ಜಾನ್ ಸುಂಟಿಕೊಪ್ಪ ಹ್ಯಾ ಲಿಕ್ಣೆನಾಂವಾನ್ ಬರಂವ್ಚೊ ಜೋನ್ ಪಾವ್ಲ್ ಡಿ’ಸೊಜಾ ವೃತ್ತೆನ್ ಶಿಕ್ಷಕ್. ತಾಚ್ಯೊ ಜಾಯ್ತ್ಯೊ ಕವಿತಾ ಕನ್ನಡಾಂತ್ ಫಾಯ್ಸ್ ಜಾಲ್ಯಾತ್ ಆನಿ ಜಾಯ್ತ್ಯಾ ಕವಿಸಂಮೇಳಾಂನಿ ತಾಣೆ ವಾಂಟೊ ಘೆತ್ಲಾ. ಕವಿತೆ ಸಾಂಗಾತಾ ತೊ ಮಟ್ವ್ಯೊ ಕಾಣಿಯೋಯ್ ಬರಯ್ತಾ. ಪಾಶ್ಚ್ಯಾತ್ಯ್ ಚಿಂತ್ಪಿ ಆನಿ ನವ್ಯ್ ಸಾಹಿತ್ಯಾಥಾವ್ನ್ ಪ್ರಭಾವಿತ್ ಜೋನಾಚ್ಯೊ ಕವಿತಾ ಆನಿ ಕಥಾ ಚಡ್ಕರುನ್ ಮನ್ಶ್ಯಾದಣ್ಸಣ್ ಆನಿ ನಯ್ಸರ್ಗಿಕ್ ಸತಾಚೆ ಭಂವ್ತಣಿ ಪಾಸಾಯೊ ಮಾರ್ತಾತ್. ಕಿಟಾಳಾ ಮಾರಿಫಾತ್ ಜಾನ್ ಸುಂಟಿಕೊಪ್ಪ ಕೊಂಕ್ಣಿ ಸಾಹಿತ್ಯಾಕ್ ಪ್ರವೇಶ್ ಘೆತಾ. ಎದೊಳ್ಚ್ ತಾಣೆ ಆರ್ಸೊ ಯುವ ಕಥಾಸ್ಪರ್ಧ್ಯಾ ಖಾತಿರ್ ಏಕ್ ಕಾಣಿ ಬರಯಿಲ್ಲಿ ಆಸಾ. ವೆಗಿಂಚ್ ತಿ ಕಿಟಾಳಾರ್ ಫಾಯ್ಸ್ ಜಾತೆಲಿ.
– ಸಂಪಾದಕ್
ಹಾಂವ್ ಗೆಲ್ಲೊಂ
ಜಿಹಾದಿಂಚ್ಯಾ ಗಾಂವಾಕ್
ಭಿಯೆವ್ನ್ ಭಿಯೆವ್ನ್ ಘಾಮೆವ್ನ್
ಮೇಟ್ ಏಕ್ ಕಾಡುಂಕೀ
ಪಾಟಿಂ ಮುಕಾರ್ ಪಳೆವ್ನ್ . . .
ಥಂಯ್ಸರ್ ಕುಶೀಲೆ ವಾಡ್ಯಾಂತ್
ಏಕ್ ಮ್ಹಾತಾರೊ ಖೊಂಕ್ತಾಲೊ
ತಾಣೆ ವೊಡ್ಚ್ಯಾ ಹುಕ್ಕಾ ಖಾತಿರ್
ಥಾಂಬ್ಡೆಂ ಥಾಂಬ್ಡೆಂ ಹಡ್ದೆಂ ವಿಂಚ್ತಾಲೊ. . .
ಎಕ್ಸುರೆಂ ಪ್ರಾಯೆಸ್ತ್ ಚೆಡುಂ
ಮಾರ್ಗಾ ದೆಗೆಲೆಂ ಲಾಂಕ್ಡಾಂ ವಿಂಚ್ತಾಲೆಂ
ಬಾಂದ್ಲ್ಲೊ ಭೊರೊ ಉಕಲ್ನ್ ದೀಂವ್ಕ್ ಗೆಲೊಂ
ಬೊರ್ಯಾಂತ್ ಲಾಂಕ್ಡಾಂ ನಾತ್ಲಿಂ
ಲಾಂಬ್ ಹಾಡಾಂತ್ಲೆ ಮಾಸ್ ಕೂಸ್ಲ್ಲೆಂ ದಿಸ್ತಾಲೆಂ . . .
ಚೆಡೊ ಎಕ್ಲೊ ಖೆಳ್ತಾಲೊ
ರಗ್ತಾಂತ್ ಭಿಜ್ಲ್ಲೆಂ ಕಾಳಿಜ್ ಘೆವ್ನ್
ರಗ್ತಾಚ್ಯಾ ಶಿರಾಂನಿ ಬಿಗ್ದುನ್
ಬುಗುರಿ ಖೆಳ್ತಾಲೊ;
ಮಕಾಯ್ ಆಪಯ್ಲೊ
ಯೇ ಗುನ್ನ ಖೆಳ್ಯಾಂ. . .
ಹಾಂವ್ ಧಾವೊಂಕ್ ಲಾಗ್ಲೊಂ
ಜಿಹಾದಿ ಎಕ್ಲೊ ಜಾಂಗೆ ಥಾಪ್ಡುನ್ ಬೊಬಾಟ್ಲೊ
ಆನಿ ಖಿಣಾನ್ ಹಾಂವ್ ಬುಗುರಿ ಜಾಲೊಂ.
– ಜಾನ್ ಸುಂಟಿಕೊಪ್ಪ, ಕೊಡಗು.
