ಹಾತಾಂತ್ಲೊ ಸೊರೊ

ಹಾತಾಂತ್ಲ್ಯಾ ಗಿಲಾಸಾಂತ್ಲೊ ಸೊರೊ – ಕುಡಿಂತ್ ಅಮಾಲ್ ಮಾತ್ ಚಡಯ್ನಾ, ಸಮಾಜಾಂತ್ ಗಿರೇಸ್ತಾಕ್ ‘ದರ್ಜೊ’ ದಿತಾ. ಆನಿ ಜೆನ್ನಾಂ ಹೊ ‘ದರ್ಜೊ’ ಮನ್ಯಾಪಣಾಚ್ಯೊ ಶೀಮ್ ಮೆರೊ ಉತ್ರೊನ್ ವಾಡೊಂಕ್ ಸುರು ಜಾತಾ, ದಳ್ಬಾರ್ – ದಣ್ಸಣೆಚಿ ಸುರ್ವಾತ್ ಜಾತಾ. ಕಾಳಾಚಿ ಮಹಿಮಾ ವಾ ಪ್ರಿತುಮೆಚೆಂ ನಿಯಮ್ – ಭರ್ಲಲೊ ಹರ್ ಗಿಲಾಸ್ ಖಾಲಿ ಜಾತಾ ಜಶೆಂ, ಎಕ್ಲ್ಯಾಚಾ ಹಾತಾಂತ್ಲೊ ಖಾಲಿ ಜಾತಾನಾ, ಅನ್ಯೆಕ್ಲ್ಯಾಚಾ ಹಾತಾಂತ್ಲೊ ಭರೊನ್ ಯೆತಾ.

ಸೊರ‍್ಯಾಚಾ ನಿಬಾನ್, ಗಿರೇಸ್ತ್‌ಕಾಯೆಚ್ಯಾ ಅಮಾಲಾಂತ್ – ಅಸ್ಕತ್ಯಾಂಚೆರ್ ಜುಲುಮ್ ಚಲಯ್ತೆಲ್ಯಾಂಚೆರ್ ಕೇಂದ್ರಿತ್ ಕವಿತಾ – ವಿಶ್ವ್ ಕವಿತಾ ದಿಸಾಕ್.

ಚೆರ್ಕೊ ಕಿರ್ಲಾನಾಂಗೀ ತುಜ್ಯಾ ಪೊಟಾಂತ್
ಚೆಡ್ವಾಂಚಿ ರಾಸ್ ಬಾಂದುನ್ ದವರ್ಲ್ಯಾಯ್ ಕಿತೆಂ?
ಘೊವಾಚ್ಯಾ ಹಾತಾಂತ್ಲೊ ಸೊರೊ ಉಲಯ್ಲೊ.

ಪೂತ್ ಮ್ಹಜೊ ಭಾರೀ ಬರೊ
ತುಂ ಖಂಚಾ ಕಾಸ್ತಾಕ್ ಜಲ್ಮಾಲೆಂಯ್ ಗೋ
ಬಾಪಾಯ್ಚ್ಯಾ ಹಾತಾಂತ್ಲೊ ಸೊರೊ ಉಲಯ್ಲೊ.

ಪೂತಾಕ್ ಮುಟಿಂತ್ ಧರ‍್ನ್
ಭಾರಿ ಉಸಳ್ತಾಯ್ ಗೋ,
ಮಾಂವಾಚ್ಯಾ ಹಾತಾಂತ್ಲೊ ಸೊರೊ ಉಲಯ್ಲೊ

ಆತಾಂ ಬಾಪುಯ್
ಗಳಯ್ತಾ ದುಕಾಂ

ತಾಚ್ಯಾ ಹಾತಾಂತ್ಲೊ
ಸೊರ‍್ಯಾಚೊ ಗಾಲಾಸ್
ಪಾವ್ಲಾ . . .
ಪುತಾಚ್ಯಾ ಹಾತಾಂತ್

► ಲವಿನಾ ನಜ್ರೆತ್, ಗಂಜಿಮಠ