“ಶಿಕ್ಪಾಶೆತಾಂತ್ ಕಶೆಂ ಆರ್ಟ್ಸ್, ಕೊಮರ್ಸ್, ಸಯನ್ಸ್, ಮೆಡಿಕಲ್- ಇಂಜಿನಿಯರಿಂಗ್, ಐಟಿ ಅಶೆಂ ಸಾಟಾವ್ಯಾ ದಾಕ್ಡ್ಯಾಪಾಸುನ್ ಕಾಳಾ ತೆಕಿದ್ ವಿದ್ಯಾರ್ಥಿ ಖಾಯ್ಸ್ ಕರ್ತಲೆ, ತಶೆಂ ಕೊಂಕ್ಣಿ ಸಾಹಿತ್ಯಾಂತೀ ಸಾಟಾವ್ಯಾ ಧಾಕ್ಡ್ಯಾಪಾಸುನ್ ಅಜ್ ಮೆರೆನ್ಚಿ ವಾಡಾವಳ್ ಪಳಯ್ಲ್ಯಾರ್ ಬರವ್ಪ್ಯಾಂನಿ ಕಾದಂಬರಿ, ಮಟ್ವ್ಯೊ ಕಾಣಿಯೊ ಜಾವ್ನ್ ಆತಾಂ ಕವಿತಾ ಶೆತಾಂತ್ ಚಡ್ ಕೃಶಿ ಕರ್ಚೆಂ ದಿಸ್ತಾ ಆನಿ ವಾಚ್ಪ್ಯಾಂನೀಯ್ ಕಾಳಾತೆಕಿದ್ ಆಪ್ಲಿ ರೂಚ್ ಬದ್ಲಿಲ್ಲೆಂಯ್ ದಿಸ್ತಾ. ಉಬ್ಬ, ಮೂಡ್ಬಿದ್ರಿ ಮಟ್ವ್ಯಾ ಕಾಣಿಯಾಂಚ್ಯಾ ಕಾಳಾಚೊ ಆನಿ ತ್ಯಾ ಶೆತಾಂತ್ ಆತಾಂಯ್ ತೋ ಠಿಕೂನ್ ಉರ್ಲಾ. ತಾಚ್ಯಾ ಕಾಣಿಯಾಂ ಜಮ್ಯಾಕ್ ತಾಣೆ ‘ಘೊಸ್’ ಮ್ಹಣ್ ದಿಲ್ಲೆಂ ನಾಂವ್ ಬೋವ್ ವಾಜ್ಬಿ ಆಸಾ. ಜಶೆಂ ಫಳಾಂಚ್ಯಾ ಘೊಸಾಂತ್ಲಿಂ ಫಳಾಂ ತ್ರಾಣ್ ವಾಡಯ್ತಾತ್ ಆನಿ ಫುಲಾಂಚ್ಯಾ ಘೊಸಾಂತ್ಲಿಂ ಫುಲಾಂ ಜಸೆಂ ಫರ್ಮಳ್ ಪಾಸಾರ್ತಾತ್ – ತಶೆಂ ಹ್ಯಾ ಘೊಸಾಂತ್ಲ್ಯೊ ಕಾಣಿಯೊ ಕೊಂಕ್ಣಿ ಸಾಹಿತ್ಯಾಚೆಂ ತ್ರಾಣ್ ವಾಡಂವ್ಚೆಂ ಸವೆಂ ಫರ್ಮಳ್ ಪಾಸಾರುಂ ಮ್ಹಣ್ ಆಂವ್ಡೆತಾಂ” ಮ್ಹಣಾಲೊ ಸಾಹಿತ್ಯ ಅಕಾಡೆಮಿ, ನವಿ ದಿಲ್ಲಿ ಜೆರಾಲ್ ಕಾವ್ನ್ಸಿಲಾಚೊ ಸಾಂದೊ, ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ವಿಜೇತ್ ಕವಿ ಶ್ರಿ ಮೆಲ್ವಿನ್ ರೊಡ್ರಿಗಸ್.
ಕವಿ ಮೆಲ್ವಿನ್, ಸಾಂ. ಲುವಿಸ್ ಕೊಲೆಜಿಚ್ಯಾ ಸಾನಿಧ್ಯ ಸಭಾಸಾಲಾಂತ್, ಆಯ್ತಾರಾ 22 ಜನೆರ್ 2023 ವೆರ್, ಉಬ್ಬ ಮೂಡ್ಬಿದ್ರಿ ಹಾಣೆ ಬರಯಿಲ್ಲ್ಯಾ ಕೊಂಕ್ಣಿ ಮಟ್ವ್ಯಾ ಕಾಣಿಯಾಂಚೊ ಸಂಗ್ರಹ್ ‘ಕಾಣ್ಯಾಂಚೊಂ ಘೊಸ್’ ಲೊಕಾರ್ಪಣ್ ಕರುನ್ ಉಲಯ್ತಾಲೊ.
ಕಾರ್ಯಾಕ್ ಸಾಂ. ಲುವಿಸ್ ಶಿಕ್ಪಾಸಂಸ್ತ್ಯಾಂಚೊ ರೆಕ್ಟರ್ ಮಾ| ಬಾ| ಮೆಲ್ವಿನ್ ಪಿಂಟೊ ಅಧ್ಯಕ್ಶ್ ಜಾವ್ನ್ ಹಾಜರ್ ಆಸ್ಲೆ.
ಕಿಟಾಳ್ ಸಂಪಾದಕ್ ಎಚ್ಚೆಮ್, ಪೆರ್ನಾಲಾನ್ ಬುಕಾಚಿ ವಳಖ್ ಕರುನ್ ದಿಲಿ. “ಉಬ್ಬಚೆ ಕಾಣಿಯೊ ಚಡ್ಕರುನ್ ಆತ್ಮ್ಕಥನಾಪರಿಂ ದಿಸ್ತಾತ್ ತರೀ, ಆತ್ಮ್ಕಥನಾಚೆ ಮಿತಿ ಉತ್ರೊನ್, ಕಥನ್ ಶಯ್ಲೆಚ್ಯೊ ತಾಂಕಿ ವಾಪಾರುನ್ ದರ್ಜೆದಾರ್ ಸಾಹಿತ್ಯಾಂತ್ ಕಾಣಿಯೊ ಜಾವ್ನ್ ಬದಲ್ಲ್ಯಾತ್. ಆಪ್ಲ್ಯಾ ಕಾಣಿಯಾಂನಿ ತಾಣೆ ರುತಾ ಕೆಲ್ಲೊ ಕಜೆಬೈಲ್ ಗಾಂವ್, ಕಜೆಬೈಲ್ ಗಾಂವಾಂತ್ ಜಿಯೆಂವ್ಚೆ ಪ್ರತಿಪಾದಕ್ ಚಾರ್ಲಿ ಆನಿ ಪ್ರತಿಪಾದಕಿ ಜೆಸ್ಸಿ – ಭಲಾಯ್ಕೆಭರಿತ್ ಸಮಾಜ್ ಆನಿ ಆದರ್ಶ್ ನಾಗರಿಕ್ ಜಾವ್ನ್ ವಾಚ್ಪ್ಯಾಸಮೊರ್ ಯೆತಾತ್. ಕಥಾಕಾರ್ ಜಾವ್ನ್ ಆಪ್ಲ್ಯಾ ಕಾಣಿಯೆಚ್ಯಾ ಕಥನಾಂನಿ ಮನ್ಶ್ಯಾಮುಖಿ ಚಿಂತಪ್ ಪಾಸ್ರಾಂವ್ಕ್ ಮೆಳ್ಲ್ಲೆ ಅವ್ಕಾಸ್ ಉಬ್ಬಾನ್ ಆಪುರ್ಬಾಯೆನ್ ವಾಪಾರ್ಲ್ಯಾತ್” ಮ್ಹಣ್ ಎಚ್ಚೆಮ್, ಪೆರ್ನಾಲಾನ್ ಬುಕಾಚಿ ವಳಖ್ ಕರುನ್ ದೀವ್ನ್, ಲೇಕಕಾಕ್ ಆನಿ ಪ್ರಕಾಶನಾಕ್ ಬರೆಂ ಮಾಗ್ಲೆಂ.
ಸಾಂ. ಲುವಿಸ್ ಕೊಲೆಜಿಚೊ ಪ್ರಾಚಾರ್ಯ್ ಮಾ| ದೊ| ಪ್ರವೀಣ್ ಮಾರ್ಟಿಸ್ ಹಾಣೆ ಸಯ್ರ್ಯಾಂಚಿಂ ವಳಖ್ ಕರುನ್ ದೀವ್ನ್ ಯೆವ್ಕಾರ್ ಮಾಗ್ಲೊ.
ಉಬ್ಬ, ಮೂಡ್ಬಿದ್ರಿನ್ ಆಪ್ಣಾಕ್ ಕೆದಾಳಾಯ್ ಆದರ್ಶ್ ಜಾವ್ನಾಸ್ಲ್ಲ್ಯಾ ಆಪ್ಲ್ಯಾ ಆವಯ್ಚೊ ಉಗ್ಡಾಸ್ ಕಾಡುನ್, ಕಾಣಿಯೊ ಬರಂವ್ಕ್ ಪ್ರೇರಣ್ ದಿಲ್ಲ್ಯಾ ಸರ್ವ್ ಸಂಪಾದಕಾಂಕ್ ದಿನ್ವಾಸ್ ಪಾಟಯ್ಲೆ. ಆನಿ ಪುಸ್ತಕ್ ಪ್ರಕಾಶನ್ ಕೆಲ್ಲ್ಯಾ ಸಾಂ. ಲುವಿಸ್ ಪ್ರಕಾಶನಾಚೊ ಉಪ್ಕಾರ್ ಬಾವುಡ್ಲೊ.
ಕಾರ್ಯಾಚ್ಯಾ ಅಧ್ಯಕ್ಶ್ ಸ್ಥಾನಾಥಾವ್ನ್ ಉಲಯಿಲ್ಲ್ಯಾ ರೆಕ್ಟರ್ ಮಾ| ಬಾ| ಮೆಲ್ವಿನ್ ಪಿಂಟೊ ಹಾಣಿ “ಬರಂವ್ಚಿ ಆಶಾ ಸಗ್ಳ್ಯಾಂಕ್ ಆಸ್ತಾ, ಪುಣ್ ಬರಂವ್ಚೆಂ ದೆಣೆಂ ಸಗ್ಳ್ಯಾಂಕ್ ಪ್ರಾಪ್ತ್ ಜಾಯ್ನಾ. ಬರಯ್ಣಾರಾಂಕ್ ಆಪ್ಲ್ಯಾ ಬರ್ಪಾಂನಿ ಸಮಾಜೆಂತ್ ಬರೆಂ ಕರ್ಚಿ, ಸುಧ್ರಾಪ್ ಹಾಡಂವ್ಚಿ ತಾಂಕ್ ಆಸಾ. ಉಬ್ಬಾಚ್ಯಾ ಬುಕಾಥಾವ್ನ್ ಆನಿ ಕೊಲೆಜಿಚ್ಯಾ ಪ್ರಕಾಶನ್ ವಿಭಾಗಾಥಾವ್ನ್ ಪ್ರೇರಣ್ ಜೊಡುನ್ ವಿದ್ಯಾರ್ಥಿಂನಿ ಸಾಹಿತ್ಯ್ ರಚ್ಚೆವಿಶಿಂ ಆಸಕ್ತ್ ದಾಕಯ್ಜಾಯ್” ಮ್ಹಣ್ ಉಲೊ ದಿಲೊ ಆನಿ ಉಬ್ಬಾಕ್ ತಾಚ್ಯಾ ಸಾಹಿತಿಕ್ ವಾವ್ರಾಂತ್ ಬರೆಂ ಮಾಗ್ಲೆಂ.
ಹ್ಯಾ ಸುವಾಳ್ಯಾರ್ ಪ್ರಕಾಶನ್ ವಿಭಾಗಾಚಿ ದಿರೆಕ್ತೊರ್ ದೊ| ವಿದ್ಯಾ ವಿನುತ ಡಿ’ಸೊಜಾ ವೆದಿರ್ ಹಾಜರ್ ಆಸ್ಲಿ.
ಶರಲ್ ಫೆರ್ನಾಂಡಿಸ್ ಹಿಣೆ ಕಾರ್ಯೆಂ ಚಲಯ್ಲೆಂ. ರೋವಿನಾ ಡಿ ಸಿಲ್ವ ಹಿಣೆ ಪ್ರಾರ್ಥನ್ ಗೀತ್ ಗಾಯ್ಲೆಂ. ಡೊ। ರೋಶನ್ ಡಿ ಸೊಜಾ ಹಾಣಿ ದಿನ್ವಾಸ್ ಪಾಟಯ್ಲೆ.
‘ಕಾಣ್ಯಾಂಚೊ ಘೊಸ್’ ಹ್ಯಾ ಬುಕಾಂತ್ ಉಬ್ಬ, ಮೂಡ್ಬಿದ್ರಿನ್ ಬರಯಿಲ್ಲ್ಯೊ ತೆರಾ ಕಾಣಿಯೊ ಆಸಾತ್. ಕಿಟಾಳ್ ಸಂಪಾದಕ್ ಎಚ್ಚೆಮ್, ಪೆರ್ನಾಲಾನ್ ಹ್ಯಾ ಬುಕಾಕ್ ಪಯ್ಲೆಂ ಉತರ್ ಬರಯ್ಲಾಂ. ಸಾಂ. ಲುವಿಸ್ ಪ್ರಕಾಶನಾನ್ ಹೊ ಬೂಕ್ ಫಾಯ್ಸ್ ಕೆಲಾ ಆಸುನ್ ಬುಕಾಚೆಂ ಮೋಲ್ ರು.150/- ಜಾವ್ನಾಸಾ. ಬುಕಾಚ್ಯಾ ಪ್ರತಿಯಾಂಕ್ ಲೇಖಕ್ ಉಬ್ಬ, ಮೂಡ್ಬ್ರಿಕ್ 9353859870 ಹ್ಯಾ ನಂಬ್ರಾಚೆರ್ ವಾ ಸಾಂ. ಲುವಿಸ್ ಪ್ರಕಾಶನಾಕ್ 0824 – 4117701 ಹ್ಯಾ ನಂಬ್ರಾಚೆರ್ ಸಂಪರ್ಕ್ ಕರ್ಯೆತ್. ಪ್ರಕಾಶಕಾಚೊ ಇ ಮೇಯ್ಲ್ ವಿಳಾಸ್ : aloyprakashana@staloysius.edu.in
