ಮೈಕಲ್ ಸೊಜಾ ತಸಲೆ ಮನಿಸ್ ಆಮ್ಚ್ಯಾ ಸಮಾಜೆಕ್ ಪ್ರೇರಣ್ – ಅ। ಮಾ। ದೊ। ಪೀಟರ್ ಪಾವ್ಲ್ ಸಲ್ಡಾನ್ಹಾ

“ಆಮಿ ಫಕತ್ ಘೆತ್ಲೆ ಮಾತ್, ದೀಂವ್ಕ್  ನಾಂತ್ ಮ್ಹಳ್ಳೆಂ ಚಿಂತಪ್ ನಾಕಾ. ದಿತಲೊ ವ್ಹಡ್ ಆನಿ ಘೆತಲೊ ಲ್ಹಾನ್ ಮ್ಹಣ್ ಕೆದಿಂಕ್‌ಚ್ ಚಿಂತ್ಚೆಂ ನಯ್. ಹ್ಯಾ ಯೋಜನಾ ವಿಶ್ಯಾಂತ್‌ಚ್ ಸಾಂಗ್ಚೆಂ ಜಾಲ್ಯಾರ್ ಪಾಟ್ಲ್ಯಾ ತೀನ್ ವರ್ಸಾಂಚಿಂ ದಿಯೆಸೆಜಿಚಿ ಕರೆಜ್ಮಾಚಿ ಉರವ್ಣಿ ಹ್ಯಾ ಯೋಜನಾಂತ್ ಆಸಾ. ಆಜ್ ಹಾಂಗಾಸರ್ ಫಲಾನುಭವಿ ಜಾವ್ನ್ ಆಯಿಲ್ಲ್ಯಾ ತುಮೀಂಯ್ ಕರೆಜ್ಮಾಚಿ ಉರವ್ಣಿ ದಿಲ್ಯಾ ಮ್ಹಣ್ತಾನಾ, ತುಮ್ಚ್ಯಾಚ್ ದುಡ್ವಾನ್ ಆಮಿ ತುಮ್ಕಾಂ ಕುಮಕ್ ಕರುನ್ ಆಸಾಂವ್”  ಮ್ಹಣಾಲೊ ಅ। ಮಾ। ದೊ। ಪೀಟರ್ ಪಾವ್ಲ್ ಸಲ್ಡಾನ್ಹಾ. 

ನಂತೂರ್ ಸಿ.ಒ.ಡಿ.ಪಿ.ಚ್ಯಾ ಮದರ್ ತೆರೆಜಾ ಸಾಲಾಂತ್ ಚಲ್ಲೆಲ್ಯಾ, ಸಿ.ಒ.ಡಿ.ಪಿ. ಭಾಂಗ್ರಾಳ್ಯಾ ವರ್ಸಾಂತ್, ಮಂಗ್ಳುರ್ ದಿಯೆಸೆಜಿಚ್ಯಾ ವಸ್ತೆ ಯೋಜನಾಚೊ ವಾಂಟೊ ಜಾವ್ನ್ – ಘರಾಂ ಬಾಂದುಂಕ್ /  ದುರುಸ್ತಿ ಕರುಂಕ್ ಕುಮ್ಕೆ  ಅನುದಾನ್ ವಿತರಣ್  ಕರ್ಚ್ಯಾ  ಕಾರ್ಯಾಚ್ಯಾ ಅಧ್ಯಕ್ಶ್ ಸ್ಥಾನಾಥಾವ್ನ್ ಧರ್ಮಾಧ್ಯಕ್ಶ್  ದೊ| ಸಲ್ಡಾನ್ಹಾ ಉಲಯ್ತಾಲೊ. ಕಾರ್ಯಾಕ್ ದಿಯೆಸೆಜಿಚೊ ಜಾಣ್ತೊ ಯಾಜಕ್ ತಶೆಂ ಅನಿವಾಸಿ ಉದ್ಯಮಿ ಆನಿ ಮಹಾದಾನಿ ಶ್ರೀ ಮೈಕಲ್ ಡಿ’ ಸೊಜಾ ಹಾಂಚೊ ಸಲಹಾದಾರ್ ಮಾ। ಬಾ। ವಲೇರಿಯನ್ ಡಿ’ ಸೊಜಾ ಮುಕೆಲ್ ಸೊಯ್ರೆ ಜಾವ್ನ್ ಹಾಜರ್ ಆಸ್ಲೆ.  

ಸಿ.ಒ.ಡಿ.ಪಿ ನಿರ್ದೇಶಕ್ ಮಾ| ಬಾ| ವಿನ್ಸೆಂಟ್ ಡಿ’ಸೊಜಾ ಹಾಣಿ ಸಿ.ಒ.ಡಿ.ಪಿ. ಸಂಸ್ಥ್ಯಾ ವಿಶ್ಯಾಂತ್, ದಿಯೆಸೆಜಿಚ್ಯಾ ವಸ್ತೆ ಯೋಜನಾ ವಿಶ್ಯಾಂತ್, ಸವಿಸ್ತಾರ್ ಮಾಹೆತ್ ಆಟಾಪ್ಚೆಂ ಸಾಕ್ಶ್ಯ್ ಚಿತ್ರ್ ದಾಕವ್ನ್ ವಿವರ್ ದಿಲೊ ಆನಿ ಸಯ್ರ್ಯಾಂಕ್ ತಶೆಂ ಫಲಾನುಭವಿಂಕ್ ಯೆವ್ಕಾರ್ ಮಾಗ್ಲೊ.

ಶ್ರೀ ಸ್ಟೀಫನ್ ಪಿಂಟೊ, ಬೆಂದುರ್ ಆನಿ ಸಿ.ಒ.ಡಿ.ಪಿ. ಶಿಬಂದೆಚ್ಯಾ ಸ್ತುತಿ ಗಾಯನಾ ಉಪ್ರಾಂತ್, ಧರ್ಮಾಧ್ಯಕ್ಶ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಣಿ –  ಮುಕೆಲ್ ಸಯ್ರೊ ಮಾ| ಬಾ| ವಲೇರಿಯನ್ ಡಿಸೊಜಾ ಆನಿ ಸಿ.ಒ.ಡಿ.ಪಿ. ನಿರ್ದೇಶಕ್ ಮಾ| ಬಾ| ವಿನ್ಸೆಂಟ್ ಡಿಸೊಜಾ ಹಾಂಚೆ ಸಾಂಗಾತಾ ಪಣ್ತಿ ಪೆಟವ್ನ್ ಕಾರ್ಯಕ್ರಮಾಕ್ ಅಧಿಕೃತ್  ಚಾಲನ್ ದಿಲೆಂ.

ಆಪ್ಲ್ಯಾ ಅಧ್ಯಕ್ಷೀಯ್ ಉಲವ್ಪಾಂತ್ ಧರ್ಮಾಧ್ಯಕ್ಷ್ ದೊ। ಸಲ್ಡಾನ್ಹಾನ್, ಯೋಜನಾಚಿ ಆಲೊಚೆನ್ ಸುರ್ವಾತ್ತಾನಾ ಸಾಂಗಾತ್ ದಿಲ್ಲೊ ಸಿ.ಒ.ಡಿ.ಪಿ.ಚೊ ಆದ್ಲೊ ನಿರ್ದೇಶಕ್ ಮಾ| ಬಾ| ಒಸ್ವಲ್ಡ್ ಮೊಂತೆರೊ ಆನಿ ಆತಾಂ ಯೋಜನ್ ಆಪುರ್ಬಾಯೆನ್ ಕಾರ್ಯಗತ್ ಕರುನ್ ಆಸ್ಚೊ ಪ್ರಸ್ತುತ್ ನಿರ್ದೇಶಕ್ ಮಾ| ಬಾ| ವಿನ್ಸೆಂಟ್ ಡಿ’ಸೊಜಾ ಹಾಂಚೊ ಉಪ್ಕಾರ್ ಬಾವುಡ್ನ್  ಚಾರ್ ವರ್ಸಾಂ ಆದಿಂ ಕೆಲ್ಲ್ಯಾ ಸಮೀಕ್ಶೆಚೊ ಉಡಾಸ್ ಕಾಡ್ಲೊ ಆನಿ ಮ್ಹಳೆಂ “ಖಂಯ್ಚೇಯ್ ಯೋಜನ್ ಎಕಾಣೆಂ ಕಾರ್ಯಗತ್ ಕರುಂಕ್ ಜಾಯ್ನಾ. ವೇಳ್ ಲಾಗ್ತಾ. ಆಜ್ ತುಮ್ಕಾಂ ಮೆಳ್‌ಲ್ಲ್ಯಾ ಕುಮ್ಕೆ ಅನುದಾನಾಂತ್ ತುಮ್ಕಾಂಯ್ ಧರುನ್ ಜಾಯ್ತ್ಯಾಂಚೆಂ ಕಶ್ಟ್ ಆಸಾತ್. ಕಿತ್ಯಾಕ್ ಮ್ಹಳ್ಯಾರ್ ದಿಯೆಸೆಜಿಚ್ಯಾ ಹ್ಯಾ ಯೋಜನಾಕ್ ದಿಯೆಸೆಜಿಚ್ಯಾ ಹರ್ ಫಿರ್ಗಜಾಂ ಥಾವ್ನ್ ಕರೆಜ್ಮಾಚಿ  ಉರವ್ಣಿ ಆಯ್ಲ್ಯಾ. ಕರೆಜ್ಮಾಚಿ ಉರವ್ಣಿ ಮ್ಹಳ್ಯಾರ್ ತಿ ಕಶ್ಟಾಂಚಿಂ ಉರವ್ಣಿ. ಪೋಟ್ ಮಾರ್ನ್ ಕರ್ಚಿ ಉರವ್ಣಿ. ಆನಿ ಹ್ಯಾ ಕಶ್ಟಾಂಚ್ಯಾ ಉರವ್ಣೆಂತ್  ತುಮ್ಚೋಯ್ ವಾಂಟೊ ಆಸಾ”

“ಹ್ಯಾ ಯೋಜನಾಕ್ ಕಸಲಿಚ್ ವಿದೇಶಿ ಕುಮೊಕ್ ಆಮ್ಕಾಂ ಮೆಳುಂಕ್ ನಾ. ಮಂಗ್ಳುರಿ ಕಥೊಲಿಕ್ ಲೋಕ್ ಕಾಳ್ಜಾ ಮನಾನ್ ಬೋವ್ ಉದಾರ್ ಮನಿಸ್ ಮ್ಹಣ್ ಹಾಂವ್ ಕೆದಾಳಾಯ್ ಮ್ಹಣ್ತಾಂ. ಆತಾಂಯ್ ಮ್ಹಾಕಾ ಕೊಣೆಂಯ್ ತುಮ್ಚಿಂ ಕಾಂಯ್ ಯೋಜನಾಂ ಆಸಾತ್‌ಗೀ ಮ್ಹಳ್ಯಾರ್ ‘ದುಬ್ಳ್ಯಾಂಕ್ ಘರಾಂ ಬಾಂದುನ್ ದಿಂವ್ಚೆಂ ಸಿ.ಒ.ಡಿ.ಪಿ.ಚೆಂ ಯೋಜನ್ ಆಸಾ’ ಮ್ಹಣ್ತಾಂ ಆನಿ ಉದಾರ್ ಮನಾಚೆ ಮನಿಸ್ ಖಂಡಿತ್ ದಿತಾತ್. ಉದಾರ್ ಮನಾಚ್ಯಾ ಶ್ರೀ ಮೈಕಲ್ ಡಿಸೊಜಾನ್ 500 ಘರಾಂಕ್ ಎದೊಳ್‌ಚ್ ಅನುದಾನ್ ಭಾಸಾಯ್ಲಾಂ ಜಾಲ್ಲ್ಯಾನ್ ಹೆಂ ಯೋಜನ್ ಹಂತಾ ಹಂತಾನ್ ಮುಕಾರ್ ವೆತೆಲೆಂ. ಶ್ರೀ ಮೈಕಲ್ ಡಿ’ಸೊಜಾ ತಸಲೆ ಸಮಾಜ್‌ಮುಖಿ ಮನಿಸ್ ಆಮ್ಚ್ಯಾ ಸಮಾಜೆಕ್ ಪ್ರೇರಣ್. ತಾಚೆರ್ ಆನಿ ತಾಚ್ಯಾ ಕುಟ್ಮಾಚೆರ್ ಧಾರಾಳ್ ಬೆಸಾಂವಾಂ ಹಾಂವ್ ಮಾಗ್ತಾಂ. ತಾಚೆ ಥಾವ್ನ್ ಹೆರ್ ಜಾಯ್ತೆ ಪ್ರೇರಣ್ ಜೊಡುಂದಿತ್”   ಮ್ಹಣಾಲೊ ದೊ। ಸಲ್ಡಾನ್ಹಾ. 

ಕಾರ್ಯಕ್ರಮಾಕ್ ದಾನಿ ಶ್ರೀ ಮೈಕಲ್ ಡಿ’ಸೊಜಾ ತರ್ಫೆನ್ ಶ್ರೀಮತಿ ಸಿಲ್ವಿಯಾ ಆನಿ ಶ್ರೀ ವಿನ್ಸೆಂಟ್ ಡಿ’ಸಿಲ್ವ ಹಾಜರ್ ಆಸೊನ್, ಸಿ.ಒ.ಡಿ.ಪಿ. ತರ್ಫೆನ್ ನಿರ್ದೇಶಕ್ ಮಾ| ಬಾ| ವಿನ್ಸೆಂಟ್ ಡಿ’ಸೊಜಾ ಹಾಣಿ ಫುಲಾಂ ತುರೆ ದೀವ್ನ್ ತಾಂಕಾ ಮಾನ್ ಪಾಟಯ್ಲೊ.

ಸಮಾಜೆಂತ್ ಮೈಕಲಾ  ತಸಲೆ ಧಾ ಜಣ್ ಆಸ್ಲ್ಯಾರೀ ದುಬ್ಳಿಕಾಯ್  ಉರ‍್ಚಿ ನಾ – ಮಾ। ಬಾ। ವಲ್ಲಿ  

“ಮ್ಹಜಿ ಆನಿ ಮೈಕಲಾಚಿ ಒಳಕ್ ಪಾಟ್ಲ್ಯಾ 45 ವರ್ಸಾಂಚಿಂ. ತಾಣೆ ಮ್ಹಣ್ಚೆಂ ಆಸಾ ‘ಗರ್ಜ್ ಆಸ್‌ಲ್ಲ್ಯಾ ಪ್ರಾಸ್ ಚಡ್ ದೆವಾನ್ ಮ್ಹಾಕಾ ದಿಲಾಂ. ದೆಕುನ್ ಹಾಂವ್ ದಾನ್ ದಿತಾಂ’ ಆಮ್ಚ್ಯಾ ಸಮಾಜೆಂತ್ ಮೈಕಲಾ ತಸಲೆ ಧಾ ಜಣ್ ಜರಿ ಆಸ್‌ಲ್ಲೆ ಜಾಲ್ಯಾರ್ ಆಜ್ ಇತ್ಲಿ ದುಬ್ಳಿಕಾಯ್ ಮ್ಹಳ್ಳಿ ಆಸ್ತಿ ನಾ” ಮ್ಹಣಾಲೊ ಮಾ| ಬಾ| ವಲೇರಿಯನ್ ಸೊಜ್, ಮಂಗ್ಳುರ್ ದಿಯೆಸೆಜಿಚೊ ಜಾಣ್ತೊ ಯಾಜಕ್.  

ಆಪ್ಲ್ಯಾ ಉಲವ್ಪಾಂತ್ ಮಾ| ಬಾ| ವಲೇರಿಯನ್ ಹಾಣಿ  “ಮನ್ಶ್ಯಾಕ್ ಜಿಯೆಂವ್ಕ್ ಥೊಡ್ಯೊ ಬೋವ್ ಮುಳಾವ್ಯೊ ಸಂಗ್ತಿ ಗರ್ಜ್ ಆಸಾತ್. ವಾರೆಂ ಆನಿ ಉಜ್ವಾಡ್ ದೆವಾನ್ ಆಮ್ಕಾಂ ದಿಲಾ. ಆಪ್ಲ್ಯಾ ಸ್ವಾರ್ಥಾಕ್ ಮನ್ಶ್ಯಾನ್ ವಾರೆಂಯ್ ವಿಕಾಳ್ ಕೆಲಾಂ ತಿ ಅಲಗ್ ಗಜಾಲ್. ಪೂಣ್ ಮನ್ಶ್ಯಾಕ್ ಜಿಯೊಂಕ್ ವಾರ‍್ಯಾ – ಉಜ್ವಾಡಾ ಸಾಂಗಾತಾ ಖಾಣ್, ನ್ಹೆಸಣ್‌ ಕಿತ್ಲ್ಯಾ ಗರ್ಜೆಚೆಂಗೀ, ಭಲಾಯ್ಕೆನ್ ಆನಿ ಸುರಕ್ಶಿತ್ ಜಿಯೆಂವ್ಕ್ ಘರ್‌ಯೀ ತಿತ್ಲ್ಯಾಚ್ ಗರ್ಜೆಚೆಂ. ತೀನ್ ವರ್ಸಾಂ ಆದಿಂ ಮಂಗ್ಳುರ್ ದಿಯೆಸೆಜಿನ್ ಏಕ್ ಸಮೀಕ್ಷಾ ಕೆಲ್ಲಿ ಆನಿ ತ್ಯಾ ಸಮೀಕ್ಷೆಂತ್ ಮಂಗ್ಳುರ್ ದಿಯೆಸೆಜಿಚ್ಯಾ ವ್ಯಾಪ್ತಿಂತ್ 500 ಕುಟ್ಮಾಂ ಜಿಯೊಂಕ್ ಫಾವೊತೆಂ ಬಿಡಾರ್ ನಾಸ್ತಾನಾ ಕಶ್ಟೊನ್ ಆಸಾತ್ ಮ್ಹಳ್ಳಿ ಗಜಾಲ್ ದಿಯೆಸೆಜಿಕ್ ಕಳೊನ್ ಆಯಿಲ್ಲಿ. ತವಳ್ ಧರ್ಮಾಧ್ಯಕ್ಷ್ಯಾನ್ ಹ್ಯಾ ವಸ್ತೆ ಯೋಜನಾಚಿ ನಕ್ಶಾ ತಯಾರ್ ಕೆಲ್ಲಿ. ವೊಸ್ಯಾಚ್ಯಾ ಪಿಡೆವರ್ವಿಂ ದಿಯೆಸೆಜಿಚೆಂ ಹೆಂ ಯೋಜನ್ ಕಾರ್ಯಗತ್ ಕರುಂಕ್ ಥೊಡಿ ಘಳಾಯ್ ಜಾಲಿ ಜಾಲ್ಯಾರೀ, ಆತಾಂ ಸಿ.ಒ.ಡಿ.ಪಿ.ಚ್ಯಾ ಭಾಂಗ್ರಾಳ್ಯಾ ಉತ್ಸವಾಚ್ಯಾ ಸಂದರ್ಬಾರ್ (16.04.1974 – 16.04.2024)  ಹ್ಯಾ ವಸ್ತೆ ಯೋಜನಾಕ್ ಚಾಲನ್ ಮೆಳ್ಳಾಂ ತಿ ಗಜಾಲ್ ವ್ಹಡಾ ಸಂತೊಸಾಚಿ. ಹ್ಯಾ ಯೋಜನಾಚೊ ಸೂತ್ರ್‌ದಾರ್ ಧರ್ಮಾಧ್ಯಕ್ಷಾಕ್ ಹ್ಯಾ  ಖಾತಿರ್  ದಿನ್ವಾಸ್ ಫಾವೊ” ಮ್ಹಣ್ ಯೋಜನಾಚ್ಯೆ ಪಾಟ್‌ಭುಂಯ್ ವಿಶ್ಯಾಂತ್ ವಿವರ್ ದಿಲೊ.

ಹಾಂವ್ ಮೈಕಲ್ ಸೊಜಾಕ್ ಸಿ.ಒ.ಡಿ.ಪಿ. ಸಂಸ್ಥ್ಯಾಕ್ ಒಳಕ್ ಕರುನ್ ದಿಲ್ಲೊ ‘ಭಡ್ವೊ’ ಮ್ಹಳ್ಳ್ಯಾ ಮಾ| ಬಾ| ವಲೇರಿಯನ್ ಹಾಣಿ “ಖಂಯ್ಚೀಯ್ ಸಮಾಜ್ ಏಕ್ ಸಶಕ್ತ್ ಸಮಾಜ್ ಜಾಯ್ಜೆ ತರ್, ತ್ಯಾ ಸಮಾಜೆಚ್ಯಾ ಭುರ್ಗ್ಯಾಂನಿ ಉಂಚ್ಲೆಂ ಶಿಕಪ್ ಜೊಡ್ಚೆಂ ಬೋವ್ ಗರ್ಜೆಚೆಂ. ಸಮಾಜಾಚಿ ಹಿ ಗರ್ಜ್ ಸಮ್ಜಾಲ್ಲ್ಯಾ ಮೈಕಲ್ ಸೊಜಾನ್ ‘ಎಡುಕೇರ್’ ಮ್ಹಳ್ಳ್ಯಾ ಕಾರ್ಯಕ್ರಮಾಖಾಲ್ ಆಜ್ ಮೆರೆನ್ ಸಿ.ಒ.ಡಿ.ಪಿ. ಸಂಸ್ಥ್ಯಾ ಮುಕಾಂತ್ರ್ 3,000 ವಿದ್ಯಾರ್ಥಿಂಕ್ ಉಂಚ್ಲ್ಯಾ ಶಿಕ್ಪಾಕ್ ಕುಮಕ್ ಕೆಲ್ಯಾ. ಹಾಂತು 100 ದಾಕ್ತೆರ್ ಆನಿ 1,500 ಇಜ್ನೆರ್ ಆಸಾತ್. ಜಾಯ್ತ್ಯಾಂನಿ ಎಂ.ಬಿ.ಎ. ಎಂ.ಎಸ್ಸಿ ಆನಿ ಹೆರ್ ಉಂಚ್ಲೆಂ ಶಿಕಪ್ ಜೊಡ್ಲಾಂ. ಶಿಕ್ಪಾಕುಮ್ಕೆ  ಉಪ್ರಾಂತ್ ಆತಾಂ ಮೈಕಲ್ ವಸ್ತೆಕ್ ಫಾವೊತೆಂ ಬಿಡಾರ್ ನಾಸ್ತಾನಾ ಕಶ್ಟೊಂಚ್ಯಾ ಗರ್ಜೆವೊಂತಾಚ್ಯಾ ಕುಮ್ಕೆಕ್ ಆಯ್ಲಾ. ಸುರ್ವಾತೆರ್, ಸಿ.ಒ.ಡಿ.ಪಿ. ಥಾವ್ನ್ ಫಕತ್ 100 ಕುಟ್ಮಾಂಕ್ ವಸ್ತೆಕ್ ಕುಮಕ್ ಮ್ಹಣ್ ಆಲೊಚೆನ್ ಆಸ್ಲಿ ತರೀ, ಮೈಕಲಾನ್ ಗರ್ಜೆವೊಂತ್ ಕುಟ್ಮಾಂ ಪಾಂಯ್ಶಿಂ ಆಸ್ತಾನಾ ಫಕತ್ ಶೆಂಭೊರ್ ಕಿತ್ಯಾಕ್, ಸಗ್ಳ್ಯಾ ಕುಟ್ಮಾಂಕ್ ಕುಮಕ್ ಕರ್ಯಾಂ, ಮ್ಹಳ್ಳ್ಯಾನ್ ಆತಾಂ ಫಲಾನುಭವಿಂಚೊಂ ಸಂಕೊ 600 ಕರುನ್ ಯೋಜನಾಕ್ ವಿಸ್ತಾರ್ ರೂಪ್ ದಿಲಾಂ. ಎದೊಳ್ಚ್ಯಾಕ್ ಮೈಕಲಾನ್ ಏಕ್ ಕೊರೊಡ್ ಅಟ್ರಾ ಲಾಕ್ ರುಪ್ಯಾಂಚೆಂ ಅನುದಾನ್ ಹ್ಯಾ ಯೋಜನಾಕ್ ದಿಲಾಂ” ಮ್ಹಳೆಂ.

“ಬರೆಂ ಕಾಮ್ ಜಾವ್ನಾಸಾ ದೆವಾಚೆಂ ಕಾಮ್. ಮೈಕಲ್ ದೆವಾಚೆಂ ಕಾಮ್ ಕರುನ್ ಆಸಾ” ಮ್ಹಣ್ ತಾಚ್ಯಾ ಕುಟ್ಮಾಚೆರ್ ದೆವಾಚಿಂ ವಿಂಚ್ಣಾರ್ ಆಶಿರ್ವಾದಾಂ ಮಾ| ಬಾ| ವಲೇರಿಯನ್ ಹಾಣಿ  ಹ್ಯಾ ಸುವಾಳ್ಯಾರ್ ಮಾಗ್ಲಿಂ.

ಅನುದಾನ್ ವಿತರಣ್ ಕಾರ್ಯೆಂ ಎಡುಕೇರ್ ಕಾರ್ಯಕ್ರಮ್ ನಿರ್ದೇಶಕ್ ಶ್ರ‍ೀ ಸ್ಟೀಫನ್ ಪಿಂಟೊ ಹಾಣಿ ಚಲವ್ನ್ ವ್ಹೆಲೆಂ. ಕಾರ್ಯಕ್ರಮಾಕ್ ದಿಯೆಸೆಜಿಚೊ ವಿಗಾರ್ ಜೆರಾಲ್ ಮೊ| ಮ್ಯಾಕ್ಸಿಮ್ ನೊರೊನ್ಹಾ, ಸುರತ್ಕಲ್ ಫಿರ್ಗಜೆಚೊ ವಿಗಾರ್ ಮಾ| ಬಾ| ಆಸ್ಟಿನ್ ಪೀಟರ್ ಪೆರಿಸ್, ಕೆನರಾ ಸಂಪರ್ಕ್ ಕೇಂದ್ರಾಚೊ ನಿರ್ದೇಶಕ್ ಮಾ| ಬಾ| ಅನಿಲ್ ಐವನ್ ಫೆರ್ನಾಂಡಿಸ್, ಸಾಂ. ವಿಶೆಂತ್ ಪಾವ್ಲ್ ಸಭೆಚೊ ಮಂಗ್ಳುರ್ ದಿಯೆಸೆಜಿಚೊ ಅಧ್ಯಕ್ಶ್ ಶ್ರೀ ಜ್ಯೋ ಕುವೆಲ್ಹೊ, ಯೋಜನಾಚೆ  ಸಮನ್ವಯಿ ಶ್ರ‍ೀ ಒಸ್ವಲ್ಡ್ ರೊಡ್ರಿಗಸ್, ಶ್ರೀ ಹೆನ್ರಿ ಡಿಸೊಜಾ, ಮರಿಯಾಳ್ ಸೊಡೆಲಿಟಿಚೆ ಹುದ್ದೆದಾರ್ ಆನಿ ಹೆರ್  ಹಾಜರ್ ಆಸ್ಲೆ.

ಸಕಾಳಿಂಚ್ಯಾ ಆದೇಸಾರ್ ಫಲಾನುಭವಿಂ ಖಾತಿರ್ ವಿಶೇಸ್ ‘ಜಾಗೃತಿ ಆನಿ ಸಂವಾದ್’ ಕಾರ್ಯೆಂ ಮಾಂಡುನ್ ಹಾಡ್‌ಲ್ಲೆಂ.

ಸಿ.ಒ.ಡಿ.ಪಿ. ನಿರ್ದೇಶಕ್ ಮಾ| ಬಾ| ವಿನ್ಸೆಂಟ್ ಡಿ’ಸೊಜಾ ಹಾಂಚ್ಯಾ ಮುಕೆಲ್ಪಣಾರ್ ಚಲ್ಲೆಲ್ಯಾ ಹ್ಯಾ ಕಾರ್ಯಕ್ರಮಾಂತ್ – ಜಾಗ್ಯಾಚಿಂ ದಸ್ತಾವೆಜಾಂ, ಘರಾಚಿ ನಕ್ಷಾ ತಯಾರ್ ಕರ್ಚೆ ವಿಶ್ಯಾಂತ್, ಘರ್ ಬಾಂದುಂಕ್ ಸರ್ಕಾರಿ ಅನುದಾನ್ ಜೊಡ್ಚೆ ವಿಶ್ಯಾಂತ್ , ದಿಯೆಸೆಜಿಚ್ಯಾ ವಸ್ತೆ ಯೋಜನಾಕ್ ಅರ್ಜಿ ಪಾಟಂವ್ಚೆಂ ವಿಶ್ಯಾಂತ್ ಸಂಪೂರ್ಣ್ ಮಾಹೆತ್ ಆನಿ ಗರ್ಜೆಚಿ ತರ್ಭೆತಿ ಎಡುಕೇರ್ ಕಾರ್ಯಕ್ರಮ್ ನಿರ್ದೇಶಕ್ ಶ್ರೀ ಸ್ಟೀಫನ್ ಪಿಂಟೊ, ಸಾಂ. ವಿಶೆಂತ್ ಪಾವ್ಲ್ ಸಭೆಚೊ ದಿಯೆಸೆಜಿಚೊ ಅಧ್ಯಕ್ಶ್ ಶ್ರೀ ಜ್ಯೋ ಕುವೆಲ್ಹೊ ಆನಿ ಯೋಜನಾಚೆ ಸಮನ್ವಯಿ ಶ್ರೀ ಒಸ್ವಲ್ದ್ ರೊಡ್ರಿಗಸ್ ಆನಿ ಶ್ರೀ ಹೆನ್ರಿ ಡಿ’ಸೊಜಾ ಹಾಣಿ ದಿಲಿ. ಜಾಗೃತಿ – ಸಂವಾದ್ ಕಾರ್ಯಕ್ರಮಾಂತ್ 180 ಫಲಾನುಭವಿ ಕುಟ್ಮಾಂನಿ ವಾಂಟೊ ಘೆತ್ಲೊ.

ಶ್ರಿಮತಿ ರೀನಾ ಹಿಣೆ ದಿನ್ವಾಸ್ ಪಾಟಯ್ಲೆ.

ತಸ್ವಿರ‍್ಯೊ : ಪ್ರವೀಣ್ ಕ್ರಾಸ್ತಾ