಮಾನ್ ಪರಾತ್ಲೆಂ ತಾಕಾ ಲಾಗಿಂ ಆರಾವ್ನ್. ಆಪ್ಲೆಂ ಮುಕಮಳ್ ತಾಣೆ ತೆಲ್ಮಾಚ್ಯಾ ಸ್ಥನಾಂ ಮಧೆಂ ಲಿಪಯ್ಲೆಂ.
‘ನಾ!’ ಮ್ಹಣಾಲೆಂ ತೆಲ್ಮಾ, ತಾಚ್ಯಾ ಕೆಸಾಂನಿ ಬೊಟಾಂ ಚರವ್ನ್. ‘ಎಕೇಕ್ ಪಾವ್ಟಿಂ ಉಲಯ್ಜೆ ಪಡ್ಟಾ…..ಆತಾಂ ತುಂ, ತಾಂಕಾಂ ನಾಸ್ ಕರ‍್ಚ್ಯಾ ಝಜಾಂತ್ ದೆಂವ್ಲಾಯ್.’
‘ಹಾಂವ್ ಝಜ್ ರಾವಂವ್ಚೊ ನಾ.’
‘ಆನಿ ತುಕಾ ಹಾಂವ್ ಆಡಾಂವ್ಚಿಂಯಿ ನಾ.’
‘ಕಿತ್ಯಾಕ್ ಮ್ಹಳ್ಯಾರ್ ತುಕಾ ದುಡು ಜಾಯ್.’
‘ತೆಂ ಎಕ್‌ಚ್ ಕಾರಾಣ್ ನ್ಹಯ್.’
‘ಹುಂ! ಹೆರ್ ಕಸಲ್ಂ ಕಾರಾಣಾಂ ಆಸ್ಯೆತ್?’
ತೆಲ್ಮಾನ್ ತಾಚೆಂ ಮುಕಮಳ್ ಆಪ್ಲ್ಯಾ ಸ್ಥನಾಂ ಮದ್ಲೆಂ ಪಯ್ಸ್ ಕೆಲೆಂ ಆನಿ ಆಪ್ಲ್ಯಾ ಹಾತಾಂನಿ ಘೆತ್ಲೆಂ. ‘ಹಾಂವೆಂ ಯಾ ಹೆರ್ ಕೊಣೆಂಯಿ ತುಕಾ ಆಡಾಯ್ಲ್ಯಾರ್ ಎಕ್‌ಚ್ ತುಂ ಜೀವಾಕ್ ಘಾತ್ ಕರ‍್ತೊಲೊಯ್ ಯಾ ಪಿಶ್ಯಾಂಚೆ ಆಸ್ಪತ್ರೆಂತ್ ದಾಕಲ್ ಜಾತೊಲೊಯ್.’
ಜೆರೊಮ್ ರಡ್ಲೊ.
‘ಆಜ್ ತುಕಾ ಮ್ಹಜಿ ಗರ‍್ಜ್ ಆಸಾ, ಜೆರೊಮ್,’ ತಾಣೆ ಮ್ಹಳೆಂ ತಾಚೆ ದೋನ್‌ಯಿ ಹಾತ್ ವಿಂಚುನ್ ಆಪ್ಲ್ಯಾ ಸ್ಥನಾಂಚೆರ್ ದವರ‍್ನ್. ‘ಸಬಾರ್ ತೇಂಪ್‌ಥಾವ್ನ್ ತುಂ ಚುಕಾರಿ ಮಾರಿತ್ತ್ ಆಯ್ಲ್ಯಾಯ್.’
‘ನಾ!’ ಮ್ಹಣಾಲೊ ಜೆರೊಮ್, ತೆಲ್ಮಾಚ್ಯಾ ಸ್ಥನಾಂಚೆರ್ ಹಳ್ಟಾಚೊ ದಾಬ್ ಘಾಲುನ್. ‘ಹಾಂವ್ ಭಿರ‍್ಮತೆಚಿ ಲಂಯ್ಗಿಕತಾ ಆಪೇಕ್ಷಿನಾ.’
ತೆಂ ಹಾಸ್ಲೆಂ ಆನಿ ಚಿಕ್ಕೆಸೆ ಪಯ್ಸ್ ಸರೊನ್ ಆಪ್ಲಿ ಬಿಕಿನಿ ಪ್ಯಾಂಟಿ ತಾಣೆ ನಿಕ್ಳಾಯ್ಲಿ. ‘ಭಿರ‍್ಮತೆಚಿ ಲಂಯ್ಗಿಕತಾ ಮ್ಹಣಾಲೊಯ್ ಮಿಸ್ಟರ್ ಜೆರೊಮ್ ಲಾಜ್ರಾ?’ ತಾಣೆ ವಿಚಾರ‍್ಲೆಂ ಆಪ್ಲ್ಯೊ ಜಾಂಗೊ ಚಿಕ್ಕೆಸೆ ರುಂದಾವ್ನ್.
‘ಮ್ಹಜ್ಯಾ ಹ್ಯಾ ವಿಣ್ಗ್ಯಾಪಣಾಚೆರ್ ಮ್ಹಾಕಾ ಗರ‍್ವ್ ಆಸಾ. ಪುಣ್ ತುವೆಂ ತುಜ್ಯಾ ವಿಣ್ಗ್ಯಾಪಣಾಚೆರ್ ದೀಷ್ಟ್ ಘಾಲ್ಯಾಯ್? ತುಂ ಎಕ್ ಅಹಸ್ಯ್, ಘಾಣೆರೊ ದಾದ್ಲೊ. ಮೂರ್ ಯೆತಾ ತುಜೆ ಕುಡಿಕ್.’
ಜೆರೊಮ್ ಉಬೊ ಜಾಲೊ.
ತಾಚೆಂ ಸರ‍್ವಾಂಗ್ ಕಾಂಪ್ತಾಲೆಂ.
‘ತರಿ ತುಜೆಂ ರೊಸಾಳ್ ತೊಂಡ್ ತಯಾರ್ ಆಸಾ?’ ತಾಣೆ ತೆಲ್ಮಾಕ್ ಖಟ್ಲ್ಯಾ ಕುಶಿಕ್ ಲೊಟ್ಲೆಂ.
‘ವ್ಹಯ್!’ ಜಾಪ್ ದಿಲಿ ತೆಲ್ಮಾನ್, ತಾಚ್ಯಾ ಪೆಂಟಾವಯ್ಲ್ಯಾನ್ ತಾಚ್ಯಾ ಪುರುಷತ್ವಾಚೆರ್ ಆಪ್ಲೊ ಹಾತ್ ಚರವ್ನ್. ತಾಚ್ಯಾ ಬೆಲ್ಟಾಕ್ ತಾಣೆ ಹಾತ್ ಘಾಲೊ.
‘ಹೆಂ ಕಾಮ್ ಹಾಂವ್‌ಯಿ ಕರುಂಕ್ ಸಕ್ತಾಂ!’ ಬೊಬಾಟ್ಲೊ ಜೆರೊಮ್, ಖುದ್ದ್ ವಿವಸ್ತ್ರ್ ಜಾವ್ನ್. ತಾಚ್ಯಾ ವಿಸ್ವ್ಯಾಂತ್ ಅರ‍್ವಾಸ್ ಉದ್ರಿಕ್ತಾಯ್ ಪರ್ಯಾಂತ್ ದಿಸುನ್ ಯೆನಾತ್‌ಲ್ಲಿ.
ತೆಲ್ಮಾನ್ ತಾಚೆ ಸಾಮ್ಕಾರ್ ದಿಂಬಿ ಘಾಲಿ.
——
ಟೆಲಿಫೋನ್ ವ್ಹಾಜ್ಲೆಂ.
‘ರಿಚರ‍್ಡ್ ಹಾಂಗಾಸರ್.’
‘ಹಾಂವ್ ಜಾಣಾಂ.’ ತೆವ್ಶಿಲೊ ತಾಳೊ ಮ್ಹಣಾಲೊ. ‘ವ್ಹಡ್ಲೊ ದೀಸ್ ಲಾಗಿಂ ಯೆತಾ.’
‘ವ್ಹಯ್.’
‘ತಯಾರ್ ಆಸಾಯ್?’
‘ಥೊಡೆಂ ಕಾಮ್ ಬಾಕಿ ಆಸಾ.’
‘ಫಾಲ್ಯಾಂ ಹ್ಯಾಚ್ ವೆಳಾರ್ ಕೊಲ್ ಕರ‍್ತಾಂ. ಪೊರ‍್ವಾಂ ಟೆಂಡರ್ ಬಂದ್ ಜಾತಾ.’
‘…..’
‘ಉಡಾಸ್ ಆಸುಂ, ಪರಿಕ್ರಮ್ ಪಯ್ಲೆಂಚೆಂಚ್.’
‘ಹೆಂ ಸರ‍್ವ್ ತುಂ ಕಿತ್ಯಾಕ್ ಕರ‍್ತಾಯ್?’
‘ಫಾಯ್ದೊನಾಸ್ತಾನಾ ನ್ಹಯ್.’
‘ಕೊಣಾಕ್? ತುಕಾ ಯಾ ಮ್ಹಾಕಾ?’
‘ದೊಗಾಂಯ್ಕಿ ಮ್ಹಣ್ ಸಮಜ್.’
ಕ್ಲಿಕ್-ಸಂಪರ‍್ಕ್ ತುಟ್ಲೊ.
ರಿಚರ್ಡಾನ್ ರಿಸೀವರ್ ಪಾಟಿಂ ದವರ‍್ಲೆಂ.
ಸಬಾರ್ ವೇಳ್ ಪರ್ಯಾಂತ್ ತೊ ರಿಸೀವರಾಕ್ ಪಳೆವ್ನ್ ಬಸ್ಲೊ, ಕಸಾಯ್ಗಾರಾಚಿ ತಲ್ವಾರ್ ಕೆದಳಾ ಆಪ್ಲ್ಯಾ ಗೊಮ್ಟ್ಯಾರ್ ದೆಂವ್ತಾ ಮ್ಹಳ್ಳ್ಯಾ ನಿರೀಕ್ಷಣೆನ್. ಭೋವ್‌ಶಾ, ತಾಚ್ಯಾ ಮತಿಚ್ಯಾ ಪಡ್ದ್ಯಾರ್ ಹೆಲೀನಾಚಿಂ ದುಕಾಂ ದೆಂವ್ಚಿಂ ದಿಸ್ತಾಲಿಂ ಜಾಯ್ಜೆ. ತಾಚ್ಯಾ ರಗ್ತಾಚಿಂ ದುಕಾಂ ಪುಣ್ ತಾಕಾ ಕಶೆಂ ಸಾಂಗ್ಚೆ, ತಾಚೆಂ ಮುಕಮಳ್ ವಿಚಾರ‍್ತಾಲೆಂ, ಕಿತೆಂ ಸಾಂಗ್ಚೆಂ?
ತೊ ಆಪ್ಲೆ ಬಸ್ಕೆ ವಯ್ಲೊ ಉಟ್ಲೊ ಆನಿ ಕೆಬಿನಾಚ್ಯಾ ಜನೆಲಾಲಾಗಿಂ ಉಬೊ ಜಾಲೊ. ತಾಚಿ ಮೋತ್ ಪರಿಪೂರ‍್ಣ್ ರಿತಿ ಆಸ್‌ಲ್ಲಿ.
ದಾರಾರ್ ಠೊಕೆ ಪಡ್ಲೆ.
ತಾಣೆ ವೊಚ್ಯಾಕ್ ಪಲೆಲೆಂ. ಸಕಾಳಿಂಚಿಂ ಸಾಡೆ-ಧಾ. ಮಿಸೆಸ್ ಗೊಮಿಸ್ ಕೊಫಿ ಹಾಡುನ್ ಆಯ್ಲ್ಯಾ ಆಸ್ತೆಲಿ. ಆರ‍್ಶ್ಯಾಚ್ಯಾ ದಾರಾಂತ್ಲ್ಯಾನ್ ತಿಕಾ ಪಳೆವ್ನ್ ತಾಣೆ ಮಾತೆಂ ಹಾಲಯ್ಲೆಂ. ತಿ ಭಿತರ್ ಆಯ್ಲಿ. ತಿಚ್ಯಾ ಹಾತಾಂತ್ ಟ್ರೇ ಆಸ್ಚಿ ಪಳೆವ್ನ್ ರಿಚರ್ಡಾನ್ ಭಂವ್ರ್ಯೊ ವಯ್ರ್ ಕೆಲ್ಯೊ. ಫಕತ್ ಕೊಫಿ ಕಪ್ ಯೆಂವ್ಚ್ಯಾ ತಿಚ್ಯಾ ಹಾತಾಂತ್ ಆಸ್‌ಲ್ಲ್ಯಾ ಟ್ರೇ-ಂತ್ ದೋನ್ ಪ್ಯಾಟೀಸ್ ಆಸ್‌ಲ್ಲ್ಯೊ ಆನಿ ಸಾಂಗಾತಾಚ್ ಕೊಫಿ ಕಪ್.
‘ಚಿಕನ್ ಪ್ಯಾಟೀಸ್,’ ತಿಣೆ ಕಳಯ್ಲೆಂ. ‘ಹಾಂವೆಂಚ್ ತಯಾರ್ ಕೆಲ್ಲ್ಯೊ.’ ತಿಚೊ ತಾಳೊ ಹಳ್ತಾರ್ ಕಾಂಪ್ತಾಲೊ.
‘ಕಾಂಯ್ ವಿಷೇಸ್?’
‘ಆಜ್ ಮ್ಹಜೊ ಜಲ್ಮಾ ದೀಸ್, ಮಿ|ಕ್ಲೆಮೆಂಟ್.’ ತಿಚೆಂ ಆಡ್ಕುಲೆಂ ಮುಕಮಳ್ ಆನಿಕಿ ಚಿಕ್ಕೆಸೆ ರುಂದಾಲೆಂ.
‘ಹೊ! ಮೆನಿ ಹ್ಯಾಪ್ಪಿ ರಿಟರ್ನ್ಸ್.’ ರಿಚರ್ಡಾನ್ ಮ್ಹಳೆಂ, ತಿಕಾ ಬಸುಂಕ್ ಹಿಸಾರೊ ದೀವ್ನ್. ತಾಚ್ಯಾ ವೊಟಾಂ ಇಡ್ಯಾಂತ್ ಕಸಲೊಗಿ ಹಾಸೊ ಉದೆಲೊ.
‘ಹ್ಯಾ ಪ್ರಾಯೆರ್‌ಯಿ …ಜಲ್ಮಾ ದೀಸ್…ದೆಕುನ್ ಹಾಸ್ತಾಯ್ ಆಸ್ತೊಲೊಯ್.’ ತಿಣೆ ಮ್ಹಳೆಂ ತಾಚ್ಯಾ ಸಾಮ್ಕಾರ್ ಬಸುನ್. ‘ಆಮ್ಚ್ಯಾ ತಸಲ್ಯಾಂಚೆ ಲ್ಹಾನ್ ಸಂತೊಸ್ ಅಸಲೆಚ್.’
‘ತಶೆಂ ಕಾಂಯ್ ನಾ ಮಿಸೆಸ್ ಗೊಮಿಸ್,’ ತಾಣೆ ಮ್ಹಳೆಂ, ಎಕ್ ಪ್ಯಾಟೀಸ್ ವಿಂಚುನ್. ‘ಹಾಂವ್ ಹೆರ್ ಕಿತೆಂಗಿ ಚಿಂತಾಲೊ.’
‘ಕಾಂಯ್ ಪ್ರೊಬ್ಲೆಮ್ ಆಸಾತ್ ಮಿ|ಕ್ಲೆಮೆಂಟ್? ಮ್ಹಜೊ ಮತ್ಲಬ್, ಒಸಿಸಾಂತ್?’ ತಿಚೆಂ ಸವಾಲ್ ಅನಿರಿಕ್ಷಿತ್ ಪುಣ್ ತಾಕಾ ಅನಿರೀಕ್ಷಿತ್ ನ್ಹಯ್.
‘ಸರ‍್ವಾಂಯಿ ಕಿತ್ಯಾಕ್ ಹೆಂ ಸವಾಲ್ ಮ್ಹಜೆಲಾಗಿಂ ವಿಚಾರ‍್ತಾತ್?’ ತಾಣೆ ಮ್ಹಳೆಂ, ಪ್ಯಾಟೀಸಾಕ್ ಹಳ್ಟಾಚೊ ಘಾಸ್ ಮಾರುನ್. ತಾಕಾ ಮಿಸೆಸ್ ಗೊಮಿಸಾನ್ ಕಸಲಿಗೀ ಜಾಪ್ ದಿಲಿ. ತಿ ತಾಕಾ ಆಯ್ಕಾಲಿ ನಾ. ಮಿಸೆಸ್ ಗೊಮಿಸಾಕ್ ಹಿಸಾರೊ ಮೆಳ್ಳೊ ಆನಿ ತಿ ತಾಕಾ ಮಾನ್ ಭಾಗಾವ್ನ್ ಭಾಯ್ರ್ ಗೆಲಿ. ರಿಚರ್ಡಾನ್ ತ್ಯೊ ಪ್ಯಾಟೀಸ್ ಖೆಲ್ಯೊ ಆನಿ ಕೊಫಿ ಕಪ್ ಖಾಲಿ ಕೆಲೆಂ.
ದುಸ್ರ್ಯಾ ದಿಸಾ ನಮಿಯಾರ‍್ಲೆಲ್ಯಾ ವೆಳಾರ್ ಫೋನ್ ಆಯ್ಲೆಂ.
‘ಸಂಖೆ ತಯಾರ್ ಆಸಾತ್?’
‘ವ್ಹಯ್! ಬರವ್ನ್ ಘೆ.’ ರಿಚರ್ಡಾನ್ ಆಪ್ಲೊ ಸಂಖೊ ಸಾಂಗ್ಲೊ.
‘ಅರ‍್ದ್ಯಾ ಘಂಟ್ಯಾನ್ ಫೋನ್ ಕರ‍್ತಾಂ.’
ಭರ‍್ತಿ ಅರ‍್ದ್ಯಾ ಘಂಟ್ಯಾನ್ ಕೊಲ್ ಕೆಲ್ಲ್ಯಾ ತ್ಯೆ ವೆಕ್ತಿನ್ ರಿಚರ‍್ಡಾಕ್ ಆಪ್ಲೊ ಸಂಖೊ ಸಾಂಗ್ಲೊ.
‘ಪುಣ್ ಹೊ ಸಂಖೊ ಹಾಂವೆಂ ದಿಲ್ಲ್ಯಾ ಸಂಖ್ಯಾಚ್ಯಾಕಿ ಪಂಚ್ವೀಸ್ ಹಜಾರ್ ಚಡ್ ಆಸಾ.’
‘ಹಾಂವ್ ಜಾಣಾಂ! ತುಕಾ ಟೆಂಡರ್ ಮಾರುಂಕ್ ಜಾಯ್ ಯಾ ನಾಕಾ?’ ಹ್ಯಾ ಸವಲಾ ಬರಾಬರ್ ತ್ಯೆ ವೆಕ್ತಿನ್ ಲಾಯ್ನ್ ಬಂದ್ ಕೆಲಿ.
ಪಂದ್ರಾ ಮಿನುಟಾಂ ಬರಾಬರ್ ರಿಚರ‍್ಡ್ ಆಪ್ಲೆ ದೊಳೆ ಧಾಂಪುನ್ ಬಸ್ಲೊ.
ವಿಂಚವ್ಣ್ ತಾಚಿ, ಗೊಮ್ಟಿ ತಾಚಿ.
ಪಂದ್ರಾ ಮಿನುಟಾಂ ಉಪ್ರಾಂತ್ ತಾಣೆ ನಿರ‍್ದಾರ್ ಘೆತ್ಲೊ.
ಟೆಂಡರ್ ಫೊರ‍್ಮಾಚೆರ್ ಆಪ್ಲೆಂಚ್, ಪಯ್ಲೆಂ ಸಾಂಗ್‌ಲ್ಲೆಂ ಫಿಗರ್ ತಾಣೆ ಭರ‍್ಲೆಂ ಆನಿ ಹೆರ್ ಡೊಕ್ಯುಮೆಂಟ್ಸ್ ತಯಾರ್ ಕೆಲಿಂ.
ಎಕಾ ಹಫ್ತ್ಯಾನ್ ವೀಜೆಚ್ಯಾ ಮಿನಿಸ್ಟ್ರಿನ್ ತ್ಯಾ ಟೆಂಡರಾಚೆಂ ಫಳಿತಾಂಶ್ ಜಾಯ್ರ್ ಕೆಲೆಂ.
ಒಸಿಸಾಕ್ ಟೆಂಡರ್ ಲಾಗೊಂಕ್ ನಾತ್‌ಲ್ಲೊ.
ರಿಚರ್ಡಾನ್ ಭರ್‌ಲ್ಲೆಂ ಫಿಗರ್ ಜುಲಿಯಾ ಟ್ರೇಡಿಂಗ್ ಕಂಪೆನಿನ್ ಭರ್‌ಲ್ಲ್ಯಾ ಫಿಗರಾಚ್ಯಾಕಿ ಆಟ್ ಹಜಾರ್ ಚಡ್ ಆಸ್‌ಲ್ಲೆಂ ಆನಿ ಡೆಲಿವರಿ ತೀನ್ ಮ್ಹಯ್‌ನೆ ಮುಕಾರ್ ಆಸ್‌ಲ್ಲಿ.
ಖಂಯ್ಸರ್‌ಗಿ ಕಸಲೆಂಗಿ ಚುಕೊನ್ ಗೆಲ್ಲೆಂ.
ಫೋನಾಚೆರ್ ಉಲಂವ್ಚ್ಯಾ ವೆಕ್ತಿನ್ ದಿಲ್ಲೆಂ ಫಿಗರ್ ಪಂಚ್ವೀಸ್ ಹಜಾರಾಂಕ್ ಚಡ್ ಆಸ್‌ಲ್ಲೆಂ ಜಾಲ್ಲ್ಯಾನ್ ರಿಚರ್ಡಾನ್ ಆಪ್ಲೆಂಚ್ ಫಿಗರ್ ಭರ್‌ಲ್ಲೆಂ ತೆಂ, ಆತಾಂ, ಜುಲಿಯಾ ಟ್ರೇಡಿಂಗ್ ಕಂಪೆನಿಚ್ಯಾ ಫಿಗರಾಚ್ಯಾಕ್ ಆಟ್ ಹಜಾರ್ ಚಡ್ ಆಸ್‌ಲ್ಲೆಂ.
ಜುಲಿಯಾ ಟ್ರೇಡಿಂಗಾಕ್ ವಿಜೆಚ್ಯಾ ಮಿನಿಸ್ಟ್ರಿಚೊ ಟೆಂಡರ್ ಲಾಗ್ಚೊ ಕಾಂಯ್ ನವೆಸಾಂವ್ ನ್ಹಯ್.
ತರ್?
ತರ್, ಕಸಲೊ ಪ್ರೊಬ್ಲೆಮ್ ಮಿ|ರಿಚರ‍್ಡ್ ಕ್ಲೆಮೆಂಟ್?
ತ್ಯಾ ಅಪರಿಚಿತ್ ಮನ್ಶ್ಯಾಲಾಗಿಂ ತುಂ ಜುಗಾರ್ ಖ್ಹೆಳ್ಳೊಯ್ ಆನಿ ಸಲ್ವಾಲೊಯ್.
ರಿಚರ‍್ಡ್ ಕ್ಲೆಮೆಂಟ್ ತುಂ ಸಲ್ವಾಲೊಯ್ ಮಾತ್ರ್ ಯಾ ಸಾಂಪಡ್ಲೊಯ್?
(ಅವಸ್ವರ್ – 56-ಂತ್ ಮುಂದರ‍್ತಾ)
