spot_imgspot_img
spot_img

ರೆವೆಂತ್ಲೆ ಫಾತೊರ್ : ಅವಸ್ವರ್ -60

Reventhlefathor 2ICU-ಚ್ಯಾ ಎರ್‌ಕಂಡೀಶನ್ಡ್ ರುಮಾಂತ್ ಆಪ್ಲ್ಯಾ ಭಯ್ಣಿಚ್ಯಾ ಖಟ್ಲ್ಯಾ ಭೊಂವಾರಿ ಯೆಕ್ಟಾಂಯ್ ಜಾಲ್ಲ್ಯಾ ದೊಗಾಂ ಡೊಕ್ಟರಾಂಕ್ ಆನಿ ಚವ್ಗಾಂ ನರ‍್ಸಾಂಕ್ ಗ್ರೆಗರಿ ಡೆಲ್ಗಾರ‍್ಡೊ ಲಿಯೊ ತೀಕ್ ದಿಷ್ಟಿನ್ ಪಳೆತಾಲೊ. ತಾಂಚ್ಯಾ ಮುಕಮಳಾರ್ ಸಲ್ವಣಿ ಉಟೊನ್ ದಿಸ್ತಾಲಿ. ತಾಚ್ಯಾ ಸ ಫುಟ್ ಚಾರ್ ಇಂಚಾಂ ಲಾಂಬಾಯೆಚ್ಯಾ ಜಿವಾಕ್ ಮಾತೆಂ ಉಕಲ್ನ್ ಪಳೆಂವ್ಚಿ ಸಕತ್‌ಯಿ ತಾಂಕಾ ನಾತ್‌ಲ್ಲಿ. ಎಕ್ಲಿ ನರ‍್ಸ್ ಬೆಷ್ಟೆಂಚ್ ಒಕ್ಸಿಜನ್ ಮಾಸ್ಕ್ ಸಮಾ ಕರ‍್ಚೆಪರಿಂ ಕರ‍್ತಾಲಿ.

‘ತುಜೆ ಭಯ್ಣಿ ಖಾತಿರ್, ಎಸ್ತೆರ್ ಲಿಯೊ ಖಾತಿರ್ ಆಮಿ ಸರ‍್ವ್ ಪ್ರೇತನಾಂ ಕೆಲಿಂ ಮಿ|ಲಿಯೊ.,’ ಮ್ಹಣಾಲೊ ತ್ಯಾ ಆಸ್ಪತ್ರೆಚೊ ಪ್ರಮುಕ್ ಫಿಜಿಶಿಯನ್. ‘ಆತಾಂ ತಿ-‘

‘ಮತಿರ್ ನಾ,’ ಹಾಳ್ವಾಯೆನ್ ಮ್ಹಳೆಂ ಗ್ರೆಗರಿನ್.

‘ತಿ ಕೋಮಾಂತ್ ರಿಗ್ಲ್ಯಾ’

‘ಆನಿ ತಿ ಭಾಯ್ರ್ ಯೆಂವ್ಚಿ ನಾ?’

‘ವ್ಹಯ್ ಸರ್!’ ಎಕಾ ಲಾಂಬ್ ಉಸ್ವಾಸಾ ಸಂಗಿ ಫಿಜಿಶಿಯನಾನ್ ಜಾಪ್ ದಿಲಿ. ಎಕ್ಲಿ ನರ‍್ಸ್ ಆಪ್ಲ್ಯಾ ಬೊಟಾಂಚ್ಯಾ ನಾಕ್ಷಾಂಕ್ ಪಳೆತಾಲಿ ಆನಿ ದುಸ್ರಿ ಕಾರ್ಡಿಯ್ಯಾಕ್ ಮೊನಿಟರಾಚೆರ್ ಶೂನ್ಯ್ ದೀಷ್ಟ್ ದವರುನ್ ಆಸ್‌ಲ್ಲಿ.

‘ತರ್ ತುಮ್ಚೆಂ ಪ್ರೇತನ್ ಬಂದ್ ಕರಾ!’ ಗ್ರೆಗರಿನ್ ಮ್ಹಳೆಂ. ‘ಆನಿ ಹೆಂ ರೂಮ್ ಖಾಲಿ ಕರಾತ್. ತಿಚ್ಯೊ…..’ ಖಟ್ಲ್ಯಾ ವಯ್ರ್ ಖರಸ್ ಕಾಡಿತ್ತ್ ಪಡೊನ್ ಆಸ್‌ಲ್ಲ್ಯಾ, ಮಟ್‌ವ್ಯಾ ಪುಣ್ ಘಟ್‌ಮೂಟ್ ಕುಡಿಚ್ಯಾ ಸ್ತ್ರೀಯೆಕ್ ಪಳೆವ್ನ್ ತಾಣೆ ಮ್ಹಳೆಂ. ‘ತಿಚ್ಯೊ ನಿಮಾಣ್ಯೊ ಘಡಿಯೊ ತಿ ಫಕತ್ ಮ್ಹಜೆ ಸಂಗಿಂ ಖರ‍್ಚಿತೆಲಿ.’

‘ಪುಣ್ ತಿಚೆ ಕುಡಿಂತ್ ಜೀವ್ ಆಸ್ತಾ ವರೇಗ್…….’

‘ತುಜಿಂ ಕಾತೊಲಿಕ್ ತತ್ವಾಂ ಮ್ಹಾಕಾ ನಾಕಾತ್, ಡೊಕ್ಟರ್!’ ಗ್ರೆಗರಿನ್ ಮ್ಹಳೆಂ ಪಯ್ಲೆಂಚೆಚ್ ಹಾಳ್ವಾಯೆನ್. ‘ತಿಚೆರ್ ಖ್ಹೊವಯಿಲ್ಲಿಂ ಸರ‍್ವ್ ಲಾಯ್ಫ್ ಸಪೋರ‍್ಟ್ ಸಿಸ್ಟಮ್ಸ್ ತುಮಿ ನಿಕ್ಳಾಯೆತ್.’

‘ಪುಣ್ ಹೆಂ ಆಮ್ಚ್ಯಾ ಆಸ್ಪತ್ರೆಚ್ಯಾ ನೇಮಾಂಕ್ ಉಳ್ಟೆಂ, ಮಿ|ಲಿಯೊ’ ಡೊಕ್ಟರಾನ್ ಪರಾತ್ಲೆಂ. ‘ಕಿತೆಂಯಿ ತರಿ ತಿಕಾ ಎಕಾ-ದೋನ್ ಘಂಟ್ಯಾಂ ವಯ್ರ್ ಆವ್ಕಾಚಿ ಆವ್ದಿ ಆಮಿ ಭಾಸಾಂವ್ಕ್ ಸಕಾನಾಂತ್.’

ಗ್ರೆಗರಿಚ್ಯಾ ವೊಂಟಾಂಚೆರ್ ಎಕ್ ಹಾಸೊ ಉದೆವ್ನ್ ಲಿಪ್ಲೊ. ‘ತರ್ ತುಮಿ ಸರ‍್ವಾಂ ದಯಾಕರುನ್ ಭಾಯ್ರ್ ವಚಾತ್.’

‘ತುಂವೆಂ ಉಲಯಿಲ್ಲೆಂ ಕಸಲೆಂಚ್ ಆಯ್ಕೊಂಕ್ ಯಾ ಸಮ್ಜೊಂಕ್ ತಿ ಸಕ್ಚಿ ನಾ.’

‘ಹಾಂವ್ ಜಾಣಾಂ!’ ಜಾಪ್ ದಿಲಿ ಗ್ರೆಗರಿನ್. ‘ತಿಚೆಲಾಗಿಂ ಉಲಂವ್ಕ್ ಆಸ್ಚೆಂ ಸಕಾಳಿಂಚ್ – ತಿ ಮತಿರ್ ಆಸ್ತಾನಾಂಚ್ ಹಾಂವೆಂ ಉಲವ್ನ್ ಜಾಲಾಂ. ಆತಾಂ ತಿಚ್ಯೊ ನಿಮಾಣ್ಯೊ ಘಡಿಯೊ ಮ್ಹಾಕಾ ಪಳೆಂವ್ಕ್ ಜಾಯ್.’

‘ಸಕಾಳಿಂ, ತುಂವೆಂ ತಿಚೆಲಾಗಿಂ ಉಲಯಿಲ್ಲ್ಯಾ ಉಪ್ರಾಂತ್‌ಚ್ ತಿಚಿ ಪರಿಗತ್ ಭಿಗಡ್ಲಿ, ಮಿ|ಲಿಯೊ….’ಪಾದ್ದೆವ್ನ್‌ಶೆಂ ಮ್ಹಣಾಲೊ ಫಿಜಿಶಿಯನ್. ‘ತವಳ್ ಪರ‍್ಯಾಂತ್ ಆಮ್ಕಾಂ ಥೊಡೊ ಭರ‍್ವಾಸೊ ಆಸ್‌ಲ್ಲೊ,’ ತಾಣೆ ಬಗ್ಲೆನ್ಂಚ್ ಉಬೊ ಆಸ್‌ಲ್ಲ್ಯಾ ಕಾರ‍್ಡಿಯೋಲೊಜಿಸ್ಟಾಕ್ ಬೋಟ್ ದಾಕಯ್ಲೆಂ. ‘ಪುಣ್ ಉಪ್ರಾಂತ್ ಕಿತೆಂ ಜಾಲೆಂ ಆಮಿ ನೆಣಾಂವ್.’

‘ತುಮಿ ಜಾಣಾಂ ಜಾಂವ್ಚೆಂಯಿ ನಾಕಾ,’ ಗ್ರೆಗರಿನ್ ಮ್ಹಳೆಂ. ‘ಆತಾಂ ದಯಾಕರುನ್ ಭಾಯ್ರ್ ವಚಾ.’

ಹೆರ್ ವಾಟ್ ದಿಸನಾಸ್ತಾಂ ತಿಂ ಭಾಯ್ರ್ ಗೆಲಿಂ.

‘ಕಸಲ್ಯಾಯಿ ಫೊರ‍್ಮಾಂಚೆರ್ ದಸ್ಕತ್ ಕರುಂಕ್ ಆಸ್ಲ್ಯಾರ್ ಆತಾಂಚ್ ಸಾಂಗಾ ಆನಿ ಫೊರ‍್ಮಾಂ ತಯಾರ್ ದವರಾ.’

ಜಾಪ್ ದೀನಾಸ್ತಾಂ ತಿಂ ಭಾಯ್ರ್ ಗೆಲಿಂ.

ಎಕ್ ಕದೆಲ್ ವೊಡುನ್ ಗ್ರೆಗರಿ ಡೆಲ್ಗಾರ‍್ಡೊ ಲಿಯೊ ಭಯ್ಣಿಚ್ಯಾ ಖಟ್ಲ್ಯಾ ದೆಗೆನ್ ಬಸ್ಲೊ; ಥೊಡ್ಯಾ ಘಂಟ್ಯಾಂ ಆದಿಂ, ಸಕಾಳಿಂ ತೆಚ್ಚ್‌ಪರಿಂ ತೊ ಬಸ್‌ಲ್ಲೊ ಆನಿ ಎಸ್ತೆರ್ ಲಿಯೊ ಮತಿರ್ ಆಸ್‌ಲ್ಲಿ ಪುಣ್ ಉಲಂವ್ಕ್ ಸಕಾನಾತ್‌ಲ್ಲಿ. ಗ್ರೆಗರಿಚೆ ದೊಳೆ ಖಿಳ್ಯಾಂಚೆ ಧೊಮಸಿಂಪರಿಂ ತಿಚೆರ್ ಖಂಚ್‌ಲ್ಲೆ. ತವಳ್‌ಯಿ ಥಂಯ್ಸರ್ ಕೋಣ್ಂಚ್ ನಾತ್‌ಲ್ಲೆ; ಆಸ್‌ಲ್ಲ್ಯಾಂಕ್ ತಾಣೆಂ ಭಾಯ್ರ್ ಧಾಡ್‌ಲ್ಲೆ.

‘ತುಜಿಂ ನಿಮಾಣಿ ವೊರಾಂ ಸುರು ಜಾಲ್ಯಾಂತ್, ಎಸ್ತೆರ್!’ ತಿಚ್ಯಾ ಕಾನಾಲಾಗಿಂ ಆಪ್ಲೆ ವೋಂಟ್ ವ್ಹರುನ್ ತಾಣೆ ಮ್ಹಳೆಂ. ‘ಹಾಂವೆಂ ಉಲಂವ್ಚೆಂ ತುಕಾ ಆಯ್ಕಾತಾ ಆನಿ ಸಮ್ಜಾತಾ?’

ಎಸ್ತೆರಾನ್ ದೊಳೆ ಧಾಂಪ್ಲೆ ಆನಿ ತಿಚ್ಯಾ ದೊಳ್ಯಾಂ ಖಾಂಚಿಂನಿ ಜಮ್‌ಲ್ಲಿಂ ದುಕಾಂ ಪಿಗ್ಳೊನ್ ಪೊಲ್ಯಾಂ ವಯ್ರ್ ದೆಂವ್ಲಿಂ. ‘ತುಜೆ ಚಿಕಿತ್ಸೆ ಖಾತಿರ್ ಹಾಂವೆಂ ಪಾಟಿಂ ಫುಡೆಂ ಪಳೆಯಿಲ್ಲೆಂ ನಾ’ ತಾಣೆ ಮ್ಹಳೆಂ ಸ್ಪಷ್ಟ್ ಪುಣ್ ಹಾಳ್ವಾಯೆನ್. ‘ಹೆಂ ಸರ‍್ವ್ ತುಕಾ ಫಾವೊ?’

ಎಸ್ತೆರಾನ್ ಮಾತೆಂ ಹಾಲಯ್ಲೆಂ.

‘ಆತಾಂ ತುಂ ‘ನಾ’ ಮ್ಹಣ್ತಾಯ್!’ ತಾಣೆ ಮ್ಹಳೆಂ. ‘ಪುಣ್ ಯೆದೊಳ್ ಪರ‍್ಯಾಂತ್ ತುಂ ಕುಟ್ಮಾಂತ್ಲೆಂ ಅಪ್ರತಿಮ್ ಆನಿ ಪರಮ್ ಮಾಡ್ತಿರ್ ಜಾವ್ನಾಸ್‌ಲ್ಲೆಂಯ್. ತುಂವೆಂ ಘರ್‌ದಾರ್ ಸಾಂಬಾಳ್ಳೆಲ್ಯಾನ್ ಆಮಿ ಪರ‍್ಗಾವಾಂಕ್ ಗೆಲ್ಯಾಂವ್, ಖೂಬ್ ಜೊಡ್ಲೆಂ ಮ್ಹಣ್ ಸಮಾಜ್ ಉಲಯ್ತಾ. ಆನಿ ತುಂ ಭಿತರ‍್ಲೆ ಭಿತರ್ ಸಂತೊಸ್ ಪಾವ್ತಾಲೆಂಯ್. ಘರ್ ಕಾಮ್, ಘರ್ ಕಾಮ್ ಮ್ಹಣೊನ್ ಸ್ವತಾಕ್ ದಣ್ಸುನ್ ತುಂವೆಂ ಅವೆಕ್ತ್ ಸುಖ್ ಭೊಗ್ಲೆಂಯ್; ಪುಣ್ ತುಂವೆಂ ತೆವೀಸ್ ವರ‍್ಸಾಂ ಆದಿಂ ಕುಟ್ಮಾಕ್ ಹಾಡ್‌ಲ್ಲಿ ಅವ್‌ಮರ‍್ಯಾದ್, ತೆಂ ಆಯ್ಬ್, ತಿ ನಾಲಿಸಾಯ್ ತುಕಾ ಭಿತರ‍್ಲೆ ಭಿತರ್ ಖರ‍್ಗಯ್ತಾಲಿ ಆನಿ ಪರಿಣಾಮ್ ಜಾವ್ನ್ ತುಂ ಹಾಂಗಾಸರ್ ಪಡೊನ್ ಆಸಾಯ್.’
ಒಕ್ಸಿಜನ್ ಮಾಸ್ಕಾ ಪಾಟ್ಲ್ಯಾನ್ ಎಸ್ತೆರಾಚೆಂ ಮುಕಮಳ್ ಒಳಾಲೆಂ.

‘ಹೆ ಘಡಿಯೆ ಹೆಂ ಸರ‍್ವ್ ಹಾಂವ್ ಕಿತ್ಯಾಕ್ ಉಲಯ್ತಾಂ ಮ್ಹಣ್ ತುಂ ಚಿಂತಾಯ್. ತುಕಾ ದಣ್ಸುಂಕ್? ಬಿಲ್ಕುಲ್ ನ್ಹಯ್. ಭಾಗಿ ತುಂ. ಥೊಡ್ಯಾಚ್ ವೆಳಾನ್ ತುಜಿ ದಣ್ಸವ್ಣ್ ಸಂಪ್ತೆಲಿ. ಉರ‍್ತೊಲೊ ಹಾಂವ್, ತುಜೊ ದುಸ್ರೊ ಭಾವ್ ಆನಿ ಎಕ್ಲಿ ಭಯ್ಣ್. ಚುಕಾರಿಮಾರ್ ತಿಂ. ತೊ ಲಗ್ನ್ ಜಾಯ್ನಾಸ್ತಾಂಚ್ ಉರ‍್ಲೊ ಆನಿ ಕಸೊಯಿ ಅಮೆರಿಕಾಕ್ ಪಾವ್ಲೊ. ಭಯ್ಣ್, ಪಿಡೇಸ್ತಾಂಚಿ ಸೆವಾ, ದುಬ್ಳ್ಯಾಂಚಿ ಜತನ್ ಮ್ಹಣೊನ್ ಮಾದ್ರಿಂತ್ ರಿಗ್ಲಿ ಆನಿ ಕಶಿಯಿ ಇಟೆಲಿಕ್ ಪಾವ್ಲಿ. ಆತಾಂ, ತುಜೆಂ ಜಾಲ್ಯಾ ಉಪ್ರಾಂತ್ ಉರ‍್ತಾಂ ಹಾಂವ್ ಮಾತ್ರ್….’ಗ್ರೆಗರಿನ್ ಉತ್ರಾಂ ಥಾಂಬಯ್ಲಿ ಪುಣ್ ರಾವಯ್ಲಿಂ ನಾಂತ್. ಎಸ್ತೆರಾಚೊ ಹಾತ್ ತಾಣೆ ಧರ‍್ಲೊ.

‘ತೆವೀಸ್ ವರ‍್ಸಾಂ ಆದಿಂ ತುಂ ಆಂಕ್ವಾರ್ ಆವಯ್ ಜಾಲೆಂಯ್. ಪರ‍್ಕ್ಯಾ ಜಾತಿಚೊ ಪರ‍್ಕಿ ಚಲೊ ತುಜ್ಯಾ ಉದರಾಂತ್ಲ್ಯಾ ಭುರ‍್ಗ್ಯಾಚೊ ಬಾಪಯ್ ಜಾಲೊ. ಪಯ್ಸ್ ಹಿಲ್‌ಸ್ಟೇಶನಾಂತ್ಲ್ಯಾ ಎಕಾ ಆಸ್ರ್ಯಾಂತ್ ತುಂವೆಂ ತುಜೆಂ ಪಾಪ್ ಭುಂಯ್ ಘಾಲೆಂಯ್ ಪುಣ್ ಪ್ರಸೂತ್ಪಣಾ ವೆಳಾರ್‌ಚ್ ತುಜೆಂ ಬಾಳ್ಶೆಂ – ಚೆಡೊ – ಮೆಲೊ. ತುಂ ನಿತಳ್ ನಿಸ್ಕಳ್ ಆಂಕ್ವಾರ್ ಜಾವ್ನ್ ಪಾಟಿಂ ಆಯ್ಲೆಂಯ್. ವ್ಹಯ್, ಹೆಂ ಸರ‍್ವ್ ಹಾಂವ್ ಆದಿಂ ಉಲಯ್ಲಾ. ವ್ಹಯ್, ಹೆಂ ಸರ‍್ವ್ ಹಾಂವ್ ಆದಿಂ ಉಲಯ್ಲಾಂ ಪುಣ್ ಆತಾಂಯಿ ಕಿತ್ಯಾಕ್ ಉಲಯ್ತಾಂ?’

ಎಸ್ತೆರಾನ್ ಪರ‍್ತ್ಯಾನ್ ಮಾತೆಂ ಹಾಲಯ್ಲೆಂ, ನಾಕಾ ನಾಕಾ ಮ್ಹಣ್ಚ್ಯಾ ಜಿನ್ಸಾರ್.

‘ಪುಣ್ ಅಸಲೆ ಘುಟ್, ಘುಟ್ ಜಾವ್ನ್ ಉರಾನಾಂತ್, ಎಸ್ತೆರ್.’ ಗ್ರೆಗರಿನ್ ಮುಂದರಿಲೆಂ ‘ಪಾತ್ಕಾಚಿ ಮೂರ್ ಸಮಾಜಿಕ್ ಯೆಂವ್ಕ್ ಚಡ್ ವೇಳ್ ಲಾಗ್ಲೊ ನಾ. ಆಮ್ಚೆಂ ಕುಟಮ್ ಬಹಿಷ್ಕೃತ್ ಜಾಲೆಂ. ಮ್ಹಜ್ಯಾ ಗಲ್ಫಾಚ್ಯಾ ದುಡ್ವಾಕ್ ಲಾಗುನ್ ಪಯ್ಶಿಲ್ಯಾ ಶ್ಹೆರಾಂತ್ಲಿ ಎಕ್ ಸೊಭಿತ್ ಚಲಿ ಮ್ಹಾಕಾ ಪತಿಣ್ ಜಾವ್ನ್ ಮೆಳ್ಳಿ ಪುಣ್ ತಿಕಾ ಆಮ್ಚ್ಯಾ ಕುಟ್ಮಾಚೊ ಪವಿತ್ ಘುಟ್ ಕಳಿತ್ ಜಾತಾನಾ ಮ್ಹಜ್ಯಾ ಎಕ್ಲ್ಯಾಚ್ ಪುತಾಕ್ ಘೆವ್ನ್ ಬಲ್ತ್ಯಾಚ್ ದಾದ್ಲ್ಯಾ ಸಾಂಗಾತಾ ತಿ ಚಲ್ತೆಚ್ ರಾವ್ಲಿ. ವೆಚ್ಯಾ ಫುಡೆಂ ತಿಣೆ ಕಿತೆಂ ಮ್ಹಳೆಂ ಜಾಣಾಂಯ್? ಹೆಂ ತುಕಾ ಯೆದೊಳ್ ಹಾಂವೆಂ ಸಾಂಗೊಂಕ್ ನಾ. ‘ ತುಜ್ಯೊ ಭಯ್ಣಿ ವಾಟೆರ್ ವೆತೆಲ್ಯಾಂಕ್ ರಾವವ್ನ್ come and fuck me’ ಮ್ಹಣ್ತಾಲಿಂ ಖಂಯ್. ಪುಣ್ ಸಂಸಾರಾಕ್ ಕಿತೆಂ ದಿಸ್ಲೆಂ? ದೀಸ್-ರಾತ್ ಸೊರೊ ಪಿಯೆವ್ನ್ ಆತರ‍್ವಣಾಂ ಕರ‍್ಚ್ಯಾ ರಾಕ್ಸಾ ಸಾಂಗಾತಾ ಖಂಚಿ ಬಾಯ್ಲ್ ರಾವತ್? ವ್ಹಯ್, ಹೆಂ ಸರ‍್ವ್ ತುಕಾ ಹಾಂವೆಂ ಸಾಂಗೊಂಕ್ ನಾ ಪುಣ್ ಆತಾಂ ಸಾಂಗ್ತಾಂ. ಕಿತ್ಯಾಕ್? ತುಜೆರ್ ಫಾರಿಕ್ಪಣ್ ಘೆಂವ್ಕ್? ನಾ! ಹಾಂವೆಂ ಯೆದೊಳ್ ಪರ‍್ಯಾಂತ್ ಲಿಪಯಿಲ್ಲೊ ಎಕ್ ಘುಟ್ ತುಕಾ ಸಾಂಗ್ಚೆ ಖಾತಿರ್. ಹೊ ಘುಟ್ ಜಾವ್ನಾಸ್ತೊಲೊ ತುಜೆಂ ಅಪ್ರತಿಮ್ ಪ್ರಾಚಿತ್ ಜ್ಯಾ ವರ‍್ವಿಂ ತುಜೊ ಅತ್ಮೊ ಸಾಲ್ವಾರ್ ಜಾಲ್ಯಾರಿ ಜಾಲೊ.’

ಎಸ್ತೆರಾನ್ ದೊಳೆ ವಾಟಾರ‍್ಲೆ.

‘ತುಜ್ಯಾ ಪಾತ್ಕಾಚಿ ಕಾಣಿ ತ್ಯಾ ಹಿಲ್‌ಸ್ಟೇಶನಾಂತ್‌ಚ್ ಸಂಪ್ಲಿ ಮ್ಹಣ್ ತುಂ ಚಿಂತಾಯ್ ಆನಿ ಮಾಂದ್ತಾಯ್?’ ಎಸ್ತೆರಾಚ್ಯಾ ಕಾನಾಂತ್ ತೊ ಪುಸ್ಪುಸ್ಲೊ. ‘ಪ್ರಾಚಿತ್ ಆಮಿ ಕೆಲೆಂ, ಹಾಂವೆಂ ಕೆಲೆಂ. ಪುಣ್ ಎಕ್ಲೊ ಆನಿಕೀ ಜೀವಂತ್ ಆಸಾ-ತುಜೊ ಪೂತ್!’

ಹೆಂ ಆಯ್ಕೊನ್ ಎಸ್ತೆರ್ ಉಸ್ಮಡ್ಲೆಂ ಆನಿ ಇ.ಸಿ.ಜಿ ಮೊನಿಟರಾನ್ ಉಡ್ಕ್ಯೊ ಮಾರ‍್ಲ್ಯೊ.

‘ತುಜೊ ಪೂತ್ ಮರೊಂಕ್ ನಾ ಪುಣ್ ಜೀವಂತ್ ಆಸಾ ಆನಿ ಎಕಾ ಕೊಲೆಜಿಚ್ಯಾ ಉಂಚ್ಲ್ಯಾ ಬೊರ‍್ಡಿಂಗಾಂತ್ ರಾಯಾಳ್ ಜಿಣಿ ಜಿಯೆತಾ.’

ಎಸ್ತೆರಾಚೆ ದೊಳೆ ಶೂನ್ಯ್ ಜಾಲೆ.

‘ಉಡಾಸ್ ಆಸಾ ತುಕಾ, ಹರ್‌ಯೆಕಾ ವರ‍್ಸಾ ಹಾಂವ್ ರಜೆರ್ ಆಯಿಲ್ಲ್ಯಾ ವೆಳಾರ್ ಥೊಡ್ಯಾ ದಿಸಾಂಕ್ ಭಾಯ್ರ್ ವೆತಾಲೊಂ ಆನಿ ಪಾಟಿಂ ಯೆತಾನಾ ಮ್ಹಜೆ ಸಂಗಿ ಎಕ್ ಯುವಕ್ ಆಸ್ತಾಲೊ? ತೊ ತುಕಾ ಆಂಟಿ ಮ್ಹಣ್ ಉಲೊ ಮಾರ‍್ತಾಲೊ ಆನಿ ತುಂ ತಾಚಿ ವಿಸೇಶ್ ಕೊಂಡಟಾಯ್ ಕರ‍್ತಾಲೆಂಯ್. ತುಂವೆಂ ಕೆನ್ನಾಂಯಿ ತ್ಯಾ ಚಲ್ಯಾಲಾಗಿಂ ವಿಚಾರ‍್ಚೆಂ ಆಸ್‌ಲ್ಲೆಂ – ತುಕಾ ಆಮ್ಚ್ಯಾಚ್ ಕುಟ್ಮಾಚೆ ಆಲ್ಕುಂಜ್ ಕಶೆಂ ಆಯ್ಲೆಂ. ಆನಿ ತವಳ್ ಹಾಂವೆಂ ವಿವರಣ್ ದಿಲ್ಲೆಂ ಆಸಾ – ತೊ ಅನಾಥ್. ಕೊಣಾಚ್ಯಾಗಿ ಪಾತ್ಕಾಚೆಂ ಫಳ್. ಹಾಂವೆಂ ತಾಕಾ ಪೊಸ್ಕೊ ಕರುನ್ ಘೆತ್ಲಾ ಆನಿ ಆಮ್ಚ್ಯಾಚ್ ಕುಟ್ಮಾಚೆಂ ಆಲ್ಕುಂಜ್ ದಿಲಾಂ. ಹೆಂ ಆಯ್ಕೊನ್ ತುಂ ಧಾದೊಸ್ಲೆಂಯ್, ತ್ಯಾ ಚಲ್ಯಾಚೆರ್ ತುಜೊ ಮೋಗ್ ಚಡ್ಲೊ ಆನಿ ಹರ್‌ಯೆಕಾ ವರ‍್ಸಾ ತುಂ ತಾಚ್ಯಾ ಯೆಣ್ಯಾಕ್ ರಾಕೊನ್ ರಾವ್ತಾಲೆಂಯ್. ಪುಣ್ ಬಿರ‍್ಮತ್. ಆವಯ್ಚೊ ಮೋಗ್ ತುಂವೆಂ ತಾಕಾ ದಿಲೊಯ್ ತರಿ ತೊ ತುಕಾ ಆಂಟಿಚ್ ಮ್ಹಣ್ತಾಲೊ. ಪುತಾ, ಪುತಾ ಮ್ಹಣ್ ತುಂ ತಾಚ್ಯಾ ಪಾಟ್ಲ್ಯಾನ್ ಉಬ್ಲೆಂಯ್ ತರಿ ತಾಣೆ ‘ಮಾಮ್ಮಿ’ ಮ್ಹಳ್ಳೊ ಉಲೊ ತುಕಾ ದಿಲೊ ನಾ. ಫುಡೆಂ ಕಾಂಯ್ ಸತ್ ಉಗ್ಡಾಪೆಂ ಜಾತಾನಾ ತೊ ತುಕಾ ‘ಮಾಮ್ಮಿ’ ಮ್ಹಣ್ ವಳ್ಕತ್ ಪುಣ್ ತೆಂ ಆಯ್ಕೊಂಕ್ ತುಂ ಜೀವಂತ್ ಆಸ್ಚೆಂನಾಂಯ್ ಹ್ಹ!’

ಎಸ್ತೆರಾನ್ ಕಷ್ಟಾಂನಿ ಮಾತೆಂ ಘುಂವ್ಡಾವ್ನ್ ಭಾವಾಕ್ ಪಳೆಲೊ. ಎಸ್ತೆರಾಚ್ಯಾ ದೊಳ್ಯಾಂ ಥಾವ್ನ್ ದುಕಾಂ ಪಾಜರ‍್ತಾಲಿಂ.

‘ವ್ಹಯ್ ಎಸ್ತೆರ್, ವ್ಹಯ್!’ ದಾಡಾಂಆಂ ಅಡ್ಚಿಲಿಂ ಗ್ರೆಗರಿನ್. ‘ತೊಚ್ ಚಲೊ ತುಜೊ ಪೂತ್, ತುಜೆಂ ಕರ‍್ಮ್, ತುಜೆಂ ಪಾಪ್, ತುಜೆಂ ಪಾತಕ್.’

ಎಸ್ತೆರಾಚೊ ಉಸ್ವಾಸ್ ವಯ್ರ್ ಗೆಲೊ.

‘ಮೆಥ್ಯು ಲಿಯೊ, ತುಜೊ ಪುತ್ ಜೀವಂತ್ ಆಸಾ!’ ಮುಂದರಿಲೆಂ ಗ್ರೆಗರಿನ್. ‘ಹಾಂವೆಂ ತಾಕಾ ಜೀವಂತ್ ದವರ‍್ಲಾ ಎಕ್ ದೆವೆಂ ಫಾರಿಕ್ ಕರುಂಕ್….ಮೆಥ್ಯು ಲಿಯೊ, ಎಕ್ ಬ್ರಿಲ್ಲಿಯಂಟ್ ಬೊಯ್, ಉತ್ತೀಮ್ ಫುಟ್‌ಬೊಲ್ ಖೆಳ್ಗಾಡಿ….ತುಜೊ ಪುತ್!’

ಎಸ್ತೆರಾಚೆ ವೋಂಟ್ ತೆಂ ನಾಂವ್ ಉಚಾರೊಂಕ್ ಉರ‍್ಡಾಲೆ. ಲಾಗ್ಶಿಲ್ಯಾ ಟ್ರೇಂತ್ ಆಸ್‌ಲ್ಲ್ಯಾ ಕಾಪ್ಸಾ ಮುದ್ಯಾನ್ ಗ್ರೆಗರಿನ್ ತಾಚೆ ವೋಂಟ್ ಭಿಜಯ್ಲೆ. ತವಳ್ ಒಕ್ಸಿಜನ್ ಮಾಸ್ಕ್ ತಾಣೆ ಉಕಲ್ಲೆಲ್ಯಾನ್ ಎಸ್ತೆರಾಚ್ಯಾ ಗಳ್ಯಾಥಾವ್ನ್ ಯೆಂವ್ಚ್ಯಾ ಗರ‍್ಗರೊ ಆವಾಜ್ ತಾಕಾ ಆಯ್ಕಾಲೊ. ‘ವ್ಹಯ್,’ ತಾಣೆ ಮ್ಹಳೆಂ. ‘ಮೆಥ್ಯು ಲಿಯೊ. ಸೊಭಿತ್ ನಾಂವ್ ನ್ಹಯ್? ಮೆಥ್ಯು ಮ್ಹಳ್ಯಾರ್ ‘ದೆವಾನ್ ದಿಲ್ಲೆಂ ದೆಣೆ’ ಆನಿ ಲಿಯೊ ಮ್ಹಳ್ಯಾರ್ ‘ಸಿಂಹ್’ ಅಸೊ ಅರ‍್ಥ್ ಜಾತಾ.’

ಎಸ್ತೆರ್ ತಾಚ್ಯಾ ಭುಜಾಂ ವಯ್ಲ್ಯಾನ್ ಪಳೆಲಾಗ್ಲಿ.

‘ನಾ!’ ಮ್ಹಣಾಲೊ ಗ್ರೆಗರಿ. ‘ನಾ. ತಾಕಾ ಹಾಂಗಾಸರ್ ಹಾಂವೆಂ ಹಾಡುಂಕ್ ನಾ. ಪುಣ್ ತುಜ್ಯಾ ಮರ‍್ಣಾಕ್ – ತಾಚ್ಯಾ ಮೊಗಾಚ್ಯಾ ಆಂಟಿಚ್ಯಾ ಮರ‍್ಣಾಕ್ – ತೊ ಜರೂರ್ ಯೆತೊಲೊ.’

ಎಸ್ತೆರಾಚ್ಯಾ ದೊಳ್ಯಾಂಚೊ ಮಾಜ್ವೊನ್ ಯೆಂವ್ಚೊ ಪ್ರಕಾಸ್ ಯೆಕಾಚಾಣೆ ಕಿಟಾಂ ಜಾಲೊ. ತಿಚ್ಯೊ ಮುಟಿ ಅಂರ‍್ದಾಲ್ಯೊ, ಹಾತಾಂಚ್ಯಾ ಶಿರಾಂಕ್ ತೊಪ್‌ಲ್ಲ್ಯಾ ಕೆನ್ಯೂಲಾಥಾವ್ನ್ ರಗತ್ ಪಾಜ್ರುಂಕ್ ಲಾಗ್ಲೆಂ.

‘ಆತಾಂ ತುಂ ಮ್ಹಾಕಾ ಶಿರಾಪ್ತಾಯ್!’ ಗ್ರೆಗರಿನ್ ಮ್ಹಳೆಂ, ಆಪ್ಲ್ಯಾ ವೊಂಟಾಂ ಇಡ್ಯಾಂನಿ ಹಾಸೊ ಹಾಡುನ್. ತುಜೊ ಶಿರಾಪ್ ಮ್ಹಾಕಾ ಲಾಗ್ಚೊ ನಾ, ಎಸ್ತೆರ್. ತುಜ್ಯಾ ಪುತಾಕ್ ತೊ ಲಾಗಾಸೊ ಹಾಂವ್ ಕರ‍್ತೊಲೊಂ. ಮೆಥ್ಯುಕ್ ಹಾಂವ್ ಸರ‍್ವ್ ದಿತಲೊಂ, ತಾಕಾ ಖ್ಹಾವಯ್ತೊಲೊಂ, ಬೊರಯ್ತೊಲೊಂ ಪುಣ್ ತಾಕಾ ಅಮಾನುಶ್ ಕಸಾಯ್ಗಾರ್ ಕರುನ್ ಸಂಸಾರಾಂತ್ ಸೊಡ್ಟಲೊಂ. ಸರ‍್ವ್ ತಾಕಾ ಹಾಂವ್ ದಿತೊಲೊಂ, ಮೇಗ್ ಎಕ್ ಸೊಡ್ನ್ ಕಿತ್ಯಾಕ್ ಮೋಗ್ ಮ್ಹಳ್ಳ್ಯಾ ಬನಾವಟಿ ಉತ್ರಾಕ್ ಹಾಂವ್ ಮಾಂದಿನಾ. ತುಕಾ ಕಿತೆಂ ದಿಲೆಂ ಮೊಗಾನ್? ಗರ‍್ಭಾಂತ್ ಎಕ್ ನಾಲಿ? ಮ್ಹಾಕಾ ಕಿತೆಂ ಮೆಳ್ಳೆಂ? ಮಾಣ್ಕಾಂ-ಮೊತಿಯಾಂನಿ ಹಾಂವೆಂ ಮ್ಹಜೆ ಪತಿಣೆಕ್ ನೆಟಯ್ಲೆಂ ಪುಣ್ ತುಜ್ಯಾ ಕರ‍್ತುಬಾಚಿ ವಳಕ್ ಮೆಳ್ತಾನಾ ತಿ ಮ್ಹಾಕಾ ಸಾಂಡುನ್ ಗೆಲಿ. ಕಸಲಿ ಚೂಕ್ ಹಾಂವೆಂ ಕೆಲ್ಲಿ, ಎಸ್ತೆರ್, ಕಸಲಿ ಚೂಕ್?’

‘ತರಿ, ಇತ್ಲಿ ಕುಸಡಾಯ್ ಕಾಳ್ಜಾಂತ್ ದವರ‍್ನ್ ಹಾಂವೆಂ ತುಜ್ಯಾ ಪುತಾಕ್ ಭಾಂಗಾರಾಚೆಂ ಶಿತ್ ಖ್ಹಾವಯ್ಲೆಂ ನ್ಹಯ್? ಗಳೊ ಕಾತ್ರುಂಕ್ ಸುರಿ ಮಿಲಾವಾಚಿಚ್ ಜಾಯ್ಜೆ ಮ್ಹಣ್ ನಾ, ಎಸ್ತೆರ್. ಭಾಂಗಾರಾಚೆ ಸುರಿಯೆನ್‌ಯಿ ಗಳೊ ಕಾತ್ರುಂಕ್ ಜಾತಾ. ಹಾಂವ್ ಪೊಳ್ಕುರೊ ನ್ಹಯ್? ವ್ಹಯ್. ತು

ಎಸ್ತೆರಾಚೆ ದೊಳೆ ಪರ‍್ತಾಲೆ. ತಿಚೊ ಜೀವ್ ಪೆಂಕ್ಟಾಥಾವ್ನ್ ಧೊಣ್ವಾಪರಿಂ ಭಾಗ್ವಾಲೊ ಆನಿ ತಸೊಚ್ ಕುಸ್ಕಾಲೊ. ತಿ ಪಾಟಿಂ ಯೆಂವ್ಕ್ ಸಾದ್ಯ್ ನಾತ್‌ಲ್ಲ್ಯಾ ಸಂಸಾರಾಂತ್ ರಿಗ್‌ಲ್ಲಿ. ಅನಿಶ್ಚಿತ್ ಕೋಮಾ. ಎಕೆ ವಾಟೆನ್ ಗ್ರೆಗರಿ ಸಲ್ವಾಲ್ಲೊ ಆನಿ ತಾಣೆ ಕಿತೆಂ ಉಲಯ್ಲ್ಯಾರಿ, ಖಿಳಂಚ್ಲ್ಯಾರಿ, ತಿಕಾ ಚಾಚಾಯ್ಲ್ಯಾರಿ ಕಸಲೊಚ್ ಫಾಯ್ದೊ ನಾತ್‌ಲ್ಲೊ. ಆಪ್ಲೆ ಸಲ್ವಣೆಂತ್ ತರಿ ಎಸ್ತೆರ್ ಜಿಕ್‌ಲ್ಲಿ.

ಆತಾಂ ತಿಚ್ಯೊ ನಿಮಾಣ್ಯೊ ಘಡಿಯೊ ಯೆತಾನಾ, ಗ್ರೆಗರಿ ತ್ಯಾಚ್ ಕದೆಲಾರ್ ಬಸುನ್ ಆಸ್‌ಲ್ಲೊ. ತಿಚ್ಯಾ ಹರ‍್ಧ್ಯಾಚ್ಯಾ ಸವ್ಕಾಸ್ ಉಡ್ಣೆಂ-ಚಡ್ಣೆಂನ್ ತಿಚೆ ಥಂಯ್ ಜೀವ್ ಆಸಾ ಮ್ಹಣ್ ಕಳಿತ್ ಜಾತಾಲೆಂ.

ಗ್ರೆಗರಿ ರಾಕೊನ್ ಬಸ್ಲೊ.

ಸಾಂಜೆಚ್ಯಾ 6.04 ಘಂಟ್ಯಾಚೆರ್ ಎಸ್ತೆರಾಚೆಂ ಅಂತ್ಯ್ ಆಯ್ಲೆಂ.

ಕಾರ‍್ಡಿಯ್ಯಾಕ್ ಮೊನಿಟರಾನ್ ಲಾಂಬ್ ಎಕ್ ವಿಳಾಪ್ ಕೆಲೊ. ಆಪ್ಲ್ಯಾ ಮುಕಮಳಾರ್ ಕಸಲಿಚ್ ಬದ್ಲವಣ್ ದಾಕಯ್ನಾಸ್ತಾಂ ಗ್ರೆಗರಿ ಉಟ್ಲೊ ಆನಿ ಐ.ಸಿ.ಯು.-ಂತ್ಲೊ ಭಾಯ್ರ್ ಆಯ್ಲೊ. ಡ್ಯೂಟೆರ್ ಆಸ್‌ಲ್ಲಿ ಎಕ್ಲಿ ನರ‍್ಸ್ ಉಬಿ ಜಾಲಿ.

‘ಮ್ಹಜಿ ಭಯ್ಣ್ ಅಂತರ‍್ಲಿ,’ ತಾಣೆ ಕಳಯ್ಲೆಂ.

‘ಐ ಆಮ್ ಸೊರ್ರಿ, ಮಿ|ಲಿಯೊ.’ ತಿಣೆ ಮಾತೆಂ ಮುಳಾಂತ್ ಘಾಲೆಂ.

‘So am I.’ ತಾಣೆ ಮ್ಹಳೆಂ. ‘ಮರ‍್ಣಾಚಿ ವಿಧಿ ಪೊರ‍್ವಾಂ ಜಾತೆಲಿ. ತವಳ್ ಪರ‍್ಯಾಂತ್ ತಿಚಿ ಕೂಡ್ ಮೊರ‍್ಗಾಂತ್ ಆಸ್ತೆಲಿ. ಹಿ ಸಗ್ಳಿ ವಿಲೆವಾರಿ ಕರುಂಕ್ ಹಾಂವ್ ಎಕಾ ಅಂಡರ್‌ಟೇಕರಾಕ್ ಧಾಡ್ತಾಂ.’

‘ಥೊಡಿಂ ಪೇಪರಾಂ ದಸ್ಕತ್ ಕರುಂಕ್ ಆಸ್ತೆಲಿಂ, ಸರ್.’

‘ತರ್ ಚಲ್ಯಾಂ!’ ಗ್ರೆಗರಿನ್ ಮಟ್ವ್ಯಾನ್ ಮ್ಹಳೆಂ.

***

ಸೆಮೆಸ್ಟರಾಚೆಂ ನಿಮಾಣೆಂ ಮ್ಯಾಚ್ ತೆಂ. ಆನಿ ದೆಡಾಚ್ ಮ್ಹಯ್ನ್ಯಾನ್ ಡಿಗ್ರಿ ಶಿಕ್ಪಾಚಿ ಅಂತಿಮ್ ಪರೀಕ್ಷಾ ಉದೆತೆಲಿ. ಕೊಲೆಜಿಚೊ ಅಪ್ರತಿಮ್ ಸೆಂಟರ್‌ಫೊರ‍್ವಡ್ ಖ್ಹೆಳ್ಗಾಡಿ ಮೆಥ್ಯು ಲಿಯೊ ಆಪ್ಲ್ಯಾ ಸಾಂಗಾತಿ ಖ್ಹೆಳ್ಗಾಡ್ಯಾಂಚ್ಯಾ ಖಾಂದಾಂಚೆರ್ ಬಸುನ್ ಟ್ರೋಫಿ ವಯ್ರ್ ಉಬಾರೋನ್ ಧರುನ್ ಹೊಸ್ಟೆಲಾಕ್ ಪಾಟಿಂ ಯೆತಾನಾ ತಾಚ್ಯಾ ಮತಿಂತ್ ಹಿಂ ಆನಿ ಹೆರ್ ಮಿಶ್ರಿತ್ ಚಿಂತ್ನಾಂ ಆಸ್‌ಲ್ಲಿಂ. ಕಸಲ್ಯಾಗಿ ಅವೆಕ್ತ್ ಕಾರಾಣಾಕ್ ಲಾಗುನ್ ತಾಕಾ ತಾಚ್ಯಾ ಟೀಮಾಚೆಂ ಜಯ್ತ್ (ಆಪ್ಲೆಂ ಸಯ್ತ್) ಧಾದೊಸ್ಕಾಯ್ ಹಾಡುಂಕ್ ಸಕ್ಲೆಂ ನಾ.

ಕೊಲೆಜಿಚ್ಯಾ ಲೊಕರ್ ರೂಮಾಂತ್ ತಾಣೆ ಆಪ್ಲೆಂ ಖ್ಹೆಳ್ಗಾಡಿ ವಸ್ತುರ್ ನಿಕ್ಳಾಯ್ಲೆಂ ಆನಿ ಹುನೊನಿ ಶವರ್ ಘೆತೆಚ್ ಖೆಳಾಂತ್ ಪಡೊನ್ ಝಂಜ್ರೊನ್ ಗೆಲ್ಲ್ಯಾ ದೊಂಪ್ರಾಂಕ್ ಡೆಟ್ಟೊಲ್ ಪುಸುನ್ ತಾಣೆ ಆಪ್ಲೊ ಧವೊ ಟ್ರ್ಯಾಕ್ ಸೂಟ್ ಶಿರ‍್ಕಾಯ್ಲೊ ಆನಿ ಶೀದಾ ಹೊಸ್ಟೆಲಾಕ್ ಆಯ್ಲೊ. ದನ್ಪಾರಾಂಚಿಂ ಪಾವ್ಣೆ-ಎಕ್ ಜಾಲ್ಲಿಂ. ಹೊಸ್ಟೆಲಾಚ್ಯಾ ದಫ್ತರಾ ಭಾಯ್ರ್‌ಚ್ ತಾಕಾ ವೊರ‍್ಡನ್ ಭೆಟ್ಲೊ.

‘ಕಂಗ್ರ್ಯಾಚುಲೇಶನ್ಸ್, ಮೆಥ್ಯು!’ ವೊರ್ಡನಾನ್ ತಾಕಾ ವೆಂಗ್ಲೊ. ‘ಗುಡ್ ಶೊ.’

‘ಧನ್ಯವಾದ್ ಫಾದರ್ ಮೊರ್ರಿಸ್,’ ಮೆಥ್ಯುನ್ ಜಾಪ್ ದಿಲಿ. ‘ಮ್ಹಜ್ಯಾ ಸಾಂಗಾತ್ಯಾಂನಿ ಬರೆಂ ಪ್ರೇತನ್ ಕೆಲಾಂ.’

‘ಬರಾಬರ್!’ ಮ್ಹಳೆಂ ಫಾದರ್ ಮೊರ್ರಿಸಾನ್. ‘ಪ್ರಿನ್ಸಿಪಲಾನ್‌ಯಿ ಮ್ಯಾಚ್ ಪಳೆಲಾಂ ಆನಿ ತುಂವೆಂ ಆನಿ ತುಜ್ಯಾ ಟೀಮಾನ್ ಆಜ್ ಗಮ್ಮತ್ ಕರ‍್ಯೆತ್ ಮ್ಹಳ್ಳಿ ಪರ‍್ವಣ್ಗಿ ಹಾಂವ್ ದಿತಾಂ.’ ಎಕ್ ಖಿಣ್‌ಭರ್ ತೊ ರಾವ್ಲೊ. ‘ಪುಣ್….’ ತಾಚ್ಯಾ ದೊಳ್ಯಾಂಚೊ ಪಾಟ್ಲಾವ್ ಕೆಲ್ಲ್ಯಾ ಮೆಥ್ಯುಕ್ ರುಕಾಂಚೆ ಸಾವ್ಳೆಂತ್ ಉಬಿ ಆಸ್ಚಿ ಟೆಕ್ಸಿ ದಿಸ್ಲಿ.

‘ತುಜೊ ಅಂಕಲ್ ಆಯ್ಲಾ,’ ಫಾದರ್ ಮೊರ್ರಿಸಾನ್ ಕಳಯ್ಲೆಂ.

‘ಅಂಕಲ್ ಗ್ರೆಗರಿ, ಹ್ಯಾ ವೆಳಾರ್….’ಮೆಥ್ಯು ಹಾಂಕ್ರೆಲೊ. ‘ಖಬರ್ ಬರಿ ನಾ?’

‘ತೊಚ್ ತುಕಾ ಸಾಂಗ್ತೊಲೊ,’ ಫಾದರ್ ಮೊರ್ರಿಸಾನ್ ಮ್ಹಳೆಂ. ‘ತೊ ವಿಜಿಟರ್ಸ್ ಪಾರ‍್ಲರಾಂತ್ ಆಸಾ.’

ಕಿತೆಂಗಿ ಸೊದ್ಚೆಪರಿಂ ಮೆಥ್ಯುನ್ ಆಪ್ಲ್ಯಾ ದಾವ್ಯಾ ಹಾತಾಚ್ಯಾ ತಾಳ್ವೆಕ್ ಪಳೆಲೆಂ.

‘ಥೆಂಕ್ಸ್, ಫಾದರ್.’

‘ಮೆಲ್‌ಕಮ್, ಮ್ಹಜಿ ಗರ‍್ಜ್ ಪಡ್ಲ್ಯಾರ್ ಹಾಂವ್ ಖಂಯ್ ಆಸಾಂ ಮ್ಹಳ್ಳೆಂ ತುಂ ಜಾಣಾಂಯ್.’

‘ಯೆಸ್, ಫಾದರ್.’

‘Now run along, boy. Be brave.’ ತಾಚಿ ಪಾಟ್ ಥಾಪುಡ್ಲಿ ಫಾದರ್ ಮೊರ್ರಿಸಾನ್.

ವಿಜಿಟರ್ಸ್ ಪಾರ‍್ಲಲಾಂತ್ ರಿಗ್‌ಲ್ಲ್ಯಾ ಮೆಥ್ಯುಕ್ ಅಂಕಲ್ ಗ್ರೆಗರಿಚೆಂ ಆಸ್ವೆಲ್ ವೆಕ್ತಿತ್ವ್ ರಾಕೊನ್ ಆಸ್‌ಲ್ಲೆಂ. ಕಿತೆಂಗಿ, ಮೆಥ್ಯುಚೆಂ ಕಾಳಿಜ್ ಬರ‍್ಪಾಂತ್ ಲೊಳಯಿಲ್ಲೆಪರಿಂ ಕಾಂಪ್ಲೆಂ. ಹ್ಯಾ ಪಯ್ಲೆಂ ತಾಕಾ ಕೆನ್ನಾಂಯಿ ಅಶೆಂ ಭೊಗ್‌ಲ್ಲೆಂ ನಾ. ಅಂಕಲ್ ಗ್ರೆಗರಿಚೆರ್ ತಾಕಾ ಮೊಠೊ ಅಭಿಮಾನ್ ಆಸ್‌ಲ್ಲೊ. ತರೀ-

‘ಅಂಕಲ್ ಗ್ರೆಗರಿ!’ ತಾಚ್ಯಾ ವೊಂಟಾಂಚೆರ್ ಹಿಂ ಉತ್ರಾಂ ಉದೆಂವ್ಕ್ ಥೊಡಿ ಘಳಾಯ್ ಜಾಲಿ.

ಗ್ರೆಗರಿನ್ ಆಪ್ಲೆಂ ಮಾತೆಂ ಘುಂವ್ಡಾವ್ನ್ ಮೆಥ್ಯುಕ್ ಪಳೆಲೆಂ ಆನಿ ಉಬೊ ಜಾಲೊ. ಮೆಥ್ಯುನ್ ಮುಕಾರ್ ಹಾಡ್‌ಲ್ಲೊ ಹಾತ್ ತಾಣೆ ಧರ‍್ಲೊ.

‘ಫುಟ್‌ಬೊಲ್ ಮ್ಯಾಚ್ ಜಿಕ್‌ಲ್ಲ್ಯಾಕ್ ಅಭಿನಂದನ್!’ ತಾಣೆ ಮ್ಹಳೆಂ. ‘ಪ್ರಿನ್ಸಿಪಾಲ್ ಆನಿ ವಾರ್ಡನಾನ್ ಮ್ಹಾಕಾ ಕಳಯ್ಲೆಂ. ‘ಮ್ಯಾಚ್ ಸುರು ಜಾತಾನಾಂಚ್ ಹಾಂವ್ ಹಾಂಗಾಸರ್ ಆಸ್‌ಲ್ಲೊಂ ಪುಣ್ I did not want to upset you.’

‘ವರ‍್ಸಾಚ್ಯಾ ಹ್ಯಾ ಕಾಳಾರ್ ತುಂ ಹಾಂಗಾಸರ್, ಅಂಕಲ್ ಗ್ರೆಗರಿ?’ ಗ್ರೆಗರಿನ್ ತಾಚ್ಯಾ ಸವಾಲಾಚೆಂ ಗುಮಾನ್ ಕೆಲೆಂ ನಾ. ‘ಕಾಂಯ್ ಪುಣಿ—-‘ಮೆಥ್ಯುನ್ ಆಪ್ಲೆಂ ಸವಾಲ್ ಲಾಂಬಯ್ಲೆಂ.

‘ಕಾಂಯ್ ಪುಣಿ ನ್ಹಯ್ ತರಿ ಕಿತೆಂ ಪುಣಿ ಘಡ್ಲಾಂ.’ ಗ್ರೆಗರಿನ್ ಮ್ಹಳೆಂ ಮೆಥ್ಯುಚೊ ಹಾತ್ ಸೊಡುನ್. ಖುದ್ದ್ ಬಸ್ತೆಚ್ ಮೆಥ್ಯುಕ್ ಬೊಸ್ ಮ್ಹಳ್ಳೊ ಇಸಾರೊ ತಾಣೆ ದಿಲೊ.

‘ಮ್ಹಜಿ ಭಯ್ಣ್, ತುಜಿ ಆಂಟಿ ಎಸ್ತೆರ್ ಕಾಲ್ಚೆ ಸಾಂಜೆರ್ ಅಂತರ‍್ಲಿ.’

‘ಎಸ್ತೆರ್ ಆಂಟಿ?’ ಮೆಥ್ಯು ಫುಮಾರ‍್ಲೊ.

‘ವ್ಹಯ್! ತುಜಿ ಎಸ್ತೆರ್ ಆಂಟಿ. ಫಾಲ್ಯಾಂ ಸಕಾಳಿಂ ಇಕ್ರಾ ಘಾಂಟ್ಯಾರ್ ಮರ‍್ಣಾಚಿ ವಿಧಿ ಚಲ್ತೆಲಿ.’

ಮೆಥ್ಯು ಸುಸ್ಕಾರ್ನ್.

‘ಮರಣ್ ಪರ‍್ಯಾಂತ್ ತಿ ಕಷ್ಟಾಲಿ,’ ಗ್ರೆಗರಿನ್ ಕಳಯ್ಲೆಂ. ‘ನಿಮಾಣಿ ಘಡಿಯೆ ಪರ‍್ಯಾಂತ್ ತುಜೆಂಚ್ ನಾಂವ್ ತಿಚ್ಯಾ ವೊಂಟಾಂಚೆರ್ ಆಸ್‌ಲ್ಲೆಂ.’

‘ಹಾಂವ್ ಮರ‍್ಣಾ ವಿಧಿಕ್ ಯೆತೊಲೊಂ.’

‘ವ್ಹಯ್, ತೆಚ್ಚ್ ಖಾತಿರ್ ಹಾಂವ್ ಹಾಂಗಾಸರ್ ಆಯ್ಲಾಂ.’

‘ಪುಣ್ ತಿಚೆ ಪಿಡೆ ವಿಶಾಂತ್ ಯಾ ಅಸ್ವಸ್ಥೆ ವಿಶಾಂತ್ ತುಂವೆಂ ಮ್ಹಾಕಾ ಕಾಂಯ್ ಖಬರ್ ದಿಲ್ಲಿ ನಾ, ಅಂಕಲ್ ಗ್ರೆಗರಿ.’

‘ಎಕಾ ವ್ಯೆಕ್ತ್ ಉದ್ದೇಶಾನ್, ಮೆಥ್ಯು!’ ಖಡ್ಪಾಯೆನ್ ಮ್ಹಳೆಂ ಗ್ರೆಗರಿನ್. ‘ತುಕಾ ಹಾಂವೆಂ ತಯಾರ್ ಕರ‍್ಚ್ಯಾ ಜಿಣಿಯೆಂತ್ ಸಿಂತಿಮೆಂತಾಂಕ್ ಪ್ರವೇಸ್ ನಾ.’

‘ಸಿಂತಿಮೆಂತಾಂ ಉಚಾರೊಂಕ್ ಮ್ಹಾಕಾ ಕೊಣ್ ಆಸಾತ್, ಅಂಕಲ್?’

‘ಹಾಂವ್ ಆಸಾಂ!’

‘ವ್ಹಯ್, ತುಜೆವಿಣೆ ಹಾಂವ್ ಕಿತೆಂಚ್ ನ್ಹಯ್.’ ಮೆಥ್ಯುನ್ ಆಪ್ಲೆಂ ಮಾತೆಂ ಮುಳಾಂತ್ ಘಾಲೆಂ.

‘ಉತ್ರಾಂ, ಚತ್ರಾಯೆನ್ ಉಚಾರ್, ಮೆಥ್ಯು!’ ಗ್ರೆಗರಿಚ್ಯಾ ತಾಳ್ಯಾಂತ್ ನವಿಚ್ಚ್ ಎಕ್ ಝರ್ ಆಸ್‌ಲ್ಲಿ. ‘ಉಚಾರ್‌ಲ್ಲಿಂ ಉತ್ರಾಂ ಪಾಟಿಂ ಕಾಡ್ಚೊ ಸಂದರ‍್ಬ್ ಉದೆತಾನಾ ತುಂವೆಂ ಉಸ್ಮಡೊಂಕ್ ನಜೊ.’

‘ಆಜ್ ತುಂ ವಿಚಿತ್ರ್ ಉತ್ರಾಂ ಉಲಯ್ತಾಯ್, ಅಂಕಲ್! ಪುಣ್ ಮ್ಹಾಕಾ ಸಮ್ಜಾತಾ. ಸಂಸಾರಾಂತ್ ಆಸ್‌ಲ್ಲಿ ಮ್ಹಳ್ಯಾರ್ ಎಸ್ತೆರ್ ಆಂಟಿ ಮಾತ್ರ್. ಆತಾಂ….’

‘ಆತಾಂ ತುಕಾ ತಿ ಸೊಡುನ್ ಗೆಲ್ಯಾ.’

‘ಮತ್ಲಬ್?’

‘ತಿಕಾ ತುಜೆರ್ ಕಠಿಣ್ ಮೋಗ್ ಆಸ್‌ಲ್ಲೊ.’

‘ವ್ಹಯ್! ಪುಣ್ ಕಿತ್ಯಾಕ್ ಮ್ಹಳ್ಳೆಂ ಹಾಂವ್ ನೆಣಾಂ. ಹಾಂವ್ ಪರ‍್ಕಿ ನ್ಹಯ್?’

‘ಪಿಸಾಂಟ್ ಸಿಂತಿಮೆಂತಾಂಕ್ ಕಾರಾಣಾಂ ಆಸಾನಾಂತ್.’

ಮೆಥ್ಯುನ್ ಕಿತೆಂಚ್ ಮ್ಹಳೆಂ ನಾ.

‘ಆಜ್ ತುಜ್ಯಾ ಟೀಮಾಚೆಂ ಸೆಲೆಬ್ರೇಶನ್ ಆಸಾ ಮ್ಹಣ್ ಹಾಂವ್ ಸಮ್ಜಾತಾಂ. ಪುಣ್ ತುಂ….ತುಂ… ಮ್ಹಜ್ಯಾ ಸಾಂಗಾತಾ ಲಂಚ್ ಕರುಂಕ್ ಯೆತೊಲೊಯ್.’

‘ಖಂಡಿತ್ ಜಾವ್ನ್!’

‘ತಿತ್ಲೆ ವೆಗಿಂ ವಿಂಚವ್ಣ್ ಕೆಲಿಯ್?’ ಗ್ರೆಗರಿನ್ ಆಪ್ಲ್ಯಾ ದೊಳ್ಯಾಂಚ್ಯೊ ಭಂವ್ರ್ಯೊ ವಯ್ರ್ ಕೆಲ್ಯೊ. ‘ಎಸ್ತೆರಾ ಖಾತಿರ್?’

‘ನ್ಹಯ್! ತುಜೆ ಖಾತಿರ್. ಮೆಥ್ಯುನ್ ಜಾಪ್ ದಿಲಿ.

‘ಸಾಂಜೆಚ್ಯಾ ಫ್ಲಾಯ್ಟಾಚೆರ್ ಆಮಿ ಗಾಂವಾಂಕ್ ವೆತೆಲ್ಯಾಂವ್.’ ಗ್ರೆಗರಿನ್ ಕಳಯ್ಲೆಂ. ‘ಆತಾಂ ವಚ್ ಆನಿ ಹೊ ಟ್ರ್ಯಾಕ್ ಸುಟ್ ಬದ್ಲುನ್ ಬರೆಂ ವಸ್ತುರ್ ನ್ಹೆಸುನ್ ಯೆ. ಟಾಯ್ ಬಾಂದುಂಕ್ ವಿಸ್ರಾನಾಕಾ.

ಮೆಥ್ಯುನ್ ತಶೆಂಚ್ ಕೆಲೆಂ

ಶ್ಹೆರಾಚ್ಯಾ ರಾಯಾಳ್ ರೆಸ್ಟೋರೆಂಟಾಂತ್ ಬಸ್‌ಲ್ಲ್ಯಾ ತಾಂಚೆ ಮಧೆಂ ಚಡಿತ್ ಉಲವ್ಣೆಂ ಚಲ್ಲೆಂ ನಾ. ತಾಂಚಿ ಸೆವಾ ಕರುಂಕ್ ಆಯಿಲ್ಲ್ಯಾ ವೇಯ್ಟರಾಕ್ ದೋನ್ ಸ್ಕೊಚ್ ಹಾಡುಂಕ್ ಗ್ರೆಗರಿನ್ ಸಾಂಗ್ತಾನಾ ಮೆಥ್ಯು ಜಾಗೊ ಜಾಲೊ.

‘ಯೆದೊಳ್ ಪರ‍್ಯಾಂತ್ ಬಿಯರ್ ಸೊಡ್ಲ್ಯಾರ್ ಹಾಂವೆಂ ಹೆರ್ ಆಮಾಲ್ ಸೆವೊಂಕ್ ನಾ, ಅಂಕಲ್.’

‘ಹರ್ ಯೆಕಾಕ್ ಎಕ್ ಸುರುವಾತ್ ಆಸ್ತಾ.’ ಗ್ರೆಗರಿನ್ ಮ್ಹಳೆಂ. ‘ಪುಣ್ ತ್ಯೆ ಸುರುವಾತಿಕ್ ಪಾಚ್ವಿ ನಿಶಾನಿ ದಿತೊಲೊ ತಿತ್ಲೊಚ್ ಘಟ್ ಆಸಾಜೆ. ಆಪ್ರೂಬ್‌ಶೆಂ ಬಿಯರ್ ಪಿಯೆವ್ಯೆತ್ ಮ್ಹಣ್ ಫಾದರ್ ಮೊರ್ರಿಸಾನ್ ಪರ‍್ವಣ್ಗಿ ದಿಲ್ಯಾ ಆಸ್ತೆಲಿ. ಹಾಂವ್ ತುಕಾ ಸ್ಕೊಚ್ಯಾಚಿ ಪರ‍್ವಣ್ಗಿ ದಿತಾಂ.’

‘ಯೆಸ್ ಅಂಕಲ್.’

‘ಆತಾಂ ದಾದ್ಲೊ ತುಂ,’ ಗ್ರೆಗರಿನ್ ಮುಂದರಿಲೆಂ. ‘ದೋನ್ ತೀನ್ ಮ್ಹಯ್‌ನ್ಯಾಂನಿ ತುಜೆಂ ಗ್ರಾಜ್ಯುಯೆಶನ್ ಜಾತಾ. ಉಪ್ರಾಂತ್ ಕಿತೆಂ? ಫುಡೇಂ ಶಿಕ್‌ಚಿ ಆಶಾ ಆಸಾ?’

‘ಹಾಂವ್-ನಾಂವ್, ಗಾಂವ್, ದೇಶ್‌ನಾತ್‌ಲ್ಲೊ ಮನಿಸ್.’ ತಗ್ಸಾಲ್ಲ್ಯಾ ತಾಳ್ಯಾನ್ ಮ್ಹಣಾಲೊ ಮೆಥ್ಯು. ‘ಕೆದೊಳ್ ಪರ‍್ಯಾಂತ್ ತುಜ್ಯಾ ಉದಾರ್ ಮನಾಚೆರ್ ಜಿಯೆಂವ್?’

ವೇಯ್ಟರಾನ್ ಸ್ಕೊಚ್ ಆನಿ ಸೊಡಾ ಹಾಡ್ಲೊ.

ಗ್ರೆಗರಿನ್ ಆಪ್ಲೆಂ ಡ್ರಿಂಕ್ ತಯಾರ್ ಕರ‍್ತಾನಾ ಮೆಥ್ಯುನ್ ಕಿತೆಂಚ್ ಕೆಲೆಂ ನಾ. ಗ್ರೆಗರಿ ಹಾಸ್ಲೊ.

‘ತುಜೆಂ ಪ್ರಥಮ್ ಡ್ರಿಂಕ್ ಹೆಂ,’ ತಾನೆ ಮ್ಹಳೆಂ. ‘ಫುಲ್ಲ್ ಸೊಡಾ ಘಾಲ್. ತುಕಾ ರೋಸ್ಟ್ ಚಿಕನ್ ಮ್ಹಳ್ಯಾರ್ ಪಸಂದ್‌ಮೂ? ಹಾಂವೆಂ ಎಕ್ ಸಗ್ಳೆಂಚ್ ರೋಸ್ಟ್ ಚಿಕನ್ ಒರ‍್ಡರ್ ಕೆಲಾಂ. ಪೋಟ್ ಅಂರ‍್ದುನ್ ಫುಟ್ಚೆ ಪರ‍್ಯಾಂತ್ ಖ್ಹಾ, ಖ್ಹಾ ಆನಿ ಖ್ಹಾ.’

(ಅವಸ್ವರ್ – 61 – ಂತ್ ಮುಂದರ‍್ತಾ)

Support Free & Independent Media

Keep journalism alive – support free, independent media. Help us to do our work by making a contribution. Together, stronger. Together as one.

LEAVE A REPLY

Please enter your comment!
Please enter your name here

ಎಡ್ವಿನ್ ಜೆ. ಎಫ್ ಡಿ’ಸೊಜಾ
1948 ಇಸ್ವೆಚ್ಯಾ ಜೂನ್ ಮಯ್ನ್ಯಾಂತ್ ವಾಲೆನ್ಸಿಯಾಂತ್ (ದೆ.) ಮಾರ್‍ಟಿನ್ ಆನಿ (ದೆ.) ಸ್ಟೆಲ್ಲಾ ಡಿಸೋಜ ಜೊಡ್ಯಾಕ್ ಜಲ್ಮಲ್ಲ್ಯಾ ಎಡ್ವಿನ್ ಜೋಸೆಫ್ ಫ್ರಾನ್ಸಿಸ್ ಡಿಸೊಜಾನ್, ಆಪ್ಲಿಂ ಸುರ್‍ವಿಲಿಂ ಬರ್‍ಪಾಂ ಇಂಗ್ಲಿಶಾನ್ ಪ್ರಸ್ತುತ್ ಕೆಲಿಂ ಆನಿ 1964 ಇಸ್ವೆಂತ್ ತಾಣೆ ಕೊಂಕಣಿಂತ್ ಲಿಖುಂಕ್ ಸುರು ಕೆಲೆಂ. ( ಸುರ್ವಿಲೆಂ ಲಿಕ್ಣೆನಾಂವ್ : ವಾಸು, ವಾಲೆನ್ಸಿಯಾ) ಕೊಂಕಣಿಂತ್ ಮಾತ್ರ್ ನ್ಹಯ್ ಸಬಾರ್ ಇಂಗ್ಲಿಷ್ ದಿಸಾಳ್ಯಾಂನಿ ಆನಿ ನೆಮಾಳ್ಯಾಂನಿ ತಾಚಿಂ ಬರ್ಪಾಂ ಪರ್ಗಟ್ ಜಾತೆಚ್ ಆಸಾತ್. ತಾಚ್ಯೊ ಮಟ್ಟ್ಯೊ ಕಥಾ, ಇಂಗ್ಲಿಷ್, ತಮಿಳ್, ಹಿಂದಿ, ಕನ್ನಡ, ಕಾಶ್ಮೀರಿ ಆನಿ ಹೆರ್ ಭಾಸಾಂನಿ ಭಾಶಾಂತ್ರ್ ಜಾಲ್ಯಾತ್. ತಾಚಿ ಏಕ್ ಮಟ್ವಿ ಕೊಂಕಣಿ ಕಥಾ ಚೊಕ್ಲೇಟ್ಸ್ ಜಿ ತಾಣೆಂಚ್ ಇಂಗ್ಲಿಷ್ ಭಾಶೆಂತ್ ತರ್‍ಜಣ್ ಕೆಲ್ಲಿ, ವಿಶ್ವವಿಖ್ಯಾತ್ Readers’ Digest ಮ್ಹಯ್ನ್ಯಾಳ್ಯಾಚ್ಯಾ ದೋನ್ ಕಲೆಕ್ಟರ್ಸ್ ಎಡಿಶನಾಂತ್ ಪರ್ಗಟ್ ಜಾಲ್ಯಾ. ತಾಣೆಂಚ್ ತರ್‍ಜಣ್ ಕೆಲ್ಲಿ ತಾಚಿ 'A Cup of Hot Coffee' ಮಟ್ವಿ ಕಥಾ ದೆ. ಖುಶ್ವಂತ್ ಸಿಂಘ್ ಹಾಣೆ ವಿಂಚುನ್ ಆಪ್ಲ್ಯಾ 'Our Favourite Indian Stories’ ಸಂಗ್ರಹಾಂತ್ (2002) ಪರ್ಗಟ್ ಕೆಲ್ಯಾ. ತಾಚಿ ಭೋವ್ ಯಶಸ್ವಿ ಕಾದಂಬರಿ ಕಾಳೆಂ ಭಾಂಗಾರ್, ಗೋವಾ ಕೊಂಕಣಿ ಅಕಾದಮಿನ್ 2013 ವ್ಯಾ ವರ್ಸಾ ನಾಗರಿಕ್ ಲಿಪ್ಯಂತರ್ ಕರುನ್ ಪರ್ಗಟ್ ಕೆಲ್ಯಾ. ಎಡ್ವಿನಾನ್ಂಚ್ ನಾಗರಿಕ್ ಲಿಪ್ಯಂತರ್ ಕೆಲ್ಲ್ಯಾ ತಾಚ್ಯಾಚ್ 22 ಮಟ್ವ್ಯಾ ಕೊಂಕಣಿ ಕಥೆಂಚೊ ಪುಂಜೊ, 'ಪಯ್ಣ್' ಗೊಂಯ್ಚ್ಯಾ 'ಬಿಂಬ್' ಪ್ರಕಾಶನಾನ್ ಪರ್ಗಟ್ಲಾ. ತಾಣೆಂಚ್ ಇಂಗ್ಲಿಷಾಕ್ ಭಾಶಾಂತರ್ ಕೆಲ್ಲ್ಯಾ ತಾಚ್ಯಾಚ್ ಕೊಂಕಣಿ ಮಟ್ವ್ಯಾ ಕಥೆಂಚೊ ಸಂಗ್ರಹ್ ಚೊಕ್ಲೆಟ್ಸ್, ಚೆನ್ನೈ ಥಾವ್ನ್ 'The English Titles' ಮ್ಹಳ್ಳ್ಯಾ ಪ್ರಕಾಶನಾನ್ ಪರ್ಗಟ್ ಕೆಲಾ. ಚೆನ್ನೈಚೊ ಆದ್ಲೊ ಮುಖೆಲ್ ಮಂತ್ರಿ ಮಾನೆಸ್ತ್ ಕರುಣಾನಿಧಿನ್ ಸ್ಥಾಪಿತ್ ಕೆಲ್ಲ್ಯಾ Booksellers & Publishers Association of South India (BAPASI) ಸಂಸ್ಥ್ಯಾನ್, ಅಲ್ಪ್‌ಸಂಖ್ಯಾತ್ ಭಾಶೆಂತ್ಲ್ಯಾ ಸಾಹಿತಿಕ್ ದಿಂವ್ಚಿ ವರ್‍ಸಾವಾರ್ ಪ್ರಶಸ್ತಿ 2012 ಎಡ್ವಿನಾಕ್ ಫಾವೊ ಜಾಲ್ಯಾ. ಆಜ್ ಪರ್‍ಯಾಂತ್ ಎಡ್ವಿನಾಚ್ಯೊ ತೆತ್ತೀಸ್ ಕೊಂಕಣಿ ಕಾದಂಬರಿ, ಸಾಂಕಳ್ ಕಾಣಿಯೆಂ ರುಪಾರ್ ಯಾ ಶೀದಾ ಪುಸ್ತಕಾಂ ರುಪಾರ್ ಪರ್ಗಟ್ ಜಾಲ್ಯಾತ್. ಶೆಂಬರಾಂ ವಯ್ರ್ ಮಟ್ವ್ಯೊ ಕಥಾ, ಅಂಕಣಾಂ, ವಿಡಂಬನಾಂ ತಾಣೆ ಲಿಕ್ಲ್ಯಾಂತ್. ಭೊಗ್ಸಾಣೆ ಕೊಂಕಣಿ ಫಿಲ್ಮಾಚೆಂ ಥೊಡೆಂ ಸಂಭಾಶಣ್ ತಾಚೆಂಚ್. ಎದೊಳ್ ಪರ್‍ಯಾಂತ್ ಇಕ್ರಾ ಸಾಹಿತಿಕ್ ಪ್ರಶಸ್ತ್ಯೊ ತಾಕಾ ಲಾಭ್ಲ್ಯಾತ್ ಆನಿ ಆಂವ್ದುಂಚ್ಯಾ ದಿಸಾಂನಿ ತಾಣೆ ಆಪ್ಲೆಂ ಗುಮಾನ್ ಚಡಿತ್ ಮಾಪಾನ್ ಮಟ್ವ್ಯಾ ಕಥೆಂಚೆರ್, ಅಂಕಣಾಂಚೆರ್ ಆನಿ ತಾತ್ವಿಕ್ ವಿಶಯಾಂಚೆರ್ ಘುಂವ್ಡಾಯ್ಲಾಂ ಆನಿ ತ್ಯಾ ತೆಕಿದ್‌ಚ್ ತೊ ಲಿಕ್ತಾ. 2008 ಥಾವ್ನ್ 2012 ಪರ್ಯಾಂತ್ ತೊ ನ್ಯೂ ಡೆಲ್ಲಿಚ್ಯಾ ಸಾಹಿತ್ಯ ಅಕಾಡೆಮಿಚ್ಯಾ ಜೆರಾಲ್ ಸಭೆಚೊ ಸಾಂದೊ ಜಾವ್ನಾಸ್‌ಲ್ಲೊ. ಪ್ರಸ್ತುತ್, ಸಾಂ ಲುವಿಸ್ ಕೊಲೆಜಿಚ್ಯಾ Institute of Konkani ಹಾಚೊ ಕಾರ್ಯಕರಿ ನಿರ್ದೇಶಕ್ ಆನಿ ಅಮರ್ ಕೊಂಕಣಿ ಸಂಸೊಧಿಕ್ ಶಣ್ಮಾಸಿಕಾಚೆಂ ಸಂಪಾದಕ್ಪಣ್ ಸಾಂಬಾಳ್ತಾ. 2013 ಶೈಕ್ಷಣಿಕ್ ವರ್‍ಸಾ ಥಾವ್ನ್ ಗೋವಾ ಯುನಿವರ್ಸಿಟಿಚ್ಯಾ ಕೊಂಕಣಿ ವಿಭಾಗಾಚ್ಯಾ ಸಲಹಾ ಸಮಿತಿಂತ್ ತೊ ಆಸಾ. ಮುಳಾವ್ಯಾ ದೇವ್‌ಶಾಸ್ತ್ರಾಂತ್ 'ಆಮೆರಿಕನ್ ಬಾಯ್ಬಲ್ ಸ್ಕೂಲ್' ಹಾಂಗಾ ಥಾವ್ನ್ ತಾಕಾ ಪಾಂಚ್ ಪದವಿಕಾ ಲಾಭ್ಲ್ಯಾತ್ ಆನಿ ಪಾಟ್ಲ್ಯಾ ತೆರಾ ವರ್‍ಸಾಂ ಥಾವ್ನ್ ಸಾಂ ಲುವಿಸ್ ಪಿ.ಯು. ಕೊಲೆಜಿಚ್ಯಾ ಪಯ್ಲ್ಯಾ ಆನಿ ದುಸ್ರ್ಯಾ ವರ್‍ಸಾಚ್ಯಾ ವಿದ್ಯಾರ್ಥಿಂಕ್ ಮುಳಾವ್ಯಾ ದೇವ್‌ಶಾಸ್ತ್ರಾಚೆರ್ ಉಲವ್ಪಾಂ ದಿತಾ. ಭಾರತೀಯ್ ಕೇಂದ್ರ್ ಸರ್ಕಾರಾಚ್ಯಾ ಸಂಸ್ಕೃತಿ ಮಂತ್ರಾಲಯಾನ್ (Ministry of Culture, Government of India) ವರ್‍ಸಾವಾರ್ ಸಂಸೊಧಿಕ್ ವೇತನಾಂಕ್ ದಾಖಲ್ ಜಾಲ್ಲ್ಯಾ ಕೊಂಕಣಿ ಅಭ್ಯರ್ಥಿಂಕ್ ವಿಂಚುನ್ ಕಾಡ್ಚ್ಯಾ ಪರಿಣತಾಂಚ್ಯಾ ಸಮಿತಿಂತ್ 2012 ಥಾವ್ನ್ ದೋನ್ ವರ್‍ಸಾಂಚೆ ಆವ್ದೆಕ್ ತಾಕಾ ನೇಮಕ್ ಕೆಲಾ. ಎಡ್ವಿನ್, ಜಾಣೆ ಸೊಳಾ ವರ್‍ಸಾಂ ಕುವೇತಾಂತ್ ತೆಲಾ ಸಂಸಾರಾಂತ್ ವಾವ್ರ್ ಕೆಲ್ಲೊ, 1990 ಥಾವ್ನ್ ಆಪ್ಲೆ ಪತಿಣೆ ಜೇನಾ ಸಂಗಿಂ ಮಂಗ್ಳುರ್‍ಚ್ಯಾ ಮಿಲಾರಾಂತ್ ವಸ್ತಿ ಕರುನ್ ಆಸಾ. ತಾಕಾ ಎಕ್ಲಿಚ್ ಧುವ್, ರೂತ್ ಎಸ್ತೆರ್ ಪ್ರಭು ಬೆಂಗ್ಳುರಾಂತ್ ಕುಟ್ಮಾಸವೆಂ ವಸ್ತಿ ಕರ್ತಾ.