ಜೆರೊಮ್ ಲಾಜ್ರಾ ಚಾರ್ಲ್ಸಾನ್ ಹಾಡುನ್ ದಿಲ್ಲಿ ಕೊಫಿ ಘೆವ್ನ್ ತಾಣೆ ದಾಕಯಿಲ್ಲ್ಯಾ ಬೆಡ್‌ರೂಮಾಕ್ ವೆತಾನಾ ತಾಚಿ ಪಾಟ್ ಪಳೆಂವ್ಚ್ಯಾ ಮೆಥ್ಯು ಲಿಯೊಚಿ ಮೋತ್ ಯೆಕಾಚಾಣೆ ಶೂನ್ಯ್ ಜಾಲಿ. ಅಂತ್ಯ್ ಸಾಮ್ಕಾರ್ ಆಯಿಲ್ಲೆಪರಿಂ ಆನಿ ಕಸಲಿಚ್ ಚುಕಾರಿ ವಾಟ್ ಸಾಮ್ಕಾರ್ ನಾತ್‌ಲ್ಲೆಪರಿಂ. ಕಸಲೆಂಗಿ ವಿಬಿನ್ನ್ ಚಿಂತಪ್ ತಾಚ್ಯಾ ಮತಿಂಯ್ ಆಯ್ಲೆಂ- ಜಶೆಂ ವಾರ್‍ಯಾ-ಪಯ್ಣಾಕ್ ಭಿಯೆಂವ್ಚೊ ಪ್ರಯಾಣಿಕ್ ವಿಮಾನಾಂತ್ ಆಸ್ತಾನಾ ಕ್ಯಾಪ್ಟನಾನ್ ತುರ್ತ್ ಪರಿಸ್ಥಿತಿ ಐಲಾನ್ ಕರುನ್ – ಆನಿ ಆಮಿ ಥೊಡ್ಯಾಚ್ ಸೆಕುಂದಾಂನಿ ಧರ್ಣಿಕ್ ಆಪ್ಟಾತೆಲ್ಯಾಂವ್ ಮ್ಹಣ್ ದೆದೆಸ್ಪ್ರಾಯೆನ್ ಮ್ಹಣ್ತಾನಾ ಜಾಂವ್ಚೆಪರಿಂ. ತಿಂ ಥೊಡಿಂಚ್ ಖಿಣಾಂ ಕಸಲಿಂ ಜಾವ್ನಾಸ್ತೆಲಿಂ ಮ್ಹಳ್ಳೆಂ ಚಿಂತುಂಕ್ ಕಾಂಯ್ ತೊ ಪ್ರಯಾಣಿಕ್ ಸಕತ್ ಪುಣ್ ತ್ಯಾ ಘಡಿಯಾಂ ವಿಷಾಂತ್ ಹೆರಾಂಕ್ ಸಾಂಗುಂಕ್ ತೊ ಜೀವಂತ್ ಆಸ್ಚೊ ನಾ. ತ್ಯಾ ಫುಡೆಂಚ್ ತಾಚಿ ಮೋತ್ ಶೂನ್ಯ್ ಜಾತೆಲಿ.
ಪುಣ್ ಮೆಥ್ಯು ಥಂಯ್ ಉದೆಲ್ಲಿ ಶೂನ್ಯತಾ ಅಸಲಿ ನ್ಹಯ್. ಆಪ್ಲೆ ಶೂನ್ಯತೆಂತ್ ತರಿ ತಾಚಿ ಮೋತ್ ಸ್ಪಟಿಕ್ ಬಸಯಿಲ್ಲೆಪರಿಂ ಕಾಮ್ ಕರ್ತಾಲಿ.
ಜೆರೊಮಾಚಿಂ ಉತ್ರಾಂ- ‘ಡಿಟೆಕ್ಟಿವ್ ಮಾಲ್ಕಮ್ ಆನಿ ಗ್ಲೋಬ್ ಪರ್ಸನಲ್ ಸರ್ವಿಸಸ್’ ಮೆಥ್ಯುಕ್ ಹಿ ಮಾಹೆತ್ ಕಾಂಯ್ ನವಿ ನ್ಹಯ್ ಪುಣ್ ತಾಣೆ ಜೆರೊಮಾ ಥಾವ್ನ್ ಹಿ ಲಿಪಯಿಲ್ಲಿ ಆನಿ ಜೆರೊಮಾನ್ಂಚ್ ಹಿಂ ನಾಂವಾಂ ವೊಂಕಾಶಿಂ ಕೆಲ್ಲಿಂ. ಹೆ ನಿಹಾಳುನ್ ತೊ ಹಾಸ್ಲೊ. ಮತಿಂತ್ ಖಂಚೊನ್ ರಾವ್ಲಿಂ ಕಿತ್ಯಾಕ್ ತಾಣೆ ಪುಡೆಂ ಕರುಂಕ್ ಆಸ್ಚೆಂ, ಹ್ಯಾ ಮಾಹೆತಿ ಥಾವ್ನ್ಂಚ್ ತಾಣೆ ಸುರು ಕರಿಜೆ ಆಸ್‌ಲ್ಲೆಂ. ಆನಿ ಹಿ ಮಾಹೆತ್ ಆಪ್ಣಾಕ್ ಮೆಳ್ಚೆ ಖಾತಿರ್ ತಾಣೆ ಒಸಿಸಾಂತ್ ಜಾಂವ್ಚೆಂ ಸರ್ವ್ ದಾಸ್ತಾನ್ ಕರುನ್ ದವರ್‌ಲ್ಲೆಂ, ಜಶೆಂ ಎಕಾ ಕ್ಲಾಸಿಂತ್ ಪನ್ನಾಸ್ ವಿದ್ಯಾರ್ಥಿ ಆಸುನ್ ತಾಂಚೆ ಲಾಗಿಂ ಮತಿಕ್ ಆಯಿಲ್ಲೊ ಸಬ್ದ್ ಉಚಾರುಂಕ್ ಸಾಂಗುನ್, ತೊ ಬರವ್ನ್ ಘೆವ್ನ್ ವಾಚ್‌ಚ್ಯಾ ಕೊಣಾಯ್ಕೀ ಕಸಲೆಂಚ್ ಅರ್ಥ್ ಜಾಯ್ನಾ ಶಿವಾಯ್ ಹ್ಯಾ ಸಬಾಂಕ್ ಎಕಾ ವ್ಯಾಕರಣಾಂತ್ ಘುಂತ್ಲ್ಯಾ ಶಿವಾಯ್, ಅಶೆಂ ಆಸ್ತಾನಾ, ಮೆಥ್ಯುನ್ ಯೆದೊಳ್ ಪರ್ಯಾಂತ್ ಆರಾವ್ನ್ ಮತಿಂತ್ ಘುಂತಿನಾಸ್ತಾಂ ದವರ್‌ಲ್ಲಿಂ ಘಟನಾಂ, ಸನ್ನಿವೆಶಾಂ, ಉಲವ್ಣಿಂ, ಸಂಬಾಷಣಾಂ….ಮಟ್ವ್ಯಾನ್ ತಾಚಿ ಸಗ್ಳಿಚ್ ಜಿಣಿ, ಲೀಜಾ ಉಪ್ರಾಂತ್ಲಿ ಜಿಣಿ, ಆತಾಂ ಎಕಾ ದಾಲಿಯೆಂತ್ ತಾಚ್ಯಾ ಸಾಮ್ಕಾರ್, ತಾಚ್ಯಾ ಉಸ್ಕ್ಯಾರ್ ಆಸ್‌ಲ್ಲಿ ಪುಣ್ ಕಶೆಂ ಸುತಾಚೊ ಎಕ್ ಗೊಂಡೊ ರಂಗಾಳ್ ಸುತಾಂನಿ ರೆವ್ಡಾಲ್ಲೊ ಆಸ್ತಾ ತಸೊ. ತಾಕಾ ಸರ್ವ್ ದಿಸ್ತಾಲೆಂ ಪುಣ್ ಕಸಲೆಂಚ್ ದಿಸನಾತ್‌ಲ್ಲೆಂ. ತಾಕಾ ಸರ್ವ್ ಸಮ್ಜಾತಾಲೆಂ ಪುಣ್ ಸಾಂಗಾತಾಚ್ ಕಸಲೆಂಚ್ ಸಮ್ಜಾನಾತ್‌ಲ್ಲೆಂ.
ಲೀಜಾಚ್ಯಾ ಮರ್ಣಾಕ್ ಡೊ|ಫ್ರಾನ್ಸಿಸ್ ಕ್ಲೆಮೆಂಟ್ ಕಾರಾಣ್ ಜಾಂವ್ ಯಾ ಹೆ ಕೋಣ್‌ಯಿ ದಾಕ್ತೆರ್ ಜಾಂವ್, ತಾಕಾ ಎಕ್ ನಾಂವ್ ಮೆಳುಲ್ಲೆಂ. ಹಾಂಗಾಸರ್ ರಿಚ್ಚರ್ಡ್ ಕ್ಲೆಮೆಂಟಾಕ್ ಕಸಲೊಚ್ ಪಾತ್ರ್ ನಾತ್‌ಲ್ಲೊ. ಪಾತ್ರ್ ಆಸ್‌ಲ್ಲೊ ತರ್ ಜೆರೊಮ್ ಲಾಜ್ರಾಚೊ ಆನಿ ತಾಣೆ ತಾಚೊ ಪಾತ್ರ್ ಖೆಳೊಂಕ್ ಸುರು ಕರಿಜೆ ತರ್ ಮೆಥ್ಯುನ್ ತಾಕಾ ಉದ್ರೇಕಿತ್ ಕೆಲ್ಲೊ ರಿಚ್ಚರ್ಡ್ ಕ್ಲೆಮೆಂಟಾಕ್ ಒಸಿಸಾಂತ್ ಘೆವ್ನ್ ಆನಿ ತಾಕಾ ಚಿಟ್ಟ್ಯಾ ವಾಗಾಚೆಂ ಪೀಲ್ ಮ್ಹಳ್ಳೆಂ ವಿಶೇಷಣ್ ಲಗ್ತಿ ಜಾಯ್ಶೆಂ ಕರುನ್.
ಜೆರೊಮ್ ಲಾಜ್ರಾ ಕಸಲ್ಯಾ ಅಸ್ಕತ್, ವಿಕಾಳ್, ವಿಕೃತ್ ಮನೋಭಾವಾಚೊ ಮ್ಹಳ್ಳೆಂ ಸತ್ ಮೆಥ್ಯು ಲಿಯೊಚ್ಯಾಕಿ ಬರ್‍ಯಾನ್ ಕೋಣ್ಂಚ್ ನೆಣಾಸ್ಲೊ. ಆಪ್ಲೆಂ ಹೈಡ್ರೊಸಿಲ್ ಲಿಪಂವ್ಕ್ ಎಕಾ ಚಾಮ್ಡ್ಯಾಚೊ ಬೇಗಾಚೊ ವಾಪರ್ ಕರ್ಚೊ ದಾದ್ಲೊ ಕಿತ್ಲೊ ದಾದ್ಲೊ ಜಾವ್ನಾಸ್ಯೆತ್ ಮ್ಹಳ್ಳೆಂ ಮೆಥ್ಯುಕ್ ಕಳಿತ್ ಆಸ್‌ಲ್ಲೆಂ. ಅಸಲೊ ಎಕ್ಲೊ ತಾಕಾ ಜಾಯ್ ಆಸ್‌ಲ್ಲೊ, ಆಪ್ಲೆಚ್ ಬಗ್ಲೆನ್. ಅಸಲೊ ಎಕ್ ಪಾತ್ರ್ ಆಪ್ಣಾಕ್ ಆನಿ ಆಪ್ಣಾಚ್ಯಾ ಶಿಂತಿದಾಕ್ ಜಿವೆಂ ಆನಿ ಜಾಗೆಂ ದವರ್ತೊಲೊ ಮ್ಹಳ್ಳೆಂ ತಾಕಾ ಖಚಿತ್ ಕಳಿತ್ ಆಸ್‌ಲ್ಲೆಂ. ಪುಣ್ ರಿಚ್ಚರ್ಡ್ ಕ್ಲೆಮೆಂಟಾಚೊ ಒಸಿಸಾಂತ್ ಪ್ರವೇಸ್ ಜಾವ್ನಾಸ್‌ಲ್ಲೊ ಎಕ್ ಖರೆಂಚ್ ಸಹಘಟನ್. ಜಶೆಂ ಎಕ್ ಕಥಾ ಘಡೊಂಕ್ ಆಸ್‌ಲ್ಲಿ ಆನಿ ತಿ ಘಡಾಶಿ ಕರುಂಕ್ ತ್ಯಾ ‘ಭುರ್ಗ್ಯಾಂನಿ’ ಉಚಾರ್‌ಲ್ಲಿಂ ಸರ್ವ್ ಉತ್ರಾಂ ಎಕೆ ದಾಲಿಯೆಂತ್ ಆಸ್‌ಲ್ಲಿಂ ಆನಿ ರಾಕ್ತಾಲಿಂ ಎಕಾ ವ್ಯಾಕರಣಾಕ್. ಆನಿ ಅಸಲ್ಯಾ ವ್ಯಾಕರಣಾಚಿ ಗರ್ಜ್ ಥಾಂಬಂವ್ಕ್ ಮೆಥ್ಯು ಲಿಯೊ ಆಸ್‌ಲ್ಲೊ.
ತಾಣೆ, ಜೆರೊಮಾಕ್ ಆನಿ ರಿಚ್ಚರ್ಡಾಕ್ ಆನಿ ಒಸಿಸಾಕ್ ಆನಿ ಆಪ್ಣಾಕ್ ಅಶೆಂ ತಾಂಡುನ್ ದವರ್ಲ್ಲೆಕಿ, ಜಶೆಂ ರಚ್ಣಾರಾನ್ ಸಗ್ಳ್ಯಾ ಸೌರಮಂಡಳೇಕ್ ಗುರುತ್ವಾಕರ್ಶಣ್ ಸಕ್ತೆನ್ ತಾಂಡುನ್ ದರ್‌ಲ್ಲೆಪರಿಂ. ಕುಸ್ಕುಟಾಚೆಂ ಕುಸ್ಕುಟ್ ಹಿ ಸಕತ್ ಹಲ್ಕಾಂದ್ಲಿ ತರ್ ಕಿತ್ಯಾ ಥಾವ್ನ್ ಕಿತೆಂ ಜಾಯ್ತ್ ಮ್ಹಳ್ಳೊ ಅಂದಾಜ್ ಕೊಣಾಯ್ಕೀ ನಾ. ತಶೆಂಚ್ ಜಾಲ್ಲೆಂ ಆತಾಂ. ಮೆಥ್ಯುನ್ ಹ್ಯೆ ಸಕ್ತೆಕ್ ಅಶೆಂ ಹಲ್ಕಾಂದಿಲ್ಲೆಂ ಕಿ, ಸಬಾರ್ ಸಂಗ್ತಿ ಆಪಾಪಿಂಚ್ ಘಡುಂಕ್ ಸುರು ಜಾಲ್ಯೊ.
ಪ್ರಥಮ್ ಜಾವ್ನ್ ಜೆರೊಮ್ ಲಾಜ್ರಾ ಪರಿಪೂರ್ಣ್, ಆಪ್ಲ್ಯಾ ಖರ್‍ಯಾ ಬಣಾಂನಿ, ಜಾಗೃತ್ ಜಾಲ್ಲೊ. ಜೆರೊಮಾಕ್ ಕಳಿತ್ ಜಾಲ್ಲೆಂ ಕೀ, ಯೆದೊಳ್ ಪರ್ಯಾಂತ್ಲೆ ಜಿಣಿಯೆಂತ್ ನಾಲಿಸಾಯೆನ್ ಸಲ್ವಾಲ್ಲ್ಯಾ ತಾಕಾ ರಿಚ್ಚರ್ಡಾ ಥಾವ್ನ್ ದೆಂವ್ಣೆಂ ಪಾಟ್ಲ್ಯಾನ್ ದೆಂವ್ಣಿಂ, ಕೀಳ್ ವೆಬಿಚಾರಿಂಚೊ ಆಸ್ರೊ, ಈವಾ ಥಾವ್ನ್ ಎಕಾ ಲಂಯ್ಗಿಕ್ ದುಬಾವಾ ಥಾವ್ನ್ ದುಸ್ರ್ಯಾಕ್ ಉಡ್ಕಿ ಮಾರುನ್, ನತೀಜೊ ನಾಫಳಾದೀಕ್ ಜಾತಾನಾ ಉದೆಲ್ಲಿ ದೆದೆಸ್ಪ್ರಾಯ್ ತಾಚ್ಯಾ ಸೊಸುಂಕ್ ಜಾಯ್ನಾತ್‌ಲ್ಲಿ. ತಾಕಾ (ಜೆರೊಮಾಕ್) ಎಕ್‌ಚ್ ಎಕ್ ವಾಟ್ ಉಗ್ತಿ ಆಸ್‌ಲ್ಲಿ – ಮೆಥ್ಯು ಲಿಯೊಕ್, ಒಸಿಸಾಂತ್ಲ್ಯಾ ದೆವಾಕ್, ಒಸಿಸಾಂತ್ಲ್ಯಾ ರಿಂಗ್‌ಮಾಸ್ಟರಾಕ್ ಖುಶ್ ಕರ್ಚ. ನ್ಹಯ್ ಹೋಮ್-ಬಲಿಯೊ ಅರ್ಪುನ್ ಪುಣ್ ಲೀಜಾಚ್ಯಾ ಮರ್ಣಾಕ್ ಕಾರಾಣ್ ಜಾಲ್ಲ್ಯಾ ಡೊಕ್ಟರಾಕ್ ಹಾಡುನ್ ಮೆಥ್ಯು ಸಾಮ್ಕಾರ್ ಉಬೊ ಕರ್ಚೊ. ಮೆಥುಕ್ ಪ್ರಸನ್ನ್ ಕರುಂಕ್ ಜೆರೊಮಾಕ್ ಹೆರ್ ಉಪಾಯ್ ನಾತ್‌ಲ್ಲೊ.
ರಿಚ್ಚರ್ಡಾ ಸಾಮ್ಕಾರ್ ಆಪ್ಣೆ ಮೆಥ್ಯುಚೆ ನದ್ರೆಂತ್ ಎಕ್ ಎಕ್ಕೊ ಚಡ್ ಜಾಯ್ಜೆ ತರ್ ಹೆರ್ ವಾಟ್ ನಾತ್‌ಲ್ಲಿ. ಪುಣ್ ಆಸ್‌ಲ್ಲಿ ವಾಟ್ ತರಿ ಕಸಲಿ? ಆಸ್‌ಲ್ಲ್ಯೊ ಸರ್ವ್ ವಾಟೊ ತಾಣೆ ವಾಪರ್ಲ್ಲ್ಯೊ. ರಿಸೆಪ್ಶನಿಶ್ಟಾಕ್ ಫುಸ್ಲಾವ್ನ್, ಲಂಯ್ಗಿಕ್ ರಿತಿರ್ ತಾಕಾ ವಾಪರ್ನ್ ತಾಣೆ ರಿಚ್ಚರ್ಡಾ ವಿರೊಧ್ ಧಾರಾಳ್ ಪುರಾವೆ ಜಮೊ ಕೆಲ್ಲೆ ಪುಣ್ ಖಂಚಾಕೀ ತಾಚೆ ಲಾಗಿಂ ರುಜ್ವಾತಿ ನಾತ್‌ಲ್ಲ್ಯೊ. ತಾಚ್ಯಾ ವಿಕಾಳ್‌ಪಣಾಕ್ ತಾಣೆ ಮೆಥ್ಯುಚ್ಯಾ ಬೀಚ್ ಕೊಟೆಜಿಕ್ ರಿಚ್ಚರ್ಡ್ ಆನಿ ರಮೋನಾಚಿಂ ಲಂಯ್ಗಿಕ್ ಆತರ್ವಾಣಾಂಚ್ಯೊ ತಸ್ವೀರ್‍ಯೊ ಕಾಡುಂಕ್ ಮೆಲ್ಕಮಾನ್ ಧಾಡ್‌ಲ್ಲೊ ಫೊಟೊಗ್ರಾಫರ್ ತಾಂತ್ರಿಕ್ ಕಾರಾಣಾಂಕ್ ಲಾಗುನ್ ಸಲ್ವಾಲ್ಲೊ. ಎಕ್‌ಚ್ ಎಕ್ ತಸ್ವೀರ್ ಕಾಡ್ಚೆಂ ಸೊಡ್ಯಾಂ, ತಾಕಾ ಕೊಟೆಜಿಸರ್ಶಿಂ ವಚುಂಕ್‌ಚ್ ಸೆಕ್ಯುರಿಟಿ ಪಾರ್ಯಾಂನಿ ಸೊಡ್ಲೆಂ ನಾ. ತ್ಯಾ ವಯ್ರ್ ಫೊಟೊಗ್ರಾಫರಾನ್ ಸೆಕ್ಯುರಿಟಿ ಪಾರ್ಯಾಂಥಾವ್ನ್ ಸರ್ಸರಿತ್ತ್ ಮಾರ್ ಖೆಲ್ಲೆ. ಹಿ ಸಂಗತ್ ಮೆಲ್ಕಮಾಥಾವ್ನ್ ಜಾಣಾಂ ಜಾತಾನಾ ಜೆರೊಮ್ ಸಗ್ಳೊಚ್ ಪಿಸೊ ಜಾಲ್ಲೊ. ಪುಣ್ ತಾಣೆ ಕಸಲೆಂಚ್ ಸನ್ನಿವೇಶ್ ಉಬೆಂ ಕೆಲ್ಲೆಂ ನಾ. ಕಿತ್ಯಾಕ್ ಮೆಥ್ಯು ಜಿಕ್‌ಲ್ಲೊ ಆನಿ ಎಕ್ ಮೆಟ್ ಫುಡೆಂ ಆಸ್‌ಲ್ಲೊ.
ಆನಿ ಆತಾಂ ಹ್ಯೆ ರಾತಿಂ, ಫ್ರೆಡ್ ಟೇಯ್ಲರಾಚಿ ಸ-ವಿ ಜಮಾತ್ ಜಾವ್ನ್ ಮಾತ್ಯಾರ್ ಸೊರ್‍ಯಾಚೊ ಶವರ್ ವೊತುನ್ಂಚ್ ಮೆಥ್ಯುಚ್ಯಾ ಬಂಗ್ಲ್ಯಾಕ್ ಆಯಿಲ್ಲ್ಯಾ ಜೆರೊಮಾನ್ ಉಬೊ ಕೆಲ್ಲೊ ಡ್ರಾಮಾ ತಾಚೆ ಖುನಿಯೆಂತ್ ಆಕೇರ್ ಜಾಯ್ಜೆ ಆಸ್‌ಲ್ಲೊ ಪುಣ್-
‘ಆಕ್ರೇಕ್ ಜಾಂವ್ಕ್ ಆಸ್ಚೆಂ ಜಾಲೆಂಚ್!’
‘ಕಿತೆಂ ಜಾಲೆಂ?’ ಮೆಥ್ಯುನ್ ಸಿಗಾರ್ ಪೆಟಯ್ಲೆಂ.
‘ಸ್ಕಾಯ್‌ಪಾರ್ಕ್ ಪಾರ್ಟಿ ಜಾಲ್ಯಾ ಉಪ್ರಾಂತ್…..you…you…fucked my wife!’
ಉಪ್ರಾಂತ್ ಘಡ್‌ಲ್ಲೆಂ ಕ್ಷಣಿಕ್ ಜಾವ್ನಾಸ್‌ಲ್ಲೆಂ ಪುಣ್ ಅನಾಪೇಕ್ಷಿತ್ ನ್ಹಯ್.
ಆಪ್ಲ್ಯಾ ಉಜ್ವ್ಯಾ ಹಾತಾಚ್ಯಾ ಬೊಟಾಂ ಮಧೆಂ ಆಸ್‌ಲ್ಲೆ ಸಿಗಾರ್ ಮೆಥ್ಯುನ್ ದಾವ್ಯಾಕ್ ವರ್ಗಾಯಿಲೆಂ ಆನಿ ತಾಣೆ ಉಜ್ವ್ಯಾ ಹಾತಾನ್ ಭಿಜಾಯಿಲ್ಲಿ ಮುಟ್ ಜೆರೊಮಾಚೆ ಖಾಡ್ಕೇರ್ ಫುಟ್ಲಿ. ಜೆರೊಮ್ ಪಾಟಿಂ ಉಸಳ್ಳೊ ಆನಿ ತಾಚ್ಯಾ ಹಾತಾಂತ್ಲೊ ಗ್ಲಾಸ್ ಕಾರ್ಪೆಟಿಚೆರ್ ಪಡ್ಲೊ ಆನಿ ವೊಡ್ಕಾ ಶಿಂಪ್ಲೊ.
ಕಿತ್ಲ್ಯಾ ವರ್ಸಾಂಥಾವ್ನ್ ಹ್ಯಾ ಅವ್ಕಾಸಾಕ್ ಹಾಂವ್ ರಾಕೊನ್ ಆಸ್‌ಲ್ಲೊ!’ ಮ್ಹಣಾಲೊ ಮೆಥ್ಯು ಆಪ್ಲ್ಯಾ ಬೊಟಾಂಚೆರ್ ಸಮಾಧಾನೆಚೊ ಸ್ವಾಸ್ ಫುಂಕೊನ್. ‘ಸ್ಕಾಯ್‌ಪಾರ್ಕ್ ಪಾರ್ಟಿ ಉಪ್ರಾಂತ್ ಕಿತೆಂ ಜಾಲೆಂ ತೆಂ ಜಾಣಾಂ ಜಾಂವ್ಚೆಂ ಪುರುಷತ್ವ್ ತುಜೆಲಾಗಿಂ ನಾ.’
‘ಪುರುಷತ್ವಾಚೆಂ ಉಲವ್ಣೆಂ ಉಲಯ್ನಾಕಾ, ಮೆಥ್ಯು ಲಿಯೊ!’ ಕಾರ್ಪೆಟಿರ್‌ಚ್ ಉಟೊನ್ ಬಸುನ್ ಮ್ಹಣಾಲೊ ಜೆರೊಮ್. ತಾಚೆ ವೊಂಟ್ ಫುಟ್‌ಲ್ಲೆ ಆನಿ ನಾಕಾಚ್ಯಾ ಫುಡಾಂನಿ ರಗತ್ ದೆಂವ್ತಾಲೆಂ. “ಡಾಯ್ನಿಂಗ್ ಟೇಬಲಾಚೆರ್ ಹಾಂವೆಂ ಕಿತೆಂ ಕೆಲೆಂ ಆನಿ ಹಾಂವ್ ಕಿತೆಂ ಕರುಂಕ್ ಸಕ್ಲೊಂ ಮ್ಹಳ್ಳೆಂ ಈವಾಲಾಗಿಂ ವಿಚಾರ್, ಒಸಿಸಾಂತ್ಲ್ಯಾ ದೆವಾ ಸರ್ವೇಸ್ಪರಾ!’ ಬೊಬಾಟ್ಲೊ ಜೆರೊಮ್. ‘ಸ್ಕಾಯ್‌ಪಾರ್ಕಾಂತ್ಲ್ಯಾ ಪಾರ್ಟಿ ಉಪ್ರಾಂತ್ ತುಮಿ ಕಿತೆಂ ಕೆಲೆಂ ಮ್ಹಳ್ಳೆಂ ಹಾಂವ್ ದೃಶಾನ್ ದೃಶ್ ಜಾಣಾಂ, ದಳ್ದಿರ್‍ಯಾ. ಆಕ್ರೇಕ್ ತರಿ ತುಂವೆಂ ತುಜಿ ಆಶಾ ಜ್ಯಾರಿ ಕೆಲಿಯ್. ಕಿತ್ಲೆಂ ಪಿಸುಡ್ಲೆಂಯ್ ಮ್ಹಜ್ಯಾ ಈವಾಕ್?’
‘ತುಜ್ಯಾ ಈವಾಕ್?’ ಖೆಂಚ್ಲೊ ಮೆಥ್ಯು. ‘ಮ್ಹಜ್ಯಾ ತಸಲ್ಯಾ ದಾದ್ಲ್ಯಾಕ್ ಸಾಂಗ್‌ಲ್ಲ್ಯಾ ಈವಾಕ್ ಮ್ಹಣ್!’
‘ಮೆಥ್ಯು, ಬ್ಲಡಿ ಬಾಸ್ಟರ್ಡ್!’ ಮ್ಹಳೆಂ ಜೆರೊಮಾನ್ ತಾಚ್ಯಾ ಸಾಮ್ಕಾರ್ ಬೋಟ್ ಹಾಲವ್ನ್. ‘ಹಾಂವೆಂ ಸಾಂಗೊಂಕ್ ಆಸ್ಚೆಂ ಆಯ್ಕಾತಾನಾ ತುಜೆಂ ದಾದ್ಲೆಂಪಣ್ ಖಿರೊನ್ ವೆತೆಲೆಂ ಮಾತ್ರ್ ನ್ಹಯ್, ಈವಾ ತಸಲಿಂ ಹಜಾರ್ ಜಣಾಂ ತುಜೆ ಸಾಮ್ಕಾರ್ ವಿಣ್ಗಿಂ ನಾಚ್ಲ್ಯಾರ್‌ಯಿ ತುಂ ಕಿತೆಂ ಕರ್ಚೆಂ ಮ್ಹಳ್ಳೆ ಕಳಿತ್ ಜಾಯ್ನಾಸ್ತಾನಾ ಮೂಟ್ ಮಾರ್ತೊಲೊಯ್.’
‘ತರ್ ಜಾಂಕುಳ್ ಆತಾಂ!’ ಮೆಥ್ಯುನ್‌ಯಿ ಕೀಳ್ ಉತ್ರಾಂ ವಾಪರ್ಲಿಂ. ಜೆರೊಮಾನ್ ಕಾರ್ಪೆಟಿರ್ ಪಡ್‌ಲ್ಲೊ ಗ್ಲಾಸ್ ವಿಂಚುನ್ ಪರ್ತ್ಯಾನ್ ಭರ್ಲೊ. ಮೆಥ್ಯುಚ್ಯಾ ಸಿಗಾರಾಚೊ ಧುಂವರ್ ಸ್ಟಡಿ ರುಮಾಂತ್ ಭರೊನ್ ಯೆತಾಲೊ.
‘ಬೊಸ್ ಮೆಥ್ಯು ಬೊಸ್,’ ಜೆರೊಮಾನ್ ಮ್ಹಳೆಂ ಎಕಾ ದಿವಾನಾಚೆರ್ ಬಸುನ್. ‘ಹಾಂವೆಂ ಸಾಂಗೊಂಕ್ ಆಸ್ಚೆಂ ಉಬೊ ರಾವೊನ್ ಆಯ್ಕೊಂಚೆಂ ತ್ರಾಣ್ ಆನಿ ಶಾಥಿ ತುಕಾ ಆಸ್ಚಿ ನಾ.’
ಮೆಥ್ಯು, ಆಪ್ಲ್ಯಾ ಸ್ಟಡಿ ಡೆಸ್ಕಾಚ್ಯಾ ಕದೆಲಾರ್ ಬಸ್ಲೊ.
ಪಾಂಚ್ ಖಿಣಾಂಚ್ಯಾ ಮೌನಾ ಉಪ್ರಾಂತ್ ಜೆರೊಮಾನ್ ಸುರು ಕೆಲೆಂ.
‘ತುಂವೆಂ ಪೊಸುನ್ ದವರ್‌ಲ್ಲ್ಯಾ ಚಿಟ್ಟ್ಯಾ ವಾಗಾಚ್ಯಾ ಪಿಲಾಕ್ ಪಯ್ಶ್ಯಾಂಚಿ ರೂಚ್ ಲಾಗ್ಲ್ಯಾ!’ ತಾಣೆ ಮ್ಹಳೆಂ. ‘ತೊ ಒಸಿಸ್ ಕಂಪೆನಿಕ್ ದಿಸಾ ಉಜ್ವಾಡೆಂಚ್ ವಿಕ್ರಿತ್ ಕರ್ತಾ. ಮ್ಹಜೆಲಾಗಿಂ ರುಜ್ವಾತಿ ಆಸಾತ್.’
‘ಕಸಲ್ಯೊ ರುಜ್ವಾತಿ?’
‘ಕಿತೆಂಯಿ ತರಿ ಹಾಂವ್ ಮ್ಹಜ್ಯಾ ನವ್ಕರೆಕ್ ಧಗೊ ಕರಿನಾ.’ ಆಪ್ಲಿಂ ಉತ್ರಾಂ ವಿಂಚ್ಲಿಂ ಜೆರೊಮಾನ್. ‘ಮ್ಹಜೆಲಾಗಿಂ ದಸ್ತಾವೆಜಾಂ ಆಸಾತ್, ಟೇಪ್ ಕೆಲ್ಲಿಂ ಸಂಭಾಷಣಾಂ ಆಸಾತ್, ಬೆಂಕ್ ಎಕೌಂಟ್ ನಂಬ್ರಾಂ ಆಸಾತ್.’
‘ಮತ್ಲಬ್, ತುಜೆಲಾಗಿಂ ಸರ್ವಾಂಚ್ಯಾ ಕೆಬಿನಾಂಚ್ಯೊ ಚೋರ್ ಚಾವಿಯೊ ಆಸಾತ್, ಹರ್ಯೆಕ್ ಫೋನ್ ಲಾಯ್ನ್ ತುಂವೆಂ ಟ್ಯಾಪ್ ಕೆಲ್ಯಾಯ್ ಆನಿ ಭೋವ್‌ಶಾ ಎಕಾ ಪ್ರಾಯ್ವೇಟ್ ಡಿಟೆಕ್ಟಿವಾಕ್ ತುಂವೆಂ ಸಹಾಯಕ್ ಜಾವ್ನ್ ನೆಮ್ಲಾಯ್.’
‘ಖಂಡಿತ್ ಜಾವ್ನ್!’ ಹರ್ದೆಂ ಪೆಟ್ಲೆಂ ಜೆರೊಮಾನ್. ‘Never under estimate Jerome Lazra, Sir, never! ಒಸಿಸ್ ಕಂಪೆನಿ ವಿಕ್ರಿತ್ ಜಾಂವ್ಕ್ ಹಾಂವ್ ಸೊಡಿಸೊಂ ನಾ.’
ತಾಣೆ ಬ್ರೀಫ್‌ಕೇಜ್ ಉಗ್ತಿ ಕೆಲಿ. ‘ತುಕಾ ರುಜ್ವಾತಿ ಆಯ್ಕೊಂಕ್ ಆನಿ ಪಳೆಂವ್ಕ್ ಜಾಯ್?’
‘ಗರ್ಜ್ ನಾ!’ ಮೆಥ್ಯುನ್ ಮ್ಹಳೆಂ. ‘ರಿಚ್ಚರ್ಡ್ ಆನಿ ಮ್ಹಜೆ ಮದ್ಲಿ ಸಮ್ಜಣಿ ಕಸಲ್ಯಾಯಿ ರುಜ್ವಾತಿಂಕ್ ಆಪವ್ಣೆಂ ದೀನಾ.’
‘ತುಂ ಅಶೆಂ ಮ್ಹಣ್ತೊಲೊಯ್ ಮ್ಹಣ್ ಹಾಂವ್ ಜಾಣಾಸ್ಲೊಂ!’ ಮ್ಹಳೆಂ ಜೆರೊಮಾನ್, ಬ್ರೀಫ್‌ಕೇಜ್ ದಾಂಪುನ್. ‘ಬರೆಂ. ಆತಾಂ ಎಕ್ ನವಿ ಸಂಗತ್– ಪಾಟ್ಲ್ಯಾ ದೋನ್ ರಾತಿಂಥಾವ್ನ್ ತುಜ್ಯಾಚ್ ಬೀಚ್‌ಕೊಟೆಜಿಂತ್ ರಿಚ್ಚರ್ಡ್ ತುಜೆ ಧುವೆಕ್, ರಮೋನಾಕ್, ಸ್ಕ್ರೂ ಘಾಲಿತ್ತ್ ಆಸಾ. ದಾಕ್ಲೆ ಹಾಂಗಾಸರ್‌ಚ್ ಪಳೆಂವ್ಕ್ ಜಾಯ್ ಯಾ ಈವಾ ಸಾಂಗಾತಾ ಪಳೆತಾಯ್? ಈವಾಚಿ ರೂಚ್ ರಿಚ್ಚರ್ಡಾನ್‌ಯಿ ಪಳೆಲ್ಯಾ, ಚಾಕ್ಲ್ಯಾ ಆನಿ ಲೆಂವ್ಲ್ಯಾ.’
ಮೆಥ್ಯುಚ್ಯಾ ಮುಕಮಳಾರ್ ಕಸಲಿಚ್ ಬದ್ಲವಾಣ್ ಜಾಲಿ ನಾ.
‘ತುಜೆಂ ಪ್ರತಿಕ್ರಿಯೆಂ ಅಸಲೆಂಚ್ ಆಸ್ತೆಲೆಂ ಮ್ಹಣ್ ಹಾಂವ್ ಜಾಣಾಸ್ಲೊಂ!’ ಮ್ಹಳೆಂ ಜೆರೊಮಾನ್ ಆಪ್ಲೊ ಗ್ಲಾಸ್ ಖಾಲಿ ಕರುನ್. ಆನ್ಯೇಕ್ ವೊಡ್ಕಾ ಘೆಂವ್?’
ಮೆಥ್ಯುನ್ ಜಾಪ್ ದಿಲಿ ನಾ.
‘ರಮೋನಾಕ್ ಪ್ರಸೂತ್ ಜಾತಾನಾ ತುಜೆ ಪತಿಣೆನ್ ಜೀವ್ ದಿಲೊ ಯಾ ಕೊಣೆಂಗೀ ತಿಚೊ ಜೀವ್ ಕಾಡ್ಲೊ.’ ಬಾರಾಥಾವ್ನ್ ಪಾಟಿಂ ಆಯಿಲ್ಲೊ ಜೆರೊಮ್ ಪರ್ತ್ಯಾನ್ ದಿವಾನಾಚೆರ್ ಬಸುನ್ ಮ್ಹಣಾಲೊ. ‘ತಿಚ್ಯಾ ಮರಣಾಚೆಂ ಕಾರಾಣ್ ಜಾವ್ನಾಸ್‌ಲ್ಲೊ ಎಕ್ಲೊ ಕಾಮುಕಿ ಆನಿ ಆಮಾಲಿ ಡೊಕ್ಟರ್.’
‘ಚತ್ರಾಯ್, ಜೆರೊಮ್!’ ದಾಂತಾಂ ಇಡ್ಯಾಂತ್ಲ್ಯಾನ್ ಪುಸ್ಪುಸ್ಲೊ ಮೆಥ್ಯು. ‘ಹೊ ಮ್ಹಜೊ ಖಾಸ್ಕಿ ಘಾಯ್. ತಾಚೆ ಮೀಟ್ ರಗ್ಡುಂಕ್ ಕೊಣಾಕೀ ಹಕ್ಕ್ ನಾ.’
‘ಮ್ಹಾಕಾ ಹಕ್ಕ್ ಆಸಾ!’ ಸಟ್ಟ್ ಕರುನ್ ಜಾಪ್ ದಿಲಿ ಜೆರೊಮಾನ್. ‘ಪುಣ್ ಆತಾಂ ಮೀಟ್ ನಾಕಾ. ಘಾಯ್ ಮಾಜ್ವಂವ್ಕ್ ಹಾಂವೆಂ ಮುಲಾಮ್ಂಚ್ ಹಾಡ್ಲ್ಯಾ.’
ಮೆಥ್ಯು ಮೊನೊ ಜಾಲೊ.
‘ತುಜಿ ಪತಿಣ್ ಮರ್ತಾನಾ ತುಂ ಗಲ್ಫಾಂತ್ ಆಸ್‌ಲ್ಲೊಯ್. ತಿ ಅಂತರ್ಲಿ ಮ್ಹಳ್ಳಿ ಖಬರ್ ಕಳ್‌ಲ್ಲ್ಯಾಫರಾ ತುಂ ಪಾಟಿಂ ಯೆತಾನಾ ತ್ಯಾ ಡೊಕ್ಟರಾಚಿ ಪಿತುಳ್ ಭಾಯ್ರ್ ಪಡ್‌ಲ್ಲಿ ಆನಿ ರಾಜಕೀಯ್ ಫುಡಾರಿಂಚ್ಯಾ ಮಜತೇನ್ ತಾಣೆ ಪಳಾಪಳ್ ಘೆತ್‌ಲ್ಲಿ. ತ್ಯಾ ಡೊಕ್ಟರಾಚೆಂ ನಾಂವ್ ಡೊಕ್ಟರ್ ಫ್ರಾನ್ಸಿಸ್ ಕ್ಲೆಮೆಂಟ್.’
‘ಜೆರೊಮ್!’ ಮೆಥ್ಯು ಖಿಳಂಚ್ಲೊ.
‘ಕಾಂಯ್ ಮತಿಕ್ ಗೆಲೆಂ, ಮೆಥ್ಯು?’
‘ನಾ!’
‘ವೆಚೆಂ ನಾ,’ ಮ್ಹಳೆಂ ಜೆರೊಮಾನ್. ‘ತಿತ್ಲೊ ಸ್ಮಾರ್ಟ್ ಮನಿಸ್ ತುಂ ನ್ಹಯ್. ಹೊ ತುಜೊ ರಿಚ್ಚರ್ಡ್ ಕ್ಲೆಮೆಂಟ್ ಜಾವ್ನಾಸಾ ಎಕ್ಲೊಚ್ ಪುತ್ ತುಂವೆಂ ಸೊದ್ಚ್ಯಾ ಡೊಕ್ಟರ್ ಫ್ರಾನ್ಸಿಸ್ ಕ್ಲೆಮೆಂಟಾಚೊ!
ಪುಣ್ ಮೆಥ್ಯುಥಂಯ್ ಕಸಲಿಚ್ ಬದ್ಲವಣ್ ಜಾಲಿ ನಾ ತೆಂ ಪಳೆತಾನಾ ಮೆಲ್ಕಮಾನ್ ಯೆದೊಳ್ ಕೆಲ್ಲ್ಯಾ ಪತ್ತೇದಾರಿ ವಾವ್ರಾಚೊ ಮುಕ್ಕಾಲ್ ವಾಂಟೊ ಮೆಥ್ಯುಕ್ ಕಳಿತ್ ಆಸ್‌ಲ್ಲೊ ಮ್ಹಳ್ಳೆಂ ಸತ್ ಜೆರೊಮಾಚ್ಯಾ ಮತಿಕ್ ಗೆಲೆಂ ನಾ. ತಾಕಾ ಜಾಯ್ ಆಸ್‌ಲ್ಲೆಂ ಮೆಥ್ಯುನ್ ಈವಾಕ್ ಸ್ಕ್ರೂ ಘಾಲಿಜೆ ಮ್ಹಣ್ ಆನಿ ತಿಂ ದೊಗಾಂ ಸ್ಕಾಯ್‌ಪಾರ್ಕ್ ಪಾರ್ಟಿ ಥಾವ್ನ್ ಸಾಂಗಾತಾಚ್ ಜೆರೊಮಾಚ್ಯಾ ವಿಲ್ಲಾಕ್ ವೆತಾನಾ, ಹೆಂ ಜಾಲೆಂಚ್ ಮ್ಹಣ್ ತಾಣೆಂ ಲೆಕ್ಲೆಂ. ಹಲೀನಾ ಜೆನಿಸ್ ಆಪ್ಣಾಚ್ಯಾ ವಾಂಟಾಕ್ ಯೆಂವ್ಚಿ ಮೊಂವಾಂಚಿ ಪೊಳಿ ನ್ಹಯ್ ಮ್ಹಣ್ ಜೆರೊಮಾಕ್ ಕಳಿತ್ ಆಸ್‌ಲ್ಲೆಂ, ತಾಣೆ ಕಿತ್ಲೆ ಆಂವ್ಡೆ ಘಾಲ್ಯಾರಿ.
ಪುಣ್ ರಿಚ್ಚರ್ಡಾಕ್ ಆಪ್ಲ್ಯಾ ಎಸ್ಟೇಟಿಕ್ ಆಪವ್ಣೆಂ ದೀವ್ನ್ ಹೆಲೀನಾ ತಾಚೆ ಖಾತಿರ್ ಉಗ್ತೆಂ ಜಾಲೆಂಚ್ ಮ್ಹಣ್ ಆಪ್ಣಾಕ್‌ಚ್ ಸಮಾದಾನ್ ಕೆಲ್ಲೆಂ ಜೆರೊಮಾನ್.
ಆನಿ ಮೆಥ್ಯುಚೆ ಬೀಚ್ ಕೊಟೆಜಿಂತ್ ರಮಿ ಆನಿ ರಿಚ್ಚರ್ಡಾ ಮದೆಂ ಚಲ್‌ಲ್ಲೆಂ ಆತರ್ವಣ್ ದಾಕ್ಲ್ಯಾ ಸಮೇತ್ ತಸ್ವೀರ್‍ಯಾಂನಿ ಕಯ್ದ್ ಕರುಂಕ್ ತಾಣೆ ದಾಡ್‌ಲ್ಲೊ ಮೆಲ್ಕಮಾಚೊ ಫೊಟೊಗ್ರಾಫರ್ ನಾಪಸ್ ಜಾಂವ್ಚ್ಯಾಂತ್ ಮೆಥ್ಯುಚೊ ಹಾತ್ ಆಸ್‌ಲ್ಲೊ ಮ್ಹಣ್ ಜೆರೊಮಾಕ್ ಬಿಲ್ಕುಲ್ ಕಳಿತ್ ನಾತ್‌ಲ್ಲೆಂ, ಕೊಣಾಕ್‌ಚ್ ಕಳಿತ್ ನಾತ್‌ಲ್ಲೆಂ.
ಮೆಲ್ಕಮಾ ತಸಲೊ ದಲಾಲಿ ಆನಿ ತೆಲ್ಮಾ ತಸ್ಲಿ ಸವಾಯ್ ಆನಿ ಕೀಳ್ ವೆಬಿಚಾರಿಣ್ ವಿಕ್ರಪಾಕ್ ಆಸ್ಚಿ ಸಂಗತ್ ಆನಿ ಸತ್ ಖಂಚಾಯಿ ಪಿಶಾಕ್‌ಯಿ ಸಮ್ಜಾತಿ ಪುಣ್ ಜೆರೊಮಾಕ್ ಸಮ್ಜಾಲಿ ನಾ. ಮೆಲ್ಕಮ್ ಆನಿ ತೆಲ್ಮಾಂ ಹೆಣೆಂ ಜೆರೊಮಾ ಥಾವ್ನ್ ಆನಿ ತೆಣೆಂ ಮೆಥ್ಯುಥಾವ್ನ್ ರುಸುಂ ಘೆತಾಲಿಂ ಮ್ಹಳ್ಳೆಂ ಸಾಮಾನ್ಯ್ ರಾಜಾಂವ್ ಜೆರೊಮಾಕ್ ಕಳಿತ್ ಜಾಂವ್ಕ್ ನಾತ್‌ಲ್ಲೆಂ. ತೆಲ್ಮಾ ಕಶೆಂಯಿ ಒಸಿಸಾಚೊ ಸ್ಟಾಫ್. ಖಂಚಾಯಿ ಸ್ಟಾಫಾಕ್ ಆಪ್ಲಿ ನವ್ಕರಿ ಆನಿ ಆಪ್ಲ್ಯಾ ಬೊಸ್ಸಾಕ್ ಆಪ್ಲ್ಯಾ ವಾವ್ರಾನ್ ಖುಶ್ ದವರ್ಚೆಂ ಎಕಾ ಕುಶಿನ್ ಮಹತ್ವಾಚೆಂ ತರ್, ಹ್ಯಾ ಮಕ್ಸದಾಕ್ ದಿಗೊ ಮೆಳಾಶೆಂ ಕರ್ಚೊ ಉದ್ದೇಶ್ ದುಸ್ರೊ ಪುಣ್ ಮಹತ್ವಾಚೊ. ತೆಲ್ಮಾಕ್ ಒಸಿಸಾಂತ್ಲಿ ಪರಿಗತ್ ಬರ್‍ಯಾನ್ ಕಳಿತ್ ಆಸ್‌ಲ್ಲಿ ಯಾ ಕಳಿತ್ ಜಾಲ್ಲಿ. ಖಂಚಾ ದಿಸಾ ಹೆಲೀನಾ ಒಸಿಸಾಂತ್ ರಿಗ್ಲೆಂ, ಖಂಚಾ ದಿಸಾ ರಿಚ್ಚರ್ಡ್ ಕ್ಲೆಮೆಂಟ್ ಒಸಿಸಾಂತ್ ಕ್ಯಾಲ್ಕುಲೇಟರಾಚೆಂ ಪ್ರಕರಣ್ ಉಬೆಂ ಕರುನ್ ಪ್ರವೇಸ್ ಜಾಲೊ, ತೆಲ್ಮಾಕ್ ಎಕ್‌ಚ್ ಫಿಕ್ರ್ ಆಸ್‌ಲ್ಲಿ-ಆಪ್ಣಾಚಿ ನವ್ಕರಿ ಭದ್ರ್ ದವರ್ಚಿ. ದೆಕುನ್ ತಾಣೆ ಹೆಣೆಂ ಜ್ರೊಮಾಕ್ ಆನಿ ತೆಣೆಂ ಮೆಥ್ಯುಕ್ ತೆಂ ಸರ್ವಿಸ್ ದಿತಾಲೆಂ. ಮೆಥ್ಯುಕ್ ಲಾಂಯ್ಗಿಕತೆಚಿ ಕಸಲಿಚ್ ಗರ್ಜ್ ನಾತ್‌ಲ್ಲಿ, ಆವಡ್ ನಾತ್‌ಲ್ಲಿ. ದೆಕುನ್ ಹೆಂ ಜಾಳ್ ತೆಲ್ಮಾನ್ ಫಯ್ಲಾಲೆಂ ನಾ. ಜೆರೊಮಾಕ್ ಲಂಯ್ಗಿಕತೆಚಿ ವಿಕೃತ್ ವೋಡ್ ಆಸ್‌ಲ್ಲಿ ಆನಿ ತೆಲ್ಮಾನ್ ತಾಚ್ಯಾ ಖಂಚಾಯಿ ವಿಕೃತ್‌ಪಣಾಂಕ್ ನಾ ಮ್ಹಳ್ಳೆಂ ನಾ; ಪಾವಾನಾತ್‌ಲ್ಯಾರ್ ತಾಚ್ಯಾಚ್ ಜಿನ್ಸಾಂಚ್ಯಾ ಹೆರ್ ಚಲಿಯಾಂಕ್ ತಲಾಸ್ ಕರ್ಚ್ಯಾತ್ ತೆಂ ಪಾಟಿಂ ಸರಾನಾತ್‌ಲ್ಲೆಂ.
ಅಶೆಂ ಜಾವ್ನ್ ತಾಣೆ ಮೆಥ್ಯುಕ್ ಖಬರ್ ದಿಲ್ಲಿ, ಫಲಾಣ್ಯಾ ರಾತಿಂ ರಿಚ್ಚರ್ಡ್ ಆನಿ ರಮೋನಾ ಮೆಥ್ಯುಚ್ಯಾ ಬೀಚ್ ಕೊಟೆಜಿಂತ್ ಭೆಟ್ತೆಲಿಂ. ಹೆಂ ಆಯ್ಕಾಲ್ಲ್ಯಾ ಮೆಥ್ಯುನ್ ಕಸಲೆಂ ಕ್ರಮ್ ಘೆಂವ್ಚಿ ಮಾಂಡ್ಣಿ ಕೆಲಿ ಯಾ ಕರ್ಚ್ಯಾರ್ ಆಸ್‌ಲ್ಲೊ ಮ್ಹಳ್ಳೆಂ ತಾಕಾ ಕಳಿತ್ ನಾತ್‌ಲ್ಲೆಂ. ಪುಣ್ ಮೆಥ್ಯು ಬರಾಬರ್ ಸ್ಥಿಮಿತಾಂತ್ ಆಸ್‌ಲ್ಲೊ. ತೆಲ್ಮಾನ್ ದಿಲಿ ಬಾತ್ಮಿ ಆಯ್ಕೊನ್ ತಾಣೆ ಮೆಲ್ಕಮಾಕ್ ವಾಪಾರ್‍ಯೆತ್ ಆಸ್‌ಲ್ಲೊ ಪುಣ್ ತಾಣೆ ತಶೆಂ ಕೆಲೆಂ ನಾ. ಆಪ್ಲೆ ಧುವೆಕ್ ಪರಿಪೂರ್ಣ್ ರಿತಿರ್ ಸಮ್ಜಾಲ್ಲ್ಯಾ ತಾಣೆ ರಮೋನಾಚಿಂ ಉತ್ರಾಂ – ಹ್ಯಾ ಸರ್ವಾಚಿ ಗರ್‍ಜಾಸ್‌ಲ್ಲಿ ಡೆಡಿ – ಮ್ಹಳ್ಳಿ ಗಮನಾಂತ್ ಹಾಡ್ಲಿಂ ಆನಿ ಬೀಚ್ ಕೊಟೆಜಿಚ್ಯಾ ಸೆಕ್ಯೂರಿಟಿಕ್ ಮುಂಗಡ್ ಇಸಾರೊ ದಿಲ್ಲೊ – ರಮೋನಾ ಆನಿ ತಾಚ್ಯಾ ಸಾಂಗೊಡ್ಯಾಕ್ ಪ್ರವೇಸ್ ದಿಯಾ ಪುಣ್ ತಿಸ್ರೊ ಕೋಣ್‌ಯಿ ಕೊಟೆಜಿಕ್ ಯೇತ್ ತರ್ ತಾಚೆಂ ಸತ್ತ್ಯಾನಾಸ್ ಕರಾ. ಹೆಂ ಎಕ್ ಸಾದೆಂ ಕ್ರಮ್ ಪುಣ್ ಸೆಕ್ಯೂರಿಟಿ ಪಾರ್ಯಾಂನಿ ಹೆಂ ಜ್ಯಾರಿ ಕರ್ತಾನಾ ಕೊಣಾಕ್‌ಚ್ ದುಬಾವ್ ಜಾಂವ್ಕ್ ಇಡೆಂ ನಾ. ತರಿ ಪುಣ್ ಮೆಲ್ಕಮಾಚೊ ಫೊಟೊಗ್ರಾಫರ್ ಕಾಂಯ್ ತರಿ ಶಾಣೆಂಪಣ್ ದಾಕಯ್ತೊಲೊ ಮ್ಹಳ್ಳೆಂ ಮೆಥ್ಯುಕ್ ಅಂದಾಜ್ ಆಸ್‌ಲ್ಲೊ. ತಾಕಾ ಉಪ್ರಾಂತ್ ಮೆಳುಲ್ಲ್ಯಾ ರಿಪೊರ್ಟಾ ಪರ್ಮಾಣೆಂ ತ್ಯಾ ಫೊಟೊಗ್ರಾಫರಾನ್ ಆಪ್ಲೊ ಖೆಳ್ ಖೆಳ್ಚೆಂ ಪ್ರೇತನ್ ಕೆಲ್ಲೆಂ – ಆಪುಣ್ ಎಕಾ ಪ್ರತಿಷ್ಟಿತ್ ಮೆಗಝಿನಾಚೊ ಅಧಿಕೃತ್ ಫೊಟೋಗ್ರಾಫರ್ ಆನಿ ಮೆಥ್ಯು ಲಿಯೊಚಿ ಧುವ್ page three material ತಾಚೊ ಆನಿ ಒಸಿಸಾಚೊ ಚೀಫ್ ಎಕ್ಜೆಕ್ಯೂಟಿವ್ ಮಾನೆಸ್ತ್ ರಿಚ್ಚರ್ಡ್ ಕ್ಲೆಮೆಂಟಾನ್ ಎಕಾ ಖಾಸ್ ಇಂಟರ್‌ವ್ಯೂವಾ ಖಾತಿರ್ ಆನಿ ಫೋಟೊ-ಶೂಟಾ ಖಾತಿರ್ ಮೆಥ್ಯು ಸರಾಚ್ಯಾ ಬೀಚ್ ಕೊಟೆಜಿಕ್ ಆಪವ್ಣೆಂ ದಿಲಾಂ ಮ್ಹಣ್ ಕಸಲೆಂಗಿ ಪತ್ರ್ ತಯಾರ್ ಕರುನ್‌ಯಿ ತೊ ಗೆಲ್ಲೊ. ಪುಣ್ ಮೆಥ್ಯುಚ್ಯಾ ಮುಂಗಡ್ ಹುಕ್ಮೆ ಸಾಮ್ಕಾರ್ ಕಸಲೆಂಚ್ ಚಲ್ಲೆಂ ನಾ. ಸೆಕ್ಯೂರಿಟಿನ್ ತ್ಯಾ ಫೊಟೊಗ್ರಾಫರಾಚಿ ಊಂಚಿ ಕೆಮರಾ ಪಿಸ್ಡುನ್ ತಾಕಾಯಿ ದಾಡಾವ್ನ್ ಧಾಂವ್ಡಾಯ್ಲೊ.
ಅಶೆಂ ಕರಿಶೆಂ ಕರುಂಕ್ ಮೆಥ್ಯುಕ್ ಸಬಾರ್ ಕಾರಾಂ ಆಸ್‌ಲ್ಲಿಂ ಆನಿ ಒಸಿಸಾಂತ್ ಆನಿ ಭಾಯ್ರ್ ತರಿ ಜೆರೊಮ್ ಲಾಜ್ರಾಚಿಂ ಆತರ್ವಣಾಂ ಥೊಡ್ಯಾ ಮತ್ಟಾಕ್ ಪುಣಿ ಪರಿಚಿತ್. ಜೆರೊಮ್ ಆಪ್ಲ್ಯಾ ವಿಲ್ಲಾಂತ್ ಕಿತೆಂ ಕರ್ತಾಲೊ ತೆಂ ಮೆಥ್ಯುಕ್ ಕಳಿತ್ ಜಾಯ್ನಾತ್‌ಲ್ಲೆಂ ಪುಣ್ ಭಾಯ್ರ್-ಒಸಿಸಾಂತ್ಲೆ ಆನಿ ಪೆಟ್ರೋಸ್ಟೇಟ್ ಮಹಂತಾನಾಂ ಮದೆಂ ಖಾಯಾಮ್ ಚಲ್ಚೆಂ ವೊದ್ದುವೊರಾಂಟ್ – ಆಮ್ಚೊ ಮೆಥ್ಯು ಕೆದಳಾ ಈವಾಕ್ ಸ್ಕ್ರೂ ಘಾಲಿತ್ ಮ್ಹಳ್ಳೆಂ-ಆಪ್ಲೊ ಧಮ್ಮ್ ಹೊಗ್ಡಾವ್ನ್ ಘೆತಾ ಮ್ಹಣ್ತಾನಾ ಸ್ಕಾಯ್ ಪಾರ್ಕ್ ಪಾರ್ಟಿ ಜಾಲಿ. ಪೆಟ್ರೊಸ್ಟೇಟಾಚೆಂ ಮಹಂತನ್ ಇತ್ಲೆಂ ಖುಶ್ ಜಾಲೆಂ, ನಿಜಾಯ್ಕಿ ಈವಾಕ್ ಮೆಥ್ಯುನ್ ಸ್ಕ್ರೂ ಘಾಲ್ಲೊಚ್ ತರ್ ಮೆಥ್ಯುಕ್ ತಿತ್ಲಿ ಖುಶಿ ಜಾತಿ ನಾ ಕೊಣ್ಣಾ. ಅಶೆಂ ತರ್ ಖರೆಂಚ್ ಘಡೊಂಕ್ ನಾ ತರಿ, ಘಡ್‌ಲ್ಲೆಂ ಜೆರೊಮಾಚೆ ಬಿರ್ಮತ್ ಪಾಂವ್ಚೆ ಮ್ಹಂತನಿ ಧಾರಾಳ್ ಆಸ್‌ಲ್ಲೆ ಪುಣ್ ಮೆಥ್ಯುಕ್ ಗುನ್ಯಾಂವ್ಕಾರ್ ಕರುಂಕ್ ಕೊಣಾಕೀ ಧಯ್ರ್ ನಾತ್‌ಲ್ಲೆಂ. ಮೆಥ್ಯು ಮ್ಹಣ್ತಾನಾ ಆಪ್ಲ್ಯಾ ಪತಿಣ್ಯಾಂಕ್ ಆನಿ ಧುವಾಂಕ್ ಭದ್ರ್ ದವರ್‍ಯಾಂ ಮ್ಹಳ್ಳಿ ಕಾವ್ಜೆಣಿ ತಾಂಚಿ ಥಯ್ ಉದೆಲ್ಲಿ.
ಮೆಥ್ಯುನ್, ಬೀಚ್ ಕೊಟೆಜಿಚೆಂ ಪ್ರಕರಣ್ ತಿತ್ಲ್ಯಾ ಕಠಿಣಾಯೆನ್ ಆಸಾ ಕರುಂಕ್ ಎಕ್ ಕಾರಾಣ್ ಆಸ್‌ಲ್ಲೆಂ-
ತಾಕಾ ಕಳಿತ್ ನಾತ್‌ಲ್ಲೆಂ, ರಮೋನಾ ಲಿಯೊಚೆ ಆಂಕ್ವಾರ್‌ಪಣ್, ನಿಸ್ಕಳ್‌ಪಣ್ ಆಜೂನ್‌ಯಿ ಉಜಾರ್ ಜಾಯ್ನಾಸ್ತಾಂ ಉರ್‍ಲಾಂ ಯಾ ನಾ ಮ್ಹಣ್. ಸಗ್ಳಿ ಮಹಂತನಿ ಸಮಾಜ್, ರಮೋನಾಕ್, ಹೈ-ಟೆಕ್ ವೆಬಿಚಾರಿಣ್ ಮ್ಹಣ್ಂಚ್ ಸಮ್ಜಾಲ್ಲಿ. ರಮೋನಾನ್ ಅಸಲೆಂಚ್ ರೂಪ್ ಸಮಾಜೆಕ್ ದಾಕಯಿಲ್ಲೆಂ. ಆನಿ ಸುರ್ವೆಚ್ಯಾ ಸುರ್ವೆರ್‌ಚ್ ಮೆಥ್ಯುಚ್ಯಾ ಮಜ್ಬೂತ್ ಬಂಗ್ಲ್ಯಾಂತ್ ರಿಗ್ತಾನಾ ರಮೋನಾನ್ ವಿಚಾರ್‌ಲ್ಲೆಂ – ಹ್ಯಾ ಸರ್ವಾಚಿ ಗರ್ಜ್ ಆಸಾ, ಡೆಡಿ? ಹಾಂವೆಂ ಮ್ಹಜೆ ಕುಡಿಕ್ ಜಾಯ್ ಜಾಲ್ಲೆಂ ನೆಗಾರ್ ಕರುಂಕ್ ನಾ, ಡೆಡಿ; ಹಾಂವೆಂ ಕಶೆಂ ನೆಸ್ಲ್ಯಾರಿ ಹೆರಾಂಕ್ ದಿಸ್ಚೆಂತ್ ತುಕಾಯಿ ದಿಸ್ತಾ ನ್ಹಯ್, ಡೆಡಿ? ಹ್ಯಾ ಉತ್ರಾಂನಿ ಮೆಥ್ಯುಕ್ ಮತಿಂತ್ ರಮೋನಾ ಮ್ಹಳ್ಯಾರ್ ಮಾನಸಿಕ್/ದಯ್ಹಿಕ್ ಮಿಸ್ತೆರಾಂಚಿ ಚಲಿ ಮ್ಹಳ್ಳೆಂ ಖಚಿತ್ ಜಾಲ್ಲೆಂ.
ಕಿತೆಂಯಿ ತರಿ, ರಮೋನಾಚೆ ಆಂಕ್ವಾರ್‌ಪಣ್ ಉಡೊನ್ ಗೆಲಾಂ ಯಾ ನಾ, ತೆಂ ರಿಚ್ಚರ್ಡಾಚೆ ಕುಡಿನ್ ಪಿಸುಡ್ಚೆಂ ಮೆಥ್ಯುಕ್ ನಾಕಾಸ್ಲೆಂ. ರಿಚ್ಚರ್ಡ್, ಮೆಥ್ಯುಚೆಂ ಉಳ್ಟೆಂ ಧ್ರುವ್. ಆಪ್ಣೆಂ ಮಾನಸಿಕ್ ರಿತಿರ್ ಜೀವಂತ್ ಉರಾಶೆಂ ಕರುಂಕ್ ತಾಣೆ ರಿಚ್ಚರ್ಡಾಕ್ ಜೀವಂತ್ ದವರ್‌ಲ್ಲೊ. ಆನಿ ಆಪ್ಣಾಚೊ ದುಸ್ರೊ ಮಕ್ಸದ್ ಜಾವ್ನಾಸ್‌ಲ್ಲೊ – ಲೀಜಾಚ್ಯಾ ಖುನಿಗಾರಾಕ್ ಆಪ್ಣಾ ಸಾಮ್ಕಾರ್ ಉಬೊ ಕರ್ಚೊ. ಹೆಂ ಜ್ಯಾರಿ ಕರುಂಕ್ ತಾಕಾ ಜೆರೊಮಾ ತಸಲ್ಯಾಂ ಕೀಳ್ಗತಿಚ್ಯಾಂಚಿ ಗರ್ಜ್ ಆಸ್‌ಲ್ಲಿ. ಜೆರೊಮಾ ಥಂಯ್ ತಾಣೆಂ ಕೀಳ್ಪಣ್ ಪಳೆಯಿಲ್ಲೆಂ. ಆನಿ ಹ್ಯಾ ಕೀಳ್ಪಣಾಕ್ ಜೀವಂತ್ ದವ್ರುಂಕ್ ತೊ ಪೆಟ್ರೊಸ್ಟೇಟಾಂತ್ಲ್ಯಾ ಸಗ್ಳ್ಯಾ ಕಾಳ್ಯಾ ಭಾಂಗಾರಾಕ್ ಉಜೊ ದೀಂವ್ಕ್ ತಯಾರ್ ಆಸ್‌ಲ್ಲೊ. ಆನಿ ಹೆಂ ಕಾಳೆಂ ಭಾಂಗಾರ್ ತಾಣೆ ರಿಚ್ಚರ್ಡಾ ಥಂಯ್ ಪಳೆಯಿಲ್ಲೆಂ ಆನಿ ತಾಣೆ ವಿಂಚವ್ಣ್ ಕೆಲ್ಲಿ ಕಿ ಆಪುಣ್ ಅಸಲಿಂ ಅಸಲಿಂ ಸನ್ನಿವೆಶಾಂ ಒಸಿಸಾಂತ್ ಉಬೊ ಕರ್ತಲೊಂ ಜಾಂಚೊ ಪರಿಣಾಮ್ ಜಾವ್ನ್ ಸತ್, ಧಂಯಾಂಥಾವ್ನ್ ಲೊಣಿ ಸುಟ್‌ಲ್ಲೆಪರಿಂ ವಯ್ರ್ ಯೆತೆಲೆಂ.
ಆನಿ ಅಸಲ್ಯಾ ಸಬಾರ್ ಸನ್ನಿವೆಶಾಂ ಪಯ್ಕಿ ಎಕ್ ಅವ್ವಲ್ ಆನಿ ಅಪ್ರತಿಮ್ ಜಾವ್ನಾಸ್‌ಲ್ಲೆಂ ವೀಜ್ ಸರಿಯಾಂಚ್ಯಾ ಟೆಂಡರಾಚೆಂ ಪ್ರಕರಣ್ – ಜಾಚೊ ಸೂತ್ರ್‌ದಾರ್ ಜಾವ್ನಾಸ್‌ಲ್ಲೊ ಖುದ್ದ್ ಮೆಥ್ಯು ಆನಿ ಹ್ಯಾ ಖೆಳಾಚಿ ಸುಳಿ ಪರ್ಯಾಂತ್ ರಿಚ್ಚರ್ಡಾಕ್ ಕಳಿತ್ ನಾತ್‌ಲ್ಲಿ. ಹೊ ಖೆಳ್ ಮೆಥ್ಯು ಕಿತ್ಯಾಕ್ ಖೆಳ್‌ಲ್ಲೊ ಮ್ಹಳ್ಯಾರ್ ತಾಕಾ ಆಪ್ಲ್ಯಾ ಒಸಿಸಾಂತ್ ಆಪ್ಣಾಕ್ ಉತ್ರೊನ್ ಕೊಣೆಂಯಿ ವಚುಂಕ್ ನಜೊ ಮ್ಹಳ್ಳೆಂ ಗುಪ್ತಿಂ ನೇಮ್ ತಾಣೆಂಚ್ ಆಸಾ ಕೆಲ್ಲೆಂ. ಜೆರೊಮಾಚಿ ತಾಕಾ ಬಿರಾಂತ್ ನಾತ್‌ಲ್ಲಿ ತೊ ಹ್ಯಾ ರೇಸಿಂತ್ ಕೆನ್ನಾಂಯ್ ಜಿಕತ್ ಮ್ಹಣ್. ಪುಣ್ ರಿಚ್ಚರ್ಡ್ ತಾಕಾ ಮಿಸ್ತೆರಾಂಚೊ ಜಾಲ್ಲೊ. ತಾಚಿ ಮೆಥ್ಯುಕ್ ಗರ್ಜ್ ಆಸ್‌ಲ್ಲಿ ಜಶೆಂ ತಾಕಾ ಗರ್ಜ್ ಆಸ್‌ಲ್ಲಿ ಹ್ಲೀನಾಚಿ, ಲಿಲಿಯನಾಚಿ, ಮೌರಿಸ್ ಆಗುಸ್ತಿನಾಚಿ, ಜುಲಿಯಾ ಟ್ರೇಡಿಂಗ್ ಕಂಪೆನಿಚಿ.
ಧನಾಚ್ಯಾ ಆಶೆನ್ ತೊ ಝುಗಾರ್ ಖೆಳಾನಾತ್‌ಲ್ಲೊ. ಒಸಿಸ್ ಕಂಪೆನಿಂತ್ಲೊ ರಿಂಗ್ ಮಾಸ್ಟರ್ ಮ್ಹಳ್ಳೆಂ ವಿಸೇಶಣ್ ತಾಕಾ ಚವ್ಕಾಂತ್ ಚವ್ಕ್ ಬಸ್ಚೆಪರಿಂ ಬಸ್ತಾಲೆಂ; ಆನಿ ತ್ಯಾ ವರ್ವಿಂ ತಾಕಾ ಜಾಂವ್ಚಿ ಮಝಾ ಎಕ್ ವಿಕೃತ್‌ಪಣ್ಂಚ್ ಮ್ಹಣ್ಯೆತ್. ಅಶೆಂ ಆಸ್ತಾಂ ತೊ ಆಪ್ಲ್ಯಾ ಫಾರಿಕ್ಪಣಾಚ್ಯಾ ಉಜ್ಯಾಕ್ ವಿಸ್ರೊಂಕ್ ನಾತ್‌ಲ್ಲೊ. ತಾಚ್ಯಾ ಲೀಜಾಕ್ ತಾಚೆಥಾವ್ನ್ ಅಜಾಗ್ರುತ್‌ಕಾಯೆನ್, ಅಮಾನುಷ್ ರಿತಿರ್ ಮೆಕ್ಳೆಂ ಕೆಲ್ಲ್ಯಾಕ್ ಭೊಗ್ಸುಂಕ್ ತೊ ಕೆದಳಾಯಿ ತಯಾರ್ ನಾತ್‌ಲ್ಲೊ. ಖರೆಂ ಮ್ಹಳ್ಳೆಂ ರಮೋನಾನ್, ಒಸಿಸ್ ಕಂಪೆನಿ ತುಜೆಂ ಖಾಸ್ಕಿ ಮೃಗಾಲಯ್, ಡೆಡಿ!
ಆತಾಂ ಜೆರೊಮಾನ್ ದಿಲ್ಲ್ಯಾ ಮಾಹೆತಿ ಪ್ರಕಾರ್ ಲೀಜಾಚೊ ಖುನಿಗಾರ್ ಕೋಣ್ ಮ್ಹಳ್ಳೆಂ ತಾಕಾ ಕಳಿತ್ ಜಾಲ್ಲೆಂ, ಕಾಂಯ್ ನಾ ತರ್ ನಾಂವ್ ಪುಣಿ ಕಳಿತ್ ಜಾಲ್ಲೆಂ. ಆನಿ ರಿಚ್ಚರ್ಡ್ ಕ್ಲೆಮೆಂಟ್ ಡೊ|ಫ್ರಾನ್ಸಿಸ್ ಕ್ಲೆಮೆಂಟಾಚೊ ಪುತ್ ಮ್ಹಳ್ಳೆಂ ಕಳಿತ್ ಜಾಲ್ಲೆಂ ಪುಣ್ ಹ್ಯಾ ದೋನ್ ಖಬ್ರಾಂಕ್/ಮಾಹೆತಿಂಕ್ ಕೊನ್ಶಾಕ್ ಮಾರುಂಕ್ ತೊ ತಯಾರ್ ನಾತ್‌ಲ್ಲೊ. ಚಾಳ್ನ್ ಚಾಳ್ನ್ ತಾಕಾ ಧಂಯಾಂತ್ಲೆಂ ಲೊಣಿ ಭಾಯ್ ಕಾಡುಂಕ್ ಆಸ್‌ಲ್ಲೆಂ. ಹ್ಯಾ ತುಮುಲಾಂ ಮಧೆಂ ಸಾಂಪಡ್ಲೆಲೆಲ್ಯಾ ತಾಕಾ ಲೀಜಾಚಿ ಯಾದ್ ಆಯ್ಲಿ ಆನಿ ತಾಚೊ ಜೀವ್ ಸರ್‍ಸರಿತ್ ಚರ್‍ಚರ್‍ಲೊ. ತಾಣೆ ಆಪ್ಣಾಕ್‌ಚ್ ‘ಚರ್‍ಚರಾಯ್‌ನಾಸ್ತಾಂ’ ಜಾಯ್ತೊ ತೇಂಪ್ ಜಾಲ್ಲೊ. ತಾಚೆಂ ಸಿಗಾರ್ ಪಾಲ್ವಲ್ಲೆಂ ಆನಿ ತಾಣೆಂ ತೆಂ ಪರತ್ ಜಳಯ್ಲೆಂ ಆನಿ ಚಿಂವೊನ್ ತುದಿ ಉಜ್ಯಾಚೆಂ ಕೆಂಡ್ ಕೆಲೆಂ. ಆಪ್ಲ್ಯಾ ದಾವ್ಯಾ ಹಾತಾಚಿ ತಾಳು ಸಾಫ್ ಕರುನ್ ಸಿಗಾರಾಚಿ ತುದಿ ಮಾಸಾಳ್ ದೊಂಗುಲಿಚೆರ್ ತೊಪ್ತಾಂ ಮ್ಹಣ್ತಾನಾ ಜೆರೊಮ್ ನಿದುಂಕ್ ಗೆಲ್ಲ್ಯಾ ಯಾ ತಾಕಾ ಚಾರ್ಲ್ಸಾನ್ ದಾಕಯಿಲ್ಲ್ಯಾ ಬೆಡ್‌ರೂಮಾಚೆಂ ದಾರ್ ಉಗ್ತೆಂ ಜಾಲೆಂ ಆನಿ ಜೆರೊಮ್ ಸುಡಾಳಾಯೆನ್ ಭಾಯ್ರ್ ಆಯ್ಲೊ.
ಆಪ್ಲೆಂ ದಾಗಂವ್ಚೆಂ ಕರ್‍ತುಬ್ ತಿತ್ಲ್ಯಾರ್‌ಚ್ ರಾವವ್ನ್ ಮೆಥ್ಯುನ್ ಘಡಿಯಾಳಾಚೆರ್ ದೀಷ್ಟ್ ಘಾಲಿ. ಸಕಾಳಿಚಿ ಸಾಡೆ-ಧಾ ಉತ್ರಾಲ್ಲಿಂ ಆನಿ ಆಪುಣ್ ಯೆದೊಳ್ ಪರ್ಯಾಂತ್ ಚಿಂತ್ನಾಂ ಗೊಂದೊಳಾಂತ್ ಮತಿಭೃಷ್ಟ್‌ಚ್ ಆಸ್‌ಲ್ಲೊಂ ಜಾಯ್ಜೆಯ್ ಮ್ಹಣ್ ತಾಕಾ ಕಳಿತ್ ಜಾಲೆಂ. ಅಸಲ್ಯೆ ಸ್ಥಿಯೆಂತ್ ತಾಣೆ ಪಡ್ಚೆಂ ಭಾರಿಚ್ ಅಪ್ರೂಬ್ ಪುಣ್ ಅಶೆಂ ಜಾತಾನಾ ತಾಕಾ ಚಾರ್ಲ್ಸ್ ಜಾಗಯ್‌ನಾತ್‌ಲ್ಲೊ.
‘ತಶೆಂ ತುಕಾಚ್ಚ್ ದಾಗವ್ನ್ ದವರಿನಾಕಾ, ಮೆಥ್ಯು!’ ಜೆರೊಮಾಚೊ ತಾಳೊ ಆಯ್ಕೊನ್ ಆಂಗ್ ಕಾಡ್‌ಲ್ಲ್ಯಾ ಮೆಥ್ಯುನ್ ಆಪ್ಲ್ಯಾ ಬೊಟಾಂ ಮದ್ಲೆಂ ಸಿಗಾರ್ ಕಾರ್ಪೆಟಿರ್ ಗಳಯ್ಲೆಂ.
‘ತುಕಾಚ್ ದಾಗವ್ನ್ ದವರ್ಚೆ ದೀಸ್ ಸಂಪ್ಲೆ.’ ಮ್ಹಳೆಂ ಜೆರೊಮಾನ್. ‘ಆತಾಂ ಕಸಲೊಯಿ ಸಂದಿಗ್ದ್ ಮಿಸ್ತೆರ್ ತುಜ್ಯಾ ಸಾಮ್ಕಾರ್ ನಾ. ಸರ್ವ್ ಆಂಕ್ಡೆ ಹಾಂವೆಂ ಸುಟಯ್ಲ್ಯಾತ್. ಆತಾಂ ಒಸಿಸಾಂತ್ಲೊ ಚಿಟ್ಟೊ ವಾಗ್ ಕೋಣ್, ಚಿಟ್ಟ್ಯಾವಾಗಾಚೆಂ ಪೀಲ್ ಕೋಣ್ ಆನಿ ಅಪ್ರತಿಮ್ ರಿಂಗ್‌ಮಾಸ್ಟರ್ ಕೋಣ್ ಮ್ಹಣ್ ತುಕಾ ಕಳಿತ್ ಜಾಯ್ಜೆ.’ ತೊ ಭಾಗಾಲೊ ಆನಿ ಕಾರ್ಪೆಟಿರ್ ಪಡ್‌ಲ್ಲೆಂ ಸಿಗಾರ್ ವಿಂಚುನ್ ತಾಣೆ ಗೊಬ್ರಾಚೆ ಪಿರಿಂತ್ ಚಿರ್ಡಿಲೆಂ. ‘ಆತಾಂ ತುಕಾ ಜಾಗೃತ್ ದವರುಂಕ್ ಜಳ್ತ್ಯಾ ಸಿಗಾರಾಚಿ ತುದಿ ಗರ್ಜ್ ಪಡ್ಚಿ ನಾ.’
ಮೆಥ್ಯುನ್ ಆಪ್ಲಿ ದೀಷ್ಟ್ ಜೆರೊಮಾಚೆ ದಿಷ್ಟಿಕ್ ಖಿಳಾಯ್ಲಿ.
ಜೆರೊಮಾನ್ ತಾಚಿ ದಿಷ್ಟ್ ಮುಳಾಂತ್ ಘಾಲಿ ನಾ.
‘ಆತಾಂ ಆಮಿ ಸಮಾಸಮ್ ಜಾಲ್ಯಾಂವ್, ಮೆಥ್ಯು ಲಿಯೊ!’ ಮ್ಹಳೆಂ ಜೆರೊಮಾನ್. ‘ಈವಾಕ್ ತುಂವೆಂ ಸ್ಕ್ರೂ ಘಾಲೊಯ್, ನೊ ಪ್ರೊಬ್ಲೆಮ್. ಹಾಂವ್ ಕಾಂಯ್ ಸಾಂತ್ ನ್ಹಯ್. ಆದಿಂ ಥಾವ್ನ್ ಹಾಂವ್ ತುಜೊ ಸಾಂಗೊಡಿ ಆಸಾಂ ಆನಿ ಕೋಣ್ ನ್ಹಯ್ ತರಿ ಮ್ಹಜೆಂ ಹೈಡ್ರೋಸಿಲ್ ತುಕಾ ವಿಸರ್ಚೆಂ ನಾ.’
‘ತುಕಾ ಜಾಯ್ ತರಿ ಕಿತೆಂ?’
‘ಒಸಿಸಾಂತ್ ಮ್ಹಾಕಾ ಫಾವೊ ಜಾಯ್ಜೆ ಆಸ್‌ಲ್ಲೊ ಜಾಗೊ!’
‘ಯಾ ರಿಚ್ಚರ್ಡಾಚಿ ಪರಿಪೂರ್ಣ್ ಸಲ್ವಣಿ?’
‘ಹೆಂ ಸವಾಲ್ ಗರ್ಜೆಚೆಂ, ಮೆಥ್ಯು?’ ಸಾಮ್ಕಾರ್ ಆಸ್‌ಲ್ಲ್ಯಾ ಸೋಫಾಚೆರ್ ಬಸ್ಲೊ ಜೆರೊಮ್. ‘ರಿಚ್ಚರ್ಡಾಕ್ ಹಾಂವೆಂ ಪರಿಪುರ್ಣ್ ವಿಣ್ಗೊ ಕೆಲಾ…’
‘ತುಂವೆಂ ಕಿತೆಂಚ್ ಕರುಂಕ್‌ನಾಂಯ್, ಜೆರೊಮ್!’ ಮೆಥ್ಯುನ್ ಆಪ್ಲೊ ತಾಳೊ ತಗ್ಸಿಲೊ.
‘ತ್ಯಾ ಟೆಂಡರಾಂಚೊ ಖ್ಹೆಳ್?’
‘ಖ್ಹೆಳ್ ಮ್ಹಳೆಂಯ್?’ ಮೆಥ್ಯು ಹಾಸ್ಲೊ. ‘ಖ್ಹೆಳ್ ಎಕ್ಲ್ಯಾನ್ಂಚ್ ಖೆಳೊಂಕ್‌ಯಿ ಜಾತಾತ್, ಜೆರೊಮ್!’
‘ಮತ್ಲಬ್?’ ನೀಟ್ ಬಸ್ಲೊ ಜೆರೊಮ್. ‘ಹಾಂವೆಂ ನ್ಹಯ್ ರಿಚ್ಚರ್ಡಾಕ್ ಸಾಂಪ್ಡಾಯಿಲ್ಲೊ?’
‘ನಾ!’ ಮ್ಹಳೆಂ ಮೆಥ್ಯುನ್. ‘ತುಂವೆಂ ಫಕತ್ ತೆಲ್ಮಾಚ್ಯಾ ದೊಡ್ಯಾ ಜುಗಾರೆನ್ ರಿಚ್ಚರ್ಡಾಚೆಂ ಫೋನ್ ಟ್ಯಾಪ್ ಕೆಲೆಂಯ್, ಸಂಬಾಷಣಾಂ ರೆಕೊರ್ಡ್ ಕೆಲಿಂಯ್ ಪುಣ್ ತುಕಾ ಕಳಿತ್ ಜಾಲೆಂ ನಾ ಕೋಣ್ ರಿಚ್ಚರ್ಡಾಕ್ ಫೋನ್ ಕರುನ್ ಟೆಂಡರಾಂಚೆ ಸಂಖೆ ವಿಚಾರ್ತಾಲೊ, ದಿತಾಲೊ ಆನಿ ರಿಚ್ಚರ್ಡಾನ್ ಟೆಂಡರ್ ಭರಿಶೆ ಕರ್ತಲೊ ತೆಂ.’
ಜೆರೊಮ್ ಉಸ್ಮಡ್ಲೊ.
‘ಕೋಣ್ ಆನಿ ಕಿತ್ಯಾಕ್?’
‘ಸಂಸಾರಾಂತ್ ರಾಜಕಾರಣ್ ಯಾ ಪೊಲಿಟಿಕ್ಸ್ ಮ್ಹಳ್ಳೊ ಎಕ್ ಖ್ಹೆಳ್ ಆಸಾ, ಜೆರೊಮ್!’ ಮ್ಹಳೆಂ ಮೆಥ್ಯುನ್. ‘ಹೆಂ ತುಂವೆಂ ವಿಸ್ರೊಂಕ್ ನಜೊ!’
‘ಕೋಣ್, ಮೌರಿಸ್ ಆಗುಸ್ತಿನ್?’
(ಅವಸ್ವರ್ – 83 – ಂತ್ ಮುಂದರ್‍ತಾ)
