“ರೋಶುಚ್ಯಾ ಕಾಣಿಯಾಂನಿ ಕಾಫ್ಕಾಚಿ ಶೈಲಿ ದಿಸ್ತಾ” ಪ್ರೊ. ದೊ. ಜಿತಾ ಲೋಬೊ.

“ರೋಶು, ಬಜ್ಪೆನ್ ಕಾಫ್ಕಾಕ್ ವಾಚ್ಲಾಂ ವಾ ನಾ ಮ್ಹಾಕಾ ಕಳಿತ್ ನಾ, ಪೂಣ್ ತಾಚ್ಯಾ ಖಿಳೊ ಕಾಣಿಯೆಂತ್ ಕಾಫ್ಕಾಚಿ ಶೈಲಿ ಮ್ಹಾಕಾ ದಿಸ್ಲಿ. ಕಾಣಿಯಾಂನಿ ವಾಪಾರ್ಲೆಲ್ಯಾ ಶೆಲಿಚ್ಯಾ ನದ್ರೆನ್ ಪಳಯ್ಲ್ಯಾರ್ ಪ್ರಸ್ತಾವನಾಂತ್ ಕಿಶೂ, ಬಾರ್ಕೂರ್ ಹಾಣೆ ಉಲ್ಲೇಕ್ ಕೆಲ್ಲೆಪರಿಂ ರೋಶುಚ್ಯೊ ಕಾಣಿಯೊ ‘ಡಿಜಾಯ್ನಾರ್’ ಮ್ಹ ಣ್ಚೆ ತಸಲ್ಯಾ ವಿಶೇಸ್ ಕಾಲೆತಿಚ್ಯೊ ಮ್ಹಣ್ಯೆತ್” ಮ್ಹಣಾಲಿ ಪ್ರೊ. ದೊ. ಜಿತಾ ಲೋಬೊ.

ದೊ. ಲೋಬೊ, ರೋಶು, ಬಜ್ಪೆಚೊ ಮಟ್ವ್ಯಾ ಕಾಣಿಯಾಂ ಜಮೊ ಪೇಯಿಂಗ್ ಗೆಸ್ಟ್ ಆನಿ ಹೆರ್ ಕಥಾ ಉಗ್ತಾವಣ್ ಕರುನ್ ಉಲಯ್ತಾಲಿ.

ಪಿ.ಎಫ್.ಎಕ್ಸ್. ಸಲ್ಡಾನ್ಹಾ ಅಡಿಟೋರಿಯಮ್, ಎಂಸಿ.ಸಿ. ಬ್ಯಾಂಕ್ ಪ್ರಧಾನ್ ದಫ್ತರ್ ಹಾಂಗಾಸರ್ ಕಿಟಾಳ್ ಪ್ರಕಾಶನ್ ಹಾಣಿ ಉಜ್ವಾಡಾಯಿಲ್ಲ್ಯಾ ರೋಶು, ಬಜ್ಪೆ ಹಾಚ್ಯಾ 14 ಮಟ್ವ್ಯಾ ಕಾಣಿಯಾಂಚೊ ಜಮೊ ಪೇಯಿಂಗ್ ಗೆಸ್ಟ್ ಆನಿ ಹೆರ್ ಕಥಾ ಲೊಕಾರ್ಪಣ್ ಕಾರ್ಯೆಂ, ಸನ್ವಾರಾ, ನವೆಂಬರ್ 5 ವೆರ್ ಸಾಂಜೆಚ್ಯಾ 4.00 ವ್ಹರಾಂಚೆರ್ ಚಲ್ಲೆಂ. ಎಂಸಿಸಿ ಬ್ಯಾಂಕ್ ಲಿಮಿಟೆಡ್ ಹಾಚೊ ಅಧ್ಯಕ್ಷ್, ಮಾನೆಸ್ತ್ ಅನಿಲ್ ಲೋಬೊ, ಕಾರ್ಯಾಕ್ ಮುಕೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್ಲೆ.

“ರೋಶುಚ್ಯಾ ಕಾಣಿಯಾಂನಿ ಯೆಂವ್ಚಿ ಮನ್ಶ್ಯಾಂ ಆಮ್ಚ್ಯಾ ಭಂವ್ತಣಿಚಿಂಚ್ ಲಾಗ್ತಾತ್. ಫುಲ್ಕಾರ್ನ್, ಗುರ್ಕಾರಾಮ್, ಕಾರ್ಯಕರ್ತ್ ಆನಿ ಪ್ರತೇಕ್ ಜಾವ್ನ್, ಹರೇಕಾ ಕಾಣಿಯೆಂತ್ ಯೆಂವ್ಚೊ ತೋ ಅಂತೊನಾಮ್ ಆಮ್ಚೆಲಾಗಿಂ ಕಿತೆಂಗೀ ಉಲಯ್ತಾತ್, ಸಾಂಗೊನ್ ಆಸಾತ್ ಮ್ಹಣ್ ಕಾಣಿಯೊ ವಾಚ್ತಾನಾ ಭೊಗ್ತಾ. ಆಪ್ಲ್ಯಾ ಸಗ್ಳ್ಯಾ ದುಕಿಂಕ್ ‘ಖಿಳೊ’ಚ್ ಕಾರಣ್ ಮ್ಹಣ್ ಕಾಣಿಯೆಂತ್ಲ್ಯಾ ಲೊರೆಸಾಬಾಕ್ ಭೊಗ್ತಾ ತರೀ ಆಪ್ಲಿ  ಪತಿಣ್ ಇಜ್ಬೆಲಾಲಾಗಿಂ ತಿ ಗಜಾಲ್ ತೋ ವಾಂಟುನ್ ಘೆನಾ. ‘ಫೊಟೊ’ ಕಾಣಿಯೆಂತ್ಲ್ಯಾ ಅಂತೊನಾಮಾಕ್ ‘ಸಿಂಗಲ್ ಫೊಟೊ ನಾ, ಗರ್ಜೆಕ್ ಜಾಯ್ ಮ್ಹಣ್ ಏಕ್ ಕಾಡ್ಯಾಂ’ ಮ್ಹಣ್ ಭುರ್ಗ್ಯಾಂನಿ ಸಾಂಗ್ತಾನಾಂಚ್ ಅರ್ಧೆಂ ಮೊರ್ನಾಚೆಂ ಫರ್ಮಾಣ್ ವಾಚ್‌ಲ್ಲೆಪರಿಂ ಜಾತಾ. ಫುಲಾಂವರ್ವಿಂ ಮನ್ಶಾ ಸಂಬಂದ್ ಕಶೆ ಗುಂತಾತ್ ಆನಿ ತುಟ್ತಾತ್ ಮ್ಹಣ್ ಕಳಿತ್ ಆಸೊನೀ ಫುಲ್ಕಾರ್ನ್ ಶಾಂಭವಿ ಅಪ್ಲೆ ಸಂಬಂದ್ ಸಾಂಬಾಳುಂಕ್ ಸಕಾನಾ . . .” ಅಸಲ್ಯಾ ಜಾಯ್ತ್ಯಾ ಗಜಾಲಿಂಚೆರ್  ಪ್ರೊ. ದೊ. ಜಿತಾ ಲೋಬೊ ಹಾಣಿ ಕಾಣಿಯಾಂಚೊಂ ಉಲ್ಲೇಕ್ ಕರ್ನ್ ಆಪ್ಲೆ ವಿಚಾರ್ ಮಾಂಡ್ಲೆ.

“ಕಾರ್ಯಕರ್ತ್ ಆನಿ ಟೈಫಾಯ್ಡ್ ತಾಪ್ ಕಾಣಿಯಾಂನಿ, ಪಾಟ್ಲ್ಯಾ ದಿಸಾಂನಿ ಕರಾವಳೆಂತ್ ಘಡೊನ್ ಆಸ್ಚಿಂ ಕೊಮುಘಡಿತಾಂ ದಿಸ್ತಾತ್ ಜಾಲ್ಯಾರ್, ‘ಫಟ್’ ಕಾಣಿಯೆಂತ್ ಡ್ರೈವರ್ ಚಲ್ಯಾನ್ ಆಪುಣ್ ಇಂಜಿನಿಯರ್ ಮ್ಹಣ್ ಮಾರ್ಲೆಲಿ ಫಟ್ ಕಾಜಾರ್ ಜಾಲ್ಯಾ ಉಪ್ರಾಂತ್ ತಾಚ್ಯಾ ಹೊಕ್ಲೆಕ್ ಕಳ್ತಾನಾ ಜಾಂವ್ಚೊ ಆಘಾತ್ ಆನಿ ಜಾಲ್ಲೆಂ ಕಾಜರ್ ಕಿತೆಂ ಜಾಯ್ತ್ ? ಮ್ಹಣ್ ಉದೆಂವ್ಚೆಂ ಪ್ರಶ್ನ್ ಆನಿ ‘ಪೇಯಿಂಗ್ ಗೆಸ್ಟ್’ ಕಾಣಿಯೆಂತ್ ಸಂಬಂದಾಂಚ್ಯಾ ನಯ್ತಿಕತೆ ವಿಶ್ಯಾಂತ್ ಉಟ್ಚೆಂ ಪ್ರಶ್ನ್, ಸಾಹಿತಿಕ್ ಸಂವಾದಾಕ್ ಚಾಲನ್ ದಿತಾತ್. ಸಮಾಜೆಂತ್ ಅಸಲೆ ಸಂವಾದ್ ಚಲಜೆ ಮ್ಹಣ್ಚೊಚ್ ಸಾಹಿತ್ಯಾಚೊ ಉದ್ದೇಶ್ ಜಾಲ್ಲ್ಯಾನ್, ರೋಶು ಆಪ್ಲ್ಯಾ ಕಾಣಿಯಾಂನಿ ತಿತ್ಲ್ಯಾಕ್ ಯಶಸ್ವೀ ಜಾಲಾ ಮ್ಹಣ್ಯೆತ್” ಮ್ಹಣ್ ಪ್ರೊ. ದೊ. ಲೋಬೊ ಮ್ಹಣಾಲಿ.

“ಚಡಾವತ್ ಕೊಂಕ್ಣಿ ಕಾಣಿಯಾಂನಿ ಆಸ್ಚೆಪರಿಂ ರೋಶುಚ್ಯಾ ಕಾಣಿಯಾಂನೀಯ್ ಚಡ್ತಾವ್ ಕಿರ್ದಾರ್ ದಾದ್ಲೆಚ್. ಸಮಾಜಾಂತ್ ಬಾಯ್ಲಾಂಲಾಗಿಂ ಸಾಂಗ್ಚ್ಯಾಕ್ ಚಡ್ ಕಾಣಿಯೊ ಆಸಾತ್. ಫೂಣ್ ಕೊಂಕ್ಣೆಂತ್ ಸ್ತ್ರೀ ಬರಯ್ಣಾರಾಂಚೊಂ ಸಂಕೊ ಉಣೊ ಆಸಾ. ಆಧುನಿಕ್ ತಂತ್ರಗ್ಯಾನಾಂತ್ ಕಾಣಿಯೊ ಬರವ್ನ್‌ಚ್ ಕಾಡಿಜೆ ಮ್ಹಣ್ ನಾ. ಕಾಣಿಯೊ ತೊಂಡ್ಪಾಶೀಯ್ ರೆಕೊರ್ಡ್ ಕಾರ್ಯೆತ್. ಕೊಂಕ್ಣಿ ಭಾಶಿಕ್ ಸ್ತ್ರೀಯಾಂನಿ ಅಸಲೆಂ ಏಕ್ ಪ್ರೇತನ್ ಕರ್ಯೆತ್” ಮ್ಹಣ್ ಪ್ರೊ. ದೊ. ಜಿತಾ ಲೋಬೊ ಹಿಣೆ ಆಪ್ಲಿ ಅಭಿಪ್ರಾಯ್ ಮಾಂಡುನ್, ರೋಶು, ಬಜ್ಪೆ ಹಾಚ್ಯಾ ಬುಕಾಕ್ ಬರೆಂ ಮಾಗ್ಲೆಂ.

ಎಂಸಿ.ಸಿ. ಬ್ಯಾಂಕಾಚೊ ಅಧ್ಯಕ್ಶ್ ಮಾನೆಸ್ತ್ ಅನಿಲ್ ಲೋಬೊನ್ ಆಪ್ಲ್ಯಾ ಸಂದೇಶಾಂತ್ “ರೋಶು ಆನಿ ಮ್ಹಜಿ ಒಳಕ್ ಬೋವ್ ಆದ್ಲಿ. ಕಥೊಲಿಕ್ ಸಭೆಂತ್ ಆಸ್ತಾನಾ, ಹಾಂವೆ ಆನಿ ರೋಶುನ್, ಆಮ್ಚೊ ಸಂದೇಶ್ ಪತ್ರಾಚ್ಯಾ ಮಂಡಳೆಂತ್ ಸಾಂಗಾತಾ ಕಾಮ್ ಕೆಲಾಂ. ಬರಯ್ಣಾರ್ ಸಮಾಜೆಕ್ ಜಾಗವ್ನ್ ಆಸ್ತಾತ್. ಜಾಗೃತ್ ಆನಿ ಜಾಗ್ರುತ್ ಬರವ್ಪಿ ಮ್ಹಳ್ಯಾರ್ ಭಲಾಯ್ಕೆಭರಿತ್ ಸಮಾಜ್ ಮ್ಹಣ್ ಅರ್ಥ್. ರೋಶುಚ್ಯಾ ಬರ್ಪಾಂಚಿ ಶೈಲಿ ಮ್ಹಾಕಾ ಆಂವಡ್ತಾ. ಸಮಾಜೆಕ್ ಜಾಗಂವ್ಚೆ ವಿಚಾರ್ ತೋ ಆಪ್ಲ್ಯಾ ಬರ್ಪಾಂನಿ ಬೋವ್ ಸೊಂಪ್ಯಾ ಭಾಶೆನ್ ಮಾಂಡ್ತಾ. ತಾಚ್ಯಾ ಸಾಹಿತಿಕ್ ವಾವ್ರಾಕ್ ಹಾಂವ್ ಬರೆಂ ಮಾಗ್ತಾಂ” ಮ್ಹಳೆಂ.

“ಎಂಸಿಸಿ ಬ್ಯಾಂಕ್ ಆಮ್ಚ್ಯಾ ಸಮುದಾಯಾಚೆಂ ಬ್ಯಾಂಕ್. ಆಮ್ಚ್ಯಾ ಬ್ಯಾಂಕಾಕ್ 110 ವರ್ಸಾಂಚಿಂ ಚರಿತ್ರಾ ಆಸಾ. ನಿರ್ದೇಶಕ್, ಅಧ್ಯಕ್ಷ್ ಯೆತಾತ್ – ವೆತಾತ್. ಪೂಣ್ ಬ್ಯಾಂಕಾಥಾವ್ನ್ ಆಮ್ಚ್ಯಾ ಸಮಾಜಾಚೆಂ ಬರೆಂ ಜಾಯ್ಜೆ ಮ್ಹಳ್ಳೆಂ ಮ್ಹಜೆಂ ಚಿಂತಪ್. ಬೂಕ್ ಫಾಯ್ಸ್ ಕರುಂಕ್, ಸಾಹಿತಿಕ್ ಕಾರ್ಯಿಂ ಸಾದರ್ ಕರುಂಕ್ ಜಾಯ್ತಿ ವಾಂವ್ಟ್ ಆಸಾ, ತೆಂ ಮ್ಹಾಕಾ ಬರ‍್ಯಾನ್ ಕಳಿತ್ ಆಸಾ. ಐಸಿವೈಎಮ್, ಕಥೊಲಿಕ್ ಸಭಾ ತಸಲ್ಯಾ ಸಮುದಾಯಾಚ್ಯಾ ಸಂಗಟನಾಂನಿ ಅಸ್ತಾನಾ ಹಾಂವೆ ತೋ ಅನ್ಭೊಗ್ ಜೊಡ್ಲಾ. ದೆಕುನ್ ಆಮ್ಚ್ಯಾ ಕೊಂಕ್ಣಿ ಭಾಶೆಕ್ ಸಂಬಂದಿತ್ ಕಸಲ್ಯಾಯ್ ಕಾರ್ಯಾಕ್ ಹಿ ಸುವಾತ್ ಆನಿ ಸವ್ಲತ್ಯೊ ಬ್ಯಾಂಕಾಥಾವ್ನ್ ದಿತಾಂವ್. ಬರಯ್ಣಾರಾಂನಿ ಹಾಂಗಾಸರ್ ಲ್ಹಾನ್ – ವ್ಹಡ್ ಕಾರ್ಯಿಂ ಕೆಲ್ಯಾರ್ ಆಮ್ಕಾಂ ಸಂತೊಸ್. ಕೊಂಕ್ಣಿ ಭಾಶೆಕ್ ಆನಿ ಸಂಸ್ಕೃತೆಕ್ ಆಮ್ಚೊ ಸದಾಂಚ್ ಪಾಟಿಂಬೊ ಆಸಾ” ಮ್ಹಣ್ ಮಾನೆಸ್ತ್ ಅನಿಲ್ ಲೋಬೊನ್ ಹ್ಯಾ ಸಂದರ್ಭಿಂ ಮ್ಹಳೆಂ.

ಆವಯ್ ಶ್ರೀಮತಿ ಮೇರಿ ಸಿಕ್ವೇರಾ, ಪತಿಣ್ ಶ್ರೀಮತಿ ಸಿಂತಿಯಾ ಲೋಬೊ – ಹಾಂಕಾ ಬರಯ್ಣಾರ್ ರೋಶುನ್ ನವ್ಯಾ ಬುಕಾಚ್ಯೊ ಪಯ್ಲ್ಯೊ ಪ್ರತಿಯೊ ದಿಲ್ಯೊ ಆನಿ ಬುಕಾಚಿಂ ಪಾನಾಂ ಸಜಯಿಲ್ಲ್ಯಾ ಕಲಾಕಾರ್ ಮಾನೆಸ್ತ್ ಎಡ್ಡಿ ಸಿಕೇರ್ ಹಾಂಕಾ ಮಾನಾಚಿ ಪ್ರತಿ ಪಾಟಯ್ಲಿ.

ಕೊಂಕ್ಣಿ ಲೇಕಕಾಂ ತರ್ಫೆನ್ ಕೊಂಕ್ಣಿ ಲೇಕಕ್ ಸಂಘಟನ್(ನೊ) ಹಾಚೊ ಸಂಚಾಲಕ್ ಮಾನೆಸ್ತ್ ರಿಚರ್ಡ್ ಮೊರಾಸ್ ಹಾಂಕಾ, ಮಾಲ್ಘಡ್ಯಾ ಲೇಕಕಾಂ ತರ್ಫೆನ್ ಮಾಲ್ಘಡೊ ಬರಯ್ಣಾರ್ ಮಾನೆಸ್ತ್ ಎಮ್. ಪ್ಯಾಟ್ರಿಕ್ ಹಾಂಕಾಂ, ಕೊಂಕಣಿ ಸಂಗಟನಾಂ ತರ್ಫೆನ್ ಅಕಿಲ್ ಭಾರತ್ ಕೊಂಕಣಿ ಪರಿಶದ್ (ನೊ) ಹಾಚೊ ಜೆರಾಲ್ ಕಾರ್ಯದರ್ಶಿ ಮಾನೆಸ್ತ್ ಗೌರೀಶ್ ವೆರ್ಣೇಕರ್, ಗೊಂಯ್ ಹಾಂಕಾಂ, ಆಪ್ಲಿ ಮಾಂಯ್ ಫಿರ್ಗಜ್ ಬಜ್ಪೆ ತರ್ಫೆನ್, ಫಿರ್ಗಜ್ ಪತ್ರ್ ಆಮ್ಚೆಂ ಶೆತ್ ಹಾಚೊ ಸಂಪಾದಕ್ ಮಾನೆಸ್ತ್ ಎವ್ಜಿನ್ ಲೋಬೊ ಹಾಂಕಾಂ ಆನಿ ಎಂಸಿಸಿ ಬ್ಯಾಂಕಾತರ್ಫೆನ್ ಬ್ಯಾಂಕಾಚೊ ಜನರಲ್ ಮ್ಯಾನೇಜರ್ ಮಾನೆಸ್ತ್ ಸುನಿಲ್ ಮಿನೇಜಸ್ ಹಾಂಕಾ  – ಬರಯ್ಣಾರ್ ರೋಶು, ಬಜ್ಪೆ ಹಾಣೆ ಗುಲೊಬಾಸವೆಂ ಮಾನಾಚ್ಯೊ ಪ್ರತಿಯೊ ದಿಲ್ಯೊ.

ಸಾಂಗಾತಾ ಕೊಂಕ್ಣಿ ಪತ್ರಾಂಚೆಂ ಸಂಪಾದಕ್ ಮಾ| ಬಾ| ಜೊ.ಸಿ. ಸಿದ್ದಕಟ್ಟೆ (ನಮಾನ್ ಬಾಳೊಕ್ ಜೆಜು) ಮಾನೆಸ್ತ್ ನವೀನ್, ಕುಲ್ಶೇಕರ್ (ದಿವೊ) ಮಾನೆಸ್ತ್ ವಿಲ್ಫ್ರ‍ೆಡ್ ಲೋಬೊ, ಪಡೀಲ್ ( ಆಮ್ಚೊ ಸಂದೇಶ್) ಮಾನೆಸ್ತ್ ವಿಲ್ಸನ್, ಕಟೀಲ್ (ಆರ್ಸೊ) ಹಾಂಕಾ ಬುಕಾಚ್ಯೊ ಗವ್ರವ್ ಪ್ರತಿಯೊ ದಿಲ್ಯೊ.

ಕಿಟಾಳ್ ಪ್ರಕಾಶನಾಚ್ಯಾ ಎಚ್ಚೆಮ್, ಪೆರ್ನಾಲಾನ್ ಸೂತ್ರಾಂ ಸಂಚಾಲನ್ ಕರುನ್, ದಿನ್ವಾಸ್ ಪಾಟಯ್ಲೆ. ಬರಯ್ಣಾರ್ ರೋಶು, ಬಜ್ಪೆ ಹಾಣೆ ಸಯ್ರ್ಯಾಂಕ್ ಆನಿ ಸಭಿಕಾಂಕ್ ಯೆವ್ಕಾರ್ ಮಾಗ್ಲೊ.

ಪೇಯಿಂಗ್ ಗೆಸ್ಟ್ ಆನಿ ಹೆರ್ ಕಥಾ ಪುಸ್ತಕ್, ರೋಶುಚೆಂ ಸವೆಂ ಪುಸ್ತಕ್ ಆಸುನ್, ಮಟ್ವ್ಯಾ ಕಾಣಿಯಾಂಚೆಂ ಪಯ್ಲೆಂ ಪುಸ್ತಕ್ ಜಾವ್ನಾಸಾ. ಹೆಂ ಪುಸ್ತಕ್ ಮಂಗ್ಳುರ್ಚ್ಯಾ  ಕಿಟಾಳ್ ಪ್ರಕಾಶಕಾನ್ ಉಜ್ವಾಡಾಕ್ ಹಾಡ್ಲಾಂ. ಮಾಲ್ಘಡೊ ಕಲಾಕಾರ್/ ವಿನ್ಯಾಸಕ್ ಮಾನೆಸ್ತ್ ಎಡಿ ಸಿಕೇರ್ ಹಾಣಿ ಹೊ ಪುಸ್ತಕ್ ವಿನ್ಯಾಸ್ ಕೆಲಾ, ಮಾನೆಸ್ತ್ ಜೋಕಿಮ್ ಪಿಂಟೊ, ವಾಮಂಜೂರ್ ಹಾಣಿ ಮುಕ್‌ಪಾನ್ ಪಿಂತ್ರಾಯ್ಲಾಂ. ಪುಸ್ತಕಾಚೆಂ ಮೋಲ್ ರುಪಯ್ 150/- ಆಸುನ್, ಬುಕಾಚ್ಯೊ ಪ್ರತಿಯೊ ಪೋಸ್ಟಾರ್ ಧಾಡ್ಚಿ ವೆವಸ್ತಾ ಆಸಾ.

ಪ್ರತಿಯಾಂ ಖಾತಿರ್ ಬರಯ್ಣಾರ್ ರೋಶು, ಬಜ್ಪೆ ಹಾಕಾ  9880 119 515 ನಂಬ್ರಾಚೆರ್ ಉಲೊ ವಾ ವಾಟ್ಸಪ್ ಕರ್ಯೆತ್. ವಾ roshums@rediffmail.com ಹಾಂಗಾಸರ್ ಇ ಮೆಯ್ಲ್ ಬರವ್ಯೆತ್.

ತಸ್ವಿರ‍್ಯೊ / ವರ್ದಿ : ಅಲ್ಪೋನ್ಸ್ ಮೆಂಡೋನ್ಸಾ, ಪಾಂಗ್ಳಾ