ದುಬಂಯ್ತ್ ಸಾದರ್ ಜಾಲಿ ಸತ್ರಾವಿ ಸ್ಟ್ಯಾನ್ ನಾಯ್ಟ್

ನಾಮ್ನೆಚೊ ಕೊಂಕ್ಣಿ ಗಾವ್ಪಿ ಸ್ಟ್ಯಾನ್ ಮೆಂಡೊನ್ಸಾ ಹಾಚ್ಯಾ ಹಾಸ್ತ್ಯಾ – ಉಡ್ತ್ಯಾ ಆನಿ ಸಿಂತಿಮೆಂತಾಳ್ ಕೊಂಕ್ಣಿ ಪದಾಂಚಿಂ ಸತ್ರಾವಿ ಸಂಗೀತ್ ಸಾಂಜ್ ದುಬಂಯ್ಚ್ಯಾ ಎಮಿರೆತ್ ಥಿಯೆಟರಾಂತ್ ಎಪ್ರಿಲ್ 28 ವೆರ್ ಸುಕ್ರಾರಾ ಸಾದರ್ ಜಾಲಿ. ಸ್ಟ್ಯಾನ್ ಮೆಂಡೊನ್ಸಾಕ್ ನಾಮ್ನೆಚೆ ಗಾವ್ಪಿ ಜೋಸೆಫ್ ಮಥಾಯಸ್, ಡೊನಿ ಕೊರೆಯಾ, ಮೆಲ್ವಿನ್ ಅಂತೊನಿ ಡಿ ಸೊಜಾ, ಆನ್ಸನ್ ಮಥಾಯಸ್, ಪ್ರಿಯಾಂಕಾ ಮರಿಯಾ ಡಿಸೊಜಾ, ದಿಶಾ ಪ್ರಸನ್ನ, ಶೀತಲ್ ಡಿ ಸೊಜಾ ಆನಿ ಅಶ್ವಿಜಾ ಮೆಂಡೊನ್ಸಾ ಹಾಣಿ ಮಾಂಚಿಯೆರ್ ಸಾಂಗಾತ್ ದಿಲೊ.

‘ಸಾಂಗೊನ್ ಮುಗ್ದಾನಾ’ ಖ್ಯಾತೆಚ್ಯಾ ಪ್ರದೀಪ್ ಬರ್ಬೋಜಾ ಪಂಗ್ಡಾನ್ ಫೊಕಣಾಂ ಸಾದರ್ ಕೆಲಿಂ. ಲವೀನಾ ಫೆರ್ನಾಂಡಿಸ್, ಗೊಡ್ವಿನ್ ಕಾಸ್ತೆಲಿನೊ ಆನಿ ರೊಯ್‌ಸ್ಟನ್ ಕಿರಣ್ ಡಿ ಸೊಜಾ ಹಾಣಿ ಪ್ರದೀಪ್ ಬರ್ಬೋಜಾಕ್ ಸಾದರ್ಪಣಾಂತ್  ಸಾಂಗಾತ್ ದಿಲೊ. ನಿಕ್ಸನ್ ಡಿ ಸೊಜಾ ಮುಕೆಲ್ಪಣಾರ್ – ನಿತಿನ್, ಮರ್ವಿನ್, ಜೀತನ್, ಶ್ಯಾಮ್, ಸಿಂತಿಯಾ, ಜೆನಿವಿವಾ, ಡ್ಯಾಫ್ನಿ ಆನಿ ಆಯಾನ್ ಹಾಂಚ್ಯಾ ‘ಟ್ರೂ ಎಂಟರ್‌ಟೇನರ್ಸ್’ ಪಂಗ್ಡಾನ್ ನಾಚ್ ಸಾದರ್ ಕೆಲೆ. ಬ್ಯಾಂಡ್ ಸ್ಕೇಪ್ ಪಂಗ್ಡಾನ್ ಸಂಗೀತ್ ದಿಲೆಂ.

ಇಂಗ್ಲೆಡಾ ಥಾವ್ನ್ ಫಕತ್ ಸ್ಟ್ಯಾನ್ ನೈಟ್ ಕಾರ್ಯಾಕ್ ದುಬಯ್ ಯೇವ್ನ್ ನಾಮ್ನೆಚೊ ಕಾರ್ಯೆಂ ನಿರ್ವಾಹಕ್ ಜೋಸೆಫ್ ಸಿಕ್ವೇರಾ ಹಾಣೆ ಆಪುರ್ಬಾಯೆನ್ ಕಾರ್ಯೆಂ ಚಲವ್ನ್ ವೆಲೆಂ. ಡೊನಿ ಕೊರೆಯಾ ಆನಿ ರೋಶನ್ ಡಿಸಿಲ್ವಾ ಹಾಣಿ  ಕಾರ್ಯೆಂ ನಿರ್ವಹಣಾಂತ್ ಸಾಂಗಾತ್ ದಿಲೊ.

ದುಬಂಯ್ತ್ ವಸ್ತಿ ಕರುನ್ ಆಸ್ಚೆ ಕೊಂಕ್ಣಿ ಮೋಗಿ ಆನಿ ಸಮರ್ಥಕ್ ರೊನಾಲ್ಡ್  ಕುಲಾಸೊ, ಮಾರ್ಟಿನ್ ಆರಾನ್ಹಾ, ಲ್ಯಾನ್ಸಿ ಡಿ ಸೊಜಾ, ಮೈಕಲ್ ಡಿ ಸೊಜಾ, ರೊನಾಲ್ಡ್ ಮಾರ್ಟಿಸ್, ನೆಲ್ಸನ್ ರೊಡ್ರಿಗಸ್, ಜೇಮ್ಸ್ ಮೆಂಡೋನ್ಸಾ, ಭ| ಜೆಸಿಂತಾ, ಡಯಾನ್ ಡಿ ಸೊಜಾ ಆನಿ ಸಂಗೀತ್ ಸಾಂಜೆಚೊ ರೂವಾರಿ ನಟ್, ಗಾವ್ಪಿ ಆನಿ ಸಮಾಜ್ ಸೇವಕ್ ಜೋಸೆಫ್ ಮಥಾಯಸ್ ವೆದಿರ್ ಮಾನಾಚೆ ಸಯ್ರೆ ಜಾವ್ನ್ ಹಾಜರ್ ಆಸೊನ್, ಕೊಂಕ್ಣಿ ಸಾಹಿತ್ಯ್, ಸಂಗೀತ್ ಆನಿ ಸಂಸ್ಕೃತೆಕ್ ಸಹಕಾರ್ ಭಾಸಾಯ್ಲೊ. ಮಂಗ್ಳುರ್ ಥಾವ್ನ್ ಸ್ನೇಹಾಲಯ ಬ್ರದರ್ ಜೋಸೆಫ್ ಕ್ರಾಸ್ತಾ ಆನಿ ಆಲ್ಫ್ರೆಡ್ ಬೆನ್ನಿಸ್ ಮಾನಾಚೆ ಸಯ್ರೆ ಜಾವ್ನ್ ಕಾರ್ಯಾಕ್ ಹಾಜರ್ ಆಸೊನ್ ಪಂಗ್ಡಾ ತರ್ಫೆನ್ ತಾಂಕಾ ಮಾನ್ ಕೆಲೊ.