ಖಂಚೆ ಘಡಿಯೆ ಮೆಥ್ಯುನ್ ತೆಲ್ಮಾಚೆಂ ನಂಬರ್ ಹೆಲೀನಾಥಾವ್ನ್ ಘೆತ್ಲೆಂ ಆನಿ ತೆಂ ಲಾಗಯ್ಲೆಂ ತವಳ್ಚೆ ಘಡಿಯೆ
ಹ್ಯಾ ಪ್ರಕರಣಾನ್ ನವಿಚ್ಚ್ ಆನಿ ಅತೀವ್ ಅಶೀರ್ ಘುಂವ್ಡಿ ಘೆತ್ಲಿ. ಅಶೆ ಘಡತ್ ಮ್ಹಣ್ ಕೊಣೆಂಯಿ ಚಿಂತ್‌ಲ್ಲೆಂ
ನಾ. ಹಾಂಗಾಸರ್ ಆಸ್‌ಲ್ಲಿ ಘುಸ್ಪಡ್ ಆನಿ ಅಸ್ಪಷ್ಟತಾಯ್ ಇತ್ಲಿಚ್ ಕೀ ಮೆಥ್ಯುನ್, ರಿಚರ್ಡಾಕ್ ಫಸಂವ್ಕ್ ಕಿತ್ಯಾಕ್ ಟೆಂಡರ್ ಜುಗಾರೆಕ್ ವಾಪರ್‌ಲ್ಲೆಂ ಮ್ಹಳ್ಳೆಂ ಸವಾಲ್ ಎಕ್; ದುಸ್ರೆಂ, ಒಸಿಸಾಂತ್ಲೆಂ ಚಿಟ್ಟ್ಯಾ ವಾಗಾಚೆಂ ಪೀಲ್ ಕಶೆಂ ಫಸ್ಲೆಂಗಿ ಮ್ಹಳ್ಳೆಂ. ಹ್ಯಾ ದೊನಾಂಯ್ಕಿ ಜೆರೊಮಾಲಾಗಿಂ ಜಾಪ್ ನಾತ್‌ಲ್ಲಿ ಕಿತ್ಯಾಕ್ ಮೆಥ್ಯುಚೆಂ ಹೆ ಕರ್ತುಬಚ್ಚ್ ತಿತ್ಲೆಂಯಿ ಮಿಸ್ತೆರಾ ಭರಿತ್ ಜಾವ್ನಾಸ್‌ಲ್ಲೆಂ. ಎಕೆ ಕೋಶಿಯೆಂತ್ ದೋನ್ ತಲ್ವಾರಿ ರಾವೊಂಕ್ ಸಕಾನಾಂತ್ ಮ್ಹಳ್ಳೆಂ ತಾಚೆಂ ರಾಜಾಂವ್ ಕಿತ್ಲೆಂಯಿ ರಾಜಾಂವೀಕ್ ಜಾಲ್ಯಾರಿ ಪೆನೆರಾಂತ್ ಉದಕ್ ಭರ್‍ಚೆಂ ಪ್ರೇತನ್ ಕಶೆಂ ದಿಸ್ತಾಲೆಂ. ವ್ಹಯ್, ಲಾಜ್ರಾಕ್ ಖಂಡಿತ್ ಜಾಯ್ ಆಸ್‌ಲ್ಲೆಂ ರಿಚರ್ಡಾಕ್ ಫಸಂವ್ಕ್ ಆನಿ ಅಶೆಂ ಕರುಂಕ್ ತಾಣೆ ಹರ್ ತಯಾರಿ ಕೆಲ್ಲಿ, ಸರ್ವ್ ಕೆಬಿನಾಂಚ್ಯೊ ಚಾವಿಯೊ, ಟ್ಯಾಪ್ ಕೆಲ್ಲಿಂ ಫೋನಾಂ, ರೆಕೊರ್ಡ್ ಕೆಲ್ಲಿಂ ಸಂಭಾಷಣಾಂ ಘೆವ್ನ್ ಖಂಯ್ ವೆಚೆಂ ಕಿತೆಂ ಕರ್ಚೆಂ ಮ್ಹಳ್ಳೆಂ, ಆಮಾಲಾನ್ ಆನಿ ಹೆರ್ ನಾಂವ್ ನಾತ್‌ಲ್ಲ್ಯಾ ಪಾಶಾಂವಾಂನಿ ದಾಟೆಲ್ಲೆಂ ತಾಚೆಂ ಶಿಂತಿದಾಕ್ ಸಮ್ಜಾನಾತ್‌ಲ್ಲೆಂ. ಮೆಥ್ಯುಲಾಗಿಂ ಫಿರ್ಯಾದ್ ಘೆವ್ನ್ ಗೆಲ್ಯಾರ್‌ಯಿ ತೊ ವಿಚಾರ್ತೊಲೊ- ದುಸ್ರ್ಯಾ ಕುಶಿನ್ ಆಸ್ಚೊ ಕೊಣ್? ತೊ ತಾಳೊ ಕೊಣಾಚೊ? ಟೆಂಡರ್ ಜುಲಿಯಾ ಟ್ರೇಡಿಂಗಾಕ್ ಮೆಳುಂ ಯಾ ಡೈಮಂಡ್ಸ್ ಇಂಟರ್‌ನ್ಯಾಶನಲಾಕ್ ಮೆಳುಂ- ತೊ ಕೊಂಟ್ಯಾಕ್ಟ್ ಮನಿಸ್ ಕೋಣ್? ಕಸಲಿ ಜಾಪ್ ದಿತಲೊ ಲಾಜ್ರಾ? ಮೆಲ್ಕಮ್ ಸಯ್ತ್‌ಯಿ ಹ್ಯಾ ಪತ್ತೇದಾರ್‍ಗಿಂತ್ ಸಲ್ವಾಲ್ಲೊ. ಲಾಜ್ರಾನ್ ಕೆದಿಂಚ್ ಚಿಂತ್‌ಲ್ಲೆಂ ನಾ ಒಸಿಸಾಂತ್ ಬಸುನ್ ಮೆಥ್ಯು ಆಪ್ಲ್ಯಾ ತುರುಫಾ ಖಿಲಾಫ್ ಅಸಲೊ ಖ್ಹೆಳ್ ಖ್ಹೆಳಾತ್ ಮ್ಹಣ್. ಪುಣ್ ಸದಾಂಚ್ ದೋಶಿ ಕೊಶೆಡ್ದ್ ಪೋಸ್ ಕರುನ್ ಆಸ್ಚ್ಯಾ ಜೆರೊಮಾಕ್ ಎಕ್ ನವಿಚ್ ಬಿರಾಂತ್ ಚರ್‍ಲಿ-
ಮೆಥ್ಯು, ಆಪ್ಣಾಕ್ ಫಸಂವ್ಚೆಂ ಪ್ರೇತನ್ ಕರ್ತಾ ತರ್? ಒಸಿಸ್ ಕಂಪೆನಿಂತ್ ಮೆಥ್ಯು ಆನಿ ರಿಚರ್ಡಾ ಮದ್ಲೊ ಗಾಂಚ್ ಕಿತ್ಲೊ ಮಜ್ಬೂತ್ ಆಸಾ ಮ್ಹಣ್ ಸರ್ವಾಂಕ್ ಕಳಿತ್ ಆಸ್ಚಿ ಸಂಗತ್; ತಶೆಂ ಲಾಜ್ರಾ, ಎಕಾ ಮುಲ್ಯಾಂತ್ ಪಡೊನ್ ಆಸ್ಚೊ ನಕಾರಿ ಫರ್ನಿಚರ್ ಮ್ಹಣ್ ಸಗ್ಳೆಂ ಒಸಿಸ್ ಜಾಣಾಸ್ಲೆಂ. ಕೆದಳಾ ಜೆರೊಮಾಚೆರ್, ತೆಲ್ಮಾಚೆರ್ ಕುರಾಡ್ ದೆಂವತ್ ಮ್ಹಳ್ಳೆಂ ಆತುರಾಯೆನ್ ರಾಕೊನ್ ಆಸ್‌ಲ್ಲೆಂ ಸಗ್ಳೆಂ ಒಸಿಸ್. ಪಾನಾನಾತ್‌ಲ್ಲ್ಯಾ ಹಾಲಿಂಚ್ ಚಲ್‌ಲ್ಲಿ ಸ್ಕಾಯ್‌ಪಾರ್ಕ್ ಪಾರ್ಟಿಂತ್ ಸಬಾರ್‍ಶಿಂ ನವಾಲಾಂ ಉಗ್ತಿಂ ಜಾಲ್ಲಿಂ. ಹಾಂಕಾಂ ಜರ್ ಜೆರೊಮಾನ್ ಕೆಲ್ಲಿಂ ಕರ್ತುಬಾಂ ಉಗ್ತಡಾಂತ್ ಯೆತಿತ್ ತರ್ ಕುರಾಡಿಚಿ ಧಾರ್ ದೆಂವ್‌ಲ್ಲ್ಯಾಪರಿಂಚ್. ತರಿ ಮುಜುಗರಾಚೆಂ ಎಕ್ ಸವಾಲ್ ಆಸ್‌ಲ್ಲೆಂ- ಮೆಥ್ಯು ತಸಲ್ಯಾ ರಿಂಗ್‌ಮಾಸ್ಟರಾಕ್ ಹ್ಯಾ ಸರ್ವ್ ನಾಟಕೀಯಾಚಿ ಗರ್ಜ್ ಆಸ್‌ಲ್ಲಿ? ನಾತ್‌ಲ್ಲಿ ತರ್ ಹೊ ಕಿತ್ಯಾಕ್ ಅಸಲೊ ಖೆಳ್ ಖೆಳ್ಳೊ? ಜೆರೊಮಾಚ್ಯಾ ಹಿಸೊಬಾ ಪ್ರಕಾರ್ ಮೆಥ್ಯುಚೊ ಮಕ್ಸದ್ ಸ್ಕಾಯ್‌ಪಾರ್ಕ ಪಾರ್ಟಿ ಉಪ್ರಾಂಯ್ ಜ್ಯಾರಿ ಜಾಲ್ಲೊ, ರಿಚರ್ಡಾಚೊಯಿ ಜಾಲ್ಲೊ ಆಸ್ತೊಲೊ. ಆನಿ ಕಿತೆಂ ಉರ್‌ಲ್ಲೆಂ ಹ್ಯಾ ದೊಗಾಂಕ್? ಉರ್‌ಲ್ಲೊ ಫಕತ್ ಜೆರೊಮ್ ಲಾಜ್ರಾ. ಆನಿ ಅಸಲ್ಯಾ ಎಕಾ ಆಯಿನ್ನ್ ವೆಳಾರ್ ರಾಜಕಾರಿಣಿ ಮೌರಿಸ್ ಅಗುಸ್ತಿನಾನ್ ಪ್ರಖ್ಯಾತ್ ರೆವರೆಂಡ್ ಫ್ರೆಡ್ ಟೇಯ್ಲರಾಕ್ ಪೆಟ್ರೊಸ್ತೇಟಾಕ್ ಆಪವ್ಣೆಂ ದೀವ್ನ್ ‘ಭಾವಾರ್ಥಾಚಿ ಉಡ್ಕಿ’ ಮಾರಯಿಲ್ಲಿ. ಟೇಯ್ಲರಾಚ್ಯಾ ಜಾಳಾಂತ್ ಯಾ ವ್ಯೂಹಾಂತ್ ಜೆರೊಮ್ ಖಿಣಾ ಬಿತರ್ ಸೆರ್ವಾಲ್ಲೊ ಪುಣ್ ಪಳೆತಾನಾ, ಈವಾ, ರಮೋನಾ, ಹೆಲೀನಾ, ತೆಲ್ಮಾಂಯಿ. ಮೌರಿಸಾಚೆಂ ಹೆಂ ಇಲೆಕ್ಷನ್ ಸ್ಟಂಟ್ ವ್ಹಯ್ ತರ್ ರಾಜಾಂವೀಕ್‌ಚ್ ಮ್ಹಣ್ಯಾಂ. ಪುಣ್ ಮೆಥ್ಯುನ್, ರಿಚರ್ಡಾಕ್ ಫಸಂವ್ಕ್ ಮೌರಿಸಾಕ್ ವಾಪರ್ಚೆಂ ತಾಕಾ ಗಿಳುಂಕ್ ಜಾಯ್ನಾತ್‌ಲ್ಲೆಂ. ಆತಾಂ ಸರ್ವ್ ಸುತಾಂ ಉಗ್ತಡಾಂತ್ ಆಯಿಲ್ಲಿಂ ತರಿ ತಿ ಘಾಂಟಾಂವ್ಕ್ ತೊ ಸಕ್‌ಲ್ಲೊ ನಾ.
ಲಿಲಿಯನ್ ಜೆನಿಸಾನ್ ತಾಕಾ ಎಕ್ ಮಿಸಾಂವ್ ದಿಲ್ಲೆಂ, ಕಠೀಣ್ ತಾಕಿದ್ಯಾಂ ಸವೆಂ, ತ್ಯಾ ಮಿಸಾಂವಾಂತ್ ಸಲ್ವಲ್ಯಾರ್ ಕಿತೆಂ ಜಾಯ್ತ್ ಜೆರೊಮಾಚಿ ಗತ್ ಮ್ಹಣ್ ತಿಣೆ ಸ್ಪಷ್ಟ್ ಕಳಯಿಲ್ಲೆಂ. ಹೆಲೀನಾಚ್ಯಾ ಜಲ್ಮಾದಿಸಾ ತಿಂ ಹೆಲೀನಾಚ್ಯಾ ಎಪಾರ್ಟ್‌ಮೆಟಾಂತ್ ಭೆಟ್‌ಲ್ಲ್ಯಾ ವೆಳಾರ್. ತ್ಯಾ ಉಪ್ರಾಂತ್ ಜೆರೊಮ್ ಟೇಯ್ಲರಾಚೊ ಉಜ್ವೊ- ದಾವೊ ಹಾತ್ ಜಾಲ್ಲೊ ತರಿ, ಟೇಯ್ಲರಾಚಿಂ ಪಾಳಾಂ ಸೊದುನ್ ಹುಮ್ಟುಂಕ್ ತೊ ಸಕ್‌ಲ್ಲೊ ನಾ. ತಾಕಾ ಇತ್ಲೆಂಚ್ ಕಳಿತ್ ಜಾಲ್ಲೆಂ, ಟೇಯ್ಲರ್ ಅವ್ವಲ್ ದರ್ಜ್ಯಾಚೊ ಆಮಾಲಿ, ವ್ಯಬಿಚಾರಿ, fraud ಆನಿ ಸಂಸಾರಾಂತ್ ಕಾಂಯ್ ತರಿ ವಾಯ್ಟ್ ಆಸಾ ತರ್ ತಾಂತುಂ ತೊ ಶಾಮೀಲ್. ಅಮೆರಿಕಾಥಾವ್ನ್ ತೊ ಆಯಿಲ್ಲೊ ಪುಣ್ ತಾಚೊ ಬಣ್ ಗೊರೊ ನ್ಹಯ್ ಪುಣ್ ಮಾತ್ಯೆರಂಗ್‌ಯಿ ನ್ಹಯ್. ಕಸಲಿಗೀ ಮಿಲಾವಟ್ ಆಸ್‌ಲ್ಲ್ಯಾ ತಾಚ್ಯಾ ದಯ್ಹಿಕ್ ಜಲ್ಮಾಂತ್. ಪಾವನಾತ್‌ಲ್ಲ್ಯಾಕ್ ತಾಣೆ ವ್ಹಾಡಯಿಲ್ಲೆಂ ಖಾಡ್ ಆನಿ ಗರ್ಶೆ ದೊಳೆ (ದೊಳೆ, ಕೊಂಟ್ಯಾಕ್ಟ್ ಲೆನ್ಸ್ ಬಸವ್ನ್ ಕಸಲ್ಯಾಯಿ ಬಣಾಚೆ ಕರ್ಯೆತ್ ಮ್ಹಣ್ ಜೆರೊಮಾಕ್ ಕಳಿತ್ ಆಸ್‌ಲ್ಲೆಂ)… ಟೇಯ್ಲರ್ ಎಕ್ ಮಿಸ್ತೆರ್‌ಚ್. ತೊ ಮೌರಿಸ್ ಅಗುಸ್ತಿನಾಕ್ ಖಂಯ್ ಆನಿ ಕಸೊ ಭೆಟ್ಲೊ ಮ್ಹಳ್ಳೊ ಎಕ್ ಮಿಸ್ತೆರ್‌ಚ್. ದುಸ್ರಿ ಸಂಗತ್ ಜೆರೊಮಾಚ್ಯಾ ಗಮನಾಕ್ ಗೆಲ್ಲಿ- ಹ್ಯಾ ಟೇಯ್ಲರ್ ಪ್ರಕರಣಾಂತ್ ಲಿಲಿಯನ್ ಜೆನಿಸ್ ಮೆತೆರ್ ಜಾಲ್ಲಿಚ್ ನಾ; ಟೇಯ್ಲರಾಚ್ಯಾ ಪಾಟ್ಲ್ಯಾನ್ ತಿಣೆ ಜೆರೊಮಾಕ್ ಲಾಗಯಿಲ್ಲೊ. ಜೆರೊಮ್ ಎಕ್ ಚೂಕ್ ವಿಂಚವ್ಣ್ ಮ್ಹಣ್ ತಿಕಾ ಕಳಿತ್ ಆಸ್‌ಲ್ಲೆಂ ಜಾವ್ಯೆತ್ ಯಾ ನಾ ಆಸ್‌ಲ್ಲೆಂ ಜಾವ್ಯೆತ್. ಪುಣ್ ಯೆದೊಳ್ ಪರ್ಯಾಂತ್ ಜೆರೊಮಾನ್ ತಿಕಾ ಕಸಲೆಂಯಿ ಮಹತ್ವಾಚೆ ಸುರಾಗ್ ದಿಲ್ಲೆನಾಂತ್; ಬದ್ಲೆಕ್ ತೊ ಖುದ್ದ್ ಆಪ್ಣಾಕ್ ಸದಾಂ ಪಸಂದ್ ಆಸ್ಚ್ಯಾ ಜಿಣಿಯೆ ಪಥಾಚೆರ್ ಚಲೊಂಕ್ ಲಾಗ್‌ಲ್ಲೊ. ಟೇಯ್ಲರಾಚಿ ದಗಾಲ್ಭಾಜಿ ಜಿಣಿಯೆಚ್ಯಾ ಮೆಟಾಂನಿ ಆರಾಮಾಯೆನ್ ಚಲೊಂಕ್ ಲಾಗ್‌ಲ್ಲ್ಯಾ ತಾಕಾ ಹೆರ್ ಕಸಲ್ಯಾಚೆ ಪಡೊನ್ ವಚುಂಕ್ ನಾತ್‌ಲ್ಲೆಂ – ಈವಾಚ್ಯಾ ಲಂಯ್ಗಿಕ್ ಜಿಣಿಯೆಚೆರ್ ತಾಣೆ ಉಬಾರ್‌ಲ್ಲ್ಯಾ ದೋನ್‌ಯಿ ಬುರುಜಾಂಚಿ ಮೊಕ್ಳೀಕ್ ಜಾಲ್ಯಾ ಉಪ್ರಾಂತ್ ತೊ, ಜೆರೊಮ್ ಲಾಜ್ರಾ, ಸದಾಂಕಾಲ್ ಮಾಡ್ತಿರ್ ಮ್ಹಳ್ಳೆಂ ಮುಖ್ವಾಡ್ ಲಾವ್ನ್ ಜಿಯೆಂವ್ಚೊ ಮನಿಸ್ ಆತಾಂ ಜಿವೊ ಸಾಂತ್‌ಚ್ ಜಾಲ್ಲೊ. ಆನಿ ತಾಕಾ ‘ವಳ್ಕಾಲ್ಲ್ಯಾಂನಿ’ ಮ್ಹಣ್ಚೆಪರಿಂ ತೊ ಫ್ರೆಡ್ ಟೇಯ್ಲರಾಚೆ ಠೊಲಿಯೆಂತ್ ಸೆರ್ವಾಲ್ಲ್ಯಾಂತ್ ನವಾಲ್ ನಾತ್‌ಲ್ಲೆಂ.
ಆನಿ ಆತಾಂ –
ರಿಚರ್ಡಾಚಿ ಖರಿ ವಳಕ್ ಮೆಲ್ಕಮಾನ್ ತಾಕಾ ಕಳಿತ್ ಕೆಲ್ಲ್ಯಾ ರಾತಿಚ್ ತಾಣೆ ಮೆಥ್ಯುಚ್ಯಾ ಬಂಗ್ಲ್ಯಾಂತ್ ಉಬೊ ಕೆಲ್ಲೊ ಅವಸ್ವರ್ ಕೊಣಾಚ್ಯಾನ್‌ಯಿ ಕುಶಿಕ್ ಮಾರ್‍ಚೊ ನ್ಹಯ್. ಪುಣ್ ಥಂಯ್ ಹಾಜರ್ ಆಸ್‌ಲ್ಲಿಂ ಮ್ಹಳ್ಯಾರ್ ಚಾರ್ಲ್ಸ್, ಜಾಕಾ ಕಿತೆಂಚ್ ಕಳಿತ್ ನಾತ್‌ಲ್ಲೆಂ, ಜಾಕಾ ತಾಚಿಂ ಇಂಗ್ಲಿಷ್ ಫಿಲ್ಮಾಂ ಆನಿ ಕಾದಂಬರಿಚಿಂ ಫಿಕ್ರ್ ಆನಿ ಮಾಹೆತ್ ಆಸ್‌ಲ್ಲಿ; ರಮೋನಾ, ಜೆಂ ಪ್ರವೇಸ್ ಜಾಲ್ಲೆಂ ಅರ್ಧ್ಯಾ ಅವಸ್ವರಾಂತ್ ಆನಿ ಮೆಥ್ಯು. ಪುಣ್ ಹ್ಯಾ ಅವಸ್ವಾರಾಚಿ ಕೊಣೆಂಯಿ ಫೊಡ್ಣಿಶಿ ಕೆಲಿ ತರ್ ಚವ್ಕಟಾಂತ್ ಬಸನಾತ್‌ಲ್ಲ್ಯೊ ಸಂಗ್ತಿ ಮತಿಕ್ ಯೆತ್ಯೊ. ಪುಣ್ ಹೆಂ ಸರ್ವ್ ಜೆರೊಮಾಚ್ಯಾ ಶಿಂತಿದಾಂತ್ ಠಿಕ್ಲೆಂ ನಾ. ಆನಿ ಮದೆಂ ಮದೆಂ ತಾಕಾ ನಿದಾವ್ನ್, ಕೊಫಿ ಬರವ್ನ್ ಮೆಥ್ಯುನ್ ತಾಕಾ ಕಸೊಯಿ ಭಾಯ್ರ್ ದಾಡ್‌ಲ್ಲೊ. ತ್ಯಾ ಉಪ್ರಾಂತ್ಲೆಂ ತಾಕಾ ಕಳಿತ್ ನಾತ್‌ಲ್ಲೆಂ.
ಫ್ರೆಡ್ ಟೇಯ್ಲರಾಚ್ಯಾ ಸಾತ್ವ್ಯಾ ಜಮಾತಿಕ್ ದೋನ್ಂಚ್ ದೀಸ್ ಆಸ್‌ಲ್ಲೆ ಆನಿ ತ್ಯಾ ಉಪ್ರಾಂತ್ ಕಿತೆಂ? ಚುನಾವ್ ಯೆಂವ್ಚಾರ್ ಆಸ್‌ಲ್ಲೊ. ಹೆರ್ ಕಿತೆಂ ಯೆಂವ್ಚಾರ್ ಆಸ್‌ಲ್ಲೆಂ. ಆಪ್ಲ್ಯಾ ಯೆದೊಳ್ಚ್ಯಾ ಜಮಾತಿಂನಿ ಟೇಯ್ಲರಾನ್ ಮೌರಿಸಾಚ್ಯಾ ರಾಜಕೀಯಾಚಿ ಯಾ ಪಾಡ್ತಿಚೊ ಉಲ್ಲೇಕ್ ಕೆಲ್ಲೊಚ್ ನಾ, ಜಮಾತಿಚ್ಯಾ ಖಂಚಾಯಿ ಮುಲ್ಯಾಂತ್ ಎಕ್ ಬ್ಯಾನ್ನರ್ ಜಾಂವ್, ಪೋಸ್ಟರ್ ಝಳ್ಕಾಲ್ಲೆಂ ನಾ.
ಕಾಂಯ್ ಹೊ ಟೇಯ್ಲರ್ ಬಲ್ತೊಚ್ ಕಸಲೊಗಿ ಎಜೆಂದಾ ಘೆವ್ನ್ ಆಯಿಲ್ಲೊ?
ಮೆಥ್ಯುಚ್ಯಾ ಬಂಗ್ಲ್ಯಾಥಾವ್ನ್ ಭಾಯ್ರ್ ಸರ್‌ಲ್ಲ್ಯಾ ಜೆರೊಮ್ ಲಾಜ್ರಾ ತಸಲೊ ಘುಸ್ಪಡಿತ್ ಮನಿಸ್ ತ್ಯೆ ಘಡಿಯೆ ಸಂಸಾರಾಂತ್ ಹೆರ್ ನಾತ್‌ಲ್ಲೊ.
ಆಪ್ಲ್ಯಾಚ್ ವಿಲಾಕ್ ಕಾರ್ ಚಲವ್ನ್ ತೊ ಕಸೊ ಆಯ್ಲೊ ಮ್ಹಲ್ಳೆಂ ತಾಕಾಚ್ ಕಳಿತ್ ನಾತ್‌ಲ್ಲೆಂ.
ಈವಾ ತಾಕಾ ರಾಕೊನ್ ನಾತ್‌ಲ್ಲೆಂ ಪೂನ್ ತೊ ಬಿತರ್ ಯೆತೆಚ್ ತಾಕಾ ಭೆಟ್ಲೆಂ.
‘ಥಕ್ಲ್ಯಾ ಆಸ್ತೊಲೊಯ್!’ ತಾಣೆ ಮ್ಹಳೆಂ, ಸಬಾವಿಕ್ಪಣಿ. ‘ಜಮಾತ್ ಬರಿಚ್ ಲಾಂಬ್ಲಿ ಆಸ್ತೆಲಿ ಆನಿ ತ್ಯಾ ಉಪ್ರಾಂತ್ಲಿ ಪುರಾಸಣ್…’
‘ಹಾಂವ್ ಮೆಥ್ಯುಚ್ಯಾ ಬಂಗ್ಲ್ಯಾಕ್ ಗೆಲ್ಲೊಂ,’ ಮ್ಹಳೆ ಜೆರೊಮಾನ್. ‘ವಿಶೆವ್ ಘೆಂವ್ಕ್.’ ಉಪ್ರಾಂತ್ ತಾನೆ ಕುಡ್ಸಿಲೆಂ, ಕಸಲೆಂಗಿ ಲಿಪಂವ್ಚೆಪರಿಂ. ‘ಮ್ಹಜಿ ಬರಿ ನೀದ್ ಜಾಲ್ಯಾ, ಸಕಾಳಿಂಚಿ ಕೊಫಿಯಿ ಜಾಲ್ಯಾ. ಎಕ್ ಬರೊ ನಾಸ್ಟೊ ಮ್ಹಾಕಾ ಜಾಯ್.’
‘ಜರೂರ್!’ ಉತ್ಸುಕತೇನ್ ಮ್ಹಳೆಂ ಈವಾನ್. ‘ಹ್ಯಾ ಜಮಾತಿಂತ್ ಸಕ್ರೀಯ್ ಪಾತ್ರ್ ಘೆವ್ನ್ ತುಜೊ ಜಿನೊಸ್ ಬರೊಚ್ಚ್ ಸುದ್ರಾಲಾ.’
‘ಆನಿ ತುಜೊ?’
‘ಹಾಂವ್ ಕಸಲೆಂ ಸುದಾರಣ್ ದಾಕಂವ್ಕ್ ಸಕ್ತಾಂ, ಜೆರೊಮ್?’ ಈವಾಚೊ ತಾಳೊ ಕಾಂಪ್ಲೊ. ‘ಭಿಗಡ್ಲ್ಯಾ ಉಪ್ರಾಂತ್ ಸುದ್ರೊಂಚೆಂ ಕಶೆಂ. ಕಿತೆಂಯಿ ಜಾಂವ್ ಆನಿ ದೋನ್ ದಿಸಾಂನಿ ರೆವರೆಂಡಾಚಿ ನಿಮಾಣಿ ಜಮಾತ್ ಯೆತಾ ನ್ಹಯ್? ಕಿತೆಂ ಪುಣಿ ಘಡ್ಚಾರ್ ಆಸಾ ಮ್ಹಣ್ ಮ್ಹಾಕಾ ಭೊಗ್ತಾ.’
ಜೆರೊಮಾನ್ ಜಾಪ್ ದಿಲಿ ನಾ.
ಬ್ರೇಕ್‌ಫಾಸ್ಟ್ ಟೇಬಲಾಚೆರ್ ತೊ ಶೂನ್ಯ್ ಜಿನೊಸ್ ಘೆವ್ನ್ ಬಸ್ಲೊ. ಆರ್‍ಶ್ಯಾಚ್ಯಾ ಕೆರಾಫಾಂತ್ ಆಸ್‌ಲ್ಲೊ ಫಳಾಂ ರೋಸ್ ಆಪ್ಣಾ ಸಾಮ್ಕಾರ್ ಆಸ್‌ಲ್ಲ್ಯಾ ಲಾಂಬ್ ತಾಂಬ್ಲೆರಾಂತ್ ವೊತ್ಲೊ. ದೋನ್ ಯಾತೀನ್ ಘೊಟ್ ಮಾರ್ತಾನಾ ಟೇಬಲಾರ್ ಆಸ್ಚೆಂ ಫೋನ್ ವ್ಹಾಜ್ಲೆಂ. ಜೆರೊಮಾನ್ ತೆಂ ವ್ಯಕ್ತ್ ನಿರ್ಗಮನಾನ್ ಉಟಯ್ಲೆಂ.
‘ಯೆಸ್.’
‘ಎಕ್ಲೊಚ್ ಆಸಾಯ್?’ ತೆವ್ಶಿಲ್ಯಾನ್ ತೆಲ್ಮಾಚೊ ತಾಳೊ ಆಯ್ಲೊ.
‘ಕಿತೆಂ ಜಾಲೆಂ?’
‘ಹಾಂವ್ ನೆಣಾಂ, ಯೆದೊಳ್ ಕಾಂಯ್ ಜಾಲ್ಲೆಂ ನಾ.’ ತೆಲ್ಮಾನ್ ಆಪ್ಲೊ ತಾಳೊ ತಗ್ಸಿಲೊ. ‘ಪುಣ್ ಕಿತೆಂ ತರಿ ಘಡ್ಚಾರ್ ಆಸಾ ಮ್ಹಣ್ ಮ್ಹಾಕಾ ಭೊಗ್ತಾ.’
‘ತುಜಿಂ ಭೊಗ್ಣಾಂ ಫಕತ್ ಬೆಡ್ಡಾರ್ ಉಸ್ಕಾಯ್, ಯು ಬ್ಲಡಿ ಬಿಚ್ಚ್! ಕಿತ್ಯಾಕ್ ಫೋನ್ ಕೆಲ್ಲೆಂಯ್?’ ಸಣ್ಸಣ್ಲೊ ಜೆರೊಮ್.
‘ಮೆಥ್ಯು ಲಿಯೊಚೆಂ ಫೋನ್ ಆಯಿಲ್ಲೆಂ!’
‘ಕಿತೆಂ?’ ತೊ ಹಾಂಕ್ರೆಲೊ ಹೆಣೆತೆಣೆ ಪಳೆವ್ನ್. ‘ಕಿತೆಂ ಜಾಯ್ ಖಂಯ್ ತಾಕಾ?’
‘ತುಂ ಪಾತ್ಯೆಂವ್ಚೊನಾಂಯ್, ಡಾರ್ಲಿಂಗ್!’ ನೆರಾಯ್ಲೆಂ ತೆಲ್ಮಾನ್.
‘ಚತ್ರಾಯ್!’ ಪುಸ್ಪುಸ್ಲೊ ಜೆರೊಮ್. ‘ನೆರಾಯ್ನಾಕಾ.’
‘ಮೆಥ್ಯುಕ್ ಖಾಸ್ಕೆನ್ ಟೇಯ್ಲರಾಕ್ ಭೆಟೊಂಕ್ ಜಾಯ್ ಖಂಯ್!’ ಹೆಂ ಆಯ್ಕೊನ್ ಜೆರೊಮಾಚೊ ಉಸ್ವಾಸ್ ‘ಗಕ್ಕ್’ ಕರುನ್ ರಾವ್ಲೊ. ‘ಕಿತೆಂ ಖಂಯ್?’
‘ತಾಕಾ ಟೇಯ್ಲರಾಕ್ ಖಾಸ್ಕೆನ್ ಭೆಟೊಂಕ್ ಜಾಯ್ ಖಂಯ್, ತುರ್ತಾನ್.’
‘ದೆಕುನ್ ತುಕಾ ಕಿತ್ಯಾಕ್ ಫೋನ್ ಕರಿಜೆ? ಸಿಸೇರೊ ನಾ?’
‘ಸಿಸೇರೊಕ್ ಸೊಡ್, ಡಾರ್ಲಿಂಗ್…. ರಮೋನಾ ನಾ?’
‘ಆಸಾ ಪುಣ್…’ ಜೆರೊಮ್ ಉತ್ರಾಂಕ್ ಸಾಸ್ಪಾಲೊ. ‘ಕೆದಳಾ?’
‘ಜಮಾತಿಚ್ಯಾ ಪಯ್ಲೆಂ ಖಂಯ್, ಮತ್ಲಬ್ ತುರ್ತಾನ್…’
‘ತುಂವೆಂ ಕಿತೆಂ ಮ್ಹಳೆಂಯ್?’
‘ರೆವರೆಂಡ್ ಖಾಸ್ಕೆನ್ ಕೊಣಾಯ್ಕೀ ಭೆಟಾನಾ ಮ್ಹಳೆಂ! ತಾಚ್ಯಾ ಪೊದೊರ್ನ್ ಮೌರಿಸ್ ಅಗುಸ್ತಿನಾಕ್ ಸಯ್ತ್‌ಯಿ ತೊ ಭೆಟೊಂಕ್ ನಾ, ಅಶೆಂ ಮ್ಹಳೆಂ…’
‘ತುಕಾ ತುಜೆಂ ವಾಟೆರ್ ಘಾಲ್ನ್ ಸವಯ್ ಜಾಲ್ಯಾ ಆನಿ ಆತಾಂ ಜೀಬ್‌ಯಿ ವಾಟೆರ್ ಘಾಲ್ತಾಯ್?’
‘ತವಳ್ ತೊ ಕಿತೆಂ ಮ್ಹಣಾಲೊ?’
‘ಆನಿ ಕಿತೆಂ ಮ್ಹಣ್ತೊಲೊ?’ ತೆಂ ತೆವ್ಶಿಲ್ಯಾನ್ ಹಾಸ್ಲೆಂ. ‘ಒಸಿಸಾಂತ್ ಆಮ್ಚಿ ಕರ್ತುಬಾಂ ಉಗ್ತಡಾಂತ್ ಹಾಡ್ತಾಂ ಮ್ಹಣಾಲೊ.’
‘ತಶೆಂ ಕರ್ತಾನಾ, ತಾಚೊ ಸಮಾಜಿಕ್ ದರ್ಜೊ ಖಂಯ್ ಉರತ್ ಖಂಯ್?’
‘ತಿ ತುಜಿ ಭ್ರಮಿದ್, ಜೆರೊಮ್ ಡಾರ್ಲಿಂಗ್?’ ತೆಲ್ಮಾನ್ ಮ್ಹಳೆಂ. ‘ತುಂ ಚಿಂತಾಯ್ ತುಜ್ಯಾ ಈವಾಕ್ ಆಸ್‌ಲ್ಲ್ಯಾ ಸರ್ವಾಂನಿ ಸ್ಕ್ರೂ ಘಾಲ್ಯಾತ್ ಆನಿ ತುಂ ವ್ಹಡ್ಲೊ ಮಾಡ್ತಿರ್ ಜಾಲಾಯ್ ಮ್ಹಣ್. ಕಸಲ್ಯೊ ರುಜ್ವಾತಿ ಆಸಾತ್ ತುಜೆ ಲಾಗಿಂ. ಪುಣ್ ತುಂವೆಂ ಒಸಿಸಾಂತ್ ಕೆಲ್ಲಿಂ ಕೋಂತ್ರಿಸಾಂ ಮೆಥ್ಯುಕ್ ಕಳಿತ್ ನಾಂತ್ ಮ್ಹಣ್ ತುಂ ಚಿಂತಾಯ್?’
‘ಮ್ಹಾಕಾ ಸಮಾಜಿಂತ್ ಕಸಲೊಚ್ಚ್ ದರ್ಜೊ ನಾ,’ ತಾಣೆ ಚತ್ರಾಯೆನ್ ತೆಲ್ಮಾಚೆಂ ನಾಂವ್ ಕಾಡ್ಲೆಂ ನಾ. ‘ಕಿತೆಂ ಕರ್ಚೆಂ ಮ್ಹಣ್ತಾಯ್?’
‘ಟೇಯ್ಲರಾಲಾಗಿಂ ಉಲಂವ್ಚೊ ಅವ್ಕಾಸ್ ಮೆಥ್ಯುಕ್ ದಿಂವ್ಚೊ!’
‘ಪರತ್ ಉಚಾರ್?’ ಜೆರೊಮಾನ್ ಮ್ಹಳೆಂ ಹೆಣೆತೆಣೆಂ ಪಳೆವ್ನ್. ಈವಾ ಆನಿಕಿ ಕಿಚನಾಂತ್ ಆಸ್‌ಲ್ಲೆಂ ಜಾಯ್ಜೆ.
ತೆಲ್ಮಾನ್ ಪರತ್ ಉಚಾರ್‍ಲೆಂ. ‘ಕಸಲ್ಯಾ ಫಾಯ್ದ್ಯಾಕ್?’
‘ತುಂ, ಆಮಾಲಾಚ್ಯಾ ಆನಿ ವೆಬಿಚಾರಾಚ್ಯಾ ಪಾತ್ರೊನ್ ಸಾಂತಾ, ಫ್ರೆಡ್ ಟೇಯ್ಲರಾಚ್ಯಾ ಜಮಾತಿಂ ವರ್ವಿಂ ಪೆಟ್ರೊಸ್ಟೇಟಾಂತ್ ಕಸಲಿ ಭುಂಯ್ಕಾಂಪ್, ಕಸಲೆ ಸಮಾಜಿಕ್ ಮುರ್‍ಮುರೆ ಉಟ್ಲ್ಯಾತ್ ಮ್ಹಣ್ ಜಾಣಾಂಯ್?’
‘ಪುಣ್ ತೊ ಎಕ್ ದಗಾಲ್ಭಾಜಿ-‘
‘ತೆಂ ಆಮಿ ಜಾಣಾಂವ್ ಪುಣ್ ಸಂಸಾರ್ ನೆಣಾಂ’ ಮ್ಹಳೆಂ ತೆಲ್ಮಾನ್.
‘ಪುಣ್ ರಿಚರ್ಡ್ ಆನಿ ಮೆಥ್ಯು ತಸಲ್ಯಾ ಶಾಣ್ಯಾಂಕ್ ಟೇಯ್ಲರಾಚೆ ದಗಾಲ್ಭಾಜ್‌ಪಣ್ ಯೆದೊಳ್‌ಚ್ ಕಳಿತ್ ಜಾಯ್ನಾಸ್ತಾಂ ಉರ್ಲಾಂ ಮ್ಹಣ್ತಾಯ್ ತುಂ?’
ತೆಲ್ಮಾ ಹಾಸ್ಲೆಂ. ‘ಹೆಲೀನಾ ಆನಿ ಲಿಲಿಯನಾಕ್ ಕಿತ್ಯಾಕ್ ಭಾಯ್ರ್ ದವರ್‍ಲೆಂಯ್ ತುಂವೆಂ? ತಿಂ ಕಿತೆಂ ಕಾಂಯ್ ಭೆಂಕ್ರಿಂ? ತಾಂಚೆ ಮತಿಂತ್ ಕಿತೆಂ ಸಿಜ್ತಾ ಮ್ಹಳ್ಳೆಂ ಆಮಿ ನೆಣಾಂವ್. ಮೌರಿಸ್ ಅಗುಸ್ತಿನಾಚೊ ಖೆಳ್ ಕಸಲೊ, ಒಸಿಸಾಂತ್ ರಿಚರ್ಡಾನ್ ಆಸಾ ಕೆಲ್ಲೊ ಟೆಂಡರ್ ಘೊಟಾಳೊ ಕಸಲೊ…. ಹೆಂ ಸರ್ವ್ ಆಮಿ ನ್ಹೆಣಾಂವ್. ಆಮ್ಚೊ ಮೆಲ್ಕಮ್ ಹೆಂ ಸರ್ವ್ ಸೊದುನ್ ಕಾಡುಂಕ್ ಸಕಾನಾಂ, ತಾಚಿ ಪತ್ತೇದಾರ್‍ಗಿ ಪಾವಾನಾ. ದೆಕುನ್ ಮೆಥ್ಯುಕ್ ಆನಿ ಟೇಯ್ಲರಾನ್ ಭೆಟಾಶೆಂ ಅವ್ಕಾಸ್ ರಚುನ್ ದೀಜೆ ಮ್ಹಣ್ಚೆಂ ಹಾಂವೆಂ. ತಾಂಚ್ಯಾ ಮುಲಾಕತೆಚೊ, ತಾಂಚೆ ಮದೆಂ ಚಲ್ಚ್ಯಾ ಉಲವ್ಣ್ಯಾಚೊ ಖಿಣಾನ್ ಖಿಣ್ ಆಮ್ಕಾಂ ಆಯ್ಕೊಂಕ್ ಜಾಯ್.’
‘ಮ್ಹಳ್ಯಾರ್-‘
‘ಮ್ಹಳ್ಯಾರ್ ತುಂವೆಂ ಬೀಚ್‌ಕೊಟೆಜಿಕ್ ನಮಿಯಾರ್‌ಲ್ಲ್ಯಾಂ ಥಾವ್ನ್ ಜಾಂವ್ಚಿ ವೆಚಿ ಕಾರ್ಯಾವಳ್ ಹಿ ನ್ಹಯ್. ಮೆಲ್ಕಮಾಕ್ ಸಬಾರ್ ಪಾವ್ಟಿಂ ಮೆಂದು ಆಸ್ತಾ ತಾಚ್ಯಾ ಜಾಂಗಾಂ ಮದೆಂ. ತುಂ ಕಾಂಯ್ ಉಣೊ ನ್ಹಯ್.’
‘ತರ್?’
‘ಮುಲಾಕತ್ ಹಾಂವ್ಂಚ್ ತಯಾರ್ ಕರ್ತಾಂ ಆನಿ ತಾಂತ್ರಿಕ್ ಪತ್ತೇದಾರ್‍ಪಣಾಂ ಹಾಂವ್ಂಚ್ ಪಳೆವ್ನ್ ಘೆತಾಂ.’
‘ಪುಣ್ ಆಮ್ಕಾಂ ಫಾಯ್ದೊ ಕಸಲೊ?’
‘ಅಸಲ್ಯಾ ಸವಲಾಂಕ್ ಆಮ್ಕಾಂ ಜಾಪ್ ಮೆಳ್ಳ್ಯಾ, ಜೆರೊಮ್?’ ತೆಲ್ಮಾಚ್ಯಾ ಸವಲಾಚಿ ಜಾಪ್ ಜೆರೊಮಾಲಾಗಿಂ ನಾತ್‌ಲ್ಲಿ. ‘ಮೆಥ್ಯುಚ್ಯಾ ಅವನತೆಕ್ ಆನಿ ರಿಚರ್ಡಾಚ್ಯಾ ಸಲ್ವಣೆ ಖಾತಿರ್ ತುಂವೆಂ ಇತ್ಲೆಂ ಸರ್ವ್ ಕೆಲೆಂಯ್ ಪುಣ್ ಜ್ಯಾರಿ ಜಾಲ್ಲೆ ತುಜೆ ಮಕ್ಸದ್ ದೋನ್ಂಚ್- ಮೆಥ್ಯುನ್ ಆನಿ ರಿಚರ್ಡಾನ್ ತುಜ್ಯಾ ಈವಾಕ್ ಸ್ಕ್ರೂ ಘಾಲಾ ಮ್ಹಣ್ ಪಾತ್ಯೆವ್ನ್ ತುಂ ತುಕಾಚ್ ದಣ್ಸಿತಾಯ್ ಆನಿ ಸುಖ್ ಭೊಗ್ತಾಯ್. ತುಜ್ಯಾ ತಸಲ್ಯಾಂ ಖಾತಿರ್‌ಚ್ ಫ್ರೆಡ್ ಟೇಯ್ಲರ್ ಹಾಂಗಾಸರ್ ಆಯ್ಲಾ ಮ್ಹಣ್ ಮ್ಹಾಕಾ ಭೊಗ್ತಾ.’
‘ಮತ್ಲಬ್ – ತೊ ಕಸಲ್ಯಾಗಿ ಉದ್ದೇಶಾನ್ ಪೆಟ್ರೋಸ್ಟೇಟಾಕ್ ಆಯ್ಲಾ? ಕಸಲ್ಯಾಗಿ ಸೊದ್ನೆರ್?’
‘ಜಾವ್ಯೆತ್ ಆಸಾ!’
‘ಆತಾಂ ತುಂ ಚಿಂತಾಯ್….ಹಿ ಮುಲಾಗತ್ ಜಾಯ್ಶೆ ತುಂ ಕರ್‍ತೆಲೆಂಯ್ ಮ್ಹಣ್?’
‘ಹಾಂವ್ ಚಿಂತಿನಾ, ಜೆರೊಮ್ ಡಾರ್ಲಿಂಗ್! ಹಾಂವ್ ಜಾಣಾಂ. ತುಂ ತುಜಿ ಬ್ರೇಕ್‌ಫಾಸ್ಟ್ ಕರ್ ಆನಿ ಒಸಿಸಾಕ್ ವಚ್.’
*********
ಮೆಥ್ಯುಚ್ಯಾ ಮುಕಮಳಾರ್ ಪುರಾಸಣೆಚೆ, ನೀದ್ ಖಳ್ಣೆಚೆ ಆನಿ ಮಾನಸಿಕ್ ತಾಂಡ್ ವೊಡಿಂಚೆ ಆಡ್ವೆ‌ಉಬೆ ಗಿಟ್ ದಿಸ್ತಾಲೆ. ಒಸಿಸಾಂತ್ ಸರ್ವ್ ಸ್ಟಾಫ್ ತಾತಾಂಚ್ಯಾ ಕಾಮಾಂ-ಸ್ಥಾನಾಂಚೆರ್ ಆಸ್‌ಲ್ಲೊ, ಹೆಲೀನಾಕ್ ಧರುನ್. ರಿಚರ್ಡ್ ತಾಚ್ಯಾ ಕೆಬಿನಾಂತ್ ಆನಿ ಜೆರೊಮ್ ತಾಚ್ಯಾ ಸದಾಂಚ್ಯಾ ಜಾಗ್ಯಾರ್. ಪುಣ್ ಮೆಥ್ಯು ಆನಿ ಜೆರೊಮ್ ಒಸಿಸಾಕ್ ವೇಳ್ ಚುಕೊನ್ ಪಾವ್‌ಲ್ಲೆ ಪುಣ್ ತಾಂಚೊ ವಿಚಾರ್ ಕರ್ತೆಲೆ ಕೋಣ್‌ಯಿ ನಾತ್‌ಲ್ಲೆ ಜಾಲ್ಲ್ಯಾನ್ ಒಸಿಸಾಂತ್ಲೊ ಮಾಮೂಲ್ ಎಕ್ ದೀಸ್ ಸುರು ಜಾಲ್ಲೆಪರಿಂ ಹೆರಾಂಕ್ ದಿಸ್ಲೆಂ.
ದನ್ಪಾರಾಂಚ್ಯಾ ಲಂಚ್ ಸುಟೆಚೊ ವೇಳ್ ಯೆತಾನಾ ತೆಲ್ಮಾ ಮೆಥ್ಯುಚ್ಯಾ ಸುಸಜ್ಜಿತ್ ಎಮ್.ಡಿ. ದಫ್ತರಾ ಭಾಯ್ರ್ ಹಾಜರ್ ಜಾಲೆಂ. ಕಸಲ್ಯಾಗಿ ವಾವ್ರಾಂತ್ ಮಗ್ನ್ ಆಸ್‌ಲ್ಲೆಂ ಹೆಲೀನಾ, ಎಕ್ ಪೆನ್ಸಿಲ್ ಆಪ್ಲ್ಯಾ ವೊಟಾಂ ಮದೆಂ ಧರುನ್ ಜವಾಬ್ದಾರೆಚೆ‌ಒ ಖುಣ್ ಪಾಚಾರುನ್ ಬಸುನ್ ಆಸ್‌ಲ್ಲೆಂ.
‘ಹಲ್ಲೊ, ಹೆಲೀನಾ!’ ತಾಣೆ ವಂದನ್ ಕೆಲೆಂ. ‘ಕಶೆಂ ಆಸಾಯ್?’
‘ಫಾಯ್ನ್!’ ಹೆಲೀನಾನ್ ತಾಚೆರ್ ದೀಷ್ಟ್ ಚರಯ್ಲಿ. ತೆಲ್ಮಾಚ್ಯಾ ನೆಸ್ಪಾಂತ್ ಕಸಲಿಚ್ ಬದ್ಲವಾಣ್ ನಾತ್‌ಲ್ಲಿ, ಉಗ್ತಡ್ ಚಿಕ್ಕೆಸೆ ಚಡ್‌ಚ್ ಆಸ್ಚೆಪರಿಂ ಹೆಲೀನಾಕ್ ದಿಸ್ಲೆಂ. ‘ಕಿತೆಂ ಜಾಯ್ ಆಸ್‌ಲ್ಲೆಂ?’
‘ಮ್ಹಾಕಾ ಮೆಥ್ಯು ಸರಾಕ್ ಪಾಂಚ್ ಮಿನುಟಾಂಚೆ ಆವ್ದೆಕ್ ಭೆಟೊಂಕ್ ಜಾಯ್ ಆಸ್‌ಲ್ಲೆಂ. ಮಾಮ್ಲೊ ಖಾಸ್ಕಿ ದೆಕುನ್ ಹಾಂವ್ ಲಂಚ್ ಟಾಯ್ಮಾರ್‌ಚ್ ಆಯ್ಲ್ಯಾಂ…. ಎಕ್ಸ್‌ಚೇಂಜಾರ್ ಜೆರೊಮ್ ಬಸ್ಲಾ.’
ಹೆಲೀನಾನ್ ಎಕ್ ಲಾಂಬ್ ಶ್ವಾಸ್ ಸೆವ್ಲೊ ಆನಿ ತಾಚೆಂ ತರ್ನೆ, ಸ್ಪಷ್ಟ್ ಹರ್ದೆಂ ಫುಲೊನ್ ಉಠ್ಲೆಂ. ತಾಣೆ ಮೆಥ್ಯುಚೆ ಇಂಟರ್‌ಕೊಮ್ ದಾಂಬ್ಲೆಂ ಆನಿ ಮೆಥ್ಯುನ್ ತೆಂ ಉಕಲ್ತಾನಾ, ‘ತೆಲ್ಮಾ ತುಕಾ ಭೆಟೊಂಕ್ ಆಯ್ಲಾಂ, ಸರ್!’
ಜಾಪ್ ಆಯ್ಕೊನ್ ತಾಣೆ ರಿಸೀವರ್ ಪಾಟಿಂ ದವರ್‍ಲೆಂ. ‘ತುಂವೆಂ ಬಿತರ್ ವಚ್ಯೆತ್, ತೆಲ್ಮಾ….’ ತೆಲ್ಮಾ ಬಿತರ್ ವಚುಂಕ್ ಘುಂವ್ತಾನಾ ತಾಣೆ ಕುಡ್ಸಿಲೆಂ. ‘ಆನಿ ಸಾತ್ ದಿಸಾಂನಿ ನಿಮಾಣಿ ಜಮಾತ್ ಜಮ್ತಾ ನ್ಹಯ್?’
ಹೆಂ ಸವಾಲ್ ಆಯ್ಕೊನ್ ತೆಲ್ಮಾಚ್ಯಾ ಮುಕಮಳಾಚೊ ಛಾರೊ ಎಕ್ ಕರ್ಲ್‌ಭರ್ ಧೊವ್ಸಾಲೊ.
‘ಪುಣ್ ತುಕಾ ಜಮಾತಿಂತ್ ಕಸಲಿಚ್ ಉರ್ಬಾ-ಆತುರಾಯ್ ಆಸ್ಚೆಪರಿಂ ಮ್ಹಾಕಾ ದಿಸನಾ.’
‘ದಿಸ್ಚೆಂ ಸರ್ವ್ ಖರೆಂ ಜಾಯ್ಜೆ ಮ್ಹಣ್ ನಾ, ತೆಲ್ಮಾ!’ ಜಾಪ್ ದಿಲಿ ಹೆಲೀನಾನ್. ‘You may proceed. ಪುಣ್ ಚಡ್ ವೇಳ್ ಘೆನಾಕಾ, ಮೆಥ್ಯು ಸರಾ-ಕ್ ಪುರಾಸಣ್ ಯೆದೊಳ್‌ಚ್ ಜಾಲ್ಲೆಪರಿಂ ದಿಸ್ತಾ….’
‘ಮ್ಹಾಕಾಯಿ ದಿಸ್ತಾ!’ ಖಡ್ಪಾಯೆನ್ ಜಾಪ್ ದಿಲಿ ತೆಲ್ಮಾನ್.
ತೆಂ ಬಿತರ್ ವೆತೆಚ್ ಆಪ್ಲ್ಯಾ ಗೊವೆತಾಂತ್ಲೆಂ ಲಂಚ್ ಕುಪನ್ ಕಾಡುನ್ ತೆಂ ಕೆಫೇಟೇರಿಯಾಚೆ ಕುಶಿನ್ ಮೆಟಾಂ ಕಾಡಿಲಾಗ್ಲೆಂ. ಹರ್ಯೆಕ್ ಪಾವ್ಟಿಂ ತೆಂ ಕುಪನ್ ಪಿಂಜ್ತಾನಾ ತಾಕಾ ರಿಚರ್ಡಾಚೊ ಉಡಾಸ್ ಯೆತಾಲೊ. ಸಬಾರ್ ದಿಸ್ ಜಾಲ್ಲೆ ತಾಚೆ ಲಾಗಿಂ ಉಲಯ್‌ನಾಸ್ತಾಂ. ಸದಾಂಚ್ ತಿಂ ಒಸಿಸಾಂತ್ ಮೆಳ್ತಾಲಿಂ ಪುಣ್ ವಯ್ವಾಟಿ ಮುಲಾಕತ್ಯೊ ಮಾತ್ರ್ ತ್ಯೊ. ತೊ ಟೇಯ್ಲರ್ ಆಯ್ಲ್ಯಾ ಉಪ್ರಾಂತ್ ಪೆಟ್ರೊಸ್ಟೇಟಾಚೆರ್ ಕೊಣೆಂಗಿ ಆರ್ಶಾಚಿ ಮಾಲ್ತಿ ವೊಮ್ತಿ ಘಾಲ್ಲೆಪರಿಂ ಜಾಲ್ಲೆಂ.
ಮೆಥ್ಯುಚ್ಯಾ ದಫ್ತರಾಂತ್ ರಿಗ್‌ಲ್ಲ್ಯಾ ತೆಲ್ಮಾಚೆರ್ ಮೆಥ್ಯುಚಿ ದೀಷ್ಟ್ ಬಾರ್‍ಕಾಯೆನ್ ಚರ್‍ಲಿ ತರಿ ತ್ಯೆ ದಿಷ್ಟಿಂತ್ ಕಸಲಿಂಚ್ ಭೊಗ್ಣಾಂ ನಾತ್‌ಲ್ಲಿಂ. ತೆಲ್ಮಾನ್ ತಾಕಾ ವಂದನ್ ಕೆಲೆಂ. ಮೆಥ್ಯು ತಾಕಾ ‘ಬೊಸ್’ ಮ್ಹಣ್ ಇಸಾರೊ ದಿಲೊ. ಆಪ್ಲೊ ಟಾಯ್ಟ್ ಮಿನಿಸ್ಕರ್ಟ್ ಕಾಂಯ್ ದೋನ್ ಮಿಲ್ಲಿಮೀಟರ್ ಲಾಂಬ್ ಕರ್ಚೆಂ ಪ್ರೇತನ್ ಕರುನ್ ತೆಂ ಬಸ್ಲೆಂ; ಹೆಂ ಪಳೆಯಿಲ್ಲ್ಯಾ ಮೆಥ್ಯುಚ್ಯಾ ವೊಂಟಾಂ-ಇಡ್ಯಾಂನಿ ಖಿಣ್‌ಭರ್ ಹಾಸೊ ಉದೆಲೊ. ತೆಲಾಕ್ ಆಪುಣ್ ಧನ್ಯ್ ಕಶೆಂ ಭೊಗ್ಲೆಂ.
‘ಕಿತೆಂ ಜಾಲೆಂ?’ ವಿಚಾರ್‍ಲೆಂ ಮೆಥ್ಯುನ್.
‘ತುಜೆಂ ಕಾಮ್ ಜಾತೆಲೆಂ.’
‘ಹಾಂವೆಂ ಕೊಣಾಯ್ಚೊ ಗಳೊ ಚಿರ್ಡುಂಕ್ ಸಾಂಗೊಂಕ್ ನಾ.’
‘ಜಾಯ್ ತರ್, ತೆಂ ಕಾಮ್ ಕರುಂಕ್‌ಯಿ ಆಮಿ ತಯಾರ್ ಆಸಾಂವ್… ಹೆಂ ತುಂ ಜಾಣಾಂಯ್ ಸರ್. ಪುಣ್ ಕಿತ್ಯಾಕ್ ಹಿ ಅವ್ಚಿತ್ ಆತುರಾಯ್, ಫ್ರೆಡ್ ಟೇಯ್ಲರಾಚೆರ್?’
‘ತುಕಾ ಸವಲಾಂ ಕರ್ಚೆಂ ಕಸಲೆಂಚ್ ಹಕ್ಕ್ ನಾ ಪುಣ್ ಸನ್ನಿವೆಶಾಂಕ್ ಲಾಗುನ್, ರಿಚರ್ಡಾಚ್ಯಾ ಟೆಂಡರ್ ಪ್ರಕರಣಾಕ್ ಲಾಗುನ್ ಹಾಂವೆ ಸಾದರ್ ಕೆಲ್ಲ್ಯಾ ಸಬಾರ್ ಘಡಿತಾಂ ವರ್ವಿಂ ಹೆಂ ಹಕ್ಕ್ ತುಕಾ ಆಯ್ಲಾಂ ಮ್ಹಣ್ ಹಾಂವ್ ಪಾತ್ಯೆತಾಂ.’
‘ಹಾಂವ್ ಧನ್ಯ್ ಜಾಲಿಂ, ಸರ್!’ ಮ್ಹಣಾಲೆಂ ತೆಲ್ಮಾ ಮುಕಾರ್ ಭಾಗ್ವೊನ್. ತಾಚಿಂ ಸ್ಥನಾಂ ಮೆಥ್ಯುಚ್ಯಾ ಮೆಜಾಕ್ ಲಾಗ್ಲಿಂ. ‘ಪುಣ್ ಹಾಂವ್ ಘಾತ್ಕಿಣ್ ನ್ಹಯ್.’
‘ತೆಂ ಹಾಂವ್ ಜಾಣಾಂ!’ ಮ್ಹಳೆಂ ಮೆಥ್ಯುನ್. ‘ತುಮಿ ದಗಾಲ್ಭಾಝಿ ವ್ಹಯ್ ಪುಣ್ ಘಾತ್ಕಿಣ್ ಜಾಶ್ಯಾತ್ ತರ್ ಲಿಪೊನ್ ರಾವೊಂಕ್ ತುಮ್ಕಾಂ ಖಂಚೇಂಯಿ ಬೀಳ್ ಮೆಳಾಶೆಂ ನಾ. ಹಾಂವ್ ಆತಾಂಯಿ ಒಸಿಸಾಚೊ ರಿಂಗ್‌ಮಾಸ್ಟರ್ ಆನಿ ಒಸಿಸ್ ಮ್ಹಜೆಂ ಮೃಗಾಲಯ್.’
ದಾಟ್ ಮೊನೆಪಣ್.
‘ಸರ್, ದೆವಾಧೀನ್ ಲೀಜಾ ಮೆಡಮಾ ಖಾತಿರ್ ತುಂ ಕಿತೆಂಯಿ ಕರುಂಕ್ ತಯಾರ್ ಆಸಾಯ್ ಮ್ಹಳ್ಳೆಂ ಆಮಿ ಜಾಣಾಂವ್.’
‘ತಿಂ ಸಿಂತಿಮೆಂತಾಂ ತುಮಿ ತುಮ್ಚ್ಯಾಚ್ ಫಾಯ್ದ್ಯಾಕ್ ವಾಪಾರ್ಚಿಂ ನ್ಹಯ್!’ ಮ್ಹಳೆಂ ಮೆಥ್ಯುನ್. ‘ಜೆರೊಮಾಕ್ ಹೊ ವಿಶಯ್ ಕಳಿತ್ ಆಸಾ?’
‘ಆಸುಂಕ್‌ಚ್ ಜಾಯ್ ಆನಿ ಆತಾಂ ಟೇಯ್ಲರಾಚ್ಯಾ ಸಿಸೇರೊಕ್‌ಯಿ ಕಳಿತ್ ಜಾಲಾಂ.’
‘ಪುಣ್ ಭಾಯ್ಲ್ಯಾ ಸಂಸಾರಾಕ್ ಕಳಿತ್ ಜಾಂವ್ಕ್ ನಜೊ!’ ಮೆಥ್ಯುಚಿ ದೀಷ್ಟ್ ಪಯ್ಶಿಲ್ಯಾನ್ ದಿಸ್ಚ್ಯಾ ಫ್ಲೇರ್‌ಸ್ಟಾಕ್ಸಾಂಚೆರ್ ಪಡ್ಲಿ. ‘ಮ್ಹಜೊ ಎಕ್ ಉದ್ದೇಶ್ ಆಸಾ, ಮಕ್ಸದ್ ಆಸಾ, ಮ್ಹಜ್ಯಾ ಲೀಜಾಚ್ಯಾ ಖುನಿಗಾರಾಕ್ ಪಳೆಂವ್ಚೊ. ರಿಚರ್ಡ್ ಕ್ಲೆಮೆಂಟ್ ತ್ಯಾ ಖುಗಾರಾಚೊ ಪುತ್ ಮ್ಹಳ್ಳೊ ಸುರಾಗ್ ಜೆರೊಮಾನ್ ಮ್ಹಾಕಾ ದಿಲಾ. ಪುಣ್ ಮ್ಹಾಕಾ ಶಿಮ್ಟಿ ನಾಕಾ, ತೆಲ್ಮಾ, ಮ್ಹಾಕಾ ಸಗ್ಳೊಚ್ ಪಾಡೊ ಜಾಯ್.’
‘ಆನಿ ಟೇಯ್ಲರ್ ಕಾಂಯ್ ಮಜತ್ ಕರುಂಕ್ ಸಕ್ತಾ ಮ್ಹಣ್ ತುಂ ಚಿಂತಾಯ್?’
‘ತೊ ದೇವ್ ಮನಿಸ್ ನ್ಹಯ್?’ ಮೆಥ್ಯು ಕುಸ್ಕುಟ್ ಹಾಸ್ಲೊ. ‘ತಾಚೆಥಾವ್ನ್ ಜೆರೊಮಾಥಂಯ್ ಅಜಾಪಾಂ-ನವಾಲಾಂ ಜಾತಿತ್ ತರ್, ಮ್ಹಜೆಥಂಯ್ ಕಿತ್ಯಾಕ್ ನಜೊ? ಆತಾಂ ವಿವರ್ ದೀ?’
‘ಮುಲಾಗಾತ್ ಆಯ್ಚೆ ರಾತಿಚ್ ಜಾತೆಲಿ, ಸರ್, ತಸಲಿ ವಿಲೆವಾರಿ ಹಾಂವೆಂ ಕೆಲ್ಯಾ!’ ತೆಲ್ಮಾಥಾವ್ನ್ ಹೆಂ ಆಯ್ಕೊನ್ ಮೆಥ್ಯುಚ್ಯಾ ಉಜ್ವ್ಯಾ ದೊಳ್ಯಾಚಿ ಭಂವ್ರಿ ದೊಣ್ವಾಪರಿಂ ದೊಡ್ಲಿ.
‘ತುಂವೆಂ?’ ಮೆಥ್ಯುನ್ ವಿಚಾರ್‍ಲೆ. ‘ಖಂಯ್?’
‘ತುಜ್ಯಾಚ್ ಬೀಚ್‌ಕೊಟೆಜಿಂತ್.’
‘ಮುಂದರ್‍ಸಿ!’
‘ತುಜಿ ಕಸಲಿಚ್ ಸೆಕ್ಯೂರಿಟಿ ಥಂಯ್ಸರ್ ಆಸುಂಕ್ ನಜೊ!’ ಶರ್ಥಾಂ ಮುಕಾರ್ ದವರ್‍ಲಿಂ ತೆಲ್ಮಾನ್. ‘ವೇಳ್ ರಾತಿಚಿಂ ಧಾ ವೊರಾಂ. ರೆವೆರೆಂಡ್ ಟೇಯ್ಲರಾಕ್ ಜೆರೊಮ್ ಆನಿ ಸಿಸೇರೊ ಎಕಾ ಮಾಮೂಲಿ ಕಾರಾಂತ್ ಹಾಡುನ್ ಯೆತೆಲೆ. ಹೆಂ ಘಡ್ಚ್ಯಾ ಎಕಾ ಘಂಟ್ಯಾ ಫುಡೆಂ ತುಜ್ಯಾ ಸೆಕ್ಯೂರಿಟಿನ್ ಬೀಚ್‌ಕೊಟೇಜ್ ಖಾಲಿ ಕರಿಜೆ ಆನಿ ಟೇಯ್ಲರಾಚ್ಯಾ ಸೆಕ್ಯೂರಿಟಿ ಮಾನಯಾಂಕ್ ತಾಂಚೆಂ ಕಾಮ್ ಕರುಂಕ್ ಸೊಡಿಜೆ.’
‘ಮುಲಾಕತೆ ವೆಳಾರ್ ಜೆರೊಮ್ ಆನಿ ಸಿಸೇರೊ ಹಾಜರ್ ಆಸ್ತೆಲೆ?’
‘ಕೋಣ್ಂಚ್ ಹಾಜರ್ ಆಸ್ಚೆನಾಂತ್!’ ತಕ್ಷಣ್ ಜಾಪ್ ದಿಲಿ ತೆಲ್ಮಾನ್. ‘ಫಕತ್ ತುಂ ಆನಿ ರೆವರೆಂಡ್.’
‘ಪುಣ್ ತುಮಿ ಆಮ್ಚಿ ಮುಲಾಕಾತ್ ಆನಿ ಸಂಭಾಷಣ್ ರೆಕೊರ್ಡ್ ಕರ್‍ತೆಲ್ಯಾತ್!’
ತೆಲ್ಮಾ ಹಾಸ್ಲೆಂ. ‘ಸರ್, ಆಮ್ಚೊ ರೆವರೆಂಡ್ ಅಂತರಾಷ್ಟ್ರೀಯ್ ಖ್ಯಾತೆಚೊ Faith Healer. ತಾಕಾ ತಾಚಿ ಭದ್ರತಿ ಗರ್ಜ್.’
‘ಸಾಂಗ್ ಮ್ಹಾಕಾ, ತೆಲ್ಮಾ,’ ಮ್ಹಳೆಂ ಮೆಥ್ಯುನ್. ‘ತುಕಾ ಕೆದಳಾ ತರಿ ಹೊ ತುಜೊ ರೆವರೆಂಡ್ ಅಟ್ಟಾಂಗ್ ದಗಾಲ್ಭಾಜಿ ಮ್ಹಣ್ ಭೊಗ್‌ಲ್ಲೆಂ ಆಸಾ?’
ತೆಲ್ಮಾ ಹಾಸ್ಲೆಂ. ‘ಸಗ್ಳೊ ಸಂಸಾರ್‌ಚ್ ಅಟ್ಟಾಂಗ್ ದಗಾಲ್ಭಾಜಿ ತರ್, ಸರ್, ರೆವೆರೆಂಡ್ ಕಿತ್ಯಾಕ್ ಭಾಯ್ಲೊ?’
‘Well said!’ ಮ್ಹಳೆಂ ಮೆಥ್ಯುನ್. ‘ಹಾಂವೆಂ ಕಿತೆಂ ಕರುಂಕ್ ಆಸಾ?’
‘ಜುಸ್ತ್ ಸಾಡೆ-ನೋವ್ ಘಂಟ್ಯಾರ್ ತುಂವೆಂ ಬೀಚ್‌ಕೊಟೇಜಿಂತ್ ಹಾಜರ್ ಆಸಾಜೆ. ತುಜೆಂ ಪೊಶ್ ಕಾರ್ ನಾಕಾ, ಎಕಾ ಜಪಾನೀಸ್ ಕಾರಾರ್ ಆಯ್ಲ್ಯಾರ್ ಬರೆಂ. ಕಸಲೆಂಚ್ ಆಯ್ದ್-ಹಾತೆರ್ ತುಜೆಲಾಗಿಂ ಆಸುಂಕ್ ನಜೊ.’
‘ತಶೆ ತರ್ ಮ್ಹಜಿ ಭದ್ರತಿ ಕೋಣ್ ಪಳೆವ್ನ್ ಘೆತಾ?’
‘ಅಸಲ್ಯಾ ಮುಲಾಕತೆಕ್ ತಯಾರ್ ಆಸ್‌ಲ್ಲ್ಯಾ ತುಕಾ ಕಸಲ್ಯಾಯಿ ಸೆಕ್ಯೂರಿಟಿಚಿ ಗರ್ಜ್ ಆಸ್ಚಿ ಆಮ್ಕಾಂ ದಿಸನಾ.’
‘ತುಂವೆಂ ವಚ್ಯೆತ್, ತೆಲ್ಮಾ!’
ಕೊಂಡ್ಲೆಂ ಕರುನ್ ಬಾಸ್ಕೆಟಿಂತ್ ಬಸುನ್ ಆಸ್‌ಲ್ಲಿ ನಾಗಿಣ್ ಪುಂಗಿಚ್ಯಾ ನಾದಾಕ್ ಉಟ್ಚೆಪರಿಂ ಉಟ್ಲೆಂ ಆನಿ ಮೆಥ್ಯುಕ್ ಎಕ್ ಮಾರ್ಮಿಕ್ ಹಾಸೊ ದೀವ್ನ್ ಭಾಯ್ರ್ ಗೆಲೆಂ.
ತೆಂ ದಿಷ್ಟಿ ಭಾಯ್ರ್ ವೆತೆಚ್ ಮೆಥ್ಯುನ್ ಆಪ್ಲಿ ಖಾಸ್ಕಿ ಫೋನ್‌ಲಾಯ್ನ್ (ಇಂಟರ್‌ಕೊಮ್ ನ್ಹಯ್) ಉಕ್ಲೊನ್ ಎಕಾ ಡಾಯ್ರೆಕ್ಟ್ ನಂಬ್ರಾಕ್ ಫೋನ್ ಕೆಲೆಂ.
(ಅವಸ್ವರ್ – 87 – ಂತ್ ಮುಂದರ್‍ತಾ)
