ಭುಕೆಲ್ಲೊ ಕಲಾಕಾರ್

ಫ್ರಾಂಜ್ ಕಾಫ್ಕಾ ( ಜುಲಾಯ್ 1883 – ಜೂನ್ 1924) ಜರ್ಮನ್ ಭಾಶೆಂತ್ಲೊ ಏಕ್ ಫಾಮಾದ್ ಬರವ್ಪಿ ಆನಿ 20 ವ್ಯಾ ಶೆಕ್ಡ್ಯಾಂತ್ ಸಾಹಿತ್ಯ್ ಪ್ರಕಾರಾಂತ್ ನವೆಸಾಂವ್ ಹಾಡ್ಲಲೊ. ಹಾಣೆಂ ಬರಯಿಲ್ಲೆಂ ಹಾಚ್ಯಾ ಮರ್ಣಾ ಉಪ್ರಾಂತ್ ಚಡ್ ಪ್ರಗಟ್ ಜಾಲ್ಲೆಂ ಆನಿ ಪಾಶ್ಚ್ಯಾತ್ಯ್ ಸಾಹಿತ್ಯಾಂತ್ ಏಕ್ ವಿಶೇಶ್ ಸ್ಥಾನ್ ಆಪ್ಣಾಂವ್ಕ್ ಸಕ್ಲೆಂ. ಹಾಚಿ ನೀಳ್ಗತಾ “ರೂಪಾಂತರ್” (THE METAMORPHOSIS) ಆಜೂನ್ ಚರ್ಚಾಸ್ಪದ್ ಆನಿ ವಿಮರ್ಶಕಾಂಕ್ ವಿಶ್ಲೇಷಣ್ ಕರ್ಚ್ಯಾಕ್ ವಿಶೇಸ್ ಕೃತಿ ಜಾವ್ನಾಸಾ.

ಹಾಚ್ಯೊ ತೀನ್ ಕಾದಂಬರಿ, ಝಡ್ತಿ (The Trial), ರಾವ್ಳೆರ್ (The Castle) ಆನಿ ಅಮೆರಿಕ (Amerika ) ಸಾಹಿತ್ಯ್ ಸಂಸ್ರಾಕ್ ಮೆಳ್ಳೆಲಿಂ ಅಮೊಲಿಕ್ ರತ್ನಾಂ ಜಾವ್ನಾಸಾತ್. 17 ಮಟ್ವ್ಯೊಕಾಣ್ಯೊ ಬರಯ್ಲ್ಯಾತ್. ಭುಕೆಲ್ಲೊ ಕಲಾಕಾರ್ 1922 ವ್ಯಾ ಇಸ್ವೆಂತ್ಲಿ. ಕಶೆಂ  ಲೊಕಾ ಥಾವ್ನ್ ಮಾನ್ಯತಾ (Recognition)  ಮೆಳೊಂಕ್ ಕಲಾಕಾರ್ ಉಪ್ವಾಸ್ ಕರ್ತಾ, ಪೂಣ್ ತಾಚಿ ಆಶಾ ತಾಣೆಂ ಚಿಂತ್‌ಲ್ಲೆ ಬರಿ ಲೋಕ್ ತಾಕಾ ಆನಿ ತಾಚ್ಯಾ ಕಾಮಾಕ್ ಸಮ್ಜಂವ್ಚ್ಯಾ ಥಂಯ್ ಸಲ್ವಾತಾ ಜಾಲ್ಲ್ಯಾನ್  ತಿ ಫಳಾಧಿಕ್ ಜಾಯ್ನಾ ಮ್ಹಣ್ ಹ್ಯಾ ಕಾಣಿಯೆ ದ್ವಾರಿಂ ಕಾಫ್ಕಾ ಸಾಂಗ್ತಾ.

ಹಾಚೆಂ ಬರವ್ಪ್  ಚಡ್ ಜಾವ್ನ್ ಅಸ್ತಿತ್ವವಾದಿಚಿಂ ಲಕ್ಷಣಾಂ ಜಾವ್ನಾಸ್ಚಿಂ  ಅಸಂಗತ್ (absurdity), ವ್ಯಕ್ತಿಗತ್ ಸ್ವಾತಂತ್ರ್ಯ್ (individual freedom) ಆನಿ ಅಪ್ರಾಧಿ ಮನೋಭಾವ್ (guilt consciousness) ಇತ್ಯಾದಿ ಆಸ್ಚೆಂ ಪಳೆತಾಂವ್. ಲ್ಹಾನ್ಪಣಾರ್‌ಚ್ ತೊ ಆಪ್ಲ್ಯಾ ಶಿಸ್ತೆಚ್ಯಾ ಆನಿ ಪ್ರಭಾವ್ ಘಾಲ್ಚ್ಯಾ (Dominant)  ಸವಯೆಚ್ಯಾ ಬಾಪಾಯ್ಕ್ ಕಾಂಟಾಳ್ತಾಲೊ. ಹ್ಯಾ ದೆಖುನ್ ತೊ ಆಪ್ಲ್ಯಾ ಆವಯ್ಚೊ ಮೋಗ್ ಆಪ್ಣಾಂವ್ಕ್ ವದ್ದಾಡ್ತಾಲೊ ತರೀ ತೊ ತಾಕಾ ಮೆಳ್ಳೋ ನಾ. ಮೊಗಾಂತೀ ತೊ ಸಲ್ವಾಲ್ಲೊ. ಖರಾರ್ ಜಾಲ್ಲೆಂ ತರೀ ತುಟ್ಲೆಂ. ತೊ ಎಕ್ಸುರೊ ಜಾವ್ನಾಸ್‌ಲ್ಲೊ. ಹ್ಯಾ ಎಕ್ಸುರ್ಪಾಣಾ ಥಾವ್ನ್ ಸುಟ್ಕಾ ಘೆಂವ್ಕ್ ತೊ ಬರಯ್ತಾಲೊ. ಪೂಣ್ ತಾಂತುಂಯ್ ತೊ ಸಮಾಧಾನಿ ಜಾಲೊ ನಾ.

“ಬರಂವ್ಕ್ ರುಚೀಕ್ ಜಾತಾ ಆನಿ ತೆಂ ಏಕ್ ಇನಾಮ್. ಪೂಣ್ ಖಂಯ್ಚ್ಯಾ ಫಾಯ್ದ್ಯಾಕ್? ಆಯ್ಚ್ಯೆ ರಾತಿಂ ದೆಂವ್ಚಾರಾಕ್ ದಿಂವ್ಚೊ ಪಾಗ್ ಮ್ಹಣ್ ಮ್ಹಾಕಾ ಏಕಾ ಭುರ್ಗ್ಯಾ ಭಾಶೆನ್ ಸಮ್ಜಾಲೆಂ. ಕಾಳೊಕಾಕ್ ವೆಂಗುನ್, ಸ್ಪಿರಿತಾಕ್ ಸಾಲ್ವಸಾಂವ್ ದಿಂವ್ಚೆಂ ಸಕ್ಕಡ್ ಸಮಸ್ಯಾಂಕ್ ಆಲಿಂಗನಾಂತ್ ರೆವ್ಡಾಂವ್ಚೆಂ ಜಾವ್ನಾಸಾ. ಬರವ್ಪ್ಯಾಕ್ ದಿಸಾಕ್ ಬರಯ್ತಾನಾ ಹೆಂ ಕಳನಾ. ಬಹುಶಃ ಬರಂವ್ಕ್ ದುಸ್ರ್ಯೊ ವಾಟೊಚ್ ನಾಂತ್ ಕೊಣ್ಣಾ. ಪೂಣ್, ಮ್ಹಾಕಾ ಮ್ಹಜೊ ಆತಂಕ್ ನಿದೊಂಕ್ ಸೊಡಿನಾ ಆನಿ ರಾತುಇಕ್ ಬರಂವ್ಕ್ ಲಾಯ್ತಾ. ಹಾಂವ್ ಬರಂವ್ಚಿ ಹಿ ಏಕ್ ಮಾತ್ರ್ ವಾಟ್ ಜಾಣಾಂ” ಮ್ಹಣ್ತಾ ಕಾಫ್ಕಾ.

► ಉಬ್ಬ, ಮೂಡ್ ಬಿದ್ರಿ

ಪಾಟ್ಲ್ಯಾ ಥೊಡ್ಯಾ ವರ್ಸಾಂ ಥಾವ್ನ್ ಉಪ್ವಾಸ್ ಕರುಂಕ್ ಬಸ್ಚೊ ಧಂದೊ ಮೊಸ್ತು ಉಣೊ ಜಾಲಾ. ವ್ಯಕ್ತಿಗತ್ ಜಾವ್ನ್ ಮಾಂಡ್ಲೆಲ್ಯಾ ಹ್ಯಾ ಧಂದ್ಯಾಂತ್ ಬರೋ ಲಾಭ್ ಆಸ್‌ಲ್ಲೊ. ಪೂಣ್ ಹೆಂ ಕಷ್ಟಾಚೆಂ, ಅಸಾಧ್ಯ್ ಜಾಲಾಂ. ಆತಾಂ ಆಮಿ ದುಸ್ರ್ಯಾಚ್ ಸಂಸಾರಾಂತ್ ಜಿಯೆತಾಂವ್. ಏಕಾ ತೆಂಪಾರ್ ಸಗ್ಳೊ ಗಾಂವ್‌ಚ್ ಉಪ್ವಾಸ್ ಕರ್ಚ್ಯಾ ಕಲಾಕಾರಾಕ್ ಉತ್ಸಾಹಾನ್ ಸಾಂಗಾತ್ ದಿತಾಲೊ. ತಾಚ್ಯೆ ಉಪ್ವಾಸಾ ವರ್ವಿಂ ದಿಸಾಂದೀಸ್ ಲೋಕಾಚೊ ಉತ್ಸಾಹ್ ವಾಡ್ತಾಲೊ ಆನಿ ದಿಸಾಕ್ ಏಕ್ ಪಾವ್ಟಿಂ ಪುಣೀ ತಾಕಾ ಪಳೆಂವ್ಕ್ ಆಶೆತಾಲೊ. ಏಕ್ ಟಿಕೆಟ್ ಸಯ್ತ್ ಘೆವ್ನ್ ತಾಕಾ ಪಳೆಂವ್ಚೊ ಆವ್ಕಾಸ್ ಆಸ್‌ಲ್ಲೊ. ತ್ಯಾ ಜಾಗ್ಯಾಚೆರ್ ಸಕಾಳಿಂ ಥಾವ್ನ್ ರಾತಿಂ ಪರ್ಯಾಂತ್ ತೊ ಬಸ್ತಾಲೊ. ರಾತಿಂ ಸಯ್ತ್ ತಾಕಾ ಪಳೆಂವ್ಕ್ ಆವ್ಕಾಸ್ ಆಸ್‌ಲ್ಲೊ. ತೊ ಬಸ್ಲೆಲ್ಯಾ ವೆದಿಕೆಚೆರ್ ಪರ್ಜಳ್ಚೆ ದಿವೆ ಜಳ್ತಾಲೆ. ಭುರ್ಗ್ಯಾಂಕ್ ತಾಕಾ ಪಳೆಂವ್ಚೆಂಚ್ ಏಕ್ ವ್ಹಡ್ ಸಂತೊಸಾಚಿ ಗಜಾಲ್. ವ್ಹಡಾಂಕ್ ತೊ ಏಕ್ ಜೋಕಾರಾ ಬರಿ ದಿಸ್ಲ್ಯಾರ್, ಭುರ್ಗ್ಯಾಂಕ್ ಮಾತ್ರ್ ತೊ ಆಕರ್ಷಿತ್ ಜಾತಾಲೊ. ಏಕಾಮೆಕಾಚ್ಯೆ ಹಾತ್ ಧರ್ನ್ ಪಳೆಂವ್ಚಾ ತಾಂಕಾಂ, ಕಲಾಕಾರಾಚೆಂ ಕಾಳೆಂ ನ್ಹೆಸಾಣ್ ಆನಿ ತಾಚಿಂ ಹಾಡಾಂ ದಿಸ್ಚಿ ಕೂಡ್ ಪಳೆವ್ನ್ ಆಜ್ಯಾಪ್ ಜಾತಾಲೆಂ. ತೊ ಬಸ್ಕೆಚೆರ್ ನ್ಹಯ್, ಬದ್ಲಾಕ್ ಸಕ್ಲಾ ತಣಾಚೆರ್ ಬಸೊನ್, ಥೊಡೆ ಪಾವ್ಟಿಂ ತಾಂಚ್ಯೆ ದಿಶಿಂ ಪಳೆವ್ನ್, ತಕ್ಲಿ ಹಾಲವ್ನ್ ಹಾಸೊನ್ಂಚ್ ಸವಾಲಾಂಕ್ ಜಾಪ್ ದಿತಾಲೊ.  ಅರ್ಧೆ ಧಾಂಪ್ಲೆಲ್ಯಾ ದೊಳ್ಯಾಂನಿ ತೊ ಕೊಣಾಕ್‌ಚ್ ಯಾ ಕಿತ್ಯಾಕ್‌ಚ್, ಟಿಕ್ ಟಿಕ್ ಕರ್ಚ್ಯಾ ಘಡಿಯಾಳಾಕ್ ಸಯ್ತ್ ಪಳೆನಾಸ್ತಾನಾ, ತೆದ್ನಾಂ ತೆದ್ನಾಂ ಲೊಟ್ಯಾಂತ್ಲೆಂ ಉದಾಕ್ ಪಿಯೆವ್ನ್ ಆಪ್ಲಿಂ ಓಂಟಾಂ ಭಿಜಯ್ತಾಲೊ.

ತಾಕಾ ಪಳೆಂವ್ಕ್ ಸಾಂದರ್ಭಿಕ್ ಪ್ರೇಕ್ಷಕ್ ಮಾತ್ರ್ ನ್ಹಯ್, ಲೋಕಾನ್ ವಿಂಚ್ಲಲೊ ಲೋಕ್, ಚಡಾವತ್ ಕಸಾಯ್ಗಾರ್ ಉಪ್ವಾಸ್ ಕರ್ಚಾ ಕಲಾಕಾರಾಚೆರ್ ದೊಳೆ ದವರುನ್ ಆಸ್ತಾಲೆ. ತಾಂಚೆಂ ಕಾಮ್ ತೆಂ. ಏಕೇಕಾ ಸರ್ತೆರ್ ತೇಗ್ ಆಸ್ತಾಲೆ ಆನಿ ಕಲಾಕಾರಾಕ್ ರಾಕ್ತಾಲೆ. ಹೆಂ ಲೋಕಾ ಮಧೆಂ ಧಯ್ರ್ ಭರುಂಕ್ ಕೆಲ್ಲಿ ಏಕ್ ಔಪಚಾರೀಕ್ ವ್ಯವಸ್ಥಾ ಸೊಡ್ನ್ ದುಸ್ರೆಂ ಕಿತೆಂಚ್ ನ್ಹಯ್. ಖಂಚಾಯ್ ಸಂದರ್ಭಾರ್ ಕಿತೆಂಚ್ ಖಾಯ್ನಾಸ್ತಾನಾ ಉಪ್ವಾಸ್ ಕರ್ಚ್ಯಾ ವ್ಯಕ್ತಿನ್ ಪಾಳುಂಕ್ ಜಾಯ್ ತೆಂ ಗರ್ಜೆಚೆಂ ಜಾಲ್ಲ್ಯಾನ್ ಹಿ ವ್ಯವಸ್ಥಾ. ಆಸೆಂ ಕರ್ಚೆಂ ತಾಂಚ್ಯೆ ಧಂದ್ಯಾಚೆಂ ನಿಯಮ್ ತೆಂ. ಪೂಣ್ ತಾಚೆರ್ ಗಮನ್ ದವರುನ್ ಆಸ್ಚಾ ಹರ್ಯೆಕ್ಲ್ಯಾಕ್ ಹೆಂ ಆರ್ಥ್ ಜಾಯ್ನಾತ್‌ಲ್ಲೆಂ ಜಾಲ್ಲ್ಯಾನ್ ರಾತಿಂ ಥೊಡೆಂ ಪಾವ್ಟಿಂ ತಾಂಚ್ಯೆ ಗಮನ್ ಸಡಿಳ್ ಜಾತಾಲೆಂ ಆನಿ ಆಪ್ಲೆಂ ಕಾಮ್ ಸಾರ್ಕ್ಯೆ ರಿತಿನ್ ಕರಿನಾಸ್ತಾನಾ ಏಕಾ ಕಲಾಕಾರಾಕ್ ಆಪ್ಣಾಕ್ ಜಾಯ್ ಜಾಲ್ಲ್ಯಾ ಮನ್ಶ್ಯಾಂ ಥಾವ್ನ್ ಖಾಣ್ ಯಾ ಪೀವನ್ ಹಾಡಂವ್ನ್ ಆವ್ಕಾಸ್ ಮೆಳ್ತಾಲೊ. ಆಪ್ಣಾಚೆರ್ ದೊಳೆ ದವ್ರುನ್ ಆಸ್ಚಾ ಅಸಲ್ಯಾಂಕ್ ಪಳೆಲ್ಯಾರ್ ಕಲಾಕಾರ್ ದುಖೇಸ್ತ್ ಜಾತಾಲೊ ಆನಿ ತಾಕಾ ಹಿ ಏಕಾ ಹಿಂಸಾ ಬರಿಂ ಭಗ್ತಾಲೆಂ. ಆಪ್ಣೆಂ ಕರ್ಚೊ ಉಪ್ವಾಸ್ ನಿರ್ಫಳ್ ಜಾಂವ್ಚಾ ಬರಿಂ ಹಾಂಚೆಂ ವರ್ತನ್ ಮ್ಹಣ್ ತಾಕಾ ಭಗ್ತಾಲೆಂ. ಹ್ಯಾ ಖಾತಿರ್ ತೊ ಆಪ್ಲೊ ಉಪ್ವಾಸ್ ಖರೊ ಮ್ಹಣ್ ದಾಖಂವ್ಚಾ ಖಾತಿರ್ ಗಾಯ್ತಾಲೊ. ಪೂಣ್ ಹ್ಯಾ ವರ್ವಿಂ ಕಿತೆಂಚ್ ಪ್ರಯೋಜನ್ ಜಾಲೆಂ ನಾ. ಗಾಯ್ತಾನಾ ಸಯ್ತ್ ತೊ ಬುಧ್ವಂತ್ಕಾಯೆನ್ ಖಾಂವ್ಚೊ ಮನಿಸ್ ಹೊ ಮ್ಹಣ್ ತೆ ಚಿಂತುನ್ ಆಜಾಪ್ತಾಲೆ. ಗಾಯ್ತಾನಾ ಸಯ್ತ್ ತೊ ಬಸ್ಲೆಲ್ಯಾ ಥೊಡ್ಯಾಚ್ ಪಯ್ಸ್ ಬಾರಾಂತ್ ಬಸೊನ್ ತಾಚೆರ್ ದೊಳೆ ದವ್ರುನ್ ಆಸ್ಚ್ಯಾಂಕ್ ತೊ ಆಸ್ಲೆಲ್ಯಾ ಹೊಲಾಂತ್ ಉಜ್ವಾಡ್ ಉಣೊ ಮ್ಹಣ್ ಭಗ್ಲೆಲ್ಯಾನ್ ಆಪ್ಣಾಕ್ ದಿಲ್ಲೆಲ್ಯಾ ಎಲೆಕ್ಟ್ರಿಕ್ ಟಾರ್ಚಾಚೊ ಉಜ್ವಾಡ್ ತಾಚೆರ್ ಫಾಂಕವ್ನ್ ಪಳೆತಾಲೆ.

ಕಿತೇಂಯ್ ಜಾಂವ್, ಅಸಲೆ ದುಭಾವ್ ಉಪ್ವಾಸ್ ಕರ್ಚ್ಯಾ ದಂದ್ಯಾಕ್ ಸಾಂಗಾತ್ ದಿಂವ್ಚಾಕ್ ಗರ್ಜೆಚೊ. ಭುಕೆನ್ ವಳ್ವಳ್ಚಾ ಕಲಾಕಾರಕ್ ದೀಸ್ ರಾತ್ ಪಳೇತ್ತ್ ರಾಂವ್ಚ್ಯಾಕ್ ಕೊಣಾಯ್ಕೀ ಸಾಧ್ಯ್ ನಾ. ದೆಖುನ್ ತಾಣೆ ಕರ್ಚೊ ಉಪ್ವಾಸ್ ನಿಜಾಯ್ಕೀ ಕಶ್ಟಾಂಚೊ ಆನಿ ಅವಿರತ್ ಮ್ಹಣ್ ಸಾಂಗ್ಚಾಕ್ ಸಾಕ್ಸ್ ದೀಂವ್ಕ್ ಕೊಣೀ ತಯಾರ್ ನಾಂತ್. ಕಲಾಕಾರಕ್ ಮಾತ್ರ್ ಹೆಂ ಕಳಿತ್. ಆನಿ ಹ್ಯಾ ಖಾತಿರ್ ತೊಚ್ಚ್ ಆಪ್ಲ್ಯಾ ಉಪ್ವಾಸಾ ವಿಶಿಂ ಧಾದೊಶಿ ಪ್ರೇಕ್ಷಕ್ ಜಾವ್ನಾಸಾ. ಜಾಲ್ಯಾರೀ ಹೆರ್ ಥೊಡ್ಯಾ ಕಾರಾಣಾಂಕ್ ಲಾಗುನ್ ತೊ ಸಂಪೂರ್ಣ್ ಧಾದೊಶಿ ಜಾಯ್ನಾ ಮ್ಹಣ್ಯೆತ್. ಆಪ್ಲ್ಯಾ ಉಪ್ವಾಸಾ ವರ್ವಿಂ ತೊ ಭಾಗುನ್ ಲಾಚಾರ್ ಜಾಲ್ಲ್ಯಾನ್ ಸಭಾರ್ ತಾಚ್ಯೆ ಥಾವ್ನ್ ಪಯ್ಸ್ ರಾವ್ತಾಲೆ. ತಾಕಾ ಪಳೆಂವ್ಚೆಂಚ್ ತಾಂಕಾಂ ಬರೆಂ ದಿಸಾನಾತ್ಲೆಂ. ಬಹುಶ್ಯಾ ಹ್ಯಾಚ್ಚ್ ಬೆಜಾರಾಯೆನ್ ತೊ ಲಾಚಾರ್ ಜಾಲ್ಲೊ ಜಾಂವ್ಕೀ ಪುರೊ. ಉಪ್ವಾಸ್ ಕರ್ಚೆಂ ಕಿತ್ಲೆಂ ಸುಲಭಾಯೆಚೆಂ ಮ್ಹಣ್ ಕೊಣಾಕ್‌ಚ್ ಗೊತ್ತು ನಾತ್ಲೆಲಿ ಎಕ್ ಗಜಾಲ್ ತಾಕಾ ಮಾತ್ರ್ ಗೊತ್ತಾಸ್‌ಲ್ಲಿ. ಸಂಸ್ರಾಂತ್‌ಚ್ ಹೊ ಸುಲಭಾಯೆಚೊ ವಿಶಯ್ ಜಾವ್ನಾಸ್ಲೊ. ಹೊ ಘುಟ್ ತಾಣೆಂ ತಾಂಕಾಂ ಸಾಂಗ್ಲೊ ತರೀ ಕೊಣ್ಂಚ್ ತಾಕಾ ಪಾತ್ಯೆಲೊ ನಾ. ತಶೆಂ ಕರ್ಚೆಂ ಏಕ್ ಸಾಮಾನ್ಯ್ ವಿಷಯ್ ಮ್ಹಣ್ ತಾಂಕಾಂ ಭಗ್ಲೆಂ. ತರೀ ತಾಂಚ್ಯೆ ಪೈಕಿ ಸಭಾರ್  ಜಣಾಂನಿ ಉಪ್ವಾಸ್ ಕರ್ನ್ ತೊ ಪ್ರಚಾರ್ ಘೆತಾ ಯಾ ಫಸಂವ್ಕ್ ಉಪ್ವಾಸ್ ಏಕ್ ಸುಲಭಾಯೆಚಿ ಮ್ಹಣ್ ತಾಣೆಂ ಹಿ ವಾಟ್ ಸೊಧ್ಲ್ಯಾ ಆನಿ ಚಡುಣೆಂ ಸತಾಕ್ ಒಪ್ವೊನ್ ಘೆಂವ್ಚೊ ಅವಿವೇಕಿ ಮನಿಸ್ ಮ್ಹಳೆಂ. ತಾಣೆಂ ಸಕ್ಕಡ್ ಸೊಸುಂಕ್ ಜಾಯ್ ಆನಿ ಕ್ರಮೇಣ್ ಹೆಂ ತಾಚ್ಯಾನ್ ತೆಂ ಸಾಧ್ಯ್ ಜಾಲೆಂ. ತರೀ ತಾಚ್ಯೆಂ ಭಿತರ್ಲೆಂ ಅಸಮಧಾನ್ ತಾಕಾ ಕೆದ್ನಾಂಯ್ ಕಾಂತಾಯ್ತೆಲೆಂ. ಪೂಣ್, ತಾಣೆಂ ಸಂಪವ್ಚೊ ಉಪ್ವಾಸಾಚೊ ಕಾಳ್ ತಾಚ್ಯೆ ಅಭಿನಂದನ್ ಪಾಟಂವ್ಚಾ ತಸಲೊ. ಹ್ಯಾ ಖಾತಿರ್ ತಾಕಾ ಫಾವೊ. ಹೆಂ ಜರ್ ತಾಣೆಂ ಸ್ವ ಖುಶೆನ್ ಆಪ್ಲೊ ಉಪ್ವಾಸ್ ಕರ್ಚೊ ಪಿಂಜ್ರೊ ಸೊಡ್ನ್ ಗೆಲ್ಯಾರ್ ಮಾತ್ರ್. ಉಪ್ವಾಸ್ ಕರ್ಚಿ ಆವ್ದಿ ಚಾಳೀಸ್ ದೀಸ್ ಮ್ಹಣ್ ಆಯೋಜಿತ್ ಕೆಲ್ಲ್ಯಾಂನಿ ನಿಗಧಿತ್ ಕೆಲ್ಯಾ. ಹ್ಯಾ ಅವ್ದೆಚಾಕೀ ಚಡ್ ವಚುಂಕ್ ತಾಕಾ ವ್ಹಡ್ ಶಹರಾಂನಿ ಸಯ್ತ್ ಅವ್ಕಾಸ್ ನಾತ್‌ಲ್ಲೊ. ಹಾಕಾ ಸಾರ್ಕೆಂ ಕಾರಣ್ ಸಯ್ತ್ ಆಸಾ. ಜಾಹಿರಾತಾಂಚ್ಯೆ ಪ್ರಚಾರಾ ವರ್ವಿಂ ಸುಮಾರ್ ಚಾಳಿಸ್ ದಿಸಾ ಮ್ಹಣಾಸರ್ ಲೊಕಾಂಚಿ ಆಸಕ್ತ್ ಜಿವಿ ದವರ್ಯೆತ್ ಮ್ಹಣ್ ಅನುಭವಾನ್ ತಾಂಕಾಂ ಕಳಿತ್ ಜಾಲ್ಲೆಂ. ತ್ಯಾ ಉಪ್ರಾಂತ್ ಲೊಕಾಚಿ ಉರ್ಭಾ ಉಣಿ ಜಾತಾಲಿ ಆನಿ ಭಿರ್ಮತಿಚೊ ಪಾಟಿಂಬೊ ಕ್ರಮೇಣ್ ಮಾಜ್ವೊನ್ ವೆತಾಲೊ. ಮಾತ್ರ್ ನ್ಹಯ್, ಏಕಾ ಶಹರಾ ಥಾವ್ನ್ ಅನ್ಯೆಕ್ಲ್ಯಾಕ್ ಸ್ಥಳಿಯ್ ವಾತಾವರಣ್ ಸಯ್ತ್ ಕಾರಣ್ ಜಾತಾಲೆಂ. ದೆಖುನ್ ಸಾಮಾನ್ಯ್ ಜಾವ್ನ್ ಚಾಳೀಸ್ ದಿಸಾಂಚಿ ಅವ್ದಿಚ್ ನಿಗಧಿತ್ ಜಾತಾಲಿ.

ಚಾಳಿಸ್ ದಿಸಾಂ ಉಪ್ರಾಂತ್ ಘರಾಂನಿ ಸಜಯಿಲ್ಲೊ ಪಿಂಜ್ರೊ ಉಗ್ತೊ ಜಾತಾಲೊ. ಉತ್ಸಾಹಿ ಪ್ರೇಕ್ಶಕ್ ಹೊಲಾಂತ್ ರಾಸ್ ಪಡ್ತಾಲೊ. ಮಿಲಿಟ್ರಿ ಬ್ಯಾಂಡ್ ವಾಜ್ತಾಲೆಂ. ದೋಗ್ ವ್ಹಯ್ಜ್ ಪಿಂಜ್ರಾ ಭಿತರ್ ವಚುನ್ ಉಪ್ವಾಸಾಚೆಂ ಫಲಿತಾಂಶ್ ಜೊಕುನ್ ಪಳೆತಾಲೊ. ತಾಣಿ ಆರಾಯಿಲ್ಲೆಂ ಫಲಿತಾಂಶ್ ಮೆಗಾ ಫೊನಾಚೆರ್ ಪ್ರಸಾರ್ ಜಾತಾಲೊ. ಉಪ್ರಾಂತ್ ದೊಗಾಂ ತರ್ನಾಟಿಂ ಚೆಡ್ವಾಂ ಹಾಜಾರ್ ಜಾತಾಲಿಂ. ಗೌರವಾಚ್ಯೆ ಹ್ಯಾ ಕಾಮಾಕ್ ತಾಂಕಾಂ ಸಂತೊಸ್ ಜಾತಾಲೊ. ತಿಂ ಪಿಂಜ್ರ್ಯಾ ಥಾವ್ನ್ ಕಲಾಕಾರಕ್ ಹಾತಿಂ ಧರ್ನ್ ಭಾಯ್ರ್ ಹಾಡ್ತಾಲಿಂ. ಏಕಾ ಮೆಜಾಲಾಗಿಂ ಬಸವ್ನ್ ಉಪ್ವಾಸ್ ಮೊಡ್ಚ್ಯಾಕ್ ಕುಮಕ್ ಕರ್ತಾಲಿಂ. ಹ್ಯಾ ವಗ್ತಾ ಆಮ್ಚೊ ಕಲಾಕಾರ್ ಹಟ್ಟಿ ಜಾತಾಲೊ. ಆಪ್ಲೆ ಲಾಚಾರ್ ಜಾಲ್ಲೆ ಬಾವ್ಳೆ ತೊ ಬಾಗ್ವೊನ್ ಆಸ್ಲೆಲ್ಯಾ ಚೆಡ್ವಾಂಚ್ಯಾ ಹಾತಿಂ ದಿತಾಲೊ. ಹೆಂ ಸತ್. ಪೂಣ್ ತೊ ಉಟೊನ್ ಉಭೊ ರಾವಾನಾತ್ಲೊ. ಚಾಳಿಸ್ ದಿಸಾ ಉಪ್ರಾಂತ್ ತ್ಯಾ ಘಡ್ಯೆ ಕಿತ್ಯಾಕ್ ಉಪ್ವಾಸ್ ಮೊಡಿಜಾಯ್? ತಿತ್ಲೊ ಲಾಂಬ್ ತೇಂಪ್ ಕೆಲ್ಲೊ ಉಪ್ವಾಸ್ ಆತಾಂ ತಶೆಂ ಕರ್ಚಾಕ್ ತೊ ಬರೊಚ್ ಹೆಳ್‌ಲ್ಲ್ಯಾ ಸ್ಥಿತೆರ್ ಆಸ್ತಾನಾ, ಕಿತ್ಯಾಕ್ ರಾವಯ್ಜಾಯ್? ಅನಿಕೀ ಉಪ್ವಾಸ್ ಮುಂದರ್ಸುನ್ ಚಾಳಿಸ್ ದಿಸಾಂಚೊಂ ಆಪ್ಲೊಚ್ ದಾಖ್ಲೊ ಮೋಡ್ನ್ ಕಿತ್ಯಾಕ್ ನಾಂವ್ ಜೊಡಿನಾಯೆ? ತಾಚ್ಯೆ ಪ್ರೇಕ್ಶಕ್ ತಾಕಾ ಮೆಚ್ವಾತಾಂವ್ ಮ್ಹಳ್ಳೆ ಬರಿ ನಟನ್ ಕರಿಲಾಗ್ಲೆ. ತೊ ಅನಿಕೀ ಚಡ್ ದೀಸ್ ಉಪ್ವಾಸ್ ಕರುಂಕ್ ತಯಾರ್ ಆಸ್ತಾನಾ ,ಲೋಕ್ ಕಿತ್ಯಾಕ್ ತಾಕಾ ಪಾಟಿಂಬೊ ದೀನಾಸ್ತಾನಾ ಇತ್ಲ್ಯಾರ್‌ಚ್ ತೃಪ್ತಿ ಜಾತಾತ್? ತೊ ಥಕ್‌ಲ್ಲೊ ವ್ಹಯ್, ಆನಿ ಹೆಂ ಚಿಂತುನ್ಂಚ್ ತಾಕಾ ವೊಂಕಾರೊ ಆಯ್ಲೊ. ಚೆಡ್ವಾಂ ಸಾಂಗಾತಾ ಆಸ್ಲೆಲ್ಯಾನ್ ತೊ ಆಪ್ಣಾಕ್‌ಚ್ ವಿಕ್ರೀತ್ ಕರುಂಕ್ ಸಕಾನಾ. ಮೊಸ್ತು ಖುಶಾಲಿ ತಸೆಂ ಮೊಗಾಳ್ ಆಸ್ಚ್ಯಾ ಚೆಡ್ವಾಂಚ್ಯೆ ದೊಳ್ಯಾಂಕ್ ಪಳೆಂವ್ಕ್ ಲಾಗ್ಲೊ ತರೀ, ವಾಸ್ತವಾನ್ ಹೆಂ ಮೊಸ್ತು ಕ್ರೂರ್ ಜಾವ್ನಾಸ್‌ಲ್ಲೆಂ. ಜಡಾಯೆಚಿ ಜಾಲ್ಯಾರೀ ತಾಣೆಂ ತಕ್ಲಿ ಹಾಲಯ್ಲಿ.

ಅನಿ ತಿತ್ಲ್ಯಾರ್ ಸದಾಂಚ್ ಜಾಂವ್ಚೆ ಬರಿ ಪರ್ತುನ್ ಜಾಲೆಂ. ಉಪ್ವಾಸ್ ಆಯೋಜಿತ್  ಕೆಲ್ಲೆ ಮುಖಾರ್ ಆಯ್ಲೆ. ಬ್ಯಾಂಡಾಚ್ಯೆ ಆವಾಜಾ ಮಧೆಂ ತಾಣಿಂ ಉಲಯಿಲ್ಲೆಂ ಕಿತೆಂಚ್ ಆಯ್ಕಾಲೆಂ ನಾ. ತಾಣಿಂ ಆಪ್ಲೆ ಹಾತ್ ಕಲಾಕಾರಾ ವಯ್ರ್ ಉಭಾರ್ಲೆ. ಸರ್ಗಾಕ್ ಪಳೆವ್ನ್, ಆಮ್ಚ್ಯಾ ಕಿರ್ಕೊಳ್, ವಳ್ವಳ್ಚ್ಯಾ ಕಲಾಕಾರಾಕ್ ಪಳೆ ಮ್ಹಣ್ಚ್ಯಾ ಭಾಶೆನ್ ತಾಂಚೆಂ ವರ್ತನ್ ದಿಸ್ಲೆಂ. ತರೀ ತಾಣಿಂ ಮೊಸ್ತು ಲಾಚಾರ್ ಜಾಲ್ಲ್ಯಾ ಕಲಾಕಾರಾಚ್ಯೆ ಪೆಂಕ್ಟಾಕ್ ಧರ್ಲೆಂ. ಹ್ಯಾ ವರ್ವಿಂ ತಾಚಿ ದುರ್ಬಳಿ ಅವಸ್ತಾ ಪಳೆಂವ್ಕ್ ಸಾಧ್ಯ್ ಜಾತಾ. ತಾಣೆಂ ಆಪ್ಣಾಕ್‌ಚ್  ತ್ಯಾ ಚೆಡ್ವಾಂಕ್ ಶುಶ್ರುಶಾ ಕರ್ಚ್ಯಾಕ್ ಆರ್ಪಿಲೆಂ. ತಾಚಿ ಕೂಡ್ ಆನಿ ಪಾಯ್ ಹಾಲವ್ನ್ ಧಲವ್ನ್ ಮ್ಹಳ್ಲೆಬರಿ ತಾಂಕಾಂ ದಿಲಿ. ತೊ ಆತಾಂ ತಾಂಕಾಂ ಶರಣಾಗತ್ ಜಾಲೊ. ತಾಚಿ ತಕ್ಲಿ ಹರ್ದ್ಯಾರ್ ಬಾಗ್ವಾಲಿ. ಕೂಡ್ ಬಾವ್ಲಿ. ಧರ್ನಿಚೆರ್ ಆಸ್ಲ್ಯಾರೀ ತಿ ಧರ್ನ್ ಗಟ್ಟ್ ನಾ ಮ್ಹಳ್ಳೆ ಬರಿ ತಾಚ್ಯೆ ಪಾಯ್ ಏಕಾಮೆಕಾ ರೆವ್ಡಾಲ್ಲೆ. ತಾಚಿ ಕೂಡ್ ಪಾಕಾಂ ತಿತ್ಲಿ ಹಳೂ ಜಾವ್ನ್ ಏಕಾ ಚೆಡ್ವಾಚೆರ್ ಮಾಲ್ವಾಲಿ. ಚೆಡ್ವಾಂ ಕುಮ್ಕೆಕ್ ಕೊಣೀ ಯೆತಾತ್ಗೀ ಮ್ಹಣ್ ಭಂವ್ತಿಂ ಪಳೆತಾಲಿಂ. ಆನಿ ಪುರಾಸಾಣೆನ್ ಖರ್ಸೆತಾಲಿಂ. ಹೆಂ ಮರ್ಯಾದಿಚೆಂ ಕಾಮ್ ತಾಣಿಂ ಚಿಂತ್ಲೆಲೆ ಬರಿ ನಾತ್‌ಲ್ಲೆಂಚ್. ಕಲಾಕಾರಾಚಿ ತಕ್ಲಿ ತಾಂಚ್ಯೆ ಗಳ್ಯಾಕ್ ರೆವ್ಡಾಲಿ. ತಾಣಿಂ ದೊಗಾಂಯ್ನೀ ಆಪ್ಲ್ಯಾ ಹಾತಾಂನಿ ಕಲಾಕಾರಾಚಿ ನಕ್ಲಿ ಹಾಡಾಂ ಧರ್‌ಲ್ಲಿಂ. ಹೆಂ ಪಳೆವ್ನ್ ಜಮೊ ಜಾಲ್ಲೊ ಲೋಕ್ ಸಂತೊಸ್ಲೊ. ತಾಂಚ್ಯೆ ಕುಮ್ಕೆ ಖಾತಿರ್ ಎದೊಳ್‌ಚ್ ತಯಾರ್ ದವರ್ಲೆಲೊ ಏಕ್ಲೊ ಮುಖಾರ್ ಆಯ್ಲೊ.

ಉಪ್ರಾಂತ್ ಖಾಣ್ ಆಯ್ಲೆಂ. ಕಲಾಕಾರ್ ಅರ್ದಿ ಮತ್ ಚುಕ್ಲೆಲ್ಯಾ ಬರಿ ಆಸ್ತಾನಾ, ಇಲ್ಲೆಂ ಖಾಣ್ ತಾಚ್ಯೆ ತೊಂಡಾ ಭಿತರ್ ರಿಗಯ್ಲೆಂ. ಜಮ್ಲೆಲ್ಯಾ ಲೋಕಾಚೆಂ ಗಮನ್ ಚುಕಾಂವ್ಚಾ ಖಾತಿರ್ ಬ್ಯಾಂಡ್ ವಾಜ್ಲೆಂ. ಉಪ್ರಾಂತ್ ಜಮ್ಲೆಲ್ಯಾ ಲೋಕಾಕ್ ಟೋಸ್ಟ್ ಮ್ಹಣ್ ಪಿಯೆಂವ್ಕ್ ದಿಲೆಂ. ಕಲಾಕಾರ್ ಕಿತೆಂಗೀ ಪುಸ್ಪುಸ್ಲೊ. ಬ್ಯಾಂಡ್ ಆವಾಜ್ಲೆಂ. ಲೋಕ್ ಪಾತಳ್ ಜಾಲೊ. ಕಲಾಕಾರಾಕ್ ಸೊಡ್ನ್ ಹೆರಾಂಕ್ ಜಾಲ್ಲ್ಯಾ ಘಡಿತಾಂ ವಿಶಿಂ ಕಸಲಿಚ್ ಬೆಜಾರಾಯ್ ನಾತ್‌ಲ್ಲಿ. ಹರ್ಯೆಕ್ ಪಾವ್ಟಿಂ ತಾಕಾ ಮಾತ್ರ್ ಬೆಜಾರಾಯ್.

ತೊ ಮೊಸ್ತು ವರ್ಸಾಂ ವಾಂಚ್ಲೊ. ಥೊಡ್ಯಾ ರಾಟಾವಳಿಂ ಮಧೆಂ ಸಮಾಜಿಂತ್ ಮಾನಾಚೊ ಮ್ಹಳ್ಳೆ ಬರಿ ಜಿಯೆಲೊ. ಕೊಣೆಂಚ್ ತಾಚ್ಯಾ ಕಷ್ಟಾಂಕ್ ಗಂಭೀರ್ ಥರಾನ್ ಘೆನಾತ್ಲೆಲ್ಯಾನ್ ತೊ ಬೆಜಾರಾಯೆನ್ ಬುಡ್ತಾಲೊ. ತಾಕಾ ಕಸಲೆಂ ಸಾಂತ್ವನ್ ಜಾಯ್? ತೊ ಆನಿ ಕಿತೆಂ ಆಶೆತಾ? ಆನಿ ಕೋಣ್ ಎಕ್ಲೊ ಬರ‍್ಯಾ ಸ್ವಾಭಾವಾಚೊ ಮನಿಸ್ ತಾಚ್ಯೆ ವಳ್ವಳೆ ಪಳೆವ್ನ್ ಚುರ್ಚುಲ್ಯಾರ್, ತಾಚಿ ಗತ್ ಉಪ್ವಾಸ್ ಕೆಲ್ಲ್ಯಾ ವರ್ವಿಂ ಜಾಲ್ಯಾ ಮ್ಹಣ್ ಸಾಂಗುನ್ ಸಮಾಧಾನ್ ಕೆಲ್ಯಾರ್, ಹೆಂ ಸಾಧ್ಯ್. ತೇಂಯ್ ಥೊಡೊ ತೇಂಪ್ ಉಪ್ವಾಸ್ ಕೆಲ್ಲ್ಯಾ ಉಪ್ರಾಂತ್. ಕಲಾಕಾರ್ ಎಕಾಚ್ಚಾಣೆ ಉದ್ರೇಕಿತ್ ಜಾವ್ನ್, ರಾಗಾನ್ ಆನಿ ಪಿಂಜ್ರ್ಯಾಕ್ ಧರ್ನ್ ಮೊನ್ಜಾತೆಬರಿಂ ಗಟ್ಟ್ ಹಾಲಯ್ಲಾಗ್ಲೊ. ಪೂಣ್, ತಾಕಾ ನಿಯಂತ್ರಣ್ ಕರುಂಕ್ ವಾಟ್ ಆಸ್‌ಲ್ಲಿ. ಆನಿ ತಸೆಂ ಕರುಂಕ್ ಲೋಕ್ ಸಂತೊಸ್ಲೊ. ಕಲಾಕಾರಾಚ್ಯೆ ಬಾಬ್ತಿನ್ ಮಾಫಿ ಸಯ್ತ್ ಮಾಗ್ತಾತ್. ಕಿತ್ಯಾಕ್ ಮ್ಹಳ್ಯಾರ್, ಉಪ್ವಾಸ್ ಕರ್ನ್ ಜಾಲ್ಲ್ಯಾ ಕರ್ಕರೆ ವರ್ವಿಂ, ಬರೆಂಚ್ ಜೆಂವ್ಚಾ ಲೋಕಾಕ್ ಹಿ ಕಳಾನಾತ್ಲೆಲಿ ಸ್ಠಿತಿ. ಉಪ್ರಾಂತ್ ಕಲಾಕಾರಾಚೆಂ ಹೊಗ್ಳಾಪ್ ಕರ್ನ್, ತಾಕಾ ಕರ್ಚಾಕೀ ಚಡ್ ಉಪ್ವಾಸ್ ಕರವ್ಯೆತ್ ಆನಿ ಆಸೆಂ ಕೆಲ್ಲ್ಯಾನ್ ತಾಚ್ಯೆ ಥಂಯ್ ಆಸ್ಚಿ ಉರ್ಭಾ, ಬರೆಂ ಮನ್ ಮ್ಹಣ್ ತಾಚೊ ತಾರೀಫ್ ಕರ್ಯೆತ್. ಕಾಡ್ಲೆಲ್ಯೊ ತಾಚ್ಯೊ ತಸ್ವಿರ‍್ಯೊ, ಲೋಕಾಕ್ ಮೊಲಾಂವ್ಕ್ ಘೆಂವ್ಚೊ ಆವ್ಕಾಸ್ ಸಯ್ತ್ ಆಸಾ.

ಚಾಳಿಸಾವೆ ದಿಸಾ ಕಲಾಕಾರ್ ಪುರಸಾಣೆನ್ ಮೆಲ್ಲ್ಯಾ ಬರಿ ಪಡುನ್ ಆಸ್ಚೆಂ ದಾಖಯ್ಲೆಂ. ಹ್ಯಾ ಸತಾಚಿ ವಳಕ್ ಆಸ್ಲ್ಯಾರೀ, ತಾಕಾ ಮೊಸ್ತು ಬೆಜಾರ್ ಜಾಲೆಂ. ಅನಿಕೀ ಚಡ್ ಉಪ್ವಾಸ್ ಕರುಂಕ್ ಜಾಯ್ ಮ್ಹಣ್ ಆಶೆಂವ್ಚಾ ತಾಕಾ, ತಾಚೊ ಉಪ್ವಾಸ್ ಲೊಕಾನಿ ಕಸೊ ಅಖೇರ್ ಕೆಲೊ?! ಹೆಂ ಸತ್ ಸಮ್ಜಾನಾತ್ಲೆಲ್ಯಾ ಸಗ್ಳ್ಯಾ ಸಂಸ್ರಾ ವಿರೋಧ್ ಝುಜೊಂಕ್ ಅಸಾಧ್ಯ್ ಜಾವ್ನಾಸ್ಲೆಂ. ತಸ್ವಿರೊ ಪಳೆತಚ್ ತಾಕಾ ಪರ್ತುನ್ ತಣಾಚೆರ್ ವಚುನ್, ಫಿಂರ್ಗೊನ್ ನಿದೊಂಕ್ ಜಾತಾ ಆನಿ ಲೋಕಾಕ್ ಪರ್ತುನ್ ತಾಕಾ ಲಾಗಿಂ ವಚುನ್ ಪಳೆಂವ್ಕ್ ಜಾತಾ ಮ್ಹಣ್ ಭೊಗ್ಲೆಂ.

ಥೊಡ್ಯಾ ವರ್ಸಾಂ ಉಪ್ರಾಂತ್ ಹ್ಯಾ ಘಡಿತಾಂಚೊ ಉಗ್ಡಾಸ್ ತಾಂಕಾ ಯೆತಾನಾ ತಾಂಕಾಂಚ್ ಸಮ್ಜೊಂಕ್ ಲೋಕಾಕ್ ಜಾಯ್ನಾ. ದೆಖುನ್ ಸಾರ್ವಜನಿಕ್ ಅನ್ಕೂಲಾ ಖಾತಿರ್ ಉಪ್ವಾಸಾಚೊ ದಂಧೊ ಸುರು ಕೆಲೊ. ಬಹುಶ್ಯಾ ರಾತೊಂ ರಾತ್. ಹಾಕಾ ಗರ್ಜೆಚಿಂ ಕಾರಣಾಂ ಆಸ್ಯೆತ್.  ಪೂಣ್, ಹ್ಯಾ ವಿಶಿಂ ಕೋಣ್ ತಕ್ಲಿ ಹುನ್ ಕರ್ತಾ? ಜಾಲ್ಯಾರೀ, ಏಕಾ ದಿಸಾ ಕೊಂಡಾಟ್ಯಾಚೊ ಹೊ ಕಲಾಕಾರಾಕ್ ಲೋಕ್ ಇನ್ಕಾರ್ ಕರ್ನ್, ಅನಿಕೀ ಚಡ್ ಮನರಂಜನ್ ಸೊಧುನ್ ಗೆಲೊ. ಹ್ಯಾ ವರ್ವಿಂ ಉಪ್ವಾಸ್ ಅಯೋಜಿತ್ ಕೆಲ್ಲ್ಯಾಂನಿ ಅನಿಕೀ ಹ್ಯಾ ದಂಧ್ಯಾ ವಯ್ರ್ ಲೋಕಾಕ್ ಅಸಕ್ತ್ ಉರ್ಲ್ಯಾಗೀ ಮ್ಹಣ್ ಕಳ್ಚೆ ಖಾತಿರ್ ಕಲಾಕಾರಾಕ್ ಯೂರೋಪಾಂತ್ ಥೈಂ ಹಾಂಗಾ ಧಾಂವ್ಡಾಂವ್ಚೆಂ ಪ್ರಯತನ್ ಕೆಲೆಂ. ಪೂಣ್ ಸಕ್ಕಡ್ ವ್ಯರ್ಥ್. ಸಗ್ಳ್ಯಾನಿತ್ಲ್ಯಾನ್, ಏಕಾ ಗುಪಿತ್ ಸಂಧಾನ್ ಜಾಲ್ಲ್ಯಾ ಬರಿ ಉಪ್ವಾಸಾಚ್ಯೆ ದಂಧ್ಯಾ ವಿಶಿಂ ಸಕಾರಾತ್ಮಕ್ ತಿರಸ್ಕಾರ್ ಆಸಾ ಮ್ಹಣ್ ಕಳ್ಳೆಂ. ಹೆಂ ಅಚಾನಕ್ ಜಲ್ಮೊಂಕ್ ನಾ. ಆನಿ ದಂಧ್ಯಾಚೆಂ ನಾಂವ್ ಉಭಾರಾಯೆರ್ ಆಸ್ತಾನಾ, ದಿಸಾನಾತ್ಲೆಲ್ಯೊ ಅಡ್ಕಳಿ ಯಾ ಗಮನ್ ದೀನಾತ್ಲೆಲ್ಯೊ ಸಂಗ್ತಿ ಆತಾಂ ದಿಸ್ಲ್ಯೊ. ಪೂಣ್, ಸದ್ದ್ಯಾಕ್ ಹ್ಯಾ ವಿಶಿಂ ಕಸಲೆಂಚ್ ಕ್ರಮ್ ಘೆಂವ್ಕ್ ವೇಳ್ ಉತ್ರಾಲ್ಲೊ. ಮುಖ್ಲ್ಯಾ ದಿಸಾನಿ ಖಂಡಿತ್ ಜಾವ್ನ್ ಉಪ್ವಾಸ್ ಪರ್ತುನ್ ಏಕ್ ಫ್ಯಾಶನ್ ಜಾವ್ನ್ ಯೆತೊಲೊ, ಪೂಣ್ ಆತಾಂ ಜಿಯೆಂವ್ಚಾ ಲೋಕಾಕ್ ನ್ಹಯ್. ತರ್, ಉಪ್ವಾಸ್ ಕರ್ಚಾ ಕಲಾಕಾರಾನ್ ಕಿತೆಂ ಕರಿಜಾಯ್ ಆಸ್ಲೆಂ? ಹಜಾರಾಂ ವಯ್ರ್ ಲೋಕಾನ್ ತಾಚಿ ಪ್ರಶಂಸಾ ಕೆಲ್ಲಿ ಆನಿ ಹಳ್ಳೆಂತ್ಲ್ಯಾ ಸಾಂತೆಂನಿ, ವಾಟೆ ದೆಗೆಂನಿ ಹೆಂ ಜಾಲ್ಲೆಂ, ಆನಿ ಆನ್ಯೆಕ್ ದಂಧೊ ಆಪ್ಣಾಂವ್ಕ್, ತಾಕಾ ಮೊಸ್ತು ಪ್ರಾಯ್ ಜಾಲ್ಲಿ. ಮಾತ್ರ್ ನ್ಹಯ್, ತೊ ಉಪ್ವಾಸಾಚೊ ಪೂಜಾರಿ ಜಾಲ್ಲೊ. ದೆಖುನ್ ತಾಣಿಂ ಆಯೋಜಕಾಂ ಥಾವ್ನ್ ಸುಟ್ಕಾ ಮಾಗುನ್ ಸರ್ಕಾಸಾಂತ್ ಭರ್ತಿ ಕರಯ್ಲೊ. ಅಪ್ಣಾಚಿಂ ಭಗ್ಣಾಂ ದಾಂಬುನ್ ದವರ್ಚಾ ಖಾತಿರ್ ತಾಣೆಂ ಕಾಮಾಚಿಂ ಶರ್ತಾಂ ಸಯ್ತ್ ವಾಚ್ಲಿಂ ನಾಂತ್!

ದಾದ್ಲೆ, ಮನ್ಜಾತಿ ಆನಿ ವ್ಹಡ್ ವ್ಹಡ್ ಸಾಮಾಗ್ರಿ ಆಸ್ಚಿ ಏಕ್ ಜಯ್ತ್ ಸರ್ಕಸ್ ಕಂಪೆನಿ ಲೋಕಾಕ್ ಕೆದ್ನಾಂಯ್ ಗರ್ಜೆಕ್, ಉಪ್ಯೋಗಾಕ್ ಪಾವ್ತಾ ಆನಿ ಹೆಂ ಭುಕೆಲ್ಲ್ಯಾ ಕಲಾಕಾರಾಕ್ ಸಯ್ತ್ ಲಾಗು ಜಾತಾ. ಪೂಣ್, ಹ್ಯಾ ಸಂದರ್ಭಾರ್ ತಾಣೆಂ ಚಡ್ತಿಕ್ ವಿಚಾರ್ಲೆಂ ನಾ ಜಾಲ್ಯಾರೀ, ತಾಕಾ ಕಂಪೆನಿನ್ ಕಾಣ್ಘೆಲೆಂ ಮಾತ್ರ್ ನ್ಹಯ್, ಸಾಂಗಾತಾ ತಾಣೆಂ ಎದೊಳ್ ಜೊಡ್ಲೆಲೆಂ ನಾಂವ್ ಸಯ್ತ್. ಹೆಂ, ತಾಕಾ ಪ್ರಾಯ್ ಜಾಲ್ಲಿ ತರೀ, ತಾಣೆಂ ಕೆಲ್ಲ್ಯಾ ವಿಶಿಸ್ಟ್ ಸ್ವರೂಪಾಚ್ಯಾ ನಟನಾಕ್ ಮಾಂದುನ್, ಆನಿ ತಾಚ್ಯೆ ಪಾಟ್ಲ್ಯಾನ್ ಏಕ್ ಕಲಾಕಾರ್ ಆಸಾ ಮ್ಹಳ್ಳ್ಯಾನ್ . ತೊ ಸರ್ಕಾಸಾಚ್ಯೆ ಏಕಾ ಕೊನ್ಷ್ಯಾರ್ ಜಾಗೊ ವಿಂಚ್ತಾಲೊ ಮ್ಹಣ್ ಲೆಕ್ಲೆಲ್ಯಾಂಕ್ ತ್ಯಾ ಭುಕೆಲ್ಲ್ಯಾ ಕಲಾಕಾರಾನ್ ಆಪುಣ್ ಕೆದ್ನಾಂಯ್ ಉಪ್ವಾಸ್ ಕರ್ಚಾಕ್ ತಯಾರ್ ಆಸಾಂ ಮ್ಹಣ್ ವಾದ್ ಮಾಂಡ್ತಾನಾ, ತಾಣೆಂ ಸಾಂಗ್ಚೆಂ ಪಾತ್ಯೆಜಾಯ್ ಮ್ಹಳ್ಳೊ ಆರೋಪ್ ತಾಚೆರ್ ಘಾಲೊ. ತಾಕಾ ತಾಚ್ಯೆ ಖುಶೆ ಪ್ರಕಾರ್ ಉಪ್ವಾಸ್ ಕರುಂಕ್ ಆವ್ಕಾಸ್ ದಿಲ್ಯಾರ್ ಆನಿ ಚಡ್ ಆಡಂಬರ್ ನಾಸ್ತಾನಾ ತಾಕಾ ಭರ್ವಸೊ ದಿಲ್ಯಾರ್, ತೊ ಎದೊಳ್ ಮ್ಹಣಾಸರ್ ಆಪ್ಣಾಯ್‌ನಾತ್ಲೊಲೊ ದಾಖ್ಲೊ ರಚುನ್, ಸಂಸ್ರಾಕ್‌ಚ್ ವಿಜ್ಮಿತ್ ಕರುಂಕ್ ಪುರೊ. ಹೆಂ ತರ್ಕ್ ಹೆರ್ ದಂಧ್ಯಾಂತ್ಲ್ಯಾಂಕ್ ಹಾಸುಂಕ್ ಕಾರಣ್ ಜಾಲೆಂ. ಸಾರ್ವಜನಿಕ್ ಅಭಿಪ್ರಾಯೆಂತ್ಲಿ ಬದ್ಲಾವಣ್ ಗಮನಾಕ್ ಘೆವ್ನ್ ಭುಕೆಲ್ಲೊ ಕಲಾವಿದ್ ಆಪ್ಲ್ಯಾ ಉರ್ಭೆನ್ ಹೆಂ ವಿಸ್ರಾಲೊ.

ಜಾಲ್ಯಾರೀ, ವಾಸ್ತವಿಕ್ ಪರಿಸ್ಥಿತಿಂತ್ ತಾಕಾ ಆಪ್ಲೆಂ ಗ್ಯಾನ್ ಚುಕ್ಲೆಂ ನಾ. ದೆಖುನ್, ತಾಣೆಂ ಆಪ್ಲೊ ಪಿಂಜ್ರೊ ಪ್ರಮುಖ್ ಆಕರ್ಶಣ್ ಜಾವ್ನ್, ಸರ್ಕಾಸಾ ಭಿತರ್ ನ್ಹಯ್, ಭಾಯ್ರ್, ಸುಲಭಾಯೆನ್ ಮನ್ಜಾಂತಿಚ್ಯಾ ಪಿಂಜ್ರ್ಯಾ ಲಾಗ್ಸಾರ್ ದವರಿಜಾಯ್ ಮ್ಹಣ್ ಅಭಿಪ್ರಾಯ್ ಗಟ್ಟ್ ಜಾಲಿ. ವ್ಹಡ್ ಫಲಂಕಾಚೆರ್ ಪಿಂಜ್ರ್ಯಾ ಭಿತರ್ ಕಿತೆಂ ಆಸಾ ಮ್ಹಣ್ ಬರವ್ನ್ ಉಮ್ಕಾಳಾಯ್ಲೆಂ. ಲೋಕಾಕ್ ಮಧ್ಯಂತರ್ ವಿರಾಮ್ ಮೆಳ್ತಾನಾ ಮನ್ಜಾಂತಿಂಕ್ ಪಳೆಂವ್ಕ್ ಭಾಯ್ರ್ ಯೆಂವ್ಚಾ ವಗ್ತಾ, ಭುಕೆಲ್ಲ್ಯಾ ಕಲಾಕಾರಾಚ್ಯೆ ಪಿಂಜ್ರ್ಯಾಲಾಗಿಂ ರಾವುನ್ ಪಳೆತಾಲೊ. ತೊ ಚಡ್ ವೇಳ್ ಥೈಂಸರ್ ರಾವುನ್ ಪಳೆಂವ್ಕ್ ಆಶೆಲೊ ತರೀ, ಜಮೊ ವ್ಹಡ್ ಆಸ್ಲೆಲ್ಯಾನ್ ಹೆಂ ಸಾಧ್ಯ್ ಜಾಲೆಂ ನಾ ಆನಿ ತೆದ್ನಾಂ ಆಪ್ಣಾಕ್ ಪಳೆಂವ್ಕ್ , ಆಕರ್ಶಣ್ ಆನಿ ಕುತೂಹಲಿತ್ ದ್ರಶ್ಯ್ ಆಸ್ತಾನಾ, ಕಿತ್ಯಾಕ್ ಲೋಕಾಕ್ ಸೊಡಿನಾಂತ್ ಮ್ಹಳ್ಳೆಂ ತಾಕಾ ಸಮ್ಜಾಲೆಂ ನಾ. ಲೋಕ್ ದೆಖುನ್ ಭುಕೆಲ್ಲ್ಯಾ ಕಲಾಕಾರಾನ್ ಹೊ ಆವ್ಕಾಸ್ ಆಪ್ಲ್ಯಾ ಜಿಣ್ಯೆಚೊ ಪ್ರಮುಖ್ ಸಾಧನ್ ಕರ್ನ್ ಘೆಜಾಯ್ ಆನಿ ಹೆಂಚ್ ಜಾಯ್ ಮ್ಹಣ್ ಆಪಾಲಿಪಾ ಖೆಳ್ ಖೆಳಾಲಾಗ್ಲೊ. ಹ್ಯಾ ವರ್ವಿಂ ಸುರ್ವೇರ್ ವಿರಾಮಾ ವೆಳಾರ್ ರಾಕುನ್, ಲೋಕ್ ವ್ಹಡಾ ಸಂಖ್ಯಾನ್ ಆಪ್ಣಾಕ್ ಪಳೆಂವ್ಚೆಂ ತಾಕಾ ಬರೆಂಚ್ ಲಾಗ್ಲೆಂ. ಹ್ಯಾ ಲೋಕಾ ಪೈಕಿ ಚಡ್ ಲೋಕ್, ತಾಂಚ್ಯೆ ವರ್ತನ್ ಪಳೆವ್ನ್, ತಾಂಕಾ ಪರ್ತುನ್ ಪರ್ತುನ್ ಮನ್ಜಾತಿಂಚ್ಯಾ ಪಿಂಜ್ರ್ಯಾಲಾಗಿಂ ವೆಚೆಂ ಚಡ್ ಜಾಲೆಂ. ತಾಂಚಿ ದೀಶ್ಟ್ ಹಾಚೆರ್ ಪಡ್ತಾನಾ ಹೊ ಸಂತೊಸ್ತಾಲೊ. ಆನಿ ಲೋಕ್ ದೋನ್ ಪಂಗ್ಡಾಚೆ ಆಸುನ್ ತಾಚ್ಯೆ ಪಿಂಜ್ರ್ಯಾಲಾಗಿಂ ಯೇವ್ನ್ ಬೊಬಾಟುನ್, ನಿಂದಾ ಕರ್ನ್, ಕಿಂಕ್ರಾಟ್ತಾನಾ ತಾಚ್ಯೆ ಕಾನ್ ಕೆಪ್ಪೆಚ್ ಜಾಲೆ. ಏಕ್ ಪಂಗಡ್ ತಾಕಾಚ್ ಪಳೆಂವ್ಚಾಕ್ ಆಶೆತಾನಾ, ತೊ ತಾಂಕಾ ಮೆಚ್ವಾಲೊ ನಾ. ಹಾಚೆರ್ ಆಸಕ್ತ್ ನಾಸ್ತಾನಾ ಮನ್ಜಾಂತಿಂಕ್ ಪಳೆಂವ್ಕ್‌ಚ್ ಮ್ಹಣ್ ಆಯ್ಲೆಲ್ಯಾ ಆನ್ಯೆಕಾ ಪಂಗ್ಡಾಕ್ ತೊ ಮೆಚ್ವಾಲೊ!

ಪಯ್ಲೆಂ, ಆಪ್ಣಾಕ್‌ಚ್ ಪಳೆಂವ್ಕ್ ಆಯ್ಲ್ಯಾತ್ ಮ್ಹಣ್ ಚಿಂತ್ತಾನಾಂಚ್, ಜಮೊ ವೆವೆಗ್ಗಿಂ ತಾಕಾ ಪಳೆನಾಸ್ತಾನಾಂಚ್ ಮನ್ಜಾತಿಂಚ್ಯೆ ಪಿಂಜ್ರ್ಯಾಲಾಗಿಂ ಪಾಂವ್ಚ್ಯಾಕ್ ಧಾಂವ್ತಾಲೊ. ಆಪ್ರೂಪ್‌ಶೆಂ , ಅದ್ರಶ್ಟ್ ಮ್ಹಳ್ಳೆಬರಿಂ ಕೋಣ್ ಎಕ್ಲೊ ಬಾಪುಯ್ ಆಪ್ಲ್ಯಾ ಭುರ್ಗ್ಯಾಂಕ್ ಹಾಚ್ಯೆ ಪಿಂಜ್ರ್ಯಾಲಾಗಿಂ ರಾವುನ್, ಆಪ್ಲೆಂ ಬೋಟ್ ಜೊಕುನ್ ಕಿತೆಂಗೀ ವಿವರ್ಸುನ್ ಸಾಂಗ್ತಾಲೊ. ಭುರ್ಗ್ಯಾಂಕ್ ಹಾಚ್ಯಾಕೀ ಚಡ್ ಆಕರ್ಶಣ್ ಪಳೆಂವ್ಕ್ ಬಾಕಿ ಆಸ್ತಾನಾ, ಇಸ್ಕೊಲಾಂತ್ ಹ್ಯಾ ವಿಶಿಂ ಕಸಲೆಂಚ್ ಲಿಸಾಂವ್ ಶಿಕಂವ್ಕ್ ನಾತ್ಲೆಲ್ಯಾನ್ , ತಾಂಕಾಂ ಉಪ್ವಾಸಾ ವಿಶಿಂ ಕಸಲೊ ಹುಸ್ಕೊ? ಜಾಲ್ಯಾರೀ, ತಾಂಚ್ಯಾ ದೊಳ್ಯಾಂತ್ಲೊ ಉಜ್ವಾಡ್ ಪಳೆವ್ನ್ ಮುಖಾರ್ ಬರೆ ದೀಸ್ ಯೆತೆಲೆ ಮ್ಹಣ್ ತಾಣೆಂ ಚಿಂತ್ಲೆಂ. ಆಪ್ಲೊ ಪಿಂಜ್ರೊ ಮನ್ಜಾತಿಂಚ್ಯಾ ಪಿಂಜ್ರ್ಯಾಲಾಗಿಂ ಆಸ್ಲ್ಯಾರ್ ಬರೆಂಚ್ ಜಾತೆಂ ಮ್ಹಣ್ ತಾಣೆಂ ತಾಕಾಚ್ ಸಭಾರ್ ಪಾವ್ಟಿಂ ಸಾಂಗ್ಲೆಲೆಂ ಆಸಾ. ಪೂಣ್ ತಸೆಂ ನಾತ್ಲೆಲ್ಯಾನ್ ಲೋಕಾಕ್ ವಿಂಚವ್ಣ್ ಕರುಂಕ್ ಸುಲಭ್ ಜಾಲೆಂ. ಮನ್ಜಾಂತಿಚಿ ಬೊಬಾಟ್, ಘಾಣ್, ಜಿವೆಂ ಮಾಸ್ ವಾವವ್ನ್ ವರ್ಚೆಂ ಪೂರಾ ಪಳೆತಾನಾ, ತಾಣೆಂ ಸೊಸ್ಲೆಲೆ ಕಶ್ಟ್ ಕೊಣ್ಂಚ್ ನೆಣಾಂತ್. ಮನ್ಜಾಂತಿಂಕ್ ಖಾಣ್ ದಿಂವ್ಚೊ ವೇಳ್ ತಾಕಾ ಚಡ್ ಖಂತಿಕ್ ಲಾಯ್ತಾಲೊ. ತರೀ, ತಾಣೆಂ ಆಡಳ್ತ್ಯಾಗಾರಾಂಕ್ ದೂರ್ ದಿಂವ್ಚೆಂ ಧಯ್ರ್ ಕೆಲೆಂ ನಾ. ಲೋಕ್ ತಾಕಾ ಪಾಶಾರ್ ಜಾವ್ನ್ ಮನ್ಜಾತಿಂಕ್ ಪಳೆಂವ್ಕ್ ವೆತಾಲೊ ಜಾಲ್ಲ್ಯಾನ್ ಮನ್ಜಾಂತಿಕ್ ತೊ ಆಭಾರಿ ಜಾವ್ನಾಸ್ಲೊ. ಪೂಣ್, ನಿಜಾಯ್ಕೀ ತೊ ಮನ್ಜಾಂತಿಂಕ್ ಪಳೆಂವ್ಕ್ ವೆಚ್ಯಾ ವಾಟೆರ್ ಏಕ್ ಅಡ್ಕಳ್ ಜಾವ್ನಾಸ್‌ಲ್ಲೊ!

ಏಕ್ ಲ್ಹಾನ್ ಅಡ್ಕಳ್. ತಿ ಕ್ರಮೇಣ್ ಉಣಿ ಜಾಲಿ. ಅಸಲ್ಯಾ ಸಂದರ್ಭಾನಿ ಭುಕೆಲ್ಲ್ಯಾ ಕಲಾಕಾರಾ ಥಂಯ್ ಆಸಕ್ತ್ ಘೆಂವ್ಕ್ ಜಾತಾ ಮ್ಹಳ್ಳೆ ಬರಿ ಲೊಕಾನ್ ವಳಕ್ ದಾಖಯ್ಲಿ ಆನಿ ಹಿಚ್ ವಳಕ್ ತಾಂಚ್ಯೆ ವಿರೋಧ್ ತೀರ್ಪ್ ಜಾವ್ನ್ ಭಾಯ್ರ್ ಆಯ್ಲೆಂ. ತಾಣೆಂ ಕಿತ್ಲೊ ಉಪ್ವಾಸ್ ಜಾಯ್ ತಿತ್ಲೊ ಕರ್ಯೆತಾ, ಆನಿ ತಾಣೆಂ ತೊ ಕೆಲೊ. ಪೂಣ್ ಅತಾಂ ತಾಕಾ ಕಿತೆಂಚ್ ಉರಂವ್ಕ್ ಜಾಲೆಂ ನಾ. ಲೋಕ್ ತಾಕಾ ಪಾಶಾರ್ ಜಾವ್ನ್ ವೆತಾಲೊ. ಕೊಣಿ ತರೀ ಉಪ್ವಾಸಾಚಿ ಕಲಾ ವಿವರ್ಸುನ್ ಸಾಂಗ್ಚೆಂ ಪ್ರಯತನ್ ಕರಾ! ತ್ಯಾ ವಿಶಿಂ ಕಸಲಿಂಚ್ ಭೊಗ್ಣಾಂ ನಾತ್ಲೆಲ್ಯಾಂಕ್ ಅರ್ಥ್ ಕರುಂಕ್ ಅಸಾಧ್ಯ್. ಸೊಭೀತ್ ಅಸ್ಲೆಲಿಂ ಫಲಕಾಂ ಮೆಳಿಂ ಜಾಲಿಂ ಆನಿ ತಾಂಕಾಂ ಹುಮ್ಟುನ್ ಕಾಡ್ಲೆಂ. ಕಿತ್ಲೊ ದೀಸ್ ಉಪ್ವಾಸ್ ಕೆಲೊ ಮ್ಹಣ್ ಸುರ್ವೇರ್ ಹರ್ಯೆಕಾ ದಿಸಾ ಬರವ್ನ್ ದವರ್ಚೊ ನೋಟಿಸ್ ಬೋರ್ಡ್ ಆಸ್‌ಲ್ಲೊ ಅತಾಂ ಕಿತೆಂಚ್ ದಾಖಯ್ನಾಸ್ತಾನಾ ಖಾಲಿ ಉರ್ಲೆ. ಥೊಡ್ಯಾ ಹಫ್ತ್ಯಾ ಉಪ್ರಾಂತ್ ಹೆಂ ಲ್ಹಾನ್ಶ್ಯೆಂ ಕಾಮ್ ಸಯ್ತ್ ಸಿಬ್ಬಂಧೆಕ್ ಆರ್ಥ್ ನಾತ್ಲೆಲೆಂ ಮ್ಹಣ್ ಭಗ್ಲೆಂ, ಪೂಣ್ ಕಲಾಕಾರಾಕ್ ಹ್ಯಾ ವರ್ವಿಂ ಕಸಲೆಚ್ ತೊಂದ್ರೆ ಜಾಲೆನಾಂತ್ ಆನಿ ತೊ ಉಪ್ವಾಸ್ ಕರ್ನ್ಂಚ್ ರಾವ್ಲೊ. ಪೂಣ್ ಕೊಣೆಂಚ್, ತಾಣೇಂಯ್ ದೀಸ್ ಮೆಜ್ಲೆನಾಂತ್ ಆನಿ ಆಪುಣ್ ಕಸಲೊ ದಾಖ್ಲೊ ಮೊಡುನ್ ಆಸಾಂ ಮ್ಹಳ್ಳೆಂಚ್ ಕಳನಾಸ್ತಾನಾ ತಾಚೆಂ ಕಾಳಿಜ್ ಜಡ್ ಜಾಲೆಂ. ಆನಿ ಥೊಡೆ ಪಾವ್ಟಿಂ ಕೊಣೀ ತಾಚ್ಯೆ ಸಾಮ್ಖಾರ್ ರಾವುನ್, ಬೊರ್ಡಾಚೆರ್ ಬರಯಿಲ್ಲೊ ದೀಸ್ ವಾಚುನ್, ಹಾಸುನ್ ಉಲಯ್ತಾನಾ, ಭುಕೆಲ್ಲ್ಯಾ ಕಲಾಕಾರಾಕ್ ಮಾತ್ರ್ ನ್ಹಯ್, ಪ್ರಾಮಾಣಿಕ್ಪಣಾನ್ ಆಪ್ಲೆಂ ಕಾಮ್ ಕೆಲ್ಲ್ಯಾ ನಟನಾಕ್, ತಾಕಾ ಮೆಳ್ಚ್ಯಾ ಇನಾಮಾ ವಿಶಿಂ ಸಂಸಾರ್ ಮೋಸ್ ಕರ್ತಾಲೊ.

ಅನಿಕೀ ಸಭಾರ್ ದಿಸ್ ಪಾಶಾರ್ ಜಾಲೆ. ಆನಿ ಏಕಾ ದಿಸಾ ತೇಯ್ ಅಕೇರ್ ಜಾಲೆ. ಏಕಾ ದಿಸಾ ಏಕಾ ಆಡಳ್ತ್ಯಾಗಾರಾಚಿ ದೀಶ್ಟ್ ಹಾಚ್ಯಾ ಪಿಂಜ್ರ್ಯಾಚೆರ್ ಪಡ್ಲಿ. ಹೊ ಇತ್ಲೊ ಬರೊ ಪಿಂಜ್ರೊ, ಭಿತರ್ ಭಾತೆಣ್ ಭರುನ್ ಥಂಯ್ಸರ್ ಕಿತೆಂ ಕರ್ತಾ ಆನಿ ಕಿತ್ಯಾಕ್ ತಾಚೊ ಉಪ್ಯೋಗ್ ಕರಿನಾಂತ್ ಮ್ಹಣ್ ತಾಣೆಂ ಕಾಮೆಲ್ಯಾಂಕ್ ವಿಚಾರ್ಲೆಂ. ಕೊಣೆಂಚ್ ಜಾಪ್ ದಿಲಿ ನಾ. ಅಖ್ರೇಕ್ ಏಕ್ಲ್ಯಾನ್ ನೊಟೀಸ್ ಬೋರ್ಡ್ ಪಳೆವ್ನ್ ಕಲಾಕಾರಾಚೊ ಉಗ್ಡಾಸ್ ಕೆಲೊ. ತಾಣಿಂ ಬೆತಾಂನಿ ಭಾತೆಣಾ ಮಧೆಂ ತೊಪುನ್ ಪಳೆಲೆಂ. ಕಲಾಕಾರ್ ಥಂಯ್ಸರ್ ದಿಸ್ಲೊ.

“ತೂಂ ಅನಿಕೀ ಉಪ್ವಾಸ್ ಕರುನ್ ಆಸಾಯ್ಗೀ?” ಮ್ಹಣ್ ಆಡಳ್ತೆಗಾರಾನ್ ವಿಚಾರ್ಲೆಂ. “ಆನಿ ಕೆದ್ನಾಂ ತೂಂ ಹೆಂ ರಾವಯ್ತಾಯ್?”

“ಸಕ್ಡಾಂ ಮ್ಹಾಕಾ ಮಾಫ್ ಕರಾ” ಪುಸ್ಪುಸ್ಲೊ ಕಲಾಕಾರ್. ಹೆಂ ಲಾಗಿಂ ಆಸ್ಲೆಲ್ಯಾ ಆಡಳ್ತೆಗಾರಾಕ್ ಮಾತ್ರ್ ಆಯ್ಕಾಲೆಂ.

“ಖಂಡಿತ್”. ಉಪ್ವಾಸ್ ಖಂಚ್ಯಾ ಸ್ಥಿತೆರ್ ಆಸಾ ಮ್ಹಣ್ ಕಾಮ್ಗಾರಾಂಕ್ ಕಳ್ಚಾಕ್ ಆಪ್ಲೆಂ ಕಪಲ್ ಥಾಪ್ಡುನ್ ತಾಣೆಂ ಜಾಪ್ ದಿಲಿ.

ಆಡಳ್ತ್ಯಾಗಾರ್ “ತುಕಾ ಆಮಿ ಭಗ್ಸಿತಾಂವ್’ ಮ್ಹಣಾಲೊ.

“ಮ್ಜಜೊ ಉಪ್ವಾಸ್ ತೂಮಿ ಮೆಚ್ವಾಜಾಯ್ ಮ್ಹಣ್ ಹಾಂವ್ ಸದಾಂಚ್ ಆಶೆತಾಲೊಂ” ಮ್ಹಣ್ ಕಲಾಕಾರಾನ್ ಜಾಪ್ ದಿಲಿ.

“ಬರೆಂ, ಆಮಿ ಮೆಚ್ವಾತಾಂವ್”

“ಪೂಣ್, ತುಮಿ ಮೆಚ್ವೊಂಕ್ ನ್ಹಜೊ”

“ತಸೆಂಚ್ ಜಾಂವ್. ಆಮಿ ಮೆಚ್ವಾನಾಂವ್. ಪೂಣ್ ಆಮಿ ಕಿತ್ಯಾಕ್ ಮೆಚ್ವೊಂಕ್ ನ್ಹಜೊ?”

“ಹಾಂವೆ ಉಪ್ವಾಸ್ ಕರಿಜಾಯ್ ಜಾಲ್ಲ್ಯಾನ್. ಮ್ಹಾಕಾ ದುಸ್ರಿ ವಾಟ್ ಚ್ ನಾ”

“ಕಸಲೊ ಮನಿಸ್ ಸಾಯ್ಬಾ ತೂಂ?” ಆಡಳ್ತ್ಯಾಗಾರಾನ್  ವಿಚಾರ್ಲೆಂ. “ಕಿತ್ಯಾಕ್ ದುಸ್ರಿ ವಾಟ್ ನಾ?”

“ಕಿತ್ಯಾಕ್ ಮ್ಹಳ್ಯಾರ್” ಕಲಾಕಾರಾನ್ ಆಪ್ಲಿ ತಕ್ಲಿ ಇಲ್ಲಿಶಿ ವಯ್ರ್ ಉಕಲ್ನ್, ಉಮೊ ದೀಂವ್ಕ್ ಮ್ಹಳ್ಳೆ ಬರಿ ವೊಂಟಾಂ ಉಗವ್ನ್, ಆಡಳ್ತ್ಯಾಗಾರಾಚ್ಯಾ ಕಾನಾಂತ್ ಮ್ಹಳೆಂ: “ಕಿತ್ಯಾಕ್ ಮ್ಹಳ್ಯಾರ್, ಮ್ಹಾಕಾ ಮ್ಹಜ್ಯಾ ಪಸಂದೆಚೆಂ ಖಾಣ್ ಮೆಳ್ಳೆಂ ನಾ. ಜರ್ ಮ್ಹಾಕಾ ತಸಲೆಂ ಖಾಣ್ ಮೆಳ್ಳೆಲೆಂ ಜಾಲ್ಯಾರ್, ಮ್ಹಾಕಾ ಪಾತ್ಯೆ. ಹಾಂವ್ ತುಜ್ಯೆ ಬರಿ ಯಾ ಹೆರ್ ಕೊಣಾಯ್ ಬರಿ ಗಲಾಟೊ ಕರಿನಾಸ್ತಾನಾ ಜಿಯೆಜಾಯ್ ಆಸ್‌‌ಲ್ಲೆಂ.”

ಹಿಂ ತಾಚಿಂ ಅಖ್ರೇಚಿಂ ಉತ್ರಾಂ. ಪೂಣ್, ಅಪುಣ್ ಉಪ್ವಾಸ್ ಮುಖಾರ್ಸುನ್ ವರ್ತಾಂ ಮ್ಹಣ್ ತಾಚ್ಯೆ ದೊಳೆ ಉಲಯ್ಲೆ ನಾಂತ್.

“ಬರೆಂ,ಆತಾಂ ಪಿಂಜ್ರ್ಯಾಕ್ ಖಾಲಿ ಕರಾ!” ಮ್ಹಣಾಲೊ ಆಡಳ್ಯ್ತಾಗಾರ್. ಆನಿ ತಾಣಿಂ ಕಲಾಕಾರಾಕ್, ಭಾತೆಣಾ ಒಟ್ಟುಕ್ ಪುರ್ಲೆಂ!

ಪಿಂಜ್ರ್ಯಾಂತ್ ತಾಣಿಂ ಏಕ್ ಚಿತ್ಳಾಕ್ ಘಾಲೆಂ. ತಾಚ್ಯೆ ಭಿತರ್ ಉಡ್ಕಾಣಿ ಮಾರ್ಚ್ಯಾ ಚಿತ್ಳಾಕ್ ಪಳೆವ್ನ್ ಮೊಸ್ತು ದಯಾಳ್ ಮನಿಸ್ ಸಯ್ತ್ ಸಂತೊಸ್ಲೆ. ಸುಮಾರ್ ತೇಂಪ್ ಥಂಡ್ ಆಸ್ಲೆಲೆಂ ಚಿತಾಳ್ ಪಳೆಂವ್ಕ್ ಬರೆಂಚ್ ದಿಸ್ಲೆಂ ಆನಿ ಉರ್ಭೆನ್ ನಾಚ್ಲೆಂ.

ತಾಕಾ ರೂಚಿಚೆಂ ಖಾಣ್ ವೆಳಾ ವೆಳಾರ್ ಚುಕಾನಾಸ್ತಾನಾ ದೀಂವ್ಕ್ ಕೊಣೆಂಚ್ ಪಾಟಿಂ ಮುಖಾರ್ ಪಳೆಲೆಂ ನಾ. ತಾಕಾ ಪಳೆತಾನಾ ತಾಚ್ಯೆಂ ಸ್ವಾತಂತ್ರ್ಯ್ ಹೊಗ್ಡಾಂವ್ಕ್ ನಾ ತಸೆಂ ದಿಸ್ತಾಲೆಂ. ತಾಚಿ ಕೂಡ್ ಸಕ್ಕಡ್ ಸಂಗ್ತಿಂ ಸಾಂಗಾತಾ ತಯಾರ್ ಆಸಾ ಆನಿ ತಾಚ್ಯೆಂ ಸ್ವಾತಂತ್ರ್ಯ್ ದಾಂತಾಂ ಮಧೆಂ ಲಿಪೊನ್ ಆಸ್ಲೆಲೆ ಬರಿ ಭಗ್ತಾ. ತಾಕಾ ಪಳೆವ್ನ್ ಜಾಂವ್ಚಾ ಅಘಾತಾಕ್, ಭಿಯಾಕ್ ತಡ್ವುಂಕ್ ಪಳೆಂವ್ಚಾಂಕ್ ಸುಲಭ್ ನ್ಹಯ್. ಪೂಣ್, ತಾಂಕಾಂಚ್ ತಾಣಿಂ ಧೈರಾಧಿಕ್ ಕೆಲೆಂ ಆನಿ ಪಿಂಜ್ರ್ಯಾ ಭಂವ್ತಿಂ ಜಮೊ ಜಾವ್ನ್, ಥಂಯ್ ಥಾವ್ನ್ ಪಯ್ಸ್ ವೆಚ್ಯಾಕ್ ಮನ್ ಕೆಲೆಂ ನಾ.

ಮೂಳ್ : ಫ್ರಾಂಜ್ ಕಾಪ್ಕಾ  ತರ್ಜುಮೊ : ಉಬ್ಬ, ಮೂಡ್ ಬಿದ್ರಿ