ದೋನ್ ವೆವೆಗ್ಳಿಂ ಆನಿ ವಿಬಿನ್ನ್ ನಾಮ್‌ಪದಾಂ ಪುಣ್ ಎಕಾ ತೆಂಪಾರ್ ಹಿಂ ನಾಮ್‌ಪದಾಂ ಆಮ್ಚ್ಯಾ ಬಿಡಾರಾಂನಿ ಸರ‍್ವ್‌ಸಾಮಾನ್ಯ್ ಆಸ್‌ಲ್ಲಿಂ ಆನಿ ಹ್ಯಾ ನಾಮ್‌ಪದಾಂಕ್ ವೊಂದ್ವಾಲ್ಲ್ಯೊ/ಚಿಡ್ಕಾಲ್ಲ್ಯೊ ವಸ್ತು ಎಕಾ ಘರ್‌ದಾರಾಕ್ ತುಟಾನಾತ್‌ಲ್ಲ್ಯಾ ದಾಗ್ಯಾನ್ ಬಾಂದ್ತಾಲಿಂ. ಹಾಂವ್ ತುಮ್ಕಾಂ ಖಂಚಾ ರಿಪ್‌ವ್ಯಾನ್‌ವಿಂಕಲಾಚ್ಯಾ ಸಂಸಾರಾಕ್ ತಾಂಡುನ್ ವರ‍್ತಾಂ ಮ್ಹಳ್ಳೆಂ ಸವಾಲ್ ಯೆದೊಳ್‌ಚ್ ಉಟ್ಲಾಂ ಆಸ್ತೆಲೆಂ. ಹಾಕಾ ಕಾರಾಣ್ ಆಮ್ಚೆಂ ಯುವಜಣ್ (ತೆ ಕಾಂಯ್ ಕೊಂಕಣಿ ವಾಚ್ತಾತ್ ತರ್) ಹೆಂ ಲೇಕ್ ವಾಚ್‌ಚೆಚ್ಚ್ ನಾಂತ್, ವಾಚ್‌ಲ್ಯಾರಿ ತಾಂಚ್ಯಾನ್ ಮಾಹೆತಿಚೆಂ ಕಸಲೆಂಚ್ ಚಿಂವೊನ್ ಘೆಂವ್ಕ್ ಜಾಂವ್ಚೆಂ ನಾ ಆನಿ ಕಾಂಯ್ ಮ್ಹಣ್ತೆಲೆ – ಹೊ ಖಂಚಾ ಶತಮಾನಾಂತ್ಲೊ ಬರವ್ಪಿ, ಹಾಣೆ ಉಲ್ಲೇಕ್ ಕೆಲ್ಲೊ ವಿಷಯ್ ಫಕತ್ ಎಕಾ ವಸ್ತು ಸಂಗ್ರಹಾಲಯಾಕ್ ಸೀಮಿತ್ ಜಾಲ್ಲೊ.
ವೊಪ್ತಾಂ ಹಾಂವ್. ಸಂಸಾರಾರ್ ಸಬಾರ್ ಆನಿ ಸಬಾರ್ ವಸ್ತು ಸಂಗ್ರಹಾಲಯಾಂ ಆಸಾತ್ ಆನಿ ತಿಂ, ಫಾವೊತ್ಯೆಪರಿಂ ವೈಜ್ಞಾನಿಕ್ ರಿತಿರ್ ಮಾಂಡ್ಲ್ಯಾಂತ್ ತರ್ ಭೆಟ್ ದಿತೆಲ್ಯಾಂಕ್ ಮಾಹೆತಿಚೆಂ ಆನಿ ಜಾಣ್ವಾಯೆಚೆಂ ತುಪೆಂಚ್ ಉಗ್ತೆಂ ಕರ‍್ತಾತ್ ಆನಿ ಸಂಸಾರಾಚೆ ಚರಿತ್ರೆಚಿಂ ದಾಂಪ್ಲೆಲಿಂ ದಾರಾ-ಗವಾಕ್ಷಾಂ ಉಗ್ತಿಂ ಕರ‍್ತಾತ್. ಹ್ಯಾ ವಸ್ತು ಸಂಗ್ರಾಹಲಾಯಾಂಚಿ ಫೊಡ್ಣಿಶಿ ಕರ‍್ಚೊ ಉದ್ದೇಶ್ ಹ್ಯಾ ಲೇಖಾಚೊ ನ್ಹಯ್.
ಸಂಸಾರಾಂತ್ಲ್ಯಾ ಖಂಚಾಯಿ ವಸ್ತು ಸಂಗ್ರಾಹಲಾಯಾಕ್ ಸೆರ‍್ವಾಲ್ಲ್ಯೊ ವಸ್ತು ಎಕಾ ನ್ಹಯ್ ತರ್ ಎಕಾ ತೆಂಪಾರ್ ಸಾಮಾನ್ಯ್ ಲೊಕಾಚ್ಯಾ /ಮಹಂತನಿಂಚ್ಯಾ ಉಪೆಗಾಂತ್ ಆಸ್‌ಲ್ಲ್ಯೊ ಆನಿ ಕ್ರಮೇಣ್ ಸಮಾಜಿಕ್ ಆನಿ ವಿಗ್ಯಾನಿಕ್ ಉದರ‍್ಗತ್ ಯೆತಾನಾ, ಚಿಂತಪ್ ಬದ್ಲತಾನಾ ಹ್ಯಾ ವಸ್ತುಂಕ್ ಸಂಗ್ರಹಲಯಾಂಚ್ ಆಸ್ರೊ ಜಾಲಿಂ. ಹ್ಯಾ ಎಕಾ ಅಬಿಯಾನಾಚೆಂ ಮಹತ್ವ್ ವರ‍್ತೆಂ ಆನಿ ಸಂಗ್ರಹಲಯಾಕ್ ಭೆಟ್ ದಿಂವ್ಚ್ಯಾ ಕೊಣಾಕ್ ಕಸಲ್ಯಾಚೆರ್ ಆಸಕ್ತ್ ಖಂಚಾತ್ ಮ್ಹಳ್ಳೆಂ ತಜ್ವೀಜ್ ಕರುಂಕ್ ಕಷ್ಟ್. ದೆಕಿಕ್, ರೊಮಾಚ್ಯಾ ಚಕರವರ‍್ತಿ ನೀರೊಲಾಗಿಂ ಎಕ್ weeping glass (ಲ್ಹಾನ್ ಎಕ್ ಈದ್ರ್) ಆಸ್‌ಲ್ಲೊ ಖಂಯ್ ಆನಿ ಭಾರಿಚ್ಚ್ ಬಾವುಕ್ ಸಂಯ್ಬಾಚೊ ನೀರೊ ದಿಸಾ ಮದೆಂ ಸಬಾರ್ ಪಾವ್ಟಿಂ ಬಾವುಕ್ ಜಾವ್ನ್ ಕಸ್ಕಸೋನ್ ರಡ್ಟಾನಾ ತಾಚಿಂ ದುಕಾಂ ಧರ‍್ಣಿರ್ ಪಡಾನಾಶೆಂ ತಾಚೆ ಸೇವಕ್ ತಾಚಿಂ ದುಕಾಂ ಹ್ಯಾ ಲ್ಹಾನ್‌ಶಾ ಈದ್ರಾಂತ್ ಜಮಯ್ತಾಲೆ. ಹೊ ಈದ್ರ್ ಖಂಚಾ ಸಂಗ್ರಹಲಯಾಂತ್ ಆಸಾ, ಹಾಂವ್ ನೆಣಾಂ ಪುಣ್ ಆಸಾ ತರ್ ತಾಚೆಂ ಮೌಲ್ಯ್ ಕಾಂಯ್ ಕರೊಡಾಂಚೆ.
ಪುಣ್ ಮ್ಹಜೆಂ ಲೇಖ್ ತ್ಯಾ ಕರೋಡಾಂಚೆ ಲೇಕ್ ಘಾಲಿನಾ. ಹಾಂವ್ ಎಕಾ ಸಾದ್ಯಾ ಮಂಗ್ಳುರಿ ಕುಟ್ಮಾಂತ್ ಜಲ್ಮಾಲ್ಲೊಂ ಆನಿ ಹಾಂವ್ ವಾಡೊನ್ ಯೆತಾನಾ ಮ್ಹಜೆ ಭಂವ್ತಿಂ, ಮಧ್ಯ್‌ಪ್ರಾಚ್ಯಾಕ್ ಯೆದೊಳ್‌ಚ್ ಪಾವ್‌ಲ್ಲ್ಯಾ ಮಾವ್ಳ್ಯಾಂ-ಮಾವ್ಶಾಂಚ್ಯಾ ಪ್ರಬಾವಾನ್ ವಿದೇಶಿ ಖಳ್ ಥಾಪುನ್ ಯೆತಾಲಿ ತರಿ – ಧನ್ಯ್ ತಿಂ ಸರ‍್ವಾಂ, (ಚಡ್ ಕರುನ್ ಮ್ಹಜಿ ಆಜಿ, ಆಜೊ ಆನಿ ಮಾಮ್ಮಿ) ತಾಂಚಿ ಕೊಂಕ್ಣಿ ವಿಸ್ರೊಂಕ್ ನಾಂತ್, ಸಂಪ್ರ್ರದಾಯೊ ವಿಸ್ರೊಂಕ್‌ನಾಂತ್ ಆನಿ ಘರಾಂತ್ ಮಿಕ್ಸಿ ಆನಿ ಗ್ಯಾಸ್ ಕುಕ್ಕರ್ ಆಯ್ಲ್ಯಾರಿ “ರಾಂದ್ಣಿಚೊ ಖುರ್ ಆನಿ ಸಾರ‍್ಣಿ ಖುಂಟೊ” ವಿಸ್ರೊಂಕ್‌ನಾತ್‌ಲ್ಲಿಂ.
ತ್ಯಾ ಎಕಾ ತೆಂಪಾರ್ ಹ್ಯೊ ಸಾದ್ಯೊ ವಸ್ತು ಕಿತ್ಲ್ಯಾ ಮಹತ್ವಾಚ್ಯೊ ಆಸ್‌ಲ್ಲ್ಯೊ ಆನಿ ಎಕಾ ಘರಾಂತ್ ತಾಂಚೆಂ ಸ್ಥಾನ್-ಮಾನ್-ಡಂಗ್ ಕಿತ್ಲ್ಯಾ ಮಹತ್ವಾಚೆಂ ಆಸ್ತಾಲೆಂ ಆನಿ ಖಂಚಾ ಪರೋಕ್ಷ್ ರಿತಿರ್ ಹ್ಯೊ ವಸ್ತು ಆಮ್ಚ್ಯಾ ಸದಾಂಚ್ಯಾ ಜೀವನಾಂತ್ ಪ್ರಮುಕ್ ಆನಿ ಅವಿಬಾಜ್ಯ್ ಗಾಂಚ್ ಜಾವ್ನ್ ರಾಜ್ ಕರ‍್ತಾಲ್ಯೊ ಆನಿ ತ್ಯಾ ಘರಾಂತ್ ಜಿಯೆತೆಲ್ಯಾಂಚೆ ದೀಸ್ ಹ್ಯಾ ವಸ್ತುಂಚೆರ್ ಹೊಂದೊನ್ ಆಸ್ತಾಲ್ಯೊ ಮ್ಹಳ್ಳೊಚ್ ತೀಬ್ ಹ್ಯಾ ಲೇಖಾಚೊ.
|ಮಿಟಾಚಿ ಕಟ್ಟಿ
ರಾಂದ್ಣಿಚ್ಯಾ ಖುರಾಥಾವ್ನ್ಂಚ್ ಸುರು ಕರ‍್ಚೆಂ ತರ್ ತಾಚೆರ್ (ಖುರಾಚೆರ್) ಸಬಾರ್ ಗರ‍್ಜೆಚ್ಯೊ ವಸ್ತು ಆಸ್ತಾಲ್ಯೊ ಆನಿ ತ್ಯಾ ಪಯ್ಕಿ ಮಿಟಾ-ಉದ್ಕಾಚೆಂ ಬುಯಾಂವ್ ಎಕ್. ಹಾಂತುಂ ಖಿರಯಿಲ್ಲೆಂ ಮೀಟ್ ಕೆನ್ನಾಂಯಿ ಆಸ್ತಾಲೆಂ ಆನಿ ಮೊಡ್ಕ್ಯಾಂನಿ ರಾಂದಪ್ ಚಲಾತ್ ಆಸ್ತಾನಾ ರೂಚ್ ಚಾಕೊಂಕ್ ಯಾ ಮಿಟಾಚೆಂ ಹಳ್ಟ್ ಪಳೆಂವ್ಕ್ ಆಯಿಲ್ಲಿ ಯೆಜ್ಮಾನ್ (ರಾಂದ್ಪಿಣ್/ಮಾಂಯ್/ಮಾಮ್ಮಿ ತ್ಯಾ ಮಟ್ಟಾಕ್) ಕಾಂಯ್ ಮೀಟ್ ಉಣೆಂ ಆಸ್ಲ್ಯಾರ್ ಸಟ್ಟ್ ಕರುನ್ ಮಿಟಾಚೆಂ ಬುಯಾಂವ್ ಉಗ್ತೆಂ ಕರುನ್ ತಾಂತ್ಲೆಂ ರುಚಿ ತೆಕಿದ್ ಮೀಟ್ ಕಾಡುನ್ ರಾಂದ್ಪಾಕ್ ಘಾಲ್ತಾಲಿ. ಪುಣ್ ಕಶೆಂ? ಕುಲೆರಾನ್ ಯಾ ಟೀಸ್ಪೂನಾನ್ ನ್ಹಯ್ ಪುಣ್ ತ್ಯಾ ಬುಯಾಂವಾಂತ್ ಮಿಟಾಚಿ ಕಟ್ಟಿ ಖಾಯಾಮ್ ಆಸ್ತಾಲಿ. ಲ್ಹಾನ್ ಎಕ್ ಕಟ್ಟಿ, ತಾಸುನ್ ತೆಲ್ತಿ ಕೆಲ್ಲಿ. ತಾಂತುಂ ಸೊಂಬ್ಚೆಂ ಮೀಟ್ ಎಕ್ ಮಾಪ್‌ಚ್ ಕಶೆಂ ಆಸ್ತಾಲೆಂ ತ್ಯಾ ತ್ಯಾ ಘರಾಣ್ಯಾಕ್. ಅರ್ಥಾತ್, ತ್ಯಾ ಘರಾಣ್ಯಾಚೆಂ “ಮೀಟ್” ಥಿರಾಯ್ತಾಲಿ ತಿ ಕಟ್ಟಿ ಮ್ಹಣ್ಯೆತ್.
ಹಾಂವ್ ನೆಣಾಂ ಕಿತ್ಲ್ಯಾ ವಾಚ್‌ಪ್ಯಾಂನಿ “ತಾಂಚಿ ಮೀಟಾಚಿ ಕಟ್ಟಿ ಪರ್ಯಾಂತ್ ಗೆಲಿ” ಮ್ಹಳ್ಳೊ ಗಾಂಟ್ಲೊ ಆಯ್ಕಾಲಾ. ಹಾಚೊ ಅರ‍್ಥ್ ಆನಿ ಸಾಮ್ ಕಸಲೊ? ಎಕಾ ಘರಾಣ್ಯಾಚಿ ಮಿಟಾಚಿ ಕಟ್ಟಿ ಪರ್ಯಾಂತ್ ಗೆಲಿ ಮ್ಹಳ್ಯಾರ್ ತೆಂ ಘರಾಣೆ ರಿಣಾಂತ್ ಬುಡೊನ್/ಸೊರ‍್ಯಾಕ್ ಲಾಗುನ್/ಜುಗಾರೆಕ್ ಬಲಿ ಜಾವ್ನ್ ಇತ್ಲೆ ಲಾಚಾರ್ ಆನಿ ಪೋಲ್ ಜಾಲೆಂ ಕಿ ತಾಂಚಿ ಮಿಟಾಚಿ ಕಟ್ಟಿ ಭೋವ್ ಸಾಮಾನ್ಯ್ ಪುಣ್ ಮಹತ್ವಾಚಿ ವಸ್ತ್, ಜಿಣಿಯೆಚೆಂ ಮೀಟ್‌ಚ್ ಮೆಜ್‌ಚೆಂ ಎಕ್ ಸಾದನ್ ಸಯ್ತ್ ಉರಂವ್ಕ್ ತಿಂ ಸಕೊಂಕ್ ನಾಂತ್, ಅಶೆಂ. ಸೊಬಾಯ್ ಕೊಂಕ್ಣಿ ಭಾಶೆಚಿ ವ್ಹಯ್ ಪುಣ್ ಹ್ಯಾ ಉತ್ರಾಂಚೊ ಪರಿಣಾಮ್ ಸರ‍್ಪಾನ್ ತೊಂಕ್ ಮಾರ‍್ಚೆ ತಸಲೊ.
|ಘರಾಂತ್ ರಾಂದ್ಣಿಕ್ ಮಹತ್ವ್
ಹೆಂ ಆತಾಂಚ್ಯಾಂಕ್, ಗ್ಯಾಸ್ ಸ್ಟವ್, induction stove ವಾಪರ‍್ತೆಲ್ಯಾಂಕ್ ಸಮ್ಜೊಂಚೆಂ ನ್ಹಯ್. ಹ್ಯಾ ರಾಂದ್ಣಿ ಖುರಾರ್ ಕಾಫಿಯೆಚೊ ಎಕ್ ಬುಡ್ಕುಲೊ ಕಾಯಾಮ್ ಆಸ್ತಾಲೊ ಆನಿ ತಾಂತುಂ ಫುಟಿ ಕೊಫಿ ಆಸ್ತಾಲಿ. ಪಾವ್ಶಿಲ್ಯಾ ದಿಸಾಂನಿ ಹಿ ಕೊಫಿ ಊಬ್ ಉರ‍್ತಾಲಿ ಆನಿ ಕೊಣಾಕ್ ಜಾಯ್ ತಾಣಿಂ ತಿ ಸೆವ್ಯೆತ್ ಆಸ್‌ಲ್ಲಿ, ಚಡ್ ಕರುನ್ ಪ್ರಾಯ್ವಂತಾಂಕ್. ಅಸಲೊ ಎಕ್ ಉಲ್ಲೇಕ್ ಹಾಂವೆಂ ಮ್ಹಜ್ಯಾ “ಎಕ್ ಕಪ್ ಹುನೊನಿ ಕೊಫಿ” ಕಥೆಂತ್ ಕೆಲಾ ಆನಿ ಹಿ ಕಥಾ “A Cup of Hot Coffee” ಮಾತಾಳೊ ಘೆವ್ನ್‌ಯಿ ಪ್ರಗಟ್ ಜಾಲ್ಯಾ. ಆದುನಿಕ್ ಜನಜೀವನಾಂತ್ ಆತಾಂ ರಾಂದಣ್ ದಿಸನಾ ಪುಣ್ ಎಕಾ ತೆಂಪಾರ್ ರಾಂದ್ಣಿಚೆಂ ‘ಪೊರ‍್ಲ್’ ಮ್ಹಳ್ಯಾರ್ ಮಹತ್ವಾಚೆಂ. ‘ಪೊರ‍್ಲ್’ ಮ್ಹಳ್ಯಾರ್ ರಾಂದ್ಣಿಚ್ಯಾ ಮುಖಾ ಲಾಗ್ಶಿಲೊ ಭಾಗ್, ಎಕ್ ಫೊಂಡ್ಕುಲ್ ಕಸೊ. ಹಾಂಗಾಸರ್ ಉಜೊ, ಕೆಂಡಾಂ ಆನಿ ತಾಂಚೊ ದಾವ್ ಉಣೊ.
ಉಡಾಸ್ ಆಸಾ ಮ್ಹಾಕಾ, ಕಾಜುಚ್ಯೊ ಬಿಯೊ ಹುಲ್ಪಾವ್ನ್ ಮೋಯ್ ಕಾಡ್ಚೆ ಖಾತಿರ್ ಮ್ಹಜಿ ಆಜಿ ಹ್ಯೊ ಬಿಯೊ ರಾಂದ್ಣಿಚ್ಯಾ ಉಜ್ಯಾಂತ್ ಉಡಯ್ತಾಲಿ ಆನಿ ತಾಂಚ್ಯಾ ಸರ‍್ಲಾಂಕ್ ಉಜೊ ಲಾಗುನ್ ಆನಿ ತ್ಯೊ ‘ಟಸ್‌ಟುಸ್’ ಕರುನ್ ಎಕಾ ವಿಷೇಸ್ ಪರ‍್ಮಳಾನ್ ಝಳ್ತಾಲ್ಯೊ ಆನಿ ಮ್ಹಜೆ ಆಜಿಯೆಕ್ ಕಳಿತ್ ಆಸ್‌ಲ್ಲೆಂ ತಾಂಕಾಂ (ಬಿಯಾಂಕ್) ಎಕೆ ದೊಯೆನ್ ಕೆದಳಾ ಭಾಯ್ರ್ ಕಾಡಿಜೆ ಅಶೆಂ. ತ್ಯಾ ಬಿಯಾಂಕ್ ಆರಾವ್ನ್ ತಿ ಪೊರ‍್ಲಾಂತ್ ವೊಡ್ತಾಲಿ ಆನಿ ನಿಂವ್ತೆಚ್ ಸೊಲ್ನ್ ಆಮ್ಕಾಂ ದಿತಾಲಿ. ಹೆಚ್ಚ್‌ಪರಿಂ ಲೊಂಕ್ಡಾಚೆ ಇಸ್ತ್ರೆಕ್ ಜಾಯ್ ಜಾಲ್ಲೆ ಜಳ್ತೆ ಇಂಗ್ಳೆ ಪೊರ‍್ಲಾಂತ್ ವೊಡುನ್ ಇಸ್ತ್ರೆಂತ್ ಭರ‍್ಚೆ ಆಸ್‌ಲ್ಲೆ. ರಾಂದ್ಣಿಚೆಂ ಆನಿ ಪೊರ‍್ಲಾಚೆಂ ಮಹತ್ವ್ ಆದುನಿಕತೆಚೆಂ ಪ್ರಥಮ್ ಹಂತ್ ಜಾವ್ನ್ ಪ್ರವೇಸ್ ಜಾಲ್ಲ್ಯಾ ‘ಸಿಗ್ಡಿ ಸಿಸ್ಟಮಾಂತ್’ ಆಳ್ವೊನ್ ಗೆಲೆಂ. ಕಿತ್ಲ್ಯಾ ಜಣಾಂಕ್ ‘ಸಿಗ್ಡಿ’ ಮ್ಹಳ್ಯಾರ್ ಜೆರಾಲ್ ಥರಾನ್ ಎಕ್ ರಾಂದ್ಣಿ ಮ್ಹಳ್ಳೊ ಅರ‍್ಥ್ ಜಾತಾ ಕೊಣಾ ಪುಣ್ ಆಮ್ಗೆರ್ ಸಿಗ್ಡಿ ಪ್ರವೇಸ್ ಜಾತಾನಾ ತಿ ಆಸ್‌ಲ್ಲಿ ಲೊಂಕ್ಡಾಚಿ (ಯಾ ಬೀಡಾಚಿ), ಎಕ್ ಫುಟ್ ಉಬಾರ್ ಉರುಟ್ ಬೆರಲಾಪರಿಂ ಪುಣ್ ವಯ್ಲ್ಯಾನ್ ಉಗ್ತಿ. ತಿಚೊ ಥಳ್ ಬಂದ್ ಪುಣ್ ದೆಗೆನ್ ಎಕ್ ಪ್ರವೇಸ್ ದ್ವಾರ್. ಕಾಮ್ಗಿರಿ ಅಶಿ: ಎಕ್ ದಾಂಡೊ ವಯ್ಲ್ಯಾನ್ ಬೆರಲಾಂತ್ ರಿಗಂವ್ಚೊ ಆನಿ ದುಸ್ರೊ ಪ್ರವೇಸ್ ದ್ವಾರಾಂತ್ಲ್ಯಾನ್. ಹ್ಯಾ ದೋನ್‌ಯಿ ದಾಂಡ್ಯಾಂಚೆ ಬೊಂಚೆ, ಬೆರಲಾ ಬಿತರ್ ಯೆಕಾಮೆಕಾ ಮೆಳ್ಟಾಲೆ. ಆತಾಂ, ಬೆರಲಾಂತ್ ಖಾಲಿ ಉರ್‌ಲ್ಲ್ಯಾ ಜಾಗ್ಯಾರ್ ರುಕ್ಡಾಚೊ ಪಿಟೊ (saw dust) ಭರ‍್ನ್, ಎಕಾ ಪಾರಯೆಚ್ಯಾ ಮಾಂಡ್ಡ್ಯಾನ್ ಚೆಪುನ್ ಚೆಪುನ್ ಗಚ್ಚ್ ಕರ‍್ಚೊ ಆನಿ ರುಕ್ಡಾ ಪಿಟೊ ಗಚ್ಚ್ ಭರ‍್ಲಾ ಮ್ಹಣ್ ಖಚಿತ್ ಜಾತೆಚ್ ದೋನ್‌ಯಿ ದಾಂಡೆ ಹಾಳ್ವಾಯೆನ್ ವೊಡುನ್ ಕಾಡ್ಚೆ. ಹಿ ಸಿಗ್ಡಿ ಪೆಟಂವ್‌ಚೊ ವೇಳ್ ಯೆತಾನಾ ಥೊಡೆಂ ಗಾಸ್ಲೆಟ್ (ಚಿಮ್ಣೆ ತೇಲ್) ಹ್ಯಾ ದಾಂಡ್ಯಾಂನಿ ಸೊಡ್‌ಲ್ಲ್ಯಾ ರಂದ್ರಾಂನಿ ವೊತುನ್ ಕಾಡಿ ಮಾರ‍್ಚಿ. ಅಶಿ ಪೆಟ್‌ಲ್ಲಿ ಸಿಗ್ಡಿ ಸಗ್ಳೆಂ ರಾಂದಪ್ ಜಾಂವ್ಚೆ ಪರ್ಯಾಂತ್ ಝಳ್ತಾಲಿ ಆನಿ ಥೊಡೆ ಪಾವ್ಟಿ ಸಾಂಜೆಚ್ಯಾ ಕಾಫಿಯೆಕ್‌ಯಿ ಪಾವ್ತಾಲಿ. ಹೊ ಮ್ಹಜೊ ಉಡಾಸ್, ಭೋವ್ ಸಂತೊಸ್ ಭರಿತ್ ಉಡಾಸ್ ಕಿತ್ಯಾಕ್ ಸಿಗ್ಡಿ ಭರ‍್ಚೆಂ ಕಾಮ್ ಮ್ಹಜೆಂ ಆನಿ ಹೆಂ ಪಳೆತಾನಾ ಮ್ಹಜೊ ಆಜ್ ಮ್ಹಜಿಂ ನಕ್ಲಾಂ ಕರ‍್ತಾಲೊ ಆನಿ ಮ್ಹಣ್ತಾಲೊ – ಮಾತ್ಯಾಕ್ ದಾಂಡೊ, ಗಾಂಡಿಕ್‌ಯಿ ದಾಂಡೊ!
|ಬಾಣಾಚಿ ರಾಂದ್ಣಿ
ಆತಾಂ ಗೀಜರ್ ಪುಣ್ ತವಳ್ ಸಗ್ಳ್ಯಾ ಕುಟ್ಮಾಕ್ ಜಾಯ್ ಪಡ್ಚೆಂ ಊಬ್ ಉದಾಕ್ ತಾಪಂವ್ಕ್ ತಾಂಬ್ಯಾಚೆಂ ಎಕ್ ಬಾಣ್ ಆಸ್‌ಲ್ಲೆಂ ಆನಿ ತಾಂತುಂ ಕಾಂಯ್ ತೀನ್-ಚಾರ್ ಕೊಳ್ಶೆ (ಯಾ ಚಡ್) ಉದಕ್ ಸೊಂಬ್ತಾಲೆಂ ಆನಿ ಬಾಣಾಚ್ಯಾ ರಾಂದ್ಣಿಕ್ ಉಜೊ ಘಾಲುಂಕ್ ಜಾಯ್ತೊ ಜಳವ್ ಜಾಯ್ ಪಡ್ಟಾಲೊ ಆನಿ ಕಸಲೊಯಿ ಜಳವ್ ಚಲ್ತಾಲೊ. ಹೊ ವಿವರ್ ಹಾಂವ್ ದೀನಾ ಪುಣ್ ಮ್ಹಾಕಾ ಬಾಣಾಚಿ ರಾಂದ್ಣಿ ಕಿತ್ಯಾಕ್ ಯಾದಿಂತ್ ಆಸಾ ಮ್ಹಳ್ಯಾರ್-ಹಾಂವ್ ಲಿಸಾಂವ್ ಕರಿನಾಸ್ತಾಂ ಚೊರಿಯಾಂ ಕಥಾ ಪುಸ್ತಕಾಂ ವಾಚ್ತಾನಾ ಮ್ಹಜಿ ಚೊರಿ ಸಾಂಪಡ್ಲೆಲ್ಯಾ ವೆಳಾರ್ ಮ್ಹಜ್ಯಾ ಮಾಮ್ಮಿನ್ ಧಮ್ಕುಂಚೆಂ ಆಸ್‌ಲ್ಲೆಂ – ತುಜೆ ಲಾಯ್ಬ್ರೆರಿ ಬೂಕ್ ಬಾಣಾಚ್ಯಾ ರಾಂದ್ಣಿಕ್ ಘಾಲ್ತಾಂ ಪಳೆ! ಅರ್ಥಾತ್, ಎಕ್ ಪಾವ್ಟಿಂ ಬಾಣಾಚ್ಯಾ ರಾಂದ್ಣಿಂತ್ ಘಾಲ್ಲೆಂ ತೆಂ ಝಳ್ಟ್ಯಾ ಸಾರಿಯೆರ್ ಉಡಯಿಲ್ಲೆಪರಿಂ. No return! ಪುಣ್ ಮಾಮ್ಮಿನ್ ತಶೆಂ ಕೆಲ್ಲೆಂ ನಾ.
|ಸಾರ‍್ಣಿ ಖುಂಟೊ
ಕಾಲ್‌ಚ್ ಆಮ್ಚ್ಯಾ ಬಿಡಾರಾಂತ್ ಸಾಫ್-ಸುಫಾಯ್ ಕರುಂಕ್ ಯೆಂವ್ಚೆನ್ ಮ್ಹಜೆಲಾಗಿಂ ಮ್ಹಳೆಂ, ಬೊಸ್ಸ್, ಫಾಲ್ಯಾಂ ಎಕ್ ಲಾಂಬ್‌ಶಿ ಸಾರಣ್ ಹಾಡ್, ಆತಾಂ ಆಸ್ಚಿ ಸಾರಣ್ ಝರೊನ್ ಖುಂಟೊ ಜಾಲ್ಯಾ. ತುಮಿ ಸಮ್ಜತಾತ್ ಖುಂಟೊ ಮ್ಹಳ್ಯಾರ್ ಕಿತೆಂ ಮ್ಹಣ್? ಇರಾಂಚಿ ಸಾರಣ್ ವಾಪರ‍್ತಾಂ ವಾಪರ‍್ತಾಂ ಝರ‍್ತಾ ಆನಿ ಎಕ್ ಖುತಿ ಜಾತಾ ಆನಿ ಹ್ಯೆ ಖುತಿಯೆಕ್ ಆಮಿ ಖುಂಟೊ ಮ್ಹಣ್ತಾಂವ್. ಆತಾಂ ಆಮಿ ಚಡ್‌ಶೊ ವಾಪರ‍್ಚ್ಯೊ ಸಾರಣ್ಯೊ ತಣಾಚ್ಯೊ ಆನಿ ತ್ಯೊ ಧುಳ್ ಝಾಡ್ತಿತ್ ಪುಣ್ ಸಾಂಗಾತಾಚ್ ಕೋಯ್ರ್‌ಯಿ ಕರ‍್ತಾತ್. ತಾಂಕಾಂ ಖುಂಟೊ ಜಾಂವ್ಚೆ ಪರ್ಯಾಂತ್ ಕೋಣ್‌ಯಿ ಗ್ರಾಸ್ ಘಾಲಿನಾಂತ್. ಪುಣ್ ಹಾಂವೆಂ ಉಲ್ಲೇಕ್ ಕರ‍್ಚೊ ಖುಂಟೊ ಇರಾಂಚ್ಯಾ ಸಾರಣೆಚೊ. ತವಳ್ (ಆನಿ ಕಾಂಯ್ ಆತಾಂಯಿ ಕೊಣ್ಣಾ) ಹ್ಯಾ ಖುಂಟ್ಯಾಕ್ ಆಪ್ಲೆಂ ಮಹತ್ವ್ ಆಸ್‌ಲ್ಲೆಂ. ಸಾರಣ್ ಆಸ್‌ಲ್ಲಿ ಖುಂಟೊ ಜಾವ್ನ್ ಕರ‍್ಗಾತಾನಾ/ಝರ‍್ತಾನಾ ತಿಚೊ ಜಾಗೊ ಕಾಕ್ಸಾಚ್ಯಾ ಯಾ ನ್ಹಾಣಿಯೆಚ್ಯಾ ಮುಲ್ಯಾಕ್. ಪುಣ್ important ಸ್ಥಾನ್, ಹಾಂ! ನಿಸರ‍್ನಾಶೆಂ ನ್ಹಾಣಿ ಘಾಸುಂಕ್, ಕಾಕ್ಸಾಂತ್ಲೊ ಆಂಬೊಟ್ ವಾಸ್, ಫಿನೆಲ್, ಗಾಸ್ಲೆಟ್ (ಯಾ ಕಸ್ಲೆಂಯಿ…ತವಳ್ ಹಾರ್ಪಿಕ್ ಯಾ ಫಿನಾಯ್ಲ್ ನಾತ್‌ಲ್ಲೆಂ) ಕಾಡುಂಕ್ ಹೊ ಖುಂಟೊ ಆಸಾಜೆಚ್ಚ್.
ನ್ಹಾಣಿಯೆಂತ್ ಆನಿ ಕಾಕ್ಸಾಂತ್ ಖಾಯಾಮ್ ಆಸಾಜೆ ಆಸ್‌ಲ್ಲೊ ಖುಂಟೊ ಕಾಂಯ್ ಕೊಣೆ ಜಾಗೊ ಬದ್ಲಿ ಕರುನ್ ಖಂಯ್ ಪುಣಿ ದವರ‍್ಲೊ ಉಪ್ರಾಂತ್ ರಂಬಾರೂಟ್ ಸಾಂಗ್ಚಿಚ್ ನಾಕಾ. ತಿತ್ಲೆಂಚ್ ನ್ಹಯ್, ಹ್ಯಾ ಖುಂಟ್ಯಾಚ್ಯಾ ಗಾತ್ರಾನ್ ಕೊಣ್ ಕುಬ್ಜ್ಯಾಕ್ ಯಾ ಮಟ್ವೆ ಚಲಿಯೆಕ್ ತುಕ್ಲಾಂವ್ಚೆಂ ತರ್ – ಹಾಂ, ತೆಂಗೀ ಸಾರ‍್ಣೆ ಖುಂಟೊ ಆನಿ ತೊಗೀ ಟಿಂಗು ಸಾರ‍್ಣಿ ಖುಂಟೊ ಮ್ಹಳ್ಳೆ ವಿಷೇಶಣ್ ತ್ರಾಸಾವಿಣೆಂ ಯೆತಾಲೆಂ. ಇತ್ಲೆಚ್ ನ್ಹಯ್, ಹೆರಾಂಚಿ ದೀಷ್ಟ್ ಜಾಯ್ನಾಯೆ ಮ್ಹಣ್ ಫುಲಾಂ-ಫಳಾಂ ಪಡ್‌ಲ್ಲ್ಯಾ ಪೊಪಾಯೆಚ್ಯಾ, ಆಂಬ್ಯಾಂಚ್ಯಾ, ಪಣ್ಸಾಂಚ್ಯಾ ರುಕಾಂಕ್ ಆನಿ ಶೆಂಬರಾಂನಿ ನಾರ‍್ಲ್ ದಿಂವ್ಚ್ಯಾ ಮಾಡಾಕ್ ಪರ‍್ನೊ ಖುಂಟೊ (ಆನಿ ದಿಗೊ ಜಾವ್ನ್ ಥೊಡೆ ಪಾವ್ಟಿಂ ಪರ‍್ನಿ ವ್ಹಾಣ್) ಬಾಂದ್ಚೊ ಆಮ್ಚೊ ಎಕ್ ಭಾವಾರ‍್ಥ್. ಆನಿ ಹಾಂವೆಂ ಆಯ್ಕಾಲಾಂ, ಹ್ಯಾಚ್ ಭಾವಾರ‍್ಥಾಕ್ ಲಾಗುನ್ ಆಮಿ ಕೊಣಾಚೆಂ ‘ಮೆಲ್ಲೆಂ-ಸ್ಪಿರಿತ್-ಪಂಜುರ‍್ಲಿ’ ಸುಟಂವ್ಕ್ ವೆತಾನಾ ಖುಂಟೊ ಅವಶ್ ಜಾವ್ನ್ ಸಾಂಗಾತಾ ಆಸಾಜೆ ಖಂಯ್. ಜಶೆಂ nesferatu-vampire-Dracula-ಂಕ್ ಪಯ್ಸ್ ದವರುಂಕ್ ಜಿವಿ ಲೊಸುಣ್ ಜಾಯ್ ಖಂಯ್, ತಶೆಂ.
ಪುಣ್, ಆತಾಂ ಆಮ್ಕಾಂ ರಾಂದ್ಣಿಚೊ ಖುರ್, ಪೊರ‍್ಲ್ ಆನಿ ಸಿಗ್ಡಿ ವ್ಹರುಂಕ್ ಸಾದ್ಯ್ ನಾ, ಗ್ಯಾಸ್ ಸ್ಟವ್ ಯಾ induction stove ವ್ಹರುಂಕ್‌ಯಿ ಸಾದ್ಯ್ ನಾ ದೆಕುನ್ ಸಾರ‍್ಣಿ ಖುಂಟೊ ಪುಣಿ ಬಗ್ಲೆಕ್ ದವರ‍್ಯಾಂ. ಹೆಂ ಮ್ಹಜೆಂ ಟಿಂಕರ್ ಮ್ಹಣ್ ಘೆತಾತ್ ತರ್, ಬರ‍್ಯಾನ್ ಘೆಯಾ ಕಿತ್ಯಾಕ್ ತೀರ‍್ಲಾಚೆಂ ಕಾಂಯ್ ಲಿಖುಂಕ್ ಆಸ್‌ಲ್ಲೆಂ ತೆಂ ಹಾಂವೆಂ ಲಿಕುನ್ ಜಾಲಾಂ…ಆಮ್ಚ್ಯಾಚ್ ಸಂಸ್ಕೃತಿಚ್ಯಾ ಕುಸಾಂ ಥಂಯ್ ಕಿತ್ಯಾಕ್ ಲಜ್‌ಚೆಂ?
