ಪೊಯೆಟಿಕ್ಸ್’ ಕವಿಂಚ್ಯಾ ವಾಟ್ಸಾಪ್ ಪಂಗ್ಡಾನ್ ಮಾಂಡುನ್ ಹಾಡ್ಲ್ಲ್ಯಾ ಪೊಯೆಟಿಕ್ಸ್ ಕವಿತಾ ಸ್ಪರ್ಧೊ – 2017 ಹಾಚೆಂ ಫಳಿತಾಂಶ್ ಜಾಹೀರ್ ಜಾಲಾಂ ಆಸೊನ್, ಜೊಮೆಲ್, ಬೊಂದೆಲ್ ಹಾಚ್ಯಾ ಮರ್ತಲ್ಯಾಚಿ ಪ್ರಾಯ್ ಕವಿತೆಕ್ ರುಪಯ್ ಪಾಂಚ್ ಹಜಾರ್ ರುಪ್ಯಾಂಚೆಂ ಪಯ್ಲೆಂ ಇನಾಮ್ ಫಾವೊ ಜಾಲಾಂ ತರ್, ರೋಶು, ಬಜ್ಪೆ ಹಾಚ್ಯಾ ತೀಂತ್ ಆನಿ ರಗತ್ ಕವಿತೆಕ್ ರುಪಯ್ ತೀನ್ ಹಜಾರ್ ರುಪ್ಯಾಂಚೆಂ ದುಸ್ರೆಂ ಇನಾಮ್ ಲಾಭ್ಲಾಂ. ಜೋನ್, ಸುಂಟಿಕೊಪ್ಪ ಹಾಚ್ಯಾ ಮೊಡ್ಯಾತಪಾಸ್ಣಿ ಕವಿತೆನ್ ರುಪಯ್ ದೋನ್ ಹಜಾರ್ ರುಪ್ಯಾಂಚೆಂ ತಿಸ್ರೆಂ ಇನಾಮ್ ಆಪ್ಣಾಯ್ಲಾಂ.
ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ ಹಾಚ್ಯಾ ಕವಿತಾ ಜಾಯ್ನಾತ್ಲಲಿಂ ಉತ್ರಾಂ ಆನಿ ರೋಹನ್ ಅಡ್ಕಬಾರೆ ಹಾಚ್ಯಾ ಅತ್ಯಾಚಾರ್ ಕವಿತೆಂಕ್ ತಲಾ ರುಪಯ್ ಏಕ್ ಹಜಾರಾಚಿಂ ಭುಜಾವಣೆಂಚಿಂ ಇನಾಮಾಂ ಫಾವೊ ಜಾಲ್ಯಾಂತ್.
ಪೊಯೆಟಿಕ್ಸ್ ಪಂಗ್ಡಾನ್ ಹೊ ಸ್ಪರ್ಧೊ ಮಾಂಡುನ್ ಹಾಡ್ಲ್ಲೊ ತರ್ಯೀ ಕೊಣಾಕ್ಯೀ ಹಾಂತುಂ ವಾಂಟೊ ಘೆಂವ್ಚೊ ಉಗ್ತೊ ಆವ್ಕಾಸ್ ಆಸ್ಲ್ಲೊ. ನವ್ಯಾನ್ ಬರಯ್ತಲ್ಯಾಂಚಿಂ ತಾಲೆಂತಾಂ ಒಳ್ಕೊಂಚೊ ಹ್ಯಾ ಸ್ಪರ್ಧ್ಯಾಚೊ ಉದ್ದೇಶ್ ಆಸ್ಲ್ಲೊ. ಆನಿ ಹಾಕಾ ಪೂರಕ್ ಜಾವ್ನ್ ಲಾಗಿಂ ಲಾಗಿಂ ಸಾಟ್ ಸ್ಪರ್ಧಿಕಾಂನಿ ವಾಂಟೊ ಘೆವ್ನ್ ಹೊ ಸ್ಪರ್ಧೊ ಯಶಸ್ವಿ ಕೆಲಾ ಮ್ಹಣ್ ಪೊಯೆಟಿಕ್ಸ್ ಎಡ್ಮಿನ್ ತಶೆಂ ಸಂಪಾದಕ್ ವಿಲ್ಸನ್, ಕಟೀಲ್ ಹಾಣೆ ಕಳಯ್ಲಾಂ. ಹ್ಯಾ ಸ್ಪರ್ಧ್ಯಾಂತ್ ವಾಂಟೊ ಘೆತ್ಲ್ಲ್ಯಾಂಕ್ ಸಾಂಗಾತಾ ಘೆವ್ನ್ ಕವಿತೆವಿಶಿಂ ಜಾಣ್ವಾಯ್ ದಿಂವ್ಚಿ, ಕವಿಗೋಶ್ಟಿ ಚಲವ್ನ್ ವ್ಹರ್ಚಿ ಯೆವ್ಜಣ್ ಆಸಾ ಮ್ಹಣ್ ಯೀ ತಾಣೆ ಕಳಯ್ಲಾಂ.
ಹ್ಯಾ ಸ್ಪರ್ಧ್ಯಾಚೆ ವರಯ್ಣಾರ್ ಜಾವ್ನ್ ಕವಿತಾ ಟ್ರಸ್ಟಾಚೊ ಸ್ಥಾಪಕ್ ತಶೆಂ ಕವಿತಾ ಡೊಟ್ ಕೊಮ್ ಸಂಪಾದಕ್ ಮೆಲ್ವಿನ್ ರೊಡ್ರಿಗಸ್, ಕವಿ ಆಂಡ್ರ್ಯೂ ಎಲ್. ಡಿ’ ಕುನ್ಹಾ ಆನಿ ವಿಮರ್ಶಕ್ ತಶೆಂ ಕಿಟಾಳ್ ಸಂಪಾದಕ್ ಎಚ್ಚೆಮ್, ಪೆರ್ನಾಲ್ ಹಾಣಿ ವರವ್ಣಿ ಕೆಲ್ಲಿ. ವರಯ್ಣಾರಾಂ ತರ್ಫೆನ್ ಆಂಡ್ರ್ಯೂ ಎಲ್. ಡಿ ಕುನ್ಹಾ ಹಾಚಿ ಅಭಿಪ್ರಾಯ್ ಹಾಂಗಾಸರ್ ದಿಲ್ಯಾ.
ಇನಾಮಾಂ ವಾಂಟ್ಚೆಂ ಕಾರ್ಯೆಂ, ದಶಂಬರಾಚ್ಯಾ 17 ತಾರಿಕೆರ್ ಮಂಗ್ಳುರಾಂತ್ ಜಾಂವ್ಕ್ ಆಸ್ಚ್ಯಾ “ಆರ್ಸೊ ವಿಶೇಸ್ ಅಂಕೊ’ ಲೊಕಾರ್ಪಣಾಸಂದರ್ಭಾರ್ ಆಸ್ತಲೆಂ ಮ್ಹಣ್ ಎಡ್ಮಿನ್/ ಸಂಪಾದಕ್ ವಿಲ್ಸನ್ ಕಟೀಲ್ ಹಾಣೆ ಕಳಯ್ಲಾಂ.
ಕವಿತೆಂಕ್ ಪಾಕಾಟೆ ಜಾಯ್ !
ಪೊಯೆಟಿಕ್ಸ್ ಸ್ಪರ್ದ್ಯಾಂತ್ ಭಾಗ್ ಘೆತಲ್ಲ್ಯಾ ಕವಿಂಚಿಂ ಪನ್ನಾಸಾಂವರ್ನಿ ಚಡಿತ್ ಕವಿತಾಂ ವಾಚ್ತಾನಾ, ಕೊಂಕ್ಣಿ ಕವಿತಾ ಉಂಚಾಯೆಕ್ ಪಾವಂವ್ಚ್ಯಾ ಮಿಸಾಂವಾಂತ್ ಕವಿಂಚಿ ಉಮೆದ್ ಪಳೆವ್ನ್ ಸಂತೊಸ್ ಭೊಗ್ಲೊ. ಕವಿತೆಂನಿ ಬರೆ ವಿಷಯ್ ಆಸಲ್ಲೆ ಆನಿ ಚಡಾವತ್ ಕವಿತಾ ಸಮಕಾಲೀನ್ ಜಿಣ್ಯೆ ಭೊಂವ್ತಿಚ್ ಆಸಲ್ಲೆ. ಕವಿನ್ ಅಪ್ಲ್ಯಾ ಬೊಂವ್ತಣಿ ಘಡ್ಚ್ಯಾ ಸಂಗ್ತಿ ಥಂಯ್ ಬಾರಿಕ್ಷಾಣೆನ್ ಗುಮಾನ್ ದಿತಾ. ತೀಕ್ಷ್ಣ್ ಆನಿ ತೀವ್ ರಿತಿನ್ ತೊ ಪ್ರತಿಕ್ರಿಯಾ ದಿತಾ. ಹಿ ಪ್ರತಿಕ್ರಿಯಾ ದಿತಾನಾ ಆಪ್ಲಿ ಭಾಸ್ ಅತೀ ಊಂಚ್ ರಿತಿನ್ ವಾಪಾರ್ತಾ. ಎಕಾ ಬರ್ಯಾ ಕವಿತೆಕ್ ಅನ್ಭೊಗ್, ಪ್ರತಿಕ್ರಿಯಾ ಆನಿ ಭಾಸ್ ಹ್ಯೊ ತೀನ್ ಸಂಗ್ತಿ ಜಾಯ್ಜೆಚ್. ನಾ ತರ್ ಕವಿತಾ ಅಸ್ಕತ್ ಜಾತಾ.
ಸ್ಪರ್ದ್ಯಾಕ್ ಕವಿತಾ ಧಾಡ್ಚ್ಯಾ ಕವಿಂನಿ ಆಪ್ಲ್ಯಾಚ್ ಕವಿತೆಚೊ ಪಯ್ಲೊ ತೀರ್ಪ್ದಾರ್ ಜಾಂವ್ಕ್ ಜಾಯ್. ಹ್ಯಾ ಖಾತಿರ್ ಹೆರ್ ಉಂಚ್ಲ್ಯಾ ಮಟ್ಟಾಚ್ಯಾ ಕವಿತೆ ಸಂಗಿಂ ಆಪ್ಲಿ ಕವಿತಾ ತುಲನ್ ಕರುಂಕ್ ಜಾಯ್. ಖಂಚ್ಯಾಯ್ ಭಾಶೆಂತ್ಲ್ಯೊ ಉಂಚ್ಲ್ಯೊ ಕವಿತಾ ವಾಚ್ಲ್ಯಾರ್ ಆನಿ ತಾಂತ್ಲೊ ರಸ್ ಭೊಗ್ಲ್ಯಾರ್ ಹೆಂ ಸಾಧ್ಯ್ ಆಸಾ.
ಚಡ್ತಾವ್ ಕವಿತೆಂನಿ ಅನ್ಭೊಗಾಚೆಂ ಆನಿ ವಿಶಯಾಚೆ ವಿವರಣ್ ಚಡ್ ದಿಸ್ಲೆಂ ಆನಿ ಕಾವ್ಯಾರಸಚಿ ಸುಕಿದಾಡ್ ದಿಸ್ಲಿ. ಆಪ್ಣಾಕ್ ಮೆಳಲ್ಲೊ ಅನ್ಭೊಗ್ ಎಕಾ ಕವಿ ಭಿತರ್ ರುಪಾಂತರ್ ಜಾವ್ನ್ ಏಕ್ ನವೆಂ ರಚನ್ ಕವಿನ್ ದಿತಾನಾ ಕಾವ್ಯ ರಸಿಕಾಕ್ ಕಿತೆಂಗಿ ನವೆಂಚ್ ಭೊಗಲ್ಲೊ ಸುಖಾಳ್ ಅನ್ಭೊಗ್ ಲಾಬ್ತಾ. ಕವಿನ್ ದಿಂವ್ಚೊ ಹೊ ’ನವೊ’ ಅನ್ಭೊಗ್ ಎಕಾ ಕವಿಕ್ ಹೆರಾಂ ಥಾವ್ನ್ ವೆಗ್ಳೆಂ ಕತಾ. ಏಕ್ ಸೂಕ್ಷ್ಮ್ ಆನಿ ನಾಜೂಕ್ ದೀಶ್ಟ್ ಎಕಾ ಕವಿಕ್ ಆಶ್ಚಿ ಚಡ್ ಗರ್ಜೆಚಿ. ಕವಿತೆಚೊ ತೀರ್ಲ್ ಅಭಿವ್ಯಕ್ತ್ ಕರುಂಕ್ ಕಶೆಂ ವೆವೆಗ್ಳೆ ಕಾವ್ಯ ಅಲಂಕಾರ್, ಪ್ರಾಸ್, ಅಂತರ್ಪ್ರಾಸ್, ಉಪಮಾಂ ಪ್ರತಿಮಾಂ ಆನಿ ರೂಪಕಾಂ ವಾಪರ್ಯೆತ್. ಪ್ರತಿಮಾ ಆನಿ ರೂಪಕಾಂ ತಸಲೆ ಪಾಕಟೆ ನಾಸ್ಲ್ಯಾರ್ ಕವಿತಾ ಉಂಚಾಯೆಕ್ ಉಬೊಂಕ್ ಸಾಧ್ಯ್ ನಾ. ಸ್ಪರ್ದ್ಯಾಕ್ ಆಯಿಲ್ಲ್ಯಾ ಚಡಾವತ್ ಕವಿತೆಂ ಥಂಯ್ ಹೊ ಊಣ್ ಅಸಾ.
ಸಬಾರ್ ಪಾವ್ಟಿಂ ಏಕ್ ಬರಿ ಕವಿತೆಂತ್ ಮ್ಹಜ್ಯಾಚ್ ಜಿವಿತಾಕ್ ಹಾಂವ್ ಭೆಟ್ತಾಂ. ಮಾಕಾ ತಿ ಕವಿತಾ ಹಾಂವೆಂಚ್ ಪಳೆಯ್ನಾತಲ್ಲ್ಯಾ ಮ್ಹಜ್ಯಾ ಜಿವಿತಾಚ್ಯಾ ಕುಶಿಂಚೆರ್ ಉಜ್ವಾಡ್ ಘಾಲ್ತಾ. ಮಾಕಾ ತಿ ಕವಿತಾ ಉಗ್ತಿ ಕರ್ತಾ. ಕವಿತೆಂಚ್ಯಾ ಕಿರ್ಣಾಂಚಿ ಸಕತ್ ಆನಿ ಪ್ರಭಾವ್ ವಿಶೇಸ್. ಪೊಯೆಟಿಕ್ಸ್ ಗ್ರೂಪಾಂತ್ ಹಾಪ್ತ್ಯಾಕ್ ಏಕ್ ಕೊಂಕ್ಣೆಚಿ ಏಕ್ ಊಂಚ್ಲಿ ಕವಿತಾ ಪ್ರಕಟ್ ಕರ್ನ್ ವಿಶ್ಲೇಶಣ್ ಕೆಲ್ಯಾರ್ ಆಮ್ಚ್ಯಾ ಕವಿಂಕ್ ಉಪ್ಕಾರಾಕ್ ಪಡಾತ್ ಮ್ಹಣ್ ಮಾಕಾ ಭೊಗ್ತಾ. ಹೆಂ ಕಾಮ್ ಆತಾಂ ಜಾಳಿ ಜಾಗ್ಯಾಂನಿ ಚಲೊನ್ ಆಸಾ ತರೀ, ಗ್ರೂಪಂತೀ ಜಾಲ್ಯಾರ್ ಬರೆಂ.
► ಆಂಡ್ರ್ಯೂ ಎಲ್ ಡಿ ಕೂನ್ಹಾ
(ವರಯ್ಣಾರಾಂತರ್ಫೆನ್)
