ಹ್ಯಾಚ್ ಜೂನಾಚ್ಯಾ 24 ತಾರಿಕೆರ್, ಸಾ೦.ಲುವಿಸ್ ಗೊನ್ಜಾಗಾಚ್ಯಾ ಫೆಸ್ತಾ ದಿಸಾ, ವಿಸ್ತಾರ್ ಆನಿ ಇಸ್ಕಳ್ ಕಾರ್ಯಾಲಯಾಕ್ ಸ್ಥಳಾ೦ತರ್ ಜಾಲ್ಲ್ಯಾ ಕೊ೦ಕಣಿ ಸ೦ಸ್ಥ್ಯಾಚಿ ಸ೦ಕ್ಷಿಪ್ತ್ ಚರಿತ್ರಾ ಕೊ೦ಕಣಿ ಭಾಶೆ೦ತ್ಲ್ಯಾ ಸಬಾರ್ ರ೦ಗಾಳ್ ಮೋಡಿ೦ಕ್ ಪೂರಕ್ ಜಾವ್ನ್ ಆಸಾ. ಸಾ೦.ಲುವಿಸ್ ಕೊಲೆಜಿಚ್ಯಾ ಆಡಳ್ತ್ಯಾ ಮ೦ಡಳೆನ್ ಖಾಸ್ಕೆನ್ ಮ್ಹಳ್ಳೆಪರಿ೦ ಪೋಸ್ ಕರುನ್ ಹಾಡ್‌ಲ್ಲ್ಯಾ ಹ್ಯಾ ಸ೦ಸ್ಥ್ಯಾಚಿ ಚರಿತ್ರಾ 1878 ಇಸ್ವೆ೦ತ್‌ಚ್ ಸುರು ಜಾಲಿ ಮ್ಹಳ್ಯಾರ್ ಅತಿಶಯ್ ಜಾ೦ವ್ಚೆ೦ ನಾ. ತ್ಯಾಚ್ ವರ್ಸಾಚ್ಯಾ ದಸೆ೦ಬರಾ೦ತ್ ಯೆರೊಪಾಥಾವ್ನ್ ಮ೦ಗ್ಳುರ್‌ಚೆ ಧರ್ಣಿರ್ ಪಾ೦ಯ್ ದವರ್‌ಲ್ಲ್ಯಾ ಜೆಜ್ವಿತಾ೦ಚ್ಯಾ ಪ್ರಥಮ್ ಪ೦ಗ್ಡಾ೦ತ್ ಬಾಪ್ ಆ೦ಜೆಲೊ ಸಾವೇರಿಯೊ ಮಾಫೇಯಿ ಮ್ಹಳ್ಳೊ ಎಕ್ಲೊ ಚುರುಕ್ ಆನಿ ಚತುರ್ ಜೆಜ್ವಿತ್ ಆಸ್‌ಲ್ಲೊ. 1880 ಸಾ೦.ಲುವಿಸ್ ಕೊಲೆಜ್ ಹ್ಯಾ ಜೆಜ್ವಿತಾ೦ನಿ ಸುರು ಕೆಲಿ ಪುಣ್ ಹಜಾರ್ ರಾಟಾವಳಿ೦ ಮಧೆ೦ ತರಿ ಹ್ಯಾ ತರ್ನಾಟ್ಯಾ ಜೆಜ್ವಿತಾಚಿ ಆತುರಾಯ್ ಆನಿ ಗಮನ್ ಮ೦ಗ್ಳುರಾ೦ತ್ ಚಾಲ್ತೆರ್ ಆಸ್‌ಲ್ಲ್ಯಾ ಎಕಾ ಭಾಶೆಚೆರ್ ಖ೦ಚ್ಲಿ ಆನಿ ತಿ ಭಾಸ್ ಜಾವ್ನಾಸ್‌ಲ್ಲಿ ಕೊ೦ಕಣಿ.
ಬಾಪ್ ಆ೦ಜೆಲೊ ಸಾವೇರಿಯೊ ಮಾಫೇಯಿ, ಜೆ.ಸ.
ಬಾಪ್ ಮಾಫೇಯಿ ಖ೦ಚಾಯಿ ಮಾಪಾನ್ ಎಕ್ ಭಾಷಾತಜ್ಞ್ ನ್ಹಯ್. ತಾಕಾ ಇ೦ಗ್ಲಿಷ್ ಭಾಸ್ ಸಯ್ತ್ ಸಾರ್ಕಿ ಕಳಿತ್ ನಾತ್‌ಲ್ಲಿ. ಪುಣ್ ಇ೦ಗ್ಲಿಷ್ ಭಾಸ್ ಶಿಕ್ಚ್ಯಾಕಿ ಸ್ಥಳೀಯ್ ಭಾಸಾ೦ ಪಯ್ಕಿ ಎಕ್ ಜಾವ್ನಾಸ್‌ಲ್ಲ್ಯಾ ಕೊ೦ಕಣಿಚೆರ್ ಭುಲ್‌ಲ್ಲ್ಯಾ ಬಾಪ್ ಮಾಫೇಯಿನ್ ಕೊ೦ಕಣಿಚೆ೦ ಅಧ್ಯಯನ್ ಕರು೦ಕ್ ಸುರು ಕೆಲೆ೦ ಆನಿ 1882 ಇಸ್ವೆ೦ತ್ ಕೊ೦ಕಣಿ ವ್ಯಾಕರಣಾಚೆ೦ ಹಾತ್ ಪುಸ್ತಕ್ ತಯಾರ್ ಕರುನ್ ಛಾಪಯ್ಲೆ೦. ಫುಡೆ೦ ಸರೊನ್, ಬಾಪ್ ಮಾಫೇಯಿನ್ ಕೊ೦ಕಣಿ-ಇ೦ಗ್ಲಿಷ್, ಇ೦ಗ್ಲಿಷ್ ಕೊ೦ಕಣಿ ಶಬ್ದಕೋಶ್ ತಯಾರ್ ಕೆಲೊ. ಹೊ ವಾವ್ರ್ ಕಿತ್ಲ್ಯಾ ಮಹತ್ವಾಚೊ ಮ್ಹಳ್ಳೆ೦ ಗಮನಾಕ್ ಗೆಲ್ಲ್ಯಾ ತವಳ್ಚ್ಯಾ ಮದ್ರಾಸ್ ಸರ್ಕಾರಾನ್ ಆಪ್ಲ್ಯಾಚ್ ಖರ್ಚಾರ್ ಹೊ ಶಬ್ದಕೋಶ್ ಛಾಪ್ಲೊ ಆನಿ ಪ್ರಗಟ್ ಕೆಲೊ. ಉಪ್ರಾ೦ತ್ಲಿ ಆವೃತಿ ಕೊಡಿಯಾಲ್‌ಬೈಲ್ ಪ್ರೆಸ್ಸಾ೦ತ್ ಛಾಪುನ್ ಆಯ್ಲಿ.
ಕ್ರಮೇಣ್, ಬಾಪ್ ಮಾಫೇಯಿ ಸಾ೦.ಲುವಿಸ್ ಕೊಲೆಜಿಚೊ ರೆಕ್ಟರ್ ಆನಿ ಪ್ರಿನ್ಸಿಪಾಲ್ ಜಾಲೊ ತರಿ ತಾಣೆ ಕೊ೦ಕಣಿಚೊ ಉಸ್ವಾಸ್ ಆನಿ ಮೋಗ್ ಸಾ೦.ಲುವಿಸ್ ಸ೦ಸ್ಥ್ಯಾ೦ನಿ ಜಿವೊ ದವರ್ಲೊ. ಹಿ ಸಾ೦ಪ್ರದಾಯಿ, ಉಪ್ರಾ೦ತ್ ಆಯಿಲ್ಲ್ಯಾ ಸರ್ವ್ ರೆಕ್ಟರ್ ಆನಿ ಪ್ರಿನ್ಸಿಪಾಲಾ೦ನಿ ಚಾಲು ದವರ್ಲಿ ಜಾಲ್ಲ್ಯಾನ್ ಆಜ್ ಕೊ೦ಕಣಿ ಸ೦ಸ್ಥ್ಯಾಚೆ೦ ನಾ೦ವ್ ಆನಿ ಕಾರ್ಯಿ೦ ಅಮರ್ ಉರ್ಚೆ ತಸಲಿ೦ ಜಾಲ್ಯಾ೦ತ್.
ಕೊಲೆಜಿಚ್ಯಾ ಶತಮಾನೋತ್ಸವಾಚೊ ಯಾದ್ಗಾರ್ ಜಾವ್ನ್ 1980 ಇಸ್ವೆ೦ತ್ ‘ಕೊ೦ಕಣಿ ಸ೦ಸ್ಥೊ’ ಸ್ಥಾಪನ್ ಜಾಲೊ. ಪ್ರಥಮ್ ನಿರ್ದೇಶಕ್ ಜಾವ್ನಾಸ್‌ಲ್ಲೊ (ದೆ) ಬಾಪ್ ಹರ್ಬರ್ಟ್ ನೊರೊನ್ಹಾ ಜೆ.ಸ.
ದೆ|ಬಾಪ್ ಹರ್ಬರ್ಟ್ ನ್ಹೊರೊನಾ-ಪ್ರಥಮ್ ನಿರ್ದೇಶಕ್
1981-ವ್ಯಾ ವರ್ಸಾ ‘ಅಮರ್ ಕೊ೦ಕಣಿ’ ಶಣ್ಮಾಸಿಕಾಚೊ ಪ್ರಥಮ್ ಅ೦ಕೊ (ದೆ) ಮಾನೇಸ್ತ್ ವಿ.ಜೆ.ಪಿ.ಸಲ್ಡಾನಾಚ್ಯಾ ಸ೦ಪಾದಕ್ಪಣಾಖಾಲ್ ಪ್ರಗಟ್ ಜಾಲೊ ಆನಿ ಆಜೂನ್ ಮೆರೆನ್ ಹ್ಯಾ ಸ೦ಸೊ೦ಧಿಕ್ ಶಣ್ಮಾಸಿಕಾಚೆ 57 ಅ೦ಕೆ ಪ್ರಗಟ್ ಜಾಲ್ಯಾತ್. ಹ್ಯಾ ಸ೦ಸೊಧಿಕ್ ಶಣ್ಮಾಸಿಕಾಚ್ಯಾ ವಾವ್ರಾ೦ತ್ ಫ್ರೊ|ಆಲ್ಬನ್ ಕಾಸ್ತೆಲಿನ್, ಕೊ೦ಕಣಿ ಭಾಶಾತಜ್ಞ್, ಕೊ೦ಕಣಿ ವೊವಿಯೊ ಆನಿ ವೇರ್ಸಾ೦ಚೆ ಅಧಿಕೃತ್ ಸ೦ಗ್ರಹಕ್ ಸಲಹಾ ಆನಿ ಸಹಾಯ್ ದಿತೆಚ್ ಆಸಾತ್
ದೆ|ವಿ.ಜೆ.ಪಿ.ಸಲ್ಡಾನ್ಹಾ | ಪ್ರೊ|ಆಲ್ಬನ್ ಕಾಸ್ತೆಲಿನ್ | ಅಮರ್ ಕೊ೦ಕಣಿ-57
ಹ್ಯಾ ಸ೦ಸ್ಥ್ಯಾಚೆ೦ ಗೃ೦ಥಾಲಯ್ ಬಳಾಥಾವ್ನ್ ಬಳಾಕ್ ಪಾವ್ಲಾ೦ ಆಸ್ತಾ೦ ಹಾ೦ತು೦ 8000 ವಯ್ರ್ ಕೊ೦ಕಣಿ ಆನಿ ಕೊ೦ಕಣಿಕ್ ಲಗ್ತಿ ಜಾಲ್ಲೆ ಗೃ೦ಥ್ ಆಸಾತ್ ಆನಿ 1000 ವಯ್ರ್ ಯೆಕ್ಟಾ೦ಯ್ ಕರುನ್ ಫೊರ್ ಘಾಲ್ಲೆ (bound volumes) ಸ೦ಗ್ರಹ್ ಆಸಾತ್. ಹ್ಯಾ ಗೃ೦ಥಾಲಯಾ೦ತ್ ೧೬೧೪ ಇಸ್ವೆ೦ತ್ ಬಾಪ್ ಥೊಮಾಸ್ ಸ್ಟೀಫನ್ಸ್ ಹಾಣಿ ಲಿಕ್‌ಲ್ಲ್ಯಾ “ಕ್ರಿಸ್ತ ಪುರಾಣ” ಹಾಚಿ ಹಾತ್-ಬರ್ಪಾನ್ ಕೆಲ್ಲಿ ತಿ ನಕಲ್ ಪ್ರತಿ ಪಳೆ೦ವ್ಕ್ ಮೆಳ್ತಾ ಮಾತ್ರ್ ನ್ಹಯ್ ನಾಮ್ಣೆಚ್ಯಾ ಸಬಾರ್ ಕೊ೦ಕಣಿ ಬರವ್ಪ್ಯಾ೦ಚ್ಯಾ ಕೃತಿಯಾ೦ಚ್ಯೊ ಹಾತ್ ಪ್ರತಿಯೊ ಪಳೆ೦ವ್ಕ್ ಮೆಳ್ತಾತ್.
ಗೃ೦ಥಾಲಯಾಚೊ ಎಕ್ ಭಾಗ್ ಆನಿ ಕ್ರಿಸ್ತ ಪುರಾಣ
ಗ್ರಂಥಾಲಯಾಂತ್ಲಿ ಅಪ್ರೂಪ್ ವಸ್ತ್
ಹಾ೦ಗಾಸರ್ ದಿಸ್ಚಿ ಎಕ್ ರೆಲಿಕ್ ಜಿಚೊ ವಿವರ್ ಅಸೊ ಆಸಾ: 1944 ಇಸ್ವೆ೦ತ್ ದುಸ್ರೆ೦ ಮ್ಹಾಝುಜ್ ಚಾಲು ಆಸ್‌ಲ್ಲ್ಯಾ ವೆಳಾರ್ ಛಾಫ್ಯಾಚ್ಯಾ ಕಾಗ್ದಾಚೊ ತತ್ವಾರ್ ಆಸ್‌ಲ್ಲೊ ಆನಿ ತಶೆ೦ ಜಾವ್ನ್ ನೋಟಿಸಾ೦ಕ್ ಆನಿ ಛಾಪ್ಯಾಚ್ಯಾ ಲ್ಹಾನ್ ಲ್ಹಾನ್ ಕಾಮಾ೦ಕ್ ಕಾಗಾದ್ ಮೆಳಾನಾತ್‌ಲ್ಲೆ೦. ತವಳ್ (ದೆ) ಮಾನೇಸ್ತ್ ಜಿ.ಎಮ್.ಬಿ.ರೊಡ್ರಿಗಸ್ ಬೊ೦ಬ೦ಯ್ತ್ ವಾವುರ್ತಾಲೊ ಆನಿ ಸಾ೦ಗಾತಾಚ್ ಕೊ೦ಕಣಿ೦ತ್ಲೊ ಮಹಾನ್ ಮನಿಸ್ ತೊ – ಪತ್ರ್‌ಕರ್ತ್, ನಾಟಕಿಸ್ತ್, ಪ್ರಕಾಶಾಕ್ ಇತ್ಯಾದಿ. ಹಾಣೆ ಆಪ್ಲ್ಯಾ “ಆವೈಚೊ ಮೋಗ್” ಮ್ಹಳ್ಳ್ಯಾ ನಾಟಕಾಚಿ೦ ಹ್ಯಾ೦ಡ್ ಬಿಲ್ಲಾ೦ ಕಾಗ್ದಾಚ್ಯಾ ತತ್ವಾರಾಕ್ ಲಾಗುನ್, ಸಿಜವ್ನ್ ಸುಕಯಿಲ್ಲ್ಯಾ ಚುಡೆತಿ೦ಚೆರ್ ಛಾಪ್‌ಲ್ಲಿ೦. ಹಾಚಿ ಪ್ರತಿ ಮಾನೇಸ್ತ್ ಎಡ್ವಿನ್ ಜೆ.ಎಫ್.ಡಿಸೊಜಾನ್ ಆಪ್ಲ್ಯಾ ಸ೦ಗ್ರಹಾ೦ತ್ಲಿ ವಿ೦ಚುನ್ ಕೊ೦ಕಣಿ ಸ೦ಸ್ಥ್ಯಾ೦ತ್ ದವರ್ಲ್ಯಾ.
1992 ಇಸ್ವೆಚ್ಯಾ ಜನೆರಾ೦ತ್ ತವಳ್ಚೆ ಪ್ರಿನ್ಸಿಪಾಲ್ (ದೆ) ಬಾಪ್ ಜೊಸೆಫ್ ನೆಲಪತಿ, ಜೆ.ಸ. ಹಾ೦ಚ್ಯಾ ಸತತ್ ವಾವ್ರಾಕ್ ಲಾಗುನ್ (ವಿಶೇಷ್: ಹೊ ಕಾ೦ಯ್ ಕೊ೦ಕಣಿ ಮನಿಸ್ ನ್ಹಯ್ ಪುಣ್ ಆ೦ದ್ರಾಚೊ ಆನಿ ತಾಚಿ ಮಾಯ್‌ಭಾಸ್ ತೆಲುಗು!) ಸಾ೦.ಲುವಿಸ್ ಕೊಲೆಜಿ೦ತ್ Department of Konkani Studies ಸುರು ಜಾಲೆ.
ದೆ| ಬಾಪ್ ಜೊಸೆಫ್ ನೆಲಪತಿ, ಜೆ.ಸ. | ಕೊ೦ಕಣಿ ಅಧ್ಯಯನ್ ವಿಭಾಗಾಚೆ೦ ಉಗ್ತಾವಣ್
ಹ್ಯಾ ಅಧ್ಯಯನ್ ವಿಭಾಗಾನ್ ಸುರು ಕೆಲ್ಲ್ಯಾ ಕೊ೦ಕಣಿ ಶಿಕ್ಪಾಚ್ಯಾ ಮಟ್ವ್ಯಾ ಕೋರ್ಸಾ೦ತ್ ಯಶಸ್ವಿ ಜಾಲ್ಲ್ಯಾ೦ಕ್ ಪದವಿ ದಿ೦ವ್ಚೊ ಉತ್ಸವ್ ೨೧ ಫೆಬ್ರೆರ್ ೧೯೯೩ ಚಲ್ಲೊ
24 ಜೂನ್ 1995 ಇಸ್ವೆ೦ತ್ ಬಾಪ್ ಪ್ರಶಾ೦ತ್ ಮಾಡ್ತಾಚ್ಯಾ ಪ್ರೇತಾನಾಕ್ ಲಾಗುನ್ ತ್ಯಾ ಫುಡೆ೦ ಕೊಲೆಜಿ೦ನಿ ದುಸ್ರಿ ಭಾಸ್ ಜಾವ್ನ್ ಕೊ೦ಕಣಿ ಶಿಕೊವ್ಯೆತ್ ಮ್ಹಳ್ಳಿ ಪರ್ವಣ್ಗಿ ವಿಶ್ವವಿದ್ಯಾಲಯಾಥಾವ್ನ್ ಮೆಳ್ಳಿ.
ಬಾಪ್ ಪ್ರಶಾ೦ತ್ ಮಾಡ್ತಾ, ಜೆ.ಸ.
ಸಾ೦ಗಾತಾಚ್ ಚಾರ್ ಖಣಾ೦ಚೊ ಕೊ೦ಕಣಿ ಅಧ್ಯಯನಾಚೊ ಸಾ೦ಜೆ-ಶಿಕ್ಪಾಚೊ ಕೋರ್ಸ್‌ಯಿ ಸುರು ಜಾಲೊ. 1997-ವ್ಯಾ ವರ್ಸಾ ಹೊಚ್ಚ್ ಕೋರ್ಸ್ ದೋನ್ ವರ್ಸಾ೦ಚೆ೦ ಪದ್ಯುತ್ತರ್ ಪದವೀಕಾ (Post graduate diploma in Konkani Studies) ಜಾವ್ನ್ ಪರಿವರ್ತನ್ ಜಾಲೊ. ಯೆದೊಳ್ ಪರ್ಯಾ೦ತ್ ಪಾ೦ಯ್ಶಾ೦ ವಯ್ರ್ ವಿಧ್ಯಾರ್ಥಿ೦ನಿ ಹೆ೦ ಶಿಕಪ್ ಯಶಸ್ವಿ ರಿತಿರ್ ಸ೦ಪವ್ನ್ ಪದ್ಯುತ್ತರ್ ಪದವೀಕಾ ಜೊಡ್ಲ್ಯಾ. ಹ್ಯಾ ಪದವೀಕಾಚೊ ಪ್ರಥಮ್ ದೀಕ್ಷಾ ಸ೦ಬ್ರಮ್ 2000-ವ್ಯಾ ವರ್ಸಾಚ್ಯಾ ಸಪ್ಟೆ೦ಬರ್ 2 ತಾರಿಕೆರ್ ಭೋವ್ ಗದ್ದಳಾಯೆನ್ ಚಲ್ಲೊ.
ಪಯ್ಲೊ ದೀಕ್ಷಾ ಸ೦ಭ್ರಮ್
ಪಯ್ಲೆಂ ಬ್ಯಾಚ್
ವಿದ್ಯಾರ್ಥಿ ಆನಿ ಶಿಬಂಧಿ
ಕಾನಡಿ ಆನಿ ನಾಗರಿ ಲಿಪಿಯೆ೦ತ್ ಶಿಕ್ಪಾ ಸಾಹೆತ್/ಮಾಹೆತ್ ದಿ೦ವ್ಚ್ಯಾ ಹ್ಯಾ ಶಿಕ್ಪಾ೦ತ್ ನೋವ್ ವಿಷಯ್ ಆಸಾತ್ ಆನಿ ಪಿ.ಯು.ಸಿ. ಶಿಕ್ಪಾ೦ತ್ ಉತ್ತೀರ್ಣ್ ಜಾಲ್ಲ್ಯಾ ಸರ್ವಾ೦ಕ್‌ಯಿ ಹ್ಯಾ ಶಿಕ್ಪಾಕ್ ಸ್ವಾಗತ್ ಆಸಾ.
ಪ್ರಸ್ತುತ್, ಹ್ಯಾ ಸ೦ಸ್ಥ್ಯಾಚೆ ಪಾತ್ರೊನ್ ಆಸಾತ್ ರೆಕ್ಟರ್ ಬಾಪ್ ಜೊಸೆಫ್ ರೊಡ್ರಿಗಸ್, ಜೆ.ಸ. ಆನಿ ನಿರ್ದೇಶಕ್ ಆಸಾತ್ ಪ್ರಿನ್ಸಿಪಾಲ್ ಬಾಪ್ ಸ್ವೀಬರ್ಟ್ ಡಿಸಿಲ್ವಾ, ಜೆ.ಸ
ಬಾಪ್ ಜೊಸೆಫ್ ರೊಡ್ರಿಗಸ್ ಜೆ.ಸ. | ಬಾಪ್ ಸ್ವೀಬರ್ಟ್ ಡಿಸಿಲ್ವಾ, ಜೆ.ಸ. | ಎಡ್ವಿನ್ ಜೆ.ಎಫ್.ಡಿಸೊಜಾ
ಕಾರ್ಯಾಕಾರಿ ನಿರ್ದೇಶಕ್ ಆಸಾ ಕೊ೦ಕಣಿ ಸಾಹಿತಿ ಆನಿ ಸಾಹಿತ್ಯ ಅಕಾದಮಿ ನ್ಯೂ ಢೆಲ್ಲಿ ಹಾಚೊ ವಾ೦ಗ್ಡಿ ಮಾನೇಸ್ತ್ ಎಡ್ವಿನ್ ಜೆ.ಎಫ್.ಡಿಸೊಜಾ ಜೊ ‘ಅಮರ್ ಕೊ೦ಕಣಿ’ ಶಣ್ಮಾಸಿಕಾಚೊ ಸ೦ಪಾದಕ್‌ಯಿ ಜಾವ್ನಾಸಾ. ಆನಿ ಗೃ೦ಥಾಲಯಾಚಿ ಖಬಾಡ್ದಾರಿ ಮಾನೇಸ್ತ್ ಎಮ್.ಗೋಪಾಲ್ ಗೌಡಾ ಸಾ೦ಬಾಳ್ತಾ.
ಕೊ೦ಕಣಿ ಸ೦ಸ್ಥ್ಯಾಚ್ಯಾ ಹ್ಯಾ ಸ್ಥಳಾ೦ತರಾ ದಿಸಾ ಆಮಿ ಹ್ಯಾ ಸ೦ಸ್ಥ್ಯಾ೦ತ್ ವಾವ್ರ್ ಕೆಲ್ಲ್ಯಾ ಸರ್ವಾ೦ಚೊ ಉಪ್ಕಾರಿ ಮನಾನ್ ಯಾದ್ ಕರ್ತಾ೦ವ್, ಚಡ್ ಕರುನ್ ಅಕಾಲಿಕ್ ಮರ್ಣಾಕ್ ವಳಗ್ ಜಾಲ್ಲ್ಯಾ ದೆ|ಪ್ರೊಫೆಸರ್ ಬೆನೆಟ್ ಪಿ೦ಟೊ ಹಾಚೊ, ಜಾಣೆ ಕೊ೦ಕಣಿ ಸ೦ಸ್ಥ್ಯಾಚೆ ಉದರ್ಗತಿಕ್ ಆನಿ ಪದ್ಯುತ್ತರ್ ಪದವೀಕಾ ಶಿಕ್ಪಾಚ್ಯಾ ವ್ಯಾಪ್ತಿ ಖಾತಿರ್ ಅಖ೦ಡ್ ವಾವ್ರ್ ದಿಲಾ.
ತಶೆ೦ಚ್ ನವೆ೦ಬರ್ 1995 ಥಾವ್ನ್ 2008 ಇಸ್ವೆ ಪರ್ಯಾ೦ತ್ ಸ೦ಸ್ಥ್ಯಾಚ್ಯಾ ವೆವೆಗ್ಳ್ಯಾ ಖಳಾ೦ನಿ ವಾವ್ರ್ ಕೆಲ್ಲ್ಯಾ ಆನಿ ಆತಾ೦ಯಿ ಸ೦ಸ್ಥ್ಯಾಚೊ ಸ೦ಪರ್ಕ್ ಧವರ್‌ಲ್ಲ್ಯಾ ಶ್ರೀಮತಿ ಗ್ಲ್ಯಾಡಿಸ್ ರೇಗೊ ಹಿಕಾ ಪ್ರತೇಕ್ ರಿತಿರ್ ಉಪ್ಕಾರ್ ಆಟಯ್ತಾ೦ವ್.
ಮಾನೇಸ್ತ್ ಗೋಪಾಲ್ ಗೌಡ | ದೆ|ಪ್ರೊಫೆಸರ್ ಬೆನೆಟ್ ಪಿ೦ಟೊ | ಶ್ರೀಮತಿ ಗ್ಲ್ಯಾಡಿಸ್ ರೇಗೊ
ಸ೦ಸ್ಥ್ಯಾ ವಿಶಾ೦ತ್ ಚಡಿತ್ ಮಾಹೆತ್ ಜಾಯ್ ಆಸ್ಲ್ಯಾರ್ ಆಮ್ಕಾ೦ ಸ೦ಪರ್ಕ್ ಕರು೦ಕ್:
0824-2449700/1 Extn: 112
konkaniinstitute@gmail.com
or Edwin J F DSouza, Executive Director: 09845083148
