ಬಿ. ಎಂ. ರೋಹಿಣಿಚ್ಯಾ ‘ಕಂತ್ರೆಲಾಂತ್ಲೆ’ ಆತ್ಮ್‌ಕಥೆಕ್ ಮೋಲಿ ಮಿರಾಂದಾಚೆ ಕೊಂಕಣಿ ದೊಳೆ  

[ಆಯ್ಲೆವಾರ್ ಸೈಂಟ್ ಎಲೋಶಿಯಸ್ ಪ್ರಕಾಶನಾಥಾವ್ನ್ ಮೊಲಿ ಮಿರಾಂದಾನ್ ಕೊಂಕಣಿಕ್ ತರ್ಜಣ್ ಕೆಲ್ಲೊ ಕನ್ನಡ ಲೇಖಕಿ ಬಿ.ಎಮ್. ರೋಹಿಣಿಚ್ಯಾ ಆತ್ಮಚರಿತ್ರೆಚೊ ಬೂಕ್ ‘ಕಂತ್ರೆಲಾಂತ್ಲೆಂ’ ಲೋಕಾರ್ಪಣ್ ಜಾಲೊ. ಮೂಳ್ ಕನ್ನಡ ಭಾಶೆಂತ್ 2019ವ್ಯಾ ವರ್ಸಾ ‘ನಾಗಂದಿಗೆಯೊಳಗಿಂದ’ ನಾಂವಾಖಾಲ್ ಹೆಂ ಪುಸ್ತಕ್ ಪರ್ಗಟ್ ಜಾಲ್ಲೆಂ. ಕನ್ನಡ ಪುಸ್ತಕಾಕ್ ಕರ್ನಾಟಕ ಸಾಹಿತ್ಯ ಅಕಾಡೆಮಿ ಪುರಸ್ಕಾರ್, ಸುಧಾ ಇನ್ಫೋಸಿಸ್ ಪ್ರಶಸ್ತಿ ಲಾಭ್ಲ್ಯಾ ಮಾತ್ರ್ ನ್ಹಯ್, ಹೆಂ ಪುಸ್ತಕ್ ಬಿ.ಬಿ.ಎ. ವಿದ್ಯಾರ್ಥಿಂಕ್ ಪಾಠ್‌ಪುಸ್ತಕ್ ಜಾವ್ನ್ ವೆಗಿಂಚ್ ಯೆಂವ್ಚ್ಯಾರ್ ಆಸಾ. ಕೊಂಕಣಿ ಅನುವಾದಾಚ್ಯಾ ಪುಸ್ತಕಾಕ್ ಪ್ರಸ್ತಾವನ್ ಜೆಂ ಹಾಂವೆಂ ಬರಯ್ಲಾಂ, ತೆಂ ಹಾಂಗಾಸರ್ ಅನುವಾದಕಿಚ್ಯೆ ಪರ್ವಣ್ಗೆನ್ ಪರ್ಗಟ್ತಾಂವ್. ಪುಸ್ತಕಾಚೆಂ ಮೊಲ್ ರು. 350. ಪ್ರತಿ ಜಾಯ್ ಆಸಲ್ಲ್ಯಾಂನಿ ಮೊಲಿ ಮಿರಾಂದಾಕ್ ಸಂಪರ್ಕ್ ಕರ್‍ಚೊ : 94498 53300].

ಮಾನೆಸ್ತಿಣ್ ಮೊಲಿ ಮಿರಾಂದಾ ಗಾಂವಾನ್ ಕೊರ್ಡೆಲ್ಚಿ. ಧಾವಿ ಪರ್ಯಾಂತ್ ಕುಲ್ಶೇಕರ್ ಸೇಕ್ರೆಡ್ ಹಾರ್ಟ್ಸ್ ಇಸ್ಕೊಲಾಂತ್ ಶಿಕಪ್. ಉಪ್ರಾಂತ್ ವಿಮೆನ್ಸ್ ಪೊಲಿಟೆಕ್ನಿಕ್, ಮಂಗ್ಳುರ್ ಹಾಂಗಾ ಥಾವ್ನ್ ಟೆಲಿಕಮ್ಯೂನಿಕೇಶನ್ ಎಂಜಿನಿಯರಿಂಗ್ ವಿಭಾಗಾಂತ್ ತೀನ್ ವರ್ಸಾಂಚೊ ಡಿಪ್ಲೊಮಾ ಕೋರ್ಸ್. ಹ್ಯಾ ಡಿಪ್ಲೊಮಾಂತ್ ಕರ್ನಾಟಕ ರಾಜ್ಯಾಂತ್ ಪ್ರಥಮ್ ಸ್ಥಾನ್. ಸಾಂ. ಲುವಿಸ್ ಮಹಾವಿದ್ಯಾಲಯ್ ಥಾವ್ನ್ ಕೊಂಕಣಿ ಅಧ್ಯಯನಾಂತ್ ಪದ್ಯುತ್ತರ್ ಪದವಿಕಾ ಪಯ್ಲ್ಯಾ ವರ್ಗಾಂತ್ ಉತ್ತೀರ್ಣತಾ. ಚಾಳಿಸ್ ವರ್ಸಾಂ ಕೇಂದ್ರ್ ಸರಕಾರಿ ಕಮ್ಯೂನಿಕೇಶನ್ ಮಿನಿಸ್ಟ್ರಿಂತ್ ವಾವ್ರ್ ಕರ್ನ್ ಆತಾಂ ನಿವೃತ್ತ್.

ವೆವೆಗ್ಳ್ಯಾ ಸಮುದಾಯಾಂಚ್ಯಾ ಸಂಘ್ ಸಂಸ್ಥ್ಯಾಂನಿ ತಶೆಂಚ್ ಫಿರ್ಗಜ್ ಗೊವ್ಳಿಕ್ ಪರಿಶದ್, ಕಥೊಲಿಕ್ ಸಭಾ(ರಿ), ಮಂಗ್ಳುರ್ ಹಾಂಗಾಸರ್ ಸೆವಾ.  ರಂಗ್‌ಮಾಂಚಿಯೆಚಿ ಕಲಾಕರ್. ಕೊಂಕ್ಣಿ ನಾಟಕ್ ಸಭಾ ಆನಿ ಟಿ.ಎಮ್.ಎ.ಪೈ ಫೌಂಡೇಶನ್ ಥಾವ್ನ್ ಉತ್ತೀಮ್ ನಟಿ ಪ್ರಶಸ್ತಿ, ಆಲ್ ಇಂಡಿಯಾ ಬಿ.ಎಸ್.ಎನ್.ಎಲ್. ಕನ್ನಡ ನಾಟಕ್ ಸ್ಪರ್ಧ್ಯಾಂತ್ ಉತ್ತೀಮ್ ನಟಿ ಪ್ರಶಸ್ತಿ.

ಪಾಟ್ಲ್ಯಾ ಸಾತ್ ವರ್ಸಾಂ ಥಾವ್ನ್ ‘ಕರಾವಳಿ ಲೇಖಕಿಯರ ವಾಚಕಿಯರ ಸಂಘ’ ಕಾರ್ಯಕಾರಿ ಸಮಿತಿಚೊ ಸಾಂದೊ ಜಾವ್ನ್ ಆಸುನ್ ಸರ್ವ್ ಸಾಹಿತಿಕ್ ಆನಿ ಸಾಮಾಜಿಕ್ ಕಾರ್ಯಕ್ರಮಾಂನಿ ವಾಂಟೊ ಘೆವ್ನ್ ಆಸಾ. ಕನ್ನಡ ಸಾಹಿತ್ಯ ಪರಿಷತ್ತು ಮಂಗಳೂರು ತಾಲೂಕು ಕಾರ್ಯಕಾರಿ ಸಮಿತಿಚೊ ಸಾಂದೊ ಜಾವ್ನ್ ಸೆವಾ ದಿಲ್ಯಾ.

ಬಿ. ಎಂ. ರೋಹಿಣಿಚ್ಯಾ ‘ಕಂತ್ರೆಲಾಂತ್ಲೆ’ ಆತ್ಮ್‌ಕಥೆಕ್ ಮೋಲಿ ಮಿರಾಂದಾಚೆ ಕೊಂಕಣಿ ದೊಳೆ  

ಹ್ಯಾ ಸಂಸಾರಾಂತ್ಲೊ ಹರ‍್ಯೆಕ್ಲೊ ಮನೀಸ್ ಅದ್ಭುತಾಂಚೊ ಕುಡವ್. ಹರ‍್ಯೆಕಾ ಮನ್ಶಾಚೆಂ ಜಿವಿತ್ ವೆಗ್ಳೆಂ, ಅನ್ಭೋಗ್ ವೆಗ್ಳೊ. ವೆವೆಗ್ಳ್ಯಾ ವ್ಯಕ್ತಿಂಚೆಂ ವ್ಯಕ್ತಿತ್ವ್ ಘಡೊವ್ನ್ ದಿಲ್ಲೆ ಥೆಂಬೆ ಚಾಕ್ಚ್ಯಾಂತ್ ಆನಿ ಆಮ್ಚ್ಯಾ ಜಿವಿತಾಚಿ ವಾಟ್ ರುತಾ ಕರ‍್ಚ್ಯಾಂತ್ ರೋಮಾಂಚನ್ ಆಸ್ತಾ. ಕಾಂಯ್ ಫಾಮಾದ್ ಮನೀಸ್ ತಾಂಚಿ ಆತ್ಮ್‌ಚರಿತ್ರಾ ಬರಯ್ತಾತ್, ಭೆಟ್ವೊಳ್ ನಾತಲ್ಲೆ ಆಪ್ಲಿ ಜೀವನ್‍ಚರಿತ್ರಾ ಹೆರಾಂಥಾವ್ನ್ ಬರೊಂವ್ಕ್ ಲಾಯ್ತಾತ್. ಕಾಂಯ್ ಸಂದರ್ಭಾಂನಿ ಏಕ್ ವ್ಯಕ್ತಿ ಸೊಂಪುನ್ ವರ್ಸಾಂ ಉಪ್ರಾಂತ್, ಕಾಂಯ್ ಥೊಡೆ ಪಾವ್ಟಿಂ ಶೆಕ್ಡ್ಯಾಂ ಉಪ್ರಾಂತ್ ಜೀವನ್‍ಚರಿತ್ರಾ ಬರಯಿಲ್ಲೆ ದಾಕ್ಲೆ ಆಸಾತ್.

ಆತ್ಮಚರಿತ್ರೆಚೆಂ ವಾಚಪ್ ಆಮ್ಕಾಂ ತೆಂ ಬರಯಿಲ್ಲ್ಯಾ ವಕ್ತಿಚ್ಯಾ ಜಿವಿತಾಚೆ ಗುಂಡಾಯೆಕ್ ವ್ಹರ್ನ್ ಪಾವಯ್ತಾ ಮಾತ್ರ್ ನ್ಹಯ್ ತಾಂಣಿ ಜೊಡಲ್ಲ್ಯಾ ಅನ್ಭೋಗಾನ್ ತಾಂಚೆಂ ವ್ಯಕ್ತಿತ್ವ್ ಕಶೆಂ ಘಡುನ್ ಆಯ್ಲೆಂ ಮ್ಹಳ್ಳೆಂ ಆಮ್ಕಾಂ ಸಾಂಗ್ತಾ ಆನಿ ಆಮ್ಕಾಂಯ್ ಆಮ್ಚ್ಯಾ ಜಿವಿತಾಂತ್ ಉಂಚಾಯೆಕ್ ಪಾವೊಂಕ್ ಪ್ರೇರಣೆಚೊ ಪಾವ್ಸ್ ವೊತ್ತಾ.

ಆತ್ಮ್‌ಚರಿತ್ರಾ ಮ್ಹಳ್ಯಾರ್ ಜೊ ಕೊಣ್ ಬರಯ್ತಾ ತ್ಯೆಚ್ ವಕ್ತಿಚೆಂ ಜಿವಿತ್ ಆಟಾಪುನ್ ಆಸ್ತಾ. ತಾಂಚೆ ವಿಚಾರ್, ತಾಂಚಿಂ ಸಿಂತಿಮೆಂತಾಂ ಹ್ಯೆ ಆತ್ಮ್‌ಚರಿತ್ರೆಂತ್ ಉಟುನ್ ದಿಸ್ತಾತ್. ಕಾಂಯ್ ತಾಂಚ್ಯೊ ಡಾಯ್ರಿ, ಪುಸ್ತಕಾಂನಿ ಕೆಲ್ಲೆ ನೋಟ್ಸ್, ಬರಯಿಲ್ಲೆಂ ಬರಪ್, ಆನಿ ಚಡೀತ್ ಕರುನ್ ಉಡಾಸಾಚ್ಯಾ ಕಂತ್ರೆಲಾಂತ್ ಆಸಲ್ಲೆಂ ರಿಟ್ರೀವ್ ಕರುನ್ ಆತ್ಮ್‌ಚರಿತ್ರಾ ಬರೊಂವ್ಯೆತಾ. ಜಾಯ್ತ್ಯಾ ಸಂದರ್ಭಾಂನಿ ಅಸಲ್ಯೆ ಕಥೆಂನಿ ಸತ್ ಲಿಪುನ್ ವೆಚ್ಯೊ ಗಜಾಲಿ ಆಸ್ತಾತ್. ತವಳ್ ಆಪ್ಲ್ಯಾಚ್ ಆತ್ಮ್ಯಾಕ್ ಘಾತ್ ಕೆಲ್ಲ್ಯಾಬರಿ ಜಾತಾ.

ಜೀವನ್‍ಚರಿತ್ರಾ ಎಕ್ಯೆ ವ್ಯಕ್ತಿವಿಶಿಂ ಆನ್ಯೆಕ್ಲ್ಯಾನ್ ಬರೊಂವ್ಚೆಂ. ಆನ್ಯೆಕ್ಲ್ಯಾನ್ ಬರಯ್ತಾನಾ ತ್ಯೆ ವ್ಯಕ್ತಿಚೆ ವಿಚಾರ್ ಸಂಪೂರ್ಣ್ ಮಾಪಾನ್ ವಾ ಸಾರ್ಕೆ ರಿತಿನ್ ವ್ಯಕ್ತ್ ಜಾಂವ್ಕ್ ಸಾಧ್ಯ್ ನಾಂತ್. ಜ್ಯಾ ವ್ಯಕ್ತಿಚಿ ಜೀವನ್‍ಚರಿತ್ರಾ ಆಸ್ತಾ, ತ್ಯೆ ವ್ಯಕ್ತಿಚಿಂ ಸಿಂತಿಮೆಂತಾಂ ಆನ್ಯೆಕ್ಲ್ಯಾವರ್ವಿಂ ಉತ್ರಾಂಚ್ಯಾ ರುಪಾನ್ ಫಿಛಾರ್ ಕರುನ್ ದವ್ರುಂಕ್ ಸಾಧ್ಯ್ ಜಾಯ್ನಾ. ಹಿ ಜೀವನ್‌ಚರಿತ್ರಾ ಬರಯ್ತಾನಾ, ಜ್ಯಾ ವ್ಯಕ್ತಿವಿಶಿಂ ಜಿ ಚರಿತ್ರಾ ಆಸಾ, ತಿ ಮರಣ್ ಪಾವ್ಲ್ಯಾ ಜಾಲ್ಯಾರ್ ಬರಯ್ತಲ್ಯಾನ್ ಆದ್ಲಿಂ ದಸ್ತಾವೆಜಾಂ ಉಸ್ತುನ್, ಮೆಲ್ಲೆ ವ್ಯಕ್ತಿಲಾಗಿಂ ಸಂಬಂಧ್ ತಶೆಂ ಸಂಪರ್ಕ್ ಜೊಡಲ್ಲ್ಯಾ ಮನ್ಶಾಂಲಾಗಿಂ ಉಲೊವ್ನ್, ಮ್ಹಾಯೆತ್ ಆರಾಯ್ಜಾಯ್ ಪಡ್ತಾ. ವ್ಯಕ್ತಿ ಜಿವಂತ್ ಆಸಾ ಜಾಲ್ಯಾರ್,  ತಿಚೆಲಾಗಿಂ ಸಂವಾದ್ ಚಲೊವ್ನ್ ಗರ್ಜೆಚ್ಯೊ ಗಜಾಲಿ ಆನಿ ಮ್ಹಾಯೆತ್ ಆರಾಯ್ಜಾಯ್ ಪಡ್ತಾ. ಜಾಯ್ತ್ಯಾ ಸಂದರ್ಭಾಂನಿ ಜೀವನ್‍ಚರಿತ್ರಾ ಬರೊಂವ್ಚೆ ಮನೀಸ್ ದುಡ್ವಾಚೆ ಆಶೆನ್ ಸತಾಥಾವ್ನ್ ಭಾಯ್ರ್ ಗೆಲ್ಲೆ ಸಂದರ್ಭ್ ಕಾಂಯ್ ಉಣೆ ನಾಂತ್.

ಹಾಂವೆಂ ವಾಚಲ್ಲ್ಯಾ ಆತ್ಮ್‌ಚರಿತ್ರೆಚ್ಯಾ ಪುಸ್ತಕಾಂ ಪಯ್ಕಿ ಗಾಂಧೀಜಿಚೊ – ಮೈ ಎಕ್ಸ್‌ಪೆರಿಮೆಂಟ್ಸ್ ವಿದ್ ಟ್ರುಥ್ – ಸತಾಚೆ ಪ್ರಯೋಗ್, ಎ. ಪಿ. ಜೆ. ಅಬ್ದುಲ್ ಕಲಾಮ್ ಹಾಂಚೊ – ವಿಂಗ್ಸ್ ಒಫ್ ಫಾಯರ್ -ಉಜ್ಯಾಚೆ ಪಾಕ್ಟೆ, ಪರಮಹಂಸ ಯೋಗಾನಂದಾನ್ 1946 ವರ್ಸಾ ಬರಯಿಲ್ಲೊ ’ಅಟೋಬಯೋಗ್ರಾಫಿ ಒಫ್ ಎ ಯೋಗಿ’ ಪ್ರಮುಖ್. ತಶೆಂಚ್ ಜೀವನ್‍ಚರಿತ್ರೆಚ್ಯಾ ಪುಸ್ತಕಾಂ ಪಯ್ಕಿ ವೊಲ್ಟರ್ ಐಸಾಕ್ಸನ್ ಹಾಣೆ ಬರಯಿಲ್ಲಿ ಸ್ಟೀವ್ ಜೊಬ್ಸ್ ಹಾಚಿ ಕಥಾ, ಜೆ. ಬಿ. ಮೊರಾಯಸಾನ್ ಕೊಂಕಣಿಂತ್ ಬರಯಿಲ್ಲಿ ತಶೆಂಚ್ ಆಯ್ಲೆವಾರ್ ರಾಹುಲ್ ರಾಮಗುಂಡಂ ಹಾಣೆ ಇಂಗ್ಲಿಷಾಂತ್ ಬರಯಿಲ್ಲಿ ಜೊರ್ಜ್ ಫೆರ್ನಾಂಡಿಸಾಚಿ ಕಥಾ ಮ್ಹಜೆರ್ ವಿಶೇಸ್ ಪ್ರಭಾವ್ ಘಾಲ್ಲಿಂ ಪುಸ್ತಕಾಂ.

‘ಕಂತ್ರೆಲಾಂತ್’ – ಶಿಕ್ಷಕಿ ತಶೆಂ ಸಮಾಜ್ ಸೆವಕಿ ಬಿ.ಎಂ. ರೋಹಿಣಿ ಹಿಣೆ ಕನ್ನಡಾಂತ್ ಬರಯಿಲ್ಲ್ಯಾ ‘ನಾಗಂದಿಗೆಯೊಳಗಿಂದ’ ಆತ್ಮಚರಿತ್ರೆಚ್ಯಾ ಪುಸ್ತಕಾಚೊ ಕೊಂಕಣಿ ಅನುವಾದ್. ಬಂಟ್ವೊಳ್ಚ್ಯಾ ತುಂಬೆ ಲಾಗ್ಸಾರ್ ಆಸ್ಚ್ಯಾ ಕಾಣೆಮಾರಾಂತ್ಲ್ಯಾ ಎಕಾ ಬಿಲ್ಲವ ಕುಟ್ಮಾಂತ್ ಜಲ್ಮೊನ್, ಜಿವಿತಾಂತ್ಲೆ ದುರ್ಬಳ್ಕಾಯೆಂತ್ ಲೆಗುನ್ ಸ್ವಾಭಿಮಾನ್ ಸೊಡಿನಾಸ್ತಾಂ – ಮಂಜೇಶ್ವರ್, ಬಜ್ಜೋಡಿ, ಬಿಕ್ಕರ್ನಕಟ್ಟೆ, ಕುಡುಪು ತಸಲ್ಯಾ ಪ್ರದೇಶಾಂನಿ ಜಿಯೆವ್ನ್, ವೆವೆಗ್ಳ್ಯಾ ಶಾಳಾಂನಿ ಶಿಕುನ್, ಉಪ್ರಾಂತ್ ವಿದ್ಯಾರ್ಥಿಂಕ್ ಶಿಕೊವ್ನ್, ಸಮಾಜಾಂತ್ಲ್ಯಾ ಸಾದ್ಯಾಸುದ್ಯಾ ವ್ಯಕ್ತಿಂಚ್ಯಾ ಸದ್ಗುಣಾಂ ಥಾವ್ನ್ ಆಪ್ಲೆಂ ವ್ಯಕ್ತಿತ್ವ್ ಪಾಜೊವ್ನ್ ಪರ್ಜಳಾವ್ನ್, ಆಪ್ಣಾಕ್ ಸಾಂಗಾತ್ ದಿಲ್ಲ್ಯಾ ಸಮಾಜಾಚ್ಯಾ ಬರೆಪಣಾಕ್ ವಾವುರ‍್ನ್ ಆಸ್ಚೆ ಸ್ತ್ರಿಯೆಚಿ ಕಾಳೀಜ್ ಕಡೊಂವ್ಚಿ ತಶೆಂ ಆಂಗ್ ಶಿರ್ಶಿರಾಂವ್ಚಿ ಕಥಾ. ಸ್ತ್ರೀಕುಳಾಚೆರ್ ಸುಕ್ಷಿಮಾಯೆನ್ ದೀಷ್ಟ್ ಚರೊವ್ನ್, ತಾಂಚ್ಯಾ ಜಿವಿತಾಚ್ಯಾ ವೆವೆಗ್ಳ್ಯಾ ಪಾಂವ್ಡ್ಯಾಂನಿ ತಾಂಣಿ ಫುಡ್ ಕರ‍್ಚ್ಯಾ ಸಂಕಷ್ಟಾಂಚೊ ತಶೆಂ ಸಮಸ್ಯಾಂಚೊ ಸೊಧ್ ಚಲಯ್ತಾನಾ, ಕಾಂಯ್ ವಿಜ್ಮಿತ್ ಕರ‍್ಚ್ಯೊ ಗಜಾಲಿ ಉಗ್ಡಾಪೆಂ ಕರ‍್ಚಿ ಕಥಾ ಹಿ. ಮಂಗ್ಳುರ್ ತಸಲ್ಯಾ ಶೆರಾಂತ್ ರಾವುನ್ ಸಯ್ತ್, ಘರಾ ಭಾಯ್ರ್ ಘಡೊನ್ ಆಸ್ಚ್ಯಾ ಗಜಾಲಿಂಕ್ ಕಾನ್-ದೊಳೆ ಉಗ್ತೆ ಕರುನ್ ಸ್ಪಂದನ್ ಕರಿನಾತಲ್ಲ್ಯಾ ಸಮಾಜಾಕ್ ಧೈರಾನ್ ಬೋಟ್ ಜೊಕುನ್ ಕಸಾಪ್ಪ್ಯಾಚ್ಯಾ ಕಾಳ್ಜಾಕ್ ಲೆಗುನ್ ಕನ್ನಾ ಘಾಲ್ಚಿ ಕಥಾ ಹಿ.

ಆಪ್ಣೆಂ ವಾಡಲ್ಲ್ಯಾ ಸಮಾಜಾಂತ್ಲ್ಯೊ ಜಾಯ್ತ್ಯೊ ರಿತಿ-ರಿವಾಜಿ, ತಾಂಕಾಂ ಮಿರ‍್ವೊನ್ ವಾಡಲ್ಲೆಂ ಲೇಖಕಿಚೆಂ ಚಿಂತಪ್, ಜಿವಿತಾಂತ್ಲಿ ದುರ್ಬಳ್ಕಾಯ್, ದುಬ್ಳಿಕಾಯೆಚೆ ಕಾಯ್ಲಿರ್ ಭಾಜುನ್ ವಚುನ್ ಜಿವಿತ್ ಚಲೊಂವ್ಚ್ಯಾಕ್ ಗರ್ಜೆಚೆಂ ಬಳ್ ಆಪ್ಣಾಯಿಲ್ಲ್ಯೊ ಗಜಾಲಿ, ಕುಟ್ಮಾ-ಜಿವಿತ್, ಕುಟ್ಮಾ ಭಿತರ‍್ಲೆ ಸಂಬಂಧ್, ಲಗ್ನಾಚ್ಯಾ ಭೆಸಾಚಿ ಗರ್ಜ್ ಆನಿ ತೊ ತಿರಸ್ಕಾರ್ ಕೆಲ್ಲ್ಯಾನ್ ಜಿವಿತಾಚ್ಯಾ ಶೆವೊಟಾಕ್ ಪಾವುಂಕ್ ತಯಾರ್ ಕರಿಜಾಯ್ ಜಾಲ್ಲೆ ನವೆ ವಾಟೆಚಿ ಕಲ್ಪನಾ, ಸ್ತ್ರಿಯೆಚೆಂ ಶೋಷಣ್, ಕುಡಿಚೊ ವೆಪಾರ್ – ಹೆಂ ಆನಿ ಸ್ತ್ರಿಯೆಚ್ಯಾ ಸಂಸಾರಾಂತ್ಲ್ಯೊ ಪ್ರತ್ಯೇಕ್ ಗಜಾಲಿ ಸಾಂಗುನ್ ಯೆದೊಳ್ ಕೊಣೇಂಯ್ ಆಪ್ಡುಂಕ್ ನಾತ‌ಲ್ಲ್ಯಾ ಸಮಸ್ಯಾಂಕ್ ಪರಿಹಾರಾಚಿ ಪಣ್ಟಿ ಕಶಿ ಹೆಂ ಪುಸ್ತಕ್ ಆಯ್ಲಾಂ.

ಆಂಕ್ವಾರ್ ಸ್ತ್ರಿಯಾಂವಿಶಿಂ ಲೇಖಕಿನ್ ಸಂಶೋಧನ್ ಚಲಯ್ಲಾಂ. ಆಂಕ್ವಾರ್ ಸ್ತ್ರೀ ಮ್ಹಳ್ಯಾರ್ ‘ವಾರೆಸ್ದಾರ್ ನಾತಲ್ಲಿಂ ಶೆತಾಂ’ ಮ್ಹಳ್ಳೆಂ ಚಿಂತಪ್ ಕಾಡ್ನ್ ಉಡೊಂವ್ಚ್ಯಾಕ್ ತಿಚಿ ವಾಂವ್ಟ್ ಹ್ಯಾ ಪುಸ್ತಕಾಂತ್ ಉಟುನ್ ದಿಸ್ತಾ.

ಬಿ. ಎಂ. ರೋಹಿಣಿ  ಹಾಂವ್ ವಾಡಲ್ಲ್ಯಾ ಕುಲ್ಶೇಕರ್ ಪರಿಸರಾಂತ್ಲಿ. ತಿಚ್ಯಾ ಜಿವಿತಾಂತ್ ತಿಚೆರ್ ಪ್ರಭಾವ್ ಘಾಲ್ಲ್ಯಾ ಜಾಯ್ತ್ಯಾಂಚೊ ಪ್ರಭಾವ್ ಮ್ಹಜೆರ್ ಸಯ್ತ್ ಪಡ್ಲಾ. ತರೀ ಮ್ಹಾಕಾ ತಿಚಿ ವಳಖ್ ಕಿತ್ಯಾಕ್ ಯೆದೊಳ್ ಪಾಸುನ್ ಜಾಲಿನಾ, ಹೆಂ ಸವಾಲ್ ಮ್ಹಾಕಾ ಕಾಂತಯ್ತಾ. ಬೋವ್ಶಾ ತಿ ಜಿವಿತಾಂತ್ಲೆ ಉಂಚಾಯೆರ್ ಆಸ್ತಾನಾ, ಹಾಂವ್ ಪರ್ಗಾವಾಂತ್ ಆಸ್‍ಲ್ಲೆಂ ಹಾಕಾ ಕಾರಣ್ ಕೊಣ್ಣಾ.

ಕುಲ್ಶೇಕರಾಂತ್ ಮ್ಹಜ್ಯಾ ಘರಾ ಲಾಗಿಂ ಆಸ್‌ಲ್ಲೆಂ ಸೇಕ್ರೆಡ್ ಹಾರ್ಟ್ ಸ್ಕೂಲ್ ಆನಿ ತವಳ್ಚಿಂ ಥಂಯ್ಚಿಂ ಜಾಯ್ತಿಂ ಬೆಥನಿ ಸಿಸ್ಟ್ರಾಂ ಮ್ಹಾಕಾ ವಳ್ಖಿಚಿಂ ಆಸಲ್ಲಿಂ. ತಾಂಣಿಂಚ್ ಶಿಕೊವ್ನ್ ಆಸ್‍ಲ್ಲ್ಯಾ ದ್ಯೂಬ್ವಾ ಸ್ಕೂಲ್ ಒಫ್ ಕೊಮರ್ಸಾಂತ್ ಹಾಂವೆಂ ಟೈಪ್‌ರೈಟಿಂಗ್ ತರ್ಬೆತಿ ಜೊಡಲ್ಲಿ. ತಾಚೊ ಫಾಯ್ದೊ ಆತಾಂಯ್ ಹಾಂವ್ ಜೊಡುನ್ ಆಸಾಂ. ಥಂಯ್ಚ್ಯಾ ಜಾಯ್ತ್ಯಾ ವಾರ್ಶಿಕ್ ದಿಸಾಂಚ್ಯಾ ಸುವಾಳ್ಯಾಂಕ್ ಹಾಂವ್ ಗೆಲ್ಲೊಂ ಆಸಾಂ. ರೋಹಿಣಿ ಟೀಚೆರ್ ತ್ಯಾ ಕಾಳಾರ್ ಥಂಯ್ ಆಸಲ್ಲಿ. ಸೇಕ್ರೆಡ್ ಹಾರ್ಟ್ ಶಾಳೆಂತ್ಲೆಂ ಟೀಚೆರಾಂಚೆಂ ಜಿವಿತ್, ವಿದ್ಯಾರ್ಥಿಂಕ್ ಶಿಕ್ಷಕಾಂನಿ ಪಳೆಂವ್ಚಿ ರೀತ್, ವಿದ್ಯಾರ್ಥಿಂಕ್ ಶಿಕ್ಷಾ ದಿಲ್ಲ್ಯಾಂತ್ ಜಾಲ್ಲೆ ಸಮಸ್ಯೆ, ಟೀಚೆರಾಂ ಥಂಯ್ ಭುರ್ಗ್ಯಾಂಚಿ ದೀಷ್ಟ್ ಕಶಿ ಆಸ್ತಾ – ಹೆಂ ಸಮ್ಜುಂಚೆ ದಿಶೆನ್ ರೋಹಿಣಿ ಟೀಚೆರಿನ್ ಆಪ್ಣಾಯಿಲ್ಲಿ ಪ್ರಶ್ನಾವಳಿಚಿ ವಾಟ್, ಇಸ್ಕೊಲಾಂತ್ಲಿ ಚೊರಿ, ಬೈಬಲ್ ಮ್ಯಾಜಿಕ್ ಕರ‍್ಚೊ ಪಾದ್ರಿ ಆನಿ ತಿಚೆ ಮತಿಂತ್ ಉಬ್ಜಾಲ್ಲಿಂ ಸವಾಲಾಂ, ಬಿಸ್ಪಾಕ್ ತಿಣೆ ಬರಯಿಲ್ಲಿ ಚೀಟ್ -ಅಶೆಂ ಜಾಯ್ತ್ಯೊ ಗಜಾಲಿ ಕಾಂಯಿಂಚ್ ಮುಲಾಜ್ ನಾಸ್ತಾಂ ಹ್ಯಾ ಪುಸ್ತಕಾಂತ್ ಸುರಸ್ ರಿತಿನ್ ತಿ ಸಾಂಗುನ್ ವೆತಾ. ಅಶೆಂ ಸಾಂಗ್ತಾನಾ ಜಾಯ್ತೆ ನವೆ ಅಪ್ರೂಪ್ ಅನ್ಭೋಗಾಂತ್ ಪಿಕ್‌ಲ್ಲೆ ವಿಚಾರ್ ತಿ ಮಾಂಡ್ತಾ ಆನಿ ಆಮ್ಚೆ ಮಾತಿ ಖೆಲ್ಲೆ ಮತಿಂಕ್ ನವ್ಯಾ ಎಕಾ ಚರ್ಚೆಚ್ಯಾ ಮಾಟ್ವಾಕ್ ಆಪೊವ್ನ್ ವ್ಹರ‍್ತಾ.

ಹಾಂವ್ ಶಿಕಪ್ ಜೊಡಲ್ಲೆಂ ಪಾದ್ವಾ ಹೈಸ್ಕೂಲ್, ಮ್ಹಾಕಾ ಶಿಕಯಿಲ್ಲಿಂ ಲಕ್ಷ್ಮೀ ಟೀಚೆರ್, ಜೊನ್ ಮಾಸ್ಟರ್, ನೊರೊನ್ಹಾ ಟೀಚೆರ್, ಪಿರೇರಾ ಟೀಚೆರ್, ಸಲ್ಡಾನ್ಹಾ ಟೀಚೆರ್ – ಸಗ್ಳಿಂ ಹ್ಯೆ ಆತ್ಮ್‌ಕಥೆಂತ್ ಯೆತಾತ್. ಮ್ಹಾಕಾ ಆಟ್ವೆಂತ್ ಹಿಂದಿ ಶಿಕಯಿಲ್ಲೆ ಲಕ್ಷ್ಮೀ ಟೀಚೆರಿಲಾಗಿಂ ಲೇಖಕಿಕ್ ಲಾಗ್ಶಿಲಿ ಸಳಾವಳ್ ತಶೆಂ ಮೋಗ್ ಆಸಲ್ಲೊ. ತಿಚ್ಯಾ ಜಿವಿತಾಚಿ ಮಾರ್ಗದರ್ಶಕಿ ತಿ ಮ್ಹಣುನ್ ಮಾಂದುನ್ ಘೆತಲ್ಲೆವಿಶಿಂ ಹ್ಯಾ ಪುಸ್ತಕಾಂತ್ ತಿ ವೊಳ್ಖುನ್ ಘೆತಾ. ಸಲ್ಡಾನ್ಹಾ ಟೀಚೆರಿವಿಶಿಂ ಜೆಂ ತಿಣೆ ಬರಯ್ಲಾಂ ತೆಂ ವಾಚ್ತಾನಾ ಝಿಮ್ ಜಾತಾ. ನೊರೊನ್ಹಾ ಟೀಚೆರ್ ಕಶಿ ಲಕ್ಷೀ ಟಿಚೆರಿಚ್ಯಾ ಮರ್ಣಾಕಾಳಾರ್ ತಿಚೆ ಸಾಂಗಾತಾ ಆಸುನ್ ತಿಕಾ ಮಜತ್ ಕರ‍್ತಾಲಿ ತೆಂ ಲೇಖಕಿನ್ ಸಾಂಗ್ಲಾಂ. ಪಿರೇರಾ ಟೀಚೆರಿಚೆಂ ನಾಂವ್ ಕಾಡ್ಲಾಂ ಜಾಲ್ಯಾರೀ, ಕಾಂಯ್ ಉಲ್ಲೇಕ್ ನಾ. ತರಿಪುಣ್ ಪಿರೇರಾ ಟಿಚೆರಿನ್ ಹೆಡ್‌ಮಾಸ್ಟರ್ ಫಾ. ವಿಲಿಯಮ್ ಗೊಸಾಲಾಲಾಗಿಂ ಸಾಂಗುನ್, ಮ್ಹಜ್ಯಾ ವರ್ಸಾಚೆ ಫೀಸ್ ಸಾಡೆಬಾರಾ ರುಪಯ್ ಮಾಫ್ ಕರಯಿಲ್ಲೆವಿಶಿಂ ಆನಿ ತ್ಯಾ ಘಡಿತಾನ್ ಮ್ಹಜೆಂ ವ್ಯಕ್ತಿತ್ವ್ ಘಡಯಿಲ್ಲೆವಿಶಿಂ ಹಾಂವೆಂ ಜೊ ಪ್ರಬಂಧ್ ಬರಯಿಲ್ಲೊ, ತೊ ಆಜ್ ಶಾಳೆಚಿಂ ಭುರ್ಗಿಂ ಕೊಂಕಣಿ ಪಠ್ಯ್‌ಪುಸ್ತಕಾಂನಿ ವಾಚ್ತಾತ್ ಜಾಲ್ಲ್ಯಾನ್ ಮ್ಹಜ್ಯಾ ಟೀಚೆರಿಂಚ್ಯಾ ವ್ಹಡ್ಪಣಾಚ್ಯೆ ಶಿಂಕ್ಳೆಚೆಂ ಕೊಂತ್ ಸಂಪೂರ್ಣ್ ಜಾಲಾಂ ಮ್ಹಳ್ಳ್ಯಾಚಿ ದಾಧೊಸ್ಕಾಯ್ ಭೊಗ್ತಾ.

ಹ್ಯಾ ಪುಸ್ತಕಾಂತ್ ಬಜ್ಜೋಡಿ ಆನಿ ಬಿಕರ್ನಕಟ್ಟೆ ಪರಿಸರಾಚ್ಯೊ ಆದ್ಲ್ಯೊ ಗಜಾಲಿ, ತವಳ್ಚೆ ವ್ಯಕ್ತಿ ಪ್ರತ್ಯೇಕ್ ಜಾವ್ನ್ ಆಮ್ಕಾಂ ಪಿಡೆಶಿಡೆಂಕ್ ಸದಾಂಚ್ ಪಾವುನ್ ಆಸಲ್ಲೊ ಡೊ. ಉಮಾನಾಥ್ ಸುವರ್ಣ, ಹಾಂವೆಂ ಕಾಂಯ್ ಥೊಡೊ ಕಾಳ್ ಕನ್ನಡ ನಾಟಕಾಂಚ್ಯಾ ಮೊಗಾರ್ ಪಡ್ತಾನಾ ವಳಖ್ ಕರುನ್ ಘೆತಲ್ಲಿಂ ಶ್ರೀಧರ್ ಆನಿ ಲೂಸಿ ತಶೆಂಚ್ ಸಮಾಜಾಂತ್ಲ್ಯಾ ಶೋಷಿತ್ ವರ್ಗಾಚ್ಯೆ ಉದರ್ಗತೆಕ್ ವಾವುರ‍್ಚಿಂ ಜಾಯ್ತಿಂ ಬಿ. ಎಂ. ರೋಹಿಣಿಚ್ಯಾ ಹ್ಯಾ ಪುಸ್ತಕಾಂತ್ ಯೆತಾತ್ ಆನಿ ಆದ್ಲೆ ಉಡಾಸ್ ಜಿವೆ ಕರ‍್ತಾತ್.

ಮೋಲಿ ಮಿರಾಂದಾನ್ ಬಿ. ಎಂ. ರೋಹಿಣಿಚೆಂ ಹೆಂ ಪುಸ್ತಕ್ ಕೊಂಕಣಿಕ್ ಅನುವಾದ್ ಕೆಲಾಂ. ಹೊ ಏಕ್ ಸಾಹಿತಿಕ್ ಅನುವಾದ್. ಮೂಳ್ ಪುಸ್ತಕ್ ಕನ್ನಡಾಂತ್ ಆಸಾ ಆನಿ ಅನುವಾದಾಚಿ ಭಾಸ್ ಕೊಂಕಣಿ, ತಾಂತ್ಲ್ಯಾತಾಂತುಂ ಮಂಗ್ಳುರಿ ಕೊಂಕಣಿ ಕಥೊಲಿಕ್ ಬೋಲಿ. ಮೂಳ್ ಲೇಖಕಿ ಬಿಲ್ಲವ ಸಮಾಜಾಂತ್ಲಿ ಆನಿ ತುಳು ಭಾಶಿಕ್ ಕುಟ್ಮಾಂತ್ಲಿ. ಅನುವಾದಕಿ ಮಂಗ್ಳುರಿ ಕಥೊಲಿಕ್ ಸಮಾಜಾಂತ್ಲಿ ಆನಿ ಕೊಂಕಣಿ ಕುಟ್ಮಾಂತ್ಲಿ.  ದೊಗೀ ಸ್ತ್ರಿಯೊ. ಬಿ. ಎಂ. ರೋಹಿಣಿ ಕುಲ್ಶೇಕರ್ ಪರಿಸರಾಂತ್ ವ್ಹಡ್ ಜಾವ್ನ್, ಶಿಕೊವ್ನ್, ಕುಡುಪುಂತ್ ಆತಾಂ ವಸ್ತಿ ಕರ‍್ತಾ ಜಾಲ್ಯಾರ್ ಅನುವಾದಕಿ ಮೋಲಿ ಮಿರಾಂದಾ ಕುಲ್ಶೇಕರಾಂತ್ ಜಲ್ಮೊನ್, ಥಂಯಿಂಚ್ ವಾಡುನ್, ಸೇಕ್ರೆಡ್ ಹಾರ್ಟ್ ಶಾಳೆಂತ್ ಶಿಕಪ್ ಜೊಡಲ್ಲಿ ಸ್ತ್ರೀ.

ತುಳು ಮನ್ಶಾಂಚೆಂ ಜಿವಿತ್, ತಾಂಚಿ ಸಂಸ್ಕೃತಿ – ಕೊಂಕಣಿ ಮನ್ಶಾಂಕ್ ಸಮ್ಜುಂಚ್ಯಾಂತ್ ಕಾಂಯಿಂಚ್ ತ್ರಾಸ್ ಜಾಯ್ನಾಂತ್. ತುಳು ಆನಿ ಕೊಂಕಣಿ ಭಾಸೊ ಕಾಂಯ್ ಶತಕಾಂ ಥಾವ್ನ್ ಭಭಯ್ಣ್ಯಾಂ ಭಾಶೆನ್ ಜಿಯೆವ್ನ್ ಆಸಾತ್. ಕನ್ನಡ ಆಮ್ಚಿ ರಾಜ್ಯಾಚಿ ಭಾಸ್. ಮೋಲಿ ಮಿರಾಂದಾಕ್ ಕನ್ನಡ ಭಾಸ್ ಪರ್ಕಿ ನ್ಹಯ್. ಕನ್ನಡ ಭಾಶೆಂತ್‍ಯ್ ತಿಣೆಂ ಬರಪ್ ಕೆಲಾಂ. ಸಭಾರ್ ವರ್ಸಾಂ ಥಾವ್ನ್ ಮೂಳ್ ಲೇಖಕಿ ತಶೆಂ ಅನುವಾದಕಿ ಮದೆಂ ಕುಟ್ಮಾ ಸಂಬಂಧಾಂಕ್ ಮಿಕ್ವಲ್ಲಿ ಏಕ್ ವಿಶೇಸ್ ಇಷ್ಟಾಗತ್ ಆಸಾ. ಹೊ ಸಗ್ಳ್ಯೊ ಗಜಾಲಿ ಮೋಲಿ ಮಿರಾಂದಾಕ್ ಹ್ಯಾ ಅನುವಾದಾಂತ್ ಉಪ್ಕಾರಾಚ್ಯೊ ಜಾಲ್ಯಾತ್.

ಖಂಯ್ಚ್ಯಾಯ್ ಅನುವಾದಾಕಾಕ್ ವಾ ಅನುವಾದಕಿಕ್ ಅನುವಾದಾಕ್ ದೆಂವ್ತಾನಾ ಗರ್ಜ್ ಆಸ್ಚೆ ಸರ್ವಯ್ ಗೂಣ್ ಆಸನಾಂತ್. ಏಕ್ ನಾ ಏಕ್ ಊಣ್ ಆಸ್ತಾಚ್. ಪುಣ್ ಹ್ಯಾ ಅನುವಾದಾಂತ್ ಮೋಲಿ ಮಿರಾಂದಾಕ್ ಹೆ ಸರ್ವಯ್ ಗೂಣ್ ಆಸ್ಚೆ ದಿಸ್ತಾತ್. ತೆಂ ತಿಚೆಂ ಬಳ್. ಬಳ್ ಕಿತ್ಯಾಕ್ ಮ್ಹಣ್ಟಾಂ ಮ್ಹಳ್ಯಾರ್ ದೊಗೀ ಸ್ತ್ರಿಯೊ, ಸ್ತ್ರಿಯಾಂಚ್ಯೊ ಗಜಾಲಿ ಸ್ತ್ರಿಯಾಂನಿ ಸಮ್ಜಲ್ಲೆಬರಿ ದಾದ್ಲೆ ಸಮ್ಜುಂಕ್ ಸಕನಾಂತ್. ದೊಗಾಂಯ್ ಜಣಾಂ ಎಕಾಚ್ ಪರಿಸರಾಂತ್ ವಾಡಲ್ಲಿಂ ಮನ್ಶಾಂ. ಪ್ರಾಯೆನ್ ಜಾಲ್ಯಾರಿ ವ್ಹಡ್ ಏಕ್ ಫರಕ್ ನಾ. ಅನುವಾದಕಿ ಮೂಳ್ ಲೇಖಕಿಚಿ ಘರ್ಚಿ ಭಾಸ್ ತಶೆಂ ಪುಸ್ತಕಾಂತ್ ವಾಪರ್‌ಲ್ಲಿ ಭಾಸ್ ಬರಿ ಜಾಣಾ. ತುಳು ಲೊಕಾಚೆಂ ಜಿವಿತ್ ತಿ ಲ್ಹಾನ್ ಥಾವ್ನ್ ಪಳೆವ್ನ್ ಆಯ್ಲ್ಯಾ. ಹಾಚ್ಯಾ ಸಾಂಗಾತಾ ಅನುವಾದಾಚಿ ಭಾಸ್ ವಾಚ್ತಾನಾ ಮೋಲಿ ಮಿರಾಂದಾಚೆ ಕೊಂಕಣಿ ಭಾಶೆಚೆ ಗಿರೇಸ್ತ್‌ಕಾಯೆವಿಶಿಂ ತೋಖ್ಣಾಯ್ ಕರ‍್ಚಿಚ್ ಪಡ್ತಾ.

ಮಾಗೀರ್ ಶೆವೊಟ್ಚೆ ಭಾಶೆಚೆ ವಾಚ್ಪಿ ಮಂಗ್ಳುರಿ ಕೊಂಕಣಿ ಕಥೊಲಿಕ್. ತಿಂ ಪುರಾಯ್ ಮೋಲಿ ಮಿರಾಂದಾ ವಾಡಲ್ಲ್ಯಾ ಸಮಾಜಾಂತ್ಲಿಂ. ತಾಂಕಾಂ ಸಮ್ಜುಂಚ್ಯಾಪರಿಂ ಹೊ ಅನುವಾದ್ ಆಯ್ಲಾ. ಮೂಳ್ ಲೇಖಕಿನ್ ಆಪ್ಲ್ಯಾ ಪುಸ್ತಕಾಂತ್ ಸಾಂಗಲ್ಲ್ಯೊ ಗಜಾಲಿ ಕಾಂಯಿಂಚ್ ತ್ರಾಸ್ ನಾಸ್ತಾಂ ಸುಂದರ್ ಕೊಂಕಣಿ ಭಾಶೆನ್ ಮೋಲಿ ಮಿರಾಂದಾನ್ ಉತ್ರಾಯ್ಲ್ಯಾತ್.

ಏಕ್ ಗಜಾಲ್ ಸಾಂಗಜಾಯಿಚ್ ಮ್ಹಣ್ ಭೊಗ್ತಾ. ಬಿ. ಎಂ.  ರೋಹಿಣಿಚೆರ್ ಮಂಗ್ಳುರಿ ಕೊಂಕಣಿ ಸಮಾಜಾಚೊ ಪ್ರಭಾವ್ ವ್ಹಡ್ ಆಸಾ. ತ್ಯಾ ದೆಕುನ್, ಕೊಂಕಣಿ ಸಮಾಜಾ ಭಾಯ್ಲ್ಯಾ ವ್ಯಕ್ತಿಚೆಂ ಚಿಂತಪ್ ಕೊಂಕಣಿ ಸಮಾಜಾವಿಶಿಂ, ಪ್ರತ್ಯೇಕ್ ಕರುನ್ ಕ್ರಿಸ್ತಾಂವ್ ಕೊಂಕಣಿ ಸಮಾಜಾವಿಶಿಂ ಕಿತೆಂ ಆಸಾ ತೆಂ ಸಮ್ಜುನ್ ಘೆಂವ್ಕ್ ಹರ್ಯೆಕಾ ಕೊಂಕಣಿ ಸ್ತ್ರಿಯಾಂನಿ, ಸಿಸ್ಟ್ರಾಂನಿ, ಇಸ್ಕೊಲಾಂ ಚಲೊಂವ್ಚ್ಯಾ ವ್ಹಡಿಲಾಂನಿ, ಸ್ತ್ರಿಯೆಕ್ ಲ್ಹಾನ್ ಕರುನ್ ದೆಖ್ಚ್ಯಾಂನಿ ಆನಿ ಪುರುಷ್-ಸ್ತ್ರೀ ಮದೆಂ ದಾದ್ಲೊ ಊಂಚ್ ಮ್ಹಳ್ಳೆಂ ಚಿಂತಪ್ ಆಜೂನ್ ಪಾತ್ಯೆವ್ನ್ ಆಯಿಲ್ಲ್ಯಾ ದಾದ್ಲ್ಯಾಂನಿ – ಹೆಂ ಪುಸ್ತಕ್ ವಾಚಿಜಾಯಿಚ್. ತಶೆಂ ಜಾಲೆಂ ತರ್ ಮೂಳ್ ಲೇಖಕಿಕ್, ಅನುವಾದಕಿಕ್ ತಶೆಂ ಸಮೇಸ್ತ್ ಸ್ತ್ರೀಯಾಂಕ್ ಆಮಿ ಮಾನ್ ದಿಲ್ಲೆಬರಿ ಜಾತಲೊ. ತಿತ್ಲೆಂ ಮಾತ್ರ್ ನ್ಹಯ್ ಹ್ಯಾ ಪುಸ್ತಕಾಂತ್ ಜೆ ವಿಚಾರ್ ವ್ಯಕ್ತ್ ಜಾಲ್ಯಾತ್ ತೆ ಮನಾಂತ್ ಘೊಳೊವ್ನ್, ಸ್ತ್ರಿಯಾಂವಿಶಿಂ ಆಮ್ಚೆಂ ಚಿಂತಪ್ ಗವ್ರವಾಚೆಂ ಕೆಲ್ಲ್ಯಾಂತ್ ಖರ‍್ಯಾ ಮನ್ಶಾಪಣಾಕ್ ಆಮಿ ವೆಂಗ‌ಲ್ಲ್ಯಾಬರಿ ಜಾತಲೆಂ.

ಬಿ. ಎಂ. ರೋಹಿಣಿಕ್ ಕೊಂಕಣಿ ಭಾಶೆದ್ವಾರಿಂ ಆಮ್ಕಾಂ ವಳಖ್ ಕರುನ್ ದಿಲ್ಲ್ಯಾ ಮೋಲಿ ಮಿರಾಂದಾಕ್ ಸಮಸ್ತ್ ಕೊಂಕಣಿ ಪರ್ಜೆತರ್ಫೆನ್ ಉಲ್ಲಾಶಿತಾಂ ಆನಿ ತಿಚೊ ಉಪ್ಕಾರ್ ಆಟಯ್ತಾಂ.

► ಮೆಲ್ವಿನ್ ರೊಡ್ರಿಗಸ್