ಸಾತ್ ದಿಸಾಂ ಉಪ್ರಾಂತ್ ಜಮ್ಲೆಲಿ ಸಾತ್ವಿ ಜಮಾತ್.
ಕಾಂಯ್ಚ್ ಬದ್ಲುಂಕ್ ನಾತ್‌ಲ್ಲೆಂ ತರಿ ಬದ್ಲಾಲ್ಲ್ಯೊ ಸಬಾರ್ ಸಂಗ್ತಿ ಆಸ್‌ಲ್ಲ್ಯೊ. ಪುಣ್ ನಿಮಾಣ್ಯಾ ಜಮಾತಿವೆಳಾರ್ ಕಿತೆಂ ಜಾಯ್ತ್ ಮ್ಹಳ್ಳೊ ಅಂದಾಜ್ ಕೊಣಾಯ್ಕಿ ನಾತ್‌ಲ್ಲೊ. ಸವಲಾಂ ಜರೂರ್ ಆಸ್‌ಲ್ಲಿಂ – ಕಿತ್ಯಾಕ್ ಹಿ ಜಮಾತ್ ತಹಕೂಬ್ ಕೆಲ್ಲಿ, ಕಿತೆಂ ಸಿಜ್ತಾಲೆಂ ಪೆಟ್ರೊಂತ್, ಕಿತ್ಯಾಕ್ ದೈನಿಕ್ ಪತ್ರಾಂಯಿ ಮೌನ್ ಆಸ್‌ಲ್ಲಿಂ? ಫಕತ್ ಇತ್ಲೆಂಚ್ ಐಲಾನ್ ಆಯಿಲ್ಲೆಂ ಪತ್ರಾಂನಿ, ಸಬಾರ್ ವಾಜ್ಬಿ ಕಾರಾಣಾಂಕ್ ಲಾಗುನ್ ರೆವರೆಂಡ್ ಫ್ರೆಡ್ ಟೇಯ್ಲರಾಚಿ ಸಾತ್ವಿ ಜಮಾತ್ ‘ಪವಿತ್ ಅತ್ಮ್ಯಾನ್ ತುಮ್ಕಾಂ ಆಪಯ್ಲಾಂ’ ಮ್ಹಳ್ಳಿ ತಿ ಸಾತ್ ದಿಸಾಂಕ್ ತಹಕೂಬ್ ಜಾಲ್ಯಾ. ಹ್ಯಾ ನಿಮಾಣ್ಯಾ ಜಮಾತಿಚೆಂ ಶಿರ್ಶಕ್ ಆಸ್ತೆಲೆಂ ಆಜ್ ಪವಿತ್ ಅತ್ಮ್ಯಾನ್ ಆಮ್ಕಾಂ ಝಡ್ತೆಂಚ್ಯಾ ಝುಜಾಕ್ ಆಪಯ್ಲಾಂ.
ಹೆಂ ಶಿರ್ಶಕ್‌ಚ್ ಪುರೊ ಆಸ್‌ಲ್ಲೆಂ ಲೊಕಾಕ್ ಮಿರ್‍ಮಿರಾಂವ್ಕ್. ಲೊಕಾಚ್ಯಾನ್ ಟೇಯ್ಲರಾಚ್ಯಾ ತತ್ಕಾಲಿಕ್ ದಫ್ತರಾಕ್ ಫೋನ್ ಕರುನ್ ವಿಚಾರುಂಕ್ ಸಾದ್ಯ್‌ಚ್ ನಾತ್‌ಲ್ಲೆಂ. ತಾಂಕಾಂ ಎಕ್ ಅಲ್ಬೊ ಉಪಾವ್ ಆಸ್‌ಲ್ಲೊ ಮ್ಹಳ್ಯಾರ್ ಹ್ಯಾ ಜಮಾತಿಂಚೆಂ ವೆವೆಗ್ಳಿಂ ಕಾರ್‍ಯಿಂ ವಯ್ಸುನ್ ಘೆತ್‌ಲ್ಲ್ಯಾ ಕಾರ್‍ಬಾರ್‍ಯಾಂಚೊ ಸಂಪರ್ಕ್ ಕರ್ಚೊ. ತಾಂಚೆ ನದ್ರೆಂತ್ ಪಯ್ಲೆಂ ಯೆತಾಲಿ ರಾಜ್‌ಕಾರಿಣಿ ಮಾವ್ರಿಸ್ ಅಗುಸ್ತಿನ್, ದುಸ್ರ್ಯಾ ಜೆರೊಮ್ ಲಾಜ್ರಾ, ಸಿಸೆರೊ, ರಮೋನಾ ಆನಿ ಹೆರ್ ಥೊಡೆ; ಪುಣ್ ಕೊಣಾಥಾವ್ನ್‌ಯಿ ಸಮಂಜಸ್ ಜಾಪ್ ತಾಂಕಾಂ ಲಾಬ್ಲಿ ನಾ.
ಪಯ್ಲೆಂಚೆ ಪರಿಂಚ್ ಲೊಕಾಚೊ ಜಮೊ ಮ್ಹಳ್ಳೊ ಸಾಗೊರ್‌ಚ್ ತ್ಯಾ ಮಯ್ದನಾರ್ ಲಾರಾಂ ಮಾರ್‍ತಾಲೊ. ಕಾಂಯ್ ಪಂದ್ರಾ ಹಜಾರಾಂ ವಯ್ರ್ ದಾದ್ಲೆ ಆನಿ ಸ್ತ್ರೀಯೊ ಆನಿ ಭುರ್ಗಿಂ ಸಯ್ತ್.
ಮಯ್ದಾನಾವಯ್ಲಿ ಸಜಾವಟ್ ಹ್ಯಾ ಸಂಸಾರಾಂತ್ಲಿ ನ್ಹಯ್! ಹರ್ಯೆಕಾ ದೊನ್ಶಿಂ ಫುಟಿಂಚ್ಯಾ ಅಂತರಾರ್ ಮಯ್ದಾನಾಚ್ಯಾ ಸಗ್ಳ್ಯಾ ಪರಿಧಿಚೆರ್ ದೊದೊಡೆ ಫ್ಲಡ್ ಲಾಯ್ಟ್ ಆನಿ ಹಾ‌ಅಂಚ್ಯಾ ಖಾಂಬ್ಯಾಕ್ ಹಳ್ಟಾಚ್ಯಾ ಆಲ್ಮಾರಿ ಗಾತ್ರಾಂಚಿಂ ಲೌಡ್‌ಸ್ಪೀಕರಾಂ. ಮಯ್ದಾನಾಚೆಂ ಆವರಣ್ ಮೊಠ್ಯಾ ನಾಯ್ಲೊನ್ ರಾಜ್ವಾಂನಿ ವೋಯ್ ಕಶಿ ಬಾಂದುನ್ ‘ಭಿತರ್’ಚ್ ರಾವಯಿಲ್ಲೆಂ. ಆನಿ ವಯ್ಲ್ಯಾ ರಾಜ್ವಾಂಚೆರ್ ರಂಗ್‌ರಂಗಾಳ್ ದಿವ್ಯಾಂಚಿ ಸಾಂಕಳ್ ವೊಳ್‌ಲ್ಲಿ.
ಆವರಣಾಚೆ ಭಾಯ್ರ್ ದೋನ್ ಫಾಯರ್ ಬ್ರಿಗೇಡಿಚಿಂ ವೆನಾಂ, ಚಾರ್ ಪೊಲಿಸ್ ಜೀಪಾಂ, ತೀನ್ ಆಂಬ್ಯುಲೆನ್ಸಾಂ ಆನಿ ಎಕ್ ಲಾಂಬಾಯೆಚೆಂ ಪೊಲಿಸ್ ಬಸ್ಸ್. ಹಾತಾಂತ್ ವೊಕಿ-ಟೊಕಿ ಘೆವ್ನ್ ಭಂವ್ಚೆ ಪೊಲಿಸ್ಆನಿ ಸ್ವಯಂಸೇವಕ್ ಧಾರಾಳ್. ಹಾಂಚೆ ಪಯ್ಕಿ ತರ್ನಾಟ್ಯೊ ಚಲಿಯೊಚ್ಚ್ ಚಡ್ ಸಂಕ್ಯಾನ್. ಅಂರ್ದುನ್ ಬಸ್ಚೆ ಡೆನಿಮ್ ಮಿನಿ-ಸ್ಕರ್‍ಟ್, ಧವೊ ಪಾತಳ್ ಬ್ಲಾವ್ಜ್, ಸ್ಥಂನಾಂಚೆ ಉಬಾರಾಯೆರ್ ಎಕ್ ತಾಂಬ್ಡೆಂ ಕಾರ್ನೇಶನ್ ಆನಿ ಮದೆಂಚ್ ರೆವೆರೆಂಡ್ ಫ್ರೆಡ್ ಟೇಯ್ಲರಾಚ್ಯಾ ಮಾಗ್ಣ್ಯಾ ಜಮಾತಿಚೆಂ ಸಂಕೇತ್ – ಪಾರ್ವ್ಯಾ ರುಪಾರ್ ದೆಂವೊನ್ ಯೆಂವ್ಚೊ ಧವೊ ಪಾರ್ವೊ.
ಹೊಚ್ ಸಂಕೇತ್, ಸುಮಾರ್ ವೀಸ್ ಫುಟಿಂ ಉಬಾರಾಯೆರ್ ಉಬಾರ್‌ಲ್ಲ್ಯಾ ಮಜ್ಬೂತ್ ಸ್ಟೇಜಿಚೆರ್‌ಯಿ ಆಸ್‌ಲ್ಲೊ. ಸ್ಟೇಜಿಚಿ ಸಜಾವಟ್ ನಿಳ್ಸ್ಯಾ ವರ್‍ಣಾಚಿ, ಟೇಯ್ಲರಾನ್ ಉಲವ್ಪ್ ದೀಂವ್ ಆಸ್ಚ್ಯಾ ಮಾಂಚಿಯೆರ್ ಧಾ ಮಾಯ್ಕಾಂ. ಸ್ಟೇಜಿಚ್ಯಾ ದೋನ್‌ಯಿ ಕುಶಿಂನಿ ಸ್ಟೆನ್‌ಗನ್ನ್ ಘೆತ್‌ಲ್ಲೆ ಚವ್ಗ್ ಪೊಲಿಸ್ ಕಮಾಂಡೋಸ್ (ಹೆಂ ವಿಸೇಶ್ ದಿಸನಾತ್‌ಲ್ಲೆಂ). ಸ್ಟೇಜಿ ಪಾಟ್ಲ್ಯಾನ್ ಆಸ್‌ಲ್ಲ್ಯಾ ಗ್ರೀನ್ ರುಮಾಚ್ಯಾ ದಾರ್ವಟ್ಯಾರ್‌ಯಿ ಅಸಲಿಚ್ ಭದ್ರತಿ. ಹಾಕಾ ಪ್ರವೇಶ್ ಪಾಟ್ಲೆ ಕುಶಿಥಾವ್ನ್, ಕೊಣಾಯ್ಕಿ ಕಳನಾತ್‌ಲ್ಲೆಪರಿಂ. ಹ್ಯಾ ಗ್ರೀನ್ ರುಮಾಕ್ ಅಡೇಜ್ ಟನ್ನ್ ಸಮಾರ್ಥೆಚೊ ಎರ್‌ಕಂಡೀಶನರ್; ಹಾಂಗಾಸರ್ ಪ್ರವೇಸ್ ಫಕತ್ ಎಕ್ ತಾಂಬ್ಡೆಂ ಕಾರ್‍ಡ್ ಆಸ್‌ಲ್ಲ್ಯಾಂಕ್ ಮಾತ್ರ್.
ವ್ಹೊರಾ ಸಾಂಜೆಚಿಂ ಸವಾಯ್- ಪಾಂಚ್ ಜಾತಾನಾ ಭಾಯ್ಲ್ಯಾನ್ ಪೊಲಿಸ್ ಜೀಪಾಂಚೆಂ ಬಿಗಿಲ್ ಫುಟ್ಲೆಂ ಆನಿ ಹೆ ಚವ್ಗ್ ಜಿವಿ ವೀಜೆಚಿ ಸರಿ ಗುಡ್ಡಾಯಿಲ್ಲೆಪರಿಂ ನೀಟ್ ಜಾಲೆ.
ಪುಣ್ ಹೆ ನಿಮಾಣ್ಯೆ ಜಮಾತಿಂತ್ ಥೊಡಿಂ ವಿಶೇಷಣಾಂ ಆನಿ ಸಜಾವಟೆಂತ್ ಬದ್ಲವಣ್ ದಿಸುನ್ ಯೆತಾಲಿ ಜಿ ಸರವಂಚ್ಯಾ ದಿಷ್ಟಿಕ್ ಪಡ್ಲಿ ಪುಣ್ ಸಮ್ಜಾಲಿ ನಾ.
ಪ್ರಕಾಸ್ಬರಿತ್ ವೀಜ್ ದಿವ್ಯಾಂನಿ ಸಜ್‌ಲ್ಲೆಂ, ಪಾಟ್ಲ್ಯಾ ಸ ಜಮಾತಿಂನಿ ಉಜಳ್ಳೆಲಿಂ ‘ಆಜ್ ತುಮ್ಕಾಂ ಪವಿತ್ ಅತ್ಮ್ಯಾನ್ ಆಪಯ್ಲಾಂ’ ಮ್ಹಳ್ಳಿ ಅಕ್ಷರಾಂ ನಾತ್‌ಲ್ಲಿಂ ಪುಣ್ ನವೆಂಚ್ ಎಕ್ ಐಲಾನ್ – ಆಜ್ ಪವಿತ್ ಅತ್ಮ್ಯಾನ್ ಆಮ್ಕಾಂ ಝಡ್ತೆಂಚ್ಯಾ ಝುಜಾಕ್ ಆಪಯ್ಲಾಂ -ಉಜಳೋನ್ ಸೊಬ್ತಾಲೆಂ. ಸ ಜಮಾತಿಂಥಾವ್ನ್ ಪಯ್ಲೆಂಚೆ ಐಲಾನ್ ಪಳೆವ್ನ್ ಆಸ್‌ಲ್ಲ್ಯಾ ಜಮ್ಯಾಕ್ ಹೆಂ ವಿಚಿತ್ರ್ ದಿಸ್ಲೆಂ.
ಝಡ್ತೆಚೆಂ ಝುಜ್? ಕೊಣಾಚ್ಯಾ ಝಡ್ತೆಚೆಂ ಝುಜ್ ಆನಿ ಕೊಣೆ ತೆಂ ಝುಜ್‌ಚೆಂ? ಸಾತ್ ದಿಸಾಂಕ್ ಹ್ಯೊ ಪವಿತ್ ಜಮಾತಿ ಕಿತ್ಯಾಕ್ ಕಯ್ದ್ ಕರುನ್ ದವರ್‍ಲೆಲ್ಯೊ?
ಆಜ್ ಕಿತ್ಯಾಕ್ ಮೌರಿಸ್ ಅಗುಸ್ತಿನಾಚ್ಯಾ ಎಲಿಸಾಂವಾಂಚ್ಯಾ ವಿವರಾಂಚೆಂ ಫ್ಲೆಕ್ಸ್ ಕಿತ್ಯಾಕ್ ವೇದಿಚ್ಯಾ ದಾವ್ಯಾಕ್ ಉಮ್ಕಾಳಾಯ್ಲಾಂ. ಕಿತ್ಲಿಶಿಂ ಸವಾಲಾ ಹಿಂ – ಕಿತ್ಯಾಕ್, ಕಿತ್ಯಾಕ್, ಕಿತ್ಯಾಕ್?
ಪೆಟ್ರೊಚೊ ಸರ್‍ಕಾರ್ ನಿದುನ್ ಪಡ್ಲಾ?
ತಿತ್ಲ್ಯಾರ್–
ಭದ್ರ್ ಕೆಬಿನಾಚೆಂ ದಾರ್ ಉಗ್ತೆಂ ಜಾಲೆಂ
ಸ್ಟೆನ್ನ್‌ಗನ್ನ್ ಘೆವ್ನ್ ದೋಗ್ ರಾಕ್ವಲಿ ಭಿತರ್ ರಿಗೊನ್ ದಾರ್ವಾಟ್ಯಾಚ್ಯಾ ಹೆವ್ಶಿನ್-ತೆವ್ಶಿನ್ ಶಿಸ್ತೆನ್ ರಾವ್ತೆಚ್ ತೊ – ರೆವೆರೆಂಡ್ ಫ್ರೆಡ್ ಟೇಯ್ಲರ್ – ದಾರ್ವಾಟ್ಯಾಚ್ಯಾ ಚವ್ಕಟಾಂತ್ ಉದೆಲೊ.
ರೆವೆರೆಂಡ್ ಫ್ರೆಡ್ ಟೇಯ್ಲರ್?
ನ್ಹಯ್, ಪುಣ್ ಕೋಣ್‌ಗಿ ಎಕ್ಲೊ ಲಾಂಬ್‌ದೀಗ್, ಕಾಂಯ್ ಫ್ರೆಡ್ ಟೇಯ್ಲರಾಚ್ಯಾಚ್ ದಿಗಾಯೆಚೊ. ಚಿಕಾರ್ ಜಮ್ಲೆಲ್ಯಾ ಜಮ್ಯಾಂತ್ ಗುಸುಗುಸ್ ಉಲವ್ಣೆಂ ಉಟ್ಲೆಂ. ಕಸಕಸಲ್ಯಾ ಅಜಾಪಾಂಚ್ಯಾ ಆಂವ್ಡ್ಯಾನ್ ಆಯಿಲ್ಲೊ ಜಮೊ ನಿರಾಶೆಚೆ ಉದ್ಗಾರ್ ಸೊಡ್ಟಾನಾ ವೇದಿಚೆರ್ ಉದೆಲ್ಲಿ ವ್ಯಕ್ತಿ ವೇದಿಚ್ಯಾ ಮದೆಂಚ್ ಯೆವ್ನ್ ಉಬಿ ಜಾಲಿ.
‘ಕೋಣ್ ತುಂ?’ ಜಮ್ಯಾಂತ್ಲ್ಯಾ ಎಕ್ಲ್ಯಾನ್ ತಾಳೊ ಕಾಡ್ಲೊ. ‘ಆಮ್ಕಾಂ ರೆವರೆಂಡ್ ಜಾಯ್, ಆಮ್ಕಾ ಪವಿತ್ ಅತ್ಮ್ಯಾ ಪರ್ಯಾಂತ್ ವರುನ್ ಪಾವಯ್ತೊಲೊ ಜಣ್ ಜಾಯ್. ಖಂಯ್‌ಸರ್ ತಾಕಾ ತುಮಿಂ ಲಿಪಯ್ಲಾ? ಖಂಯ್ ಆಸಾ ತೊ ಸಿಸೇರೊ ಆನಿ ಪೆಟ್ರೊಂತ್ಲೆ ಭಾವಾಡ್ತಿ ಮಾನೇಸ್ತ್?’
ಇತ್ಲ್ಯಾ ಸರ್ವ್ ಸವಾಲಾಂಚ್ಯಾ ಎಕಾ ಪಾಟ್ಲ್ಯಾನ್ ಎಕ್ ಜಾವ್ನ್ ಆಯಿಲ್ಲ್ಯಾ ಫಾರಾಂಚೊ ಆವಾಜ್ ಥಾಂಬೊಕ್ ಥೊಡಿಂ ಖಿಣಾಂ ಲಾಗ್ಲಿ. ತಿಂ ಸಂಪ್ತೆಚ್, ವೇದಿಚೆರ್ ಉಬೊ ಜಾಲ್ಲ್ಯಾ ಮಾನಾಯಾನ್ ಸಾಂಕಾರ್ ಆಸ್ಚೆಂ ಮೈಕ್ ಆಪ್ಣಾ ಸರ್ಶಿಂ ವೊಡ್ಲೆಂ.
‘ತುಮಿಂ ಮ್ಹಜ್ಯಾ ತಾಳ್ಯಾಕ್ ವಳ್ಕಾತಾತ್ ಹ್ಯಾ ಮ್ಹಜ್ಯಾ ಲಿಬಾಸಾಕ್?’
‘ಆಮಿ ಫಕತ್ ರೆವರೆಂಡಾಕ್ ವಳ್ಕಾತಾಂವ್!’ ಜಮ್ಯಾಥಾವ್ನ್ ಜಾಪ್ ಆಯ್ಲಿ. ‘ತುಜೊ ಹೊ ಲಿಬಾಸ್? ಕಸಲ್ಯಾಕ್ ಹೊ ಲಿಬಾಸ್? ಕಸಲ್ಯಾಥಾವ್ನ್ ತುಂ ಲಿಪೊನ್ ರಾವೊಂಕ್ ಸೊದ್ತಾಯ್, ರೆವೆರೆಂಡ್? ತುಜ್ಯಾ ತಾಳ್ಯಾಕ್ ಆಮಿ ವಳ್ಕಾಲ್ಯಾಂವ್. ಪುಣ್ ಎಕಾ ಝಿಹಾದಿ ಝಲ್ಲಾದಾಪರಿಂ ಕಿತ್ಯಾಕ್ ತುಂ ನೆಸ್ಲಾಯ್? ತುಂ ಕಾಂಯ್ ಮನ್ಶಾಂಚ್ಯೊ ತಕ್ಲ್ಯೊ ಕಾಪ್ಚೊ ಕಸಾಯಿ?’
ವೇದಿಚೆರ್ ಆಸ್‌ಲ್ಲೊ ವ್ಯಕ್ತಿ ಖರೊಚ್ ರೆವರೆಂಡ್ ಆಸ್ಲೊ ತರ್ ತಾಚೊ ಲಿಬಾಸ್ ಜಾವ್ನಾಸ್‌ಲ್ಲೊ ಅಥ್ವೊಚ್. ತಾಣೆ ಸ್ವಛ್ಛ್ ಧವೊ ಧಗ್ಲೊ ಘಾಲ್ಲೊ, ಕಮ್ರಾಕ್ ತಾಂಬ್ಡ್ಯಾ ರಶೀಮಾಚೊ ಬಾಂದ್; ಆಪ್ಲೆಂ ಮಾತೆಂ ತಾಣೆ ಪರಿಪುರ್ಣ್ ಲಿಪಯಿಲ್ಲೆಂ, ಖಾಡ್, ಕೆಂಸ್, ವೋಂಟ್, ದೊಳ್ಯಾಂಕ್ ಕಾಳಿಂ ಚಷ್ಮಾಂ. ಕಿತೆಂ ಕಳಿತ್‌ನಾತ್‌ಲ್ಲೆಂ ಸಾಮ್ಕಾರ್ ಆಸ್ಚ್ಯಾ ಜಮ್ಯಾಕ್ ಮ್ಹಳ್ಯಾರ್ ಹೊ ಛದ್ಮವೇಷ್ ಪಾಂಗುರ್ತಾನಾ ರೆವೆರೆಂಡಾನ್ ಗ್ರೀನ್ ರುಮಾಂತ್ ಕೊಣಾಕ್‌ಚ್ ಪ್ರವೇಸ್ ದೀಂವ್ಕ್ ನಾತ್‌ಲ್ಲೊ. ಪುಣ್ ಕಿತ್ಯಾಕ್ ತುಂ ಅಶೆಂ ಕರ್ತಾಯ್ ಮ್ಹಳ್ಳೆಂ ಸವಾಲ್ ಕರ್ಚೆಂ ಧಯ್ರ್ ಕೊಣಾಕ್‌ಚ್ ನಾತ್‌ಲ್ಲೆಂ.
ತ್ಯೆ ಸಾಂಜೆರ್ ಘಡ್ಲೆಂ ಅಶೆಂ-
ಸಾತ್ವಿ ಜಮಾತ್ ಜಮ್ತೆಲಿ ಮ್ಹಣ್ ರೆವರೆಂಡಾನ್ ಖಬರ್ ದಿಲಿ ಜೆರೊಮಾಕ್. ‘ವಿಚಾರಿನಾಕಾ ತುಂ!’ ತಾಣೆ ತಾಕಿದ್ ದಿಲ್ಲಿ ಜೆರೊಮಾಕ್. ‘ವಿಚಾರಿನಾಕಾ ತುಂ ಸಾತ್ ದೀಸ್ ಪರ್ಯಾಂತ್ ಹಾಂವ್ ಖಂಯ್ ಅಸ್‌ಲ್ಲೊಂ ಮ್ಹಣ್ ಕಿತ್ಯಾಕ್ ಹಾಂವ್ ತುಜೆಲಾಗಿಂ ವಿಚಾರಿನಾ ಮೆಥ್ಯುಚ್ಯಾ ಬೀಚ್‌ಕೊಟೆಜಿಚಿ ಪಾರತ್ ಕರಿಜೆ ಆಸ್‌ಲ್ಲೊ ತುಂ ಖಂಯ್ ಗೆಲ್ಲೊಯ್ ಮ್ಹಣ್; ವಿಚಾರಿನಾ ತುಜೆಲಾಗಿಂ ಹಾಂವ್ ಬೀಚ್ ಕೊಟೆಜಿಚ್ಯಾ ಪ್ರಕರಣಾ ಉಪ್ರಾಂತ್ ರಿಚರ್ಡ್ ಮೆಥ್ಯುಕ್ ಆನಿ ಮ್ಹಾಕಾ ಬರಿ ರಾತ್/ಸಕಾಳ್ ಮಾಗುನ್ ಖಂಯ್ ನಪಂಯ್ಚ್ ಜಾಲಾ ಮ್ಹಣ್. ಇತ್ಲೆಂಚ್ ಹ್ಯೆ ಸಾಂಜೆಚ್ಯಾ ಮಟ್ಟಾಕ್ – ಸಾಂಜೆರ್ ಜಮಾತ್ ಜಮ್ತೆಲಿ ಕಿತ್ಯಾಕ್ ವೇಳ್ ಆಯ್ಲಾ ಆತಾಂ, ಆಜ್ ಪವಿತ್ ಅತ್ಮ್ಯಾನ್ ಆಮ್ಕಾಂ ಝಡ್ತೆಂಚ್ಯಾ ಝುಜಾಕ್ ಆಪಯ್ಲಾಂ. ಪ್ರೆಸ್ಸ್ ರಿಲೀಜ್ ದಿ, ರೇಡಿಯೊ, ಟಿ.ವಿ., ಸರ್ವ್ ದೈನಿಕಾಂಕ್…. ತುಂ ಜಾಣಾಂಯ್. ಆಯ್ಚಿ ಜಮಾತ್ ಖಾಸ್ ಜಾವ್ನಾಸ್ತೆಲಿ ಕಿತ್ಯಾಕ್ ಆತಾಂ ವೇಳ್ ಆಯ್ಲಾ.
ಹೊಚ್ಚ್ ಸಂದೇಶ್ ಜೆರೊಮಾನ್ ಮೌರಿಸಾಕ್, ರಮೋನಾಕ್ ಆನಿ ಮೆಥ್ಯುಕ್ ದಿಲ್ಲೊ. ಮೆಥ್ಯುನ್ ತಾಚೊ ಹಾತ್ ಧರ್‍ಲ್ಯಾ ಉಪ್ರಾಂತ್ ಎಕಾಥರಾಚೊ ಅಸ್ಪಷ್ಟ್ ಬಾಂದ್ ತಾಂಚೆ ಮದೆಂ ಉದೆಲಾ ಮ್ಹಣ್ ಜೆರೊಮ್ ಪಾತ್ಯೆತಾಲೊ. ಮೆಥ್ಯುಕ್ ರೆವರೆಂಡಾಚೊ ಸಂದೇಶ್ ದಿತಾನಾ ಜೆರೊಮಾನ್ ಮ್ಹಳೆಂ. ‘ತುಜ್ಯಾ ಬೀಚ್ ಕೊಟೆಜಿ ಉಪ್ರಾಂತ್ ರಿಚರ್ಡ್, ಒಸಿಸಾಕ್ ಆಯಿಲ್ಲೆಪರಿಂ ದಿಸನಾ!’
‘ತೊ ಯೆಂವ್ಕ್ ನಾ ತರ್ ಆಯಿಲ್ಲೆಪರಿಂ ಕಸೊ ದಿಸ್ಚೊ?’ ಮೆಥ್ಯುಚ್ಯಾ ತಾಳ್ಯಾಂತ್ ಕರ್‍ಕರ್ ಉಟೊನ್ ದಿಸ್ತಾಲೆ. ಬೀಚ್ ಕೊಟೆಜಿಚ್ಯಾ ಪ್ರಕರಣಾ ಉಪ್ರಾಂತ್ ಎಕ್ ಥರಾಚೆ ಬಾಂದ್ಪಾಸ್ ಒಸಿಸಾಂತ್ ಉದೆಲ್ಲೆ. ಜೆರೊಮ್, ಮೆಥ್ಯು ಆನಿ ಥೊಡ್ಯಾ ಮಟ್ಟಾಕ್ ಹೆಲೀನಾ ಸಯ್ತ್. ರಿಚರ್ಡ್ ಕ್ಲೆಮೆಂಟ್ ಒಸಿಸಾಥಾವ್ನ್ ಗಯ್ರ್ ಹಾಜರ್ ಜಾಲ್ಲ್ಯಾ ಥಾವ್ನ್ ದೋನ್ ದೀಸ್ ಒಸಿಸಾಕ್ ಆಯಿಲ್ಲೆಂ ನಾ. ತಿಸ್ರ್ಯಾ ದಿಸಾ ಆಯಿಲ್ಲ್ಯಾ ತಾಚ್ಯಾ ಮುಕಮಳಾರ್ ಆಸ್‌ಲ್ಲಿ ಛಾಯಾ ಕೊಣಾಚ್ಯಾನ್ ಪಾರ್ಕುಂಕ್ ಸಕ್ಚಿ ನ್ಹಯ್. ತಾಣೆ ದಾಕಲ್ ಕೆಲ್ಲ್ಯಾ ತುರ್ತಾನ್ ರಜಾ ಜಾಯ್ ಪಡ್ಲಿ ಮ್ಹಳ್ಳ್ಯಾ ರಜೆ ಚಿಟಿಂತ್ ಇತ್ಲೆಂಚ್ ಲಿಕುನ್ ಆಸ್‌ಲ್ಲೆಂ – ಮ್ಹಾಕಾ ತುರ್ತಾನ್, ಮಾಮ್ಮಿಚ್ಯಾ ಆಪವ್ಣ್ಯಾಕ್ ಪಾಳೊ ದೀವ್ನ್ ಜೆನಿಸ್ ಎಸ್ಟೇಟಿಕ್ ವೆಚೆಂ ಪಡ್ಲೆಂ. ಹಿ ರಜೆ ಚಿಟ್ ಮೆಥ್ಯುನ್ ಕಸಲಿಂಚ್ ಸವಲಾಂ ಕರಿನಾಸ್ತಾಂ ದಸ್ಕತ್ ಕೆಲಿ ಆನಿ ಪರ್ಸನಲ್ ಡಿಪಾರ್ಟ್‌ಮೆಂಟಾಕ್ ಜೆರೊಮಾ ಮುಕಾಂತ್ರ್‌ಚ್ ದಾಡುನ್ ದಿಲಿ. ಹೆಂ ನವಾಲ್ ಕಶೆಂ ದಿಸ್ಲೆಂ ನಾ ಜೆರೊಮಾಕ್. ಮೆಥ್ಯುಚೆ ಖ್ಹೆಳ್ ತೊ ಬರ್‍ಯಾನ್ ಜಾಣಾಸ್ಲೊ.
ಮೌರಿಸ್ ಅಗುಸ್ತಿನಾಕ್ ಸಾಂಜೆಚ್ಯಾ ಜಮಾತಿಚೊ ಸಂದೇಶ್ ದಿತಾನಾ ತಾಣೆ ಸುಚಾಯ್ಲೆಂ – ಮ್ಹಜ್ಯಾ ಇಲೆಕ್ಷನ್ ಕ್ಯಾಂಪೇಯ್ನಾಚೊ ಫ್ಲೆಕ್ಸ್ ಜಮಾತಿಚ್ಯಾ ಮಯ್ದಾನಾರ್ ಆಜ್ ಪುಣಿ ಉಬಾಜೆ. ಎಕ್ ಖ್ಹೆಳ್ ಖ್ಹೆಳ್ಯಾಂ, ಲಿಲಿಯನ್ ಜೆನಿಸ್ ಆನಿ ತಿಚೊ… ಯ್ಯಾಕ್ಕ್… ಕ್ಲೆರೆನ್ಸ್ ಡೊಮಿನಿಕ್, ತಾಂಕಾಂಯಿ ಆಪಯ್!
ಮೌರಿಸ್ ಗುಳ್ಗುಳ್ಯಾಂನಿ ಹಾಸ್ಲೊ.
‘ಆಜ್ ಪುಣಿ ಮ್ಹಳ್ಯಾರ್ ಕಿತೆಂ, ಸರ್?’ ವಿಚಾರ್‍ಲೆಂ ಜೆರೊಮಾನ್. ‘ಟೇಯ್ಲರಾಕ್ ತುಂಮಿಂಚ್ ನ್ಹಯ್ ಹಾಡಯಿಲ್ಲೊ ತುಮ್ಚ್ಯಾ ಎಲಿಸಾಂವ್ ಕ್ಯಾಂಪೇಯ್ನಾ ಖಾತಿರ್?’
‘ತುಮಿ ತಶೆ ಚಿಂತ್ಲ್ಯಾರ್ ಹಾಂವ್ ಜವಬ್ದಾರ್ ನ್ಹಯ್. ಥೊಡ್ಯೊ ಸಂಗ್ತಿ ದಿಸ್ತಾತ್ ಅಶ್ಯೊ, ಸಮ್ಜಾತಾತ್ ತಶ್ಯೊ ಆನಿ ವರ್ತೊವ್ತಾತ್ ಬಲ್ತ್ಯೊಚ್!’
ಜೆರೊಮಾನ್ ಕಿತೆಂಚ್ ಮ್ಹಳೆಂ ನಾ. ತಾಕಾ ಟೇಯ್ಲರಾಚಿಂ ಉತ್ರಾಂ ಧೊಸ್ತಾಲಿಂ – ಆತಾಂ ವೇಳ್ ಆಯ್ಲಾ. ಕಸಲೊ ವೇಳ್ ಆಯ್ಲಾ, ಕಸಲ್ಯಾಂಚ್ಯೊ ವೇಳ್ ಆಯ್ಲಾ? ಹ್ಯಾ ರೆವರೆಂಡಾನ್ ಪೆಟ್ರೊಚೆರ್ ಇತ್ಲೊಯಿ ಅಸಲೊಯಿ ಖಾಬೂ ಹಾಡ್ಲಾ? ತುಂ ಖಂಯ್ ಆಸಾಯ್ ರೆವರೆಂಡ್ ಮ್ಹಣ್ ವಿಚಾರುಂಕ್ ಜೆರೊಮಾನ್ ದೊದೋನ್ ಪಾವ್ಟಿಂ ವೋಂಟ್ ಉಸಯ್ಲೆ ಪುಣ್ ವಿಚಾರ್‍ಲೆಂ ನಾ.
‘ತುಂವೆಂಯಿ ಆಯ್ಚಾ ಜಮಾತಿ ಯೆಂವ್ಕ್‌ಚ್ ಜಾಯ್, ಹೆಲೀನಾ!’ ತಾಣೆ ಹುಕುಮ್ ಅಶಿ ದಿಲಿ ಹೆಲೀನಾಕ್. ತಾಚೆ ದೊಳೆ, ಪೊಲೆ ಆನಿ ಸಗ್ಳೆ ಜಿಸ್ಮ್ ಅಶೆಂ ಸುಸ್ಮೊಡಿತ್ ಜಾಲ್ಲೆಂ ಕಿ ತೆಂ ಆತ್ತಾಂ ಪಿಗಳ್ಟಾ ಮ್ಹಳ್ಳೆಪರಿಂ ದಿಸ್ತಾಲೆಂ. ‘ತುಕಾ ಜಾಲಾಂ ತರಿ ಕಿತೆಂ?’
‘ಆಮ್ಕಾಂ ಸರ್ವಾಂಕ್ ಜಾಲಾಂ ತರಿ ಕಿತೆಂ?’ ಹೆಲೀನಾನ್ ಪಾಟಿಂ ಮಾರ್‍ಲೆಂ. ‘ಕಿತ್ಯಾಕ್ ಹಿ ಸಾತ್ವಿ ಜಮಾತ್ ಕಡ್ಡಾಯೆಚಿ ಕರುಂಕ್ ತುಂ ಪಳೆತಾಯ್? ಆಜ್ ಕಿತೆಂ ಜುಜೆಫಾತ್ ಫಾಲ್ಕೆಂ ಉಗ್ತೆಂ ಜಾತೆಲೆಂ, ನಿಮಾಣಿ ಝಡ್ತಿ ಚಲ್ತೆಲಿ?’
‘ಹಾಂವ್ ನೆಣಾಂ ಪುಣ್ ಆಯ್ಚೆ ಜಮಾತಿಂತ್ ಕಿತೆಂ ತರಿ ಘಡ್ಚೆಂ ಆಸಾ. ರೆವರೆಂಡ್ ಟೇಯ್ಲಾರಾನ್ ಮ್ಹಾಕಾ ತಸಲೊಚ್ಚ್ ಸಂದೇಶ್ ದಾಡ್ಲಾ.’
‘ಆನಿ ಖಂಯ್ ಆಸಾ ತೊ?’
‘ಹಾಂವ್ ನೆಣಾಂ.’
‘ತರ್ ತುಕಾ ಸಂದೇಶ್ ಕಶೆ ಪಾವಿತ್ ಜಾತಾತ್? ಆನಿ….. ವಿಚಾರ್ತಾಂ ಹಾಂವ್… ರಿಚರ್ಡ್ ಖಂಯ್ ಗುಲ್ಲ್ ಜಾಲಾ? ಕಿತೆಂ ಚಲ್ತಾ ಒಸಿಸಾಂತ್? ರಿಚರ್ಡ್ ಒಸಿಸಾಚೊ ಸ್ಟಾಫ್. ತೊ ನಪಂಯ್ಚ್ ಜಾಲೊ ಮ್ಹಣ್ಟಾನಾ ಒಸಿಸಾಚ್ಯಾ ಆಡಳ್ತೆಕ್ ಜವಬ್ದಾರ್ ಬಾಂದಿನಾ ಕಸಲಿಂ ತರಿ ಸೊದ್ನಾಂ ಕರ್ಚಿಂ/ ತಾಣೆ ದಗಾಲ್ಭಾಜ್ ಕೆಲ್ಯಾ ಮ್ಹಳ್ಳೆಂ ಸತ್ ವ್ಹಯ್ ಯಾ ನ್ಹಯ್ ತರಿ, ಮೆಥ್ಯುನ್ ಕಸಲೆಂ ಪುಣಿ ಕ್ರಮ್ ಘೆಜೆಯ್ ಯಾ ನಾ?’
‘ಹೆಂ ಸವಾಲ್ ತುಂ ಮೆಥ್ಯುಕ್‌ಚ್ ವಿಚಾರ್, ಹೆಲೀನಾ!’ ಜೆರೊಮಾಚೊ ತಾಳೊ ಖಡ್ಪ್ ಜಾಲೊ. ‘ರಿಚರ್ಡ್ ನಪಂಯ್ಚ್ ಜಾಲ್ಲ್ಯಾ ಸಾಂಜೆಥಾವ್ನ್ ತುಂ ಪೆಟ್ರೊಂತ್ ನಾತ್‌ಲ್ಲೆಂಯ್. ಮೆಥ್ಯುನ್ ತುಜೊ ಕಾಂಯ್ ವಿಚಾರ್ ಕೆಲೊ?’
‘ಪುಣ್ ಹಾಂವ್ ನಪಂಯ್ಚ್ ಜಾಂವ್ಕ್ ನಾ.’ ಹೆಲೀನಾ ಉಬೆಂ ಜಾಲೆಂ. ‘ಹಾಂವ್ ಮ್ಹಜ್ಯಾ ಎಸ್ಟೇಟಿಂತ್ ಆಸ್‌ಲ್ಲಿಂ ಮ್ಹಳ್ಳ್ಯಾಕ್ ಮ್ಹಜೆಲಾಗಿಂ ದಾಕ್ಲೆ ಆಸಾತ್. ಹಾಂವೆಂ ರಜೆ-ಪತ್ರ್‌ಯಿ ದಾಕಲ್ ಕೆಲಾಂ.’
‘ತರ್ ರಿಚರ್ಡಾಚೆ ಸೊದ್ನೆಕ್ ತುಂ ಕಿತ್ಯಾಕ್ ಲಾಗುಂಕ್‌ನಾಂಯ್?’ ವಿಚಾರ್‍ಲೆಂ ಜೆರೊಮಾನ್. ‘ಹೊ ತುಮ್ಚೊ ಖಾಸ್ಕಿ ವಿಷಯ್ ಆನಿ ಹಾಂವೆಂ ಕಿತ್ಯಾಕ್ ಭಾಸಾಭಾಸೆಂತ್ ಮೆತೆರ್ ಜಾಯ್ಜೆ? ಆತಾಂ ಸರ್ವಾಂಚೆ ಹಾತ್ ತಾತಾಂಚ್ಯಾ ಮಾತ್ಯಾರ್. ರೆವರೆಂಡಾನ್ ಆಯ್ಚೆ ಜಮಾತಿಚೊ ತೀಬ್ ದಿಲಾ ನ್ಹಯ್ – ಆಜ್ ಪವಿತ್ ಅತ್ಮ್ಯಾನ್ ಆಮ್ಕಾಂ ಝಡ್ತೆಂಚ್ಯಾ ಝುಜಾಕ್ ಆಪಯ್ಲಾಂ.’
‘ಕೊಣಾಚಿ ಝಡ್ತಿ ಆನಿ ಕೊಣಾಚೆಂ ಝುಜ್?’ ಹೆಲೀನಾನ್ ಜೆರೊಮಾಚ್ಯಾ ನಾಕಾ ಪಂದಾಕ್ ಆಪ್ಲಿ ಮುಟ್ ಧರುನ್ ಹಾಲಯ್ಲಿ. ‘ಮ್ಹಜ್ಯಾ ಸವಲಾಚಿ ಜಾಪ್ ಹಾಂವ್ಂಚ್ ದಿತಾ, ಮಿಸ್ಟರ್ ಜೆರೊಮ್ ಲಾಜ್ರಾ! ಹೆಂ ಖರೆಂಚ್ ಝಡ್ತೆಚೆಂ ಝುಜ್ ವ್ಹಯ್ ತರ್, ವೇದಿಚೆರ್ ಚಡೊಂಕ್ ಮ್ಹಾಕಾ ಎಕ್ ಅವ್ಕಾಸ್ ದಿ. ತಜ್ವೀಜ್ ಕರುಂಕ್ ಗೆಲ್ಯಾರ್ ಆಮ್ಕಾಂ ಹರ್ಯೆಕ್ಲ್ಯಾಕ್, ಮ್ಹಾಕಾ, ತುಕಾ, ಮೆಥ್ಯುಕ್, ರಮೋನಾಕ್ ಆನಿ ತುಜ್ಯಾ ಈವಾಕ್ ಸಯ್ತ್‌ಯಿ ವೇದಿರ್ ಚಡೊಂಕ್ ಹೆಂ ಝುಜ್ ಝುಜೊಂಕ್ ಟೇಯ್ಲರಾನ್ ಅವ್ಕಾಸ್ ದೀಜೆ. ಪವಿತ್ ಅತ್ಮ್ಯಾನ್ ಆಮ್ಕಾಂ ಆಪಯ್ಲಾಂ ಮ್ಹಣ್ ಗಾಜೊವ್ನ್ ತೊ ವೇದಿರ್ ಚಡ್‌ಲ್ಲೊ ನ್ಹಯ್. ಆಮಿ ವೇದಿರ್ ಆಸ್ತಾನಾ ತಾಣೆಂಯಿ ಆಸಾಜೆ. ಸಾಂಗ್ ಮ್ಹಾಕಾ, ರೆವರೆಂಡಾಚ್ಯಾ ದಲಾಲ್ಯಾ – ಖಂಯ್ ಲಿಪ್ಲಾ ರೆವರೆಂಡ್ ಫ್ರೆಡ್ ಟೇಯ್ಲರ್?’
ಜೆರೊಮಾನ್ ರಾಗ್ ತಾಪಯ್ಲೊ ನಾ ಪುಣ್ ಆಪ್ಲಿಂ ಭುಜಾಂ ಉಡಯ್ಲಿಂ. ‘ಕಾಂಯ್ ರಿಚರ್ಡ್ ಕ್ಲೆಮೆಂಟ್ ಖಂಯ್ ಲಿಪ್ಲಾ ಮ್ಹಣ್ ಕೊಣೆಂಯಿ ಸೊದುನ್ ಕಾಡ್ಲ್ಯಾರ್…. ತುಜೊ ರಿಚರ್ಡ್ ಮೆಳತ್ ಕೊಣ್ಣಾ!’ ತೊ ಮಟ್ವ್ಯಾನ್ ಹಾಸ್ಲೊ. ‘ತುಮಿಂ ಸರ್ವಾಂ ಎಕಾಚ್ಚ್ ನಮೂನ್ಯಾಚೆಂ ಉಲವ್ಣೆಂ ಉಲಯ್ತಾತ್. ಕಾಂಯ್ ರೆವರೆಮ್ಡಾಚೊ ಮಾಂತ್ರಿಕ್ ಪ್ರಬಾವ್?’
‘ಮ್ಹಜೊ ರಿಚರ್ಡ್?’ ಹೆಲೀನಾ ಖೆಂಚ್ಲೆಂ. ಜೆರೊಮಾಚ್ಯಾ ತೊಪ್ಣೆಚೆಂ ಗಮನ್ ತಾಣೆ ಕೆಲೆಂ ನಾ. ‘ತುಜೆಂ ತೆಲ್ಮಾ ಖಂಯ್ ಲಿಪ್ಲಾಂ? ಜೆರೊಮ್ ಆತಾಂ ಹೆಂ ಎಕ್ ಉಗ್ತೆಂ ಝುಜ್. ಪುಣ್ ಕೋಣ್ ಕೊಣಾಲಾಗಿಂ ಝುಜ್ತಾ, ಕಿತ್ಯಾಕ್ ಝುಜ್ತಾ ಕಸಲೆಂ ಝುಜ್ ಝುಜ್ತಾ ಮ್ಹಳ್ಳೆಂ ಯೆಕಾಮೆಕಾ ನೆಣಾಂತ್. ಮೆಥ್ಯುಕ್ ತುಂವೆಂ ಆಪವ್ಣೆಂ ದೀವ್ನ್ ಜಾಲೆಂ. ಎಮ್.ಡಿ. ಛೇಂಬರಾಂತ್ ಆಸಾ ತೊ. ವಚ್, ತಾಚ್ಯಾ ಕಾಳ್ಜಾಕ್ ಕಾಂಯ್ ಥಂಡಖ್ ಮೆಳತ್.’
‘ಸರ್ವಾಂಚ್ಯಾ ಕಾಳ್ಜಾಂಕ್ ಜಾಲಾಂ ತರಿ ಕಿತೆಂ?’ ಆಪ್ಣಾಕ್‌ಚ್ ವಿಚಾರ್‍ಲೆಂ ಜೆರೊಮಾನ್. ‘ಜಮಾತಿ ವಿಷಾಂತ್ ಮ್ಹಜ್ಯಾ ಈವಾನ್‌ಯಿ ತಶೆಂ ವಿಚಾರ್‍ಲೆಂ’
ದೊಳ್ಯಾಂನಿ ಮಿಣ್ಕುಲೆ ಘೆವ್ನ್ ಹೆಲೀನಾ ತ್ರಾಸಾನ್ ವೊಳಾಲ್ಲೊ ಹಾಸೊ ಹಾಸ್ಲೆಂ. ‘ತುಜ್ಯಾ ಈವಾನ್, ನ್ಹಯ್?’ ತಾಣೆ ವಿಚಾರ್‍ಲೆಂ. ‘ಹ್ಯಾ ಜಮಾತಿಚೆಂ ಐಲಾನ್ ಜಾಲ್ಲೆಂಚ್ ಸಂಬಂದ್ ಜಾಲ್ಲ್ಯಾಂನಿ ತಾತಾಂಚೆ ಮುಲೆ ಸೊದ್ಲೆ ಆನಿ ಹರ್ಯೆಕ್ಲ್ಯಾಕ್ ಮ್ಹಜೆಂ ಹೆಂ, ಮ್ಹಜೊ ತೊ ಮ್ಹಣ್ ಎಕೇಕ್ ಜೊಡಿದಾರ್, ಜೊಡಿದಾರ್‍ನ್ ಮೆಳ್ಳಿ ಯಾ ಜಾಯ್ ಪಡ್ಲಿ. ಕಿತೆಂ ಮ್ಹಣಾಲೆಂ ತುಜೆಂ ಈವಾ? ಜಮಾತಿಕ್ ಯೆತೆಲೆಂ, ವ್ಹಯ್?’
ಹೆಲೀನಾಚ್ಯಾ ಸವಲಾಚೆರ್ ಜೆರೊಮಾನ್ ನಿಹಾಳ್ ಕೆಲೊ ಪುಣ್ ಉತ್ರಾಂನಿ ಕಸಲೆಂಚ್ ಮ್ಹಳೆಂ ನಾ. ‘ಜೆರೊಮ್, ಡಾರ್ಲಿಂಗ್!’ ದಿವಾನ್‌ಖಾನ್ಯಾಂತ್‌ಚ್ ತಾಕಾ ಆರಾವ್ನ್ ಧರುನ್ ಈವಾನ್ ಮ್ಹಳೆಂ. ಹೊ ಆವ್ತಾರ್ ಜೆರೊಮಾಕ್ ನವೊ ನ್ಹಯ್ ತರಿ ಭಾರಿಚ್ ಭಾರಿಚ್ ಅಪ್ರೂಬ್. ‘ಸ-ವಿ ಜಮಾತ್ ಸಂಪ್ತೆಚ್ ತುಂ ಸಯ್ರ್-ಭಯ್ರ್ ಕಸೊ ಜಾಲಾಯ್. ಜಾಲಾಂ ತರಿ ಕಿತೆಂ? ಒಸಿಸಾಂತ್ ಸರ್ವ್ ಸುಗಮ್ ಆಸಾ?’
ಜೆರೊಮಾನ್ ಎಕ್ ಸ್ವಾಸ್ ಸೆವ್ಲೊ. ‘ಮೆಥ್ಯು ಲಿಯೊ ಆರಾಮಾರ್ ಆಸಾ. ಸಾತ್ವಿ ಆನಿ ನಿಮಾಣಿ ಜಮಾತ್ ರೆವರೆಂಡಾನ್ ಸರ್ವ್ ಮಾದ್ಯಮಾಂನಿ ಐಲಾನ್ ಕೆಲ್ಯಾ ಉಪ್ರಾಂತ್ ಪೆಟ್ರೊಂತ್ ಕಸಲಿಗಿ ನವಿಚ್ಚ್ ವೀಜ್ ಸಕತ್ ವ್ಹಾಳೊಂಕ್ ಲಾಗ್ಲ್ಯಾ….’
‘ಹ್ಯಾ ನವ್ಯಾ ವೀಜ್ ಸಕ್ತೆಚೊ ದಾವ್ ಒಸಿಸಾಕ್ ಲಾಗ್ಲಾ, ಜೆರೊಮ್, ಡಾರ್ಲಿಂಗ್?’ ಈವಾನ್ ವಿಚಾರ್‍ಲೆಂ. ‘ಚಲ್ಯಾಂ ಬಸ್ಯಾಂ, ಎಕೇಕ್ ಕ್ಯಾಂಪಾರಿ ಘೆವ್ಯಾಂ, ಆಮಿ ಅಶೆ ಬಸುನ್ ಉಲಯ್‌ನಾಸ್ತಾ ಸಬಾರ್ ತೇಂಪ್ ಜಾಲೊ ನ್ಹಯ್? ಕಿತ್ಲೆಂ ಆಶೆತಾಂ ಹಾಂವ್ ಉಗ್ತ್ಯಾನ್ ಉಲಂವ್ಕ್! ಎಕಾ ವಿಶಾಲ್ ಮಯ್ದಾನಾರ್ ಉಬೆಂ ರಾವೊನ್ ಮ್ಹಾಕಾ ಮ್ಹಜೆಂ ಕಾಳಿಜ್ ಖಾಲಿ ಕರಿಜೆ. I want to pour out my heart. ಆಮ್ಚ್ಯಾ ಕಾಳ್ಜಾಂಕ್ ಜಾಲಾಂ ತರಿ ಕಿತೆಂ?’ ತೆಂ ಹಾಸ್ಲೆಂ, ಕಸಲಿಗಿ ಫಿರ್ಕಿ ಸದಿಳ್ ಜಾಲ್ಲೆಪರಿಂ. ‘ಜಮಾತಿ ಪಯ್ಲೆಂ ರೆವರೆಂಡಾಕ್ ಭೆಟ್ಚಿ ಸಾದ್ಯತಾ ಆಸಾ?’
‘ಕಿತ್ಯಾಕ್?’ ಜೆರೊಮಾಚ್ಯಾ ಕಾಳ್ಜಾಂತ್ ‘ಕಲ್ಲ್’ ಜಾಲೆಂ. ‘ಕಿತ್ಯಾಕ್?’
‘ಮ್ಹಾಕಾಯಿ ವೇದಿರ್ ಚಡೊಂಕ್ ಜಾಯ್!’ ಈವಾಚಿ ಜಾಪ್ ಆಯ್ಕೊನ್ ಜೆರೊಮಾನ್ ದೊಳೆ ರುಂದಾಯ್ಲೆ. ‘ಮ್ಹಾಕಾ ಝಡ್ತೆಚ್ಯಾ ಝುಜಾಂತ್ ಪಾತ್ರ್ ಘೆಜೆ ಆನಿ ಉಲಯ್ಜೆ.’
‘ತುಜೆ ವಿಷಾಂತ್ ಮ್ಹಾಕಾ ಕಳಿತ್ ನಾತ್‌ಲ್ಲೆಂ ಕಸಲೆಂ ತುಂ ಉಚಾರ್ನ್ ಸಾಂಗ್ಶಿ?’
ಈವಾನ್ ಆತಾಂ ಆಪ್ಲಿಂ ಭುಜಾಂ ಉಡಯ್ಲಿಂ. ‘ತುಂ ಕಿತ್ಲೆಂ ಜಾಣಾಂಯ್ ಮ್ಹಳ್ಳೆಂ ಹಾಂವ್ ನೆಣಾಂ ಅನಿ I don’t care!’
‘ಜಮಾತೆಂತ್ ಜಾಯ್ಜೆ ಆಸ್ಚೆಂ ಝುಜ್ ಆಮಿ ಹಾಂಗಾಸರ್‌ಚ್ ಸುರು ಕರ್ಚೆಂ ನಾಕಾ!’ ಖಬಡ್ದಾರೆನ್ ಮ್ಹಳೆಂ ಜೆರೊಮಾನ್. ‘ರೆವರೆಂಡಾನ್ ಪೆಟ್ರೊಕ್ ಯೆವ್ನ್ ಚಲಯಿಲ್ಲ್ಯೊ ಸ ಜಮಾತಿ ಭಾವಾರ್ಥ್ಯಾಂನಿ ಅಸಲ್ಯೊ ಭಾವಾರ್ಥಿಕ್ ಉಡ್ಕ್ಯೊ ಮಾರಿಶೆಂ ಕರುಂಕ್ ಪಾವ್ಲ್ಯಾತ್ ಕಿ…. ತುಂ ಸಮ್ಜೊಂಚೆಂನಾಂಯ್. ಸಬಾರ್ ಸಂಗ್ತಿ ಆಸ್ತಿತ್ ತುಕಾ ವೇದಿಚೆರ್ ಅವ್ಕಾಸ್ ದಿಲ್ಯಾ ಸುಟಾವ್ಯೊ ಕರುಂಕ್…..’
‘ದೆಕಿಕ್…’ಈವಾ ಹಾಸ್ಲೆಂ. ‘ಸ್ಕಾಯ್‌ಪಾರ್ಕ್ ಆನಿ ಉಪ್ರಾಂತ್? Skypark and next?’ ತಾಣೆ ಆಪ್ಲೊ ಹಾಸೊ ಮುಂದರಿಲೊ.
‘ಮ್ಹಾಕಾ ಡ್ರಿಂಕ್ ನಾಕಾ!’ ಜೆರೊಮಾನ್ ಈವಾಕ್ ಕಳಯ್ಲೆಂ. ‘ಮ್ಹಾಕಾ ವಾವ್ರ್ ಆಸಾ ಆನಿ ಸಬಾರ್ ಕಾಮಾಂ ಬಾಕಿ ಆಸಾತ್.’
ಈವಾಚೆ ವರ್ತನ್ ಆನಿ ಹಾಸೊ ಜೆರೊಮಾಚ್ಯಾ ಮತಿಂತ್ ಆಸ್‌ಲ್ಲೊ ತೊ ಮೆಥ್ಯು ಲಿಯೊಚ್ಯಾ ಛೇಂಬರಾಂತ್ ರಿಗ್ತಾನಾ. ತಾಂಚ್ಯೊ ದಿಷ್ಟಿ ಮೆಳ್ಳ್ಯೊ, ಖಿಳಾಲ್ಯೊ. ಜೆರೊಮಾನ್ ಆಪ್ಲ್ಯಾ ಉಜ್ವ್ಯಾ ಹಾತಾಚಿ ತಾಳು ಖೊರ್ಪಿಲಿ. ‘ತುಜೊ ಹಾತ್!’ ಮೆಥ್ಯುಚಿಂ ಉತ್ರಾಂ ಜೆರೊಮಾಚ್ಯಾ ಮತಿಕ್ ಆಯ್ಲಿಂ. ‘ಮ್ಹಜ್ಯಾ ಲೀಜಾ ಖಾತಿರ್… ತುಜೊ ಹಾತ್!’
‘ಹಾಂವ್ ವಿಸ್ರೊಂಕ್ ನಾ!’ ಮ್ಹಳೆಂ ಮೆಥ್ಯುನ್. ‘ಕಿತ್ಯಾಕ್ ಆಯಿಲ್ಲೊಯ್?’ ತಾಚ್ಯಾ ಬೊಟಾಂ ಮದೆಂ ಪಾಲ್ವಲ್ಲೆಂ ಸಿಗಾರ್ ಆಸ್‌ಲ್ಲೆಂ. ‘ಹಿ ಸವಯ್ ಹಾಂವ್ ಸೊಡುಂಕ್ ಪಳೆತಾಂ.’ ಮ್ಹಳೆಂ ಮೆಥ್ಯುನ್ ಪುಣ್ ತಾಚ್ಯಾ ಉತ್ರಾಂನಿ ವಜನ್ ನಾತ್‌ಲ್ಲೆಂ.
‘ಕಿತ್ಯಾಕ್ ಆಯಿಲ್ಲೊಯ್?’
‘ಆಜ್ ಸಾತ್ವಿ ಆನಿ ನಿಮಾಣಿ ಜಮಾತ್ ಆಸಾ!’ ಮ್ಹಳೆಂ ಜೆರೊಮಾನ್. ‘ತುಕಾ ಜಾಗಂವ್ಕ್ ಆಯಿಲ್ಲೊಂ. ಕಾಂಯ್ ತರಿ ಆಸ್ತೆಲೆಂ ಆಯ್ಚೆ ಸಾಂಜೆರ್!’
ಮೆಥ್ಯು, ಆಪ್ಲ್ಯಾ ಸುಖಾಳ್ ಆಸನಾಚೆರ್ ವಣ್ಕಾಲೊ. ‘ಕಾಂಯ್ ತರಿ ಆಸ್ತೆಲೆಂ? ಕಾಂಯ್ ಥೊಡೆ ತಕ್ಲೆ ಝಡ್ತೆಲೆ ಯಾ ಝಡ್ತೆಚೆಂ ಝುಜ್ ಚಲ್ತೆಲೆಂ. ತುಜೊ ತಕ್ಲೊ ಸಾಂಬಾಳ್ ಹಾಂ, ಜೆರೊಮ್. ಮ್ಹಜೊ ಝಡ್ಲ್ಯಾರ್ ಒಸಿಸ್ ಕೋಣ್ ಚಲಯ್ತೆಲೆ? ವಾಚ್ಲೆಂ ಹಾಂವೆಂ ದೈನಿಕಾಚೆರ್…. ಹಾಂ…. ಕಿತೆಂ ಹೆಂ ಪೆಟ್ರೊ ಟಾಯ್ಮ್ಸ್. ತುಂವೆಂಚ್ ದಿಲಾಂಯ್ ಆಸ್ತೆಲೆಂ ಹೆ ಐಲಾನ್. ಹಾಂತ್ಲಿ ಭಾಸ್‌ಯಿ ತುಜಿಚ್. ಪುಣ್ ಖಂಯ್ ಆಸಾ ರೆವರೆಂಡ್? ಬೀಚ್‌ಕೊಟೆಜಿ ಉಪ್ರಾಂತ್ ತಾಣೆ ಮ್ಹಜೊ ಸಂಪರ್ಕ್ ಕರುಂಕ್ ನಾ, ಹೆಲೀನಾ ರಂಗಸ್ಥಳಾಚೆರ್ ನಾತ್‌ಲ್ಲೆಂ ತರಿ ದೋನ್ ದೀಸ್ ಮಾಯಾಕ್ ಜಾಲೆಂ, ರಿಚರ್ಡಾಚೊ ಪಾತ್ತೊ ನಾ…. ತುಂ ಮಾತ್ರ್…. ಅಂತುಖುರಿಸಾಪರಿಂ ಭಂವ್ತಾಯ್.’
‘ತಮಾಷಾಂಕ್ ಹೊ ವೇಳ್ ನ್ಹಯ್, ಮೆಥ್ಯು! ದಯಾ ಕರುನ್ ಜಮಾತಿಕ್ ಯೆ.’
ಮೆಥ್ಯುನ್ ತಾಕಾ ಭಾಯ್ರ್ ವಚುಂಕ್ ಇಸಾರೊ ದಿಲೊ.
ತೊ ಭಾಯ್ರ್ ವೆತೆಚ್ ಮೆಥ್ಯು ಲಿಯೊ ಎಕ್ ಮಾರ್ಮಿಕ್ ಹಾಸೊ ಹಾಸ್ಲೊ ಆನಿ ತಾಣೆ -ಆಪ್ಲ್ಯಾ ನಿಚೆವಾಕ್ ಉಳ್ಟೆಂ ಜಾವ್ನ್- ಪಾಲ್ವಾಲ್ಲೆಂ ಆಪ್ಲೆಂ ಸಿಗಾರ್ ಪೆಟಯ್ಲೆಂ.
ಉಪ್ರಾಂತ್ ತೊ ಕಸಲ್ಯಾಗಿ ಚಿಂತ್ನಾಂನಿ ಬುಡ್ಲೊ ಕಿ ತಾಕಾ ರಮೋನಾ ಆಪ್ಲ್ಯಾ ಛೇಂಬರಾಂತ್ ಆಯಿಲ್ಲಿ ಗೋಷ್ಟಿಚ್ ಜಾಲಿ ನಾ.
‘ಡೆಡಿ!’ ತಾಣೆ ಮ್ಹಳೆಂ ಮೆಥ್ಯು ಸಾಮ್ಕಾರ್ ಬಸ್ಕಾ ಘೆವ್ನ್. ‘ಕಿತ್ಲೆ ದಿಸ್ ಜಾಲೆ ಆಮಿ ಮೆಳಾನಾಸ್ತಾಂ. ಮ್ಹಾಕಾ ದಿಸ್ತಾ ತ್ಯೆ ಸಕಾಳಿಂ ಜೆರೊಮಾನ್ ಮ್ಹಾಕಾ ವತ್ತಾಯೆನ್ ಬೆಡ್‌ರೂಮಾಕ್ ದಾಡ್‌ಲ್ಲೆಂ. ಕಿತೆಂ ಮ್ಹಳೆಂ ತಾಣೆಂ… ತುಂ ಪರ್ತ್ಯಾನ್ ತುಜ್ಯಾ ಬೆಡ್‌ರೂಮಾಕ್ ವಚ್ ಆನಿ ನೀದ್ ಮುಂದರಿಯ್. ಆನಿ ಸಾತ್ ದಿಸಾಂನಿ ಟೇಯ್ಲರಾಚಿ ನಿಮಾಣಿ ಜಮಾತ್ ಆನಿ ಜಾಯ್ತೆಂ ಕಾಮ್ ಆಮ್ಕಾಂ ಕರುಂಕ್ ಆಸಾಂ. ಬರಾಬರ್ ಮ್ಹಳ್ಳೆಂ ಹಾಂವೆಂ, ಹಾಂವ್ ಫ್ರೆಶ್ ಜಾತೆಚ್ ತುಕಾ ಕೊಲ್ ಕರ್ತಾಂ!
‘ತರ್?’ ಮೆಥ್ಯುನ್ ವಿಚಾರ್‍ಲೆಂ. ‘ಹಾಂಗಾಸರ್ ಕಿತೆಂ ಕರ್ತಾಯ್ ತುಂ? ಆಮ್ಕಾ ಕಾಮ್ ಆಸಾ, ಜವಬ್ದಾರಿ ಆಸಾ..’
‘ಆನಿ ಆಜ್ ಸಾಂಜೆರ್ ಸಾತ್ವಿ ಆನಿ ನಿಮಾಣಿ ಜಮಾತ್ ಆಸಾ!’
‘ಬರಾಬರ್! ಕಿತೆಂ ಜಾಯ್ ತುಕಾ?’ ಮೆಥ್ಯುನ್ ವಿಚಾರ್‍ಲೆಂ ‘ಜಮಾತಿಕ್ ಯೆಂವ್ಕ್ ನಾಕಾ? ಜೆರೊಮಾಕ್ ಸಾಂಗ್. ತೊ ಹಾಜರಿ ಕಾಡ್ತೆಚ್ ಆಸಾ.’
‘No need to be soo sarcastic!’ ಮ್ಹಳೆಂ ರಮೋನಾನ್ ಎಕ್ ಸಿಗ್ರೆಟ್ ಪೆಟವ್ನ್. ‘ಚಿಂತಿನಾಸ್ತಾಂ ಆಯ್ಲಿಂ ಕಿತ್ಯಾಕ್ ಹಾಂವ್ ಜೆರೊಮಾಕ್ ಭೆಟೊಂಕ್ ಸಕ್ಲಿಂ ನಾ ಕಿತ್ಯಾಕ್ ಟೇಯ್ಲರಾನ್ ಆಪ್ಲಿ ಜಮಾತ್ ಸಾತ್ ದಿಸಾಂಕ್ ಪಾಟಿಂ ಘಾಲ್ಯಾ ಉಪ್ರಾಂತ್ ಮ್ಹಾಕಾ ಹೆರ್ ಥೊಡೆಂ ಕಾಮ್ ಪಡ್ಲೆಂ ಆನಿ ಜೆರೊಮ್ ಲಾಜ್ರಾ ಖಂಚಾಗಿ ಮಾಂಕ್ಡಾ ಸಂಸಾರಾಂತ್ ಆಸ್ಚೆಪರಿಂ ಕರ್ತಾಲೊ. ಜಮಾತಿ ಲಗ್ತಿ ತಸಲಿ ವ್ಹಡ್ಲಿ ತಯಾರಾಯ್ ಕರುಂಕ್ ನಾತ್‌ಲ್ಲಿ. ಸಜಾವಟೆಂತ್ ಥೊಡಿ ಬದ್ಲವಣ್ ಜಾಯ್ ಆಸ್‌ಲ್ಲಿ ರೆವರೆಂಡಾಕ್. ವಂಡರ್‌ಫುಲ್ ದಿಸ್ತಾ ನ್ಹಯ್ ರೆವರೆಂಡಾಚೆ ನವೆಂ ಐಲಾನ್- ಆಜ್ ಪವಿತ್ ಅತ್ಮ್ಯಾನ್ ಆಮ್ಕಾಂ ಝಡ್ತೆಂಚ್ಯಾ ಝುಜಾಕ್ ಆಪಯ್ಲಾಂ. ಜಮಾತಿಕ್ ಎಕ್ ಚಡಿತ್ ಕೂಸ್ ಮ್ಹಳ್ಯಾರ್ ಮೌರಿಸ್ ಅಗುಸ್ತಿನಾಚ್ಯಾ ಇಲೆಕ್ಷನ್ ಕ್ಯಾಂಪೇಯ್ನಾಚೆಂ ಫ್ಲೆಕ್ಸ್ ಉಮ್ಕಾಳಾಯ್ಲಾಂ, ರೆವರೆಂಡಾಚ್ಯ್ ಖಾಸ್ ಹುಕುಮೆಕ್ ಲಾಗುನ್. ಖರೆಂಚ್, ಡೆಡಿ, ಮ್ಹಾಕಾ ಸಮ್ಜಾನಾ…. ಹೆಂ ಕಿತೆಂ ಘಡ್ತೆಚ್ ಆಸಾ ಮ್ಹಣ್. ತುಜೆ ತಸಲೆ ಜುನ್ಕಾಟ್ ವಯ್ವಾಟಿ ಸಯ್ತ್ ಹ್ಯಾ ಜಮಾತಿಚೆ ಐಲಾನ್ ಜಾತೆಚ್….’
‘ಮತಿ ಭೃಷ್ಟ್ ಜಾಲ್ಯಾತ್?’ ಸವಾಲ್ ವಿಚಾರುನ್ ಮೆಥ್ಯು ಹಾಸ್ಲೊ. ‘ಜರೂರ್ ಯೆ, ರಮಿ, ಹಾಂವ್ ತುಕಾ ಖಾಸ್ ಆಪವ್ಣೆಂ ದಿತಾಂ – ಝಡ್ತೆಂಚ್ಯಾ ಝುಜಾಕ್ ಜರೂರ್ ಯೆ.’
‘ಹ್ಯಾ ಆಪವ್ಣ್ಯಾಚಿ ಗರ್ಜ್ ನಾ, ಡೆಡಿ!’ ಮ್ಹಳೆಂ ರಮಿನ್, ಆಪ್ಲಿ ಸಿಗ್ರೆಟ್ ಪಿರಿಂತ್ ಚಿರ್ಡುನ್. ‘ಹಾಂವ್ ಹ್ಯಾ ಸಗ್ಳ್ಯಾ ಭಾವಾರ್ಥಾಚೆ ಉಡ್ಕೆಂತ್ ಕಿತ್ಲೆಂ ಶಾಮೀಲ್ ಆಸಾಂ ಮ್ಹಣ್ ತುಂ ಜಾಣಾಂಯ್. ಯೆದೊಳ್ ವಿಚಾರಿನಾತ್‌ಲ್ಲೆಂ ಸವಾಲ್ ಹಾಂವ್ ವಿಚಾರ್ತಾಂ, ಡೆಡಿ – ಒಸಿಸಾಂತ್ ಕಿತೆಂ ಘಡ್ಲಾಂ? ಹೆಲೀನಾಚೆ ದುಲೊಬ್ ಮುಕಮಳ್ ಇಂಫೆರ್ನಾಕ್ ವಚುನ್ ಆಯಿಲ್ಲೆಪರಿಂ ಜಾಲಾಂ, ರಿಚರ್ಡ್ ಒಸಿಸಾಂತ್ ನಾ….’
‘Enough, Ramona!’ ಮೆಥ್ಯುನ್ ಮ್ಹಳೆಂ ಆಪ್ಲ್ಯಾ ಹಾತಾಚಿ ತಾಳು ಉಬಾರ್‍ನ್. ‘ಸಾಂಜೆರ್ ಮೆಳ್ಯಾಂ!’
ಹೆಂ ಘಡ್‌ಲ್ಲ್ಯಾ ಚಾರ್ ದಿಸಾಂ ಆದಿಂ, ಮೊದ್ಯಾನ್ ರಾತಿಚೆರ್ ಪೆಟ್ರೊಂತ್ ತೆಂಕ್‌ಲ್ಲ್ಯಾ ಎಕಾ ಪ್ಯಾಸೆಂಜರ್ ವಿಮಾನಾಥಾವ್ನ್ ಎಕ್ ಜೊಡೆಂ ದೆಂವ್ಲೆಂ.
ಚಡ್ ಲಗ್ಗೇಜ್ ತಾಂಚೆಲಾಗಿಂ ನಾತ್‌ಲ್ಲಿ.
ಏರ್‌ಪೊರ್‍ಟಾ ಥಾವ್ನ್ ಹೆಂ ಜೊಡೆಂ ಭಾಯ್ರ್ ಯೆತಾನಾ ಎಕ್ ಟೆಕ್ಸಿ ಡ್ರಾಯ್ವರ್ ಫುಡೆಂ ಯೆವ್ನ್ ತಾಂಕಾಂ ಭೆಟ್ಲೊ. ತೊ ಸಮವಸ್ತ್ರಾರ್ ಆಸ್‌ಲ್ಲೊ ಆನಿ ತಾಣೆ ಹ್ಯಾ ಜೊಡ್ಯಾಚಿ ಟ್ರೊಲ್ಲಿ ಘೆವ್ನ್ ಆಪ್ಲ್ಯಾ ಟೆಕ್ಸೆ ಪರ್ಯಾಂತ್ ಲೊಟುನ್ ವೆಲಿ.
ಲಗ್ಗೇಜ್ ದವರ್‍ತೆಚ್ ತೆಂ ಜೊಡೆಂ ಬಸ್ಲೆಂ ಆನಿ ಟೆಕ್ಸಿ ಸುಟ್ಲಿ.
ತಿ ಟೆಕ್ಸಿ ಜಾವ್ನಾಸ್‌ಲ್ಲಿ ಸ್ಕಾಯ್‌ಪಾರ್ಕ್ ಹೊಟೆಲಾಚಿ.
ಅವಸ್ವರ್ – 96 ►►►
