ರಚನಾ ಪ್ರಶಸ್ತ್ಯೊ : ಮಹಾದಾನಿ ಮೈಕಲ್ ಡಿಸೊಜಾ ವರ್ಸಾಚೊ ಎನ್ನಾರೈ

ಪುತ್ತೂರ್ಚೊ ಸುಪುತ್ರ್, ಪ್ರಸ್ತುತ್ ಅಬುದಾಬಿಂತ್ ಉದ್ಯಮಿ, ಮಂಗ್ಳುರಿ ಸಮಾಜಾಂತ್ಲೊ ಮಹಾದಾನಿ ಮಾನೆಸ್ತ್ ಮೈಕಲ್ ಡಿ’ಸೊಜಾ ಹಾಂಕಾ, ಮಂಗ್ಳುರ್ಚೆಂ ಕಥೊಲಿಕ್ ಉದ್ಯಮಿ ಆನಿ ವೃತ್ತಿಪರಾಂಚೆಂ ಸಂಘಟನ್ ರಚನಾ ಹಾಣಿ ವರ್ಸಾಚೊ ಎನ್ನಾರೈ ಪ್ರಶಸ್ತೆಕ್ ವಿಂಚ್ಲಾಂ. ಸಾಂಗಾತಾ ಅಲ್ಲಿಪಾದೆಚೊ ಕೃಷಿಕ್ ಮಾನೆಸ್ತ್ ಲಿಯೊ ಫೆರ್ನಾಂಡಿಸ್, ಉಡುಪಿಚೊ ರಿಯಲ್ ಎಸ್ಟೇಟ್ ಉದ್ಯಮಿ ಮಾನೆಸ್ತ್ ಜೆರಿ ವಿನ್ಸೆಂಟ್ ಡಾಯಸ್, ರಾಮನಗರಾಂತ್ ವಯ್ಜಾಕೀಯ್ ಸೆವಾ ದಿಂವ್ಚಿ ಸಿ| ಡೊ| ಗ್ಲ್ಯಾಡಿಸ್ ಮಿನೇಜಸ್ ಆನಿ ‘ಆವೆ ಮರಿಯಾ ಪ್ಯಾಲೆಟಿವ್ ಕೇರ್’ ಹಾಚಿ ನಿರ್ದೇಶಕಿ ಡೊ| ಲವೀನಾ ಎಮ್. ನೊರೊನ್ಹಾ ಹಾಂಕಾ ವರ್ಸಾಚೊ ಕೃಷಿಕ್, ವರ್ಸಾಚೊ ಉದ್ಯಮಿ, ವರ್ಸಾಚಿ ವೃತ್ತಿಪರ್ ಆನಿ ವರ್ಸಾಚಿ ಸ್ತ್ರೀ ಸಾಧಕಿ ಪ್ರಶಸ್ತ್ಯಾಂಕ್ ವಿಂಚುನ್ ಕಾಡ್ಲಾಂ.

ರಚನಾ ವಾರ್ಷಿಕ್ ಪುರಸ್ಕಾರಾಂಚಿಂ ಘೋಷಣಾ ರಚನಾ ಪ್ರಶಸ್ತಿ ಸಮಿತಿಚೊ ಸಂಚಾಲಕ್ ಸಿ.ಎ.  ರುಡೊಲ್ಪ್ ರೊಡ್ರಿಗಸ್  ಹಾಣಿ ಕೆಲಿ. ಯುವ ಉದ್ಯಮಿಂಕ್ ತೆಂಕೊ ದಿಂವ್ಚ್ಯಾ ಧ್ಯೇಯಾಸವೆಂ 1998 ವ್ಯಾ ಕಥೊಲಿಕ್ ಉದ್ಯಮಿ ಆನಿ ವೃತಿಪರಾಂನಿ ಸಾಂಗಾತಾ ಮೆಳೊನ್ ಸುರು  ಜಾಲ್ಲೊ  ಸಂಸ್ಥೊ  ರಚನಾ ಸುರ್ವಿಲ್ಯಾ ವರ್ಸಾಂನಿ ಹರ್ ವರ್ಸಾ ಆನಿ ಹಾಲಿಂ ದೋನ್ ವರ್ಸಾಂಕ್ ಏಕ್ ಪಾವ್ಟಿಂ ಸಮಾಜೆಂತ್ಲ್ಯಾ ಸಾಧಕಾಂಕ್ ಒಳ್ಕೊನ್ ಮಾನ್ ಪಾಟಮ್ವ್ಚಿ ಸಂಪ್ರದಾಯ್ ಪಾಳುನ್ ಆಯ್ಲಾ ಮ್ಹಳೆಂ. ರಚನಾ ಅಧ್ಯಕ್ಷ್ ಮಾನೆಸ್ತ್ ವಿನ್ಸೆಂಟ್ ಕುಟಿನ್ಹಾ  ಆನಿ ಕಾರ್ಯದರ್ಶಿ ಮಾನೆಸ್ತಿಣ್ ಲವೀನಾ  ಮೊಂತೇರೊ ಹಾಣಿ ಪ್ರಶಸ್ತಿ ವಿಜೇತಾಂಚಿಂ ಒಳಕ್ ಕರುನ್ ದಿಲಿ. ಖಜಾಂಚಿ ಮಾನೆಸ್ತಿಣ್ ಯೂಲಾಲಿಯಾ ಡಿ’ಸೊಜಾ ಆನಿ  ಸಂಗಟಕ್ ಮಾನೆಸ್ತ್ ಲುವಿಸ್ ಜೆ. ಪಿಂಟೊ ಹ್ಯಾ ಸಂದರ್ಬಾರ್ ಹಾಜರ್ ಆಸ್ಲಿಂ.

ಪ್ರಶಸ್ತಿ ಪ್ರದಾನ್ ಕಾರ್ಯೆಂ 2023  ಜನೆರ್  15 ವೆರ್ ಮಂಗ್ಳುರ್ಚ್ಯಾ ಮಿಲಾಗ್ರೆಸ್  ಹವಾನಿಯಂತ್ರಿತ್ ಸಬಾಂಗ್ಣಾಂತ್, ಸಾಂಜೆಚ್ಯಾ ಸ ವೊರಾರ್ ಚಲ್ಚೆಂ ಆಸುನ್ , ಮಂಗ್ಳುರ್ಚೊ ಬಿಸ್ಪ್ ಅ। ಮಾ। ದೊ। ಪೀಟರ್ ಪಾವ್ಲ್ ಸಲ್ಡಾನ್ಹಾ  ಕಾರ್ಯಾಕ್ ಅಧ್ಯಕ್ಷ್  ಆಸ್ತಲೆ. ಎಚ್.ಎಫ್.ಡಿ.ಸಿ. ಬ್ಯಾಂಕಾಚೊ ವರಿಶ್ಟ್  ಕಾರ್ಯಕಾರಿ ಉಪಾಧ್ಯಕ್ಷ್ ಮಾನೆಸ್ತ್ ಸಂಜಯ್ ಡಿ’ಸೊಜಾ ಮುಕೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್ತಲೊ.

ಸೊಜಾಗೆಲ್ಯಾಂ ಕುಟ್ಮಾಂತ್ ಪುತ್ತೂರಾಂತ್ ಜಲ್ಮೊನ್, ‘ಸೊಜಾ ಮೆಟಲ್ ಮಾರ್ಟ್’ ಮ್ಹಳ್ಳ್ಯಾ ಸಂಸ್ಥ್ಯಾಸವೆಂ ಉದ್ಯಮ್ ಶೆತಾಂತ್ ಸುರ್ವಾತ್ ಕರುನ್, ಪುತ್ತೂರ್ ಥಾವ್ನ್ ಮಂಗ್ಳುರಾಕ್ ಯೇವ್ನ್, ‘ಸೊಜಾ ಇಲೆಕ್ಟ್ರೊನಿಕ್ಸ್ ‘ ಮಾಳಯ್ ಉಗ್ತಿ ಕರುನ್, ಉದ್ಯಮ್ ವಿಸ್ತಾರಾಂವ್ಕ್ ದುಬಯ್ ಪಯ್ಣ್ ಕೆಲ್ಲ್ಯಾ ಮಾನೆಸ್ತ್ ಮಾಯ್ಕಲ್ ಡಿಸೊಜಾನ್ ಆಜ್ ಖಾಡಿಯೆ ಗಾಂವಾಂತ್ ಎಚ್‌ಎ‌ಎಸ್ ಹೊಸ್ಪಿಟ್ಯಾಲಿಟಿ ಮ್ಹಳ್ಳೊ ಜಯ್ತ್ ಉದ್ಯಮ್ ಸಂಸ್ಥೊ ಉಬೊ ಕೆಲಾ. ಹ್ಯಾ ಸಂಸ್ಥ್ಯಾಚಾ  ಮಾಂತಾಖಾಲ್ ‘ಡ್ಯೂನ್ಸ್’ ಆನಿ ‘ಐವರಿ ಗ್ರಾಂಡ್’  ಬ್ರಾಂಡ್ ಹೊಟೆಲ್ ಅಪಾರ್ಟ್‌ಮೆಂಟಾಂ ಚಲುನ್ ಆಸಾತ್. ಹ್ಯಾ ಸಂಸ್ಥ್ಯಾಂನಿ ಹಜಾರೊಂ ಲೊಕಾನ್ ಕಾಮ್ ಕರ್ನ್ ಜಿವಿತ್ ಬಾಂದುನ್ ಹಾಡ್ಲಾಂ. ದುಬಯ್ ಆನಿ ಆಸ್‌‍ಪಾಸ್ಚ್ಯಾ ಗಾಂವಾಂನಿ ಚಲ್ಚ್ಯಾ ಚಡವತ್ ಕೊಂಕ್ಣಿ ಕಾರ್ಯಾಂಕ್ ಮಾನೆಸ್ತ್ ಮೈಕಲ್ ಡಿ’ಸೊಜಾ ಮೊಟೊ ತೆಂಕೊ ದಿತಾ ಮಾತ್ ನಯ್, ಮಂಗ್ಳುರ್ ಆನಿ ಉಡುಪಿ ದಿಯೆಸೆಜಿಚ್ಯಾ ಚಡಾವತ್ ಫಿರ್ಗಜಾಂಕ್, ಶಿಕ್ಪಾಸಂಸ್ಥ್ಯಾಂಕ್, ಸಮಾಜಿಕ್ ಸೇವಾಸಂಸ್ಥ್ಯಾಂಕ್ ವ್ಹಡ್ ದೆಣ್ಗಿ ದಿತಾ.

2013 ವ್ಯಾ ವರ್ಸಾ ಮಂಗ್ಳುರ್ ದಿಯೆಸೆಜಿಚ್ಯಾ ಸಿಒಡಿಪಿ ಸಂಸ್ಥ್ಯಾಂತ್ ರುಪಯ್ 25 ಕೊರೊಡಾಂಚಿಂ ‘ಎಡುಕೇರ್’ ಶಿಕ್ಪಾನಿಧಿ ಸ್ಥಾಪನ್ ಕರುನ್, ಉಂಚ್ಲೆಂ ಶಿಕಪ್ ಜೊಡ್ಚ್ಯಾ ವಿದ್ಯಾರ್ಥಿಂಚ್ಯಾ ಶಿಕ್ಪಾಕ್ ಕುಮಕ್ ದಿತಾ. ಆಜ್ ಮೆರೆನ್ ಹ್ಯಾ ನಿಧಿ ಥಾವ್ನ್ 3,500 ವಿದ್ಯಾರ್ಥಿಂನಿ ಫಾಯ್ದೊ ಜೊಡ್ಲಾ. ಆರ್ಥಿಕ್ ಆನಿ ಯೆವ್ಜಣೆ ಗಜಾಲಿಂನಿ ಜಾಯ್ತ್ಯಾ ವರ್ಸಾಂಚೊಂ ಅಪಾರ್ ಅನ್ಭೊಗ್ ಆಸ್ಚೊ ನಿವೃತ್ತ್ ದಕ್ಶ್ ಬ್ಯಾಂಕ್ ಅಧಿಕಾರಿ ಬೆಂದುರ್ ಫಿರ್ಗಜೆಚೊ ಮಾನೆಸ್ತ್ ಸ್ಟೀಫನ್ ಪಿಂಟೊ – ‘ಎಡುಕೇರ್’ ಜವಾಬ್ದಾರಿ ಸಾಂಬಾಳುನ್ ಆಸಾ. ಹ್ಯಾ ಶಿವಾಯ್ ಸಿಒಡಿಪಿ ಸಂಸ್ಥ್ಯಾಂತ್ ರುಪಯ್ 10 ಕೊರೊಡಾಂಚಿಂ ಅನ್ಯೇಕ್ ನಿಧಿ ಸ್ಥಾಪನ್ ಕರುನ್  ಸಮಾಜಿಕ್ ಸಶಕ್ತೀಕರಣಾಚ್ಯಾ ದಿಶೆನ್ ವಾವ್ರುಂಕ್ ಸ್ವ ಕುಮ್ಕೆ ಪಂಗ್ಡಾಂಕೀ ಮಾನೆಸ್ತ್ ಮೈಕಲ್ ಸೊಜಾನ್ ಚಾಲನ್ ದಿಲಾಂ ಆಸುನ್, ಹ್ಯಾ ಯೆಜ್ವಣೆಥಾವ್ನ್ ಚಡುಣೆಂ 10,000 ಕುಟ್ಮಾಂನಿ ಆದಾರ್ ಜೊಡುನ್ ಘೆತ್ಲಾಂ.

ಹೆ ಭಾಯ್ರ್ ಖಾಸ್ಗೆನ್ ಘರಾಂಚ್ಯಾ ದುರುಸ್ತೆಕ್, ಪಿಡೆಚ್ಯಾ ಚಿಕಿತ್ಸೆಕ್ ಆನಿ ವಿಶೇಸ್ ಸಾಮರ್ಥೆಚ್ಯಾ ಭುರ್ಗ್ಯಾಂಚ್ಯಾ ಇಸ್ಕೊಲಾಕೀ ಮಾನೆಸ್ತ್ ಮೈಕಲ್ ಡಿಸೊಜಾ ವ್ಹಡಾ ಮಾಪಾಚಿ ಐವಜ್ ದಾನ್ ಕರುನ್ ಆಸಾ. ಸರ್ವ್ ವರ್ಗಾಚ್ಯಾ ಲೊಕಾಕ್ ಬರಿ ಚಿಕಿತ್ಸಾ ಮೆಳಾಜಾಯ್ ಮ್ಹಳ್ಳ್ಯಾ ಇರಾದ್ಯಾನ್ ಆಸ್ಪತ್ರ್ಯಾಂಕ್ ಆನಿ ಚಿಕಿತ್ಸಾ ಕೆಂದ್ರಾಂಕ್ ಆಧುನಿಕ್ ಉಪಕರಣಾಂ ದಾನ್ ದೀವ್ನ್ ಆಸಾ. ವಸ್ತೆಕ್, ಶಿಕ್ಪಾಕ್, ಭಲಾಯ್ಕೆಕ್ ಮಾತ್ ನಯ್, ಯವಜಣಾಂನಿ ಸಿವಿಲ್ ಸರ್ವಿಸ್ ಪರೀಕ್ಷಾ ಬರವ್ನ್, ಸರ್ಕಾರಿ ಅಧಿಕಾರಿ ಜಾವ್ನ್ ಸಮಾಜ್ ಸಶಕ್ತ್ ಜಾಯ್ಜೆ ಮ್ಹಳ್ಳ್ಯಾ ಪಯ್ಸಾದಿಶ್ಟಿನ್ ಮಾನೆಸ್ತ್ ಮೈಕಲ್ ಡಿಸೊಜಾನ್ ಮಂಗ್ಳುರ್ಚ್ಯಾ ಸಾಂ. ಲುವಿಸ್ ಕೊಲೆಜಿಂತ್ ಸಿವಿಲ್ ಸರ್ವಿಸ್ ಅಕಾಡೆಮಿಕ್ ಚಾಲನ್ ದಿಲಾಂ. ಹ್ಯಾ ಅಕಾಡೆಮಿಂತ್ ಯುಪಿಎಸ್‌ಸಿ, ಕೆಪಿಎಸ್‌ಸಿ ಆನಿ ಹೆರ್ ಸಿವಿಲ್ ಸರ್ವಿಸ್ ಪರೀಕ್ಷೆಂಕ್ ತಯಾರಿ ಕರುಂಕ್ ಯುವಜಣಾಂಕ್ ತರ್ಭೆತ್ ಕರ್ತಾತ್. ಸಾಂಗಾತಾಚ್ ಕೊಂಕ್ಣಿ ಆವಯ್ ಭಾಶೆಚ್ಯಾ ಮೊಗಾನ್, ಕೊಂಕ್ಣಿ ಸಾಹಿತ್ಯ್ ಆನಿ ಸಂಸ್ಕೃತೆಚ್ಯಾ ಉದರ್ಗತೆ ಖಾತಿರ್ ವಾವುರ್ಚ್ಯಾ ಕೊಂಕ್ಣಿ ಬರಯ್ಣಾರಾಂಕ್ ಆನಿ ಕಲಾಕಾರಾಂಕ್ ಮಾನೆಸ್ತ್ ಮೈಕಲ್ ಡಿಸೊಜಾ ಪ್ರೋತ್ಸಾಹ್, ಪಾಟಿಂಬೊ ದೀವ್ನ್ ಆಸಾ.

ಉಡುಪಿಂತ್ ‘ಮಾಂಡವಿ ರಿಯಲ್ ಎಸ್ಟೇಟ್ ಆನಿ ಡೆವಲಪರ್ಸ್’ ಸಂಸ್ಥೊ ಚಲವ್ನ್ ಆಸ್ಚ್ಯಾ ಮಾನೆಸ್ತ್ ಜೆರಿ ವಿನ್ಸೆಂಟ್ ಡಾಯಸ್ ಹಾಣೆ ಉಡುಪಿ ಆನಿ ಮಣಿಪಾಲ್ ಪರಿಸರಾಂತ್ ‘ಮಾಂಡವಿ ಟೈಮ್ ಸ್ಕ್ವೇರ್’ ಪ್ರಪ್ರಥಮ್ ಆನಿ ಜಯ್ತ್ ಮೊಲ್ ಬಾಂದುನ್ ದಾಕ್ಲೊ ರಚ್ಲಾ. ಹ್ಯಾ ಮೊಲಾಂತ್ ಸ್ಟಾರ್ ದರ್ಜೆಚೆಂ ಹೊಟೆಲ್ ಆಸಾ. ಸಾಂಗಾತಾಚ್ 4 ಮಲ್ಟಿಫ್ಲೆಕ್ಸ್ ಥಿಯೆಟರಾಂಚೆಂ ಬಾಂದಪ್ ಬಾಂದುನ್ ಆಸಾ.

1995 ವ್ಯಾ ವರ್ಸಾ ಬಾಂದ್ಪಾ ಉದ್ಯಮಾಚಿ ಸುರ್ವಾತ್ ಕೆಲ್ಲ್ಯಾ, ಉಡುಪಿ ಸಂತೆಕಟ್ಟೆ ಫಿರ್ಗಜೆಚ್ಯಾ ಮಾನೆಸ್ತ್ ಡಾಯಸಾನ್ ಆಜ್ ಮೆರೆನ್ ಉಡುಪಿ ಪರಿಸರಾಂತ್ 50 ಬಾಂದ್ಪಾಂ ಉಬಾರ್ಲ್ಯಾಂತ್ ಆಸುನ್ 4,000 ಪರ್ಯಾಂತ್ ಫ್ಲೆಟಾಂ 250 ಪರ್ಯಾಂತ್ ವೆಪಾರಿ ಮಾಳಿಯೊ ಉಬಾರ್ಲ್ಯಾತ್. ತಾಣೆ ಮಣಿಪಾಲಾಂತ್ ಉಬಾರ್ಲೆಲ್ಯಾ ‘ಮಾಂಡವಿ ರೊಯಲ್ ಪ್ರಿನ್ಸ್ ‘ ಇಮಾರತೆಕ್ ಕ್ರೆಡಾಯ್ ಕೇರ್ ಅತ್ಯುತ್ತಮ್ ಬಾಂದಪ್ ಪ್ರಶಸ್ತಿ ಫಾವೊ ಜಾಲ್ಯಾ. ಬಾಂದ್ಪಾ ಉದ್ಯಮಾ ಬರಾಬರ್ ತೋ ಜೆ.ಜೆ. ಇಂಡಸ್ಟ್ರ‍ೀಸ್ ಮ್ಹಳ್ಳ್ಯಾ ನಾಂವಾರ್ ಸೊಲಿಡ್ ಬ್ಲೊಕ್ ಉದ್ಯಮ್ ಅನಿ ಜೆಜೆ ಸಿನೆ ನಿರ್ಮಾಣ್ ಸಂಸ್ಥ್ಯಾ ಮುಕಾಂತ್ರ್ ಸಿನೆಮಾ ನಿರ್ಮಾಣ್ ಕರ್ತಾ. ‘ಮಹಾನದಿ’ ಆನಿ ‘ಡಿಕೆ’ ತಾಚ್ಯಾ ಬ್ಯಾನರಾಖಾಲ್ ನಿರ್ಮಾಣ್ ಜಾಲ್ಲಿ ಕನ್ನಡ ಸಿನೆಮಾ ಜಾವ್ನಾಸಾತ್.

ಪ್ರಸ್ತುತ್ ಉಡುಪಿಚ್ಯಾ ಕ್ರೆಡಾಯ್ ಘಟಕಾಚೊ ಅಧ್ಯಕ್ಷ್ ಜಾವ್ನಾಸ್ಚೊ ಮಾನೆಸ್ತ್ ಡಾಯಸ್, ಲಯನ್ಸ್ ಕ್ಲಬ್ ಆನಿ ಹೆರ್ ಸಮಾಜ್ ಸೇವಾ ಸಂಸ್ಥ್ಯಾಂ ಮುಕಾಂತ್ರ್ ಸಮಾಜ್ ಸೆವೆಂತೀ ಮೆತೆರ್ ಆಸಾ. ತಾಚಿ ಸಮಾಜ್ ಸೆವಾ ಮಾಂದುನ್ ಘೆವ್ನ್ ಉಡುಪಿಚ್ಯಾ ಅದಮಾರ್ ಮೊಠಾ ಥಾವ್ನ್, ಬ್ರಾಹೇಯ್ನ್ ಬಿಲ್ಲವ ಸಂಗಾಥಾವ್ನ್, ಮಂಗ್ಳುರ್ಚ್ಯಾ ಬಂಟರ ಸಂಗಮಾಥಾವ್ನ್ ಪ್ರಶಸ್ತ್ಯೊ – ಪುರಸ್ಕಾರ್ ಫಾವೊ ಜಾಲ್ಯಾತ್. ಬೆಂಗ್ಳುರ್ಚ್ಯಾ ನ್ಯಾಶನಲ್ ಇನ್ಸಿಟಿಟ್ಯೂಟ್ ಒಫ್ ಸೋಶಿಯಲ್ ಎಂಡ್ ಇಕೊನೊಮಿಕ್ ರಿಫೊರ್ಮ್ಸ್ ಹಾಣಿ ಸಮಾಜ ಸೇವಾ ರತ್ನ ಪುರಸ್ಕಾರ್ ಪಾಟಯ್ಲಾ ತರ್, ಅಕಾಡೆಮಿ ಒಫ್ ಗ್ಲೋಬಲ್ ಪೀಸ್ ಹಾಣಿ  ಮಾನೆಸ್ತ್ ಜೆರಿ ವಿನ್ಸೆಂಟ್ ಡಾಯಸ್ ಹಾಕಾ ಗವ್ರವ್ ಡೊಕ್ಟರೇಟ್ ಪದ್ವಿ ದೀವ್ನ್ ಮಾನ್ ಕೆಲಾ.

ಬೆಳ್ಮಣ್ ಫಿರ್ಗಜೆಂತ್ ಜಲ್ಮೊನ್, ಬೆಂಗ್ಳುರ್ಚ್ಯಾ ಪ್ರತಿಷ್ಠಿತ್ ಸೈಂಟ್ ಜೋನ್ಸ್ ಮೆಡಿಕಲ್ ಕೊಲೆಜಿಂತ್ ಎಮ್.ಬಿ.ಬಿ.ಎಸ್ ಆನಿ ಡಿ.ಜಿ.ಒ ಶಿಕಪ್ ಜೊಡುನ್, ಆಂದ್ರ ಪ್ರದೇಶಾಂತ್ ವೃತ್ತೆ ಜೀವನ್ ಸುರು ಕರುನ್, ಕರ್ನಾಟಕಾಚ್ಯಾ ಪಾಟಿಂ ಉರ್ಲೆಲ್ಯಾ ಗ್ರಾಮಿಣ್ ಪ್ರದೆಶಾಂನಿ ನಿರಂತರ್ ತೀಸ್ ವರ್ಸಾಂ ದುಬ್ಳ್ಯಾ ಧಾಕ್ಟ್ಯಾ ಆನಿ ಆದಿವಾಸಿ ಲೊಕಾಕ್ ತಜ್ಞ್ ವಯ್ಜಾಕೀಯ್ ಸೆವಾ ದಿಲ್ಲಿ ಕೀರ್ತ್ ಸಿ| ಡೊ| ಗ್ಲ್ಯಾಡಿಸ್ ಮಿನೇಜಸ್ ಹಿಕಾ ಫಾವೊ ಜಾತಾ. ಪಾಟ್ಲ್ಯಾ ತೀಸ್ ವರ್ಸಾಂ ಪಾಸುನ್ ಸರಾಸರ್, ದಿಸಾಕ್ 150 ಲೊಕಾಕ್ ತಿ ಚಿಕಿತ್ಸಾ ದಿತಾ, ಹಫ್ತ್ಯಾಕ್ 80 ಬಾಂಳ್ತೆರ್ ಕರ್ತಾ. ಗ್ರಾಮೀಣ್ ಪ್ರದೇಶಾಂನಿ ಲಂಬಾಣಿ, ಗೊಲ್ಲ, ಗೌರಿ, ಟಿಬೆಟಿ, ಸಿದ್ದಿ ಅಶೆಂ ಸಮಾಜೆಂತ್ ಮೆರೆರ್ ಜಿಯೆಂವ್ಬ್ಚ್ಯಾ ಲೊಕಾಮಧೆಂ ತಿ ವಾವುರ್ತಾ. ತಿಣೆ ಸೆವಾ ದಿಲ್ಲ್ಯಾ ಹಳ್ಳೆಂನಿ ಚಡುಣೆ 300  ಸ್ತ್ರೀಯಾಂಕ್ ಬಾಂಳ್ತೆರ್ ಕರುಂಕ್ ತಿಣೆಂ ತರ‍್ಬೆತ್ ಕೆಲಾಂ. 200 ಭುರ್ಗ್ಯಾಂಕ್ ಭಲಾಯ್ಕೆ ಕಾರ್ಯಕರ್ತ್ ಮ್ಹಣ್ ತರ‍್ಭೆತ್ ಕರುನ್, ಕಾಮಾಚೆ ಅವ್ಕಾಸ್ ರಚುನ್ ದಿಲ್ಯಾತ್. ಪ್ರಸ್ತುತ್ ತಿ ರಾಮನಗರ್, ಸೊಲ್ಲೂರ್ ಹಾಂಗಾಸರ್  ತಿ  ಸೆವಾ ದೀವ್ನ್ ಆಸಾ.

ಅಲ್ಲಿಪಾದೆಚೊ ಲಿಯೊ ಫೆರ್ನಾಂಡಿಸ್ ಮಾಡ್ – ಮಾಡಿಯೊ, ಗೊರ್ವಾಂ ಪೊಸಪ್, ಆಂಗಡ್ ಆನಿ ಕೆಟರಿಂಗ್ ಅಶೆಂ ಕೃಷಿ ಆನಿ ಉದ್ಯಮ್ ದೊನೀ ಶೆತಾಂನಿ ಹೆಳ್ಳಾ. 20 ಎಕ್ರೆ ಸುವಾತೆರ್ 15 ಹಜಾರ್ ಮಾಡಿಯೊ ಆನಿ 1 ಹಜಾರ್ ಮಾಡ್ ಲಾವ್ನ್ ವರ್ಸಾಕ್ 350 ಕ್ವಿಂಟಲ್ ಬೆಡೊ ಅನಿ 25,000 ನಾರ್ಲ್ ವಿಕ್ತಾ. ಸಾಂಗಾತಾ ಮಿರಿಯಾಂಚಿಂ ಕೃಷಿಯ್ ಕರುನ್ ಆಸಾ. ‘ಆಂಟನಿ ಟ್ರೇಡರ್ಸ್’ ಮ್ಹಳ್ಳ್ಯಾ ಸಂಸ್ಥ್ಯಾ ಮುಕಾಂತ್ರ್ ಥಳೀಯ್ ರಯ್ತಾಂಥಾವ್ನ್ ವಾಜ್ಬಿ ಮೋಲಾಕ್ ಬೆಡೊ ಮೊಲಾಕ್ ಘೆವ್ನ್ ರಖಂ ಬಜಾರಾಕ್ ಪಾವಾಯ್ತಾ. 1,000 ಲೊಕಾಕ್ ಸುಧಾರ್ಸುಂಚೆಂ ‘ಫೆರ್ನಾಂಡಿಸ್ ಕೇಟರಿಂಗ್’ ಉದ್ಯಮ್ ತೋ ಚಲಯ್ತಾ. ತಾಚೆಲಾಗಿಂ ಜರ್ಸಿ, ಗೀರ್, ಎಚ್.ಎಫ್ ಅಶೆಂ 100 ಲಾಗಿಂ ಗೊರ್ವಾಂ ಆನಿ ಪಾಡಿಯೊ ಆಸಾತ್. ದಿಸಾಕ್ 600 ಲೀಟರ್ ದೂದ್ ಸರಪಾಡಿ ಆನಿ ಅಲ್ಲಿಪಾದೆ ಸೊಸಾಯ್ಟಿಂಕ್ ತೋ ವಿಕ್ತಾ. 2021 -22 ಹ್ಯಾ ವರ್ಸಾ ಅತ್ಯಧಿಕ್ ದೂದ್ ವಿಕ್‌ಲ್ಲಿ ಕೀರ್ತ್ ತಾಕಾ ಫಾವೊ ಜಾತಾ. ಗೊರ್ವಾಂ ಸಾಂಗಾತಾ ಪಾಡೆ ಆನಿ ಕಾಂಬ್ಳಾಚೆ ರೆಡೆಯ್ ತಾಣೆ ಪೊಸ್ಲ್ಯಾತ್.

ಸಮಾಜ್ ಸೆವಾಶಾಸ್ತ್ರಾಂತ್ ಸ್ನಾತಕೋತ್ತರ್ ಆನಿ ಪಿ.ಎಚ್.ಡಿ. ಸನದ್ ಜೊಡುನ್, ಅಮೆರಿಕಾಂತ್ ಪ್ರಾಧ್ಯಪಕಿ ಆನಿ ಚಿಕಿತ್ಸಕಿ ಜಾವ್ನ್ ಸೆವಾ ದೀವ್ನ್ ಅಪಾರ್ ಸೆವೆ ಅನ್ಭೊಗ್ ಆಸ್ಚಿ ಡೊ| ಲವೀನಾ ಎಮ್. ನೊರೊನ್ಹಾ, ಮಂಗ್ಳುರಾಂತ್ ‘ಆವೆ ಮರಿಯಾ ಪ್ಯಾಲೇಟಿವ್ ಕೇರ್’ ಮ್ಹಳ್ಳೊ ಸಂಸ್ಥೊ ಚಲವ್ನ್ ಆಸಾ. ಹ್ಯಾ ಕೇಂದ್ರಾಂತ್ ಜಾತ್ ಧರ್ಮ್ ಬೇದ್ ಭಾವ್ ನಾಸ್ತಾನಾ, ಮರ್ಣಾತಣಿರ್ವ್ ಆಸೊನ್ ಕಠೀಣ್ ದುಕಿನ್ ವಳ್ವಳ್ಚ್ಯಾ 15 ಜಣಾಂಕ್ ಕಸಲ್ಯಾಚ್ ಶುಲ್ಕಾವಿಣೆ ಮೊಗಾಚಿ ಜತನ್ ಮೆಳ್ತಾ. ಕ್ಯಾನ್ಸರ್, ಲಿವರ್, ಕಿಡ್ನಿ, ಡಿಮೆನ್ಸಿಯಾ ಅಸಲ್ಯಾ ಗಡೀಸ್ ಸಮಸ್ಸ್ಯಾಂನಿ ವಳ್ವಳ್ತೆಲ್ಯಾಂಚಿ ತಜ್ಞ್ ವಯ್ಜ್, ನರ್ಸಾಂ ಆನಿ ಕುಮ್ಕೆದಾರಾಂ ಸೆವಾ ಕರ್ತಾತ್.

ಬೆಂಗ್ಳುರ್ಚ್ಯಾ ನಿಮ್ಹಾನ್ಸ್ ಆನಿ ಅಮೆರಿಕಾಚ್ಯಾ ಇಲಿಯನೋಸ್ ವಿಶ್ವವಿದ್ಯಾಲಯಾಂತ್ ಉಂಚ್ಲೆಂ ಶಿಕಪ್ ಜೊಡುನ್, ಥಂಯ್ಚ್ ಕಾಮಾರ್ ಆಸ್‌‍ಲ್ಲಿ ಡೊ|ಲವೀನಾ ಆಪ್ಲ್ಯಾ ಬಾಪಯ್ಚಿ ಜತನ್ ಘೆಂವ್ಕ್ ಭಾರತಾಕ್ ಆಯಿಲ್ಲಿ, ಹಾಂಗಾಚ್ಯಾ ಲೊಕಾಚೆ ಕಶ್ಟ್ ಪಳೆಂವ್ಕ್ ಜಾಯ್ನಾಸ್ತಾನಾ, ಪರತ್ ವಿದೇಶಾಕ್ ವಚಾನಾಸ್ತಾನಾ ಥಳೀಯ್ ಲೊಕಾಚ್ಯಾ ಸಹಕಾರಾನ್ ಆವೆ ಮರಿಯಾ ಕೇಂದ್ರ್ ಸ್ಥಾಪನ್ ಕೆಲೊ. ಅಮೆರಿಕಚ್ಯಾ ಕ್ರೆಸ್ಟ್ ಇಂಟರ್‌ನ್ಯಾಶನಲ್ ಹ್ಯಾ ಸಂಸ್ತ್ಯಾಚಿ ಸ್ಥಾಪಕ್ ಅಧ್ಯಕ್ಶ್ ಜಾವ್ನಾಸ್ಚಿ ತಿ ಪ್ರಸ್ತುತ್ ಇಂಡಿಯನ್ ಅಸೊಶಿಯೇಶನ್ ಒಫ್ ಪ್ಯಾಲೇಟಿವ್ ಕೇರ್ ಹಾಚಿ ಸಾಂದೊ ಜಾವ್ನಾಸಾ. ಮತಿಚಿ ಭಲಾಯ್ಕಿ ಆನಿ ಶಿಬಂದಿ ನಿರ್ವಹಣ್ ಅಸಲ್ಯಾ ಗಜಾಲಿಂನಿ ಕ್ಲಿನಿಕಲ್ ಅನ್ಭೊಗ್ ಆಸ್ಚ್ಯಾ ತಿಣೆ ಜಾಯ್ತೆ ಬೂಕ್ ಬರಯ್ಲ್ಯಾತ್ ಆನಿ  ಪ್ರಬಂದ್  ಮಂಡನ್ ಕೆಲ್ಯಾಂತ್.