ಕಿಲ್ಲಚೆಂ ಕ್ರಿಸ್ಮಸ್

“ಮಮ್ಮಿ, ಆಮ್ಗೆರ್ ಸಾಂತಾಕ್ಲೊಸ್ ಯೆತಾಗೀ?”

ಆಪ್ಲ್ಯಾ ಸ ವರ್ಸಾಂಚ್ಯಾ ಪೂತ್ ಜೇಸಾನಾಚೆಂ ಸವಾಲ್ ಆಚಾನಾಕ್ ಆಯ್ಕೊನ್ ತಿಕಾ ಆಜಾಪ್ ಜಾಲೆಂ.  ನತಾಲಾಂಚೊ ಕಾಳ್ ಜಾಲ್ಲ್ಯಾನ್ ತಿಣೆ ಕಾಮ್ ಕರ್ಚ್ಯಾ ಆಂತೋನಾಮಾಚಾ ಘರಾ ಧರಭಸ್ತ್ ಕಾಮ್ ಆಸ್ಲೆಂ.  ತಾಚಿಂ ಭುರ್ಗಿಂ,  ಗಾಂವಾಕ್ ಯೇವ್ನ್ ಪಾವ್‌ಲ್ಲಿಂ. ತಶೆಂ ರೊಜಿಬಾಯ್  ಸಕಾಳ್  ಥಾವ್ನ್ ಸಾಂಜೆ ವರೇಗ್ ಕಾಮ್ ಕರ್ನ್ ಥಕ್ತಾಲಿ.  ಸಾಂಜೆರ್ ಘರಾ ಯೆತಾನಾ ಪೆಲ್ಸಿಬಾಯ್, ಆಂತೊನಾಮಾಚಿ ಬಾಯ್ಲ್ ಇಲ್ಲೆಂ ಜೆವಾಣ್ ಬಾಂದುನ್ ದಿತಾಲಿಂ.  ತಸೆಂ ರೊಜಿಬಾಯೆಕ್ ಘರಾ ಯೇವ್ನ್ ವಿಶೇಸ್ ರಾಂದುಂಕ್ ನಾತ್ಲೆಂ.  ಮಾಲ್ಘಡಿ ಧುವ್ ಕಿಲ್ಲಾ (ಕ್ಲಾರಾ) ಸಾಂಜೆರ್ ಶಿತ್ ಶಿಜೊನ್ ದವರ್ತಾಲೆಂ ಆನಿ ಘರ್ಚೆಂ ಸಗ್ಳೆಂ ಕಾಮ್ ಸಾಂಬಾಳ್ತಾಲೆಂ.  ಬಿ.ಕೊಮ್ ಸಂಪವ್ನ್ ಆತಾಂ ತೆಂ ಕಾಮಾಚ್ಯಾ ಸೊಧ್ನೆರ್ ಆಸ್ಲೆಂ.  ಸದ್ದ್ಯಾಕ್ ಭುರ್ಗ್ಯಾಂಕ್ ಟ್ಯೂಶನ್ ದೀವ್ನ್ ಘರ್ಚ್ಯಾ ಖರ್ಚಾಕ್ ಖಾಂದ್ ಮಾರ್ತಾಲೆಂ. ಸಾದ್ಯ್ ತರ್ ಮುಖಾರ್ ಎಮ್.ಕೊಮ್.  ಕರುಂಕ್ ತಾಕಾ ಮನ್ ಆಸ್ಲೆಂ.

“ಮಮ್ಮಿ, ಮಮ್ಮಿ ಸಾಂಗ್ ಮಾಮ್ಮಿ ಆಮ್ಗೆರ್ ಸಾಂತಾಕ್ಲೊಸ್ ಯೆತಾಗೀ?” ತಾಣೆ ಆವಯ್ಚೊ ಕೊಟ್ಟು ಸಕಯ್ಲ್  ವೊಡ್ಲೊ.

“ಕಿತ್ಯಾಕ್ ಪುತಾ . . . ತಶೆಂ ವಿಚಾರ್ತಾಯ್ ? ” ತಿಣೆ ತಾಕಾ ಪೊಟ್ಲುನ್ ಧರ್ನ್ ವಿಚಾರ್ಲೆಂ.

“ಮಾಮ್ಮಿ ಆಜ್ ಇಸ್ಕಾಲಾಂತ್ ಕ್ರಿಸ್ಮಸ್ ಟ್ರೀ ಕೆಲ್ಲಿ ಆನಿ ತಾಚ್ಯೆರ್, ನೆಕೆತ್ರಾಂ, ಕಾಪ್ಪುಸ್ ಅನಿ ರಂಗಾಳ್ ಫಿಂತಾಂ ಘಾಲ್ಲಿಂ ಆನಿ ಎಕ್ಲೊ ವ್ಹಡ್ಲ್ಯಾ ಧವ್ಯಾ ಖಾಡಾಚೊ ಆಬ್ ಬೆಲ್ಲ್ ವಾಜೊನ್ ಭುರ್ಗ್ಯಾಂಕ್ ಚೊಕ್ಲೆಟಾಂ ಉಡೈತಾಲೊ.  ತಾಚೆಂ ನಾಂವ್ ಸಾಂತಾಕ್ಲೊಸ್.  ಮ್ಹಾಕಾಯ್ ದೋನ್ ಮೆಳ್ಳಿಂ.  ಏಕ್ ಹಾಂವೆ ಖೆಲೆಂ ಮಮ್ಮಿ ಆನಿ ದುಸ್ರೆಂ ಕಿಲ್ಲಾಬಾಯೆಕ್ ಹಾಡ್ಲೆಂ”

“ಬೊರೆಂ ಕೆಲೆಂಯ್ ಪುತಾ.  ಬಾಯೆಚೊ ಕಿತ್ಲೊ ಮೋಗ್ ನೆ ತುಕಾ.”

“ವ್ಹಯ್ ಮಮ್ಮಿ. ಮಾಗಿರ್ ತಾಕಾ ಕೋಣ್  ದಿತಾ? ಕಿಲ್ಲಾಬಾಯ್ ಘರ್ಚೆಂ ಸಗ್ಳೆಂ ಕಾಮ್ ಕರ್ನ್ ಭುರ್ಗ್ಯಾಂಕ್ ಟ್ಯೂಶನ್ ದಿತಾ ಆನಿ ಮ್ಹಾಕಾಯ್ ಜೇಂವ್ಕ್, ಖಾಂವ್ಕ್ ದಿತಾ ನೆ. ತುಂ ಎಕಾ ಸಾಕಾಳಿಂ ಗೆಲ್ಲಿ ಸಾಂಜೆರ್ ಯೆತಾಯ್. ಕಿಲ್ಲಾಬಾಯ್ ಮ್ಹಸ್ತ್ ಬರಿ ಆನಿ ಮ್ಹಜೊ ಮೊಸ್ತ್ ಮೋಗ್ ಕರ್ತಾ ನೆ..”

“ವ್ಹಯ್ ಪುತಾ, ತುಜೆಂ ಕಿಲ್ಲಾ ಬಾಯ್ ಭಾಂಗಾರ್ ಭುರ್ಗೆಂ ಮುನ್ನಾ.”

“ಭುರ್ಗಿಂ ಸಾಂಗ್ತಾಲಿ ಸಾಂತಾಕ್ಲೊಸ್ ಸಗ್ಳಾಂಚ್ಯಾ ಘರಾ ಯೇತಾ ಮ್ಹಣ್.  ಆಮ್ಗೆರೀ ಯೇತಾ ನೆ ಮಾಮ್ಮಿ?

“ಸಾಂತಾಕ್ಲೊಸ್ ಆಮ್ಗೆರ್ ಯೆಂವ್ಚೊ ನಾ ಪುತಾ.  ಆಮ್ಚೆಂ ಘರ್ ಪಯ್ಸ್ ನೆ ಆನಿ ವಾಟ್‌ಯೀ ಸಮಾ ನಾ.”

“ಮಾಮ್ಮಿ, ಮ್ಹಾಕಾ ಗಿಫ಼್ಟ್ ನಾಂಗೀ ತರ್?”

“ಗಿಫ಼್ಟ್ ಆಸಾ ಪುತಾ ಹಾಂವ್ ಕಿಲ್ಲಾಬಾಯೆಲಾಗಿಂ ತುಕಾ ಕಾರ್ ಹಾಡುಂಕ್ ಸಾಂಗ್ತಾ.  ಆತಾಂ ನಿದ್ಯಾಂ  ಪುತಾ.” ತಿಣೆ ತಾಕಾ ಆರಾವ್ನ್ ಧರ್ಲೊ ಆನಿ ವೋಲ್ ವಯ್ರ್ ವೊಡ್ಲಿ.

ಪುತಾಕ್ ಕಿತೆಂ ಮ್ಹಣ್ ಸಾಂಗ್ತಾಲಿ ತಿ. ದುಸ್ರ್ಯಾ ಭುರ್ಗ್ಯಾಂಚೆಂ ಖೆಳಾವಸ್ತು ಪಳಯ್ತಾನಾ ತಾಕಾಯ್ ಖೆಳೊಂಕ್ ಆಶಾ ಯೆತಾಲಿ. ಪುಣ್  ಘರ್ಚಿ ಆವಾಸ್ತಾ ಳೆಲ್ಯಾರ್ ಪುರೊ.  ತಿಚೊ ಘರ್ಕಾರ್, ಬೊನಾ ಗ್ಯಾರೆಜಿಂತ್ ಕಾಮ್ ಕರ್ತಾ, ಪುಣ್ ಏಕ್ ನಯಾಪಯ್ಸೊ ಘರಾ ಯೇನಾ. ಕಾಮ್ ಜಾಲ್ಲ್ಯಾ ಉಪ್ರಾಂತ್ ಈಶ್ಟ್-ಮಂತ್ರ್ ಬಾರ್ ಆನಿ ನಾಕ್‌‌ಭರ್ ಪಿಯೊಣೆಂ.

ತಿಕಾ ಖಂತ್ ಆಪ್ಲ್ಯಾ ಭಾಂಗಾರ್ ಭುರ್ಗ್ಯಾ ಕಿಲ್ಲಾಚಿ.  ತಾಣೆ ಏಕ್ ತಾಚೆಂ ಶಿಕಪ್ ಸಂಪವ್ನ್ ತಾಣೆ ತಾಚ್ಯಾ ಪಾಯಾರ್ ಉಬೆ ರಾವ್ಲ್ಯಾರ್ ಆಮ್ಚೆ ಕಶ್ಟ್ ಹಾಳು ಜಾತಿತ್ ಮ್ಹಣ್ ತಿಚಿ ಆಲೊಚೆನ್.

***

“ಮಮ್ಮಿ ಮ್ಹಾಕಾ ಆಜ್ ಉಡ್ಪಿ ಫ಼್ರೆಂಡ್ಸಾಗೆರ್ ಕ್ರಿಸ್ಮಸ್ ಪಾರ್ಟೆಕ್ ವ್ಹಚುಂಕ್ ಆಸಾ”  ಮಿಕ್ಕಿನ್, ಆರ್ಶ್ಯಾ ಮುಖಾರ್ ಆಪ್ಲಿ ಟೈ ಸಮಾ ಕರ್ತಾನಾ ಆವಯ್ಕ್ ಸಾಂಗ್ಲೆಂ.

ಮಿಕ್ಕಿ, ಜ್ಯಾನೆಟ್ ಬಾಯೆಚೊ ಮೊಗಾಚೊ ಎಕ್ಲೊಚ್ಚ್ ಪೂತ್.  ದೋನ್ ವರ್ಸಾಂ ಉಪ್ರಾಂತ್ ಗಾಂವಾಕ್ ಆಯಿಲ್ಲೊ ಆನಿ ಹ್ಯಾ ಪಾವ್ಟಿಂ ಸೈರಿಕ್ ಪಳೆಂವ್ಕ್ ಆಸ್ಲಿ.  ಜ್ಯಾನೆಟ್ ಬಾಯ್ ತಾಕಾ ಗಾಂವಾಕ್ ಆಯಿಲ್ಲ್ಯಾ ಥಾವ್ನ್ ಉಡಾಸ್ ಕರ್ತಾಲಿ ಆನಿ ತಿಣೆ ಪಳಯಿಲ್ಲ್ಯಾ ಚೆಡ್ವಾಂಚಿ ಪಟ್ಟಿ ವಾಚ್ತಾಲಿ.  ಪುಣ್ ಮಿಕ್ಕಿನ್ ತಾಕಾ ಚಡ್ ಗುಮಾನ್ ದೀಂವ್ಕ್ ನಾ.  ತೊ ಟಿಪ್ – ಟೊಪ್ ನೆಸೊನ್ ವಚೊಂಕ್ ತಯಾರ್ ಜಾಲ್ಲೊ.  ‘ಕೊಣೀ ಚೆಡ್ವಾಂ ಪಾರ್ಟೆಂತ್ ಭೆಟ್ತೆಲಿಂ. ಮಾಮ್ಮಿಚಾ ಸೈರಿಕೆಕ್ ಲಾಯ್ ಉಜೊ’ ತೊ ಮತಿಂತ್‌ಚ್ ಹಾಸ್ಲೊ ಆನಿ ಬೈಕಾಕ್ ಕಿಕ್ ಮಾರ್ಲಿ.

ತಾಣೆ ಬೈಕಾಚೊ ವೇಗ್ ಚಡಯ್ಲೊ. ಸಾಂಜೆಚೆಂ ಪ್ರಫುಲ್ಲಿತ್ ವಾರೆಂ ವಾಳ್ತಾಲೆಂ. ತ್ಯಾ ಭಾಯ್ರ್ ಸಗ್ಳ್ಯಾನ್ ನತಾಲಾಂಚೊ ಸಂಭ್ರಮ್, ಸರ್ವಾಂಚ್ಯಾ ಘರಾಂನಿ ಥರಾವಳ್ ಅಲಂಕಾರ್, ಬಣಾಚೆ ದಿವೆ, ಪರ್ಜಳ್ಚ್ಯೊ ಕ್ರಿಸ್ಮಸ್ ಟ್ರೀಸ್, ನೆಕೆತ್ರಾಂ ಆನಿ ಕಿತೆಂ ಕಿತೆಂ. ತೊ ಏಕ್  ವಿಶೇಸ್ ಆನ್ಬೋಗ್. ಗಾಂವ್ಚೊ ಹವೊ, ಸಂಭ್ರಮ್ … ಸಂತೊಸ್, ಉಲ್ಲಾಸ್ ವಾರ‍್ಯಾಂತ್ ಉಪೆತಾಲೊ.

ಸಾಧಾರ್ಣ್ ಅರ್ಧ್ಯಾ ವಾಟೆರ್ ಪಾವ್ತಾನಾ ಎಕ್ಲೊ ದೆಧೆಸ್ಪರ್ ಮನಿಸ್ ಮಾರ್ಗಾರ್ ಮಾತ್ಯಾಕ್ ಹಾತ್ ಧರ್ನ್ ಬಸ್ಲಲೊ ತಾಣೆ ಪಳೆಲೊ.  ಮಿಕ್ಕಿನ್ ಬೈಕ್ ಕುಶಿಕ್ ರಾವವ್ನ್  ಮಾರ್ಗಾ ದೆಗೆರ್ ಬಸ್ಲೆಲ್ಯಾ  ಮಾನೆಸ್ತಾಕ್ ವಿಚಾರ್ಲೆಂ.

“ಆಂಕಲ್ ಕಾಲೆಂ ಜಾಲೆಂ.  ಹಾಂಗಾ ಕಿತ್ಯಾಕ್ ಬಸ್ಲಾಯ್?”

ತ್ಯಾ ಮಧ್ಯಮ್ ಪ್ರಾಯೆಚಾ ಮನ್ಶಾನ್ ವಯ್ರ್ ಪಳಯ್ಲೆಂ. ತಾಚ್ಯಾ ದೊಳ್ಯಾನಿ ದುಕಾಂ ಭರ್‌ಲ್ಲಿಂ. ತೊ ಕಾಂಯ್ಚ್ ಉಲಯ್ಲೊ ನಾ. ಬಗಾರ್ ಮಾರ್ಗಾರ್ ಪಿಟೊ ಜಾಲ್ಲ್ಯಾ ಪುತ್ಲೆಕ್ ಬೋಟ್ ದಾಕಯ್ಲಾಗ್ಲೊ.

“ಹೊ ತುಜೀ ಗಿ ತಿ?  ಕಶಿ ಪಿಟೊ ಜಾಲಿ?”

“ಹಾಂವ್ ತೆಂ ಕಾರ್ಟಾ ಬೆಗಾಂತ್ ಘೆವ್ನ್ ಚಲೊನ್ ವೆತಾಲೊಂ.  ತೆದ್ನಾ ದೋಗ್ ತರ್ನಾಟೆ ಬಾಯ್ಕಾರ್ ವೆಗಾನ್ ವೆತಾಲೆ ಆನಿ ಎಕ್ಲ್ಯಾನ್ ಮ್ಹಜೆಂ ಬ್ಯಾಗ್ ವೋಡ್ನ್ ರಸ್ತ್ಯಾರ್ ಉಡಯ್ಲೆಂ ಆನಿ ತಾಚ್ಯಾ ಪಾಟ್ಲ್ಯಾನ್ ಆಯಿಲ್ಲ್ಯಾ ಆನ್ಯೆಕಾ ಬೈಕಾಚಾ ಟಯರಾ ಪಂದಾ ಪಡೊನ್ ಪಿಟೊ ಪಿಟೊ ಜಾಲೆಂ.” ತಾಚ್ಯಾ ದೊಳ್ಯಾಂನಿ  ದುಕಾಂ ಆಯ್ಲಿಂ.

“ಕಾಲೆಂ ಆಂಕರ್ ತುಂ . . .  ಎದ್ದೆಶ್ಯಾ ಖೆಳಾವಸ್ತುಕ್ ಬೆಜಾರ್ ಪಾವ್ತಾಯ್.  ಊಟ್, ಹಾಂವ್ ತುಕಾ ಘರಾ ಪಾಯ್ತಾಂ.. ಹೆಂ ಖೆಳ್ಚೆಂ ಕಾರ್  ವಾಟೆರ್ ಕಾಣ್ಘೆವ್ಯಾಂ”

ತೊ ಬೆಜಾರಾಯೆನ್ ಉಟ್ಲೊ.  ತಾಚೆಂ ಘರ್ ಖೈಂ ಮ್ಹಣ್ ವಿಚಾರ್ಲೆಂ ಮಿಕ್ಕಿನ್.  “ಹಾಂವ್ ಘರಾವರೇಗ್ ತುಕಾ ಪಾಯ್ತಾಂ, ಯೆ ಬಸ್” ಮಿಕ್ಕಿನ್ ಒತ್ತಾಯ್ ಕೆಲ್ಲ್ಯಾಕ್ ಬೊನಾಬ್ ತಾಚ್ಯಾ ಬೈಕಾರ್ ಬಸ್ಲೊ.  ಬೈಕಾರ್ ಬಸ್ಲ್ಯಾ ಉಪ್ರಾಂತ್ ಮಿಕ್ಕಿನ್ ತಾಕಾ ವಿಚಾರ್ಲೆಂ ಹಿ ಖೆಳಾವಸ್ತ್  ಕೊಣಾಕ್ ಮ್ಹಣ್.

“ಮ್ಹಜಾ ಲ್ಹಾನ್ ಪುತಾಕ್ ಆನಿ ತೇಂಯ್ ಪಯ್ಲೆ ಪಾವ್ಟಿಂ ಹಾಂವೆ ಘೆಂವ್ಚಿ.”

“ಪಯ್ಲೆ ಪಾವ್ಟಿಂ ಮ್ಹಳ್ಯಾರ್?”

“ಕಾಣಿ ಲಾಂಬ್ ಆಸಾ ಪುತಾ, ಪೂಣ್ ತುಕಾ ಮಟ್ವಾನ್ ಸಾಂಗ್ತಾ.  ಕಾಲ್ ವರೆಗ್ ಹಾಂವ್ ಸಧಾಂ ಸೊರೊ ಪಿಯೆವ್ನ್ ಘರಾ ಮೊಸ್ತು ವೇಳ್ ಕರ್ನ್ ವೆತಾಲೊಂ. ಕಾಲ್ ರಾತಿಂ ಮ್ಹಜ್ಯಾ ಪುತಾನ್ ನಿದ್‌ಲ್ಲ್ಯಾ ವೆಳಾರ್ ಆಪ್ಲ್ಯಾ ಆವಯ್‌ಲಾಗಿಂ ವಿಚಾರ್ಲೆಂ,  “ಆಮ್ಗೆರ್ ಸಾಂತಾಕ್ಲೊಸ್  ಯೆತಾಗೀ ಆನಿ ಮ್ಹಾಕಾ ಇನಾಮ್ ಹಾಡ್ತಾಗೀ? ಮ್ಹಣ್. ಮ್ಹಜ್ಯಾ ಬಾಯ್ಲೆನ್ ಪುತಾಕ್ ಸಾಂಗ್ಲೆ ಆಮ್ಗೆರ್ ಸಾಂತಾಕ್ಲೊಸ್  ಯೆಂವ್ಚೊ ನಾ ಪುತಾ ಆನಿ ಆಮ್ಚ್ಯಾ ಘರಾಕ್ ಸಮಾ ವಾಟ್ ನಾ. ಮ್ಹಜ್ಯಾ ಬಾಯ್ಲೆಚ್ಯಾ ಮತಿಂತ್ ಕಿತೆಂ ಆಸ್ಲೆಂ ಹಾಂವ್ ಜಾಣಾ. ತಾಚೊ ಘೊವ್ ಸದಾಂ ನಾಕ್‌‌ಭರ್  ಘೊಟುನ್ ಯೆತಾ ಆನಿ ಪುತಾಕ್ ಇನಾಮ್ ಕೋಣ್ ಹಾಡ್ತಾ?   ತೆದ್ನಾಂಚ್ ಹಾಂವೆ ನಿಚೆವ್ ಕೆಲೊ. ಆನಿ ಮುಕಾರ್ ಸೊರೊ ಪಿಯೆಂವ್ಚೊ  ನಾ ಆನಿ ಪುತಾಕ್ ಇನಾಮ್ ಹಾಡಿಜೆ ಮ್ಹಣ್. ತಶೆಂ ಹಾಂವ್ ಆಜ್ ಮ್ಹಜ್ಯಾ ಪುತಾಕ್ ಏಕ್ ಖೆಳ್ಚೆಂ ಕಾರ್ ಘೆತ್ಲೆಂ.”

“ಹೊ ತಶೆಂಗೀ  ಆಂಕಲ್?  ಆಜ್ ತರ್ ಪಿಯೊಂಕ್ ನಾಂಯ್‌ ಗೀ  ಅಂಕಲ್.”

“ಪಿಯೆಲೊಂ ಪುತಾ ಪೂಣ್ ಲ್ಹಾನ್ ಸಾಟ್ ಮಾರ್ಲೆಂ. ಎಕ್‌ಚ್ ಪಾವ್ಟಿಂ ಸೊಡುಂಕ್ ಜಾತಾಗೀ? ಪುಣ್ ಖಂಡಿತ್ ಹಾಂವ್ ಸೊರೊ ಸೊಡ್ತೊಲೊಂಚ್ ಏಕ್ ದೀಸ್.  ಆಜ್ ಕ್ರಿಸ್ಮಸ್ ಜಾಲ್ಲ್ಯಾನ್ ಧನ್ಯಾನ್ ಸಾಂಬಾಳ್ ದಿಲೊ.  ಹಾಂವೆ ತೆ ಜೊಗಾಸಾಣೆನ್ ದವರ್ಲ್ಯಾತ್ ಆನಿ ಫ಼ಾಲ್ಯಾಂ ಇಲ್ಲೆಂ ದುಕ್ರಾ ಮಾಸ್ ಆನಿ ಕುಸ್ವಾರ್ ಘರಾ ವ್ಹರುಂಕ್ ಚಿಂತ್ಲಾಂ.”

“ಹೋ ಬೋವ್ ಬರೆಂ ಆಂಕಲ್.”

ವಾಟೆರ್ ದುಕಾನ್ ಮೆಳ್ಳೆಂ ಆನಿ ಮಿಕ್ಕಿನ್ ಬೊರೆಂ ವಡ್ಲೆಂ ಏಕ್ ಖೆಳ್ಚೆಂ ಕಾರ್ ಘೆವ್ನ್ ದಿಲೆಂ. ಬೊನಾಬಾನ್ ಪಯ್ಶೆ ಒಡ್ಡಾಯ್ಲೆ ಪುಣ್ ಮಿಕ್ಕಿನ್ ತೆ ಘೆತ್ಲೆ ನಾಂತ್.

ಬೊನಾಬಾಚ್ಯಾ ಘರ್ಚಿ  ವಾಟ್ ಇಲ್ಲಿ ಕಶ್ಟಾಂಚಿಚ್ಚ್ ಮ್ಹಣ್ಯೆತ್, ಸಬಾರ್ ಘುಂವ್ಡ್ಯೊ ಆನಿ ವಯ್ರ್ ಸಕಯ್ಲ್  ಜಾಲ್ಯಾರೀ ಮಿಕ್ಕಿನ್ ಬೈಕ್ ವ್ಹೆಲೆಂ.  ಘರಾ ಲಾಗಿಂ ಲಾಗಿಂ ಪಾವ್ತಾನಾ ಬೊನಾಬ್ ಮ್ಹಣಾಲೊ ” ರಾತಿಂ ಪೂತ್ ಆವಯ್‌ಲಾಗಿಂ ಸಾಂಗ್ತಾಲೊ ಥಂಯ್ ಏಕ್ ಬೊರ್ಡ್ ಘಾಲ್ಯಾಂ ಕಿಲ್ಲಾಬಾಯೆಚೆ ನಾಂವ್ ಬರವ್ನ್, ಕಿತ್ಯಾಕ್ ಸಾಂತಾಕ್ಲೊಸಾಕ್  ಸಾರ್ಕಿ ವಾಟ್ ಗೊತ್ತುನಾ ನೆ”

ಪಯ್ಲ್ಯಾ  ಪಾವ್ಟಿಂ ತೊ ಹಾಸ್ಲೊ.  ಮಿಕ್ಕಿಯೀ ಹಾಸ್ಲೊ . ತ್ಯಾ ಲ್ಹಾನ್ ಚೆರ್ಕ್ಯಾಚಿ ಆಲೊಚೆನ್ ಆಯ್ಕೊನ್. “ಕಿಲ್ಲಾಬಾಯ್ . . . ? ತಿ ಕೋಣ್?”

“ಹೊ ಸಾಂಗೊಂಕ್ ವಿಸ್ರಾಲೊಂ ಪುತಾ.  ಮ್ಹಜಿ ಮಾಲ್ಘಡಿ ಧುವ್, ಸಾರ್ಕೆಂ ನಾಂವ್ ಕ್ಲಾರಾ ಆಮಿ ಮೊಗಾನ್ ಕಿಲ್ಲಾ ಮ್ಹಣ್ ಆಪಂವ್ಚೆ ಆನಿ ಮ್ಹಜ್ಯಾ ಪುತಾನ್ ಕಿಲ್ಲಾಬಾಯ್ ಮ್ಹಣ್ ಆಪಂವ್ಚೆ.”

“ಹೊ ವಯ್ಗೀ? ತೆಂ ಕಾಲೆಂ ಕರ್ತಾ . . . ಕಿತೆಂ ಶಿಕ್ತಾ?” ಮಿಕ್ಕಿಕ್ ಕುತೂಹಲಾನ್ ವಿಚಾರ್ಲೆಂ.

“ತಾಚೆಂ ಬಿ.ಕೊಮ್ ಜಾಲೆಂ ಪುತಾ, ಮುಕಾರ್ ಶಿಕೊಂಕ್ ತಾಕಾ ಮನ್ ಆಸಾ. ಪುಣ್ ಆಮ್ಚ್ಯಾ ಕುಲ್ಯಾಕ್ ದೀಂವ್ಕ್ ಮ್ಹಣಯ್ ನಾತ್ಲ್ಯಾರ್ ಕಶೆಂ ಶಿಕೊಂವ್ಚೆ ತಾಕಾ.  ಅತಾಂ ಕಾಮ್ ಸೊಧುನ್ ಆಸಾ. ಘರ್ಚೆಂ ಸಗ್ಳೆಂ ಕಾಮ್ ತೆಂಚ್ ಕರ್ತಾ. ದೊನ್ಪಾರಾಂ ಉಪ್ರಾಂತ್ ಭುರ್ಗ್ಯಾಂಕ್ ಟ್ಯೂಶನ್  ದಿತಾ.  ಘರಾ ಗೊರ್ವಾಂ ಆಸಾತ್, ತಾಂಚೊ ಪೋಸ್ ತಾಣೆಂಚ್ ಕರ್ಚೊ. ಮ್ಹಜಿ ಬಾಯ್ಲ್ ಸೆಜಾರಾ ಆಂತೋನಾಬಾಗೆರ್ ರಾಂದುಂಕ್ ವೆತಾ.”

“ವ್ಹಯ್ಗೀ ಆಂಕಲ್?  ಮೊಸ್ತು ಪರಿಶ್ರಮಿ ತರ್.”

“ತಿತ್ಲೆಂ ಮಾತ್ರ್ ನ್ಹಂಯ್, ಬೋವ್ ಸಾಧೆಂ ಆನಿ ಶೆಗುಣಿ ಭುರ್ಗೆಂ. “

ತಿತ್ಲ್ಯಾರ್ ಘರ್ ಲಾಗ್ಗಿಂ ಆಯ್ಲೆಂ.  ಜಾಲಾಂತ್ ಖೆಳೊನ್ ಆಸ್‌ಲ್ಲೊ  ಚೆರ್ಕೊ ಬಾಪಯ್ಕ್ ಪಳೆವ್ನ್ ಧಾಂವೊನ್ ಆಯ್ಲೊ .

ಬೊನಾಬಾನ್ ಪುತಾಕ್ ಆಪವ್ನ್ ” ಆಳೆ ಆಮ್ಗೆರ್ ಕೋಣ್ ಆಯ್ಲಾ ಪಳೆ.”

“ಕೋಣ್ ತೊ?”  ಆಮ್ಗೆರ್ ಕಾಲ್ಯಾಕ್ ಆಯ್ಲಾ?” ತಾಚೆಂ ಶೀದಾ ಸಾವಾಲ್ ಆಯ್ಕೊನ್ ಮಿಕ್ಕಿಕ್ ಹಾಸೊ ಆಯ್ಲ್ಯೊ.

ಮಿಕ್ಕಿನ್ ತಾಚೊ ಹಾತ್ ದರ್ಲೊ. “ಮ್ಹಜೆಂ ನಾಂವ್ ಮಿಕ್ಕಿ. ಹಾಂವ್ ತುಕಾ ಮೆಳೊಂಕ್ ಆಯ್ಲಾಂ. ತುಜೆಂ ನಾಂವ್ “?

“ಮ್ಹಜೆಂ ನಾಂವ್ ಜೇಸನ್, ಘರಾ ಮ್ಹಾಕಾ ಮುನ್ನಾ ಮ್ಹಣ್ ಆಪಯ್ತಾತ್” ತೊ ಹಾಸ್ಲೊ ,ಕಿಟಿ ಕಿಟಿ ಕರ್ನ್.

ಹೊ ಮುನ್ನಾಬಾಯ್ … ಆನಿ  ತೆದ್ನಾಂಚ್ ಕಿಲ್ಲಾಬಾಯ್ ಭಾಯ್ರ್ ಆಯ್ಲೆಂ.

“ಹಲೋ, ಹಾಂವ್ ಮಿಕ್ಕಿ”.

“ಹಾಯ್”.. ತಾಣೆ ಬಾಪಾಯ್ಚೆರ್ ದೀಶ್ಟ್ ಘಾಲಿ ಕೋಣ್ ಮ್ಹಳ್ಳ್ಯಾ ಆರ್ಥಾರ್.

“ಕಿಲ್ಲಾ ಹೊ ತರ್ನಟೊ ಮ್ಹಾಕಾ ವಾಟೆರ್ ಮೆಳ್ಳೊ ಪುತಾ.  ಬೋವ್ ಖಾಲ್ತೊ ಆನಿ ಮೊಗಾಳಿ.  ನಾಕಾ ನಾಕಾ ಮ್ಹಳ್ಯಾರೀ ಮ್ಹಾಕಾ ಘರಾ ಪಾಯ್ತಾ ಮ್ಹಣಾಲೊ” ತಸೆಂ ವಾಟೆರ್ ಘಡ್ಲೆಲಿ ಗಜಾಲ್ ತಾಣೆ ಕಿಲ್ಲಾಕ್ ಸಾಂಗ್ಲಿ.

“ಹೊ ಥ್ಯಾಂಕ್ಸ್”, ತೆಂ ಸೊಭೀತ್ ಕರ್ನ್ ಹಾಸ್ಲೆಂ. ತ್ಯೊ ಹಾಸೊ ತಾಚ್ಯಾ ಕಾಳ್ಜಾಕ್ ಲಾಗ್ಲ್ಯೊ.. ತೋಯಿ ಹಾಸ್ಲೊಂ. ತೆಂ ಲಜೆಲೆಂ.  “ಭಿತರ್ ಯೆ” ಕಿಲ್ಲಾನ್ ಆಪಯ್ಲೆಂ.

“ನಾ ಕಿಲ್ಲಾಬಾಯ್, ಆನ್ಯೆಕ್ ಪಾವ್ಟಿಂ ಯೆತಾಂ”.  ಕಿಲ್ಲಾಬಾಯ್ ಮಣ್ತೆಚ್ಚ್ ತೆಂ ಜೊರಾನ್ ಹಾಸ್ಲೆಂ.  ಕಿತ್ಲ್ಯೊ ಸೊಬಿತ್ ಹಾಸೊ.. “ಆನ್ಯೇಕ್ ಪಾವ್ಟಿಂ ಖಂಡಿತ್ ಯೆತಾಂ. ಆಜ಼್ ಮ್ಹಾಕಾ ಎಕಾ ಪಾರ್ಟೆಕ್ ವ್ಹಚುಂಕ್ ಆಸಾ.  ಆನ್ಯೇಕ್ ಪಾವ್ಟಿಂ ಟ್ಯೂಶನ್  ಘೆಂವ್ಕ್ ಯೆತಾಂ, ಬಾಯ್… “

ತೆಂ ಪರ್ತ್ಯಾನ್ ಹಾಸ್ಲೆಂ..

“ಬಾಯ್ ಕಿಲ್ಲಾಬಾಯ್”

“ಬಾಯ್” ತೆಂ ಮಿಕ್ಕಿಕ್ ಪಳಯ್ತ್ ರಾವ್ಲೆಂ ಬೈಕ್ ಚಾಲು ಕರ್ನ್ ವೆತಾ ವರೇಗ್.  ಬೊನಾಬ್ ತಾಂಕಾಂಚ್ ಪಳವ್ನ್ ರಾವ್ಲೊ.

ಮತಿಂತ್ ಹಜಾರ್ ಸಪ್ಣಾ ಘೆವ್ನ್ ಮಿಕ್ಕಿ ಬೈಕ್ ಧಾಂವ್ಡಾಯ್ತಾಲೊ. ತಾಣೆ ಚೆಡುಂ ಪಳಯಿಲ್ಲೆಂ.  ತಾಚ್ಯಾ ಸಪ್ಣಾಂತ್ಲಿ ರಾಣಿ ತಾಕಾ ಮೆಳ್‌ಲ್ಲಿ.  ತಾಕಾ ಆತಾಂ  ಕಶೆಂ ಆಪ್ಣಾಂವ್ಚೆಂ ತೆಂ ಮಾತ್ ತೊ ಮತಿಂತ್ ಆಲೊಚನ್ ಕರ್ತಾಲೊ.

***

ರೋಜಿಬಾಯ್ ಕಾಮ್ ಜಾವ್ನ್ ಘರಾ ಯೆತಾನಾ ಖುಶಾಲ್ ಹಾಸೊ ಘರಾಂತ್ ತಿಕಾ ಆಯ್ಕಾಲ್ಯೊ. ಆಜ್ ಸಗ್ಳಿಂ ಭಾರಿಚ್ ಖುಶೆನ್ ಆಸಾತ್. ಗಜಾಲ್ ಕಿತೆಂ ಆಯ್ಕಾಯಾಂ ಮ್ಹಣ್ ತಿ ಥೊಡೊ ವೇಳ್ ಸೊಪ್ಯಾರ್ ಬಸ್ಲಿ.

“ಕಿಲ್ಲಾಬಾಯ್ ಮ್ಹಾಕಾ ಮಿಕ್ಕಿ ದಾಟ್ಟು ಬರೊ ಲಾಗ್ಲೊ. ತೊ ಗಮ್ಮತ್ ಕರ್ತಾ “

“ವೊಯ್ಗೀ?  ಕಿತ್ಯಾಕ್ ಬರೊ ಲಾಗ್ಲೊ ತುಕಾ?” ಕಿಲ್ಲಾ ವಾವ್ಳಿ  ಕರ್ನ್ ಆಸ್‌ಲ್ಲೆಂ ಕಳೆ ಗುಂತುಂಕ್.

“ಪಪ್ಪಾಕ್ ಘರಾ ಹಾಡ್ನ್ ಆಯ್ಲೊ ಆನಿ ಮುಕಾರೀ ಯೆತಾಂ ಮ್ಹಣಾಲೊ ತುಜೆಲಾಗಿಂ ಟ್ಯೂಶನ್ ಕಾಣ್ಘೆಂವ್ಕ್. ಆನಿ ತಾಣೆ ಮ್ಹಾಕಾ ಮುನ್ನಾಬಾಯ್ ಮ್ಹಳೆಂ” ತೊ ಕಿಟಿ ಕಿಟಿ ಕರ್ನ್ ಜೋರ್ ಹಾಸ್ಲೊ.

“ಹೊ, ತಸೆಂ”

“ಕಿಲ್ಲಾಬಾಯ್ ತುಕಾಯಿ ತೊ ಬರೊ ಲಾಗ್ಲೊ ನೆ? ತುಂ ಜೋರ್ ಹಾಸ್ಲೆಂಯ್ ಆನಿ ತೊ ಮಾರ್ಗಾಕ್ ಪಾವ್ತಾ ವರೇಗ್ ತಾಕಾಚ್ ಪಳವ್ನ್ ಆಸ್ಲೆಂಯ್.”

“ಹಮ್, ಬಾರಿ ಹುಶಾರ್ ಆಸಾಯ್ ತುಂ ಪೊರಾ. ಮಮ್ಮಿ ಮುಕಾರ್ ತುಜೆಂ ಬೇಂಡ್ ವಾಜಾಯ್ನಾಕಾ”

“ನಾ ಕಿಲ್ಲಾಬಾಯ್, ಹಾಂವ್ ಕಾಂಯ್ ಸಾಂಗಾನಾ.”

“ಜಾಯ್ತ್ ಜಾಯ್ತ್ ಕಾನುನಾ ಪುರೊ ಆತಾಂ”.

ಕಿಲ್ಲಾಕ್ ಮಿಕ್ಕಿ ನೀಜ್ ಜಾವ್ನ್  ಪಸಂದ್  ಜಾಲ್ಲೊ.  ತಾಚಾ ಜಿಣ್ಯೆಂತ್ ಪಯ್ಲೆ ಪಾವ್ಟಿಂ ಸಪ್ಣಾಂತ್ಲೊ ರಾಯ್‌‌ಕುಂವರ್ ಆಯಿಲ್ಲ್ಯಾಬರಿ ಅನ್ಭೊಗ್ ಜಾಲ್ಲೊ. ಆನಿ ಖಿಣಾಭಿತರ್ ತಾಚೆಂ ಕಾಳೀಜ್ ಚೊರಿ ಜಾಲ್ಲೆಂ.

ಬೊನಾಬಾನ್ ತಾಚಿ ಆಭಿಪ್ರಾಯ್ ಕುಡ್ಸಿಲಿ. “ಬಾರಿ ಬರೊ ಭುರ್ಗೊ ಬಾ ಕಿಲ್ಲಾ.  ಖಾಲ್ತೊ ತಸೆಂಚ್ ಜಾಂಟೊ. ಹಾಂವೆ ಕಿತ್ಲೆಂ ಸಾಂಗ್ಲ್ಯಾರೀ ಆಯ್ಕಾಲೊನಾ. ಘರಾ ವರೆಗ್ ಪಾಯ್ತಾಂ ಮ್ಹಣ್ ಹಟ್ ದರಿಲಾಗ್ಲೊ”

“ವ್ಹಯ್ಗೀ ಪಪ್ಪಾ.  ಮ್ಹಾಕಾಯ್ ತಸೊಚ್ ದಿಸ್ತಾ.. ಇಲ್ಲೊ  ಗ್ರೇಸ್ತ್ ದಿಸ್ತಾ.  ಅಮ್ಚ್ಯಾ ದುರ್ಬಳ್ಯಾ ಘರಾ ಆನಿ ಮುಕಾರ್ ಯೆತಾ ಮ್ಹಣ್ ಭರ್ವಸೊ ನಾ”

“ಖಂಡಿತ್ ಯೆತಾ ಬಾ, ಮ್ಹಾಕಾ ದಿಸ್ತಾ ತಾಕಾ ತುಂ ಪಸಂದ್  ಜಾಲೆಂಯ್. “

“ತಶೆಂ ಕಾಂಯ್ ನಾ ಪಪ್ಪಾ.. ಪುಣ್ ಪಳಂವ್ಕ್ ಸೊಬಿತ್ ಆಸಾ ” ತೆಂ ಬಾಪಾಯ್ಕ್ ಪಳವ್ನ್ ಹಾಸ್ಲೆಂ, ಲೋವ್.

ತೆದ್ನಾಂಚ್ ರೊಜಿಬಾಯ್ ಹಳ್ತಾರ್ ಭಿತರ್ ರಿಗ್ಲಿ. ಕಿಲ್ಲಾಕ್ ಯೇಕ್ ಪಾವ್ಟಿಂ ಜಾವ್ಕ್ ಜಾಲೆಂ. ಆಪ್ಲೆಂ ಪೊತೆಂ ಮೆಜಾರ್ ದವರ್ನ್, ತೀಯ್ ಭುರ್ಗ್ಯಾಂ ಸಾಂಗಾತಾ ಬಸ್ಲಿ.

ಸಬಾರ್ ಥೆಂಪಾ ಉಪ್ರಾಂತ್ ತಿಚೊ ಘರ್ಕಾರ್ ಭುರ್ಗ್ಯಾಂಲಾಗಿಂ ಖುಶಾಲ್ ಉಲೊವ್ನ್ ಆಸ್‌ಲ್ಲೊ ಪಳವ್ನ್ ತಿಕಾ ಆಜಾಪ್ ಜಾಲೆಂ. ತೇಂಯೀ ನಾಕ್‌ಭರ್ ಪಿಯೆನಾಸ್ತಾನಾ. ಕಿಲ್ಲಾಕ್ ಇಲ್ಲಿ ಕಾವ್ಜೆಣಿಶಿ ಭೊಗ್ಲಿ ಆವಯ್ಕ್ ಪಳವ್ನ್. ಆವಯ್ನ್  ತಾಂಚೆಮಧೆಂ ಚಲ್ಲಲೆಂ ಸಂಭಾಶಣ್ ಕಾಂಯ್ ಆಯ್ಕಾಲಾಂ ಕೊಣ್ಣಾ ಮ್ಹಣೊನ್.

“ಮಮ್ಮಿ, ಮಮ್ಮಿ, ಆಜ್ ಆಮ್ಗೆರ್ ಮಿಕ್ಕಿ ಧಾಟ್ಟು ಆಯಿಲ್ಲೊ.” ಮುನ್ನಾನ್ ಕಾಂಪಿಣ್ ವಾಜಯ್ಲಿ.

“ಕೋಣ್ ಪುತಾ ಮಿಕ್ಕಿ ಧಾಟ್ಟು? ಆನಿ ತುಂ ಕಿತೆಂ ವಾಟ್ ಚುಕೊನ್ ವೆಗ್ಗಿಂ ಪಾವ್ಲೊಯ್ ಆಜ್?” ಘೊವಾಕ್ ತಿಣೆ ವಿಚಾರ್ಲೆಂ.

ಭುರ್ಗಿಂ ವ್ಹಡ್ಲ್ಯಾನ್ ಹಾಸ್ಲಿಂ.

“ಪಾವ್ಲೊ ನಯ್ ಮಮ್ಮಿ , ಪಾವಯ್ಲೆಂ ತ್ಯಾ  ಎಕಾ ತರ್ನಾಟ್ಯಾನ್. ತೊಚ್ಚ್ ತೊ ಮಿಕ್ಕಿ”   ಕಿಲ್ಲಾನ್ ಮಮ್ಮಿಕ್ ಸಮ್ಜಾಯ್ಲೆಂ.

“ನಯ್ ಪುತಾ ಕಾಲ್ ವರೆಗ್ ಚಾರ್ ಪಾಂಯಾಂನಿ ಯೆಂವ್ಚೊ ಸಯ್ರೊ ಆಜ್ ಕಿತೆಂ ದೋನ್ ಪಾಂಯಾಂನಿ ನಿಟ್ಟ್ ಘರಾ ಪಾವ್ಲೊ ತೆಂ ಮ್ಹಾಕಾ ಸಮ್ಜಾನಾ.  ಆನಿ ಕೋಣ್ ತೊ ಮಿಕ್ಕಿ ? ಬಾರೀ ಪುಗಾರ್ನ್ ಆಸ್ಲ್ಯಾತ್ ತುಮಿ ? ” ಕಿಲ್ಲಾಚಿ ಕಾಳ್ಜಾ ಉಡಿ   ಚಡ್ಲಿ.

ಭುರ್ಗಿಂ ಪರ್ತ್ಯಾನ್ ಹಾಸ್ಲಿಂ.

“ತಶೆಂ ನಯ್ ರೊಜಿ..  ಹಾಂವ್ ಜಾಣಾ ಹಾಂವ್ ಏಕ್ ಆಮಾಲಿ ಮ್ಹಣ್. ಪುಣ್ ಆಜ್ ಥಾವ್ನ್ ಹಾಂವ್ ಸೊರೊ ಸೊಡುಂಕ್ ಪ್ರಯತ್ನ್ ಕರ್ತಾಂ.  ಆತಾಂ ಆಯ್ಚಿ ಕಾಣಿ ಸಾಂಗ್ತಾ ಆಯ್ಕ್.”

“ಕಿತ್ಲೊ ತೇಂಪ್ ಪಳಯ್ಜೆ ಹೊ ಡ್ರಾಮಾ  ಜಾಯ್ತ್, ಸಾಂಗ್ ತುಜಿ ಕಾಣಿ.”

ಬೊನಾಬಾನ್ ಜಾಲ್ಲೊ ವಿಶಯ್ ಸಾಂಗ್ಲೊ , ಮಟ್ವ್ಯಾನ್.

“ಹೊ ವಯ್ಗೀ? ವ್ಹಯ್ಗೊ ಕಿಲ್ಲಾ ತುಜೆ ಕಿತೆಂ ಮುಖಮಳ್ ಗುಲೊಬಾ ಬರಿಂ ಇತ್ಲೆಂ ತಾಮ್ಶೆಲಾಂ ಆಜ್? ಹೆರಾ ದಿಸಾನಿ ಬಾವ್‌ಲ್ಲ್ಯಾ  ಆಬೊಲ್ಯಾ ಬರಿ ನಿಸ್ತೇಜ್ ದಿಸ್ತಾಲೆಂಯ್. ಆಜ್ ಫುರ್ತೆಂ ಫುಲ್ಲಾಂಯ್.”

ಮಧೆಂ ಚೆರ್ಕ್ಯಾನ್ ದಾಯ್ ಘಾಲಿಚ್  ” ಮಮ್ಮಿ ಕಿಲ್ಲಾಬಾಯೆಕ್ ತೊ ಬರೊ ಲಾಗ್ಲೊ”  ಕಿಲ್ಲಾಕ್ ಆಯ್ಕೊನ್ ಕಾಳಿಜ್ ಹಾತಾಂತ್ ಆಯ್ಲೆಂ ತಾಣೆ ದೊಳೆ ಉರ್ಕುನ್ ಮುನ್ನಾಕ್ ಪಳೆಲೆಂ.  ತೊ ಚುಪ್ಪ್ ಜಾಲೊ.

“ತಶೆಂ ಕಾಂಯ್ ನಾ ಮಾಮ್ಮಿ..”  ತಾಣೆ ಭಿಯಾನ್ ಜಾಪ್ ದಿಲಿ. ಆಪ್ಲ್ಯಾ ಧುವೆಚೊ ತಿಕಾ ವಿಪ್ರೀತ್ ಮೋಗ್ ತ್ಯಾ ದೆಕುನ್ ಇಲ್ಲಿ  ಜಾಗ್ರುತ್ಕಾಯ್ ಗರ್ಜ್. ಪುಣ್ ತಿಕಾ ತಿಚ್ಯಾ ಧುವೆಚಿಂ ಭೊಗ್ಣಾಂ  ಸಮ್ಜಾತೆಲಿಂ. ತಿ ಜಾಣಾ ಆಪ್ಲಿ ಧುವ್ ಕೆದಾಳಾಯ್ ಚೂಕ್ ವಿಂಚವ್ಣ್  ಕರ್ಚಿ ನಾ ಮ್ಹಣ್.

“ಅಳೆ ಬಾ, ಕಿಲ್ಲಾ ಆಮ್ಚ್ಯಾ ಕುಲ್ಯಾ ಪಂದಾ ಸಮಾ ಮಣಯ್ ಬಸಾನಾ ಪುತಾ, ಆನಿ ತುಂ ಸಪ್ಣೆತಾಯ್.  ತ್ಯಾ ತರ್ನಾಟ್ಯಾ ವಿಶ್ಯಾಂತ್ ಆಮ್ಕಾಂ  ಕಾಂಯ್ ಖಬರ್ ನಾ,  ತ್ಯಾ  ಭಾಯ್ರ್  ತಾಕಾ ಹಾಡ್ಲೆಲ್ಯಾ  ಮನ್ಶ್ಯಾಕ್ ಮಣ್ಜೆ ತುಜ್ಯಾ ಪಪ್ಪಾಕ್ ತಾಚೊ ಕಾಂಯ್ ವಿವರ್ ನಾ” ಬೊನಾಬಾಕ್ ಪಳವ್ನ್ ದೊಳೆ ಉರ್ಕುಲೆ ತಿಣೆ.

“ತುಂ ವಗೇ ರಾವ್ ಮಮ್ಮಿ. ಬೆಶ್ಟೆಂಚ್ ಕಾಲೆಂ ಪುರಾ ಚಿಂತಿನಾಕಾ.” ಕಿಲ್ಲಾನ್ ಕಾಂಯ್ ಆಸಕ್ತ್ ನಾತ್ಲೆಲ್ಯಾಪರಿಂ ನಟನ್ ಕೆಲೆಂ.

“ಜಾಯ್ತ್.  ಪುಣ್ ತುಕಾಚ್ಚ್ ತುಂ ಸಾಂಬಾಳ್ ಪುತಾ.  ಪಯ್ಲೆಂ ಏಕ್ ಕಾಮ್ ಮೆಳೊನ್ ತುಜ್ಯಾ ಪಾಯಾಂಚೆರ್ ಉಬೆ ರಾವ್.  ಮಾಗಿರ್ ಸಪ್ಣಾಂತ್ ರಾವ್ಳೆರಾಂ ಬಾಂದ್”

“ಜಾಯ್ತ್ ಮಮ್ಮಿ.”

***

ಮಿಕ್ಕಿ ಬೈಕಾರ್ ವೆತಾಲೊ ತರೀ ತಾಚಿಂ ಚಿಂತ್ನಾ ಕಿಲ್ಲಾಚ್ಯಾ ಭೊಂವಾರಿಂಚ್ ಘುಂವ್ತಾಲಿಂ,  ಮೊಂವಾಚ್ಯಾ ಮುಸಾಬರಿಂ. ಕಿತ್ಲೆ ತಾಚೆ ಆಕರ್ಷಿತ್  ದೊಳೆ, ಪರ್ಜಳಿ ಹಾಸೊ, ತಾಂಬ್ಶೆ ಗಾಲ್ ಆನಿ ಲಾಂಬ್ ಕೇಸ್. ತಾಚಿ ಮತ್ ತ್ಯಾಚ್ ವರ್ತುಲಾಂತ್ ಘುಂವ್ತಾಲಿ. ಪಾರ್ಟೆಕ್ ಮ್ಹಣ್ ಭಾಯ್ರ್ ಸರುನ್ ಆಯಿಲ್ಲೊ ಎಕಾ ದುರ್ಬಳ್ಯಾ ಘರಾ ಪಾವ್ಲೊ.  ಆನಿ ತಾಕಾ ತಾಚ್ಯಾ ಮನ್ ಪಸಂದೆಚೆಂ ಚೆಡುಂ ಮೆಳ್‌ಲ್ಲೆಂ.

ಪಾರ್ಟೆಕ್ ಪಾವ್ತಾನಾ ಜಾಯ್ತೊ ವೇಳ್ ಜಾಲ್ಲೊ. ಸಗ್ಳಿಂ ಪುರ್ಪುರ್ತಾಲಿಂ,  ಪ್ರತ್ಯೇಕ್ ಜಾವ್ನ್ ಚೆಡ್ವಾಂ ಥೊಡಿಂ ತಾಕಾ ರಾಕೊನ್ ಆಸ್ಲಿಂ . . . ತಾಚೆ ಸಾಂಗಿ ನಾಚೊಂಕ್. ಸಂಗೀತಾಚಾ ಆವಾಜಾನ್ ಸಗ್ಳೆಂ ಹೊಲ್ ಹಾಲ್ತಾಲೆಂ.  ಪುಣ್ ಮಿಕ್ಕಿನ್ ನಾಚೊಂಕ್ ಕಾಂಯ್ಚ್ ಮನ್ ನಾತ್ಲೆಂ. ಏಕ್ ಕ್ಯಾನ್ ಬಿಯರ್ ಘೆವ್ನ್ ಕೊನ್ಶ್ಯಾ  ಎಕಾ ಟೇಬಲಾಚೆರ್ ಬಸ್ಲೊ . ತಾಚ್ಯಾ ಮನಾಂತ್ ಕಿಲ್ಲ ಮಾತ್ ಆಸ್ಲೆಂ. ಫ಼ಾಮಾದ್ ಗಾವ್ಪಿ ಜಿಮ್ ರೀವ್ಸಾಚಿಂ ಪದಾಂ ವಾಜೊನ್ ಆಸ್ಲಿಂ, ತ್ಯಾ ಪಯ್ಕಿ “ಕ್ರಿಸ್ಮಸ್ ಕಾರ್ಡ್” ಪದ್ ಮ್ಹಳ್ಯಾರ್ ಮಿಕ್ಕಿಕ್ ಜೀವ್. ಕಿತ್ಲ್ಯಾ ಆಪುರ್ಬಾಯೆಚೆಂ ಪದ್. ಖಿಣಾಕ್  ತಾಚಿಂ ಚಿಂತ್ನಾ ರಾವ್ಲಿಂ.  ತಾಕಾ ಏಕ್ ಆಲೊಚೆನ್ ಝಳ್ಕಾಲಿ ಆನಿ ಪಾರ್ಟೆಥಾವ್ನ್ ತೋ ಲೋವ್ ಭಾಯ್ರ್ ಪಡ್ಲೊ.

***

ಹರ್ಶೆಂ ದೀಸ್‌ಭರ್ ಕಾಮ್ ಕರ್ನ್, ಭುರ್ಗ್ಯಾಂಕ್ ಟ್ಯೂಶನ್ ದೀವ್ನ್ ಮಾಂದ್ರೆಕ್ ಪಾಟ್ ತೆಂಕ್ತಾನಾ ಘಡ್ಯೆನ್ ಧಾಂಪ್ಚೆ ದೊಳೆ ಆಜ್ ಭಿಲ್ಕುಲ್ ಧಾಂಪೊಂಕ್ ಆಯ್ಕಾನಾಂತ್. ದೊಳೆ ಕಿತ್ಲೆಯ್ ಜೆಮ್ಲ್ಯಾರೀ ಮತಿಂತ್ ವಾದಾಳ್ ಉಟ್‌ಲ್ಲೆಂ. ಕಿಲ್ಲಾಚ್ಯಾ ಮತಿಂತ್ ಏಕ್ ನವೊ ಸಯ್ರೊ ರಾವೊಂಕ್ ಆಯಿಲ್ಲೊ. ಮೊಳ್ಬಾರ್ ಥಾವ್ನ್ ತುಟೊನ್ ಪಡ್ಚ್ಯಾ  ನೆಕೆತ್ರಾಪರಿಂ ನವೊ ಸಯ್ರೊ ಕಿಲ್ಲಾಚಾ ಕಾಳ್ಜಾಂತ್ ರಿಗ್‌ಲ್ಲೊ.

ಆಜ್ ಮೆರೆನ್ ಕಿಲ್ಲಾಕ್ ಕೊಣಾ ಎಕ್ಲ್ಯಾ ತರ್ನಾಟಾಚ್ಯೆರ್ ವೊಡ್ಣಿ ವಾ ಆಕರ್ಶಣ್ ಮ್ಹಣ್ ಭೊಗ್‌ಲ್ಲೆಂ ನಾ. ಪುಣ್ ಮಿಕ್ಕಿನ್ ಮಾತ್ರ್ ತಾಚೆರ್ ಸಂಪೂರ್ಣ್ ಧಾಡ್ ಘಾಲ್ಲಿ.  ತ್ಯಾ ಕಾಳ್ಕ್ಯಾ ರಾತಿಂ ಪಳಯಿಲ್ಲೆಂ ಮಿಕ್ಕಿಚೆಂ ಮುಕಮಳ್ ತಾಕಾ ಪಳವ್ನ್ ಹಾಸ್ತಾಲೆಂ. “ಹಾಂವ್ ಟ್ಯೂಶನ್ ಘೆಂವ್ಕ್ ಯೆತಾಂ”  ತಾಚಿಂ  ಉತ್ರಾಂ ತಾಕಾ ಧೊಸ್ತಾಲಿಂ. ಚಿಂತೂನ್ ಘಡ್ಯೆಕ್ ತಾಕಾ ಜೋರ್ ಹಾಸೊ ಆಯ್ಲ್ಯೊ.  ಆಶೆಂ ಸುಮಾರ್ ವೇಳ್ ಚಿಂತುನ್, ನಿಮಾಣೆಂ ನಿದೆನ್ ತಾಕಾ ವೆಂಗ್ಲೆಂ.

ನತಾಲಾಂಚಿಂ ಸ್ವಾದಿಕ್ ರಾತ್ . . .  ಆಕಾಸಾರ್ ತಾರಾಂ ಪರ್ಜಳ್ತಾಲಿಂ.

***

ಕಿಲ್ಲಾ ಸಕಾಳಿಂ ವೆಗಿಂ ಉಟೊನ್ ಭಾಯ್ರ್ ಜಾಲ್ ಝಾಡುಂಕ್ ಆಯ್ಲೆಂ ಸಾರ್ಣಿ ಖುಂಟೊ ಘೆವ್ನ್. ಸಗ್ಳಿ ರಾತ್ ತಾಕಾ ನೀದ್ ಪಡೊಂಕ್ ನಾ. ತಾಚೆ ಜಿಣ್ಯೆಂತ್ ಪಯ್ಲೆ ಪಾವ್ಟಿಂ ಎಕಾ ತರ್ನ್ಯಾಟ್ಯಾನ್ ತಾಚಿ ನೀದ್ ಪಾಡ್ ಕೆಲ್ಲಿ.  ಜಾಲ್ಯಾರೀ ಸವಾಯೆಚಾ ಬಳಾನ್ ತೆಂ ಉಟ್ಲೆಲೆಂ, ಕೊಂಬ್ಯಾನ್ ಫಾಂತ್ಯಾರ್ ಸಾದ್ ಘಾಲ್ಲೊಚ್. ಸಕಾಳಿಂಚ್ಯಾ ಆಟ್ ವ್ಹರಾರ್ ಫೆಸ್ತಾಚೆಂ ಮೀಸ್ ಮೀಸ್ ಆಸ್ಲೆಂ.  ಆಂಗಣ್ ಝಾಡುನ್  ಆಸ್ತಾನಾಂಚ್ ತಾಚಿ ದೀಶ್ಟ್ ಗೊರ್ದಾನಾಚ್ಯಾ ಗೊಟ್ಯಾಚೆರ್ ಪಡ್ಲಿ.  ಲಾಗಿಂ ಯೇವ್ನ್ ಪಳೆತಾನಾ ಸಬಾರ್ ಗಿಫ಼್ಟಾಂ … ದೋನ್ ಹಳ್ತಾಚೆ ಬೊಕ್ಸ್  ಆನಿ ತಾಂಚೆರ್ ಬರಯಿಲ್ಲೆಂ  ‘ಟು ಲಿಟಲ್ ಜೇಸಾನ್ – ಲವ್ ಫ್ರಮ್ ಸಾಂತಾಕ್ಲೊಸ್’ ತಾಕಾ ತೆಂ ಪಳವ್ನ್ ಬೋವ್ ಖುಶಿ ಜಾಲಿ. ಕೋಣ್ ತೊ ಸಾಂತಾಕ್ಲೊಸ್? ತಾಕಾ ಸಮ್ಜೊಂಕ್ ನಾ. ಥಂಯ್ಸರ್ ಆನ್ಯೇಕ್ ಹಳ್ತಾಚೊ ಬೊಕ್ಸ್ ಆನಿ ತಾಚೆ ವಯ್ರ್ ಯೇಕ್ ಕ್ರಿಸ್ಮಸ್ ಕಾರ್ಡ್.  ಬೋವ್ ಸೊಬೀತ್ ಕಾರ್ಡ್. ತಾಣೆ ತೆಂ ಆಮ್ಸೊರಾನ್ ಹೆಣೆ ತೆಣೆ ಪಳವ್ನ್ ಉಗ್ತೆಂ ಕರ್ನ್ ಪಳಯ್ಲೆಂ. ಅಜಾಪ್ … “ಮ್ಹಜ್ಯಾ ಮೊಗಾಚಾ ಕಿಲ್ಲಾಬಾಯೆಕ್ ಮಾಗ್ತಾಂ ಸಂತೊಸ್ಬರಿತ್ ನತಾಲಾಂ ಫ಼ೆಸ್ತ್ . . . ಮಿಕ್ಕಿ”

“ದೆವಾ ಮ್ಹಜ್ಯಾ, ಜಾಲಿ ಗತ್ ಆತಾಂ” ತಾಕಾಚ್ಚ್ ತೆಂ ಪಾತ್ಯೆನಾ ಜಾಲೆಂ. ಆಪುಣ್ ಆನಿಕೀ ಸಪ್ಣಾಂತ್ ಆಸಾಗೀ ಮ್ಹಣ್ ತಾಕಾ ದುಬಾವ್ ಜಾಲೊ.  ಕಿಲ್ಲಾಕ್ ಸರ್ಗಾರ್ ಆಸ್ಲೆಲ್ಯಾಬರಿ ಭಗ್ಲೆಂ. ಕಾರ್ಡಾಕ್ ತಾಣೆ ಉಮೊ ದಿಲೊ ಆನಿ ಗಿಫ಼್ಟ್ ಬೊಕ್ಸ್ ಉಗ್ತೊ ಕೆಲೊ. ಏಕ್ ಜೊಡಿ ಸೊಬಿತ್ತ್ ಚೂಡಿದಾರ್ ಆನಿ ಏಕ್ ನವೆಂಚ್ ಮೊಬಾಯ್ಲ್ ತಾಂತು ಪ್ಯಾಕ್ ಕೆಲ್ಲೆಂ. ಮಾಮ್ಮಿ ಪಳಯ್ತ್ ಜಾಲ್ಯಾರ್ ಸಾರ್ಣಿ ಕುಂಟ್ಯಾಂತ್ ಘಾಲುಂಕ್ ಆಸಾ, ಕಿಲ್ಲ ಕಾವ್ಜೆಲೆಂ.

ತಾಣೆ ತೊ ಗಿಫ಼್ಟ್ ಬೊಕ್ಸ್ ಆಪ್ಲ್ಯಾ ಹರ್ದ್ಯಾಕ್ ದಾಂಬುನ್ ದರ್ಲೊ. ತಾಕಾಚ್ ತೆಂ ಪಾತ್ಯೆನಾ ಜಾಲೆಂ. ನಾ ತರ್ ಕಾಲ್ ಪರ್ಯಾಂತ್  ಖಂಯ್ಚ್ಯಾಯ್ ತರ್ನಾಟ್ಯಾಚೆರ್ ತಾಕಾ ಅಶೆಂ ಆಕರ್ಷಣ್ ಜಾಂವ್ಕ್ ನಾ, ಖಂಯ್ಚ್ಯಾಯ್ ತರ್ನಾಟ್ಯಾಚಾ ದೊಳ್ಯಾಕ್ ದೊಳೊ ತಾಣೆ ಮೆಳಂವ್ಕ್ ನಾ. ಪುಣ್ . . . ಖಿಣಾನ್ . . .  ಮಿಕ್ಕಿನ್ ತಾಕಾ ಬದ್ಲಿಲ್ಲೆಂ, ತೇಂಯ್ ತಾಚ್ಯಾಚ್ ಖಬ್ರೆ ವಿಣೆ.  ಗಿಫ಼್ಟ್ಸ್ ಆನಿ ಕಾರ್ಡ್ ಘೆವ್ನ್ ತೆಂ ಭಿತರ್ ಧಾಂವ್ಲೆ ಆನಿಂ ಮುನ್ನಾಕ್ ಉಟೊಂಕ್ ಗೆಲೆಂ, ತಾಕಾ ತಾಚೆಂ ಗಿಫ಼್ಟ್ ದೀಂವ್ಕ್.

“ಆಳೆ ಸಾಂತಾಕ್ಲೊಸಾನ್ ತುಕಾ ಕ್ರಿಸ್ಮಸ್ ಗಿಫ಼್ಟ್ಸ್ ಹಾಡ್ಲ್ಯಾಂತ್.  ಊಟ್ ವೆಗ್ಗಿಂ.”

ತೊ ರಪಕ್ಕ್ ಕರ್ನ್ ಉಟ್ಲೊ ಆನಿ ತಾಚೊ ಸಂತೋಸ್ ತೊ ವರ್ಣುಂಚೆಂ ತಸಲೊ ನಯ್.

” ಧಾಂವ್ ಆತಾಂ . . . ಆನಿ ಮಾಮ್ಮಿ –  ಡ್ಯಾಡಿಕ್ ದಾಕಯ್. ಉಪ್ರಾಂತ್ ಉಗ್ತೆಂ ಕರ್ “

***

ಮಿಸಾಂತ್ ನಿಮಾಣೆ ಬೆಸಾಂವ್ ಜಾಲ್ಲೆಂಚ್ ತುರಂತ್ ಕಿಲ್ಲ ಭಾಯ್ರ್ ಆಯ್ಲೆಂ ಆನಿ ಗರ್ದ್ಯಾನಾಚ್ಯಾ ಘೊಟ್ಯಾಲಾಗಿಂ ಗೆಲೆಂ ಮುನ್ನಾಕ್ ಜೆಜು ಬಾಳ್ಕಾಕ್ ದಾಕಂವ್ಕ್. ಥಂಯ್ಸರ್ ಲೊಕಾಚಿ ಖೆಟ್ ಆಸ್ಲಿ. ಕಶೆಂಯ್ ತಿಂ ಮುಕಾರ್ ಪಾವ್ಲಿಂ.

“ಮೆರಿ ಕ್ರಿಸ್ಮಸ್ ಕಿಲ್ಲಾಬಾಯ್” ಎಕ್‌ಚ್ ಪಾವ್ಟಿಂ ತೆಂ ಉಡೊನ್ ಪಡ್ಲೆಂ. ಮಧುರ್ ತಾಳೊ ಆಯ್ಕೊನ್ ತೆಂ ಶೆರ್ಮೆಲೆಂ. ಪಾಟಿಂ ಘುವೊನ್ ಪಳಯ್ತಾನಾ – ಥಂಯ್ ಮಿಕ್ಕಿ ಉಬೊ ಆಸ್ಲೊ, ಸೊಭೀತ್ ಹಾಸೊ ದೀವ್ನ್.

“ಮೆರಿ ಕ್ರಿಸ್ಮಸ್” ತಾಣೆ ಲಜೆವ್ನ್ ಪಾಟಿಂ ಉಲ್ಲಾಸ್ ಪಾಟಯ್ಲೆ.

“ಹೆ, ಮುನ್ನಾಬಾಯ್, ಮೆರಿ ಕ್ರಿಸ್ಮಸ್”  ತಾಣೆ ಹಾತ್ ಮುಕಾರ್ ಕೆಲೊ.

“ಮೆರಿ ಕ್ರಿಸ್ಮಸ್ ಮಿಕ್ಕಿ ಧಾಟ್ಟು” ಜೇಸನ್ ಕಿಟಿ – ಕಿಟಿ  ಹಾಸ್ಲೊ.

“ತುಂ ಭಾರಿ ಸೊಭಿತ್ ದಿಸ್ತಾಯ್ ಆಜ್” ಮಿಕ್ಕಿಚಿ ಉತ್ರಾಂ ಆಯ್ಕೊನ್ ಕಿಲ್ಲ ಪುಗ್ಲೆಂ. ತೆಂ ತಾಂಬ್ಡೆ ಲಾಂಬ್ ಟೊಪ್ ಆನಿ ಪಿಂಕ್ ಪ್ಯಾಂಟ್ ನೆಸ್‌ಲ್ಲೆಂ.

“ಮ್ಹಾಕಾ ವೇಳ್ ಜಾಲೊ. ಮಾಮ್ಮಿ ರಾಕ್ತಾ ಆಸ್ತೆಲಿ.  ಇಲ್ಲೆಂ ರಾಂದುಂಕ್ ಆಸಾ, ಬಾಯ್..”

“ಹೊ ಒಕೆ, ರಾವ್. ಕಶೆಂ ವೆತಾತ್ ಘರಾ?”

“ಆಮಿ ಚಲೊನ್ ವೆತಾಂವ್. ಹಾಂಗಾ ಥಾವ್ನ್ ಚಡ್ ಪಯ್ಸ್ ನಾ.”

“ನಾಕಾ ನಾಕಾ ಹಾಂವ್ ಪಾಯ್ತಾಂ ಇಫ್ ಯು ಡೊಂಟ್ ಮೈಂಡ್.”

ಕಿಲ್ಲ  ಕಾವ್ಜೆಲೆಂ. ಪುಣ್ ಜೇಸನ್ ಖುಶ್ ಜಾಲೊ.  “ಯಾ ಕಿಲ್ಲಾಬಾಯ್. ವೊತಾಕ್ ಮ್ಹಜೊ ಮಾಂಡ್ಡೊ ಗಿರ್ಗಿರ್ತಾ” ತಿಂ ತೆಗಾಂಯ್ ಜೋರ್ ಹಾಸ್ಲಿಂ.

“ಒಕೆ, ಜಾಯ್ತ್. ಯಾ ಪೂಣ್ ಘರಾ ವರೇಗ್ ನಾಕಾ, ವಯ್ರ್ ಮಾರ್ಗಾ ಪರ್ಯಾಂತ್ ಸೊಡ್ಲ್ಯಾರ್ ಪುರೊ. ಮಮ್ಮಿನ್ ಪಳಯ್ಲ್ಯಾರ್ ಮಾಗಿರ್ ಖಂಯ್ ಭಾಯ್ರ್ ವಚುಂಕ್ ಆಸ್ಚೆಂ ನಾ.”

“ಜಾಯ್ತ್, ತುಜಿ ಖುಶಿ, ಬೈಕ್ ಭಾಯ್ರ್ ಪಾರ್ಕಿಂಗಾಂತ್ ಅಸಾ ಯಾ.”  ಕಿಲ್ಲಾ ಮುನ್ನಾಚೊ ಹಾತ್ ಧರ್ನ್ ಪಂದಾ ಪಳೆವ್ನ್ ಗೆಲೆಂ, ತಾಕಾ ಕೋಣ್ ಪಳಯ್ತಿತ್ ಮ್ಹಳ್ಳ್ಯಾ  ಭಿಂಯಾನ್.

ತಿಂ ದೊಗಾಂಯ್ ಮಿಕ್ಕಿಚ್ಯಾ ಬೈಕಾರ್ ಬಸ್ಲಿಂ. ಪಾಯ್ಲೆ ಪಾವ್ಟಿಂ ಕಿಲ್ಲ ಎಕಾ ತರ್ನಾಟ್ಯಾ ಸಾಂಗಾತಾ ಬೈಕಾರ್ ಬಸ್‌ಲ್ಲೆಂ. ತಾಕಾ ಮ್ಹಸ್ತ್ ಸಂತೊಸ್ ಜಾಲೊ.  ಜೇಸನ್ ಖುಶೇನ್ ಉಡ್ತಾಲೊ.

ಮಿಕ್ಕಿ ಹಳ್ತಾರ್ ವೆತಾಲೊ. ತಾಕಾ ಕಿಲ್ಲಲಾಗಿಂ ಉಲಂವ್ಕ್ ಆಸ್ಲೆಂ.

“ತುಕಾ ಹಾಂವೆ ಮಿಸಾವೆಳಾರ್ ಕುಮ್ಗಾರ್ ಘೆತಾನಾ ಪಳೆಲೆಂ” ಮಿಕ್ಕಿನ್ ಉಲವ್ಣ್ಯಾಕ್ ಬುನ್ಯಾದ್ ಘಾಲಿ.

“ಹೊ ಬಾರಿ ಉಶಾರ್ ಆಸಾಯ್ ತುಂ.”

ತೊ ವೊಡ್ಲ್ಯಾನ್ ಹಾಸ್ಲೊ.  ಕಿಲ್ಲಾಕ್ ಖುಶೀ ಜಾಲಿ.

“ಕಿಲ್ಲಾಬಾಯ್ … ಏಕ್ ವಿಶಯ್ ಸಾಂಗೊಂಕ್ ಆಸಾ.”

“ಹೋ, ಸಾಂಗ್” ತಾಕಾ ಇಲ್ಲಿ ಕಾವ್ಜೆಣಿ ಭೊಗ್ಲಿ.

“ಹಾಂವ್ ತುಕಾ ಪಸಂದ್ ಕರ್ತಾಂ.”

ತಾಕಾಚ್ ತೆಂ ಪಾತ್ಯೆನಾ ಜಾಲೆಂ.  ತೆಂ ಲಜೆಲೆಂ. ವೊಗೊಚ್ ರಾವ್ಲೆಂ.  ಕಿತೆಂ ಸಾಂಗ್ಚೆ ತಾಕಾ ಕಳ್ಳೆಂ ನಾ.

” ಕಿಲ್ಲಾ, ಪ್ಲೀಸ್ ಸಾಂಗ್, ಹಾಂವ್ ತುಕಾ ಪಸಂದ್ ಆಸಾಂ ? “

“. . .  ಮ್ಹಾಕಾ ಭ್ಯೆಂ ದಿಸ್ತಾ”

“ವೆಗ್ಗಿಂಚ್ ಹಾಂವ್ ಮ್ಹಜ್ಯಾ ಮಾಮ್ಮಿಕ್ ಘೆವ್ನ್  ತುಮ್ಗೆರ್ ಯೆತಾಂ. . . “

ತಾಣೆ ಪರ್ತ್ಯಾನ್ ಜಾಪ್ ಕಾಡ್ಲಿ ನಾ. ತಾಕಾ ಸಗ್ಳೆಂ ಏಕ್ ಸಪಣ್ ಕಶೆಂ ದಿಸ್ತಾಲೆಂ. ಘುಟಾನ್ ತೆಂ ಆತಾಂ ಮಿಕ್ಕಿಚ್ಯಾ ಮೊಗಾರ್ ಪಡ್‌ಲ್ಲೆಂ.

ಬೊನಾಬ್ ದುಕ್ರಾಮಾಸ್ ಘೆವ್ನ್ ಭಾಯ್ರ್ ಯೆತಾನಾ ತಾಣೆ ಮಿಕ್ಕಿಚಾ ಬೈಕಾರ್  ಕಿಲ್ಲಾ ಆನಿ ಮುನ್ನಾನ್ ವೆಚೆಂ ಪಳೆಲೆಂ.  ಮಿಕ್ಕಿಚಿ ಆನಿ ಕಿಲ್ಲಾಚಿ ಜೊಡಿ ಪಳೆವ್ನ್ ತಾಕಾ ಬೋವ್ ಖುಶಿ ಜಾಲಿ.

ಮಿಕ್ಕಿನ್ ಘರಾವಯ್ಲ್ಯಾ ರಸ್ತ್ಯಾವರೇಗ್ ತಾಂಕಾಂ ಪಾವಯ್ಲೆಂ. ಕಿಲ್ಲ ತಾಕಾ “ಥ್ಯಾಂಕ್ ಯೂ … ಥ್ಯಾಂಕ್ಸ್ ಫೊರ್ ಎವ್ರಿಥಿಂಗ್, ಕಾರ್ಡ್ಸ್ ಆನಿ ಗಿಫ್ಟ್  ” ಮ್ಹಣೊಂಕ್ ವಿಸ್ರಾಲೆಂ ನಾ.

ಮಿಕ್ಕಿ ಸೊಭಿತ್ ಹಾಸೊ ಪಾಟಿಂ ದಿಲೆ.

“ಬಾಯ್ ಮುನ್ನಾಬಾಯ್… ”  ಮ್ಹಣ್ ಜೇಸನಾಚೆಂ ಮಾತೆಂ ಪೊಶೆಲೆಂ. ಜೇಸನಾಕ್ ಮೊಸ್ತು ಖುಶಿ ಜಾಲ್ಲಿ ಆಜ್…

“ಬಾಯ್ ಮಿಕ್ಕಿ ದಾಟ್ಟು ” ಮ್ಹಣ್ ಜ್ಯೋರಾನ್ ಮ್ಹಣೊನ್ ಹಾತ್ ಹಾಲಯ್ಲೆ.

ಕಿಲ್ಲಾನ್ ಮುನ್ನಾಕ್ ತಾಕಿದ್ ದಿಲಿ.  ಮಿಕ್ಕಿ ಮೆಳ್‌ಲ್ಲ್ಯಾ ವಿಶ್ಯಾಂತ್ ಮಾಮ್ಮಿಕ್ ವಾ ಪಪ್ಪಾಕ್ ಸಾಂಗೊಂಕ್ ನಜೊ ಮ್ಹಣ್.

ಕಿಲ್ಲಾಕ್ ಮಾತ್ರ್ ಮಾಮ್ಮಿಕ್ ಕಶೆಂ ಸಮ್ಜಾಂವ್ಚೆಂ ತೆಂ ಕಳಾನಾಸ್ತಾನಾ  ಘಾಮ್ ಸುಟ್ಲೊ..

ಪುಣ್ ತೆಂ ಆಜ್ ಮ್ಹಸ್ತ್ ಸಂತೊಸಾನ್ ಆಸ್ಲೆಂ. ತಾಚ್ಯಾ ಕಾಳ್ಜಾಂತ್ ಆಜ್ ಹಜಾರ್ ಪಿಸೊಳಿಂ ನಾಚ್ತಾಲಿಂ.

‘ಐ ಲವ್ ಯು ಮಿಕ್ಕಿ’  ಆವಾಜಾವಿಣೆಂ ತಾಚಿಂ ಉತ್ರಾಂ ಭಾಯ್ರ್ ಪಡ್ಲಿಂ.

►  ಆಲ್ಪೋನ್ಸ್, ಪಾಂಗ್ಳಾ