ಕ್ರಿಸ್‌ಮಸ್ ಸಂಭ್ರಮ್ – ಸಾರ‍್ಕೆಂ; ‘ಸೌಹಾರ್ದ ಕ್ರಿಸ್‌ಮಸ್’ ಮ್ಹಳ್ಯಾರ್ ಕಿತೆಂ ?

ವರ್ಸ್‌ಭರ್ ಕುತ್ತರೆ ಭಿತರ್ ಜಿಯೆಂವ್ಚ್ಯಾ ಮಂ. ಕ್ರಿ. ಸಮುದಾಯಾಕ್ ದಸೆಂಬರ್ ಮಯ್ನೊ ಆಯ್ಲೊ ಮ್ಹಣ್ತಾನಾ ಎಕಾಣೆಂ ಏಕ್ ವಿಚಿತ್ರ್ ‘ಸ್ಫಿರಿತ್’ ಆಂಗಾರ್ ಯೆತಾ. ಹ್ಯಾ ಸ್ಪಿರಿತಾಚೆಂ ನಾಂವ್ – ಸೌಹಾರ್ದ.  ಫಿರ್ಗಜೆ ಹಂತಾಥಾವ್ನ್ ಸುರು ಕರುನ್, ವಾರಾಡೊ, ಶಿಕ್ಪಾಸಂಸ್ಥೆ, ದಿಯೆಸೆಜ್ ಪರ್ಯಾಂತ್, ನುಕ್ಕಡ್ ನುಕ್ಕಡಾಂತ್ ವೆದಿ ಉಬಾರುನ್ – ಸೌಹಾರ್ದ ಕ್ರಿಸ್‌ಮಸ್ ಸಂಭ್ರಮ್. ಕ್ಯಾರಲ್ಸ್, ಸಾಂತಾಕ್ಲೊಸ್ ಆನಿ ಕೇಕ್. ಏಕ್ ಲೋಬ್ ಘಾಲ್ಲೊ ಪಾದ್ರಿ, ಏಕ್ ಮುಂಡಾಸ್ ದವರ್‌ಲ್ಲೊ ಮುಲ್ಲಾ ಆನಿ ಮೆಳ್ಳ್ಯಾರ್ ಏಕ್ ಭೊಟ್‌ಮಾಮ್; ಮೆಳಾನಾ ಜಾಲ್ಯಾರ್ ಮಾದ್ರಿಪರಿಂ ದಿಸ್ಚಿ ಬ್ರಹ್ಮಕುಮಾರಿ. ಹ್ಯಾ ಸಗ್ಳ್ಯಾ ಕಾರ್ಯಾಚೆಂ ವಿಶೇಸ್ ಆಕರ್ಷಣ್ ಕಿತೆಂಗೀ ಮ್ಹಳ್ಯಾರ್ –  ಜಲ್ಮಾಂತ್ ಕನ್ನಡ  ಉಲವ್ನ್ ಕಳಿತ್ ನಾತ್ಲ್ಯಾ ಪೊರ್ಬುಂಗೆಲ್ಯಾಂನಿ ಉಲಂವ್ಚೆಂ ವಿಚಿತ್ರ್  ಕನ್ನಡ.  ಆಯ್ಕಾತಾನಾ,  ‘ಆದರದ ಸ್ವಾಗತ ಮ್ಹಣ್ತಾತ್‌ಗೀ ?  ಹಾದರದ ಸ್ವಾಗತ ಮ್ಹಣ್ತಾತ್’ ಕಳಾನಾ.  ಆತಾಂ’ ತಾ  ಫಕತ್ ಸೌಹಾರ್ದ ಕ್ರಿಸ್‌ಮಸ್ ಆಚರಣ್ ಕರುಂಕ್ ಮ್ಹಣ್‍‌ಚ್  ಕಾಂಯ್ ಥೊಡಿಂ ಸಂಘಟನಾಂಯ್ ಉದೆಲ್ಯಾಂತ್‌. ಹಾಂಚೆ ಏಕ್ ಮಾತ್ ಕಾಮ್,  ವರ್ಸಾಂತ್ ಏಕ್ – ದೋನ್ ಫೆಸ್ತಾಂಚೆಂ ಆಚರಣ್. ಏಕ್ ದೀಪಾವಳಿ, ಏಕ್ ಕ್ರಿಸ್ಮಸ್. ಆನಿ ಹ್ಯಾ ಕಾಮಾಕ್ ಬಿಸ್ಪ್ – ಪಾದ್ರಿ – ಮಾದ್ರಿಂಚೊಂ ಆನಿ ಮಂ. ಕ್ರಿ.  ಸಂಸ್ತ್ಯಾಂಚೊಂ ಸಾಥ್!

ಆತಾಂ, ಫಕತ್ ಮ್ಹಾಕಾ ಮಾತ್ ನಯ್, ಪ್ರಜ್ಞಾವಂತ್ ಸಮಾಜೆಕ್ ಆಸ್ಚೆಂ ಪ್ರಶ್ನ್ –  ಆಮ್ಕಾಂ ಸಗ್ಳ್ಯಾಂಕ್ ಕಳಿತ್ ಆಸ್ಚೆಂ ಜೆಜು ಜಲ್ಮಾಲ್ಲೆಂ ಫೆಸ್ತ್ – ‘ಕ್ರಿಸ್‌ಮಸ್’ –   ಎಕಾಣೆಂ ‘ಸೌಹಾರ್ದ ಕ್ರಿಸ್‌ಮಸ್’ ಜಾಲೆಂ ತರೀ ಕಶೆಂ ?

ಆಮ್ಚ್ಯಾ  ದೆಶಾಂತ್ ವಾ ಪ್ರದೇಶಾಂತ್ ‘ನತಾಲಾಂ ಫೆಸ್ತ್’ ಆಚರಣ್ ಕರ್ತಾನಾ ಕಾಂಯ್ ದೊಂಬಿ, ಗಲಾಟೊ ಜಾಲ್ಲೆ ದಾಕ್ಲೆ ಆಸಾತ್‍ಗೀ ? ಜಾಂವ್ಚಿ ಸಾಧ್ಯತಾ ಆಸಾಗೀ ? ತರ್, ಎಕಾಣೆ ಆತಾಂ –  ಹಿಂದೂ ಸಮಡ್ತೆಚ್ಯಾ ಎಕ್ಲ್ಯಾಕ್, ಮುಸ್ಲಿಂ ಸಮಡ್ತೆಚ್ಯಾ ಎಕ್ಲ್ಯಾಕ್ ಆಪವ್ನ್, ಗಾಂವಾರ್ ಕೋಮು ಗಲಾಟೊ ಜಾತಾನಾ ‘ಶಾಂತಿಸಭಾ’ ಕರ‍್ತಾತ್ ಪಳೆ, ತೇಚ್ ಭಾಶೆನ್ ‘ಶಾಂತಿ ಭಾಷಣಾಂ –  ಶಾಂತಿ ಸಂದೇಶ್’ ದಿಂವ್ಚೊ ಉದ್ದೇಶ್ ತರೀ ಕಿತೆಂ ?

“ಮಂಗ್ಳುರಿ ಕ್ರೀಸ್ತಾಂವ್ ಭಾರಿಚ್ ಶಿಕ್ಪಿ ಸಮಾಜ್. ಆದಿಂ ಥಾವ್ನ್‌ಯೀ ಮಾಸ್ಟೆರ್ – ಟಿಚೆರಾಂ ಆಸ್‌ಲ್ಲಿಂ ಕ್ರಿಸ್ತಾಂವಾಂಚಿಂಚ್” ಮ್ಹಣ್ ಪೋರ್‌ಚ್ ಕಾಡ್ದಿನಾಲ್ – ಆರ್ಚ್‌ಬಿಸ್ಪಾಂ ಮುಕಾರ್  ದಿಯೆಸೆಜಿಚ್ಯಾ ಗೊವ್ಳಿಕ್ ಪರಿಶದೆಚ್ಯಾ ಭಾಂಗಾರೋತ್ಸವ್ ಕಾರ್ಯಾಂತ್ ನಿವೃತ್ತ್ ಸರ‍್ಕಾರಿ ಅಧಿಕಾರಿ  ಫಿಲೊಮೆನಾ ಬಾಯ್ ಮ್ಹಣಾಲಿ ಆನಿ ಜಮ್ಲೆಲ್ಯಾ ಸಗ್ಳ್ಯಾಂನಿ ತಾಳಿಯೊ ಪೆಟ್ಯ್ಲೊ. ಬರೆಂಚ್. ಆಮ್ಚೆ ಪಾದ್ರ್ಯಾಬ್, ಬಿಸ್ಪ್ ರೊಮಾಕ್ ವಚೊನ್ ದೊತೊರ್ ಸನದ್ ಜೋಡ್ನ್ ಯೆತಾತ್. ಪೂಣ್ ಸಮಾಜ್ ವಿಗ್ಯಾನಾಚಿ ಗಜಾಲ್ ಯೆತಾನಾ ಮಾತ್ – ಲ್ಹಾನ್ ಮಟ್ಟಾಚ್ಯಾ ರಾಜ್‌ಕಾರಣಿಂಕ್  ಆಸ್‌ಲ್ಲೆ ತಿತ್ಲಿ ಮುಳಾವಿ ಜಾಣ್ವಾಯ್‌ಯೀ ಆಮ್ಚ್ಯಾ ಧರ್ಮಿಕ್ ವ್ಹಡಿಲಾಂಕ್ ಆಸಾ ಮ್ಹಣ್ ದಿಸಾನಾ.

ಏಕ್ ದಾಕ್ಲೊ ದಿಂವ್ಚೊ ತರ್ –  ವೆವೆಗ್ಳ್ಯಾ ಸಮಡ್ತೆಚೆ ಬುದ್ವಂತ್ ರಾಜ‌ಕಾರಣಿ ಆಪಾಪ್ಲ್ಯಾ ಫೆಸ್ತಾಂಕ್ ಏಕ್‌ಚ್ ‘ಗೆಟ್ – ಟುಗೆದರ್’ ದವರ್ತಾತ್ ವಾ ‘ಇಫ್ತಾರ್ ಪಾರ್ಟಿ’ ದವರ್ತಾತ್. ತಾಂತು ತೆ ಬಿಲ್ಕುಲ್  ‘ಸೌಹಾರ್ದ’ ಭರ್ಸುಂಕ್ ವಚಾನಾಂತ್.  ತಾಣಿ ಆಚರಣ್ ಕರ್ಚೆಂ ತಾಂಚ್ಯಾ ಸಮಡ್ತೆಚೆಂ ಖಾಸ್ ಫೆಸ್ತ್ ಮ್ಹಳ್ಳೆಂ ತೆ ಜಾಣಾಂತ್. ಪೂಣ್ ಕ್ರಿಸ್ತಾಂವ್ ಧರ್ಮಿಕ್ ಮುಕೆಲಿ ಆನಿ pseudo ಕ್ರೀಸ್ತಾಂವ್ ಮುಕೆಲಿ ಮಾತ್ ಕ್ರೀಸ್ತಾಂವಾಂಚ್ಯಾ ಹರ್ ಫೆಸ್ತಾಂನಿ  ‘ಸೌಹಾರ್ದ’ ಭರ‍್ಶಿತಾತ್. ಜಾಂವ್ ತೆಂ ಮೊಂತಿಫೆಸ್ತ್ ವಾ ನತಾಲಾಂ ಫೆಸ್ತ್. ಸದ್ದ್ಯಾಕ್ ಸಾಂತ್ ಮಾರಿ ಏಕ್ ಮಾತ್ ‘ಸೌಹಾರ್ದ’ ಕರುಂಕ್ ಉರ್ಲ್ಯಾ.

ಆನಿ ಹೆಂ ಸಗ್ಳೆಂ ಪಳೆವ್ನ್ ಸಮಡ್ತಿಚೆ ಶ್ರೇಷ್ಠ್ ಆನಿ ಶಿಕ್ಪಿ ವ್ಹಡಿಲ್ ಕಾನ್, ದೊಳೆ, ತೋಂಡ್  ಧಾಂಪುನ್ ನುತ್ತಾ ಬಸ್ಲ್ಯಾತ್.

ಭಾವಾಡ್ತ್ಯಾಂಕ್ ಕ್ರಿಸ್‌ಮಸ್ X – Mas  ಮ್ಹಣ್ ಬರಯ್ನಾಯೆ – ತೆಂ ಚುಕಿಚೆಂ, Christmas  ಮ್ಹಣ್‌ಚ್ ಬರಯ್ಜೆ – ತೆಂ ಮಾತ್ ಸಾರ್ಕೆಂ ಮ್ಹಣ್ ಮಹಾಪ್ರಸಂಗ್ ದಿಂವ್ಚೆ ಮ್ಹಣಿಯಾರಿ, ತೇಂಚ್ ‘ಕ್ರಿಸ್‌ಮಸ್’ ಆಸ್‌ಲ್ಲೆಂ ಹ್ಯಾಯ್ ಪರಿಂ  ‘ಸೌಹಾರ್ದ ಕ್ರಿಸ್‌ಮಸ್’ ಮ್ಹಣ್ ಕರ್ತಾನಾ ಮಾತ್ ಕಾಂಯ್ಚ್  ಉಲಯ್ನಾಂತ್. ಏಕ್‌ಚ್ ಹೆಂ ಚುಕಿಚೆಂ ಮ್ಹಳ್ಳಿ ಸಮ್ಜಣಿಚ್ ಹ್ಯಾ ಮಣಿಯಾರ‍್ಯಾಂಕ್ ನಾ; ವಾ ಸಮ್ಜಣಿ ಆಸ್ಲ್ಯಾರೀ ಸಮಾಜ್ ವಿಗ್ಯಾನಾಚ್ಯಾ ದಿಶ್ಟಿನ್ ಹಿ ಗಜಾಲ್ ತಾಣಿ ಗಂಬೀರ್‌ಪಣಿ ಘೆತ್‌ಲ್ಲಿ ನಾ.

ಆತಾಂ, ಎಕಾ ಸಾದ್ಯಾ ಗಜಾಲಿಕ್ ಯೆವ್ಯಾಂ. ಆಮ್ಚ್ಯಾ ಫಿರ್ಗಜೆಂತ್ ಸಾಂತ್‌ಮಾರಿ ಜಾತಾ – ಮ್ಹಳ್ಯಾರ್ ಫಿರ್ಗಜ್ ಫೆಸ್ತ್. ಆನಿ ಹ್ಯಾ ಫೆಸ್ತಾಕ್ ಆಮಿ ಹರ್ ಸಮಡ್ತೆಚ್ಯಾ ಆಮ್ಚ್ಯಾ ಇಶ್ಟಾ – ಮಂತ್ರಾಂಕ್, ಸಾಂಗೊಡ್ಯಾಂಕ್ ಆಪಯ್ತಾಂವ್. ಆನಿ ತೇಯ್ ತಿತ್ಲ್ಯಾಚ್ ಉರ್ಭೆನ್ ಸಾಂತ್‌ಮಾರಿಕ್ ಆಮ್ಚ್ಯಾ ಘರಾ ಯೆತಾತ್. ಸಾಂಗಾತಾ  ಬಸೊನ್ ಆಮಿ ಪಿಯೆತಾಂವ್, ಜೆವ್ತಾಂವ್, ದುಕ್ರಾಮಾಸ್ ಖಾತಾಂವ್. ತಶೆಂಚ್ ಹೆರ್ ಸಮಡ್ತಿಚೆ ಆಮ್ಚೆ ಈಶ್ಟ್  ತಾಂಚ್ಯಾ ಗಾಂವಾಂತ್ ಜಾತ್ರೆ – ಕೋಲ – ತಂಬಿಲ ಆಸ್ಲ್ಯಾರ್ ಆಮ್ಕಾಂ ಆಪಯ್ತಾತ್. ಈದ್ – ಬಕ್ರೀದ್ ಅಸ್ಲ್ಯಾರೀ ಆಪಯ್ತಾತ್. ಆಮಿ ತಿತ್ಲ್ಯಾಚ್ ಖುಶೇನ್ ವೆತಾಂವ್. ತಾಂಚ್ಯಾ ದೆವಾಕ್ ಬಲಿ ದಿಲ್ಲ್ಯಾ ಕುಂಕ್ಡಾಚೆಂಗೀ, ಬಕ್ರ್ಯಾಚೆಂಗೀ – ಮಾಸ್, ಭಾಕ್ರಿ, ಬಿರಿಯಾನಿ ರಾಂದ್ಲ್ಯಾರ್ ಜೇವ್ನ್ – ಖಾವ್ನ್ ಯೆತಾಂವ್. ಹಾಂಗಾಸರ್ ಆಮಿ ಕಿತೆಂ ಆಮ್ಚ್ಯಾ ಸಾಂತ್‌ಮಾರಿಕ್ ‘ಸೌಹಾರ್ದ ಸಾಂತ್‌ಮಾರಿ’ ಮ್ಹಣ್ತಾಂವ್‌ಗೀ ? ವಾ ಹೆರ್ ಸಮಡ್ತಿಚೆ ಆಮ್ಚೆ ಈಶ್ಟ್  ‘ಸೌಹಾರ್ದ ಕೋಲ – ತಂಬಿಲ’ ಮ್ಹಣ್ತಾತ್‌‌‌ಗೀ ?

ಕ್ರಿಸ್‌ಮಸ್ ವಾ ಮೊಂತಿಫೆಸ್ತ್ ಮ್ಹಳ್ಯಾರೀ ಸಾಂತ್‌ಮಾರಿ, ಕೋಲ – ತಂಬಿಲ, ಈದ್ – ಬಕ್ರೀದಾ ತಿತ್ಲೆಂಚ್ ಎಕಾ ಪಾತ್ಯೆಣೆಚ್ಯಾ ಲೊಕಾಚೆಂ ಖಾಸ್ ಫೆಸ್ತ್. ತಾಂತು ಬಾಂದವ್ಪಣ್ ಸಂಯ್ಬಾಂತ್‌ಚ್ ಆಸ್ತಾನಾ, ಸೊಧುನ್ ವಚೊನ್ ‘ಸೌಹಾರ್ದತಾ’ ಚೆಪ್ಚೆಂ ಆಸಾ ಪಳಯಾ – ತಾಚೆ ತಿತ್ಲೆಂ ವ್ಹಡ್ ಮೂರ್ಖ್‌ಪಣ್  ದುಸ್ರೆಂ ನಾ. ಆನಿ ಹ್ಯಾ ಮೂರ್ಖ್‌ಪಣಾಕ್ ಬಿಸ್ಪ್, ಪಾದ್ರಿ, ರೆಲಿಜಿಯೊಸ್ ಸಾಂಗಾತ್ ದೀವ್ನ್  ಆಸಾತ್  ತೆಂ ನೀಜ್ ದುರಂತ್ !

ಕ್ರಿಸ್‌ಮಸ್ ಮ್ಹಳ್ಯಾರ್ ಜೆಜುಚ್ಯಾ ಜಲ್ಮಾಚೆಂ ಫೆಸ್ತ್! ಕ್ರೀಸ್ತಾಕ್ ಪಾತಿಯೆಂವ್ಚ್ಯಾ ಲೊಕಾನ್ ಆಚರಣ್ ಕರ್ಚೆಂ ಫೆಸ್ತ್! ಕ್ರೀಸ್ತಾಂವ್ ಮನಿಸ್, ಸಂಸ್ಥೊ, ದಿಯೆಸೆಜ್, ಫಿರ್ಗಜ್ ಹ್ಯಾ  ಫೆಸ್ತಾಚೊ Host. ಹೆರ್ ಸಮಡ್ತಿಚೆ ಮಾನಾಚೆ guest. ತಾಂಕಾ ಫೆಸ್ತಾಕ್ ಆಪವ್ನ್ treat ದಿಂವ್ಚೊ ಜಾಯ್ಜೆ ಸಂದರ್ಭ್. ಕನಿಶ್ಟ್  ಪಾಂಚ್ವ್ಯಾ ಕ್ಲಾಶಿ ಪರ್ಯಾಂತ್ ತರೀ ಸಮಾಜ್ ವಿಗ್ಯಾನ್ ಶಿಕ್ಲೆಲ್ಯಾಕ್ ಕಳಿತ್ ಆಸಜೆಚ್ ಜಾಲ್ಲಿ ಹಿ ಮುಳಾವಿ ಗಜಾಲ್ ಆಮ್ಚ್ಯಾ ಧರ್ಮಿಕ್ ವ್ಹಡಿಲಾಂಕ್ ಆನಿ pseudo  ಕ್ರೀಸ್ತಾಂವ್ ಮುಕೆಲ್ಯಾಂಕ್ ಕಳಿತ್ ನಾ ಮ್ಹಳ್ಯಾರ್ –   ವರ‍್ತ್ಯಾ ದುರಾದೃಶ್ಟಾಚಿ ಗಜಾಲ್.

ಫಾತಿಮಾ ಸಾಯ್ಭಿಣಿಕ್ ಸಮರ್ಪುನ್ ದಿಲ್ಲ್ಯಾ ಆಮ್ಚ್ಯಾ ಫಿರ್ಗಜೆಂತ್ ವಿಗಾರ್ ಜಾವ್ನ್ ಆಸ್‍ಲ್ಲೊ,  ಆತಾಂ ದೆವಾದೀನ್ ಬಾ| ವಿಶೆಂತ್ ವಿತೊರ್ ಮಿನೆಜ್ ಹಾಣಿ ಭುರ್ಗ್ಯಾಂಚ್ಯಾ ಮಿಸಾಚೆರ್ ಶೆರ್ಮಾಂವಾರ್ ಕೆದಾಳಾಯ್ ಸಾಂಗ್ಚೆಂ ಆಸ್‌‍ಲ್ಲೆಂ – ಭುರ್ಗ್ಯಾಂನೋ,  ಇಂಗ್ಲಿಶಾಂತ್ ಆಮ್ಚ್ಯಾ ಇಗರ್ಜೆಚೆಂ ನಾಂವ್ ಫಾತಿಮಾ ಬರಯ್ತಾನಾ ಸ್ಪೆಲ್ಲಿಂಗ್ Fatima ಮ್ಹಣ್ ಸಾರ್ಕೆಂ ಬರಯಾ. Fathima ಮ್ಹಣ್  ಬರಯ್ನಾಕಾತ್, ತೆಂ ಚುಕಿಚೆಂ. ತವಳ್ಚ್ಯಾ ಮಣಿಯಾರ‍್ಯಾಂಕ್ ಸಮಡ್ತಿಚ್ಯಾ ಗಜಾಲಿಂಚೆರ್, ಸಾಂಗಾತಾಚ್ ಸಮಾಜ್ ವಿಗ್ಯಾನಾಚೆರ್ ಆಸ್‌ಲ್ಲಿ ಸಮ್ಜಣೀಯ್ ಆತಾಂಚ್ಯಾ  ಮಣಿಯಾರ‍್ಯಾಂಕ್ ನಾ ? ವಾ ಆಸ್ಲ್ಯಾರೀ ಕೊಣಾಚ್ಯಾಗೀ ದಾಕ್ಶೆಣೆಕ್ ಪಡೊನ್  ಕಾಂಯ್ಚ್ ಕಳಿತ್ ನಾತ್‌‌‌‌‌‌‌‌‌ಲ್ಲೆಪರಿಂ ತೆ ನಟನ್ ಕರುನ್ ಆಸಾತ್ ?

ಮಂ. ಕ್ರಿ. ಲೊಕಾಕ್ ಸೊಡ್ಲ್ಯಾರ್ ಹೆರ್ ಖಂಯ್ಚ್ಯಾಯ್ ಸಮಾಜಾಚ್ಯಾ ಲೊಕಾನ್, ಸೌಹಾರ್ದ ಮ್ಹಣ್ ಆಪ್ಲಿಂ ಫೆಸ್ತಾಂ ಆಚರಣ್ ಕೆಲ್ಲೆಂ ಹಾಂವೆ ಎದೊಳ್ಚ್ಯಾಕ್ ಪಳಯಿಲ್ಲೆಂ ನಾ. ಖಂಯ್ಚ್ಯಾಯ್ ಸಮಾಜಾಚ್ಯಾ ಲೊಕಾನ್, ನುಕ್ಕಡಾಂನಿ ಸರ್ವ ಧರ್ಮ ಶಾಂತಿಸಭಾ ತಸಲಿಂ ವಿಕ್ಷಿಪ್ತ್ ಆಚರಣಾಂ ಮಾಂಡುನ್ ಹಾಡುನ್  ಫೆಸ್ತ್  ವಾಟೆರ್ ಘಾಲ್ಲೆಂಯ್ ಹಾಂವೆ ಪಳೆಂವ್ಕ್ ನಾ. ಹಾಂ … ವ್ಹಯ್ ! –  ಹ್ಯಾ ಗಾಂವಾಂತ್  ಸರ್ವಜಣಿಕ್ ಗಣೇಶೋತ್ಸವ್, ಸರ್ವಜಣಿಕ್ ದಸರಾ ಬೋವ್ ವಿಭ್ರಂಜಣೆನ್ ಚಲ್ತಾತ್ – ತೆ ಸರ್ವಜಣಿಕ್ ಉತ್ಸವ್ ತರೀ, ಕೋಣ್‌ಯೀ ತಾಕಾ ಸೌಹಾರ್ದ ಗಣೇಶೋತ್ಸವ, ಸೌಹಾರ್ದ ದಸರಾ ಮ್ಹಣ್ ಆಪಯ್ನಾಂತ್. ಹೆರ್ ಸಮಡ್ತಿಚ್ಯಾ ಧರ್ಮಿಕ್ ಮುಕೆಲ್ಯಾಂಕ್ ವಾ pseudo ಕ್ರೀಸ್ತಾಂವ್ ಮುಕೆಲ್ಯಾಂಕ್ ಆಪವ್ನ್ ಶಾಂತಿ ಭಾಶಣಾಂ – ಶಾಂತಿ ಸಂದೇಶ್ ಥಂಯ್ಸರ್ ದೀನಾಂತ್. ಪೂಣ್ ಆತಾಂತಾ ಥೊಡೆ pseudo ಕ್ರೀಸ್ತಾಂವ್ ಮುಕೆಲಿ ಥಂಯ್ಸರ್  ಭೆಟ್ ದೀವ್ನ್  ‘ಸೌಹಾರ್ದತಾ’ ಮ್ಹಣ್ ಹಾಸ್ಯಾಸ್ಪದ್  ಜಾತೇ ಆಸಾತ್!

ಸುಕ್ಶಿಮಾಯೆನ್ ‘ಸಾರ್ವಜನಿಕ’  ಮ್ಹಳ್ಯಾರ್ ತೋ ಉತ್ಸವ್, ಜಾಂವ್ ಗಣಪತಿ ಬಾಪ್ಪಾಚೊ ವಾ ದಸರಾಚೊ – ತೊ ಸರ್ವಾಂಕ್ ಉಗ್ತೊ. ಪೂಣ್ ಹಾಂಚೆ ‘ಸೌಹಾರ್ದ ಕ್ರಿಸ್‌ಮಸ್ ‘ ಫಕತ್ ತೀನ್ ಧರ್ಮಾಂಕ್ ಸೀಮಿತ್ – ಹಿಂದು, ಮುಸುಲ್ಮಾನ್ ಆನಿ ಕ್ರೀಸ್ತಾಂವ್!  ಅಶೆಂ ಕಿತ್ಯಾಕ್ ?  ಮ್ಹಳ್ಳೆಂ ಪ್ರಶ್ನ್‌ಯೀ ಆಸಾ. ಆಸುಂ. 

ಫಕತ್ ಆನಿ ಫಕತ್ ಮಂ. ಕ್ರಿ. ಸಮಾಜ್ ಮಾತ್ ನತಾಲಾಂಚೆಂ ಫೆಸ್ತ್ –  ಕರಾವಳೆಂತ್ ಸೌಹಾರ್ದ  ಕ್ರಿಸ್‌ಮಸ್  ಮ್ಹಣ್ ಆಚರಣ್ ಕರುನ್ ಸಮಡ್ತೆಚೊ ಆನಿ ಫೆಸ್ತಾಚೊ ಭೊಂಗಸ್ತಳ್ ಕರುನ್ ಆಸಾತ್. ಆನಿ ಸಮಡ್ತೆಚೆ ಶ್ರೇಷ್ಠ್ ವ್ಹಡಿಲ್ ಜಾವ್ನಾಸ್ಚೆ ಬಿಸ್ಪ್, ಸಂಸ್ಥ್ಯಾಂಚೆಂ ವ್ಹಡಿಲ್, ಸಂಪೂರ್ಣ್ ಧಾರ್ಮಿಕ್ ಮುಸ್ತಾಯ್ಕೆರ್ ಹ್ಯಾ ಕಾರ್ಯಾಂಕ್ ಹಾಜರ್ ಜಾವ್ನ್ ಆಪ್ಲಿ ‘ಮ್ಹೊರ್’ ದಾಂಬುನ್ ಯೆತಾತ್!  ಕರಾವಳೆಂತ್ ಅಸಲಿ ಏಕ್ ವಿಚಿತ್ರ್ ಗಜಾಲ್ ಖಂಯ್ ಥಾವ್ನ್, ಕೊಣಾಥಾವ್ನ್ , ಖಂಯ್ಚ್ಯಾ ಕಾರಣಾಕ್ ಲಾಗೊನ್ ಆಯ್ಲಿ ಮ್ಹಳ್ಳೆವಿಶ್ಯಾಂತ್ ಮ್ಹಾಕಾ ಖಬರ್ ನಾ. ವಾಚ್ಪ್ಯಾಂ ಪಯ್ಕಿ ಕೊಣಾಕ್ ಆಸ್ಲ್ಯಾರ್ ದಯಾಕರುನ್ ಹಾಂಗಾಸರ್ ಹ್ಯಾ ಲೇಕನಾಚ್ಯಾ ಮುಳಾಂತ್ ದಿಯಾ.

ಹಾಂಗಾಸರ್ ದಿಲ್ಲ್ಯೊ ದೋನ್ ತಸ್ವಿರ‍್ಯೊ ಪಳಯಾ – ‘ಸೌಹಾರ್ದ’ ಆಸ್ಚೆಂ ಫಕತ್ ಕ್ರಿಸ್‌ಮಸಾಂತ್ ಮಾತ್ರ್!
ದೊನೀ ಸಂಭ್ರಮಾಚೊ ಆಯೋಜಕ್ ಸಂಸ್ಥೊ –  ಏಕೂಚ್! ದೊನಾಂಯ್ತೀ ಬಿಸ್ಪ್ , ಪಾದ್ರಿ ಆಸಾತ್. ಸಂಸ್ಥ್ಯಾಂಚೆಂ ವ್ಹಡಿಲ್‌ಯಿ ಆಸಾತ್!  

ಆಮ್ಚ್ಯಾ ಘರಾಂನಿ ಆನಿ ಸಂಸ್ಥ್ಯಾಂನಿ – ದೀಪಾವಳಿ, ಓಣಂ, ಪೊಂಗಲ್, ಯುಗಾದಿ, ಹೋಳಿ ಅಸಲಿಂ ಸರ್ವ್ ಫೆಸ್ತಾಂ ಸಹಜ್ಪಣಿಂ ಆಚರಣ್ ಕರುಂಕ್ ಸಾಧ್ಯ್ ಜಾತಾ ಜಾಲ್ಯಾರ್, ಕ್ರಿಸ್‌ಮಸ್ ಮಾತ್ ಕಿತ್ಯಾಕ್ ಸಹಜ್ಪಣಿ ಫಕತ್ ಆನಿ ಫಕತ್ ಜೆಜುಚ್ಯಾ ಜಲ್ಮಾಚೆಂ ಫೆಸ್ತ್ ‘ಕ್ರಿಸ್‌ಮಸ್’ ಜಾವ್ನ್ ಆಚರಣ್ ಕರುಂಕ್ ಕಿತ್ಯಾಕ್ ಜಾಯ್ನಾ? ಫಕತ್ ಕ್ರಿಸ್‌ಮಸಾಕ್ ಮಾತ್ ಕಿತ್ಯಾಕ್ ‘ಸೌಹಾರ್ದ’ ಟ್ಯಾಗ್ ಲಾಯ್ಜೆ ? ಖಂಯ್ಚ್ಯಾ ಕಾರಣಾಕ್ ಲಾಗೊನ್ –   ಕೊಮುದಂಗ್ಯಾ ಉಪ್ರಾಂತ್ ಜಾಂವ್ಚ್ಯಾ ಸರ್ವ ಧರ್ಮ ಶಾಂತಿ ಸಭೆಪರಿಂ  ‘ಸೌಹಾರ್ದ ಕ್ರಿಸ್‌ಮಸ್’ ಮ್ಹಳ್ಳೊ ಹೊ ನಾಟಕ್ ಉಬೊ ಕರಿಜೆ? ಆಮ್ಚ್ಯಾ ಸುತ್ತುರಾಂತ್ ಇತ್ಲೆ ಶಿಕ್ಪಾಸಂಸ್ಥೆ ಆಸಾತ್, ಮೊಲಾಂ ಆಸಾತ್, ಮೆಡಿಕಲ್ ಕೊಲೆಜಿ ಆಸಾತ್ – ತಾಣಿ ಕೆದಾಳಾಯ್ ಸೌಹಾರ್ದ ಓಣಂ, ಸೌಹಾರ್ದ ಹೋಳಿ, ಸೌಹಾರ್ದ ದೀಪಾವಳಿ, ಸೌಹಾರ್ದ ಸಂಕ್ರಾಂತಿ – ಮ್ಹಣ್ ಆಚರಣ್ ಕೆಲ್ಲೆಂ ಆಸಾಗೀ ? ತರ್ ಕಿತ್ಯಾಕ್ ಸೌಹಾರ್ದ ಕ್ರಿಸ್‌ಮಸ್ ?

ಸಮಾಜಾಂತ್ ಸಹಜ್ಪಣಿ ಆಸ್ಚಿ ಸೌಹಾರ್ದತಾ ‘ನಾ’ ಮ್ಹಣ್ ಲೊಕಾಮತಿಂತ್ ‘ದುಬಾವ್’ ವೊಂಪುನ್, ನತಾಲಾಂ ಫೆಸ್ತಾಚ್ಯಾ ನಿಬಾನ್ ಸೌಹಾರ್ದತಾ ಚೆಪ್ಚಿಂ ಜಿಂ ಪ್ರೇತನಾಂ ಚಲೊನ್ ಆಸಾತ್, ಸಮಾಜಿಕ್ ಸ್ವಾಸ್ತ್ಯಾಚಾ ನದ್ರೆನ್ ತುರ‍್ತಾನ್ ರಾವಂವ್ಕ್ ಜಾಯ್. ಕರಾವಳೆಚ್ಯಾ ದಿಯೆಸೆಜಿಚ್ಯಾ ವ್ಹಡಿಲಾಂನಿ ಆನಿ ಸಂಸ್ತ್ಯಾಂಚ್ಯಾ ವ್ಹಡಿಲಾಂನಿ ಜಾಗ್ರುತ್ ಜಾಂವ್ಕ್ ಜಾಯ್.

ತರ್ –  ಸರ್ವಜಣಿಕ್ ಥಳಾರ್ ಕ್ರಿಸ್‌ಮಸ್ ಆಚರಣ್ ನಜೊ ? ಖಂಡಿತ್ ಆನಿ ಜರೂರ್ ಜಾಯ್.  ಪೂಣ್ ಆಚರಣ್  ಸಮಡ್ತೆಚ್ಯಾ ಸಂಸ್ಕೃತೆಚೊ ವಾಂಟೊ ಜಾವ್ನ್ ಜಾಂವ್ಕ್ ಜಾಯ್ ಸೊಡ್ಲ್ಯಾರ್, ‘ಸೌಹಾರ್ದ’ ಮ್ಹಣ್ ನಯ್. ಆನಿ ಹ್ಯಾ ಆಚರಣಾಕ್ ಸಮಾಜಾಂತ್ಲ್ಯಾ ಸರ್ವ್ ಪಾತ್ಯೆಣೆಚ್ಯಾ ಲೊಕಾಕ್, ಅಧಿಕಾರಿಂಕ್ ಸಯ್ರೆ ಮ್ಹಣ್ ಆಪಂವ್ಕ್ ಜಾಯ್. ಕೇಕ್ ವಾಂಟ್ಚೆಂ, ಕ್ಯಾರಲ್ಸ್, ಜಿಂಗಲ್ ಬೆಲ್ಸ್, ಸಾಂತಾಕ್ಲೊಸ್ ಸಗ್ಳೆಂ ಆಸುಂಕ್ ಜಾಯ್. ಜೆಜುಚ್ಯಾ ಜಲ್ಮಾಚ್ಯಾ ಫೆಸ್ತಾದಿಸಾ ಜೆಜುಚ್ಯಾ ಜಲ್ಮಾ ವಿಶ್ಯಾಂತ್, ತಾಣೆ ಕೆಲ್ಲ್ಯಾ ಸಮಾಜ್ ಪರಿವರ್ತನಾಚ್ಯಾ ಆನಿ ಲೊಕ್ ಉದ್ದಾರಾಚ್ಯಾ ಕಾಮಾ ವಿಶ್ಯಾಂತ್ ಧರ್ಮಿಕ್ ಮುಕೆಲ್ಯಾಂನಿ, ವ್ಹಡಿಲಾಂನಿ ಉಲಂವ್ಕ್ ಜಾಯ್. ಆನಿ ಹ್ಯಾ ಆಚರಣಾಚೆಂ ನಾಂವ್ ಫಕತ್ ಆನಿ ಫಕತ್ – ಕ್ರಿಸ‌ಮಸ್ ಆಚರಣ್ ವಾ ಸಂಭ್ರಮ್ ಮ್ಹಣ್ ಆಸೊಂಕ್ ಜಾಯ್.  No ಸೌಹಾರ್ದ, No ಸಂಗಮ! ( ದಾಕ್ಲ್ಯಾಕ್ –  ಜಶೆಂ ಫಾ। ಮುಲ್ಲರ್ ಸಂಸ್ಥ್ಯಾಂತ್ ವರ್ಸಾಂ ಪಾಸುನ್  ಚಲೊನ್ ಆಸಾ . . . ಸಾಂ. ಲುವಿಸ್ ಕೊಲೆಜಿಂತ್‌‌‌ಯಿ ಎದೊಳ್ಚ್ಯಾಕ್  ಚಲೊನ್ ಆಸ್‌ಲ್ಲೆಂ . . . )   ತೆಂ ಸೊಡ್ನ್  ಹೆರ್ ಪಾತ್ಯೆಣೆವಿಶ್ಯಾಂತ್ ಉಲಂವ್ಚೆಂ, ಶಾಂತಿ ಭಾಶಣಾಂ ಕರ್ಚಿಂ ಅರ್ಥಾಹೀನ್. ಪೆದ್ರುಚ್ಯಾ ಜಲ್ಮಾದಿಸಾ ಕೋಣ್ ಲಾದ್ರು ವಿಶ್ಯಾಂತ್ ಉಲಯ್ತಾ? ಪೆದ್ರುಚೊ ಜಲ್ಮಾ ದೀಸ್ ಮ್ಹಳ್ಯಾರ್ ಫಕತ್ ತೋ ಪೆದ್ರುಚೊ – ಲಾದ್ರು ವಿಶ್ಯಾಂತ್ ಉಲಂವ್ಕ್ ಲಾದ್ರುಚೊ ಜಲ್ಮಾ ದೀಸ್ ಆಸಾ. ಸಮಡ್ತಿಚ್ಯಾ ಶ್ರೇಷ್ಠ್ ವ್ಹಡಿಲಾಂನಿ ಆನಿ ಮಣಿಯಾರ‍್ಯಾಂನಿ ಮುಳಾನ್ ಇತ್ಲೆಂ ಸಮ್ಜೊನ್ ಘೆತ್ಲ್ಯಾರ್  ಪುರೊ.

ಆಮ್ಚ್ಯಾ ಸಂಸ್ಥ್ಯಾಂನಿ ‘ಕ್ರಿಸ್‌ಮಸ್ ಸಂಭ್ರಮ್’ ಕಸೊ ಆಸಜೆ ಮ್ಹಣ್ಚ್ಯಾಕ್ ಏಕ್ ನಿದರ್ಶನ್

ಆಮ್ಚ್ಯಾ ಸಮಾಜಾಂತ್ಲ್ಯಾ ಎಕಾ ಚಿಂತ್ಪ್ಯಾನ್ ಕೆದಾಳಾಯ್ ಮ್ಹಣ್ಚೆಂ  ಆಸಾ – “ಆತಾಂ ಫಕತ್ ತೀನ್ ಧರ್ಮಾಂ ಜಾಲ್ಯಾತ್.  ಏಕ್ ಹಿಂದು – ದುಸ್ರೆಂ ಮುಸ್ಲಿಂ ಆನಿ ತಿಸ್ರೆಂ ಸರ್ವಧರ್ಮ.” ದಿಯೆಸೆಜಿಚ್ಯಾ ಶ್ರೇಷ್ಠ್ ವ್ಹಡಿಲಾಂನಿ ಹಿ ಗಜಾಲ್ ಗಂಬೀರ್‌ಪಣಿ ಘೆನಾ ಜಾಲ್ಯಾರ್ ‘ಸರ್ವಧರ್ಮಾಂತ್’  ಕ್ರೀಸ್ತಾಂವ್ ಧರ್ಮ್ ಸಂಪೂರ್ಣ್ ವಿಲೀನ್ ಜಾಂವ್ಚೆ ದೀಸ್ ಪಯ್ಸ್  ನಾಂತ್!

– ಎಚ್ಚೆಮ್, ಪೆರ್ನಾಲ್