ದುಡು ಆನಿ ಖರೊ ಮೋಗ್

ಓ ಹೆನ್ರಿ ನಾಂವಾನ್ ಸಾಹಿತ್ಯ್ ಸಂಸಾರಾಂತ್ ನಾಂವಾಡ್ಲೆಲೊ ವಿಲಿಯಂ ಸಿಡ್ನಿ ಪೋರ್ಟರ್ ( 1862 – 1910) ಆಮೆರಿಕಾಚೊ ಭಾರಿಚ್  ಫಾಮಾದ್ ಮಟ್ವ್ಯಾ ಕಾಣಿಯಾಂಗಾರ್. ಜೈಲಾಚಿ ಶಿಕ್ಶಾ ಭರುನ್ ಆಸ್ತಾನಾ ತಾಣೆ ಕಾಣ್ಯೊ ಬರಯ್ಲ್ಯೊ. ಲೊಕಾಕ್ ಕಳಾನಾಯೆ ಮ್ಹಣ್ ಓ ಹೆನ್ರಿ ನಾಂವಾನ್ ಬರಯ್ಲ್ಯೊ. ಸುಮಾರ್ ಸಯ್ಶಿಂ ವಯ್ರ್ ಮಟ್ವ್ಯೊ ಕಾಣ್ಯೊ ತಾಣೆಂ ಬರಯ್ಲ್ಯಾತ್. ಹಾಚ್ಯೆ ಕಾಣಿಯಾಂಚಿ ವಿಶೇಷತಾ ಮ್ಹಳ್ಯಾರ್, ಅಂತ್ಯ್. ತಾಚಿ ಹರ್ಯೆಕ್ ಕಾಣಿ ವಿಶಿಸ್ಟ್ ಶೈಲೆಚಿ ಆಸುನ್, ಮನ್ಶ್ಯಾಚ್ಯಾ ವಿವಿಧ್ ಸ್ವಭಾವಾಂಕ್ ಪಿಂತ್ರಾಯ್ತಾ.

ಡಿಸೋಜ ಸಾಬು ತಯಾರ್ ಕರ್ನ್, ವಿಕುನ್ ಕೊರೊಡಾಂನಿ ಡೊಲರ್ ಆಪ್ಣಾಯಿಲ್ಲೊ, ಮಾಲ್ಘಡೊ ಆಂತೊನಿ ಡಿಸೋಜ, ಆಪ್ಲ್ಯಾ ಪಾಂಚ್ವ್ಯಾ ಅವೆನ್ಯೂಚ್ಯಾ ವ್ಹಡ್ ಬಂಗ್ಲ್ಯಾಚ್ಯೆ ಜನೆಲಾಲಾಗಿಂ ಉಬೊ ರಾವ್‌ಲ್ಲೊ. ತೊ ಆಪ್ಲ್ಯಾ ಸೆಜಾರ್ಚ್ಯಾ ಘರಾಂತ್ ಆಸ್ಚ್ಯಾ ಸೈಮನ್ ಲೋಬೊಕ್ ಪಳೆತಾಲೊ. ಹೊ ಸೈಮನ್ ನ್ಯೂಯಾರ್ಕ್ ಶಹರಾಂತ್ ಗೌರವಾಚೊ ಸಾಂದೊ. ತೊ ಘರಾ ಥಾವ್ನ್ ಭಾಯ್ರ್ ಯೇವ್ನ್ ಬಾಡ್ಯಾಚ್ಯಾ ಗಾಡ್ಯೆಚೆರ್ ಬಸ್ಲೊ. ಸದಾಂಚೆ ಬರಿ ಆಜ್‌ಯ್ ತಾಣೆಂ ಆಂತೊನಿಚ್ಯಾ ಘರಾ ಕಡೆ ಪಳೆಲೆಂ. ತಾಣೆ ಪಳೆಯಿಲ್ಲಿ ದೀಶ್ಟ್ ಕಸಿ ಆಸ್‌ಲ್ಲಿಗೀ ಮ್ಹಳ್ಯಾರ್, ಆಪುಣ್ ಮೊಸ್ತು ಪ್ರಭಾವಿತ್ ಮನಿಸ್ ಆನಿ ಹೊ ಗಿರೇಸ್ತ್ ಸಾಬುಗಾರ್ ಏಕ್ ಸಾಧಾರಣ್ ಮನಿಸ್.

“ಹಾಂವ್ ಗೀಮಾಂತ್ ಹ್ಯಾ ಘರಾಕ್ ತಾಂಬ್ಡೊ, ಧವೊ ಆನಿ ನಿಳ್ಸೊ ರಂಗ್ ದೀವ್ನ್ ಸೊಭಾಯ್ತೊಲೊಂ” ಸಾಬುಗಾರ್ ಆಪ್ಣಾಕ್‌ಚ್ ಮ್ಹಣಾಲೊ.
“ತೆದ್ನಾಂ ಹೊ ಹೆಂ ಕಸೆಂ ಮೆಚ್ವಾತಾಗೀ ಪಳೆತಾಂ?”

ಉಪ್ರಾಂತ್ ಆಂತೊನಿ ಡಿಸೋಜ ಪಾಟಿಂ ಪಳೆವ್ನ್ ವ್ಹಡಾ ತಾಳ್ಯಾನ್ ಬೊಬಾಟ್ಲೊ:

“ವಿನ್ಸೀ!”

ಕಾಮ್ಗಾರಾಂಕ್ ಆಪಂವ್ಕ್ ತಾಣೆಂ ಕೆದಿಂಚ್ ಕಾಂಪಿಣ್  ವಾಜಯಿಲ್ಲಿ ನಾ.

“ಮ್ಹಜ್ಯಾ ಪೂತಾಕ್ ಘರಾ ಭಾಯ್ರ್ ವೆಚ್ಯಾ ಪಯ್ಲೆಂ ಮ್ಹಾಕಾ ಮೆಳೊಂಕ್  ಸಾಂಗ್.”ತಾಣೆಂ ಕಾಮ್ಗಾರಾಕ್ ಸಾಂಗ್ಲೆಂ.

ಪೂತ್ ಕೂಡಾಕ್ ಪಾವ್ತಾನಾ ವಾಚುನ್ ಆಸ್ಚೆಂ ದಿಸಾಳೆಂ ಸಕ್ಲಾ ದವ್ರುನ್ ಬಾಪುಯ್ ಮ್ಹಣಾಲೊ:

“ರಿಚ್ಚಿ, ತೂಂ ಸಾಬುಂಕ್ ಕಿತ್ಲೊ ದುಡು ಖರ್ಚಿತಾಯ್?”

ರಿಚ್ಚಿಚಿ ಕಾಲೆಜ್ ಮುಗ್ದುನ್ ಸ ಮಹಿನೆ ಜಾಲ್ಲೆ. ಆತಾಂ ತೊ ಘರಾ ಪಾಟಿಂ ಆಯ್ಲಾ. ಎದೊಳ್ ಮ್ಹಣಾಸರ್ ಆಪ್ಲ್ಯಾ ಬಾಪಾಯ್ಕ್ ಸಮ್ಜೊಂಕ್ ತಾಕಾ ಜಾಂವ್ಕ್ ನಾ. ಹರ್ಯೆಕಾ ಪಾವ್ಟಿಂ ತೊ ಬಾಪಯ್ ವಿಶಿಂ ಆಜ್ಯಾಪ್ತಾಲೊ.

“ಬಾರಾ ಸಾಬುಂಕ್ ಸ ಡಾಲರ್” ತಾಣೆಂ ಜಾಪ್ ದಿಲಿ.

“ಆನಿ ತುಜ್ಯಾ ವಸ್ತುರಾಂಕ್?”

“ಸುಮಾರ್ ಸಾಟ್ ಡಾಲರ್.”

“ತೂಂ ಏಕ್ ಖಾಲ್ತೊ ಮನಿಸ್.” ಬಾಪುಯ್ ಮ್ಹಣಾಲೊ. “ಥೊಡೆ ತರ್ನಾಟೆ ಬಾರಾ ಸಾಬುಂಕ್ ಚೊವೀಸ್ ಡಾಲರ್ ಆನಿ ವಸ್ತುರಾಂಕ್ ಶೆಂಬೊರ್ ಡಾಲರಾಚ್ಯಾಕೀ ಚಡ್ ಖರ್ಚಿತಾತ್ ಮ್ಹಣ್ ಹಾಂವೆ ಆಯ್ಕಾಲಾಂ. ಹೆರಾಂ ಬರಿ ತುಜ್ಯೆ ಕಡೆ ಸಯ್ತ್ ಉಡಂವ್ಕ್ ಮೊಸ್ತು ದುಡು ಆಸಾ. ಪೂಣ್ ತೂಂವೆ ಕರ್ಚೆಂ ಸಾರ್ಕೆಂ ಜಾವ್ನಾಸಾ. ಹಾಂವ್ಂಚ್ ಡಿಸೋಜ ಸಾಬು ವಾಪಾರ್ತಾಂ. ಕಿತ್ಯಾಕ್ ಮ್ಹಳ್ಯಾರ್ ತೊಚ್ಚ್ ಬರೊ ಸಾಬು. ಏಕಾ ಸಾಬುಕ್ ತೂಂವೆ ಧಾ ರುಪ್ಯಾಚಾಕೀ ಚಡ್ ದಿಲ್ಯಾರ್, ತೆ ತೂಂ ಫರ್ಮಳಾಕ್ ಆನಿ ಕಂಪೆನಿಚ್ಯಾ ನಾಂವಾಕ್ ದಿಲ್ಲೆ ಬರಿ.”

“ಪೂಣ್, ತುಜ್ಯಾ ತಸಲ್ಯಾ ತರ್ನಾಟ್ಯಾಕ್ ಪನ್ನಾಸ್ ರುಪಯ್ ಬರೆ. ತೂಂ ಖಾಲ್ತೊ. ಏಕ್ ಮನಿಸ್ ಖಾಲ್ತೊ ಆಸ್ಲ್ಯಾರ್ ತಾಚೊ ಪೂತ್‌ಯ್ ಖಾಲ್ತೊ ಆಸಾನಾ ಮ್ಹಣ್ ಲೋಕ್ ಉಲಯ್ತಾ. ಬಹುಶ್ಯಾ ಪೂತ್‌ಯ್ ಖಾಲ್ತೊ ಅಸುಂಕ್ ಪುರೊ. ತಾಣಿಂ ಸಾಂಗ್ಚೆಂ ಪೂರಾ ಫಟಿ. ದುಡು ಮನ್ಶ್ಯಾಕ್ ವೆಗಿಂಚ್ ಖಾಲ್ತೊ ಕರ್ತಾ. ದುಡ್ವಾನ್ ತುಕಾ ಖಾಲ್ತೊ ಕೆಲಾ. ಮ್ಹಾಕಾಯ್ ತಾಣೆಂ ಖಾಲ್ತೊ ಕೆಲಾ. ಆಮ್ಚ್ಯಾ ಘರ್ಚ್ಯಾ ದೊನೀ ಖುಶಿನಿ ಆಸ್ಚ್ಯಾ ಖಾಲ್ತ್ಯಾ ಮನ್ಶ್ಯಾಂ ಬರಿ ಹಾಂವ್ ಖಾಲ್ತೊ ಆಸಾಂ. ಮ್ಹಜೆಂ ನಡ್ತೇಂಯ್ ತಾಂಚ್ಯೆ ಬರಿಚ್ ಪಾಡ್. ಪೂಣ್, ತಾಂಕಾಂ ರಾತಿಂ ಸಾರ್ಕಿ ನೀದ್ ಯೇನಾ. ಕಿತ್ಯಾಕ್ ಮ್ಹಳ್ಯಾರ್ ಏಕ್ ಸಾಬು ತಯಾರ್ ಕರ್ಚೊ ಹ್ಯಾ ಮಧ್ಲ್ಯಾ ಘರಾ ಆಸಾ.”

“ಥೊಡಿಂ ಕಾಮಾಂ ದುಡು ಕರುಂಕ್ ಸಕಾನಾ” ಪೂತ್ ಮ್ಹಣಾಲೊ.

“ತಸೆಂ ಮ್ಹಣಾನಾಕಾ.” ಮ್ಹಣಾಲೊ ಮಾಲ್ಘಡೊ ಆಂತೊನಿ. “ದುಡು ಹರ್ಯೆಕಾ ವಗ್ತಾ ಜಿಕ್ತಾ. ತಾಕಾ ಮೊಲಾಂವ್ಕ್ ಮೆಳಾನಾತ್ಲಿ  ವಸ್ತ್ ಹಾಂವೆ ಏದೊಳ್ ಮ್ಹಣಾಸರ್ ಪಳೆಂವ್ಕ್ ನಾ. ದುಡು ಮೊಲಾಯ್ನಾತ್ಲೆಲಿ ವಸ್ತ್ ಖಂಯ್ಚಿ? ಮಾಗಿರ್, ತೂಂವೆ ಮ್ಹಾಕಾ ಏಕ್ ವಿಶಯ್ ಸಾಂಗಿಜಾಯ್. ತುಕಾ ಕಸಲಿಗೀ ಅಡ್ಕಳ್ ಆಸಾ ಮ್ಹಣ್ ಮ್ಹಾಕಾ ಭಗ್ತಾ. ದೋನ್ ಹಫ್ತ್ಯಾಂ ಥಾವ್ನ್ ಹಾಂವ್ ಪಾರ್ಕುನ್ ಆಸಾಂ. ಕಿತೆಂ ಮ್ಹಣ್ ಸಾಂಗ್. ಹಾಂವ್ ತುಕಾ ಕುಮಕ್ ಕರ್ತಾಂ. ಮುಕ್ಲ್ಯಾ  ಚೊವೀಸ್ ಘಂಟ್ಯಾನಿ ಮ್ಹಜ್ಯಾ ಹಾತಿಂ ಇಕ್ರಾ ಲಾಖ್ ಡಾಲರ್ ಆಸ್ತಾತ್. ತುಜಿ ಭಲಾಯ್ಕಿ ಬರಿ ನಾಂಗೀ?”

“ಥೊಡೆ ಹಾಕಾ ಪಿಡಾ ಮ್ಹಣ್ತಾತ್.”

“ಓಹ್! ” ಉದ್ಗಾರ್ಲೊ ಆಂತೊನಿ. “ತಾಚೆಂ ನಾಂವ್ ಕಿತೆಂ? ಮ್ಹಜ್ಯಾಲಾಗಿಂ ಕಾಜಾರ್ ಜಾ ಮ್ಹಣ್ ತೂಂವೆ ಕಿತ್ಯಾಕ್ ವಿಚಾರುಂಕ್ ನಜೊ?ತೆಂ ಸಂತೊಸಾನ್ ಒಪ್ವಾತಾಲೆಂ. ತುಜ್ಯಾಲಾಗಿಂ ದುಡು ಆಸಾ, ಸೊಭಾಯ್ ಆಸಾ ಆನಿ ತೂಂ ಎಕ್ ಬರೊ ಭುರ್ಗೊ. ತುಜ್ಯೆ ಹಾತ್ ನಿತಳ್ ಆಸಾತ್. ತಾಚ್ಯೆರ್ ಡಿಸೋಜ ಸಾಬು ನಾ.”

“ತಾಚ್ಯೆಲಾಗಿಂ ವಿಚಾರುಂಕ್ ಮ್ಹಾಕಾ ಆವ್ಕಾಸ್ ಚ್ ಮೆಳೊಂಕ್ನಾ” ರಿಚ್ಚಿ ಮ್ಹಣಾಲೊ.

“ಏಕ್ ಆವ್ಕಾಸ್ ಕರ್. ತಾಕಾ ವೊಡ್ತಾಕ್ ಭಂವ್ಡಾಂವ್ಕ್ ಆಪವ್ನ್ ವರ್, ಯಾ ಇಗರ್ಜೆ ಥಾವ್ನ್ ತಾಚ್ಯೆ ಘರಾ ಮ್ಹಣಾಸರ್ ತಾಚ್ಯೆ ಸಾಂಗಾತಾ ಚಲೊನ್ ವ್ಹಚ್.”

“ಡ್ಯಾಡ್, ತುಕಾ ಗಿರೇಸ್ತ್ ಚಲಿಯಾಂಚ್ಯೆ ಜಿಣ್ಯೆ ವಿಶಿಂ ಕಳಿತ್ ನಾ. ತಾಂಚೊ ಹರ್ಯೆಕ್ ಘಂಟೊ, ಮಿನುಟ್ ಮೆಜುನ್ ವಾಂಟೊ ಜಾತಾ. ತಾಕಾ ಹಾಂವೆ ಆಪ್ಣಾಯ್ಜಾಯ್‌ಚ್. ನಾ ತರ್, ಹೊ ಸಂಸಾರ್‌ಚ್ ಮ್ಹಾಕಾ ಆರ್ಥ್ ನಾತ್ಲೊಲೊ ಜಾತಾ. ಹಾಂವ್ ತಾಚೊ ಮೋಗ್ ಕರ್ತಾಂ ಮ್ಹಣ್ ಕಾಗಾತ್ ಬರಯ್ನಾಂ.  ಮ್ಹಜ್ಯಾನ್ ತೆಂ ಸಾಧ್ಯ್ ನಾ.”

“ಮ್ಹಜ್ಯೆಲಾಗಿಂ ಆಸ್ಚ್ಯಾ ದುಡ್ವಾನ್ ತ್ಯಾ ಚಲಿಯೆಚೆ ಏಕ್ ದೋನ್ ಘಂಟೆ ಆಪ್ಣಾಂವ್ಕ್ ಅಸಾಧ್ಯ್ ಮ್ಹಣ್ ಸಾಂಗ್ತಾಯ್ಗೀ?” ಮಾಲ್ಘಡ್ಯಾನ್ ವಿಚಾರ್ಲೆಂ.

“ಹಾಂವ್ ಮೊಸ್ತು ರಾಕ್ಲೊಂ ಡ್ಯಾಡ್. ಪೊರ್ವಾಂ ತೆಂ ಯುರೋಪಾಕ್ ವೆತಾ. ಥಂಯ್ಸರ್ ತೆಂ ದೋನ್ ವರ್ಸಾಂ ಆಸ್ತೆಲೆಂ. ತಾಕಾ ಎಕ್ಸುರೆಂ ಮೆಳ್ಚಾಕ್ ಫಾಲ್ಯಾಂ ಥೊಡಿಂ ಮಿನುಟಾಂ ಮೆಳ್ಳ್ಯಾಂತ್. ಫಾಲ್ಯಾಂ ತೆಂ ರೈಲಾರ್ ಯೆತಾ. ಹಾಂವ್ ಏಕಾ ಘೊಡ್ಯಾ ಗಾಡಿಯೆರ್ ವಚುನ್ ತಾಕಾ ಮೆಳ್ತಾಂ. ಉಪ್ರಾಂತ್ ಆಮಿ ವೆಗಿಂಚ್ ಏಕ್ ನಾಟಕ್ ಪಳೆಂವ್ಕ್ ನಾಟಕ್ ಘರಾ ವಚುಂಕ್ ಆಸಾ. ಥಂಯ್ಸರ್ ತೆಂ ಆಪ್ಲಿ ಮಾಂಯ್ ಆನಿ ಕುಟ್ಮಾಚ್ಯಾಂಚಿ ಭೆಟ್ ಕರ್ತಾ. ತೆದ್ನಾಂ ತೆಂ ಮ್ಹಜಿಂ ಉತ್ರಾಂ ಆಯ್ಕಾತೆಲೆಂಗೀ? ನಾ. ನಾಟಕ್ ಘರಾಂತ್? ನಾ. ನಾಟಕ್ ಮುಗ್ದಾಲ್ಯಾ ಮಾಗಿರ್? ನಾ!  ನಾ ಡ್ಯಾಡ್. ಹೊ ಏಕ್ ಸಮಸ್ಸೊ  ತುಜೊ ತೊ ದುಡು ಪರಿಹಾರ್ ಕರ್ಚೊ ನಾ. ಆಮಿ ದುಡ್ವಾನ್ ಏಕ್ ಮಿನುಟ್ ಮೊಲಾಂವ್ಕ್ ಸಾಧ್ಯ್ ನಾ. ತಶೆಂ ಜಾಲ್ಲೆಂ ಜಾಲ್ಯಾರ್, ಗಿರೇಸ್ತ್ ಲೋಕ್ ಮೊಸ್ತು ತೇಂಪ್ ವಾಂಚ್ತೊ. ಪೊರ್ವಾಂ ಮಿಸ್ ಫೆಲ್ಸಿ ತಾರುಂ ಚಡ್ಚ್ಯಾ ಪಯ್ಲೆಂ ತಾಚ್ಯೆಲಾಗಿಂ ಉಲಂವ್ಚಿ ಆಶಾ ಮ್ಹಜ್ಯೆ  ಥಂಯ್   ನಾ.”

“ಪೂತಾ ರಿಚ್ಚಿ” ಆಂತೊನಿ ಉಲಯ್ಲೊ. “ತೂಂ ನಿಜಾಯ್ಕೀ ಪಿಡೆಸ್ತ್ ನ್ಹಯ್ ಮ್ಹಣ್ ಕಳೊನ್ ಸಂತೊಸ್ ಜಾಲೊ. ದುಡ್ವಾನ್ ವೆಳಾಕ್ ಮೊಲಾಂವ್ಕ್  ಜಾಯ್ನಾ ಮ್ಹಳೆಂಯ್ಮೂ? ಬಹುಶ್ಯಾ ಪೂರಾ ವೇಳ್ ಮೊಲಾಂವ್ಕ್ ಸಕ್ಚೊಂ ನಾ ಪೂಣ್, ಇಲ್ಲೊ ವೇಳ್ ಮೊಲಾಯಿಲ್ಲೆಂ ಹಾಂವೆ ಪಳೆಲಾಂ.”

ತ್ಯಾ ದಿಸಾ ಸಾಂಜೆರ್ ಆಂತೊನಿಚಿ ವ್ಹಡ್ ಭಯ್ಣ್ ಹೆಲೆನ್ ಮೋಗ್ ಕರ್ತೆಲ್ಯಾಂನಿ ಸೊಸ್ಚ್ಯಾ ಕಶ್ಟಾಂ ವಿಶಿಂ ಉಲಂವ್ಕ್ ಆಯ್ಲಿ.

“ತಾಣೆಂ ಮ್ಹಾಕಾ ಸಕ್ಕಡ್ ಸಾಂಗ್ಲಾಂ ” ಭಾವ್ ಮ್ಹಣಾಲೊ. “ತುಕಾ ಜಾಯ್ ತಿತ್ಲೊ ದುಡು ಕಾಣ್ಘೆ ಮ್ಹಣ್ ಹಾಂವೆ ತಾಕಾ ಸಾಂಗ್ಲೆಂ. ಪೂಣ್ ತೊ ದುಡ್ವಾನ್ ಕಸಲೆಂಚ್ ಪ್ರಯೋಜನ್ ನಾ ಮ್ಹಣ್ತಾ. ದುಡ್ವಾನ್ ಕುಮಕ್ ಜಾಯ್ನಾ ಮ್ಹಣ್ ತೊ ಪಾತ್ಯೆಲಾ.”

“ಓಹ್! ಆಂತೊನಿ” ಭಯ್ಣ್ ಉದ್ಗಾರ್ಲೆಂ. “ದುಡ್ವಾ ವಿಶಿಂ ತೂಂವೆ ತಿತ್ಲೆಂ ಚಡ್ ಚಿಂತೂಂಕ್ ನಜೊ ಮ್ಹಣ್ ದಿಸ್ತಾ. ಮೊಗಾಚ್ಯೆ ಸಂಗ್ತಿಂನಿ ದುಡ್ವಾಚಿ ಕಸಲಿಚ್ ಕುಮಕ್ ಜಾಯ್ನಾ. ಮೋಗ್ ಚಡ್‌ಚ್ ಬಳಾಧಿಕ್. ತೊ ಚಲಿಯೆಲಾಗಿಂ ಪಯ್ಲೆಂಚ್ ಉಲಯಿಲ್ಲೊ ತರ್!? ತೆಂ ಆಮ್ಚ್ಯಾ ರಿಚ್ಚಿಕ್ ಖಂಡಿತ್ ಒಪ್ವಾತೆಂ. ಆತಾಂ ಮೊಸ್ತು ತಡವ್ ಜಾಲಾ ಕೊಣ್ಣಾ ಮ್ಹಣ್ ಮ್ಹಾಕಾ ಭ್ಯೆಂ.  ತುಜೆಂ ಪೂರಾ ಭಾಂಗಾರ್ ಸಯ್ತ್ ತುಜ್ಯಾ ಪೂತಾಕ್ ಸಂತೊಸ್ ಹಾಡ್ನ್ ದಿಂವ್ಚೆಂ ನಾ.”

ದುಸ್ರ್ಯಾ ದಿಸಾ ರಾತಿಂ ಹೆಲೆನಾನ್ ಭಾಂಗ್ರಾಚಿ ಪರ್ನಿ ಏಕ್ ಮುದಿ ರಿಚ್ಚಿಕ್ ದಿಲಿ.

“ಹಿ ಬೊಟಾಕ್ ಘಾಲ್ನ್ ವ್ಹಚ್. ಹಿ ಮುದಿ ತುಜ್ಯಾ ಮಾಂಯ್ನ್ ಮ್ಹಾಕಾ ದೀವ್ನ್, ತುಕಾ ತೂಂವೆ ಮೋಗ್ ಕರ್ಚಿ ಚಲಿ ಮೆಳ್ಚ್ಯಾ ವಗ್ತಾ ದೀ ಮ್ಹಣ್ ಸಾಂಗ್‌ಲ್ಲೆಂ.”

ರಿಚ್ಚಿನ್ ತಿ ಆಪ್ಲ್ಯಾ ಬೊಟಾಕ್ ಘಾಲುಂಕ್ ಪಳೆಲಿ. ಜಾಂವ್ಕ್ ನಾ. ತಿ ಮೊಸ್ತು ಲ್ಹಾನ್ ಆಸ್‌ಲ್ಲಿ. ದೆಕುನ್ ತಿಕಾ ತಾಣೆಂ ಆಪ್ಲ್ಯಾ ಶರ್ಟಾಚ್ಯೆ ಬೊಲ್ಸಾಂತ್ ದವರ್ಲಿ ಆನಿ ತೊ ಗಾಡಿ ಚಡುನ್ ಗೆಲೊ. ರೈಲ್ ನಿಲ್ದಾಣಾಂತ್ ಮಿಸ್. ಫೆಲ್ಸಿಕ್ ಮೆಳ್ಳೊ.

“ಆಮಿ ಮ್ಹಜ್ಯಾ ಮಾಂಯ್ಕ್ ಆನಿ ಹೆರಾಂಕ್ ರಾಕ್ಚೆ ಬರಿ ಕರಿನಾಯೆ” ಫೆಲ್ಸಿನ್ ಅಂವ್ಸರ್ ಕೆಲೊ.

“ಕಿತ್ಲ್ಯಾ ವೆಗ್ಗಿಂ ಜಾತಾಗೀ ತಿತ್ಲ್ಯಾ ವೆಗ್ಗಿಂ ಮೋಹಕ್ ನಾಟಕ್ ಘರಾ ಗಾಡಿ ಧಾಂವ್ಡಾಯ್” ರಿಚ್ಚಿನ್ ಗಾಡ್ಯೆ  ಚಾಲಾಕಾಕ್ ಸಾಂಗ್ಲೆಂ. ತಾಂಚಿ ಗಾಡಿ ರಸ್ತ್ಯಾರ್ ಧಾಂವ್ಲಿ ಆನಿ ಘುಂವ್ಲಿ ಆನಿ ಧಾಂವ್ಲಿ. ತಿತ್ಲ್ಯಾರ್ ರಿಚ್ಚಿ ಗಾಡಿ ರಾವಯ್ ಮ್ಹಣ್ ಬೊಬಾಟ್ಲೊ.

“ಮ್ಹಜಿ ಮುದಿ ಸಕ್ಲಾ ಪಡ್ಲಿ ” ಆನಿ ಗಾಡ್ಯೆ ಥಾವ್ನ್ ತೊ ಸಕ್ಲಾ ದೆಂವ್ಲೊ. “ತಿ ಮ್ಹಜ್ಯಾ ಮಾಂಯ್ಚಿ ಮುದಿ. ತಿಕಾ ಹೊಗ್ಡಾಂವ್ಕ್ ಹಾಂವ್ ಆಶೆನಾ.ಏಕ್‌ಚ್ ಮಿನುಟ್.ತಿ ಖಂಯ್ಸರ್ ಪಡ್ಲಿ ಮ್ಹಣ್ ಹಾಂವ್ ಜಾಣಾಂ.” ಮ್ಹಣೊನ್ ಏಕಾಚ್ ಮಿನುಟಾನ್ ತೊ ಮುದಿ ಕಾಣ್ಘೆವ್ನ್ ಗಾಡ್ಯೆಚೆರ್ ಬಸ್ಲೊ. ಪೂಣ್, ತ್ಯಾಚ್ ವಗ್ತಾ ಏಕಾ ಮಿನುಟಾಂಚ್ಯೆ ಆವ್ದೆಂತ್ ಏಕ್ ಲಾಂಬ್ ಗಾಡಿ ಯೇವ್ನ್ ಹಾಂಚ್ಯಾ ಗಾಡ್ಯೆ ಮುಕಾರ್ ರಾವ್ಲಿ. ಗಾಡ್ಯೆಗಾರಾನ್ ದಾವ್ಯಾಕ್ ಧಾಂವ್ಡಾಂವ್ಕ್ ಪಳೆಲೆಂ. ಪೂಣ್ ಥೈಂಸರ್ ತ್ಯಾಚ್ ವಗ್ತಾ ಆನ್ಯೆಕ್ ಗಾಡಿ ಯೇವ್ನ್ ರಾವ್ಲಿ. ಆತಾಂ ಉಜ್ವ್ಯಾಕ್ ಘುಂವ್ಡಾಂವ್ಕ್ ಮ್ಹಣ್ ಚಿಂತ್ತಾನಾ ಥಂಯ್ಸರ್ ಆನ್ಯೆಕ್ ಗಾಡಿ! ಆತಾಂ ಪಾಟಿಂ ವಚುಂಕೀ ಜಾಯ್ನಾ, ಭಂವ್ತಿಂ ಗಾಡ್ಯೊ ರಾವ್ಲೆಲ್ಯಾನ್ ಖಂಚೇಯ್ ಖುಶಿಕ್ ವೆಚ್ಯಾಕ್ ಜಾಯ್ನಾಸ್ತಾನಾ ತಾಂಚಿ ಗಾಡಿ ಶಿರ್ಕಾಲಿ.

ಅಸಲಿಂ ಘಡಿತಾಂ ಶಹರಾಂತ್ ಘಡ್ತಾತ್. ರಸ್ತ್ಯಾರ್ ಗಾಡ್ಯೊ ಸೀದಾ ವೆಚ್ಯಾ ಬದ್ಲಾಕ್ ಏಕಾಮೆಕಾ ರಿಗೊನ್ ರಾವ್ತಾತ್.

“ಮುಕಾರ್ ಕಿತ್ಯಾಕ್ ವಚಾನಾಂಯ್?” ಮಿಸ್ ಫೆಲ್ಸಿನ್ ವಿಚಾರ್ಲೆಂ. “ಆಮ್ಕಾಂ ತಡವ್ ಜಾತಾ.”

ರಿಚ್ಚಿನ್ ಉಭೊ ರಾವೊನ್ ಪಳೆಲೆಂ. ಪಳೆವ್ನ್ ತೊ ಘಾಬ್ರೆಲೊ. ಸಗ್ಳ್ಯಾನಿತ್ಲ್ಯಾನ್, ಕೊನ್ಶ್ಯಾ ಕೊನ್ಶ್ಯಾಕ್ ಗಾಡ್ಯೊ, ವ್ಹಡ್ , ಲ್ಹಾನ್ ವಾಹನಾಂ ಪೂರಾ ವಾದಾಳ್ ಯೆಂವ್ಚ್ಯಾ ಬರಿಂ ರಿಗೊನ್ ಯೆತಾತ್! ಹರ್ಯೆಕ್ ವಾಹನಾಂ ಶಿರ್ಕಾಲಿಂ. ಸಕ್ಕಡ್ ಬೊಬಾಟ್ತಾತ್. ನ್ಯೂಯಾರ್ಕಾಂತ್ ಆಸ್ಚಿಂ ಪೂರಾ ವಾಹನಾಂ ಹ್ಯಾಚ್ ಖುಶಿಕ್ ಅಮ್ಸೊರಾನ್ ಯೆಂವ್ಚೆಬರಿಂ ದಿಸ್ತಾ!

“ಛೆ! ಮ್ಹಾಕಾ ಮೊಸ್ತು ಬೆಜಾರ್ ಜಾತಾ” ರಿಚ್ಚಿ ಮ್ಹಣಾಲೊ. “ಆಮ್ಕಾಂ ಮುಕಾರ್ ವೆಚ್ಯಾಕ್ ಸಾಧ್ಯ್‌ಚ್ ನಾ. ಆನ್ಯೆಕ್ ಘಂಟೊ ಪುಣೀ ಜಾಯ್. ಹಾಂವೆ ತಿ ಮುದಿ ಸಕ್ಲಾ ಘಾಲಿನಾಯೆ ಆಸ್ಲಿ. ಆಮಿ …”

“ಮ್ಹಾಕಾ ತಿ ಮುದಿ ಪಳೆಂವ್ಕ್ ದೀ” ಮ್ಹಣಾಲೆಂ ಮಿಸ್. ಫೆಲ್ಸಿ. “ಆಮ್ಕಾಂ ಅಮ್ಸೊರಾನ್ ವಚುಂಕ್ ಜಾಯ್ನಾ ಜಾಲ್ಯಾರೀ ಮ್ಹಾಕಾ ಖಂತ್ ನಾ. ಮ್ಹಾಕಾ ನಾಟಕ್ ಘರಾ ವೆಚಾಕ್ ಮನ್ ನಾತ್ಲೆಂ.”

***

ತ್ಯಾ ರಾತಿಂ ಇಕ್ರಾ ವರಾರ್ ಕೋಣ್‌ಗೀ ಆಂತೊನಿಚ್ಯಾ ಕೂಡಾಚ್ಯಾ ದಾರಾಲಾಗಿಂ ಯೆಂವ್ಚೆಂ  ಆಯ್ಕಾಲೆಂ.

“ಭಿತರ್ ಯೇ” ತಾಣೆಂ ಉಲೊ ದಿಲೊ. ವಾಚುನ್ ಆಸ್ಲಲೊ ಬೂಕ್ ಸಕ್ಲಾ ದವರ್ಲೊ. ಭಯ್ಣ್ ಹೆಲೆನ್ ಭಿತರ್ ಆಯ್ಲೆಂ.

“ತಿಂ ದೊಗಾಂಯ್ ಕಾಜಾರ್ ಜಾತಾತ್ ಆಂತೋನಿ” ತೆಂ ಮ್ಹಣಾಲೆಂ. “ತಾಣೆಂ ಆಮ್ಚ್ಯಾ ರಿಚ್ಚಿಲಾಗಿಂ ಕಾಜಾರ್ ಜಾತಾಂ ಮ್ಹಣ್ ಉತರ್ ದಿಲಾಂ. ತಿಂ ನಾಟಕ್ ಘರಾ ವೆಚ್ಯಾ ವಾಟೆರ್ ತಾಂಚಿ ಗಾಡಿ ಥಾಂಬ್ಲಿ ಖಂಯ್. ತಿಂ ಮುಕಾರ್ ವಚುಂಕ್ ದೋನ್ ಘಂಟೆ ಲಾಗ್ಲೆ  ಖಂಯ್. ಭಾವಾ ಆಂತೋನಿ, ತೂಂ ಕೆದಿಂಚ್ ದುಡ್ವಾಚ್ಯಾ ಸಕ್ತೆ ವಿಶಿಂ ಉಲಯ್ನಾಕಾ. ಹೆಂ ಏಕಾ ಧಾಕ್ಟ್ಯಾ ಮುದಿಯೆಚಿ ಮಹಿಮಾ. ತಿ ನಿಜಾಯ್ಕೀ ಮೊಗಾಚಿ ಮುದಿ. ರಿಚ್ಚಿಚ್ಯಾ ಆಯ್ಚಾ ಸಂತೊಸಾಕ್ ತಿಚ್ಚ್ ಕಾರಣ್. ತಾಚ್ಯೆ ಹಾತಿಂ ಥಾವ್ನ್ ತಿ ಸಕ್ಲಾ ಪಡ್ಲಿ ಆನಿ ತಿ ಸೊಧುಂಕ್ ತೊ ಸಕ್ಲಾ ದೆಂವ್ಲೊ. ತಿ ಮೆಳ್ಳ್ಯಾ ಉಪ್ರಾಂತ್ ತಾಂಚಿ ಗಾಡಿ ಮುಕಾರ್ ವೆಚ್ಯಾ ಪಯ್ಲೆಂಚ್ ಹೆರ್ ಗಾಡ್ಯೆ ಮಧೆಂ ಶಿರ್ಕಾಲಿ. ತಾಣೆಂ ಗಾಡ್ಯೆ ಭಿತರ್‌ಚ್ ಆಪ್ಲೊ ಮೋಗ್ ಪಾಚಾರ್ಲೊ. ಕಳ್ಳೆಂಮೂ ಆಂತೋನಿ? ದುಡು ಕಿತೆಂಚ್ ನ್ಹಯ್, ಖರೊ ಮೋಗ್‌ಚ್ ಸಕ್ಕಡ್.”

“ಆಮ್ಚ್ಯಾ ಚೆರ್ಕ್ಯಾನ್ ಆಶೆಲ್ಲೆಂಚ್ ತಾಕಾ ಮೆಳ್ಳೆಂ. ಸಂತೊಸಾಚಿ ಗಜಾಲ್.” ಮ್ಹಣಾಲೊ ಮಾಲ್ಘಡೊ ಆಂತೋನಿ. “ದುಡು ಕಿತ್ಲೊ ಜಾಲ್ಯಾರೀ ತೊಂದ್ರೆ ನಾಂತ್ ಮ್ಹಣ್ ಹಾಂವೆ ತಾಕಾ ಸಾಂಗ್ ಲ್ಲೆಂ …”

“ಪೂಣ್ ಆಂತೋನಿ, ತುಜೊ ದುಡು ಕಿತೆಂ ಕರಿತ್?”

“ಬಾಯೆ, ಹಾಂವ್ ಆತಾಂ ಏಕ್ ಬರೋ ಬೂಕ್ ವಾಚುನ್ ಆಸಾಂ. ಏಕ್ ಸಾಹಸಿಕ್ ಕಾಣಿ. ಪೂಣ್ ಮ್ಹಾಕಾ ತಿ ಮೆಚ್ವಾಲಿ. ಮುಕಾರ್ ಕಿತೆಂ ಜಾತಾ ಮ್ಹಳ್ಳೊ ಅತ್ರೆಗ್ ಮ್ಹಾಕಾ ಧೊಸ್ತಾ. ಮ್ಹಾಕಾ ತೊ ಬೂಕ್ ವಾಚುಂಕ್ ಸೊಡ್.”

***

ಹಿ ಕಾಣಿ ಹಾಂಗಾಚ್ ಮುಗ್ದಾಜಾಯ್. ತಸೆಂ ಜಾಲ್ಯಾರ್ ಬರೆಂ. ತುಮ್ಕಾಂಯ್ ತಸೆಂಚ್ ಭಗ್ತಾಸ್ತೆಲೆಂ. ಪೂಣ್ ಸತಾ ಖಾತಿರ್ ಆಮಿ ತಿ ಮುಖಾರ್ಸಿಜಾಯ್‌ಚ್.

ದುಸ್ರ್ಯಾ  ದಿಸಾ ತಾಂಬ್ಡೆ ಹಾತ್ ಆನಿ ನಿಳ್ಶಿ ಟೈ  ನೆಸ್ಲೊಲೊ ಏಕ್ಲೊ ಆಂತೋನಿ ಡಿ’ಸೋಜಾಚ್ಯೆ ಘರಾ ಆಯ್ಲೊ. ತಾಚೆಂ ನಾಂವ್ ಚಾರ್ಲಿ.

“ಕಸೇಂಯ್ ಆಮಿ ಏಕ್ ಬರೊಚ್ ಸಾಬು ಕೆಲೊ” ಮ್ಹಣಾಲೊ ಆಂತೋನಿ. “ಕಾಲ್ ರಾತಿಂ ಹಾಂವೆ ತುಕಾ ಪಾಂಚ್ ಹಜಾರ್ ಡೊಲರ್ ದಿಲ್ಲೆ.”

“ಹಾಂವೆ ತಾಚ್ಯೆ ವಯ್ರ್ ತಿನ್ಶಿಂ ಡೊಲರ್ ಮ್ಹಜ್ಯಾ ಬೊಲ್ಸಾಂ ಥಾವ್ನ್ ದಿಲ್ಯಾತ್” ಚಾರ್ಲಿ ಮ್ಹಣಾಲೊ.

“ಹಾಂವೆ ಚಿಂತ್ಲೆಲ್ಯಾಚಾಕೀ ಚಡ್ ಖರ್ಚ್ ಜಾಲೊ. ಹಾಂವೆ ಸುಮಾರ್ ಗಾಡ್ಯೊ ಪಾಂಚ್ ಡಾಲರ್ ದೀವ್ನ್ ಬಾಡ್ಯಾಕ್ ಕಾಣ್ಘೆಲ್ಲ್ಯೊ. ಪೂಣ್ ದೋನ್ ಘೊಡೆ ಆಸ್ಚ್ಯೆ ಗಾಡ್ಯೆಂಕ್ ಧಾ ಡಾಲರ್. ಚಡ್ ದುಡು ಪೊಲಿಸಾಂಕ್ ದೀಂವ್ಕ್ ಪಡ್ಲೊ. ದೊಗಾಂಕ್ ಪನ್ನಾಸ್ ಡಾಲರ್ ಆನಿ ಉರ್ಲೆಲ್ಯಾಂಕ್ ವೀಸ್, ಪಂಚ್ವೀಸ್ ದಿಲೆ. ಪೂಣ್, ಮಿ.ಡಿ’ಸೋಜ, ಕಾಮ್ ಮಾತ್ರ್ ಬರೆ ಥರಾನ್ಂಚ್ ಜಾಲೆಂ ನೇ? ಸಕ್ಕಡ್ ಸಾರ್ಕ್ಯಾ ವೆಳಾರ್ ಆಯ್ಲೆ. ರಿಗೊನ್ ತುಜೊ ಪೂತ್ ಬಸ್ಲೆಲಿ ಗಾಡ್ಯೆಕ್ ಮುಕಾರ್ ವೆಚ್ಯಾಕ್ ಸೊಡ್ಲೆಂ ನಾ. ಉಪ್ರಾಂತ್ ತಾಂಕಾಂ ಥಂಯ್ ಥಾವ್ನ್ ಖಾಲಿ ಕರುಂಕ್ ದೋನ್ ಘಂಟೆ ಲಾಗ್ಲೆ!”

“ಜಾಯ್ತ್ ಚಾರ್ಲಿ. ಘೆ ಏಕ್ ಹಜಾರ್ ಆನಿ ತಿನ್ಶಿಂ ಡಾಲರ್. ಹಜಾರ್ ತುಕಾ ಆನಿ ತಿನ್ಶಿಂ ತೂಂವೆ ಖರ್ಚಿಲ್ಲೊ ದುಡು. ತುಕಾ ಖುಶಿ ನ್ಹಯ್ವೇ?”

“ವ್ಹಯ್, ವ್ಹಯ್” ಮ್ಹಣಾಲೊ ಚಾರ್ಲಿ.

ಮೂಳ್: ಓ ಹೆನ್ರಿ   ತರ್ಜುಮೊ: ಉಬ್ಬ,ಮೂಡ್ ಬಿದ್ರಿ