ಮ್ಹಾಕಾ ಮನಿಸ್ ಕರ್

ವಲ್ಲಿ ಕ್ವಾಡ್ರಸ್ ಅಜೆಕಾರ್ ಲಿಖ್ಣೆನಾಂವಾನ್ ಬರಂವ್ಚೊ ವಲೇರಿಯನ್ ಆಲ್ವಿನ್ ಕ್ವಾಡ್ರಸ್, ಕೊಂಕಣಿ, ಕನ್ನಡ, ಇಂಗ್ಲಿಶ್, ತುಳು ಆನಿ ಹಿಂದಿ ಭಾಶೆಂನಿ ಪಾಟ್ಲ್ಯಾ ಪಾಂತೀಚ್ ವರ್ಸಾಂ ಥಾವ್ನ್ ಬರಯ್ತಾ. ಆಜ್ ಮೆರೆನ್ ತಾಚೆ ಸಾಡೆ ತಿನ್ಶ್ಯಾಂಕ್ ಮಿಕ್ವೊನ್ ಕವಿತಾ, ಅಡೇಯ್ಶ್ಯಾಂಕ್ ಮಿಕ್ವೊನ್ ಮೊಟ್ವ್ಯೊ ಕಾಣಿಯೊ, ಸ ಕಾದಂಬರಿ, ಸಾತ್ ನಾಟ್ಕುಳೆ ಆನಿ ಜಾಯ್ತಿಂ ಲೇಕನಾಂ ಫಾಯ್ಸ್ ಜಾಲ್ಯಾಂತ್. ದಾಯ್ಜ್.ಕೊಮ್ ( 2003 ಥಾವ್ನ್ 2011) ಜಾಳಿಜಾಗ್ಯಾಚೊ ಸಂಪಾದಕ್ ಜಾವ್ನ್ ತಶೆಂಚ್ ಪಯ್ಣಾರಿ.ಕೊಮ್ ( 2015 ಥಾವ್ನ್ ) ಜಾಳಿಜಾಗ್ಯಾಚೊ ಸಂಪಾದಕ್ ಜಾವ್ನ್ ವಾವುರ್ನ್ ಆಸಾ. 2001 ಇಸ್ವೆಂತ್ ಕುವೆಯ್ಟಾಂತ್ ಸುರ್ವಾತ್ ಜಾಲ್ಲ್ಯಾ ಆಶಾವಾದಿ ಪ್ರಕಾಶನಾಚೊ ಸಂಪಾದಕ್ ಜಾವ್ನ್ ಯೆದೊಳ್ ಪಾಸುನ್ ಪನ್ನಾಸ್ ಬೂಕ್ ಸಂಪಾದನ್ ಕರುನ್ ಪರ್ಗಟ್ಲ್ಯಾತ್. 2020 ಥಾವ್ನ್ ಗೊಂಯ್ಚ್ಯಾ ಕೊಂಕಣ್‌ಗಾರ್ ಪ್ರಕಾಶನಾಚೊ ಸಂಪಾದಕ್ ಜಾವ್ನ್ ಯೆದೊಳ್ ಪಾಸೊನ್ ಪಾಂಚ್ ಬೂಕ್ ಪರ್ಗಟ್ ಕೆಲ್ಯಾತ್. ಕನ್ನಡ, ನಾಗರಿ ಆನಿ ರೋಮಿ ಲಿಪಿಂನಿ ಬರಯ್ತಾ ತಶೆಂಚ್ ಲಿಪಿಯಂತರ್ ವಾವ್ರ್ ಕರುನ್ ಸಭಾರ್ ಡಿಜಿಟಲ್ ಪುಸ್ತಕಾಂ (ಇ-ಪುಸ್ತಕಾಂ, ಆಡಿಯೊ ಪುಸ್ತಕಾಂ) ಪರ್ಗಟ್/ಪ್ರಸಾರ್ ಕೆಲ್ಯಾಂತ್. ಆಶಾವಾದಿ (2001), ಖಿಳೊ (2003), ಸತಾಂ ಆನಿ ಖತಾಂ (2005), ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ (2005), ಬಂಧ್ (2017) ಕನ್ನಡ ಲಿಪಿಂನಿ ಪರ್ಗಟ್ ಜಾಲ್ಲೆ ಸ್ವತಾಚೆ ಕಥಾಜಮೆ. ಬಂಧ್ (2019) ಗೊಂಯ್ಚ್ಯಾ ಕೊಂಕಣಿ ಅಕಾಡೆಮಿನ್ ನಾಗರಿ ಲಿಪಿಯೆಂತ್ ಪರ್ಗಟ್ಲಾ. ಸಾಂಕವ್ (2020) ಕೊಂಕಣ್‌ಗಾರ್ ಪ್ರಕಾಶನಾನ್ ನಾಗರಿ ಲಿಪಿಯೆಂತ್ ಪರ್ಗಟ್ಲಾ. ಬಂದ್ ಪುಸ್ತಕಾಕ್ ೨೦೧೮ ಇಸ್ವೆಂತ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಉತ್ತೀಮ್ ಬೂಕ್ ಪುರಸ್ಕಾರ್ ಲಾಭ್ಲಾ. The Woman's Era ಇಂಗ್ಲಿಶ್ ನೇಮಾಳ್ಯಾಂತ್ ತಶೆಂಚ್ ಹೆರ್ ಸಾಹಿತಿಕ್ ಜಾಳಿಜಾಗ್ಯಾಂನಿ ಇಂಗ್ಲಿಶಾಂತ್ ತರ್ಜಣ್ ಜಾಲ್ಲ್ಯೊ ಹಾಚ್ಯೊ ಕೊಂಕಣಿ ಕಾಣಿಯೊ ಪರ್ಗಟ್ ಜಾಲ್ಯಾತ್. ನವಕಿರಣ ಮರಾಠಿ ನೇಮಾಳ್ಯಾಂತ್ ಮರಾಠಿಕ್ ತರ್ಜಣ್ ಜಾಲ್ಲ್ಯೊ ಹಾಚ್ಯೊ ಕೊಂಕಣಿ ಕಾಣಿಯೊ ಪರ್ಗಟ್ಲ್ಯಾತ್. ಕಂಗಾಲ ಕುಕ್ಕೆಹಳ್ಳಿ ಮತ್ತೆ ಕತೆಗಳು (2019) ಕನ್ನಡ ಭಾಶೆಂತ್ ತರ್ಜಣ್ ಜಾವ್ನ್ ಪರ್ಗಟ್ಲಾ. ಆಕಾಶ್‌ವಾಣಿ ಮಂಗ್ಳುರ್ ತಶೆಂಚ್ ಆಲ್ ಇಂಡಿಯಾ ರೇಡಿಯೊ ಮುಂಬಯ್‌ಚೆರ್ ಸಭಾರ್ ಕಥಾ, ಕವಿತಾ ಸಾದರ್ ಕೆಲ್ಯಾಂತ್. ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿನ್ ಪ್ರಕಾಶಿತ್ ಕೆಲ್ಲ್ಯಾ ’20 ವ್ಯಾ ಶೆಕ್ಡ್ಯಾಚ್ಯೊ ಕೊಂಕಣಿ ಕಾಣಿಯೊ (2006)’, ಸುರ‍್ಯೊ ಉದೆತಾ (2019) ರಾಶ್ಟ್ರೀಯ್ ಮಟ್ಟಾಚ್ಯಾ ಕಾಣಿಯಾಂಚೆಂ ಸಂಪಾದನ್ ಕೆಲಾಂ. ಕೊಂಕಣಿ ಮಟ್ವ್ಯಾ ಕಾಣಿಯಾಂಚಿಂ ವೆವೆಗ್ಳಿಂ ಅಂಕಣಾಂ ಚಲಯ್ಲ್ಯಾಂತ್. ಕಥಾಪಾಠ್ ಮ್ಹಳ್ಳೆಂ ಕಾಮಾಸಾಳ್ ಗಲ್ಫಾಂತ್, ಮುಂಬಂಯ್ತ್, ಗೊಂಯ್, ಮಂಗ್ಳುರಾಂತ್ ಚಲಯ್ಲ್ಯಾಂತ್. ಚ್ಯಾರ್ ಮುಖಾಂ (2003), ಕಟ್‌ಪುತ್ಳಿ (2005), ದರ್ಭಾರಾಂತ್ಲಿ ಪಿಂರ್ಗೊಣ್ (2006), ಬಜಾರ್ (2017), ಭಿತರ್ಲೊ ಕವಿ (2020: ಕವಿತಾ ಟ್ರಸ್ಟ್) ತಾಚೆ ಯೆದೊಳ್ ಪರ್ಗಟ್ ಜಾಲ್ಲೆ ಕವಿತಾಜಮೆ. ದರ್ಭಾರಾಂತ್ಲಿ ಪಿಂರ್ಗೊಣ್ ಪುಸ್ತಕಾಕ್ 2006 ಇಸ್ವೆಂತ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೆಂ ಉತ್ತೀಮ್ ಕವಿತಾ ಪುಸ್ತಕ್ ಪುರಸ್ಕಾರ್ ಲಾಭ್ಲಾ. ಕವಿತಾಪಾಠ್ ಮ್ಹಳ್ಳೆಂ ಕಾಮಾಸಾಳ್ ಗಲ್ಫಾಂತ್ ತಶೆಂಚ್ ಮುಂಬಯ್, ಮಂಗ್ಳುರಾಂತ್ ಚಲಯ್ಲ್ಯಾಂತ್. ಸಭಾರ್ ಹೆರಾಂಚ್ಯಾ ಪುಸ್ತಕಾಂನಿ ಪ್ರಸ್ತಾವನಾಂ ಬರಯ್ಲ್ಯಾಂತ್.’ಝೆಲೊ’, ’ಮಿತ್ರ್’, ’ಕಾಣಿಕ್’, ’ದಿವೊ’ ಅಶೆಂ ಸಭಾರ್ ಪತ್ರಾಂಚ್ಯಾ ವಿಶೇಸ್ ಅಂಕ್ಯಾಂನಿ ಸಂಪಾದಕ್ ಜಾವ್ನ್ ವಾವ್ರ್ ಕೆಲಾ. ಕವಿತಾಪಾಠ್ (2004) ದರ್ಯಾಕ್ ಉದಕ್ (2005), ಕಾಳೊಕ್ ನಾತ್ಲೊ ಗಾಂವ್ (2006), ಮುಗ್ದನಾತ್ಲಿಂ ಗಿತಾಂ (2017), ಸುಕ್ತಿ ಭರ್ತಿ (2018) ಮ್ಹಳ್ಳೆ ಕವಿತೆಚೆರ್ ಅಧ್ಯಯನ್ ಪುಸ್ತಕಾಂ ಬರಯ್ಲ್ಯಾಂತ್. ಕವಿತಾಪಾಠ್ ಪುಸ್ತಕಾಕ್ 2005 ಇಸ್ವೆಚೊ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ವಿಶೇಸ್ ಬೂಕ್ ಪುರಸ್ಕಾರ್ ಲಾಭ್ಲಾ. ಮುಗ್ದನಾತ್ಲಿಂ ಗಿತಾಂ (2019) ಗೊಂಯ್ ಕೊಂಕಣಿ ಅಕಾಡೆಮಿನ್ ನಾಗರಿ ಲಿಪಿಯೆಂತ್ ಪರ್ಗಟ್ಲಾ. ಮೊತಿಯಾಂ ಆನಿ ತಾರಾಂ (2004), ತಿಂತೆರಾಂತ್ ಪಿಂತುರಾಂ (2006), ಶಿಂಪಡ್ಲೆಲಿಂ ಮೊತಿಯಾಂ (2006), ಮಯ್ಲಾ ಫಾತರ್ (2019) ಮ್ಹಳ್ಳೆ ಕವಿತಾ ಸಂಕಲಾಂಚೆಂ ಸಂಪಾದನ್ ಕರುನ್ ಪರ್ಗಟ್ಲ್ಯಾತ್. ಸಭಾರ್ ಹೆರ್ ಕವಿ-ಕಥಾಕಾರಾಂಚಿಂ ಪುಸ್ತಕಾಂ ಪರ್ಗಟ್ ಕೆಲ್ಯಾಂತ್. ಯೂಟ್ಯೂಬಾಚೆರ್ ’ಆಶಾವಾದಿ ಪ್ರಕಾಶನ್’ ಚ್ಯಾನಲಾಚೆರ್ ಸ ಕೊಂಕಣಿ ಡಿಜಿಟಲ್ ಆಡಿಯೊ ಪುಸ್ತಕಾಂನಿ 125 ಚ್ಯಾಕಿ ಚಡಿತ್ ಕೊಂಕಣಿ ಕಾಣಿಯಾಂಕ್ ಪ್ರಸಾರ್ ಕೆಲಾಂ. ಶ್ರೀನಿವಾಸ್ ಯುನಿವರ್ಸಿಟಿ ಕೋಲೆಜ್ ಆಫ್ ಇಂಜಿನಿಯರಿಂಗ್ ಆನಿ ಟೆಕ್ನೋಲೊಜಿ ಹಾಂಗಾಸರ್ ಪ್ರಾಧ್ಯಾಪಕ್ ಜಾವ್ನ್ ತಶೆಂಸ್ ಎಕ್ಸಿಸ್ ಕಂಪ್ಲಾಯನ್ಸ್ ಲಿಮಿಟೆಡ್ ಮ್ಹಳ್ಳ್ಯಾ ಯುಕೆಚ್ಯಾ ಎಕಾ ಬಹು ರಾಶ್ಟ್ರೀಯ್ ಕಂಪ್ಣೆಂತ್ ಗ್ಲೋಬಲ್ ಟ್ರಾನ್ಸಿಶನ್ ಮುಖೇಸ್ತ್, ಗ್ಲೋಬಲ್ ಪಾರ್ಟ್ನರ್ ಮ್ಯಾನೇಜ್‌ಮೆಂಟಾಚೊ ಮುಖೇಸ್ತ್ ತಶೆಂಚ್ ಕಂಟ್ರಿ ಹೆಡ್ ಜಾವ್ನ್ ವಾವ್ರ್ ಕರುನ್ ಆಸಾ. ದಿವೊ ಪುರಸ್ಕಾರ್ (2004), ಕವಿತಾ ಟ್ರಸ್ಟಾಚೊ ಮಥಾಯಸ್ ಕುಟ್ಮಾಚೊ ಕವಿತಾ ಪುರಸ್ಕಾರ್ (2017) ಪುರಸ್ಕಾರ್ ಹಾಕಾ ಲಾಭ್ಲ್ಯಾತ್.