‘ವಿಶೇಸ್ ಸಾಮರ್ಥ್ಯಾಚಿಂ ಭುರ್ಗಿಂ ಸಮಾಜೆಕ್ ವೊಜೆಂ ನ್ಹಯ್, ಬಗಾರ್ ಸಾರ್ಕಿ ತರ್ಭೆತಿ ದಿಲ್ಯಾರ್ ಸಮಾಜೆಚಿ ಆಸ್ತ್ ಜಾಂವ್ಕ್ ಸಾದ್ಯ್ ಆಸಾ. ಪಾಟ್ಲ್ಯಾ 25 ವರ‍್ಸಾಂ ಪಾಸುನ್ ಮಾನಸ ಸಂಸ್ಥೊ ಹೊ ವಾವ್ರ್ ಕರುನ್ ಆಸಾ ‘ ಮ್ಹಣಾಲೊ ಉಡುಪಿಚೊ ಗೊವ್ಳಿ ಬಾಪ್ ಭೋ. ಮಾ. ದೊ. ಜೆರಾಲ್ಡ್ ಐಸಾಕ್ ಲೋಬೊ.
25.11.2022 ವೆರ್, ಪಾಂಬೂರ್ ಮಾನಸಾ ವಿಶೇಸ್ ಇಸ್ಕೊಲಾಚೊ ರುಪ್ಯೋತ್ಸವ್ ಉಗ್ತಾವಣ್ ಕರುನ್ ತೊ ಉಲಯ್ತಾಲೊ. ಮಾನಾಸ ಅದ್ಯಕ್ಷ್ ಮಾನೇಸ್ತ್ ಹೆನ್ರಿ ಮಿನೇಜಸಾನ್ ಕಾರ್ಯಾಚೆಂ ಅದ್ಯಕ್ಷ್‌‌ಪಣ್ ಘೆತ್‌ಲ್ಲೆಂ. ಮುಕೆಲ್ ಸಯ್ರೆ ಜಾವ್ನ್ ಕಾಪುಚೊ ಶಾಸಕ್ ಶ್ರೀ ಲಾಲಾಜಿ ಮೆಂಡನ್, ಆದ್ಲೊ ಕರ್ನಾಟಕಾಚೊ ಮಂತ್ರಿ ವಿನಯ ಕುಮಾರ್ ಸೊರಕೆ, ಸಂಸ್ಥ್ಯಾಚ್ಯಾ ಸ್ಥಾಪನೆಕ್ ಆರ್ಥಿಕ್ ಪಾಟಿಂಬೊ ದಿಲ್ಲೊ, ಜರ್ಮನಿಂತ್ ವಸ್ತಿ ಕರ‍್ಚೊ ಪಾ| ಜೆಪ್ರಿನ್ ಮೊನಿಸ್, ಹೊಲಿ ಸ್ಪಿರಿಟ್ ಧರ್ಮಿಕ್ ಮೆಳಾಚಿ ವ್ಹಡಿಲ್ನ್ ಸಿ| ಐಡಾ ಲೋಬೊ ಹಾಣಿ ಆಪ್ಲೆ ಸಂದೇಶ್ ದಿಲೆ.
ಸುರ್ವೆರ್ ರುಪ್ಯೋತ್ಸವ್ ಸಮಿತಿಚೊ ಸಂಚಾಲಕ್ ಮಾನೇಸ್ತ್ ಎಲ್ರೋಯ್ ಕಿರಣ್ ಕ್ರಾಸ್ಟೊನ್ ಸಯ್ರ್ಯಾಂಕ್ ಯೆವ್ಕಾರ್ ಮಾಗ್ಲೊ. ಪ್ರಿನ್ಸಿಪಾಲ್ ಸಿ| ಅನ್ಸಿಲ್ಲಾ ಫೆರ್ನಾಂಡಿಸಾನ್ 25 ವರ‍್ಸಾಂಚಿ ವರ್ಧಿ ಸಭೆ ಮುಕಾರ್ ದವರ‍್ಲಿ. ಡಾ| ಜೆರಾಲ್ಡ್ ಪಿಂಟೊಚ್ಯಾ ಮುಕೆಲ್ಪಣಾರ್ ಪರ್ಗಟ್ ಕೆಲ್ಲ್ಯಾ ಸ್ಮಾರಕ್ ಪುಸ್ತಕಾಚೆಂ ಮೊಕ್ಳಿಕ್ ಜರ್ಮನಿಚ್ಯಾ ರುಡ್ಸ್‌ಬರ್ಗ್ ಶೆರಾಚೊ ಮೇಯರ್ ಹೊಸ್ಟ್ ಸ್ನಾಯ್ನಾರ್ ಅನಿ ಪತಿಣ್ ಮಾರ್ಗಿಟ್‌ಸ್ನಾಯ್ನಾರ್ ಹಾಣಿ ಕೆಲೆಂ.
ಆದ್ಲ್ಯಾ ಆನಿ ಆತಾಂಚ್ಯಾ ಟ್ರಸ್ಟಿಂಕ್, ೨೦ ವರ‍್ಶಾಂ ವಯ್ರ್ ಸೆವಾ ದಿಲ್ಲ್ಯಾ ಶಿಕ್ಷಕಾಂಕ್ ಅನಿ ಸಿಬ್ಬಂದಿಕ್, ಆದ್ಲ್ಯಾ ಪ್ರಿನ್ಸಿಪಾಲಾಂಕ್ ಆನಿ ವಾರ್ಡಾನಾಂಕ್, ಮಾನಾಸಾಚಿ ವೆಬ್ ಸಾಯ್ಟ್ ಧರ್ಮಾರ್ಥ್ ನಿರ‍್ವಹಣ್ ಕರ‍್ಚ್ಯಾ ಮಾನೇಸ್ತ್ ಪ್ರಾನ್ಸಿಸ್ ಡಿ ಸೋಜಾಕ್ ಸನ್ಮಾನ್ ಕೆಲೊ.
ದಾನಿ ಶ್ರೀ ಸಿತಾರಾಮ್ ಶೆಟ್ಟಿ ಆನಿ ಶ್ರಿ ನೋಯೆಲ್ ಮಸ್ಕರೇನ್ಹಸ್ ಮುಂಬಯಿ, ಆದ್ಲೊ ಕಥೊಲಿಕ್ ಸಭೆಚೊ ಅಧ್ಯಕ್ಷ್ ಶ್ರಿ ಎಲ್. ಜೆ. ಫೆರ್ನಾಂಡಿಸ್, ಪಾಂ ಬೂರ‍್ಚೊ ವಿಗಾರ್ ಮಾ. ಬಾ. ಹೆನ್ರಿ ಮಸ್ಕರೇನ್ಹಸ್, ಮಾನಾಸಾಚೊ ಸ್ಥಾಪಕ್ ಅದ್ಯಕ್ಷ್ ಡಾ| ಎಡ್ವರ‍್ಡ್ ಲೋಬೊ, ಆದ್ಲಿ ಅದ್ಯಕ್ಷಿಣ್ ಕು| ರೆಮೆಡಿಯಾ ಡಿ ಸೋಜಾ, ಕಥೊಲಿಕ್ ಸಬಾ ಮಂಗ್ಳೂರ್ ಪ್ರದೇಶ್ ಅದ್ಯಕ್ಷ್ ಮಾನೇಸ್ತ್ ಸ್ಟೇನಿ ಲೋಬೊ, ಶಿಕ್ಷಕ್-ರಕ್ಷಕ್ ಸಂಘಾಚಿ ಅದ್ಯಕ್ಷಿಣ್ ಶ್ರಿಮತಿ ವನಿತಾ ಶೆಟ್ಟಿಗಾರ್, ಉಡ್ಪಿ ಪ್ರದೇಶ್ ಅದ್ಯಕ್ಷಿಣ್ ಮಾನೇಸ್ತಿಣ್ ಮೇರಿ ಡಿ. ಸೋಜಾ, ಮಾನಸಾ ಖಜನ್ದಾರ್ ಮಾನೇಸ್ತ್ ವಲೇರಿಯನ್ ಫೆರ್ನಾಂಡಿಸ್, ಸಯ್ರೆ ಜಾವ್ನ್ ವೇದಿರ್ ಹಾಜರ್ ಆಸ್ಲೆ.
ಕಾರ್ಯದರ್ಶಿ ಮಾನೇಸ್ತ್ ಜೊಸೆಫ್ ನೊರೊನ್ಹಾನ್ ಉಪ್ಕಾರ್ ಆಟಯ್ಲೊ. ಶಿಕ್ಶಕಿ- ಶಶಿ, ಪ್ರಭಾ ಆನಿ ರೀನಾ- ಹಾಣಿ ಕಾರ್ಯೆಂ ಚಲವ್ನ್ ವೆಲೆಂ.
ಮಾನಾಸಾಚ್ಯಾ ಭುರ್ಗ್ಯಾಂ ಥಾವ್ನ್ ಆನಿ ಮಾನೇಸ್ತ್ ಅನಿಲ್ ಡೇಸಾ, ಪಾಂಗ್ಳಾ – ಹಾಂಚೆ ಥಾವ್ನ್ ಸಂಸ್ಕ್ರತಿಕ್ ಕಾರ್ಯೆಂ ಸಾದರ್ ಜಾಲೆಂ.
Thank you.