ಆಮ್ಚ್ಯಾ ಕೊಂಕಣಿ ವಾಕಸರಿಂತ್ ಸಬಾರ್ ಸಬ್ದ್ ಕರಡ್ ತರಿ ಅಮಾಯೆಕ್ ರಿತಿರ್ ಮಿಸ್ಳಾಲ್ಯಾತ್. ದೆಕಿಕ್ – ಜೊಲ್ಲಿ, ಬಿಂದಾಸ್, ಫಿಕ್ರ್‌ನೊಟ್ ಇತ್ಯಾದಿ. ಥೊಡ್ಯಾಚ್ ದಿಸಾಂ ಆದಿಂ ಹಾಂವೆಂ ಎಕ್ ವರ‍್ದಿ ವಾಚ್‌ಲಿ – ಎಕ್ಲೊ ಕೊಂಕಣಿ ಮಿತ್ರ್ ಆಪ್ಲ್ಯಾ ಮಿತ್ರಾಂಕ್ ಸಂದೇಶ್ ದಾಡ್ತಾ, ವಿದೇಶಾಂತ್ಲ್ಯಾ ಫಲಾಣ್ಯಾ ಎಕಾ ಕಿನಾರೀರ್ ಆಪುಣ್ ಆಪ್ಲ್ಯಾ ಮಿತ್ರಾ ಸಾಂಗಾತಾ “ರಿಲ್ಯಾಕ್ಸ್” ಕರ‍್ತಾಂ ಅಶೆಂ. ಬರೆಂಚ್, ಪ್ರಸ್ತುತ್ ಧಾಂವಾಂ ಧಾಂವೆಂಚ್ಯಾ ಸಂಸಾರಾಂತ್ ಜರ್ ಬಾಬಾ ತುಕಾ ‘ರಿಲ್ಯಾಕ್ಸ್’ ಕರುಂಕ್ ಆವಡ್ತಾ ತರ್ ಬರೆಂಚ್ ಆಸಾ ಕಿತ್ಯಾಕ್ ನೊವೊದ್ ಆನಿ ನೋವ್ ಯಾ ತಾಚ್ಯಾಕಿ ಚಡ್ ವಾಂಟ್ಯಾಂನಿ ಮಾನವ್ ಖಂಯ್ ಎಕ್ ಪಾವ್ಟಿಂ ಸುಶೆಗ್ ಲಾಬಾತ್ ಮ್ಹಣ್ ಆಶೆವ್ನ್ ಆಸಾತ್.
ತಾಂತುಂ ಹಾಂವ್ ‘ಚೆಪೆಂ ಉಕಲ್ತಾಂ’ ಮ್ಹಜ್ಯಾ ಗೊಂಯ್ಕಾರ್ ಭಾವಾಂಕ್ ಜಾಣಿಂ ‘ಸೊಸೆಗಾದ್ ಆಸಾಂವ್’ ಮ್ಹಳ್ಳೊ ಗಾಂಟ್ಲೊ ಕಸಲ್ಯಾಚ್ ಮುಲಾಜ್ಯಾವಿಣೆಂ ಆಪ್ಣಾಯ್ಲಾ; ಭೊವ್‌ಶಾ ಹೊ ಚೆಪೆಂ ಮ್ಹಳ್ಳೊ ಸಬ್ದ್ ಪುಡ್ತುಗೀಜಾಂಚೊ ಆನಿ ಹೆಂ ಚೆಪೆಂ ಉಕಲ್ಚೆಂ ಮ್ಹಳ್ಯಾರ್ ‘ರಿಲ್ಯಾಕ್ಸ್’ ಮ್ಹಳ್ಳೊ ಜಾವ್ಯೆತ್. ಪುಡ್ತುಗಿಜಾಂನಿ ಕಾಂಯ್ ತರಿ ಪಾಟಿಂ ಸೊಡ್ಲಾಂ ತರ್ ‘ಫೆನ್ನಿ’ ಆನಿ ‘ಸೊಸೆಗಾದ್’ ಆಸ್ಯೆತ್, ಆಸುಂ.
ಆತಾಂ ಹೊ ಎಡ್ವಿನ್ ಖಂಚಾ ಮಾರ‍್ಕೆಟಿಚೊ ಉಲ್ಲೇಕ್ ಕರ್ತಾ? ಮಾರ್ಕೆಟ್ ಮ್ಹಳ್ಳೊ ಸಬ್ದ್ ಎಕ್ ವಿಶಾಲ್ ಪರಿದಿ ಮ್ಹಳ್ಳೊ ಅರ‍್ಥ್ ದಿಂವ್ಚೊ ಸಬ್ದ್. ಮ್ಹಜ್ಯಾ ಲ್ಹಾನ್ ವರ‍್ಸಾಂನಿ ಮಾಂಯ್ (ಆಜಿ) ಆನಿ ಮಾಮ್ಮಾ (ಆವಯ್) ಮಾರ‍್ಕೆಟಿಕ್ ವೆತಾಂ ಮ್ಹಣ್ ಜೆಂಬಿಲ್ ಘೆವ್ನ್ ಭಾಯ್ರ್ ಸರ‍್ತಿತ್ ತರ್ ಹಾಂವೆಂ ಚಿಂತ್‌ಚೆಂ ಆನಿ ಸಮ್ಜೊಂಚೆಂ ಕಂಕ್ನಾಡಿ ಮಾರ‍್ಕೆಟಿಕ್ ಅಶೆಂ ಆನಿ ಕಾಂಯ್ ಚುಕೊನ್ ಫೆಸ್ತಾಂ-ಪರ‍್ಬೆಂ ವೆಳಾರ್ ವ್ಹಡ್ಲ್ಯಾ ಮಾರ‍್ಕೆಟಿಕ್ ವೆತಾಂ ಮ್ಹಳ್ಯಾರ್ ಸಂತೊಸ್‌ಚ್ ಸಂತೊಸ್. ವ್ಹಡ್ಲಿ ಮಾರ್ಕೆಟ್ ಮ್ಹಳ್ಯಾರ್ ಹಾಪಾಟ್ಯಾರ್ ಆಸ್‌ಚಿ.
ಹ್ಯಾ ಪ್ರಾಯೆರ್ ಬಸುನ್ ಚಿಂತಾನಾ ಹಾಂವೆಂ ದಳ್ಬಾರಾಂವಿಣೆಂ ಸಾಂಗಾಜೆ, ಲ್ಹಾನ್ ಪ್ರಾಯೆರ್‌ಥಾವ್ನ್ ಮ್ಹಜಿ ಮತ್ ಎಕಾ ಸ್ಪಂಜಾಪರಿಂ. ಪಳೆಂವ್ಚೆಂ, ಆಯ್ಕೊಂಚೆಂ ಚಿಂವೊನ್ ಘೆಂವ್ಚೆಂ ದಾರಾಳ್; ಮಾರ‍್ಕೆಟಿಥಾವ್ನ್ ಮಾಂಯ್ನ್ ಕಿತೆಂ ಹಾಡ್ಲೆಂ, ಮಾಮ್ಮಾನ್ ಕಿತೆಂ ಹಾಡ್ಲೆಂ ಮ್ಹಳ್ಳೆಂ ಜೆಂಬಿಲೆಂತ್ ತಿಳ್ಚೆಂ ಸಾಹಸ್ ಹಾಂವ್ ಬಿಲ್ಕುಲ್ ಕರಿನಾತ್‌ಲ್ಲೊಂ ಕಿತ್ಯಾಕ್ ಜೆಂ ಕಿತೆಂ ತಾಣಿಂ ಹಾಡ್ಲಾಂ ತೆಂ ಜೆವ್ಣಾಚ್ಯಾ ಮೆಜಾಕ್ ಯೆತಾ ಮ್ಹಳ್ಳೆಂ ಖಚಿತ್ ದೆಕುನ್ ಹಾಂವ್ ತಾಂಚೆಥಾವ್ನ್ ‘ಜೆಂಬಿಲೆ’ ಭಾಯ್ಲ್ಯೊ ಕಥಾ ಆಯ್ಕೊಂಕ್ ಆತುರಿತ್ ಆಸ್ತಾಲೊಂ ಆನಿ ಮ್ಹಜ್ಯಾ ಸಬಾರ‍್ಶ್ಯಾ ಬರ‍್ಪಾಂನಿ (ಕಂಕನಾಡಿ ಜಂಕ್ಷನ್) ಹಾಂವೆಂ ಮಾರ‍್ಕೆಟಿಚೊ ಉಲ್ಲೇಕ್ ಕೆಲ್ಲೊ ಆಸಾ.
ಮ್ಹಜೊ ಆಜೊ ದೆ|ಜೊನ್ ರೊಬರ್ಟ್ ಪಾಯ್ಸ್, ಕಂಕ್ಣಾಡಿ ಆಸ್ಚ್ಯಾ ಆಪ್ಲ್ಯಾ ಜವ್ಳೆ ಆಂಗ್ಡಿಥಾವ್ನ್ ಸಾಂಜೆಚೆಂ ಪಾಟಿಂ ಯೆತಾನಾ ‘ಚಾರ‍್ಲಿಚೆ” ದೋನ್ ಪೆಗ್ಗ್ ಚಡವ್ನ್ ಯೇತ್ ತರ್ ಮಾಗಿರ್ ಸಾಂಗ್ಚೆಂ ನಾಕಾ. ತಾಣೆ ಸಾಂಗ್ಚೆಂ ಆನಿ ಹಾಂವೆಂ ‘ಬಾಬು’ನ್ ಆಯ್ಕೊಂಚೆಂ. ಕೊಣಾಕ್ ತರಿ ಮ್ಹಜಿ ‘ಬಣ್ಣಕಡ್ಡಿ’ ಮಟ್ವಿ ಕಥಾ ಉಡಾಸಾಂತ್ ಆಸಾ?
ಹಾಚೊ ಖರೊ ಕೃತ್ರ್ ಮ್ಹಜೊ ಆಜೊ ದೆ|ಜೊನ್ ರೊಬರ್ಟ್ ಪಾಯ್ಸ್ ಆನಿ ತಾಣೆ ಸಾಂಗ್‌ಲ್ಲಿ ಕರಾಳ್ ಕಥಾ.
ಮಾರ್ಕೆಟ್ ಮ್ಹಳ್ಯಾರ್ ಫಕತ್ ವಿಕ್ರ್ಯಾಚಿ ಸುವಾತ್ ನ್ಹಯ್ ಮ್ಹಳ್ಳಿ ಸಮ್ಜಣಿ ಮ್ಹಜಿ. ಮಾರ್ಕೆಟ್ ಮ್ಹಳ್ಳ್ಯಾ ವಿಸ್ತ್ರತ್ ಸುವಾತೆರ್ ಕಸಲೊ ವಿಕ್ರೊ ಚಲ್ತಾ, ಕಸಲಿಂ ಉತ್ರಾಂ-ಲೆತ್ರಾಂ ಆಶಾರ್ ಪಾಶಾರ್ ಜಾತಾತ್, ಕಸಲ್ಯೊ ಕಸಲ್ಯೊ ಖಬ್ರೊ ಕಸಲಿಂ ಕಸಲಿಂ ಗಾತ್ರಾಂ-ರುಪಾಂ ಘೆವ್ನ್ ಉದೆತಾತ್ ಆನಿ ಪರಿಸರಾಂತ್ ಫಯ್ಲಾತಾತ್ ಮ್ಹಳ್ಳೊ ಅಣ್ಬವ್ ಭೊಗ್ಲ್ಯಾ ಖೆರಿತ್ ಅಣ್ಬವ್ ಜಾಂವ್ಚೊ ನ್ಹಯ್. ಅಣ್ಬವಾಚೊ ಅಣ್ಬವ್ ಜಾಯ್ಜೆ ತರ್ ಅಣ್ಬವ್ ಜಾಯ್ಜೆ.
ದೆಕುನ್ ಹ್ಯಾ ದಿಸಾಂನಿ, ಚಿಂತ್ಪಾಂಚೊ ಬಂಡ್ವಾಳ್ ಅಡ್ಚುನ್ ಯೆತಾನಾ ಮ್ಹಜೆಂ ಗಮನ್ ಮಾರ‍್ಕೆಟಿಚೆರ್ ಘುಂವ್‌ಲ್ಲೆಂ ಕಾಂಯ್ ವಿಷೇಶ್ ನ್ಹಯ್. ಎಕ್ ವಿಷಿಷ್ಟ್ ದೀಷ್ಟ್ ಜಾಯ್ ಮಾರ‍್ಕೆಟಿಚೆರ್ ಚರಂವ್ಕ್ ಆನಿ ತವಳ್ ಮಾತ್ರ್ ‘ಎಪ್ಫಾತಾ’ ಜಾತಾ ಮ್ಹಳ್ಳೊ ಅಣ್ಬವ್ ಮ್ಹಜೊ.
ಮ್ಹಜೊ ಸುಚಾವ್ ಅಸೊ ಆಸಾ ಕಿ ‘ಮಾರ್ಕೆಟ್’ ಮ್ಹಳ್ಯಾರ್ ಎಕ್ ಜೀವಂತ್ ಜೀವಿ characterized by the belief that the parts of something are intimately interconnected and explicable only by reference to the whole ಮ್ಹಣ್ ಸಮ್ಜೊನ್ ಘೆಜೆ ಆನಿ ತವಳ್ ಮಾತ್ರ್ ಎಕ್ panoramic ಚಿತ್ರ್ ದೊಳ್ಯಾಂ ಸಾಮ್ಕಾರ್ ಉದೆತಾ. ಪುಣ್ ಹ್ಯಾ ಚಿತ್ರಾಂತ್ ಆಮ್ಚ್ಯಾ ಮತಿಪಟಲ್ ಮ್ಹಳ್ಳ್ಯಾ ಸ್ಪಂಜಾಂತ್ ಕಿತೆಂ ಸರ‍್ವ್ ನೋಂದ್ ಜಾತಾ ಮ್ಹಳ್ಳೆಂ ಸಮಾಸಮ್ ನ್ಹಯ್. ಹಾಂವ್ ಲೇಕಕ್ ಮ್ಹಳ್ಳ್ಯಾಫರಾ ಸರ‍್ವ್‌ರಾಜಾಂವೀಕ್ ಮ್ಹಣ್ ಮಾನುನ್ ಘೆಂವ್ಚೆಂ ನ್ಹಯ್. ಸರ‍್ವ್ ಲೇಕಕ್ ಸಮಾ ಸಮ್ ಮಟ್ಟಾರ್ ಬುದ್ವಂತ್ ನ್ಹಯ್, ಆಮ್ಚೆಮದೆಂ ಸಬಾರ್ ಸವಾಯ್ ಬುಂದ್ವಂತ್ ಆಸಾತ್ ಮ್ಹಳ್ಳೆಂ ಮಾನುನ್ ಘೆಂವ್ಚೆಂ ಅವಶ್ ಆನಿ ತ್ಯಾಂ ಪಯ್ಕಿಂ ಹಾಂವ್ ಯೆಕ್ಲೊಂ.
ದೆಕಿಕ್, ಸಕಾಳಿಂಚ್ಯಾ ಸಾತ್ ಘಂಟ್ಯಾರ್ ಮ್ಹಜಿ ಗಾಡಿ ಹಾಂವ್ ಕಂಕನಾಡಿ ಮಾರ‍್ಕೆಟಿಚ್ಯಾ ಆಳ್ವ್ಯಾರ್ ಥಾಂಬಯ್ತಾನಾ (ಆಳ್ವೊ ಮ್ಹಳ್ಯಾರ್ ಹೆಣೆತೆಣೆಂಚೆ ವ್ಹಾಳ್‌ವ್ಹಾಳೆ, ತೋಡ್-ಚರಂಡ್ಯೊ ಮಿಲನ್ ಜಾಂವ್ಚೆಂ ಕೇಂದ್ರ್ ಮ್ಹಣ್ ಹಾಂವ್ ಸಮ್ಜಾತಾಂ, ತಿದ್ವಿಯಾ ಚೂಕ್ ಜಾಲಿ ತರ್), ಮ್ಹಾಕಾ ಮೆಳ್ಟಾ ಸ್ವಾಗತ್ ವಿಸಿಶ್ಟ್ ಆನಿ ವಿಚಿತ್ರ್ ಪರ‍್ಮಳಾಂಚೊ ಪುಣ್ ಕಾಂಯ್ ನಜೊ, ಮಂಗಳೂರು ಮ್ಹಳ್ಯ್ಯಾ ನಗ್ರಿಕ್ ಆನ್ಯೇಕ್ ವಿಶೇಶಣ್ ಹೆಂ. ಹ್ಯಾ ಪರ‍್ಮಳಾಂನಿಂಚ್ ಆಮಿಂ ಆಮ್ಚಿಂ ಆಮ್ಚಿಂ ಪೊಪ್ಸಾಂ ಪಿಕಯ್ಲ್ಯಾಂತ್ ಆನಿ ಹಿಂಚ್ ಪೊಪ್ಸಾಂ ಘೆವ್ನ್ ಆಮಿಂ ದೇಶ್‌ವಿದೇಶಾಂನಿ ಲಂಗರ್ ಮಾರ‍್ಲ್ಯಾಂತ್ ಆನಿ ಪಾಟಿಂ ಯೆವ್ನ್ Oh this Mangaluru is so very,dirrty and unhygenic ಮ್ಹಣ್ ಕರ‍್ಲಾಂ ಗಳಯ್ಲ್ಯಾಂತ್. ಪುಣ್ ಫಿಕ್ರೊನೊಟ್. ಹಾಂವೆಂ ಕಾರ್ ಪಾರ‍್ಕ್ ಕರ‍್ಚೆ ಕಡೆನ್ ದೋನ್ ಯಾ ತೀನ್ ಎಮ್.ಸಿ.ಸಿ. ಟ್ರಕ್ಕಾಂ ಕಚ್ರೊ ಆರಾಯ್ತಾತ್ ಆನಿ ಮಂಗಳೂರಾಕ್ ‘ಸ್ಮಾರ‍್ಟ್ ಸಿಟಿ’ ಕರ‍್ಚ್ಯಾ ಅಬಿಯಾನಾಂತ್ ಮಗ್ನ್ ಆಸಾತ್. ತ್ಯಾ ಕಾಮೆಲ್ಯಾಂಕ್ ಪಳೆವ್ನ್ ಹಾಂವ್ ಧರ‍್ಮೇದಂರ್ (ಕೋಣ್ ತೊ?) ಹಾಸ್‌ಲ್ಲೆಪರಿಂ ಹಾಸ್ತಾಂ ಆನಿ ತಿತ್ಲ್ಯಾರ್ ಮಾರ‍್ಕೆಟಿಂತ್ ಆಸ್ಚ್ಯಾ ಸಾತಾಟ್ ಚಿಕನ್ ಶೊಪಾಂಕ್ ಕೊಂಬಿಯೊ ತಲಾಸ್ ಕರ‍್ಚಿಂ ವಾಹನಾಂ ಕುಂಕ್ಡಾಂಚ್ಯಾ ಕೆಂಕಾರ‍್ಯಾಂನಿ (ಕೊಂಬ್ಲೆಬಾಬ್ ನಾಂತ್) ಬಿತರ್ ಸರ‍್ತಾತ್.
ವಿಪರ‍್ಯಾಸ್ ಪಳೆಯಾ – ಗರ‍್ಮೆಚೆ ದೀಸ್ ಆನಿ ಹ್ಯೊ ಕೊಂಬಿಯೊ ತ್ಯಾ ಲ್ಹಾನ್ ಲ್ಹಾನ್ ಕ್ರೇಟಾಂನಿ ಪಯ್ಶಿಲ್ಯಾ ಪೋಲ್ಟ್ರೀ ಫಾರ‍್ಮಾಥಾವ್ನ್ ಪಯಣ್ ಕರುನ್ ಆಯ್ಲ್ಯಾತ್ ಆನಿ ಕಾಂಯ್ ಮ್ಹಣ್ಟಾತ್ ಕೊಣ್ಣಾ..what a wonderful ride, this is Mangaluru? So cool and beautiful. ಫುಡ್ಲೆ ಹಾಂವೆಂ ಲಿಕಿಜೆ ತರ್ ಹಾಂವೆಂ ಮ್ಹಜೊ ಮೆಂದು ಕುಂಕ್ಡಾಚ್ಯಾ ಮೆಂದ್ವಾಕ್ ಟ್ರಾನ್ಸ್‌ಫರ್ ಕರಿಜೆ. ನಾಕಾ, ಆಮ್ಚ್ಯಾ ಮಂಗಳಾ ಪುರಾಂತ್‌ತಿತ್ಲೆ ಪುಣಿ ಅಕ್ಕಲ್‌ಮಂದ್ ಆಸಾತ್ ಆಸ್ತೆಲೆ.
ಹ್ಯಾ ಕುಂಕ್ಡಾಂಚೆಂ ಟ್ರಾನ್ಸ್‌ಫರ್ ಫಲಾಣ್ಯಾ ಫಲಾಣ್ಯಾ ಶೊಪಾಂಕ್ ಜಾಂವ್ಚೆ ಪರ್ಯಾಂತ್ ಮ್ಹಜೆಂ ಗಮನ್ ಬಂದ್ ಆಸ್‌ಲ್ಲ್ಯಾ ಕಟ್ಲೆರಿ ಶೊಪಾಂಚೆರ್ ಚರ‍್ತಾ. ಸಬಾರ್ ಸುಣಿಂ ಥಂಯ್ಸರ್ ನಿದುನ್ ವಿಶೆವ್ ಘೆತಾತ್ ಆನಿ ಮ್ಹಜ್ಯಾ ಕಾರಾಕ್ ಆನಿ ಮ್ಹಾಕಾ ಆಳ್ಶಿ ದೊಳ್ಯಾಂನಿ ಪಳೆತಾತ್. ಧನ್ಯವಾದ್ ಮನೆಕಾಕ್, ತಾಂಕಾಂ ಎಡ್ವಿನಾಚ್ಯಾ A Collar For Moti ಕಥೆಂತ್ಲ್ಯಾ ಮೋತಿಚಿ ಗತ್ ಸದ್ದ್ಯಾಕ್ ಯೆಂವ್ಚಿ ನಾ. ಥೊಡ್ಯಾಚ್ ವೆಳಾನ್ ಹ್ಯಾ ಸೊಪಾಂಚೆ ಮ್ಹಾಲಕ್ ಯೆತಾತ್ ಆನಿ ಶಟ್ಟರಾಂ ಉಗ್ತಿಂ ಕರ‍್ತಾತ್ ಆನಿ ಸ್ತ್ರೀಯಾಂಚ್ಯಾ ಶೃಂಗಾರಾಂಚ್ಯೊ ರಂಗ್‌ರಂಗಾಳ್ ವಸ್ತು, ಬ್ರಾ-ಪ್ಯಾಂಟೀಸ್ ಆನಿ ಲಿಪ್‌ಸ್ಟಿಕಾಂಚೆಂ ಪ್ರದರ‍್ಶನ್ ಸುರು ಜಾತಾ.
ಹೆಂ ಚಲ್ತಾನಾ ಮ್ಹಾಕಾ ಉಡಾಸ್ ಯೆತಾ ಗೌ|ಕರುಣಾನಿಧಿ ನ್ ಲಿಕ್‌ಲ್ಲ್ಯಾ Confessions of a Dust Bin ಮಟ್ವ್ಯಾ ಕಥೆಚೊ ಜಾಂತುಂ ಕಥಾನಾಯಕ್, ಸೆಜಾರಾ ಸುಕತ್ ಘಾಲ್ಲ್ಯಾ ಹ್ಯಾ ರಂಗ್‌ಗಂಗಾಳ್ ವಸ್ತ್ರಾಂಕ್ ಆಪ್ಣಾಚೊ personal rainbow ಮ್ಹಣ್ ಪಿಂತ್ರಾಯ್ತಾ. ಹೊ ಉಲ್ಲೇಕ್ ಹಾಂವ್ BAPASI ಪ್ರಶಸ್ತಿ ವಿಜೇತ್ (Book Sellers’ And Publishers’ Association of South India) ಜಾಲ್ಲ್ಯಾನ್ ಕರುಣಾನಿಧಿ ಸರ್ ಹಾಣೆ ಹಿ ಪ್ರಶಸ್ತಿ ಸ್ಥಾಪಿಕ್ ಕೆಲ್ಲ್ಯಾ-ಕ್ ನಮಾನ್ ಕರ‍್ಚೊ. ಆಸುಂ. ಪುಣ್ ಉಡಾಸ್ ಖಂಯ್‌ಥಾವ್ನ್ ಖಂಯ್ ಮನ್ಶ್ಯಾಕ್ ವರ‍್ತಾತ್ ನ್ಹಯ್? ಹಾಂಕಾಂಯಿ ಅಸುಂ ಮ್ಹಣ್ಯೆತ್?
ಆತಾಂ ಕಿತೆಂ ಜಾಲೆಂ?
ಆತಾಂ ಎಡ್ವಿನಾಚೆಂ ಚಡ್ ಜಾಲೆಂ. ಜಿಣಿ, ಎಕ್ ಥಕಾವ್‌ನಾತ್‌ಲ್ಲೆಂ ರೋದ್ ಮ್ಹಣ್ತಾನಾ ಆನಿ ಮಾಂದ್ತಾನಾ ಕಸಲೆಂಚ್ ಘಡಿತ್, ಚಿಂತಪ್ ಆನಿ ಲೇಕ್-ಉಲ್ಲೇಕ್ ಕುಶಿಕ್ ಮಾರುಂಕ್ ಜಾಯ್ನಾ. ದೆಕುನ್ ಹಾಂವೆಂ ಮ್ಹಣ್ಚೆಂ ಇತ್ಲೆಂಚ್ –
ಸಾಹಿತ್, ತ್ಯಾ ಲೇಕಕಾಕ್ ಹ್ಯಾ ಹೊಗೊಳ್ಸುನ್ ಲಿಕ್ಚೆಂ ನ್ಹಯ್. ಸ್ವತಾಚೆಂ ಕಿತೆಂ ಆಸಾ ತುಮ್ಚೆಂ? ಹಾಂವೆಂ ಯಾ ತುಮಿ ಪಳೆಯಿಲ್ಲಿ ತಿ ಮಾರ್ಕೆಟ್ ಕಿತ್ಲ್ಯಾ ಜಣಾಂನಿ ಪಳೆಯ್ಲ್ಯಾ ಆನಿ ಖಂಚೆ ದೃಷ್ಟೆನ್ ಪಳೆಲ್ಯಾ ಲಿಕುಂಕ್ ಸಕ್ತಾಂವ್ ಆಮಿಂ? ಆನಿ ಪಂದ್ರಾ-ವೀಸ್ ಮಿನುಟಾಂನಿ ‘ಹಲಾಲ್’ ಜಾಂವ್ಚ್ಯಾ ಕುಂಕ್ಡಾಂಕ್ ಆನಿ ತಾಂಚೆ ದುಕಿಕ್ ಉತ್ರಾಂನಿ ಉತ್ರಾಂವ್ಕ್ ಸಕ್ತಾಂವ್ ಆಮಿಂ?
ಭೋವ್‌ಶಾ, ಸಕ್ತಾಂವ್….ಕಿತ್ಯಾಕ್ ಆಮಿ ನಾಮ್‌ವರ್ ಸಾಹಿತಿ ನ್ಹಯ್?
