ಕ್ಲೈವ್ ಸೊಜ್, ಬೊಳಿಯೆ ಲಿಕ್ಣೆನಾಂವಾನ್ ಬರಂವ್ಚೊ ಕುಂತಳ್‌ನಗರ್ಚೊ ಲ್ಯಾರಿ ಕ್ಲೈವ್ ಡಿ’ಸೊಜಾ ಹಾಕಾ ಆನಿ ಕಾಣಿಕ್ ಪಂದ್ರಾಳ್ಯಾ ಪತ್ರಾಚೊ ಆದ್ಲೊ ಸಂಪಾದಕ್ – ಪ್ರಕಾಶಕ್ ಆವಿಲ್ ರಸ್ಕೀನ್ಹಾ ಹಾಂಕಾ – ಲಿಯೊ ರೊಡ್ರಿಗಸ್ ಕುಟಮ್ ಕಿಟಾಳ್ ಯುವ ಪುರಸ್ಕಾರ್ ಆನಿ ಆಸ್ಟಿನ್ ಪ್ರಭು ಕುಟಮ್ ಆರ್ಸೊ ಪತ್ರಿಕೋದ್ಯಮ್ ಪುರಸ್ಕಾರಾಕ್ ವಿಂಚುನ್ ಕಾಡ್ಲಾಂ.
ಹೆ ಪುರಸ್ಕಾರ್ 2023 ಜನೆರಾಚ್ಯಾ 1 ತಾರಿಕೆರ್, ಜೆಪ್ಪು ಸಾಂ. ಜುಜೆ ಸೆಮಿನರಿಚ್ಯಾ ಆವರಣಾಂತ್ ಆಸ್ಚ್ಯಾ ಮರಿಯ ಜಯಂತಿ ಸಭಾಭವನಾಂತ್ ಮಾಂಡುನ್ ಹಾಡ್ಲೆಲ್ಯಾ ಸಾದ್ಯಾ ಕಾರ್ಯಕ್ರಮಾಂತ್ ಸಾಂಜೆಚ್ಯಾ 6 ವ್ಹರಾರ್ ಪ್ರದಾನ್ ಕರ್ತಲೆ. ಕಾರ್ಯಾಕ್ ಪಾಟ್ಲ್ಯಾ ಸಾಡೆ ಪಾಂಚ್ ವರ್ಸಾಂ ಪಾಸುನ್ ಖಳನಾಸ್ತಾನಾ ಚಿಕಾಗೊ ಥಾವ್ನ್ ಫಾಯ್ಸ್ ಜಾಂವ್ಚೆಂ ಕೊಂಕ್ಣೆಚೆಂ ಏಕ್ ಮಾತ್ ಡಿಜಿಟಲ್ ಹಫ್ತ್ಯಾಳೆಂ ಪತ್ರ್ ವೀಜ್ ಕೊಂಕಣಿ ಹಾಚೊ ಸ್ಥಾಪಕ್/ ಪ್ರಕಾಶಕ್/ ಸಂಪಾದಕ್ – ಲ| ಡೊ| ಆಸ್ಟಿನ್ ಡಿ’ಸೊಜಾ ಪ್ರಭು ಆನಿ ಅಬುದಾಬಿಚೊ ಅನಿವಾಸಿ ಉದ್ಯಮಿ, ಸ್ಫಿಯರ್‌ಹೆಡ್ ಗ್ರೂಪ್ ಹಾಚೊ ಮೆಂಟೊರ್ ಆನಿ ಸಲಹಾದಾರ್ ಸಿಎ ವಲೆರಿಯನ್ ದಾಲ್ಮೇದಾ ಹಾಜರ್ ಆಸೊನ್, ಪುರಸ್ಕಾರ್ ಪ್ರದಾನ್ ಕರ್ತಲೆ. ಕಿಟಾಳ್ – ಆರ್ಸೊ ಪುರಸ್ಕಾರ್ ವಿಂಚ್ಣುಕೆ ಸಮಿತಿಚೊ ಅಧ್ಯಕ್ಶ್ ಟೈಟಸ್ ನೊರೊನ್ಹಾ ಕಾರ್ಯಾಚೆಂ ಅಧ್ಯಕ್ಷ್ ಸ್ಥಾನ್ ಘೆತೆಲೆ.
ಪಾಟ್ಲ್ಯಾ ಧಾ ವರಸಾಂ ಪಾಸುನ್ ಕಿಟಾಳ್ ಜಾಳಿಸುವಾತ್ ಕೊಂಕ್ಣಿ ಸಾಹಿತ್ಯಾಂತ್ಲ್ಯಾ ಭರ್ವಶ್ಯಾಚಾ ಯುವ ತಾಲೆಂತಾಂಕ್ ಒಳ್ಕೊನ್ ಮಾನ್ ಕರ್ಚಿ ಏಕ್ ರಿವಾಜ್ ಪಾಳುನ್ ಆಸಾ ಆನಿ ಅಬುದಾಬಿಚೊ ಅನಿವಾಸಿ ಉದ್ಯಮಿ ತಶೆಂ ಕೊಂಕ್ಣಿ ಸಮರ್ಥಕ್ ಮಾನೆಸ್ತ್ ಲಿಯೊ ರೊಡ್ರಿಗಸ್ ಆಪ್ಲ್ಯಾ ಕುಟ್ಮಾಚ್ಯಾ ನಾಂವಾರ್ ಹೊ ಪುರಸ್ಕಾರ್ ಪಾಟವ್ನ್ ಆಸಾ. ಪುರಸ್ಕಾರ್ ನಗ್ದೆನ್ ರುಪಯ್ 25,000/- ಆನಿ ಸ್ಮರಣಿಕಾ ಆಟಾಪ್ತಾ.
ಪ್ರಸ್ತುತ್ ವರ್ಸಾ ಪಾಸುನ್ ಆರ್ಸೊ ಪತ್ರಾಚ್ಯಾ ಮುಕೆಲ್ಪಣಾರ್, ಶೆಕ್ಡ್ಯಾಚಿ ಚರಿತ್ರಾ ಆಸ್ಚ್ಯಾ ಕೊಂಕ್ಣಿ ಪತ್ರಿಕೋದ್ಯಮಾಂತ್ ಥಿರಾಸಣೆನ್ ವಾವುರ್ನ್, ಕೊಂಕ್ಣಿ ಸಾಹಿತಿ ಆನಿ ಸಾಹಿತ್ಯಾಚಾ ವಾಡಾವಳಿಕ್ ಮಹತ್ವಾಚಿ ದೆಣ್ಗಿ ದಿಲ್ಲ್ಯಾ ಎಕಾ ವೆಕ್ತಿಕ್ ವಿಂಚುನ್ ಹರ್ ವರ್ಸಾ ಮಾನ್ ಕರುಂಕ್ ಚಿಂತ್ಲಾಂ. ಹ್ಯಾ ಚಿಂತ್ಪಾಕ್ ಚಿಕಾಗೊ ಥಾವ್ನ್ ಫಾಯ್ಸ್ ಜಾಂವ್ಚೆಂ ಎಕ್ ಮಾತ್ ಡಿಜಿಟಲ್ ಕೊಂಕ್ಣಿ ಹಪ್ಯ್ತಾಳೆಂ ‘ವೀಜ್ ಕೊಂಕಣಿ’ ಹಾಚೊ ಸ್ಥಾಪಕ್ ಆನಿ ಪ್ರಕಾಶಕ್ – ಸಂಪಾದಕ್ ಲ| ಡೊ| ಆಸ್ಟಿನ್ ಡಿ’ಸೊಜಾ ಪ್ರಭು ಹಾಣಿ ಆಪ್ಲೊ ಸಾಂಗಾತ್ ಭಾಸಾಯ್ಲಾ.
1977 ಪಾಸುನ್ 1997 ಪರ್ಯಾಂತ್ ಖಳಾನಾಸ್ತಾನಾ ಆನಿ ವೊಳಾನಾಸ್ತಾನಾ ನಿರಂತರ್ 20 ವರ್ಸಾಂ ಕಾಣಿಕ್ ಪಂದ್ರಾಳೆಂ ಪತ್ರ್ ಫಾಯ್ಸ್ ಕೆಲ್ಲಿ ಕೀರ್ತ್ ಪ್ರಸ್ತುತ್ ಬೆಳ್ಳೂರ್ ನಿವಾಸಿ, ಕುಲ್ಶೇಕರ್ಚ್ಯಾ ಮಾನೆಸ್ತ್ ಆವಿಲ್ ರಸ್ಕೀನ್ಹಾಕ್ ಫಾವೊ ಜಾತಾ. ಆಪ್ಲ್ಯಾಚ್ ಸಾಂತಾಕ್ರೂಜ್ ಛಾಪ್ಖಾನ್ಯಾ ಥಾವ್ನ್ ತಾಣೆ 12 ಕೊಂಕ್ಣಿ ಬೂಕ್ ಸಯ್ತ್ ಫಾಯ್ಸ್ ಕೆಲ್ಯಾತ್. ಹ್ಯಾ ಬುಕಾಂನಿ ದೋನ್ ವಿ.ಜೆ.ಪಿ. ಸಲ್ಡಾನ್ಹಾ ( ಖಡಾಪ್ ) ಹಾಚೆ ಆನಿ ಏಕ್ ಕೊಂಕಣ್ ಕೊಗುಳ್ ವಿಲ್ಪಿ ರೆಬಿಂಬಸಾಚ್ಯಾ ವಿಂಚ್ಣಾರ್ ಪದಾಂಬುಕಾಚಿ ಆಟ್ವಿ ಆವೃತ್ತೀಯ್ ಆಟಾಪುನ್ ಆಸಾ.
ಆಪ್ಲ್ಯಾ 14 ವರ್ಸಾಂಚ್ಯಾ ಪ್ರಾಯೆರ್ ಕೊಂಕ್ಣೆಂತ್ ಬರಂವ್ಕ್ ಸುರು ಕೆಲ್ಲ್ಯಾ ಆವಿಲಾನ್, ಭಾವ್ ಹ್ಯಾರಿ ಕಾಣಿಕ್ ಚಲಂವ್ಕ್ ಘೆತಾನಾ ದೋನ್ ವರ್ಸಾಂ ಸಹ – ಸಂಪಾದಕ್ ಜಾವ್ನ್ ವಾವುರ್ನ್ ಅನ್ಬೊಗ್ ಜೊಡ್ಲಲೊ ಆಸಾ. ಉಪ್ರಾಂತ್ ವೀಸ್ ವಸಾಂಚ್ಯಾ ಪ್ರಾಯೆರ್ ತೋ ಕಾಣಿಕ್ ಪತ್ರಾಚೊ ಸಂಪದಕ್ – ಪ್ರಕಾಶಕ್ ಜಾಲೊ. ತಾಚ್ಯಾ ಅವ್ಧೆಂತ್ ವಿಕ್ಟರ್ ಆಲ್ವಾರೆಸ್(ವಿಜಯ್) ರಿಚರ್ಡ್ ಆಲ್ವಾರೆಸ್(ಗುರೂಜಿ) ವಿನ್ಸೆಂಟ್ ಪಿಂಟೊ, ಕುಲ್ಶೇಕರ್, ಪಂಚು ಬಂಟ್ವಾಳ್, ವಲ್ಲಿ ಕ್ವಾಡ್ರಸ್, ಅಜೆಕಾರ್ ಹಾಣಿ ಆವಿಲ್ ರಸ್ಕೀನ್ಹಾಕ್ ಸಹ- ಸಂಪಾದಕ್ ಜಾವ್ನ್ ಮೊಟೊ ಸಾಂಗಾತ್ ದಿಲ್ಲೊ ಆಸಾ. ಪುಣ್ , 1992 ಥಾವ್ನ್ 1997 ಪರ್ಯಾಂತ್ ಆವಿಲಾನ್ ಕಾಣಿಕ್ ಪತ್ರಾಚಿ ಸಂಪೂರ್ಣ್ ಜವಾಬ್ದಾರಿ ಸಾಂಬಾಳ್‌ಲ್ಲಿ ಆಸಾ. ಪತ್ರ್ ಆನಿ ಪುಸ್ತಕಾಂ ಪ್ರಕಾಶನಾ ಭಾಯ್ರ್ ಲಯನ್ಸ್ ಕ್ಲಬ್ಬಾಂತ್ ಹುದ್ದೆದಾರ್ ಜಾವ್ನ್ ತಾಣೆ ಸೆವಾ ದಿಲ್ಲಿ ಆಸಾ ಆನಿ ಕೊಂಕ್ಣೆ ಸಾಂಗಾತಾ ತುಳು, ಕನ್ನಡ ನಾಟಕಾಂನೀಯ್ ನಟನ್ ಕೆಲ್ಲೆಂ ಆಸಾ. ಆವಿಲ್ ಪ್ರಸ್ತುತ್ ಬೆಳ್ಳೂರಾಂತ್ ಅಪ್ಲಿ ಪತಿಣ್ ಮ್ಯಾರಿಯೆಟ್ ಡಿಸಿಲ್ವ ಆನಿ ಭುರ್ಗ್ಯಾಂ ಸಾಂಗಾತಾ ವಸ್ತಿ ಕರುನ್ ಆಸಾ.
ಬೊಳಿಯೆ, ಕುಂತಳ್‌ನಗರ್ಚ್ಯಾ ಕ್ಲೈವ್ ಸೊಜಾನ್ ಆಜ್ ಮೆರೆನ್ ಸುಮಾರ್ 150 ಲಾಗಿಂ ಕವಿತಾ, ಚುಟುಕಾಂ, ಮಟ್ವ್ಯೊ ಕಾಣಿಯೊ ಆನಿ ಪ್ರಬಂದ್ ಬರಯ್ಲ್ಯಾತ್. ‘ನವಾಲಾಂಚೊಂ ಸಂಸಾರ್’ ಆನಿ ‘ಸರ್ಗಾರಾಜ್’ ಹೆ ನಾಟಕ್ ಬರವ್ನ್, ನಟನ್, ನಿರ್ದೇಶನ್ ಕರುನ್ ನಿರ್ಮಾಣ್ ಕೆಲ್ಯಾತ್. ಪ್ರಸ್ತುತ್ ಪದಾಂ ಬರವ್ನ್, ತಾಳೆ ಬಸವ್ನ್ ಡಿಜಿಟಲ್ ಮೀಡಿಯಾಂತ್ ತೋ ಫಾಯ್ಸ್ ಕರ್ತೇ ಆಸಾ. ಆಜ್ ಮೆರೆನ್ ತಾಚಿಂ ಸ ಪದಾಂ ಆನಿ ದೋನ್ ಕಾಂತಾರಾಂ ಫಾಯ್ಸ್ ಜಾವ್ನ್ ಲೊಕಾಮೊಗಾಳ್ ಜಾಲ್ಯಾಂತ್. ಚಾರ್ ಪದಾಂ ನಿರ್ಮಾಣ್ ಹಂತಾರ್ ಆಸಾತ್.
2010 ವ್ಯಾ ವರ್ಸಾ ‘ಯೋ ಮೊಗಾ’ ಕೊವ್ಳಿ ನಿರ್ಮಾಣಾಕ್ ತಾಣೆ ಪೋಶಕ್ ಜಾವ್ನ್ ಆದಾರ್ ದಿಲ್ಲೊ ಆಸಾ. 2011 ವರ್ಸಾ ಪಾಸುನ್ ಕುವೈಟ್ ಕೆನರಾ ವೆಲ್ಪೇರ್ ಅಸೋಶಿಯೇಸನ್ ಹಾಚೊ ಕಾರ್ಯಾಳ್ ಸಾಂದೊ ಜಾವ್ನ್ ತೋ ಸೆವಾ ದೀವ್ನ್ ಆಸಾ. ಮಂಗ್ಳುರ್ ವಿಶ್ವವಿದ್ಯಾಲಯಾಥಾವ್ನ್ ಹೊಸ್ಪಿಟ್ಯಾಲಿಟಿ ಸೈನ್ಸ್ ವಿಶಯಾಂತ್ ಪದ್ವಿ ಜೊಡುನ್, ಪ್ರಸ್ತುತ್ ಐರ್ಲೆಂಡಾಂತ್ ಇಂಡಿಯನ್ ಓಶಿಯನ್ ಹಾಂಗಾಸರ್ ವಾವ್ರಾರ್ ಆಸೊನ್, ಪತಿಣ್ ಅನಿತಾ ಆನಿ ಕುಟ್ಮಾಸವೆಂ ವಸ್ತಿ ಕರುನ್ ಆಸಾ.
ಪ್ರಶಸ್ತಿ ಪ್ರದಾನ್ ಕಾರ್ಯೆಂ ಸಾಂಜೆಚ್ಯಾ ಸ ವ್ಹರಾಂಚೆರ್ ಸುರು ಜಾವ್ನ್ ಜೆವ್ಣಾಸಾಂಗಾತಾ ನೊವ್ ವ್ಹರಾಂಚೆರ್ ಸಂಪ್ತಾ. ಆಮಂತ್ರಣ್ ಪತ್ರ್ ಹಾಂಗಾಸರ್ ಸಕಯ್ಲ್ ದಿಲಾಂ. ಕಿಟಾಳ್ – ಆರ್ಸೊ ಹಿತಯ್ಶಿಂಕ್ ಆನಿ ಕೊಂಕ್ಣಿ ಮೊಗಿಂಕ್ ಕಾರ್ಯಾಕ್ ಮಾಯಾಮೊಗಾಚೊ ಯೆವ್ಕಾರ್ ಆಸಾ. ಚಡಿತ್ ವಿವರಾಕ್ 94497 70629 ಹ್ಯಾ ನಂಬ್ರಾಕ್ ಫೊನ್ ಕರ್ಯೆತ್ ವಾ ವಾಟ್ಸಪ್ ಸಂದೇಶ್ ಪಾಟವ್ಯೆತ್.
