ಜೆಜು ಕ್ರಿಸ್ತ್ ಭಾಸಾಯ್ಲಲೊ ಸೊಡ್ವೊಣ್ದಾರ್: ತೊ ಮಾಖ್ಲಲೊ, ತೆಲಾಯ್ಲಲೊ ಆನಿ ಧಾಡ್ಲಲೊ. ತ್ಯಾಚ್ ಕ್ರಿಸ್ತಾಕ್ ಸಂಸಾರಾರ್ ಸಾಕ್ರಾಮೆಂತಾಂತ್ ಹಾಜರ್ ಕರುಂಕ್, ತ್ಯಾಚ್ ಕ್ರಿಸ್ತಾಚೆ ನಾಂವಿಂ ಲೊಕಾಕ್ ಪವಿತ್ರ್ ಕರುಂಕ್ ಆನಿ ತ್ಯಾಚ್ ಕ್ರಿಸ್ತಾಚಿ ಸುವಾರ್ತಾ ಪರ್ಗಟ್ ಕರುಂಕ್ ಮಂಗ್ಳುರ್ಚೊ ಬಿಸ್ಪ್ ಆಧಿಕ್ ಮಾನಾಧಿಕ್ ದೊತೊರ್ ಪೀಟರ್ ಪಾವ್ಲ್ ಸಾಲ್ಡಾನ್ಹಾ ಹಾಂಣಿಂ ತೆಗಾಂ ಉಮೆದ್ವಾರಾಂಕ್ ತೆಲಾನ್ ಮಾಖುನ್ ಯಾಜಕೀ ಭೆಸಾಕ್ ಉಬಾರ್ಲೆಂ.
ಯಾಜಕೀ ದೀಕ್ಷೆಚೊ ಹೊ ದಬಾಜಿಕ್ ಸಂಭ್ರಮ್ ಮಂಗ್ಳುರ್ಚ್ಯಾ ರೊಜಾರ್ ಮಾಯೆಚ್ಯಾ ಕಾಥೆದ್ರಾಲಾಂತ್ 2023 ಎಪ್ರಿಲ್ 20 ತಾರೆಕೆರ್ ಸಾಂಜೆರ್ 3 ವೊರಾಂಚೆರ್ ಜಾಲೊ.
ಯಾಜಕೀ ಭೆಸ್ ದೆವಾಚೆಂ ಉದಾರ್ಥ್ ದೆಣೆಂ ಆನಿ ಮಿಸ್ತೆರ್. ದೀಕ್ಷಾ ಜೊಡ್ಲಲೊ ಹರೆಕ್ ಯಾಜಕ್ ಪವಿತ್ರ್ಪಣಾಕ್ ಆಪಯ್ಲಲೊ. ಯಜಕೀ ದೀಕ್ಷೆ ಮಾರಿಫಾತ್ ಕರ್ಚೊ ವಾವ್ರ್ ಹರೇಕಾ ಯಾಜಕಾಕ್ ಆಪ್ಣಾಚ್ಯಾ ಪವಿತ್ರ್ಪಣಾಕ್ ವಾಟ್ ಜಾತಾ. ಆಜ್ ಮಂಗ್ಳುರ್ ದಿಯೆಸೆಜಿಕ್ ದೆವಾನ್ ವಿಂಚ್ಲಲೆ ಆನಿ ಮಾಖ್ಲಲೆ ತೇಗ್ ಯಾಜಕ್ ನವ್ಯಾನ್ ಫಾವೊ ಜಾಲ್ಯಾತ್ ಆಸ್ತಾಂ, ದೆವಾಕ್ ಆಮಿ ಆರ್ಗಾಂ ದಿಂವ್ಯಾಂ ಮ್ಹಣ್ ಮಂಗ್ಳುರ್ಚೊ ಬಿಸ್ಪ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಉದ್ಗಾರ್ಲೊ.
ಮಾ| ದೊ| ರಾಜೇಶ್ ರೊಜಾರಿಯೊ, ಸೆಮಿನರಿಚೊ ಪ್ರಾದ್ಯಾಪಕ್ ನವ್ಯಾ ಯಜಾಕಾಂಕ್ ಉಲ್ಲಾಸುನ್, ಯಾಜಕಾಚೊ ವಾವ್ರ್ ಆನಿ ಮಿಸಾಂವ್ ಪವಿತ್ರ್ ಸಭೆಚಾ ಜಿವಿತಾಕ್ ಗರ್ಜೆಚೊ. ಜಾಯ್ತ್ಯಾ ನಿಸ್ವಾರ್ಥಿ, ಸಾಕ್ರಿಫಿಸಾಚ್ಯಾ ಆನಿ ದೆವಾಚ್ಯಾ ಮೊಗಾನ್ ಭರ್ಲಲ್ಯಾ ಯಾಜಕಾಂ ಮಾರಿಫಾತ್ ಕ್ರಿಸ್ತಾಚಿ ಸುವಾರ್ತಾ ಸಗ್ಳ್ಯಾನ್ ಪರ್ಗಟ್ ಜಾಲ್ಯಾ. ಆಮ್ಚ್ಯಾ ತೆಗಾಂ ನವ್ಯಾ ಯಾಜಕಾಂಕ್ ಆಮ್ಚೆ ದಿಯೆಸೆಜಿಚ್ಯಾ ಗೊವ್ಳಿ ಬಾಪಾಂಚೆ ನಾಂವಿಂ, ನಿವೃತ್ತ್ ಗೊವ್ಳಿ ಬಾಪಾಂಚೆ ನಾಂವಿಂ, ಯಾಜಕ್, ಧಾರ್ಮಿಕ್ ಭಾವ್-ಭಯ್ಣಿಂ ಆನಿ ಭಾವಾಡ್ತಿ ಲೊಕಾಚೆ ನಾಂವಿಂ ಉಲ್ಲಾಸ್ ಪಾಟಯ್ತಾಂ ಆನಿ ಫಳಾಭರಿತ್ ಯಾಜಕಿ ಮಾಣಿಯಾರ್ಪಣ್ ಮಾಗ್ತಾಂ ಮ್ಹಣಾಲೊ.
: ನವ್ಯಾ ಯಾಜಾಕಾಂಚಿ ಮಟ್ವಿ ವಳಕ್ :
ಬಾಪ್ ಅವಿನಾಶ್ ಲೆಸ್ಲಿ ಪಾಯ್ಸ್
ಕಾಟಿಪಳ್ಳಾ ಬಾಳೊಕ್ ಮರಿಯೆಚೆ ಫಿರ್ಗಜೆಚ್ಯಾ ಮಾನೆಸ್ತಿನ್ ಆಂಜೆಲಿನ್ ವೇಗಸ್ ಆನಿ ದೆವಾಧೀನ್ ಲುವಿಸ್ ಪಾಯ್ಸಾಚ್ಯಾ ಕುಟ್ಮಾಂತ್ ದೊಗಾಂ ಭುರ್ಗ್ಯಾಂ ಪಯ್ಕಿ ದುಸ್ರೊ. ವ್ಹಡ್ಲಿ ಭಯ್ಣ್ ಕಾಜಾರಿ. ಬಿ.ಎ. ಸನದ್ ಜೊಡ್ಲಲ್ಯಾ ಬಾಪ್ ಅವಿನಾಶಾನ್ ಕಿರೆಂ ಆನಿ ಕೋರ್ಡೆಲ್ ಫಿರ್ಗಜಾಂನಿ ಗೊವ್ಳಿಕ್ ವಾವ್ರ್ ಕೆಲ್ಲೊ ಅನುಭವ್ ಆಸಾ.
ಇಸಾಯಿಯಾ ಪ್ರವಾದಿಚಿಂ ಉತ್ರಾಂ: ಹಾಂವ್ ಹಾಂಗಾ ಆಸಾಂ, ಮ್ಹಾಕಾ ಧಾಡ್ (6:8) ಆಪ್ಣಾಕ್ ದೇಕ್ ಮ್ಹಣ್ ಸಾಂಗ್ತಾ. ಕ್ರಿಯಾಳ್, ಉರ್ಬೆವಂತ್ ಆನಿ ಖಂಚ್ಯಾಯ್ ವಾವ್ರಾಂತ್ ಆಸಕ್ತ್ ದಾಕೊಂವ್ಚೊ ಬಾಪ್ ಅವಿನಾಶ್ ಜಾಯ್ತ್ಯಾ ತಾಲೆಂತಾಂನಿ ಭರ್ಲಲೊ. ಮಾಯ್ಪಾಸಿ ಸ್ವಭಾವಾಚೊ ತೊ, ಸರ್ವಾಂ ಸಂಗಿಂ ಭರ್ಸಾತಾ. ನವೊ ಯಾಜಕ್ ಬಾಪ್ ಅವಿನಾಶಾಕ್ ಆಮ್ಚೆ ಉಲ್ಲಾಸ್ ಪಾಟಯ್ತಾಂವ್.
ಬಾಪ್ ಲೋಹಿತ್ ಅಜಯ್ ಮಸ್ಕರೇನಸ್
ವೇಣೂರ್ಚ್ಯಾ ಕ್ರಿಸ್ತ್ ರಾಯಾಚೆ ಫಿರ್ಗಜೆಚ್ಯಾ ಮಾನೆಸ್ತ್ ಫ್ರಾನ್ಸಿಸ್ ಮಸ್ಕರೇನಸ್ ಆನಿ ಮಾನೆಸ್ತಿನ್ ಆಪೊಲಿನ್ ಮಸ್ಕರೇನಾಸಾಚ್ಯಾ ಕುಟ್ಮಾಂತ್ಲೊ ಬಾಪ್ ಲೋಹಿತ್, ತೆಗಾಂ ಭುರ್ಗ್ಯಾಂ ಪಯ್ಕಿ ನಿಮಾಣೊ. ತಾಣೆಂ ಬಿ.ಎಸ್ಸಿ. ಸನದ್ ಆಪ್ಣಾಯ್ಲ್ಯಾ. ಬಾಪ್ ಲೋಹಿತ್ ಶಿಕ್ಪಾಂತ್ ಹುಶಾರ್, ಸ್ವಭಾವಾನ್ ಸಾದೊ ಆನಿ ಚಟುವಟಿಕೊ ಮಾಂಡುನ್ ಹಾಡ್ಚ್ಯಾಂತ್ ಪ್ರವೀಣ್. ದಿಯೆಸೆಜಿಚ್ಯಾ ಗೊವ್ಳಿಕ್ ಕೇಂದ್ರಾಂತ್ ಆನಿ ಒಮ್ಜೂರ್ ಫಿರ್ಗಜೆಂತ್ ಗೊವ್ಳಿಕ್ ವಾವ್ರ್ ಕೆಲ್ಲೊ ಅನುಭವ್ ತಾಕಾ ಆಸಾ.
ಮ್ಹಜೆಂ ನಾಂವ್ ಪರ್ಗಟುಂಕ್ ಮ್ಹಜೆಂ ಹಾತೆರ್ ಮ್ಹಣ್ ಹಾಂವೆಂ ತುಕಾ ವಿಂಚುನ್ ಕಾಡ್ಲಾ (ಧ.ಕೃ. 9:15) ಮ್ಹಣ್ ಸಾಂ ಪಾವ್ಲಾಕ್ ಸೊಮ್ಯಾನ್ ಸಾಂಗ್ಲಲಿಂ ಉತ್ರಾಂ ಆಪ್ಲ್ಯಾ ಯಾಜಕಿ ಜಿವಿತಾಕ್ ಮಾರ್ಗದರ್ಶಕ್ ಮ್ಹಣ್ ಬಾಪ್ ಲೋಹಿತ್ ಮಾನುನ್ ಘೆತಾ. ಹೆರಾಂಚ್ಯಾ ಗರ್ಜಾಂಕ್ ಪಾಂವ್ಚೆಂ ಬರೆಂ ಮನ್ ತಾಚೆ ಥಂಯ್ ಆಸಾ. ಬಾಪ್ ಲೋಹಿತಾಕ್ ಆಮಿ ಅಭಿನಂದನ್ ಪಾಟಯ್ತಾಂವ್.
ಬಾಪ್ ರೊಬಿನ್ ಜೊಯ್ಸನ್ ಸಾಂತುಮಾಯೊರ್
ಗಾಂವಾನ್ ಸಾಂ ರೊಕಿಚಿ ಫಿರ್ಗಜ್, ನೀರುಡೆ, ತರಿ ತಾಚಿಂ ಆವಯ್ ಬಾಪುಯ್ ಮುಂಬೈಂತ್ ಆಸ್ಲ್ಲ್ಯಾನ್, ಮಂಗ್ಳುರ್ ಆನಿ ಮುಂಬೈಂತ್ ಶಿಕಪ್ ಚಲ್ಲೆಂ. ತೊ ಮಾನೆಸ್ತ್ ರಿಚ್ಚರ್ಡ್ ಜೋನ್ ಸಾಂತುಮಾಯೊರ್ ಆನಿ ಮಾನೆಸ್ತಿನ್ ಲಿನೆಟ್ ತೆರೆಜಾ ಸಾಂತುಮಾಯೊರ್ ಹಾಂಚೊ ಏಕ್ಲೊಚ್ ಪೂತ್. ಬಿ.ಎಸ್.ಡಬ್ಲ್ಯು. ಸನದ್ ಜೊಡ್ಲಲೊ ಬಾಪ್ ರೊಬಿನ್ ಸದಾಂಚ್ ಹಾಸ್ತ್ಯಾ ತೊಂಡಾಚೊ, ಶಿಕ್ಪಾಂತ್ ಮುಕಾರ್ ಆನಿ ಸರ್ವಾಂ ಲಾಗಿಂ ಬರೊ ಸಂಬಂಧ್ ದವರ್ಚ್ಯಾ ದೆಣ್ಯಾಂನಿ ಭರ್ಲಾ. ಪುತ್ತೂರ್ಚ್ಯಾ ಸಾಂ ಫಿಲೊಮೆನಾ ಕೊಲೆಜ್ ತಶೆಂಚ್ ಕೂಳೂರ್ ಫಿರ್ಗಜೆಂತ್ ತಾಣೆಂ ಗೊವ್ಳಿಕ್ ವಾವ್ರ್ ಕೆಲಾ.
ಸಾಂ ಪಾವ್ಲಾಚಿಂ ಉತ್ರಾಂ: ಹಾಸ್ತ್ಯಾ ತೊಂಡಾನ್ ದಿತಲೊ ದೆವಾಕ್ ಮೊಗಾಚೊ (2 ಕೊರಿಂಥ್ 9:7) ಆಪ್ಣಾಕ್ ಪ್ರೇರಣ್ ಮ್ಹಣ್ ತೊ ಮ್ಹಣ್ತಾ. ವಾವ್ರ್ ಕರುಂಕ್ ಸದಾಂಚ್ ಉರ್ಬಾ ದಾಕೊಂವ್ಚೊ ಆಮ್ಚೊ ನವೊ ಯಾಜಕ್, ಸೆವೆಚ್ಯಾ ಮನೋಭಾವಾನ್ ಭರ್ಲಲೊ. ಬಾಪ್ ರೊಬಿನಾಕ್ ಆಮ್ಚೆ ಶುಭಾಶಯ್ ಪಾಟಯ್ತಾಂವ್.
ವರ್ದಿ: ಬಾಪ್ ಅನಿಲ್ ಫೆರ್ನಾಂದ್, ತಸ್ವಿರ್ಯೊ: ಸ್ಟ್ಯಾನ್ಲಿ ಬಂಟ್ವಾಳ್
