“ದಕ್ಶ್ ಆಡಳ್ತ್ಯಾ ಮಂಡಳಿ, ಸಮರ್ಪಿತ್ ಶಿಬಂದಿ, ಪ್ರೊತ್ಸಾಹ್ ದಿಂವ್ಚೆ ಗ್ರಾಹಕ್ ಆನಿ ಫಲಾನುಭವಿ – ಹೆ ಜಾವ್ನಾಸ್ತಾತ್ ತೀನ್ ಬಳಿಷ್ಠ್ ಖಾಂಬೆ ಸೆವಾಉದ್ಯಮಾಚೆ. ಎಮ್.ಸಿ.ಸಿ. ಬ್ಯಾಂಕಾಂತ್ ದಕ್ಶ್ ಆಡಳ್ತ್ಯಾ ಮಂಡಳಿ, ಸಕ್ಷಮ್ ಅಧಿಕಾರಿವರ್ಗ್ ಆನಿ ಶಿಬಂದಿ, ಸದಾಂಚ್ ಪಾಟಿಂಬೊ ದಿಂವ್ಚೆ ಗ್ರಾಹಕ್ ಆಸಾತ್ ಮ್ಹಳ್ಳೆಂ ಆಮ್ಚ್ಯಾ ಸಮಾಜೆಕ್ ಫಾವೊ ಜಾಲ್ಲೆಂ ಭಾಗ್” ಮ್ಹಣಾಲೊ ಉಡುಪಿ ಧರ್ಮ್ಪ್ರಾಂತ್ಯಾಚೊ ಧರ್ಮಾಧ್ಯಕ್ಷ್ ಅ| ಮಾ| ದೊ| ಜೆರಾಲ್ಡ್ ಐಸಾಕ್ ಲೋಬೊ.
ಧರ್ಮಾಧ್ಯಕ್ಶ್ ದೊ| ಲೋಬೊ, ಮಂಗ್ಳುರ್ ಮಿಲಾರ್ ಕೊಲೆಜಿಚ್ಯಾ ಉಗ್ತ್ಯಾ ಮಯ್ದಾನಾರ್, ಆಯ್ತಾರಾ, 27 ನವೆಂಬರ್ 2022 ವೆರ್, ಎಮ್.ಸಿ.ಸಿ. ಬ್ಯಾಂಕಾಚ್ಯಾ ಶತಮಾನೋತ್ತರ್ ದಶಮಾನೊತ್ಸವ್ ಸಂಭ್ರಮಾಚೆಂ ಆಶೀರ್ವಚನ್ ಕರುನ್ ಉಲಯ್ತಾಲೊ.
ಮುಕಾರುನ್ ತಾಣೆ ಮ್ಹಳೆಂ ” ಸೆವೆಚೆಂ ಉದ್ಯಮ್ ಶೆತ್ ಆಜ್ ವೆಗಾನ್ ವಾಡ್ತೇ ಆಸಾ. ಖಂಯ್ಚೊ ಸಂಸ್ಥೊ ಗ್ರಾಹಕಾಂಕ್ ಬರಿ ಆನಿ ಶ್ರೇಷ್ಠ್ ಸೆವಾ ದಿಂವ್ಕ್ ಸಕ್ತಾ ತೋ ಸಂಸ್ಥೊ ಮೊಳ್ಬಾ ಊಂಚಾಯೆಕ್ ವಾಡ್ತಾ. ಸೆವಾ ಉದ್ಯ್ಯಮಾಚಿ ಊಂಚಾಯ್ ಮೆಜೂಂಕ್ ಸೆವೆಚ್ಯಾ ದರ್ಜೆ ಶಿವಾಯ್ ದುಸ್ರೆಂ ಮಾಪ್ ನಾ. ಆಮ್ಚ್ಯಾ ಎಮ್.ಸಿ.ಸಿ. ಬ್ಯಾಂಕಾ ವಿಶ್ಯಾಂತ್ ಸಾಂಗ್ಚೆಂ ತರ್ ಹಾಂಗಾಸರ್ ಮೆಳ್ಚಿ ಸೆವಾ ಖಂಯ್ಚ್ಯಾಯ್ ಹೆರ್ ಬ್ಯಾಂಕಾಂನಿ ಮೆಳಾನಾ.”
ಗ್ರಾಹಕಾಂಕ್, ಸಾಂದ್ಯಾಕ್, ಆಡಳ್ತ್ಯಾ ಮಂಡಳೆಕ್ ಆನಿ ಶಿಬಂದೆಕ್ ಎಕ್ಶೆಂ ಧಾ ವರ್ಸಾಂಚ್ಯಾ ಸಂಭ್ರಮಾಚೆ ಉಲ್ಲಾಸ್ ಪಾಟವ್ನ್ ಧರ್ಮಾಧ್ಯಕ್ಷ್ ಡೊ| ಲೋಬೊನ್ – “ಅಂಬಾನಿಕ್ ಏಕ್ ಸಪಣ್ ಆಸ್ಲೆಂ, ಪಯ್ಲ್ಯಾ ಫಂಗ್ತೆಚೊ ಉದ್ಯಮಿ ಜಾಯ್ಜೆ ಮ್ಹಣೊನ್. ಪೂಣ್ ತಶೆಂ ಜಾಲ್ಯಾ ಉಪ್ರಾಂತ್ ತಾಕಾ ತೆಂ ಸ್ಥಾನ್ ಉರವ್ನ್ ಘೆಂವ್ಕ್ ದಿಸಾಚಿಂ ಚಡಿತ್ ವೊರಾಂ ಕಾಮ್ ಕರಿಜೆ ಪಡ್ಲಾಂ. ಸಾಧನ್ ಕರ್ಚೆಂ ತಿತ್ಲೆಂಚ್, ಕೆಲ್ಲೆಂ ಸಾಧನ್ ಉರವ್ನ್ ಘೆಂವೆಂಯ್ ಗರ್ಜೆಚೆಂ. ಆಡಳ್ಯ್ತ್ಯಾ ಮಂಡಳೆಚೆ ಸಾಂದೆ ಯೆತೆಲೆ – ವೆತೆಲೆ, ಪೂಣ್ ಹೆಂ ಬ್ಯಾಂಕ್ ಆಮ್ಚೆಂ. ಹ್ಯಾ ಬ್ಯಾಂಕಾನ್ ಕೆಲ್ಲೆಂ ಸಾಧನ್ ಉರವ್ನ್ ಘೆಂವ್ಚೆಂ . . . ಹ್ಯಾ ಬ್ಯಾಂಕಾಚೆ ಗ್ರಾಹಕ್ ಆನಿ ಸಾಂದೆ ಜಾವ್ನ್ ಆಮ್ಚೆಂ ಕರ್ತವ್ಯ್ ಜಾವ್ನಾಸಾ. ದೆಕುನ್ ಆಮಿ ಸಗ್ಳ್ಯಾಂನಿ ಆಮ್ಚ್ಯಾ ಎಮ್.ಸಿ.ಸಿ. ಬ್ಯಾಂಕಾಕ್ ಪ್ರೋತ್ಸಾವ್ ಆನಿ ಪಾಟಿಂಬೊ ದಿಂವ್ಚೊ ಗರ್ಜೆಚೊ. ಆಮ್ಚ್ಯಾ ಪ್ರೋತ್ಸಾಹಾನ್ ಆಮ್ಚೆಂ ಬ್ಯಾಂಕ್ ದೇಶಾಂತ್ ಅಗ್ರ್ ಸ್ಥಾನಾಕ್ ಫಾವೊಂದೀ” ಮ್ಹಣ್ ಬರೆಂ ಮಾಗ್ಲೆಂ.
ಪಣ್ತಿ ಪೆಟವ್ನ್ ಕಾರ್ಯಕ್ರಮ್ ಉಗ್ತಾಯಿಲ್ಲ್ಯಾ , ಮಂಗ್ಳುರ್ಚೊ ಧರ್ಮಾಧ್ಯಕ್ಶ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಣಿ – ಎಮ್.ಸಿ.ಸಿ. ಬ್ಯಾಂಕ್ ಆಮ್ಚ್ಯಾ ಸಮಾಜಾಚೆಂ ಹೆಮ್ಮೆ ಮ್ಹಣೊನ್ ಎಮ್.ಸಿ.ಸಿ. ಬ್ಯಾಂಕಾಂತ್ ತಾಣೆ ಪಾರ್ಕಿಲ್ಲ್ಯಾ ದೋನ್ ಗುಣಾಂಚಿಂ ತೊಕ್ಣಾಯ್ ಕೆಲಿ.
“ಪಯ್ಲೊ ಗೂಣ್ ಉದಾರತೆಚೊ – ಜಶೆಂ ಏಕ್ ಕುಬೆ ವಿಕ್ತಲೊ, ಕುಬೆ ಘೆತೆಲ್ಯಾಕ್ ‘ಹೆ ತುಜ್ಯಾ ಭುರ್ಗ್ಯಾಂಕ್’ ಮ್ಹಣ್ ಏಕ್ ಮೂಠ್ ಚಡಿತ್ ಕುಬೆ ದಿತಾ, ತಶೆಂ ಎಮ್.ಸಿ.ಸಿ. ಬ್ಯಾಂಕಾಂತ್ ಸದಾಂಚ್ ಆಮ್ಕಾಂ ಇಲ್ಲಿಶಿ ಚಡಿತ್ ಸೆವಾ ಮೆಳ್ತಾ. ಅಸಲಿ ಉದಾರತಾ ಹೆರ್ ಬ್ಯಾಂಕಾಂನಿಂ ಮೆಳ್ಚಿ ಅಪ್ರೂಪ್. ಕಾಲ್ಚ್ಯಾ ದಿಸಾ ಸಮಜಾಂತ್ಲ್ಯಾ ಅಶಕ್ತ್ ವರ್ಗಾಕ್ ಆಪ್ಲ್ಯಾ ಮುನಾಫ್ಯಾಂತ್ಲೊ ಏಕ್ ವಾಂಟೊ ವಾಂಟುನ್ ಎಮ್.ಸಿ.ಸಿ. ಬ್ಯಾಂಕಾನ್ ಉದಾರತೆಚೊ ವರ್ತೊ ಗೂಣ್ ದಾಕಯ್ಲಾ. ದುಸ್ರೊ ಗೂಣ್ ಜಾವ್ನಾಸಾ – ವ್ಹೆವಾರಾಂತ್ಲಿ ಸಲೀಸಾಯ್. ಆಮ್ಚ್ಯಾ ಎಮ್.ಸಿ.ಸಿ. ಬ್ಯಾಂಕಾಂತ್ ವ್ಹೆವಾರ್ ಸುಲಭ್ ಆನಿ ಶಿಬಂದೆಚೊ ಸಹಕಾರ್ ಆಪುರ್ಬಾಯೆಚೊ. ಹ್ಯಾ ದೊನ್ ಗುಣಾಂ ನಿಮ್ತಿಂ ಪಾಟ್ಲ್ಯಾ ವರ್ಸಾಂನಿ ಬ್ಯಾಂಕಾಚಿ ಬರಿಚ್ ವಾಡಾವಳ್ ಜಾಲ್ಯಾ ದೆಕುನ್ ಪ್ರಸ್ತುತ್ ಆಡಳ್ತ್ಯಾ ಮಂಡಳೆಕ್ ಆನಿ ಶಿಬಂದೆಕ್ ಪ್ರಶಂಸಾ ಫಾವೊ” ಮ್ಹಣ್ ಧರ್ಮಾಧ್ಯಕ್ಶ್ ದೊ| ಸಲ್ಡಾನ್ಹಾನ್ ಮ್ಹಳೆಂ.
ಶ್ರೀ ಬನ್ನು ಫೆರ್ನಾಂಡಿಸ್ ಹಾಣೆ ರಚ್ಲ್ಲ್ಯಾ ಧ್ಯೇಯ್ಗೀತಾಸವೆಂ ಕಾರ್ಯಕ್ರಮ್ ಸುರ್ವಾತ್ಲೆಂ. ಕಾರ್ಯಾಚೊ ಅಧ್ಯಕ್ಷ್ ಶ್ರೀ ಅನಿಲ್ ಲೋಬೊ ಹಾಣೆ ಬ್ಯಾಂಕಾಚಿ ಚರಿತ್ರಾ, ಬ್ಯಾಂಕ್ ಜಲ್ಮೊನ್, ವಾಡೊನ್ ಆಯಿಲ್ಲಿ ವಾಟ್, ಮಾಲ್ಘಡ್ಯಾಂಚಿಂ ಪಯ್ಸಾದೀಶ್ಟ್ ಆನಿ ತ್ಯಾಗ್, 2018 ಪಾಸುನ್ ಬ್ಯಾಂಕಾಚ್ಯಾ ಸರ್ವಾಂಗೀಣ್ ಪ್ರಗತೆಂತ್ ಜಾಲ್ಲಿ ದಾಕ್ಲ್ಯಾಭರಿತ್ ವಾಡಾವಳ್ ಆನಿ ಫುಡಾರಾಚ್ಯೊ ಯೆವ್ಜಣ್ಯೊ ಹೆ ವಿಶ್ಯಾಂತ್ ಅಂಕ್ಯಾಂ – ಸಂಕ್ಯಾಸವೆಂ ಸವಿಸ್ತಾರ್ ವಿವರ್ ದೀವ್ನ್ – ಸಯ್ರ್ಯಾಂಕ್ ಆನಿ ಸಭಿಕಾಂಕ್ ಯೆವ್ಕಾರ್ ಮಾಗ್ಲೊ.
ಬ್ಯಾಂಕಾಚೊ ಆದ್ಲೊ ಅಧ್ಯಕ್ಷ್ ಶ್ರೀ ವ್ಯಾಲೆಂಟಾಯ್ನ್ ಡಿ’ ಸಿಲ್ವ, ಮಂಗ್ಳುರ್ ಆನಿ ಉಡುಪಿ ಧರ್ಮ್ಪ್ರಾಂತ್ಯಾಚಾ ಧರ್ಮಾಧ್ಯಕ್ಷಾಂಕ್, ಆನಿ ಸರ್ವ್ ಶಿಬಂದೆ ತರ್ಪೆನ್ ಬ್ಯಾಂಕಾಚೊ ಮಹಾಪ್ರಬಂದಕ್ ಶ್ರೀ ಸುನಿಲ್ ಮಿನೇಜಸ್, ಉಪಮಹಾಪ್ರಬಂದಕ್ ಶ್ರೀ ರಾಜ್ ಮಿನೇಜಸ್ ಆನಿ ಮಾಲ್ಘಡೊ ಕ್ರೆಡಿಟ್ ಮ್ಯಾನೇಜರ್ ಶ್ರೀ ಡ್ಯಾರಲ್ ಲಸ್ರಾದೊ ಹಾಂಕಾ ಸನ್ಮಾನ್ ಕೆಲೊ. ಹ್ಯಾ ಸಂದರ್ಭಾರ್ ವೆದಿರ್ ಆರ್ಸುಲಾಯ್ನ್ ಮೆಳಾಚಿ ಮಹಾವ್ಹಡಿಲ್ನ್ ಮಾ| ಭ| ಮಿಲ್ಲಿ ಫೆರ್ನಾಂಡಿಸ್, ಬ್ಯಾಂಕಾಚೊ ಉಪಾಧ್ಯಕ್ಶ್ ಶ್ರೀ ಜೆರಾಲ್ಡ್ ಜೂಡ್ ಡಿ’ಸಿಲ್ವ, ನಿರ್ದೇಶಕ್, ವೃತ್ತಿಪರ್ ನಿರ್ದೇಶಕ್, ಸಲಹಾ ಮಂಡಳೆಚೆ ಸಾಂದೆ ಹಾಜರ್ ಆಸ್ಲೆ.
ಕಾರ್ಯಕ್ರಮಾಂತ್ ಬ್ಯಾಂಕಾಚೊ ಸ್ಥಾಪಕ್ ಫಿ.ಎಪ್. ಎಕ್ಸ್. ಸಲ್ಡಾನ್ಹಾ ಹಾಚ್ಯಾ ತಸ್ವಿರೆಕ್ ಸಯ್ರ್ಯಾಂನಿ ಫುಲಾಂಚೊ ಮಾನ್ ಅರ್ಪಿಲೊ. ಡೊ| ಜೆರಾಲ್ದ್ ಪಿಂಟೊ ಹಾಂಚ್ಯಾ ಸಂಪಾದಕ್ಪಣಾಕಾಲ್ ಫಾಯ್ಸ್ ಜಾಂವ್ಚ್ಯಾ ವಾರ್ತಾಪತ್ರಾಚೊ ದುಸ್ರೊ ಅಂಕೊ ಉಡುಪಿ ಧರ್ಮ್ಪ್ರಾಂತ್ಯಾಚೊ ಧರ್ಮಾಧ್ಯಕ್ಷ್ ಅ|ಮಾ|ದೊ| ಜೆರಾಲ್ಡ್ ಐಸಾಕ್ ಲೋಬೊ ಹಾಣಿ ಉಗ್ತಾಯ್ಲೊ.
ಬ್ಯಾಂಕಾಚೊ ಮಹಾಪ್ರಬಂದಕ್ ಶ್ರೀ ಸುನಿಲ್ ಮಿನೇಜಸ್ ಹಾಣೆ ದಿನ್ವಾಸ್ ಪಾಟಯ್ಲೆ. ಪ್ರಾಧ್ಯಾಪಕ್ ನೆಲ್ಸನ್ ಮೋನಿಸ್ ಹಾಣೆ ಕಾರ್ಯೆಂ ಚಲವ್ನ್ ವೆಲೆಂ.
ಸಾಂಸ್ಕೃತಿಕ್ ಕಾರ್ಯಕ್ರಮ್ ಆನಿ ಜೆವ್ಣಾಸವೆಂ ಕಾರ್ಯೆಂ ಅಕೆರ್ ಜಾಲೆಂ.
ವರ್ದಿ- ತಸ್ವಿರ್ಯೊ – ಅಲ್ಪೋನ್ಸ್ ಮೆಂಡೋನ್ಸಾ, ಪಾಂಗ್ಳಾ
