ಹರ್ ಕ್ರಿಸ್ತಾಂವ್ ಲಿತುರ‍್ಜಿಂತ್ ಹಿಂ ದೋನ್ ಉತ್ರಾಂ ಕಿತ್ಲೆ ಪಾವ್ಟಿಂ ಆಮಿ ಉಚಾರ‍್ತಾಂವ್ ಮ್ಹಳ್ಳೆಂ ಹಿಸೊಬ್ ಆಮ್ಕಾಂ ಆಸ್ಚೆಂ ನಾ ಕಿತ್ಯಾಕ್ ಹ್ಯಾ ಉತ್ರಾಂಚಿ ಗುಂಡಾಯ್‌ಚ್ ಆಮಿ ಮೆಜಿನಾಂವ್ಂಚ್ ತರ್ ಹಿಸೊಬ್ ದವ್ರುಂಕ್ ಸಾದ್ಯ್ ಆಸ್ಚೆಂ ಕಶೆಂ? ಹೆಂ ಕಸಲೆಂ ಅರಾಜಾಂವೀಕ್ ಸವಾಲ್ ಮ್ಹಣ್ತೆಲ್ಯಾಂಕ್ ಸವಲಾಚೊ ಮತ್ಲಬ್ ಸಮ್ಜಾಲೊ ನಾ – ಹಾಂಗಾಸರ್ ಹಿಸೊಬಾಚ್ಯಾ ಅಂಕ್ಡ್ಯಾ-ಸಂಕ್ಡ್ಯಾಂಚೊ ಮತ್ಲಬ್ ನ್ಹಯ್ ಪುಣ್ ಹ್ಯಾ ದೋನ್ ಉತ್ರಾಂಚೊ ತೀರ್ಲ್ ಆಮಿ ಕಿತ್ಲೆ ಪಾವ್ಟಿಂ ಸಮ್ಜಾಲ್ಯಾಂವ್, ಗೂಂಡ್, ಅರ‍್ತಾಬರಿತ್ ಉಮಾಳ್ಯಾಂನಿ ಹಿಂ ಉತ್ರಾಂ ಆಮಿ ಉಚಾರ‍್ಲ್ಯಾಂತ್ ಆನಿ ಉಚಾರ‍್ತಾಂವ್ ಮ್ಹಳ್ಳೆಂ ಸವಾಲ್. ಹರ್‌ಯೆಕ್ ಪಾವ್ಟಿಂ ಯೆಕಾಮೆಕಾ ಭೆಟ್ತಾನಾ ಆಮ್ಚೆ ಮುಸ್ಲಿಮ್ ಭಾವ್ ‘ಸಲಾಮ್ ಆಲೇಯ್ಕುಮ್’ ಮ್ಹಳ್ಳೆಂ ವಂದನ್ ಕರ‍್ತಾಂವ್ ಆನಿ ಹ್ಯಾ ದೋನ್ ಉತ್ರಾಂಚೊ ತರ‍್ಜುಮೊ ‘ಸಮಾದಾನ್ ತುಮ್ಕಾಂ’ ಮ್ಹಳ್ಳೊಚ್ ಮ್ಹಳ್ಳೆಂ ಸಮ್ಜೊಂಚೆ ಗಿನ್ಯಾನ್ ಆಮ್ಕಾಂ ನಾ. ಆತಾಂಯಿ, ಸಲಾಮ್ ಆಲೇಯ್ಕುಮ್ ಮ್ಹಳ್ಯಾರ್ ‘ಮುಸ್ಲಿಮ್ ಭಾವಾರ‍್ಥಾಚಿ ಪಾಚಾರ‍್ಣಿ’ ಮ್ಹಣ್ ಲೆಕ್ತೆಲೆ ಸಬಾರ್ ಆಸಾತ್. ಪುಣ್ ದೇಡ್ ಮ್ಹಯ್‌ನೊ ಮಧ್ಯಪ್ರಾಚ್ಯಾಂತ್ ರಾವೊನ್ ಪಾಟಿಂ ಆಯಿಲ್ಲೆ ಥೊಡೆ ‘ಮಿಡ್ಲ್‌ಈಷ್ಟ್’ ಜಾಲ್ಲೆ ಆಮಾ ಗಾಂವ್ಟ್ಯಾಂ ಲಾಗಿಂ ಉಟ್ತಾನಾ ಬಸ್ತಾನಾ ‘ಸಲಾಮ್ ಆಲೇಯ್ಕುಮ್’ ಮ್ಹಣ್ ರಂದಿತಾನಾ ಮ್ಹಾಕಾ ಮುಜುಗರ್ ಜಾತಾ, ಜಾಯ್ ತರ್ ಹಾಂವ್ ದೇಡ್ ಮ್ಹಯ್‌ನೊ ಗಲ್ಫಾಂತ್ ಆಸ್‌ಲ್ಲೊಂ ಮ್ಹಣ್ ಶೀದಾ ಮ್ಹಣ್ ಸಾಯ್ಬಾ, ಜಾಯ್ ತರ್ ತುಜೊ ಬೋರ‍್ಡಿಂಗ್ ಪಾಸ್ ದಾಕಯ್ ಪುಣ್ ಹ್ಯಾ ಸೊಬಿತ್ ವಂದನಾಕ್ ಅಕ್ಮಾನ್ ಕರಿನಾಕಾ. ಸೊಮ್ಯಾಚಿಂಯಿ ಉತ್ರಾಂ ಹಿಂ.
ಕೊಣಾಕ್ ನಾಕಾ ಜಾಲಾಂ ಸಮಾದಾನ್? ಪವಿತ್ರ್ ಬಲಿದಾನಾ ವೆಳಾರ್ ‘ಎಕಾಮೆಕಾ ಸಮಾದಾನ್’ ದಿಯಾ ಮ್ಹಣ್ ಯಾಜಕ್ ಉಲೊ ದಿತಾನಾ ಆಮಿ ಉಜ್ವ್ಯಾಕ್-ದಾವ್ಯಾಕ್, ಪಾಟಿಂ-ಫುಡೆಂ, ವಯ್ರ್-ಸಕಯ್ಲ್ ಪಳೆವ್ನ್ ಎಕಾಮೆಕಾ ಸಮಾದಾನ್ ದಿತಾಂವ್ ಪುಣ್ ಕಿತ್ಲೆಂ ಸಮಾದಾನ್ ಆಶಾರ್ ಪಾಶಾರ್ ಜಾತಾ ಮ್ಹಳ್ಳೆಂ ಸವಾಲ್ ವಿಚಾರುಂಕ್ ಹಾಂವ್ ಧಯ್ರ್ ಘೆನಾ, ಸವಯೆ ಆನಿ ಸವಾಯೆನ್ ಆಮಿ ಎಕಾಮೆಕಾ ಸಮದಾನ್ ದಿಂವ್ಚೆಂ ಮ್ಹಣ್ ಹ್ಯಾ ಸವಲಾಕ್ ಹಾಂವ್ ಕೂಸ್ ಮಾರ‍್ತಾಂ. ಹೆರಾಂಚೆ ಚಿಂತಪ್ ಮ್ಹಾಕಾ ಕಳಿತ್ ನಾ ಆನಿ ಜಾಣಾಂ ಜಾಂವ್ಚಿ ಹುಮೆದ್‌ಯಿ ಮ್ಹಾಕಾ ನಾ ಕಿತ್ಯಾಕ್ ಜಾಪ್ ಆಮಿ ಸರ‍್ವ್ ಜಾಣಾಂವ್.
(ಮಾತೆವ್ 5:9) ಸಮಾದಾನ್ ಹಾಡುಂಕ್ ವಾವುರ‍್ತಾತ್ ತಿಂ ಕಿತ್ಲಿಂ ಭಾಗಿ! ತಾಂಕಾಂ ದೆವಾಚಿಂ ಭುರ‍್ಗಿಂ ಮ್ಹಣ್ತೆಲೆ. ನಿತಿ ಪಾಸತ್ ದಗ್ದಣಿ ಬೊಗ್ತಾತ್ ತಿಂ ಕಿತ್ಲಿಂ ಭಾಗಿ, ಸರ‍್ಗಿಂಚೆ ರಾಜ್ ತಾಂಚೆಂ.
ರೊಮಾಗಾರಾಂಕ್ ಬರಯಿಲ್ಲ್ಯಾ ಆಪ್ಲ್ಯಾ ಪತ್ರಾಂತ್ ಸಾಂ.ಪಾವ್ಲ್ ಮ್ಹಣ್ತಾ (12:18) ಸಾದ್ಯ್ ಜಾಲ್ಯಾರ್ ತುಮ್ಕಾಂ ತಾಂಕ್ತಾ ತೇ ಪರಿಂ ಸಮೆಸ್ತಾಂ ಲಾಗಿಂ ಸಮದಾನೆನ್ ಜಿಯೆಯಾ. ಮ್ಹಜ್ಯಾ ಮೊಗಾಚ್ಯಾಂನೊ, ತುಮಿ ಬಿಲ್ಕುಲ್ ಫಾರಿಕ್ಪಣ್ ಘೆಂವ್ಚೆಂ ನ್ಹಯ್; ತೆಂ ದೆವಾಚ್ಯಾ ಕ್ರೋದಾಕ್ ಸೊಡಾ. ಫಾರಿಕ್ಪಣ್ ಘೆಂವ್ಚೆಂ ಮ್ಹಾಕಾ ಸೊಡಾ, ಹಾಂವ್ ತೆಂ ಪಾಟಿಂ ಫಾರಿಕ್ ಕರ‍್ತಾಂ ಮ್ಹಣ್ತಾ ಸರ‍್ವೆಸ್ಪರ್. Vengeance is mine, says the Lord.
ದೆವಾಚಿ ನೀತ್ ಆನಿ ಫಾರಿಕ್ಪಣ್ ಕೆದಳಾ ಜ್ಯಾರಿ ಜಾಯ್ತ್ ತೆಂ ಆಮಿ ನೆಣಾಂವ್ ಆನಿ ಪ್ರಸ್ತುತ್ ಕಾಳಾರ್ ಕ್ರಿಸ್ತಾಂವಾಂಚೆರ್ ಜಾಂವ್ಚೆಂ ಜುಲುಮ್, ಆತಂಕ್‌ವಾದಿಂನಿ ತಾಂಚೆ ಗಳೆ ಶಿಂದುನ್ ವ್ಹಾಳಂವ್ಚೆಂ ರಗತ್ ಆನಿ ಇಂಟರ್‌ನೆಟ್ಟಾಂಚ್ಯಾ ಪಡ್ದ್ಯಾಂಚೆರ್ ದಾಕಂವ್ಚಿಂ ತಿಂ ಅಮಾನುಷ್ ಶಿರ್-ಕಾಪ್ಣ್ಯೊ ಹ್ಯಾ ಸಾಮ್ಕಾರ್ ಆಮಿ ಎಕಾ ತೆಂಪಾರ್ ಹರ್‌ಎಕಾ ನೊವೆನಾ ವೆಳಾರ್ ‘ರಶಿಯಾಕ್ ಬಚಾವ್ ಕರ್ ದೆವಾ’ ಮ್ಹಣ್ ದೊಂಫ್ರಾಂ ದಾಡಾಯಿಲ್ಲಿಂ ಆತಾಂ ಎಕ್ ಕುಸ್ಕುಟ್ ಕೊಮಿಕ್‌ಶೆಂ ದಿಸ್ತಾ ಪುಣ್ ರಚ್ಣಾರಾಚಿ ನೀತ್ ಆನಿ ಸಳ್ಸಳಿ ಸೂಡ್ (Vengeance) ನಿದ್ರೇಸ್ತ್ ಜಾಂವ್ಕ್ ನಾ. ಹೆಂ ಲಿಕ್ತಾನಾ ಮ್ಹಜ್ಯಾ ಮತಿಂತ್ ಆಸಾತ್ ಸವಲಾಂ, ಆತಂಕಾರಿಂಚ್ಯಾ ಬಂದಡೆಂತ್ (ಮಾರ‍್ತಿರ್ ಜಾಲ್ಲ್ಯಾ ತ್ಯಾ ಧರ‍್ಮ್‌ಭಯ್ಣಿಂಕ್ ಆಮಿ ವಿಸ್ರೊಂಕ್ ನಜೊ) ಆಸ್‌ಚೊ ಬಾಪ್ ಟೊಮ್ ಕ್ರಿಸ್ತಾ ಖಾತಿರ್ ಕಿತೆಂ ಸೊಸ್ತಾ, ತೊ ಜೀವಂತ್ ಆಸಾ ಯಾ ನಾ, ರಚ್ಣಾರಾಚಿ ನೀತ್ ಆನಿ ಕಾಕುತ್ ತಾಕಾ ಬಚಾವ್ ಕರಿತ್ ಯಾ ನಾ, ತಾಚ್ಯಾ ಮಾರ‍್ತಿರ್‌ಪಣಾಂತ್ ಯಾ ಸುಟ್ಕೆಂತ್ ಆಮ್ಚ್ಯಾ ಭಾವಾರ‍್ಥಾಕ್ ಧಿಗೊ ಲಾಬ್ತೊಲೊ ಹಿಂ ಸವಲಾಂ. ತಾಕಾ ಕಾಂಯ್ ಆಲ್ತಾರಿಚೊ ಮಾನ್ ಮೆಳತ್ ತೆಂ ಖಚಿತ್ ಪುಣ್ “ಸಮಾದಾನ್ ತುಮ್ಕಾಂ” ಮ್ಹಳ್ಳ್ಯಾಚೊ ತೀಬ್ ಇತ್ಲೊಚ್? ಕಿತ್ಲೆಶೆ ಹಜಾರ್ ಕ್ರಿಸ್ತಾಂವ್ ಭಾವಾರ‍್ಥಾ ಖಾತಿರ್ ಜೀವ್ ದೀವ್ನ್ ಗೆಲ್ಯಾತ್; ಕ್ರಿಸ್ತಾ ಖಾತಿರ್ ಜೀವ್ ದೀವ್ನ್ ಗೆಲ್ಯಾತ್ ಮ್ಹಣ್ ಹಾಂವ್ ಮ್ಹಣಾನಾ ಕಿತ್ಯಾಕ್ ಜೆಜು ಕ್ರಿಸ್ತಾನ್ ಮ್ಹಜೆ ಖಾತಿರ್ ಜೀವ್ ದಿಯಾ ಮ್ಹಣ್ ಖಂಯ್ಚ್ ಸಾಂಗ್ಲೆಂಲೆಂ ನಾ. ಕ್ರಿಸ್ತಾಕ್ ಆಮ್ಚೆ ರಗತ್ ನಾಕಾ ಕಿತ್ಯಾಕ್ ತಾಣೆ ಆಪ್ಣಾಕ್‌ಚ್ ಪರಿಪೂರ‍್ಣ್ ರಿತಿರ್ ಖಾಲಿ ಕರುನ್ ಆಮ್ಚಿ ಸೊಡ್ವಣ್ ಕೆಲ್ಯಾ. He emptied Himself for us.
ತರ್ ಆತಾಂ ಆಮಿ ವಿಚಾರಿಜೆ ಸವಾಲ್, ಸಮಾದಾನ್ ಪ್ರಸರ‍್ಚೆಂ, ವಾಂಟ್ಚೆಂ ಆನಿ ಜಿಯೆಂವ್ಚೆಂ ಲಕ್ಷಣ್ ಆಮ್ಚೆಥಂಯ್ ಆಸಾ? Are we Peaceful, peace loving and tolerant people, are we Christians in the true sense?
ಭಾಗೆವಂತ್ ಹಫ್ತೊ ಚಾಲು ಆಸ್ತಾನಾಂಚ್ ಹಾಂವೆಂ ಆನಿ ತುಮಿ ಎಕಾ ದೈನಿಕಾಚೆ ವಾಚ್ಲೆಂ-ಥೊಡ್ಯಾ ಅಕ್ರಿಸ್ತಾಂವಾಂನಿ ಆಮ್ಚೆ ಹಾತ್ ಧರುನ್ Happy Good Friday ಮ್ಹಣ್ ಉಲ್ಲಾಸ್ ಪಾಟಯಿಲ್ಲೆ ಅಶೆಂ. ತಾಂಕಾಂ ಹಾಂವ್ ದುರ‍್ಸನಾ ಕಿತ್ಯಾಕ್ ಸಬಾರ್ ಪಾವ್ಟಿಂ ಹೆಂ Happy Good Friday ಮ್ಹಳ್ಳೆಂ ಒಕ್ಕಾಣೆಂಚ್ ಕಿತ್ಯಾಕ್ ಮ್ಹಣ್ ಸಬಾರಾಂನಿ ವಿಚಾರ್‌ಲ್ಲೆಂ ಆಸಾ. ಆನಿ ಆಮಾ ಥೊಡ್ಯಾ ಕಾತೊಲಿಕಾಂನಿ ಹಾಚೊ ಅರ‍್ಥ್ ಉತ್ರಾನ್ ಉತರ್ (literally) ಘೆವ್ನ್ ದೋನ್ ‘ಹ್ಯಾಪ್ಪಿ ಪೆಗ್ಗ್’ ಚಡ್ ಮಾರ್‌ಲ್ಲೆಯಿ ಆಸಾತ್. ಹೆಂ ಫೊಕಾಣ್ ನ್ಹಯ್, ಹಕೀಗತ್. ಉಡಾಸ್ ಯೆತಾ ಮ್ಹಾಕಾ, ವರ್ಸಾಂ ಆದಿಂ ಎಕಾ ಕಾತೊಲಿಕ್ ಲಿಕ್ಕರ್ ಮರ‍್ಚೆಂಟಾನ್ ಮ್ಹಾಕಾ ದಿಲ್ಲಿ ಆಮಿಷ್ – ಕರೆಜ್ಮಾಂತ್ ಸೇಲ್ ದೆಂವ್ತಾ ಜಾಲ್ಲ್ಯಾನ್ ಆಮಿ ಬೊತ್ಲಿಚೆರ್ ಧಾ ರುಪಯ್ ಡಿಸ್ಕಾಂವ್ಟ್ ದಿತಾಂವ್. ತೊ ಮಾನೇಸ್ತ್ ಆತಾಂ ಸಂಸಾರಾಂತ್ ನಾ, ಆಸ್ಲ್ಯಾರ್ ಮ್ಹಾಕಾ ಕಾಂಯ್ ಖುರ‍್ಸಾಯ್ತ್ ಕೊಣ್ಣಾ ಪುಣ್ ಫೊಕಾಣಾಕ್‌ಯಿ ಹೊ ಸಾಮ್ ಹಾಂವೆಂ ದಿಂವ್ಚೊ ನ್ಹಯ್ ಕಿತ್ಯಾಕ್ ಪವಿತ್ ಖುರಿಸ್ ಜಾವ್ನಾಸಾ ಆಮ್ಕಾಂ ಖರೊಖರ್ ಪವಿತ್. ದೆಕುನ್ ಹಾಂವ್ ಮ್ಹಜಿಂ “ಟಿಂಕರಾ” ದೆಗೆನ್ ದವರ‍್ತಾಂ ಪುಣ್ ಜೆಂ ಮ್ಹಜೆಥಂಯ್ ಘಡ್‌ಲ್ಲೆಂ ಖರೋಖರ್ ಸತ್. ಆಸುಂ.
ಹೆ ಸರ‍್ವ್ ದಾಕ್ಲೆ ಆಮ್ಚೆಂ ಆಲ್ಬೆಂಪಣ್ ದಾಕಯ್ತಾನಾ, ಭಾವಾರ‍್ಥಾಕ್ ಉಜಾರ್ ಕರ‍್ಚೆ ದಿಶೆನ್ (ಅಶೆಂ ಹಾಂವ್ ಪಾತ್ಯೆತಾಂ) ಆಮಿ ಪುಬ್ಲಿಕ್ ರಿತಿರ್ ಕರ‍್ಚ್ಯೊ ಖುರ‍್ಸಾ ವಾಟೊ, ದೆಖ್ಣ್ಯೊ ಇತ್ಯಾದಿ ಕಿತ್ಲ್ಯಾ ಮಾಪಾನ್ ಫಳ್ ದೀಂವ್ಕ್ ಸಕ್ತಾತ್ ಹೆರಾಂಚೆರ್ ಪ್ರಬಾವ್ ಘಾಲುಂಕ್ ಸಕ್ತಾತ್, ಕ್ರಿಸ್ತಾಚೊ ಸಂದೇಶ್ ಪ್ರಸರೊಂಕ್ ಸಕ್ತಾತ್ ಯಾ ಫಕತ್ ‘ದೆಕ್ಲೆಂ ಮೊಡೆಂ ಆಯ್ಲೆಂ ದೂಕ್’ ಮ್ಹಳ್ಳ್ಯಾ ಕೊಂಕಣಿ ಭಾಶೆಂತ್ಲ್ಯಾ ಸೊಬಿತ್ cliche -ಪರಿಂ ಆನಿ ತಿತ್ಲೆಚ್ ಪರಿಣಾಮ್‌ಕಾರಿ ಜಾಲ್ಯಾಂತ್ ಯಾ ಜಾತಿತ್ ಮ್ಹಳ್ಳಿ ಬಿರಾಂತ್ ಮ್ಹಾಕಾ. ವೆರೊನಿಕಾ ಸ್ತ್ರೀಯೆನ್ ಫಕತ್ ಎಕೆ ದೆಖ್ಣೆಂತ್ ಆಸ್ಚೆಂ ಆನಿ ಕ್ರಿಸ್ತಾಚೆಂ ಮುಕಮಳ್ ಪುಸ್ಚೆಂ ಮ್ಹಳ್ಳೆಂ ಸವಾಲ್‌ಯಿ ಮ್ಹಜೆ ಮತಿಂತ್ ಅಪಾಲಿಪಾ ಕರ್ತಾ. ಕ್ರಿಸ್ತಾಚ್ಯಾ ಅಪರಿಮಿತ್ ಪಾಶಾಂವಾಂಕ್ ಭಾವಾರ‍್ಥಾಚ್ಯಾ ಉಮಾಳ್ಯಾನ್ ಪಿಗ್ಳೊಂಚ್ಯೊ ಮಾನೆಸ್ತಿಣಿ ಆತಾಂ ನಾಂತ್ ಯಾ ತಾಂಕಾಂ ನಿಮಾಣ್ಯಾ ಬ್ರೇಸ್ತಾರಾಚ್ಯಾ ಲಿತುರ‍್ಜಿ ವೆಳಾರ್ ಕಿತ್ಲೆಂ ಮಿನಿ ಪಾರದರ‍್ಶಕ್ ಧವೆಂ ನ್ಹೆಸಣ್ ನೆಸ್ಚೆಂ/ನಿಮಾಣ್ಯಾ ಸುಕ್ರಾರಾ ತ್ಯಾಚ್ ಮಾಪಾನ್ ಕಾಳೆಂ ನ್ಹೆಸ್ಚೆಂ ಆನಿ ‘ಹ್ಯಾಪ್ಪಿ ಗುಡ್ ಫ್ರಾಯ್ಡೆಕ್’ ಇಂಬು ಕರುನ್ ದಿಂವ್ಚೊ ಹಿಂ ಸನ್ನಿವೆಶಾಂ ಮ್ಹಾಕಾ ಕುಂಬು ಕರ‍್ತಾತ್. ಹ್ಯಾ ಅಳುಕ್‌ಪಿಳುಕ್ ವಿಷಯಾಂಚೆರ್ ಹಾಂವೆಂ ಮಾನುನ್ ಘೆತ್‌ಲ್ಲ್ಯಾ ಥೊಡ್ಯಾ ದೇವ್‌ಶಾಸ್ತ್ರಿಂ ಲಾಗಿಂ ಭಾಸಾ ಭಾಸ್ ಚಲಯ್ತಾನಾ ತಾಣಿಂ ಮ್ಹಾಕಾ ಆದೇಶ್/ಛೆತಾವ್ಣಿ ದಿಲ್ಯಾ – ಹ್ಯೊ ಪಾರಂಪರಿಕ್ ರಿತಿ-ರಿವಾಜಿ ಥೊಡ್ಯಾ ಭಾವಾರ‍್ಥ್ಯಾಂಚ್ಯಾ ಮಟ್ಟಾಕ್ ಆನಿ ದರ‍್ಜ್ಯಾಂಕ್ ಗರ‍್ಜೆಚ್ಯೊ ದೆಕುನ್ ತುಂ ತ್ಯಾ ಘಾಂಜಿಲ್ ಮುಸಾಂಚ್ಯಾ ಪೊಳಿಯೆಂತ್ ಹಾತ್ ಘಾಲುಂಕ್ ವಚಾನಾಕಾ. ಜೆಂ ಕಿತ್ಯಾಂತ್ ತುಂ ಪಾತಿಯೆತಾಯ್, ಖರ‍್ಯಾ ಕಾಳ್ಜಾನ್ ಪಾತ್ಯೆ ಆನಿ ಜಿಯೆ. ಮನ್ಶಾ ಸಬಾವ್ ಅಸಲೊಕಿ ಸಮಾದಾನ್ ಪಿಸುಡ್ಚೊ ವೊಸೊ ಆಮ್ಚ್ಯಾ ಕಾಲೆತಿಂತ್‌ಚ್ ಆಸಾ. ಹ್ಯಾ ವಿಷಾಂತ್ ಸಾಂ ಮಾತೆವ್ (18:7) ಅಶೆಂ ಲಿಕ್ತಾ: ಪಾತ್ಕಾಕ್ ಕಾರಾಣ್ ಜಾತೆಲ್ಯಾ ಸಂಸಾರಾಕ್ ಹಾ ಕಟಾ! ತಸಲ್ಯೊ ಸಂಗ್ತಿ ಘಡ್ತೆಲ್ಯೊಚ್. ಪುಣ್ ಜ್ಯಾ ಮನ್ಶಾವರ‍್ವಿಂ ತ್ಯೊ ಘಡ್ತಾತ್, ತ್ಯಾ ಮನ್ಶ್ಯಾಕ್ ಹಾ ಕಟಾ.
ಖರೆಂ, ಆತಂಕ್‌ವಾದಿಂನಿ ಆಸಾ ಕೆಲ್ಲ್ಯಾ ಧಹಶತೆಕ್ ಫುಡ್ ಕರುಂಕ್ ಆಮಿ ಸಕಾನಾಂವ್. ಬಾಪ್ ಟೊಮ್ ಹಾಕಾ ಆನಿ ತ್ಯಾ ಇನ್ನೊಸೆಂತ್ ಧರ‍್ಮ್ ಭಯ್ಣಿಂಕ್ ಆಯಿಲ್ಲಿ ದಶಾ ಆಮ್ಕಾಂಯಿ ಯೆಂವ್ಚಿನಾ ಮ್ಹಳ್ಳಿ ಹಮಿದಾರಿ (assurance) ನಾ ತರಿ ಸದ್ದ್ಯಾಕ್ ಅಶೆಂ ಜಾಂವ್ಚೆಂ ನಾ ಮ್ಹಣ್ ಪಾತ್ಯೆಲ್ಲ್ಯಾಂತ್ ಕಾಂಯ್ ಭಾವಾರ‍್ಥಿಕ್ ಆಶಾವಾದ್ ಝಳ್ಕಾತಾ ಜಾವ್ಯೆತ್. ಪುಣ್ ಧಹಶತ್ (terrorism) ಫಕತ್ ದಾಂಡ್ಯಾಂ-ತೊಣ್ಖ್ಯಾಂನಿ, ವಿಸ್ಪೋಟಾಂವರ‍್ವಿಂ ಉಬ್ಜಾಜೆ ಮ್ಹಳ್ಳೆಂ ನೇಮ್ ನಾ. ಆತಂಕ್‌ವಾದಾಚೆಂ ಕಿಸರ್ ಕೊಣಾಥಂಯ್ ಆಸಾ, ಫಾಲ್ಯಾಂ ತೆಂ ಎಕ್ ಆಗ್ಟೆಂ ಜಾವ್ನ್ ಫಯ್ಲೊಂಚಿ ಸಾದ್ಯತಾ ಆಸಾ.
ಆಮ್ಚೆಂ ತರ‍್ನೆಂ ಜನಾಂಗ್ ಆಜ್ ಖಂಚೆ ದಿಶೆನ್ ವೆತಾ ತೆಂ ಕಿತ್ಲ್ಯಾ ಜಣಾಂನಿ ಗಮನ್ ಕೆಲಾಂ? ಹ್ಯಾ ದಿಸಾಂನಿ ಜಾಂವ್ಚಿಂ ಅವ್ಘಡಾಂ, ಉಬೊನ್ ವೆಚೆ ತರ‍್ನೆ, ಶಾಥಿವಂತ್, ತಾಲೆಂತ್‌ವಂತ್ ಜೀವ್. ಕಸಲ್ಯಾಚೊ ಪರಿಣಾಮ್ ಹೊ? ಸ್ವತಾಚೆರ್ ಅಧಿಕ್ ಭರ‍್ವಸೊ, ಹಾಂವ್ ಧಯ್ರಾದೀಕ್ ಮ್ಹಾಕಾ ಕಿತೆಂಚ್/ ಕಸಲೆಂಚ್ ಜಾಂವ್ಚೆಂ ನಾ ಮ್ಹಳ್ಳೊ ಉಳ್ಟೊ ಹಂಕಾರ್. ನ್ಹಯ್ ಹೊ ಆತಂಕ್‌ವಾದ್, ಧಹಶತ್, ಎಕಾ ಥರಾಚೆಂ suicide mission?
ಜರಿತರಿ ಕ್ರಿಸ್ತಾಚಿ ಶಿಕವ್ಣ್ ಹ್ಯಾ ಚಿಂತ್ಪಾಕ್ ಉಜಾರ್ ಕರ‍್ತೆಲ್ಯಾಂಚೆ ಶಿಂತಿದಾಂಕ್ ಉಜ್ವಾಡ್ ದೀಂವ್ಕ್ ಸಕಾನಾ, ನಿಶ್ಕ್ರೀಯ್, ಜಾತಾ ತರ್ ಖಂಯ್ಸರ್‌ಗೀ ಕಸಲೆಂಗೀ ಚುಕೊನ್ ಗೆಲಾಂ.
ವ್ಹಯ್, ವ್ಹಡಿಲಾಂಥಂಯ್ ಊಣ್ ಆಸಾ. ಆಮಿ ವ್ಹಡಿಲ್ ದುಸ್ರ್ಯಾ ಖಳಾಂತ್ ಆಸಾಂವ್ ಆನಿ ಪ್ರಸ್ತುತ್ ಯುವಜಣಾಂನಿ ಕರ‍್ಚಿಂ ಆತರ‍್ವಣಾಂ ಸರ‍್ವ್ ಆಮ್ಕಾಂ ಸಾಹಸಾಂ ಕಶಿಂ ದಿಸ್ತಾತ್. ನಾಮ್‌ವರ್ ಆತಂಕ್‌ವಾದಿಂಚ್ಯೊ ಜಿಣಿಯೆ ಚರಿತ್ರಾ ಆಮಿ ಉಸ್ತಿಲ್ಯಾರ್ ಆನಿ ವಾಚ್ಲ್ಯಾರ್ ಆಮ್ಕಾಂ ಉಟೊನ್ ದಿಸ್ತಾತ್ ಸಬಾರ‍್ಶಿಂ ಅಸಲಿಂ ಧಹಶತಿ ಲಕ್ಷಣಾಂ ಜಿಂ ಹರ್‌ಎಕಾ ಹುಕುಮ್‌ಶಾಹಿ ಥಂಯ್, ಆತಂಕ್‌ವಾದಿಥಂಯ್ ಆನಿ ವಿಕೃತ್ ಮಾನಸಿಕತೆಚ್ಯಾಂ ಥಂಯ್ ಆಸ್‌ಲ್ಲಿಂ ತಿಂ. ರೊಮಾಗಾರಾಂಚ್ಯಾ ಕಾಳಾರ್ ಜಾಂವ್ ತೊ ಕ್ಯಾಲಿಗುಲಾ, ಹ್ಯಾಚ್ ಶತಕಾಂತ್ಲೊ ಹಿಟ್ಲರ್, ಪೊಲ್‌ಪೊಟ್, ಖ್ಹೊಮೆನಿ, ಸದ್ದಾಮ್, ಘದ್ದಾಫಿ, ಈದಿ ಆಮೀನ್ ಹಾಂಕಾಂ ಆನಿ ಅಸಲ್ಯಾಂಕ್ ಎಕ್ ಮಾನಸಿಕ್ ವಳ್ (kink, pervertions) ಆಸ್‌ಲ್ಲಿಂ ಆನಿ ತಾಂಚ್ಯಾ ರಾಜ್ವಟ್ಕೆ ವೆಳಾರ್ ತೆ ಜಾವ್ನಾಸ್‌ಲ್ಲೆ ವ್ಹಡ್ಲೆ ಧಯ್ರಾದೀಕ್ ಹೀರೊ, ಥರ‍್ತೆರೆ ಉಬ್ಜಾಂವ್ಚೆ ‘ಘಬ್ಬರ್ ಸಿಂಘ್.’
ನೆಣಾಂವ್ ಆಮಿ ಆಮ್ಚ್ಯಾಚ್ ಹಿತ್ಲಾಚ್ಯಾ ಮುಲ್ಯಾಂತ್ ಕಿತ್ಲೆ ಆನಿ ಕಸಲೆ ನೇರ್ ಕಿರ‍್ಲಾಲ್ಯಾತ್ ಆನಿ ವ್ಹಾಡೊನ್ ಯೆತಾತ್ ಮ್ಹಣ್. ಅಸಲ್ಯಾಂಚಿಂಚ್ ಕರ‍್ತುಬಾಂ, ಧಹಶತೆಚಿ ಲಕ್ಷಣಾಂ ಕ್ರಿಸ್ತಾಂವ್ ಭಾವಾರ‍್ಥಾಕ್ ಆಮಾಸ್ ಹಾಡುನ್ ಆಯ್ಲ್ಯಾಂತ್ ಆನಿ ಹಾಡಿತ್ತ್ ಆಸಾತ್. ಆನಿ ಅಶೆಂ ತರ್ ಮುಂದರುನ್ ವಚಾತ್ ತರ್ ಆಮ್ಚ್ಯಾ ಸಗ್ಳ್ಯಾ ಕ್ರಿಸ್ತಾಂವ್ ದೇವ್‌ಪರ‍್ಜೆನ್ ಖುರ‍್ಸಾಚೆಂ ಆರಾದನ್ ನ್ಹಯ್, ಖುರ‍್ಸಾಚೆಂ ಮರಣ್ ಆಪ್ಣಾಂವ್ಚೆ ದೀಸ್ ಯೆತೆಲೆ.
ಆನಿ ತವಳ್ ಆಮ್ಚೆಥಂಯ್ ‘ಹ್ಯಾಪ್ಪಿ ಗುಡ್ ಫ್ರಾಯ್ಡೆ’ ಮ್ಹಣ್ಚಿ ಸಕತ್‌ಯಿ ಆಸ್ಚಿ ನಾ.
► ಎಡ್ವಿನ್ ಜೆ.ಎಫ್.ಡಿಸೊಜಾ, ಮಂಗ್ಳೂರು
