ಸಿದ್ಧಾಂತಾಂ – The Ethics

‘ರ‍್ಯಾಡಿಸನ್ ಬ್ಲೂ’ ಹೊಟೆಲಾಚಾ ’ಬಂಜಾರಾ’ ಬಾರಾಂತ್ ಹರ್ಶೆಂಚಾಕೀ ಚಡಿತ್ ಮಾಫಾನ್ ಗಡ್ದಿ ಆಸ್‌ಲ್ಲಿ. ತಾಂಬ್ಡ್ಯಾ ಮಂದ್ ದಿವ್ಯಾ ಪಂದಾ ಬಿಲ್ಡರ್ ರಾಯಾನಾನ್ ಆಪ್ಲೊ ತಿಸ್ರೊ ಪೆಗ್ಗ್ ಕಾಬಾರ್ ಕರ‍್ತಾನಾ ಡಾ| ನರೇಶಾನ್ ಲಾಂಬ್ ಘೊಟ್ ಮಾರ‍್ಲೊ.

ರಾಯನ್ ಆನಿ ಡಾ। ನರೇಶಾಚಿ ದೀಷ್ಟ್ ಆರ್ಶ್ಯಾಂಚಾ ವಣದಿ ಬಾಯ್ಲ್ಯಾ ಝಿಳ್ಮಿಳ್ಚ್ಯಾ ಶಹರಾಚೆರ್ ಆಸ್‌ಲ್ಲಿ.

ದೋಗ್ ಮ್ಹಾನ್ ಮ್ಹನಿಸ್!!

ದೋನ್ ಸ್ವಾಭಿಮಾನಿ ವ್ಯಕ್ತಿತ್ವಾಂ!!

ಚವ್ತ್ಯಾ ಮಾಳಿಯೆಚಾ ಮುಳಾಂತ್ಲ್ಯಾ ರಸ್ತ್ಯಾರ್ ಚಲ್ಚ್ಯಾ ವಾಹನಾಂಚಾ ಪರ್ಜಳ್ಚ್ಯಾ ದಿವ್ಯಾ ಮಧೆಂ ಊಂಚ್ ಉಬಾರ್‌ಲ್ಲ್ಯಾ ಬಾಂದ್ಪಾನಿಂ ರಾತ್ಚ್ಯಾ ಕಾಳೊಕಾಂತ್ ಫಾಂಕ್ಚ್ಯಾ ಉಜ್ವಾಡಾ ಸಂಗಿಂ ನವ್ಯಾ ವರ‍್ಸಾಚಾ ಸಂಭ್ರಮಾಕ್ ಥಂಯ್ ಹಾಂಗಾಂ ಲಾಗಯಿಲ್ಲ್ಯಾ ಸೊಭಾಯೆಚ್ಯಾ ದಿವ್ಯಾಂನಿ ಶಹರಾಚಿ ಸೊಭಾಯ್ ದೊಡಿ ಕೆಲ್ಲಿ!

ತಾಂಚ್ಯಾ ದಿಷ್ಟಿ ವರ್ತುಲಾ ಭಿತರ‍್ಲ್ಯಾ ಹ್ಯಾ ಸೊಭಿತ್ ಶಹರಾಕ್ ತಾಣಿಂ ಆಪಾಪ್ಲ್ಯಾ ಶೆತಾಂನಿಂ ಭರ್ಪೂರ್ ಸೆವಾ ದಿಲ್ಲಿ.

ಪಾಟ್ಲ್ಯಾ ಪಂದ್ರಾ ವರ‍್ಸಾಂನಿ ಸಬಾರ್ ಊಂಚ್ ಊಂಚ್ ಬಾಂದ್ಪಾ ಉಬಾರ‍್ನ್ ಶಹರಾಚಿ ನಕ್ಷಾ ಬದ್ಲಿಲ್ಲಿ ಮಾತ್ರ್ ನ್ಹಯ್ ಆಸ್ತಾ ಲೊಕಾಂಚೆಂ ಜಿಯೆಂವ್ಚೆಂ ಮಟ್ಟ್ ಚಡಂವ್ಕ್ ಆಪುಣ್ ಎಕ್ಲೊಚ್ ಕಾರಣ್ ಮ್ಹಳ್ಳೊ ಭರಮ್ ರಾಯಾನಾ ಥಂಯ್ ಉಟೊನ್ ದಿಸ್ತಲೊ. ಎಕ್ಸಿಡೆಂಟ್ ತಸಲ್ಯಾ ಅನಾಹುತಾಂನಿಂ ಕಿತ್ಲೆಶ್ಯಾ ಲೊಕಾಕ್ ಮೊರ್ನಾಚಾ ದಾವ್ಲೆ ಥಾವ್ನ್ ಬಚಾವಿ ದಿಲ್ಲಿ ಕೀರ್ತ್ ಡಾ| ನರೇಶಾ ವಿಣೆಂ ದುಸ್ರ್ಯಾ ಖಂಚಾಯ್ ದಾಕ್ತೆರಾನ್ ಜೊಡ್ಚೆಂ ಧಯ್ರ್ ಕರುಂಕ್ ನಾತ್‌ಲ್ಲೆಂ!

ಪಾಟ್ಲ್ಯಾ ಥೊಡ್ಸಾ ವರ‍್ಯಾನಿಂ ತಾಂಚಿ ಇಷ್ಟಾಗತ್ ವ್ಯವಾಹಾರಿಕ್ ಭಾಗಿದಾರೆಂತ್ ಘುಟ್ ಜಾಲ್ಲಿ.

ಡಾ| ನರೇಶಾಚೆಂ ಸಂಜೀವಿನಿ ಆಸ್ಪತ್ರೆಚೆಂ ಬಾಂಧಾಪ್ ರಾಯನಾನ್ ನಿರ್ಮಿಲ್ಲೆಂ. ಉಂಚ್ಲ್ಯಾ ಮಟ್ಟಾಚಿ ತಾಂತ್ರಕತಾ ಘಕತ್ತ್ ವ್ಹಡ್ ಶಹರಾಂಕ್ ಮಾತ್ರ್ ಸೀಮಿತ್ ಮ್ಹಳ್ಳೆಂ ಚಿಂತಾಪ್ ರಾಯನಾನ್ ಘಟ್ ಮ್ಹಣ್ ರುಜು ಕೆಲ್ಲೆಂ.

ಹ್ಯಾಚ್ ದಿವ್ಯಾ ಪಂದಾ ವಿಸ್ಕೆಚ್ಯಾ ಗ್ಲಾಸಾಚಾ ಮಧ್ಯೆಸ್ತೆಂತ್ ದಾಕ್ತೆರ್ ಆನಿ ಬಾಂದ್ಪ್ಯಾ ಮಧೆಂ ಸಬಾರ್ ಸೊಲ್ಲೆ ಚಲ್‌‌‌‌‌‌ಲ್ಲೆ. ಮಹತ್ವಾಚೆ  ನಿರ್ಧಾರ್ ಹಾತಿಂ ಘೆತ್‌ಲ್ಲ್ಲೆ ಮಾತ್ರ್ ನ್ಹಯ್ ಆಸ್ತಾಂ ಪೊಂತಾಕ್ ಪರ್ಯಾಂತ್ ಪಾವಯಿಲ್ಲೆ.

ಅಶೆಂ ಆಯ್ಚೊ ಜುಂತ್ ಪರ್ಯಾಂತ್ ಮಹತ್ವಾಚೊ ಜಾವ್ನಾಸ್‌ಲ್ಲೊ. ಎಕಾಮೆಕಾಕ್ ಹಾತಾಕ್ ಹಾತ್ ಧರುನ್ ಚಲ್ತಾಲೆ ತರೀ ರಾಯನಾಕ್ ಅಪುಣ್ ಏಕ್ ಮೇಟ್ ಪಾಟಿಂ ಆಸಾ ತಶೆಂ ಭಗ್ತಾಲೆಂ.

ಜಯ್ತಾಚಾ ಉಂಚಾಯೆರ್ ತೆ ಉಬ್ತಾಲೆ ತರೀ ರಾಯನಾಕ್ ಅಪ್ಣಾ ಥೈಂ ಸಂಪೂರ್ಣ್‌ಕಾಯ್ ಭಗಾನಾತ್ಲೆಂ. ತಪಾವತ್ ಅಸ್‌ಲ್ಲ್ಲೊ!!

ಸಮಾಜೆನ್ ಬಾಂದ್ಪ್ಯಾಚಾ ಗ್ರೇಸ್ತ್‌ಕಾಯೆಕ್ ಕಾಳ್ಯಾ ದುಡ್ವಾಚೊ ರಂಗ್ ದಿಲ್ಲೊ.

ಭೂ ಮಾಫಿಯಾಚಾ ಸಾಂದ್ಯಾ ಮಧ್ಲೊ ಎಕ್ಲೊ ಮ್ಹಣ್ ವೊಲಾಯಿಲ್ಲೊ. ಭೂಗತ್ ಸಂಸಾರಾಲಾಗಿಂ ಲಾಗ್ಸಿಲೊ ಸಂಬಂಧ್ ಗಾಂಟಾಯಿಲ್ಲೊ!

ಹೆಂ ಉಣೆಂಪಣ್ ಭರ್ತಿ ಕರ್ಚೆಂ ಗರ್ಜೆಚೆಂ ಜಾವ್ನಾಸ್‌ಲ್ಲೆಂ!

ಡಾ| ನರೇಶಾಚಾ ಉಂಚಾಯೆಚಿ ಸಾವ್ಳಿ ಜಾವ್ನ್ ಅಪ್ಲ್ಯಾ ಪುತಾಕ್ ದಾಕ್ತೆರ್ ಜಾಂವ್ಕ್ ಧಾಡ್‌ಲ್ಲ್ಲೊ.

ನೀಲ್ ಮತಾಯಸ್!!

ರಾಯನಾಚಾ ಪುತಾಚಾ ನಾಂವಾಂ ಫುಡೆಂ ದಾಕ್ತೆರ್ ಮ್ಹಳ್ಳೊ ಬಿಲ್ಲೊ ಲಾಂವ್ಕ್ ಫಕತ್ ಸ ಮಹಿನೆ ಮಾತ್ರ್ ಬಾಕಿ ಆಸ್‌ಲ್ಲೆ. ಡಾ| ನರೇಶಾ ಸಂಗಿಂ ಮೆಳಪ್ ಸಂಜೀವಿನಿ ಆಸ್ಪತ್ರೆಚಿ ವಾಡವಳ್ ಕರ್ಚೆ ಸಂಗಿಂ ಅಪ್ಲ್ಯಾ ಪುತಾಚಾ ವರ್ತ್ಯಾ ಫುಡಾರಾಚಿ ಬುನ್ಯಾದ್ ಘಾಲ್ಲಿ.

ಮಾನಸಿಕ್ ಪಿಡಾ ತಶೆಂಚ್ ಅಮಾಲ್ ಪಿಯೆಣೆಂ ಆನಿ ಮಾಧಕ್ ವಕ್ತಾಂ ಸೇವನಾ ಥಾವ್ನ್ ಸುಟ್ಕಾ ಹಾಚೊ ವಿಭಾಗ್ ಪ್ರಾರಂಭ್ ಕರ್ಚೊ ನಿರ್ಧಾರ್ ಜಾಲ್ಲೊ.

ಥೊಡ್ಯಾ ದುಬ್ಳ್ಯಾಂಕ್ ಧರ್ಮಾರ್ಥ್ ಸೆವಾ ದೀವ್ನ್ ಸಮಾಜ್ ಸೆವಕಾಂಚಾ ಪಂಗ್ತೆರ್ ನಾಂವ್ ಕಾಂತಂವ್ಕ್ ಅತ್ರೆಗ್ಲೆ ಮಾತ್ರ್ ನ್ಹಯ್ ಆಸ್ತಾಂ ಶಿಕ್ಪಾ ಕೇಂದ್ರ್ ಮ್ಹಣ್ ನಾಂವಾಡ್‌ಲ್ಲ್ಯಾ ಶಹರಾಂತ್ಲ್ಯಾ ಹಜಾರೊಂ ವಿದ್ಯಾರ್ಥಿಂ ಥಂಯ್ ವ್ಹಡಾ ಮಾಫಾನ್ ವಿಸ್ತಾರೊನ್ ಆಯಿಲ್ಲ್ಯಾ ಮಾದಕ್ ದ್ರವ್ಯಾಂ ಸೇವನಾಂಚಾ ಸವಯೆಕ್ ಪಡ್‌ಲ್ಲ್ಯಾ ಭುರ್ಗ್ಯಾಂಚಾ ಗ್ರೇಸ್ತ್ ಬೊಲ್ಸಾಂನಿಂ ಶೀದಾ ಹಾತ್ ಗಾಲುಂಕ್ ಯೆವ್ಜಣಿ ಜಾವ್ನಾಸ್‌ಲ್ಲಿ.

“ಹ್ಯಾಪಿ ನ್ಯೂ ಇಯರ್ 2023”

ನರೇಶ್ ಆನಿ ರಾಯನಾನ್ ಎಕಾಮೆಕಾಕ್ ಹಾತ್ ಹಾಲಯ್ಲೆ! ಬಾಂದ್ಪಾಂಚಾ ತಕ್ಲೆರ್ ರಂಗಾಳ್ ವೀಜ್ ದಿವೆ ದಾಂವ್ತಾಲೆ!

ಟಪ್…ಟುಪ್..ಮ್ಹಳ್ಳ್ಯಾ ಅವಾಜಾ ಸಂಗಿಂ ವಿವಿಧ್ ಬಣಾಂನಿಂ ಆನಿ ವಿವಿಂಗಡ್ ಥರಾನ್ ಅಂತ್ರಾಳಾರ್ ಫುಗೆಟ್ಯೊ ಫುಟ್ತಾಲ್ಯೊ.

ದೊನ್ಶಿ ಮಿಟರಾಂ ಪಯ್ಸ್ ದೇವ್ ಮಂದಿರಾಚಾ ಪಾಕ್ಯಾರ್ ಸೊಡಾಯಿಲ್ಲೆ ಝಿಳ್ಮಿಳ್ಚೆ ರಂಗಾಳ್ ದಿವೆ ರೈಲಾಬರಿಂ ಧಾಂವ್ತಾಲೆ.

ಜಯ್ತ್ ಖುರ್ಸಾಚೆರ್ ತಾಂಬ್ಡೆ ದಿವೆ ಚಿಕು..ಪುಕು ಮ್ಹಣೊನ್ ಜಳ್ತಾಲೆ ತರ್ ಅನ್ಯೇಕಾ ಪೊಂತಾರ್ ಹಾತ್ ಉಸವ್ನ್ ರಾವ್‌ಲ್ಲ್ಯಾ ಇಮಾಜೆಪಂದಾ ಥಾವ್ನ್ ದಿವ್ಯಾಚಾ ಉಜ್ವಡಾಂತ್ ದೂದಾಬರಿಂ ದಿಸ್ಚ್ಯಾ ಸಂಗಿಂ ಆಪ್ಣಾಕ್ ಆಪಯ್ತಾ ತಸೆಂ ಭಗ್ತಾಲೆಂ.

ರಯಾನಾಚೊ ಮೊಬಾಯ್ಲ್ ಅವಾಜ್ ಕರುಂಕ್ ಲಾಗ್ಲೊ.

ಅಪರಿಚಿತ್ ಫೋನಾಕ್ ಗಣ್ಣೆ ಕರಿನಾತ್‌ಲ್ಲ್ಯಾ ರಯಾನಾಕ್ ತಿಸ್ರೆ ಪಾವ್ಟಿಂ ಉಬಾರುಂಕ್‌ಚ್ ಪಡ್ಲೆಂ.

ರಾಯನ್ ಮಥಾಯಸ್

ತೆವ್ಶಿಲೊ ತಾಳೊ ಜವಾಬೆಕ್ ರಾಕಾನಾಸ್ತಾನಾ ಮುಂದಾರುಂಕ್ ಲಾಗ್ಲೊ.

“ಹಾಂವ್ ಎಸ್.ಪಿ. ಸರವನನ್ ಉಲಯ್ತಾಂ ತುಜೊ ಪೂತ್ ನೀಲ್ ಮತಾಯಸಾಕ್ ಆಮಿ ಪೊಲಿಸ್ ಕಸ್ಟಡಿಂತ್ ಘೆತ್ಲಾ”

“ಹ್ಯಾ ವೆಳಾರ್ ಹಾವೆಂ ಯೆಂವ್ಚಿ ಗರ್ಜ್‌ಗೀ ಸರ್? ವಿಶಯ ಕಿತೆಂಯ್ ಗಂಭೀರ್?” ರಯಾನಾಕ್ ಕಿತೆಂ ಉಲಂವ್ಚೆಂ ಮ್ಹಣ್ ಸುಸ್ತಾಲೆಂ ನಾಂ. ತುರ್ತಾನ್ ತುವೆಂ ಎಸ್.ಪಿ ಒಫಿಸಾಕ್ ಯೆಂವ್ಚಿ ಗರ್ಜ್ ಆಸಾ. ಉಂಚ್ಲ್ಯಾ ದರ್ಜ್ಯಾಚ್ಯಾ ಪೊಲಿಸ್ ಅಧಿಕಾರಿಚೆರ್ ಹಲ್ಲ್ಯಾಚೊ ತಾಚೆರ್ ಗಂಭೀರ್ ಆರೋಪ್ ಆಸಾ. ಸೊರ‍್ಯಾಚಾ ಆಮಾಲಾರ್ ತಶೆಂಚ್ ಮಾದಕ್ ದ್ರವ್ಯಾಚಾ ಸೇವನಾಂತ್ ಪೊಲಿಸಾಂ ಸಂಗಿಂ ಅವಿಧೇಯ್ ವರ್ತನ್ ಕೆಲ್ಲೊ ಅರೋಪ್ ಆಸಾ. ಕೊಡ್ತಿಕ್ ಹಾಜರ್ ಕರುನ್ 14 ದಿಸಾಂಚಿ ಪೊಲಿಸ್ ಕಸ್ಟಡಿ ಘೆತೆಲ್ಯಾಂವ್.. ..  ಉಪ್ರಾಂತ್ ಚಾರ್ಜ್‌ಶೀಟ್”  ಎಸ್ಪಿ ಸರವನನಾನ್ ಸುಡಾಳ್ ಉತ್ರಾಂನಿಂ ಕಳಯ್ಲೆಂ.

ಎಸ್ಪಿ ಸರವನನ್ ಐಪಿಎಸ್ ಅಧಿಕಾರಿ.

ಶಹರಾಚೊ ಸಿಂಗಮ್ ಮ್ಹಣೊನ್ ಲೊಕಾನಿಂ ತಾಕಾ ಬಿರುದ್ ದಿಲ್ಲೊ. ನಿಷ್ಟಾವಂತ್ ಆನಿ ದೈರಾಧಿಕ್ ಮ್ಹಣೊನ್ ತಾಚ್ಯಾ ಯೆಣ್ಯಾ ಪಯ್ಲೆಂಚ್ ಖಬ್ರೆರ್ ಆಸಲ್ಲೊ.

ಎಕಾಚ್ ಹಫ್ತ್ಯಾ ಭಿತರ್ ಲಾಂಬ್ ಕಾಳಾ ಥಾವ್ನ್ ಚಲವ್ನ್ ಅಯಿಲ್ಲ್ಯಾ ಮಟ್ಕಾ ಅಡ್ಡ್ಯಾಂಚೆರ್ ಧಾಡ್ ಗಾಲ್ನ್ ಬಂದ್ ಕರಯಿಲ್ಲೆ!

ಜುಗಾರ್ ತಶೆಂಚ್ ಹೆರ್ ವ್ಯವಹಾರ್ ಕರ್ಚಾ ಹೊಟೆಲ್ ಮ್ಹಾಲಿಕಾಂಕ್ ಲೈಸನ್ಸ್ ರದ್ಧ್ ಕರ್ತಾಂ ಮ್ಹಣೊನ್ ಧಮ್ಕಿ ದಿಲ್ಲಿ.

ಖುನಿಯೆ ಆರೋಪಿ ಆನಿಂ ರೌಡಿ ಗ್ಯಾಂಗಾಂ ಚಲಯ್ತೆಲ್ಯಾಂಕ್ ತಾಂಚಾ ಮಾಟ್ಯಾಂ ಥಾವ್ನಾ ಭಾಯ್ರ್ ವೋಡ್ನ್ ಉಗ್ತ್ಯಾ ರಸ್ತ್ಯಾಂನಿ ಎನ್‌ಕೌಂಟರ್ ಕರ್ತಾಂ ಮ್ಹಣೊನ್ ಪ್ರೆಸ್ಸ್ ಕೊನ್ಫರೆನ್ಸಾಂತ್ ಗರ್ಜಾಲ್ಲೊ.

ಆಯ್ಲೆವಾರ್ ವಿದ್ಯಾರ್ಥಿನಿಚೆರ್ ಗ್ಯಾಂಗ್ ರೇಪ್ ಕೆಲ್ಲ್ಯಾ ಆರೋಪ್ಯಾಂಕ್ ಉಗ್ತ್ಯಾನ್ ಧಾಂವ್ಡಾವ್ನ್ ಮ್ಹಳ್ಳೆ ಬರಿಂ ಮಾರ್‌ಲ್ಲೆಂ.

ಭಷ್ಟಾಚಾರಿ ಆನಿ ಸ್ತ್ರೀಯಾಂಚೆಂ ಶೋಷಣ್ ಕರ್ತೆಲ್ಯಾಂಚೆರ್ ತಾಣಿಂ ಕಠಿಣ್ ಶಿಣ್ ಉಚಾರ್‌ಲ್ಲೊ.

ಉಗ್ತ್ಯಾನ್ ಪಯ್ಶೆ ವಿಚಾರ್ಚ್ಯಾ ಪೊಲಿಸ್ ಹವಾಲ್ದಾರಾಂಚೆರ್ ಕಠಿಣ್ ಕ್ರಮ್ ಘೆತ್‌ಲ್ಲೆಂ.

ಶಹರಾಂತ್ ಕಾನೂನ್ ವ್ಯವಸ್ಥೆಂತ್ ಸುಧ್ರಾಪ್ ದಿಸೊನ್ ಯೆತಾಲೊ ದುಡ್ವಾಚಾ ಬಳಾನ್ ಕಿತೆಂಯ್ ಕರ್ಯೆತಾ ಮ್ಹಣ್ ಚಿಂತಾಪ್ ಆಸ್‌ಲ್ಲ್ಯಾ ಗ್ರೇಸ್ತಾಂಕ್ ಏಕ್ ಸವಾಲ್ ಜಾವ್ನ್ ಉಬೊ ಜಾಲ್ಲೊ. ಕುಟ್ಮಾಚಿ ಗ್ರೇಸ್ತ್‌ಕಾಯ್ ದೆಗೆನ್ ಲೊಟುನ್ ಉದ್ಧೇಶ್‌ಪೂರ್ವಕಿಂ ಐಪಿಎಸ್ ಅಧಿಕಾರಿ ಜಾಲ್ಲೊ ಮಳ್ಳೆಂ ತಾಚೆ ವಿಶಿಂ ಅಯ್ಕೊಂಕ್ ಮೆಳ್ತಾಲೆಂ. ‘ಹರ್ಯೆಕಾ ವಿದ್ಯಾರ್ಥಿನ್ ಆಪ್ಲ್ಯಾ ಜಿಣಿಯೆಂತ್ ಆಪ್ಲಿಂಚ್ ಮ್ಹಳ್ಳಿಂ ಸಿದ್ಧಾಂತಾಂ ತಯಾರ್ ಕರುಂಕ್ ಜಾಯ್. ತಿತ್ಲೆಂ ಮಾತ್ರ್ ನ್ಹಯ್ ಆಸ್ತಾ ಆಪ್ಲ್ಯಾ ಸಿದ್ಧಾಂತಾ ಪರ್ಮಾಣೆ ಜಿಯೆಂವ್ಕ್ ಪ್ರಯತ್ನ್ ಕರುಂಕ್ ಜಾಯ್. ತವಳ್ ತೊ ಆಪ್ಲ್ಯಾ ಶೆವೊಟಾಕ್ ಪಾವ್ತಲೊ.’

ಅಸಲ್ಲ್ಯಾ ಉತ್ತೇಜನಕಾರಿ ಉತ್ರಾಂ ಮಾರಿಫಾತ್ ತೊ ತರ್ನಾಟ್ಯಾಂಚೊ ಹೀರೋ ಜಾಲ್ಲೊ.

ರಾಯನಾಚಾ ಕಾರಾಚಿಂ ರೊದಾಂ ಎಸ್ಪಿ ದಫ್ತರಾ. ತೆವ್ಶಿಂ ಧಾಂವ್ತಾನಾ ಚಾರ್ ಪೆಗ್ ಸೊರೊ ತಾಕಾ ಶಾಂತ್ ದವ್ರುಂಕ್ ಸಕ್ಲೊ ನಾ.

ಪಯ್ಲ್ಯಾ ದಿಸಾ ಥಾವ್ನಾ ಹೊ ಗಿಳುಂಕ್ ಜಾಯ್ನಾತ್ಲ್ಯಾ ಹಾಡಾಬರಿಂ ಜಾವ್ನಾಸ್‌ಲ್ಲೊ.

ಹೊ ಸಮಾಧಾನೆಂತ್ ಜಿಯೆಂವ್ಕ್ ಸೊಡಿನಾ, ರೇಂವ್ ಮಾಫಿಯಾ ಸಂಪೂರ್ಣ್ ಥರಾನ್ ಬಂಧ್ ಕರ್ತಾಂ ಮ್ಹಣೊನ್ ಖಬ್ರೊ ಚಡ್ತಿಕ್ ದಿಸಾಳ್ಯಾಂಚ್ಯಾ ಪಯ್ಲ್ಯಾ ಪಾನಾರ್ ಉದೆಲ್ಲ್ಯೊ. ಕಾನೂನ್ ಬಾಹಿರ್ ರಿತಿರ್ ರಾತಿಂಚಾ ಕಾಳೊಕಾಂತ್ ರೇಂವ್ ಕಾಡುನ್ ಟೆಂಪೊ, ರಿಕ್ಷಾ ತಸಲ್ಯಾ ವಾಹನಾಂನಿ ಸಾಗ್ಸುನ್ ದೊಡ್ಯಾ ಯಾ ತಿದೊಡ್ಯಾ ಮೊಲಾಕ್ ಅನೈತಿಕ್ ಜಾವ್ನ್ ಬಿಲ್ಡರಾಂಕ್ ವಿಕ್ಚ್ಯಾ ಚೊರಿಯಾಂ ವ್ಯಾಪರಿಸ್ತಾಂಕ್ ಜಯ್ಲಾಚ್ಯಾ ಸರಳಾಂ ಪಾಟ್ಲ್ಯಾನ್ ಲೊಟ್ತಾಂ. ತಾಂಚೆ ದೊಣಿ ಸೀಜ್ ಕರುನ್ ತಾಬ್ಯಾಂತ್ ಘೆತಾಂವ್. ತಾಂಚಿ ವಾಹನಾಂ ರಸ್ತ್ಯಾಕ್ ದೆಂವ್ಚಿಂನಾಂತ್. ಆನಿ ಅಸಲಿ ಚೊರಿಯಾಂ ರೇಂವ್ ಘೆವ್ನ್ ಕಾಳ್ಯಾ ಬಾಜಾರ‍್ಯಾಂಕ್ ಉತ್ತೇಜನ್ ದಿತಲ್ಯಾ ಸರ್ವ್ ಬಿಲ್ಡರ್ ಮಾಫಿಯಾ ಬಂದ್ ಕರ್ತಲೊಂ ಮ್ಹಣ್ ಸಿಂಹಾಬರಿಂ ಗರ್ಜಾಲ್ಲೊ ತೊ.

ತಾಚೆವಿಶಿಂ ದೋನ್ ಸಂಗ್ತಿ ಲೊಕಾನಿಂ ಪಾರ್ಕಿಲ್ಲೆಂ.

ಪಯ್ಲೆಂ ಎಸ್ಪಿ ಸರವನಾನ್ ಉಲಯ್ತನಾ ಮುಖ್ಲ್ಯಾಂಕ್ ಮೌನ್ ರಾವೊಂಕ್ ಪಡ್ತಾಲೆಂ!

ದುಸ್ರೆಂ ಸದಾಂಚ್ ಛಾಪೊ ಆನಿ ಡಿಜಿಟಲ್ ಮಾಧ್ಯಮಾಂನಿಂ ಖಬ್ರೆರ್ ಅಸ್ಚೆಂ ತಾಕಾ ಪಸಂದೆಚೆಂ ಮ್ಹಣ್!

ಪಾಟ್ಲ್ಯಾ ದಿಸಾಂನಿಂ ರಾಯನಾಚಾ ಮೆನೆಜರಾನ್ ರಾಯನಾಕ್ ಚತ್ರಾಯ್ ದಿಲ್ಲಿ. ಹ್ಯಾ ವೆಳಾರ್ ತಾಕಾ ಉಗ್ದಾಸಾಕ್ ಆಯಿಲ್ಲೆಂ ಚೊರಿಯಾಂ ರೇಂವ್ ಘೆಂವ್ಚೆ ವಿಶಿಂ ಪೊಲಿಸಾಂಕ್ ಖಬರ್ ಪಾವ್‌ಲ್ಲಿ. ಪೊಲಿಸ್ ರಾಯನಾಕ್ ‘ಕೊರ್ನರ್’ ಕರುಂಕ್ ಜಾಳ್ ಉಡವ್ನ್ ಆಸಾತ್ ಮ್ಹಣೊನ್. ತವಳ್ ರಾಯನಾನ್ ಗಣ್ಣೆಂ ಕರುಂಕ್ ನಾತ್‌ಲ್ಲೆಂ. ಆತಾಂ ರಾಯನಾಕ್ ಮೆನೆಜರಾಚಾ ಉತ್ರಾಂತ್ ಸತ್ ದಿಸೊನ್ ಯೆತಾಲೆಂ.

01:45 ವರಾರ್ ಎಸ್ಪಿ ದಫ್ತರಾಂತ್ ಪ್ಲಾಸ್ಟಿಕ್ ಕದೆಲಾರ್ ರಾಯನಾಕ್ ಬಸ್ಕಾ ದಿಲ್ಲಿ. ಪುತಾಚೆಂ ಮೊಡ್‌ಲ್ಲೆಂ ಚಸ್ಮಾ ಮೆಜಾರ್ ಪಡೊನ್ ಅಸಲ್ಲೆಂ. ನೀಲಾಚಾ ದೊಳ್ಯಾಂಚಾ ಆಸ್ಡ್ಯಾಂ ವಯ್ರ್ ಥಾವ್ನಾ ಬಾರೀಕ್ ರಗ್ತಾಚಿ ಝರ್ ದೆಂವೊನ್ ಯೆಂವ್ಚೆಂ ಪಳೆತಾನಾ ಘಡಿತಾಚಿ ಗಂಭೀರಾಯ್ ಸಮ್ಜೊಂಕ್ ರಾಯನಾಕ್ ವೇಳ್ ಲಾಗ್ಲೊನಾ.

“ಮಿ। ಮಥಾಯಸ್ ತುಜ್ಯಾ ಪುತಾಚೆರ್ ಐಪಿಸಿ ಸೆಕ್ಷನ್ 353  ಪ್ರಕಾರ್ ಎಕಾ ಸಾರ್ವಜನಿಕ್ ಸೆವಕಾಚೆರ್ ಸರ್ಕಾರಾನ್,  ಶಿಸ್ತ್ ಆನಿ ಕಾನೂನ್ ಪಾಳ್ಚೆ ಖಾತಿರ್ ನಮಿಯಾರ‍್ಲೆಲ್ಯಾ ವಿಶೇಷ್ ದಳಾಚೆರ್ ಹಲ್ಲೊ ಕರ್ಚೆಂ ಪ್ರಯತ್ನ್ ಕೆಲಾ. ಸ್ಪಷ್ಟ್ ಸಾಂಗ್ಚೆಂ ತರ್ ಪೊಲಿಸ್ ದಳಾಚೊ ಮುಖೆಲಿ, ಉನ್ನತ ಅಧಿಕಾರಿ ಮ್ಹಣ್ಚೆ ಮ್ಹಜೆರ್ ಯಾನೆ ಎಸ್ಪಿ ಸರವನನಾಚೊ ಕೊಲ್ಲರ್ ಆರಾಯ್ಲಾ”’ ಎಕಾ ಘಡಿಯಚೆಂ ಮೌನ್ ಥಂಯ್ಸರ್ ಆಸ್‌ಲ್ಲೆಂ.

“ಹಾಚಿ ಗಂಭೀರತಾ ತುಮಿಂ ಜಾಣಾಂತ್‌ಗೀ?”

“ಹ್ಯಾ ಕ್ರಿಮಿನಲ್ ವರ್ತನಾ ಖಾತಿರ್ 7 ವರ‍್ಸಾಂಚಾ ಸಜೆಜೊ ಅವ್ಕಾಸ್ ಆಸಾ. ಗ್ರೇಸ್ತ್‌ಕಾಯ್ ಅಸ್ಲ್ಯಾರ್ ಕಿತೆಂ ಜಾಯ್ ತೆಂ ಕರ್ಯೆತಾ ಮಳ್ಳೆಂ ಚಿಂತಾಪ್ ಗೀ?”

ಹಾತಾಂತ್ಲ್ಯಾ ಮೊಬಾಯ್ಲೊಚೆರ್ ಬೊಟಾಂ ಚರವ್ನ್ ತಾಣಿಂ ಮುಂದರಿಲೆಂ.

“ಯುರೋಪ್ ರಾಷ್ಟ್ರಾಂನಿ ಚವ್ದಾ ವರ‍್ಸಾಂ ಕಠೀಣ್ ಸಜಾ. ಗಲ್ಫ್ ರಾಷ್ಟ್ರಾಂನಿ ಘಯರಿಂಗ್ ಸ್ಕ್ವಾಡಾ ಥಾವ್ನಾ ಮೊರ್ತಾ ಪರ್ಯಾಂತ್ ಗುಳೊ ಮಾರ‍್ತಾತ್”

“ಮೆಜಾರ್ ಆಸ್‌ಲ್ಲ್ಯಾ ಮೆಡಿಕಲ್ ರಿಪೋರ್ಟಾಚೆರ್ ಬೋಟ್ ಜೊಕುನ್ ಕಳೊನ್ ಆಯಿಲ್ಞಾ ಪರ್ಮಾಣೆ ನೀಲ್ ಮತಾಯಸಾಚಾ ರಗ್ತಾಂತ್ ಆಲ್ಕೋಹಾಲ್ ಅಂಶ್ ಮಳ್ಳ್ಯಾರ್ Blood Alcohol Content (BAC) 0.04 ಚಾಕೀ ಚಡಿತ್ ಮಾಫಾನ್ ಆಸಾ. ಅನಿ ಹೆಂ ವಾಹನ್ ಚಲಂವ್ಕ್ ಅಡ್ವಾರ‍್ಲೆಲೆಂ ಜಾವ್ನಾಸಾ. 0.24 BAC ಹಾಚಾ ರಗ್ತಾಂತ್ ಮೆಳ್ಳಾಂ ಜಾಲ್ಲ್ಯಾರ್ ಲಗ್ಭಗ್ 6 ವಾಂಟ್ಯಾಂನಿ ಚಡಿತ್ ಸೇವನ್ ಕೆಲಾಂ. ಇತ್ಲೊ ಅಂಶ್ ಎಕಾ ಕಠಿಣ್ ಆಮಾಲಿ ಅಲ್ಕೊಹಾಲಿಕಾಚಾ ಮಾತ್ರಾಚಾಕೀ ಚಡಿತ್!! ಅಜಾಪಾಚಿ ಗಜಾಲ್ ಮಳ್ಳ್ಯಾರ್ ಏಕ್ ದಾಕ್ತೆರ್ ಜಾಂವ್ಚ್ಯಾ ಮನ್ಶಾನ್ ಅಪ್ಲೆಂ ಲಿವರ್ ಕಿತ್ಲೊ ತೇಂಪ್ ಸಾಂಗಾತ್ ದಿತಾಲೆಂ ಮ್ಹಣೊನ್ ಸಮ್ಜೊಂಕ್ ಜಾಯ್.”

ಎಸ್ಪಿ ಮುಖ್ಲ್ಯಾಂಕ್ ಉಲಂವ್ಕ್ ಆವ್ಕಾಸ್ ದಿನಾತ್‌ಲ್ಲೊ.

“ಗೂಂಡಾಯೆಚೆ ಆರೋಪ್ ಮಾಂಡ್ಚಿ ರೀತ್ ಸರವನಾಚಿ ಕಲಾ ಜಾವ್ನಾಸ್‌ಲ್ಲಿ. ತುಂ ಅಮಾಲ್ ಪಿಯವ್ನ್ ವಾಹನಾಂ ಥಾವ್ನ್ ಪಡ್ಲೊಯ್ ತರ್ ಸರ್ವಾಂಚಾಕೀ ಫುಡೆಂ ಮ್ಹಜೆ ಹವಾಲ್ದಾರ್ ತುಕಾ ಉಬಾರ‍್ನ್ ಆಸ್ಪತ್ರೆಕ್ ಪಾವವ್ನ್ ಜೀವ್ ವಾಂಚಯ್ತಾ. ತುಜ್ಯಾ ಘರ‍್ಚಿಂ ಉಪ್ರಾಂತ್ ಪಾವ್ತಲಿಂ. ಅನುಪ್ಕಾರಿ ಖಂಚಿಂ ಥೂ ತುಮ್ಚ್ಯಾ ಜನ್ಮಾಕ್!! ತುಮಿಂ ಬುದ್ವಂತ್ ಜಾಂವ್ಕ್ ಪುರೊ ಪೂಣ್ ಜಾಣ್ವಾಯ್ ನಾತ್‌ಲ್ಲಿಂ” ದಾಂತ್ ಕಿರ್ಲುನ್ ಮ್ಹಳ್ಳೆ ಪರಿಂ ಎಸ್ಪಿನ್ ನೀಲಾಚ್ಯಾ ಹಾತಾಂತ್ಲೊ ಮೊಬಾಯ್ಲ್ ಆರಾಯ್ಲೊ. ಜಬರ್‌ದಸ್ತೆನ್ ಮ್ಹಳ್ಳ್ಯಾಬರಿಂ ಮೊಬಾಯ್ಲಾಚೆಂ ಲೋಕ್ ಉಗ್ತೆಂ ಕರವ್ನ್ ಗ್ಯಾಲಾರಿಂತ್ ಸೊಧುಂಕ್ ಲಾಗ್ಲೊ.

“ಹಾಕಾಯೀ ಹಾಂವ್ ಸೊಡಿನಾಂ. ಹ್ಯಾ ಚೆಡ್ವಾಚೆಂ ನಾಂವ್ ಕಿತೆಂ?”

“ರುಚಿತಾ ಅಗರ್‌ವಾಲ್!” ಪಯ್ಲೆಂ ಪಾವ್ಟಿಂ ನೀಲ್ ಉಲಯ್ಲೊ. ಥೊಡ್ಯಾಚ್ ವೇಳಾ ಪಯ್ಲೆಂ ಕಾಡ್‌ಲ್ಲೆ ಥೊಡೆ ಫೊಟೊ ಆನಿ ವೀಡಿಯೋ ರಾಯಾನಾಕ್ ದಾಖವ್ನ್ “ಪಳೆ ಆನಿ ಸಂತೊಸ್ ಪಾವ್! ತುಜ್ಯಾ ಗೈರ್‌ಹಾಜ್ರೆನ್ ತುಜೊ ಪೂತ್ ಕಿತೆಂ ಕರ್ತಾ ಮ್ಹಣೊನ್!!

ನೀಲ್ ಆನಿಂ ರುಚಿತಾ ಎಕಾಮಕಾಕ್ ಚಿಡ್ಕೊನ್, ಎಕಾಮೆಕಾಕಾ ಪೊಟ್ಲುನ್ ಧರುನ್ ಸಿಗ್ರೆಟ್ ವೊಡ್ಚೊ.. ಎಕ್ಲೊ ದುಸ್ರ್ಯಾಚ್ಯಾ  ವೊಂಠಾಂಕ್ ವೊಂಠ್ ಮೆಳವ್ನಾ ಚುಂಬನ್ ದಿಂವ್ಚೊ! ಅಶ್ಲೀಲ್ ಪಿಂತುರಾಕ್ ತಾಳ್ ಪಡ್ಚ್ಯಾರಿತಿಚ್ಯೊ – ತಸ್ವಿರ‍್ಯೊ!

ರಾಯನ್ ಅಸಹಾಯಕಾ ಜಾಲ್ಲೊ! ಜಿಣ್ಯೆಂತ್ ಪಯ್ಲ್ಯಾ ಪಾವ್ಟಿಂ.

ವಿಶಯ್ ನಾಜೂಕ್ ನಾತ್‌ಲ್ಲೊ ತರ್!

ಪೊಲಿಸಾಂಚಾ ಧಪ್ತರಾಕ್ ವೆಚಿ ಗರ್ಜ್ ತಾಕಾ ನಾತ್‌ಲ್ಲಿ.

ಏಕ್ ಘೊನಾಂತ್ ಎಮ್.ಎಲ್.ಎ. ತಾಚೆಂ ಕಾಮ್ ಕರ್ತಾ ಆಸ್‌ಲ್ಲೊ.

ವಕೀಲಾಂಚೊ ಜಮೊ ತೊ ಉಬೊ ಕರ್ತೊ ಅಸ್‌ಲ್ಲೊ.

ಪೂಣ್ ಎಸ್ಪಿನ್ ಸರ್ವ್ ದಾರ್ವಾಟೆ ಬಂದ್ ಕೆಲ್ಲೆ.

ರಾಜಕೀಯ್ ಒತ್ತಡ್ ಚಡಿತ್ ಸಂಕಷ್ಟಾಂತ್ ಗಾಲ್ಚೆಬರಿಂ ಆಸ್‌ಲ್ಲೆಂ. ಕೊಡ್ತಿಂತ್ ಕೇಸ್ ಜಾಲ್ಯಾರ್ ಪುತಾಕ್ ಪೊಲಿಸ್ ಕ್ಲಿಯೆರನ್ಸ್ ನಾಸ್ತಾನಾ ದಾಕ್ತೆರಾಚಿ ಡಿಗ್ರಿ ಹಾತಾಕ್ ಪಾವಾನಾ ಜಾವ್ನಾಸ್‌ಲ್ಲಿ.

ಜಾಳ್ ಸಾರ್ಕ್ಯಾ ಜಾಗ್ಯಾರ್ ಪಡ್‌ಲ್ಲೆಂ.

‘ಹೊ ಕಿತೆಂ ಆಶೆತಾಗಾಯ್ ?’ ರಾಯನ್ ಅಸಹಾಯಕ್ ರಿತಿರ್ ಪುಸ್ಪುಸ್ಲೊ.

ನೀಲ್ ಸಗ್ಳೊಚ್ ಘುಸ್ಪಡ್‌ಲ್ಲೊ!!

ತಾಣೆಂ ಪಯ್ಲೆಂ ಜಾವ್ನ್ ಎಸ್ಪಿಚಾ ಆಂಗಾರ್ ಹಾತ್ ಘಾಲುಂಕ್ ನಾತ್‌ಲ್ಲೊ.

“ತುಮಿ ಖಂಚಾ ಅಪ್ರಾಧಾ ಖಾತಿರ್ ಮ್ಹಾಕಾ ಹಾಂಗಾ ಉಬೊ ಕೆಲಾ ಮ್ಹಣೊನ್ ಮ್ಹಾಕಾ ಸಮ್ಜಾನಾ. ಪಯ್ಲೆಂ ಜಾವ್ನ್ ತುಮಿ ಮ್ಹಜೊ ಕೊಲ್ಲರ್ ಆರಾವ್ನ್ ಸರ್ವಾಂ ಮಧೆಂ ಥಾವ್ನ್ ವೋಡ್ನ್ ಹಾಡ್‌ಲ್ಲೊ ಹಾತ್ ಘಾಲುಂಕ್ ಕಾರಣ್. ತುಮಿ ಸಾದ್ಯಾ ವಸ್ತುರಾಂತ್ ಆಸ್‌ಲ್ಲ್ಯಾತ್,  ತುಮ್ಚ್ಯಾ ಆಂಗಾರ್ ಹಾತ್ ಘಾಲುಂಕ್ ಕಾರಣ್.  ಸ್ವರಕ್ಷಣೆ ಖಾತಿರ್ ಸೊಡ್ಲ್ಯಾರ್ ಆನಿ ಕಸಲೊಚ್ ಉದ್ದೇಶ್ ನಾತಲ್ಲೊ. ತುಮಿ ಎಸ್ಪಿ ಮ್ಹಣೊನ್ ಕಳಿತ್ ಆಸ್‌ಲ್ಲೆಂ ತರ್ ಹಾಂವ್ ಬಿಲ್ಕುಲ್ ತಸಲೆಂ ನಡ್ತೆಂ ದಾಕಯ್ತೊಂ ನಾಂ. ಹಾಂವ್ ಮಾತ್ರ್ ನ್ಹಯ್ ಮ್ಹಜ್ಯಾ ಜಾಗ್ಯಾರ್ ದುಸ್ರೊ ಕೋಣ್ ಅಸ್‌ಲ್ಲೊ ತರ್‌ಯಿ ಪಾಡ್ ವರ್ತನ್ ದಾಖಂವ್ಚೆಂ ಧಯ್ರ್ ಘೆತೊ ನಾ.”

“ದುಸ್ರೆಂ ಜಾವ್ನ್ BAC (Blood Alcohol Content) ರಿಪೊರ್ಟ್ ಫಟ್ ಜಾವ್ನಾಸಾ ನಕ್ಲಿ ಜಾಂವ್ಕ್‌ಯೀ ಸಾಧ್ಯತಾ ಆಸಾ. ಮ್ಹಾಕಾ ಫಸಂವ್ಚ್ಯಾ ಇರಾದ್ಯಾನ್ ಪರ್ಯಾಂತ್ ಸಂಭವ್ ಆಸಾ. ಹಾಂವ್ ದಾಕ್ತರ್ ಜಾಲ್ಲೆ ವರ್ವಿಂ ಹ್ಯಾ ವಿಶಿಂ ಬರ‍್ಯಾನ್ ಜಾಣಾ ಆಸಾಂ. ಆನಿ ಅಖ್ರೇಕ್ ಜಾವ್ನ್ ಮ್ಹಜಾ ಮೊಬಾಯ್ಲಾರ್ ಅಸ್‌ಲ್ಲಿಂ ಪಿಂತುರಾಂ ಜಾಂವ್ ಯಾ ಫೊಟೊ ಜಾಂವ್ ಸಂಪೂರ್ಣ ರಿತಿರ್ ವೈಯಕ್ತಿಕ್ ಜಾವ್ನಾಸಾತ್. ಮ್ಹಜ್ಯಾ ಸಾಂಗಾತಿಣೆೆ ಸವೆಂ ಮ್ಹಜ್ಯಾ ವರ್ತನಾಚೆರ್ ಸವಾಲ್ ಉಟಂವ್ಚೊ ಅಧಿಕಾರ್ ಕೊಣಾಕ್‌ಚ್ಚ್ ನಾಂ. ಆಮ್ಚೆ ಮಧ್ಲೊ ಸಂಬಂಧ್ ಜಾಣಾ ಜಾಂವ್ಚೆಂ ಹಕ್ಕ್ ಪರ್ಯಾಂತ್ ನಾಂ.” ನೀಲ್ ಮತಾಯಸಾಚಿಂ ಉತ್ರಾಂ ತಾಕಾಚ್ಚ್ ಕಳಿತ್ ನಾತ್‌ಲ್ಲ್ಯಾ ಮಾಫಾನ್ ಭಾಯ್ರ್ ಪಡಲ್ಲಿಂ!

ರಾಯನ್ ಪರ‍್ಯಾಂತ್ ಅಜಾಪ್ ಜಾಲ್ಲೊ. ಕಿತ್ಯಾಕ್ ಎಸ್ಪಿಕ್ ಉಪ್ರಾಟ್ಚೆಂ ಪರಿಣಾಮ್ ಗಂಭೀರ್ ಕರುಂಕ್ ಸಕ್ತಾ ಮ್ಹಣ್ ತೊ ಜಾಣಾ ಆಸ್‌ಲ್ಲೊ.

ಎಕಾ ಘುಡಿಯಚೆಂ ಮೌನ್ ಭೀಕರ್ ಮೌನ್!

ಎಸ್ಪಿ ಸರವನನ್ ‘ಸಿಂಗಮಾ’ ಸಾರ್ಕೆಂ ಗರ್ಜಾಲೊ. ದೋನ್ ಅಧಿಕಾರಿ ಆನಿ ತೇಗ್ ಹವಾಲ್ದಾರ್ ಘಡಿಯೆನ್  ತಯಾರ್ ಜಾಲೆ.

ಹಾಚೆಂ ಮಾಧಕ್ ವಕ್ತಾಚೆಂ ಸೇವನ್ (ಡ್ರಗ್ಸ್) ಪರೀಕ್ಷಾ ಕರ್ಚೆಂ ಭೊವ್ ಗರ್ಜೆಚೆಂ. ಹಾಚಾ ವೊಂಠಾಂ ಮಧೆಂ ಜಳ್ಚ್ಯಾ ಸಿಗ್ರೆಟಿಚೆಂ ಹಾತಾಂತ್ ಕೊವ್ಶಿಳ್ಳೆಂ ಪೇಪರಾ ಥಾವ್ನ್ ಆನಿ ಉಟ್‌ಲ್ಲ್ಯಾ ಕಾಳ್ಯಾ ಮೊಟ್ಯಾ ದುಂವ್ರಾ ಥಾವ್ನ್ ತವಳ್‌ಚ್ ಹಾಂವ್ ಸಮ್ಜಾಲ್ಲೊಂ ಹಾಣಿಂ ಡ್ರಗ್ಸಾಚೊ ಉಪ್ಯೋಗ್ ಕೆಲಾ. ಹ್ಯಾ ಶಹರಾಕ್ ಅಸಲ್ಯಾ ದಾಕ್ತೆರಾಂಚಿ ಗರ್ಜ್ ನಾಂ ತಾಕಾ ಜೀಪಾ ಭಿತರ್ ಲೊಟುನ್ ಭರಾನ್ ಮಳ್ಳೆಬರಿಂ ಜಾಗೊ ಖಾಲಿ ಕೆಲೊ.

ರಾಯನ್ ನಿಸ್ತೇಜ್ ಜಾಲ್ಲೊ! ಥೊಡ್ಯಾಚ್ಚ್ ವೊರಾಂ ಪಯ್ಲೊ ನವ್ಯಾ ವರ‍್ಸಾಚೊ ಉತ್ಸಾಹ್ ಚೂರಾನ್ ಚೂರ್ ಜಾವ್ನ್ ಆಕಾಂತಾಂತ್ ಬದ್ಲಾಲೊ.

ವಕೀಲ್ ತಾಕಾ ಕೊಡ್ತಿಂತ್ ಜಿಕವ್ನ್ ದೀಂವ್ಕ್ ಸಕ್ತಾ ಅಸ್‌ಲ್ಲೆ. ಪೂಣ್ ಹಿ ಕೇಸ್ ತಾಚಾ ಪುತಾಚೆಂ ಭವಿಷ್ಯ್ ನಾಸ್ ಕರುಂಕ್ ಪಾವ್ತಾಲಿ. ಡ್ರಗ್ಸಾಚಾ ಪರೀಕ್ಷೆಂತ್ ಪೊಸಿಟಿವ್ ತರ್ ಪುತಾಚಿ ದಾಕ್ತೆರ್ಗಿಚಿ ಸರ್ಟಿಫಿಕೇಟ್ ಎಸ್ಪಿ ಸರವನಾಚಾ ತಲ್ವಾರಿರ್ ಉಮ್ಕಾಳ್ತಾಲಿ. ಅಶೆಂ ಜಾಯ್ತಾ ತರ್ ಡಾ|ನರೇಶಾ ಸಂಗಿಂ ಮೆಳೊನ್ ನವಿ ಅಸ್ಪತ್ರ್ ಬಾಂದ್ಚಿಂ ಸಪ್ಣಾಂ ಕೆದಿಂಕ್‌ಚ್ ಪೊಂತಾಕ್ ಪಾವ್ಚಿಂ ನಾಂತ್.

ಉಪಾವ್ ನಾತ್‌ಲ್ಲೊ! ಸರ್ವ್ ದಾರ್ವಟೆ ಧಾಂಪ್‌ಲ್ಲೆ.

ವಕೀಲಾಂ ಥಾವ್ನ್ ವಾದ್

ರಾಜಕೀಯ್ ಮಾರಿಫಾತ್ ಒತ್ತಡ್….

ಕಿತೆಂಚ್ ಚಲ್ಚೆಬರಿಂ ನಾತಲ್ಲೆಂ.

ಎಸ್ಪಿ ಸರವನನ್ ಸಿದ್ದಾಂತಾಂಚೊ ಮನಿಸ್

…. ರಾತಿಚೆಂ ಅಂತ್ಯ್ ಆಯಿಲ್ಲೆಂ.

ವೊರಾಂ 3:09 ಜಾಲ್ಲಿಂ

1900/- ಆನಿ , 2500/- ದೋನ್ ಆಲ್ಕೋಹಾಲ್ ಟೆಸ್ಟ್ ಆನಿ ಡ್ರಗ್ಸ್ ಸ್ಕ್ರೀನಿಂಗಾಚಿಂ ಬಿಲ್ಲಾಂ ಫಾರಿಕ್ ಕೆಲಿಂ, ರಾಯನಾನ್.  ಫಾಲ್ಯಾಂ 11.00 ವೊರಾಂಚೆರ್ ರಿಪೊರ್ಟ್ ಮೆಳ್ತಾಲೊ ಮ್ಹಳೆಂ. ತಾಚೆ ಪ್ರಕಾರ್ ಮುಖ್ಲಿ ವಾಟ್ ಕಳಿತ್ ಜಾತಾಲಿ ಮ್ಹಣ್ ಸರವನನಾನ್ ಅಪ್ಲೊ ಜಾಗೊ ಖಾಲಿ ಕೆಲೊ.

ಆನಿಂ ದುಸ್ರೊ ದೀಸ್ ಉದೆವ್ನ್ ಅಯಿಲ್ಲೊ.

ಸಕಾಳಿಂಚಿಂ ವೊರಾಂ 09:10 ಜಾಲ್ಲಿಂ

ರಾಯನಾಚಾ ಫೊನಾನ್ ಅವಾಜ್ ಕೆಲ್ಲೊ.

ಹಾಂವ್ ಎಸಿಸ್ಟೆಂಟ್ ಪಬ್ಲಿಕ್ ಪ್ರಾಸಿಕ್ಸೂಟರಾಚಾ ಧಫ್ತರಾ ಥಾವ್ನ್. 10:30 ವೊರಾಂ ಭಿತರ್ 5 ಲಾಖ್ ರುಪಯ್ ತುಂವೆಂ ತಯಾರ್ ಕೆಲೊಯ್ ತರ್ ತುಜೆಂ ಕಾಮ್ ಜಾತಲೆಂ.

10:15 ವೊರಾರ್ ದುಡು ಘಾವೊತ್ಯಾ ಜಾಗ್ಯಾರ್ ಪಾವ್‌ಲ್ಲೆ. ನೋಟ್ ಐಸಾಬರಿಂ ಥಂಡ್ ಆಸ್‌ಲ್ಲೆ. ಐಸ್‌ಕ್ರೀಮಾಚಾ ಭಿತರ್ ಲಿಪವ್ನ್ ದವರ್‌ಲ್ಲೊ ಕಾಳೊ ದುಡು ಮ್ಹಣ್ ವಿಂಗಡ್ ಸಾಂಗ್ಚಿ ಗರ್ಜ್ ನಾತ್‌ಲ್ಲಿ

10.25 ವೊರಾರ್ ಎಸ್ಪಿ ಸರವನಾನ್ ಮೊಗಾಳ್ ಪತಿಣೆಕ್ ಫೋನ್ ಲಾಗಯ್ಲೊ. “Happy Wedding Anniversary Dear.”  ಹ್ಯಾ ಸಂತೋಸಾಚಾ ದಿಸಾ ಭಾಸಯಿಲ್ಲ್ಯಾ ಪ್ರಕಾರ್ ತುಕಾ ಡೈಮಂಡ್ ನೆಕ್ಲೆಸ್ ಗಿಫ್ಟ್ ಜಾವ್ನ್ ಮೆಳ್ತಾಲೊ.

10:32 ವೊರಾರ್ ಅಪ್ಲೊ ಸ್ಮಾರ್ಟ್ ಫೋನ್ ಮೆಜಾರ್ ಗಳವ್ನ್ ಮೆಜಾಚಿ ಡ್ರಾವರಾಂತ್ಲೊ ಪರ್ನೊ ಫೋನ್ ಎಸ್ಪಿನ್ ಭಾಯ್ರ್ ಕಾಡ್ನ್ ಫೊನ್ ಲಾಗಾಯ್ಲೆಂ. “ಮಿಸ್ ರುಚಿತಾ ಅಗರ್‌ವಾಲ್ ಘುಟನಾಸ್ಥಳಾರ್ ಉಪಸ್ಥಿತ್ ಆಸೊನ್ ಅಮ್ಚ್ಯಾ ಕಾಮಾಂತ್ ಅಡ್ಕಳ್ ಹಾಡುನ್ ಎಕಾ ಆರೋಪಿಕ್ ಕುಮಕ್ ಕೆಲ್ಲೆ ಮಾತ್ರ್ ನಹಿಂ ಅಸ್ತಾಂ ಮೊಬಾಯ್ಲರ್ ವೀಡಿಯೋ ರೆಕಾರ್ಡ್ ಕೆಲ್ಲೆಂ ಪೊಲಿಸ್ ಗಂಭೀರಾಯೆನ್ ಘೆತಾ. ಪೊಲಿಸ್ ವರ್ಗಾಕ್ ಅವ್ಮಾನ್ ಕರ‍್ಚ್ಯಾ ಉದ್ಧೇಶಾಂತ್ ಹೊ ವಿಡಿಯೊ ವಾಟ್ಸಪಾರ್ ಕೊಣಾಯ್ಕಿ ಧಾಡ್ಲಾಯ್ ಆನಿ ವೈರಲ್ ಜಾಲ್ಲ್ಯಾ ತರ್ ತುಜೆರ್ ಕಠಿಣ್ ಕ್ರಮ್ ಹಾತಿಂತ್ ಘೆಂವ್ಕ್ ಪಡ್ತಾಲೆಂ. ಹ್ಯಾ ಖಾತಿರ್ ಸೈಬರ್ ಸೆಲ್ ಥಾವ್ನ್ ತಶೆಂಚ್ ತುಜೆಂ ರಗತ್ ಡ್ರಗ್ಸ್ ಸ್ಕ್ರೀನಿಂಗ್ ಟೆಸ್ಟಾಕ್ ಧಾಡುಂಕ್ ಆಸ್ತೆಲೆಂ. ಎಕಾದವೆಳಾರ್ ಪೊಸಿಟಿವ್ ಮ್ಹಣೊನ್ ಕಳಿತ್ ಆಯ್ಲೆಂ ತರ್ ಯುನಿವರ್ಸಿಟಿಂತ್ ಅಮಾಲ್ ಪಿಯವ್ಣೆ ಡ್ರಗ್ಸ್ ಆನಿ ಸೆಕ್ಸ್ ವಿಶಯಾಚೆರ್ ಪೊಲಿಸ್ ಪ್ರೆಸ್ಸ್ ಕಾನ್ಫರೆನ್ಸ್ ಆಪಯ್ತಲೆ.”

ರುಚಿತಾಚಾ ದೊಳ್ಯಾಂಕ್ ಕಾಳೊಕ್ ಅಯಿಲ್ಲ್ಯಾ ಬರಿಂ ಭಗ್ಲೆಂ. ಪೊಲಿಸ್ ಸ್ಟೇಶನಾಂ… ಜಾರ್ಜ್‌ಶೀಟ್.. ಕೊಡ್ತಿಚಿಂ ಮೆಟಾಂ… ಮಾಧ್ಯಮಾಂತ್ ಖಬಾರ್ ನಾಲಿಸಾಯ್!

ಡಿಗ್ರಿ ಸರ್ಟಿಫಿಕೇಟ್ ಆನಿ ಪೊಲಿಸ್ ಕ್ಲಿಯರೆನ್ಸ್

ರುಚಿತಾನ್ ಕಳಿತ್ ನಾಸ್ತಾನಾ ಪೊಲಿಸಾಂ ಸಂಗಿಂ ದುಸ್ಮಾನ್ಕಾಯ್ ಜೊಡ್‌ಲ್ಲಿ.

‘Choice is yours’ ಎಸ್ಪಿನ್ ತಾಳೊ ಚಿಕ್ಕೆಶೆಂ ಮೋವ್ ಕೆಲೊ ‘What choice I have sir? please…  ಏಕ್ ಪಾವ್ಟಿಂಕ್ ಮ್ಹಾಕಾ ಸುಟ್ಕಾ ದಿಯಾತ್. ಹ್ಯಾ ಖಾತಿರ್ ಹಾಂವ್ ಕಿತೆಂಯ್…”

ತೀನ್ ತಾರಿಕೆರ್ ಸಾಂಜೆರ್ 4:00 ವೊರಾಂಚೆರ್ ತುಜ್ಯಾ ಹೊಸ್ಟೆಲಾ ಮುಕಾರ್ ಕಾರ್ ರಾಕೊನ್ ಆಸ್ತೆಲೆಂ. ದುಸ್ರ್ಯಾ ಸಕಾಳಿಂ ಪರ್ಯಾಂತ್ ವಾರ್ಡನಾ ಕಡೆನ್ ರಜಾ ವಿಚಾರ್. ಹಾಂವ್ ಆನಿ ತುಂ ಶಹರಾ ಭಾಯ್ಲ್ಯಾ ರೆಸೊರ್ಟಾಂತ್ ನವ್ಯಾ ವರ‍್ಸಾಚಿ ರಾತ್ ಆಚಾರ‍್ಸಿತೆಲ್ಸಾಂವ್ ರುಚಿತಾಕ್ ವಿಂಚವ್ಣ್ ನಾತ್‌ಲ್ಲಿ.

10:43:47 ವೊರಾಂ

ಎಸ್ಪಿನ್ ಸ್ಮಾರ್ಟ್‌ಫೋನಾಂತ್ ಅಪ್ಲ್ಯಾ ಬಾಯ್ಲೆಕ್ ತೀನ್ ತಾರಿಕೆರ್ ಡೈಮಂಡ್ ನೆಕ್ಲೆಸ್ ಶೊಪಿಂಗ್ ಕರುಂಕ್ ಕಳಯ್ಲೆಂ. ತುರ್ತಾಚಾ ಮಿಟಿಂಗಾ ನಿಮ್ತಿ ಶಹರಾ ಭಾಯ್ರ್ ಆಸ್ತಲೊಂ ಮ್ಹಳೆಂ.

10.52 ವೊರಾಂ

ರಾಯನಾಚೊ ಫೊನ್ ಆವಾಜ್ ಕರಿಲಾಗ್ಲೊ.

“ನೀಲ್ ಮತಾಯಸಾಚಾ ರಗ್ತಾ ಪರೀಕ್ಷೆಂತ್ ಕಸಲೆಂಚ್ ಮಾಧಕ್ ಒಕ್ತಾಚೆಂ ಸೇವನ್ ಕೆಲ್ಲೆಂ ಕಳವ್ನ್ ಯೇಂವ್ಕ್ ನಾಂ. ತಶೆಂ ಜಾಲ್ಲ್ಯಾನ್ ತಾಚೆರ್ ಕಸಲೆಂಚ್ ಕ್ರಮ್ ಹಾತಿಂ ಘೆನಾಸ್ತಾನಾ ಆಮಿ ತಾಕಾ ಸುಟ್ಕಾ ದಿತಲ್ಯಾಂವ್.  ಮಿ। ರಾಯನ್ ತುಕಾ ಬರೆಂ ನವೆಂ ವರಸ್ ಮಾಗ್ತಾಂ, ಹಾಂವ್ ಎಸ್ಪಿ ಸರವನನ್” .

11:05 ವೊರಾಂ…

ರಾಯನಾಚಾ ಮೆನೆಜರಾಚೊ ಫೋನ್ ರಿಂಗ್ ಜಾಲೊ.

“ಆಮ್ಚ್ಯಾ ನವ್ಯಾ ಬಾಂದ್ಪಾಚೆಂ ಜಾಹಿರಾತ್ ಛಾಪ್ಯಾಕ್ ವೆಚೆ ಆದಿಂ ಸ್ಕ್ವ್ಯಾರ್ ಫೀಟಾಕ್ ಪಂಚ್ವೀಸ್ ರುಪಯ್ ಚಡಿತ್ ಕರುನ್ ಗಾಲುಂಕ್ ಜಾಯ್” ರಾಯನಾನ್ ತಾಕಿದ್ ದಿಲಿ. “ಕಿತೆಂ ಸರ್ ಅಛಾನಕ್ ಬದ್ಲಾವಣ್?” ಮೆನೆಜರ್ ವಿಜ್ಮಿತ್ ಜಾಲೊ.  “ಬಹುಶಾ ಸರ್ವಾಂಚಾಕೀ ಪಯ್ಲೆಂ ಭರ್ಪೂರ್ ರೇಂವ್ ಮೆಳೊಂಕ್ ಅವ್ಕಾಸ್ ಆಸಾ. ವೆಳಾಚಾಕೀ ಪಯ್ಲೆಂ ಪ್ರೊಜೆಕ್ಟ್ …ಸಂಪೂರ್ಣ್  ಜಾತೆ ಲೆಂ”

ಮೆನೆಜರಾಕ್ ಕಿತೆಂಚ್ ಸಮ್ಜೊಂಕ್ ನಾತ್‌ಲ್ಲೆಂ.

► ರೊನಿ ಮೊಂತೇರೊ, ಕಟ್ಪಾಡಿ