ಸಾವ್ಳ್ಯಾಂಚೆಂ ರಾವ್ಳೆರ್..

ಮೂಸ್ – ಪಿಸೊಳಿಂ ಖಾವ್ನ್ ಆಪ್ಣ್ಯಾಇತ್ಲ್ಯಾಕ್ ಜಿಯೆಂವ್ಚೆ ಪರ್ಯಾಂತ್ ಸಾವ್ಳೊ ಜಾಂವ್ ಪಾಲ್, ನಿರುಪ್ರದವಿ. ಭಾಯ್ರ್ ಮಾತ್ ನಯ್, ಮನ್ಶ್ಯಾಜಿವಾ ಭಿತರ್ ಸಯ್ತ್ ಜಿಯೆಂವ್ಚೆ ಸುಕ್ಶಿಮ್ ಜಿವಿ ಮನ್ಶ್ಯಾಜಿವಿತಾಕ್ ಪರೋಕ್ಷ್ ಜಾವ್ನ್ ಸಹಕಾರಿ.

ಹ್ಯಾ ಕವಿತೆಂತ್ ಕವಿ ಮನ್ಶ್ಯಾಕ್ ನಿರುಪ್ರದವಿ ಜಾವ್ನ್ ಆಸಜೆ ಜಾಲ್ಲೊ ಸಾವ್ಳೊ ಕಸೊ ಸವ್ಕಾಸ್ ಮನ್ಶ್ಯಾಜಿವಾಕ್‌ಚ್ ಸಂಚಿಕಾರ್ ಹಾಡ್ನ್ ಆಯ್ಲಾ ಮ್ಹಳ್ಳೆವಿಶ್ಯಾಂತ್ ಸಾಂಗ್ಚೆಂ ಪ್ರೇತನ್ ಕರ್ತಾ.

ಘರಾಂತ್ ಸಾವ್ಳ್ಯಾಂನಿ ಪಟ್ಟಾಂ ಬಾಂದ್ಲ್ಯಾರ್ ಪನ್ವತಿ ಲಾಗ್ತಾ ಮ್ಹಣ್ ಮಾಲ್ಘಡ್ಯಾಂನಿ ಸಾಂಗ್ಚೆಂ ಆಸಾ. ಹ್ಯಾ ಪಾಟಿಥಳಾರ್ ಪ್ರಜ್ಞಾವಂತ್ ನಾಗ್ರಿಕಾಂನಿ ಏಕ್ ಸವಾಲ್ ಆಪ್ಣಾಕೂಚ್ ವಿಚಾರುನ್ ಘೆಜೆ ಮ್ಹಣ್ ದಿಸ್ತಾ – ಎಕಾ ಕಾಳಾರ್ ಫಕತ್ ಹಿತ್ಲಾಂನಿ ಮಾತ್ ಪಟ್ಟಾಂ ಬಾಂದುನ್, ಕಿಡಿ, ಮೂಸ್, ಪಿಸೊಳ್ಯಾಂಕ್ ಖಾವ್ನ್, ಬೆಳೆಂ, ದಾನಿಚಿ ರಾಕ್ವಲಿ ಕರ್ತೆಲ್ಯಾ ಸಾವ್ಳ್ಯಾಂಕ್ ಘರಾಂನಿ ಆನಿ ನುಕ್ಕಡಾಂನಿ, ರಸ್ತೆ – ಗಲ್ಲ್ಯಾಂನಿ ಪಟ್ಟಾಂ ಬಾಂದುಕ್ ಅವ್ಕಾಸ್ ಕರ್ನ್ ದಿಲ್ಲೊ ಕೊಣೆಂ ?

ಜರ್ ಸಾವ್ಳೆ ಸಯ್ತ್ , ಪಟ್ಟಾಂಕ್ ರಾವ್ಳೆರ್ ಮ್ಹಣ್ ದಾಕವ್ನ್, ನರ್ ಮನ್ಶ್ಯಾಂಕ್ ಭುಲವ್ನ್, ರಗತ್ ಪಿಳ್ನ್ ಕೊಜಾಂಟಿ ಉಡಂವ್ಚ್ಯಾಂತ್ ಯಸಸ್ವಿ ಜಾಲ್ಯಾತ್ ವ್ಹಯ್ ತರ್ – ಅಸಲ್ಯಾ ಎಕಾ ಪರಿಸ್ಥಿತೆಕ್ ಕಾರಣ್ ಕೋಣ್ ? ಆನಿ ಹ್ಯಾ ಕಾಟ್ಕಾಯೆಥಾವ್ನ್ ಭಾಯ್ರ್ ಯೆಂವ್ಚಿ ವಾಟ್ ಖಂಯ್ಚಿ ?

ಸಾವ್ಳ್ಯಾಕ್ ಸಂಕೇತ್ ಕರುನ್, ವಾಚ್ಪ್ಯಾಕ್ ಆತ್ಮಾವಲೋಕನಾಕ್ ಲಾಂವ್ಚಿ ಕವಿತಾ.

ಗಾಂವಾಂತ್ ಆಮ್ಚ್ಯಾ ಆಸ್ಲಿಂ
ಪಟ್ಟಾಂ ಸಾವ್ಳ್ಯಾಂಚಿ
ಲ್ಹಾನ್ ಗುಡ್ಸುಲಾಂಪರಿಂ

ನಿರಂತರ್ ಬಾಂದ್ತಾಲೆ
ಲ್ಹಾಲಾನ್ ಸಾವ್ಳೆ
ಖಳನಾಸ್ತಾಂ ದೀಸ್-ರಾತ್
ಪೊಂತಾ ಥಾವ್ನ್ ಪೊಂತಾಕ್
ಮಾಂಡ್ತಾಲೆ ಪಾಸ್
ಮೂಸ್-ಪಿಸೊಳ್ಯಾಂಕ್

ಆತಾಂ –

ಉದೆಲ್ಯಾಂತ್ ಗಾಂವ್ ಭರ್
ರಸ್ತೆ – ರಸ್ತೆ , ಗಲ್ಲಿ – ಗಲ್ಲಿ
ಜಯ್ತ್ ಘಟ್-ಮೂಟ್ ಪಟ್ಟಾಂ
ರಾವ್ಳೆರಾಪರಿಂ ಆಕರ್ಶಿಕ್

ಸಾವ್ಳೆಯ್ ಜಾಲ್ಯಾತ್
ದಾಟೆಮೊಟೆ – ಜಬ್ಬೊರ್

ನಾಕಾತ್ ಆತಾಂ ತಾಂಕಾಂ
ಮೂಸ್ – ಪಿಸೊಳಿಂ

ರಾಕೊನ್ ಆಸಾತ್
ನರ್ ಮನ್ಶ್ಯಾಂಕ್

ರಾವ್ಳೆರಾ ಸೊಭಾಯೆಕ್ ಪಿಸ್ವೊನ್
ಸಾಂಪಾಡ್ಲ್ಯಾರ್ ಪಾಸಾಂತ್

ರಗತ್ ಪೀಳ್ನ್
ಉಡಯ್ತಾತ್ ಭಾಯ್ರ್!

► ಆಲ್ಫೋನ್ಸ್, ಪಾಂಗ್ಳಾ.