” ಆಜ್ ಕಾಲ್ ಇಂಗ್ಲಿಷ್ ಮಾಧ್ಯಮಾಂತ್ ಶಿಕಪ್ ಜೊಡ್ಲ್ಯಾರ್ ಮಾತ್ ಜಿಣ್ಯೆಕ್ ಫುಡಾರ್ ಮ್ಹಳ್ಳ್ಯಾ ಭ್ರಮಿದೆಂತ್ ಆವಯ್ – ಬಾಪಯ್ ಭುರ್ಗ್ಯಾಂಕ್ ಜಲ್ಮಾಲ್ಲೆಂಚ್ ಬೇಬಿಕೇರಾಕ್ ಘಾಲ್ನ್, ಇಂಗ್ಲಿಷ್ ಭಾಷೆಚ್ಯಾ ಪ್ರಭಾವಾಂತ್ ಪಡ್ಚೆಪರಿಂ ಕರ್ತಾತ್. ಹ್ಯಾ ವರ್ವಿಂ ಭುರ್ಗಿಂ ಆವಯ್ ಭಾಷೆಚ್ಯಾ ಸಂಪರ್ಕಾಥಾವ್ನ್ ವಂಚಿತ್ ಜಾವ್ನ್, ಜಲ್ಮಾಲ್ಯ್ಯಾ ಗಾಂವ್ಚ್ಯಾ ಮಾತಿಯೆಚಿ ಮೂರ್ ಸಯ್ತ್ ನಾಸ್ತಾನಾ ವಾಡೊನ್ ಜಲ್ಮಾಲ್ಲ್ಯಾ ಗಾಂವಾಂತ್ ಚ್ ಪರ್ಕಿ ಜಾತಾತ್” ಮ್ಹಣಾಲೊ ಸಿಂಡಿಕೇಟ್ ಬ್ಯಾಂಕಾಚೊ ನಿವೃತ್ತ್ ಪ್ರಬಂದಕ್ ಶ್ರೀ ರಾಮದಾಸ ಮಂಜುನಾಥ ಕುಮಟಾಕರ.
ತೋ ಸರಸ್ವತಿ ಪ್ರಭಾ ಪತ್ರಾಚ್ಯಾ ದಫ್ತರಾಂತ್ ಆರಗೋಡು ಸುರೇಶ ಶೆಣೈ ಹಾಣಿ ಬರಯಿಲ್ಲಿ 13 ವಿ ಕೊಂಕಣಿ ಕೃತಿ, “ಅಕ್ಕುಚ್ಚಿ” ಕಾಣಿಯಾಂಜಮೊ ಲೊಕಾರ್ಪಣ್ ಕರ್ನ್ ಉಲಯ್ತಾಲೊ. ಹ್ಯಾ ಸುವಾಳ್ಯಾರ್, ಕರಾವಳೆಥಾವ್ನ್ 33 ವರ್ಸಾಂ’ಧಿ ಹುಬ್ಬಳ್ಳಿಕ್ ಯೇವ್ನ್, ಹುಬ್ಬಳಿಂತ್ ಆವಯ್ ಭಾಸ್ ಕೊಂಕಣಿಚಿ ಸೆವಾ ಕರೀತ್, ಕೊಂಕ್ಣಿ ಸಾಹಿತ್ಯ್ ಚರಿತ್ರೆಂತ್ ಹುಬ್ಬಳ್ಳಿಚೆಂ ನಾಂವ್ ದಾಖಲ್ ಜಾಂವ್ಚೆಪರಿಂ ನಿಷ್ಠೆನ್ ವಾವುರ್ಲೆಲ್ಯಾ ಶ್ರೀ ಆರಗೋಡು ಸುರೇಶ ಶೆಣೈ ಹಾಕಾ ತಾಣೆ ಅಭಿನಂದನ್ ಪಾಟಯ್ಲೆಂ ಬರೆಂ ಮಾಗ್ಲೆಂ.
ಸಂಭ್ರಮಾಚೊ ಅಧ್ಯಕ್ಷ್ ಸಮಾಜ ಸೇವಕ್ ಧರ್ಮೇಶ ಗಂಗೊಳ್ಳಿ ಉಲವ್ನ್ ಮ್ಹಣಾಲೊ “ಕೊಂಕಣಿ ಮ್ಹಳ್ಳೆಫರಾ ಆಮಿ ಸಗ್ಳೆ ಕರಾವಳ್ ವಾ ಗೋವಾ ತಿಶಿನ್ ಮಾತ್ ಪಳಯ್ತಾಂವ್. ಪೂಣ್ ಪಾಟ್ಲ್ಯಾ 29 ವರ್ಸಾಂಚ್ಯಾ ಸುದೀರ್ಘ್ ಕಾಳಾಪಾಸುನ್ ಹುಬ್ಬಳ್ಳಿಥಾವ್ನ್ ಸರಾಗ್ `ಸರಸ್ವತಿ ಪ್ರಭಾ’ ಮ್ಹಳ್ಳೆಂ ಕೊಂಕ್ಣಿ ಮಯ್ನ್ಯಾಳೆಂ ಪತ್ರ್ ಫಾಯ್ಸ್ ಕರ್ಚೆ ಸಾಂಗಾತಾ, ಆಪ್ಲೆ ಬರಾಬರ್ ಹೆರ್ ಕೊಂಕ್ಣಿ ಲೇಕಕಾಂಚ್ಯೊ 30 ಪ್ರಾಸ್ ಚಡ್ ಕೃತಿಯೊ ಫಾಯ್ಸ್ ಕರುನ್, ಪಾಟ್ಲ್ಯಾ 25 ವರ್ಸಾಂನಿ 600 ಪ್ರಾಸ್ ಚಡ್ ಕೊಂಕಣಿ ವಿದ್ಯಾರ್ಥಿಂಚ್ಯಾ ಶಿಕ್ಪಾಕ್ ಆಪ್ಲ್ಯಾ ತಾಂಕಿಭಿತರ್ಲಿ ಆರ್ಥಿಕ್ ಮಜತ್ ಸಯ್ತ್ ದೀವ್ನ್ ಆಯಿಲ್ಲ್ಯಾ ಆರಗೋಡು ಸುರೇಶ ಶೆಣೈ ಹಾಚೆಂ ಸಾಧನ್ ಹುಬ್ಬಳ್ಳಿ – ಧಾರವಾಡದಾಂತ್ಲ್ಯಾ ಕೊಂಕಣಿ ಭಾಂವ್ಡಾಂನಿ ಅಭಿಮಾನ್ ಪಾಂವ್ಚೆತಸಲೆಂ, ಪ್ರೋತ್ಸಾವ್ ದೀಜೆ ಜಾಲ್ಲೆಂ”
ಸಯ್ರ್ಯಾಂಕ್ ಯೆವ್ಕಾರ್ ಮಾಗೊನ್, ಪ್ರಾಸ್ತಾವಿಕ್ ಜಾವ್ನ್ ಉಲಯಿಲ್ಲ್ಯಾ ಲೇಖಕ್ ಆರಗೋಡು ಸುರೇಶ ಶೆಣೈ ಹಾಣೆ ಸ್ತ್ರ‍ೀಯಾಂಚ್ಯಾ ಸಮಸ್ಸ್ಯಾಂವಿಶ್ಯಾಂತ್ ಬರಯಿಲ್ಲೆ ಇಕ್ರಾ ಕಾಣಿಯೊ ಪ್ರಸ್ತುತ್ ಬುಕಾಂತ್ ಆಸೊನ್, ಕೊಂಕ್ಣಿ ಲೊಕಾನ್ ಹೊ ಕಾಣಿಯಾಂಬೂಕ್ ಮೊಲಾಕ್ ಘೆವ್ನ್, ವಾಚುನ್ ಪ್ರೋತ್ಸಾವ್ ದೀಜಾಯ್ ಮ್ಹಣ್ ವಿನತಿ ಕೆಲಿ. ಕನ್ನಡ ಭಾಷೆಂತ್ ತಾಚ್ಯಾ ಮಟ್ವ್ಯಾಕಾಣಿಯಾಂಚೊ ಪಯ್ಲೊ ಬೂಕ್ `ಊಟ’ ಛಾಫ್ಯಾಕ್ ತಯಾರ್ ಜಾತೇ ಆಸುನ್, ವೆಗಿಂಚ್ ಉಗ್ತಾವಣ್ ಜಾಂವ್ಚ್ಯಾರ್ ಆಸಾ ಮ್ಹಣ್ ಹ್ಯಾ ಸಂದರ್ಭಿಂ ಆರಗೋಡು ಸುರೇಶ ಶೆಣೈ ಮ್ಹಣಾಲೊ.
ದೀಪಕ್ ಶೆಣೈ ಹಾಣೆ ಕಾರ್ಯೆಂ ಚಲವ್ನ್ ವೆಲೆಂ. ಯೋಗಶಿಕ್ಷಕಿ ದೀಪಾಲಿ ಶೆಣೈ ಹಿಣೆ ದಿನ್ವಾಸ್ ಪಾಟಯ್ಲೆ.
