ಉಡುಪಿ ದಿಯೆಸೆಜಿಚೊ ಪ್ರಪ್ರಥಮ್ ದೆವಾಚೊ ಸೆವಕ್ ಜಾವ್ನ್, ಸಾಂತಿಪಣಾಚೆ ವಾಟೆರ್ ಆಸ್ಚೊ, ಆಮ್ಚೊ ಪಾದ್ರ್ಯಾಬ್ ಬಾ| ಆಲ್ಫ್ರೆಡ್ ರೋಚ್ ಹಾಂಚ್ಯಾ ಜಲ್ಮಾ ಶತಾಬ್ದಿಚ್ಯಾ ಉಡಾಸಾಕ್, ತಾಣಿ ಜಲ್ಮೊನ್ ವಾಡ್ಲೆಲ್ಯಾ ಬಾರ್ಕೂರ್ ಫಿರ್ಗಜೆಚ್ಯಾ ಪಾಂಡೇಶ್ವರ್, ಮೂಡಾಡುಕುದ್ರು ವಾಡ್ಯಾಂತ್ ಸನ್ವಾರಾ, ಮೇ 25 ವೆರ್ ಬಾ। ಆಲ್ಫ್ರೆಡ್ ರೋಚ್ ಜಲ್ಮಾ ಶತಾಬ್ದಿ ಸ್ಮಾರಕ್ ಉಗ್ತಾವಣ್ ಜಾಲೆಂ.
ವಾಡ್ಯಾಚಿಂ ಮಾಲ್ಘಡಿಂ – ಉರ್ಬನ್ ಡಿಸೊಜಾ, ಲೆನ್ನಿ ಮಾರ್ಟಿಸ್ ಆನಿ ತೆರೆಜಾ ಫೆರ್ನಾಂಡಿಸ್ ಹಾಣಿ ಸ್ಮಾರಕ್ ಉಗ್ತಾಯ್ಲೆಂ. ಬಾರ್ಕೂರ್ ಫಿರ್ಗಜೆಚೊ ವಿಗಾರ್ ಮಾ| ಬಾ| ರೊನಾಲ್ಡ್ ಮಿರಾಂದಾ ಹಾಣಿ ಸ್ಮಾರಕಾಚೆಂ ಆಶೀರ್ವಚನ್ ಕರುನ್ ಆಪ್ಲ್ಯಾ ಸಂದೇಶಾಂತ್ ಸ್ಮಾರಕ್ ಉಬಾರ್ಲೆಲ್ಯಾ ವಾಡ್ಯಾಗಾಂಕ್ ಅಭಿನಂದನ್ ಪಾಟವ್ನ್ ” ಹೆಂ ಸ್ಮಾರಕ್ , ಏಕ್ ಖಾಲ್ತೊ ಸೆವಕ್ ಜಾವ್ನ್ ಆಪ್ಲ್ಯಾ ಜಿವಿತಾವ್ಧೆಂತ್ ಸೊಮಿಯಾಚೆಂ ಮಿಸಾಂವ್ ಬಾ| ಆಲ್ಫ್ರೆಡ್ ರೊಚಾನ್ ಜಶೆಂ ಪಾಚಾರ್ಲೆಂ ತಶೆಂ ಪಾಚಾರ್ಚೆಂ ಕೇಂದ್ರ್ ಜಾಂವ್” ಮ್ಹಳೆಂ.
ಉಗ್ತವಣ್ ಕಾರ್ಯಾ ಉಪ್ರಾಂತ್ ಚಲ್ಲೆಲ್ಯಾ ಮಟ್ವ್ಯಾ ವೆದಿ ಕಾರ್ಯಾಂತ್ ಆಂಟನಿ ಪ್ರಕಾಶ್ ಡಿಸೊಜಾ ಹಾಣಿ ಫಾ| ರೋಚ್ ಜಲ್ಮಾ ಶತಾಬ್ದಿ ಸ್ಮಾರಕ್ ಯೆವ್ಜಣೆ ವಿಶ್ಯಾಂತ್ ವಿವರ್ ದಿಲೊ ಆನಿ ಯೆವ್ಜಣೆಕ್ ಮಜತ್ ಮಾಗೊನ್ ಧಾಡ್ಲೆಲ್ಯಾ ದೆವಾಚೊ ಸೆವಕ್ ಫಾ| ರೋಚಾಚೊ ಉಪ್ಕಾರ್ ಆಟಯ್ಲೊ. ಮಾ| ಬಾ| ರೋಹನ್ ಲೋಬೊ ಹಾಣಿ ಸ್ಮಾರಕಾ ಪಾಸತ್ ವಾವುರ್ಲೆಲ್ಯಾ ವಾಡ್ಯಾಗಾರಾಂಚೊಂ ಉಪ್ಕಾರ್ ಭಾವುಡ್ಲೊ.
ವೆದಿ ಕಾರ್ಯಾಚೊ ಅಧ್ಯಕ್ಷ್, ಉಡುಪಿ ದಿಯೆಸೆಜಿಚೊ ಎಪಿಸ್ಕೊಪಲ್ ವಿಗಾರ್ ಮಾ| ಬಾ| ರೋಶನ್ ಮಿನೇಜಸ್ ಹಾಣಿ ಆಪ್ಲ್ಯಾ ಅಧ್ಯಕ್ಶೀಯ್ ಉಲವ್ಪಾಂತ್ 1974 ಥಾವ್ನ್ ಫಾ| ರೋಚಾಸಂಗಿ ತಾಂಚ್ಯಾ ಸಳಾವಳೆಚೊ ಉಡಾಸ್ ಕಾಡುನ್, ತವಳ್ ಥಾವ್ನ್ ಆಜ್ ಪರ್ಯಾಂತ್ ಆಪ್ಲ್ಯಾ ಯಾಜಕೀ ಭೆಸಾಂತ್ ಫಾ| ರೋಚ್ ಹಾಂಚೊ ಪ್ರಭಾವ್ ಆನಿ ಪೇರಣಾವಿಶಿಂ ಸವಿಸ್ತಾರ್ ಸಾಂಗ್ಲೆಂ.
ವಾಡ್ಯಾಚಾ ಭುರ್ಗ್ಯಾಂನಿ ಸ್ವಾಗತ್ ನೃತ್ಯಾದ್ವಾರಿಂ ಸ್ವಾಗತ್ ಕೆಲೊ. ವಾಡ್ಯಾಚಿ ಗುರ್ಕಾರ್ನ್ ಮಾರ್ಗರೆಟ್ ಡಿ ಸೊಜಾ ಹಾಣಿ ಯೆವ್ಕಾರ್ ಮಾಗ್ಲೊ. ಜೆನಿಫರ್ ಮಾರ್ಟಿಸ್ ಹಿಣೆ ದಿನ್ವಾಸ್ ಪಾಟಯ್ಲೆ. ಜೋಸೆಫ್ ಫೆರ್ನಾಂಡಿಸ್ ಹಾಣಿ ಕಾರ್ಯೆಂ ಚಲವ್ನ್ ವೆಲೆಂ.
ಕಾರ್ಯಾಕ್ ಕುಮಕ್ ಕೆಲ್ಲ್ಯಾ ದಾನಿಂಕ್ ಉಡಾಸಾಚ್ಯೊ ಕಾಣಿಕೊ ವಾಂಟ್ಲ್ಯೊ. ಫಿರ್ಗಜೆಚೊ ಉಪಾಧ್ಯಕ್ಶ್ ಜೊಸ್ಸಿ ಫೆರ್ನಾಂಡಿಸ್, ಬಾರ್ಕೂರ್ ಆನಿ ಸಾಸ್ತಾನ್ ಕೊವೆಂತಾಚ್ಯೊ ಧರ್ಮ್ ಭಯ್ಣಿ ಅಶೆಂ ಸುಮಾರ್ ದೊನ್ಶ್ಯಾಂ ವಯ್ರ್ ಫಿರ್ಗಜ್‌ಗಾರಾಂ ಕಾರ್ಯಾಕ್ ಹಾಜರ್ ಆಸ್ಲಿಂ.
ಸಕಾಳಿಂಚ್ಯಾ ಆದೇಸಾರ್ ಸಾಂ. ಪೆದ್ರುಕ್ ಸಮರ್ಪಿಲ್ಲ್ಯಾ ಬಾರ್ಕೂರ್ ಫಿರ್ಗಜೆಂತ್ ವಿಗಾರ್ ಮಾ| ಬಾ| ರೊನಾಲ್ದ್ ಮಿರಾಂದಾ ಹಾಣಿ ಸಂಭ್ರಮಿಕ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಬ್ರಹ್ಮಾವರ್ ಭಾಗೆವೊಂತ್ ಕುಟಮ್ ಫಿರ್ಗಜೆಚೊ ವಿಗಾರ್ ಮಾ| ಬಾ| ಜೋನ್ ಫೆರ್ನಾಂಡಿಸ್, ಮಾ| ಬಾ| ರೋಹನ್ ಲೋಬೊ, ಮಾ| ಬಾ| ಜೋಕಿಂ ಡಿಸೊಜಾ, ಮಾ|ಬಾ| ರವಿರಾಜ್ ಸೆರಾವೊ, ಮಾ| ಬಾ| ಗ್ಲ್ಯಾನ್ಸನ್ ಹಾಣಿ ತಾಂಕಾ ಸಾಂಗಾತ್ ದಿಲೊ. ಆಪ್ಲ್ಯಾ ಪ್ರಸಂಗಾಂತ್ ಮಾ| ಬಾ| ಜೋಕಿಮ್ ಸೊಜ್ ಹಾಣಿ “ಜೆಜುಚ್ಯಾಚ್ ಮೆಟಾಂನಿ ಬಾ| ರೋಚ್ ಸಾದಿ, ಭೊಳಿ ಆನಿ ಪೆಲ್ಯಾಚಾ ಸೆವೆಚಿ ಜೀಣ್ ಜಿಯೆಲ್ಲೊ” ಮ್ಹಳೆಂ.
2021 ವ್ಯಾ ವರ್ಸಾ ಅಗೋಸ್ತಾಚ್ಯಾ 15 ವೆರ್, ಉಡುಪಿ ದಿಯೆಸೆಜಿಚೊ ಪಯ್ಲೊ ದೆವಾಚೊ ಸೆವಕ್ ಜಾವ್ನ್ ಘೋಶಿತ್ ಜಾಲ್ಲೊ ಬಾ| ಆಲ್ಫ್ರೆಡ್ ರೋಚ್, ಬಾರ್ಕೂರ್ಚ್ಯಾ ಮೂಡಾಡು ಕುದ್ರುಂತ್ 1924 ವ್ಯಾ ವರ್ಸಾ ಎಪ್ರಿಲ್ 3 ವೆರ್ ಜಲ್ಮಾಲ್ಲೊ. 1951 ವ್ಯಾ ವರ್ಸಾ ಎಪ್ರಿಲ್ 11 ವೆರ್, ಕಾಪುಚಿನ್ ಯಾಜಕ್ ಜಾವ್ನ್ ಸೊಮಿಯಾಚ್ಯಾ ಶೆತಾಂತ್ ಆಪ್ಲೆಂ ಮಿಸಾಂವ್ ಸುರು ಕರುನ್, ಬ್ರಹ್ಮಾವರ್, ಭಿಣಗಾ, ಕಾಸರ‌ಕೋಡ್, ಫರಂಗಿಪೇಟ್ ಅಶೆಂ ಸೆವಾ ದಿಲ್ಲ್ಯಾ ತಾಕಾ ಲೋಕ್ ‘ಆಮ್ಚೊ ಪಾದ್ರ್ಯಾಬ್’ ಮ್ಹಣ್ ಮಾನ್ತಾ, ಒಳ್ಕತಾ ಆನಿ ವೆಗಿಂಚ್ ತೋ ಸಾಂತ್ ಜಾಂವ್ಚ್ಯಾಕ್ ರಾಕೊನ್ ಆಸಾ.
■ ವರ್ದಿ : ಅರ್ಚಿಬಾಲ್ದ್ ಪುರ್ಟಾದೊ
■ ತಸ್ವಿರ‍್ಯೊ : ಸ್ಟೀಫನ್ ಅಂದ್ರಾದೆ
Well begun is half done .
Congratulations to Barkur Parishioners, in particular of Moodhadu kudru’s for celebrating and inaugurating a fitting memorial in honor of their Son of Soil , the Servant of God Fr Alfred Roche commemorating his birth centenary.
May his life inspire and may devotion to him spread and increase and may he obtain both spiritual and material graces to those who seek through his intercession . May his cause for Beatification be realised at the earliest .
Hopefully prayer services routinely be held at this Memorial of his birth place and at his tomb at Brahmavar .
God has proved that he can raise holy people even from a remote village .