ಜೆ. ಆರ್. ಲೋಬೊ – ಮಂಗ್ಳುರಾಕ್ ಆತಾಂ ತುಮಿಂಚ್ ಆಸ್ರೊ

ರೋಮ್ ಪೆಟೊನ್ ಝಳ್ತಾನಾ ರಾಯ್ ನೀರೊ ಗಿಟಾರ್ ವಾಜಯ್ತಾಲೊ ಖಂಯ್. ಪಾಟ್ಲ್ಯಾ ಪಾಂಚ್ ವರ್ಸಾಂನಿ ಚಡಾವತ್ ಆಸಲಿಚ್ ಗತ್ ಜಾಲ್ಯಾ ಆಮ್ಚ್ಯಾ ಮಂಗ್ಳುರ್ ಶಹರಾಚಿ. ಮಂಗ್ಳುರ್ ಶೆರ್ ಉಜ್ಯಾಕಾಯ್ಲಿರ್ ಭಾಜೊನ್ ಆಸಾ.

ಕೃತಕ್ ಆವ್ರಾ ನಿಮ್ತಿಂ ಮಂಗ್ಳುರ್ಚ್ಯಾ ರಸ್ತ್ಯಾಂನಿ ನ್ಹಂಯೊ ವಾಳ್ತಾನಾ, ಕೊರೊನಾ ಪಿಡೆಕ್ ಲಾಗೊನ್ ಲೋಕ್ ವಳ್ವಳ್ತಾನಾ, ಕೊರೊನಾಂತ್ ಮರಣ್ ಪಾವ್ಲೆಲ್ಯಾಂಕ್ ಸ್ಮಶಾನಾಂತ್ ಹುಲ್ಫಾಂವ್ಕ್ ಸೊಡಿನಾಸ್ತಾನಾ ಕುಟ್ಮಾದಾರಾಂನಿ ಮೊಡೆಂ ಘೆವ್ನ್ ರಸ್ತೆ – ರಸ್ತೆ ಭಂವ್ತಾನಾ, ರಸ್ತ್ಯಾ ಗುಂಡಿಯಾಂಕ್ ತರ್ನೆ ಜೀವ್ ಬಲಿ ಜಾತಾನಾ, ವೊರಾಂಚಿಂ ವೊರಾಂ ಟ್ರಾಫಿಕ್ ಜಾಮಾಂತ್ ಶಿರ್ಕೊನ್ ಕಶ್ಟಾತಾನಾ, ವಾಟೆರ್ ಕಚ್ರೊ ರಾಸ್ ಪಡೊನ್ ಘಾಣ್ ಉಟ್ತಾನಾ ಆನಿ ಆತಾಂ ಪಿಯೊಂವ್ಚ್ಯಾ ಉದ್ಕಾಕ್ ತತ್ವಾರ್ ಯೆತಾನಾ – ಚುನಾಯಿತ್ ಪ್ರತಿನಿಧಿ ಲೊಕಾಚ್ಯಾ ಕುಮ್ಕೆಕ್ ಆಯಿಲ್ಲೆಚ್ ನಾಂತ್. ಲೊಕಾನ್ ಆವಾಜ್ ಉಟಯ್ಲ್ಯಾ ಉಪ್ರಾಂತ್ ಕಣ್ಣ್‌ಕಟ್ಟಾಕ್ ವಾರ್ ರೂಮಾಂ ಕರ್ನ್ ಬಸ್ಲೆ. ಕೇಂದ್ರಾಂತ್, ರಾಜ್ಯಾಂತ್ ಆನಿ ಪಾಲಿಕೆಂತ್ ಹಾಂಚೊಚ್ ತ್ರಿಬಲ್ ಇಂಜಿನ್ ಸರ್ಕಾರ್ – ತರ್ WAR ಕೊಣಾಕಡೆ ? ಹಾಂಚ್ಯಾ ಹಾತಾಕ್ ಅಧಿಕಾರ್ ದಿಲ್ಲ್ಯಾ ಲೊಕಾಕಡೆಚ್ ಝುಜ್ಚೆಂ ?

ಮಂಗ್ಳುರ್ ಶೆರ್ ಆಪ್ಲೆಂ ಮ್ಹಣ್ ಹಾಂಗಾಚ್ಯಾ ಚುನಾಯಿತ್ ಪ್ರತಿನಿಧಿಂಕ್ ಭೊಗ್‌ಲ್ಲೆಂಚ್ ನಾ. ಪಿಯೆಂವ್ಚೆಂ ಉದಕ್, ಕಚ್ರೊ ವಿಲೇವಾರಿ ತಸಲೆ ಮುಳಾವ್ಯೊ ಸವ್ಲತ್ಯೊ ವಿಚಾರ್ನ್ ಪ್ರತಿಭಟನ್ ಕೆಲ್ಲ್ಯಾಂಕೀ ಭೆಶ್ಟಾವ್ನ್ ತೋಂಡ್ ಧಾಂಪಂವ್ಚೆಂ ಪ್ರೇತನ್ ಚಲ್ಲೆಂ.

ಮಂಗ್ಳುರ್ ಶೆರ್ ಬಾಂದುನ್ ಹಾಡ್‌ಲ್ಲೆಂಚ್ ಕ್ರಿಸ್ತಾವಾಂನಿಂ (ಪ್ರೊಟೆಸ್ಟೆಂಟ್ ಆನಿ ಇತರ್ ಪಂಗ್ಡಾಂಚೊಂ ಸಹಕಾರ್ ಖಂಡಿತ್ ಆಸಾ) ಮ್ಹಳ್ಯಾರ್ ಖಂಡಿತ್ ಚೂಕ್ ಜಾಂವ್ಚಿ ನಾ. ಕ್ರೀಸ್ತಾಂವ್ ಲೋಕ್ ಹಾಂಗಾಚೆ ಮೂಳ್‌ನಿವಾಸಿ ಮ್ಹಣ್ಯೆತ್. ಗೊಂಯಾಥಾವ್ನ್ ಧಾಂವೊನ್ ಆಯಿಲ್ಲೆ ಮ್ಹಣ್ಚ್ಯಾ ಪ್ರೊಪೊಗಾಂದಾಕ್ ಕಸಲೊಚ್ ಐತಿಹಾಸಿಕ್ ಆದಾರ್ ನಾ. ಠೋಸ್ ಪುರಾವೆಯ್ ನಾಂತ್. ಪೊರ್ಚುಗಿಸಾಂಚ್ಯಾ ಇಂಕ್ವಿಜಿಸಾಂವಾಕ್ ಲಾಗೊನ್ ಕ್ರೀಸ್ತಾಂವ್ ಗೊಂಯ್ ಸಾಂಡುನ್ ಅಯ್ಲೆ ವ್ಹಯ್ ಜಾಲ್ಯಾರ್, ಹಾಂಗಾಯ್ ಕ್ರೀಸ್ತಾಂವ್ ಜಾವ್ನ್ ತೆ ಕಶೆಂ ಉರ‍್ಲೆ ? ಮ್ಹಳ್ಳ್ಯಾ ಸವಾಲಾಕ್ ಪ್ರೊಪೊಗಾಂದಾ ಕರ‍್ತೆಲ್ಯಾಂಲಾಗಿಂ ಜಾಪಿ ನಾಂತ್. ಕ್ರಿಸಾಂವ್ ಮುಳಾನ್ ಮಂಗ್ಳುರ್ಚೆಚ್ ಆನಿ ಮಂಗ್ಳುರ್ ಶಹರ್ ತಾಣಿ ಆಪ್ಲ್ಯಾ ಘಾಮಾನ್ ಬಾಂದುನ್ ಹಾಡ್ಲಾಂ ದೆಕುನ್ ಮಂಗ್ಳುರಾ ವಿಶ್ಯಾಂತ್ ಕ್ರ‍ಿಸ್ತಾಂವಾಂಕ್ ಆಪ್ಲೆಂಪಣ್ ಆಸಾ. ನಳ್ಯಾ ಕಾರ್ಖಾನೆ, ಇಸ್ಕೊಲಾಂ, ಆಸ್ಪತ್ರ್ಯೊ … ಆಶೆಂ ಹರ್ಯೆಕಾ ಸಂಗ್ತಿಂನಿ ಕ್ರೀಸ್ತಾಂವ್ ಸಮುದಾಯಾನ್ ಜಾತ್ – ಕಾತ್ – ಧರ್ಮ್ ಲೆಕಿನಾಸ್ತಾಂ ಸರ್ವ್ ಸಮುದಾಯಾಂ ಸಾಂಗಾತಾ ಜಿಯೆಲ್ಲ್ಯಾನ್ ಕ್ರೀಸ್ತಾಂವ್ ಸಮಾಜಾಕ್ ಆತಾಂಯ್ ಮಂಗ್ಳುರಾಂತ್ ವ್ಹಡ್ ಗೌರವ್ ಆಸಾ.

ಪೂಣ್ – ಕೆನ್ನಾ ರಾಜಕೀಯಾಂತ್ ಧರ್ಮ್ ಭರ್ಸಾಲೊ, ತವಳ್ ಸಗ್ಳೆಂ ಬದ್ಲಾಲೆಂ. ಹರೇಕ್ಲ್ಯಾನ್ ತಾತಾಂಚ್ಯಾ ಧರ್ಮಾಚ್ಯಾಂಕ್ ಪಾಟಿಂಬೊ ದೀಂವ್ಕ್ ಸುರು ಕೆಲೊ. ಹಾಚೊ ಶೀದಾ ಪರಿಣಾಮ್ ಉಣ್ಯಾಸಂಕ್ಯಾತ್ ಲೊಕಾಚೆರ್ ಪಡ್ಲೊ ಆನಿ ಕ್ರೀಸ್ತಾಂವಾಂನಿ ಆಸ್‌ಲ್ಲಿ ಏಕ್ ಎಮ್.ಎಲ್.ಎ ಸೀಟ್ ಸಯ್ತ್ ಹೊಗ್ಡಾಯ್ಜೆ ಪಡ್ಲಿ. ಬ್ಲೇಸಿಯಸ್ ಡಿ’ಸೊಜಾ ಉಪ್ರಾಂತ್ ತೀನ್ ಚುನಾವ್ ಸತತ್ ಯೋಗಿಶ್ ಭಟ್ ಬಿಜೆಪಿ ಥಾವ್ನ್ ಜಿಕ್ಲೊ ಆನಿ ಆಸ್‌ಲ್ಲಿ ಏಕ್ ಸೀಟ್‌ಯಿ ಹೊಗ್ಡಾಂವ್ಚ್ಯಾ ಸ್ಥಿತೆಕ್ ಕ್ರೀಸ್ತಾಂವ್ ಸಮಾಜ್ ಪಾವ್ಲೊ. ಆನಿ ತೆನ್ನಾ ಕ್ರೀಸ್ತಾಂವ್ ಸಮಾಜಾಚ್ಯಾ ಮುಕೆಲ್ಯಾಂಕ್ ಆನಿ ಪ್ರತೇಕ್ ಜಾವ್ನ್ ಸಮಾಜ್ ಸೇವಕ್ ಶ್ರೀ ರೊನಾಲ್ಡ್ ಕುಲಾಸೊಚ್ಯಾ ಮುಕೆಲ್ಪಣಾರ್ ಆನಿವಾಸಿ ಭಾರತೀಯ್ ಕ್ರಿಸ್ತಾಂವ್ ಸಮುದಾಯಾಕ್ ದಿಶ್ಟಿಕ್ ಪಡ್‌ಲ್ಲೊ ನಿಷ್ಠಾವಾನ್ ಮನಿಸ್ – ಕೆ.ಎ.ಎಸ್. ಅಧಿಕಾರಿ ಶ್ರೀ ಜೆ. ಆರ್. ಲೋಬೊ ಯಾನೆ ಲೋಬಾಮ್.

ತವಳ್ ಮಂಗ್ಳುರಾಂತ್ ಲೋಬಾಮಾಚಿ ಹವಾ ಅಶಿ ಚಲ್ಲಿಗೀ, ಅಮೆರಿಕಾದಲ್ಲಿ ಒಬಾಮಾ – ಮಂಗಳೂರಿನಲ್ಲಿ ಲೊಬಾಮಾ ಮ್ಹಳ್ಳೆ ನಾರೆ ಗಾಜ್ಲೆ. ಆಜ್ ಮಂಗ್ಳುರಾಂತ್ ಪರ್ತ್ಯಾನ್ ಲೋಬಾಮಾಚಿ ಅಸಲೀಚ್ ಏಕ್ ಹವಾ ಚಲ್ತೇ ಆಸಾ. ಲೋಬಾಮಾನ್ ನಾಮ್‌ಪತ್ರ್ ದಾಖಲ್ ಕರ್ತಾನಾ ಕುದ್ರೋಳಿ ದೆವುಳಾಥಾವ್ನ್ ಲಾಲ್‌ಭಾಗ್ ಮಹಾಪಾಲಿಕಾ ಪರ್ಯಾಂತ್ ವ್ಹಾಳೊನ್ ಅಯಿಲ್ಲೊ ಲೊಕಾಸಾಗೊರ್‌ಚ್ ಹಾಕಾ ಸಾಕ್ಸ್.

ಸದಾಂನೀತ್ ಮ್ಹಳ್ಳೆಪರಿಂ ಜಾತಿ – ಧರ್ಮಾಚ್ಯಾ ನಾಂವಾನ್ ಜಾಂವ್ಚಿಂ ಝಗ್ಡಿಂ, ಅನೈತಿಕ್ ಗೂಂಡಾಗಿರಿ, ಲ್ಹಾನ್ ಆನಿ ಮದ್ಯಮ್ ವೆಪಾರಿಂಚ್ಯಾ ದಿಸ್ಪಡ್ತ್ಯಾ ವೆಪಾರ್ – ವಯ್ವಾಟಾಕ್ ಜಾಂವ್ಚೆಂ ಲುಕ್ಸಾಣ್, ವ್ಹರಾಂ ಗಟ್ಲ್ಯಾನ್ ಟ್ರಾಫಿಕ್ ಜಾಮ್, ಮೊಳ್ಬಾಕ್ ತೆಂಕ್‌ಲ್ಲಿಂ ಮೊಲಾಂ, ಚಾಳಿಸ್ ಠಕ್ಕೆ ಕಮಿಶನಾ ಧರ್ಮಾನ್ ಉದ್ಘಾಟನ್ ಜಾಲ್ಲ್ಯಾ ದುಸ್ರ್ಯಾ ದಿಸಾಚ್ ಫುಟ್ಚೆ ಕಾಂಕ್ರೀಟ್ ರಸ್ತೆ, ಕೊಸಾಳ್ಚಿಂ ಬಾಂದ್ಪಾಂ – ಬ್ರಿಡ್ಜಾಂ, ಲೊರಿಯೊ ಶಿರ್ಕೊಂಚಿಂ ಅಂಡರ್‌ಪಾಸಾಂ – ಮಂಗ್ಳುರ್ಚ್ಯಾ ಲೊಕಾಕ್ ಆತಾಂ ಪುರೊ ಜಾವ್ನ್ ಗೆಲಾಂ. ಬದ್ಲಾವಣ್ ಅನಿವಾರ್ಯ್ ಜಾಲ್ಯಾ.

ಏಕ್, ಕೆ. ಎ. ಎಸ್ ಅಧಿಕಾರಿ ಜಾವ್ನ್ ಲೋಬಾಮಾನ್ ಆಪ್ಲ್ಯಾ ಪಯ್ಲ್ಯಾಚ್ ಅವ್ಧೆಂತ್ ದಿಲ್ಲಿ ಸೆವಾ ಬೋವ್ ಉಂಚ್ಲಿ. ತಾಚ್ಯಾ ಬುದ್ವಂತ್ಕಾಯೆಕ್ ಆನಿ ಪಯ್ಸಾದಿಶ್ಟಿಕ್ ಪಿಲಿಕುಳ ನಿಸರ್ಗ ಧಾಮ, ಪ್ಲಾನೆಟೋರಿಯಂ ಆನಿ ಸ್ಮಾರ್ಟ್ ಸಿಟಿ ಜೊಕ್ತಿಂ ಉದಾಹರಣಾಂ.

ಲೊಬಾಮಾನ್ ಮಂಗ್ಳುರ್ಚೆ ರಸ್ತೆ ಸುದ್ರಾಯ್ಲೆ, ಕದ್ರಿ ಪಾರ್ಕ್ ಸೊಭಿತ್ ಕೆಲೆಂ, ತುಂಬೆ ಡ್ಯಾಮಾಚಿ ದುರುಸ್ತಿ ಕರುನ್ ಪಿಯೆಂವ್ಚ್ಯಾ ಉದ್ಕಾಚೆ ತತ್ವಾರ್ ನಿವ್ರಾಯ್ಲೆ, ಸಾಸ್ಣಾಕ್ ಪಿಯೆಂವ್ಚ್ಯಾ ಉದ್ಕಾಚೆ ಸಮಸ್ಸೆ ಜಾಯ್ನಾತ್ಲೆಪರಿಂ ‘ಜಲಸಿರಿ’ ತಸಲೆಂ ಯೋಜನ್ ಹಾಡ್ಲೆಂ. ಲೋಬಾಮ್ ಆಸ್ತಾನಾ ಕಮಿಶನಾಕ್ ಅವ್ಕಾಸ್ ನಾತ್ಲೊ. ತೊ ಭ್ರಶ್ಟಾಚಾರ್ ಸೊಸಿನಾತ್ಲೊ. ದೆಕುನ್ 2013 ಥಾವ್ನ್ 2018 ಪರ್ಯಾಂತ್ ಮಂಗ್ಳುರ್ಚಿ ಅಭಿವೃದ್ದಿ ಕೊಣೆಂಯ್ ಚಿಂತಿನಾತ್ಲೆ ತಿತ್ಲ್ಯಾ ವೆಗಾನ್ ಜಾಲಿ. ಮಂಗ್ಳುರ್ಚಿ ನಕ್ಷಾ ತಾಚ್ಯಾ ಮತಿಂತ್ ಗೂಗಲ್ ಮ್ಯಾಪಾಪರಿಂ ಅಸ್ಲಿ. ತಾಚಿ ಬುದ್ವಂತ್ಕಾಯ್, ಜಾಣ್ವಾಯ್ ಆನಿ ಕಾಮ್ ಕರ್ಚಿ ಕ್ಷಮತಾ ಪಳಯ್ತಾನಾ ಕ್ರಿಸ್ತಾಂವ್ ಸಮಾಜಾಚ್ಯಾ ಮುಕೆಲ್ಯಾಂನಿ ತಾಕಾ ಭೊಳಾವ್ನ್, ತಾಣೆ ಸರ್ಕಾರಿ ಕಾಮಾಕ್ ಸ್ವಯಂ ನಿವೃತ್ತಿ ದಿಂವ್ಚೆಪರಿಂ ಕೆಲ್ಲೆಂ ಸಾರ್ಥಕ್ ಜಾಲೆಂ ಮ್ಹಣ್ ಭೊಗ್ಲೆಂ.

ಜಾತ್ – ಕಾತ್ – ಧರ್ಮ್ ಲೆಕಿನಾಸ್ತಾಂ ತಾಣೆ ಸರ್ವಾಂಕ್ ಸಮಾನ್ ಜಾವ್ನ್ ದೆಕ್ಲೆಂ. ಕಾನೂನ್ ವೆವಸ್ತೆಚೆರ್ ಖಡಕ್ ದೀಶ್ಟ್ ದವರ್ಲಿ. ತೋ ಶಾಸಕ್ ಆಸ್ತಾನಾ ಅನೈತಿಕ್ ಗೂಂಡಾಗಿರಿಚಿಂ ಜಾಂವ್, ಹಿಜಾಬಾಚಿಂ ಘಡಿತಾಂ ಘಡೊಂಕ್ ತಾಣೆ ಸೊಡುಂಕ್‌ಚ್ ನಾ. ಪ್ರವಾಸೋದ್ಯಮಾಕ್ ವಿಶೇಸ್ ಮಹತ್ವ್ ತಾಣೆ ದಿಲೊ. ಲಕ್ಷದ್ವೀಪಾಕ್ ಸಯ್ತ್ ತೊ ಗೆಲೊ. ವಸ್ತೆಕ್ ಘರಾಂ ನಾಸ್ತಾನಾ ಕಶ್ಟಾತೆಲ್ಯಾಂಕ್ ವಸ್ತೆ ಯೋಜನ್ ಮಾಂಡುನ್ ಹಾಡ್ಲೆಂ. ಅಭಿವೃದ್ದಿಚ್ ರಾಜ್‌ಕಾರಣ್ ಮ್ಹಣ್ಚೆ ತಸಲೊ ಲೋಬಾಮಾ ತಸಲೊ ಶಾಸಕ್ ಕರ್ನಾಟಕಾಂತ್‌ಚ್ ಪಯ್ಲೊ ಮ್ಹಳ್ಯಾರೀ ಚೂಕ್ ಜಾಂವ್ಚಿ ನಾ.

ಪೂಣ್ – ದುರ್ದಶಾ. 2018 ವ್ಯಾ ಎಲಿಸಾಂವಾಂತ್ ಲೋಬಾಮ್ ಸಲ್ವಾಲೊ. ಕಿತ್ಯಾಕ್ ಮ್ಹಳ್ಯಾರ್ ತಾಕಾ ಧರ್ಮ್ ಆದಾರಿತ್ ರಾಜ್‌ಕಾರಣ್ ಕರುಂಕ್ ಕಳ್ಳೆಂ ನಾ. ತೊ ಸತ್ ಉಲಯ್ಲೊ, ಬರೊ ಸಾಮಾರಿಯಾಗಾರ್ ಜಾಲೊ ಆನಿ ಧರ್ಮಾಂದ್ಳ್ಯಾಂಚ್ಯಾ ಖೆಳಾಚೆರ್ ತಾಣೆ ಖಾಡುಂ ಘಾಲ್ಲೆಂ.

ಲೋಬಾಮ್ ಸಲ್ವಾಲ್ಲ್ಯಾಚೊ ಪರಿಣಾಮ್ ಆಜ್ ಮಂಗ್ಳುರ್ ಶಹರ್ ಭೊಗ್ತೇ ಆಸಾ. ಡಬಲ್ ನ್ಹಯ್, ತ್ರಿಬಲ್ ಇಂಜಿನ್ ಸರ್ಕಾರ್ ಆಸೊನೀ ಕಚ್ರ್ಯಾಚಿ ರಾಸ್ ಕ್ಲಿಯರ್ ಕರುಂಕ್ ಎದೊಳ್ ಜಾಂವ್ಕ್ ನಾ. ಪಿಯೆಂವ್ಚ್ಯಾ ಉದ್ಕಾಚೆಂ ರೇಶನಿಂಗ್ ಪರ್ತ್ಯಾನ್ ಸುರು ಜಾಲಾಂ. ಆತಾಂ – ಫಕತ್ ದೋನ್ ದಿಸಾಂಕ್ ಏಕ್ ಪಾವ್ಟಿಂ  ಪಿಯೆಂವ್ಚೆಂ ಉದಕ್! ಪಚ್ಚನಾಡಿಂತ್ ಕಾಂಯ್ ಕಿತ್ಲೆ ಪಾವ್ಟಿಂ ಉಜೊ ಪಡ್ಲಾ ಲೇಕ್ ನಾ. ರಸ್ತ್ಯಾಚ್ಯಾ ಗುಂಡಿಯಾಂನಿ ಇಂಜಿನಿಯರಿಂಗ್ ಶಿಕೊನ್ ಕಾಮಾಕ್ ಆಯ್ತೊ ಜಾಲ್ಲ್ಯಾ ಪ್ರತಿಭಾನ್ವಿತ್ ಭುರ್ಗ್ಯಾಚೊ ಜೀವ್ ಗೆಲಾ.

ಏಕ್ ದೋನ್ ಬಸ್ ಸ್ಟೇಂಡಾ, ಅವೈಜ್ಞಾನಿಕ್ ರಸ್ತೆ, ಏಕ್ ಟ್ರಕ್ಕ್ ಪಾಶಾರ್ ಜಾಯ್ನಾತ್ಲೆಂ ಅಂಡರ್‌ಪಾಸ್ ಆನಿ ಏಕ್ ದೋನ್ ಉದ್ಯಾನಾಂ, ಚಾರ್ ಸರ್ಕಲಾಂ ಕೆಲ್ಲೆಂ ಆನಿ ಜಾಗ್ಯಾಚಿಂ ನಾಂವಾ ಬದ್ಲಿಂಲ್ಲೆಂಚ್ ಮಂಗ್ಳುರ್ ಅಭಿವೃದ್ದಿ ಜಾಲೆಂ ಮ್ಹಣ್ತಾತ್.

ಹಕೀಗತ್ ಮ್ಹಳ್ಯಾರ್ – ಪಾಟ್ಲ್ಯಾ ಪಾಂಚ್ ವರ್ಸಾಂನಿ ‘ಲೋಬಾಮ್’ ನಾಸ್ತಾನಾ ಮುಂಗ್ಳುರ್ಚ್ಯಾ ನಾಗರಿಕಾಚೆಂ ಜಿವಿತ್ ಯೆಂಮ್ಕೊಂಡ್ ಜಾಲಾಂ. ಮಂಗ್ಳುರಾಂತ್ ಕಾನುನ್ ವೆವಸ್ತಾ ಸಾರ್ಕಿ ನಾ ಮ್ಹಣೊನ್ ಹೆರ್ ರಾಜ್ಯಾಚಾ ವಿದ್ಯಾರ್ಥಿಂನಿ ಹಾಂಗಾ ಉಂಚ್ಲ್ಯಾ ಶಿಕ್ಪಾಕ್ ಯೆಂವ್ಚೆಂ ರಾವಯ್ಲಾಂ. ಪ್ರವಾಸಿ ಯೇಂವ್ಕ್ ಭಿಯೆತಾತ್. ಟ್ರಾಫಿಕ್ ಸಮಸ್ಸೊ ದಿಸಾಂದೀಸ್ ಚಡೊನ್ ಆಸಾ. ಎಂಬುಲೆನ್ಸಾಂಕ್ ಸಯ್ತ್ ವಾಟ್ ನಾ. ಪಿಯೊಂಕ್ ಉದಕ್ ನಾ. ಲೋಬಾಮಾನ್ ಸುರು ಕೆಲ್ಲ್ಯಾ ವಸ್ತೆ ಯೋಜನಾಂತೀ ಧಂಯಾಂತ್ ಫಾತೊರ್ ಸೊಧ್‌‌ಲ್ಲೆಪರಿಂ ಊಣ್ ಸೊಧುನ್, ದುಬ್ಳ್ಯಾ ವಸ್ತೆವೀಣ್ ಲೊಕಾಚ್ಯಾ ಪೊಟಾಕ್ ಫಾತೊರ್ ಘಾಲಾ. ಜರಿ ಲೋಬಾಮಾ ತಸಲೊ ಶಿಕ್ಪಿ, ಜಾಣಾರಿ ಆನಿ ಆಡಳ್ತ್ಯಾಂತ್ ಅನುಭವಿ ಶಾಸಕ್ ಆಸ್‌ಲ್ಲೊ ಜಾಲ್ಯಾರ್ – ಮಂಗ್ಳುರ್ಚಿ ಪರಿಸ್ಥಿತಿ ಆಜ್ ಇತ್ಲಿ ಪಾಡ್ ಖಂಡಿತ್ ಜಾತಿ ನಾ. ಹಿ ಗಜಾಲ್ ಆತಾಂ ಮಂಗ್ಳುರ್ ದಕ್ಶಿಣ್ ಕ್ಷೇತ್ರಾಚ್ಯಾ ಮತದಾರಾಂಕ್ ಸ್ಪಶ್ಟ್ ಕಳ್ಳ್ಯಾ ಆನಿ ತೆ ಲೋಬಾಮಾಕ್  ‘ಮತ್’ ದೀನಾತ್ಲೆ ಖಾತಿರ್ ಚುರ್ಚುರೊನ್ ಆಸಾತ್. ಜಾಯ್ತೆ ಉಗ್ತ್ಯಾನ್ ಸಾಂಗ್ತಾತ್. ಥೊಡೆ ಮನಾಭಿತರ್ ಪಶ್ಚಾತ್ತಾಪ್ ಪಾವ್ತಾತ್.

ಪೂಣ್ , ಹಿ ನಿರ್ಣಾಯಕ್ ಗಜಾಲ್ ಸಮ್ಜೊಂಚ್ಯಾಂತ್ ಕ್ರೀಸ್ತಾಂವ್ ಲೋಕ್ ಮಾತ್ ಪಾಟಿಂ ಉರ್ಲಾ ಮ್ಹಣ್ ದಿಸ್ತಾ. ಅವಿಭಜಿತ್ ದಕ್ಷಿಣ ಕನ್ನಡ ಜಿಲ್ಲ್ಯಾಂತ್ ಕ್ರಿಸ್ತಾವಾಂಕ್ ಮ್ಹಣ್ ಆಸ್ಚಿ ಸೀಟ್ ಏಕ್‌ಚ್ – ಮಂಗ್ಳುರ್ ದಕ್ಷಿಣ್! ಹ್ಯಾ ಪಾವ್ಟಿಂ ಆಕೇರ್ ಪರ್ಯಾಂತ್ ತೀಯ್ ಮೆಳಾನಾ ಮ್ಹಣ್ ಆಸ್ಲಿ. ದೆವಾಚ್ಯಾ ದಯೆನ್ ಆನಿ ಸಬಾರಾಂಚ್ಯಾ ಪ್ರಯತ್ನಾಚೊ ಫಳ್ ಜಾವ್ನ್ ‘ಸಮಾಜಿಕ್ ನ್ಯಾಯಾ’ಚ್ಯಾ ಆದಾರಾರ್ ಕ್ರೀಸ್ತಾಂವ್ ಅಭ್ಯರ್ಥಿಕ್ ಶೆವ್ಟಿಂ ಮಂಗ್ಳುರ್ ದಕ್ಷಿಣ್ ಕ್ಷೇತ್ರಾ ಥಾವ್ನ್ ಏಕ್ ಅವ್ಕಾಸ್ ಮೆಳ್ಳಾ. ಆನಿ ಹೊ ಅವ್ಕಾಸ್ ಫಾವೊತ್ಯಾ ಅಭ್ಯರ್ಥಿಕ್‌ಚ್ ಮೆಳ್ಳ್ಯಾ.

ಮಂಗ್ಳುರ್ ಶೆರಾಚ್ಯಾ ಅಭಿವೃದ್ದೆಚ್ಯಾ ದಿಶ್ಟಿನ್ ಲೋಬಾಮಾಕ್ ಜಿಕಂವ್ಚಿ ವ್ಹಡ್ ಜವಾಬ್ದಾರಿ ಮ್ಹಣಾ ವಾ ಕಾಯ್ದೊಚ್ ಆಮ್ಕಾಂ ಬಾಂದ್ತಾ. ಜರಿ ಹ್ಯಾ ಪಾವ್ಟಿಂಯ್ ಹೊ ಅವ್ಕಾಸ್ ಹೊಗ್ಡಾಯ್ಲೊ ಜಾಲ್ಯಾರ್ ಉಪ್ರಾಂತ್ ‘ಮಂಗ್ಳುರ್ ದೀಸ್ ವೆತಾಂ ವೆತಾಂ ಪಾಡ್ ಜಾತೇ ಆಸಾ, ಟ್ರಾಫಿಕ್ ಚಡ್ಲಾಂ, ಎಕ್ಸಿಡೆಂಟಾಂ ಜಾತಾತ್, ಪಿಯೊಂಕ್ ಉದಕ್ ನಾ, ಆವ್ರ್ ಯೆತಾ’ ಮ್ಹಣೊಂಕ್ ಆಮ್ಕಾಂ ಕಸಲೆಂಚ್ ನೈತಿಕ್ ಹಕ್ಕ್ ನಾಂ. ಅಭಿವೃದ್ದಿ ಜಾಯ್ಜೆ ತರ್, ಅಭಿವೃದ್ದಿ ಕಶಿ ಕರಿಜೆ ಮ್ಹಳ್ಳೊ ಸ್ಪಶ್ಟ್ ದಿಶ್ಟಾವೊ ಆಸ್ಚ್ಯಾ ಮನ್ಶ್ಯಾಕ್ ಜಿಕಯ್ಜೆ. ಜಾತ್ – ಧರ್ಮಾಚ್ಯಾ ನಾಂವಾನ್ ವೊಟ್ ಮಾಗ್ತಲ್ಯಾಂಕ್ ಶೀದಾ ನೆಗಾರಿಜೆ.

ಹ್ಯಾ ಪಾವ್ಟಿಂ ಲೋಬಾಮ್ ಜಿಕಾನಾ ಜಾಲ್ಯಾರ್ ಫುಡಾರಾಂತ್ ಮ್ಹಜ್ಯಾ ಯಾ ತುಮ್ಚ್ಯಾ ಕುಟ್ಮಾ ಥಾವ್ನ್ ಪಿಂತಾಮ್, ಸೊಜಾಮ್, ಸಿಕೇರಾಮ್ ವಾ ಹೆರ್ ಖಂಯ್ಚ್ಯಾಯ್ ಮಾಮಾಕ್ ರಾಷ್ಟ್ರಿಯ್ ಪಾಡ್ತಿ ಥಾವ್ನ್ ಟಿಕೆಟ್ ಮೆಳ್ಚೊ ಸಂಭವ್ ನಾ. ಮಂಗ್ಳುರ್ ಶಹರ್ ವೈಜ್ಞಾನಿಕ್ ರಿತಿನ್ ಅಭಿವೃದ್ದಿ ಜಾಯ್ಜೆ ಜಾಲ್ಯಾರ್ ಲೋಬಾಮಾ ಶಿವಾಯ್ ಬರಿ ವಿಂಚವ್ಣ್ ನಾ. ಆತಾಂ, ಚುಕಿಚ್ಯಾ ಮನ್ಶ್ಯಾಕ್ ವಿಂಚುನ್, ಉಪ್ರಾಂತ್ ಚುರ್ಚುರೊನ್ ಫಾಯ್ದೊ ನಾ.

• ವಿನೋದ್ ಪಿಂಟೊ, ತಾಕೊಡೆ