ಅದೇವ್ಸ್

“ಆನಿ ಚಡ್ ದೀಸ್ ತುಂ ವಾಂಚೊಂಕ್ ಸಕ್ಚೆ ನಾಂಯ್. ತುಕಾ ಗರ್ಬಾಪೊತಿಯೆಚೆಂ ಕ್ಯಾನ್ಸರ್ ಆಸಾ. ತುವೆಂ ತುಜೆಯಿತ್ಲ್ಯಾಕ್ ದೂಖ್ ಸೊಸುನ್ ಆಸ್ಪತ್ರೆಕ್ ಯೇಂವ್ಕ್ ಮಸ್ತ್ ವೇಳ್ ಕೆಲೊಯ್. ತುಜೆಂ ಕ್ಯಾನ್ಸರ್ ತುಜ್ಯಾ ಕುಡಿಚ್ಯಾ ದುಸ್ರ್ಯಾ ವಿಶ್ವ್ಯಾಂಕ್ ವಿಸ್ತಾರ್ಲಾಂ ದೆಕುನ್ ಅನಿ ಖಂಯ್ಚೀಯ್ ಚಿಕಿತ್ಸಾ ಉಪ್ಕಾರಾಕ್ ಪಡ್ಚಿ ನಾಂ ಮ್ಹಣ್ ಸಾಂಗೊಂಕ್ ಮ್ಹಾಕಾ ಬೆಜಾರ್ ಭೊಗ್ತಾ.”

ಡಾ। ಸುನಿಲಾಚಿಂ ಉತ್ರಾಂ ಜಿರಂವ್ಕ್ ಮ್ಹಾಕಾ ಕಶ್ಟ್ ಜಾಲಿಂ.

“ತುವೆಂ ಎಡ್ಮಿಟ್ ಜಾಲ್ಯಾರ್ ಬರೆಂ. ತುಜಿ ದೂಖ್ ಇಲ್ಲಿ ಉಣಿಂ ಕರ್ಯೆತ್” ಮ್ಹಜೆಂ ಮೌನ್ ಪಳೆವ್ನ್ ಡಾ। ಸುನಿಲಾನ್ಂಚ್ಚ್ ಮುಂದರಿಲೆಂ.

ತೊ ಉಲಯಿತ್ತ್ ಆಸ್‌ಲ್ಲೊ ಆನಿ ಹಾಂವ್ ಹಳೂ ಕದೆಲ್ ಲೊಟುನ್ ಡಾ। ಸುನಿಲಾಚ್ಯಾ ಕ್ಯಾಬಿನಾ ಥಾವ್ನ್ ಭಾಯ್ರ್ ಆಯ್ಲಿಂ – ತಾಚಿ ಪರ್ವಣ್ಗಿ ವಿಚಾರಿನಾಸ್ತಾನಾಂಚ್ಚ್.

ದೊಳ್ಯಾಂಕ್ ಕಾಳೊಕ್ ಆಯಿಲ್ಲ್ಯಾ ಬರಿಂ ಜಾಲೆಂ. ಹಾಂವ್ ಥಂಯ್ಚ್ ಲಾಗ್ಸಾರ್ ಆಸ್‌ಲ್ಲ್ಯಾ ಬಾಂಕಾರ್ ಕುಸ್ಕಾಲಿಂ.

“ಆರ್ ಯು ಓ.ಕೆ. ಮೇಡಮ್?” ನರ್ಸ್ ಮ್ಹಜ್ಯಾ ಸರ್ಶಿಂ ದಾಂವೊನ್ ಅಯ್ಲೆಂ.

“ಯಸ್. ಐ ಯ್ಯಾಮ್ ಒ.ಕೆ. ಥ್ಯಾಂಕ್ ಯು.” ಹಾಂವೆ ಕಶ್ಟಾಂನಿ ತಾಕಾ ಹಾಸೊ ದಿಲ್ಯೊ.

“ಹಾಂವೆ ಎಡ್ಮಿಟ್ ಜಾಲ್ಯಾರ್ ಮಜ್ಯಾ ಘೊವಾಕ್ ಆನಿ ಭುರ್ಗ್ಯಾಂಕ್ ಬೆಶ್ಟೆಂಚ್ಚ್ ಧೊಶಿ. ನಾಕಾ ದೂಖ್ ಸೊಸುನ್ ಉರ್‌ಲ್ಲೆ ಥೊಡೆ ದೀಸ್ ಮಜ್ಯಾ ಕುಟ್ಮಾ ಸಂಗಿ ಘರಾಚ್ಚ್ ಸಾರ್ತಾಂ”. ಹಾಂವ್ ಹಳೂ ಉಬೆ ರಾವ್ಲಿಂ. ಆಸ್ಪತ್ರೆ ಬಾಯ್ರ್ ಯೆತಾನಾ ಮಜೊ ಡ್ರಾಯ್ವರ್ ತಯಾರ್ ಆಸ್ಲೊ.

“ಚೆಕ್ ಅಪ್ ಜಾಲೆಂಗೀ ಮೇಡಮ್, ಘರಾ ಯಾಗಿ?” ತಾಣೆಂ ಗಾಡಿಯೆಚೆಂ ದಾರ್ ಉಘಡ್ತಾನಾ ವಿಚಾರ್ಲೆಂ.

“ನಾಂ ಮ್ಹಾಕಾ ಇಲ್ಲೊ ವೇಳ್ ದರ್ಯಾ ವೆಳೆಕ್ ಆಪವ್ನ್ ವರ್. ಇಲ್ಲೆಂ ಥಂಡ್ ವಾರೆಂ ಸೆಂವ್ಚೆ ಮನ್ ಜಾಲಾಂ.” ಹಾಂವ್ ಗಾಡಿಯೆರ್ ಬಸ್ಲಿಂ.

“ಜಾಯ್ತ್ ಮೇಡಮ್.” ಡ್ರಾಯ್ವರಾನ್ ಗಾಡಿ ಚಾಲು ಕೆಲಿ.

***

ಮ್ಹಾಕಾ ಲಾನ್ಪಣಾಂ ಥಾವ್ನ್ ದರ್ಯಾತಡ್ ಬೊವ್‌ಚ್ಚ್ ಪಸಂದೆಚಿ. ದರ್ಯಾತಡಿಕ್ ಪಾವ್ ಲ್ಲೆಂಚ್ಚ್ ಹಾಂವೆ ರೆಂವೆರ್ ಕುಲೊ ತೆಂಕ್ಲೊ. ಮಜಿ ದೀಶ್ಟ್ ಬುಡ್ಚ್ಯಾ ಸುರ್ಯಾಚೆರ್ ಖಂಚ್ಲಿ.

“ತುಂ ತರ್ ಪಾಲ್ಯಾಂ ಉದೆತಲೊಯ್, ಪೂಣ್ ಹಾಂವ್ ಅನಿಂ ಥೊಡ್ಯಾಚ್ಚ್ ದಿಸಾಂನಿ ಸಾಸ್ಣಾಕ್ ಬುಡ್ತೆಲಿಂ”. ಮ್ಹಜ್ಯಾ  ಪರ್ವಣ್ಗೆವಿಣೆಂ ದೋನ್ ಥೆಂಬೆ ದುಖಾಂ ಗಳೊನ್ ರೆಂವೆರ್ ಜಿರ್ಲಿಂ. ಜೋರಾನ್ ಬೋಬ್ ಮಾರ್ನ್ ರಡ್ಯಾಂ ಮ್ಹಣ್ ಭೊಗ್ಲೆಂ. ಪೂಣ್ ಕೋಣ್ ಆಸಾ ಮ್ಹಾಕಾ ಭುಜಯ್ತಲೊ ? ಕಾಳೊಕ್ ಭುಂಯ್ಕ್ ವೆಂಗ್ತಾ ಪರ್ಯಾಂತ್ ಥಂಯ್ಚ್ ಬಸ್ಲಿಂ. ಉಪ್ರಾಂತ್ ಹಳೂ ಉಟೊನ್ ಗಾಡಿಯೆ ತೆವ್ಶಿಂ ಪಾವ್ಲಾಂ ಕಾಡ್ಲಿಂ.

“ಹೊ, ಆಯ್ಲಿಯ್ಗಿ ಮಮ್ಮಿ?” ದಾರ್ ಉಗ್ತೆಂ ಕೆಲೆಂ ಮಜ್ಯಾ ಅಟ್ರಾ ವರ್ಸಾಂಚ್ಯಾ ದುವೆನ್ ಸರಿತಾನ್.

“ಹಾಂವ್ ದಾಕ್ತೆರಾ ಲಾಗಿಂ ಗೆಲ್ಲಿಂ ಪುತಾ.” ಮಜ್ಯಾ ಜಾಪಿಕ್ ರಾಕಾನಾಸ್ತಾನಾ ತೆಂ ಅಪ್ಲ್ಯಾ ಕುಡಾಕ್ ದಾಂವ್ಲೆಂ.

“ಮಮ್ಮಿ, ಮಜ್ಯಾ ಇಶ್ಟಿಣಿಚೊ ಜಲ್ಮಾ ದೀಸ್ ಆಮಿ ಭಾಯ್ರ್ ರೆಸ್ಟೋರೆಂಟಾಂತ್ ಆಚರ್ಸಿತಾಂವ್. ಹಾಂವೆ ಯೆತಾನಾ ವೇಳ್ ಜಾತಾಲೊ. ಮ್ಹಾಕಾ ರಾಕನಾಕಾ ಮಮ್ಮಿ”. ವೀಸ್ ವರ್ಸಾಂಚೆಂ ಮ್ಹಜಿ ಮಾಲ್ಘಡಿ ದುವ್ ಮಲಿತಾ ಚಿತ್ಳಾ ಬರಿಂ ಉಡೊನ್ ಘಡಿಯೆನ್ ದೊಳ್ಯಾಂ ಮುಖ್ಲೆಂ ನಪಂಯ್ಚ್ ಜಾಲೆಂ.

ತಿತ್ಲ್ಯಾರ್ ಫೊನ್ ವಾಜ್ಲೆಂ.

“ಅಳೆ ಬಾ, ಮಜಿಂ ಮೀಟಿಂಗಾ ಸಂಪೊಂಕ್ನಾತ್. ಜಾಲ್ಲ್ಯಾನ್ ಮ್ಹಾಕಾ ಅನ್ಯೇಕ್ ಚಾರ್ ದೀಸ್ ಹಾಂಗಾಚ್ಚ್ ರಾವಾಜಯ್ ಪಡ್ತೆಲೆಂ. ಜಾತಾ ತಿತ್ಲ್ಯಾ ವೆಗ್ಗಿಂ ಯೇಂವ್ಕ್ ಪ್ರಯತ್ನ್ ಕರ್ತಾಂ. ಕೋಣ್‌ಗೀ ಮ್ಹಾಕಾ ಮೆಳೊಂಕ್ ಆಯ್ಲಾ. ಉಪ್ರಾಂತ್ ಉಲಯ್ತಾಂ . . .”

ಮಸ್ತ್ ದೀಸಾಂ ಉಪ್ರಾಂತ್ ಮಜ್ಯಾ ನೊವ್ರ್ಯಾಚೊ ತಾಳೊ ಆಯ್ಕೊನ್ ಮ್ಹಾಕಾ ಸಂತೋಸ್ ಜಾಲೊ. ಹಾಂವೆ ತೋಂಡ್ ಉಘಡ್ಚ್ಯಾ ಪಯ್ಲೆಂ ಫೊನ್ ಡಿಸ್‌ಕನೆಕ್ಟ್ ಜಾಲ್ಲೆಂ.

ವ್ಹಯ್, ಮ್ಹಾಕಾ ಕಿತ್ಯಾಚೆಂಚ್ಚ್ ಉಣೆಂ ನಾತ್‌ಲ್ಲೆಂ. ಭಾಯ್ರ್ ವೆತಾನಾ ಡ್ರಾಯ್ವರ್, ಘರಾಂತ್ ಝಾಡುಂಕ್, ಪುಸುಂಕ್, ರಾಂದುಂಕ್, ಆಯ್ದಾನಾಂ ದುಂವ್ಕ್ ಕಾಮಾಚಿಂ. ಹಾಂವೆ ಕಿತೆಂ ವಿಚಾರ್ಲ್ಯಾರೀ ಮಜೊ ನೊವ್ರೊ ನಾಂ ಮ್ಹಣಾನಾತ್ಲೊ. ಪೂಣ್ ಕೊಣಾಯ್ ‌‌‌‌‌ಲಾಗಿಂ ದೋನ್ ಮಿನುಟಾಂ ಮ್ಹಜೆ ಸಾಂಗಾತಾ ಬಸೊನ್ ಉಲಂವ್ಕ್ ವೇಳ್ ನಾತ್‌ಲ್ಲೊ.

***

ಘಡಿಯೊ, ವರಾಂ, ದೀಸ್, ಹಪ್ತೆ ದಾಂವ್ತಾಲೆ. ಹಾಂವ್ ಮಸ್ತ್ ಅಸ್ವಸ್ಥ್ ಜಾಲ್ಲಿಂ. ಮ್ಹಜ್ಯಾ ನೊವ್ರ್ಯಾನ್ ಮಜಿ ಚಾಕ್ರಿ ಕರುಂಕ್ ಎಕಾ ನರ್ಸಾಕ್ ಘರಾ ಹಾಡ್‌ಲ್ಲೆಂ. ಕಿತ್ಲೆಂ ಮನ್ ಕೆಲ್ಯಾರೀ ಮ್ಹಜೆ ಪಿಡೆ ವಿಶ್ಯಾಂತ್ ಮಜ್ಯಾ ನೊವ್ರ್ಯಾಕ್ ಯಾ ಭುರ್ಗ್ಯಾಂಕ್ ಕಳಂವ್ಚ್ಯಾಂತ್ ಹಾಂವ್ ಅಸಮರ್ಥ್ ಜಾಲ್ಲಿಂ. ದೂಖ್ ಸೊಸುನ್ ವಕಾತ್ ಘೆವ್ನ್ ದೀಸ್ ಸಾರ್ತಾಲಿಂ.

ದೀಸಾಕ್ ಏಕ್ ಪಾವ್ಟಿಂ ಮ್ಹಜೆ ದುವೊ ಮ್ಹಜ್ಯಾ ಕುಡಾಕ್ ತೀಳ್ನ್  ‘ಫೀಲ್ ಬೆಟರ್ ಸೂನ್ ಮಮ್ಮಿ’ ಮ್ಹಣ್ ಚಲ್ತಾಲಿಂ. ಬಿಜ್ನೆಸ್ ವಾಡ್ ಲ್ಲ್ಯಾನ್ ಮ್ಹಜೊ ನೊವ್ರೊ ಚಡ್ತಾವ್ ಬಾಯ್ರ್‌ಚ್ಚ್ ಆಸ್ತಾಲೊ. ಮಜೆ ಹಾತ್ ಕಾಂಪ್ತಾಲೆ, ಕೂಡ್ ಅಸ್ವಸ್ಥ್ ಜಾಲ್ಲಿ. ಮಜೆಂ ಅಂತ್ಯ್ ಲಾಗಿಂ ಪಾವ್ಲಾಂ ಮ್ಹಣ್ ಮ್ಹಾಕಾ ಭೊಗ್ತಾಲ್ಲೆಂ.

“ಮಮ್ಮಿ ಆಜ್ ‘ಮದರ್ಸ್ ಡೇ’ ದೆಕುನ್ ಆಮಿ ತುಕಾ ಫುಲಾಂ ಆನಿ ಕಾರ್ಡ್ ಹಾಡ್ಲಾಂ ಆನಿ ಆಮ್ಚ್ಯಾಚ್ಚ್ ಹಾತಾಂನಿ ಬ್ರೇಕ್ ಫಾಸ್ಟ್ ಕರ್ನ್ ಹಾಡ್ಲಾಂ. ಎಂಜೋಯ್ ಮಮ್ಮಿ” ಬ್ರೇಕ್ ಫಾಸ್ಟಾಚಿ ಟ್ರೇ, ಫುಲಾಂ, ಕಾರ್ಡ್ ದೆಗೆನ್ ಆಸ್‌ಲ್ಲ್ಯಾ ಮೆಜಾರ್ ದವರ್ನ್ ಮ್ಹಜ್ಯಾ ಗಾಲಾಂಕ್ ಉಮೊ ದಾಂಬುನ್ ವಚೊಂಕ್ ಘುಂವ್ಲಿಂ ಮಲಿತಾ ಆನಿ ಸರಿತಾ.

“ಸರಿತಾ, ಮಲಿತಾ . . .” ಮಜ್ಯಾ ಉಲ್ಯಾಕ್ ತಿಂ ಪಾಟಿಂ ಘುಂವ್ಲಿಂ.

“ಕಿತೆಂ ಮಮ್ಮಿ” ಮ್ಹಜ್ಯೊ ಧುವೊ  ಮ್ಹಜ್ಯಾ ಸರ್ಶಿಂ ಮಜ್ಯಾ ಖಟ್ಲ್ಯಾರ್ ಬಸ್ಲಿಂ.

“ಹಾಂವ್ ತುಮ್ಚೊ ಮಸ್ತ್ ಮೋಗ್ ಕರ್ತಾಂ ಪುತಾ. ಹಾಂವೆ ತುಮ್ಕಾಂ ಎದೋಳ್ ಮ್ಹಣಾಸರ್ ಸಕಯ್ಲ್ ದವರ್ಲ್ಯಾರ್ ಮೂಯ್ ವರಿತ್, ವಯ್ರ್ ದವರ್ಲ್ಯಾರ್ ಕಾವ್ಳೊ ವರಿತ್ ಮ್ಹಳ್ಳ್ಯಾ ಬರಿಂ ಪೊಸ್ಲಾಂ. ಆನಿ ಮುಖಾರ್ ತುಮ್ಕಾಂಚ್ಚ್ ತುಮಿಂ ಸಾಂಬಾಳಿಜಯ್ ಪಡ್ತೆಲೆಂ. ಪೂಣ್ ಮ್ಹಜೆಂ ಬೆಸಾಂವ್ ಸದಾಂಚ್ಚ್ ತುಮ್ಚ್ಯಾ ಸಾಂಗಾತಾ ಆಸ್ತೆಲೆಂ ಪುತಾ.” ಹಾಂವೆ ಮ್ಹಜ್ಯಾ ದೊಗಾಂಯ್ ಧುವಾಂಕ್ ವೆಂಗೆಂತ್ ಆರಾಯ್ಲೆಂ.

“ಮಮ್ಮಿ ತುಕಾ ಕಾಂಯ್ ಜಾಂವ್ಚೆಂ ನಾಂ. ಡ್ಯಾಡಿ ಯೇಂವ್ದಿ ತುಕಾ ಶಹರಾಂತ್ಲ್ಯಾ ಬರ‍್ಯಾ ದಾಕ್ತೆರಾ ಲಾಗಿಂ ವರ್ನ್ ತುಜಿ ಪಿಡಾ ಗೂಣ್ ಕರ್ತಾಲೊ” ತಿಂ ಮಜ್ಯಾ ವೆಂಗೆಂತ್ಲಿಂ ಸುಟೊನ್ ದಾಂವ್ಲಿಂ.

“ವ್ಹಯ್ ಪುತಾ, ಪಯ್ಶ್ಯಾಂನಿ ಜಿವಿತ್ ಮೊಲಾಂವ್ಕ್ ಜಾಲ್ಲೆಂ ತರ್ ಕಿತ್ಲೆಂ ಬರೆಂ ಆಸ್ತೆಂ. ಮ್ಹಾಕಾಯ್ ತುಮ್ಕಾಂ ಸೊಡ್ನ್ ಮೊರೊಂಕ್ ಮನ್ ನಾಂ. ಪೂಣ್ ರಚ್ನಾರಾಚಿ ಖುಶಿ, ಅಮಿ  ಫಕತ್  ಖಾಲ್ತಿಮಾನ್ ಘಾಲಿಜಯ್” ಹಾಂವ್ ಮಜ್ಯಾ ಧುವಾಂಚಿ ಪಾಟ್ ಪಳೆವ್ನ್ ಮ್ಹಜೆಯಿತ್ಲ್ಯಾಕ್ ಘುಣ್ಗುಣ್ಲಿಂ.

ಕಾರ್ಡ್ ವಾಚುನ್, ಬ್ರೇಕ್ ಫಾಸ್ಟ್ ಕರ್ನ್, ದೆಗೆರ್ ಅಸ್ಲ್ಯಾ ಲೋಕರಾಂತ್ಲಿ ಡೈರಿ ಉಗ್ತಿ ಕೆಲಿ. ಮ್ಹಜ್ಯಾ ಕುಟ್ಮಾಕ್ ತೊಂಡಾರ್  ಸಾಂಗೊಂಕ್ ಧಯ್ರ್ ಪಾವನಾತ್‌ಲ್ಲ್ಯಾನ್ ಹಾಂವೆ ಡೈರೆಚಿ ಸಸಾಯ್ ಘೆತ್ಲಿ. ಡೈರೆಚಿಂ ಪಾನಾಂ ಘುಂವ್ಡಾಯ್ತಾನಾ ಮ್ಹಜಿ ಮತ್ ಪನ್ನಾಸ್ ವರ್ಸಾಂ ಅದ್ಲೆಂ ಮಜೆಂ ಬಾಳ್ಪಣ್ ನಿಯಾಳುಂಕ್ ಲಾಗ್ಲಿ.

***

ಅಮ್ಚೆಂ ಗ್ರೇಸ್ತ್ ಘರಾಣೆಂ ನಂಯ್.  ತಶೆಂ ಮ್ಹಣ್ ದುಬ್ಳೆಂಯ್ ನಂಯ್. ಮಧ್ಯಮ್ ವರ್ಗಾಚೆಂ. ದೋಗ್ ಮಾಲ್ಘಡ್ಯಾ ಬಾವಾಂ ಉಪ್ರಾಂತ್ಲೆಂ ನಿಮಾಣೆಂ ಜಾವ್ನ್ ಜಲ್ಮಾಲ್ಲಿ ಚಲಿ ಹಾಂವ್. ತೆಂ ಮ್ಹಜೆಂ ಅದ್ರಶ್ಟ್ ಗಿ? ಯಾ ದುರಾದ್ರಶ್ಟ್? ಹಾಂವ್ ನೆಣಾಂ. ನಿಮಾಣೆಂ ಮ್ಹಣ್ ಮ್ಹಾಕಾ ಕೊಂಡಾಟ್ಯಾನಿಂ ಕಾಂಯ್ ಪೊಸುಂಕ್ ನಾತ್ಲೆಂ. ಘರ್ ಸಾಂಬಾಳ್ಚೆಂ ಚಲಿಯಾಚೆಂ ಕಾಮ್ ಮ್ಹಳ್ಳ್ಯಾ ಬರಿಂ ಹಾಂವ್ ವಾಡೊನ್ ಯೆತಾನಾಂಚ್ಚ್ ಘರ್ಚಿಂ ಸರ್ವ್ ಕಾಮಾಂ ಕರುಂಕ್ ಶಿಕ್‌ಲ್ಲಿಂ. ಚೆಡ್ಯಾನಿಂ ಭಾಯ್ರ್ ಖೆಳೊಂಕ್ ವಚ್ಯೆತ್ ಪೂಣ್ ಚೆಡ್ವಾಂನಿ  ಘರ್ ಕಾಮ್ ಕರಿಜಯ್ ಮ್ಹಳ್ಳ್ಯಾ ಮ್ಹಜ್ಯಾ ವ್ಹಡಿಲಾಂಚ್ಯಾ ದೆಂಕ್ಣ್ಯಾಕ್ ಹಾಂವೆ ಉಪಾವ್ ನಾಸ್ತಾಂ ಘರ್ ಅನಿ ಕೂಜ್ಞ್ ಸಾಂಬಾಳಿಜಯ್ ಆಸ್ಲೆಂ. ಕುಟ್ಮಾಚಿಂ ಸಾಂಗಾತಾ ಮೆಳ್ತಾನಾ, ಸಾಂಜೆರ್ ಸಗ್ಳಿಂ ಭೊವೊಂಕ್ ಬೀಚಾಕ್ ವೆತಾನಾಂಯ್, ಹಾಂವೆ ಮಾತ್ರ್ ಘರಾ ರಾವೊನ್ ಮೊಗ್ರ್ಯಾಂ ಝಡಾಂಕ್ ಉದಾಕ್ ಘಾಲುಂಕ್ ಆಸ್‌ಲ್ಲೆಂ. ಫೆಸ್ತಾಕ್ ನವಿ ಮುಸ್ತಾಯ್ಕಿ ಜಾಯ್ ತರ್ ಹಾಂವೆಚ್ಚ್ ಆಬೊಲಿಂ ಗುಂತುನ್, ವಿಕುನ್, ಆಯಿಲ್ಲ್ಯಾ ಪಯ್ಶ್ಯಾನಿಂ ಮುಸ್ತಾಯ್ಕಿ ಘೆಜಯ್ ಆಸ್‌ಲ್ಲಿ.

ಖೆಳ್ಚ್ಯಾ ಪ್ರಾಯೆರ್ ಘರ್ ಕಾಮ್ ಕರ್ನ್ ದೀಸ್ ಸಾರ್ಲೆ. ತರ್ಣಾಟ್ಪಣಾಚ್ಯಾ ಹುಂಬ್ರಾರ್ ಪಾಡಾರಿ ಚಲ್ಯಾಂನಿ ಜಿಯೆಂವ್ಚೆಂ ಕಶ್ಟಾಂಚೆಂ ಕೆಲ್ಲೆಂ. ಇಸ್ಕೊಲಾಕ್ ಚಲೊನ್ ವೆತಾನಾ ಸೈಕಲ್, ಬೈಕ್ ರಾವವ್ನ್ ಮ್ಹಜೆ ಸಾಂಗಾತಾ ಯೆತಾಯ್ಗಿ? ಮ್ಹಾಕಾ ಪೊಟ್ಲುನ್ ಧರ್ನ್ ಬಸ್,  ತುಕಾ ಇಸ್ಕೊಲಾಕ್ ಸೊಡ್ತಾಂ ಮ್ಹಣ್ ನಾಡ್ತಾಲೆ. ಘರಾ ಸಾಂಗ್ಲ್ಯಾರ್ ಮ್ಹಜಿಂ ವ್ಹಡಿಲಾಂ ಮ್ಹಜೆರ್‌ಚ್ಚ್ ಉಪ್ರಾಟ್ತಾಲಿಂ. ದೆಕುನ್ ಚಲ್ಯಾಂಚೆಂ ಪಾಡಾರ್ಪಣ್ ಸೊಸುಂಕ್ ತಾಂಕಾನಾಸ್ತಾಂ ಹಾಂವೆ ಮಾರ್ಗಾದೇಗ್ ಸೊಡ್ನ್ ಭಿತರ್ಲ್ಯಾ ವಾಟೆಂತ್ಲ್ಯಾನ್ ಇಸ್ಕೊಲಾಕ್ ವಚೊಂಕ್ ಸುರು ಕೆಲ್ಲೆಂ. ಪಿ.ಯು.ಸಿ ಕ್ ಬಸ್ಸಾರ್ ವೆತಾನಾಂಯ್ ಹ್ಯಾ ಪಾಡಾರಿ ಚಲ್ಯಾಂಚಿ ಅತರ್ವಣಾಂ ಉಣಿಂ ಜಾಂವ್ಕ್ ನಾತ್ಲಿಂ. ಬಸ್ಸಾರ್ ಗಡ್ದಿ ಆಸ್ತಾನಾ ಜಾಯ್ ಜಾಯ್ ಮ್ಹಣ್ ಅಂಗಾರ್ ಪಡ್ತಾಲೆ. ಚಲಿಯಾಂನಿ ಮರ್ಯಾದಿನ್ ಹ್ಯಾ ಸಮಾಜೆಂತ್ ಜಿಯೆಂವ್ಚೆಂಚ್ಚ್ ಕಶ್ಟಾಂಚೆ ಮ್ಹಣ್ ಮ್ಹಾಕಾ ಭೊಗ್ತಾಲೆಂ.  ಪಿ ಯು ಸಿಚೆಂ ಫಲಿತಾಂಶ್ ಆಯಿಲ್ಲೆಂಚ್ಚ್ ಮಾಂಯ್ನ್ ಸಾಂಗ್ಲೆ –  “ಆನಿ ಶಿಕೊನ್ ರಾಸ್ ಘಾಲ್ಚೆಂ ನಾಕಾ. ಕಿತ್ಲೆಂ ಶಿಕ್ಲ್ಯಾರೀ ದುಂವ್ಚಿಂ ಘೊವಾಗೆಲ್ಯಾ ಕುಜ್ಞಾಂತ್ಲಿಂ ಆಯ್ದಾನಾ ನೆಂ. ರಾಂದುಂಕ್, ಧುಂವ್ಕ್ ಶಿಕ್ ಬರಿ ಸೈರಿಕ್ ಆಯಿಲಿಚ್ಚ್ ತುಕಾ ಕಾಜರ್ ಕರ್ತಾಂವ್.” ಮ್ಹಜಿಂ ಸ್ವಪ್ಣಾಂ ಆಂಕ್ರೆಂವ್ಚ್ಯಾ ಪಯ್ಲೆಂಚ್ಚ್ ಕರ್ಪಾಲ್ಲಿಂ.

ಅಖ್ರೇಕ್ ದೆವಾಕ್ ಮ್ಹಜೆರ್ ಭಿರ್ಮತ್ ದಿಸ್ಲಿ ದಿಸ್ತಾ. ಥೊಡ್ಯಾ ತೇಂಪಾನ್ ಎಕಾ ಗ್ರೇಸ್ತ್ ಚಲ್ಯಾಚಿ ಸೈರಿಕ್ ಮ್ಹಾಕಾ ಆಯಿಲ್ಲಿ. ಘಡ್ಯೆ ಭಿತರ್ ಕಾಜರ್ ಜಾಲೆಂ. ಮ್ಹಜ್ಯಾ ಕಬ್ಲಾತೆಚಿ ಕೊಣಾಯ್ಕಿ ಗರ್ಜ್ ಮ್ಹಣ್ ಭೊಗ್ಲಿ ನಾಂ. ಹಾಂವ್ ಹೊಕಾಲ್ ಜಾವ್ನ್ ಎಕಾ ಜಯ್ತ್ ಬೊಂಗ್ಲ್ಯಾಚಿಂ ಮೆಟಾಂ ಚಡ್ಲಿಂ.

“ಅಳೆ ಬಾ, ಮ್ಹಜಿಂ ಆವಯ್ ಬಾಪುಯ್ ಮಾತಾರಿಂ. ತಾಚಿಂ ತುವೆಂ ಬರಿ ಕರ್ನ್ ಚಾಕ್ರಿ ಕರಿಜಯ್ ದೆಕುನ್ ಹಳ್ಳೆಂತ್ಲ್ಯಾ ಚೆಡ್ವಾಕ್ ತುಕಾ ಮ್ಹಜಿ ಹೊಕಾಲ್ ಜಾವ್ನ್ ಹಾಡ್ಲಾಂ. ಹಾಂವ್ ಬಿಜ್ನೆಸಾಕ್ ಲಾಗೊನ್ ಇಲ್ಲೊಂ ಬಿಝಿ ಆಸ್ತಾಂ. ತುಂ ಮಜಿ ಖಂತ್ ಕರಿನಾಕಾ. ಮ್ಹಜ್ಯಾ ಆವಯ್ ಬಾಪಾಯ್ಕ್ ಸಾಂಬಾಳ್ಳ್ಯಾರ್ ಪುರೊ” ಮ್ಹಜ್ಯಾ ನೊವ್ರ್ಯಾಚ್ಯಾ ಉತ್ರಾಂನಿ ಫರ್ಮಾಣ್ ಆಸ್ಲ್ಯಾರೀ ಮೋಗ್ ಲಿಪೊನ್ ಆಸ್‌ಲ್ಲೊ.

“ಇತ್ಲೊ ತೇಂಪ್ ಹಾಂವೆ ಮ್ಹಜ್ಯಾ ಆವಯ್ ಬಾಪಯ್ಕ್ ಪಳೆಲಾಂ ಆಜ್ ಥಾವ್ನ್ ತುಜ್ಯಾ ಆವಯ್ ಬಾಪಯ್ಕ್ ಪಳೆಯ್ತಾಲಿಂ” ಹಾಂವೆ ಉಶ್ಯಾಕ್ ತಕ್ಲಿ ತೆಂಕ್ಲಿ.

ಮ್ಹಜಿಂ ಮಾಂಯ್ ಮಾಂವ್ ಗುಣೇಸ್ತ್ ಜಾವ್ನಾಸ್‌ಲ್ಲಿಂ. “ತುಜ್ಯಾ ಬಾಯ್ಲೆಕ್ ಇಲ್ಲೆಂ ಭಾಯ್ರ್ ಆಪವ್ನ್ ವರ್ ಪುತಾ, ತಾಕಾ ಸಗ್ಳೊ ದೀಸ್ ಅಮ್ಚಿ ಚಾಕ್ರಿ ಕರ್ನ್ ಪುರೊ ಜಾತಾಸ್ತಲೆಂ” ಸಾಸುಮಾಂಯ್ನ್ ಸಾಂಗ್ತಾನಾ “ಆಪವ್ನ್ ವರ್ತಾಂ ಆತಾಂ ಇಲ್ಲೊಂ ಬಿಝಿ ಆಸಾಂ” ಮ್ಹಳ್ಳಿ ಜಾಪ್ ತಾಂಕಾ ಮೆಳ್ತಾಲಿ.

ಮ್ಹಜ್ಯಾ ನೊವ್ರ್ಯಾಕ್ ಮ್ಹಜೆ ಖಾತಿರ್ ವೇಳ್ ನಾತ್ಲ್ಯಾರೀ ಕಾಜರ್ ಜಾವ್ನ್ ಥೊಡ್ಯಾ ವರ್ಸಾಂನಿ  ದೋನ್ ಸೊಬಿತ್ ಆಂಜಾ ತಸ್ಲ್ಯಾ ಧುವಾಂಚಿ ಆವಯ್ ಹಾಂವ್ ಜಾಲ್ಲಿಂ. ಮ್ಹಾಕಾ ಆಯಿಲ್ಲೆ ಕಶ್ಟ್ ಮ್ಹಜ್ಯಾ ಧುವಾಂಕ್ ಯೆಂವ್ಕ್ ನಜೊ ಮ್ಹಣ್ ತಾಂಚಿ ಬರಿ ಜತನ್ ಹಾಂವ್ ಘೆತಾಲಿಂ. ಥೊಡ್ಯಾ ತೆಂಪಾನ್ ಮ್ಹಜಿ ಸಾಸುಮಾಂಯ್ ಆನಿ ಮಾಂವ್ ಅಂತರ್ಲಿಂ. ಚೊವೀಸ್ ವ್ಹರಾಂ ಭುರ್ಗ್ಯಾಂಕ್ ಸಾಂಬಾಳ್ಚ್ಯಾಂತ್ ಮ್ಹಜೆ ದೀಸ್ ಉದೆತಾಲೆ ಆನಿ ಬುಡ್ತಾಲೆ. ಸವ್ಕಾಸ್ ಹಾಂವ್ ಏಕ್ ಮಿಶಿನ್ ಜಾಲ್ಲಿಂ.

***

ಆನಿ ಆಜ್ ಮ್ಹಜ್ಯಾ ಗರ್ಭಾಪೊತಿಯೆಚ್ಯಾ ಕ್ಯಾನ್ಸರಾನ್ ಮ್ಹಾಕಾ ಮ್ಹಜ್ಯಾ ಜಿಣಿಯೆಚ್ಯಾ ಅಖ್ರೇಚ್ಯಾ ಹಂತಾಕ್ ಹಾಡ್ನ್ ಪಾವಯಿಲ್ಲೆಂ. ಆಸ್ತ್ – ಬದಿಕ್, ಧನ್ – ದಿರ್ವೆಂ ಸಗ್ಳೆಂ ಆಸೊನ್ ಆಜ್ ಮ್ಹಜೆಕಡೆ ಕಿತೆಂಚ್ಚ್ ನಾಂ ಜಾಲ್ಲೆಂ!

“ಮೇಡಮ್ ಧರ್ ಒಕತ್ ಕ್ಕಾಣ್ಘೆ.” ನರ್ಸ್ ಆಶಾಚ್ಯಾ ತಾಳ್ಯಾಕ್ ಹಾಂವ್ ವಾಸ್ತವಾಕ್ ಪಾಟಿಂ ಆಯ್ಲಿಂ. ಮಾತ್ರಿಂ ತೋಂಡಾಂತ್ ಉಡವ್ನ್ ಉದಾಕ್ ತಾಳ್ಯಾಕ್ ವೊತ್ಲೆಂ.

“ಮೇಡಮ್, ಮಾತ್ರಿಂ ಮುಗ್ದಾಲ್ಯಾಂತ್ ಹಾಂವ್ ಮೆಡಿಕಲ್ ಶೊಪಾಕ್ ವಚೊನ್ ಘೆವ್ನ್ ಯೆತಾಂ” ಹಾಂವೆ ತಕ್ಲಿ ಹಾಲಯ್ಲಿ. ಆಶಾ ಖಾಲಿ ಗ್ಲಾಸ್ ಘೆವ್ನ್ ಥಂಯ್ಚೆ ಚಲ್ಲೆಂ.

ಹಾಂವೆ ಪರತ್ ಡೈರೆಚಿಂ ಪಾನಾಂ ಘುಂವ್ಡಾಯ್ಲಿಂ ಆನಿ ಗಿಚ್ಚುಂಕ್ ಲಾಗ್ಲಿಂ . .  .

“ಮ್ಹಾಕಾ ಗರ್ಬಾ ಪೊತಿಯೆಚೆಂ ಕ್ಯಾನ್ಸರ್ ಅಸಾ. ತೆಂ ಮ್ಹಜ್ಯಾ ಕುಡಿಂತ್ ಸಗ್ಳ್ಯಾನ್ ವಿಸ್ತಾರ್ಲಾಂ ದೆಕುನ್ ದಾಕ್ತೆರಾನ್ ಹಾಂವ್ ಚಡ್ ತೇಂಪ್ ವಾಂಚ್ಚಿ ನಾಂ ಮ್ಹಣ್ ಮ್ಹಾಕಾ ಸಾಂಗ್‌ಲ್ಲೆಂ. ತುಮ್ಕಾಂ ಮ್ಹಜ್ಯಾ ಪಿಡೆ ವಿಶ್ಯಾಂತ್ ಮಸ್ತ್ ಪಯ್ಲೆಂ ಹಾಂವೆ ತಿಳ್ಸಿಜಯ್ ಆಸ್ಲೆಂ, ಪೂಣ್ ತವಳ್‌ಚ್ಚ್ ವೇಳ್ ಉತ್ರಾಲ್ಲೊ ಜಾಲ್ಲ್ಯಾನ್ ತುಮ್ಕಾಂ ತಿಳ್ಸುನೀ ಕಾಂಯ್ ಫಾಯ್ದೊ ನಾತ್‌ಲ್ಲೊ. ತುಮ್ಕಾಂ ಧೊಶಿ ದೀಂವ್ಕ್ ಮನ್ ಆಯ್ಕಾಲೆಂ ನಾಂ. ಉರ್‌ಲ್ಲೆ ಥೊಡೆ ದೀಸ್ ತುಮ್ಚ್ಯಾ ಸಂಗಿಂ ಘರಾಚ್ಚ್ ಸಾರ್ತೆಲಿಂ ಮ್ಹಣ್ ಹಾಂವೆ ನಿರ್ಧಾರ್ ಘೆತ್‌ಲ್ಲೊ. ಆತಾಂ ಮ್ಹಜೆಂ ಅಂತ್ಯ್ ಲಾಗಿಂ ಪಾವ್‌ಲ್ಲ್ಯಾ ಬರಿಂ ಮ್ಹಾಕಾ ಭೊಗ್ತಾ. ಮ್ಹಜೆವಿಣೆಂ ಜಿಯೆವ್ನ್ ತುಮ್ಕಾಂ ಆತಾಂ ಸವಯ್ ಆಸಾ. ದೆಕುನ್ ಮ್ಹಾಕಾ ತುಮಿ ಚಡ್ ಮಿಸ್ಸ್ ಕರ್ಚಿಂ  ನಾಂತ್ ಮ್ಹಣ್ ಪಾತ್ಯೆತಾಂ. ಅದೇವ್ಸ್ ತುಮ್ಕಾಂ”

►  ಮೊನಿಕ, ಶಾಂತಿಪುರ.