ಜುಬ್ಲೆವ್ ಜಾಲೊ – ಮುಕಾರ್ ಕಿತೆಂ ?

ಬಿಸ್ಪ್ ಬಾಜಿಲಾಚ್ಯಾ ಪಯ್ಲೆಂ ದಿಯೆಸೆಜಿಚ್ಯಾ ಜೆರಾಲ್ ಆಡಳ್ತ್ಯಾಂತ್ ಲಾಯಿಕ್ ಭಾವಾಡ್ತ್ಯಾಂಸವೆಂ ಸಮಾಲೋಚನಾಚಿ ವೆವಸ್ತಾ ನಾತ್‌ಲ್ಲಿಚ್. ಫಿರ್ಗಜಾಂನಿ ಬೋರ್ಡ್, ಲುವಾದ್, ಇಸ್‌ಕ್ರಿಯಾಂವ್, ಆಡಳ್ತೆದಾರ್ ಆನಿ ವಿಗಾರ್ ಆಸ್ತಾಲೆ. ಜಶೆಂ ಯುರೋಪಾಂತ್ ಉಳ್ಗಾ ಕಾಳಾರ್ (ಫ್ಯೂಡಲ್ ಏಜ್) ಉಳ್ಗಾಧನ್ಯಾಚ್ಯಾ ಮುಟಿಂತ್ ಕಾಥೆದ್ರಾಲ್ ಆನಿ ಥಂಯ್ಸರ್ ಉಳ್ಗಾಧನ್ಯಾನ್ ಸಾಂಗ್‌ಲ್ಲೆಪರಿಂ ಪಾದ್ರಿ ಆನಿ ಥಂಯ್ಚೊ ಲೋಕ್ ತಶೆಂ ಆಸ್‌ಲ್ಲಿ ಪರಿಗತ್ ಆಮ್ಚ್ಯಾ ಗಾಂವಾಂತ್. ತಾಳೊ ಕಾಡ್ಲ್ಯಾರ್ ವಾಚುನ್ ಭಾಯ್ರ್ ದವರ್ಚೆಂ. ಖಾಂದಿ ಖುರಿಸ್, ಅಸಲೆಂಚ್ ಚಲ್ತಾಲೆಂ. ಶಿಕ್ಪಾಚಿ ಜಾಂವ್, ದುಡ್ವಾಚಿ ಜಾಂವ್ ತಾಂಕ್ ನಾಸ್ತಾನಾಂ ದುಬ್ಳೊ ಲೋಕ್ ವ್ಹಡಾಂಗೆಲ್ಯಾಂಕ್ ಖಾಲ್ ಜಾತಾಲೊ.

ಇಗರ್ಜೆಂತ್ ತರೀ ಪಾದ್ರಿ ಲೋಕ್ ‘ನಿಮಾಣೊ ಜಾಲ್ಲೊ ಪಯ್ಲೊ ಜಾತಲೊ’ ಮ್ಹಣ್ ಆಯ್ತಾರಾ ಮಿಸಾರ್ ದಾಂಬುನ್ ಸಾಂಗ್ತಾಲೆ, ಮೀಸ್ ಜಾಲ್ಲೆ ತಕ್ಷಣ್ ತೆ ಮಾತ್ರ್ ಸಾರೊಟಾರ್ ಆಯಿಲ್ಲ್ಯಾ ‘ವ್ಹಡಾಂಕ್’ ಶೇಕ್ ಹ್ಯಾಂಡ್ ದೀಂವ್ಕ್ ಆನಿ ಇಂಗ್ಲೀಶಾಂತ್ ಪಟ್ಪಟ್ ಉಲೊಂವ್ಕ್ ಮುಕಾರ್ ಯೆತಾಲೆ. (ಬಿಸ್ಪ್ ಬಾಜಿಲಾ ಪಯ್ಲೆಂ ಏಕ್ ಬಿಸ್ಪ್ ಆಸ್‌ಲ್ಲೊ ತಾಚ್ಯಾ ಮೊಚ್ಯಾಂಕ್ ಘಟ್ ಲೊಂಕ್ಡಾಚಿ ಗೆಳಾಂ ಆನಿ ತೊ ಚಲುನ್ ಯೆತಾನಾಂ ಟಕ್ ಟಕ್ ಆವಾಜ್ – ಆನಿ ತೊ ಆವಾಜ್ ಆಯ್ಕಾಲ್ಲೆಂಚ್ ಸಕ್ಡಾಂನಿ ಉಬೆ ರಾವುನ್ ಆನಂದ್ ಬಾಪಾ ಕಾಡಿಜೆ ಆಸ್‌ಲ್ಲೆಂ. ತೆ ವಿಶಿಂ ಏಕ್ ವಿಂಗಡ್‌ಚ್ ಪುಸ್ತಕ್ ಬರವ್ನ್ ಕಾಡ್ಯೆತ್)

ಹ್ಯಾ ಕಾಳಾಚಿ ಆನ್ಯೇಕ್ ಮಹತ್ವಾಚಿ ಗಜಾಲ್ ಮಿಸಾವೆಳಿಂ ಲೊಕಾಂನಿ ಬಸ್ಚೆವಿಶಿಂ; ಆಡಳ್ತೆದಾರ್, ಲುವಾದ್ ದುಡ್ವಾಧಿಕ್ ಆಸ್ತಾಲೆ ದೆಕುನ್ ತಾಣಿಂ ಮೊಲಾಕ್ ಘೆವ್ನ್ ಬಾಂಕ್ ದಿಂವ್ಚೆ ಆಸ್‌ಲ್ಲೆ, ಕೊಣೆಂ ಬಾಂಕ್ ಆನಿ ದಿಂಬ್ಯೆರಾಂ (ಕ್ನೀಲರ್) ದಿಲ್ಯಾಂತ್‌ಗಿ ತಾಂಚಿಂ ನಾಂವಾಂ ಥಂಯ್ಸರ್ ಬರವ್ನ್ ಆಸ್ತಾಲಿಂ ಆನಿ ತಾಣಿಂ ಮಾತ್ರ್ ಥಂಯ್ ಬಸ್ಯೆತೆಂ ಆಸ್‌ಲ್ಲೆಂ. ಉರ್‌ಲ್ಲ್ಯಾಂಕ್ ಧರಣ್‌ಚ್ ಗತ್. ಇಗರ್ಜಾಂನಿ ಸಕ್ಕಡ್ ಲೊಕಾಕ್ ಬಸುಂಕ್ ಬಾಂಕ್ ಕರ್ಚ್ಯಾ ಸುಚನಾಕ್ ವ್ಹಡಾಂಗೆಲೊ ವಿರೋಧ್‌ಚ್ ಯೆತಾಲೊ. ಕಾಂಯ್ 1940 ಉಪ್ರಾಂತ್‌ಚ್ ಸಕ್ಡಾಂಕ್ ಬಸುಂಕ್ ಬಾಂಕಾಂಚೆಂ ಚಿಂತಪ್ ವಾಡ್ಲೆಂ. ಆಳಾಂನಿ ಧನ್ಯಾಂ ಮುಕಾರ್ ಬಸ್ಚೆಂ ಮ್ಹಳ್ಯಾರ್ ಕಿತೆಂ? ಆಳಾಂಚ್ಯಾ ಭುರ್ಗ್ಯಾಂನಿ ಧನ್ಯಾಂಚ್ಯಾ ಭುರ್ಗ್ಯಾಂನಿ ಶಿಕ್ಚ್ಯಾ ಕೊಲೆಜಿಂತ್ ಶಿಕ್ಚೆಂ ಮ್ಹಳ್ಯಾರ್ ಕಿತೆಂ? ಅಸಲ್ಯಾ ಚಿಂತ್ಪಾಂತ್ ಬಿಸ್ಪ್ ಬಾಜಿಲಾನ್ ‘ದಾಕ್ಟ್ಯಾ ದೆವಾಚ್ಯಾ ಭುರ್ಗ್ಯಾಂಕ್ ಲಾದ್ರು ಪೆದ್ರುಕ್’ ಫಿರ್ಗಜ್ ಗೊವ್ಳಿಕ್ ಪರಿಶದೆಂನಿ ಸಾಂಧೆಪಣ್ ದಿಲೆಂ ಮ್ಹಣ್ಚೆಂ ಕಿತ್ಲೆಂ ಕ್ರಾಂತಿಕಾರಿ. ಹ್ಯಾ ಖಾತಿರ್ ತಾಣೆ ಚಲಯಿಲ್ಲೆ ಜುಂತ್ ಕಿತ್ಲೆ ? ವಿಚಾರ್ ವಿನಿಮಯ್ ಚಲಯಿಲ್ಲೊ ಕಿತ್ಲೊ ?

ಬಿಸ್ಪ್ ಬಾಜಿಲಾಕ್ ದಿಯೆಸೆಜಿಚ್ಯಾ ಆಡಳ್ತ್ಯಾಂತ್ ನವೆಸಾಂವ್ ಹಾಡುಂಕ್ ಆನಿ ಚಡ್‌ಕರ್ನ್ ಲಾಯಿಕ್ ಭಾವಾಡ್ತ್ಯಾಂಕ್ ಗೊವ್ಳಿಕ್ ಆಡಳ್ತ್ಯಾ ಸಂರಚನಾಂನಿ ಜೆರಾಲ್ ರಿತಿನ್ ಆನಿ ಸಮಾಸಮಿ ರಿತಿನ್ ವಾಂಟೆಲ್ಪಣ್ ದೀಂವ್ಕ್ ಖಂಡಿತ್ ಸುಲಭ್ ನಾತ್‌ಲ್ಲೆಂ. ಸಭಾರಾಂಚೊ ಪ್ರತಿರೋಧ್ ಆನಿ ವಿವಿಧ್ ಯಾಜಕೀ ಆನಿ ಧಾರ್ಮಿಕ್ ಮುಕೆಲ್ಯಾಂಚೊ ವಿರೋಧ್ ತಾಣೆ ಫುಡ್ ಕೆಲ್ಲೊ. ತರೀ ತೊ ಪಾಟಿಂ ಸರ್‌ಲ್ಲೊ ನಾಂ. ಎಕಾ ಕುಶಿನ್ ಬಿಸ್ಪ್ ಬಾಜಿಲಾನ್ ಆಪುಣ್ ಬಿಸ್ಪ್ ಜಾಲ್ಲೆಂಚ್ ವಿಂಚುನ್ ವಿಂಚುನ್ ಉಂಚ್ಲ್ಯಾ ಶಿಕ್ಪಾಕ್ ಧಾಡ್‌ಲ್ಲೆ ಜಾಣಾರಿ ‘ತುವೆಂ ಹಾಡ್‌ಲ್ಲೆಂ ನವೆಸಾಂವ್ ಪಾವಾನಾಂ’ ಮ್ಹಣ್ ತಾಳೊ ಕಾಡ್ತಾನಾಂ ಆನ್ಯೇಕಾ ಕುಶಿನ್ ಮ್ಹಾಲ್ಘಡೆ ಮ್ಹಾತ್ಭಾರಿ ‘ತುವೆಂ ನವೆಸಾಂವ್ ಹಾಡ್‌ಲ್ಲೆಂ ಲೆಕಾವ್ಹರ್ತೆಂ ಜಾಲೆಂ, ಮೆಟಾಂ ಪಾಟಿಂ ಕಾಡ್’ ಮ್ಹಣುನ್ ದಾಬಾವ್ ಘಾಲ್ತಾಲೆ. ಹೆಂ ಸಕ್ಕಡ್ ಫುಡ್ ಕರ್ನ್ ತಾಣೆ ದಿಯೆಸೆಜಿಂತ್ ಧಾರ್ಮಿಕ್ ಶೆತಾಂತ್ ವ್ಹಡ್ ಬದ್ಲಾಪ್ ಹಾಡ್‌ಲ್ಲೆಪರಿಂಚ್ ಫಿರ್ಗಜಾಂಚ್ಯಾ ಆನಿ ದಿಯೆಸೆಜಿಚ್ಯಾ ಗೊವ್ಳಿಕ್ ವೆವಸ್ತ್ಯಾಂತ್ ಬದ್ಲಾಪ್ ಹಾಡ್ಲೆಂ. ಫಿರ್ಗಜಾಂನಿ ಆದ್ಲಿ ಭೋವ್ ಥೊಡ್ಯಾ ಘರಣ್ಯಾಂನಿ ನಿಯಂತ್ರಿತ್ ಆಸ್‌ಲ್ಲಿ ಉಳ್ಗಾ ಚಿಂತ್ಪಾಚಿ (ಫ್ಯೂಡಲಿಸ್ಟಿಕ್) ಆಡಳ್ತೆದಾರ್ ವೆವಸ್ತಾ ಅಕೇರ್ ಕರ್ನ್ ಉದಾತ್ತ್ ಪ್ರಜಾತಾಂತ್ರಿಕ್ ಚಿಂತ್ಪಾಚಿ ಗೊವ್ಳಿಕ್ ಮಂಡಳಿ ವೆವಸ್ತಾ ಆಸಾ ಕೆಲಿ.

ಹ್ಯಾ ಪಾಟಿಥಳಾರ್ – ಜುಬ್ಲೆವ್ ಏಕ್ ವ್ಹಡ್ ಸಂದರ್ಭ್ ತಿ ವೆವಸ್ತಾ ಆಸಾ ಜಾತಾನಾಂ ಆನಿ ತ್ಯಾ ಪಯ್ಲೆಂ ಪರಿಗತ್ ಕಶಿ ಆಸಲ್ಲಿ ಮ್ಹಣ್ ಸಮ್ಜುಂಕ್. ಹಿ ವೆವಸ್ತಾ ಆಸಾ ಕೆಲ್ಲೆ ಉದ್ದೇಶ್ ಕಿತೆಂ ಮ್ಹಳ್ಳೆಂ ಪರ್ತ್ಯಾನ್ ಮನನ್ ಕರ್ಚ್ಯಾಕ್. ಆನಿ ತೆ ಉದ್ದೇಶ್ ಜಾರಿ ಕರ್ತಾನಾಂ ಖಂಯ್ ಆಮಿ ಜಿಕ್ಲ್ಯಾಂವ್ ಖಂಯ್ ಥಕ್ಲ್ಯಾಂವ್, ಆಮ್ಚ್ಯಾ ಪಯ್ಣಾವಾಟೆರ್ ಕಿತ್ಲೆಂ ಬರೆಂ ಜಾಲಾಂ, ಆನಿ ಕಿತೆಂ ಬರೆಂ ಕರುಂಯೆತೆಂ ಮ್ಹಳ್ಳೆಂ ಹ್ಯಾ ಸಂದರ್ಭಿಂ ಚಿಂತಪ್ ಆಟವ್ನ್ ಸ್ಪಷ್ಟ್ ಸಮ್ಜುನ್ ಘೆಂವ್ಕ್ ಜಾತಾ. ಗೊವ್ಳಿಕ್ ಪರಿಶದೆಕ್ 50 ವರ್ಸಾಂ ಭರ್ತಾನಾಂ ಆಮಿ ಸಂಭ್ರಮ್ ಚಲಯ್ತಾಂವ್. ಪೂಣ್ ಸವಾಲ್ ಉರ್ತಾ – ಹೆಂ ಸಗ್ಳೆಂ ಜುಬ್ಲೆವಾಚೆಂ ವರಸ್, ಹೊ ಸಂಭ್ರಮ್ ಆನಿ ತಿತ್ಲ್ಯಾ ಬರ‍್ಯಾನ್ ಚಲವ್ಯೆತೊಗಿ? ಮ್ಹಣ್ಚೆಂ. ಹ್ಯಾ ಸಗ್ಳ್ಯಾ ವರ್ಸಾ ಏಕ್-ದೋನ್ ಸಂದರ್ಭಾಂನಿ ಪುಣಿ ‘ಎದೊಳ್ (ಚಡ್ ಕರ್ನ್ ಆದ್ಲ್ಯಾ 50 ವರ್ಸಾಂನಿ) ದಿಯೆಸೆಜಿಂತ್ ಲಾಯಿಕ್ ಭಾವಾಡ್ತ್ಯಾಂಚೆಂ ವಾಂಟೆಲ್ಪಣ್ (ಪಾರ್ಟಿಸಿಪೇಶನ್), ಮೆತೆರ್‍ಪಣ್ (ಇಂಟರ್‌ವೆನ್ಶನ್) ಆನಿ ಮುಕೇಲ್ಪಣ್ (ಲೀಡರ್‌ಶಿಪ್) ವಾಡುನ್ ಆಯಿಲ್ಲಿ ರೀತ್, ತಿ ವಾಡಾವಳ್ ಬರ‍್ಯಾನ್ ಜಾಂವ್ಚ್ಯಾಕ್ ರುಪಿತ್ ಕೆಲ್ಲ್ಯೊ ಮಾಂಡಾವಳಿ ಕಿತೆಂ ? ಹ್ಯಾ ಗೊವ್ಳಿಕ್ ಸಂರಚನಾಂನಿಮ್ತಿಂ ಜೆರಾಲ್ ರಿತಿನ್ ಸಮುದಾಯಾಕ್ ಆನಿ ಸಮಾಜೆಕ್ ಜಾಲ್ಲೆಂ ಬರೆಂಪಣ್ ಕಿತೆಂ ? ಫಿರ್ಗಜಾಂನಿ ಆನಿ ದಿಯೆಸೆಜಿಂತ್ ಆಸ್ಚ್ಯಾ ಗೊವ್ಳಿಕ್ ಪರಿಶದೆಂಚಿ ಪ್ರಸ್ತುತತಾ (ರೆಲೆವೆನ್ಸ್) ಆನಿ ಮಹತ್ವ್ (ಇಂಪೊರ್‍ಟೆನ್ಸ್) ಕಿತೆಂ ? ಹಿಂ ಸರಚನಾಂ ಆನಿ ತಿತ್ಲಿಂ ಉಪಯುಕ್ತ್ (ಯೂಸ್‌ಫುಲ್) ಜಾಂವ್ಚ್ಯಾಕ್ ಫುಡಾರಾಂತ್ ಕಸಲಿಂ ಮೆಟಾಂ ಆಮಿ ಕಾಡುಂಯೆತಾತ್’ ಮ್ಹಣ್ಚೆವಿಶಿಂ ಕಾಮಾಸಾಳಾಂ, ಸಮಾಲೋಚನಾಂ ಚಲವ್ನ್ ಜೊಕ್ತಿಂ ಕಾರ್ಯಾಯೋಜನಾಂ ಮಾಂಡುಯೆತಿಂಗಿ ?

ಖರ‍್ಯಾನ್ ಸಾಂಗ್ಚೆಂ ತರ್ ಗೊವ್ಳಿಕ್ ಪರಿಶದೆಂಚಿ ರಾಟಾವಳ್ ಆನಿ ಉಪಸ್ಥಿತಿ ಸಾರ್ಕೆಂ ದಿಸುನ್ ಯೆಂವ್ಚಿ ಫಿರ್ಗಜಾಂನಿ. ಆತಾ’ತಾಂ ಪರಿಗತ್ ವಿಪ್ರೀತ್ ಬದ್ಲುನ್ ದಿಯೆಸೆಜಿಚ್ಯಾ ಗೊವ್ಳಿಕ್ ಪರಿಶದೆಚೊ ಕಾರ್ಯದರ್ಶಿ ಜಾಂವ್ಚ್ಯಾಕ್ ಥೊಡೆಂ ಪ್ಲ್ಯಾನಿಂಗ್ ಕರ್ಚೆಂ ದಿಸುನ್ ಯೆತಾ ಜಾಲ್ಲ್ಯಾನ್ ದಿಯೆಸೆಜಿಚ್ಯಾ ಗೊವ್ಳಿಕ್ ಪರಿಶದೆಚ್ಯಾ ಆಸ್ತಿತ್ವಾವಿಶಿಂ ಆವಾಜ್ ಆಯ್ಕಾತಾ. ನಾತ್ಲ್ಯಾರ್ ಫಿರ್ಗಜಾಂನಿ ಮಾತ್ರ್ ಗೊವ್ಳಿಕ್ ಪರಿಶದೆಂನಿಮ್ತಿಂ ವ್ಹರ್ತೊ ವಾವ್ರ್ ಚಲ್ತಾ. ವ್ಹಡ್ಲೆಂ ಫೆಸ್ತ್, ಮೊಂತಿಚೆಂ ಫೆಸ್ತ್, ಭಾಗೆವಂತ್ ಹಫ್ತೊ, ಫಿರ್ಗಜ್ ದೀಸ್, ಕ್ರಿಸ್ಮಸ್ ಅಸಲ್ಯಾ ಸಂದರ್ಭಾಂನಿ ಮಾತ್ರ್ ನ್ಹಂಯ್ ಲ್ಹಾನ್ ಕ್ರಿಸ್ತಾಂವ್ ಸಮುದಾಯಾಂದ್ವಾರಿಂ ಸಭಾರ್ ಲ್ಹಾನ್ ಲ್ಹಾನ್ ಕಾಮಾಂ ಚಲುನ್ಂಚ್ ಆಸ್ತಾತ್. ಸಗ್ಳ್ಯಾ ದಿಯೆಸೆಜಿಂತ್ ಚಲ್ಚಿಂ ಹಿಂ ಲ್ಹಾನ್ ಲ್ಹಾನ್ ಕಾಮಾಂನಿಂಚ್ ಖರ‍್ಯಾನ್ ವ್ಹಡ್ ಮಹತ್ವಾಚೊ ವಾವ್ರ್ ಜಾತಾ. ಹ್ಯಾ ನಿಮ್ತಿಂ ಕೊರೊಡೊ ರುಪ್ಯಾಂಚಿ ವಾಡಾವಳ್ ಆಸಾ ಜಾಲ್ಯಾ. ಫಿರ್ಗಜೆಚೊ ಜುಬ್ಲೆವ್ ಮ್ಹಣುನ್ ಖಂಯ್ ನಾಂ ಖಂಯ್ ಬಾಂದ್ಪಾಂ ವಯ್ರ್ ಯೆತಾತ್. (ಬಾಂದ್ಪಾಂ ಬಾಂದ್ಚೆಪಯ್ಲೆಂ ಕೊಣಾಚಿಂ ? ಬಾಂದ್ಲ್ಯಾ ಉಪ್ರಾಂತ್ ಕೊಣಾಚಿಂ ? ಮ್ಹಣ್ಚೆಂ ಏಕ್ ಸವಾಲ್ ತರ್, ಖರ‍್ಯಾನ್ ತ್ಯಾ ಸ್ಥಳೀಯ್ ಪವಿತ್ರ್ ಸಭೆಕ್ ತೆಂ ಬಾಂದಪ್ ಕಿತ್ಲ್ಯಾ ಗರ್ಜೆಚೆಂ ? ಮ್ಹಣ್ಚೆಂ ಆನ್ಯೇಕ್ ಸವಾಲ್) ಸ್ಥಳೀಯ್ ಫಿರ್ಗಜೆ ಜಿವಿತಾಚ್ಯಾ ಹರ್ಯೆಕ್ ರಾಟಾವಳಿಂತ್ ಫಿರ್ಗಜ್ ಗೊವ್ಳಿಕ್ ಪರಿಶದ್ ಆಸಾ. ಪಾದ್ರ್ಯಾಬಾಕ್ ಬೊಟ್ಲೆರ್ ನಾತ್ಲ್ಯಾರ್ ಜೆವ್ಣಾಚಿ ವೆವಸ್ತಾ ಕರ‍್ತಾ. ಸಾಕ್ರಿಸ್ತಿಂತ್ಲೆಂ ಫ್ಯಾನ್ ಪಡ್ಲ್ಯಾರ್ ಎಲೆಕ್ಟ್ರೀಶಿಯನಾಕ್ ಹಾಡ್ನ್ ರಿಪೇರಿ ಕರಯ್ತಾ, ಸಾಂಕ್ತುವಾರಿಂತ್ ಪೊಂವ್ತಾ ಜಾಲ್ಯಾರ್ ಥಾಪುಡ್ತಾಪ್ ದುರಸ್ತಿ ಕರಯ್ತಾ ಮಾತ್ರ್ ನ್ಹಂಯ್ ಕೊಂಪ್ರಿಚ್ಯಾ ಪುರ್ಶಾಂವಾಕ್ ಲೊಕಾಂನಿ ಸಾಲಿಂನಿ ವೆಚೆಪರಿಂ ವಾಟ್ ಸಾಂಬಾಳ್ತಾ. ಫಿರ್ಗಜ್ ಗೊವ್ಳಿಕ್ ಪರಿಶದೆಧ್ವಾರಿಂ ಭೋವ್ ಮಹತ್ವಾಚಿಂ ಮಾತ್ರ್ ನ್ಹಂಯ್ ಭೋವ್ ಚಿಲ್ಲರ್ ಕಾಮಾಂಯ್ ಸಲೀಸಾಯೆನ್ ಶಾಭಿತಾಯೆನ್ ಚಲ್ತಾತ್.

ಪೂಣ್ ಹ್ಯಾ 50 ವರ್ಸಾಂಚೊ ಜುಬ್ಲೆವ್ ಚಲ್ತಾನಾಂ ಕಿತ್ಲ್ಯಾ ಫಿರ್ಗಜಾಂನಿ ಸಂಭ್ರಮ್ ಚಲ್ಲೊ ? ಫಿರ್ಗಜ್ ಗೊವ್ಳಿಕ್ ಪರಿಶದೆಂತ್ ಆದಿಂ ವಾವ್ರ್ ದಿಲ್ಲ್ಯಾಂಕ್ ಸಂಗಿ ಆಪಯ್ಲೆಂ? ಆಪ್ಲ್ಯಾ ಘರ‍್ಚಿ ರಾಟಾವಳ್ ಸಕ್ಕಡ್ ಬಾಯ್ಲೆಚೆರ್ (ವಾ ಘೊವಾಚೆರ್) ಥಾಪುನ್ (ಇಗರ್ಜೆಚಿ ಸೆವಾ ಕೆಲ್ಯಾರ್ ದೇವ್ ಸಕ್ಕಡ್ ಪಾತ್ಕಾಂ ಭೊಗ್ಸುನ್ ಶೀದಾ ಸರ್ಗಾರ್ ಘೆತಾ ಮ್ಹಣ್ ಮಿಸಾಚ್ಯಾ ಶೆರ್ಮಾಂವಾರ್ ಸಾಂಗ್‌ಲ್ಲೆಂ ಭಾವಾಡ್ತಾಚೆಂ ಸತ್ ಮ್ಹಣ್ ಮಾನುನ್) ನಿಸ್ವಾರ್ಥ್‌ಪಣಿಂ ಆನಿ ಪ್ರಾಮಾಣಿಕ್ಪಣಿಂ ಇಗರ್ಜೆ ಬಾಗ್ಲಾರ್ ವಾವುರ್ಚ್ಯಾ ಕಿತ್ಲ್ಯಾ ಗುರ್ಕಾರಾಂಕ್ (ಮ್ಹಜೆ ಪರ್ಮಾಣೆಂ ಲಾಯಿಕ್ ಮ್ಹಣಿಯಾರ‍್ಯಾಂಕ್ ) ಹೊ ಜುಬ್ಲೆವ್ ಆಪ್ಲೊ ಮ್ಹಣ್ ಭೊಗ್ತಾ ? ಹ್ಯಾ ಜುಬ್ಲೆವಾಚ್ಯಾ ನಾಂವಾರ್ ಪುಣಿಂ ಸರ್ವ್ ಗುರ್ಕಾರಾಂಕ್ ತಾಂಚ್ಯಾ ತಾಂಚ್ಯಾ ಫಿರ್ಗಜಾಂನಿ ಸಾಂಗಾತಾ ಹಾಡ್ನ್ ತಾಂಚ್ಯಾ ಸೆವೆಕ್ ಏಕ್ ಲ್ಹಾನ್‌ಸೊ ತರೀ ಮಾನ್ – ಸನ್ಮಾನ್ ಕರ್ಯೆತೊಗೀ ? ಲಾಯಿಕ್ ಸೆವಾ ದೀಂವ್ಕ್ ಆಸ್ಚೆ ಆನಿ ಆಮಿ ಸೆವಾ ಘೆಂವ್ಕ್ ಆಸ್ಚೆ. ತೆಂ ಸದಾಂಚೆಂ. ಆಮ್ಚಿ ಸೆವಾ ಮಾತ್ರ್ ಸಮೇಸ್ತಾಂನಿ ವಾಖಣ್ಲ್ಯಾರ್ ಪುರೊ ಮ್ಹಣ್ ಚಿಂತ್ಚ್ಯಾ ಉಳ್ಗಾಚಿಂತ್ಪಾಂತ್ ಭೊಂವ್ತಿ ಆಸ್‌ಲ್ಲ್ಯಾಂಚ್ಯಾ ಆನಿ ನಿಸ್ಣಿಂತ್ ಸಕಯ್ಲ್ ಆಸ್‌ಲ್ಲ್ಯಾಂಚ್ಯಾ ಸೆವೆಕ್ ಕವ್ಡೆಚೆಂ ಮೊಲ್ ಆಸಾನಾಂ. ಹಫ್ತ್ಯಾಚ್ಯಾ ದಿಸಾ ‘ವ್ಹಡ್‌ಜಯ್ತ್’ ದಬಾಜೊ ದವರ್‍ಲ್ಯಾ ಉಪ್ರಾಂತ್, ವ್ಹಡಾಂವ್ಹಡಾಂಕ್ ಆಪಯ್ಲ್ಯಾ ಉಪ್ರಾಂತ್ ಆಯ್ಕುಂಕ್ ಸಭಾಂಗಣ್ ಭರ್ತಿ ಪ್ರೇಕ್ಷಕ್ ಜಾಯ್ಜೆ. ಗುರ್ಕಾರಾಂಕ್ ಆಪಯ್ಲಾಂ, ಖಂಡಿತ್ ಯೇಜೆ ಮ್ಹಳಾಂ.

ದಿಯೆಸೆಜಿಚ್ಯಾ ಥೊಡ್ಯಾ ಫಿರ್ಗಜಾಂನಿ ಲಾಂಬ್ ಕಾಳ್ ಉಪಾಧ್ಯಕ್ಷ್, ಕಾರ್ಯದರ್ಶಿ ಆನಿ ಹೆರ್ ಹುದ್ದ್ಯಾಂನಿ ವಾವುರ‍್ಲೆಲೆ, ಫಿರ್ಗಜೆಚ್ಯಾ ಆನಿ ದಿಯೆಸೆಜಿಚ್ಯಾ ಹಿತಾಸಕ್ತೆಕ್ ಲಾಗುನ್ ಕಷ್ಟ್ ಆಯಿಲ್ಲೆ ಸಭಾರ್ ಲಾಯಿಕ್ ಭಾವಾಡ್ತಿ ಆಸಾತ್. ತಾಂಕಾಂ ಕೊಣಾಯ್ಕ್ ಪುಣಿಂ ಬಿಸ್ಪ್ ಬಾಜಿಲಾನ್ ಲಾಯಿಕಾಂಖಾತಿರ್ ಉಬೆಂ ಕೆಲ್ಲ್ಯಾ ಹ್ಯಾ ಗೊವ್ಳಿಕ್ ವೆವಸ್ತ್ಯಾಂಕ್ 50 ವರ್ಸಾಂ ಭರ್ಲಿಂ ; ತಾಕಾ ಲಾಗುನ್ ‘ವಿವಿಧ್ ಆಯಾಮಾಂಚೊ ಅರ್ಥಾಭರಿತ್ ಜುಬ್ಲೆವ್’ ವರ್ಸಭರ್ ಚಲ್ಲೊ ಮ್ಹಣ್ ಬಾನ್ (ಖಬರ್) ಆಸ್‌ಲ್ಲಿಗೀ ? ತಾಂಚ್ಯಾ ತಾಂಚ್ಯಾ ಫಿರ್ಗಜೆಂತ್, ವಾರಾಡ್ಯಾಂತ್‌ ಪುಣಿಂ ತಾಂಕಾಂ ಲಾಗಿಂ ಆಪವ್ನ್ ಗುಮಾನಾಂತ್ ಘೆತ್‌ಲ್ಲೆಂ ಆಸಾಗೀ ? ವರ್ಸಾವರ್ಸಾ ಯೆಂವ್ಚ್ಯಾ ಬರ್ಥ್ ಡೇ, ಆನಿ ಖಂಚ್ಯಾ ದಿಸಾಕ್ ಸಗ್ಳಿ ಫಿರ್ಗಜ್ ಉಬಿ ಜಾತಾ. ರುಬಿ ಜುಬ್ಲಿ, ಗೋಲ್ಡನ್ ಜುಬ್ಲಿ ಜಾಲ್ಯಾರ್ ಸಾಂಗ್ಚೆಂ ನಾಕಾ. ‘ಎಡ್ವರ್‍ಟಾಯ್ಜ್ ಪತ್ರಿಕಾರ್’ ಫೊಟೊ ಕಿತೆಂ, ಶುಭಾಶಯ್ ಕಿತೆಂ, ತೆಂಯ್ ಬರೆಂಚ್ ಪೂಣ್ ಬಾವ್ಡ್ಯಾ ಗೊವ್ಳಿಕ್ ಪರಿಶದೆಚ್ಯಾ ಜುಬ್ಲೆವಾಕ್ ‘ಎಡ್ವರ್‍ಟಾಯ್ಜ್ ಪತ್ರಿಕಾರ್’ ಸೆಂಟರ್ ಸ್ಪೇಡ್ ಜಾಲೆಂ ನಾಂ, ದೋನ್ ಬರಿಂ ಲೇಕನಾಂ ಸಯ್ತ್ ಆಯ್ಲಿಂ ನಾಂತ್.

ಫಿರ್ಗಜಾಂನಿ ಉಪಾಧ್ಯಕ್ಷಾಂಚಿ ರಾಟಾವಳ್ ಲೆಕಾವ್ಹರ್ತಿ. ಸಭಾರ್ ಉಪಾಧ್ಯಕ್ಷಾಂನಿ ಫಿರ್ಗಜೆಚ್ಯಾ ರಾಟಾವಳಿಕ್ ಲಾಗುನ್, ಆಪ್ಲ್ಯಾ ಕಾಳಾರ್ ಫಿರ್ಗಜೆಂತ್ ಕಿತೆಂಪುಣಿ ವಿಶೇಷ್ ಜಾಯ್ಜೆ ಮ್ಹಣುನ್ ಆಪ್ಲೊ ಉದ್ಯಮ್ ಲೊಸಾರ್ ಘಾಲ್ಲೊ ಆಸಾ. ಹ್ಯಾ ಜುಬ್ಲೆವಾಂತ್ ತ್ಯಾ ಉಪಾಧ್ಯಕ್ಷಾಂಕ್ ಖಂಚ್ಯಾ ರಿತಿನ್ ಮಾನವ್ಣಿ ಚಲ್ಲಿ ? ಜುಬ್ಲೆವಾಚೆಂ ಸೊಡ್ಯಾಂ ಜೆರಾಲ್ ಥರಾನ್ ಉಪಾಧ್ಯಕ್ಷ್ ಆಪ್ಲೊ ಹುದ್ದೊ ಸೊಡ್ನ್ ಗೆಲ್ಯಾ ಉಪ್ರಾಂತ್ ತಾಕಾ ಫಿರ್ಗಜೆಂತ್ ಕಿತೆಂ ? ದಾಕ್ಲ್ಯಾಕ್ 6 ವರ್ಸಾಂ (ಥೊಡೆ 1 ವರ್ಸಾನ್ಂಚ್ ವೆತಾತ್) ಫಿರ್ಗಜೆಂತ್ ಆಸ್ಚ್ಯಾ ವಿಗಾರಾಚೊ ಫೊಟೊ ಮುಕಾರ್ ಸಾಸ್ಣಾಕ್ ಇಗರ್ಜೆಚ್ಯಾ ವೊಣ್ತಿರ್ ಉಮ್ಕಾಳ್ತಾ. ಉಮ್ಕಳುಂ ಸಂತೊಸಾಚಿ ಖಬರ್ ; ಪೂಣ್ ಏಕ್ ಅವ್ದಿ, ದೋನ್ ಅವ್ದ್ಯೊ ಆನಿ ತ್ಯಾ ಪ್ರಾಸ್ ಚಡ್ ಸೆವಾ ದಿಲ್ಲೊ ಉಪಾಧ್ಯಕ್ಷ್ ವೊಣ್ತಿರ್ ದಿಸಾನಾಂ; ನಾಂ ಮ್ಹಳ್ಯಾರ್ ತಾಂಚಿ ಅಧಿಕಾರ್ ಅವ್ದಿಚಿ ಯಾದಿಯ್ (ರೋಲ್ ಆಫ್ ಹಾನರ್) ನಾಂ. ಮಾಗಿರ್ ‘ಫಿರ್ಗಜ್ ತುಮ್ಚಿ, ಫಿರ್ಗಜ್ ತುಮ್ಚಿ, ತುಮ್ಚ್ಯಾ ಫಿರ್ಗಜೆಕ್ ದಿಯಾ’ ಮ್ಹಣ್ಚೆಂ ಕಿತ್ಯಾಕ್ ?

ಬಿಸ್ಪಾಚ್ಯಾ ಘರಾ ವಿಗಾರ್ ಅಪೊಸ್ತಲಿಕ್ ತೊಮಾಸ್ ದೆ’ ಕಾಸ್ತ್ರೋಥಾವ್ನ್ ಬಿಸ್ಪ್ ಪೀಟರ್ ಪಾವ್ಲಾ ಪರ್ಯಾಂತ್ (ಮಧೆಂ 1684 ಥಾವ್ನ್ 1845 ಪರ್ಯಾಂತ್ ಕೋಣ್ ಮ್ಹಣ್ ಮಾಹೆತ್‌ಚ್ ನಾಂ) ಹರ್ಯೆಕ್ಲ್ಯಾಚ್ಯೊ ಫೊಟೊ ಆನಿ ವಿವರ್ ಆಸಾತ್. ದಿಯೆಸೆಜಿಚ್ಯಾ ಗೊವ್ಳಿಕ್ ಪರಿಶದೆಚ್ಯಾ ಕಾರ್ಯದರ್ಶಿಂಚೆ ಫೊಟೆ ಸೊಡ್ಯಾ ತಾಂಚಿ ಸಾರ್ಕಿ ಯಾದಿಚ್ ನಾಂ, (ತಿ ಅಶಿ ಮ್ಹಣ್ ಹಾಂವೆಂ ಬರವ್ನ್ ದಿಂವ್ಚಿ ಪಡ್ಲಿ, ಆಯಿನ್ನ್ ಎಕ್ಲೊ ಕಾರ್ಯದರ್ಶಿ ಆಸ್ಲಲೊ ಮ್ಹಣ್ಚಿ ಗಜಾಲ್ ಹೆಳ್ಕೆಂತ್‌ಚ್ ನಾತ್ಲಲಿ ತಿ ದಾಕ್ಲ್ಯಾಂನಿ ಪಳವ್ನ್ ತಾಚೆಂ ನಾಂವ್ ಪಟ್ಟೆಕ್ ಘಾಲ್ತಾನಾಂ ಕೊಡು ಉತ್ರಾಂಯ್ ಆಯ್ಕುಂಚಿಂ ಪಡ್ಲಿಂ. ತಶೆಂ ಮ್ಹಣುನ್ ವಿಗಾರ್ ಜೆರಾಲಾಂಚಿ ಯಾದಿಯ್ ಬರವ್ನ್ ಘಾಲ್ಲಿ ನಾಂ) ಹ್ಯಾ ಸಕ್ಕಡ್ ಸವಾಲಾಂ ಸವೆಂ ಹೊ ಜುಬ್ಲೆವ್ ಕಿತ್ಯಾಕ್ ? ಕಸೊ ? ಕೊಣಾಚೊ ? ಮ್ಹಣ್ಚೆಂ ಆಟಪ್ ಗುಂಡಾಯೆನ್ ಹ್ಯಾ ಸಂದರ್ಭಿಂ ಚಲಾಜೆ ಆಸ್ಲೆಂ.

ಆತಾಂ ದಿಯೆಸೆಜಿಚ್ಯಾ ಗೊವ್ಳಿಕ್ ಪರಿಶದೆನ್ ಆಪ್ಣಾಯಿಲ್ಲ್ಯಾ ಯಶಸ್ವೆಚೆಂ ಪಳವ್ಯಾಂ. ಪಯ್ಲ್ಯಾನ್ ಪಯ್ಲೆಂ ಲಾಯಿಕ್ ಭಾವಾಡ್ತ್ಯಾಂಕ್ ದಿಯೆಸೆಜಿಚ್ಯಾ ಆನಿ ಫಿರ್ಗಜೆಂಚ್ಯಾ ರಾಟಾವಳಿಂನಿ ವಾಂಟೆಲ್ಪಣ್; ಸುರ್ವಾತೆಚ್ಯಾ ದಿಸಾಂನಿ ಹೆಂ ಖರೆಪಣಿಂ ದಿಸುನ್ ಯೆತಾಲೆಂ. ಆದ್ಲ್ಯಾ ಥೊಡ್ಯಾ ವರ್ಸಾಂನಿ ಹೆಂ ವಾಂಟೆಲ್ಪಣ್ ಉಣೆಂಉಣೆಂ ಜಾವ್ನ್ ಆಯ್ಲಾಂಗೀ ? ವಾಂಟೆಪಣ್ ಜಾಯ್, ವಾಂಟೆಪಣ್ ಜಾಯ್ ಮ್ಹಣ್ ಸೆಮಿನಾರಾಂ/ ಶಿಕ್ಪಾಸಾಳಾಂ ಮಾತ್ರ್ ಚಲ್ತಾತ್ಗೀ ? ಖಂಚ್ಯಾಯ್ ವೆವಸ್ತ್ಯಾಂತ್ ಫಕತ್ ಜಿಬೆಪುರ್ತೆಂ ವಾಂಟೆಲ್ಪಣಾಚ್ಯಾ ಆವ್ಕಾಸಾಚೆಂ ಉರ್ಲ್ಯಾರ್ ಜಾಲ್ನಾಂ. ಪೂಣ್ ಆದ್ಲ್ಯಾ ಪನ್ನಾಸ್ ವರ್ಸಾಂಚ್ಯಾ ಅನ್ಭವಾನ್ ವಾಂಟೆಲ್ಪಣಾಚೊ ಹುರುಪ್ ಲಾಯಿಕ್ ಭಾವಾಡ್ತ್ಯಾಂಥಂಯ್ ಉರ್ಲಾ. ತಾಂಕಾಂ ಆಪ್ಲ್ಯಾ ವಾವ್ರಾನ್ ಚಲ್ಚ್ಯಾ ಕಥೊಲಿಕ್ ಧಾರ್ಮಿಕ್ ವೆವಸ್ತ್ಯಾಂಚ್ಯಾ ವೆವ್ಹಾರಾಂತ್ ವಾಂಟೆಲ್ಪಣ್ ಖಂಡಿತ್ ಜಾಯ್ ಅಶೆಂ ಭೊಗ್ತಾ.

ದಿಯೆಸೆಜಿಚ್ಯಾ ಗೊವ್ಳಿಕ್ ಪರಿಶದೆನ್ ವ್ಹಡ್ ವ್ಹಡ್ ಜುಬ್ಲೆವ್ ಸಂಘಟಿತ್ ಕೆಲ್ಯಾತ್. ದಿಯೆಸೆಜಿಚಿಂ 100 ವರ್ಸಾಂ, 125 ವರ್ಸಾಂ, ಬಿಸ್ಪಾಚೊ ದಶಮಾನೋತ್ಸವ್, ರುಪ್ಯೋತ್ಸವ್, ಪವಿತ್ರ್‌ಪುಸ್ತಕಾಚೆಂ ವರಸ್, ಭಾವಾಡ್ತಾಚೆಂ ವರಸ್, ಎಕ್ಝಿಬೀಷನಾಂ, ಅಭಿಶೇಕೋತ್ಸವ್ ಅಸಲಿಂ ಸಭಾರ್ ಕಾರ್ಯಾಯೋಜನಾಂ ಮಾಂಡುನ್ ಹಾಡ್ಲ್ಯಾಂತ್. ತಶೆಂ ತರಿ ದಿಯೆಸೆಜಿಂತ್ 95% ಆಸ್ಚ್ಯಾ ಲಾಯಿಕಾಂಚ್ಯಾ ಜಿವಿತಾಕ್ ಶೀದಾಶೀದಾ ಉಪ್ಕಾರ್ತಾ ತೆಂ ಕಿತೆಂ ಕೆಲಾಂ ? ಬಿಸ್ಪ್ ಬಾಜಿಲಾಚ್ಯಾ ಕಾಳಾರ್ ದಲಿತ್ ಕ್ರಿಸ್ತಾಂವಾಂಚ್ಯಾ ಹಕ್ಕಾಂ ಖಾತಿರ್, ತ್ಯಾಗಿ ಮಸೂದೆ ವಿರೋದ್ ಇತ್ಯಾದಿ. ಬಿಸ್ಪ್ ಲುವಿಸ್ ಪಾವ್ಲಾಚ್ಯಾ ಕಾಳಾರ್ ದಿಯೆಸೆಜಿಚ್ಯಾ ಗೊವ್ಳಿಕ್ ಪರಿಶದೆಚ್ಯಾ ಮುಕೇಲ್ಪಣಾರ್ ಭಲಾಯ್ಕೆ ನಿಧಿ ಜಾಲಿ, ಕ್ಯಾಪ್ ಸೆಲ್ಲ್ ಜಾಲೆಂ, ಭಾಂಧವ್ಯ ಉಬೆಂ ಜಾಲೆಂ, 125 ವ್ಯಾ ವರ್ಸಾಚ್ಯಾ ಜುಬ್ಲೆವಾವೆಳಾರ್ ಹರ್ಯೆಕಾ ಫಿರ್ಗಜೆಂತ್ ದುಬ್ಳ್ಯಾ ಕುಟ್ಮಾಕ್ ಏಕ್ ಘರ್ ಜಾಲೆಂ, ಇಂಜಿನಿಯರಿಂಗ್ ಕೊಲೆಜ್ ಜಾಲಿ. ಹ್ಯಾ ದೊಗಾಂಯ್ ಬಿಸ್ಪಾಂಚ್ಯಾ ಕಾಳಾರ್ ಕಾಂಯ್ ಥೊಡೆ ಮುಕೆಲಿ ಉಬೆ ಜಾಲೆ.

ಮ್ಹಜ್ಯಾ ಎಕಾ ಇಷ್ಟಾಚೆಂ ಆಡಿಯೋ ಕ್ಲಿಪ್ ತವಳ್ ತವಳ್ ವಾಟ್ಸಾಪಾರ್ ಯೆತಾ, ಕೊಣಾನಿಮ್ತಿಂ, ಖಂಚ್ಯಾನಿಮ್ತಿಂ ಆಮ್ಚೊ ಸಮುದಾಯ್ ಅಸ್ಕತ್ ಜಾಲಾ ಮ್ಹಣುನ್, ತಾಣಿಂ ಮಾಗ್‌ಲ್ಲ್ಯಾ ಸರ್ವಾಕ್ ದಾನಾಂ ದೀನಾಕಾತ್ ಮ್ಹಣುನ್. ಹಾಂವ್ ತ್ಯಾ ಚಿಂತ್ಪಾಕ್ ಪುರ್ತಿ ಪಾಟಿಂಬೊ ದೀನಾಂ ತರೀ ಥೊಡೆಪಾವ್ಟಿಂ ಸಮುದಾಯ್ ಅಸ್ಕತ್ ಜಾಂವ್ಚೆವಿಶಿಂ ತಾಣೆ ಸಾಂಗ್ಚೆಂ ಯುಕ್ತ್ ಆನಿ ಸಾರ್ಕೆಂ ಮ್ಹಣ್ ಮ್ಹಾಕಾ ದಿಸ್ತಾ. ಮಂಗ್ಳುರಿ ಕೊಂಕ್ಣಿ ಕಥೊಲಿಕ್ ಸಮುದಾಯಾಂತ್ 99 % ಆಸ್ಚ್ಯಾ ಲಾಯಿಕ್ ಭಾವಾಡ್ತ್ಯಾಂನಿ ಸಕ್ಕಡ್ ಸಾಂಗಾತಾ ಮೆಳುನ್ ಸಂಭ್ರಮುಂಕ್ ಆನಿ ನವಿ ದಿಶಾ ಪಳಂವ್ಕ್ ಆವ್ಕಾಸಾಚೊ ಜಾವ್ಯೆತ್ ಜಾಲ್ಲೊ ಹೊ ಜುಬ್ಲೆವ್ ಕಾಂಯ್ ಮಹತ್ವಾಚೊ ನ್ಹಂಯ್ ಮ್ಹಣ್ಚೆಪರಿಂ ಜಾವ್ನ್ ಗೆಲೊ ಕಸೊ ? ಶಿಕುಂಕ್, ಸಮ್ಜುಂಕ್, ಆಟಪ್ ಚಲಂವ್ಕ್, ಮುಕ್ಲ್ಯಾ ವರ್ಸಾಂನಿ ದಿಯೆಸೆಜಿಚ್ಯಾ ಜಿವಿತಾಂತ್ (ಫಕತ್ ಆಡಳ್ತ್ಯಾಂತ್ ಮಾತ್ರ್ ನ್ಹಂಯ್) ಲಾಯಿಕ್ ಭಾವಾಡ್ತ್ಯಾಂಚೆ ಆವ್ಕಾಸ್ ಕಿತೆಂ ಆನಿ ಫುಡಾರ್ ಕಸೊ ಮ್ಹಣ್ಚೆಂ ಕಾರ್ಯಯೋಜನ್ ಮಾಂಡುನ್ ಹಾಡುಂಕ್ ಆಸ್‌ಲ್ಲೊ ಸಂದರ್ಭ್ ಹಾತ್ ಚುಕ್ಲೊ.

ಕಾಂಯ್ ಥೊಡೆ ಆಮಿ ಜುಬ್ಲೆವಾಚ್ಯಾ ಸಮಾರೋಪಾಕ್ ಕಾಡ್ದಿಯಾಲಾಕ್ ಆಪವ್ನ್ ಸನ್ಮಾನ್ ಕೆಲೊ ಮ್ಹಣ್ ಸಾಂಗುಂಕ್ ಪುರೊ. ಕಾಡ್ದಿಯಾಲಾಕ್ ಸನ್ಮಾನ್ ಕರ್ಚ್ಯಾಕ್ ಕಾರ್ಯಯೋಜನ್ ಆಸ್‌ಲ್ಲೆಂ ಆನಿ ತೆಂ ಹ್ಯಾ ಸಂದರ್ಭಿಂ ಜಾವ್ನ್ ಗೆಲೆಂ ಮ್ಹಣ್ ಚಿಂತಪ್ ದಿಂವ್ಚೆಯ್ ಆಸಾತ್. ಬರೆಂಚ್ ಪೂಣ್ ತ್ಯಾ ಸಮಾರೋಪಾಖಾತಿರ್ ಜುಬ್ಲೆವ್‌ಗೀ? ಜುಬ್ಲೆವಾ ವರ್ಸಾಚೆಂ ಉದ್ಘಾಟನ್ ಜಾಲ್ಲೆಂ ಕಶೆಂ? ಕೆದಾಳಾ? ತ್ಯಾ ಸಂದರ್ಬಾಕ್ ಜೊಕ್ತೊ ಮಹತ್ವ್ ಲಾಬ್ಲೊಗೀ?

ಸಿನೊದಿಚ್ಯಾ ಉದ್ಘಾಟನಾಂತ್ ಜುಬ್ಲೆವ್ ವರ್ಸಾಚೆಂ ಉದ್ಘಾಟನ್ ಜಾಲೆಂ. ಸಿನೊದ್ ಮ್ಹಳ್ಯಾರ್ ಸಾಂಗಾತಾ ವೆಚೆಂ, ದಿಯೆಸೆಜಿಚ್ಯಾ ಗೊವ್ಳಿಕ್ ಪರಿಶದೆಚ್ಯಾ ಪನ್ನಾಸ್ ವರ್ಸಾಂಚೊ ಜುಬ್ಲೆವ್ ಹ್ಯಾ ಸಾಂಗಾತಾ ಪಯ್ಣ್ ಕರ್ಚ್ಯಾ ದಿಶೆಂತ್ ಏಕ್ ವ್ಹಡ್ ಮೆಟ್ ಜಾವ್ಯೆತೆಂ, ತೆಂಯ್ ನಾಂ ಹೆಂಯ್ ನಾಂ ಮ್ಹಣ್ಚೆಪರಿಂ ಜಾಲೆಂಗೀ ವಾ ಹೆಂ ಸಕ್ಕಡ್ ಅಶೆಂಚ್ ಜಾಯ್ಜೆ ಮ್ಹಣ್ ಕಾಂಯ್ ಮಾಂಡಾವಳ್ ಆಸ್‌ಲ್ಲಿಗಿ. ಹ್ಯಾ ಜುಬ್ಲೆವಾಚ್ಯಾ ನಿಬಾನ್ ಪುಣಿ ಸಿನೊಡ್ಯಾಲಿಟಿ ಉಬಿ ಕರ್ಯೆತಿಗೀ?

ಹ್ಯಾ ಜುಬ್ಲೆವಾ ಉಪ್ರಾಂತ್ ಯುವಜಣಾಂಚ್ಯಾ ಜಿವಿತಾಂತ್ ನವಿ ದಿಶಾ ದಿಂವ್ಚ್ಯಾಕ್ ಏಕ್ ಲಾಂಬ್‌ಕಾಳಾಚೆಂ ಕಾರ್ಯಾಯೋಜನ್ ಮಾಂಡುನ್ ತ್ಯಾ ಖಾತಿರ್ ಬಾಂದಾವಳಿ ಆನಿ ಮಾಂಡಾವಳಿ ಕರ್ಚ್ಯಾಕ್ ನಿಧಿ ಆಸಾ ಕರ್ತಾತ್ ಮ್ಹಣ್ ಹಾಂವೆಂ ಆಯ್ಕಾಲೆಂ; ವ್ಹಡ್ ಸಂತೊಸಾಚಿ ಗಜಾಲ್. ಪೂಣ್ ಸವಾಲ್ ಎದೊಳ್‌ಚ್ ಕ್ಯಾಚ್ ದೆಮ್ ಯಂಗ್ (ಸಿಟಿವೈ) ಯೂಥ್ ಎಮ್‌ಪವರ್‌ಮೆಂಟ್ ಟ್ರೈನಿಂಗ್ (ಯೆಟ್ಟ್) ಕೆರೀಯರ್ ಎಡ್ವಾನ್ಸ್‌ಮೆಂಟ್ ಪ್ರೋಗ್ರಾಮ್ (ಕ್ಯಾಪ್ ಸೆಲ್ಲ್) ಅಸಲಿಂ ಯೋಜನಾಂ ಜಾವ್ನ್ ಗೆಲಿಂ. ಝಾಡ್ ಲಾವ್ನ್ ಹರ್ಯೆಕಾ ಹಫ್ತ್ಯಾಕ್ ಏಕ್‌ಪಾವ್ಟಿಂ ಖುಂಟುನ್ ಕಾಡ್ನ್ ಪಾಳಾಂ ಕಿತ್ಲಿಂ ವಾಡ್ಲ್ಯಾಂತ್ ಮ್ಹಣ್ ಪಳಂವ್ಚ್ಯಾ ಭುರ್ಗ್ಯಾಪರಿಂ ಆಮಿ ಜಾಲ್ಯಾರ್ ಕಶೆಂ? ಹರ್‍ಯೆಕ್ ಪಾವ್ಟಿಂ ನವೆಂಚ್ ಏಕ್ ಹಾಡ್ಚೆಪ್ರಾಸ್ ಆಸ್‌ಲ್ಲಿಂಚ್ ಸಂರಚನಾಂ ಕಿತ್ಯಾಕ್ ನವ್ಯಾ ಜಿವಾನ್ ಭರುಂಕ್ ನಜೊ ?

ಜುಬ್ಲೆವಾವೆಳಿಂ ಆಮಿ ಚಿಂತಪ್ ಆಟಂವ್ಕ್ ಸಭಾರ್ ಸಂಗ್ತಿ ಆಸಾತ್. ತಾಂತ್ಲ್ಯಾ’ತಾಂತುಂ ಆಮಿ ಆಮ್ಚಿಂ ಮಹಾನ್ ದೋನ್ ಥಿಕಾಂ ಮ್ಹಣ್ ಅಭಿಮಾನಾನ್ ಸಾಂಗ್ಚ್ಯಾ ಶಿಕ್ಪಾ ಆನಿ ಭಲಾಯ್ಕೆ ವೆವಸ್ತ್ಯಾಂವಿಶಿಂ. ಆಮಿ ತ್ಯಾ ಕಾಳಾರ್ ತಶೆಂ ಕೆಲಾಂ, ಹ್ಯಾ ಕಾಳಾರ್ ಅಶೆಂ ಕೆಲಾಂ ಮ್ಹಣ್ ಭೂತ್ ಕಾಳಾಚಿ ವ್ಹಡ್ವಿಕಾಯ್ ಉಲೊಂವ್ಚಿ ಮಹತ್ವಾಚಿ ನ್ಹಂಯ್ ಬಗಾರ್ ಬದ್ಲುನ್ ಆಸ್ಚ್ಯಾ ಪರಿಗತೆಂತ್ ಆಮ್ಚ್ಯಾ ಲೊಕಾಕ್ ಶಿಕ್ಪಾ ಆನಿ ಭಲಾಯ್ಕೆ ವೆವಸ್ತ್ಯಾಂಥಾವ್ನ್ ಕಿತೆಂ ವ್ಹರ್ತೊ ಫಾಯ್ದೊ ಜಾತಾ. ಸುಕ್ಷಿಮಾಯೆನ್ ಪಳೆಲ್ಯಾರ್ ದಿಯೆಸೆಜಿಚ್ಯಾ ಮುಕೇಲ್ಪಣಾಂತ್ ಆಸ್ಚ್ಯಾ ಶಿಕ್ಪಾ ಸಂಸ್ಥ್ಯಾಂಚಿ ಭಲಾಯ್ಕಿ ಆಜೂನ್ ಬರಿ ಜಾಯ್ಜೆ ಆನಿ ಪ್ರಗತೆಚ್ಯಾ ನವ್ಯಾ ದಿಶೆಕ್ ಆಮಿ ವಚಾಜೆ. ಎಕಾ ಕಾಳಾರ್ ಶಿಕ್ಪಾ ಸಂಬಂಧಿ ಗಜಾಲಿಂನಿ ಆಮಿಂಚ್ ಮುಕೆಲಿ ಆಸ್‌ಲ್ಲ್ಯಾಂವ್, ಆಜ್ ಆಮಿ ಕಾಂಯ್ ಮುಕಾರ್ ನಾಂವ್. ಭರ್ಮಿದೆಚೆಂ ಸೊಡ್ನ್ ಉಲಯ್ಲ್ಯಾರ್ ಧುಂವ್ರಾತೆವ್ಶಿಲೆಂ ಸಾರ್ಕೆಂ ನಿತಳ್ ದಿಸ್ತಾ. ಶಿಕ್ಪಾ ಶೆತಾಂತ್ ನಾಮ್ಣೆಚೆ ಜಾಂವ್ಕ್ ಆಮ್ಚೆಂ ಕಾರ್ಯಕ್ರಮ್ ಕಿತೆಂ ?. ಫಿರ್ಗಜೆಚ್ಯಾ ಆನಿ ದಿಯೆಸೆಜಿಚ್ಯಾ ಗೊವ್ಳಿಕ್ ಪರಿಶದೆಂಧ್ವಾರಿಂ ಲಾಯಿಕ್ ಭಾವಾಡ್ತ್ಯಾಂಚಿ ಆರ್ಥಿಕ್ ಸ್ಥಿತಿ ಸುಧ್ರಾಂವ್ಕ್ ಹ್ಯಾ ಜುಬ್ಲೆವಾ ಸಂದರ್ಭಿಂ ಕಸಲಿಂ ಕಾರ್ಯಾಯೋಜನಾಂ ಆಮಿ ಮಾಂಡ್ಲ್ಯಾಂತ್ ?

ಜುಬ್ಲೆವ್ ಜಾಲೊ. ಪೂಣ್ 50 ವರ್ಸಾಂಚೊ ಅನ್ಭವ್ ಆಮ್ಕಾಂ ಲಾಯಿಕ್ ಭಾವಾಡ್ತ್ಯಾಂಕ್ ಜಾಗ್ರುತ್ ಕರುಂದಿ. ಆಮಿ ಕೊಣಾಚೆಚ್ ಗುಲಾಮ್ ನ್ಹಂಯ್. ಆಮಿ ಸೊಮ್ಯಾಚೆ. ಕಿತ್ಲೆ ತೇಗೀ ತ್ಯಾ ಪ್ರಾಸ್ ವ್ಹರ್ತ್ಯಾನ್ ಆಮಿ, ಕಿತ್ಯಾಕ್ ಆಮಿ ಕುಟಮ್ ಸಾಂಬಾಳ್ತಾಂವ್, ಸಂಗಿಂ ಪವಿತ್ರ್‌ಸಭೆಚ್ಯಾ ಸರ್ವ್ ಮಾಂಡಾವಳಿಂಕ್‌ಯ್ ವಾಡಯ್ತಾಂವ್ ಆನಿ ಆರ್ಥಿಕ್ ತೆಂಕೊ ದೀವ್ನ್ ಸಾಂಬಾಳ್ತಾಂವ್. ದೆಕುನ್ ಹ್ಯಾ ಥೊಡ್ಯಾ ದಿಸಾಂನಿ ಗೊವ್ಳಿಕ್ ಪರಿಶದೆಕ್ ತಾಕಾ ವೋಟ್ ಘಾಲ್ನಾಕಾತ್, ಹಾಕಾ ಜಿಕಯ್ನಾಕಾತ್ ಮಾಗಿರ್ ಹೊ ಉಪಾಧ್ಯಕ್ಷ್ ಜಾಲ್ಯಾರ್ ಮ್ಹಾಕಾ ಕಷ್ಟ್ ಮ್ಹಣ್ ಘರಾಘರಾಂನಿ ಯೇವ್ನ್ ಸಾಂಗ್ತಾಲ್ಯಾಂಚೆಂ ಆಯ್ಕುನ್ ಫಿರ್ಗಜೆಂತ್ ವಾಂಟೆಫಾಂಟೆ ಕರ್ಚೆಂ ಬಿಸ್ಪ್ ಬಾಜಿಲಾನ್ ಸಪ್ಣೆಲ್ಲ್ಯಾ ಗೊವ್ಳಿಕ್ ಪರಿಶದೆಂಚ್ಯಾ ಪರಿಕಲ್ಪನಾಕ್ ವಿರೋದ್! ಸರ್ವ್ ಅಡ್ಕಳೆಂ ಮಧೆಂಯ್ ತಾಣೆ ಮಂಗ್ಳುರ್‍ಚ್ಯಾ ಪವಿತ್ರ್‌ಸಭೆಂತ್ ಪ್ರಜಾತಂತ್ರಾಚ್ಯಾ ಮೊಲಾಂಚೆಂ ನವೆಂ ವಾರೆಂ ಹಾಡ್‌ಲ್ಲೆಂ, ತೆಂ ವಾಯ್ಟಾಂವ್ಕ್ ಕೊಣಾಯ್ಕ್ ಆಮಿ ಆವ್ಕಾಸ್ ದಿಂವ್ಚೊ ನಾಕಾ. ಫಿರ್ಗಜ್ ಆಮ್ಚಿ ತಿ ಎಕ್ವಟಿತ್ ಸಾಂಬಾಳ್ಯಾಂ. ದಿಯೆಸೆಜಿಪ್ರಾಸ್ ಖಂಚೊಯ್ ಮನಿಸ್ (ಕೊಣ್ಂಯ್ ತೊ ಜಾಂವ್) ವ್ಹಡ್ ನ್ಹಂಯ್. ದೆಕುನ್ ಬಿಸ್ಪ್ ಬಾಜಿಲಾನ್ ಆಮ್ಕಾಂ ಉಬೊ ಕರ್ನ್ ದಿಲ್ಲೊ ಆವ್ಕಾಸ್ ಮುಲ್ಯಾಕ್ ಘಾಲುಂಕ್ ಕೊಣಾಯ್ಕ್‌ಯ್ ಸೊಡ್ಚೆಂ ನಾಕಾ. ಹ್ಯಾ ಜುಬ್ಲೆವಾ ಉಪ್ರಾಂತ್ ಆಮಿ ಲಾಯಿಕ್ ಭಾವಾಡ್ತಿ ಪುಣಿಂ ಫಿರ್ಗಜೆಚ್ಯಾ ಆನಿ ದಿಯೆಸೆಜಿಚ್ಯಾ ಬರ‍್ಯಾಪಣಾಕ್ ಆನಿ ಹಾಂಗಾಸರ್ ಪ್ರಜಾತಂತ್ರಾಚೆಂ ಜಿವೆಂ ನಿತಳ್ ವಾರೆಂ ಬರೆಂ ಕರ್ಚ್ಯಾಕ್ ತಕ್ಲಿ ಆಟಯಾಂ.

► ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ