ವಿವಿಧ್ ಕನ್ನಡ ಪತ್ರಾಂನಿ ಪ್ರಗಟ್ ಜಾಲ್ಲ್ಯಾ, ಪ್ರಶಸ್ತಿ ವಿಜೇತ್ ಕೊಂಕ್ಣೆಚೊ ಖ್ಯಾತ್ ಲೇಖಕ್ ವಲ್ಲಿ ವಗ್ಗ ಹಾಚ್ಯಾ 50 ಕಾಣ್ಯಾಂ ಪಯ್ಕಿ, ವಿಂಚ್ಲಲ್ಯಾ 17 ಕಾಣ್ಯಾಂಚೊ ‘ಹೆಗಲ ಶಿಲುಬೆ’ ಕನ್ನಡ ಕಥಾ ಸಂಗ್ರಹ್, ಜನೆರ್ 20 ತಾರಿಕೆರ್ ಮೈಸೂರ್ಚ್ಯಾ ಕೊಂಕಣ್ ಭವನಾಂತ್, ಖ್ಯಾತ್ ಕನ್ನಡ ಸಾಹಿತಿ ಡಾ| ನಾ.ಡಿ’ಸೊಜಾನ್ ಮೊಕ್ಳಿಕ್ ಕೆಲೊ.
ಹ್ಯಾ ಸಂದರ್ಭಾರ್, ಕೊಂಕ್ಣಿ ಕಥೊಲಿಕಾಂಚ್ಯಾ, ಆಚಾರ್-ವಿಚಾರ್ ಸಂಪ್ರದಾಯ್, ಫೆಸ್ತಾಂ – ಪರ್ಬೆಂಚೆಂ ಪರಿಣಾಮ್ ಕಾರಿ ಚಿತ್ರಣ್ ಹಾಂತುಂ, ವಲ್ಲಿ ವಗ್ಗಾನ್ ಕೆಲಾಂ ಮ್ಹಣುನ್ ತಾಣಿಂ ಸಾಂಗ್ಲೆಂ ಆನಿ ಆಪ್ಲೊ ಪ್ರಥಮ್ ಕನ್ನಡ ಕಥಾ ಸಂಗ್ರಹ್ ಉಜ್ವಾಡಾಕ್ ಹಾಡ್ಲಲ್ಯಾ ಕಾಣ್ಯಾಂಗಾರಾಕ್, ನಾ. ಡಿ’ಸೊಜಾನ್ ಹೊಗ್ಳಿಕ್ ಪಾಟಯ್ಲಿ.
ಕೊಂಕ್ಣಿ ಕ್ರಿಸ್ತಾಂವಾಂಚ್ಯಾ ಸಂಘಾನ್ ಕೊಂಕ್ಣಿ ಮಾಂಯ್ ಭಾಶೆಚ್ಯಾ ಪ್ರಖ್ಯಾತ್ ಕನ್ನಡ ಸಾಹಿತಿ ಡಾ| ನಾ. ಡಿ’ಸೊಜಾಕ್ ಮಾನ್ ಪತ್ರ್ ಅರ್ಪುನ್ ಮಾನ್-ಸನ್ಮಾನ್ ಕೆಲೊ.
ಮಾನೆಸ್ತ್ ಜೋರ್ಜ್ ವಿಲ್ಯಂ ಸೊಜಾಚ್ಯಾ ಮುಖೇಲ್ ಪಣಾಖಾಲ್, ನಾಚ್-ಪದಾಂ ಸಂಗಿತಾಚೊ ಆಕರ್ಶಿಕ್ ‘ಕೊಂಕ್ಣಿ ಸಾಂಸ್ಕೃತಿಕ್ ಸಂಭ್ರಮ್’ ಸಾದಾರ್ ಕೆಲೊ.
ವ್ಹಯ್, ಕನ್ನಡಾಂತ್ ಖಾಂದಿ ಖುರಿಸ್ ವಾಚುನ್ ಕಾಣಿಯಾಂಚಿ ಸೊಭಾಯ್ ಚಾಕ್ಯಾಂ.