‘ಆನಿ ಕೋಣ್ ಜಾವ್ನಾಸಾತ್ victims? ಕೋಣ್ ಭಕೀಕ್ ಪಡ್ತೆಲೆ?’ ವಿಚಾರ್ಲೆಂ ಟೇಯ್ಲರಾನ್.
ಮೆಥ್ಯುನ್, ಟೇಯ್ಲರಾಚಿ ತೀಕ್ಷ್ಣ್ ದೀಶ್ಟ್ ಧರಿಲಿ.
‘ತುಂ ಪಳೆತೊಲೊಯ್!’ ಮ್ಹಳೆಂ ಟೇಯ್ಲರಾನ್. ‘ಆಮ್ಕಾಂ ಪವಿತ್ ಅತ್ಮ್ಯಾನ್ ಆಪಯ್ಲಾಂ. ತುಂಚ್ ತುಜ್ಯಾ ನಲಿಯಾಂಕ್ ವಿಂಚುನ್ ತಾಂಚೆ ಗಳೆ ಕಾಪ್ತೊಲೊಯ್. ತವಳ್ ತುಜ್ಯಾ ಜಮಾತಿಂಕ್ ರಾಜಾಂವ್ ಯೆತೆಲೆಂ-ತುಜ್ಯಾ ಖುನ್ ಕರುಂಕ್ ಪಡ್ಲ್ಯಾರ್ ಸಯ್ತ್!’
ಟೇಯ್ಲರಾನ್ ಆಪ್ಲ್ಯಾ ಖಾಡಾಂತ್ ಬೊಟಾಂ ರಿಗಯ್ಲಿಂ. ‘ಆತಾಂ ಮ್ಹಾಕಾ ಕಳ್ತಾ ತುಜೊ ಮಕ್ಸದ್ ಮ್ಹಾಕಾ ಭೆಟೊಂಕ್ ಸೊದ್‌ಲ್ಲ್ಯಾಂತ್!’ ಮೆಚ್ವಣ್ ಆಸ್‌ಲ್ಲಿ ತಾಚ್ಯಾ ತಾಳ್ಯಾಂತ್ ಆನಿ ಎಕ್ ನಿರ್ದಾರ್ ಕಸೊ.
‘ಜಿಣಿಯೆಂತ್ ಸಬಾರ್ ಪಾವ್ಟಿಂ ಆಮಿ ಆಮ್ಚೆಂ ಮ್ಹೆಳೆಂ, ಪಾತ್ಕಾಂ, ಕಾಮ್ ಆನಿ ಕ್ರೋದ್ ಎಕಾಚ್ ಖುಂಟ್ಯಾಚೆರ್ ಉಮ್ಕಾಳಾಯ್ತಾಂವ್. ಪುಣ್ ಎಕಾ ದಿಸಾ ಹ್ಯಾ ಸರ್ವಾಚೆಂ ವಜನ್ ಚಡ್ ಜಾವ್ನ್ ತೊ ಖುಂಟ್‌ಚ್ ಮೊಡ್ತಾ….’
‘ನಿಮಾಣೆ ಜಮಾತಿಂತ್ ತುಕಾ ಆನಿ ಹೆರಾಂಕ್ ಉಗ್ತ್ಯಾನ್ ಉಲಂವ್ಕ್ ತುಕಾ ಅವ್ಕಾಸ್ ಹಾಂವ್ ದಿತಾಂ. ತುಕಾಚ್ ಕಿತ್ಯಾಕ್ ಈವಾಕ್, ಜೆರೊಮಾಕ್, ರಮೋನಾಕ್…’
‘ರಿಚರ್ಡಾಚೆಂ ನಾಂವ್ ತುಂವೆಂ ಕಾಡ್ಲೆಂನಾಂಯ್?’
‘ರಿಚರ್ಡ್?’ ಟೇಯ್ಲರ್ ಯೆಕಾಚಾಣೆಂ ಗಂಬೀರ್ ಜಾಲೊ. ‘ಜಾಚ್ಯಾ ಬಾಪಾಯ್ನ್ ತುಜ್ಯಾ ಪತಿಣೆಚೆಂ ಮೆಡಿಕಲ್ ಮರ್ಡರ್ ಕೆಲ್ಲೆಂ ಮ್ಹಳ್ಳಿಂ ಸೊದ್ನಾಂ ಮೆಲ್ಕಮಾನ್ ತುಜ್ಯಾ ಸಾಮ್ಕಾರ್ ದವರ್‍ಲ್ಯಾಂತ್? ಕಸಲ್ಯೊ ರುಜ್ವಾತಿ ಆಸಾತ್ ಖಂಯ್ ಮೆಲ್ಕಮಾಲಾಗಿಂ? ರಿಚರ್ಡಾಕ್ ಹಾಂವ್ ಭೆಟ್ಲ್ಯಾ ಖೆರಿತ್ ಆನಿ ತಾಚೆಲಾಗಿಂ ಉಲಯ್ಲ್ಯಾ ಖೆರಿತ್ ಹಾಂವ್ ಪಾತ್ಯೆಂವ್ಚೊ ನಾ. ತ್ಯಾ ಉಪ್ರಾಂತ್ ಜಾಯ್ ತರ್ ತುಜೆಂ ಫಾರಿಕ್ಪಣ್ ಜ್ಯಾರಿ ಜಾಂವ್ಚೆ ಪರ್ಯಾಂತ್ ರಿಚರ್ಡಾಕ್ ಭದ್ರತಿ ದಿವ್ಯಾಂ!’
‘ಕಿತೆಂ? ತುಕಾ ರಿಚರ್ಡಾಲಾಗಿಂ ಉಲಂವ್ಕ್ ಜಾಯ್?’
‘ವ್ಹಯ್!’
‘ಆನಿ ನಿತಿ ಫೈಸಲ್ ಕರುಂಕ್ ಜಾಯ್? ಪವಿತ್ ಅತ್ಮ್ಯಾನ್ ತುಕಾ ಹಾಂಗಾಸರ್ ಧಾಡ್ಲಾ?’
‘ಹಾಂವ್‌ಯಿ ಸೊದ್ನೆರ್ ಆಯ್ಲಾಂ, ಮೆಥ್ಯು!’ ಟೇಯ್ಲರಾಚೊ ಜಿನೊಸ್ ಆನಿ ತಾಳೊ ಬದ್ಲುನ್ ಯೆತಾಲೊ. ಮೆಥ್ಯುಚೆಂ ಮನ್ ಕಸಲ್ಯಾಗಿ ಘೊಟಾಳ್ಯಾಕ್ ಶಿರ್ಕಾಲ್ಲೆಪರಿಂ ವೊಳಾಲೆಂ.
‘ರಿಚರ್ಡಾಚೆ ಸೊದ್ನೆರ್?’ ಮೆಥ್ಯುಚೆಂ ಸವಾಲ್ ದುಬಾವಿತ್ ಆಸ್ಲೆಂ. ‘ಕಿತ್ಯಾಕ್? ತುಜ್ಯಾ ಖಂಚಾಯಿ ಪವಿತ್ ಅತ್ಮ್ಯಾನ್ ತಾಕಾ ಆಪವ್ನ್ ಹಾಡ್ಲ್ಯಾರಿ ತುಜ್ಯಾನ್ ಹಾಂವೆಂ ಯೆವ್ಜಿಲ್ಲೆಂ ಆಡಾಂವ್ಕ್ ಜಾಂವ್ಚೆಂ ನಾ!’
‘ಕಸಲ್ಯಾ ಹಮಿದಾರಿಚೆರ್ ಹೆಂ ತುಂ ಉಚಾರ್ತಾಯ್?’
ಮೆಥ್ಯುನ್ ಆಪ್ಲಿಂ ದಾಡಾಮಾಂ ಅಡ್ಚಿಲಿಂ. ‘ತುಕಾ ರಿಚರ್ಡಾಕ್ ಭೆಟೊಂಕ್ ಜಾಯ್ ನ್ಹಯ್? ತಾಕಾ ತುಂ ಯೆದೊಳ್ ಭೆಟೊಂಕ್‌ನಾಂಯ್. ತುಜ್ಯಾ ಜಮಾತಿಕ್‌ಯಿ ತೊ ಪುರ್ತ್ಯಾನ್ ಹಾಜರ್ ಜಾಂವ್ಕ್ ನಾ.’
‘ತರ್?’
‘ತರ್…ರಿಚರ್ಡ್ ಕ್ಲೆಮೆಂಟ್ ಆನಿ ಥೊಡ್ಯಾಚ್ ವೆಳಾನ್ ಹಾಂಗಾಸರ್ ಹಾಜರ್ ಜಾತೊಲೊ!’
ಟೇಯ್ಲರಾಚೆ ದೊಳೆ ಅಶೀರ್ ಜಾಲೆ. ‘ಹಾಂಗಾಸರ್ ಹಾಜರ್ ಜಾತೊಲೊ? ತಾಕಾ ತುಂವೆಂ ಆಜ್ಞಾ-ಹುಕುಮ್ ದಾಡ್ಲ್ಯಾಯ್?’
‘ಧಾಡ್ಲ್ಯಾ ಪುಣ್…’ ಮೆಥ್ಯು ಬೀಚ್ ಕೊಟೆಜಿಂತ್ಲ್ಯಾ ಟೆಲಿಫೋನಾ ಸರ್ಶಿಂ ಗೆಲೊ. ಪುಣ್ ತಾಣೆ ರಿಸೀವರ್ ಉಕಲ್ಚ್ಯಾ ಫುಡೆಂಚ್ ಬೀಚ್‌ಕೊಟೆಜಿಚ್ಯಾ ದಾರಾಕ್ ಠೊಕೆ ಪಡ್ಲೆ. ಟೇಯ್ಲರಾಕ್ ಎಕ್ ದೀಷ್ಟ್ ದೀವ್ನ್ ಮೆಥ್ಯುನ್ ಆಪ್ಲ್ಯಾ ಕೊಟೆಜಿಚೆಂ ದಾರ್ ಉಘಡ್ಲೆಂ.
ರಿಚರ್ಡ್ ಕ್ಲೆಮೆಂಟ್ ಉಬೊ ಆಸ್‌ಲ್ಲೊ. ತಾಚ್ಯಾ ಪಾಟ್ಲ್ಯಾನ್ ದೋಗ್ ಸೆಕ್ಯುರಿಟಿ ಪಾರೆ. ‘ತುಮ್ಚಿ ಹಾಂಗಾಸರ್ ಗರ್ಜ್‌ನಾ ಮ್ಹಣ್ ಹಾಂವೆಂ ಸಾಂಗ್‌ಲ್ಲೆಂ?’
‘ವ್ಹಯ್ ಸರ್,’ ದೊಗಾಂ ಪಯ್ಕಿ ಎಕ್ಲೊ ಮ್ಹಣಾಲೊ. ‘ಪುಣ್ ಆಮ್ಕಾಂ ಮಾನೆಸ್ತ್ ಜೆರೊಮ್ ಲಾಜ್ರಾನ್ ಆನಿ ಎಕೆ ಚಲಿಯೆನ್ ಬಲ್ತೆಚ್ ಇಸಾರೆ ದಿಲ್ಲೆ, ಖಂಚಾಕೀ ಚಡ್ ತುಮ್ಚ್ಯಾ ಜೀವಾಕ್, ಸರ್, ಅಪಾಯ್ ಆಸಾ ಮ್ಹಣ್ ಸಾಂಗ್‌ಲ್ಲೆಂ. ತಿತ್ಲೆಂಚ್ ನ್ಹಯ್, ಹೊ ಮಾನೆಸ್ತ್….’ ತಾಣೆ ರಿಚರ್ಡಾಕ್ ದಾಕಯ್ಲೊ. ‘ಹೊ ಮಾನೇಸ್ತ್ ಹ್ಯಾ ಫುಡೆಂಯಿ ಬೀಚ್ ಕೊಟೆಜಿಕ್ ಆಯ್ಲಾ, ಮಿಸ್ ರಮೋನಾ ಸಾಂಗಾತಾ….’
ಮೆಥ್ಯುನ್ ಎಕ್ ಲಾಂಬ್ ಸ್ವಾಸ್ ಸೊಡ್ಲೊ. ‘ಹೆರ್ ಖಂಯ್ ಆಸಾತ್?’
ಸೆಕ್ಯುರಿಟಿ ಗಾರ್ಡಾನ್ ಮಾತೆಂ ಹಾಲಯ್ಲೆಂ. ‘ಥೊಡೊ ವೇಳ್ ಪರ್ಯಾಂತ್ ಥಂಯ್ಸರ್ ಬಸುನ್ ಆಸ್‌ಲ್ಲೆ….ಉಪ್ರಾಂತ್ ಖಂಯ್ ಗೆಲೆ ಮ್ಹಳ್ಳೆಂ ಆಮಿ ನೆಣಾಂವ್.’
‘ತೆಲ್ಮಾ…. ತಿ ಚಲಿಯಿ ಆಸ್‌ಲ್ಲಿ?’
‘ವ್ಹಯ್, ಸರ್.’
‘ಆತಾಂ ತುಮಿ ವಚಾ….ಖಂಯ್ ಜಾಯ್ ತೆಂ…ಹ್ಯಾ ಮಾನೆಸ್ತಾಕ್ ಹಾಂವೆಂಚ್ ಆಪಯಿಲ್ಲೊ!’
‘ತರ್ ಆಮ್ಚಿ ಗರ್ಜ್ ಯಾ ಭದ್ರತಿ ತುಕಾ ಗರ್ಜ್ ಪಡ್ಚಿ ನಾ, ಸರ್?’ ಸೆಕ್ಯೂರಿಟಿ ಗಾರ್ಡಾನ್ ವಿಚಾರ್ಲೆಂ ‘ಫಾಲ್ಯಾಂ ಮಿಸ್ ರಮೋನಾ ಆಮ್ಚೊ ವಿಚಾರ್ ಕರಿತ್ ತರ್?’
‘ಫಾಲ್ಯಾಂಚೊ ದೀಸ್…. ಫಾಲ್ಯಾಂಚೊಚ್ಚ್ ಜಾವ್ನ್ ಆಸ್ತೊಲೊ!’ ಮೆಥ್ಯುನ್ ತಾಳೊ ಕಾಡ್ಲೊ. ‘ರಿಚರ್ಡ್, ತುಂ ಬಿತರ್ ಯೆ.’
‘ರಾವ್, ಮೆಥ್ಯು!’ ರಿಚರ್ಡಾನ್ ಧುವಿದಾಯೆನ್ ಮ್ಹಳೆಂ. ‘ಹೆಂ ಸರ್ವ್ ಕಿತೆಂ ಮ್ಹಳ್ಳೆಂ ಮ್ಹಾಕಾ ಸಮ್ಜಾನಾ. ಕಸಲೊಗಿ ಆಪಾಯ್ ಮ್ಹಾಕಾ ಝಳ್ಕಾತಾ. ತುಂವೆಂ ಮ್ಹಾಕಾ ಹಾಂಗಾಸರ್ ಕಿತ್ಯಾಕ್ ಆಪಯ್ಲಾಯ್?’
‘ತುಜ್ಯಾ ಹರ್ ಸವಲಾಕ್ ಜಾಪ್ ಆಸಾ ಮ್ಹಜೆಲಾಗಿಂ. ಮ್ಹಜೆಲಾಗಿಂ ಜಾಪ್ ನಾ ಜಾಲ್ಯಾರ್ ರೆವೆರೆಂಡ್ ಫ್ರೆಡ್ ಟೇಯ್ಲರಾಲಾಗಿಂ ಆಸ್ತೆಲಿ.’ ಮೆಥ್ಯುನ್ ಪಾಟಿಂ ಮಾತೆಂ ಘುಂವ್ಡಾವ್ನ್ ಕೊಟೆಜಿ ಬಿತರ್ ಪಳೆಲೆಂ.
‘ಕಿತೆ ಉಲಯ್ತಾಯ್, ಮೆಥ್ಯು?’ ಹಾಂಕ್ರೆಲೊ ರಿಚರ್ಡ್. ‘ಟೇಯ್ಲರ್ ಹಾಂಗಾಸರ್? ಹೆರ್‌ಕೋಣ್ ಆಸಾತ್? ರಮೋನಾ, ಈವಾ, ಹೆಲೀನಾ, ಜೆರೊಮ್? ಕಸಲೊ ಘೊಟಾಳೊ ಹೊ, ಮೆಥ್ಯು? ಒಸಿಸಾಂತ್‌ಯಿ ಆಸ್ಚೆಂ ಆನಿ ಆಸಾಜೆ ಆಸ್‌ಲ್ಲೆಂ ವಾತಾವರಣ್ ಘುಲ್ಲ್ ಜಾಲಾಂ….ತೊ ಟೇಯ್ಲರ್ ಪೆಟ್ರೊಕ್ ಆಯಿಲ್ಲ್ಯಾ ತವಳ್‌ಥಾವ್ನ್.’
‘ತುಕಾ ಭೆಟೊಂಕ್ ಜಾಯ್ ಖಂಯ್ ಟೇಯ್ಲರಾಕ್!’
‘ತರ್ ಸೆಕ್ಯೂರಿಟಿ ಹಾಂಗಾಸರ್ ಆಸುಂದಿ!’ ಮ್ಹಳೆಂ ರಿಚರ್ಡಾನ್ ಸೆಕ್ಯೂರಿಟಿ ಗಾರ್ಡಾಂಕ್ ಪಳೆವ್ನ್. ‘ಟೇಯ್ಲರಾಚೆ ಲಫ್ಡೆ ಮ್ಹಣ್ತಾನಾ ಮ್ಹಾಕಾ ಬಿರಾಂತ್ ದಿಸ್ತಾ. ಮ್ಹಾಕಾಯಿ ಮೋಗ್ ಆಸಾ ಮ್ಹಜ್ಯಾ ಜಿಣಿಯೆಚೊ.’
‘ಬರಾಬರ್ ಪುಣ್ ತುಕಾ ಹಾಂವೆಂ ಸುರ್ವೆರ್‌ಚ್ ಸಾಂಗ್‌ಲ್ಲೆಂ ಆಸಾ….ಒಸಿಸಾಂತ್ ಕೆದಳಾಯಿ ಮುನ್ಕುಟ್ಯಾರ್ ಆಸ್ಚೊ ಗಳೊ ಫಕತ್ ತುಜೊ ಮ್ಹಣ್!’
‘ದೆಕುನ್ ಕಸಾಯ್ಗಾರ್ ಜಾವ್ನ್ ತುಂವೆಂ ಟೇಯ್ಲರಾಕ್ ನೆಮ್ಲಾಯ್ ಆನಿ ಮ್ಹಾಕಾ ಹಾಂಗಾಸರ್ ಆಪಯ್ಲಾಯ್? ಖಂಯ್ ಆಸಾ ತೊ ದಗಾಲ್ಬಾಜಿ ಘಾಡಿಗಾರ್?’
ಕೊಟೆಜಿ ಬಿತರ್‍ಲ್ಯಾನ್ ಮೆಟಾಂಚೊ ಆನಿ ಮೊಚ್ಯಾಂಚೊ ಆವಾಜ್ ಆಯ್ಕಾಲೊ.
‘ದಾರಾರ್ ಉಬೊ ಜಾವ್ನ್ ಕೊಣೆಂಯಿ ಕಸಲೆಂಚ್ ರುಸ್ತುರುಸಾಂವ್ ವಿಸ್ಕಳಾಯಿಲ್ಲೆಂ ನಾ!’ ಟೇಯ್ಲರಾಚೊ ತಾಳೊ ಆತಾಂ ಸ್ಥಿಮಿತಾಕ್ ಆಯಿಲ್ಲೆಪರಿಂ ಮೆಥ್ಯುಕ್ ಆಯ್ಕಾಲೊ. ‘ಬಿತರ್ ಯೆ, ಮೆಥ್ಯುನ್ ತುಕಾ ಆಪಂವ್ಕ್ ನಾತ್ಲೊ ತರ್, ಹಾಂಗಾಸರ್ ಆಯ್ಲ್ಯಾ ಉಪ್ರಾಂತ್ ಹಾಂವ್ಂಚ್ ತುಕಾ ಆಪಯ್ಶೆಂ ಕರ್ತೊಂ.’
‘ಆನಿ ಕಿತ್ಯಾಕ್ ತುಕಾ ಮ್ಹಜೆರ್ ಇತ್ಲೊ ಮೋಗ್?’
ರಿಚರ್ಡ್ ಬಿತರ್ ಆಯ್ಲೊ. ಟೇಯ್ಲರ್ ಆನಿ ರಿಚರ್ಡ್ ಪಯಿಲ್ಲೆಪಾವ್ಟಿಂ ಮುಕಾಮುಕಿಂ ಜಾಲೆ. ಕಸಲೆಂಗಿ ಆಯಸ್ಕಾಂತಿಕ್ ಆಸ್‌ಲ್ಲೆಂ ಹ್ಯಾ ಘಾಡಿಗಾರಾಥಂಯ್; ಜಶೆಂ ಆಪ್ಣಾಥಂಯ್ ಆಸಾ, ದುಬಾವ್ಲೊ ರಿಚರ್ಡ್. ಥೊಡಿಂ ಖಿಣಾಂಬರ್ ತೆ ಉಲಯ್ಲೆನಾಂತ್. ಟೇಯ್ಲರ್ ವೇದಿರ್ ಆಸ್ತಾನಾ ಥೊಡ್ಯಾ ವೆಳಾಕ್ ರಿಚರ್ಡಾನ್ ತಾಕಾ ಪಳೆಯಿಲ್ಲೊ ಪುಣ್ ಪ್ರಕಾಸ್ಬರಿತ್ ದಿವ್ಯಾಂಚ್ಯಾ ಉಜ್ವಡಾಂತ್, ಘಣ್ಕಣೀತ್ ಧ್ವನಿವರ್ಧಕಾಂಚ್ಯಾ ಆವಾಜಾಂತ್ ಆನಿ ಟಾಯ್ಟ್ ಡೆನಿಮ್ ಸ್ಕರ್ಟ್ ಘಾಲುನ್ ಉಬ್ಚ್ಯಾ ಚಲಿಯಾಂಚ್ಯಾ ನಾಡ್ಗೆಂ ಮದೆಂ.
‘ತುಜೆರ್ ಮೋಗ್, ರಿಚರ್ಡ್ ಮ್ಹಜ್ಯಾ ಭುರ್ಗ್ಯಾ!’ ತಾಚ್ಯಾ ಖಾಂದಾರ್ ಹಾತ್ ದವರ್‍ಲೊ ಟೇಯ್ಲರಾನ್. ‘ತುಕಾ ಎಕ್ ಆಯಾಸ್ಕಾಂತಿಕ್ ವ್ಯಕ್ತಿತ್ವ್ ಆಸಾ.’
‘ತುಕಾ ಆಸ್‌ಲ್ಲೆಪರಿಂಚ್ ಮ್ಹಣ್ ಮ್ಹಣೊಂಕ್ ಹಾಂವ್ ಸಕಾನಾಂ….’
‘ಕಿತ್ಯಾಕ್ ಮ್ಹಳ್ಯಾರ್ ಮ್ಹಜೆಂ ಖರೆಂ ವ್ಯಕ್ತಿತ್ವ್ ಮ್ಹಜ್ಯಾ ಖಾಡಾ ಪಾಟ್ಲ್ಯಾನ್ ಲಿಪ್ಲಾಂ ಮ್ಹಳ್ಳ್ಯಾಕ್?’ ಟೇಯ್ಲರಾ ಆಪ್ಲ್ಯಾ ದಾಟ್ ಖಾಡಾವಳಿ ಮದೆಂ ಆಪ್ಲ್ಯಾ ಉಜ್ವ್ಯಾ ಹಾತಾಂಚಿಂ ಬೊಟಾಂ ರಿಗಯ್ಲಿಂ. ‘ಕೋಣ್ ಜಾಣಾಂ,’ ತಾಣೆ ಮ್ಹಳೆಂ. ‘ಎಕಾ ದಿಸಾ ಹೆಂ ಖಾಡ್‌ನಾಸ್ತಾಂ ಸರ್ವಾಂಚ್ಯಾ ಝಳ್ಕೆಕ್ ಪಡ್ತೊಲೊಂ ಕೊಣ್ಣಾಂ!’
‘ಆದಿಂ ಘಾಡಿಗಾರಾಂಕ್ ಸುಳಿಯೆಕ್ ಬಾಂದುನ್ ಹುಲ್ಪಾಯ್ತಾಲೆ!’ ರಿಚರ್ಡ್ ಸೊಫಾಚೆರ್ ಬಸ್ಲೊ. ‘ತವಳ್ ತುಜೆಂ ಖಾಡ್ ಕಶೆಂಯಿ ಹುಲ್ಪಾತಾಲೆಂ ಮ್ಹಣ್ಯಾಂ…ಆತಾಂ ಸಾಂಗಾ ಮ್ಹಾಕಾ ಕಿತ್ಯಾಕ್ ಹಾಂಗಾಸರ್ ಆಪಯ್ಲಾ? ತುಂ ಕಿತೆಂ ಬೀಜ್ ವಾಕ್ಯೆಂ ಉಚಾರ್ತಾಯ್ ತೆಂ…ಪವಿತ್ ಅತ್ಮ್ಯಾನ್ ಆಮ್ಕಾಂ ಆಪಯ್ಲಾಂ….ವ್ಹಯ್?’
‘ಎಕ್ ಡ್ರಿಂಕ್ ಘೆ, ರಿಚರ್ಡ್!’ ಮ್ಹಳೆಂ ಮೆಥ್ಯುನ್. ‘ಲಿಕ್ಕರ್ ಕೆಬಿನೆಟ್ ಖಂಯ್ ಆಸಾ ಮ್ಹಣ್ ತುಂ ಜಾಣಾಂಯ್. ಹ್ಯಾ ಕೊಟೆಜಿಕ್ ಕಾಂಯ್ ತುಂ ನವೊ ನ್ಹಯ್.’
‘ರಮೋನಾ ಸಾಂಗಾತಾ ಹಾಂವ್ ಹಾಂಗಾಸರ್ ಆಯಿಲ್ಲೊಂ, ತಾಚ್ಯಾ ಆಪವ್ಣ್ಯಾಕ್ ಪಾಳೊ ದೀವ್ನ್.’
‘ಆತಾಂ ಪವಿತ್ ದೆಂವ್ಚಾರಾನ್ ಆಮ್ಕಾಂ ಆಪಯ್ಲಾಂ ಮ್ಹಣ್ ಸಮ್ಜೊನ್ ತುಂ ಆರಾಮಿತ್ ಜಾ, ಡ್ರಿಂಕ್ ಘೆ….ಆಮ್ಕಾಂ ಜಾಯ್ತೆಂ ಉಲಂವ್ಕ್ ಆಸಾ.’
‘ತುಂ ಖಂಚಾ ಖಾಂಚಿಂತ್ಲ್ಯಾ ರಿಗೊನ್ ಆಮ್ಚೊಚ್ ಜಾಲೊಯ್, ಟೇಯ್ಲರ್?’
‘ಹ್ಯಾ ತುಜ್ಯಾ ಸವಲಾಕ್ ಜಾಪ್ ಹಾಂವ್ ದಿತಾಂ!’ ಮಧೆಂಚ್ ಉಲಯ್ಲೊ ಮೆಥ್ಯು. ‘ಈವಾ, ಹೆಲೀನಾ, ರಮೋನಾ ಹಾಣಿಂ ತಾತಾಂಚಿ ಅಂತರ್‍ಮುಳಾಂ ತುಜ್ಯಾ, ರಿಚರ್ಡ್ ಕ್ಲೆಮೆಂಟಾಚ್ಯಾ ಸಾಮ್ಕಾರ್ ಉಗ್ತಿಂ ಕೆಲ್ಯಾಂತ್. ಆನಿ ಹಾಲಿಂಚ್ ಹಾಂವ್ ಟೇಯ್ಲರಾಲಾಗಿಂ ಉಲಯ್ಲಾಂ. ಅಸಲ್ಯಾ ಎಕ್ ಅವ್ಕಾಸಾ ಖಾತಿರ್ ಹಾಂವೆಂಚ್ ಹಿ ಭೆಟ್ ಆಸಾ ಕೆಲ್ಲಿ ಆನಿ ಕಿತೆಂ ಹಾಂಗಾಸರ್ ಉಗ್ಡಾಪೆಂ ಜಾತೆಲೆಂ ಮ್ಹಳ್ಳೊ ಅಂದಾಜ್ ಆಸ್‌ಲ್ಲ್ಯಾನ್ ತುಕಾಯಿ ಹಾಂವೆಂ ಆಪಯ್ಲೊ.’
‘ಕಸಲಿ ಫಿತೂರಿ ಹಿ?’ ಸೋಫಾ ವಯ್ಲೊ ಉಟೊನ್ ರಿಚರ್ಡ್ ಲಿಕ್ಕರ್ ಕೆಬಿನೆಟಾಕ್ ಗೆಲೊ ಆನಿ ಆಪ್ಲೆಚ್ ಹಾಳ್ವಾಯೆನ್ ತಾಣೆ ಸ್ಕೊಚ್ ಘೆತ್ಲಿ. ‘ಮ್ಹಾಕಾ ಹೆಂ ಸಗ್ಳೆಂ ಪ್ರಕರಣ್ ಅತ್ಯಂತ್ ನಾಟಕೀಯ್ ದಿಸ್ತಾ ಪುಣ್ ಒಸಿಸ್, ಮೆಥ್ಯು ಆನಿ ತುಂವೆಂ ಆತ್ತಾಂ ಉಚಾರ್‌ಲ್ಲಿಂ ವ್ಯಕ್ತಿತ್ವಾಂ ಪಳೆತಾನಾ, ಕಸಲೆಂ ನಾಟಕೀಯ್ ಆಸ್ಲ್ಯಾರಿ ತೆಂ ಘಡೊಂಕ್ ಸಾದ್ಯ್ ಆಸಾ ಮ್ಹಣ್ ಮ್ಹಾಕಾ ಕಳಿತ್ ಆಸಾ.’
‘ತರ್ ತುಕಾಚ್ ಕಿತ್ಯಾಕ್ ತುಂ ಭಾಯ್ರ್ ದವರ್ತಾಯ್?’ ಮೆಥ್ಯುನ್ ವಿಚಾರ್ಲೆಂ. ‘ತುಂ ಕಾಂಯ್ ಉಣೊ ಶಾಣೊ ನ್ಹಯ್.’
ಲುಕ್ಸಾಣ್ ಜಾಲೆಂ ಕೊಣಾಕ್, ಮ್ಹಾಕಾ, ತುಕಾ ಯಾ ಒಸಿಸಾಕ್.’
‘ಎಕೆ ಕೋಶಿಯೆಂತ್ ದೋನ್ ತಲ್ವಾರಿ ರಾವೊಂಕ್ ಸಕಾನಾಂತ್ ಮ್ಹಳ್ಳೆಂ ಹಾಂವೆಂ ಮ್ಹಾಕಾಚ್ ರುಜು ಕೆಲೆಂ!’
ರಿಚರ್ಡ್ ಪಾಟಿಂ ಯೆವುನ್ ಸೊಫಾಚೆರ್ ಬಸ್ಲೊ.
‘ತುಂ, ಮೆಥ್ಯು ಲಿಯೊ ಧಿಮಾಗಾಂತ್ ಸಮಾನಾಂಯ್ ಮ್ಹಳ್ಳೆಂ ಮ್ಹಾಕಾ ಪಯ್ಲ್ಯಾಚ್ ದಿಸಾ ಕಳಿತ್ ಜಾಲ್ಲೆಂ. ತರಿ ತೊಚ್ಚ್ ಧಿಮಾಗ್ ಘೆವ್ನ್ ತುಂವೆಂ ತುಜೆ ತಸಲ್ಯಾ ಪಿಶಾಂಕ್ ಒಸಿಸ್ ಸರ್ಕಸ್ ಮ್ಹಳ್ಳ್ಯಾ ಕಂಪೆನಿಂತ್ ಯೆಕ್ಟಾಂಯ್ಲೆಂಯ್ ಆನಿ ತುಂ ರಿಂಗ್‌ಮಾಸ್ಟರ್ ಜಾಲೊಯ್. ತುಜ್ಯಾ ಮಾಂತಾ ಭಿತರ್ ಯೆಂವ್ಕ್ ನಾಸ್‌ಲ್ಲೊಂ ಮ್ಹಳ್ಯಾರ್ ಫಕತ್ ಹಾಂವ್. ಮ್ಹಾಕಾ ಚಿಟ್ಟ್ಯಾ ವಾಗಾಚೆಂ ಪೀಲ್ ಮ್ಹಣ್ ಒಸಿಸಾಂತ್ ಪ್ರಖ್ಯಾತಿ ಯೆತಾನಾ ತುಂ ಚಾಳ್ವಲೊಯ್. ಸರ್ವಾಂಕ್ ತಾತಾಂಚೆ ಘುಟ್ ಆಸಾತ್ ಪುಣ್ ಮ್ಹಜಿ ನಿಗೂಡತಾ ಪುಟಂವ್ಕ್ ತುಂ ಸಕ್ಲೊನಾಂಯ್. ರಿಚರ್ಡ್ ಕ್ಲೆಮೆಂಟ್ ತುಕಾ ಎಕ್ ವಾಯ್ಟ್ ಸಪಣ್ ಜಾವ್ನ್, ಕುಸಾಳಾಂತ್ಲೊ ಕಾಂಟೊ ಜಾವ್ನ್, ದೊಳ್ಯಾಂ-ಪಾಪ್ಡೆಚೊ ಪುಳೆರ್ ಜಾತಾನಾ ತುಂ ಚಡ್ಪಡ್ಲೊಯ್, ಮೆಥ್ಯು. ಮ್ಹಾಕಾ ಖ್ಹೆಳೊಂವ್ಕ್ ತುಜ್ಯಾನ್ ಜಾಲೆಂ ನಾ…’
‘ಪುಣ್ ತುಂ,’ ರಿಚರ್ಡಾಕ್ ಬೋಟ್ ಜೊಕ್ಲೆಂ ಮೆಥ್ಯು. ‘ನಿಗೂಡ್ ಜಾವ್ನ್ಂಚ್ ರಾವ್ಲೊಯ್. ತುಜ್ಯಾ ಪಾಟ್ಲ್ಯಾ ಜಿಣಿಯೆಚಿ ಕಸಲಿಚ್ ಖಾಂಚ್ ತುಂವೆಂ ಉಗ್ತಿ ಕರುಂಕ್‌ನಾಂಯ್. ಹೆರಾಂಕ್ ಖಾಲ್ ಜಾವ್ನ್ ಜಿಯೆಂವ್ಚೆಂ ಮ್ಹಾಕಾ ಆವಡ್ನಾ. ಎಕಾ ತೆಂಪಾರ್ ಆವಡ್ತಾಲೆಂ, ಮ್ಹಜೆಂ ಲೀಜಾ ಜಿವಂತ್ ಆಸ್ತಾನಾ. ತ್ಯಾ ಆಂಜ್ಯಾನ್ ಸಾಂಗ್‌ಲ್ಲೆಂ ಸರ್ವ್ ಹಾಂವೆಂ ಹುಕ್ಮ್ಯೊ ಜಾವ್ನ್ ಜ್ಯಾರಿ ಕೆಲ್ಯಾತ್. ಪುಣ್ ತಾಣೆ ತಸಲೆಂ ಕಸಲೆಂಚ್ ಅರಾಜಾಂವಿಕ್ ವಿಚಾರ್‌ಲ್ಲೆಂ ನಾ. ಆಪ್ಲ್ಯಾ ಮರ್ಣಾಂತ್ ತರಿ ತಾಣೆಂ ಮ್ಹಾಕಾ ರಮೋನಾ ದಿಲೆಂ…’ ಮೆಥ್ಯುಚಿಂ ಭುಜಾಂ ಕುಸ್ಕಾಲಿಂ. ‘ಹಾಂವ್ ಫಾರಿಕ್ಪಣಾಕ್ ಆಶೆಲೊಂ, ಆಶೆತಾಂ ಆನಿ ಸೊದ್ನೆರ್ ಆಸಾಂ.’
‘ಆನಿ ಕೋಣ್ ಕೋಣ್ ಆಸಾತ್ ತುಜ್ಯಾ ಸಾಂಗಾತಾ ಹ್ಯೆ ಸೊದ್ನೆಂತ್?’ ಸ್ಕೊಚಾಚೊ ಘೊಟ್ ತಾಳ್ಯಾಂತ್ ದೆಂವವ್ನ್ ರಿಚರ್ಡಾನ್ ವಿಚಾರ್ಲೆಂ. ‘ಜೆರೊಮ್, ಖಂಡಿತ್ ಜಾವ್ನ್, ತೆಲ್ಮಾ, ಮೆಲ್ಕಮ್…. ಹಾಂಚೊ ಪಾತ್ರ್ ತುಕಾಯಿ ಕಳಿತ್ ಆಸ್ಚೊಚ್, ಮೆಥ್ಯು. ಆತಾಂ ತುಂ ಇತ್ಲೊ ಘುಸ್ಪಡ್ಲಾಯ್….ಹ್ಯಾ ಸರ್ವಾಂನಿ ತುಕಾ ಭೊರಯಿಲ್ಲ್ಯಾ ರಿಪೋರ್ಟಾಂನಿ ತುಕಾ ಅಸೊ ಘುಸ್ಪಟಾಯ್ಲಾ ಕಿ ಎಕ್ ಬಿರಾಂಕುಳ್ ವಿಸ್ಪೋಟ್ ಜಾಲ್ಯಾ ಶಿವಾಯ್ ಒಸಿಸಾಂತ್ ಗರ್ಬೇಸ್ತ್ ಜಾಲ್ಲಿ ಹಿ ಪರಿಗತ್ ಸಮತಟ್ಟ್ ಜಾಂವ್ಚಿ ನಾ.’
‘ತ್ಯಾ ಖಾತಿರ್‌ಚ್ ತುಕಾ ಹಾಂವೆಂ ಹಾಂಗಾಸರ್ ಆಪಯಿಲ್ಲೊ, ಟೇಯ್ಲರ್ ಹಾಂಗಾಸರ್ ಯೆತಾ ಮ್ಹಲ್ಳೆಂ ಖಚಿತ್ ಜಾಣಾಂ ಆಸುನ್. ತರಿ, ತುಜೆಥಾವ್ನ್ ಹಾಂವ್ ಕಸಲೊಚ್ ಪಾಟಿಂಬೊ ಅಪೇಕ್ಷಿನಾ, ವಿಸ್ಪೋಟ್ ಜಾಂವ್ಚೊ ತೊ ಜಾಯ್ಜೆಯಿಚ್ಚ್, ಖಾಂಚಿಯೆಂನಿಂ ಬಸಾನಾತ್‌ಲ್ಲೆ ರೆವೆಂತ್ಲೆ ಫಾತೊರ್ ಝಡೊನ್ ವಚಾಜೆಚ್ಚ್.’
ಥೊಡ್ಯಾ ವೆಳಾಚೆಂ ಮೊನೆಪಣ್ ಥಂಯ್ ಉಚಿತ್ ಜಾವ್ನಾಸ್‌ಲ್ಲೆಂ ಜಾವ್ಯೆತ್. ಉಪ್ರಾಂತ್-
ಟೇಯ್ಲರಾನ್ ತೆಂ ಮೌನ್ ಫೊಡ್ಲೆಂ. ‘ಆತಾಂ ಉಲ್ಲೇಕ್ ಜಾಲ್ಲ್ಯಾಂನಿ ತಾಂಚೊ ಅಂತರಾಳ್ಮ್ ತುಜ್ಯಾ ಸಾಮ್ಕಾರ್ ದವರ್‍ಲಾ. ತಾಂಚೊ ಸಂಕ್ಶಿಪ್ತ್ ಆಮ್ಕಾ ತುಜ್ಯಾಥಾವ್ನ್ ಆಯ್ಕೊಂಕ್ ಜಾಯ್. ಹಾಲಿಂಚ್ ಮೆಥ್ಯುನ್ ಮ್ಹಜೆಲಾಗಿಂ ಸಬಾರ್ ಸಂಗ್ತಿ ಉಗ್ಡ್ಯಾಪೊ ಕೆಲ್ಯಾತ್. ಈವಾನ್ ತಾಚೆಲಾಗಿಂ ಉಗ್ಡಾಪ್ಯೊ ಕೆಲ್ಲ್ಯೊ ಅಸಾದಾರಣ್ ಸಂಗ್ತಿ ಮೆಥ್ಯುನ್ ಮ್ಹಾಕಾ ಕಳಿತ್ ಕೆಲ್ಯಾತ್. ಹ್ಯಾಚ್ ಖಾತಿರ್ ಪವಿತ್ ಅತ್ಮ್ಯಾನ್ ಮ್ಹಾಕಾ ಪೆಟ್ರೋಕ್ ಹಾಡ್ಲೊ ಕಿತೆಂಗಿ. ರಾಜ್‌ಕಾರಿಣಿ ಮೌರಿಸ್ ಅಗುಸ್ತಿನ್ ಫಕತ್ ಎಕ್ ನೀಬ್. ಹಾಂವ್ ಸೊದ್ನೆರ್ ಆಸಾಂ ಆನಿ ಹಿಂ ಸೊದ್ನಾಂ ಆಕೇರ್ ಜಾವ್ನ್ ಯೆಂವ್ಚೆಪರಿಂ ಮ್ಹಾಕಾ ದಿಸ್ತಾತ್. ವಿಸ್ಪೊಟಾಂತ್ ತರಿ ಸಯ್, ರಿಚರ್ಡ್ ಆಮಾ ಸರ್ವಾಂಚಿಂ ಸೊದ್ನಾಂ ಆಕೇರ್ ಜಾಯ್ಜೆಯಿಚ್ಚ್. ಆತಾಂ ಹಾಂವ್ ದಗಾಲ್ಭಾಜಿ ಫ್ರೆಡ್ ಟೇಯ್ಲರ್ ಜಾವ್ನ್ ಹಾಂ ಹಾಂಗಾಸರ್ ನಾ. ಜಶಿ ತುಜಿ ಪರಿಗತ್ ಆತಾಂ ಆಸಾ, ಸರ್ವಾಂಚೆಂ ತುಂವೆಂ ಆಯ್ಕಾಲಾಂಯ್, ಥೊಡ್ಯಾಂಚೆ ಮೆಥ್ಯುನ್ ಆಯ್ಕಾಲಾಂ, ತಶಿಚ್ ಆಸಾ ಮ್ಹಜಿ. ಸಗ್ಳ್ಯಾ ಸಂಸಾರಾಚೆಂ ಹಾಂವೆಂ ಆಯ್ಕಾಲಾಂ. ಪುಣ್ ಮ್ಹಜೆಂಚ್ ಹಾಂವೆಂ ಆಯ್ಕೊಂಕ್ ನಾ. ಸಬಾರ್‍ಶೆಂ ಆಸಾ ಮ್ಹಜೆಥಂಯ್, ರಿಚರ್ಡ್! ಹಾಂವ್ ಆಮಾಲಿ, ಕಾಮುಕಿ, ಚೆಡ್ಯಾಳೊಂ ಆನಿ ಭಾವಾರ್ಥಾಚ್ಯಾ ಮಟ್ಟಾಕ್ ದಗಾಲ್ಭಾಜಿ. ಪುಣ್ ಎಕ್ ಸಂಗತ್ ಆಮಿ ಉಡಾಸಾಂತ್ ದವರ್‍ಯಾಂ- ಪಾತ್ಕಿ ಸ್ತ್ರೀಯೆಕ್ ಸೊಮ್ಯಾನ್ ಫಾತ್ರಾಯ್ಲೆಂ ನಾ ಪುಣ್ ಸಾಂಗ್ಲೆಂ- ತುಜಿ ಪಾತ್ಕಾ ಭೊಗ್ಸಾಲ್ಯಾಂತ್, ವಚ್ ಆನಿ ಪರತ್ ಪಾತ್ಕಾಂ ಕರಿನಾಕಾ.’
‘ಹೆಂ, ತುಂ ತುಕಾಚ್ ಲಾಗು ಕರ್ತಾಯ್?’ ರಿಚರ್ಡಾನ್ ವಿಚಾರ್ಲೆಂ.
‘ಹಾಂವ್ ಅಸಲ್ಯಾ ಎಕಾ ಶಿರಿಗುಂಡಿಯೆ ಸರ್ಶಿಂ ಉಬೊಂ ಆಸಾಂ ರಿಚರ್ಡ್…. ಎಕ್‌ಚ್ ಮ್ಹಾಕಾ ಭೊಗ್ಸಾಣೆ ಜಾಯ್ ಯಾ ಫಾತ್ರಾವ್ಣಿ ಜಾಯ್!’
‘ಹೆ ತುಜೆ ದೋನ್‌ಯಿ ಆಂವ್ಡೆ ತುಜ್ಯಾ ನಿಮಾಣ್ಯಾ ಜಮಾತಿ ವೆಳಾರ್ ಜ್ಯಾರಿ ಜಾಂವ್ಚಿ ಸಾದ್ಯತಾಯ್ ಆಸಾ. ಸಾಂಗ್ ಮ್ಹಾಕಾ, ಯೆದೊಳ್ ಪರ್ಯಾಂತ್ಲ್ಯೊ ತುಜ್ಯೊ ಸ ಜಮಾತಿ ಪಾಟಾಪಾಟ್ ಚಲ್ಲ್ಯಾತ್. ಹಿ ನಿಮಾಣಿ ಆನಿ ಸಾತ್ವಿ ಕಿತ್ಯಾಕ್ ಪಾಟಿಂ ಘಾಲ್ಯಾಯ್?’
‘ಮ್ಹಜಿ ಸೊದ್ನಾಂ ಪೂರ್ಣ್ ಕರುಂಕ್!’
‘ತುಂ ಸೊದುನ್ ಆಯಿಲ್ಲೆಂ ತುಕಾ ಮೆಳ್ಳೆಂ ನಾ?’
ಟೇಯ್ಲರಾನ್ ಜಾಪ್ ದಿಲಿ ನಾ.
ತವಳ್ ಮೆಥ್ಯುನ್ ಆಪ್ಲೊ ತಾಂಬ್ಲೆರ್ ಭರ್ನ್ ಹಾಡ್ಲೊ ಆನಿ ತೊ ಶೀದಾ ರಿಚರ್ಡಾ ಸಾಮ್ಕಾರ್ ಉಬೊ ಜಾಲೊ. ‘ತುಂ ಮ್ಹಜೆರ್ ಬದ್ಲಾಮ್ ಘಾಲ್ತಾಯ್ ಟೆಂಡರಾಂಚೆ ಶಿರಿಗುಂಡಿಯೆಂತ್ ಹಾಂವೆಂ, ಮ್ಹಜ್ಯಾ ಖಾಸ್ಕಿ ಸಂತೊಸಾಖಾತಿರ್ ತುಕಾ ಫಸಯ್ಲೊ ಮ್ಹಣ್. ಎಕಾ ಕೋಶಿಯೆಂತ್ ದೋನ್ ತಲ್ವಾರಿಂಕ್ ಚೆಪ್ಚೆಂ ಪ್ರೇತನ್ ಕೆದಿಂಚ್ ಫಲ್ಸೊಂಚೆ ನಾ ಮ್ಹಣ್ ಸರ್ವ್ ಜಾಣಾಂತ್. ಆತಾಂ ಮ್ಹಾಕಾ ಎಕ್ ಸಂಗತ್ ಕಳೊನ್ ಆಯ್ಲ್ಯಾ. ಧನ್ಯವಾದ್ ತ್ಯಾ ಮತಿಭೃಷ್ಟ್ ಜೆರೊಮಾಕ್ ಆನಿ ತಾಚ್ಯಾ ಪಂಗ್ಡಾಕ್….. ತಾಂಚ್ಯಾ ಪತ್ತೇದಾರಿ ವಾವ್ರಾಕ್ ಲಾಗುನ್ ಎಕ್ ಸಂಗತ್ ಉಗ್ತಡಾಕ್ ಆಯ್ಲ್ಯಾ. ಡೊ|ಫ್ರಾನ್ಸಿಸ್ ಕ್ಲೆಮೆಂಟ್ ಮ್ಹಜ್ಯಾ ಲೀಜಾಚೊ ಖುನಿಗಾರ್, ಖುದ್ದ್ ತಾಚ್ಯಾಚ್ ಪತಿಣೆಚೊ ಆನಿ ಸಬಾರ್ ಹೆರ್ ಪೇಶಂಟಾಂಚೊ ಖುನಿಗಾರ್, ತೊ ಎಕ್ ಬೆಬ್ದೊ, ಆಮಾಲಿ, ವಿಕೃತ್ ಕಾಮುಕಿ ಮ್ಹಳ್ಳೆಂಯಿ ಉಗ್ತಡಾಂತ್ ಆಯ್ಲಾಂ.’
‘ಆನಿ ದೆಕುನ್?’ ರಿಚರ್ಡಾನ್ ವಿಚಾರ್ಲೆಂ. ‘ಟೇಯ್ಲರಾಕ್ ಆನಿ ಮ್ಹಾಕಾ ಹಾಂಗಾಸರ್ ತುಂವೆಂ ಆಪಂವ್ಚ್ಯಾಕ್ ಕಸಲೊ ಸಂಬಂದ್?’
‘ಹಾಂವೆಂ ತಸಲೆಂ ಕಾಂಯ್ ಮ್ಹಳ್ಳೆಂ ನಾ!’ ಮೆಥ್ಯು ಆಪ್ಲ್ಯಾ ಬಸ್ಕೆರ್ ಬಸ್ಲೊ. ‘ತರಿ ಪುಣ್ ತುಂವೆಂ ಹಾಂವೆಂ ಸಾಂಗ್ಲೆಲ್ಯಾ ಸಂಗ್ತಿಂಕ್ ಆನಿ ಹಾಂಗಾಸರ್ ಪೆಟ್ರೊಂತ್ ಘಡ್ಚ್ಯಾ, ಘಡ್‌ಲ್ಲ್ಯಾ ಸಂಗ್ತಿಕ್ ಗಾಂಚ್ ಆಸಾಗಿ ಮ್ಹಳ್ಳ್ಯಾ ಸವಾಲಾಚಿ ಖಾಂಚ್ ತುಂವೆಂ ದಾಕಯ್ಲಿಯ್.’
‘ತರ್?’ ರಿಚರ್ಡಾಚ್ಯಾ ತಾಳ್ಯಾಂತ್ ವ್ಯಕ್ತ್ ವಿರರಾಯ್ ಆಸ್‌ಲ್ಲಿ.
‘ಆಸಾ ಮ್ಹಳ್ಳೊ ರಿಪೊರ್ಟ್ ಜೆರೊಮಾನ್ ಮ್ಹಾಕಾ ದಿಲಾ!’
‘ತೊ ಮ್ಹಜ್ಯಾ ರಗ್ತಾಕ್ ಕೆನ್ನಾಂಯಿ ತಾನೆವ್ನ್ ಆಸಾ, ಮೆಥ್ಯು!’ ರಿಚರ್ಡಾನ್ ಭುಜಾಂ ಉಡಯ್ಲಿಂ. ‘ಚಡ್ ಕರುನ್ ಈವಾನ್ ಮ್ಹಾಕಾ ತಾಚ್ಯಾ ಬಂಗ್ಲ್ಯಾಕ್ ಆಪಯಿಲ್ಲ್ಯಾ ತವಳ್ ಥಾವ್ನ್!’ ತೊ ಸುಕೊ ಹಾಸೊ ಹಾಸ್ಲೊ. ‘ತುಂ ಮೆಥ್ಯು ಲಿಯೊ, ಸ್ಕಾಯ್‌ಪಾರ್ಕ್ ಪಾರ್ಟಿ ಉಪ್ರಾಂತ್ ಈವಾಕ್ ಪಾಂವ್ಕ್ ಗೆಲ್ಲೊಯ್ ಆನಿ ತ್ಯಾ ಉಪ್ರಾಂತ್ ಆನಿ ತ್ಯಾ ಪಯ್ಲೆಂಯಿ – ಹೆಲೀನಾಕ್ ತುಜೆಂ ಸೆಕ್ರೆಟರಿ ತುಂವೆಂ ನೆಮ್ತಾನಾ ಆನಿ ಮ್ಹಾಕಾ ಟೆಂಡರಾಂಚೊ ಮುಕೆಲಿ ನೆಮ್ತಾನಾ, ತುಜ್ಯಾ ರಗ್ತಾಚಿ ತಾಚಿ ತಾನ್‌ಯಿ ಚಡೊನ್ ಆಯ್ಲ್ಯಾ. ಮೆಥ್ಯು ಲಿಯೊ – ಹೆಂ ತುಂ ಸಮಜ್ ಆನಿ ಪಾತ್ಯೆ – Jerome Lazra is becoming a threat day by day – ಬಿರಾಂತ್ ನ್ಹಯ್ ಫಕತ್ ಆಮ್ಕಾಂ ಆನಿ ಒಸಿಸಾಕ್ ಪುಣ್ ಹ್ಯಾ ಸಗ್ಳ್ಯಾ ವರ್ತುಲಾ ಭಿತರ್ ಯೆತೆಲ್ಯಾಂಕ್.’
‘ತರ್ ತಾಕಾ ಕಿತೆಂ ಕರಿಜೆ ಮ್ಹಣ್ಚೆಂ ತುಂವೆಂ?’ ತೀಕ್ ತಾಳ್ಯಾನ್ ವಿಚಾರ್ಲೆಂ ಮೆಥ್ಯುನ್. ‘One single bullet in his head?’
ಆತಾಂ ಟೇಯ್ಲರ್ ಹಾಸ್ಲೊ. ‘ಮ್ಹಾಕಾ ಹಾಸಾನಾಸ್ತಾಂ ತಡ್ವನಾ!’ ತಾಣೆ ಮ್ಹಳೆಂ. ‘ಜೆರೊಮಾಚ್ಯಾ ಕಟ್ಟ್ಯಾಂತ್ ತುಂವೆಂ ಎಕ್ ಬುಲ್ಲೆಟ್ ರಿಗಂವ್ಚ್ಯಾ ಫುಡೆಂಚ್ ತುಜ್ಯಾ ಕಟ್ಟ್ಯಾಂತ್, ತುಜ್ಯಾ ಒಸಿಸ್ ಕಂಪೆನಿಂತ್ಲ್ಯಾ ಚಿಟ್ಟ್ಯಾ ವಾಗಾಚ್ಯಾ ಕಟ್ಟ್ಯಾಂತ್ ಎಕ್ ಬುಲ್ಲೆಟ್ ರಿಗಂವ್ಚಿ ವೆವಸ್ಥಾ ಜೆರೊಮಾನ್ ಕೆಲ್ಯಾ!’
ಥೊಡ್ಯಾ ವೆಳಾಚ್ಯಾ ಮೌನಾಂತ್ ರಿಚರ್ಡ್ ಎಕ್ಲ್ಯಾಥಾವ್ನ್ ಯೆಕ್ಲ್ಯಾಕ್ ಪಳೆಲಾಗ್ಲೊ.
‘ಎಕ್‌ಚ್ಚ್ ಹಾಂವ್ ಮತಿಭೃಷ್ಟ್ ಜಾಲಾಂ ಯಾ ತುಮಿ ಯಾ ಒಸಿಸಾಂತ್ಲೊ ರಿಂಗ್‌ಮಾಸ್ಟರ್ ರಿಂಗ್ ಸೊಡುನ್ ಧಾಂವ್ ಮಾರ್ಚಿ ಮಾಂಡ್ಣಿ ಕರಿತ್ತ್ ಆಸಾ.’
‘ಖಂಚೆಂಯಿ ಸಾರ್ಕೆಂ ನ್ಹಯ್!’ ತಿದ್ವಿಲೆಂ ಟೇಯ್ಲರಾನ್. ‘ಜೆರೊಮಾಚ್ಯಾ ಆನಿ ತಾಣೆ ನಮಿಯಾರ್‍ಲೆಲ್ಯಾ ಪ್ರಾಯ್ವೆಟ್ ಡಿಟೆಕ್ಟಿವಾಂಚ್ಯಾ ಸೊದ್ನಾಂ ವರ್ವಿಂ ಕಳಿತ್ ಜಾಲಾಂ ಕಿ ತುಂ, ರಿಚರ್ಡ್ ಕ್ಲೆಮೆಂಟ್ ಜಾವ್ನಾಸಾಯ್ ಎಕ್ಲೊಚ್ ಪುತ್ ಡೊ|ಫ್ರಾನ್ಸಿಸ್ ಕ್ಲೆಮೆಂಟಾಚೊ!!’
ಹೆಂ ಆಯ್ಕೊನ್ ರಿಚರ್ಡಾಚ್ಯಾ ಮುಕಮಳಾರ್ ಕಸಲಿಚ್ ಬದ್ಲವಣ್ ಜಾಲಿ ನಾ. ತಾಣೆಂ ಆಪ್ಲೊ ಸ್ಕೊಚ್ ಗ್ಲಾಸ್ ಸಾಮಾರ್ ಆಸ್‌ಲ್ಲ್ಯಾ ಗ್ಲಾಸ್ ಟೇಬಲಾಚೆರ್ ದವರ್‍ಲೊ ಆನಿ ಆಪ್ಲೆಂ ಕಪಾಲ್, ಸಾಫ್ ಕರ್‍ಚ್ಯಾ ಜಿನ್ಸಾರ್, ದೋನ್ ತೀನ್ ಪಾವ್ಟಿಂ ಪುಸ್ಲೆಂ.
‘ಆತಾಂ!’ ತಾಣೆಂ ಮ್ಹಳೆಂ, ಮೆಥ್ಯುಕ್ ದೀಷ್ಟ್ ಧರುನ್. ‘ಹೆಂ ಕಪಾಲ್ ತುಜ್ಯಾ ಬುಲ್ಲೆಟಾಕ್ ತಯಾರ್ ಆಸಾ.’
‘ರುಜ್ಯಾತ್ ನಾಸ್ತಾಂ ಮೆಥ್ಯು ಕಸಲೆಂಚ್ ಕಾಮ್ ಕರಿನಾ ಮ್ಹಳ್ಳಿ ಪ್ರಕ್ಯಾತಿ ತಾಕಾ ಆಸಾ ನ್ಹಯ್?’
‘ಜರೂರ್!’ ಮ್ಹಳೆಂ ಮೆಥ್ಯುನ್. ‘ರುಜ್ವಾತಿ ತುಂಚ್ ತಲಾಸ್ ಕರ್ಶಿ?’
ರಿಚರ್ಡಾನ್ ಆಪ್ಲೆ ದೊಳೆ ಧಾಂಪ್ಲೆ.
ಸಿನೆಮಾ ಪಡ್ದ್ಯಾರ್ ತಿದೊಡ್ಯಾ ವೆಗಾನ್ ದೃಶಾಂ ಚಲಯಿಲ್ಲೆಪರಿಂ ತಾಚ್ಯಾ ಮತಿಪಡ್ದ್ಯಾರ್ ಧಾಂವ್ಲಿಂ ತಿ ದೃಶಾಂ – ಆವಯ್ಚೆಂ ಮರಣ್, ಜೂಡಿ ಆಂಟಿ, ಕ್ಯಾಪ್ಟನ್ ಜೋರ್ಜ್, ರಿಚರ್ಡಾಕ್ ಡೆಬಿಟ್-ಕ್ರೆಡಿಟ್ ಖೆಳೊಂಕ್ ಶಿಕಯಿಲ್ಲೊ ಡೆನಿಸ್, ದೈನಿಕ್ ಪತ್ರಾಂ ವಿತರಣ್ ಕರ್ತಾನಾ ಉದೆಲ್ಲೆಂ ಕ್ಯಾಂಡಿಸ್, ಬೆಬ್ದಿಣ್ ನರ್ಸ್ ಯೂಲಾ ಆನಿ ಬಾರಾಂತ್ ತಾಂಚೆ ಮದೆಂ ಚಲ್‌ಲ್ಲೆಂ ಸಂಬಾಷಣ್…..
“ಹಾ೦ವ್ ಮ್ಹಜಿ ಮುಳಾ೦ ಸೊದುನ್ ಆಯ್ಲಾ೦!” ರಿಚರ್ಡಾನ್ ಆಪ್ಲಿ೦ ಉತ್ರಾ೦ ವಿ೦ಚ್ಲಿ೦.
“ತುಜಿ೦ ಮುಳಾ೦ ಆನಿ ಹಾ೦ಗಾಸರ್? ಮನ್ಶಾ೦ ಮಧೆ೦ ಯಾ ರಾನ್-ಮೊಲ್ಯಾ೦ನಿ?”
ರಿಚರ್ಡಾನ್ ಜಾಪ್ ದಿಲಿ ನಾ.
“ಖ೦ಯ್ಸರ್ ಸುರು ಕರು೦ಕ್ ತು೦ ಸೊದ್ತಾಯ್?”
“ತುಜೆಥಾವ್ನ್೦ಚ್!” ಜಾಪ್ ದಿಲಿ ರಿಚರ್ಡಾನ್. “ವಿಚಿತ್ರ್ ಸಹ್‌ಘಟನ್….ತು೦ ಎಕ್ ನರ್ಸ್”
“ತಾ೦ತು೦ coincidence ಕಸಲೆ೦?”
ರಿಚರ್ಡಾನ್ ಜಾಪ್ ದೀ೦ವ್ಕ್ ಥೊಡಿ ಘಳಾಯ್ ಕೆಲಿ.
“ಹಾ೦ವ್ ಎಕಾ ಕ್ಲಿನಿಕಾಕ್ ಸೊದುನ್ ಆಯ್ಲಾ೦….ತೆ೦ ಆಜೂನ್‌ಯಿ ಆಸಾ ತರ್?”
ಯ್ಯೂಲಾಚೆ೦ ಮುಖಮಳ್ ಸಾವ್ಳೆಲೆ೦. ನವ್ಯಾನ್ ಆಯಿಲ್ಲ್ಯಾ ಡ್ರಿ೦ಕಾಕ್ ತೆ೦ ಶೂನ್ಯ್ ದಿಶ್ಟಿನ್ ಪಳೆಲಾಗ್ಲೆ೦.
“ಕ್ಲಿನಿಕಾಕ್ ಸೊದುನ್ ಆಯ್ಲಾಯ್ ಯಾ ಡೊಕ್ಟರಾಕ್? ಎಕಾ ಡೊಕ್ಟರಾಕ್ ಸೊದುನ್ ಹಾ೦ಗಾಸರ್ ಆಯಿಲ್ಲ್ಯಾ೦ ಪಯ್ಕಿ ತು೦ ತಿಸ್ರೊ!”
ರಿಚರ್ಡಾಚೆ೦ ಮುಖಮಳ್ ಫಾತ್ರೆಲೆ೦. “ತ್ಯಾ ಪಯ್ಲ್ಯಾ ದೊಗಾ೦ಕ್ ತೊ ಡೊಕ್ಟರ್ ಮೆಳ್ಳೊ?”
“ಹಾ೦ವ್ ನೆಣಾ೦!” ಯ್ಯೂಲಾ ಮ್ಹಣಾಲಿ. “ತಾಣಿ ದೊಗಾ೦ನಿ ಸೊದ್ಚೊ ಡೊಕ್ಟರ್ ಎಕ್ಲೊಚ್ ಆಸ್ಲೊ ಪುಣ್ ತು೦ ಖ೦ಚಾ ಡೊಕ್ಟರಾಕ್ ಸೊದುನ್ ಆಯ್ಲಾಯ್ ಮ್ಹಳ್ಳೆ೦ ತು೦ವೆ೦ ಮ್ಹಾಕಾ ಸಾ೦ಗ್ಲೆ೦ ನಾ೦ಯ್.”
ತಾ೦ಚೆ ದೊಳೆ ಖಿಳಾಲೆ.
ಜೂಡಿನ್, ಕರಿನಾಕಾ ಮ್ಹಳ್ಳೆ೦ ಕರ್ಚ್ಯಾರ್ ಆಸ್‌ಲ್ಲೊ ರಿಚರ್ಡ್.
“ಡೊಕ್ಟರ್ ಫ್ರಾನ್ಸಿಸ್ ಕ್ಲೆಮೆ೦ಟ್!”
ಉಪ್ರಾ೦ತ್ ಥ೦ಯ್ಸರ್ ದೆ೦ವ್‌ಲ್ಲೆ೦ ಮೌನ್ ಚಾರಿತ್ರಿಕ್ ಪುಣ್ ಕಸಲ್ಯಾ ಕಾರಾಣಾಕ್ ಲಾಗುನ್?
“ಕಸಲ್ಯಾ ಕಾರಾಣಾಕ್ ಲಾಗುನ್ ತು೦ ತಾಕಾ ಸೊದ್ತಾಯ್?” ಯ್ಯೂಲಾಚೊ ತಾಳೊ ಪೊಕೊಳ್ ಜಾಲ್ಲೊ.
“ತೆ ಹೆರ್ ದೋಗ್ ಕಸಲ್ಯಾ ಕಾರಾಣಾಕ್ ಲಾಗೊನ್ ತಾಕಾ ಸೊದುನ್ ಆಯಿಲ್ಲೆ?”
“ಮ್ಹಾಕಾ ಸಾರ್ಕೆ೦ ಉಡಾಸಾ೦ತ್ ನಾ…. ಧಾ ವರ್ಸಾ೦ ವಯ್ರ್ ಜಾಲಿ೦….”
“ಖ೦ಯ್ ಥಾವ್ನ್ ಆಯಿಲ್ಲೆ?”
ಯ್ಯೂಲಾನ್ ಆಪ್ಲೆ ದೊಳೆ ಅಶೀರ್ ಕೆಲೆ ಆನಿ ಕ್ರಮೇಣ್ ಧಾ೦ಪ್ಲೆ. “ಮ್ಹಾಕಾ ಉಡಾಸಾ೦ತ್ ಆಸ್ಲ್ಯಾರಿ ತುಕಾ ಕಿತ್ಯಾಕ್ ಸಾ೦ಗಾಜೆ?”
“ಆನ್ಯೇಕಾ ಡ್ರಿ೦ಕಾ ಖಾತಿರ್!” ಕಸಲಿಚ್ ದಯಾ ದಾಕ್ಶೆಣ್‌ನಾಸ್ತಾ೦ ಜಾಪ್ ದಿಲಿ ರಿಚರ್ಡಾನ್.
“ಮ್ಹಾಕಾ ಆತಾ೦ ಕಸಲ್ಯಾಯಿ ಡ್ರಿ೦ಕಾಚಿ ಗರ್ಜ್ ನಾ.”
ರಿಚರ್ಡ್, ಮ೦ದ್ ಹಾಸೊ ಹಾಸ್ಲೊ. “ಖ೦ಯ್ ಥಾವ್ನ್ ತೆ ಆಯಿಲ್ಲೆ?”
“ದೋಗ್‌ಯಿ ಮಧ್ಯ್‌ಪ್ರಾಚ್ಯಾಥಾವ್ನ್ ಆಯಿಲ್ಲೆ ಮ್ಹಳ್ಳೊ ಉಡಾಸ್ ಮ್ಹಜೊ…. ಪುಣ್….”
“ಮು೦ದರ್‍ಸಿ?”
“ವ್ಹಯ್….ಎಕ್ಲೊ ಕಾ೦ಯ್ ಧಾ ವರ್ಸಾ೦ ಆದಿ೦ ಆಯಿಲ್ಲೊ ಆನಿ ದುಸ್ರೊ….ಕಾ೦ಯ್ ಪಾ೦ಚ್ ವರ್ಸಾ೦ ಆದಿ೦. ವ್ಹಯ್, ವ್ಹಯ್.”
“ತೆ ದೋಗ್‌ಯಿ ಎಕಾಚ್ ಡೊಕ್ಟರಾಕ್ ಸೊದುನ್ ಆಯಿಲ್ಲೆ?”
………
‘ಕಸಲ್ಯಾ ಚಿಂತ್ನಾಂನಿ ಗುಲ್ಲ್ ಜಾಲೊಯ್, ರಿಚರ್ಡ್?’ ವಿಚಾರ್ಲೆಂ ಟೇಯ್ಲರಾನ್. ‘ಪತ್ತೇದಾರ್‍ಗಿಚೆಂ ಕಾಮ್ ಅಕ್ಕಲ್ ಆಸ್‌ಲ್ಲ್ಯಾಂಕ್ ಸುಲಬಾಯೆಚೆಂ. ಗಾಂಚಾಥಾವ್ನ್ ಗಾಂಚಾಕ್ ಗಾಂಚ್ ಸೊದ್ಲ್ಯಾರ್ ಜಾಲೆಂ.’
ರಿಚರ್ಡ್ ಹಾಸ್ಲೊ.
‘ಪುಣ್ ಹೊ ಡೊ|ಕ್ಲೆಮೆಂಟ್ ಆಸಾ ತರಿ ಖಂಯ್, ಬುಲ್ಲೆಟ್ ತಾಚ್ಯಾ ಕಪಾಲಾಂತ್ ರಿಗಯ್ಜೆ ನ್ಹಯ್?’
‘ಹ್ಯಾ ಸವಲಾಂಚಿ ಜಾಪ್ ಸೊದುನ್ ಕಾಡ್ಚೆ ಖಾತಿರ್ ತುಕಾ ಹಾಂವೆಂ ಜೀವಂತ್ ದವರಿಜೆ, ರಿಚರ್ಡ್!’ ಮೆಥ್ಯುನ್ ಮ್ಹಳೆಂ. ‘You need protection!’
ಅವಸ್ವರ್ – 90 ► ► ►
