ಹಫ್ತ್ಯಾ ಆದಿಂ, ಮಂಗ್ಳುರಿ ಕ್ರಿಸ್ತಾಂವ್ ಮ್ಹಣೊನ್ ಒಳೊಕ್ ಸಾಂಗ್ಚ್ಯಾ ವ್ಹಡಾಂಗೆಲ್ಯಾ ಎಕಾ ಪುಸ್ತಕ್ ವಿಮೋಚನ್ ಕಾರ್ಯಾಕ್ ಹಾಜರ್ ಜಾಲ್ಲೊಂ. ಬೂಕ್ ರಾಂದ್ಪಾಚೊ, ಪ್ರಚಾರ್ ಕೆಲ್ಲೊ ‘ಕೊಂಕ್ಣಿ ಕ್ರೀಸ್ತಾಂವ್ ಮಂಗ್ಳುರಿ ರಾಂದ್ಪಾಂ’ ಮ್ಹಣೊನ್. ಬರಯಿಲ್ಲೊ ಇಂಗ್ಲೆಜಾಂತ್. ಹ್ಯಾ ಕಾರ್ಯಾಕ್ ಶಹರಾಚೊ ಪುಲಿಸ್ ಕಮಿಶನರ್, ಜೊ ಏಕ್ ಐಪಿಎಸ್ ಅಧಿಕಾರಿ, ಮುಕೆಲ್ ಸಯ್ರೊ ಜಾವ್ನ್ ಆಯಿಲ್ಲೊ. ಕಾರ್ಯೆಂ ಇಂಗ್ಲೆಜ್ ಮಿಜಾಸ್ಕೆಂತ್ ಚಲ್ಲೆಂ, ಕಮಿಶನರಾ ಆದಿಂ ಉಲಯಿಲ್ಲೆ ಸಗ್ಳೆ ಇಂಗ್ಲಿಶಾಂತ್ ಉಲಯ್ಲೆ.
ಕಮಿಶನರಾನ್ ಮಾತ್ ಉಲಂವ್ಕ್ ಸುರು ಕರ್ಚ್ಯಾ ಪಯ್ಲೆಂ “ಹಾಂಗಾಸರ್ ಕೊಣೀ ಕನ್ನಡ ಯೇನಾತ್ಲೆ ಆಸಾತ್‌ಗೀ ?” ಮ್ಹಣ್ ವಿಚಾರ್ಲೆಂ. ಕಶ್ಟಾಂನಿ ಏಕ್ ವಾ ದೋನ್ ಹಾತ್ ವಯ್ರ್ ಗೆಲೆ. 99% ಠಕ್ಕೆ ಲೊಕಾಕ್ ಕನ್ನಡ ಯೆತಾ ಜಾಲ್ಲ್ಯಾನ್ ಆಪುಣ್ ಥಳೀಯ್ ಭಾಸ್ ಕನ್ನಡಾಂತ್‌ಚ್ ಉಲಯ್ತಾಂ ಮ್ಹಣ್ ಕಮಿಶನರ್ ಗ್ರಾಂಥಿಕ್ ಕನ್ನಡ ಭಾಶೆಂತ್ ಆಪುರ್ಬಾಯೆನ್ ಉಲಯ್ಲೊ. ಕಮಿಶನರಾನ್ ಮ್ಹಳೆಂ ” ಮಂಗ್ಳುರಿ ಕ್ರಿಸ್ತಾಂವ್ ಸಮುದಾಯ್ ಏಕ್ ಶಾಂತ್ ಸಮಾಜ್. ತೆ ತಾಂಚ್ಯಾಚ್ ಸಂಸಾರಾಂತ್ ಆಸ್ತಾತ್. ಭಂವ್ತಿ ಕಿತೆಂ ಘಡ್ತಾ ತೆ ವಿಶ್ಯಾಂತ್ ತಾಂಕಾ ಗಣ್ಣೆಂಚ್ ನಾ ” ಕಮಿಶನಾರಾಚೆಂ ಉತರ್ ಆಯ್ಕೊನ್ ಜಮ್ಲೆಲೆ ವ್ಹಡ್ಲ್ಯಾನ್ ಹಾಸ್ಲೆ ಮಾತ್ ನಯ್, ತಾಳಿಯೊಯ್ ಪೆಟ್ಯ್ಲೊ.
ಸಭೆಂತ್ ಅಸ್‌ಲ್ಲ್ಯಾ ಕಿತ್ಲ್ಯಾ ಜಣಾಂಕ್ ಕಮಿಶನರಾಚ್ಯಾ ಉತ್ರಾಂನಿ ಆಸ್‌ಲ್ಲೊ ಲಿಪ್ತೊ ಅರ್ಥ್ ಸಮ್ಜಾಲೊ – ಮ್ಹಾಕಾ ಖಬರ್ ನಾ. ಪೂಣ್ ಕೊಡ್ಯಾಳ್ ಆಯಿಲ್ಲ್ಯಾ ಥೊಡ್ಯಾಚ್ ದಿಸಾಂನಿ ಮಂಗ್ಳುರಿ ಕ್ರೀಸ್ತಾಂವ್ ಸಮಾಜೆಚಿ ನಾಡ್ ಪಾರ್ಕಿಲ್ಲ್ಯಾಕ್ ಕಮಿಶನರ್ ಸಾಯ್ಭಾಕ್ ಶಾಭಾಸ್ಕಿ ಪಾವೊ.
ಆತಾಂ – ಜ್ಯಾ ಸಮುದಾಯಾಕ್ ಆಪ್ಲ್ಯಾ ಭಂವ್ತಿ ಸಮಾಜಾಂತ್ ಕಿತೆಂ ಘಡುನ್ ಆಸಾ? ತೆ ವಿಶಿಂ ಖಬರ್ ನಾ, ತೆ ವಿಶಿಂ ಸ್ಪಂದನ್ ಕರಿನಾ – ತೊ ಸಮುದಾಯ್ ‘ಜೀವ್’ ಆಸಾ ಮ್ಝಣೊಂಕ್ ಜಾತಾ?
ಹೆಂ ಘಡುನ್, ಎಕಾ ಹಫ್ತ್ಯಾನ್ ವ್ಹಡಾ ದಬಾಜ್ಯಾನ್ ಮಂಗ್ಳುರ್ ದಿಯೆಸೆಜಿಚ್ಯಾ ಗೊವ್ಳಿಕ್ ಪರಿಶದೆಚೊ ಭಾಂಗ್ರಾಳೊ ಉತ್ಸವ್ ಚಲ್ಲೊ. ಕಾಡ್ದಿನಾಲ್, ಆರ್ಚ್‌ಬಿಸ್ಪ್ ಆಯ್ಲೆ. ಸಾಂಗಾತಾ ಕರ್ನಾಟಕ ಉಂಚ್ಲ್ಯಾ ಕೊಡ್ತಿಚೊ ನಿವೃತ್ತ್ ನಿತಿಕರ್ತ್ ಮೈಕಲ್ ಡಿಕುನ್ಹಾ ಆನಿ ನಿವೃತ್ತ್ ಸರ್ಕಾರಿ ಅಧಿಕಾರಿ ಫಿಲೊಮೆನಾ ಲೋಬೊ ಸಯ್ರಿಂ ಜಾವ್ನ್ ಆಯಿಲ್ಲಿಂ.
ನಿತಿಕರ್ತ್ ಮೈಕಲ್ ಡಿಕುನ್ಹಾನ್ ಸರ್ವೋಚ್ಚ್ ಕೊಡ್ತಿಂಚಿಂ ದೋನ್ ಪ್ರಮುಕ್ ಫಯ್ಸಲಾಂ, ‘ಅಯೋದ್ಯಾ ಆನಿ ಹಿಂದುತ್ವ ಏಕ್ ಜಿಣ್ಯೆರೀತ್’ ಉಲ್ಲೇಕ್ ಕರುನ್ ಮ್ಹಳೆಂ – ಸತಾಚಿ ಸಾಕ್ಸ್ ಜಾಂವ್ಚೆಂ ಮ್ಹಳ್ಯಾರ್ ಬಾಯ್ಲೆಕಡೆ ಘುಟಾನ್ ಉಲಯಿಲ್ಲೆ ಪರಿಂ ನಯ್, ಬಗಾರ್ ಉಗ್ತ್ಯಾ ಕೊಡ್ತಿಂತ್ ಧಾ ಜಣಾಂ ಮುಕಾರ್ ಪರ್ಗಟ್ ಥರಾನ್ ಸಾಂಗ್ಚೆಂ. ಮುಕಾರುನ್ ತಾಣೆ ವಿಚಾರ್ಲೆಂ – ಜಶೆಂ ಜುವಾಂವ್ ಬಾವ್ತಿಸ್ ಅರಣ್ಯಾಂತ್ ಎಕ್ಲೊ ಬೋಬ್ ಮಾರ್ತಾಲೊ, ತಶೆಂ ಬೆಂಗ್ಳುರ್ಚೊ ಆರ್ಚ್ ಬಿಸ್ಪ್ ಆಜ್ ಎಕ್ಲೊ ಉಲಯ್ತಾ. ಹೆರ್ ದಿಯೆಸೆಜಿಚೆಂ ಬಿಸ್ಪ್ ಕಿತ್ಯಾಕ್ ಉಲಯ್ನಾಂತ್ ? ಧಾ ಜಣಾಂ ಮುಕಾರ್ ಉಗ್ತ್ಯಾನ್ ಸತಾಕ್ ಸಾಕ್ಸ್ ದಿಂವ್ಚೆಂ ಧಯ್ರ್ ಆಮ್ಕಾಂ ಏಕ್ ಹಿಂಡ್ ಜಾವ್ನ್ ಆಜ್ ಕಿತ್ಯಾಕ್ ನಾ?
ಎಕಾಮೆಕಾಕ್ ಸಾಂಗಾತ್ ದೀನಾ ಜಾಲ್ಯಾರ್, ಎಕ್ವಟ್ ನಾ ಜಾಲ್ಯಾರ್ – ಕಿತೆಂಚ್ ಕರುಂಕ್ ಜಾಯ್ನಾ. ಹೆರ್ ಸಮಾಜಾಂತ್ಲ್ಯಾ ಮುಕೆಲ್ಯಾಂಚೊಂ ದಾಕ್ಲೊ ದೀವ್ನ್ ನಿತಿಕರ್ತ್ ಡಿಕುನ್ಹಾನ್ ಮ್ಹಳೆಂ, ಹೆರ್ ಸಮಾಜಾಂನಿ ಎಕಾ ಧರ್ಮಿಕ್ ಮುಕೆಲ್ಯಾನ್ ಉಲಯಿಲ್ಲೆಂಚ್, ಉರ್‌ಲ್ಲೆ ಸಗ್ಳೆ ತಾಳೊ ಮೆಳಯ್ತಾತ್, ತಾಣಿ ಉಲಂವ್ಚ್ಯಾಂತ್ ಸತ್ ನಾ ಜಾಲ್ಯಾರೀ ಉಲಂವ್ಕ್ , ತಾಳೊ ಮೆಳಂವ್ಕ್ ತೆ ಪಾಟಿಂ ಸರಾನಾಂತ್. ಆಮ್ಚೆಮಧೆಂ ಅಸಲೊ ಎಕ್ವಟ್ ಆಸಾಗೀ ?
ಉಗ್ತ್ಯಾನ್ ಆನಿ ಧಯ್ರಾನ್ ಉಲಯಿಲ್ಲ್ಯಾ ಶಿವಾಯ್ ಸತಾಕ್ ಸಾಕ್ಸ್ ದೀಂವ್ಕ್ ಜಾಯ್ನಾ, ತಕ್ಲಿ ಘಟ್ ಆಸಾ ಮ್ಹಣ್ ಎಕ್ಲ್ಯಾನ್ ವಚೊನ್ ಫಾತ್ರಾಕ್ ಧಾಡಾಂವ್ಕ್ ಜಾಯ್ನಾ. ಸಂಘಟಿತ್ ಜಾಲ್ಯಾ ಶಿವಾಯ್ ಸಮಡ್ತ್ ಉರಂವ್ಕ್ ಸಾಧ್ಯ್ ನಾ – ಮ್ಹಣ್ ನಿತಿಕರ್ತ್ ಡಿಕುನ್ಹಾನ್ ಸ್ಪಶ್ಟ್ ಮ್ಹಳೆಂ.
ಆತಾಂ, ಕಮಿಶನರಾಚ್ಯಾ ಉತ್ರಾಂಪರಿಂ, ನಿತಿಕರ್ತಾಚೆಂ ಉತರ್ – ಕಿತ್ಲ್ಯಾ ಜಣಾಂಕ್ ಸಮ್ಜಾಲೆಂ – ಮ್ಹಾಕಾ ಖಬರ್ ನಾ. ಕಿತ್ಯಾಕ್ ಮ್ಹಳ್ಯಾರ್ ಆಮ್ಚಿ ಸಮಾಜ್ ಕಮಿಶನರಾನ್ ಸಾಂಗ್‌ಲ್ಲೆಪರಿಂ ಭಂವ್ತಿ ಸಮಾಜಾಂತ್ ಕಿತೆಂ ಘಡುನ್ ಆಸಾ ಮ್ಹಳ್ಳೆವಿಶ್ಯಾಂತ್ ಗಣ್ಣೆಂಚ್ ನಾತ್‌ಲ್ಲಿ, ಚಡುಣೆ ‘ಜೊಂಬಿ’ ಸಮಾಜ್ ಮ್ಹಣ್ಚ್ಯಾಕ್ ಮ್ಹಾಕಾ ತರೀ ಕಸಲೆಚ್ ದುಬಾವ್ ನಾಂತ್.
ಐಪಿಎಸ್ ಅಧಿಕಾರಿನ್ ಆನಿ ನಿತಿಕರ್ತಾನ್ ಉಲಯಿಲ್ಲೆ ಸಂದರ್ಭ್ ವೆವೆಗ್ಳೆ ಜಾಂವ್ಕ್ ಪುರೊ – ಪೂಣ್ ತೀರ್ಲ್ ಏಕ್. ದೊಗೀ ಖಿಣಾಭಿತರ್ ಮನ್ಶ್ಯಾಕ್ ಪಾರ್ಕುಂಚ್ಯಾ ವಿಶೇಸ್ ತಾಂಕಿಚೆ ಮನಿಸ್, ಆಪ್ಲ್ಯಾ ವೃತ್ತೆಂತ್ ತರ್ಭೆತಿ ಜೊಡ್‌ಲ್ಲೆ ಆನಿ ಅಪಾರ್ ಅನ್ಭೊಗ್ ಆಸ್ಚೆ ಶಿಕ್ಪಿ ಮನಿಸ್. ಪ್ರಾಮಾಣಿಕ್ಪಣಿ ಸಾಂಗ್ಚೆಂ ತರ್ – ಮಂಗ್ಳುರಿ ಕಿರಿಸ್ತಾಂವ್ ಸಮಾಜ್ ಆಪ್ಲ್ಯಾ ಭಂವ್ತಿ ಸಮಾಜಾಂತ್ ಕಿತೆಂ ಘಡ್ತಾ ಮ್ಹಳ್ಳೆವಿಶ್ಯಾಂತ್ ಗಣ್ಣೆಂ ಕರಿನಾ ಮ್ಹಣ್ಚೆಪ್ರಾಸ್ ‘ಉಲಂವ್ಕ್ ಧಯ್ರ್ ನಾ’ ಮ್ಹಳ್ಯಾರ್ ಚಡ್ ಅರ್ಥಾಭರಿತ್ ಜಾಯ್ತ್ ಮ್ಹಣ್ ಮ್ಹಾಕಾ ಭೊಗ್ತಾ.
ಆತಾಂ, ಮಂಗ್ಳುರಿ ಕಿರಿಸ್ತಾಂವ್ ಸಮಾಜ್ ಇತ್ಲೀಯ್ ಭಿವ್ಕುರಿ ಆನಿ ‘ಜೊಂಬಿ ಸಮಾಜ್’ ಜಾಂವ್ಕ್ ಕಾರಣ್ ತರೀ ಕಿತೆಂ? ಎಕಾ ಕಾಳಾರ್ ಬಂದೂಕ್ ಘೆವ್ನ್ ವಾಗ್ ಮಾರ್‌ಲ್ಲೆ ಮನಿಸ್ ಜಾವ್ನ್ ಗೆಲ್ಲ್ಯಾ ಹ್ಯಾ ಸಮಾಜಾಕ್ ಅಶೇಂಯ್ ‘ಜೊಂಬಿ’ ಕೆಲ್ಲೆಂ ತರೀ ಕೊಣೆಂ?
ಗೊವ್ಳಿಕ್ ಪರಿಶದೆಚ್ಯಾ ಭಾಂಗ್ರಾಳ್ಯಾ ಉತ್ಸವಾಂತ್ ಉಲಯಿಲ್ಲ್ಯಾ ಫಿಲೊಮೆನಾ ಲೋಬೊನ್ ಸಾಂಗ್ಚೆ ಪರ್ಮಾಣೆ, ಆಮ್ಚ್ಯಾ ಭುರ್ಗ್ಯಾಂಕ್ ಲ್ಹಾನ್ಪಣಾಥಾವ್ನ್‌ಚ್ ಇಗರ್ಜೆಂತ್, ದೊತೊರ್ನೆ ಕ್ಲಾಶಿ ಭಾಯ್ರ್‌ಯೀ, ಜಾಯ್ತ್ಯಾ ಗಜಾಲಿಂನಿ ಬರಿ ತರ್ಭೆತಿ ಮೆಳ್ತಾ. ಜಾಲ್ಯಾರೀ ಆಮ್ಚೆ ಮಧೆಂ ಆಜ್ ಪತ್ರ್‌ಕರ್ತ್ ನಾಂತ್, ಆಸ್ಲ್ಯಾರೀ ತಾಂಕಾ ಸಮುದಾಯಾಚ್ಯಾ ಪಕ್ಷೆನ್ ಬರಂವ್ಚೆಂ ಧಯ್ರ್ ನಾ. ಆಮ್ಚೆ ಮಧೆಂ ಐಎಎಸ್ ಅಧಿಕಾರಿ ನಾಂತ್, ಆಮ್ಚಿಂ ಭುರ್ಗಿಂ ಕೆನಡಾ ವೆತಾತ್, ಪಾಟಿಂ ಯೇನಾಂತ್! ಲಾಯಿಕಾಂನಿ ಏಕ್ ಆಸ್ಪತ್ರ್, ಶಿಕ್ಪಾಸಂಸ್ಥೊ ಕೆಲ್ಲೊ ನಾ, ಕಿತ್ಲೆಂ ಶಿಕ್ಲ್ಯಾರೀ ವಚೊನ್ ಘೊಳ್ಚೆಂ ಪಾದ್ರಿ – ಮಾದ್ರಿಂಚ್ಯಾ ಹಾತಾಖಾಲ್, ಸಗ್ಳೆಂ ಕೆಲ್ಲೆಂ ಪಾದ್ರಿ ಆನಿ ಮಾದ್ರಿಂನಿ!
ಪಾದ್ರಿ ಆನಿ ಮಾದ್ರಿಂಚ್ಯಾ ಆಡಳ್ತ್ಯಾಖಾಲ್ ಕ್ರೀಸ್ತಾಂವ್ ಸಂಸ್ಥೆ, ಇಗರ್ಜೊ, ಹೊಲಾಂ, ಇಸ್ಕೊಲಾಂ, ಆಸ್ಪತ್ರ್ಯೊ ಆಸ್ಲೆಲ್ಯಾನ್ ತಿಂ ಎದೊಳ್ ಶಾಬೀತ್ ಉರ್ಲ್ಯಾಂತ್, ವಾಡ್ಲ್ಯಾಂತ್ ಮ್ಹಣ್ಚ್ಯಾಕ್ ದುಸ್ರೆಂ ಉತರ್ ನಾ. ಲಾಯಿಕಾಂಚ್ಯಾ ಹಾತಾಂತ್ ಸದ್ದ್ಯಾಕ್ ಉರ್ಲಾಂ ಮ್ಹಳ್ಯಾರ್ ಏಕ್ ಎಂ.ಸಿ.ಸಿ. ಬ್ಯಾಂಕ್ ಮಾತ್. ಆಜ್ ಕೊಡ್ಯಾಳಾಂತ್ ಏಕ್ ದೀಶ್ಟ್ ಉಬಾರ್ನ್ ಪಳಯ್ಲ್ಯಾರ್ ಲಾಯಿಕ್ ಕ್ರೀಸ್ತಾಂವ್ ಆಪ್ಲಿ ಆಸ್ತ್ ಸಗ್ಳಿ ಅಕ್ರಿಸ್ತಾಂವ್ ಬಿಲ್ಡರಾಂಕ್ ವಿಕುನ್ ಕೆನಡಾ ಗೆಲ್ಯಾತ್. ಆತಾಂ ಕಾಂಯ್ ಆಸ್ತ್ ಉರ್ಲ್ಯಾ ಜಾಲ್ಯಾರ್ – ಇಗರ್ಜ್, ಇಸ್ಕೊಲಾಂ ಆನಿ ಕೊವೆಂತಾಂನಿ ಮಾತ್.
ಆತಾಂ ಪಾದ್ರಿ – ಮಾದ್ರಿಂನಿ, ಆಸ್ತ್ – ಸಂಸ್ಥೆ ಸಾಂಬಾಳ್ಳ್ಯಾತ್ ಮ್ಹಳ್ಳೆಫರಾ ಲಾಯಿಕಾಂನಿ ಕಿತೆಂಚ್ ಕರುಂಕ್ ನಾ – ಮ್ಹಣ್ಚೆಂ ಚುಕಿಚೆಂ. ಪಾದ್ರಿ – ಮಾದ್ರಿಂನಿ ಕಾಂಯ್ ಹೆ ಸಂಸ್ಥೆ ತಾಂಚ್ಯಾ ಘರಾಥಾವ್ನ್ ದುಡು ಹಾಡ್ನ್ ಬಾಂದುಂಕ್ ನಾಂತ್. ಆಮ್ಚ್ಯಾ ಪುರ್ವಜಾಂನಿ ದಾನ್ ದಿಲ್ಲ್ಯಾ ಜಾಗ್ಯಾರ್ ಆನಿ ಡೊನೆಶನಾಚೆರ್ ಹೆ ಸಂಸ್ಥೆ ಉಭೆ ಜಾಲ್ಯಾತ್, ತೆಂ ವಿಸ್ರೊಂಕ್ ನಜೊ. ಆತಾಂ ಜೆ ಪಾದ್ರಿ – ಮಾದ್ರಿ ಜಾಲ್ಯಾತ್, ತಾಂಚ್ಯಾಚ್ ಆವಯ್ – ಬಾಪಯ್ನ್, ಆಜ್ಯಾ – ಆಜಿಯೆನ್ ವ್ಹಡ್ ದಾನ್, ದೆಣ್ಗಿ ಹ್ಯಾ ಸಂಸ್ಥ್ಯಾಂಕ್ ದಿಲ್ಯಾ ಜಾಂವ್ಕ್ ಪುರೊ. ಆಜ್ ಧರ್ಮಿಕ್ ವ್ಹಡಿಲಾಂ ಹೆ ಸಂಸ್ಥೆ ಬರ‍್ಯಾನ್ ಸಾಂಬಾಳುನ್ ಆಸಾತ್. ಜರಿ ಹೆ ಸಂಸ್ಥೆ ಲಾಯಿಕಾಂಚ್ಯಾ ಹಾತಾಂತ್ ದಿಲ್ಲೆ ಜಾಲ್ಯಾರ್, ಕೆದಾಳಾಗೀ ದಿವಾಳಿ ಜಾವ್ನ್ ವೆತೆ ಮ್ಹಣ್ಚ್ಯಾಕ್ ಮ್ಹಾಕಾ ತರೀ ದುಬಾವ್ ನಾ.
ಹಿ ಜಾಲಿ ಸಂಸ್ಥ್ಯಾಂಚಿಂ ಗಜಾಲ್ – ಆತಾಂ ಪತ್ರ್‌ಕರ್ತಾಂಚ್ಯಾ, ಐಎಎಸ್, ಐಪಿಎಸ್ ಗಜಾಲಿಕ್ ಯೆವ್ಯಾಂ.
ಆಮ್ಚ್ಯಾ ಸಯ್ರ್ಯಾಂಕ್ ಏಕ್ ವೆದಿ ಆನಿ ಮೈಕ್ ಮೆಳೊಂಕ್ ನಾ, ‘ಆಮ್ಚೆ ಮಧೆಂ ಐಎಎಸ್ ನಾಂತ್, ಐಪಿಎಸ್ ನಾಂತ್’ – ಮ್ಹಣ್ ರಡ್ಣೆಂ ರುದಾನ್ ಆನಿ ದಾಂತ್ ಕಿರ್ಲೊಣಿ ಕರ್ಚೆಂ ಆತಾಂ ಸದಾಂಚೆಂ ಜಾಲಾಂ. ಫಿಲೊಮೆನಾ ಬಾಯೆನ್ ಉಲಯ್ತಾ, ಉಲಯ್ತಾನಾ ಖಾನೆಸ್‌ಮಾರಿ ಸಯ್ತ್ ಕಾಡ್ಲಿ. ಕಿತ್ಲೆ ಆಸಾತ್ ? ಕಿತ್ಲೆ ಆಸಾತ್ ? ತುಮಿ ಸಾಂಗಾ . . . ಮ್ಹಣ್ ಸುಬೇದಾರಿಚ್ ಸುರು ಕೆಲಿ. ಆತಾಂ ಮ್ಹಜೆಂ ಪ್ರಶ್ನ್, ಬಾಯೇ . . . ತುಮ್ಕಾಂ ಐಎಎಸ್, ಐಪಿಎಸ್, ಪತ್ರ್‌ಕರ್ತ್ ಕಿತ್ಯಾಕ್ ಜಾಯ್ ? Why ?
ಹ್ಯಾ ಸವಾಲಾಕ್ ತುಮ್ಚೆಲಾಗಿಂ ಜಾಪ್ ಆಸಾ ತರ್ ದಯಾಕರುನ್ ದಿಯಾ. ಪುಲಿಸ್ ಕಮಿಶನರ್ ಕಿತೆಂ ಸ್ಟೇಶನಾಂತ್ ಯೇವ್ನ್ ಬಸೊನ್ ಚಾರ್ಜ್ ಶೀಟ್ ಬರಯ್ತಾವೆ ? ಕಲೆಕ್ಟರ್ ಕಿತೆಂ ಕೇಸ್ ವರ್ಕರ್ ಜಾವ್ನ್ ಫೈಲ್ ಫುಟ್ ಅಪ್ ಕರ್ತಾವೆ ? ಅಧಿಕಾರಿ ಕಿತ್ಲೋಯ್ ವ್ಹಡ್ ಜಾಂವ್, ತಾಣೆ ವಿಚಾರಿಜೆ ಥಳಾಮಟ್ಟಾಚ್ಯಾ ಶಿಬಂದೆಕ್ ನಯ್ ? ಹೆಂ ರಾಜಾಂವ್ ಲೋಬೊಬಾಯೆಕ್ ಕಳಿತ್ ನಾ ಮ್ಹಣ್ ನ್ಹಯ್. ತೀಚ್ ಆಪ್ಲ್ಯಾ ಭಾಶಣಾಂತ್ ದಾಕ್ಲೊ ದೀವ್ನ್ ಮ್ಹಣಾಲಿ ; ಸಗ್ಳೆ ಪಾದ್ರಿ – ಸಿಸ್ಟರಾಂ ಕನಕರಾಜಾಲಾಗಿಂ ವೆತಾಲಿಂ, ಮ್ಹಜೆಲಾಗಿಂ ಯೇನಾತ್ಲಿಂ ಮ್ಹಣ್! ಆತಾಂ, ಕಾಮಾಂ ಸಗ್ಳಿಂ ಕನಕರಾಜಾಲಾಗಿಂ ಜಾತಾತ್ ಜಾಲ್ಯಾರ್, ಆಮ್ಕಾಂ ಕನಕರಾಜ್ ಪುರೊ ನ್ಹಯ್ವೆ? ಲೋಬೊ ಬಾಯ್ . . . ಕಿತ್ಯಾಕ್ ಜಾಯ್ ? Why ?
ರಾಜಾಂವ್ ಸ್ಪಶ್ಟ್ – ಖಂಯ್ಚ್ಯಾಯ್ ಕಮಿಶನಾರಾಕ್ ಲಾಟಿ ಘೆವ್ನ್ ಚಾರ್ಜ್ ಕರುಂಕ್ ಜಾಯ್ನಾ. ರೆವೆನ್ಯೂ ಇನ್ಸ್‌ಫೆಕ್ಟರಾಚೆಂ ಕಾಮ್ ಕಲೆಕ್ಟರಾನ್ ಕರುಂಕ್ ಜಾಯ್ನಾ. ಹಿ ವಾಸ್ತವಿಕ್ ಗಜಾಲ್ ಸಮ್ಜಾಲ್ಲಾ ಹೆರ್ ಸಮುದಾಯಾಚ್ಯಾಂನಿ ಥಳಾಹಂತಾರ್ ತಾಂಚೆ ಮನಿಸ್ ಆಸ್ಚೆಪರಿಂ ಪಳಯ್ಲಾಂ. ಪ್ರಾಮಾಣಿಕ್ಪಣಿಂ ಸಾಂಗ್ತಾಂ – ಮಂಗ್ಳುರಿ ಕ್ರೀಸ್ತಾಂವ್ ಸಮಾಜೆಚ್ಯಾ ಸ್ವ – ಘೋಷಿತ್ ಮುಕೆಲ್ಯಾಂನಿ ‘ಆಮ್ಕಾಂ ಐಎಎಸ್ ಜಾಯ್, ಐಪಿಎಸ್ ಜಾಯ್’ ಮ್ಹಣ್ ರುಂಬಾ ನಾಚ್ಚೆಪರಿಂ ಹೆರ್ ಖಂಯ್ಚ್ಯಾಯ್ ಸಮುದಾಯಾಚ್ಯಾಂನಿ ನಾಚ್ಚೆಂ ಹಾಂವೆ ಎದೊಳ್ಚ್ಯಾಕ್ ಪಳೆಂವ್ಕ್ ನಾ. ಬದ್ಲಾಕ್ ತೆ ಫ್ಯಾಮಿಲಿ ಬಿಜ್ನೆಸಾಚೆರ್ ಗುಮಾನ್ ಕೇಂದ್ರಿತ್ ಕರುನ್ ಆಸಾತ್. ಥಳಾಹಂತಾಚೆ ಸರ್ಕಾರಿ ಮುಲಾಜಿಮ್ ಜಾವ್ನ್ ಸೆವಾ ಸುರು ಕರುನ್ ವಾಡೊನ್ ವೆತಾತ್.
ಆಮ್ಚ್ಯಾ ಸೊ ಕೊಲ್ಡ್ ಮುಕೆಲ್ಯಾಂಕ್ ಹ್ಯೊ ಸೂಕ್ಷ್ಮ್ ಗಜಾಲಿ ಸಮ್ಜಾನಾಂತ್. ಅಜೂನ್ ತೆ ಭ್ರಮಿದೆಂತ್ ಆಸಾತ್ ಆನಿ ಹಾತಾಕ್ ಮೈಕ್ ಮೆಳ್‌ಲ್ಲೆಂಚ್ ಐಎಎಸ್, ಐಪಿಎಸ್ ಮ್ಹಣ್ ಏಕ್ ಲೇಕ್ ಬಡ್ಬಡೊಂಕ್ ಸುರು ಕರ್ತಾತ್. ಫಿಲೊಮೆನಾ ಬಾಯೆನ್‌ಯೀ ಕೆಲೆಂ ಹೆಂಚ್. ಆತಾಂ ಬಾಯೆ – ತುಮ್ಕಾಂ ಐಎಎಸ್ ಜಾಯ್, ಐಪಿಎಸ್ ಕಿತ್ಯಾಕ್ ಜಾಯ್ ? Why ? ಹ್ಯಾ ದೆಶಾಂತ್ ಐಎಎಸ್ ಅಧಿಕಾರಿ ಆಸ್ಚೆಚ್ ಉತ್ತರ ಪ್ರದೇಶ್ ಅನಿ ಬಿಹಾರಾಚೆ. ತಾಂಚೊ ಗಾಂವ್ ಆಜ್ ಕಿತ್ಲೊ ಉದ್ದಾರ್ ಜಾಲಾ? ಟ್ರೇನಿಂಗ್ ಜೊಡುನ್ ಕಿತ್ಲೆ ಅಧಿಕಾರಿ ಸ್ವಂತ್ ಗಾಂವಾಕ್ ಸೆವಾ ದೀಂವ್ಕ್ ವೆತಾತ್? ಲೇಕ್ ದಿವ್ಯೆತ್‌ಗೀ ?
ಖಂಯ್ಚ್ಯಾ ರಾಜ್ಯಾಂನಿ ತಾಂಚ್ಯಾ ಭುರ್ಗ್ಯಾಂಕ್ ಬರೆಂ ಶಿಕಪ್ ಮೆಳ್ತಾ ತೋ ರಾಜ್ಯ್ ಸೊಧುನ್ – ಚಡಾವತ್ ಅಧಿಕಾರಿ ತ್ಯಾ ರಾಜ್ಯಾಕ್ ವೆತಾತ್ ಆನಿ ಥಂಯ್ ರಾಯಾಪರಿಂ ಜಿಯೆತಾತ್. ದೆಕುನ್ ಐಎಎಸ್, ಐಪಿಎಸ್ ಬದ್ಲಾಕ್ ಪೊಲಿಸ್ ಪೆದೊ, ತಲಾಟಿ ಜಾಯ್ ಮ್ಹಣಾ. ಸಮಾಜ್ ಸಕಯ್ಲ್ ಥಾವ್ನ್ ವಯ್ರ್ ಬಾಂದುನ್ ವರ್ಚಿ, ವಯ್ರ್ ಥಾವ್ನ್ ಸಕಯ್ಲ್ ನ್ಹಯ್. ‘ರೋಮ್ ರಾಜ್ಯ್’ ಕಲ್ಪನ್ ಪವಿತ್ ಸಭೆಂತ್ ಚಲ್ತಾ ಜಾಂವ್ಕ್ ಪುರೊ; ಭಾರತಾಂತ್ ಚಲಾನಾ – ಹೆಂ ಉತರ್, ಫಿಲೊಮೆನಾ ಬಾಯೆನ್ ಆನಿ ಹೆ ಉಪ್ರಾಂತ್ ಆಮ್ಕಾಂ ಐಎಎಸ್, ಐಪಿಎಸ್ ಜಾಯ್ ಮ್ಹಣ್ ಉಲವ್ನ್, ಚಾರ್ ತಾಳಿಯೊ ಆಪ್ಣಾಯ್ಜೆ ಮ್ಹಣ್ ಚಿಂತ್ಲೆಲ್ಯಾಂನಿ ಗಾಂಟ್ ಬಾಂದುನ್ ಉಡಾಸಾಂತ್ ದವರ‍್ಚೆಂ. ‘ಜಾಯ್ , ಜಾಯ್’ ಮ್ಹಣ್ತಾನಾ, ‘ಕಿತ್ಯಾಕ್ ಜಾಯ್’ ಮ್ಹಣ್ ಸ್ಪಶ್ಟ್ ಸಾಂಗಾ. ಅಧಿಕಾರಿ ಕಿತ್ಲೊಯ್ ವ್ಹಡ್ ತೋ ಜಾಂವ್, ಅಕೆರಿಕ್ ತಾಕಾ ಮಂತ್ರಿನ್, ಥಳೀಯ್ ಶಾಸಕಾನ್ ಸಾಂಗ್‌ಲ್ಲೆಂ ಆಯ್ಕಾಜೆಚ್ ಪಡ್ತಾ. ಪತಿ ಎಕಾ ಆವ್ಧೆಕ್ ಶಾಸಕ್ ಜಾಲಾ ಜಾಲ್ಲ್ಯಾನ್ ಫಿಲೊಮೆನಾ ಬಾಯೆಕ್ ಹೆಂ ಕಳಿತ್ ನಾ ಮ್ಹಣೊಂಕ್ ಜಾಯ್ನಾ.
ಹಿ ಜಾಲಿ, ಐಎಎಸ್, ಐಪಿಎಸ್ ಜಾಯ್, ಪತ್ರ್‌ಕರ್ತ್ ಜಾಯ್ – ಮ್ಹಣ್ಚ್ಯಾ ಮಾಗ್ಣ್ಯಾಚಿ ಪ್ರಾಯೋಗಿಕ್ ಕೂಸ್.
ಆತಾಂ ಸೈದ್ದಾಂತಿಕ್ ಕುಶಿಕ್ ಯೆವ್ಯಾಂ. ತುಮ್ಕಾಂ ತುಮ್ಚ್ಯಾಚ್ ಧರ್ಮಾಚೆ, ಜಾತಿಚೆ, ಕಮಿಶನರ್, ಕಲೆಕ್ಟರ್, ಪತ್ರ್‌ಕರ್ತ್ – ಕಿತ್ಯಾಕ್ ಜಾಯ್ ? ಹ್ಯಾ ತುಮ್ಚ್ಯಾ ಮಾಗ್ಣ್ಯಾಚೊ ಮತ್ಲಬ್ ತರೀ ಕಿತೆಂ? ತುಮ್ಚ್ಯಾ ಜಾತಿಚೊ, ತುಮ್ಚ್ಯಾ ಧರ್ಮಾಚೊ ಮನಿಸ್ ಅಧಿಕಾರಾರ್ ಆಸ್ಲ್ಯಾರ್ ತುಮ್ಚಿಂ ಕಾಮಾಂ ಸಲೀಸಾಯೆನ್ ಜಾತಾತ್. ತುಮ್ಕಾಂ favor ಕರ್ತಾತ್, ಪತ್ರಾಂನಿ ತುಮ್ಚೆ ಪಕ್ಶೆನ್ ವರ್ದ್ಯೊ ಛಾಪ್ತಾತ್, ತುಮಿ ಚುಕಿ ಕೆಲ್ಯಾರ್ ತೆ ಧಾಂಪುನ್ ವ್ಹರ್ತಾತ್ ಮ್ಹಣ್ ನಂಯ್ಗೀ – ತುಮ್ಚೊ ಸುಪ್ತ್ ಅತ್ರೆಗ್ ?
ಹೆಂ ಚಿಂತಪ್ ಸ್ವಾರ್ಥಿ, ಕೊಮುವಾದಿ ಆನಿ ಸಮಾಜಿಕ್ ನ್ಯಾಯಾವಿರೋದ್ ನಂಯ್ಗೀ ?
ಥೊಡ್ಯಾಚ್ ದಿಸಾಂ ಆದ್ಲಿ ಗಜಾಲ್ ಪಳಯಾ – ಮಂಗ್ಳುರ್ ದಿಯೆಸೆಜಿನ್ ಚಲಂವ್ಚ್ಯಾ ಎಕಾ ಶಿಕ್ಪಾಸಂಸ್ಥ್ಯಾಂತ್ ವಿದ್ಯಾರ್ಥಿಂನಿ ಬುರ್ಖಾ ಘಾಲ್ನ್ ಐಟಂ ಡಾನ್ಸ್ ಕೆಲೊ. ಆಮ್ಚೆಚ್ ಪತ್ರ್‌ಕರ್ತ್ ಆಸ್‌ಲ್ಲೆ ಜಾಲ್ಯಾರ್ ಖಬರ್ ಫಾಯ್ಸ್ ಜಾಯ್ನಾತ್ಲೆಪರಿಂ ಪಳವ್ಯೆತೆಂ ಮ್ಹಣ್ಚೆಂಗಿ ತುಮಿ ? ಹಿ ಖಬರ್ ಏಕ್ ಪತ್ರ್‌ಕರ್ತ್ ಜಾವ್ನ್ ಹಾಂವೆ ವಾ ಕೊಣೆಂಯ್ ಕಿತ್ಯಾಕ್ ಧಾಂಪುನ್ ವ್ಹರಿಜೆ ? ಪೊರ್ಚ್ಯಾ ಪೋರ್ ಮಂಗ್ಳುರಾಂತ್ ಕುಕ್ಕರ್ ಬೊಂಬ್ ಫುಟ್ಲಾ – ಕ್ಯಾಂಪಸಾಂತ್ ಇತ್ಲಿಂ ಸರ್ವ್ ಅತರ್ವಣಾಂ ಜಾತಾನಾ ಸಂಸ್ಥ್ಯಾಚೊ ನಿರ್ದೇಶಕ್ ಖಂಯ್ ನಿದೊನ್ ಪಡ್‌ಲ್ಲೊ? ತಾಕಾ ಜವಾಬ್ದಾರಿ ಮ್ಹಳ್ಳಿ ನಾ? ಫಕತ್ ವಿದ್ಯಾರ್ಥಿಂಕ್ ಸಸ್ಪೆಂಡ್ ಕೆಲ್ಯಾರ್ ಪುರೊ ? ದಿಯೆಸೆಜಿಚೊ ವ್ಹಡಿಲ್ ಕಿತ್ಯಾಕ್ ಆತಾಂ ನುತ್ತಾ ಬಸ್ಲಾ?
ಫಿಲೊಮೆನಾ ಲೋಬೊನ್ ಆಪ್ಲ್ಯಾ ಉಲವ್ಪಾಂತ್ ಏಕ್ ತಾರ್ಕಿಕ್ ಗಜಾಲ್ ಸಾಂಗ್ಲಿ. ಆಮ್ಚ್ಯಾ ಇಗರ್ಜಾಂನಿ ‘ಹಾತ್ ಧರ್ನ್ ಚಲಂವ್ಚೆಂ’ (Hand Holding) ಚಡ್ ಜಾಲಾಂ ದೆಕುನ್ ಆಮ್ಚೆ ಯುವಜಣ್ ಶೆಳೆಲ್ಯಾತ್. ಕೊಣಾಚ್ಯಾ ಭುರ್ಗ್ಯಾಂಕ್ ಹಾತ್ ಧರ್ನ್ ಚಲಯ್ತಾತ್ ? ಫಕತ್ ವ್ಹಡಾಂಗೆಲ್ಯಾ. – ದುಬ್ಳ್ಯಾಂಕ್ ಆತಾಂಯ್ ಶೆಣ್ಕುಟಾಂಚ್ ಗತ್! ಆಸುಂ.
ಮಂಗ್ಳುರಿ ಕ್ರೀಸ್ತಾಂವ್ ಮ್ಹಣ್ಚಿ ಮಂ. ಕ್ರಿ. ಸಮಾಜ್ ಉದ್ದಾರ್ ಜಾಯ್ಜೆ ತರ್ – ಇಗರ್ಜೆಂತ್ ಫಕತ್ ಮಾಗ್ಣೆಂ – ರಜಾರ್, ವೋಲ್ – ಕುಮ್ಗಾರ್, ರೆಸ್ಪೆರ್ – ಮೋರ್ನ್ – ಇತ್ಲೆಂ ಮಾತ್ ಚಲಜೆ. ಹೆ ಅಟ್ರಾ ಆಯೋಗ್, ಎಕ್ವಿಸ್ ಆಯೋಗ್, ವೈಸಿಎಸ್, ಐಸಿವೈಎಮ್ – ಸಗ್ಳೆಂ ಬರ್ಖಾಸ್ತ್ ಕರಿಜೆ. ಸರ್ವಾಪ್ರಾಸ್ ಪಯ್ಲೆಂ ಕಥೊಲಿಕ್ ಸಭಾ ವಿಸರ್ಜನ್ ಕರಿಜೆ. ಫಿರ್ಗಜ್ ಪತ್ರಾಂ, ದಿಯೆಸೆಜಿಚಿಂ ಪತ್ರಾಂ – ಫಕತ್ ನ್ಯೂಸ್ ಲೆಟರ್ ಜಾವ್ನ್ ಮಾತ್ ಉರಜೆ. ಸ್ಥನ್ – ಸ್ಖಲನ್ ಮ್ಹಳ್ಳೆ ಸಬ್ದ್ ಆಸ್ಲ್ಯಾರೀ ‘ಕಾಣಿ’ ಫಾಯ್ಸ್ ಕರಿನಾ ಮ್ಹಣ್ಚ್ಯಾ ಹ್ಯಾ ನಿತಳ್ – ನಿರ್ಮಳ್ ಪತ್ರಾಂನಿ ಸಾಹಿತ್ಯಾಕ್ ಹಾತ್ ಲಾಂವ್ಕ್ ಯೇಂವ್ಕ್ ನಜೊ. ಸಾಹಿತ್ಯ್ – ಸಂಸ್ಕೃತಿ ಸ್ವತಂತ್ರ್ ವಾಡೊಂಕ್, ಫುಲೊಂಕ್ ಸೊಡಿಜೆ. ಆಮ್ಚ್ಯಾ ಸಮಾಜಾಚ್ಯಾ ಭುರ್ಗ್ಯಾಂನಿ ತಾಂಚಿ ಸಕತ್, ತಾಲೆಂತಾಂ, ದೆಣಿಂ ಇಗರ್ಜೆ ಕಂಪಾಂವ್ಡಾಂತ್ ಪುರ್ಚ್ಯಾ ಬದ್ಲಾಕ್- ಸಮಾಜೆಚ್ಯಾ ಮುಕೆಲ್‌ವ್ಹಾಳ್ಯಾಚ್ಯಾ ಸಂಘಟನಾಂನಿ ನಿವೇಶ್ ಕರುಂಕ್ ಶಿಕಜೆ. ತವಳ್ ಸಮುದಾಯ್ ಉದ್ದಾರ್ ಜಾತಾ – ಸಮಾಜ್ ಉದ್ದಾರ್ ಜಾತಾ!
ಭುರ್ಗ್ಯಾಂನೋ ಆನಿ ಯುವಜಣಾಂನೋ, ಇಗರ್ಜೆ ಕಂಪಾಂವ್ಡ್ ಮ್ಹಳ್ಳ್ಯಾ ಬಂದ್ಕಣೆಚ್ಯಾ ಜನೆಲಾಂತ್ಲ್ಯಾನ್ ಏಕ್ ದೀಶ್ಟ್ ಉಬಾರ್ನ್ ಭಾಯ್ರ್ ಪಳಯಾ – ಸಮಾಜಾಂತ್ ಸರ್ಕಾರಿ, ಬೆಸರ್ಕಾರಿ ಕಿತ್ಲಿಶಿಂ ಸಂಘಟನಾಂ ಆಸಾತ್. ಯುವಕ ಮಂಡಳ, ಮಹಿಳಾ ಮಂಡಳ, ಸಾಹಿತ್ಯ ಪರಿಷತ್ತು, ರೆಡ್ ಕ್ರೊಸ್ – ಹಾಂತು ಸರ್ವ್ ಧರ್ಮಾಂಚೊಂ, ಭಾಶೆ – ಸಂಸ್ಕೃತೆಚೊ ಲೋಕ್ ಆಸಾ. ತಾಂತು ಸಾಂದೆ ಜಾಯಾ, ಮುಕೆಲ್ಪಣ್ ಘೆಯಾ. ಅಶೆಂ ಕೆಲ್ಯಾರ್ ತುಮ್ಚಿ ದೀಶ್ಟ್ ವಿಸ್ತಾರ್ ಜಾತಾ ಮಾತ್ ನಯ್, ಭಂವ್ತಿ ಸಮಾಜ್ ಕಿತೆಂ? ಕಶಿ ಕಾಮ್ ಕರ‍್ತಾ? ಮ್ಹಳ್ಳೆಂ ತುಮ್ಕಾಂ ಕಳ್ತಾ. ಅಪಾಪಿಂ ತುಮಿ ‘ಗಣ್ಣೆಂ ಕರುಂಕ್’ ಶಿಕ್ತಾತ್. ಐಎಎಸ್, ಐಪಿಎಸ್‌‌ಯ್ ಉರ್ಭೆನ್ ಜಾತಾತ್. ಕುತ್ತರೆ ಭಿತರ್ ಘಾಲ್ನ್ ಪೊಸ್‌ಲ್ಲ್ಯಾ ಕುಂಕ್ಡಾಪಿಲಾಂಕ್ ಎಕಾಣೆಂ ಭಾಯ್ರ್ ಸೊಡ್ಲ್ಯಾರ್ ತಾಂಕಾ ಘೊಣ್ ವಾವಯ್ತಾಲಿ. ಕಿತ್ಯಾಕ್ ಮ್ಹಳ್ಯಾರ್ ಘೊಣ್ ಮ್ಹಳ್ಯಾರ್ ಕಿತೆಂ? ಘೊಣಿ ಥಾವ್ನ್ ಬಚಾವ್ ಜಾಂವ್ಚೆಂ ಕಶೆಂ ಮ್ಹಳ್ಳೆಂಚ್ ತಾಂಕಾ ಕಳಿತ್ ಆಸಾನಾ.
ಕೊಣಾಚ್ಯಾ ಭುರ್ಗ್ಯಾಂಕ್ ಕೆನಡಾ, ಅಮೆರಿಕಾ ವಚೊಂಕ್ ಆಸಾ – ತಿಂ ವಚುಂ. ಕೆನಡಾ ವೆತಾನಾ ತಾಂಕಾ ಸಂತೊಸಾನ್ ಧಾಡುನ್ ದಿಯಾ. ಲೊಬಾಗೆಲ್ಯಾಂ ಪರಿಂ ರಡಾನಾಕಾತ್. ಧಾಡ್ತಾನಾ, ಏಕ್ ಕಾನ್ ಉತರ್ ಸಾಂಗೊನ್ ಧಾಡಾ – ಕೆನಡಾ ಗೆಲ್ಯಾ ಉಪ್ರಾಂತ್ ಥಂಯ್ಸರೀ ಫಕತ್ ಲೋಬಾಮ್ ಜಾವ್ನ್ ಉರಾನಾಕಾ, ಸುನಕ್ ವಾ ಹ್ಯಾರೀಸ್ ಜಾ! ಅಶೆಂ ಆಮ್ಚಿಂ ಭುರ್ಗಿಂ ಕೆನಡಾಂತ್, ಅಮೆರಿಕಾಂತ್ ಸುನಕ್, ಹ್ಯಾರೀಸ್ ಜಾಲ್ಯಾರ್ ಏಕ್ ಐಎಎಸ್ ಸೊಡ್ಯಾಂ , ಸಮುದಾಯಾಕ್ / ಸಮಾಜಾಕ್ ಪನ್ನಾಸ್ ಐಎ‌ಎಸಾಂಚೊ ಪವರ್ ಯೆತಾಲೊ.
ಜ್ಯಾ ದಿಸಾ ಫಿರ್ಗಜೆ ಹಂತಾರ್ ಆಸ್ಚೆ ಸಭಾ, ಸಂಗಟನಾಂ ವಿಸರ್ಜನ್ ಜಾತಾತ್, ತ್ಯಾ ದಿಸಾ ಆಮ್ಚೆ ಯುವಜಣ್, ಲಾಯಿಕ್ ಸ್ವತಂತ್ರ್ ಜಾತಾತ್! ಫಾಂಟೆ ಸೊಡ್ನ್ ಪಾಕಾಟ್ಯಾಂಚ್ಯಾ ಬಳಾರ್ ಉಬೊಂಕ್ ಶಿಕ್ತಾತ್ !! ಆನಿ ತ್ಯಾ ದಿಸಾ ಮಂಗ್ಳುರಿ ಕ್ರಿಸ್ತಾಂವ್ ಸಮಾಜ್, ಸತ್ತ್ ಸಾಂಗ್ತಾಂ – ಉದ್ದಾರ್ ಜಾತಾ! ತವಳ್ ಪರ್ಯಾಂತ್ ಆರ್ಚ್ ಬಿಸ್ಪ್ ಮಚಾದೋ ಜುವಾಂವ್ ಬಾವ್ತಿಸಾಪರಿಂ ಅರಣ್ಯಾಂತ್ ಬೋಬ್ ಮಾರುನ್ ಆಸುಂದೀ. ಆಮಿ ಸಗ್ಳೆ ಗಾಡ್ ನಿದೆಂತ್ ಅಸ್‌ಲ್ಲೆಪರಿಂ ನಟನ್ ಕರ್ಯಾಂ!
– ಎಚ್ಚೆಮ್, ಪೆರ್ನಾಲ್
The writer while being appreciative of the selfless service of the clergy in building the institutions, gives a clarion call to the community to come out of the clutches or the cocoon of the Church and integrate itself in the mainstream. Commendable! However his radical suggestion to dissolve the church led associations may not be a practical one as pointed out by one of the priest commentators here. The need of the hour is to overhaul the working strategies of these associations which can plan to have many pro- society events in collaboration with the mainstream associations.
Another observation of the writer is instead of encouraging the community members to attain top civil service positions, it’s better get bottom level positions. The reason he gives is that top cadre officers can not do the job of lower cadre themselves. He is partially right. In one instance a person approaches DCP to complain against a fraud builder and thecDCP orders filing FIR but the local police inspector doesn’t follow the instructions and refuses and finally he is supported by the commissioner. At this instance DCP an IPS officer expresses his helplessness. It’s a different matter finally the court directs the police to file FIR. So the point is just by occupying a few top cadre positions, the community may not going get benefitted in a big way. Instead the youth need to be encouraged to strive for govt jobs of all levels right from the high school level.
Further it’s a wrong notion that if we have our community advocates they will stand up for the community cause. During the Church attack, how many of our advocates selflessly fought to release the community youth imprisoned ?
Its unfortunate that some community leaders such as govt officers/ political representatives or advocates forget their roots and refuse to help financially weaker and downtrodden people from the community.
ಥೊಡೆ ಅಮ್ಚೆಂ ಚ್ ರಾಜಕೀಯ್ ಫುಢಾರಿ ಆಸಾತ್ ವಾ ವ್ಹಡ್ ವ್ಹಡ್ ಹುದ್ದ್ಯಾರ್ ಆಸಾತ್ ಹಾಚೆಂ ಲಾಗ್ಗಿ ಖಂಚೀಯ್ ಮಜತ್ ಇಸಾರ್ಲ್ಯಾರ್ ಅಮ್ಕಾಂಚ್ ಲಜ್ ಕಾಸೊಳಿಚೊ ಖೊಲೊ ಉಪ್ರಾಂತ್ ತೊಂಡಾಕ್ ಧರಿಜೆ ಪಡ್ತಾ ಹೊ ಮುಜ್ಹೊ ಅನ್ಭೊಗ್
On the positive side our community has better social , educational and economical opportunities for women compare to the other communities. It looks like more percentage of people in our community have moved to higher socioeconomic class than the other communities who were in same level few decades ago. It is also very important fact and some credit should go the community leadership.
And now we are talking about excellency. Excellency is much more challenging to achieve compared to moving from poor level to medium level (80/20 rule). The same strategy will not work here. It needs lot of skills , knowledge and continuous efforts towards it. Excellency is not just becoming IAS officers , it can be in anything. Excellency is loved and celebrated by all the people(Ex. Abdul Kalam) doesn’t matter which community that person belongs. As explained by the author, instead of talking about the why we don’t have IAS Officers or political leaders we should work on basic things and grow up. Moreover we have to think of merging ourselves with the society than thinking of just our community. We can even help people from other community who is making a genuine effort in achieving excellency. Because we belong to everyone and everyone belong to us.
ಫಿಲೊಮಿನಾ ಬಾಯೆಚಾ ಬಾಗ್ಲಾ ಬಾಯ್ರ್ ಆಸ್‌ಲ್ಲ್ಯಾ ಕನಕರಾಜ್ ವರ್ವಿಂ ಮಸ್ತ್ ಕಾಮಾಂ ಜಾತಾಲಿಂ. ಬೋವ್ ಬರೆಂಚ್ಚ್. ತೊ ಸಕ್ಡಾಂಕೀ ತೇಚ್ಚ್ ರಿತಿನ್ ಕುಮಕ್ ಕರ್ತಾಲೊಗೀ ಕಳಿತ್ ನಾಂ. ಪೂಣ್ ಪಾದ್ರಿ-ಮಾದ್ರಿಂಕ್ ಕುಮಕ್ ಕರ್ತಾಲೊ ಮ್ಹಣ್ ಸಾಂಗ್ಲೆಂ. ಹ್ಯಾ ಕನಕರಾಜಾಚಾ ಜಾಗ್ಯಾರ್ ಆನಿ ಕೊಣೀ ಆಸ್‌ಲ್ಲೆ ಯಾ ಆಸಾತ್ ತರ್ ಕಿತೆಂ ಘಡ್ತಾ ತೆಂ ಎಕಾ ದಾಖ್ಲ್ಯಾ ಮಾರಿಫಾತ್ ಸಾಂಗೊಂಕ್ ಖುಶಿ ವರ್ತಾ.
ವರ್ಸಾಂ ಆದಿಂ ಬೆಂಗ್ಳುರಾಂತ್ ಎಕ್ಲೊ ಜೆಜ್ವಿತ್ ಬ್ರದರ್ ಸರ್ಕಾರಿ ದಫ್ತರಾಂಕ್ ವೆತಾಲೊ ತಾಂಚಾ ಸಭೆಕ್ ಲಗ್ತಿ ಜಾಲ್ಲೆಂ ಕಾಮಾಂ ಕರ್ಚಾ ಖಾತಿರ್. ತಾಕಾ ಪ್ರಾಯ್‌ಯೀ ಜಾಲ್ಲಿ ಪೂಣ್ ಜಾಯಿತ್ತ್ಯಾ ಅಧಿಕಾರಿಂಚಿ ಬರಿ ವಳಕ್ ತಾಕಾ ಆಸ್‌ಲ್ಲಿ. ಪ್ರಾಯ್ ಜಾಲಿ ದೆಖುನ್ ಆಧಾರಾ ಖಾತಿರ್ ತಾಣೆಂ ಹಾತಾಂತ್ ಬೆತ್ ಘಂವ್ಚೆಂ ಆಸ್‌ಲ್ಲೆಂ. ತೊ ಅಧಿಕಾರಿಚಾ ಚೇಂಬರಾ ಭಿತರ್ ವೆತಾನಾ ಥಂಯ್ ಬಾಯ್ರ್ ದಾರ್ ರಾಕ್ವಾಲಿ ಆಸ್ತಾಲೊ. ದಾರ್ ರಾಕ್ವಾಲ್ಯಾನ್ ಹ್ಯಾ ಬ್ರದಾರಾಂಕ್ ಜಾಯಿತ್ತೆ ಪಾವ್ಟಿಂ ಪಳೆಯಿಲ್ಲೊ ತರ್‌ಯೀ ಬ್ರದರ್ ಬಿತರ್ ವೆತಾನಾ ರಾಕ್ವಾಲ್ಯಾನ್ ಬ್ರದರಾಕ್ ಹಾತ್ ಆಡ್ ದರ್ಚೊ ಆಸ್‌ಲ್ಲೊ. ಉದ್ದೇಶ್ ಬಿತರ್ ವಚಾಜೆ ತರ್ ಮಜ್ಯಾ ಹಾತಾರ್ ಇಲ್ಲೆಂ ಘಾಲ್. ತೊ ಪ್ರಾಯೆಚೊ ಬ್ರದರ್ ರಾಕ್ವಲ್ಯಾಚೊ ಹಾತೊ ಪಳೆವ್ನ್ ಪಳೆನಾತ್ಲ್ಯಾಬರಿಂ ಕರ್ನ್ ಆಪ್ಣಾಲಾಗಿಂ ಆಸ್‌ಲ್ಲ್ಯಾ ಬೆತಾನ್ ಹಾತ್ ಸಕಯ್ಲ್ ಕರ್ನ್ ಬಿತರ್ ವೆತಾಲೊ. ವರ್ಸಾಂ ಆದಿಂ ಬೀದರ್ ಡಿ.ಸಿ. ಲಾಗಿಂ ವೆತಾನಾ ಮ್ಹಾಕಾಯೀ ಅಸಲೊಚ್ಚ್ ಅನುಭಾವ್ ಜಾಲ್ಲೊ ಉಗ್ಡಾಸ್ ಯೆತಾ. ಹಾತ್ ಆಡ್ ದರ್ಚೆ ಜಾಯಿತ್ತೆ ಆಸಾತ್. ಕನಕರಾಜ್ ತಸಲೆ ಬೋವ್ ಉಣೆಂ.
ಫಿಲೊಮಿನಾ ಬಾಯೆನ್ ಐಎಎಎಸ್ ಜಾಯ್ ಮಳ್ಳಿ ಅಭಿಪ್ರಾಯ್ ಹಾಂವ್ ಆನ್ಯೇಕಾ ಕುಶಿ ಥಾವ್ನ್ ಪಳೆಂವ್ಕ್ ಖುಶಿ ವರ್ತಾಂ. ಆಮ್ಚಾಚ್ಚ್ ಸಮೂದಾಯಾಚೆ ಅಧಿಕಾರಿ ಆಸ್ತಿತ್ ತರ್ ಆಮ್ಕಾಂ ಉಪ್ಕಾರಾಕ್ ಪಡ್ತಿತ್ ಮ್ಹಳ್ಳೆಂ ಏಕ್ ಚಿಂತಾಪ್. ಹೆಂ ಚಿಂತಾಪ್ ಇತ್ಲ್ಯಾರ್‌ಚ್ಚ್ ರಾವ್ಲ್ಯಾರ್ ತೆಂ ಖಂಡಿತ್ ಸ್ವಾರ್ಥಿ ಚಿಂತಾಪ್. ಪೂಣ್ ಹೆ ಅಧಿಕಾರಿ ಸಕ್ಡಾಂಕೀ ಉಪ್ಕಾರಾಕ್ ಪಡ್ತಿತ್ ತರ್? ಗೊವ್ಳಿಕ್ ಪರಿಷದಿಚಾ ಭಾಂಗಾರೋತ್ಸವಚಾ ಕಾರ್ಯಾಚಾ ಸುರ್ವೆಕ್ ಮಿಸಾ ವೆಳಾರ್ ಕಾಡ್ದಿನಾಲ್ ಫಿಲಿಪ್ ನೇರಿನ್ ಎಡ್ಮಿರಲ್ ರೊನಾಲ್ಡ್ ಪಿರೇರಿಚಿ ಏಕ್ ದೇಖ್ ಉಲ್ಲೇಕ್ ಕೆಲಿ. ಹ್ಯಾ ಎಡ್ಮಿರಲಾನ್ ಕೆಲ್ಲೆಂ ಕಾಮ್ ಎಕಾ ಎಟೆಂಡಾರಾನ್ ಕೆಲ್ಲೆಂ ತರ್ ತಾಚೆಂ ಡಿಸ್ಮಿಸ್ಸಲ್ ಫಾಯ್ಲ್ ಕೆದಾಳಾಗೀ ಕ್ಲೋಸ್ ಜಾತೆಂ. ಪೂಣ್ ತೆಂ ಎಕಾ ಎಡ್ಮಿರಲಾನ್ ಕೆಲೆಂ ದೆಖುನ್ ತೊ ವೇಳ್ ಕರ್ನ್ ಆಯ್ಲೊ ತರೀ ಪ್ರಧಾನ್ ಮಂತ್ರಿಯೀ ಖಬರ್ ಕಾಡಿನಾಸ್ತಾನಾ ವಗೆಚ್ಚ್ ಬಸ್ಲಿ,
ಐಎಎಎಸ್ ಕರ್ಚೆಂ ಪ್ರೇತನ್ ಕೆಲೆಂ ತರ್ ಖಂಚಾಯೀ ಎಕಾ ಸಕಯ್ಲ್ಯಾ ವರ್ಗಾಚಾ ಕಾಮಾಂತ್ ಪುಣೀ ಭರ್ತಿ ಜಾಯ್ತ್. ಎಟೆಂಡರ್ ಕಾಮಾಕ್ ಅರ್ಜಿ ಗಾಲ್ಯಾರ್ ಮೆಳ್ಳ್ಯಾರ್ ಮೆಳ್ಳೆಂ. ನಾಂ ತರ್ ತಾಚಾ ಸಕಯ್ಲ್ ಹೆರ್ ಕಾಮಾಂ ನಾಂತ್. ಇತರ್ ಧರ್ಮಾಂತ್ಲೆ ಮನಿಸ್ ಪ್ರಾಮಾಣಿಕ್ ನಾಂತ್ ಮ್ಹಣ್ ನಂಯ್. ಬಿಲ್ಕುಲ್ ಆಸಾತ್. ಪೂಣ್ ಆಮ್ಚಿಂ ಮನ್ಶಾಂ ಜೆರಾಲ್ ರಿತಿನ್ ಸಾಂಗ್ಚೆಂ ತರ್ ಪ್ರಾಮಾಣಿಕ್. ದೆಖುನ್ಂಚ್ಚ್ ನಂಯ್ಗೀ ನಿವೃತ್ತ್ ಜಾಲ್ಲ್ಯಾ ಆಮ್ಚಾ ಮನ್ಶಾಂಕ್ ಹೆರ್ ಸಂಸ್ಥ್ಯಾಂನಿ ಪ್ರಿನ್ಸಿಪಾಲ್ ಯಾ ಮುಖೆಲ್ ಮೆಸ್ತ್ರಿ ಜಾಂವ್ಕ್ ಆಪಂವ್ಚೆಂ. ಜಾಯ್ನಾ ಮ್ಹಳ್ಯಾರೀ ’ನಾಂ ತುವೆಂ ಯೇವ್ನ್ ಕೇವಲ್ ಬಸ್ಲ್ಯಾರ್ ಪುರೊ’ ಮ್ಹಣ್ತಾತ್. ಆಮ್ಚಿಂ ಸಕ್ಕಡ್ ಮನ್ಶಾಂಯೀ ಪ್ರಾಮಾಣಿಕ್, ಬೆಭ್ರಷ್ಟಾಚಾರಿ ಮ್ಹಣ್ ಸಾಂಗಾನಾಂ. ಪೂಣ್ ಚಡಾವತ್ ಜಣಾಂ ಪ್ರಾಮಾಣಿಕ್ ತೆಂ ಜೆರಾಲ್ ರೀತಿನ್ ಜಾಯಿತ್ತೆ, ಜಾಂವ್ ಗಾಂವಾಂತ್ ಯಾ ಪರ್ಗಾವಾಂತ್ ಮಾನುನ್ ಘೆತಾತ್. ಅಶೆಂ ಆಸ್ತಾಂ ಆಮ್ಚಿಂ ಮನ್ಶಾಂ ಸಾರ್ವಜನಿಕ್ ವರ್ತುಲಾಂತ್ ಅಧಿಕಾರಿ ಜಾತಿತ್ ತರ್ ಸಾಮಾನ್ಯ್ ಮನ್ಶಾಂಕ್ ಬರಿ ಸೆವಾ ಮೆಳ್ತಾ ನಂಯ್ಗೀ? ತಿತ್ಲೆಂ ಮಾತ್ರ್ ನಂಯ್ ತಾಂಚೆಂ ಪ್ರಾಮಾಣಿಕ್ಪಣ್ ಹೆರಾಂಕ್ ಏಕ್ ಪಂಥಾಹ್ವಾನ್ ಜಾಯ್ನಾಗೀ?
ನಿತಿಖಾತಿರ್ ಝುಜ್ಚೆ ಆಮ್ಚೆ ವಕೀಲ್ ಆಸ್ತಿತ್ ತರ್? ದಬಾವಕ್ ವಳಗ್ ಜಾಯ್ನತ್‌ಲ್ಲೆ, ಲೊಂಚಾಚಾ ಅಶೆಕ್ ಭುಲನಾತ್ಲೆ ಬಗರ್ ಅಂತಸ್ಕರ್ನಾಚಾ ತಾಳ್ಯಾಕ್ ಕಾನ್ ದೀವ್ನ್ ನೀತ್ ದಿಂವ್ಚೆ ನಿತಿಕರ್ತ್ ಆಸ್ತಿತ್ ತರ್ ಆಮ್ಚಾ ಸಮಾಜೆಂತ್ ಅಸ್ಕತ್ಯಾಂಕ್ ಏಕ್ ಭರ್ವವೊ ಉದೆತಾ ನಂಯ್ಗೀ? ನಿಸ್ಪಕ್ಷ್ ರೀತಿನ್ ಚಲ್ಚೆ ಚುನಾವಣ್ ಅಧಿಕಾರಿ ಅಸ್ತಿತ್ ತರ್ ಖೊಟ್ಯಾ ಮನ್ಶಾಂನಿ ಅಧಿಕಾರಾಚಾ ಕದೆಲಾರ್ ಬಸ್ಚಾ ಸಪ್ಣಾಂಕ್ ಖಾಡು ಗಾಲ್ಲೆ ಬರಿಂ ಜಾತಾ ನಂಯ್ಗೀ? ಪ್ರಸ್ತುತ್ ಪರಿಗತಿಂತ್ ಆಮ್ಚೆ ಬರವ್ಪಿ ಆಸ್ಚೆ ಚಡಾವತ್ ಆಮ್ಚಾ ಭಾಷೆಂತ್ ಬರಂವ್ಚೆ. ಚಿಂತ್ಯಾ ಮುಖೇಲ್ ವಾಳ್ಯಾಂತ್(ಪ್ರಿಂಟ್, ಟಿ.ವಿ., ಸಾಮಾಜಿಕ್ ಜಾಳಿ) ಅನ್ಯಾಯಾಚಾ ವಿರೋದ್ ತಾಳೊ ಉಠೊಂವ್ಚೆ ಬರವ್ಪಿ ಆನಿ ಉಲೊವ್ಪಿ ಆಸ್ತಿತ್ ತರ್ ಕಿಠಾಳಾಂಚಿ ರಾಸ್‌ಚ್ಚ್ ಪಳೆಂವ್ಕ್ ಮೆಳ್ಚಿ ಸಾಧ್ಯತಾ ನಾಂಗೀ? ಆನಿ ತಸಲ್ಯಾ ಸಂದರ್ಭಾರ್ ದೊಳೆ ದಾಂಪುನ್ ಬಸ್‌ಲ್ಲ್ಯಾಂಕೀ ಕಿಠಾಳಾಂಚೊ ಪ್ರಕಾಸ್ ಮಾರ್ತಲೊಚ್ಚ್. ನಾಂ ತರ್ ಫೊಟಿಂಚಾ ಖದ್ನ್ಯಾ ಮುಖಾರ್ ಅಸ್ಕತ್ ತಾಳೊ ಬುಡೊನ್ ಜಿರೊನ್ ವೆತಲೊ.
ಆಮ್ಚೆ ಸಂಘ್-ಸಂಸ್ಥೆ- ಜಾಂವ್ ಕಥೊಲಿಕ್ ಸಭಾ ಯಾ ಐ,ಸಿ.ವೈ.ಎಮ್. ಬಂದ್ ಕರ್ಚಾ ಬದ್ಲಾಕ್ ಕಾರ್ಯಾ ರೀತ್ ಬದ್ಲಿಲ್ಯಾರ್ ಬರೆಂ ಮ್ಹಣ್ ಹಾಂವ್ ಚಿಂತಾಂ. ನಾಂ ತರ್ ಉದಾಕ್ ಮ್ಹೆಳೆಂ ದೆಖುನ್ ಉದ್ಕಾ ಸಾಂಗಾತಾ ಬುರ್ಗ್ಯಾಂಕ್ ಉಡಯಿಲ್ಲೆಬರಿಂ ಜಾಯ್ತ್. ಹ್ಯಾ ಸಂಘಟನಾಂ ಥಾವ್ನ್ ಕಿತೆಂ ಮೆಳಾಜೆ ಆನಿ ಜಾಯ್ಜೆ ಆಸ್‌ಲ್ಲೆಂ ತೆಂ ಮೆಳೊಂಕ್ ನಾಂ ಆನಿ ಜಾಂವ್ಕ್ ನಾಂ ತೆಂ ಮಾಂದ್ತಾಂ. ಹ್ಯಾ ಸಂಘಟನಾಂತ್ ಮೆಳ್‌ಲ್ಲಿ ತರ್ಬೆತಿ ವಾಪಾರ್ನ್ ಇಗರ್ಜಿಚಾ ದೊರ‍್ಯಾ ಬಾಯ್ರ್ ಅಸ್ಚಾ ಪರ್ಗಟ್ ಜಿಣ್ಯೆಂತ್ ಮುಖೇಲ್ಪಣ್ ಒದಗ್ಸುನ್ ದೀಂವ್ಕ್ ಸಂಘಟನಾಂ ಸಕೊಂಕ್ ನಾಂತ್ ಆನಿ ಸಾಂದೆ ಸಲ್ವಾಲ್ಯಾತ್ ಮ್ಹಣ್ಯೆತ್. ದಶಕಾಂ ಆದಿಂ ಚಲ್‌ಲ್ಲಿಂ ಕಾರ್ಯಿಂಚ್ಚ್ ಆತಾಂಯ್ ಕೆಲ್ಯಾರ್ ಆಮಿ ಅಪ್ರಸ್ತುತ್. ಸಂಘಟನಾಂ ದಾಂಪ್ಚಾ ಬದ್ಲಾಕ್ ಕಾರ್ಯಾ ರೀತ್ ಬದ್ಲುಂಚಿ ಗರ್ಜ್ ಜರೂರ್ ಆಸಾ.
ಉಂಚ್ಲ್ಯಾ ಸ್ಥಾನಾರ್ ಆಸ್ಲ್ಯಾರ್ ಸಮಾಜೆಕ್ ಕಿತ್ಲೆಂ ಬರೆಂಪಣ್ ಕರುಂಕ್ ಸಕ್ತಾ ಮ್ಹಣ್ಚಾಕ್ ನಿತಿಕರ್ತ್ ಮೈಕಲ್ ಡಿ’ಕುನಾಂ ಏಕ್ ಬರಿ ದೇಖ್. ಅಸಲ್ಯಾ ವ್ಯಕ್ತಿನ್ ಆರ್ಚ್ ಬಿಸ್ಪ್ ಪೀಟರ್ ಮಚಾದೊಚಿ ಬೋಬ್ ಅರಣ್ಯಾಂತ್ಲ್ಯಾ ಜುವಾಂವ್ ಬಾವ್ತಿಸ್ತಾಚೊ ತಾಳೊ ಜಾಯ್ನಾ ಜಾಂವ್ ಮ್ಹಣ್ ಸಾಂಗ್ಲಾಂ. ಸಾಮಾನ್ಯ ಮನ್ಶಾನ್ ನಂಯ್ ಬಗರ್ ಉಂಚ್ಲ್ಯಾ ಕೊಡ್ತಿಂತ್ ಬರೆಂಚ್ಚ್ ನಾಂವ್ ವೆಲ್ಲ್ಯಾ ಎಕಾ ಮಾನೆಸ್ತಾನ್ ಉಚಾರ್‌ಲ್ಲೊ ಹೊ ಹುಸ್ಕೊ ಲಿಪೊನ್ ವಚನಾಂ ಜಾಂವ್ದಿ. ಹೊ ಹುಸ್ಕೊ ಮುಖ್ಲ್ಯಾ ದಿಸಾಂನಿ ರಾಜ್ಯಾಂತ್ ತಶೆಂಚ್ಚ್ ಸಗ್ಳ್ಯಾ ದೇಶಾಂತ್ ಲ್ಹಾರಾಂಚಾ ರುಪಾರ್ ಪರಿವರ್ತನ್ ಜಾಂವ್ ಮ್ಹಣ್ ಆಶೆತಾಂ.
ಮ್ಹಜಾ ಅಭಿಪ್ರಾಯೆ ಫರ್ಮಾಣೆ ಖಂಯ್ಚಾ ಸಮುದಾಯಾ ವಯ್ರ್ ಜಲ್ಮಾಲ್ಲ್ಯಾ ಘಡ್ಯೆ ಥಾವ್ನ್ ತಾಂಚಾ ಸಮಡ್ತಿಚೆಂ ನಿಯಂತ್ರಣ್ ಆನಿ ಪ್ರಭಾವ್ ಇತ್ಲೊ ಜಬ್ಬೊರ್ ಜಾವ್ನಾಸ್ತಾಕೀ ತಿ ಸಮಾಜ್ meek ಜಾವ್ನಾಸ್ಚಾಂತ್ ಕಾಂಯ್ಚ್ ಅಜಾಪ್ ನಾ. ಕ್ರಿಸ್ತಾಂವ್ ಧರ್ಮಾಚಾ ಶೆಗುಣಾಂ ಪಯ್ಕಿ ‘ಮೋಗ್’ ಪ್ರಮುಖ್ ತರೀ ಆಮ್ಚಾ ಧಾರ್ಮಿಕ್ ಮುಕೆಲ್ಯಾಂನಿ ‘ಪಾತಕ್’ ಹಾಕಾಚ್ ಚಡ್ ಒತ್ತು ದೀವ್ನ್ ಕ್ರಿಸ್ತ್ ತುಜಾ ಪಾತ್ಕಾ ಲಾಗೊನ್‌ಂಚ್ ಖುರ್ಸಾರ್ ಮೆಲೊ ಮ್ಹಣ್ ದೊತೊರ್ನ್ ಶಿಕವ್ನ್ ಜಿಣಿ ಭರ್ ತಾಣಿ guilty feelings ಭಗುನ್ ವ್ಹಳ್ವಳ್ಚೆ ಬರಿಂ ಕೆಲಾಂ! ಹೊ ಸಂಸಾರ್ ನಶ್ವರ್, ಆಮ್ಚೆ ರಾಜ್ ಆಮ್ಚೆಂ ನ್ಹಯ್ ಮ್ಹಣೊನ್ ಶಿಕೊಣ್ ದೀವ್ನ್ ಲೌಕಿಕ್ ಜಿಣಿ ಯಮ್ಕೊಂಡಾಚಿ ಕೆಲ್ಯಾ. ಧಾರ್ಮಿಕ್ ಅಮಾಲಾನಿಂಯ್ ಸಬಾರ್ ಥರ್ ಆಸಾತ್. ಸೊರ‍್ಯಾಚೆ ಅಮಾಲ್ ಥೊಡ್ಯಾ ಘಂಟ್ಯಾಂಚೆ ಜಾಲ್ಯಾರ್, ಡ್ರಗ್ಸಾಚೆಂ ಮಾರೆಕಾರ್!
Great eye opening article HM sir.. Yes, unless our youth come out of four boundaries of the church, we will never achieve anything in life.. From the beginning we are still in this situation… As suggested best is to join outside organizations n enrich yourselves.
Secondly, I would like to add reg reading material. How many of us read other literature than Bible and religion related articles, periodicals, books?? Hardly any why our catholic priests never encourage.. Nothing beyond Catechism books.. That’s our tragedy unfortunately..