“ರಿಚ್ಚರ್ಡ್ ಕ್ಲೆಮೆಂಟ್!”
ಎಕ್ ನವೊಚ್ ಪುಣ್ ಖಚಿತ್ ತಾಳೊ ಆಯ್ಕೊನ್ ರಿಚ್ಚರ್ಡಾನ್ ಪಾಟಿಂ ಪಳೆಲೆಂ. ದೋಗ್ ಮಾನೇಸ್ತ್ ಉಬೆ ಆಸ್‌ಲ್ಲೆ; ಎಕ್ಲ್ಯಾಕ್ ತೊ ವಳ್ಕಾಲೊ-ಜೆರೊಮ್ ಲಾಜ್ರಾ. ತಾಚೆ ಬಗ್ಲೆನ್ ಉಬೊ ಆಸ್ಲ್ಲೊ ಕೋಣ್ ಮ್ಹಳ್ಳೊ ಅಂದಾಜ್ ಕರುಂಕ್ ತಾಕಾ ಚಡ್ ವೇಳ್ ಲಾಗ್ಲೊ ನಾ.
ಕ್ಯಾಲ್ಕುಲೇಟರ್ ಪ್ರಕರಣ್ ಆಸಾ ಕೆಲ್ಯಾ ಉಪ್ರಾಂತ್, ಕೊನ್ಫರೆನ್ಸ್ ಹೊಲ್ ಸಾಂಡುನ್ ಭಾಯ್ರ್ ಸುರಾಂಟಿ ಮಾರ್‌ಲ್ಲ್ಯಾ ಜೆರೊಮಾಕ್ ಪಳೆವ್ನ್ ಅಸಲೆಂ ಕಸಲೆಂಗಿ ಪ್ರಕ್ರಿಯೆಂ ಜಾತೆಲೆಂ ಮ್ಹಣ್ ರಿಚ್ಚರ್ಡಾಕ್ ಅಂದಾಜ್ ಜಾಲ್ಲೊ.
“ಹಾಂವ್ ಮೆಥ್ಯು ಲಿಯೊ, ಒಸಿಸಾಚೊ ಎಮ್.ಡಿ., ದಯಾ ಕರುನ್ ಮ್ಹಜೆಸಂಗಿಂ ಭಾಯ್ರ್ ಯೆ”
ರಿಚ್ಚರ್ಡ್ ಆಪ್ಲೆಚ್ ಹಾಳ್ವಾಯೆನ್ ಉಟ್ಲೊ, ಸಾಮ್ಕಾರ್ ಲ್ಹಾನ್ ಮೆಜಾ-ಡೆಸ್ಕಾರ್ ಆಸ್‌ಲ್ಲಿಂ ಕಾಗ್ದಾಂ ಉಬಾನಾಶೆಂ ಕಂಪೆನಿನ್ ದಿಲ್ಲೊ ಫುಟ್‌ಕೋಲ್ ತಾಂಚೆರ್ ದವರ್ಲೊ.
ತೆಗ್ಯಿ ಭಾಯ್ರ್ ಗೆಲೆ.
ಪಾಸಾಯೆಂತ್ ಪಾವ್ತಚ್ – ತು೦, ಕ್ಯಾಲ್ಕುಲೇಟರ್ ಜಾಯ್ ಮ್ಹಣ್ ಹಟ್ ಕರ್ತಾಯ್ ತೆಂ ಮಿ| ಲಾಜ್ರಾನ್ ಕಳಯ್ಲೆ೦. ಕಾರಣ್?” ವಿಚಾರ್ಲೆಂ ಮೆಥ್ಯುನ್.
“ಮ್ಹಾಕಾ ಮ್ಹಜೊ ವೇಳ್ ಆನಿ ತುಜೊ ವೇಳ್ ಪಾಡ್ ಕರುಂಕ್ ನಾಕಾ.”
“ಮತ್ಲಬ್?”
“ಮ್ಹಜೆಂ ಜವಾಬ್ ಪತ್ರ್ ತುಂ ಪಳೆಶಿ ತರ್, ಹಾಂವೆಂ ಸರ್ವ್ ಸವಾಲಾಂ ಸೊಡಯ್ಲ್ಯಾಂತ್. ಪುಣ್ ಲೆಕಾಂಚೆಂ ಅಸ್ಥಿಂಜರ್ ಘುಡ್ಸುನ್ ದವರ್ಲಾಂ. ಖಂಯ್ಸರ್ ಕುಡ್ಸಿಜೆ, ಗುಣ್ಸಿಜೆ, ಭಾಗ್ಸಿಜೆ ಮ್ಹಳ್ಳೆಂ ದಾಕಯ್ಲಾಂ. ಹಾಂವೆಂ ಜರ್ತರ್ ತೆಂ ಕಾಮ್ ಕರಿಜೆ – ಮ್ಹಾಕಾ ಸಗ್ಳೊ ದೀಸ್ ಹಾತಾಂ ಪಾಂಯಾಂಚ್ಯಾ ಬೊಟಾಂನಿ ಕುಡ್ಸುನ್, ಕಳ್ವೊನ್ ಆನಿ ಭಾಗ್ಸುನ್ ಬಸ್ಚೆಂ ನಾಕಾ.”
“ತರ್ ತುಜ್ಯಾ ಉತ್ರಾಂ ಪ್ರಕಾರ್ ತುಜೆಂ ಜವಾಬ್ ಪತ್ರ್ ಪೂರ್ಣ್ ಜಾಲಾಂ?”
“ವ್ಹಯ್!”
“ತುಂ ಜಾಣಾಂಯ್ ಮಿ! ಕ್ಲೆಮೆಂಟ್” ಆಪ್ಲ್ಯಾ ಪಾ೦ಯಾ೦ಗಾಂಟಿಚೆರ್ ಧಲ್ಲೊ ಮೆಥ್ಯು. “ಹೆ ಪರೀಕ್ಷೆಕ್ ಹಾಜರ್ ಜಾಂವ್ಕ್ ತುಕಾ ಕೊಣೆ೦ಯಿ ಕಡ್ಡಾಯ್ ಕರುಂಕ್ ನಾ.”
“ಹಾಂಗಾಸರ್ ಹಾಜರ್ ಜಾಲ್ಲ್ಯಾ ಪಂಚ್ವೀಸಾಂ ಪಯ್ಕಿ ಹಾಂವ್ಯಿ ಎಕ್ಲೊಂ ಜಾಯ್ಜೆ ಮ್ಹಳ್ಳೊ ನಿರ್ಣಯ್ ಹಾಂವೆಂ ಕರುಂಕ್ ನಾ.”
“ತು೦ವೆ೦ ವೆಚೆ೦ ಬರೆ೦”
“ಮ್ಹಾಕಾ ಕ್ಯಾಲ್ಕುಲೇಟರ್ ಮೆಳ್ಚೊ ನಾ?”
ಮೆಥ್ಯು ಲಿಯೊಚೆ ಆನಿ ರಿಚ್ಚರ್ಡ್ ಕ್ಲೆಮೆಂಟಾಚೆ ದೊಳೆ ಏಕ್ ಜಾಲೆ. ತೆ ನದ್ರೆಂತ್ ಪಾಶಾರ್ ಜಾಲ್ಲೊ ಸೊಲ್ಲೊ, ಪೆಟ್ಲ್ಲಿಂ ಕಿಟಾಳಾಂ ಆನಿ ಘಡ್ಸಲ್ಲೆ ಗಾಂಚ್ ಜೆರೊಮ್ ಲಾಜ್ರಾಚ್ಯಾ ಗುಮಾನಾಕ್ ಗೆಲೆನಾಂತ್, ಅಶೆಂ ಸಮ್ಜಾಲೊ ರಿಚ್ಚರ್ಡ್. ತಾಕಾ ಯೆದೊಳ್‌ಚ್ ಕಳಿತ್ ಜಾಲ್ಲೆಂ ಹ್ಯಾ ಒಸಿಸ್ ಸರ್ಕಸಾಂತ್ ರಿಂಗ್‌ಮಾಶ್ತರ್ ಕೋಣ್‌ಗಿ ಮ್ಹಣ್. ತ್ಯಾ ಬಾರ್‌ಮೆನಾನ್ ತಾಕಾ ಸಮ್ಜಿಕಾಯೆನ್ ದಿಕಾ ದಾಕಯಿಲ್ಲಿ.
“ನಾ!” ಮೆಥ್ಯುನ್ ಜವಾಬ್ ದಿಲಿ.
ಎಕ್ ಮಂದ್ ಪುಣ್ ಖಚಿತ್ ಹಾಸ್ಯಾಂತ್ ರಿಚ್ಚರ್ಡಾನ್ ದೊಳೆ ಧಾಂಪ್ಲೆ. ಉಪ್ರಾಂತ್ ಜೆರೊಮಾಕ್ ಕಸಲ್ಯಾಗಿ ಎಕಾ ಜಿನ್ಸಾಚಿ ದೀಶ್ಟ್ ಮಾರುನ್ ತೊ ಚಲ್ಲೊ.
ಉಪ್ರಾಂತ್ ಥಂಯ್ಸರ್ ಕಿತೆಂ ಜಾಲೆಂ, ತೆಂ ರಿಚ್ಚರ್ಡಾಕ್ ಕಳಿತ್ ನಾತ್ಲ್ಲೆಂ. ಪುಣ್ ಆಪ್ಣಾಚ್ಯಾ ಹಠಾಕ್ ಉಮ್ಕಾಳ್‌ಲ್ಲ್ಯಾ ತಾಕಾ, ಒಸಿಸ್ ಕಂಪೆನಿಂತ್ಲೊ ಸರ್ಕಸ್ ಚುಕ್‌ಲ್ಲೊ ಜಾಲ್ಯಾರ್ ನಿರಾಸ್ ಜಾತೊ – ಹೆಂ ಭೊಗಾಪ್ ಉದೆಲೆಂ. ಪುಣ್ ತಾಣೆ ಒಸಿಸ್ ಕಂಪೆನಿಕ್ ಆಪ್ಲ್ಯಾ ಮತಿಂತ್ಲಿ ಪಯ್ಸ್ ಕೆಲಿ, ಪುಣ್ ಪುಸುನ್ ಕಾಡ್ಲಿ ನಾ.
ಪಾಶಾರ್ ಜಾಲ್ಲ್ಯಾ ಎಕಾ ಹಫ್ತ್ಯಾಂತ್ ತಾಣೆ ನವ್ಕರೆಚಿ ಹೆರ್ ಬೊಂಟ್ ಕೆಲಿ ನಾ.
ಎಕ್ ಹಫ್ತೊ ಸಂಪ್ತಾನಾ, ತಾಚ್ಯಾ ನಾಂವಾರ್ ಆನಿ ತೊ ಆತಾಂ ವಸ್ತಿ ಕರುನ್ ಆಸ್ಲ್ಲ್ಯಾ ಹೊಟೆಲಾಚ್ಯಾ ವಿಳಾಸಾಕ್ ಒಸಿಸ್ ಕಂಪೆನಿಚ್ಯಾ ಎಮ್.ಡಿ.-ಚೆಂ ಪತ್ರ್ ಆಯ್ಲೆಂ. ಬಾರ್‌ಮೆನಾನ್ಂಚ್ ತಾಕಾ ತೆಂ ಹಾಡುನ್ ದಿಲೆಂ. ತ್ಯೆ ರಾತಿಚ್ಯಾ ಘಟನಾ ಉಪ್ರಾಂತ್ ತೊ ಬಾರ್‌ಮೆನ್ ತಾಕಾ ಸಬಾರ್ ಪಾವ್ಟಿಂ ಮೆಳ್‌ಲ್ಲೊ, ರಿಚ್ಚರ್ಡಾನ್ ಡ್ರಾಫ್ಟ್ ಬಿಯರ್ ಸೆವ್‌ಲ್ಲಿ ಪುಣ್ ತಾಂಚೆ ಮದೆಂ ಕಸಲೆಂಚ್ ಉಲವ್ಣೆಂ ಚಲ್ಲೆಂ ನಾ.
ಮೆಥ್ಯು ಲಿಯೊ ಥಾವ್ನ್ ರಿಚ್ಚರ್ಡಾಕ್ ಬುಲಾವ್ ಆಯಿಲ್ಲೊ-ಪೆಟ್ರೋಸ್ಟೇಟಾಂತ್ ಆಸಾಯ್ ತರ್, ಒಸಿಸ್ ಕಂಪೆನಿಕ್ ಯೆವ್ನ್ ಮ್ಹಾಕಾ ಭೆಟ್; ಮಿ|ಜೆರೊಮ್ ಲಾಜ್ರಾ ಸರ್ವ್ ತಯಾರ್ ಕರ್ತೊಲೊ.
ಹಪ್ತ್ಯಾಂತ್ ರಿಚ್ಚರ್ಡ್ ಕ್ಲೆಮೆಂಟ್ ಒಸಿಸ್ ಕಂಪೆನಿಂತ್ ಹಾಜರ್ ಜಾಲೊ.
ತವಳ್ಚೆ ಘಡಾವಳಿ ಪ್ರಕಾರ್ ಮೆಥ್ಯುನ್ ಆಪಯ್ತಾ ಪರ್ಯಾಂತ್ ಕೊಣೆಯಿ ಜೆರೊಮಾಚ್ಯಾ ದಫ್ತರಾಂತ್ ಬಸಜೆ ಆಸ್ಲ್ಲೆಂ. ಜಾಯ್ಜಾಯ್ ಮ್ಹಣ್ ಮೆಥ್ಯುನ್ ಧಾ ವೀಸ್ ಮಿನುಟಾಂಭರ್ ರಿಚ್ಚರ್ಡಾಕ್, ಜೆರೊಮಾಚ್ಯಾ ದಫ್ತರಾಂತ್ ಬಸಯ್ಲೊ. ತಾಂಚೆ ಮದೆಂ ಕಿತ್ಲೆಂ ಆನಿ ಕಸಲೆಂ ಉಲವ್ಣೆ ಚಲ್ಲೆಂ ತೆಂ ಮೆಥ್ಯುಕ್ ಕಳಿತ್ ನಾತ್ಲ್ಲೆಂ. ಪುಣ್ ರಿಚ್ಚರ್ಡ್ ಭಿತರ್ ಯೆತಾನಾ ತಾಚ್ಯಾ ಮುಕಮಳಾರ್ ಆಸ್ಲ್ಲ್ಯಾ ಹಾಸ್ಯಾಚೆಂ ಕಿಸರ್ ಮೆಥ್ಯುಕ್ ಅಪರಿಚಿತ್ ದಿಸ್ಲೆಂ ನಾ.
“ಬಸ್ ರಿಚ್ಚರ್ಡ್” ತೊ ಮ್ಹಣಾಲೊ ತಾಕಾ ಪಯ್ಲ್ಯಾಚ್ ನಾಂವಾನ್ ಉಲೊ ಮಾರುನ್.
ರಿಚ್ಚರ್ಡ್ ಬಸ್ಲೊ.
ತಾಚಿ ಹರ್ಯೆಕ್ ಚಾಲ್ ಜಾವ್ನಾಸ್ಲ್ಲಿ ಸುಡಾಳ್ ಆನಿ ಖಚಿತ್.
“ಹೊ ಬುಲಾವ್ ತುಕಾ ಅಜಾಪಾಂಚೊ ನ್ಹಯ್ ತಸೊ ದಿಸ್ತಾ! ಮೆಥ್ಯುನ್ ಪ್ರಾರಂಬ್ ಕೆಲೆಂ.
“ಸಾರ್ಕೆಂ!”
“ಮತ್ಲಬ್, ಹಾಂವ್ ತುಕಾ ಆಪಯ್ತಲೊಂ ಮ್ಹಣ್ ತುಂ ಜಾಣಾಸ್ಲೊಯ್.”
“ವ್ಹಯ್”
“ತುಜ್ಯಾ ಖಚಿತಾಯೆಚೆಂ ಕಾರಣ್?”
“ತುಜೊ ಚೀಫ್ ಕ್ಲಾರ್ಕ್ ಜಾವ್ನಾಸ್ಚ್ಯಾ ಜೆರೊಮ್ ಲಾಜ್ರಾಚೆಂ ಪ್ರತಿಕ್ರಿಯಾಂ-ಕ್ಯಾಲ್ಕುಲೇಟರ್ ಪ್ರಕರಣಾಂತ್. ತಾಣೆ ತುಕಾ ಆಪಂವ್ಕ್ ಧಾಡಿಜೆ ತರ್ ಒಸಿಸ್ ಕಂಪೆನಿಂತ್ ಕಾಮ್ ಕರ್ಚೊ ಮೆಂದು ಎಕ್ಚ್ ಮ್ಹಣ್ ಹಾಂವ್ ಜಾಣಾಂ ಜಾಲೊಂ.”
“ಕ್ಯಾಲ್ಕುಲೇಟರ್ ಪ್ರಕರಣ್ ಗರ್ಜ್ ಆಸ್ಲ್ಲೆಂ?”
“ಇಂಟರ್ನ್ಯಾಶನಲ್ ಟೆಂಡರ್ ಡಿಪಾರ್ಟ್ಮೆಂಟಾಕ್ ಜಾಯ್ ಜಾಲ್ಲೊ ಮುಖಿ ವಿಂಚುನ್ ಕಾಡುಂಕ್ ತುವೆಂ ದವರ್ಲ್ಲಿ ಟೆಸ್ಟ್ ಪಳೆತಾನಾ ಹೆಂ ಪ್ರಕರಣ್ ಉಬ್ಜಂವ್ಯಾಂ ಮ್ಹಳ್ಳಿ ಆಲೋಚನ್ ಮ್ಹಾಕಾ ಆಯ್ಲಿ.
ಮೆಥ್ಯು ಮೊಟ್ವ್ಯಾನ್ ಹಾಸ್ಲೊ.
“ಕುತೂಹಲ್ಭರಿತ್!” ತೊ ಉದ್ಗಾರ್ಲೊ. “ಹಿ ಟೆಸ್ಟ್ ಗರ್ಜೆಚಿ ನ್ಹಯ್ ಮ್ಹಳ್ಳೊ ತುಜೊ ವಾದ್?”
“ಜವಾಬ್ದಾರೆಚ್ಯಾ ಜಾಗ್ಯಾಕ್ ಎಕ್ಲೊ ಫಾವೊ ಯಾ ನಾ ತೆಂ ಪಳೆಂವ್ಕ್ ಹೆರ್ ವಾಟೊ ಆಸಾತ್.”
“ಜ್ಯಾ ವಾಟಾಂನಿ ಸುಟ್ ನ್ಹೆಸೊನ್ ಚಲ್ಚಿ ಯಾ ಹಾಜರ್ ಜಾಂವ್ಚಿ ಗರ್ಜ್ ನಾ? ಆಜ್ಯಿ ಪೇಂಟ್ ಆನಿ ಶರ್ಟಾರ್ ಆಯಿಲ್ಲ್ಯಾಯ್!’ ತಾಕಾ ಪಳೆವ್ನ್ ಕುಡ್ಸಿಲೆಂ ಮೆಥ್ಯುನ್.
ಮೆಥ್ಯುಚಿ ದೀಷ್ಟ್ ಸರ್ಜನಾಚೆ ಸುರಿಯೆನ್ ಮನ್ಶ್ಯಾಕ್ ಚಿರ್‍ಚೆಪರಿಂ ರಿಚ್ಚರ್ಡಾಕ್ ಚಿಂದಿಚೂರ್ ಕರ್ತಾಲಿ. ತಾಕಾ ಕಿತೆಂ ದಿಸ್ತಾ ತೆಂ ರಿಚ್ಚರ್ಡಾಕ್ ಕಳಿತ್ ಜಾಲೆಂ, ಕಳಿತ್ ಜಾತಾಲೆಂ.
“ತುಕಾ ಆತಾಂ ಕಾಮ್ ನಾ ಮ್ಹಣ್ ಹಾಂವ್ ಸಮ್ಜತಾ.” ಮೆಥ್ಯುನ್ಚ್ ಉಲವ್ಣೆಂ ಪ್ರಾರಂಬ್ ಕೆಲೆಂ.
“ವ್ಹಯ್”
‘ತರೀ ತುಂ ಭೆಫಿಕ್ರೆನ್ ಒಸಿಸ್ ಕಂಪೆನಿಚ್ಯಾ ಎಮ್.ಡಿ.ಲಾಗಿಂ ಉಲಯ್ತಾಯ್!’ ಮೆಥ್ಯುನ್ ಮ್ಹಳೆಂ. ‘ಎಕಾ ಹಫ್ತ್ಯಾ ಆದಿಂ ಕ್ಯಾಲ್ಕುಲೇಟರ್ ಪ್ರಕರಣ್ ತುಂವೆಂ ಉಬೆಂ ಕೆಲ್ಲ್ಯಾ ವೆಳಾರ್, ತುಕಾ ಹಾಂವೆಂ ಭಾಯ್ರ್ ಧಾಡ್‌ಲ್ಲೊ.’
‘ತುಂವೆಂ ಮ್ಹಾಕಾ ಭಾಯ್ರ್ ವಚುಂಕ್ ಸಾಂಗ್‌ಲ್ಲೆಂಯ್, ಉಸಳ್ ಮ್ಹಣ್ ಸಾಂಗುಂಕ್‌ನಾಂಯ್!’
ಮೆಥ್ಯುಚ್ಯಾ ಮುಕಮಳಾರ್ ಎಕ್ ಕ್ಷಣಿಕ್ ಹಾಸೊ ಉದೆವ್ನ್ ಲಿಪ್ಲೊ. ತೊ ಆಪ್ಲೆಂ ಸಯ್ರಾಣ್ ಸಾಂಬಾಳುಂಕ್ ಉರ್ಡಾತಾ ಮ್ಹಣ್ ರಿಚ್ಚರ್ಡಾಕ್ ಕಳಿತ್ ಜಾತಾಲೆಂ.
“ಹುಂ. ರಿಚ್ಚರ್ಡ್ ಕ್ಲೆಮೆಂಟ್. ತುವೆಂ ದಿಲ್ಲ್ಯಾ ವಿವಿದ್ ದಸ್ತಾವೆಜಾಂ ಪಯ್ಕಿ ತುಜ್ಯಾ ಆವಯ್ ಬಾಪಾಯ್ಚೆರ್ ಯಾ ತುಜ್ಯಾ ಪ್ರಾರಂಬಿಕ್ ಶಿಕ್ಷಾ ವಿಶ್ಯಾಂತ್ ಕಸಲಿಯ್ ಮಾಹೆತ್ ದಿಸೊನ್ ಯೆನಾ.”
“ಹ್ಯಾ ಬಾಬ್ತಿನ್ ತುವೆಂ ಖಾಸ್ಕಿ ಪತ್ತೆದಾರಿ ಕಾಮ್ ಕೆಲಾಂಯ್, ತೆಂ ಹಾಂವ್ ಜಾಣಾಂ!” ಮ್ಹಣಾಲೊ ರಿಚ್ಚರ್ಡ್ ಆಪ್ಲ್ಯಾಚ್ ಹಾಳ್ವಾಯೆನ್.“ ಮ್ಹಜಿ ಆವಯ್, ಶಿಕಪ್ ಆನಿ ಪಾಟ್ಲಿ ಜಿಣಿ ಏಕ್ ಚರಿತ್ರಾ. ಹಾಂವ್ ತಿ ಆಳ್ವೊಂಕ್ ಸಕನಾ. ಆನಿ ಸಾಂಗಾತಾಚ್ ಉಸ್ತುಂಕ್ಯಿ ಅಪೇಕ್ಶಿನಾ. ಮ್ಹಾಕಾ ಮ್ಹಜೊ ಜನ್ಮ್ ಪ್ರಾಮುಖ್ಯ್. ಸಿಂತಿಮೆಂತಾಂಕ್ ಹಾಂವ್ ಗುಮಾನ್ ಕರಿನಾ. ಜಿಣ್ಯೆಂತ್ ಕೊಣಾಯಿಲಾಗಿಂ ಸಂಬಂದ್-ಸಂಬಂದ್ ಮ್ಹಳ್ಳ್ಯಾ ಸಬ್ದಾಚ್ಯಾ ಬರಾಬರ್ ಅರ್ತಾಂತ್-ದವ್ರಿನಾ. ತುವೆಂಯಿ ಮ್ಹಾಕಾ ತ್ಯೆಚ್ ನದ್ರೆನ್ ಪಳೆಜೆ. ತುಂ ಬಂಡ್ವಾಳ್ಶಾಹಿ ಮನಿಸ್. ತುಜೆಂ ಆನ್ಯೇಕ್ ನಾಂವ್ – ಒಸಿಸ್ ಕಂಪೆನಿ. ತುಕಾ ಜಾಯ್ ಏಕ್ ಮನಿಸ್-ಒಸಿಸ್ ಕಂಪೆನಿಚೆಂ ಟೆಂಡರ್ ಡಿಪಾರ್ಟ್ಮೆಂಟ್ ಚಲಂವ್ಕ್.’’ ರಿಚ್ಚರ್ಡಾನ್ ಲಾಂಬಾಯೆಚಿಂ ಆಪ್ಲಿಂ ಉತ್ರಾಂ ರಾವಯ್ಲಿಂ. “ತ್ಯಾ ಶಿವಾಯ್” ಉಪ್ರಾಂತ್ ಹಾಸೊನ್ ತೊ ಮ್ಹಣಾಲೊ “ಕ್ಲೆಮೆಂಟ್ ಮ್ಹಳ್ಳೆಂ ಆಲ್ಕುಂಜ್ ಸರ್ವ್ ಸಾಮಾನ್ಯ್.”
“ಹಾಂವ್ ಮ್ಹಜೆ ಖೊಲೆ ಚತ್ರಾಯೆನ್ ಖೆಳ್ತಾಂ, ರಿಚ್ಚರ್ಡ್” ಆಪ್ಲೆಂ ಕ್ಯೂಬನ್ ಸಿಗಾರ್ ಪೆಟಯ್ಲೆಂ ಮೆಥ್ಯುನ್. “ತುಜಿ.. ಅ… ಚರಿತ್ರಾ ತುಜ್ಯಾ ಉದ್ದೇಶಾಂಕ್ ಲಾಗೊನ್ ತುವೆಂ ಲಿಪಯ್ಲ್ಯಾಯ್ಗಿ ಯಾ ಹೆರ್ ಸಂಸಾರಿ ಕಾರಣಾಂ ಖಾತಿರ್ ಮ್ಹಳ್ಳೆಂ ಜಾಣಾಜಾಂವ್ಕ್ ಹಾಂವ್ ಯೆದೊಳ್ ಸಕೊಂಕ್ ನಾ ಮ್ಹಳ್ಳೆಂ ಸತ್. ಹಾಂವೆಂ ‘ಸಂಬಂದ್’ ದವರ್ಚೆ ವೆಕ್ತಿಚೆಂ ಪರಿಪೂರ್ಣ್ ಬಳ್ ಜಾಣಾಂಕರ್ಚಿ ಮ್ಹಜಿ ಸದಾಂಚಿ ಸವಯ್. ಕಿತೆಂಯಿ ತರ್ಯಿ ತುವೆಂ ಏಕ್ ಸಂಗತ್ ಗುಮಾನಾಂತ್ ದವರಿಜೆ. ಒಸಿಸ್ ಕಂಪೆನಿಂತ್ ತುವೆಂ ಖಂಚೊಯಿ ಖೊಲೆ ಖೆಳ್ತಾನಾ, ಕಸ್ಲಿಯಿ ಚಾಲ್ ಚಲ್ತಾನಾ ತುಜೆಲಾಗಿಂ ಆಸ್ಚ್ಯಾ ಖೊಲ್ಯಾಚಾಕ್ಯಿ ಉಂಚ್ಲೊ ಖೊಲೊ ಆನಿ ತುವೆಂ ಚಲ್ಚ್ಯಾ ಚಾಲಿಚಾಕ್ಯಿ ಚತುರ್ ಚಾಲ್ ಚಲಂವ್ಕ್ ಸಕ್ಚೊ ಎಕ್ಲೊ ಆಸಾ!”
“ಆನಿ ತೊ ಜಾವ್ನಾಸಾಯ್ ತುಂ?”
“ಆನಿ ತೊ ಜಾವ್ನಾಸಾ ಹಾಂವ್!”
ತಾಂಚೆ ದೊಳೆ ಆನಿ ಮತಿ ಏಕ್ ಜಾಲ್ಯೊ.
“ತಿತ್ಲೆಂ ಸ್ವತಂತ್ರ್ ಹಾಂಗಾಸರ್ ಆಸ್ತೆಲೆಂ ಮ್ಹಣ್ ಹಾಂವ್ ಪಾತ್ಯೆತಾಂ!” ಮ್ಹಣಾಲೊ ರಿಚ್ಚರ್ಡ್ ಆಪ್ಲೆ ಕೇಸ್ ಪಾಟಿಂ ಪೊಶೆವ್ನ್.
“ಸ್ವತಂತ್ರ್ ಹಾಂಗಾಸರ್ ಆಸಾ!” ಒಪ್ಲೊ ಮೆಥ್ಯು. “ಪುಣ್ ತೆಂ ಘೆಂವ್ಚೆಂ…’’ ಉದ್ದೇಶ್ ಪೂರ್ವಕಿಂ ತಾಣೆ ಜೆರೊಮಾಚ್ಯಾ ದಫ್ತರಾಕುಶಿನ್ ಪಳೆಲೆಂ. “ಪುಣ್ ತೆಂ ಘೆಂವ್ಚೆಂ’’ ಪರತ್ ಉಚಾರಿಲಾಗ್ಲೊ ತೊ. “ಎಕೇಕ್ಲ್ಯಾಚೆರ್ ಹೊಂದ್ವೊನ್ ಆಸಾ.” ತಾಣೆ ಆಕೇರ್ ಕೆಲೆಂ.
ಥೊಡ್ಯಾ ವೆಳಾಚೆಂ ಮಾವ್ನ್.
“ತುವೆಂ ಆಶೆಂವ್ಚ್ಯಾ ಸ್ವತಂತ್ರಾಚ್ಯೊ ಪರಿದ್ಯೊ?” ಆಪ್ಲ್ಯಾ ಸಿಗಾರಾಚೊ ಗೊಬೊರ್ ಪಿರಿಂತ್ ಪಾಪ್ಡುನ್ ವಿಚಾರ್ಲೆಂ ಮೆಥ್ಯುನ್.
“ಧನ್ ಆನಿ ಯಶಸ್ವಿ!”
“ಹ್ಯಾ ಥಂಯ್ ತುಜ್ಯೊ ವಾಟೊ?”
“ಕಸಲ್ಯೊಯಿ, ಕಿತ್ಲ್ಯೊಯಿ ದಯಾ ದಾಕ್ಶೆಣ್ ನಾತ್ಲ್ಲ್ಯೊ.”
“ಪರಿಣಾಮಾಕ್ ಜವಾಬ್ದಾರ್?”
“ಹಾಂವ್ಚ್! ಹೆಂಚ್ ಜಾವ್ನಾಸಾ ಮೋಲ್ ಹಾಂವೆಂ ಆಶೆಂವ್ಚ್ಯಾ ಸ್ವತಂತ್ರಾಚೆಂ.”
“ಬರಾಬರ್! ಪುಣ್ ಒಸಿಸ್ ಕಂಪೆನಿಂತ್ ತುವೆಂ ಕಮಾಂವ್ಚೆಂ ಧನ್ ಡೈರೆಕ್ಟರಾಂ ಖಾತಿರ್, ಮ್ಹಜೆಖಾತಿರ್.”
ರಿಚ್ಚರ್ಡ್ ಹಾಸ್ಲೊ.
“ಪುಣ್ ತೆಂ ಕಮಾಂವ್ಚೆಂ ಹಾಂವೆಂ ಮಿ| ಮೆಥ್ಯು ಲಿಯೊ!” ತೊ ಮ್ಹಣಾಲೊ.
“ಒಸಿಸ್ ಕಂಪೆನಿಂತ್ ಥೊಡೆ ಸಂಪ್ರದಾಯ್ ಆಸಾತ್” ವಿಶಯ್ ಬದ್ಲಿಲೊ ಮೆಥ್ಯುನ್. “ಹವ್ಯಾಕ್ ಆನಿ ಋತುಂಕ್ ಲಾಗೊನ್ ಪ್ರಥ್ವಿ ಬದಲ್ಚೆಪರಿಂ ತುವೆಂಯಿ…”
“ಸುಟ್ ಘಾಲ್ಚ್ಯಾ ವೆಳಾರ್ ಸುಟ್ ಘಾಲಿಜೆ?”
“ವ್ಹಯ್” ಮಟ್ವ್ಯಾನ್ ಜವಾಬ್ ದಿಲಿ ಮೆಥ್ಯುನ್. “ತುಜ್ಯಾ ಸಾಂಬಾಳಾಚಿಂ ಹಂತಾಂ ತುಂ ಜಾಣಾಂಯ್. ಚಡಿತ್ ತುವೆಂ ಒಸಿಸ್ ಕಂಪೆನಿಕ್ ಲಾಗಾಶೆಂ ಕರ್ಚ್ಯಾ ಹರ್ಯೆಕಾ ಟೆಂಡರಾಚ್ಯಾ ಮುನಾಫ್ಯಾಚೆರ್ ತುಕಾ ದೋನ್ ಶೇಕಡಾಂಶ್ ಕಮಿಶನ್ ಮೆಳ್ತೆಲೆಂ. ಹೆ ಘಡ್ಯೆ ತುಜ್ಯಾ ಡಿಪಾರ್ಟ್ಮೆಂಟಾಂತ್ ವಾವ್ರುಂಕ್ ದೊಗಾಂ ಟಾಯ್ಪಿಸ್ಟಾಂ ಆಸಾತ್. ಫುಡೆಂ ತುಕಾ ಸ್ಟಾಫ್ ಗರ್ಜ್ ಪಡತ್ ತರ್ ಪಳವ್ಯೆತ್. ಜೆರೊಮ್ ಲಾಜ್ರಾ-ಜಾಕಾ ತುಂ ಭೆಟ್ಲಾಯ್ – ತುಜೆಂ ಕೊಂಟ್ರೆಕ್ಟ್ ತಯಾರ್ ಕರ್ತಾಲೊ. ತೆಂ ವಾಚುನ್ ಪಳೆವ್ನ್ ತುವೆಂ ದಸ್ಕತ್ ಕರ್ಯೆತ್.”
ರಿಚ್ಚರ್ಡಾನ್ ಹಾಳ್ವಾಯೆನ್ ತಕ್ಲಿ ಹಾಲಯ್ಲಿ.
“ಕಿತ್ಲ್ಯಾಯ್ ಮಾಹೆತಿಚೊ ಮನಿಸ್ ಎಕಾ ನವ್ಯಾ ದಫ್ತರಾಂತ್ ಥೊಡೊ ತೇಂಪ್ ಪರ್ಯಾಂತ್ ಅಸಹಾಯಕ್ ಮ್ಹಣ್ ಹಾಂವ್ ಜಾಣಾಂ. ತುಕಾ ಕಸಲೆಯಿ ವಾಂದೆ ಆಸ್ಲ್ಯಾರ್ ಮಿ| ಜೆರೊಮ್ ಲಾಜ್ರಾ-ಜಾಕಾ ತುಂ ಭೆಟ್ಲಾಯ್ -ತುಕಾ ಕುಮಕ್ ಕರ್ತಲೊ!”
ರಿಚ್ಚರ್ಡಾಚ್ಯಾ ಮುಕಾಮಳಾರ್ ಭಾರೀಕ್ ಹಾಸೊ ಉದೆಲ್ಯೊ.
“ಯೆದೊಳ್ ಪರ್ಯಾಂತ್ ಟೆಂಡರ್ ವಿಭಾಗ್ ತೊಚ್ ಚಲಯ್ತಾಲೊ?” ತಾಣೆಂ ವಿಚಾರ್ಲೆಂ.
“ಯೆದೊಳ್ ಪರ್ಯಾಂತ್ ತೊ ಸಬಾರ್ ಸಂಗ್ತಿ ಚಲವ್ನ್ ಆಸ್ಲ್ಲೊ ರಿಚ್ಚರ್ಡ್!” ಮ್ಹಣಾಲೊ ಮೆಥ್ಯು. “ಹೆರ್ ಕಸಲಿಂಯಿ ಸವಾಲಾಂ ಆಸಾತ್?”
“ತುಕಾ ನಾಂತ್ ತರ್ ಮ್ಹಾಕಾ ನಾಂತ್!” ರಿಚ್ಚರ್ಡಾನ್ ಭುಜಾ ಉಡಯ್ಲಿಂ. ಮೆಥ್ಯುನ್ ಇಂಟರ್ಕೊಟ್ ದಾಂಬ್ಲೊ.
“ಮಿ| ಲಾಜ್ರಾ” ತೊ ಮ್ಹಣಾಲೊ ಹಗುರಾಯೆನ್. “ದಯಾ ಕರುನ್ ಭಿತರ್ ಯೆ.”
ಥೊಡ್ಯಾ ಘಡ್ಯಾಂ ಭಿತರ್ ಜೆರೊಮ್ ಆಯ್ಲೊ.
“ಆಮಿ ಮಿ| ರಿಚ್ಚರ್ಡ್ ಕ್ಲೆಮೆಂಟ್ ಆಮ್ಚ್ಯಾ ನವ್ಯಾ ಟೆಂಡರ್ ಡಿಪಾರ್ಟ್ಮೆಂಟಾಚೊ ಮುಕೆಲಿ ಜಾವ್ನ್ ವಿಂಚ್ಲಾ!” ಕಸಲ್ಯಾಚ್ ಪ್ರಾರಂಬ್ ವಾಕ್ಯಾ ವೃಂದಾಂ ಶಿವಾಯ್ ಮುಖ್ಯಾಂಶಕ್ ಆಯ್ಲೊ. ಜೆರೊಮಾನ್ ಮುಕಮಳಾರ್ ಜಾಲ್ಲಿ ಬದ್ಲಾವಣ್ ಮೆಥ್ಯುಚೆರ್ ಕಸಲೊಚ್ ಪರಿಣಾಮ್ ಕರುಂಕ್ ಸಕ್ಲಿನಾ ತೆಂ ರಿಚ್ಚರ್ಡಾಕ್ ಕಳಿತ್ ಜಾಲೆಂ.. ಬೊವ್ಶ್ಯಾ ಜೆರೊಮಾಚೊ ತಾಳೊ ಥೊಡ್ಯಾ ಖಿಣಾಂ ಪರ್ಯಾಂತ್ ಪುರೊನ್ ಗೆಲೊ. ಉಪ್ರಾಂತ್ –
ಆಪ್ಲೊ ಹಾತ್ ಮುಕಾರ್ ಹಾಡ್ಲೊ. ರಿಚ್ಚರ್ಡ್ ಉಬೊ ಜಾಲೊ.
“ಹಾಂವ್ ತುಕಾ ಅಭಿನಂದ್ಸಿತಾಂ, ಮಿ! ಕ್ಲೆಮೆಂಟ್!” ತೊ ಮ್ಹಣಾಲೊ. “ಮ್ಹಾಕಾ ತುಜೆ ತಸಲೊ ಕಾರ್ಬಾರಿ ಮನಿಸ್ ಸಾಂಗಾತಿ ಜಾವ್ನ್ ಲಾಬ್ಲಾ ಮ್ಹಣ್ ಆಯ್ಕೊನ್ ಮ್ಹಜಿ ಪತಿಣ್ ಖುಶ್ ಜಾತೆಲಿ.”
ಮೆಥ್ಯುನ್ ಆನಿ ರಿಚ್ಚರ್ಡಾನ್ ದೀಶ್ಟಿ ಬದ್ಲಿಲ್ಯೊ.
“ಯೆಂವ್ಚ್ಯಾ ಮಯ್ನ್ಯಾಚ್ಯಾ ಪಯ್ಲೆರ್ ಥಾವ್ನ್ ಮಿ| ಕ್ಲೆಮೆಂಟ್ ಆಪ್ಲ್ಯಾ ಡಿಪಾರ್ಟ್ಮೆಂಟಾಚೆಂ ಚಾರ್ಜ್ ಘೆತಲೊ. ತುಜೊ ಪರಿಪೂರ್ಣ್ ಸಹಕಾರ್ ತಾಕಾ ಜಾಯ್.”
“ಮ್ಹಜೊ ಅಭಿಮಾನ್ ಚಡ್ಲೊ!” ಮಾನ್ ಭಾಗಾಯ್ಲೊ ಜೆರೊಮಾನ್.
“ತುವೆಂ ತಾಚೆಂ ಕೊಂಟ್ರೆಕ್ಟ್ ತಯಾರ್ ಕರಿಜೆ ಜೆರೊಮ್!” ರಿಚ್ಚರ್ಡಾನ್ ಹಾಚೊ ಹಾತ್ ಸೊಡ್ಲ್ಯಾ ಉಪ್ರಾಂತ್ ಮ್ಹಣಾಲೊ ಮೆಥ್ಯು. ಉಪ್ರಾಂತ್ – ಕೊಂಟ್ರೆಕ್ಟ್ ದಸ್ಕತ್ ಕರ್ಚ್ಯಾ ಫುಡೆಂ ತುವೆಂ ಏಕ್ ಪಾವ್ಟಿಂ ಆಮ್ಚ್ಯಾ ಡೈರೆಕ್ಟರಾಂ ಸಾಮ್ಕಾರ್ ಹಾಜರ್ ಜಾಂವ್ಕ್ ಆಸಾ ರಿಚ್ಚರ್ಡ್” ತೊ ಕಳಯ್ಲಾಗ್ಲೊ. “ಹ್ಯಾ ಕಂಪೆನಿಂತ್ ಕಿತೆಂ ಜಾತಾ ತೆಂ ಜಾಣಾಂ ಜಾಂವ್ಚೆಂ ಹಕ್ಕ್ ತಾಂಕಾಂಯಿ ಆಸಾ.” ತಾಣೆ ಹಾತ್ ಉದಾರೆ ಕೆಲೆ.
ರಿಚ್ಚರ್ಡ್ ಉಬೊ ಜಾಲೊ.
ಮೆಥ್ಯುನ್ ಆನಿ ತಾಣೆ ಹಾತ್ ಮೆಳಯ್ಲೆ.
“ಒಸಿಸ್ ಕಂಪೆನಿಕ್ ಸ್ವಾಗತ್!” ಮ್ಹಣಾಲೊ ಮೆಥ್ಯು.
ರಿಚ್ಚರ್ಡ್ ಹಾಸ್ಲೊ.
ತೊ ದಫ್ತರಾ ಥಾವ್ನ್ ಭಾಯ್ರ್ ವೆತಾನಾ ತೊಚ್ ಹಾಸೊ ಲಾಂಬವ್ನ್ ತಾಣೆ ಜೆರೊಮಾಕ್ ಪಾಟಯ್ಲೊ.
ಬಾರ್‌ಮೆನಾಚೆ ಮಜತೀನ್ ತಾಕಾ ಎಕ್ ಸ್ಟೂಡಿಯೊ ಎಪಾರ್ಟ್‌ಮೆಂಟ್ ಭಾಡ್ಯಾಕ್ ಮೆಳ್ಳೆಂ ಆನಿ ಒಸಿಸ್ ಕಂಪೆನಿಥಾವ್ನ್ ಮುಂಗಡ್ ಧನ್ ಸಹಾಯ್ ಮೆಳ್‌ಲ್ಲ್ಯಾನ್ ತಾಣೆ ತೆಂ ಸ್ಟುಡಿಯೊ ಎಪಾರ್ಟ್‌ಮೆಂಟ್ ಗರ್ಜೆಪುರ್ತೆಂ ಸಜಯ್ಲೆಂ.
ಆನಿ ತ್ಯಾ ಎಕಾ ದಿಸಾ, ರಿಚ್ಚರ್ಡ್ ಕ್ಲೆಂಮೆಂಟ್ ಒಸಿಸ್ ಕಂಪೆನಿಕ್ ಸೆರ್ವಾಲೊ ಆನಿ ಸಬಾರಾಂಚೆ ಜಿಣಿಯೆಂನಿ ಮಿಸ್ಳಾಲೊ.
[ಹಾಂಗಾಸರ್ ಚವ್ತೊ ಗೃಂಥ್ ಸಂಪ್ತಾ.]
(ಫುಡ್ಲೊ ಆನಿ ನಿಮಾಣೊ ಗೃಂಥ್ “ಝಡ್ತೆಚಿಂ ಝುಜಾಂ” 81 ಅವಸ್ವರಾಂತ್)
