ದಿಸಾಂತ್ ತೀನ್ ವಾಂಟೆ, ತಿಸ್ರೊ ಆಮ್ಚೊ – ಪ್ರೊ| ದೊ| ಜೀತಾ ಲೋಬೊ

“ಜಶೆಂ ಮ್ಹಣ್ತಾತ್ ಯಶಸ್ವೀ ದಾದ್ಲ್ಯಾ ಪಾಟ್ಲ್ಯಾನ್ ತಾಚಿ ಪತಿಣ್ ಆಸ್ತಾ, ತಶೆಂ ಮ್ಹಜ್ಯಾ ಗಜಾಲಿಂತ್ ಮ್ಹಜ್ಯಾ ಸಾಧನಾ ಪಾಟ್ಲ್ಯಾನ್ ಮ್ಹಜೊ ಪತಿ ಶ್ರೀ ಸೆಬಾಸ್ಟಿಯನ್ ಆಸಾ. ದೆಕುನ್ ಮ್ಹಜ್ಯಾ ಗಾಂವಾಂತ್ ಮ್ಹಾಕಾ ಫಾವೊ ಜಾಲ್ಲಿ ಪಯ್ಲಿ ಪ್ರಶಸ್ತಿ ಹಾಂವ್ ತಾಕಾ ಅರ್ಪಿತಾಂ” ಮ್ಹಣಾಲಿ ಪ್ರೊ| ದೊ| ಜಿತಾ ಲೋಬೊ.

ಪ್ರೊ| ಲೋಬೊ ಮಂಗ್ಳುರ್ಚ್ಯಾ ವುಡ್‌ಲ್ಯಾಂಡ್ಸ್ ಹೊಟ್ಲಾಚ್ಯಾ ಸಂಭಾಂಗ್ಣಾಂತ್ ಕಲ್ಲಚ್ಚು ಪ್ರಕಾಶನ ಹಾಣಿ ಪಾಟಂವ್ಚಿ ತೆರಾವ್ಯಾ ಆವೃತ್ತೆಚಿ ಪ್ರಶಸ್ತಿ ಸ್ವೀಕಾರ್ ಕರುನ್ ಉಲಯ್ತಾಲಿ.

ಮುಕಾರುನ್ ಸಂಸಾರಾಕ್ ಅಂತರ್ಲೆಲ್ಯಾ ಆಪ್ಲ್ಯಾ ಆವಯ್ – ಬಾಪಯ್ಚೊ ಆನಿ ಮೊಗಾಚ್ಯಾ ಭಾವಾಚೊ ಉಡಾಸ್ ಕಾಡುನ್ ತಿಣೆ ಮ್ಹಳೆಂ ” ಮ್ಹಜ್ಯಾ ಪತಿ ತಿತ್ಲೊಚ್ ಮ್ಹಜ್ಯಾ ಸಾಧನಾಂತ್ ಮ್ಹಜ್ಯಾ ಭುರ್ಗ್ಯಾಂಚೋಯ್ ವಾಂಟೊ ಆಸಾ. ಸಾಂಗಾತಾ ಮ್ಹಜ್ಯಾ ಭಯ್ಣಿಂಚೊಂ ಆನಿ ಭಾವೊಂಜಿಂಚೊಂ. ಜಿಣ್ಯೆಂತ್ ಕಿತೆಂಯ್ ಸಾಧನ್ ಕರುಂಕ್ ಕುಟ್ಮಾಚೊ ಸಾಂಗಾತ್ ಆನಿ ಸಹಕಾರ್ ವ್ಹಡಾ ಗರ್ಜೆಚೊ. ಮ್ಹಾಕಾ ಹೊ ಸಾಂಗಾತ್ ಆನಿ ಸಹಕಾರ್ ಲಾಭ್ಲಾ ಜಾಲ್ಲ್ಯಾನ್ ಸಾದನ್ ಕರುಂಕ್ ಸಲೀಸ್ ಜಾಲಾಂ”

“ಖರ‍್ಯಾನ್ ಹಿ ಪ್ರಶಸ್ತಿ ಅನಿರೀಕ್ಷಿತ್ ಜಾವ್ನ್ ಆಯಿಲ್ಲಿ. ಇಂಗ್ಲಿಶ್ ಸಾಹಿತ್ಯ್ ಶಿಕಂವ್ಚ್ಯಾ ಕಾಮಾಥಾವ್ನ್ ಎಕಾ ಯುನಿವರ್ಸಿಟಿಂತ್ ವೆಗ್ಳಿಚ್ ವಿಬಾಗ್ ಸಾಂಬಾಳ್ಚಿ, ಚಲಂವ್ಚಿ ಜವಾಬ್ದಾರಿ ಮ್ಹಾಕಾ ಮೆಳ್ತಾನಾ ಮ್ಹಜೆ ಮುಕಾರ್ ಪಂಥಾಹ್ವನಾಂ ಜರೂರ್ ಆಸ್ಲಿಂ, ಸಾಂಗಾತಾ ಏಕ್ ನವೊ ಸಂಸಾರ್ ಮ್ಹಜೆ ಮುಕಾರ್ ಉಗ್ತೊ ಜಾಲೊ. ತವಳ್ ಮ್ಹಜ್ಯಾ ಸಂಸ್ಥ್ಯಾಚ್ಯಾ ಮುಕೆಲ್ಯಾಂನಿ ಮ್ಹಜೆ ನಾಂವ್ ಎಕಾ ಪುರಸ್ಕಾರಾಕ್ ಧಾಡ್‌ಲ್ಲೆಂ ಮ್ಹಾಕಾ ಉಡಾಸ್ ಆಸಾ. ತೊ ಮ್ಹಜ್ಯಾ ವೃತ್ತಿಜಿವಿತಾಕ್ ಲಗ್ತೊ ಪುರಸ್ಕಾರ್, ಮ್ಹಾಕಾ ನಿರೀಕ್ಷಿತ್. ಪೂಣ್ ಹೊ ಪುರಸ್ಕ್ಕಾರ್ ಅನಿರೀಕ್ಷಿತ್. ಖಂಚೊಯ್ ಪುರಸ್ಕಾರ್ ವ್ಹಡ್ ವಾ ಲ್ಹಾನ್ ಮ್ಹಣ್ ವಾಂಟೆ ಕರುಂಕ್ ಜಾಯ್ನಾ. ಪುರಾಸ್ಕಾರಾ ಸಾಂಗಾತಾ ಮೆಳ್ಚೊ ಮೋಗ್ ಮೆಜುಂಕ್ ಜಾಯ್ನಾ” ಮ್ಹಣ್ ಹ್ಯಾ ಸಂದರ್ಬಾರ್ ಪ್ರೊ| ದೊ| ಲೋಬೊ ಮ್ಹಣಾಲಿ.

ಮುಕಾರುನ್ “ಜಾಯ್ತ್ಯಾಂನಿ ಮ್ಹಾಕಾ ವಿಚಾರ‍್ಚೆಂ ಆಸಾ – ಅದ್ಯಾಪನ್, ಸಂಶೋಧನ್, ಘರ್ – ಕುಟಮ್, ತೆಲಾವರ್ಣಾ ಚಿತ್ರಾಂ ಪಿಂತ್ರಾವ್ಣಿ, ಬರಪ್ – ಹೆಂ ಸಗ್ಳೆಂ ಕಶೆಂ ಸಾಧ್ಯ್ ಜಾತಾ? ಮ್ಹಜಿ ಜಾಪ್ ಸರಳ್. ಚಡಾವತ್ ಮ್ಹಣ್ಚೆಂ ಆಸಾ – ದಿಸಾಂತ್ ದೋನ್ ವಾಂಟೆ ಆಸಾತ್, ದೀಸ್ ಆನಿ ರಾತ್. ಪೂಣ್ ಹಾಂವೆ ಮ್ಹಣ್ಚೆಂ ದಿಸಾಂತ್ ತೀನ್ ವಾಂಟೆ ಆಸಾತ್. ಪಯ್ಲೊ ವಾಂಟೊ – ಪೊಟಾಚ್ಯಾ ಪೋಡಿಚೊ, ದುಸ್ರೊ ವಾಂಟೊ – ವಿಶೆವಾಚೊ ಆನಿ ತಿಸ್ರೊ ವಾಂಟೊ ಜಾವ್ನಾಸಾ – ಆಮ್ಚೊ! ಆನಿ ಹೊ ಆಮ್ಚೊಚ್ ಮ್ಹಳ್ಳೊ ತಿಸ್ರೊ ವಾಂಟೊ ಉಪೆಗ್ ಕರುಂಕ್ ಶಿಕ್ಲ್ಯಾರ್ ಕಾಮ್ ಕರುಂಕ್ ಕಶ್ಟಾಂಚೆಂ ನ್ಹಯ್. ಹೀಚ್ ಶಿಕೊಣ್ ಹಾಂವೆ ಮ್ಹಜ್ಯಾ ವಿದ್ಯಾರ್ಥಿಂಕೀ ದಿಂವ್ಚಿ.”

ಕಲ್ಲಚ್ಚು ಪ್ರಕಾಶನಾಚ್ಯಾ ಮಹೇಶ್ ಆರ್ ನಾಯಕ್ ಹಾಕಾ ಪನ್ನಾಸ್ ವರ್ಸಾಂ ಭರ್ಲೆಲ್ಯಾ ಸಂದರ್ಬಾರ್ ಭಾಂಗ್ರಾಳ್ಯಾ ಜಲ್ಮಾದಿಸಾಚೆ ಉಲ್ಲಾಸ್ ಪಾಟವ್ನ್ ” ಸಾಹಿತ್, ಕಲಾ, ಪ್ರಕಾಶನ್, ಬರೆ ವಿಚಾರ್ ಆನಿ ಸಂಘಟನ್ – ಅಸಲ್ಯಾ ಸಂಗ್ತಿಂನಿಂ ಥಿರಾಸಣೆನ್ ಕಾಮ್ ಕರ‍್ಚೆ ಮನಿಸ್ ಆಯ್ಚ್ಯಾ ಕಾಳಾರ್ ಮೆಳ್ಚೆಚ್ ಅಪ್ರೂಪ್. ಆಜ್ ಮಹೇಶಾಕ್ ಪನ್ನಾಸ್ ಭರ್ಲ್ಯಾಂತ್ ಆನಿ ತಾಚ್ಯಾ ಪ್ರಕಾಶನಾಕ್ ಬಾವೀಸ್ ವರ‍್ಸಾಂ. ಮ್ಹಳ್ಯಾರ್ ಆಪ್ಲ್ಯಾ 28 ವರ್ಸಾಂಚ್ಯಾ ಪ್ರಾಯೆಪಾಸುನ್ ತೋ ಹ್ಯಾ ಶೆತಾಂತ್ ಸಮರ್ಪಿತ್ ಮನೋಬಾವಾನ್ ವಾವುರ್ನ್ ಆಸಾ. ತಾಕಾ, ತಾಚ್ಯಾ ಸಾಹಿತ್ಯ್ – ಕಲೆಚ್ಯಾ ಸಂಗಟನಾಚ್ಯಾ ವಾವ್ರಾಕ್ ಬರೆಂ ಮಾಗ್ತಾಂ” ಮ್ಹಣ್ ಪ್ರೊ| ದೊ| ಲೋಬೊನ್ ಆಪ್ಲಿ ಕೃತಜ್ಞತಾ ಉಚಾರ್ಲಿ.

ರಾಷ್ಟ್ರಪತಿ ಪ್ರಶಸ್ತಿ ವಿಜೇತ್ ನಿವೃತ್ತ್ ಶಿಕ್ಷಕ್ ಶ್ರೀ ಕೆ. ರಮೇಶ್ ನಾಯಕ್ ರಾಯಿ, ಹಾಣಿ ಪ್ರೊ| ದೊ| ಜೀತಾ ಲೋಬೊ ಹಿಕಾ ಪ್ರಶಸ್ತಿ ಪ್ರದಾನ್ ಕೆಲಿ ಆನಿ ತಿಚ್ಯಾ ಬಹುಮುಖಿ ತಾಲೆಂತಾಚಿ ತೊಕ್ಣಾಯ್ ಕರುನ್ ತಿಕಾ ಬರೆಂ ಮಾಗ್ಲೆಂ. ಆಜ್‌ಕಾಲ್ ಲೊಕಾಥಂಯ್ ವಾಚ್ಚಿ ಸವಯ್ ಉಣಿ ಜಾವ್ನ್ ಯೇತೆ ಆಸಾ ಮ್ಹಣ್ ಆಕಾಂತ್ ಉಚಾರ್ಲೆಲ್ಯಾ ಶ್ರೀ ನಾಯಕ್ ಹಾಣಿ ವಾಚ್ಪಾಚಿ ಸವಯ್ ಆನಿ ರೂಚ್ ಚಾಲು ದವರುಂಕ್ ವಿನಂತಿ ಕೆಲಿ.

ಪ್ರೊ| ದೊ| ಜೀತಾ ಲೋಬೊ ಹಿಕಾ ಅಭಿನಂದನ್ ಪಾಟವ್ನ್ ಉಲಯಿಲ್ಲ್ಯಾ ಎಂ.ವಿ. ಶೆಟ್ಟಿ ಸಂಸ್ಥ್ಯಾಚಾ ಡೊ| ಹಿಮ ಊರ್ಮಿಳಾ ಶೆಟ್ಟಿ ಹಿಣೆ ತಿಚ್ಯಾ ಕಮ್ರಾಬಾಂದ್, ಸುಕ್ರಾರಾಚಿ ಸಾಂತ್ ಆನಿ ಹೆರ್ ಕಾಣಿಯಾಂಚೊಂ ಉಲ್ಲೇಕ್ ಕರುನ್, ಪ್ರೊ| ಲೋಬೊ ಕಶೆಂ ಆಪ್ಲ್ಯಾ ಮಟ್ವ್ಯಾ ಕಾಣಿಯಾಂನಿ ಸೂಕ್ಶಿಮ್ ಮನ್ಶ್ಯಾ ಸಂಬಂದ್ಲ್ಯಾಂತ್ಲ್ಯಾಂನಿ ವಾಚ್ಪ್ಯಾಂಕ್ ಪಾಸಾಯೊ ಮಾರಾಯ್ತಾ ಆನಿ ಆಪ್ಲೊ ಪಿಎಚ್‌ಡಿ ಮಾರ್ಗದರ್ಶಕ್ ಡೊ| ಯು. ಆರ್. ಅನಂತಮೂರ್ತಿನ್ ಸಂಸ್ಕಾರ ಕಾದಂಬರೆಂತ್ ಕೆಲ್ಲೆಪರಿಂ ವಾಚ್ಪ್ಯಾಂಕ್ ವಿಜ್ಮಿತ್ ಕರ‍್ತಾ ಮ್ಹಳ್ಳೆವಿಶ್ಯಾಂತ್ ಸಂಕ್ಷಿಪ್ತ್ ಆನಿ ಪರಿಣಾಮ್‌ಕಾರಿ ರಿತಿನ್ ಸಾಂಗೊನ್ ಪ್ರೊ| ದೊ| ಲೋಬೊಕ್ ಬರೆಂ ಮಾಗ್ಲೆಂ. ನಿರಾಸ್‌ವಾದ್ ವಾಟ್ ನ್ಹಯ್ ಮ್ಹಣ್ ಡೊ| ಅನಂತಮೂರ್ತಿ ಕೆದಾಳಾಯ್ ಮ್ಹಣ್ತಾಲೊ. ಹ್ಯಾ ಪಾಟಿಥಳಾರ್ ಬರಯ್ಣಾರಾಂನಿ ಹಾಂವ್ ಕೋಣ್ ? (Who Am I ? ) ಮ್ಹಳ್ಳ್ಯಾ ಸವಾಲಾಕ್ ಜಾಪ್ ಸೊದ್ಚಿ ಆನಿ ಸಾಹಿತ್ಯ್ ರಚ್ಚಿ ಗರ್ಜ್ ಆಸಾ ಮ್ಹಣ್ ಡೊ| ಶೆಟ್ಟಿ ಮ್ಹಣಾಲಿ.

ಹ್ಯಾ ಸುವಾಳ್ಯಾರ್ ಭರ್ವಸ್ಯಾಚಿ ಯುವ ಕಥಾಬರವ್ಫಿಣ್ ಫಾತಿಮಾ ರಾಲಿಯಾ ಆನಿ ದ ಹಿಂದೂ ಪತ್ರಾಚೊ ಮಾಲ್ಘಡೊ ಸಹ-ಸಂಪಾದಕ್ ಅನಿಲ್ ಕುಮಾರ್ ಶಾಸ್ತ್ರಿ ಹಾಜರ್ ಅಸೊನ್, ತಾಣಿ ಪ್ರಶಸ್ತಿ ಪುರಸ್ಕೃತಾಂಕ್ ಬರೆಂ ಮಾಗೊನ್ ಆಪ್ಲೆ ವಿಚಾರ್ ಮಾಂಡ್ಲೆ.

“ಸದಾಂಚ್ಯಾ ಕಾಮಾಥಾವ್ನ್ ಥೊಡೊ ವೇಳ್ ಕಾಡುನ್, ಮನಾಪಸಂದೆಚ್ಯಾ ಹವ್ಯಾಸಾಂತ್ ತೊ ವೇಳ್ ಕರ‍್ಚಿತಾನಾ ನೀಜ್ ಅರ್ಥಾನ್ ಜಿಣೆಂ ರಂಗಾಳ್ ಜಾತಾ. ಹಾಂವ್ ಬೆಂಗ್ಳುರ್ ಥಾವ್ನ್ ಮಂಗ್ಳುರ್ ಆಯಿಲ್ಲೆತವಳ ಸೈಕ್ಲಿಂಗಾಂತ್ ವೇಳ್ ಖರ‍್ಚುಂಕ್ ಸುರು ಕೆಲೊ ಆನಿ ಮ್ಹಾಕಾ ನವೆ ಈಶ್ಟ್ ಮೆಳ್ಳೆ, ನವೆ ಜಾಗೆ ಪಳಂವ್ಚೊ ಅವ್ಕಾಸ್ ಲಾಭ್ಲೊ” ಮ್ಹಣ್ ಅನಿಲ್ ಕುಮಾರ್ ಶಾಸ್ತ್ರಿನ್ ಮ್ಹಳೆಂ ತರ್, ಫಾತಿಮಾ ರಾಲಿಯಾನ್ “ಹರ್ ಗಜಾಲಿಂತ್ ಜಾತ್ – ಧರ್ಮ್, ರಾಜಕೀ ಪಾಡ್ತ್ ಸೊಧುನ್ ವೆಚ್ಯಾ ಎಕಾ ಸಂದಿಗ್ದ್ ಪರಿಸ್ಥಿತೆಂತ್ ಆಯ್ಚೆ ಬರಯ್ಣಾರ್ ಸಾಂಪ್ಡಾಲ್ಯಾತ್. ಹ್ಯಾ ಪಾಟಿಥಳಾರ್ ಹಾಂವ್ ಕಿತ್ಯಾಕ್ ಬರಯ್ತಾಂ ? ಮ್ಹಣ್ಚ್ಯಾ ಸವಾಲಾಕ್ ಹರ್ ಬರವ್ಫ್ಯಾನ್ ಪ್ರಾಮಾಣಿಕ್ಪಣಿ ಜಾಪ್ ಸೊದ್ಚಿ ಗರ್ಜ್ ಆಸಾ” ಮ್ಹಣ್ ಆಕಾಂತ್ ಉಚಾರ್ಲೊ.

ಪ್ರಶಸ್ತಿ ಪ್ರದಾನ್ ಸುವಾತೆರ್ ಪ್ರೊ| ದೊ| ಜೀತಾ ಲೋಬೊ ಹಿಚ್ಯಾ ತೆಲಾ ವರ್ಣಾಚಿತ್ರಂಚೆಂ ಪ್ರದರ್ಶನ್ ಚಲ್ಲೆಂ.

ಕಲ್ಲಚ್ಚು ಪ್ರಕಾಶನಾಚ್ಯಾ ಯೇಂವ್ಕ್ ಆಸ್ಚ್ಯಾ ಪುಸ್ತಕಾಚೆಂ ಮುಕ್‌ಪಾನ್ ಪಿಂತ್ರಾಯಿಲ್ಲಿ ಯುವಕಲಾಕಾರ್ನ್ ಕು| ನಂದಿನಿ ಶಾರ್ವಿ ನಾಯಕ್, ಬೆಂಗ್ಳುರ್ ಹಿಕಾ ಕಲ್ಲಚ್ಚು ಪ್ರಕಾಶನಾ ತರ್ಫೆನ್ ಸನ್ಮಾನ್ ಕರುನ್, ತಿಚ್ಯಾ ಫುಡಾರಾಕ್ ಬರೆಂ ಮಾಗ್ಲೆಂ. ಹ್ಯಾ ಸಂದರ್ಬಾರ್ ಕು| ನಂದಿನಿ ಹಿಚಿ ಆವಯ್ – ಬಾಪಯ್, ಭಾವ್ ಆನಿ ಚಿತ್ರ್‌ಕಲಾ ಶಿಕ್ಶಕ್ ತಿಚೊ ಆಜೊ ಹಾಜರ್ ಆಸ್ಲಿಂ.

ಹ್ಯಾ ಸುವಾಳ್ಯಾರ್ ಪ್ರಕಾಶಕ್ ಮಹೇಶ್ ಆರ್. ನಾಯಕ್ ಹಾಚ್ಯಾ ಭಾಂಗ್ರಾಳ್ಯಾ ಜಲ್ಮಾದಿಸಾಚಿ ಕೇಕ್ ಕಾತ್ರುನ್, ಜಮ್ಲೆಲ್ಯಾಂನಿ ಉಲ್ಲಾಸ್ ಪಾಟಯ್ಲೆ. ಪ್ರಶಸ್ತಿ ಪ್ರದಾನ್ ಕಾರ್ಯಾಕ್ ಹಾಜರ್ ಜಾಲ್ಲ್ಯಾ ಸಾಹಿತಿಂಕ್ ಕಲ್ಲಚ್ಚು ಪ್ರಕಾಶನಾ ತರ್ಫೆನ್ ಉಡಾಸಾಚಿ ಕಾಣಿಕ್ ಪಾಟವ್ನ್ ಮಾನ್ ಕೆಲೊ.

ಯುವಕವಿ ಯೋಗೀಶ್ ಮಲ್ಲಿಗೆಮಾಡು ಹಾಣಿ ಕಾರ್ಯೆಂ ಚಲವ್ನ್ ವೆಲೆಂ. ಪ್ರಕಾಶಕ್ ಮಹೇಶ್ ಆರ್. ನಾಯಕ್ ಹಾಣೆ ಯೆವ್ಕಾರ್ ಮಾಗ್ಲೊ.

ಪ್ರಶಸ್ತಿ ಪ್ರದಾನ್ ಕಾರ್ಯಾಕ್ ಪ್ರೊ| ಡೊ| ಜೀತಾ ಲೋಬೊ ಕುಟ್ಮಾ ಸಾಂದೆ, ಅಭಿಮಾನಿ, ಟೋಸ್ಟ್ ಮಾಸ್ಟರ್ ಕ್ಲಬ್ಬಾಚೆ ಸಾಂದೆ, ಬಜ್ಪೆ ಫಿರ್ಗಜೆಗಾರ್ ಆನಿ ಫಿರ್ಗಜ್ ಪತ್ರ್ ಆಮ್ಚೆಂ ಶೆತ್ ಸಂಪಾದಕ್ ಶ್ರೀ ಎವ್ಜಿನ್ ಸೊಜ್, ತಶೆಂ ಕಲ್ಲಚ್ಚು ಪ್ರಕಾಶನಾಚೆ ಅಭಿಮಾನಿ, ಸಾಹಿತ್ಯಾಸಕ್ತ್, ಮಾಲ್ಘಡೊ ಕೊಂಕ್ಣಿ ಕಾದಂಬರಿಕಾರ್ ಶ್ರೀ ರೊನ್ ರೋಚ್ ಕಾಸ್ಸಿಯಾ, ಕಥಾಕಾರ್ ಶ್ರೀ ಶೀಕೇರಾಮ್ ಸುರತ್ಕಲ್ ಆನಿ ಹೆರ್ ಹಾಜರ್ ಆಸ್ಲೆ.

ತಸ್ವಿರ‍್ಯೊ : ಅಲ್ಪೋನ್ಸ್ ಮೆಂಡೋನ್ಸಾ, ಪಾಂಗ್ಳಾ.