ಕಾರ್ಪೊರೇಟ್ ಸಂಸ್ಥ್ಯಾಂನಿ ಹರ್ ವರ್ಸಾ ಹರ್ ವ್ಯಕ್ತಿಚಿ ಮೊಲಾಮಾಪ್ಣಿ ಜಾತಾ. ಹ್ಯಾ ವೆಳಾ ಖಂಚ್ಯಾ ಸಂಗ್ತಿಂನಿ ಉಣೆಪಣ್ ಆಸಾ ಆನಿ ಹೆಂ ಉಣೆಪಣ್ ಕಶೆಂ ಸುದ್ರಾಂವ್ಚೆಂ ಹಾಚೆರ್ ಚಿಂತಪ್ ಆಟಯ್ತಾತ್. ವಿಮರ್ಸೊ – ಸಾಹಿತ್ ಆನಿ ಸಾದರ್ ಶೆತಾಂನಿ ಮೊಲಾಮಾಪ್ಣೆಚೆಂ ಕಾಮ್ ಕರ್ತಾ. ಸಾಹಿತ್ ಆನಿ ಸಾದರ್ ಕಲೆಚ್ಯಾ ವಾಡಾವಳಿಕ್ ಆನಿ ಸಾರ್ಕೆ ವಾಟೆರ್ ಚಮ್ಕಾತಾಂವ್ ಯಾ ನಾಂ ತೆಂ ಕಳಜೆ ತರ್ ‘ವಿಮರ್ಸೊ’ ಗರ್ಜೆಚೊ.
ಸಾಹಿತ್ಯಾಚೆಂ ಕಾಮ್ ಮ್ಹಳ್ಯಾರ್ ಏಕ್ ಸೆವಾ ಆನಿಂ ಹಿ ಏಕ್ ಸೆವಾ ಜಾಲ್ಲ್ಯಾನ್ ಸೆವೆಕ್ ಫಕತ್ ಶಾಬಾಸ್ಕಿ ಮಾತ್ರ್ ಫಾವೊ – ಅಸಲೆಂ ಏಕ್ ಚಿಂತಾಪ್ ಆಮಾ ಸಬಾರಾಂಚ್ಯಾ ಮತಿಂತ್ ಆಸಾ ತಶೆಂ ದಿಸ್ತಾ . ತ್ಯಾ ದೆಕುನ್ ಕೆದಾಳಾ ವಿಮರ್ಸೊ ಇಲ್ಲೊ ತೀಕ್ಶ್ಣ್ ಜಾಲ್ಲೆಫರಾ victim ಕಾರ್ಡ್ ಭಾಯ್ರ್ ಯೆತಾ. ಹೆಂ ಖಂಡಿತ್ ಜಾವ್ನ್ ಉತಳ್ ಚಿಂತ್ಪಾಚಿ ರುಜ್ವಾತ್. ಹಾಕಾ ಜರ್ ಠಿಕಾ ಮ್ಹಣ್ ವೊಲಾವ್ನ್ , ‘ಹಾಂವ್ ಪಾಪ್ ಬಾವ್ಡೊ’ ಮ್ಹಣ್ ರುದಾನ್ ಕೆಲ್ಯಾರ್ ಲುಕ್ಸಾಣ್ ಆಮಾ ರಡ್ತೆಲ್ಯಾಂಚೆಂ ಮಾತ್ರ್.
ಖಂಯ್ಚ್ಯಾಯ್ ಶೆತಾಂತ್, ಜಾಂವ್ ಸಾಹಿತ್, ಸಂಗೀತ್, ನಾಟಕ್, ಕವಿತಾ ಚಿತ್ರ ಕಲಾ, ಸಿನೆಮಾ, ಆಮಿ ಏಕ್ ಕೃತಿ ಘೆವ್ನ್ ಏಕ್ ಪಾವ್ಟಿಂ ಲೋಕಾಮುಕಾರ್ ಗೆಲ್ಯಾಂವ್ ತರ್, ಜಾಲೆಂ… ತಿ ಕೃತಿ ಪಬ್ಲಿಕಾಂಚಿ! ತಿ ಕಶೀಯ್ ಆಸೊಂ… ಆಮಿ ತಿ ಘೆವ್ನ್ ಲೋಕಾಮುಕಾರ್ ಸಾದರ್ ಕರ್ಚೆಂ ಧಯ್ರ್ ಕೆಲಾಂ ಮ್ಹಣ್ ಜಾಲ್ಯಾರ್, ಉಪ್ರಾಂತ್ ತ್ಯಾ ಕೃತಿಯೆ ವಯ್ಲ್ಯಾ ಕಸಲ್ಯಾಯ್ ಪ್ರತಿಕ್ರಿಯೆಂಕ್ ಆಮಿ ತಯಾರ್ ಆಸಾಜೆ. ಆಪ್ಲ್ಯಾ ಕೃತಿಯೆ ವಯ್ರ್ ಸ್ವ ಪಾತ್ಯೆಣಿ ಆಸ್‌ಲ್ಲಿಂ ಬಿಲ್ಕುಲ್ ವಿಮರ್ಶ್ಯಾಂಕ್ ಭಿಯೆನಾಂತ್, ಭಿಯೆಂವ್ಚಿ ಗರ್ಜ್‌ಯ್ ನಾಂ. ವಿಮರ್ಸೊ ಫುಡ್ ಕರ್ಚಿ ತಾಂಕ್ ನಾತ್‌ಲ್ಲ್ಯಾನಿಂ ತಾಂಚಿ ಕೃತಿ ಭಿತರ್ ದವರ್ನ್, ಆನಿಲ್ಲಿ ಸಿಜೋನ್, ಅಮ್ಕ್ಯಾ ಶೆತಾಂತ್ಲ್ಯಾ ಜಾಣಾರ‍್ಯಾಂಕ್ ದಾಕವ್ನ್, ತಿದ್ವುನ್, ತಿ ಸಾದರ್ ಕರುಂಕ್ ಜೊಕ್ತಿ ಮ್ಹಣ್ಚೆಂ ಧಯ್ರ್ ಯೆತಾ ಪರ್ಯಾಂತ್ ತಿ ಪರ್ಗಟ್ ಕರುಂಕ್ ವೆಚೆಂ ನಂಯ್.
ತೆಂ ಸೊಡ್ನ್ ಬೊಡ್ಚಾಂಬೊ ಶಿತ್ ವಾಡ್ನ್, ಬರೆಂ ಆಸ್ಲ್ಯಾರ್ ಸಕ್ಡಾಂಮುಕಾರ್ ಸಾಂಗಾ, ಚೂಕ್ ಆಸ್ಲ್ಯಾರ್ ಆಮ್ಕಾಂ ಮಾತ್ ಸಾಂಗಾ ಮ್ಹಣ್ ಸಾಂಗ್ಚೆಂ ಧಾಂವ್ಕುರ್ಪಣ್ ಯಾ ಪೊಕೊಳ್ಪಣ್. ಆಮ್ಚ್ಯಾ ಕೃತಿಯೆವಿಶಿಂ ಸಗ್ಳ್ಯಾನಿಂ ಬರೆಂ ಜಾಲಾಂ, ಬರೆಂ ಜಾಲಾಂ ಮ್ಹಣ್ ಫುಗಾರ್ತಾನಾ ಸಂತೊಸಾನ್ ಫುಗ್ಚಿಂ ಆಮಿಂ ತೆಂಚ್ ಕೋಣೆಂಯ್ ಕೆಲ್ಲಿ ಏಕ್ ತಿದ್ವಣ್ ಸಯ್ತ್ ಸೊಸುನ್ ಘೆಂವ್ಕ್ ತಯಾರ್ ಆಸಾನಾಂವ್ ಕಿತ್ಯಾಕ್? ಹೊಗ್ಳಾಪ್ ಜಾಯ್, ಪುಣ್ ಚುಕಿ ದಾಕಂವ್ಚ್ಯೊ ನಾಕಾತ್ ಮ್ಹಳ್ಯಾರ್!?
ಎಕ್ಲ್ಯಾನ್ ರಚ್‌ಲ್ಲ್ಯೊ ಸರ್ವ್ ಕೃತಿಯೊ ಎಕಾಚ್ ಲೇಕಾರ್ ಆಸ್ತಾತ್ ಮ್ಹಣ್ ಸಾಂಗೊಂಕ್ ಜಾಯ್ನಾ. ಸಗ್ಳ್ಯಾನಿಂ ಫುಗಾರಿಜೆ ಮ್ಹಳ್ಯಾರೀ ಜಾಯ್ನಾ. ಉಣೆಪಣ್ ಆಸ್ಲ್ಯಾರ್ ಒಪುನ್ ಘೆವ್ನ್ ಥೊಡ್ಯಾ ಸಂಗ್ತಿನಿಂ ಆಮ್ಚೆಂ ಲಿಮಿಟೆಶನ್ ಒಳ್ಕೊನ್ ಘೆವ್ನ್ ಮುಕಾರ್ ಸರಜೆ.
ಆನಿ ಆಮ್ಚೆಂ ಉಣೆಪಣ್ ಆನಿ ಲಿಮಿಟೇಶನ್ ಆಮ್ಕಾಂ ಕಳಜೆ ತರ್ ಆಮಿ ವಾಚಿಜೆ, ಪಳೆಜೆ, ಪಾರ್ಕಿಜೆ. ತೆಂಯ್ ಹೆರ್ ಭಾಸಾಂಥಾವ್ನ್. ಕಿತ್ಲೆಂ ಚಡ್ ಆನಿ ವೆವಗ್ಳ್ಯಾ ರಿತಿಚೆಂ ವಾಚಪ್, ನಾಟಕ್, ಸಿನೆಮಾ ಪಳಂವ್ಚೆಂ ಚಡ್ತಾ ತಿತ್ಲೆಂಚ್ ಆಮ್ಚಿ ತಾಂಕ್ ಆನಿ ಉಣೆಪಣಾಚಿ ಒಳೊಕ್ ಜಾತಾ, ಆಮ್ಚಿ ಕೃತಿ ಸುಧಾರ್ತಾ ಆನಿ ತಿ ಘೆವ್ನ್ ಲೊಕಾಂಮುಕಾರ್ ವೆಚೆಂ ಆಮ್ಚೆಂ ಧಯ್ರ್ ಚಡ್ತಾ.
ಪುಣ್ ಆಮ್ಕಾಂ ಜಾಯ್ Instant gratification…
ರಚ್‌ಲ್ಲೆಂ, ರಚ್‌ಲೆಚ್ ಘಡಿಯೆ, ಸಾಮಾಜಿಕ್ ಮಾಜ್ಯಾಂನಿ, ಆಪ್ಣೆಂಚ್ ಪರ್ಗಟ್ ಕರ್ನ್, ಆಪ್ಲ್ಯಾ ಸುತ್ತೂರಾಂತ್ ಆಸ್‌ಲ್ಲ್ಯಾ ಏಕ್ ಶೆಂಬರ್ ಲೊಕಾಂಚೆ ಲಾಯ್ಕ್ ಮೆಳ್‌ಲ್ಲೆ ಫರಾ ಆಪುಣ್ ಘಾಲಿಬ್‌ಚ್ ಜಾಲೊಂ ಮ್ಹಳ್ಳ್ಯಾ ಭಿರ್ಮೆಂತಾಕ್ ರಿಗ್ಲ್ಯಾರ್ ತಿ ಆಮ್ಚಿಚ್ ಚೂಕ್ ಜಾತಾ. ಹ್ಯಾ ಶೆಂಬರ್ ಲಾಯ್ಕ್ ದಿಲ್ಲ್ಯಾಂ ಮಧೆಂ ಪಾವುಣ್ಶೆಂ ಜಣಾಂನಿ ತೆಂ ಸಗ್ಳೆಂ ಪಳೆಂವ್ಕ್‌ಚ್ ನಾ ಯಾ ವಾಚುಂಕ್‌ಚ್ ನಾಂ ಆನಿ ಉರ್‌ಲ್ಲ್ಯಾಂನಿ ಆಮ್ಚ್ಯಾ ಪಾಟ್ಲ್ಯಾನ್ ‘ಕಾಲೆಂ ಮೊಡೆಂ ಬರಯ್ಲಾಂ’ ಮ್ಹಣ್ ಖೆಳ್ಕುಳಾಂ ಕೆಲ್ಯಾಂತ್ ಮ್ಹಳ್ಳೆಂ ಸೊಂಪೆಂ ಗಿನ್ಯಾನ್ ಆಮ್ಕಾಂ ಯೆತಾ ಪರ್ಯಾಂತ್ ಆಮಿ ತ್ಯಾ ಭಿರ್ಮೆಂತಾ ಲೊಕಾಂತ್‌ಚ್ ಉರ್ತೆಲ್ಯಾಂವ್.
ಹ್ಯಾ ಮಧೆಂ ಕೊಣೆಯ್ ಬರ‍್ಯಾಮನಾಚ್ಯಾಂನಿ, ಪಯ್ಲೆಂ ಜಾಯ್ತೆ ಪಾವ್ಟಿಂ ಆಮ್ಕಾಂ ತಿದ್ವಿಲ್ಯಾಂನಿ, ಆಮಿ ಖಂಯ್ ಚುಕ್ತೆ ಆಸಾಂವ್ ಮ್ಹಣ್ ದಾಕಯ್ಲ್ಯಾರ್ ‘ವೊ ತೊ ಮ್ಹಾಕಾ ಕೊಂಕ್ತಾ, ಕಿಮ್ಚಿತಾ’ ಮಣ್ ರಡ್ಣೆಂ ವಿಳಾಪ್ ಆನಿ ದಾಂತ್ ಕಿರ್ಲೊಣಿ ಸುರು ಕರ್ನ್, ಸಾಮಾಜಿಕ್ ಮಾಜ್ಯಾಂನಿ ತಾಂಚೆರ್ ‘ಮುಗಿಬೀಳು’ ಕೆಲ್ಯಾರ್ ಆಮ್ಕಾಂ ತ್ಯಾಚ್ ಸಾಮಾಜಿಕ್ ಮಾಜ್ಯಾಂನಿಂ ಪರತ್ ತೆಚ್ ಶೆಂಬರ್ ಲೋಕ್ ಸಪೋರ್ಟ್ ಕರ್ನ್ ಕಮೆಂಟ್ ಕರ್ತಿತ್, ಪುಣ್ ಆಮ್ಚ್ಯಾ ಕೃತಿಯಾಂಚೆಂ ಮಟ್ಟ್ ಮಾತ್ ತೆಂಚ್ mediocre or below average ಉರ್ತಲೆಂ.
ಏಕ್ ಕೃತಿ ಫಕತ್ ವೆವ್ಹಾರಿಕ್ ಜಯ್ತ್ ಜೊಡ್ತಾ ಆನಿ ಕರೋಡಾಂನಿ ಕಮಂವ್ಕ್ ಸಕ್ತಾ, ಮ್ಹಳ್ಳೆಫರಾ ತಿ ಏಕ್ ಉತ್ತಿಮ್ ಕಾಲೆತಿಚಿ ಕೃತಿ ಜಾತಾ ಮ್ಹಣ್ಚೆಂ ಬಿಲ್ಕುಲ್ ಫಟ್. ಪುಣ್ ಚಡ್ತಾವ್ mediocre or below average ಕೃತಿಯೋಚ್ ಚಡ್ತಾವ್ ಶೆತಾಂನಿ ಜಯ್ತ್ ಜೊಡ್ತೆ ಆಸಾತ್ ಮ್ಹಣ್ಚೆಂಯ್ ಆಮ್ಚ್ಯಾ ಕಾಳಾಚೆಂ ದುರಂತ್. ಮಾಗಿರ್ ಪಳೆಂವ್ಕ್ ಗೆಲ್ಯಾರ್ ಹ್ಯಾ ದೆಶಾಚಿಯ್ ಅಸಲಿಚ್ ಏಕ್ ಗತ್. ಆಮ್ಚೆ ಮಧೆಂ ಸನದ್ ಆಸಲ್ಲೆ ಅಶಿಕ್ಪಿ ಚಡ್. ದೆಕುನ್ ಆಮ್ಕಾಂ ಆಮ್ಚ್ಯಾತೆಕಿತ್ ಸರ್ಕಾರ್ ಮೆಳ್ತಾತ್ ಆನಿ ಆಮ್ಕಾಂ ಇಸ್ರೋಂತ್ ಲೆಗುನ್ ರೊಕೆಟ್ ಉಬಂವ್ಕ್ ವೇಳ್ ಘಡಿ ಪಳೆಜೆ ಪಡ್ತಾ.
ವೆವಗ್ಳ್ಯಾ ಭಾಸಾಂಚ್ಯೊ ವೆವಗ್ಳ್ಯಾ ಥರಾಂಚ್ಯೊ ಕೃತಿಯೊ ವಾಚುನ್ ಪಳೆವ್ನ್ ಆಸ್‌ಲ್ಲ್ಯಾಂಕ್ ಮಟ್ಟ್ ಪಾರ್ಕುಂಚಿ ಶಾಥಿ ಆಪಾಪಿಂಚ್ ಯೆತಾ. ಪುಣ್ ಜಾಯ್ತೆಂ ವಾಚುನ್ ಆನಿ ಪಾರ್ಕುನ್ ತಿ ಶಾಥಿ ಆಪ್ಣಾಂವ್ಚೆ ಆಮ್ಚೆ ಮಧೆಂ ಬೋವ್ ಉಣೆ ಆಸಾತ್.
ಸ್ವತಾಚ್ಯಾ ತಾಂಕಿಚಿ ಒಳೊಕ್ ಆಸ್‌ಲ್ಲ್ಯಾಂಕ್ ತಾಂಚ್ಯಾ ಉಣೆಂಪಣಾಚೀಯ್ ಒಳೊಕ್ ಆಸ್ತಾ. ಆಮ್ಚಿ ತಾಂಕ್ ಖಂಯ್ಚ್ಯಾಂತ್ ಆಸಾ ತೆಂ ಸಮ್ಜೊನ್ ಮುಕಾರ್ ಸರ್ಲ್ಯಾರ್ ತಾಂಕಾಂ ಕೊಣೆಂಯ್ ದಾಂಬುನ್ ಧರುಂಕ್ ಜಾಯ್ನಾ ಆನಿ ಕಿಮ್ಚುಂಕೀ ಜಾಯ್ನಾ. ಆಮ್ಚ್ಯಾ ಅಸ್ಕತ್ಕಾಯೆಕ್ ಆಮಿ ತಾಣಿಂ ಆಮ್ಕಾಂ ಕಿಮ್ಚಿಲೆಂ ಮ್ಹಣ್ ಫಟಂವ್ಕ್ ಜಾಯ್ನಾ.
ಪುಣ್ ಆಮ್ಚ್ಯಾ ಮಂಗ್ಳೂರಿ ಕೊಂಕ್ಣಿ ಶೆತಾಂತ್ ವಿಮರ್ಶ್ಯಾಂಕ್ ಫುಡ್ ಕರ್ಚೆಂ ಧಯ್ರ್ ಆಸಲ್ಲ್ಯಾಂಕ್, ಸುರ್ವೆ ಥಾವ್ನ್ ಆಜ್ ಪರ್ಯಾಂತ್, ಬೋವ್ಶ್ಯಾ ಬೊಟಾಂನಿ ಮೆಜ್ಯೆತ್. ದೋನ್ ವೊಳಿಂಚ್ಯಾ ವಿಮರ್ಶ್ಯಾಕ್ ಪಾನಾಂಗಟ್ಲ್ಯಾನ್ ಸಮರ್ಥನ್ ಬರವ್ನ್, ಆಪ್ಣೆ ಬರಯಿಲ್ಲೆಂಚ್ ಸಾರ್ಕೆಂ ಆನಿ ಆಪುಣ್ ಹೆರಾಂನಿ ಬರಯಿಲ್ಲೆಂ ವಾಚಿನಾ ಮ್ಹಣ್ ಹಂಕಾರ್ ಉಲಯಿಲ್ಲೆಚ್ ಚಡ್. ‘ಆಪುಣ್ ಹೆರಾಂನಿ ಬರಯಿಲ್ಲೆಂ ವಾಚಿನಾ’ ಮ್ಹಳ್ಳೆಂ ಏಕ್ ಉತರ್ ಪುರೊ ತಾಂಚ್ಯಾ ಕೃತಿಯೆಂಚ್ಯಾ ಮೋಲಾಮಾಪ್ಣೆಕ್. ತಾಕಾ ತೆಕೀತ್ ತಾಂಚ್ಯೊ ಕೃತಿಯೊ ತ್ಯಾಚ್ ಮಟ್ಟಾಚೆರ್ ಉರ್ರ್ಲ್ಯಾತ್. ಕೋಣ್ ಮಾನುಂ ಯಾ ಸೊಡುಂ, ಮಟ್ಟ್ ಜಾಣಾಂ ಆಸ್‌ಲ್ಲ್ಯಾಂ ಮಧೆಂ ಹಿ ಗಜಾಲ್ ಕಾಂಯ್ ಘುಟ್ ಜಾವ್ನ್ ಉರೊಂಕ್ ನಾ. ಪುಣ್ ದಾಕ್ಷೆಣೆಕ್ ಪಡ್ಚ್ಯಾ ಆಮ್ಚ್ಯಾ ವ್ಹಡ್ಲ್ಯಾ ಪಿಡೆನ್ ಹ್ಯಾ ವಿಶಿಂ ಕೋಣಿಯ್ ಉಲಯ್ನಾಂತ್, ಆನಿ ಚುಕೊನ್ ಕೊಣೆಂಯ್ ಕಾಂಯ್ ಸಾಂಗ್ಲೆ ತರ್ ತಾಕಾ ಖುರ್ಸಾಂವ್ಚಿ ಸಗ್ಳಿ ತಯಾರಿ ಜಾತಾ. ಪುಣ್ ಕೊಣಾಕ್ ಆಪ್ಲ್ಯಾ ಕೃತಿಯೆಂಚೆಂ ವ್ಹಜನ್ ಕಳಿತ್ ಆಸ್‌ಲ್ಲೆಂ, ತಾಣಿಂ ಕೆನ್ನಾಂಯ್ ವಿಮರ್ಶ್ಯಾಂ ಥಾವ್ನ್ ತೋಂಡ್ ಘುಂವ್ಡಾಯಿಲ್ಲೆಂ ನಾ.
ದಾಕ್ಶೆಣೆಕ್ ಪಡೋನ್ ವ್ಹಾಹ್ ವ್ಹಾಹ್ ಮ್ಹಳ್ಳೆ ಫರಾ ಆಮ್ಚ್ಯಾ ಕೃತಿಯೆಚೆಂ ಮೋಲ್ ಬಿಲ್ಕುಲ್ ವಾಡಾನಾ. ಆಮಿ ಖಂಯ್ ಚೂಕ್ ಕರ್ನ್ ಆಸಾಂವ್ ಮ್ಹಳ್ಳೆಂ ಕಳಜೆ ತರ್ ಗಂಭೀರ್ ವಾಚ್ಪಾಚಿ ಖಂಡಿತ್ ಗರ್ಜ್ ಆಸಾ. ಖಂಯ್ಚ್ಯಾಯ್ ವಾಟ್ಸ್ಆಪ್ ಪಂಗ್ಡಾಂತ್ ಆಮಿ ಆಮ್ಚೆಂ ಸಾಹಿತ್ ಆನಿ ಕಲಾಭ್ಯಾಸ್ ಕರ್ತಾಂವ್ ಆನಿ ಕೃತಿಯೆಚೆಂ ಮಟ್ಟ್ ವಾಡಂವ್ಕ್ ಪಾವ್ತಾಂವ್ ಮ್ಹಣ್ ಆಮಿ ಪಾತ್ಯೆತಾಂವ್ ಮ್ಹಳ್ಯಾರ್ ತ್ಯಾ ಪ್ರಾಸ್ ಚಡ್ ಬಿರ್ಮತೆಚಿ ಗಜಾಲ್ ದುಸ್ರಿ ನಾ.
ಆಮ್ಚಿ ಕೃತಿ, ಜಿ ಲೊಕಾಂಮುಕಾರ್ ಪರ್ಗಟ್ಚಿ, ಫಕತ್ ವಾಟ್ಸ್ಆಪ್ ಗ್ರೂಪ್ ಆನಿ ಸಾಮಾಜಿಕ್ ಮಾಜ್ಯಾಂಕ್ ಆನಿ ವಾಚಿನಾಸ್ತಾಂಚ್ ಮೆಳ್ಚ್ಯಾ ಶೆಂಬರ್ -ನಾಕಾ- ಪಾಂಯ್ಶಿಂ ಲಾಯ್ಕಾಂಕ್ ಆನಿ ದೆಡ್ಶೆಂ ಕಮೆಂಟಾಂಕ್ ಮಾತ್ ಸೀಮಿತ್ ಆಸೊನ್ below average ಚ್ ಉರೊಂಕ್ ಜಾಯ್? ಯಾ ವಯ್ರ್ ಉಟೋನ್, ಹೆರ್ ಭಾಸಾಂಚ್ಯಾ ಉತ್ತೀಮ್ ಕೃತಿಯಾಂಸವೆಂ ಪಂತಾಕ್ ರಾಂವ್ಚೆ ತಸಲಿ ಜಾವ್ನ್, ಫಾಲ್ಯಾಂ ಕೊಣೆಯ್ ಹೆರ್ ಭಾಶೆಚ್ಯಾನಿಂ ಆಪ್ಲ್ಯಾ ಭಾಶೇಕ್‌ಯ್ ತರ್ಜಣ್ ಕರುಂಕ್ ಆಶೆಂವ್ಚ್ಯಾ ತಸಲಿ ಜಾಯ್ಜೆ?
ದುಸ್ರಿ ವಿಂಚವ್ಣ್ ಬಿಲ್ಕುಲ್ ಸೊಂಪಿ ನಂಯ್ ಮ್ಹಳ್ಳಿ ಚತ್ರಾಯ್ ಆಸೊಂ.
ಆಮ್ಚೊ ಸಮುದಾಯ್ ಲ್ಹಾನ್ ದೆಕುನ್ ಆಮ್ಚ್ಯಾ ಕೃತಿಯಾಂಕ್ ಹೆರ್ ಭಾಸಾಂಚ್ಯಾ ಕೃತಿಯಾಂಸವೆಂ ಎಕಾಚ್ ತಾಕ್ಡೆರ್ ತುಕುಂಕ್ ನಜೊ ಮ್ಹಣ್ತಾತ್… ಸಿನೆಮಾ ತಸಲ್ಯಾ ವ್ಹಡ್ ಬಂಡ್ವಾಳಾಚ್ಯಾ ಕೃತಿಯಾಂಕ್ ಯೆತಾನಾ, ಏಕ್ ಘಡ್ಯೆಕ್ ಹೆಂ ಮಾನುನ್ ಘೆತ್ಲೆಂ ಮ್ಹಣ್ಂಚ್ ಚಿಂತ್ಯಾಂ. ಆಮ್ಚ್ಯೊ ಕಾಣಿಯೊ , ಕಾದಂಬರಿ, ಕವಿತಾ ಕಿತ್ಯಾಕ್ ಹೆರ್ ಭಾಸಾಂಸಾಂಗಾತಾ ತುಕುಂಕ್ ನಜೊ? ಆಮ್ಚ್ಯಾ ಭಾಶೆಚ್ಯಾ ಮೌಲಿಕ್ ಕೃತಿಯಾಂಕ್ ಜಾಯ್ತ್ಯಾ ಸಮ್ಮಾನಾಂನಿ ಒಳ್ಕೊನ್ ಕೇಂದ್ರ್ ಸಾಹಿತ್ಯ ಅಕಾಡೆಮಿ, ಸರಸ್ವತಿ ಸಮ್ಮಾನ್, ಗ್ಯಾನಪೀಠ ತಸಲೆ ಪುರಸ್ಕಾರ್ ಮೆಳ್ಳ್ಯಾತ್ ತರ್ ಆಮಿ ಲ್ಹಾನ್ ಸಮುದಾಯ್ ಮ್ಹಣ್ ಆಮ್ಚ್ಯಾ ಅಸ್ಕತ್ ಕೃತಿಯಾಂಚೆ ಸಮರ್ಥನ್ ಕರುಂಕ್ ಜಾಯ್ನಾ. ಸ್ಕ್ರಿಪ್ಟ್ ಬಳಿಶ್ಟ್ ಆಸ್ಲ್ಯಾರ್, ಹೋಮ್ ವರ್ಕ್ ಸಾರ್ಕೆಂ ಕೆಲ್ಯಾರ್ ಆಮ್ಚ್ಯಾ ಕೊಂಕ್ಣಿ ಸಿನೆಮಾಂಚ್ಯಾ ಸರಾಸರ್ ಬಜೆಟಾಪ್ರಾಸ್ ಉಣ್ಯಾ ಖರ್ಚಾರ್, ಫಕತ್ ವೀಸ್ ಲಾಖಾಂನಿ ತಯಾರ್ ಜಾಲ್ಲೆಂ ‘ಒಂದು ಮೊಟ್ಟೆಯ ಕಥೆ’ ತಸಲೆಂ ಫಿಲ್ಮ್ ಖಂಯ್ಚ್ಯಾಯ್ ಭಾಶೆಚ್ಯಾ ಸಿನೆಮಾಸಂಗಿ ಪಂತಾಕ್ ರಾವೊಂಕ್ ಪಾವ್ತಾ ತರ್, ಕೊಂಕ್ಣಿ ಸಿನೆಮಾಂಕ್ ಯ್ ಹೊ ವಾದ್ ಲಾಗು ಜಾಯ್ನಾ. ಕೊಂಕ್ಣೆಂತ್ ಕಾಂಯ್ ಟೈಟಾನಿಕ್ ಯಾ ಅವಟಾರ್ ಸಿನೆಮಾ ಕಾಡಿಜೆ ಮ್ಹಣ್ ಕೊಂಕ್ಣಿ ಲೋಕ್ ವಾಟ್ ಪಳೆವ್ನ್ ನಾಂತ್ ನೆಂ?
ಆನಿ ಆಮಿ ಕೊಂಕ್ಣೆಚಿ ‘ಸೇವಾ’ ಕರ್ತಾಂವ್, ಆಮ್ಚೊ ಸಮುದಾಯ್ ಲ್ಹಾನ್, ದೆಕುನ್ ಕೊಂಕ್ಣೆಚ್ಯಾ ನಾಂವಾಂನ್ ಶೆಣ್ ಖಿರವ್ನ್ ದಿಲ್ಯಾರೀ ಪಿಯೆಜಾಯ್ ಮ್ಹಣ್ಚೆಂ ಧೋರಣ್, ಜೆಂ ಆದಿಂಮಾಗಾಂ ಥಾವ್ನ್ ಆಮ್ಚ್ಯಾ ಅಸ್ಕತ್ sub standard ಕೃತಿಯಾಂಚೆರ್ ಮುಸ್ಕು ಘಾಲ್ಚೆಂ ಫ್ಯಾಶನ್ ಕಶೆಂ ಆಮಿ ವಾಪಾರ್ನ್ ಆಯ್ಲ್ಯಾಂವ್, ತೆಂಚ್ ಮುಂದರೋನ್ ಬಾಂಯ್ತ್ಲೆ ಮಾಣ್ಕೆ ಜಾವ್ನ್ಂಚ್ ಉರ್ಚೀಯ್ ಏಕ್ ವಿಂಚವ್ಣ್ ಆಮ್ಕಾಂ ಆಸಾ.
ಆತಾಂ ವಿಂಚವ್ಣ್ ಆಮ್ಚಿ …
– ಕಿಶೂ, ಬಾರ್ಕುರ್
Good one Kishoo. Well said. As u said it is a wake up call for many educated illiterates among us.
Very well written article by Kishoo. Speaks about his maturity being a writer to express these views towards reaching standards of Konkani literature to higher levels. Surely an eye opener to Konkani writers, for it is said ”If you’re not open to constructive criticism, then you’re not open to truly growing as a person”.
ಬೋವ್ ಅರ್ಥಾಭರಿತ್ ಬರಹ್ ಹೆಂ. ಸರ್ವ್ ಬರಯ್ಣಾರಾನಿಂ ವಾಚಿಜೈ ಜಾಲ್ಲೆಂ ಬರಹ್. ಸಾಹಿತ್ಯ್ ಲ್ಹಾನ್ ಜಾಂವ್ ವ ವ್ಹಡ್ ಜಾಂವ್, ವಾಚ್ಪ್ಯಾಂನಿಂ ವಿಮರ್ಸೊ ಕರ್ಚೊ ಭೋವ್ ಬರೆಂ.
ಸಾಹಿತ್ಯ್ ರಿತಿರ್ ಆಪ್ಲ್ವಾ ಬರೊವ್ಣೆಂತ್ ತಿದ್ವಣ್ ಕರುಂಕ್, ಅನಿಕೀ ಉತ್ತಮ್ ರಿತಿನ್ ಬರೊಂವ್ಕ್ ಹೆ ವಿಮರ್ಶೆ ಉಪ್ಕಾರ್ತಾತ್.
ವಿಮರ್ಸೊ ಕರ್ಚೆಂ ಸುಲಭ್ ನ್ಹಂಯ್. ತೊ ಉತ್ತಮ್ ವಾಚ್ಪಿ ಜಾಯ್ಜೈ ಅನಿ ಸಾಹಿತ್ಯ್ ಜಾಣ್ವಾಯ್ ತಾಚೆ ತೈಂ ಅಧಿಕ್ ಅಸಾಜೈ.
ಕೊಂಕಣಿ ಸಾಹಿತ್ಯಂತ್ ಬೊರೊವ್ಪಿ, ವಾಚ್ಪಿ ಅನಿ ವಿಮರ್ಸೊ ಕರೊವ್ಪಿ ಚಡೊಂವ್ದಿತ್…..
ಹೆಂ ಬರಹ್ ಸರ್ವಾಂಕ್ ಮಾರ್ಗದರ್ಶನ್.. 👏👏👌👌
ಸಾಹಿತ್ಯ್ ರಚ್ತೆಲ್ಯಾ ಹರ್ಯೇಕ್ಲ್ಯಾನ್ ವಾಚಿಜಾಯ್ ಜಾಲ್ಲೆಂ ಬರಪ್ ಹೆಂ. ಚುಕಿ ಘಡ್ಚ್ಯೊ ತಿದ್ವುಂಕ್. ಸಾಹಿತ್ಯ್ ಮ್ಹಳ್ಯಾ ಉಪ್ರಾಂತ್ ವಿಮರ್ಸೊ ಅತೀ ಗರ್ಜೆಚೊ. ಸಾಹಿತ್ಯ್ ಸಂಸರಾಂತ್ ಆಮ್ಕಾಂ ಹೆರ್ ಖಂಚ್ಯಾ ಜಾಗ್ಯಾರ್ ದವ್ರುಂಕ್ ಸಕ್ತಾತ್ ಮ್ಜಳ್ಳೆಂ ಠರಾಂವ್ಕ್ ವಿಮರ್ಸೊ ಭೋಬ್ ಗರ್ಜೆಚೊ. ಉಪ್ರಾಂತ್ ತೊ ಚಾರ್ ವೊಳಿಂಚೆರ್ ಜಾಂವ್ ವಾ ಕಾದಂಬರಿಚೆರ್. ಹೊಗ್ಳಾಪ್ ಆನಿ ಸ್ತುತಿ ಸಾಹಿತ್ಯಾಚೆಂ ಮೋಲ್ ಚಡಂವ್ಕ್ ಸಕಾನಾ ಮ್ಹಳ್ಳೆಂ ಸತ್. ಅನ್ಯೇಕ್ ಬೋವ್ ಗರ್ಜೆಚಿ ಗಜಾಲ್ ಮ್ಹಳ್ಯಾರ್ ಸಾಹಿತ್ಯಾಚೊ ವಿಮರ್ಸೊ ಕರ್ಚ್ಯಾ ಪಯ್ಲೆಂ ಆಮಿ ಆಮ್ಚೊಚ್ ವಿಮರ್ಸೊ ಪಯ್ಲ್ಯಾನ್ ಕರ್ಚೊ ಭೋವ್ ಗರ್ಜೆಚೊ. ಅಸಲಿಂ ಲೇಕನಾಂ ಬರವ್ಪ್ಯಾಕ್ ಜಾಗಯ್ತಾತ್.
Very timely and important article. Some writers are reluctant to accept their mistakes and they think that their every writing is a masterpiece. They write in pages to justify their fault. As you said we are happy to remain in the Well. We are most interested in propaganda than literature. I feel few have ego issue even in admitting their fault. For them only quantity, popularity, likes, claps matter the most than quality literature. sorry affairs of Konkani literature.