ಲೊಕಾಚೊ ಜಮೊ ಮ್ಹಳ್ಳೊ ಸಾಗೊರ್‌ಚ್ ತ್ಯಾ ಮಯ್ದನಾರ್ ಲಾರಾಂ ಮಾರ‍್ತಾಲೊ. ಕಾಂಯ್ ಪಂದ್ರಾ ಹಜಾರಾಂ ವಯ್ರ್ ದಾದ್ಲೆ ಆನಿ ಸ್ತ್ರೀಯೊ ಆನಿ ಭುರ‍್ಗಿಂ ಸಯ್ತ್ ಸಾಂಜೆಚ್ಯಾ ಚಾರಾಂಕ್‌ಚ್ ಥಂಯ್ಸರ್ ಹಾಜರ್ ಜಾಲ್ಲಿಂ ಪುಣ್ ಶಿಸ್ತೆನ್. ಕಾರ‍್ಯಕ್ರಮಾಚಿ ಸುರುವಾತ್ ಸಾಂಜೆಚ್ಯಾ ಸ ಘಂಟ್ಯಾರ್ ಮ್ಹಣ್ ಘೋಶಿತ್ ಜಾಲ್ಲಿ ತರಿ ಭಾವಾರ್ಥ್ಯಾಂಚಿ ಜಮಾತ್ ಚಾರಾಂಕ್‌ಚ್ ಥಂಯ್ಸರ್ ಜಮೊ ಜಾವ್ನ್ ಸಾಂಜೆಚ್ಯಾ ವೊತಾಂತ್ ಅತ್ಮೊ ಸುಕಯ್ತಾಲಿಂ.
ಮಯ್ದಾನಾವಯ್ಲಿ ಸಜಾವಟ್ ಹ್ಯಾ ಸಂಸಾರಾಂತ್ಲಿ ನ್ಹಯ್! ಹರ್‌ಯೆಕಾ ದೊನ್ಶಿಂ ಫುಟಿಂಚ್ಯಾ ಅಂತರಾರ್ ಮಯ್ದಾನಾಚ್ಯಾ ಸಗ್ಳ್ಯಾ ಪರಿಧಿಚೆರ್ ದೊದೊಡೆ ಫ್ಲಡ್ ಲಾಯ್ಟ್ ಆನಿ ಹಾ‌ಅಂಚ್ಯಾ ಖಾಂಬ್ಯಾಕ್ ಹಳ್ಟಾಚ್ಯಾ ಆಲ್ಮಾರಿ ಗಾತ್ರಾಂಚಿಂ ಲೌಡ್‌ಸ್ಪೀಕರಾಂ. ಮಯ್ದಾನಾಚೆಂ ಆವರಣ್ ಮೊಠ್ಯಾ ನಾಯ್ಲೊನ್ ರಾಜ್ವಾಂನಿ ವೋಯ್ ಕಶಿ ಬಾಂದುನ್ ‘ಭಿತರ್’ಚ್ ರಾವಯಿಲ್ಲೆಂ. ಆನಿ ವಯ್ಲ್ಯಾ ರಾಜ್ವಾಂಚೆರ್ ರಂಗ್‌ರಂಗಾಳ್ ದಿವ್ಯಾಂಚಿ ಸಾಂಕಳ್ ವೊಳ್‌ಲ್ಲಿ.
ಆವರಣಾಚೆ ಭಾಯ್ರ್ ದೋನ್ ಫಾಯರ್ ಬ್ರಿಗೇಡಿಚಿಂ ವೆನಾಂ, ಚಾರ್ ಪೊಲಿಸ್ ಜೀಪಾಂ, ತೀನ್ ಆಂಬ್ಯುಲೆನ್ಸಾಂ ಆನಿ ಎಕ್ ಲಾಂಬಾಯೆಚೆಂ ಪೊಲಿಸ್ ಬಸ್ಸ್. ಹಾತಾಂತ್ ವೊಕಿ-ಟೊಕಿ ಘೆವ್ನ್ ಭಂವ್ಚೆ ಪೊಲಿಸ್ ಆನಿ ಸ್ವಯಂಸೇವಕ್ ಧಾರಾಳ್. ಹಾಂಚೆ ಪಯ್ಕಿ ತರ‍್ನಾಟ್ಯೊ ಚಲಿಯೊಚ್ಚ್ ಚಡ್ ಸಂಕ್ಯಾನ್. ಅಂರ‍್ದುನ್ ಬಸ್ಚೆ ಡೆನಿಮ್ ಮಿನಿ-ಸ್ಕರ‍್ಟ್, ಧವೊ ಪಾತಳ್ ಬ್ಲಾವ್ಜ್, ಸ್ಥಂನಾಂಚೆ ಉಬಾರಾಯೆರ್ ಎಕ್ ತಾಂಬ್ಡೆಂ ಕಾರ್ನೇಶನ್ ಆನಿ ಮದೆಂಚ್ ರೆವೆರೆಂಡ್ ಫ್ರೆಡ್ ಟೇಯ್ಲರಾಚ್ಯಾ ಮಾಗ್ಣ್ಯಾ ಜಮಾತಿಚೆಂ ಸಂಕೇತ್ – ಪಾರ‍್ವ್ಯಾ ರುಪಾರ್ ದೆಂವೊನ್ ಯೆಂವ್ಚೊ ಧವೊ ಪಾರ‍್ವೊ.
ಹೊಚ್ ಸಂಕೇತ್, ಸುಮಾರ್ ವೀಸ್ ಫುಟಿಂ ಉಬಾರಾಯೆರ್ ಉಬಾರ್‌ಲ್ಲ್ಯಾ ಮಜ್ಬೂತ್ ಸ್ಟೇಜಿಚೆರ್‌ಯಿ ಆಸ್‌ಲ್ಲೊ. ಸ್ಟೇಜಿಚಿ ಸಜಾವಟ್ ನಿಳ್ಸ್ಯಾ ವರ‍್ಣಾಚಿ, ಟೇಯ್ಲರಾನ್ ಉಲವ್ಪ್ ದೀಂವ್ ಆಸ್ಚ್ಯಾ ಮಾಂಚಿಯೆರ್ ಧಾ ಮಾಯ್ಕಾಂ. ವೆಡಿಚೆರ್ ತಾಂಬ್ಡ್ಯಾ ವಿಲುದೆನ್ ನೆಟಯಿಲ್ಲ್ಯೊ ಆಟ್ ರಾಯಾಳ್ ಬಸ್ಕಾ. ಪಾಟ್ಲ್ಯಾನ್ ದೆಂವಯಿಲ್ಲ್ಯಾ ದಾಟ್ ಪಡ್ದ್ಯಾಚೆರ್ ಧ‌ಒವೆಂ ಸಂಕೇಟ್ ಆನಿ ವೀಜ್ ದಿವ್ಯಾಂನಿ ನಟಯಿಲ್ಲಿಂ ಹಿಂ ಉತ್ರಾಂ – ಆಜ್ ತುಮ್ಕಾಂ ಪವಿತ್ ಅತ್ಮ್ಯಾನ್ ಆಪಯ್ಲಾಂ!
ಸ್ಟೇಜಿಚ್ಯಾ ದೋನ್‌ಯಿ ಕುಶಿಂನಿ ಸ್ಟೆನ್‌ಗನ್ನ್ ಘೆತ್‌ಲ್ಲೆ ಚವ್ಗ್ ಪೊಲಿಸ್ ಕಮಾಂಡೋಸ್ (ಹೆ‌ಒ ವಿಸೇಶ್ ದಿಸನಾತ್‌ಲ್ಲೆಂ). ಸ್ಟೇಜಿ ಪಾಟ್ಲ್ಯಾನ್ ಆಸ್‌ಲ್ಲ್ಯಾ ಗ್ರೀನ್ ರುಮಾಚ್ಯಾ ದಾರ‍್ವಟ್ಯಾರ್‌ಯಿ ಅಸಲಿಚ್ ಭದ್ರತಿ. ಹಾಕಾ ಪ್ರವೇಶ್ ಪಾಟ್ಲೆ ಕುಶಿಥಾವ್ನ್, ಕೊಣಾಯ್ಕಿ ಕಳನಾತ್‌ಲ್ಲೆಪರಿಂ. ಹ್ಯಾ ಗ್ರೀನ್ ರುಮಾಕ್ ಅಡೇಜ್ ಟನ್ನ್ ಸಾಮಾರ್ಥೆಚೊ ಎರ್‌ಕಂಡೀಶನರ್; ಹಾಂಗಾಸರ್ ಪ್ರವೇಸ್ ಫಕತ್ ಎಕ್ ತಾಂಬ್ಡೆಂ ಕಾರ‍್ಡ್ ಆಸ್‌ಲ್ಲ್ಯಾಂಕ್ ಮಾತ್ರ್ ಆನಿ ಹಿಂ ತಾಂಬ್ಡಿಂ ಕಾರ‍್ಡಾಂ ಫಕತ್ ಚವ್ಗಾಲಾಗಿಂ ಆಸ್‌ಲ್ಲಿಂ:
ಮಾವ್ರಿಸ್ ಆಗುಸ್ತಿನ್
ಜೆರೊಮ್ ಲಾಜ್ರಾ
ರಮೋನಾ ಲಿಯೊ
ಆನಿ ಪೆಟ್ರೋಸ್ಟೇಟಾಚೊ ಭಿಸ್ಪ್, ಕಾಥೊಲಿಕ್ ಭಿಸ್ಪ್, ವೊಲ್ಟರ್ ಸಾಂತುಮಾಯೆರ್ ದೆ ಬಿರಿತೊ.
ಹಿಂ ಚವ್ಗಾಂಯಿ, ರೆವೆರೆಂಡ್ ಫ್ರೆಡ್ ಟೇಯ್ಲರಾಚ್ಯಾ ಯೆಣ್ಯಾಕ್, ಬೊಕುಲ್, ಮಾಜ್ರಾಕ್ ರಾಕೊನ್ ಬಸ್‌ಲ್ಲೆಪರಿಂ ರಾಕೊನ್ ಆಸ್‌ಲ್ಲಿಂ.
ವ್ಹೊರಾ ಸಾಂಜೆಚಿಂ ಸವ- ಪಾಂಚ್ ಜಾತಾನಾ ಭಾಯ್ಲ್ಯಾನ್ ಪೊಲಿಸ್ ಜೀಪಾಂಚೆಂ ಬಿಗಿಲ್ ಫುಟ್ಲೆಂ ಆನಿ ಹೆ ಚವ್ಗ್ ಜಿವಿ ವೀಜೆಚಿ ಸರಿ ಗುಡ್ಡಾಯಿಲ್ಲೆಪರಿಂ ನೀಟ್ ಜಾಲೆ.
ತೊ ಆಯಿಲ್ಲೊ!
ರೆವೆರೆಂಡ್ ಫ್ರೆಡ್ ಟೇಯ್ಲರ್ ಆಯಿಲ್ಲೊ.
ತಾಣಿಂ ಯೆಕಾಮೆಕಾಚಿಂ ಮುಕಮಳಾಂ ಪಳೆಲಿಂ-
ಮಾವ್ರಿಸ್ ಆಗುಸ್ತಿನ್ ಆಪ್ಲ್ಯಾ ಮೊಟಾಯೆಚ್ಯಾ ಫುಗ್ರ್ಯಾ ಗಾಲಾಂಚೆರ್ ನವಿ ತಾಂಬ್ಸಾಣ್ ಘೆವ್ನ್ ಆಸ್‌ಲ್ಲೊ ಆನಿ ಘಡಿಯೆ ಘಡಿಯೆ ಗರಜ್‌ನಾಸ್ತಾಂ ಹಾಸ್ತಾಲೊ. ತಾಚ್ಯಾ ತ್ಯಾ ಹಾಸ್ಯಾಂತ್ ಆತ್ತಾಂಚೆ ಆತಾಂ ಸ್ಪಿರಿತ್‌ಸಾಂತ್‌ಚ್ ನ್ಹಯ್, ದೇವ್‌ಚ್ ದಿಷ್ಟಿಕ್ ಪಡ್ಟಾ ಮ್ಹಳ್ಳಿಂ ಖುಣಾಂ ದಿಸ್ತಾಲಿಂ.
ಜೆರೊಮ್ ಲಾಜ್ರಾ – ತ್ಯಾ ಉಬಾಳಾಂತ್ ತರಿ ತೀನ್ ಪೀಸ್ ಸುಟ್ ನ್ಹೆಸ್‌ಲ್ಲೊ. ತಾಚ್ಯಾ ಕೋಟಾಚ್ಯಾ ದಾವ್ಯೆ ಕುಶಿಕ್ ತಾಂಬ್ಡೆಂ ಕಾರ್ನೇಶನ್ ಆನಿ ಉಜ್ವ್ಯಾಕ್ ಜಮಾತಿಚೊ ಸಂಕೇತ್ ಆಸ್‌ಲ್ಲೊ. ಘಡಿಯೆ ಘಡಿಯೆ ತೊ ಹೆರಾಂಕ್ ಪಳೆತಾಲೊ, ದಾಂತ್ ಖಿರ‍್ಲೊನ್ ಹಾಸ್ತಾಲೊ. ಕಿತ್ಯಾಕ್ ಲಾಗುನ್, ತೊಚ್ಚ್ ಜಾಣಾಂ.
ರಮೋನಾ ಲಿಯೊ ಮಾತ್ರ್ ಪರಿಪೂರ‍್ಣ್ ಸ್ಥಿಮಿತಾಯೆಂತ್ ಆಸ್‌ಲ್ಲೆಂ.
ಸ್ವಂಯಸೇವಕಾಂಕ್ ದಿಲ್ಲೆಂ ಸಮವಸ್ತ್ರ್ ತೆಂ ನ್ಹೆಸುಂಕ್ ನಾತ್‌ಲ್ಲೆಂ. ತಾಣೆ ಧವೆ ಸ್ಲ್ಯಾಕ್ಸ್ ಆನಿ ಧವೊಚ್ಚ್ ಬ್ಲಾವ್ಜ್ ಘಾಲ್ಲೊ ವ್ಹಯ್ ಪುಣ್ ಭುಜಾಂಚೆರ್ ದೆಂವಯಿಲ್ಲಿ ನಾವಿಕಾಂಚಿ ನಿಳಿ ಜಾಕೆಟ್ ತಾಚ್ಯಾ ವಿಭಿನ್ನ್ ಸೊಭಾಯೆಕ್ ಎಕ್ ಥಿಕ್ ದಿತಾಲಿ. ಹ್ಯಾ ಜಾಕೆಟಿಂತ್ ತಾಚಿ ತರ‍್ನಿ ಮಾಣ್ಸುಗಿ ಉಟೊನ್ ದಿಸ್ತಾಲಿ ಮಾತ್ರ್ ನ್ಹಯ್, ಜವಾಬ್ದಾರೆಚೆಂ ಎಕ್ ವಾತಾವರಣ್ ತಾಚ್ಯಾ ಉದ್ರಿಕ್ತ್ ವ್ಯಕ್ತಿತ್ವಾಕ್ ದಿತಾಲಿ. ಫುಡೆಂ ಕಿತೆಂ ಯೆಂವ್ಕ್ ಆಸಾ ತರಿ ಹಾಂವ್ ಹಾಂವ್ಂಚ್ ಮ್ಹಳ್ಳೊ ಖಚಿತ್ ಸಂದೇಶ್ ತೆಂ ಭಂವ್ತಿಂ ಆಸ್‌ಲ್ಲ್ಯಾಂಕ್ ಪಾಟಯ್ತಾಲೆಂ.
ಪೆಟ್ರೋಸ್ಟೇಟಾಚೊ ಭಿಸ್ಪ್, ಕಾಥೊಲಿಕ್ ಭಿಸ್ಪ್, ರಾಯ್ಟ್ ರೆವರೆಂಡ್ ದೊತೊರ್ ವೊಲ್ಟರ್ ಸಾಂತುಮಾಯೆರ್ ದೆ ಬಿರಿತೊ ಆಪ್ಲ್ಯಾ ಪರಿಪೂರ‍್ಣ್ ದಳ್ಬಾರಾನ್ ಆಯಿಲ್ಲೊ.
ತಾಣೆ ತಶೆಂ ಯೇಜೆ ಆಸ್‌ಲ್ಲೆಂ.
ಆಜ್, ಫ್ರೆಡ್ ಟೇಯ್ಲರ್‌ಚ್ ನ್ಹಯ್ ಇ೦ಫೆರ‍್ನಾಂತ್ಲೊ ಲುಸಿಫೆರ್‌ಚ್ ಆಯಿಲ್ಲೊ ತರೀ ಭಿಸ್ಪ್ ಪುರ‍್ತ್ಯಾಚ್ಯಾಕಿ ವರ‍್ತ್ಯಾ ಸಜಾವಟೆನ್ ಯೆತೊ ಕಿತ್ಯಾ ಖಲೀಲ್ ಝಿಬ್ರಾನಾಚ್ಯಾ ಸಯ್ತಾನಾಚಿ ಆನಿ ಪಾದ್ರಿಚಿ ಕಥಾ ಸ್ಸತ್ ಜಾಂವ್ಚೆ ದೀಸ್ ಕಾಥೊಲಿಕ್ ಸಮಾಜಿಕ್ ಆಯಿಲ್ಲೆ. ಪೆಟ್ರೋಸ್ಟೇಟಾಂತ್ಲೆಂ ಕಾಥೊಲಿಕ್‌ಪಣ್ ಉರಾಜೆತರ್ ಸರ್ವ್ ಪಾದ್ರಿ-ಮಾದ್ರಿಂನಿಂಚ್ ನ್ಹಯ್ ಸರ್ವ್ ಕ್ಲೆರಿಕಾಂನಿ ಝಿಬ್ರಾನಾಚ್ಯಾ ಸಯ್ತಾನಾಕ್ ಖಾಂದಾರ್ ವ್ಹಾವಯ್ಜೆ ಆಸ್‌ಲ್ಲೆಂ.
ಅಸಲಿ ಪರಿಗತ್ ಎಕಾ ದಿಸಾನಂಚ್ ಉದೆಲ್ಲಿ ನ್ಹಯ್. ಹೆಂ ಉಪ್ರಾಟ್‌ಪಣ್ ಸಮಾಜಿಂತ್ ಆಸ್‌ಲ್ಲ್ಯಾ ನಾಸ್ತಿಕಾಂನಿ ಯಾ ಖೊಟ್ಯಾ ಮನ್ಶ್ಯಾಂನಿ ಸುರು ಕೆಲ್ಲೆಂ ನ್ಹಯ್. ಖಂಚ್ಯಾ ಎಕಾ ದಿಸಾ ಸಂಸಾರಾಂತ್ಲ್ಯಾ ಖಂಚಾಯಿ ಸೆಮಿನರಿಥಾವ್ನ್ ಯಾ ಖಂಚಾಯೀ ಕೊವೆಂತಾಥಾವ್ನ್ ಎಕ್ಲೊ ಯಾ ಎಕ್ಲಿ ಭಾಯ್ರ್ ಆಯ್ಲಿ ತವಳ್ ಕಾಥೊಲಿಕ್ ಪವಿತ್ ಸಭೆಚೆ ಕಾಳೆ ದೀಸ್ ಸುರು ಜಾಲೆ.
ಅಶೆಂ ಭಾಯ್ರ್ ಆಯಿಲ್ಲಿಂ/ಆಯಿಲ್ಲೆ ಲಂಯ್ಗಿಕ್ ಪಾಶಾಂವಾಂಚಿ ವೊಡ್ಣಿ ಆನಿ ದಾಂಬ್ಣಿ ಸೊಸುಂಕ್ ಜಾಯ್ನಾಸ್ತಾನಾ ಆಯಿಲ್ಲೆ ನ್ಹಯ್. ಲಂಯ್ಗಿಕತಾ ಮ್ಹಳ್ಳೊ ಪಾಶಾಂವ್ ಮನ್ಶ್ಯಾಚೆಂ ಹಕ್ಕ್ ಆನಿ ಕಸಲೆಂಯಿ ಎಕ್ ಹಕ್ಕ್ ಜ್ಯಾರಿ ಕರಿಜೆ ತರ್ ಸ್ವತಂತ್ರಾಯ್ ಆಸಾಜೆಚ್ ಮ್ಹಳ್ಳೆಂ ತೆ ಜಾಣಾಸ್ಲೆ. ಪುಣ್ ಲಂಯ್ಗಿಕತೆಚ್ಯಾಕಿ ವರ‍್ತೆಂ ಕಾರಾಣ್ ಆಸ್‌ಲ್ಲೆ ಕ್ಲೆರಿಕಾಂನ್ಚೆಂ ಹಿಪೊಕ್ರಿತ್‌ಪಣ್, ವೆವಹಾರಿಕ್ ದೊಡೊ ಖ್ಹೆಳ್ ಆನಿ ಫಟ್ಕಿರೆಂ ನಿಸ್ಕಳ್‌ಪಣ್. ಜಾವ್ಯೆತ್, ಸಾಗೊರಾಂತ್ ಎಕ್ ಥೆಂಬೊ ಕಾಳೆಂ ತೀಂತ್ ಪಡತ್ ತರ್ ಸಾಗೊರ್‌ಚ್ ಕಾಳೊ ಜಾಯ್ನಾ. ಪುಣ್ ಕ್ಲೆರಿಕ್ ಮ್ಹಳ್ಳ್ಯಾ ಸಾಗೊರಾಂತ್ ಎಕ್ ಥೆಂಬೊ ಕಾಳೆಂ ತೀಂತ್ ಪಡತ್ ಜಾಲ್ಯಾರ್ ತೊ ಸಾಗೊರ್‌ಚ್ ಕಾಳೊ ಜಾತಾ.
ಆನಿ ಘಡ್ಲೆಂ ಅಶೆಂಚ್.
ಪುಣ್ ಹ್ಯಾ ಪಯ್ಲೆಂಚಿ ಪರಿಗತ್ ವೆಗ್ಳಿಚ್. ಕ್ಲೆರಿಕ್ ನ್ಹಯ್ ಜಾಲ್ಲ್ಯಾಂಕ್ ಸಾಲ್ವಸಾಂವಾಚಿ ವಾಟ್ ಎಕ್‌ಚ್ ಆಸ್‌ಲ್ಲಿ – ಧಾ ಉಪಾದೆಸ್, ಇಗರ‍್ಜ್‌ಮಾತೆಚೆ ಪಾಂಚ್, ಮೀಸ್-ಕುಮ್ಸಾರ್-ಕುಮ್ಗಾರ್-ತೇರ‍್ಸ್; ದೆವಾಸಾಂವಾಂ, ನೊವೆನಾಂ, ಬರ‍್ಯೊ ಕರ‍್ನ್ಯೊ, ದಯಾಳ್ ಕರ‍್ನ್ಯೊ ಆನಿ ಲಂಯ್ಗಿಕತೆಥಾವ್ನ್ ಪಳಾಪಳ್. ಅಸಲೆಂ ಎಕ್ ಆಫೀಮ್. ಆನಿ ಹೆಂ ಆಫೀಮ್ ತಯಾರ್ ಕರುಂಕ್ ತಯಾರ್ ಆಸ್‌ಲ್ಲೆ ಪವಿತ್ ಸಭೆಂತ್ಲೆ ಕ್ಲೆರಿಕ್, ಭಾವಾರ‍್ಥಾಚೆ ‘ಅಲ್ಕೆಮಿಸ್ಟ್’. ಖಂಚ್ಯಾ ಸಮುದಾಯೆಕ್ ಕಸಲೆಂ ಆಫೀಮ್ ಭರಯ್ಜೆ ಮ್ಹಳ್ಳಿ ವಿಂಚವ್ಣ್ ತೆಚ್ಚ್ ಕರ‍್ತಾಲೆ. ಪವಿತ್ ಗೃಂಥಾಂ ಆನಿ ಬರ್ಪಾಂ ಹಾಣಿಂ ಭಾವಾರ್ಥ್ಯಾಂಚಿ ಹಾತಾಂಕ್/ನದ್ರೆಕ್ ಪಡೊಂಕ್ ಸೊಡ್ಲಿಂ ನಾಂತ್. ತ್ಯಾ ಬರ‍್ಪಾಂತ್ಲ್ಯಾ ಉತ್ರಾಂಕ್ ಹಾಣೀಂ ತಾಂಚೊಚ್ ಅರ್ಠ್ ದಿಲೊ ಆನಿ ಹ್ಯಾ ಅರ್ಥಾಂಚೊ ದಬಾವ್ ವಾಪರ‍್ನ್ ಸರ‍್ವಾಧಿಕಾರ್ ಚಲಯ್ಲೊ.
ಪುಣ್ ಕೆದೊಳ್ ಪರ್ಯಾಂತ್?
ಉಪ್ರಾಂತ್ ಘಡ್‌ಲ್ಲೆಂ, ತುಟ್‌ಲ್ಲೆಂ, ವೊಳಾಲ್ಲೆಂ, ಧುಸ್ಪಟ್‌ಲ್ಲೆಂ, ಭೆಸಾಂ ಜಾಲ್ಲೆಂ, ಪಂಗಡ್ ಜಾಲ್ಲೆಂ, ಭಾವಾರ‍್ಥ್‌ಪಣ್ ಕಾಥೊಲಿಕ್ ಪವಿತ್ ಸಭೆಚ್ಯಾ ಚರಿತ್ರೆಂತ್ ನಾ ಜಾಂವ್ಕ್ ಪುರೊ (ಯಾ ತೆಂ ಸೊಡ್ಲೆ ನಾ ಜಾವ್ಯೆತ್) ಪುಣ್ ಸ೦ಸಾರಾಚ್ಯಾ ಚರಿತ್ರೆಂತ್ ಖಂಚೊನ್ ಉರ‍್ಲೆಂ. ಅಶೆ೦ ವಿಸಾವೊ ಶತಮಾನ್ ಸುರು ಜಾವ್ನ್ ಆಕೇರ್ ಜಾಂವ್ಕ್ ಯೆತಾನಾ ಅಂತುಖುರಿಸಾಚಿಂ ಖುಣಾಂ, ಕೃತ್ಯಾಂ ಜಾವ್ನ್ ರಾಜ್ ಕರುಂಕ್ ಲಾಗ್ಲಿಂ. ಪವಿತ್ರ್ ಗೃಂಥಾಂ ಅಶಿಕ್ಪಿ ಲಾಯಿಕಾಂಚ್ಯಾ ಹಾತಾಂನಿ ಪಡೊಂಕ್ ಸುರು ಜಾಲ್ಲಿಂ ಆನಿ ತಿಂ ವಾಚುನ್ ತಾತಾಂಚ್ಯಾ ಗಿನ್ಯಾನಾಂಕ್ ಸಮ್ಜಾಲ್ಲೆಪರಿಂ ತಿ ಸಮ್ಜತಾನಾ ಭಾವಾರ್ಥ್ಯಾಂಕ್ ಆಪುಣ್ ಕಿತ್ಲೆ ಭಾವಾರ್ಥಿ ಮ್ಹಳ್ಳೆಂ ಕಳಿತ್ ಜಾಲೆಂ. ಹೆ ಕ್ಲೆರಿಕ್ ಖಂಚೆ ರಿತಿರ್ ಕಿತ್ಲೆಶಾ ಶತಮಾನಾಂ ಥಾವ್ನ್ ಆಮ್ಕಾಂ ಮಾಂಕೊಡ್ ನಾಚಯ್ತಾತ್ ಆನಿ ನಾಚಯ್ತೆಚ್ ಆಯ್ಲ್ಯಾತ್ ಮ್ಹಳ್ಳೆಂ ಕಳಿತ್ ಜಾತಾನಾ ಸಂಸಾರಾರ್ ದೆಧೆಸ್ಪ್ರಾಯ್ ಉಟ್ಲಿ.
ಆತಾಂ ಪಾದ್ರಿ ಜಾಂವ್ಕ್ ಗೆಲ್ಲೊ ಪಾಟಿಂ ಆಯ್ಲ್ಯಾರ್ ವಿಸೇಶ್ ನ್ಹಯ್, ಕೊವೆಂತಾತ್ ಆಸ್‌ಲ್ಲಿ ಮಾದ್ರ್ ಗರ್ಭೇಸ್ತ್ ಜಾಲ್ಯಾರಿ ಚಲ್ತಾ. ಭಿಸ್ಪ್, ಆಪ್ಣೆಂಚ್ ಕಿರ್ಲಾಯಿಲ್ಲ್ಯಾ ಭುರ್ಗ್ಯಾಂಕ್ ಪೊಸಿತ್ ತರ್ ಆನಿ ಘುಟ್ ಉಡಸಪೊ ಜಾತಾನಾಟೊಪಿ ಕಾಡಿತ್ ತರ್ ಕಾಂಯ್ಂಚ್ ನವಾಲ್ ನ್ಹಯ್. ಪರಿಣಾಮ್ ಜಾವ್ನ್ ‘ಕ್ರಿಸ್ತ್ ಹಾಂಗಾಸರ್ ಆಸಾ, ಹ್ಯಾ ಕಮ್ರ್ಯಾಂತ್ ಆಸಾ, ತ್ಯಾ ಕೊನ್ಶ್ಯಾಂತ್ ಮ್ಹಣ್ ಕೊಣೆಂಯಿ ಮ್ಹಳ್ಯಾರ್‌ಯಿ ಪಾತಿಯೆನಾಕಾತ್ ಮ್ಹಳ್ಳಿಂ ಕ್ರಿಸ್ತಾಚಿಂ ಉತ್ರಾಂಚ್ ಸತ್ ಜಾಲಿಂ.
ಲಾಯಿಕ್ ಪರಿಪೂರ‍್ಣ್ ರಿತಿರ್ ಧುಸ್ಪಟ್ಲೆ.
ಯುವಜಣಾಂಕ್ ಠಾವ್‌ಠಿಕಾಣೆಂ ನಾ ಜಾಲೆಂ. ಲಂಯ್ಗಿಕ್ ಅಕ್ರಮಾ, ಮಾದಕ್ ವಕ್ತಾಂ, ಖುನ್, ಗರ್ಭಾಪಾತ್ ಆನಿ ಲೂಟ್-ದೊಂಬಿ, ಮಾರಾಮಾರಿ ಸದಾಂಚಿ ಜಾಲಿ.
ಪುಣ್ ಎಕ್ ನವೆಂ ಲ್ಹಾರ್ ಸಮಾಜೆಂತ್ ಉಟ್ಲೆಂ – ಭಾವಾರ್ಥಾಚೆಂ ಪುನರುಥಾನ್. ದಶಕಾಂ, ಶತಕಾಂಥಾವ್ನ್ ಭಾವಾರ್ತಾಚ್ಯಾ ಆಲ್ಕೆಮಿಸ್ಟಾಂನಿ ಖಿರಯಿಲ್ಲೆಂ ಆಫೀಮ್ ಪಿಯೆವ್ನ್, ಪಿಯೆವ್ನ್ ಲಾಗಾನಾ (ನಾಟ್ವಾನಾ) ಜಾಲೆಂ ಕಿತ್ಯಾಕ್ ಆಫೀಮ್ ಭರಯ್ತೆಲ್ಯಾಂಚೆರ್ ತಾಂಕಾಂ ಪಾತ್ಯೆಣಿ ಉಬ್‌ಲ್ಲಿ. ಪುಣ್ ಖಂಚಾಯಿ ಆಫೀಮಾಕ್ ಸವಯೆಚೆ ಜಾಲ್ಲ್ಯಾಂಕ್ ಕೊಂಡಾಂತ್ಲೆಂ ಸುಟೊಂಕ್ ಅಸಾದ್ಯ್. ಹಿ ಪರಿಗತ್ ತುಕುನ್ ಪಳೆಲ್ಲ್ಯಾ ಥೊಡ್ಯಾ ಶಾಣ್ಯಾಂನಿ ತಕ್ಲಿ ಖರ್ಚಿಲಿ. ಆಫೀಮ್ ದಿತೆಲೆ ಉಣೆ ಜಾಲ್ಲೆ. ಸೆಮಿನರಿ, ಕೊವೆಂತಾಂ ರಿತಿಂ ಪಡ್ಲಿಂ.
ಹಾಂಗಾಸರ್ ಉದೆಲೆಂ ಭಾವಾರ್ಥಾಚೆಂ ಪುನರುಥಾನ್. ಎಕ್ ಶೆಂಬರ್ ಠಕ್ಕೆ ವಹಿವಾಟೀ ದಂದೊ, ಕ್ರಿಸ್ತಾಚ್ಯಾ ನಾಂವಾನ್. ಕಾಥೊಲಿಕ್ ಪವಿತ್ ಸಭಾ ಫಾಸಾಳ್ಳಿ.
ತಾರ‍್ವಾಕ್ ಉಜೊ ಪೆಟ್‌ಲ್ಲ್ಯಾ ವೆಳಾರ್ ತಾರ್ವಾಚ್ಯಾ ಸಾಂದಿ ಮುಲ್ಯಾಂನಿ ರಾಜ್ ಕರುನ್ ಆಸ್ಚೆ ಉಂದಿರ್ ಜೀವ್ ಹಾತಾಂತ್ ಧರುನ್ ಧಾಂವ್ಚೆಪರಿಂ ಲಾಯಿಕಾಂಕ್ ದಿಸ್‌ಲ್ಲ್ಯಾ, ಮೆಳುಲ್ಲ್ಯಾ ಪಂಗ್ಡಾಂನಿ ರಿಗ್ಲೆ. ಪವಿತ್ ಗೃಂಥಾಂಚ್ಯೊ ನವ್ಯೊ ನವ್ಯೊ ಆವೃತ್ಯೊ ಆಯ್ಲ್ಯೊ. ದಿಸಾಕ್ ಎಕಾ ಲೆಕಾನ್ ಪಂಗಡ್ ಉದೆಲೆ. ಸೆರ್ವಾತಾನಾ ಬ್ರದರ್ ಆಸ್‌ಲ್ಲೊ ಫಾಲ್ಯಾಂ ರೆವೆರೆಂಡ್ ಜಾಲೊ; ಪೊರ‍್ವಾಂ ಭಿಸ್ಪ್ ಜಾಲೊ ಆನಿ ಉಪ್ರಾಂತ್ ಕಿತೆಂ ಕಿತೆಂ ರೆಂಕಾಂ ಘೆಂವ್ಕ್ ಲಾಗ್ಲೊ. ಹ್ಯಾ ಸರ್ವಾಂಲಾಗಿಂ ಎಕ್ ಹಾತೆರ್ ಆಸ್‌ಲ್ಲೆಂ-ಸಂಸಾರಾಂತ್ಲ್ಯಾ ಮಾನವಿಕ್ ಸಮಸ್ಯಾಂಕ್ ಪರ‍್ಯಾರ್ ನ್ಹಯ್ ತರೀ ಕಾನ್ ದೀಂವ್ಕ್ ವೇಳ್. ಸಾಂಗಾತಾಚ್ಭಲಾಯ್ಕಿ ಪಾಟಿಂ ಹಾಡ್ಚ್ಯಾ ಮಾಗ್ಣ್ಯಾ ಜಮಾತಿಂಕ್ ಲೇಕ್‌ಚ್ ನಾ ಜಾಲೆಂ. ಜೆಜು ಆಪಯ್ತಾ, ಜೆಜು ಉಲಯ್ತಾ, ಜೆಜು ಆರಾಯ್ತಾ, ಜೆಜು ಭುಜಯ್ತಾ, ಹಿಂ ಮಂತ್ರ್ ವಾಕ್‌ಯಾಂ ಘೆವ್ನ್ ಉದೆಲ್ಲ್ಯಾ ಹ್ಯಾ ಫಟ್ಕಿರ‍್ಯಾ ಫ್ರೊಫೆತಾಂಚೆಂ ಆಫೀಮ್ ಪಾಟಿಂ ಫುಡೆಂ ಪಳೆನಾಸ್ತಾಂ ಲೊಕಾಚ್ಯಾ ಧರ‍್ಮಿಕ್ ತಾಳ್ಯಾಂನಿ ದೆಂವ್ಲೆಂ.
ನವ್ಯಾ, ನವ್ಯಾ ಅಲ್ಕೆಮಿಸ್ಟಾಂಚಿ ಸಂತತ್ ವಾಡ್ಲಿ ಆನಿ ಚಡ್ಲಿ. ಸಂಸಾರಾಚ್ಯಾ ಪ್ರಬಲ್ ರಾಶ್ಟ್ರಾಂಥಾವ್ನ್, ಕ್ರಿಸ್ತಾಂವ್ ರಾಶ್ಟ್ರಾಂಥಾವ್ನ್ ಚಡ್ ಕರುನ್, ಅಮೆರಿಕಾ, ಇಂಗ್ಲೆಂಡ್ ಆನಿ ಅಕ್ಖ್ಯಾ ಯುರೋಪಾಥಾವ್ನ್ ಹಾಂಚಿಂ ಕೇಂದ್ರಾಂ ಸಗ್ಳ್ಯಾ ಸಂಸಾರಾರ್ ಭಾವಾರ್ಥಾಚೆಂ ಪುನರುಥಾನ್ ಪ್ರಗಟ್ ಕರುಂಕ್ ಲಾಗ್ಲಿಂ. ಹಾಂಕಾಂ ರೇಡಿಯೊಂಚೆರ್, ಟಿ.ವೀ-ಂಚೆರ್ ‘ಸ್ಲೊಟ್’ ಮೆಳ್ಳೆ. ಹಾಂಣೀ ಯೆಕ್ಟಾಂಯ್ ಕೆಲ್ಲೆಂ ಧನ್ ಇತ್ಲೆಂ ಆಸ್‌ಲ್ಲೆಂ, ಥೊಡ್ಯಾಂನಿ ತಾಂಚಿಂಚ್ ರೇಡಿಯೊ ಆನಿ ಟಿ.ವಿ.ಸ್ಟೇಶನಾಂ ಉಘಡ್ಲಿಂ. ಹಾಂಕಾಂ ಪಾಟಿಂಬೊ ದಿತೆಲ್ಯಾಂಕ್, ತಾಂಚೆಂ ಮಿಸಾಂವ್ ತಾಂಚ್ಯಾ ನೇಮಾಂ ಪ್ರಕಾರ್ ಪ್ರಸಾರ್ ಕರ‍್ತೆಲ್ಯಾಂವ್ – ಸಂಸಾರಾಚ್ಯಾ ಖಂಚಾಯೀ ಮುಲ್ಯಾಂತ್ ತೆ ಆಸ್ಲ್ಯಾರಿ – ಆರ್ಥಿಕ್ ಸಸಾಯ್, ತಾಂಚ್ಯಾ ಭುರ್ಗ್ಯಾಂಕ್ ಉತ್ತೀಮ್ ವಿದೇಶಿ ಶಿಕಪ್ ಆನಿ ವಿದೇಶಿ ನಿವಾಸ್ ಸಯ್ತ್ ಲಾಬ್ತಾಲೊ.ಸಂಸಾರಾರ್ ಮಾಫಿಯಾ ಆನಿ ಫ್ರೀಮೇಜನ್ಸಾಂಚೆಂ ಭಾವ್-ಬಾಂದವ್ಪಣ್ ವಿಸ್ತಾರ್‌ಲ್ಲೆಪರಿಂ ಭಾವಾರ್ಥಿಂಚಿ ಹಿ ಮಾಫಿಯಾ ಕಾತೊಲಿಕ್ ಪವಿತ್ ಸಭೆಕ್ ಕೆನ್ಸರ್ ಲಾಗಂವ್ಕ್ ಪಾವ್ಲಿ.
ಹ್ಯಾ ಮಾಫಿಯಾಂತ್ ಆಸ್ಚೆ ಮನಿಸ್ ಮಾನಸಿಕ್, ಧಯ್‌ಹಿಕ್ ಆನಿ ಹೆರ್ ಕಸಲಿಯಿ ರೀತ್ ಅಸ್ಲ್ಯಾರ್ ತಾಂತುಂಯಿ ಧುಸಪಟ್‌ಲ್ಲೆಚ್. ನಿರಾಶೆಕ್, ಎದೆಸ್ಪ್ರಾಯೆಕ್ ಆನಿ ಸಲ್ವಣೆಕ್ ಥಾಂಬಂವ್ಕ್ ಹೆರ್ ಕಸಲಿಚ್ ವಾಟ್ ನಾತ್‌ಲ್ಲ್ಯಾ ವೆಳಾರ್ ಹಾಂಣೀಂ ಹಿ ವಾಟ್ ಧರ್‌ಲ್ಲಿ. ಉಲವ್ಪಾಂಚೀಂ ಆನಿ ನಟನಾಂಚಿಂ ದೆಣಿಂ ಸಭಾವಿಕ್ ರಿತಿಂನಿ ಆಸ್‌ಲ್ಲಿಂ ಪುಣ್ ನಾತ್‌ಲ್ಲ್ಯಾಂನಿ ತಿಂ ಜಿಕುನ್ ಘೆತ್ಲಿಂ, ಸೆಮಿನರಿಸ್ತಾಂನಿ ಶೆರ್ಮಾಂವ್ ದಿಂವ್ಚಿ ವಿದ್ಯಾ ಜಿಕುನ್ ಘೆತ್‌ಲ್ಲೆಪರಿಂ. ತ್ಯಾ ಉಪ್ರಾಂತ್‌ಯಿ ಪ್ರಭಾವಿಕ್ ಹಂತಾಂಕ್ ಪಾವನಾತ್‌ಲ್ಲ್ಯಾಂನಿ ಗಿತಾಂ-ಕಂತಾಂರಾಂಚ್ಯೊ ಕೆಸೆಟಿ ಕಾಡ್ಲ್ಯೊ., ತಾಂಚ್ಯಾ ಪ್ರಸಂಗಾಚ್ಯೊ ವೀಡಿಯೊ ಕೆಸೆಟಿ ತಯಾರ್ ಕೆಲ್ಯೊ ಆನಿ ಫುಂಕ್ಯಾಕ್‌ಚ್ ವಿತರಣ್ ಕೆಲ್ಯೊ.
ಇರಾಕ್, ಇರಾನ್, ಲಿಬಿಯಾ, ಸಾವ್ದಿ ಅರೇಬಿಯಾ ತಸಲ್ಯಾ ರಾಶ್ಟ್ರಾಂನಿ ಭಾವಾರ್ಥಾಚ್ಯಾ ನಾಂವಾನ್ ಝಿಹಾದಾಂ, ಝುಜಾಂ, ರಗ್ತಾಪಾತ್, ಖುನಿಯೊ, ಅತ್ಯಾಚಾರ್ ಆನಿ ಹೆರ್ ಇತರ್ ಚಲ್ತಾನಾ ಹಾಂಗಾಸರ್ ಪುನರುಥಾನಾಚ್ಯಾ ನಾಂವಾಂನ್ ಫಟ್ಕಿರೆ ಪ್ರೊಫೆತ್ ಆನಿ ತಾಂಚೆ ಪಾಟ್ಲಾವಿ ಗ್ರೇಸ್ತ್ ಜಾಲೆ. ಸಾದೊ-ಬೊಳೊ ಆನಿ ಅಶಿಕ್ಪಿ ಭಾವಾರ್ಥಿ ಹ್ಯಾ ನವ್ಯಾ ನವಾಲಾಂತ್ ಬುಡೊನ್ ಗೆಲೊ.
ಆತಾಂ-ರೆವೆರೆಂಡ್ ಫ್ರೆಡ್ ಟೇಯ್ಲರ್ ಆಯಿಲ್ಲೊ.
ತಾಂಕಾಂ ಸಲ್ವವಂವ್ಕ್ ಜಾಯ್ನಾ ತರ್, ತಾಂಚೆ ಸಾಂಗಾತಾ ಮೇಳ್ ಮ್ಹಳ್ಳ್ಯಾ ಸಾಂಗ್ಣೆಪರಿಂ ಅಕ್ಷರಾನ್ ಅಕ್ಷರ್ ಪಾಳ್ತಾಲೊ ದಿಯೆಸೆಜಿಚ್ಯೊ ಭಿಸ್ಪ್ ರಾಯ್ಟ್ ರೆವೆರೆಂಡ್ ವೊಲ್ಟರ್ ಸಾಂತುಮಾಯೆರ್ ದೆ ಬಿರಿತೊ. ಸ್ಥಳೀಯ್ ಪ್ರೊಫೆತಾಂನಿತಾಚೆ ದಿಯೆಸೆಜಿಂತ್ ಮಾಗ್ಣ್ಯಾ ಜಮಾತಿ ಚಲಂವ್ಕ್ ತಾಣೆ ಯೆದೊಳ್‌ಚ್ ಪರ್ವಣ್ಗಿ ದಿಲ್ಲಿ. ಸಬಾರ್ ಜಮಾತಿ ಚಲ್‌ಲ್ಲ್ಯೊ. ಆನಿ ಬಾರಾ-ಥಾವ್ನ್, ಪಂದ್ರಾ ಹಜಾರ್ ಪರ್ಯಾಂತ್ ‘ಭಾವಾರ್ಥಿ’ ಜಮ್ತಾಲೆ. ಆನಿ ದೀಸ್‌ಭರ್ ಎಕ್ ಸುಕೊ ಉಂಡೊ ಜಾವ್ನ್ ಉದಕ್ ಪಿಯೆವ್ನ್ ಪ್ರಸಂಗಾಂ ಆಯ್ಕಾತಾಲೆ. ಸ್ಪಿರಿತ್ ಸಾಂತಾಕ್ ಬೊಬೊ ಘಾಲ್ನ್ ಸಾಕ್ಸ್ ದಿತಾಲೆ ಆನಿ ಆಮಿ ಸರ್ವ್ ಪಿಡೆಂಥಾವ್ನ್ ಮುಕ್ತ್ ಜಾಲ್ಯಾಂವ್ ಮ್ಹಣ್ ಹರ್ಧೆಂ ಪಟುನ್ ಘರಾ ವೆತಾಲೆ. ಮಾನಸಿಕ್ ದುರ್ಬಳಾಯೆಚೆ ಹೆ, ಜಮಾತ್ ಆಕೇರ್ ಜಾಲ್ಯಾ ಉಪ್ರಾಂತ್ ಘಡಿಯೆ ಭಿತರ್ ಪಿಗಳ್ತಾಲೆ. ಆನಿ ಪ್ರೊಫೆತ್ ನಾತ್‌ಲ್ಲ್ಯಾನ್ ಪಿಶ್ಯಾಂಚ್ಯಾ ಆಸ್ಪತ್ರೆಂನಿ ಯಾ ಆಧುನಿಕ್ ಮೆಂಟಲ್ ನರ್ಸಿಂಗ್ ಹೋಮಾಂನಿ ಆಧುನಿಕ್ ಚಿಕಿತ್ಸಾ ಜೊಡ್ಟಾಲೆ ಪುಣ್ ಘುಟ್ ಸೊಡಿನಾತ್‌ಲ್ಲೆ. ತಾಂಚೆ ವೋಟ್ ಧಾಂಪಂವ್ಕ್ ಹ್ಯಾ ಪ್ರೊಫೆತಾಂನಿ ಫಾವೊತಿ ರಟ್ಟ್ಯಾ ಸಕತ್ ತಯಾರ್ ಕರುನ್ ದವರಿಲ್ಲಿ – ವ್ಹಡ್ ವ್ಹಡ್ ಕುಟ್ಮಾಂತ್ಲ್ಯಾ ಆನಿ ಕರೊಡಾಂನಿ ಧನ್ ಪುಂಜಾಯಿಲ್ಲ್ಯಾ ಹ್ಯಾ ಭಾವಾರ್ಥ್ಯಾಂನಿ ಪ್ರೊಫೆತಾಂಲಾಗಿಂ ಕೆಲ್ಲಿ ಕುಮ್ಸರಾಂ ವಿಡಿಯೊ ಕೆಸೆಟಿಂಚೆರ್ ರೆಕೊರ‍್ಡ್ ಜಾತಾಲಿಂ. ಆನಿ ಖಂಯ್ ಪುಣಿ ಎಕ್ಲೊ ಹ್ಯಾ ಫಟ್ಕಿರ‍್ಯಾ ಪ್ರೊಫೆತಾಂಚೆಂ ಭಾಂಡೆ ಫುಟಂವ್ಚಿ ಕುಸ್ಕುಟ್ ಆಲೋಚನ್ ಕರಿತ್ ತರ್ ತಾಚೆರ್ ಬ್ಲ್ಯಾಕ್‌ಮೇಯ್ಲ್ ಚಲ್ತಾಲೆಂ
ಹೆಂ ಸರ್ವ್, ಪವಿತ್ ಸಭಾ ಪಯ್ಶಿಲ್ಯಾನ್ ಪಳೆತಾಲಿ ಪುಣ್ ಕಿತೆಂಚ್ ಕರುಂಕ್ ಸಕಾನಾತ್‌ಲ್ಲಿ. ವಿರೋದ್‌ಪಣ್ ದಾಕಯ್ಲ್ಯಾರ್ ಇರಾನಾಂತ್ ಉದೆಲ್ಲಿ ಪರಿಗತ್ ಉದೆಂವ್ಚಿ ಸಾದ್ಯತಾಯ್ ಆಸ್‌ಲ್ಲಿ. ಎಕಾ ಆಯಿನ್ನ್ ದಿಸಾ ಎಕ್ ಪಂಗಡ್ ಉಟ್ತಲೊ ಆನಿ ಹಾತೆರಾಂ ಘೆವ್ನ್ ಮ್ಹಣ್ತೊಲೊ – ಆಮಿ ಮಾತ್ರ್ ಕ್ರಿಸ್ತಾಚೆ ಖರೆ ಪಾಟ್ಲಾವಿ, ಆಮಿ ಮಾತ್ರ್ ಖರೆ ಭಾವಾರ್ಥಿ. ಹೆರ್ ಸರ್ವ್ ಹೆ ‘ಖಾಫರ್’, ಫಟ್ಕಿರೆ…ತಾಂಕಾಂ ಕಾತರ‍್ಯಾಂ ಆನಿ ನವೆಂ ಜೀವಿತ್ ದಿವ್ಯಾಂ, ಹಾಂಣಿ ಆಮ್ಚ್ಯಾ ಹಾತಾಂನಿ ಮೆಲ್ಯಾರ್ ಮಾತ್ರ್ ತಾಂಕಾಂ ಸರ್ಗಿಂಚೆಂ ಸುಖ್ ಮೆಳ್ತಾ ಮ್ಹಣ್ ಭಾಸಾವ್ಯಾಂ.
ಆನಿ ಹ್ಯಾಚ್ ಬಿರಾಂತೆಕ್ ಲಗುನ್ ಭಿಸ್ಪ್ ರಾಯ್ಟ್ ರೆವೆರೆಂಡ್ ವೊಲ್ಟರ್ ಸಾಂತುಮಾಯೆರ್ ದೆ ಬಿರಿತೊ ಆಯ್ಚೆ ಸಾಂಜೆರ್ ಆಪ್ಲ್ಯಾ ಪುರ‍್ತ್ಯಾ ದಳ್ಬಾರಾನ್ ಆಯಿಲ್ಲೊ…..
ಭದ್ರ್ ಕೆಬಿನಾಚೆಂ ದಾರ್ ಉಗ್ತೆಂ ಜಾಲೆಂ
ಸ್ಟೆನ್ನ್‌ಗನ್ನ್ ಘೆವ್ನ್ ದೋಗ್ ರಾಕ್ವಲಿ ಭಿತರ್ ರಿಗೊನ್ ದಾರ್ವಾಟ್ಯಾಚ್ಯಾ ಹೆವ್ಶಿನ್-ತೆವ್ಶಿನ್ ಶಿಸ್ತೆನ್ ರಾವ್ತೆಚ್ ತೊ – ರೆವೆರೆಂಡ್ ಫ್ರೆಡ್ ಟೇಯ್ಲರ್ – ದಾರ್ವಾಟ್ಯಾಚ್ಯಾ ಫ್ರೇಮಾಂತ್ ಉದೆಲೊ.
ರೆವೆರೆಂಡ್ ಫ್ರೆಡ್ ಟೇಯ್ಲರ್.
ಪಯ್ಲೊ ಉಬೊ ಜಾಲೊ – ಜೆರೊಮ್ ಲಾಜ್ರಾ.
ಹೆರಾಂ, ಉಪ್ರಾಂತ್ ಉಬಿಂ ಜಾಲಿಂ, ರಮೋನಾ ನಿಮಾಣೆ.
‘ಪವಿತ್ ಅತ್ಮ್ಯಾನ್ ತುಮ್ಕಾಂ ಆಪಯ್ಲಾಂ!’ ಮ್ಹಣಾಲೊ ಟೇಯ್ಲರ್, ಆಪ್ಲೆ ಹಾತ್ ಖುರ್ಸಾ ರುಪಾರ್ ವಿಸ್ತಾರೊನ್. ‘ಪವಿತ್ ಅತ್ಮ್ಯಾನ್ ತುಮ್ಕಾಂ ಆಪಯ್ಲಾಂ’ ತಾಣೆ ಪರ್ತ್ಯಾನ್ ಉಚಾರ್ಲೆಂ. ತಾಚೊ ತಾಳೊ ಬಳಿಷ್ಟ್ ತರೀ ಮಾಂತ್ರಿಕಾಚ್ಯಾ ತಾಳ್ಯಾಪರಿಂ ಪೊಕೊಳ್ ಜಾವ್ನಾಸ್‌ಲ್ಲೊ.
‘ಪವಿತ್ ಅತ್ಮ್ಯಾನ್ ತುಮ್ಕಾಂಯಿ ಆಪಯ್ಲಾಂ!’ ಸರ್ವಾಂನಿ ಎಕಾ ತಾಳ್ಯಾನ್ ಜಾಪ್ ದಿಲಿ. ಟೇಯ್ಲರಾನ್ ಇಸಾರೊ ದಿತೆಚ್ ರಾಕ್ವಲಿ ಭಾಯ್ರ್ ಗೆಲೆ ಆನಿ ಕೆಬಿನಾಚೆಂ ದಾರ್ ಧಾಂಪ್ಲೆಂ. ಕೆಬಿನಾಂತ್ ಎರ್‌ಕಂಡೀಶನರಾಚೊ ಆವಾಜ್ ಸೊಡ್ಲ್ಯಾರ್ ಹೆರ್ ನಾತ್‌ಲ್ಲೊ.
‘ದಯಾ ಕರುನ್, ಬಸಾ,’ ಹುಕುಮ್ ದಿಲಿ ಟೇಯ್ಲರಾನ್.
ತಾಚೆಂ ವೆಕ್ತಿತ್ವ್ ಜೆರೊಮಾನ್ ಆನಿ ಹೆರಾಂನಿ ತಸ್ವೀರ‍್ಯಾಂನಿ ಪಳೆಲ್ಲ್ಯಾಪರಿಂಚ್ ಆಸ್‌ಲ್ಲೆಂ. ಉಂಚಾಯ್ ಕಾಂಯ್ ಸ ಫುಟ್, ಬಾರೀಕ್ ಪುಣ್ ಅಕಂಡ್ ಜೀವ್. ಮುಕಮಳಾರ್ ದೊಳೆ ಮಾತ್ರ್ ದಿಸ್ತಾಲೆ. ಮುಕಮಳಾಚೊ ಹೆರ್ ವಾಂಟ್ ಘಣ್ಣ್ ಕೆಸಾಂನಿ ಆನಿ ಖಾಡಾನ್ ಲಿಪೊನ್ ಗೆಲ್ಲೊ. ಲಾಂಬ್ ದಗ್ಲೊ ತಾಣೇ ಘಾಲ್ಲೊ. ಹಾತಾಂಕ್ ಲುಂವಾಂ ಆನಿ ಪಾಯಾಂಕ್ ಮೊಚೆ. ತಾಚ್ಯಾ ಕುಡಿಚೊ ಖಂಚೊಯಿ ಭಾಗ್, ಮಾತೆಂ ಸೊಡ್ಲ್ಯಾರ್, ದಿಸಾನಾತ್‌ಲ್ಲೊ.
ಜಮೊ ಬಸ್ಲೊ.
‘ಮ್ಹಜೆಂ ಹೆಂ ರೂಪ್ ಹಾಂವ್ ಕ್ರಿಸ್ತಾಚ್ಯಾ ರುಪಾಕ್ ತಾಳ್ ಕರ‍್ಚೆಂ ಪ್ರೇತನ್ ಕರಿನಾ.’ ತಾಣೆ ಮ್ಹಳೆಂ. ‘ಪುಣ್ ಅಶೆಂ ನ್ಹೆಸಜೆ ಮ್ಹಣ್ ಪವಿತ್ರ್ ಅತ್ಮ್ಯಾನ್ ಮ್ಹಾಕಾ ಸಾಂಗ್ಲಾಂ, ಹುಕುಮ್ ದಿಲ್ಯಾ. ಪವಿತ್ ಅತ್ಮ್ಯಾನ್ ಆಮ್ಕಾಂ ಆಪಯ್ಲಾಂ.’
‘ಪವಿತ್ ಅತ್ಮ್ಯಾನ್ ಆಮ್ಕಾಂ ಆಪಯ್ಲಾಂ!’ ಜಮ್ಯಾನ್ ಜಾಪ್ ದಿಲಿ. ಭಾಯ್ಲ್ಯಾನ್, ಗಿತಾಂ-ಸಂಗೀತ್-ಗಾಯಾನ್ ಸುರು ಜಾಲೆಂ. ಪವಿತ್ರ್ ಅತ್ಮ್ಯಾನ್ ಆಮ್ಕಾಂ ಆಪಯ್ಲಾಂ ಮ್ಹಳ್ಳೆಂ ಹರ್‌ಯೆಕಾ ಶ್ಲೋಕಾ ಪಾಟ್ಲ್ಯಾನ್ ಆಯ್ಕಾತಾಲೆಂ.
‘ಆಮಿ ಪಯಿಲ್ಲೆ ಪಾವ್ಟೀಂ ಭೆಟ್‌ಚೆಂ’ ಟೇಯ್ಲರ್ ಮ್ಹಣಾಲೊ. ‘ಪವಿತ್ ಅತ್ಮ್ಯಾಚೆ ಸಕ್ತೆನ್.’ ದೋನ್-ತೀನ್ ಖಿಣಾಭರ್ ತಾಣೆ ಆಪ್ಲೆ ದೊಳೆ ಘಟ್ಟ್ ಧಾಂಪ್ಲೆ. ‘ತುಮ್ಚೆರ್ ಪವಿತ್ ಅತ್ಮೊ ದೆಂವ್ಚ್ಯಾರ್ ಆಸಾ ಮ್ಹಲ್ಳೆಂ ತುಮಿ ಹಾಂಗಾಸರ್ ಕೆಲ್ಲ್ಯಾ ತಯಾರಾಯೆಂತ್‌ಚ್ ಕಳ್ಟಾ.’
ತಾಣೆ ಪರ್ತ್ಯಾನ್ ಹಾತ್ ವಿಸ್ತಾರ್ಲೆ.
‘ತುಮೆ ಮಧೆಗಾತ್ ಮೊನೆಪಣಿ ಕಷ್ಟೊಂಚೊ ಎಕ್ಲೊ ಭಾವ್ ಆಸಾ.’ ತಾಣೆ ಮಾತೆಂ ಸರ್ಗಾಕ್ ಉಬಾರ‍್ಲೆಂ. ‘ಕಿತ್ಯಾಕ್ ತುಮಿ ಯೆದೊಳ್ ಪರ್ಯಾಂತ್ ತಾಕಾ ಕುಮಕ್ ಕರುಂಕ್ ನಾ?’
ತಿಂ ತೆಗಾಂಯಿ ಯೆಕ್ಲ್ಯಾಕ್‌ಚ್ ಪಳೆತಾಲಿಂ-
ಜೆರೊಮ್ ಲಾಜ್ರಾ. ತಾಚಿ ಕೂಡ್ ಬಾರೀಕಾಯೆನ್ ಕಾಂಪ್ತಾಲಿ. ರಮೋನಾನ್ ಪಳೆಲೆಂ ಮ್ಹಣ್ ಮಾವ್ರಿಸಾನ್ ಪಳೆಲೆಂ ಆನಿ ತಾಣಿ ಪಳೇಲೆಂ ಮ್ಹಣ್ ಭಿಸ್ಪಾನ್ ಪಳೆಲೆಂ. ಜೆರೊಮ್, ಆಪ್ಲೆ ಹಾತ್ ಆಪ್ಲ್ಯಾಚ್ ಜಾಂಗಾಂ ಮದೆಂ ರಿಗವ್ನ್ ಬಸ್‌ಲ್ಲೊ.
‘ಕಿತ್ಯಾಕ್ ಕಾಂಪ್ತಾಯ್ ಭಾವಾ, ಜೆರೊಮ್?’ ಟೇಯ್ಲರಾನ್ ವಿಚಾರ‍್ಲೆಂ. ಹ್ಯೆ ಪಾವ್ಟಿಂ ತುಂ ಜಯ್ತೆವಂತ್ ಜಾತೊಲೊಯಿಚ್ ಕಿತ್ಯಾಕ್ ಪವಿತ್ ಅತ್ಮ್ಯಾನ್ ಆಪಯ್ಲಾಂ, ಫಕತ್ ತುಕಾ ನ್ಹಯ್ ಪುಣ್ ಆಮ್ಕಾಂ ಸರ‍್ವಾಂಕ್‌ಯಿ.’ ದೋನ್ ಮೆಟಾಂ ಮುಕಾರ್ ಸರೊನ್ ತಾಣೆ ಜೆರೊಮಾಚ್ಯಾ ಮಾತ್ಯಾರ್ ಆಪ್ಲೆ ಹಾತ್ ದವರ‍್ಲೆ. ‘ಹಿ ಜಮಾತ್ ಸಂಪ್ಚ್ಯಾ ಪಯ್ಲೆಂ ತುಂ ಪವಿತುತ್ಮ್ಯಾಕ್ ಸಾಕ್ ದಿತೊಲೊಯ್!’
ಜೆರೊಮ್ ಕಸ್ಕಸೋನ್ ರಡ್ಲೊ ಆನಿ ಟೇಯ್ಲರಾಚೆ ಹಾತ್ ತಾಣೆ ಆಪ್ಲ್ಯಾ ಹಾತಾಂನಿ ಘೆತ್ಲೆ.
‘ತುಂಚ್ ಮ್ಹಜೊ ಸೊಡ್ವಣ್ದಾರ್!’ ತಾನೆ ಮ್ಹಳೆ. ‘ತುಂವೆಂಚ್ ಮ್ಹಜ್ಯಾ ಅತ್ಮ್ಯಾಕ್ ಸಾಲ್ವರ್ ಕರಿಜೆ.’
‘ತಾಚೆರ್ ಪಾತ್ಯೆ ಆನಿ ಪವಿತ್ ಅತ್ಮ್ಯಾಚೆರ್ ಭರ್ವಸೊ ದವರ್. ದೊಗೊರ್‌ಚ್ ತುಜಿ ವಾಟ್ ಸಾಫ್ ಕರ‍್ತೆಲೆ ಆನಿ ತುಜ್ಯಾ ವಾಟೇವಯ್ಲೆ ಉಟ್ಟೆಲೆ.’ ಪಾಟಿಂ ಸರೊನ್, ಟೇಯ್ಲರ್ ಆಪ್ಲೆ ಬಸ್ಕೆಚೆರ್ ಬಸ್ಲೊ.
‘ಹಾಂವ್ ಸೊಡ್ವಣ್ದಾರ್ ನ್ಹಯ್ ಪುಣ್ ಫಕತ್ ತಾಚೆಂ ಎಕ್ ಹಾತೆರ್.’ ಲುಂವಾಂ ಘಾಲ್ಲೆ ಆಪ್ಲೆ ಹಾತ್ ಟೇಯ್ಲರಾನ್ ಯೆಕಾಮೆಕಾಂತ್ ಧರ‍್ಲೆ. ತಾಚೆ ದೊಳೆ ಸರ‍್ವಾಂಚೆರ್ ಚರ‍್ಲೆ.
‘ತುಕಾ ಹಾಂವೆಂ ಖಂಯ್ಸರ್‌ಗಿ ಪಳೆಲಾ!’ ಮ್ಹಣಾಲೊ ಜೆರೊಮ್. ‘ತುಜ್ಯಾ ಹ್ಯಾ ದೊಳ್ಯಾಂಕ್ ಪಳೆಲಾಂ.’
‘ಪವಿತ್ ಅತ್ಮೊ ಸಗ್ಳ್ಯಾನ್‌ಯಿ ಆಸಾ!.’ ಮ್ಹಣಾಲೊ ಟೇಯ್ಲರ್, ಆಪ್ಲೆ ದೊಳೆ ಮಾದಕತೇನ್ ಭರ್ಲೆಲೆಪರಿಂ ಅಶೀರ್ ಕರುನ್. ‘ಹಾಂವ್ ಫಕತ್ ತಾಚೆಂ ಎಕ್ ಹಾತೆರ್ ಮಾತ್ರ್.’
‘ಪುಣ್ ತುಕಾ ಮ್ಹಜೆ ವಿಶಾಂತ್ ಕಶೆಂ ಕಳ್ಳೆಂ?’
‘ಸವಲಾಂ, ಸವಾಲಾಂಚ್ ಜಾವ್ನ್ ಉರೊಂದಿತ್, ಮ್ಹಜ್ಯಾ ಭಾವಾ,’ ಆಪ್ಲೆ ಹಾತ್ ಪರತ್ ಉಬಾರೋನ್ ತಾಣೆ ಮ್ಹಳೆಂ. ‘ಸವಲಾಂ ವಿಚಾರಿನಾಸ್ತಾಂಚ್ ಜಾಪಿ ಮೆಳ್ಟಾನಾ ತುಕಾ ಕಸಲಿ ಖಂತ್?’
ಜೆರೊಮಾನ್ ಹಾತ್ ಜೊಡ್ಲೆ.
‘ಯುವಜಣಾಂಕ್ ವೆವಸ್ಥಾ ತುಂವೆಂ ಬರ‍್ಯಾನ್ ಕೆಲ್ಯಾತ್ ಮ್ಹಣ್ ಜಾಣಾಂ ಆನಿ ತಿ ಪಳೆತ್ತ್ ಹಾಂವ್ ಆಸಾಂ, ರಮೋನಾ!’ ಟೇಯ್ಲರಾನ್ ಮ್ಹಳೆಂ, ರಮೋನಾಚೆ ದೊಳೆ ಧರುನ್; ಆದಿಂಥಾವ್ನ್ ಪರಿಚಯ್ ಆಸ್‌ಲ್ಲ್ಯಾಕ್ ಪಳೆಯಿಲ್ಲೆಪರಿಂ. ‘ಪುಣ್ ತುಜ್ಯಾ ಮುಕಮಳಾರ್ ಆಸ್ಡ್ವೆ‌ಉಬೆ ಘಾಂಚ್ ಕಿತ್ಯಾಕ್?’
ರಮೋನಾನ್ ಜಾಪ್ ದಿಲಿ ನಾ.
‘ತುಜೆಲಾಗಿಂ ಜಾಪ್ ನಾ ದೆಕುನ್ ತುಂ ಜಾಪ್ ದೀನಾಂಯ್.’ ತಾಣೆ ಮ್ಹಳೆಂ, ರಮೋನಾವಯ್ಲಿ ದೀಷ್ಟ್ ಕಾಡಿನಾಸ್ತಾಂ. ‘ಪುಣ್ ಧಯ್ರ್ ಆಸಾ, ಜಾಣ್ವಾಯ್ ಆಸಾ….’ತಾಚಿಂ ಉತ್ರಾಂ ಮಾಜ್ವಲಿಂ. ‘ವಾಯ್ಟಾಕ್ ಆಪವ್ಣೆಂ ದಿಲ್ಯಾ ಶಿವಾಯ್ ಕಸಲೆಂಯಿ ವಾಯ್ಟ್ ಕೊಣಾಕ್‌ಯಿ ವಾಯ್ಟ್ ಕರಿನಾ. ಬರಂಪಣ್‌ಯಿ ತಸೆಂಚ್.’
ಆತಾಂಯಿ ರಮೋನಾನ್ ಕಿತೆಂಚ್ ಮ್ಹಳೆಂ ನಾ.
‘ಬರೆಪಣಾಚೆ ವಿರೋದ್ ಪಾಗೊರ್ ಬಾಂದ್ತಾ ತೊ ನಾಸ್ ಜಾತೊಲೊ.’ ತಾಣೆ ಆಪ್ಲೊ ತಾಳೊ ಮಾತ್ಸೊ ಉಬಾರ‍್ಲೊ. ಉಪ್ರಾಂತ್ ತಾಣೆ ಭಿಸ್ಪಾಕ್ ಮಾನ್ ಭಾಗಾಯ್ಲೊ. ‘ತುಜೆರ್ ಆಸ್ಚೆಂ ವಜನ್ ಆನಿ ತಾಚೊ ವತ್ತಡ್ ಹಾಂವ್ ಜಾಣಾಂ ರಾಯ್ಟ್ ರೆವರೆಂಡ್.’ ತಾಣೆ ಮ್ಹಳೆಂ. ‘ವಿಂಚುನ್ ಕಾಡ್ಲೆಲೆ ಪರ‍್ಜೆಕ್ ತಡಿಕ್ ಪಾವಂವ್ಚಿ ಜವಬ್ದಾರಿ ವರ‍್ತಿ.’
(57 – ಅವಸ್ವರಾಂತ್ ಮುಂದರ್ತಾ)
