ತ್ಯೆ ಕುಶಿನ್ ಮೆಟಾ೦ ಕಾಡ್ತಾನಾ ತೊ ಆಪ್ಲೆಸ್ತಕಿ೦ ಹಾಸ್ಲೊ. ವಾಟ್/ದಿಶಾ ದಾಕಯ್ತೆಲೆ ಜಾಯ್ತೆ ಆಸ್ಲ್ಲೆ ಪುಣ್ ವಾಟ್ ತಾಣೆ೦ಚ್ ಚಮ್ಕಾಜೆ ಆಸ್ಲ್ಲಿ.
ಆನಿ ತೊ ಚಮ್ಕಾಲೊ.
ತಾಚ್ಯಾ ವೊಲ್ಲೆಟಾ೦ತ್ ಧಾ-ಪ೦ದ್ರಾ ದಿಸಾ೦ಕ್ ಜಾಯ್ ಪುರ್ತೆ ಪಯ್ಶೆ ಆಸ್ಲ್ಲೆ ಆನಿ ತೆ ಕಾಬಾರ್ ಜಾಲ್ಯಾರಿ ತಾಕಾ ಫಿಕ್ರ್ ನಾತ್ಲ್ಲಿ. ತೊ ಕಸಲ್ಯಾಕಿ – ಕಸಲ್ಯಾಯಿ ವಾವ್ರಾಕ್ ತಯಾರ್ ಆಸ್ಲ್ಲೊ. ಚಡ್ ಕಿತ್ಯಾಕ್, ಕಸಲ್ಯಾಯಿ ಜಿಣಿಯೆಕ್ ತಯಾರ್ ಆಸ್ಲ್ಲೊ.
ಸುಮಾರ್ ಎಕ್ವೀಸ್ ಮಿನುಟಾ೦ಚಿ ವಾಟ್ ಚಲ್ಲ್ಯಾ ಉಪ್ರಾ೦ತ್ ತಾಕಾ ರಯ್ಲ್ವೇ ಸ್ಟೆಶನಾಚೆ೦ ಭುರ್ಜ್ ದಿಸ್ಲೆ೦ ಆನಿ ಖಿಣ್ಭರ್ ರಾವೊನ್ ತಾಣೆ ಆಪ್ಲಿ ಚಾಲ್ ಸುಗಮ್ ಕೆಲಿ ಆನಿ ಪಾ೦ಚ್ ಮಿನುಟಾ೦ನಿ ತೊ ಸ್ಟೇಶನಾ ಭಿತರ್ ಪಾವ್ಲೊ. ಚಡ್ ಗಡ್ದಿ ನಾತ್ಲ್ಲಿ ಆನಿ ಕೌ೦ಟರಾಕ್ ವಚುನ್ ತಾಣೆ ರಯ್ಲ್ವೇ ವೆಳಾ-ಪಟ್ಟೇಚಿ ಕಡ್ತಿಲ್ ಘೆತ್ಲಿ. ಭಾಯ್ರ್ ಯೆವ್ನ್ ತೊ ವೊತಾಚೆ ಉಬೆ೦ತ್ ಆಸ್ಚ್ಯಾ ಎಕಾ ಬಾ೦ಕಾಚೆರ್ ಬಸ್ಲೊ ಆನಿ ಆಪ್ಲೆಚ್ ಹಾಳ್ವಾಯೆನ್ ತಾಣೆ ತಿ ವೆಳಾ-ಪಟ್ಟಿ ಉಸಯ್ಲಿ.
ಆತಾ೦ ತಾಕಾ ವಿ೦ಚವ್ಣ್ ಕರು೦ಕ್ ಆಸ್ಲ್ಲಿ.
ಹೆಂ ಚಿಂತುನ್ ತೊ ಹಾಸ್ಲೊ.
ತಾಚಿ ಯೆದೊಳ್ಚಿ ಜೀಣ್ ತಾಣೆ ವಿಂಚವ್ಣ್ ಕರ್ಚ್ಯಾಂತ್ಚ್ ಖರ್ಚಿಲ್ಲಿ, ಪುಣ್ ಸುಗಮಾಯೆನ್ ನ್ಹಯ್. ತಾಚೆ ಜಿಣಿಯೆಂತ್ ಪಂಥಾಹಾವನ್ ನಾ ತರ್ ಕಿತೆಂಚ್ ನಾತ್ಲ್ಲೆಂ. ಆಪ್ಣಾಲಾಗಿಂ ಕಿತೆಂಚ್ ನಾತ್ಲ್ಲೆಂ ತರಿ ತಾಣೆ ಸರ್ವ್ ಹೊಗ್ಡಾಯಿಲ್ಲೆಂ-
ಕಿತೆಂಚ್ ನಾತ್ಲ್ಲ್ಯಾಥಾವ್ನ್ ಸರ್ವ್ ಹೊಗ್ಡಾಂವ್ಕ್ ರಿಚ್ಚರ್ಡ್ ತಸಲ್ಯಾಂ ಥಾವ್ನ್ ಮಾತ್ರ್ ಸಾದ್ಯ್. ಪುಣ್ ಹೆಂ ಕೋಣ್ ಸಮ್ಜೊಂಕ್ ಸಕತ್? ಫಕತ್ ಜ್ಯೂಡಿ ಆಂಟಿ, ಜೋರ್ಜ್, ನರ್ಸ್ ಯ್ಯೂಲಾ ಆನಿ ಕ್ಯಾಂಡಿ?
ತಾಣೆ ರಯ್ಲಾಚಿ ವೆಳಾಪಟ್ಟಿ ಉಸಯ್ಲಿ ತರಿ ತಾಚೆಂ ಗಮನ್ ಖಂಚಾಯಿ ಠಿಕಾಣ್ಯಾಕ್ ನಿಘ್ಹಂಟ್ ಕರುಂಕ್ ಸಕ್ಲೆಂ ನಾ; ಸ್ಥಿರತಾ ತಾಚೆ ಥಂಯ್ ಆಸ್ಲ್ಲಿ ತರಿ, ಪಂಥಾಹ್ವನ್ ನಾತ್ಲ್ಲಿ ಥಿರಾಸಣ್ ತಾಕಾ ನಾಕಾಸ್ಲಿ. ಅಸಲಿ ಸ್ಥಿರತಾ ಎಕ್ ಮುನ್ಕುಟೊ ಆಸ್ಚೆಪರಿಂ.
ತರೀ ಅಶೀರ್ ಅವ್ಕಾಸ್ ಘೆಂವ್ಚ್ಯಾಂತ್ಯಿ ಮಝಾ ಆಸಾ ನ್ಹಯ್? ವೊಲಾಟಾಂತ್ ತಾಚ್ಯಾ ಚಡ್ ದುಡು ನಾತ್ಲ್ಲೊ ಪುಣ್ ಯೆದೊಳ್ ಪರ್ಯಾಂತ್ ತಾಣೆ ಚಾಕ್ಲ್ಲ್ಯಾ ಸಂಸಾರಾಂತ್ ತಾಕಾ ಲಾಬ್ಲ್ಲೊ ತರ್ಜುಬೊ ತಾಚೆಥಂಯ್ ಕಸಲೆಂಯಿ ಭೆಂ ಆಸ್ಲ್ಯಾರ್ ಕಾಡುಂಕ್ ಸಕ್ಲ್ಲೊಚ್. ಹಾಕಾ ಲಾಗುನ್ ತಾಣೆ ವಿಂಚವ್ಣ್ ಕೆಲಿ – ದೇಶಾಚ್ಯಾ ದಕ್ಷಿಣಾಕ್ ವೆಚಿ. ವಿಂಚವ್ಣ್ ಕೆಲ್ಲ್ಯಾ ಖಿಣಾ ಭಿತರ್ ತಾಣೆ ಆಪ್ಣಾಕ್ ಮತಿಕ್ ಗೆಲ್ಲೊ ಪ್ರದೇಶ್ ವಿಂಚ್ಲೊ-ಪೆಟ್ರೋಸ್ಟೇಟ್. ಚಡ್ ಪ್ರಾಯ್ವಂತ್ ಪ್ರಾಂತ್ಯ್ ಹೆಂ ನ್ಹಯ್ ಪುಣ್ ಕಿತೆಂ ಕರುಂಕ್ ಆಸಾ? ಡೆನಿಸಾನ್ ತಾಕಾ ತರ್ಬೆತಿ ದಿಲ್ಲಿ ಆನಿ ಹ್ಯಾ ತರ್ಬೆತಿಕ್ ಲಾಗುನ್ಂಚ್ ತಾಚೆ ಥಂಯ್ ಧಯ್ರ್ ಆಯಿಲ್ಲೆಂ ಆನಿ ಆಪ್ಣಾಚಿ ಜಿಣಿ ಫಲಾಣ್ಯಾ ಪರಿದ್ಯಾಂಕ್ ಸೀಮಿತ್ ನ್ಹಯ್, ಆಪುಣ್ ಎಕ್ ಅಜಾದ್ ಗೀದ್ ಮ್ಹಳ್ಳಿ ಸ್ವಪಾತ್ಯೆಣಿ ತಾಚೆ ಥಂಯ್ ಉದೆಲ್ಲಿ.
ಪೆಟ್ರೋಸ್ಟೇಟ್ ತರ್ ಪೆಟ್ರೋಸ್ಟೇಟ್.
ತಾಣೆ ಟಿಕೆಟ್ ಕಾಪ್ಲಿ, ನಿಲ್ದಾಣಾಚ್ಯಾ ಕ್ಯಾಂಟೀನಾಂತ್ ಫಳಾರ್ ಕೆಲೊ, ಬುಕ್ ಸ್ಟೋಲಾಂನಿ ಸೊದುನ್ ಪೆಟ್ರೋಸ್ಟೇಟಾಥಾವ್ನ್ ಪ್ರಗಟ್ ಜಾಂವ್ಚೆ ಮೆಗಝಿನ್ ಖರೀದ್ ಕೆಲೆ ಆನಿ ಆಪ್ಲೆಂ ಫ್ಲ್ಯಾಟ್ಫೋರ್ಮ್ ಖಚಿತ್ ಕರುನ್ ತೊ ರಯ್ಲಾಚ್ಯಾ ಯೆಣ್ಯಾಕ್ ರಾಕೊನ್ ರಾವ್ಲೊ. ತಾಚ್ಯಾ ಗಮನಾಕ್ ಗೆಲೆಂಕಿ ತಾಚೊ ಊಂಡ್ ಮಾತ್ಸ್ಯಾ ವೆಗಾನ್ ಉಡ್ಟಾಲೊ, ನವ್ಯಾನ್ ಶಾಳೆಕ್ ದಾಕಲ್ ಜಾಲ್ಲ್ಯಾ ಧಾಕ್ಟುಲ್ಯಾ ಭುರ್ಗ್ಯಾಚ್ಯಾ ಊಂಡಾಪರಿಂ.
ಎಕ್ವೀಸ್ ಘಂಟ್ಯಾಂಚೆಂ ಪಯ್ಣ್. ಕಂಪಾರ್ಟ್ಮೆಂಟ್ ಸುಶೆಗಾಚೆಂ. ಸ್ಲೀಪರಾಚೆರ್ ವಯ್ಲೆಂ ಶಯನ್ ತಾಣೆ ಘೆತ್ಲ್ಲೆಂ. ರಯ್ಲ್ ಯೆತೆಚ್ ತೊ ಎಕ್ ಲಾಂಬ್ ಉಸ್ವಾಸ್ ಸೆವಿತ್ತ್ ಬಿತರ್ ರಿಗ್ಲೊ.
ಥೊಡಯಚ್ ಮಿನುಟಾಂನಿ ಪಯ್ಣ್ ಸುರು ಜಾಲೆಂ. ಕಂಪಾರ್ಟ್ಮೆಂಟಾ ಭಿತರ್ ನಿಯಂತ್ರಿತ್ ಹವೊ ಆಸ್ಲ್ಲೊ, ಆನಿ ತೆಂ ರಯ್ಲ್ ಖಾಸ್ ಕರುನ್ ಪೆಟ್ರೋಸ್ಟೇಟಾಕ್ ಅಮಾನತ್. ಕಚ್ಚಾ ತೆಲಾಚ್ಯಾ ಪ್ರಬಾವಾನ್ ದೇಶಾಂತ್ ಘಡಿಯೆಕ್ ಎಕ್ ಪ್ರಗತಿ ಜಾತಾಲಿ. ಪೆಟ್ರೋಲಿಯುಮ್ ಸಂಸಾರಾಚೊ ಹವೊ ತಾಕಾ ನಾತ್ಲ್ಲೊ ಮ್ಹಣ್ ನ್ಹಯ್; ಡೆನಿಸಾ ಸಾಂಗಾತಾ ತರ್ಭೆತಿಕ್ ವಳಗ್ ಜಾಲ್ಲ್ಯಾ ತಾಕಾ ಕಾಂಯ್ ತರಿ ಮಾಹೆತ್ ಆಸ್ಲ್ಲಿ ಆನಿ ಗರ್ಜ್ ಪಡ್ಲ್ಯಾರ್ ಹಿಚ್ಚ್ ಮಾಹೆತ್ ತೆಲಾ ಸಂಸಾರಾಂತ್ ಆಪುಣ್ ಚಲಯ್ತೊಲೊಂ ಮ್ಹಳ್ಳಿಂ ಚಿಂತ್ನಾಂ ತಾಚ್ಯಾ ಮತಿಂತ್ ಆಸ್ಲ್ಲಿಂ. ಪುಣ್ ತಾಕಾ ಖಂಚಾಯಿ ಎಕಾ ರಿಫಾಯ್ನರಿಂತ್ ನವ್ಕರಿ ಕರ್ಚಿ ಉರ್ಬಾನಾತ್ಲ್ಲಿ. ರಿಫಾಯ್ನರಿ ಎಕ್ ವ್ಹಡ್ ಸಾಗೊರ್, ಎಕ್ ದೇಡ್ ಹಜಾರ್ ಕಾಮೆಲಿ, ವೆವೆಗ್ಳ್ಯಾ ಡಿಪಾರ್ಟ್ಮೆಂಟಾಂನಿ. ಎಕೇಕ್ ಡಿಪಾರ್ಟ್ಮೆಂಟ್ ಮ್ಹಳ್ಯಾರ್ ಎಕೇಕ್ ಸಂಸಾರ್. ಹಾಂತುಂ ಜವಾಬ್ದಾರಿ ಸುಗಮಾನ್ ಚಲತ್ ಪುಣ್ ಹರ್ಯೆಕಾ ಡಿಪಾರ್ಟ್ಮೆಂಟಾಕ್ ದುಸ್ರ್ಯಾ, ತಿಸ್ರ್ಯಾ ಆನಿ ಕ್ರಮೇಣ್ ಸಗ್ಳ್ಯಾ ರಿಫಾಯ್ನರಿಕ್ ಗಾಂಟಾತಾಲೆಂ. ಅಸಲ್ಯಾ ಎಕಾ ಸಿಸ್ಟಮಾಂತ್ ಎಕಾ ಡಿಪಾರ್ಟ್ಮೆಂಟಾನ್ ಆಪಾಪ್ಲೆ ಊಣ್ ದುಸ್ರ್ಯಾಚೆರ್ ಘಾಲ್ಚೆಂ ಸಾಮಾನ್ಯ್. ಎಕ್ ಚುಕಾರಿಮಾರ್ ವಾತಾವರಣ್ ಸಗ್ಳ್ಯಾನಿತ್ಲ್ಯಾನ್. ಆಪ್ಣಾಕ್ ಕಿತೆಂ, ಆಪುಣ್ ಸರ್ಕಾರಿ ನವ್ಕರ್, ಮ್ಹಾಕಾ ಐ.ಡಿ. ಕಾರ್ಡ್ ಆಸಾ, ಸರ್ಕಾರಾನ್ ದಿಂವ್ಚ್ಯೊ ಸವ್ಲತ್ಯೊ ಆಸಾತ್, ತಿತ್ಲ್ಯಾ ಸುಲಬಾಯೆನ್ ಮ್ಹಾಕಾ ನವ್ಕರೆಂತ್ಲೊ ಕಾಡುಂಕ್ ಲೇಬರ್ ಯುನಿಯನ್ ಸೊಡಿನಾ ಆನಿ ಮ್ಹಾಕಾ ರಿಫಾಯ್ನರಿಕ್ ಉಜೊ ಲಾಂವ್ಚಿ ಕಸಲಿಚ್ ಮಾಂಡ್ಣಿ ನಾತ್ಲ್ಲ್ಯಾನ್ ಆಪುಣ್ ಫರಗಾತ್ತ್ ಆಸಾಂ. ಅಸಲೆಂ ವಾತಾವರಣ್ ರಿಚ್ಚರ್ಡಾಕ್ ನಾಕಾಸ್ಲೆಂ.
ದುಸ್ರ್ಯಾ ದಿಸಾಚೆಂ ಫಾಂತೆಂ ಜಾತಾನಾ ರಯ್ಲ್ ಪೆಟ್ರೋಸ್ಟೇಟಾಕ್ ಪಾವ್ಲೆಂ. ಸಕಾಳಿಂಚಿ ಛಾ ಯೆದೊಳ್ಚ್ ಸೆವ್ಲ್ಲ್ಯಾನ್ ತೊ ಪ್ರಫುಲ್ಲ್ ಆಸ್ಲ್ಲೊ. ಸ್ಟೇಶನಾಂತ್ ಚಡ್ ಗಡ್ದಿ ನಾತ್ಲ್ಲಿ, ಭಾಯ್ರ್ ಟೆಕ್ಸಿ ಸ್ತೇಂಡಾಕ್ ಯೆತಾನಾ ತಾಕಾ ದಮಟ್ ಮಿಸ್ಳಾಲ್ಲೊ ಹವೊ ತಾಕಾ ಆದಾಳ್ಳೊ ತ್ಯಾ ಹವ್ಯಾಂತ್ ಕಸಲ್ಯಾಗಿ ರಸಾಯನಾಂಚೊ ವಾಸ್ ಆಸ್ಲ್ಲೊ-ರಿಫಾಯ್ನರಿಚ್ಯಾ ಸಮೀಪಾಯೆಚೆಂ ಪ್ರದೂಷಣ್.
ತೇಗ್ ಚವ್ಗ್ ಟೆಕ್ಸಿವಾಲೆ ತಾಚೆ ಸರ್ಶಿಂ ಆಯ್ಲೆ ಆನಿ ಪ್ರಾಯ್ವಂತ್ ಕಸೊ ದಿಸ್ಚ್ಯಾಚಿ ಟೆಕ್ಸಿ ತಾಣೆ ಘೆತ್ಲಿ. ಚಾಲಕಾನ್ ತಾಕಾ ಖಂಯ್ ವಚುಂಕ್ ಜಾಯ್ ಮ್ಹಣ್ ಪರ್ಯಾಂತ್ ವಿಚಾರ್ಲೆಂ ನಾ.
‘ತುಕಾ ಖಂಯ್ ವಚುಂಕ್ ಜಾಯ್ ಮ್ಹಳ್ಳೆಂ ಹಾಂವ್ ಜಾಣಾಂ, ಸರ್!’ ತೊ ಮ್ಹಣಾಲೊ. ‘ತುಜ್ಯಾ ಜಿನೊಸಾನ್ಂಚ್ ಕಳಿತ್ ಜಾತಾ ತುಂ ಹಾಂಗಾಸರ್ ನವ್ಕರೆಚ್ಯಾ ಸೊದ್ನೆರ್ ಆಯ್ಲಾಯ್. ರಿಫಾಯ್ನರಿಂತ್ ತುಕಾ ಅವ್ಕಾಸ್ ಆಸ್ಚೆ ಉಣೆ ಪುಣ್ ಸಬಾರ್ ಖಾಸ್ಕಿ ವಯ್ವಾಟೀ ಕಂಪೆನ್ಯೊ ಆಸಾತ್. ಖಂಚಾಕಿ ತುಕಾ ಎಕಾ ಬರ್ಯಾ, ನಿತಳ್ ವಾತಾವರಣಾಚ್ಯಾ ಹೊಟೆಲಾಕ್ ಹಾಂವ್ ವರ್ತಾಂ. ತುಕಾ ಪುರೊ ಪಡ್ತೆಲೆಂ, ತುಜ್ಯಾ ಬಲ್ಸಾಂತ್ ಚಡ್ ನಾಂತ್ ಪುಣ್ ಪುರೊ ಮ್ಹಳ್ಳೊ ಮ್ಹಜೊ ತರ್ಜುಬೊ. ಉತ್ತರ್ ದಿಶೆಥಾವ್ನ್ ಆಯ್ಲಾಯ್, ವ್ಹಯ್? ಹಾಂಗಾಸರ್ ಸುಂದರ್ ದರ್ಯಾ ಕಿನಾರೆ ಆಸಾತ್. ಹೆರ್ ಸರ್ವಯಿ ಆಸಾ ಪುಣ್ ತುಕಾ ತೆಂ ಸರ್ವ್ ನಾಕಾ, ತರ್ನಾಟ್ಯಾ…..ಹಾಂವ್ ಚಡ್ ಉಲಯ್ತಾಂ ನ್ಹಯ್?’
‘ವ್ಹಯ್, ತುಂ ಚಡ್ ಉಲಯ್ತಾಯ್!’ ರಿಚ್ಚರ್ಡ್ ವೊಪ್ಲೊ. ‘ತುಂ ಮ್ಹಾಕಾ ಕಸಲ್ಯಾಯಿ ಶಿರಿಗುಂಡಿಯೆಂತ್ ಸಾಂಪ್ಡಾಯ್ನಾಂಯ್ ಮ್ಹಳ್ಳಿ ಕಸಲಿ ಹಮಿದಾರಿ?’
‘ಕಸಲಿಚ್ ಹಮಿದಾರಿ ನಾ!’ ಜಾಪ್ ದಿಲಿ ಟೆಕ್ಸಿವಾಲ್ಯಾನ್ ಎಕ್ ದೋನ್ ಖಿಣಾಂಕ್ ಉಜ್ವ್ಯಾಕ್ ಬಸ್ಲ್ಲ್ಯಾ ರಿಚ್ಚರ್ಡಾಕ್ ಪಳೆವ್ನ್. ‘ಪುಣ್ ತುಂ ಕಸಲ್ಯಾಕಿ ತಯಾರ್ ಆಸ್ಚೊ ತರ್ನಾಟೊ ಮ್ಹಣ್ ಮ್ಹಾಕಾ ಭೊಗ್ತಾ. ನಾ ತರ್, ತುಂ ಟೆಕ್ಸೆಂತ್ ಚಾಲಕಾ ಸಾಂಗಾತಾಚ್ ಬಸ್ತೊನಾಂಯ್!’
ರಿಚ್ಚರ್ಡ್ ಹಾಸ್ಲೊ. ‘ಚಾಲಕಾ ಸಾಂಗಾತಾ ಬಸ್ಚ್ಯಾಂತ್ ಮ್ಹಾಕಾ ಉಣೆಪಣ್ ಭೊಗಾನಾ.’
‘ತುಜೊ ಹಾಸೊ ಸಯ್ತ್ ಸ್ವಪಾತ್ಯೆಣಿ ಪಾಚಾರ್ತಾ.’ ಮ್ಹಳೆಂ ಟೆಕ್ಸಿವಾಲ್ಯಾನ್. ‘ಜಿಣಿ ಸೊದುನ್ ತುಂ ಆಯ್ಲಾಯ್’.
‘ಜಾವ್ಯೆತ್!’ ಮ್ಹಳೆಂ ರಿಚ್ಚರ್ಡಾನ್. ‘ಆತಾಂ ಮ್ಹಾಕಾ ನವ್ಕರಿ ಸೊದುಂಕ್ ಕುಮಕ್ ಕರ್ಶಿ?’
‘ಬಿಲ್ಕುಲ್ ನಾ,’ ಮ್ಹಳೆಂ ಟೆಕ್ಸಿವಾಲ್ಯಾನ್. ‘ಜಾಯ್ರಾತಾಂ ಪಳೆ.’
‘ಬರಾಬರ್!’ ವೊಪ್ವಾಲೊ ರಿಚ್ಚರ್ಡ್.
ಉಪ್ರಾಂತ್ ಉಲವ್ಣೆಂ ಚಲ್ಲೆಂ ನಾ. ತಾಕಾ ಎಕಾ ವೆವಸ್ಥಿತ್ ದಿಸ್ಚ್ಯಾ ಹೊಟೆಲಾಕ್ ಪಾವವ್ನ್ ಟೆಕ್ಸಿವಾಲ್ಯಾನ್ ಭಾಡೆಂ ಘೆತ್ಲೆಂ.
ಹೊಟೆಲ್ ರೂಮಾಕ್ ರಿಗ್ಲ್ಲ್ಯಾ ರಿಚ್ಚರ್ಡಾಚಿ ಮೋತ್ ಯೆಕಾಚಾಣೆ ಶೂನ್ಯ್ ಜಾಲಿ. ಕಿತ್ಲೊ ವೆಳ್ ಅಸೊಚ್ಚ್ ತೊ ಬಸುನ್ ಆಸ್ಲ್ಲೊ ತಾಕಾ ಕಳಿತ್ ಜಾಲೆಂ ನಾ. ಪಯ್ಣಾಚಿ ಪುರಾಸಣ್ ಆಸ್ಲ್ಲಿ, ಎ.ಸಿ. ಚಾಲು ಕರುನ್ ತೊ ನಿದ್ಲೊ. ತಾಕಾಚ್ ಕಳಿತ್ ನಾತ್ಲ್ಲೆಂ ತಾಚಿ ಮೋತ್ ಕಿತ್ಲೊ ಸುಶೆಗ್ ಆಶೆತಾ ಮ್ಹಣ್. ಬಸ್ಲ್ಲೆಕಡೆನ್ಂಚ್ ತೊ ಕೆದಳಾ ಆಡ್ ಪಡ್ಲೊ, ತಾಕಾ ಕಳಿತ್ ಜಾಲೆಂ ನಾ. ಜಾಗ್ ಜಾತಾನಾ ಮೊದ್ಯಾನ್ ರಾತ್ ಉತರ್ಲೆಲಿ. ತಾಣೆ ನಿರ್ಮಳಾಯ್ ಕೆಲಿ ಆನಿ ಲಿಬಾಸ್ ಬದ್ಲುನ್ ತೊ ಚವೀಸ್ ವೊರಾಂಯಿ ಉಗ್ತೆಂ ಆಸ್ಚ್ಯಾ ಕೊಫಿ ಶೊಪಾಕ್/ಬಾರಾಕ್ ಗೆಲೊ. ಎಕ್ ಥಂಡ್ ಬಿಯರ್ ಆನಿ ಹೆಮ್ಬರ್ಗರ್ ಘೆವ್ನ್ ತೊ ಕೆಫೆಟೇರಿಯಾಚ್ಯಾ ಎಕಾ ಮುಲ್ಯಾಂತ್ ಬಸ್ಲೊ. ಥೊಡೆ ತರ್ನಾಟೆ ಚಲಿಯಾಂ ಸಂಗಿಂ ಬಿಯರ್ ಸೆವಿತ್ತ್ ಫಲಾಂ-ಫೊಕಾಣಾಂ ಮಾರ್ತಾಲೆ. ತಾಂಚೆಂ ಗಮನ್ ಹಾಚೆರ್ ನಾತ್ಲ್ಲೆಂ.
ಲಾಗ್ಸಾರ್ಚ್ ಪಡೊನ್ ಆಸ್ಲ್ಲೆಂ ‘ಪೆಟ್ರೊಟಾಯ್ಮ್ಸ್’ ದಿಸಾಳೆಂ ತಾಣೆ ವಿಂಚ್ಲೆಂ; ಪಳೆತಾನಾ ತೆಂ ದೋನ್ ದಿಸಾಂ ಆದ್ಲೆಂ. ತರಿ ತಾಣೆ ‘ಜಾಯ್ ಪಡ್ಲ್ಯಾತ್’ ಕೊಲಮಾಚೆರ್ ನಜರ್ ಚರಯ್ಲಿ. ಸರ್ವ್ ಮಾಮೂಲಿ ಐಲಾನಾ. ಪುಣ್ ಎಕಾ ಬೊಕ್ಸ್ ಐಟಮಾನ್ ತಾಚೆಂ ಗಮನ್ ಧರ್ಲೆಂ:
ಜಾಯ್ ಪಡ್ಲಾ, ಟೆಂಡರ್ ಡಿಪಾರ್ಟ್ಮೆಂಟಾಚೆಂ ಸುಂಕಾಣ್ ಘೆಂವ್ಚೊ ತರ್ನಾಟೊ. ಅಶೀರ್ ಅವ್ಕಾಸ್ ಘೆಂವ್ಕ್ ತಯಾರ್ ಆಸ್ಚೊ, ಸ್ವಪಾತ್ಯೆಣೆನ್ ವಿಂಚವ್ಣ್ ಕರುಂಕ್ ಸಕ್ಚೊ. ತರ್ಜುಬೊ ಆಸಾಜೆ ಮ್ಹಳ್ಳಿ ಗರ್ಜ್ ನಾ. ಅರ್ಜಿ ಘಾಲಾ: ಒಸಿಸ್ ಕಂಪೆನಿ…..
ಹಿ ಜಾವ್ನಾಸ್ಲ್ಲಿ ಎಕ್ ಸುರ್ವಾತ್.
ಬಾರ್ಮೆನಾಲಾಗಿಂ ವಚುನ್ ತಾಣೆ ವಿಚಾರ್ಲೆಂ. ‘ಹೆಂ ಪತ್ರ್ ಹಾಂವೆಂ ವ್ಹರ್ಯೆತ್?’
‘ವ್ಹರ್, ಆಮ್ಚೊ ಕಚ್ರೊ ಉಣೊ ಕರ್.’
‘ತಾಪ್ಲಾಯ್!’ ಮ್ಹಳೆಂ ರಿಚ್ಚರ್ಡಾನ್. ‘ಮ್ಹಜ್ಯಾ ಖರ್ಚಾರ್ ಎಕ್ ಬಿಯರ್ ಸೆವ್ತಾಯ್?’
‘ಕಿತೆಂ ತುಕಾ ಆಜ್ಚ್ಚ್ ನವ್ಕರಿ ಲಾಗ್ಲ್ಯಾ?’
‘ಲಾಗ್ಲ್ಯಾರಿ ಲಾಗ್ಲಿ!’ ಜಾಪ್ ದಿಲಿ ರಿಚ್ಚರ್ಡಾನ್.
‘ಒಸಿಸ್ ಕಂಪೆನಿ.’
‘ಕಿತೆಂ ಮ್ಹಳೆಂಯ್?’
‘ಕಾಂಯ್ ನಾ,’ ಜಾಪ್ ದಿಲಿ ರಿಚ್ಚರ್ಡಾನ್. ‘ಆನ್ಯೇಕ್ ಬಿಯರಿ ದಿ.’
ಬಾರ್ಮೆನಾನ್ ಭುಜಾಂ ಉಡಯ್ಲಿಂ ಆನಿ ಬಿಯರಿಚೆಂ ಪಾಂಯ್ಟ್ ತಾಚ್ಯಾ ಸಾಮ್ಕಾರ್ ದವರ್ಲೆಂ. ‘ತುಜ್ಯಾ ಲೆಕಾರ್ ದಿತಾಯ್ ತರ್ ಹಾಂವ್ಯಿ ಎಕ್ ಬಿಯರ್ ಘೆತಾಂ,’ ದಾಕ್ಷೆಣ್ ಸಾಂಡುನ್ ಮ್ಹಳೆಂ ಬಾರ್ಮೆನಾನ್. ‘ಆಮ್ಕಾಂಯಿ ತಾನ್ ಲಾಗ್ತಾ ಪಳೆ. ತುಂ ಕಸೊಯಿ ಇಂಟ್ರೆಸ್ಟಿಂಗ್ ತರ್ನಾಟೊ ಕಸೊ ದಿಸ್ತಾಯ್. ಸ್ಥಿಮಿತಾಂತ್ ಆಸಾಯ್. ತೊ ಪಂಗಡ್ ಪಳೆ…’
‘ಮ್ಹಾಕಾ ಹೆರ್ ಪಂಗ್ಡಾಂಚೆಂ ಪಡೊನ್ ವಚುನ್ ನಾ.’
‘ಹುಂ, ಘಮಂಡಿಯಿ ಆಸಾಯ್! ಬರೆಂ.’ ಬಾರ್ಮೆನ್ ಮ್ಹಣಾಲೊ. ‘ಪಳೆಂವ್ಕ್ಯಿ ಬರೊ ಆಸಾಯ್, ಕಸಲಿಗಿ ಮನ್ಜಾತ್ ತುಜೆ ಬಿತರ್ ಆಸಾ.’
‘ಮ್ಹಜೊ ಜಿನೊಸ್ ಶೀದಾ!’ ಮ್ಹಳೆಂ ರಿಚ್ಚರ್ಡಾನ್, ಬಾರ್ಮೆನಾಚೆಂ ಗುಮಾನ್ ಗರ್ಜೆಚ್ಯಾಕಿ ಚಡಿತ್ ಮಾಪಾನ್ ಆಪ್ಣಾಚ್ಯಾ ವ್ಯಕ್ತಿತ್ವಾಚೆರ್ ಚರ್ತಾ ತೆಂ ಗಮನಾಂತ್ ಘೆವ್ನ್.
‘ಆನಿ ಹಾಂವ್ ಕಾಂಯ್ ವಿಕೃತ್ ನ್ಹಯ್!’ ಮ್ಹಳೆಂ ಬಾರ್ಮೆನಾನ್.
‘ತುಜಿ ಬಿಯರ್ ಘೆ,’ ಹುಕುಮ್ಶಿ ದಿಲಿ ರಿಚ್ಚರ್ಡಾನ್. ‘ತುಂ ಕಿತೆಂಗಿ ಒಸಿಸ್ ಕಂಪೆನಿ ವಿಷಾಂತ್ ಥೊಡ್ಯಾ ಕೌತುಕ್ ಮಾಪಾನ್ ಉಲಯ್ತಾಲೊಯ್?’
‘ವ್ಹಯ್, ತಶೆಂಗೀ?’ ಕುಸ್ಕುಟ್ ಹಾಸ್ಲೊ ಬಾರ್ಮೆನ್. ‘ಹಾಂವ್ ಮ್ಹಜಿ ಡ್ರಾಫ್ಟ್ ಬಿಯರ್ ಘೆತಾಂ.’
‘ಆನಿ ಕಿತ್ಯಾಕ್ ನಜೊ?’ ವಿಚಾರ್ಲೆಂ ರಿಚ್ಚರ್ಡಾನ್. ‘ಮ್ಹಜೆಂ ನಾಂವ್ಯಿ ವಿಚಾರ್ಲೆಂನಾಂಯ್.’
‘ಮ್ಹಾಕಾ ಗರ್ಜೆಚೆಂ ನ್ಹಯ್.’ ಜಾಪ್ ದಿಲಿ ಬಾರ್ಮೆನಾನ್ ‘ತುಂ ನವ್ಕರಿ ಸೊದುನ್ ಆಯ್ಲಾಯ್, ತಿತ್ಲೆಂಚ್ ಪುರೊ. ಹಾಂವ್ ಕಾಂಯ್ ಮಜತ್ ಕರುಂಕ್ ಸಕ್ತಾಂ ತರ್…’
‘ತುಂ ಕಾಂಯ್ ಎಂಪ್ಲೊಯ್ಮೆಂಟ್ ಎಕ್ಸ್ಚೇಂಜ್ ಸಂಸ್ಥೊ? ರಿಚ್ಚರ್ಡಾನ್ ಆಪ್ಲೆಂ ಕ್ಯಾನ್ ಉಗ್ತೆಂ ಕೆಲೆಂ. ಬಾರ್ಮೆನಾನ್ ಎಕಾ ವ್ಹಡ್ಲ್ಯಾ ಮಗ್ಗಾಂತ್ ಡ್ರಾಫ್ಟ್ ಬಿಯರ್ ಘೆತ್ಲಿ.
‘ಹಾಂವ್ ಕಸಲೊಯಿ ಸಂಸ್ಥೊ ನ್ಹಯ್!’ ಎಕ್ ಘೊಟ್ ಮಾರುನ್ ಬಾರ್ಮೆನಾನ್ ಜಾಪ್ ದಿಲಿ. ‘ಹ್ಯಾ ಡ್ರಾಫ್ಟ್ ಬಿಯರಿಚೆ ಆತಾಂಚ್ ಫಾರಿಕ್ ಕರುಂಕ್ ಪಡ್ತೆಲೆಂ.’
ರಿಚ್ಚರ್ಡಾನ್ ಎಕ್ ನೊಟ್ ಕಾಡುನ್ ಕೌಂಟರಾರ್ ಗಳಯ್ಲೊ. ‘ಮ್ಹಜೆ ಲಾಗಿಂ ನಾತ್ಲ್ಲೆ ತರ್ ಉಸ್ಣೆ ಘೆತೊಂ ಆನಿ ನವ್ಕರಿ ಲಾಬ್ಲ್ಯಾ ಉಪ್ರಾಂತ್ ಫಾರಿಕ್ ಕರ್ತೊಂ. ಕಿತ್ಲ್ಯಾ ಪಯ್ಸ್ ಆಸಾ ಒಸಿಸ್ ಕಂಪೆನಿ?’
‘ಬರೊಚ್ಚ್ ಚಾಲು ಆಸಾಯ್ ತುಂ. ಆಸುಂ, ಆತಾಂ ತರಿ ನಾಂವ್ ವಿಚಾರ್ತಾಂ?’
ರಿಚ್ಚರ್ಡಾನ್ ನಾಂವ್ ಸಾಂಗ್ಲೆಂ. ‘ಹುಂ!’ ಹುಂಕಾರ್ಲೊ ಬಾರ್ಮೆನ್. ‘Richard the Lion Heart? ಚಿಟ್ಟ್ಯಾ ವಾಗಾಚ್ಯಾ ಪಿಲಾಪರಿಂ ದಿಸ್ತಾಯ್.’
‘ಒಸಿಸ್ ಕಂಪೆನಿ ಕಾಂಯ್ ದೋನ್ ಕಿಲೊಮೀಟರ್ ಪಯ್ಸ್ ಆಸಾ, ದರ್ಯಾ ಕಿನಾರ್ಯಾ ಕುಶಿನ್, ರಿಫಾನರಿ ಆಸಾ ತೆವ್ಶಿನ್. ರಿಫಾಯ್ನರಿಂಕ್ ದರಬಸ್ತ್ ಉದಕ್ ಜಾಯ್ ಪಡ್ಟಾ ನ್ಹಯ್?’
‘ಹೆರ್ ಕಿತೆಂ ಜಾಣಾಂಯ್ ಒಸಿಸ್ ಕಂಪೆನಿ ವಿಷಾಂತ್?’ ದೊಳೆ ಅಶೀರ್ ಕರುನ್ ಬಿಯರ್ ಸೆವ್ಲಿ ರಿಚ್ಚರ್ಡಾನ್. ‘ಒಸಿಸ್ ಕಂಪೆನಿಚೆಂ ನಾಂವ್ ತುಜ್ಯಾ ಜಿಬೆಚ್ಯಾ ತುದಿಯೆರ್ಚ್ ಆಸಾ ಕಶೆಂ ದಿಸ್ತಾ ಮ್ಹಾಕಾ.’ ಮ್ಹಳೆಂ ಬಾರ್ಮೆನಾನ್ ದೊಳೆ ಮಿಣ್ಕುನ್.
‘ಭಾರಿಚ್ ಇಂಟ್ರೆಸ್ಟಿಂಗ್ ಮನಿಸ್ ಆಸಾತ್ ಥಂಯ್-‘
‘ಮುಂದರ್ಸಿ, ಬಿಯೆನಾಕಾ.’
‘ಬಿಲ್ಕುಲ್ ನಾ, ರಿಚ್ಚರ್ಡ್ ಮೈ ಬೊಯ್!’ ಆತಾಂ ಬಾರ್ಮೆನಾಚೊ ತಾಳೊ ಮಾತ್ಸೊ ಗಂಬೀರ್ ಜಾಲ್ಲೊ. ‘ಎಕಾ ದೇಶಾಂತ್, ಪ್ರಾಂತ್ಯಾಂತ್ ರಿಫಾಯ್ನರಿ ಆಸುಂ ಯಾ ಹಜಾರಾಂನಿ ಒಸಿಸ್ ಕಂಪೆನಿ ಆಸುಂ. ಸರ್ವ್ ಚಲಂವ್ಚೆಂ ಮನ್ಶಾಂನಿಂಚ್ ನ್ಹಯ್?’
‘ವ್ಹಯ್ಗಿ? ತುಂಚ್ ಸಾಂಗ್!’ ಆಪವ್ಣೆಂ ದಿಲೆಂ ರಿಚ್ಚರ್ಡಾನ್. ‘ತುಕಾ ಎಕ್ ನಾಂವ್ ತರಿ ಆಸ್ತೆಲೆಂ.’
‘ಬಾರ್ಮೆನ್, ತಿತ್ಲೆಂಚ್ ಪುರೊ.’
‘ಒಸಿಸ್ ಕಂಪೆನಿ?’
‘ಮೆಥ್ಯು ಲಿಯೊ ಮ್ಹಳ್ಳೊ ಎಕ್ಲೊ ರಿಂಗ್ಮಾಸ್ಟರ್ ಮ್ಹಾಲಕ್ ಆನಿ ಧನಿ. ಮಧ್ಯ್ಪ್ರಚ್ಯಾಂತ್ ಆಸ್ಲ್ಲೊ. ವಿದುರ್, ಪತಿಣ್ ಕಶಿ ಅಂತರ್ಲಿ, ಖಚಿತಾಯೆನ್ ಕೋಣ್ಯಿ ನೆಣಾಂತ್. ಎಕ್ ಧುವ್ ಆಸಾ, ಚಾಲು ಖಂಯ್ ಪುಣ್ quite sexy and desirable. ಪ್ರಸ್ತುತ್, second in command ಜೆರೊಮ್ ಲಾಜ್ರಾ ಮ್ಹಳ್ಳೊ ಹಿಜ್ಡೊ…’
‘ಬಾರಿಚ್ ತುರ್ತಾನ್ ಫಯ್ಸಲಾಂ ದಿತಾಯ್ ತುಂ?’
‘ತುಂವೆಂ ಜೆರೊಮ್ ಲಾಜ್ರಾಚೆ ಪತಿಣೆಕ್ ಪಳೆಜೆ…ಕಿತೆಂ ಸಾಂಗ್ಚೆಂ?’
‘ಹೆಂ ಸರ್ವ್ ತುಕಾ ಕಶೆಂ ಕಳಿತ್?’
‘ಕಿತ್ಯಾಕ್ ಹಾಂವ್ ಫಕತ್ ಎಕ್ ಬಾರ್ಮೆನ್ ಮ್ಹಳ್ಳ್ಯಾಕ್?’
‘ತಸಲೊಚ್ ಅಂದಾಜ್ ಮ್ಹಜೊ!’
‘ಚೂಕ್! ಹ್ಯಾ ಬಾರಾಂತ್ಲೊ ಮುನಾಫೊ ಜಾಣಾಂಯ್? ಹೊಟೆಲ್ ಹೊಟೆಲಾ ಇತ್ಲ್ಯಾಕ್, ಹೊ ಬಾರ್ ಆನಿ ರೆಸ್ಟೋರಾಂ ಮ್ಹಜೆಂ ಆನಿ ಕಂತ್ರಾಟಾರ್ ಹಾಂವೆಂ ಘೆತ್ಲಾಂ. ಹಾಂಗಾಸರ್ ಜಾಂವ್ಚ್ಯಾ ಮುನಾಫ್ಯಾನ್ ಹಾಂವ್ ಪೆಟ್ರೋಸ್ಟೇಟಾಂತ್ಲ್ಯಾ ಮಹಂತನಾಂಚ್ಯಾ ವರ್ತುಲಾಂನಿ ಘುಸೊಂಕ್ ಸಕ್ತಾಂ, ಸೊರ್ಯಾಚೊ ಕಾಳೊ ದಂದೊ ಕರುಂಕ್ ಸಕ್ತಾಂ… ಸಬಾರ್ ಸಂಗ್ತಿ ಆಸಾತ್…’
‘ಆಸುಂದಿತ್! ಆತಾಂ ತುಂವೆಂ ಒಸಿಸಾಂತ್ಲೆ ತೀನ್ ಚಾರ್ ಪಾತ್ರ್ ಸಾಂಗ್ಲೆಯ್,’ ಆಪ್ಲಿಂ ಉತ್ರಾಂ ವಿಂಚ್ಲಿಂ ರಿಚ್ಚರ್ಡಾನ್. ‘ಹ್ಯಾ ಸರ್ವಾಂಕ್ ಗಾಂಚ್ ಆಸಾತ್?’
‘ಗಾಂಚ್? ಸಾಂಕ್ಳಿಚ್ಚ್ ಆಸಾತ್.’
‘ತುಂವೆಂ ಖಾಸ್ ಕರುನ್ ಮ್ಹಜೆಲಾಗಿಂ, ಪರತ್ ಮ್ಹಣ್ತಾಂ, ಮ್ಹಜೆಲಾಗಿಂ ಒಸಿಸಾಚೊಚ್ ಉಲ್ಲೇಕ್ ಕಿತ್ಯಾಕ್ ಕೆಲೊಯ್?’
‘ತುಂ ಸಾಹಸಾಂ ಆನಿ thrill ಸೊದುನ್ ಆಯ್ಲಾಯ್ ನ್ಹಯ್? ಸಂಸಾರ್ ಮ್ಹಳ್ಯಾರ್ ಕಿತೆಂ ಮ್ಹಣ್ ಜಾಣಾಂ ಜಾಂವ್ಕ್ ತುಕಾ ಜಾಯ್ ನ್ಹಯ್? ತರ್ ತುಕಾ ಎಕಾ ನವ್ಕರೆಚಿ ನ್ಹಯ್, ಎಕಾ ಸರ್ಕಸಾಚಿ ಗರ್ಜ್ ಆಸಾ, ಎಕಾ ರಿಂಗ್ಮಾಸ್ಟರಾಚಿ ಗರ್ಜ್ ಆಸಾ, ಚಟ್ಪಟ್ಯಾ ಸೊಸಾಯಿಟಿ ಸ್ತ್ರೀಯಾಂಚಿ ಗರ್ಜ್ ಆಸಾ.’
‘ಆನಿ ಹೆಂ ಸರ್ವ್ ತುಂ ಮ್ಹಾಕಾ ದೀಂವ್ಕ್ ಸಕ್ತಾಯ್?’
‘ಹಾಂವೆಂ ತಶೆಂ ಕಾಂಯ್ ಮ್ಹಳೆಂ? ಹಾಂವ್ ಕಾಂಯ್ ದಳ್ಳಾಲ್ ದಿಸ್ಲೊ ತುಕಾ?’
ರಿಚ್ಚರ್ಡ್ ಹಾಸ್ಲೊ.
‘ತುಂವೆಂ ಮ್ಹಜ್ಯಾ ಜಿನೊಸಾಚಿ ಅಸಲಿ ಫೊಡ್ಣಿಶಿ ಕೆಲಿಯ್ ಕೀ….’
‘ತುಕಾ ಒಸಿಸಾಂತ್ ಘುಸೊಂಕ್ ಜಾಯ್? ಬರಾಬರ್. ಅರ್ಜಿ ಘಾಲ್. ಛಾಪುನ್ ಆಯಿಲ್ಲ್ಯಾ ಜಾಯ್ರಾತಾಚೆಂ ಡಂಗ್ ಪಳೆಲಾಂಯ್. ಮಾಮೂಲಿ ಜಾಯ್ರಾತ್ ತೆಂ ನ್ಹಯ್. ಕೊಣಾಕ್ಗೀ ಮುಲೊ ದಾಕಂವ್ಕ್ ಕೋಣ್ಗೀ ಖ್ಹೆಳ್ ಖೆಳ್ತಾ ಮ್ಹಳ್ಳೆಪರಿಂ ದಿಸ್ತಾ ತ್ಯಾ ಜಾಯ್ರಾತಾಂತ್.’
ರಿಚ್ಚರ್ಡಾನ್ ಪರ್ತ್ಯಾನ್ ತೆಂ ದಿಸಾಳೆಂ ವಿಂಚ್ಲೆಂ ಆನಿ ಜಾಯ್ರಾತ್ ಸುಕ್ಷೀಮಾಯೆನ್ ವಾಚ್ಲೆಂ.
‘ತಸಲೆಂ ಕಸಲೆಂಯಿ ಮ್ಹಾಕಾ ದಿಸಾನಾ-ಮೂ, ಮಿ|ಬಾರ್ಮೆನ್,’ ತಾಣೆ ಮ್ಹಳೆಂ. ‘ಹೆಂ ಎಕ್ ಮಾಮೂಲ್-ಜಾಯ್ ಪಡ್ಲಾ-ಜಾಯ್ರಾತ್.’
‘ವ್ಹಯ್ಗೀ?’ ವಿಚಾರ್ಲೆಂ ಬಾರ್ಮೆನಾನ್. ‘ತರ್ಜುಬೆಚಿ ಗರ್ಜ್ ನಾ ಮ್ಹಳ್ಳ್ಯಾಚೊ ಮತ್ಲಬ್ ಕಸಲೊ? ಎಕಾ ಕಂಪೆನಿಚ್ಯಾ ಟೆಂಡರ್ ಡಿಪಾರ್ಟ್ಮೆಂಟಾಚೆಂ ಸುಂಕಾಣ್ ದರುಂಕ್ ತರ್ಜುಬೆಚಿ ಗರ್ಜ್ ನಾ?’
‘ಶಾಣೊ ಆಸಾಯ್ ತುಂ…’
‘ತುಜ್ಯಾಕಿ ಚಡ್. ಮ್ಹಾಕಾ ಹ್ಯಾ ಜಾಯ್ರಾತಾಂತ್ ಶಿರಿಗುಂಡಿ ದಿಸ್ತಾ.’
‘ಕಿತೆಂಗೀ ಸಿಜ್ತಾ ಒಸಿಸಾಂತ್.’ ಬಿಯರಿಕ್ ಘೊಟ್ ಮಾರುನ್. ‘ತೆಂ ಚಾಳುಂಕ್ ಎಕ್ಲ್ಯಾಚಿ ಗರ್ಜ್ ಪಡ್ಲ್ಯಾ ಮೆಥ್ಯು ಲಿಯೊಕ್. ತೊ ಕಾಂಯ್ ಸಾದಾರಣ್ ರಿಂಗ್ಮಾಸ್ಟರ್ ನ್ಹಯ್.’
‘ಪರತ್ ಎಕ್ ಫಯ್ಸಲ್?’
‘ಅರೆ ತರ್ನಾಟ್ಯಾ, ಹ್ಯಾ ಪೆಟ್ರೋಸ್ಟೇಟಾಂತ್ ಒಸಿಸಾ ತಸಲ್ಯೊ ಸಬಾರ್ ವಯ್ವಾಟೀ ಕಂಪೆನಿ ಆಸಾತ್ ಆನಿ ತ್ಯೊ ಸರ್ವ್ ಕುದ್ರೆ ನ್ಹಯ್. ತಾಂಚೆ ಧನಿ/ಮ್ಹಾಲಕ್ ಎಕಾ ಮೆಕಾಚೆ ವಳ್ಕಿಂತ್ ಆಸಾತ್, ಧಾಂವಾಂ ಧಾಂವೆಂತ್ ಆಸಾತ್. It’s cut-throat business world. ತುಕಾ ಫಿಟ್ಟ್ ಸಾಂಗ್ಲ್ಲೊ ಜಾಗೊ…ಮತ್ಲಬ್, ತುಕಾ ಧಯ್ರ್ ಆಸ್ಲ್ಯಾರ್?’
‘ಧಯ್ರ್ ನಾ ಮ್ಹಣ್ ಕಶೆಂ ಮ್ಹಣ್ತಾಯ್?’
‘ಅರ್ಜಿ ಘಾಲುನ್ ದಾಕಯ್, ‘Richard the Lion Heart?’ ಬಾರ್ಮೆನ್ ಹಾಸ್ಲೊ.
ದಾಕಯ್ತೊಲೊಂ, ಮನಾಂತ್ಚ್ ಪಂಥಾಹ್ವನ್ ಘೆತ್ಲೆಂ ರಿಚ್ಚರ್ಡಾನ್.
‘ತುಂವೆಂ ಉಚಾರೊಂಕ್ನಾಂಯ್ ತರಿ ಮ್ಹಾಕಾ ಆಯ್ಕಾಲೆಂ!’ ಮ್ಹಳೆಂ ಬಾರ್ಮೆನಾನ್. ‘ತುಂವೆಂ ಯೆದೊಳ್ ಸೆವಲ್ಲಿ ಯಾ ಸೆಂವ್ಕ್ ಆಸ್ಚಿ ಬಿಯರ್ಯಿ ಮ್ಹಜ್ಯಾ ಲೆಕಾರ್. ಮೆಥ್ಯು ಲಿಯೊಕ್ ಮ್ಹಜೆ ರೆಖಾದ್ ದೀ’
ಖಾಸ್ಕೆನ್ ಕಾಂಯ್ ಆಸಾ?’
‘ಬಿಲ್ಕುಲ್ ನಾ.’ ಪಯ್ಸ್ ಪಳೆವ್ನ್. ‘ಪುಣ್ ಮ್ಹಾಕಾ ಮೆಥ್ಯು ಲಿಯೊ ತಸಲೆ over confident ಮನಿಸ್ ಆವಡ್ಣಾಂತ್. ದೆಕಿಕ್, ಮಿ|ರಿಚ್ಚರ್ಡ್ the Lion Heart? I don’t like you. Now get the fuck out of here.’
ಆಪ್ಲೆಚ್ ಹಾಳ್ವಾಯೆನ್ ರಿಚ್ಚರ್ಡಾನ್ ಆಪ್ಲಿ ಬಿಯರ್ ಖಾಲಿ ಕೆಲಿ, ಹೆಮ್ಬರ್ಗರ್ ಖೆಲೆಂ ಆನಿ ತೆಂ ಪತ್ರ್ ಘೆವ್ನ್ ತೊ ಭಾಯ್ರ್ ಆಯ್ಲೊ. ತಾಚೆಂ ಮನ್ ಶಾಂತ್ ಆಸ್ಲ್ಲೆಂ. ಬಾರ್ಮೆನಾನ್ ತಾಕಾ ಎಕ್ ಲಿಪ್ತಿಂ ಎಕ್ ಆಶೀರ್ವಾದ್ ದಿಲ್ಲೆಂ.
ಫಾಂತೆಂ ಫಾಂತೆಂ ಜಾವ್ನ್ ಯೆತಾನಾ ತಾಣೆ ಎಕ್ ಅರ್ಜಿ ತಯಾರ್ ಕೆಲಿ. ತಯಾರ್ ಕರುಂಕ್ ಚಡ್ ಕಿತೆಂಚ್ ನಾತ್ಲ್ಲೆಂ:
ನಾಂವ್: ರಿಚ್ಚರ್ಡ್ ಕ್ಲೆಮೆಂಟ್
ಶಿಕಪ್: ಆನಿಕಿ ಚಾಲು ಆಸಾ, ಜಿಣಿ ಸುರು ಜಾಲ್ಯಾ ತಿತ್ಲಿಚ್.
ನವ್ಕರ್ಯೊ; ಮಟ್ವ್ಯೊ; ಕಂಪೆನ್ಯಾಂಚಿಂ ನಾಂವಾಂ. ಒಯ್ಲ್ ಸೆಕ್ಟರ್ ಮ್ಹಣ್ತಾನಾ, ಹಾಂವ್ ರಿಫಾಯ್ನರಿಂನಿ ನಾತ್ಲ್ಲೊಂ. ತುಮಿ ತಶೆಂ ಸಮ್ಜಾಲ್ಯಾರ್ ತುಮ್ಚಿ ಚೂಕ್
ತರ್ಜುಬೊ: ಕಾಂಯ್ಚ್ ನಾ.
ಸ್ವತಾ ಒಸಿಸ್ ಕಂಪೆನಿಕ್ ತಾಕಾ ವಚ್ಯೆತ್ ಆಸ್ಲ್ಲೆಂ ಪುಣ್ ತಾಣೆ ದುಸ್ರ್ಯಾ ದಿಸಾಚ್ಯಾ ಸಕಾಳಿಂ ತಿ ಅರ್ಜಿ ತಾಣೆ ಪೋಸ್ಟ್ ಕೆಲಿ.
ತಾಕಾ ಪರೀಕ್ಷೆಕ್/ಇಂಟರ್ವ್ಯೂವಾಕ್ ಕೊಲ್ ಆಯ್ಲೆಂ.
ತೆಂ ಯೆತೆಲೆಂಚ್ ಮ್ಹಣ್ ತೊ ಜಾಣಾಸ್ಲೊ. ತರ್ಜುಬೆಚಿ ಗರ್ಜ್ ನಾ ಮ್ಹಳ್ಳ್ಯಾ ಜಾಯ್ರಾತಾಕ್ ತಾಣೆ ಬೆತರ್ಜುಬೆಚಿಚ್ ಜಾಪ್ ದಿಲ್ಲಿ.
ಒಸಿಸಾಚ್ಯಾ ಬಿತರ್ ರಿಗ್ತಾನಾಂಚ್ ತಾಕಾ ರಿಸೆಪ್ಶನಿಸ್ಟಾಲಾಗಿಂ ವಚುನ್ ಆಪ್ಣಾಕ್ ಆಯಿಲ್ಲೆಂ ಪತ್ರ್ ದಾಕಯ್ಜೆ ಪಡ್ಲೆಂ. ತೊಡಾಂತ್ಲೆ ಚುಯಿಂಗ್ಗಮ್ ಹೆವ್ಶಿನ್ಥಾವ್ನ್ ತೆವ್ಶಿನ್ ಕರಿತ್ತ್ ತಾಣೆ ರಿಚ್ಚರ್ಡಾಕ್ ಮಾದಕ್ ನದ್ರೆನ್ ಪಳೆಲೊ.
‘ಹೊ ತುಂ!’ ತೆಂ ಉದ್ಗಾರ್ಲೆಂ. ‘ತುಜಿ ಅರ್ಜಿ ಹಾಂವೆಂ ಪಳೆಲ್ಯಾ ಆನಿ ಜೆರೊಮಾನ್ಯಿ ಪಳೆಲ್ಯಾ. ತಾಣೆಂಚ್ ಹೆ ಪತ್ರ್ ತುಕಾ ಧಾಡುಂಕ್ ಸಾಂಗ್ಲ್ಲೆಂ. ಮೆಥ್ಯು ಲಿಯೊಚಿ ಹುಕುಮ್ ಖಂಯ್. ಹಾಂವ್ ಜಾಲ್ಲಿಂ ತರ್ ತುಜಿ ಅರ್ಜಿ ಡಬ್ಬ್ಯಾಕ್ ಘಾಲ್ತಿಂ.’
‘ಹುಂ’ ಮ್ಹಳೆಂ ರಿಚ್ಚರ್ಡಾನ್. ‘ತಿತ್ಲೊ ತರ್ಜುಬೊ ತುಕಾ ಆಸಾ ಮ್ಹಣ್ ಜಾಲೆಂ ತರ್.’
‘ಮ್ಹಾಕಾ ಸಬಾರ್ ವರ್ತುಲಾಂನಿ ತರ್ಜುಬೆ ಆಸಾತ್’
‘ತೆಂ ಮ್ಹಾಕಾ ದಿಟ್ಟ್ ದಿಸ್ತಾ!’ ಮ್ಹಳೆಂ ರಿಚ್ಚರ್ಡಾನ್ ಮಟ್ವ್ಯಾ ಹಾಸ್ಯಾನ್. ‘ಬರಿಚ್ ಮ್ಹಝಾ ಯೆತೆಲಿ ಒಸಿಸಾಂತ್ ನವ್ಕರಿ ಕರುಂಕ್.’
‘ಭಾರಿಚ್ over confident ಮನಿಸ್ ತುಂ?’
‘ಮ್ಹಜಿ ಟೆಸ್ಟ್ ಆನಿ ಇಂಟರ್ವ್ಯೂವ್ ಆತಾಂಚ್ ಸುರು ಜಾಲೊ? ಎಕಾಂತಾಂತ್ ವಚ್ಯಾಂ?’
ರಿಸೆಪ್ಶನಿಸ್ಟಾಚಿ ದೀಷ್ಟ್ ರಿಚ್ಚರ್ಡಾಲಾಗಿಂ ಉರ್ಡೊನ್ ಸಲ್ವಾಲಿ.
‘ಸಾಮ್ಕಾರ್ ದಿಸ್ಚ್ಯಾ ಪಾಸಾಯೆಚ್ಯಾ ತುದಿಯೆಚೆರ್ ಕೊನ್ಪರೆನ್ಸ್ ಹೊಲ್ ಆಸಾ. ಟೆಸ್ಟ್ ಥಂಯ್ಸರ್ ಚಲ್ತೆಲಿ.’
ಆಪ್ಲ್ಯಾ ಪಾಂಯಾಂ ಗಾಂಟಿಂಚೆರ್ ಧಲೊನ್ ರಿಚ್ಚರ್ಡ್ ಪರ್ತ್ಯಾನ್ ಹಾಸ್ಲೊ.
‘ಥಂಯ್ಸರ್ ಆಮ್ಚೊ ಒಫಿಸ್ ಮೆನೆಜರ್ ಮಿ|ಜೆರೊಮ್ ಲಾಜ್ರಾ ತುಕಾ ರಾಕೊನ್ ಆಸ್ತೊಲೊ.
ಆನಿ ಜೆರೊಮ್ ಲಾಜ್ರಾ, ರಿಚ್ಚರ್ಡಾಕ್ಚ್ ನ್ಹಯ್ ಹೆರ್ ಥೊಡ್ಯಾ ಅಬ್ಯರ್ಥಿಂ ಸಾಂಗಾತಾ ಜಟಾಪಟ್ ಕಸಲೆಂಗಿ ಉಲಯ್ತಾಲೊ. ರಿಚ್ಚರ್ಡಾಕ್ ಪಳೆತೆಚ್ ತೊ ಫುಡೆಂ ಸರ್ಲೊ ಆನಿ ತಾಚಿ ದೀಷ್ಟ್ ತಾಚೆರ್ ಚರ್ಲಿ.
‘Very interesting!’ ತಾಣೆ ಮ್ಹಳೆಂ. ‘ಯೆದ್ಯಾ ವ್ಹಡ್ಲ್ಯಾ ಪೊಜಿಶನಾಕ್ ಅರ್ಜಿ ಘಾಲ್ಲೊ ತುಂ ಫಕತ್ ಪ್ಯಾಂಟ್-ಶರ್ಟಾರ್ ಆಯ್ಲಾಯ್? ಛೆ ಛೆ….ಹೊ ಎಕ್ minus point ಮ್ಹಣ್ ಮಿ|ಮೆಥ್ಯು ಲಿಯೊ ಲೆಕ್ತೊಲೊ.’
‘ಮ್ಹಾಕಾ ತಿತ್ಲೊ ತರ್ಜುಬೊ ನಾ, ಮಿ|ಲಾಜ್ರಾ!’ ಫಟಾಕ್ ಕರುನ್ ಜಾಪ್ ದಿಲಿ, ರಿಚ್ಚರ್ಡಾನ್.
‘ಆನ್ಯೇಕ್ minus point. ಪುಣ್ ಆತಾಂಚ್ ಹಾಂವ್ ಮೆಥ್ಯು ಲಿಯೊ ಕಸಲೆಂಚ್ ಸಾಂಗಾಸೊ ನಾ. ಸರ್ವಾಂಕ್ ಸಮಾಸಮ್ ಅವ್ಕಾಸ್ ಮೆಳ್ತಲೊ. ತುಜಿ ಬಸ್ಕಾ ಘೆ ಆನಿ ಆತಾಂಚ್ ಆಮಿ ಟೆಸ್ಟ್ ಸುರು ಕರ್ಯಾಂ.
ಟೆಸ್ಟ್ ಸುರು ಜಾಲಿ ಆನಿ ಮದ್ಗಾತ್ಚ್ ರಿಚ್ಚರ್ಡಾನ್ ಕ್ಯಾಲ್ಕುಲೇಟರಾಚೆಂ ಪ್ರಕರಣ್ ಉಬೆಂ ಕೆಲೆಂ.
(ಅವಸ್ವರ್ – 80 – ಂತ್ ಮುಂದರ್ತಾ)
